စံၣ်ညီၣ်ကွီၢ်
၁၈ ဖဲန့ၣ်အဆၢကတီၢ် လၢကီၢ်အံၣ်စရ့လးအပူၤန့ၣ် စီၤပၤတအိၣ် နီတဂၤဘၣ်.+ ဒီးဖဲန့ၣ်အဆၢကတီၢ် မ့ၢ်လၢ ဒၣ်အဒူၣ်+ တမၤန့ၢ် အတၢ်န့ၢ်သါ ခဲလၢာ်ခဲဆ့လၢ အံၣ်စရ့လးအဒူၣ်တဖၣ် အကျါဒံးဘၣ် အဃိ အဝဲသ့ၣ်ဟးဃု တၢ်လီၢ်လၢ ကအိၣ်ဝဲ အဂီၢ်လီၤ.+
၂ ဒီးပှၤဒၣ်ဖိ ဆှၢလီၤဝဲ ပှၤပိာ်ခွါ လၢအဒူၣ်ဖိထၢဖိအကျါ ယဲၢ်ဂၤလီၤ. အဝဲသ့ၣ် မ့ၢ်ပှၤလၢ အမၤတၢ်သ့ဂ့ၤဂ့ၤ လၢအဟဲလၢ ဝ့ၢ်စိးရၤ ဒီးဝ့ၢ်အ့ၤၡတိလးလီၤ.+ ဒီးပှၤဒၣ်ဖိ ဆှၢလီၤ အဝဲသ့ၣ်ဒ်သိး အဝဲသ့ၣ် ကလဲၤကွၢ်ဟုၣ် တၢ်လီၢ်တၢ်ကျဲ ဒီးကဃုသ့ၣ်ညါ ဟီၣ်ကဝီၤအဂ့ၢ်လီၤ. ပှၤဒၣ်ဖိ တဲအဝဲသ့ၣ်လၢ “လဲၤဃုသ့ၣ်ညါ တၢ်လီၢ်တၢ်ကျဲတက့ၢ်.” ဖဲအဝဲသ့ၣ် လဲၤတုၤလၢ စီၤမံၤကါအဟံၣ်+ လၢအအိၣ်လၢ အ့ဖရဲၣ် အကစၢၢ်ကလိကျါအခါ အဝဲသ့ၣ် မံဝဲဖဲန့ၣ် တနၤလီၤ. ၃ ဖဲအဝဲသ့ၣ် အိၣ်ဘူးဒီးစီၤမံၤကါ အဟံၣ်အခါ အဝဲသ့ၣ်မၤနီၣ်ဝဲ ပှၤလ့ၤဝံဖိ သးစၢ်တဂၤန့ၣ် အကလုၢ်ဘၣ်လီၤ. အဃိ အဝဲသ့ၣ် လဲၤလၢ ပှၤလ့ၤဝံဖိ တဂၤန့ၣ်အအိၣ် ဒီးသံကွၢ်ဝဲလၢ “မတဂၤ ဟဲကိးနၤ ဖဲအံၤလဲၣ်. နဟဲမၤ မနုၤဖဲအံၤလဲၣ်. ဘၣ်မနုၤအဃိ နအိၣ်ဖဲအံၤလဲၣ်.” ၄ အဝဲတဲဆၢဝဲလၢ “စီၤမံၤကါ မၤန့ၢ်ယၤ ဒ်အံၤဒ်နုၤ ဒီးအဝဲငါယၤလၢ ယကကဲထီၣ် အပှၤလုၢ်တၢ်ဒိၣ်လီၤ.”+ ၅ ဝံၤဒီး အဝဲသ့ၣ် တဲအီၤလၢ “ပတၢ်လဲၤတၢ်က့ၤအံၤ မ့ၢ်အကကဲထီၣ်လိၣ်ထီၣ်ဧါန့ၣ် ဝံသးစူၤ သံကွၢ်န့ၢ်ပှၤ ကစၢ်ယွၤမီၤ.” ၆ ဒီးပှၤလုၢ်တၢ်ဒိၣ်န့ၣ် တဲအဝဲသ့ၣ်လၢ “လဲၤမုာ်မုာ်ဟီ. ယဟိဝၤယွၤ ကအိၣ်ဒီးသု လၢသုတၢ်လဲၤတၢ်က့ၤအံၤလီၤ.”
