၂ ကွဲးနီၣ်တၢ်
၂၉ ဖဲစီၤဃံးစကံယၤ+ ကဲထီၣ်စီၤပၤအခါ အသးနံၣ်အိၣ်ဝဲ ၂၅ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၂၉ နံၣ်လီၤ. စီၤဃံးစကံယၤ အမိၢ်မ့ၢ်ဝဲ နီၢ်အဘံယၤ လၢအမ့ၢ် စီၤစကၤရယၤ အဖိမုၣ်န့ၣ်လီၤ.+ ၂ စီၤဃံးစကံယၤ ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ+ ဒ်အဖုဖးဒိၣ် စီၤဒၤဝံး မၤတ့ၢ်ဝဲ အသိးလီၤ.+ ၃ ဖဲအဝဲပၢတၢ် အဆိကတၢၢ်တနံၣ်, လါအခီၣ်ထံး တလါန့ၣ် အဝဲအိးထီၣ် ယဟိဝၤယွၤ အဟံၣ်အတြဲၤတဖၣ် ဒီးဘှီဂ့ၤထီၣ်က့ၤဝဲလီၤ.+ ၄ ဒီးအကိးဖှိၣ် ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် လၢတၢ်လီၢ်ပျီတတီၤလၢ မုၢ်ထီၣ်တကပၤလီၤ. ၅ ဒီးစီၤဃံးစကံယၤ တဲအဝဲသ့ၣ်လၢ “ပှၤလ့ၤဝံဖိသ့ၣ်ဧၢ, ကနၣ်လၢအံၤ. ခဲအံၤ မၤစီဆှံထီၣ်သုသး+ ဒီးမၤစီဆှံထီၣ် သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ အဟံၣ် ဒီးတၢ်လၢ အတကဆှီဘၣ်တဖၣ် လၢအအိၣ်လၢ တၢ်စီဆှံအလီၢ်န့ၣ် ထုးထီၣ်ကွံာ်အီၤတက့ၢ်.+ ၆ ပပၢ်တဖၣ် အသးတတီဘၣ် ဒီးမၤတၢ်လၢ ပကစၢ် ယဟိဝၤယွၤ ထံၣ်ဝဲလၢအအၢလီၤ.+ အဝဲသ့ၣ် ပာ်တ့ၢ်ကွံာ် ယဟိဝၤယွၤ ဒီးတပာ်ကဲ ကစၢ်ယွၤအဒဲစီဆှံဘၣ်.+ ၇ အဝဲသ့ၣ် ပံးဃာ် ဘျီၣ်ဒိၣ်အတြဲၤတဖၣ်+ ဒီးမၤလီၤပံာ်ကွံာ် မ့ၣ်အူဒၢအခွးတဖၣ်လီၤ.+ အဝဲသ့ၣ် တဒွဲၣ်ထီၣ် တၢ်နၢမူလၢၤဘၣ်+ ဒီးတလုၢ်ထီၣ် တၢ်လုၢ်ဒွဲၣ်အူတဖၣ်လၢ+ တၢ်လီၢ်စီဆှံအလီၢ်ပူၤလၢ အံၣ်စရ့လး အကစၢ်ယွၤ အအိၣ်လၢၤဘၣ်. ၈ အဃိ ယဟိဝၤယွၤ အတၢ်သးဒိၣ်လီၤဘၣ် ယူဒၤအဘီမုၢ် ဒီးဝ့ၢ်ယရူၤၡလ့ၣ်+ ဒီးအဝဲဒုးလီၤဘၣ် တၢ်နးတၢ်ဖှီၣ်လၢ အဝဲသ့ၣ် အလိၤလီၤ. အဃိ ဒ်သုထံၣ်ဘၣ်လၢ သုနီၢ်ကစၢ်အမဲာ်အသိး+ ပှၤခဲလၢာ် ကမၢကမၣ် ဒီးပျံၤတၢ်ဖုးတၢ်လၢ တၢ်မၤအသးဒီး အဝဲသ့ၣ်အဃိ ဒီးတဲဆဲးအဲး အဝဲသ့ၣ်လီၤ. ၉ လၢတၢ်ဂ့ၢ်အံၤအဃိ ပမိၢ်ပၢ်ဖံဖု လၢပျၢၤတဖၣ် ဘၣ်တၢ်မၤသံအဝဲသ့ၣ်လၢနး+ ဒီးပဖိပမါတဖၣ် ဘၣ်တၢ်က့ၤဖီၣ် အဝဲသ့ၣ်လီၤ.+ ၁၀ ဒ်သိးအံၣ်စရ့လး အကစၢ် ယဟိဝၤယွၤ အသုတသးပှံၢ်ထီၣ်ပှၤ လၢၤတဂ့ၤအဂီၢ် ယသးဆူၣ်လၢ ယကမၤ တၢ်အၢၣ်လီၤအီလီၤဒီးအီၤလီၤ.+ ၁၁ ယပှၤဂီၢ်မုၢ်သ့ၣ်ဧၢ, ယဟိဝၤယွၤ ဃုထၢသုလၢ သုကဆၢထၢၣ်လၢ အမဲာ်ညါ, မၤအတၢ်*+ ဒီးဒွဲၣ်ခုၣ်ထီၣ် တၢ်လုၢ်တဖၣ်အဃိ+ ခဲအံၤန့ၣ် သုတဘၣ်ထုးယံာ် တၢ်ဆၢကတီၢ်ဘၣ်.”
၁၂ ဖဲန့ၣ်န့ၣ် ပှၤလ့ၤဝံဖိလၢ ဘၣ်တၢ်ပာ်ဖျါထီၣ်အီၤ လၢလာ်တဖၣ်အံၤ ဟံးထီၣ်ဝဲမူဒါလီၤ. အဝဲသ့ၣ်မ့ၢ်ဝဲ စီၤဧမၤစဲ အဖိခွါ စီၤမၤဃး ဒီးစီၤဧစၤရယၤ အဖိခွါ စီၤယိၤအ့လး လၢအမ့ၢ် ပှၤကဃးဖိတဖၣ်န့ၣ်လီၤ.+ လၢပှၤမရၤရံၤဖိ+ အကျါန့ၣ် ပၣ်ဃုာ်ဒီး စီၤဧၤဘ့းဒံ အဖိခွါ စီၤကံၣ် ဒီးစီၤယဟၤလလ့လး အဖိခွါ စီၤဧစၤရယၤလီၤ. ဒီးလၢ ပှၤက့ရၡိၣ်ဖိ+ အကျါန့ၣ် ပၣ်ဃုာ်ဒီး စီၤစံးမၤ အဖိခွါ စီၤယိၤအၤ ဒီးစီၤယိၤအၤ အဖိခွါ စီၤဧ့ၤဒ့ၣ်လီၤ. ၁၃ လၢစီၤအလံစဖၣ် အဖိခွါတဖၣ်အကျါန့ၣ် ပၣ်ဃုာ်ဒီး စီၤၡံမရံ ဒီးစီၤယူၤအ့လးလီၤ. လၢစီၤအၤစာ် အဖိခွါတဖၣ်အကျါန့ၣ်+ ပၣ်ဃုာ်ဒီး စီၤစကၤရယၤ ဒီးစီၤမးတၤနယၤလီၤ. ၁၄ လၢစီၤဟ့မၣ် အဖိခွါတဖၣ်အကျါန့ၣ်+ ပၣ်ဃုာ်ဒီး စီၤယဃံအ့လး ဒီးစီၤၡံမံၤလီၤ. ဒီးလၢစီၤယဒူသူၣ် အဖိခွါတဖၣ်အကျါန့ၣ်+ ပၣ်ဃုာ်ဒီး စီၤၡမါယၤ ဒီးစီၤဧူးစံၤအ့လးလီၤ. ၁၅ အဝဲသ့ၣ် ဒုးအိၣ်ဖှိၣ် အဒီပုၢ်ဝဲၢ်တဖၣ် ဒီးမၤစီဆှံထီၣ်အသးလီၤ. ဝံၤဒီး ဒ်စီၤပၤ အတၢ်မၤလိာ် လၢအဒိးသန့ၤထီၣ်အသးလၢ ယဟိဝၤယွၤ အကလုၢ်ကထါ အိၣ်ဝဲအသိးန့ၣ် အဝဲသ့ၣ်လဲၤ မၤကဆှီထီၣ်ဝဲ ယဟိဝၤယွၤအဟံၣ်လီၤ.+ ၁၆ ပှၤလုၢ်တၢ်ဒိၣ်တဖၣ် လဲၤနုာ်လီၤလၢ ယဟိဝၤယွၤ အဟံၣ်ပူၤ ဒ်သိးကမၤကဆှီထီၣ်က့ၤ တၢ်အဂီၢ်လီၤ. ဒီးတၢ်ခဲလၢာ်လၢ အတကဆှီဘၣ် လၢအဝဲသ့ၣ် ထံၣ်န့ၢ်ဝဲလၢ ယဟိဝၤယွၤ အတၢ်လုၢ်ဟံၣ်အပူၤန့ၣ် အဝဲသ့ၣ် ပာ်လီၤဝဲလၢ ယဟိဝၤယွၤ အဟံၣ် အတၢ်ပျီပူၤလီၤ.+ လၢခံ ပှၤလ့ၤဝံဖိတဖၣ် လဲၤစိာ်ဝဲလၢ ကံဒြိၣ် အတၢ်တြီၤလီၤ.+ ၁၇ အဃိ အဝဲသ့ၣ် စးထီၣ်မၤစီဆှံထီၣ်တၢ်ဖဲ လါအခီၣ်ထံးတလါ, လါထီၣ်တသီ ဒီးဖဲလါထီၣ်ဃိးသီတသီန့ၣ် အဝဲသ့ၣ် မၤဝဲတုၤလၢ ယဟိဝၤယွၤ အဘျီၣ်ဒိၣ်လီၤ.+ အဝဲသ့ၣ် ဆဲးမၤစီဆှံထီၣ် ယဟိဝၤယွၤ အဟံၣ်ဆူမဲာ်ညါဃိးသီ ဒီးဖဲလါထီၣ် ၁၆ သီတသီန့ၣ် အဝဲသ့ၣ် မၤစီဆှံထီၣ်တၢ် ဝံၤဝဲလီၤ.
၁၈ ဝံၤဒီး အဝဲသ့ၣ် လဲၤလၢ စီၤပၤဃံးစကံယၤအအိၣ် ဒီးတဲအီၤလၢ “ယဟိဝၤယွၤ အဟံၣ်ဒီတဖျၢၣ်, တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ်+ ဒီးအတၢ်ပီးတၢ်လီခဲလၢာ်+ ဒီးစီၢ်နီၤခိၣ်လၢ ပှၤပာ်လီၤ ကိၣ်လၢ တၢ်လုၢ်ထီၣ်တၢ်အဂီၢ်+ ဒီးအတၢ်ပီးတၢ်လီခဲလၢာ်န့ၣ် ပမၤကဆှီထီၣ်အီၤ ဝံၤလံ. ၁၉ တၢ်အပီးအလီ ခဲလၢာ်လၢ စီၤပၤအၤဃး ထုးထီၣ်ကွံာ်ဝဲဖဲအပၢတၢ် ဒီးအတတီဒီး ကစၢ်ယွၤဘၣ်အခါန့ၣ်+ ပကတဲာ်ကတီၤပာ်စၢၤအီၤလံ. ဒီးပပာ်စီဆှံထီၣ်က့ၤအီၤ ဝံၤလံ.+ ဒီးတၢ်အပီးအလီတဖၣ်န့ၣ် အိၣ်ဝဲလၢ ယဟိဝၤယွၤ အတၢ်လုၢ်လီၢ် အမဲာ်ညါလီၤ.”
