၂ စီၤပၤ
၁၇ ဖဲယူဒၤ အစီၤပၤအၤဃး ပၢတၢ် ၁၂ နံၣ်တနံၣ်န့ၣ် စီၤအ့လၤအဖိခွါ စီၤဟိၤၡ့+ ကဲထီၣ်စီၤပၤလၢ အံၣ်စရ့လးအဖီခိၣ် လၢဝ့ၢ်ၡၤမရံ အပူၤလီၤ. ဒီးအဝဲပၢဘၣ်တၢ် ခွံနံၣ်လီၤ. ၂ အဝဲဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢ ဘၣ်ဆၣ် တမၤတၢ်အၢ ထဲသိးဒီး အံၣ်စရ့လး အစီၤပၤတဖၣ် လၢအအိၣ်မူတ့ၢ်ဝဲလၢ အမဲာ်ညါဘၣ်. ၃ ကီၢ်အၤၡူၢ် အစီၤပၤၡၤလမၤန့စ့ၢ် ဟဲထီၣ်ဒုးဝဲ+ စီၤဟိၤၡ့အဃိ စီၤဟိၤၡ့ ကဲထီၣ် စီၤပၤၡၤလမၤန့စ့ၢ် အခ့အပှၤ ဒီးဘၣ်ဟ့ၣ်အီၤ တၢ်ခိတၢ်သွဲလီၤ.+ ၄ ဘၣ်ဆၣ် လၢခံန့ၣ် စီၤဟိၤၡ့ ဆှၢလီၤ ပှၤစိာ်တၢ်ကစီၣ်ဖိတဖၣ်လၢ ကီၢ်အဲၤကူပတူး အစီၤပၤစိ အအိၣ်+ ဒီးစီၤဟိၤၡ့ တဆှၢထီၣ် တၢ်ခိတၢ်သွဲလၢ ကီၢ်အၤၡူၢ် အစီၤပၤအအိၣ် ဒ်နံၣ်လၢ အပူၤကွံာ်တဖၣ် အသိးလၢၤဘၣ် အဃိ ကီၢ်အၤၡူၢ်အစီၤပၤ သ့ၣ်ညါဘၣ်ဝဲလၢ စီၤဟိၤၡ့ ကူၣ်ထီၣ်တၢ်အၢလံ. လၢတၢ်န့ၣ်အဃိ ကီၢ်အၤၡူၢ် အစီၤပၤ ပာ်စီၤဟိၤၡ့ လၢဃိာ်ပူၤ ဒီးစၢဃာ်အီၤ ဖဲန့ၣ်လီၤ.
၅ ကီၢ်အၤၡူၢ် အစီၤပၤ ဟဲနုာ်လီၤဒုးဝဲ ကီၢ်ဒီတကီၢ်ညါ ဒီးဟဲကဝီၤဃာ်ဝဲ ဝ့ၢ်ၡၤမရံ သၢနံၣ်လီၤ. ၆ ဖဲစီၤဟိၤၡ့ ပၢတၢ်ခွံနံၣ်တနံၣ်န့ၣ် ကီၢ်အၤၡူၢ် အစီၤပၤ မၤန့ၢ်ဝ့ၢ်ၡၤမရံလီၤ.+ ဒီးအဝဲက့ၤဖီၣ် ပှၤအံၣ်စရ့လးဖိ+ ဆူကီၢ်အၤၡူၢ် ဒီးဒုးအိၣ်အဝဲသ့ၣ်လၢ ဃၤလၤအတၢ်လီၢ်, လၢဝ့ၢ်ဃၤဘိၢ်အပူၤ ဘူးဒီးထံကျိကိစၣ်+ ဒီးလၢပှၤမၤဒဲဖိ အဝ့ၢ်တဖၣ် အပူၤလီၤ.+
၇ တၢ်ကဲထီၣ်အသးဒ်အံၤ မ့ၢ်လၢ ပှၤအံၣ်စရ့လးဖိ မၤကမၣ် အဝဲသ့ၣ်အကစၢ် ယဟိဝၤယွၤ လၢအဒုးဟးထီၣ်အဝဲသ့ၣ် လၢကီၢ်အဲၤကူပတူးအပူၤ လၢစီၤပၤဖၤရိၤ အတၢ်ပၢဖီလာ်န့ၣ်လီၤ.+ ဒီးပှၤအံၣ်စရ့လးဖိ ဘူၣ်ထီၣ်ဘါထီၣ်ဝဲ ယွၤလၢအဂၤတဖၣ်လီၤ.+ ၈ ဒီးအဝဲသ့ၣ် မၤပိာ်ထွဲဝဲ လုၢ်လၢ်လၢ ပှၤကလုာ်တဖၣ်လၢ ယဟိဝၤယွၤ နီဟးထီၣ်ကွံာ်လၢ အဝဲသ့ၣ် အမဲာ်ညါ မၤဝဲ ဒီးအဝဲသ့ၣ် မၤပိာ်ထွဲဝဲ လုၢ်လၢ်တဖၣ်လၢ အံၣ်စရ့လး အစီၤပၤတဖၣ် ဒုးအိၣ်ထီၣ်ဝဲန့ၣ်လီၤ.
၉ အဃိ ပှၤအံၣ်စရ့လးဖိ လူၤမၤတၢ်လၢ ယဟိဝၤယွၤ ထံၣ်ဝဲလၢ အကမၣ်တဖၣ်လီၤ. ဒီးလၢအဝဲသ့ၣ် အဝ့ၢ်ခဲလၢာ်အပူၤန့ၣ် အဝဲသ့ၣ် တ့ထီၣ် တၢ်လီၢ်ထီၣ်ထီတဖၣ် လၢတၢ်လီၢ် ကိးတီၤဒဲး+ စးထီၣ်လၢ တၢးထီခိးတၢ်အလီၢ် တုၤလၢ ဝ့ၢ်တဖၣ်လၢအအိၣ်ဒီး အဒူၣ်လၢအကျၢၤအပူၤလီၤ. ၁၀ အဝဲသ့ၣ် ဆဲးဆီလီၤဝဲ လၢၢ်ထူၣ်စီဆှံတဖၣ် ဒီးတၢ်စီဆှံအထူၣ်တဖၣ်*+ လၢအနီၢ်ကစၢ်အဂီၢ် လၢတၢ်လူၢ်လၢ အထီကိးဖျၢၣ်ဒဲးအလိၤ ဒီးလၢသ့ၣ်လါဟ့ လၢအပှဲၤဒီးအလၣ် ကိးထူၣ်ဒဲး အခီၣ်ထံး+ ၁၁ ဒီးအဝဲသ့ၣ် ဒွဲၣ်ခုၣ်ထီၣ်တၢ်လုၢ်လၢ တၢ်လီၢ်ထီၣ်ထီ ခဲလၢာ်အဖီခိၣ် ဒ်ပှၤကလုာ်တဖၣ်လၢ ယဟိဝၤယွၤ နီဟးထီၣ်ကွံာ်လၢ အဝဲသ့ၣ် အမဲာ်ညါ မၤဝဲအသိးလီၤ.+ အဝဲသ့ၣ် ဆဲးမၤတၢ်လၢ အအၢအသီဒိၣ်မးလၢ အမၤဆါ ယဟိဝၤယွၤအသးလီၤ.