၇ အဃိ ပှၤယဲၢ်ဂၤန့ၣ်ဟးထီၣ် ဒီးဆဲးလဲၤဝဲတုၤလၢ ဝ့ၢ်လ့ၡ့ၣ်လီၤ.+ ဒီးအဝဲသ့ၣ်ထံၣ်ဝဲလၢ ဒ်ပှၤစံဒိၣ်ဖိတဖၣ် အသိး ပှၤအိၣ်ဖဲန့ၣ်တဖၣ်စ့ၢ်ကီး တသန့ၤအသးလၢ ပှၤဂၤအအိၣ်ဘၣ်. ဒီးပှၤအိၣ်ဖဲန့ၣ်တဖၣ်န့ၣ် မ့ၢ်ပှၤလၢ အအိၣ်ဘၣ် မုာ်မုာ်ခုၣ်ခုၣ် ဒီးတအိၣ်ဒီး တၢ်ပလီၢ်သူၣ်ပလီၢ်သးဘၣ်.+ ဒီးပှၤလၢ အဟဲနုာ်လီၤလၢကီၢ်ပူၤ လၢကဆီၣ်တံၢ်မၤနၢၤ အဝဲသ့ၣ်န့ၣ် တအိၣ်နီတဂၤဘၣ်. အဝဲသ့ၣ်အိၣ်ယံၤဒီး ပှၤစံဒိၣ်ဖိတဖၣ် ဒီးတမၤဘၣ်ဃးအသးဒီး ပှၤဂၤဘၣ်.
၈ ဖဲအဝဲသ့ၣ် က့ၤကဒါက့ၤလၢ ဝ့ၢ်စိးရၤ ဒီးဝ့ၢ်အ့ၤၡတိလး+ လၢအဒီပုၢ်ဝဲၢ်တဖၣ် အအိၣ်အခါ အဒီပုၢ်ဝဲၢ်တဖၣ် တဲဝဲလၢ “သုတၢ်လဲၤတၢ်က့ၤ မၤသးဒ်လဲၣ်.” ၉ အဝဲသ့ၣ် တဲဝဲလၢ “ပထံၣ်ဘၣ်လၢ တၢ်လီၢ်တၢ်ကျဲန့ၣ် ဂ့ၤဒိၣ်မးအဃိ ပကဘၣ်လဲၤထီၣ် မၤန့ၢ်အီၤသၢၤ. ဒ်သိး သုကလဲၤ မၤန့ၢ်တၢ်လီၢ်တၢ်ကျဲ အဂီၢ် တဘၣ် မၤယံာ်မၤနီၢ် သုသးတဂ့ၤ. မၤမ့ၢ်ချ့သၢၤ. ၁၀ ဖဲသုလဲၤတုၤအခါ သုကထံၣ်ဘၣ် ပှၤလၢတအိၣ်ဒီး တၢ်ပလီၢ်သူၣ် ပလီၢ်သးဘၣ်တဖၣ်လီၤ.+ ဒီးသုကထံၣ်ဘၣ် စ့ၢ်ကီး တၢ်လီၢ်ဖးလဲၢ်တတီၤလီၤ. တၢ်လီၢ်အဝဲန့ၣ် တၢ်အိၣ်ကိးမံၤဒဲးလီၤ. ဒီးကစၢ်ယွၤ ဟ့ၣ်လီၤအီၤလၢ သုစုပူၤလံ.”+
၁၁ ဒီးပှၤပိာ်ခွါ အဂၤ ၆၀၀ လၢအစိာ်ဒီး တၢ်စုကဝဲၤ လၢဒၣ်အဒူၣ်ဖိထၢဖိ အကျါန့ၣ် ဟးထီၣ်ဝဲလၢ ဝ့ၢ်စိးရၤ ဒီးဝ့ၢ်အ့ၤၡတိလးလီၤ.+ ၁၂ အဝဲသ့ၣ် လဲၤဆီလီၤအသးလၢ ဝ့ၢ်ကံးရယးယဧၤရံၣ်+ လၢယူဒၤအဟီၣ်ကဝီၤအပူၤလီၤ. အဃိ တၢ်လီၢ်အံၤလၢ အအိၣ်လၢ ဝ့ၢ်ကံးရယးယဧၤရံၣ် အမုၢ်နုာ် တခီန့ၣ် ပှၤကိးအီၤလၢ မၤဃန့ၤဒၣ်*+ တုၤလၢ မုၢ်မဆါတနံၤအံၤလီၤ. ၁၃ ဒီးအဝဲသ့ၣ် လဲၤလၢ အ့ဖရဲၣ် အကစၢၢ်ကလိကျါ ဒီးလဲၤတုၤလၢ စီၤမံၤကါ အဟံၣ်လီၤ.+