၂၀ ဒီးစီၤပၤဃံးစကံယၤ ဂဲၤဆၢထၢၣ်ဂီၤဂီၤ ဒီးကိးဖှိၣ်ဝဲ ဝ့ၢ်အပဒိၣ်ဖးဒိၣ်တဖၣ် ဒီးအဝဲသ့ၣ်လဲၤလၢ ယဟိဝၤယွၤ အဟံၣ်လီၤ. ၂၁ အဝဲသ့ၣ် လဲၤမူၤဝဲ ကျီၢ်ဖါနွံဒု, သိဖါနွံဒု, သိဖါဖိနွံဒု ဒီးမဲာ်တဲးလဲးဖါနွံဒု ဒ်တၢ်လုၢ်လၢ တၢ်ဒဲးဘးအဂီၢ်လၢ ဘီမုၢ်အဂီၢ်, တၢ်လုၢ်ဟံၣ်အဂီၢ် ဒီးလၢယူဒၤအဂီၢ်လီၤ.+ ဒီးစီၤဃံးစကံယၤ မၢဝဲ ပှၤလုၢ်တၢ်ဒိၣ်တဖၣ် လၢအမ့ၢ် စီၤအၤဟရိၣ် အစၢၤအသွဲၣ်န့ၣ်လၢ ကလုၢ်ထီၣ်ဝဲတၢ်သ့ၣ်တဖၣ်န့ၣ် လၢယဟိဝၤယွၤ တၢ်လုၢ်လီၢ်အဖီခိၣ်လီၤ. ၂၂ ဒီးအဝဲသ့ၣ် မၤသံဝဲကျီၢ်+ ဒီးပှၤလုၢ်တၢ်ဒိၣ်တဖၣ် ဟံးန့ၢ်ဝဲတၢ်သွံၣ် ဒီးဖှံဝဲလၢ တၢ်လုၢ်လီၢ်အလိၤလီၤ.+ ဝံၤဒီးအဝဲသ့ၣ်မၤသံ သိဖါတဖၣ် ဒီးဖှံဝဲ တၢ်သွံၣ်လၢ တၢ်လုၢ်လီၢ်အလိၤ ဝံၤဒီးအဝဲသ့ၣ်မၤသံ သိဖါဖိတဖၣ် ဒီးဖှံဝဲတၢ်သွံၣ်လၢ တၢ်လုၢ်လီၢ်အလိၤလီၤ. ၂၃ ပှၤလုၢ်တၢ်ဒိၣ်တဖၣ် ဟဲမူၤဝဲ မဲာ်တဲးလဲးဖါတဖၣ် လၢတၢ်လုၢ်လၢ တၢ်ဒဲးဘးအဂီၢ် လၢစီၤပၤ ဒီးတၢ်အိၣ်ဖှိၣ် အမဲာ်ညါလီၤ. ဒီးအဝဲသ့ၣ် ပာ်အစုလၢ မဲာ်တဲးလဲးတဖၣ်န့ၣ် အလိၤလီၤ. ၂၄ ဒီးပှၤလုၢ်တၢ်ဒိၣ်တဖၣ် မၤသံကွံာ်ဝဲ မဲာ်တဲးလဲးတဖၣ်န့ၣ် ဒီးလုၢ်ထီၣ်ဝဲဒ်တၢ်လုၢ်လၢ တၢ်ဒဲးဘးအဂီၢ်အသိး ဝံၤဒီးပာ်ဝဲ မဲာ်တဲးလဲးတဖၣ် အသွံၣ် လၢတၢ်လုၢ်လီၢ်အလိၤ ဒ်သိးကမၤဘၣ်လိာ်ဖိးဒ့က့ၤတၢ်လၢ ပှၤအံၣ်စရ့လးဖိခဲလၢာ် အဂီၢ်လီၤ. အဝဲသ့ၣ်မၤဝဲဒ်အံၤ မ့ၢ်လၢ စီၤပၤမၤလိာ်ဝဲလၢ တၢ်လုၢ်ဒွဲၣ်အူ ဒီးတၢ်လုၢ်လၢ တၢ်ဒဲးဘးအဂီၢ်န့ၣ် ကဘၣ်မ့ၢ်ဝဲလၢ ပှၤအံၣ်စရ့လးဖိ ခဲလၢာ်အဂီၢ် အဃိလီၤ.