၁၂ ဒီးတၢ်ဂီၤတၢ်ဖှီၣ် လၢအလီၤသးဘၣ်အၢတဖၣ်+ လၢယဟိဝၤယွၤ တဲပာ်စၢၤ အဝဲသ့ၣ်လၢ “သုတဘၣ် ဘူၣ်ထီၣ်ဘါထီၣ် တၢ်သ့ၣ်တဖၣ်န့ၣ်တဂ့ၤ”+ န့ၣ် အဝဲသ့ၣ် ဆဲးဘူၣ်ထီၣ်ဘါထီၣ်ဝဲလီၤ. ၁၃ ဒီးယဟိဝၤယွၤ ဆဲးဟ့ၣ်ပလီၢ် အံၣ်စရ့လး ဒီးယူဒၤအပှၤဂီၢ်မုၢ် ခီဖျိအဝံခဲလၢာ် ဒီးအပှၤထံၣ်တၢ်ထံၣ်လၢညါခီ ကိးဂၤဒဲး+ ဒီးတဲဝဲလၢ “ပာ်တ့ၢ်ကွံာ် သုတၢ်မၤလၢ အအၢအသီတဖၣ်တက့ၢ်.+ မၤထွဲ ယတၢ်မၤလိာ်တဖၣ် ဒီးယတၢ်ဘျၢတဖၣ် ဒ်တၢ်သိၣ်တၢ်သီ ခဲလၢာ်လၢ ယမၤလိာ်ပာ်စၢၤ သုမိၢ်ပၢ်ဖံဖု လၢပျၢၤတဖၣ် ဒီးယဆှၢန့ၢ်သု ခီဖျိ ယခ့ယပှၤလၢ အမ့ၢ်ဝံတဖၣ်တက့ၢ်.” ၁၄ ဘၣ်ဆၣ် အဝဲသ့ၣ်တဒိကနၣ်ဝဲဘၣ် ဒီးအဝဲသ့ၣ် အခိၣ်ကိၤ ဒ်အမိၢ်ပၢ်ဖံဖု လၢပျၢၤတဖၣ်လၢ အတပာ်ဖျါထီၣ်တၢ်နာ်လၢ အဝဲသ့ၣ် အကစၢ် ယဟိဝၤယွၤ အဖီခိၣ်ဘၣ် အသိးလီၤ.+ ၁၅ အဝဲသ့ၣ် ဆဲးဂ့ၢ်လိာ်ကွံာ်ဝဲ ကစၢ်ယွၤ အတၢ်ဘျၢတဖၣ် ဒီးအတၢ်အၢၣ်လီၤအီလီၤလၢ+ အမၤတ့ၢ်ဝဲဒီး အဝဲသ့ၣ် အမိၢ်ပၢ်ဖံဖု လၢပျၢၤတဖၣ် ဒီးအတၢ်ဒုးသ့ၣ်နီၣ်ထီၣ်တဖၣ် လၢအဟ့ၣ်ပလီၢ် အဝဲသ့ၣ်န့ၣ်လီၤ.+ ဒီးအဝဲသ့ၣ် ဆဲးဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်တဖၣ်လၢ အဘျုးတအိၣ်ဘၣ်+ ဒီးအဝဲသ့ၣ် အနီၢ်ကစၢ်ဒၣ်ဝဲ ကဲထီၣ် ပှၤလၢအဘျုးတအိၣ်ဘၣ်+ လၢအကွၢ်လိမၤဒိး ပှၤကလုာ်ခဲလၢာ်လၢ အအိၣ်ဝးတရံး အဝဲသ့ၣ် လၢယဟိဝၤယွၤ တဲပာ်စၢၤဝဲလၢ တဘၣ်ကွၢ်လိမၤဒိးအဝဲသ့ၣ် တဂ့ၤန့ၣ်လီၤ.+
၁၆ အဝဲသ့ၣ် ပာ်တ့ၢ်ကွံာ် အကစၢ် ယဟိဝၤယွၤ အတၢ်မၤလိာ်တဖၣ် တလီၢ်လီၢ်, တ့ထီၣ်ဝဲ ကျီၢ်ဖိထးခံဒု,+ တၢ်စီဆှံအထူၣ်+ ဒီးအဝဲသ့ၣ် ဘါထီၣ်ဝဲ မူခိၣ်အသုးမုၢ်ခဲလၢာ်*+ ဒီးဘူၣ်ထီၣ်ဘါထီၣ်ဝဲ ဘဧၤလးလီၤ.+ ၁၇ ဒီးအဝဲသ့ၣ် လုၢ်ထီၣ်စ့ၢ်ကီး အဖိမုၣ်ဖိခွါတဖၣ်လၢ မ့ၣ်အူပူၤ,+ အဝဲသ့ၣ်မၤ တၢ်ဝံတၢ်နါတဖၣ် အတၢ်ဖံးတၢ်မၤ,+ ကၢ်တၢ်ဒွးတၢ် ဒီးအဝဲသ့ၣ် မၤဆါကစၢ်ယွၤအသး ခီဖျိအဝဲသ့ၣ် ဆဲးမၤဝဲ တၢ်လၢယဟိဝၤယွၤ ထံၣ်ဝဲလၢအအၢန့ၣ်လီၤ.
