၂ ကွဲးနီၣ်တၢ်
၁၅ ဒီးယွၤအသးစီဆှံ ဟဲလီၤလၢ စီၤဧိၤဒ့း အဖိခွါ စီၤဧစၤရယၤ အလိၤလီၤ. ၂ စီၤဧစၤရယၤ လဲၤထံၣ်လိာ်သးဒီး စီၤအၤစါ ဒီးတဲအီၤလၢ “စီၤအၤစါ ဒီးယူဒၤအဒူၣ် ဒီးဘံၣ်ယၤမံၣ် အဒူၣ်သ့ၣ်ဧၢ, ကနၣ်လၢအံၤ, သုမ့ၢ်အိၣ်ဒီး ယဟိဝၤယွၤန့ၣ် အဝဲကအိၣ်ဒီးသုလီၤ.+ သုမ့ၢ်ဃုအီၤန့ၣ် အဝဲကပျဲဝဲလၢ သုကထံၣ်န့ၢ်အီၤ+ ဘၣ်ဆၣ် သုမ့ၢ်ပာ်တ့ၢ်ကွံာ်အီၤန့ၣ် အဝဲကပာ်တ့ၢ်ကွံာ်သုလီၤ.+ ၃ ယွၤလၢအမ့ၢ်အတီတဂၤ တအိၣ်ဒီး ပှၤအံၣ်စရ့လးဖိဘၣ်, ပှၤအံၣ်စရ့လးဖိတအိၣ်ဒီး ပှၤလုၢ်တၢ်ဒိၣ်လၢ ကသိၣ်လိ အဝဲသ့ၣ်ဘၣ် ဒီးအဝဲသ့ၣ် တမၤထွဲ တၢ်သိၣ်တၢ်သီဘၣ်န့ၣ် အိၣ်ဖးယံာ်လံ.+ ၄ ဘၣ်ဆၣ် ဖဲအဝဲသ့ၣ် ဘၣ်ကိၢ်ဘၣ်ဂီၤအခါ အဝဲသ့ၣ် ဟဲက့ၤကဒါက့ၤလၢ အံၣ်စရ့လး အကစၢ် ယဟိဝၤယွၤအအိၣ် ဒီးအဝဲသ့ၣ် ဃုအီၤ ဒီးအဝဲပျဲဝဲလၢ အဝဲသ့ၣ် ကထံၣ်န့ၢ်အီၤလီၤ.+ ၅ ဖဲန့ၣ်အဆၢကတီၢ် လၢဟီၣ်ကဝီၤတဖၣ်အပူၤန့ၣ် တၢ်ပြုထီၣ်* ဝဲဒီဒူၣ် အဃိ ပှၤလၢအလဲၤတၢ်က့ၤတၢ်တဖၣ် တပူၤဖျဲးဝဲဒီး တၢ်ဘၣ်ယိၣ် နီတဂၤဘၣ်. ၆ ဝ့ၢ်တဝ့ၢ်ဘၣ်တဝ့ၢ် ဒီးပှၤတဒူၣ်ဘၣ်တဒူၣ် ဆီၣ်တံၢ်မၤနၢၤလိာ်သး မ့ၢ်လၢကစၢ်ယွၤ မၤကိၢ်မၤဂီၤအဝဲသ့ၣ် ခီဖျိလၢ တၢ်ကီတၢ်ခဲ အကလုာ်ကလုာ် အဃိလီၤ.+ ၇ ဘၣ်ဆၣ် မ့မ့ၢ်သုန့ၣ် ပာ်ဆူၣ်ထီၣ်သုသး ဒီးတဘၣ်သးဟးဂီၤတဂ့ၤ,+ မ့ၢ်လၢ သုကဒိးန့ၢ်ဘၣ်က့ၤ ခိၣ်ဖးလၢ တၢ်လၢသုမၤတဖၣ် အဃိလီၤ.”