၁၄ ဒီးပှၤယဲၢ်ဂၤလၢ အလဲၤကွၢ်ဟုၣ် ဝ့ၢ်လ့ၡ့ၣ်+ အဟီၣ်ကဝီၤန့ၣ် တဲဘၣ်ပှၤဒၣ်ဖိ အဂၤတဖၣ်လၢ “အ့ဖိးတဘ့ၣ်, တရၤဖးတၢ်ဂီၤတၢ်ဖှီၣ်တဖၣ်, တၢ်ဂီၤစိးပျၤတခါ ဒီးတၢ်ဂီၤတၢ်ဖှီၣ်ထးတခါ အိၣ်ဝဲလၢ ဟံၣ်တဖၣ်အံၤအပူၤန့ၣ် မ့ၢ်သုသ့ၣ်ညါ စ့ၢ်ကီးဧါ.+ အဃိ သုကဘၣ်မၤဒ်လဲၣ်န့ၣ် ဆိကမိၣ်ထံသၢၤ.” ၁၅ အဃိ အဝဲသ့ၣ် အိၣ်ပတုာ်ဝဲဖဲန့ၣ် ဒီးလဲၤတုၤဝဲလၢ စီၤမံၤကါ အဟံၣ် ဖဲပှၤလ့ၤဝံဖိ သးစၢ်တဂၤ+ အိၣ်ဝဲန့ၣ် ဒီးသံကွၢ်အီၤလၢ မ့ၢ်အအိၣ်ဆူၣ်အိၣ်ချ့ဧါ န့ၣ်လီၤ. ၁၆ ဖဲန့ၣ်အဆၢကတီၢ် ပှၤဒၣ်ဖိ+ အဂၤ ၆၀၀ လၢအစိာ်ဒီး တၢ်စုကဝဲၤန့ၣ် ဆၢထၢၣ်လၢ တြဲၤခိၣ်ထိးလီၤ. ၁၇ ဒီးပှၤပိာ်ခွါ ယဲၢ်ဂၤလၢ အလဲၤကွၢ်ဟုၣ်တၢ်လီၢ်တၢ်ကျဲ+ လၢညါန့ၣ် လဲၤနုာ်လၢ စီၤမံၤကါ အဟံၣ်ပူၤ ဒ်သိးကဟံးန့ၢ်ဝဲ တၢ်ဂီၤစိးပျၤတခါ, အ့ဖိးတဘ့ၣ်,+ တရၤဖး တၢ်ဂီၤတၢ်ဖှီၣ်တဖၣ်+ ဒီးတၢ်ဂီၤတၢ်ဖှီၣ်ထး တခါလီၤ.+ (ပှၤလုၢ်တၢ်ဒိၣ်တဂၤန့ၣ်+ ဆၢထၢၣ်ဒီး ပှၤပိာ်ခွါ အဂၤ ၆၀၀ လၢအစိာ်ဒီး တၢ်စုကဝဲၤ လၢတြဲၤခိၣ်ထိး န့ၣ်လီၤ.) ၁၈ အဝဲသ့ၣ် လဲၤနုာ်လၢ စီၤမံၤကါ အဟံၣ်ပူၤ ဒီးဟံးန့ၢ်ဝဲ တၢ်ဂီၤစိးပျၤတခါ, အ့ဖိးတဘ့ၣ်, တရၤဖး တၢ်ဂီၤတၢ်ဖှီၣ်တဖၣ် ဒီးတၢ်ဂီၤတၢ်ဖှီၣ်ထး တခါလီၤ. ဒီးပှၤလုၢ်တၢ်ဒိၣ်တဂၤန့ၣ် တဲအဝဲသ့ၣ်လၢ “သုမၤမနုၤလဲၣ်.” ၁၉ ဘၣ်ဆၣ် အဝဲသ့ၣ် တဲအီၤလၢ “အိၣ်ဘှ့ၣ်, တဲတၢ်လၢၤတဂ့ၤ. လဲၤပိာ်ပခံမီၤ. နကကဲထီၣ် ပၢ်တဂၤ* ဒီးပှၤလုၢ်တၢ်ဒိၣ် လၢပဂီၢ်. နကဲ ပှၤလုၢ်တၢ်ဒိၣ်လၢ ပှၤထဲတဂၤ အဟံၣ်ဖိဃီဖိအဂီၢ်+ မ့တမ့ၢ် လၢပှၤအံၣ်စရ့လးဖိ အဒူၣ်တဒူၣ်အဂီၢ် ဒီးဒူၣ်ဖိထၢဖိ ဒီတဒူၣ်အဂီၢ်န့ၣ် ကဂ့ၤဒိၣ် ဖဲလဲၣ်တခါလဲၣ်.”+ ၂၀ အဃိ ပှၤလုၢ်တၢ်ဒိၣ်န့ၣ် သးမံဝဲ ဒီးအဝဲဟံးန့ၢ် အ့ဖိးတဘ့ၣ်, တရၤဖး တၢ်ဂီၤတၢ်ဖှီၣ်တဖၣ်, တၢ်ဂီၤတၢ်ဖှီၣ်စိးပျၤတခါ+ ဒီးလဲၤပိာ် အဝဲသ့ၣ်အခံလီၤ.