၁၈ အဃိ ယဟိဝၤယွၤ သးဒိၣ်ထီၣ် ပှၤအံၣ်စရ့လးဖိ ဒိၣ်မး ဒီးကစၢ်ယွၤ နီဟးထီၣ်ကွံာ် အဝဲသ့ၣ်လၢ အမဲာ်ညါလီၤ.+ ကစၢ်ယွၤ တပာ်တ့ၢ်အဝဲသ့ၣ်လၢ ကီၢ်ပူၤနီတဒူၣ်ဘၣ်, ပာ်တ့ၢ်ထဲ ယူဒၤအဒူၣ် တဒူၣ်လီၤ.
၁၉ ဒီးယူဒၤအဒူၣ် ဒၣ်လဲာ် တမၤထွဲ အဝဲသ့ၣ် အကစၢ် ယဟိဝၤယွၤ အတၢ်မၤလိာ်တဖၣ်ဘၣ်.+ အဝဲသ့ၣ်စ့ၢ်ကီး မၤပိာ်ထွဲဝဲ လုၢ်လၢ်တဖၣ်လၢ အံၣ်စရ့လးအပှၤဂီၢ်မုၢ် မၤပိာ်ထွဲဝဲန့ၣ်လီၤ.+ ၂၀ အဃိ ယဟိဝၤယွၤ ပာ်တ့ၢ်ကွံာ် အံၣ်စရ့လး အစၢၤအသွဲၣ်ခဲလၢာ်, မၤမဲာ်ဆှးအဝဲသ့ၣ် ဒီးဟ့ၣ်လီၤကွံာ် အဝဲသ့ၣ်လၢ ပှၤတမျာ်တၢ်တဖၣ် အစုပူၤ တုၤလၢ အဝဲနီဟးထီၣ်ကွံာ် အဝဲသ့ၣ်လၢ အမဲာ်ညါဝံၤဝဲ ခဲလၢာ်တစုလီၤ. ၂၁ ကစၢ်ယွၤ ထုးန့ၢ်ဆူၣ်ကွံာ် အံၣ်စရ့လးလၢ စီၤဒၤဝံး အစၢၤအသွဲၣ်* အအိၣ် ဒီးပှၤအံၣ်စရ့လးဖိ ဒုးကဲထီၣ် စီၤနဘးအဖိခွါ စီၤယၤရၤဘၣ်လၢ စီၤပၤလီၤ.+ ဘၣ်ဆၣ် စီၤယၤရၤဘၣ် ဆှၢကမၣ် အဝဲသ့ၣ်ကျဲ ဒ်သိးအသုတဒိကနၣ် ယဟိဝၤယွၤ အကလုၢ်တဂ့ၤ အဂီၢ်လီၤ. ဒီးအဝဲဆီၣ်ထွဲ ပှၤအံၣ်စရ့လးဖိလၢ ကမၤတၢ်ဒဲးဘး ဖးဒိၣ်တခါလီၤ. ၂၂ ဒီးအဝဲသ့ၣ် အိၣ်မူမၤထွဲဝဲ ဒ်တၢ်ဒဲးဘးခဲလၢာ် လၢစီၤယၤရၤဘၣ် မၤဆိပာ်စၢၤဝဲလီၤ.+ ဒီးအဝဲသ့ၣ် ဆဲးမၤတၢ်ဒဲးဘး တဖၣ်အံၤ ၂၃ တုၤလီၤလၢ ယဟိဝၤယွၤ နီဟးထီၣ်ကွံာ် အဝဲသ့ၣ်လၢ အမဲာ်ညါ ဒ်အတဲဆိပာ်စၢၤဝဲ ခီဖျိအခ့အပှၤ လၢအမ့ၢ်ဝံတဖၣ် အသိးလီၤ.+ အဃိ အံၣ်စရ့လး အပှၤဂီၢ်မုၢ် ဘၣ်တၢ်က့ၤဖီၣ် အဝဲသ့ၣ်ဆူ ကီၢ်အၤၡူၢ်+ ဒီးအဝဲသ့ၣ် အိၣ်ဝဲဖဲန့ၣ် တုၤလၢ မုၢ်မဆါတနံၤအံၤလီၤ.