၈ ဖဲစီၤအၤစါ နၢ်ဟူဝဲ တၢ်ကတိၤတဖၣ်အံၤ ဒီးဝံဧိၤဒ့း တဲတၢ်ဒ်ဝံအသိးဝံၤအလီၢ်ခံ အဝဲပာ်ဆူၣ်ထီၣ်အသး ဒီးမၤဟးဂီၤကွံာ်ဝဲ တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်လၢ အအိၣ်လၢ ယူဒၤ+ ဒီးဘံၣ်ယၤမံၣ် အဟီၣ်ကဝီၤအပူၤခဲလၢာ် ဒီးဝ့ၢ်တဖၣ်လၢ အမၤန့ၢ်ပာ်စၢၤဝဲလၢ အ့ဖရဲၣ် အကစၢၢ်ကလိကျါန့ၣ်လီၤ. ဒီးအဝဲ ဘှီဂ့ၤထီၣ်က့ၤ ယဟိဝၤယွၤ အတၢ်လုၢ်လီၢ် လၢအအိၣ်လၢ ယဟိဝၤယွၤ အဘျီၣ်ဒိၣ်အမဲာ်ညါလီၤ.+ ၉ လၢညါ ဖဲအ့ဖရဲၣ်အဒူၣ်, မနၤၡ့ၤအဒူၣ် ဒီးစူၤမ့းအိၣ်အဒူၣ် ထံၣ်ဝဲလၢ ယဟိဝၤယွၤ အိၣ်ဒီးစီၤအၤစါအခါ အဝဲသ့ၣ်အါဂၤ အိၣ်ဃူအီၤ, ဟးထီၣ်လၢ အံၣ်စရ့လးဘီမုၢ် ဒီးလဲၤအိၣ်လၢ ယူဒၤအဘီမုၢ် အပူၤလီၤ. အဃိ စီၤအၤစါ ကိးဖှိၣ် ယူဒၤ ဒီးဘံၣ်ယၤမံၣ် အပှၤဂီၢ်မုၢ်ခဲလၢာ် ဃုာ်ဒီး ပှၤလၢ အလဲၤအိၣ်လၢ အဝဲသ့ၣ် အကျါတဖၣ်အံၤလီၤ.+ ၁၀ အဃိ ဖဲစီၤအၤစါ ပၢတၢ် ၁၅ နံၣ်တနံၣ်, လါသၢလါတလါန့ၣ် အဝဲသ့ၣ် ပာ်ဖှိၣ်ထီၣ်အသးလၢ ဝ့ၢ်ယရူၤၡလ့ၣ်လီၤ. ၁၁ ဒီးလၢတၢ်ဂုာ်န့ၢ်လၢ အဝဲသ့ၣ် ဟဲက့ၤစိာ်ဝဲတဖၣ် အကျါန့ၣ် အဝဲသ့ၣ်လုၢ်ထီၣ်ဝဲ ကျီၢ်အဒု ၇၀၀ ဒီးသိအဒု ၇,၀၀၀ လၢယဟိဝၤယွၤ အအိၣ် ဖဲနံၤအဝဲန့ၣ်လီၤ. ၁၂ တကးဒံးဘၣ် အဝဲသ့ၣ် မၤတၢ်အၢၣ်လီၤအီလီၤလၢ အကဃု အမိၢ်ပၢ်ဖံဖု လၢပျၢၤတဖၣ် အကစၢ်ယဟိဝၤယွၤ လၢအသးဒီဖျၢၣ် ဒီးလၢအတၢ်အိၣ်မူ ကိးသနၢၣ်ဒဲးအပူၤလီၤ.