၂ ကွဲးနီၣ်တၢ်
၂၈ ဖဲစီၤအၤဃး+ ကဲထီၣ်စီၤပၤအခါ အသးနံၣ်အိၣ်ဝဲ အနံၣ် ၂၀ လီၤ. ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၆ နံၣ်လီၤ. အဝဲတမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဒ်အဖုဖးဒိၣ် စီၤဒၤဝံးမၤတ့ၢ်ဝဲ အသိးဘၣ်.+ ၂ လၢတၢ်န့ၣ်အလီၢ် အဝဲအိၣ်မူပိာ်ထွဲဝဲဒ် အံၣ်စရ့လး အစီၤပၤတဖၣ်အသိး+ ဒီးအဝဲတ့ထီၣ်စ့ၢ်ကီး ဘဧၤလး အတၢ်ဂီၤတၢ်ဖှီၣ်ထးတဖၣ်လီၤ.+ ၃ တကးဒံးဘၣ် အဝဲဒွဲၣ်ခုၣ်ထီၣ် တၢ်လုၢ်လၢ ဟံၣ်နိၣ်အတၢ်တြီၤ* ဒီးပှၤကလုာ်တဖၣ်လၢ ယဟိဝၤယွၤ နီဟးထီၣ်ကွံာ်အီၤလၢ အံၣ်စရ့လး အမဲာ်ညါန့ၣ် စီၤအၤဃး မၤထွဲဝဲ ဒ်အဝဲသ့ၣ် အလုၢ်အလၢ်လၢ အလီၤသးဘၣ်အၢတဖၣ်အသိး+ ဒီးအဝဲလုၢ်ထီၣ်ဝဲ အဖိခွါတဖၣ်လၢ မ့ၣ်အူပူၤလီၤ.+ ၄ အဝဲဆဲးလုၢ်ထီၣ်ဒံးတၢ် ဒီးဒွဲၣ်ခုၣ်ထီၣ်တၢ်လုၢ် လၢတၢ်လီၢ်ထီၣ်ထီတဖၣ်+ အဖီခိၣ်, တၢ်လူၢ်ခိၣ် ဒီးလၢသ့ၣ်လါဟ့လၢ အပှဲၤဒီးအလၣ် ကိးထူၣ်ဒဲး အခီၣ်ထံးန့ၣ်လီၤ.+
၅ အဃိ အကစၢ်ယဟိဝၤယွၤ ဟ့ၣ်လီၤကွံာ်အီၤလၢ ကီၢ်စူၤရံ အစီၤပၤအစုပူၤလီၤ.+ ဒီးပှၤစူၤရံဖိတဖၣ် မၤနၢၤအီၤ ဒီးက့ၤဖီၣ်ပှၤအါဂၤဆူ ဝ့ၢ်ဒၤမ့ၤစ့းလီၤ.+ ဒီးကစၢ်ယွၤ ဟ့ၣ်လီၤကွံာ် စ့ၢ်ကီးအီၤလၢ အံၣ်စရ့လး အစီၤပၤအစုပူၤ ဒီးအံၣ်စရ့လး အစီၤပၤန့ၣ် မၤသံအဝဲသ့ၣ် အါအါဂီၢ်ဂီၢ်လီၤ. ၆ ဒီးမ့ၢ်လၢ ယူဒၤအပှၤဂီၢ်မုၢ် ပာ်တ့ၢ်ကွံာ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤအဃိ+ လၢတနံၤဃီ အတီၢ်ပူၤန့ၣ် စီၤရမါလယၤ အဖိခွါ စီၤပ့ကး+ မၤသံဝဲ အဝဲသ့ၣ် အပှၤပိာ်ခွါလၢ အသူၣ်ဒူသးဒူအဂၤ ၁၂၀,၀၀၀ လီၤ. ၇ ဒီးပှၤအ့ဖရဲၣ်ဖိ အသုးဖိလၢ အဂံၢ်ဆူၣ်ဘါဆူၣ်တဂၤ လၢအမ့ၢ် စီၤစံးကရံန့ၣ် မၤသံဝဲစီၤပၤ အဖိခွါ စီၤမၤစ့ယၤ, စီၤဧးစရံကၣ် လၢအမ့ၢ် ပှၤလၢအတီခိၣ်ရိၤမဲတၢ်လၢ နီပူၤ ဒီးစီၤအ့လကါနၤ လၢအမ့ၢ် ပှၤအဒိၣ်ကတၢၢ် ခံဂၤတဂၤလၢ စီၤပၤအဖီလာ်န့ၣ်လီၤ. ၈ တကးဒံးဘၣ် လၢယူဒၤအပူၤန့ၣ် ပှၤအံၣ်စရ့လးဖိ က့ၤဖီၣ်ဝဲ ပိာ်မုၣ် ဒီးဖိဒံဖိသၣ်တဖၣ်* အဂၤ ၂၀၀,၀၀၀ လီၤ. အဝဲသ့ၣ် ဟံးန့ၢ်စ့ၢ်ကီး တၢ်ဖိတၢ်လံၤ အါအါဂီၢ်ဂီၢ် ဒီးက့ၤစိာ်ဝဲ တၢ်ဖိတၢ်လံၤတဖၣ်န့ၣ်လၢ ၡၤမရံလီၤ.+
၉ ဘၣ်ဆၣ် လၢဝ့ၢ်ၡၤမရံန့ၣ် ယဟိဝၤယွၤ အဝံ အိၣ်ဝဲတဂၤလၢ အမံၤမ့ၢ်ဝဲ စီၤဧိၤဒ့းလီၤ. ဒီးဖဲပှၤသုးဖိတဖၣ် ကဟဲက့ၤနုာ်လီၤလၢ ဝ့ၢ်ၡၤမရံအပူၤအခါ အဝဲလဲၤထံၣ်လိာ်သးဒီးအဝဲသ့ၣ် ဒီးတဲအဝဲသ့ၣ်လၢ “သုမိၢ်ပၢ်ဖံဖု လၢပျၢၤတဖၣ် အကစၢ်ယဟိဝၤယွၤ သးပှံၢ်ထီၣ် ယူဒၤအဃိ ဟ့ၣ်လီၤ အဝဲသ့ၣ်လၢ သုစုပူၤလီၤ.+ ဘၣ်ဆၣ် သုမၤသံ အဝဲသ့ၣ် အၢအၢသီသီန့ၣ် ကစၢ်ယွၤထံၣ်ဝဲလံ. ၁၀ ဒီးသုပာ်လီၤသုသးလၢ သုကဒုးကဲထီၣ် ပှၤဂီၢ်မုၢ်လၢ ယူဒၤ ဒီးဝ့ၢ်ယရူၤၡလ့ၣ်လၢ သုကုၢ်ပိာ်မုၣ်ဒီး သုကုၢ်ပိာ်ခွါတဖၣ်လီၤ.+ ဘၣ်ဆၣ် သုဝဲစ့ၢ်ကီး လၢသုကစၢ် ယဟိဝၤယွၤ အမဲာ်ညါန့ၣ် သုတၢ်ကမၣ်တအိၣ်ဧီၤ. ၁၁ ကနၣ်လၢအံၤ ယကတဲသု, ယဟိဝၤယွၤ သးပှံၢ်ထီၣ်သုလံ, က့ၤဆှၢက့ၤ ယူဒၤအပှၤဂီၢ်မုၢ် လၢသုဟဲက့ၤ ဖီၣ်အီၤတဖၣ်တက့ၢ်.”
၁၂ ဖဲန့ၣ်န့ၣ် ပှၤအ့ဖရဲၣ်ဖိ အခိၣ်တဖၣ် လၢအမ့ၢ် စီၤယိဃၤနၣ် အဖိခွါ စီၤဧစၤရယၤ, စီၤမၤၡံးလ့မိး အဖိခွါ စီၤဘရ့ကံယၤ, စီၤၡၤလူၣ် အဖိခွါ စီၤယဃံးစကံယၤ ဒီးစီၤဃၤဒလဲ အဖိခွါ စီၤဧမါစၤန့ၣ် လဲၤထံၣ်လိာ်သးဒီး ပှၤလၢအဟဲက့ၤလၢ တၢ်ဒုးတဖၣ်အံၤလီၤ. ၁၃ ပှၤအ့ဖရဲၣ်ဖိ အခိၣ်တဖၣ် တဲအဝဲသ့ၣ်လၢ “ဟဲက့ၤကိးပှၤလၢ သုဖီၣ်န့ၢ်အီၤတဖၣ် ဖဲအံၤတဂ့ၤ. သုမ့ၢ်မၤဒ်န့ၣ်န့ၣ် ပတၢ်ကမၣ် ကအါထီၣ်ဝဲလၢ ယဟိဝၤယွၤ အမဲာ်ညါလီၤ. ပတၢ်ကမၣ် အိၣ်ပာ်စၢၤ ဒီဒူၣ်လံ ဒီးကစၢ်ယွၤ အတၢ်သးဒိၣ်လီၤဘၣ်လၢ အံၣ်စရ့လး