၂၄ လၢခံ ကီၢ်အၤၡူၢ် အစီၤပၤ ဟဲကိးနုာ်ဝဲ ပှၤလၢအအိၣ်လၢ ဝ့ၢ်ဘၤဘူၤလိၣ်, ဝ့ၢ်ကူသး, ဝ့ၢ်ဧးဝါ, ဝ့ၢ်ဃမါသး ဒီးဝ့ၢ်စဖၤရဝံၣ်+ ဒီးဒုးအိၣ်အဝဲသ့ၣ်လၢ ၡၤမရံ အဝ့ၢ်တဖၣ်အပူၤ လၢပှၤအံၣ်စရ့လးဖိ အလီၢ်လီၤ. ပှၤသ့ၣ်တဖၣ်အံၤ မၤန့ၢ်ဝဲ ၡၤမရံ ဒီးအိၣ်ဝဲလၢ အဝ့ၢ်တဖၣ်အပူၤလီၤ. ၂၅ ဖဲအဝဲသ့ၣ် အိၣ်ဝဲဖဲန့ၣ်သီသီအခါ အဝဲသ့ၣ်တပျံၤ* ယဟိဝၤယွၤဘၣ်. အဃိ ယဟိဝၤယွၤ ဆှၢလီၤခ့ယုၢ်တဖၣ်+ ဒီးခ့ယုၢ်တဖၣ် အ့ၣ်သံအဝဲသ့ၣ် တနီၤလီၤ. ၂၆ ဒီးပှၤတဲဘၣ် ကီၢ်အၤၡူၢ် အစီၤပၤလၢ “ပှၤအကလုာ်တဖၣ်လၢ နက့ၤဖီၣ် ဒီးဒုးအိၣ်အီၤလၢ ၡၤမရံ အဝ့ၢ်တဖၣ် အပူၤန့ၣ် အဝဲသ့ၣ် တသ့ၣ်ညါ ကီၢ်တဘ့ၣ်န့ၣ် အကစၢ်ယွၤ အတၢ်ဘူၣ်တၢ်ဘါဘၣ်. မ့ၢ်လၢ အဝဲသ့ၣ် တသ့ၣ်ညါ ကီၢ်တဘ့ၣ်န့ၣ် အကစၢ်ယွၤ အတၢ်ဘူၣ်တၢ်ဘါ နီတဂၤဘၣ်အဃိ အဝဲဆှၢလီၤ ခ့ယုၢ်တဖၣ်လၢ အဝဲသ့ၣ်အကျါ တလီၢ်လီၢ် ဒ်သိးကအ့ၣ်သံကွံာ် အဝဲသ့ၣ်လီၤ.”
၂၇ အဃိ ကီၢ်အၤၡူၢ် အစီၤပၤ မၤလိာ်ဝဲလၢ “မၢပှၤလုၢ်တၢ်ဒိၣ်လၢ သုဟဲက့ၤဖီၣ်အီၤဖဲန့ၣ်တဖၣ် အကျါတဂၤ က့ၤအိၣ်ကဒါက့ၤဖဲန့ၣ် ဒီးသိၣ်လိ အဝဲသ့ၣ်လၢ ကီၢ်တဘ့ၣ်န့ၣ် အကစၢ်ယွၤ အတၢ်ဘူၣ်တၢ်ဘါတက့ၢ်.” ၂၈ အဃိ ပှၤလုၢ်တၢ်ဒိၣ်တဖၣ် လၢၡၤမရံအပူၤ လၢအဝဲသ့ၣ်က့ၤဖီၣ်ဝဲ အကျါတဂၤန့ၣ် က့ၤအိၣ်ဝဲလၢ ဝ့ၢ်ဘ့ၤသ့လး+ ဒီးအသိၣ်လိ အဝဲသ့ၣ်လၢ အကဘၣ်ပျံၤ ယဟိဝၤယွၤ ဒ်လဲၣ်န့ၣ်လီၤ.+