+ ၁၃ ဒီးပှၤအဒိၣ်မ့ၢ်ဂ့ၤ, ပှၤအဆံးမ့ၢ်ဂ့ၤ, ပှၤပိာ်မုၣ်မ့ၢ်ဂ့ၤ, ပှၤပိာ်ခွါမ့ၢ်ဂ့ၤ ဒီးပှၤတဂၤဂ့ၤ တဂၤဂ့ၤလၢ အတဃု အံၣ်စရ့လး အကစၢ် ယဟိဝၤယွၤဘၣ်န့ၣ် ကဘၣ်တၢ်မၤသံအီၤလီၤ.+ ၁၄ အဃိ အဝဲသ့ၣ်အၢၣ်လီၤ ယဟိဝၤယွၤလၢ အကလုၢ်ဖးဒိၣ် ဒီးအဝဲသ့ၣ် ကိးပသူထီၣ်လၢ တၢ်သးခုအပူၤ ဒီးအူထီၣ်ကွဲၤလီၤ. ၁၅ အဝဲသ့ၣ် မၤတၢ်အၢၣ်လီၤလၢ အသးဒီဖျၢၣ် ဒီးအဝဲသ့ၣ် ဃုကစၢ်ယွၤလၢ တၢ်သူၣ်ဆူၣ်သးဆူၣ်အပူၤ အဃိ ကစၢ်ယွၤပျဲဝဲလၢ အဝဲသ့ၣ် ကထံၣ်န့ၢ်အီၤလီၤ.+ အဃိ အဝဲသ့ၣ် သူၣ်ခုသးခုလၢ တၢ်အၢၣ်လီၤအံၤအဃိလီၤ. ဒီးယဟိဝၤယွၤ ဆဲးဟ့ၣ်အဝဲသ့ၣ် တၢ်မုာ်တၢ်ခုၣ်လၢ တၢ်လီၢ်လၢ အကပိာ်ကပၤဝးဝးလီၤ.+
၁၆ စီၤပၤအၤစါန့ၣ် အဖံနီၢ်မၤကၤဒၣ်လဲာ်+ အဝဲထုးထီၣ်ကွံာ်ဝဲလၢ နီၢ်ပၤမုၣ်အလီၢ်အလၤ, မ့ၢ်လၢ နီၢ်မၤကၤ တ့ထီၣ် တၢ်ဂီၤတၢ်ဖှီၣ်လၢ အလီၤသးဘၣ်အၢတခါလၢ တၢ်ဘူၣ်ထီၣ်ဘါထီၣ် တၢ်စီဆှံအထူၣ်* အဂီၢ်လီၤ.+ စီၤအၤစါ မၤဟးဂီၤကွံာ်ဝဲ တၢ်ဂီၤတၢ်ဖှီၣ် လၢအလီၤသးဘၣ်အၢ တခါအံၤ, မၤလီၤဘျဲး ဒီးဒွဲၣ်အူထီၣ်ဝဲလၢ ကံဒြိၣ်တၢ်တြီၤပူၤလီၤ.+ ၁၇ ဘၣ်ဆၣ် လၢအံၣ်စရ့လးအပူၤန့ၣ်+ တၢ်လီၢ်ထီၣ်ထီတဖၣ် အိၣ်ဒံးဝဲလီၤ.+ သနာ်က့ စီၤအၤစါန့ၣ် အသးတီဝဲလၢ အသးဒီဖျၢၣ် လၢအတၢ်အိၣ်မူ ဒီတစိၤလီၤ.+ ၁၈ ဒီးတၢ်ခဲလၢာ်လၢ စီၤအၤစါ ဒီးအပၢ် ပာ်စီဆှံဝဲ ဒ်သိးဒီး စ့ညၣ်, ထူ ဒီးတၢ်ပီးတၢ်လီ အကလုာ်ကလုာ်န့ၣ် အဝဲဟဲစိာ်ဝဲလၢ ယွၤလၢအမ့ၢ်အတီတဂၤ အဟံၣ်ပူၤလီၤ.+ ၁၉ ဒီးတၢ်ဒုးတၢ်ယၤတအိၣ်ဘၣ် တုၤလီၤလၢ စီၤအၤစါ ပၢတၢ် ၃၅ နံၣ်တနံၣ်န့ၣ်လီၤ.+