၂၁ အဃိ အဝဲသ့ၣ် ဃၣ်ကဒါက့ၤအသး ဒ်သိးကဆဲးလဲၤတၢ်အဂီၢ် ဒီးအဝဲသ့ၣ်ပာ် ဖိဒံဖိသၣ်, ဆၣ်ဖိကီၢ်ဖိတဖၣ် ဒီးတၢ်ဖိတၢ်လံၤလၢ အလုၢ်ဒိၣ်ပှ့ၤဒိၣ်တဖၣ် လၢတၢ်မဲာ်ညါလီၤ. ၂၂ ဖဲအဝဲသ့ၣ်လဲၤတၢ် ယံၤထီၣ်ဒီး စီၤမံၤကါ အဟံၣ်အခါ ပှၤလၢအအိၣ်လၢ စီၤမံၤကါ အဟံၣ်ခိၣ်ဟံၣ်ဃၢၤတဖၣ် ပာ်ဖှိၣ်ထီၣ်အသး ဒီးလဲၤလူၤ ပှၤဒၣ်ဖိတဖၣ်ချုးဝဲလီၤ. ၂၃ ဖဲအဝဲသ့ၣ် ကိးဃါ ပှၤဒၣ်ဖိတဖၣ် အခါ ပှၤဒၣ်ဖိတဖၣ် ဃၣ်ကဒါအသးလၢ အဝဲသ့ၣ်အအိၣ် ဒီးသံကွၢ် စီၤမံၤကါလၢ “ဘၣ်လဲၣ်, သုပာ်ဖှိၣ်ထီၣ်သုသးန့ၣ် မ့ၢ်သုဘၣ်မနုၤလဲၣ်.” ၂၄ ဒီးစီၤမံၤကါ တဲဝဲလၢ “သုဟံးန့ၢ်ကွံာ် ယွၤအဂီၤတဖၣ်လၢ ယတ့ထီၣ် ဒီးသုက့ၤကိး စ့ၢ်ကီး ပှၤလုၢ်တၢ်ဒိၣ်လံ. တၢ်တအိၣ်ဒီးယၤ နီတမံၤလၢၤဘၣ်. အဃိ သုသံကွၢ်ယၤလၢ ‘မ့ၢ်သုဘၣ် မနုၤလဲၣ်’ န့ၣ်ကသ့ဒ်လဲၣ်.” ၂၅ ဒီးပှၤဒၣ်ဖိ တဲဆၢဝဲလၢ “ကိးဃါပှၤဒ်န့ၣ် တဂ့ၤသၢၤ. ပှၤလၢအသးချ့တဖၣ် ကဟဲမၤဒၢၣ်မၤဆါ ဘၣ်ဖုးသု ဒီးဖဲန့ၣ် နၤဒီး နဟံၣ်ဖိဃီဖိ အသးသမူ ကဟးဂီၤကွံာ်လီၤ.” ၂၆ အဃိ ပှၤဒၣ်ဖိ ဆဲးလဲၤတၢ်လီၤ. မ့ၢ်လၢ စီၤမံၤကါ ထံၣ်ဘၣ်ဝဲလၢ ပှၤသ့ၣ်တဖၣ်န့ၣ် အဂံၢ်အဘါဆူၣ်န့ၢ်ဒံးအီၤ အဃိ အဃၣ်ကဒါက့ၤအသး ဒီးက့ၤဝဲလၢ အဟံၣ်လီၤ.