၂၉ ဘၣ်ဆၣ် ပှၤတကလုာ်စုာ်စုာ် တ့ထီၣ်ဝဲ အနီၢ်ကစၢ်အယွၤ ဒီးပာ်လီၤဝဲလၢ တၢ်ဘူၣ်တၢ်ဘါ အဟံၣ်တဖၣ်အပူၤ လၢပှၤၡၤမရံဖိတဖၣ် တ့ထီၣ်ပာ်စၢၤဝဲ လၢတၢ်လီၢ်ထီၣ်ထီတဖၣ် အဖီခိၣ်လီၤ. ပှၤတကလုာ်စုာ်စုာ်န့ၣ် မၤဝဲဒ်န့ၣ် လၢဝ့ၢ်တဖၣ်လၢ အဝဲသ့ၣ် အိၣ်ဆိးဝဲလၢ အပူၤလီၤ. ၃၀ ဒီးပှၤလၢအအိၣ်ဟဲလၢ ဝ့ၢ်ဘၤဘူၤလိၣ်န့ၣ် တ့ထီၣ်ဝဲ စူးကိၤသးဘနိး အတၢ်ဂီၤတၢ်ဖှီၣ်, ပှၤလၢအအိၣ်ဟဲလၢ ဝ့ၢ်ကူသးန့ၣ် တ့ထီၣ်ဝဲ န့ရကၤလး အတၢ်ဂီၤတၢ်ဖှီၣ်, ပှၤလၢအအိၣ်ဟဲလၢ ဝ့ၢ်ဃမါသးန့ၣ်+ တ့ထီၣ်ဝဲ အၡံမၤ အတၢ်ဂီၤတၢ်ဖှီၣ် ၃၁ ဒီးပှၤလၢအအိၣ်ဟဲလၢ ဝ့ၢ်ဧးဝါန့ၣ် တ့ထီၣ်ဝဲ နံးဘဃး ဒီးတၢ်တး အတၢ်ဂီၤတၢ်ဖှီၣ်လီၤ. ဒီးပှၤစဖၤရဝံၣ်ဖိတဖၣ် လုၢ်ထီၣ်ဝဲ အဖိတဖၣ် လၢမ့ၣ်အူ လၢပှၤစဖၤရဝံၣ်ဖိ အကစၢ်တဖၣ်+ လၢအမ့ၢ် အဒြၤမ့လ့း ဒီးဧၤနမ့လး အအိၣ်လီၤ. ၃၂ ပှၤတဖၣ်န့ၣ် ပျံၤယဟိဝၤယွၤ သနာ်က့ အဝဲသ့ၣ် ဃုထၢထီၣ်ဝဲ ပှၤမုၢ်ဆ့ၣ်မုၢ်ဂီၤဖိလၢ ပှၤဂီၢ်မုၢ်အကျါလၢ ကကဲထီၣ် တၢ်လီၢ်ထီၣ်ထီ အပှၤလုၢ်တၢ်ဒိၣ်တဖၣ်လီၤ. ဒီးပှၤသ့ၣ်တဖၣ်အံၤ တီခိၣ်ရိၤမဲတၢ်လၢ အဝဲသ့ၣ်အဂီၢ် လၢတၢ်ဘူၣ်တၢ်ဘါ အဟံၣ်တဖၣ် ဖဲတၢ်လီၢ်ထီၣ်ထီတဖၣ် အဖီခိၣ်န့ၣ်လီၤ.+ ၃၃ အဃိ အဝဲသ့ၣ် ပျံၤယဟိဝၤယွၤ ဘၣ်ဆၣ် အဝဲသ့ၣ် ဘူၣ်ထီၣ်ဘါထီၣ် အဝဲသ့ၣ် အယွၤတဖၣ် ဒ်အထံကီၢ်ပှၤကလုာ် အတၢ်ဘူၣ်တၢ်ဘါ အိၣ်ပာ်စၢၤဝဲ အသိးလီၤ.+
၃၄ အဝဲသ့ၣ် မၤပိာ်ထွဲဝဲဒ် အတၢ်ဘူၣ်တၢ်ဘါ လၢညါတဖၣ်အသိး တုၤလၢမုၢ်မဆါတနံၤအံၤလီၤ. အဝဲသ့ၣ် တဘူၣ်ထီၣ်ဘါထီၣ် ယဟိဝၤယွၤ, တမၤထွဲ အတၢ်ဘျၢတဖၣ်, အတၢ်သိၣ်တၢ်သီတဖၣ်, စီၤမိၤၡ့ အတၢ်သိၣ်တၢ်သီ ဒီးတၢ်မၤလိာ်တဖၣ်လၢ ယဟိဝၤယွၤ ဟ့ၣ်လီၤပာ်စၢၤဝဲ စီၤယၤကိာ် အဖိခွါတဖၣ်န့ၣ် နီတဂၤဘၣ်. စီၤယၤကိာ်န့ၣ် ဘၣ်တၢ်ကိးက့ၤအီၤလၢ စီၤအံၣ်စရ့လးလီၤ.