အဘီမုၢ်လံအဃိ တၢ်လၢသုကမၤတခါအံၤ ကမၤအါထီၣ် ပတၢ်ဒဲးဘး ဒီးပတၢ်ကမၣ် ကအါထီၣ်လီၤ.” ၁၄ အဃိ သုးဖိလၢ အဖီၣ်တၢ်စုကဝဲၤတဖၣ်အံၤ ဟ့ၣ်လီၤကွံာ် ပှၤလၢအဘၣ် တၢ်ဟဲက့ၤဖီၣ်အီၤတဖၣ် ဒီးတၢ်ဖိတၢ်လံၤလၢ ပှၤဂုာ်န့ၢ်အီၤတဖၣ်+ ဆူပဒိၣ်တဖၣ် ဒီးတၢ်အိၣ်ဖှိၣ် ဒီတဖုအအိၣ်လီၤ. ၁၅ ဝံၤဒီး ပှၤလၢအဘၣ် တၢ်ဃုထၢထီၣ်အီၤတဖၣ် ဟံးမူဒါ ဒီးဟံးန့ၢ် တၢ်ကူတၢ်ကၤလၢ တၢ်လၢ ပှၤဂုာ်န့ၢ်အီၤတဖၣ်အကျါ ဒီးဟ့ၣ်လီၤဝဲလၢ ပှၤလၢအဘၣ် တၢ်ဟဲက့ၤဖီၣ်အီၤလၢ အအိၣ်ဘ့ၣ်ဆ့ ကိးဂၤဒဲးလီၤ. အဃိ အဝဲသ့ၣ်ဟ့ၣ်လီၤ တၢ်ကူတၢ်ကၤဒ်သိး ပှၤတဖၣ်န့ၣ် ကကူထီၣ်သိးထီၣ်ဝဲအဂီၢ်, ခီၣ်ဖံး, တၢ်အီၣ်တၢ်အီ ဒီးသိလၢပှၤတဖၣ်န့ၣ် ကဖှူဝဲလၢအလိၤလီၤ. တကးဒံးဘၣ် အဝဲသ့ၣ် ဒုးဒိးထီၣ် ပှၤလၢအဂံၢ်ဘါလီၤစၢ်တဖၣ်လၢ ကသ့ၣ်ယီၤတဖၣ် ဒီးလဲၤဆှၢ ပှၤတဖၣ်န့ၣ်ခဲလၢာ်လၢ အဒီပုၢ်ဝဲၢ်တဖၣ် အအိၣ် လၢဝ့ၢ်သ့ၣ်စူၣ်ပလိၣ် လၢအမ့ၢ် ဝ့ၢ်ယရံၤဃိလီၤ. ဝံၤဒီး အဝဲသ့ၣ်က့ၤလၢ ဝ့ၢ်ၡၤမရံလီၤ.
၁၆ ဖဲန့ၣ်အဆၢကတီၢ် စီၤပၤအၤဃး ဃ့တၢ်မၤစၢၤလၢ ကီၢ်အၤၡူၢ် အစီၤပၤတဖၣ်အအိၣ်လီၤ.+ ၁၇ ဒီးပှၤအဒိၣ်ဖိ စ့ၢ်ကီး ဟဲနုာ်လီၤဒုးဝဲယူဒၤ ဒီးက့ၤဖီၣ်အဝဲသ့ၣ်လီၤ. ၁၈ ဒီးပှၤဖလ့ၡသးဖိ+ စ့ၢ်ကီးဟဲဒုးဝဲ ဝ့ၢ်တဖၣ် လၢအိၣ်ဝဲလၢ ၡ့ဖလၣ်+ ဒီးနဲကဲၤလၢ ယူဒၤဘီမုၢ်အပူၤလီၤ. ဒီးအဝဲသ့ၣ်မၤန့ၢ်ဝဲ ဝ့ၢ်ဘ့ၤသၡ့မ့ၣ်,+ ဝ့ၢ်အးယၤလိၣ်,+ ဝ့ၢ်ကဒ့ရိၣ်, ဝ့ၢ်စိကိၤ ဒီးအဒူသဝီတဖၣ်, ဝ့ၢ်တံးမနး+ ဒီးအဒူသဝီတဖၣ်, ဝ့ၢ်ကံးမစိၤ ဒီးအဒူသဝီတဖၣ် ဒီးအဝဲသ့ၣ် အိၣ်ဝဲဖဲန့ၣ်လီၤ. ၁၉ အံၣ်စရ့လး အစီၤပၤအၤဃး ပျဲဝဲလၢ ယူဒၤအပှၤဂီၢ်မုၢ် ကမၤတၢ်ဖဲ အဝဲသ့ၣ်အသး အဃိအဝဲသ့ၣ် မၤကမၣ်ဘၣ် ယဟိဝၤယွၤ ဒီဒူၣ်လီၤ. ခီဖျိလၢ အံၣ်စရ့လး စီၤပၤအၤဃးအဃိ ယဟိဝၤယွၤ ဆီၣ်လီၤ ယူဒၤအဘီမုၢ်လီၤ.