၂၅ ဒီးစီၤပၤ ဆီလီၤပာ်စၢၤ ပှၤလ့ၤဝံဖိတဖၣ် ဖဲယဟိဝၤယွၤ အဟံၣ် ဒီးအဝဲသ့ၣ် အိၣ်ဒီးစှၢၣ်စှံး, သီတူၢ် ဒီးတနၢ်တဖၣ်+ ဒ်စီၤဒၤဝံး,+ စီၤကး+ လၢအမ့ၢ် စီၤပၤအပှၤထံၣ်တၢ်ထံၣ်လၢညါခီတဂၤ ဒီးဝံနၤသၣ်+ မၤလိာ်ဝဲအသိးလီၤ. တၢ်မၤလိာ်တခါအံၤ ဟဲလၢ ယဟိဝၤယွၤ အအိၣ်ခီဖျိလၢ အဝံတဖၣ်လီၤ. ၂၆ အဃိ ပှၤလ့ၤဝံဖိတဖၣ် ဆၢထၢၣ်ဝဲ အိၣ်ဒီးစီၤဒၤဝံး အတၢ်ဒ့တၢ်အူ အပီးအလီတဖၣ် ဒီးပှၤလုၢ်တၢ်ဒိၣ်တဖၣ် အိၣ်ဒီးကွဲၤတဖၣ်လီၤ.+
၂၇ စီၤဃံးစကံယၤ ဟ့ၣ်လီၤတၢ်ကလုၢ်လၢ ပှၤကလုၢ်ထီၣ် တၢ်လုၢ်ဒွဲၣ်အူလၢ တၢ်လုၢ်လီၢ် အဖီခိၣ်လီၤ.+ ဖဲပှၤစးထီၣ် တၢ်လုၢ်တၢ်ပာ်အံၤအခါ တၢ်သးဝံၣ်လၢ ယဟိဝၤယွၤအဂီၢ် စးထီၣ်ဝဲလီၤ. ဒီးအံၣ်စရ့လး အစီၤပၤဒၤဝံး အတၢ်ဒ့တၢ်အူ အပီးအလီတဖၣ် သီၣ်ထီၣ်ဝဲ ဃုာ်ဒီးကွဲၤတဖၣ်လီၤ. ၂၈ ဖဲပှၤသးဝံၣ်ထီၣ်တၢ် ဒီးကွဲၤတဖၣ် သီၣ်ထီၣ်ဝဲအခါ တၢ်အိၣ်ဖှိၣ်ဒီတဖု ဘူၣ်ထီၣ်ဘါထီၣ်တၢ်လီၤ. တၢ်သ့ၣ်တဖၣ်အံၤ ဆဲးမၤအသး တုၤလၢ တၢ်လုၢ်ဒွဲၣ်အူ ဝံၤဝဲတစုလီၤ. ၂၉ ဒီးဖဲပှၤလုၢ်တၢ်ဒိၣ်တဖၣ် လုၢ်ထီၣ်တၢ်ဝံၤအလီၢ်ခံ စီၤပၤ ဒီးပှၤလၢအိၣ်ဒီးအီၤတဖၣ် ထိၣ်လီၤပှီၤအသး ဒီးဘူၣ်ထီၣ်ဘါထီၣ်တၢ်လီၤ. ၃၀ စီၤပၤဃံးစကံယၤ ဒီးပဒိၣ်ဖးဒိၣ်တဖၣ် မၢပှၤလ့ၤဝံဖိတဖၣ် စံးထီၣ်ပတြၢၤ ယဟိဝၤယွၤလၢ စီၤဒၤဝံး+ ဒီးစီၤအၤစာ်+ လၢအမ့ၢ် ပှၤထံၣ်တၢ်ထံၣ်လၢညါခီတဂၤန့ၣ် အတၢ်သးဝံၣ်လီၤ. အဃိ အဝဲသ့ၣ် စံးထီၣ်ပတြၢၤတၢ်လၢ တၢ်သူၣ်ဖှံသးညီ ဖးဒိၣ်အပူၤ ဒီးအဝဲသ့ၣ် ထိၣ်လီၤပှီၤအသး ဒီးဘူၣ်ထီၣ်ဘါထီၣ်တၢ်လီၤ.