+ ၃၅ ဖဲယဟိဝၤယွၤ မၤတၢ်အၢၣ်လီၤအီလီၤ ဒီးပှၤအံၣ်စရ့လးဖိအခါ+ ကစၢ်ယွၤ မၤလိာ်ပာ်စၢၤ အဝဲသ့ၣ်လၢ “သုတဘၣ် ပျံၤယွၤအဂၤတဖၣ်တဂ့ၤ, သုတဘၣ် ဘါထီၣ်အဝဲသ့ၣ်တဂ့ၤ, မၤအဝဲသ့ၣ်အတၢ်တဂ့ၤ ဒီးလုၢ်ထီၣ်တၢ်လၢ အဝဲသ့ၣ်အအိၣ်တဂ့ၤ.+ ၃၆ မ့မ့ၢ် ယၤ, ယဟိဝၤယွၤ လၢအယူာ်ဃီၤအစုဒ်သိး ကဒုးဟးထီၣ်သုလၢ ကီၢ်အဲၤကူပတူးအပူၤ လၢတၢ်စိတၢ်ကမီၤ ဖးဒိၣ်န့ၣ်+ သုကဘၣ်ပျံၤယၤ,+ ဘူၣ်ထီၣ်ဘါထီၣ်ယၤ ဒီးသုကဘၣ် လုၢ်ထီၣ်တၢ်လၢ ယအိၣ်လီၤ. ၃၇ ဒီးတၢ်ဘျၢတဖၣ်, တၢ်သိၣ်တၢ်သီတဖၣ်, စီၤမိၤၡ့အတၢ်သိၣ်တၢ်သီ ဒီးတၢ်မၤလိာ်လၢ ယကွဲးပာ်စၢၤန့ၢ်သုန့ၣ်+ သုကဘၣ် မၤပိာ်ထွဲအီၤ လီၤတံၢ်လီၤဆဲး ဒီးသုတဘၣ် ပျံၤယွၤအဂၤတဖၣ်တဂ့ၤ. ၃၈ ဒီးသုတဘၣ် သးပ့ၤနီၣ် တၢ်အၢၣ်လီၤအီလီၤလၢ ယမၤဒီးသုန့ၣ်တဂ့ၤ.+ သုတဘၣ် ပျံၤယွၤအဂၤတဖၣ်တဂ့ၤ. ၃၉ ဘၣ်ဆၣ် မ့မ့ၢ် ယၤ, ကစၢ်ယဟိဝၤယွၤန့ၣ် သုကဘၣ်ပျံၤယၤ မ့ၢ်လၢ ယမ့ၢ်ပှၤတဂၤလၢ အကမၤပူၤဖျဲးသုလၢ သုဒုၣ်သုဒါ ခဲလၢာ် အစုပူၤ အဃိလီၤ.”
၄၀ ဘၣ်ဆၣ် ပှၤကလုာ်တဖၣ်အံၤ တဒိကနၣ်ဝဲဘၣ် ဒီးအဝဲသ့ၣ် ဘူၣ်ထီၣ်ဘါထီၣ်ဝဲ အတၢ်ဘူၣ်တၢ်ဘါ လၢညါန့ၣ်လီၤ.+ ၄၁ အဃိ အဝဲသ့ၣ် ပျံၤယဟိဝၤယွၤ+ ဘၣ်ဆၣ် အဝဲသ့ၣ် ဘူၣ်ထီၣ်ဘါထီၣ်စ့ၢ်ကီး အနီၢ်ကစၢ် အတၢ်ဂီၤတၢ်ဖှီၣ်တဖၣ်လီၤ. ဒီးအဝဲသ့ၣ် အဖိအလံၤတဖၣ် မၤဝဲဒ် အမိၢ်ပၢ်ဖံဖု လၢပျၢၤတဖၣ် မၤဝဲအသိး တုၤလၢ မုၢ်မဆါတနံၤအံၤလီၤ.