၂၇ ဒီးဖဲအဝဲသ့ၣ် ဟံးန့ၢ်ဝဲ တၢ်လၢ စီၤမံၤကါတ့ဝဲ ဒီးက့ၤကိးဝဲ စီၤမံၤကါ အပှၤလုၢ်တၢ်ဒိၣ် ဝံၤအလီၢ်ခံ အဝဲသ့ၣ် လဲၤဝဲလၢ ဝ့ၢ်လ့ၡ့ၣ်+ လၢပှၤလၢ အအိၣ်ဘၣ် မုာ်မုာ်ခုၣ်ခုၣ် ဒီးတအိၣ်ဒီး တၢ်ပလီၢ်သူၣ် ပလီၢ်သးဘၣ်တဖၣ် အအိၣ်လီၤ.+ ဒီးအဝဲသ့ၣ် ကျီသံကွံာ် ပှၤတဖၣ်န့ၣ် ဒီးဒွဲၣ်ထီၣ်ကွံာ်ဝဲ အဝ့ၢ် လၢမ့ၣ်အူလီၤ. ၂၈ ဒီးမ့ၢ်လၢ ပှၤတဖၣ်န့ၣ် အိၣ်ဖးယံၤဒီး ဝ့ၢ်စံဒိၣ် ဒီးအဝဲသ့ၣ် တမၤဘၣ်ဃးအသး ဒီးပှၤနီတဂၤဘၣ် ဒီးဝ့ၢ်လ့ၡ့ၣ်န့ၣ် အိၣ်လၢ တၢ်ပၢၤခိၣ် လၢအအိၣ်လၢ ဘ့ၤသရဃိာ်+ အဃိ ပှၤလၢအကမၤပူၤဖျဲး အဝဲသ့ၣ်န့ၣ် တအိၣ်နီတဂၤဘၣ်. ဝံၤဒီး ပှၤဒၣ်ဖိတဖၣ် တ့ထီၣ်ကဒါက့ၤဝ့ၢ် ဒီးအဝဲသ့ၣ် အိၣ်ဝဲဖဲန့ၣ်လီၤ. ၂၉ တကးဒံးဘၣ် အဝဲသ့ၣ် ကိးန့ၢ်ဝဲ ဝ့ၢ်အမံၤလၢ ဝ့ၢ်ဒၣ်+ ဒ်အပၢ်စီၤဒၣ် အမံၤအိၣ်ဝဲအသိးန့ၣ်လီၤ. စီၤဒၣ်န့ၣ်မ့ၢ်ဝဲ စီၤအံၣ်စရ့လး အဖိခွါလီၤ.+ ဘၣ်ဆၣ် လၢညါန့ၣ် ပှၤကိးဝ့ၢ်တဖျၢၣ်အံၤလၢ ဝ့ၢ်လ့ၡ့ၣ်လီၤ.+ ၃၀ ဒီးပှၤဒၣ်ဖိတဖၣ် ဆီလီၤတၢ်ဂီၤစိးပျၤ+ တခါလၢ အနီၢ်ကစၢ်အဂီၢ် ဒီးစီၤယိနၤသၣ် ဒီးအဖိအလံၤတဖၣ် ကဲပှၤလုၢ်တၢ်ဒိၣ်တဖၣ်လၢ ပှၤဒၣ်ဖိတဖၣ်အဂီၢ် တုၤလၢ ပှၤလၢအအိၣ်ဝဲဆိးဝဲ လၢကီၢ်ပူၤ ဘၣ်တၢ်က့ၤဖီၣ်အီၤ အဆၢကတီၢ်န့ၣ်လီၤ. စီၤယိနၤသၣ်+ အပၢ်မ့ၢ်ဝဲ စီၤက့းရၡိၣ်+ ဒီးစီၤက့းရၡိၣ် အပၢ်မ့ၢ်ဝဲ စီၤမိၤၡ့လီၤ. ၃၁ ဒီးအဝဲသ့ၣ် ဆီလီၤစီၤမံၤကါ အတၢ်ဂီၤစိးပျၤတခါလီၤ. ဖဲယွၤအမ့ၢ်အတီတဂၤ အဟံၣ်* အိၣ်ဝဲလၢ ဝ့ၢ်ၡံလိၣ်အပူၤ ဒီတကတီၢ်န့ၣ်+ တၢ်ဂီၤစိးပျၤတခါအံၤ အိၣ်ဝဲဖဲ ဝ့ၢ်ဒၣ်လီၤ.