၃၁ ဝံၤဒီး စီၤဃံးစကံယၤ တဲဝဲလၢ “ခဲအံၤ သုဘၣ်တၢ်ပာ်လီၤဆီသုလၢ ယဟိဝၤယွၤ အဂီၢ်လံအဃိ ဟဲစိာ် တၢ်လုၢ်တၢ်ပာ်တဖၣ် ဒီးတၢ်လုၢ်စံးဘျုးစံးဖှိၣ်က့ၤတဖၣ် လၢယဟိဝၤယွၤ အဟံၣ်တက့ၢ်.” အဃိ တၢ်အိၣ်ဖှိၣ် ဟဲစိာ်ဝဲ တၢ်လုၢ်တၢ်ပာ်တဖၣ် ဒီးတၢ်လုၢ်စံးဘျုးစံးဖှိၣ်က့ၤ တဖၣ်လီၤ. ပှၤတနီၤဟဲစိာ် တၢ်လုၢ်ဒွဲၣ်အူတဖၣ်လၢ တၢ်သူၣ်အိၣ်သးအိၣ်အပူၤလီၤ.+ ၃၂ တၢ်အိၣ်ဖှိၣ်ဟဲမူၤဝဲ ကျီၢ်အဒု ၇၀, သိဖါအဒု ၁၀၀ ဒီးသိဖါဖိ အဒု ၂၀၀ လၢတၢ်လုၢ်ဒွဲၣ်အူ အဂီၢ်လီၤ. တၢ်သ့ၣ်တဖၣ်န့ၣ် မ့ၢ်ဝဲတၢ်လုၢ်ဒွဲၣ်အူလၢ ယဟိဝၤယွၤ အဂီၢ်လီၤ.+ ၃၃ ဒီးလၢတၢ်လုၢ်စီဆှံ အဂီၢ်န့ၣ် အဝဲသ့ၣ်ဟဲမူၤဝဲ ကျီၢ်အဒု ၆၀၀ ဒီးသိအဒု ၃,၀၀၀ လီၤ. ၃၄ ဘၣ်ဆၣ် လၢကအုၣ်ကွံာ် ဆၣ်ဖိကီၢ်ဖိတဖၣ်အံၤ ခဲလၢာ် အဘ့ၣ်လၢ တၢ်လုၢ်ဒွဲၣ်အူတဖၣ်အဂီၢ်န့ၣ် ပှၤလုၢ်တၢ်ဒိၣ်တဖၣ် အိၣ်တယၢဘၣ်. အဃိ အဝဲသ့ၣ် အဒီပုၢ်ဝဲၢ် ပှၤလ့ၤဝံဖိတဖၣ် မၤစၢၤဝဲ တုၤလၢ အဝံၤတစု+ ဒီးတုၤလၢ ပှၤလုၢ်တၢ်ဒိၣ်အဂၤတဖၣ် မၤစီဆှံထီၣ်အသး န့ၢ်ဝဲတစုလီၤ.+ နီၢ်ကီၢ်န့ၣ် ဘၣ်ဃးဒီး တၢ်မၤစီဆှံထီၣ်သးန့ၣ် ပှၤလ့ၤဝံဖိတဖၣ် အသးဆူၣ်ဒိၣ်န့ၢ်ဒံး ပှၤလုၢ်တၢ်ဒိၣ်တဖၣ်လီၤ. ၃၅ တကးဒံးဘၣ် တၢ်လုၢ်ဒွဲၣ်အူတဖၣ်,+ တၢ်အသိအကူာ်အခီတဖၣ်လၢ တၢ်လုၢ်အိၣ်ဃူအိၣ်ဖိးတဖၣ်အဂီၢ်+ ဒီးစပံးထံလၢ ပှၤလုၢ်ထီၣ်ဃုာ်ဒီး တၢ်လုၢ်ဒွဲၣ်အူတဖၣ်န့ၣ်+ အိၣ်ဝဲအါမးလီၤ. အဃိ တၢ်မၤလၢ အဘၣ်ထွဲဒီး ယဟိဝၤယွၤ အဟံၣ်န့ၣ် က့ၤစးထီၣ်အိၣ်ကဒီးဝဲ ဒ်လၢညါအသိးလီၤ. ၃၆ ဒီးစီၤဃံးစကံယၤ ဒီးပှၤဂီၢ်မုၢ်ခဲလၢာ် သူၣ်ဖှံသးညီမ့ၢ်လၢ ယွၤလၢအမ့ၢ်အတီတဂၤ မၤစၢၤက့ၤအဝဲသ့ၣ်+ ဒီးတၢ်ကဲထီၣ်အသး ချ့ထဲအံၤညါ အဃိလီၤ.