၂၀ ဒီးလၢကီၢ်အၤၡူၢ် အစီၤပၤတံးလကးပံးလန့စ့ၢ်+ ကဟဲမၤစၢၤ စီၤအၤဃးအလီၢ် အဝဲဟဲထီဒါအီၤဒီး မၤအါထီၣ် အတၢ်ကိၢ်တၢ်ဂီၤလီၤ.+ ၂၁ လၢညါန့ၣ် စီၤအၤဃး ဟံးန့ၢ် တၢ်လုၢ်ဒိၣ်ပှ့ၤဒိၣ်တဖၣ်လၢ ယဟိဝၤယွၤ အဟံၣ်ပူၤ,+ လၢစီၤပၤအနီပူၤ ဒီးလၢပဒိၣ် အဟံၣ်တဖၣ်အပူၤ ဒီးဟ့ၣ်လီၤဝဲ ကီၢ်အၤၡူၢ် အစီၤပၤ ဒ်တၢ်ဟ့ၣ်အသိးလီၤ. အဝဲမၤဝဲဒ်န့ၣ် ဘၣ်ဆၣ် အတကဲဘျုးလၢ အဂီၢ်နီတစဲးဘၣ်. ၂၂ ဒီးဖဲ စီၤအၤဃး ဘၣ်ကီဘၣ်ခဲအဆၢကတီၢ် အဝဲမၤကမၣ် ယဟိဝၤယွၤ အါန့ၢ်ဒံးလၢညါလီၤ. ၂၃ ဖဲန့ၣ်အခါ စီၤအၤဃး လုၢ်ထီၣ်တၢ်လၢ ပှၤစူၤရံဖိ အယွၤတဖၣ်လၢ+ အမၤနၢၤတ့ၢ်အီၤအအိၣ်လီၤ.+ အဝဲတဲဝဲလၢ “ပှၤစူၤရံဖိ အယွၤတဖၣ် မၤစၢၤဘၣ် ကီၢ်စူၤရံအစီၤပၤတဖၣ် အဃိ ယကလုၢ်ထီၣ်တၢ်လၢ ယွၤတဖၣ်န့ၣ်အအိၣ် ဒ်သိးအဝဲသ့ၣ် ကမၤစၢၤယၤ စ့ၢ်ကီးလီၤ.”+ ဘၣ်ဆၣ် ယွၤတဖၣ်န့ၣ် ဆှၢအီၤဒီး အံၣ်စရ့လးခဲလၢာ် ဆူတၢ်ဟးဂီၤလီၤ. ၂၄ တကးဒံးဘၣ် စီၤအၤဃး ဟံးန့ၢ်ဝဲ တၢ်ပီးတၢ်လီတဖၣ်လၢ ယွၤလၢအမ့ၢ်အတီတဂၤ အဟံၣ်+ ဒီးအဝဲ ဒီၣ်တဲာ်ကွံာ်ဝဲ တကူာ်ဘၣ်တကူာ်, ပံးကွံာ်ဝဲ တြဲၤတဖၣ်လၢ ယဟိဝၤယွၤ အဟံၣ်+ ဒီးတ့ထီၣ်ဝဲ တၢ်လုၢ်လီၢ်တဖၣ် လၢအနီၢ်ကစၢ်အဂီၢ် လၢဝ့ၢ်ယရူၤၡလ့ၣ်အနၢၣ်ထံး ကိးသနၢၣ်ဒဲးလီၤ. ၂၅ ဒီးလၢယူဒၤအဝ့ၢ် ကိးဖျၢၣ်ဒဲးအပူၤန့ၣ် အဝဲတ့ထီၣ် တၢ်လီၢ်ထီၣ်ထီတဖၣ် လၢတၢ်ဒွဲၣ်ခုၣ်ထီၣ်တၢ်လုၢ် လၢယွၤအဂၤတဖၣ်+ အအိၣ်အဃိ အဝဲမၤဆါ အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ အသးလီၤ.
၂၆ မ့မ့ၢ်စီၤအၤဃး အဂ့ၢ်လၢအဂၤတဖၣ် ဒီးတၢ်လၢအမၤဝဲခဲလၢာ် စးထီၣ်လၢ အခီၣ်ထံး တုၤလၢအကတၢၢ်န့ၣ် ဘၣ်တၢ်ကွဲးလီၤအီၤလၢ ယူဒၤဒီးအံၣ်စရ့လး အစီၤပၤတဖၣ် အလံာ်ပူၤလီၤ.+ ၂၇ ဒီးစီၤအၤဃး သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤလၢ ဝ့ၢ်ယရူၤၡလ့ၣ်အပူၤလီၤ. ဘၣ်ဆၣ် ပှၤတခူၣ်လီၤအီၤလၢ အံၣ်စရ့လး အစီၤပၤတဖၣ် အတၢ်သွၣ်ခိၣ်အပူၤဘၣ်.+ ဒီးအဖိခွါ စီၤဃံးစကံယၤ ကဲထီၣ်က့ၤ စီၤပၤလၢအလီၢ်လီၤ.