၂ ကွဲးနီၣ်တၢ်
၃ ဒီးစီၤၡလိၤမိၤတ့ထီၣ် ဟံၣ်လၢ ယဟိဝၤယွၤအဂီၢ်+ လၢကစၢၢ်မိၤရံယၤအလိၤ+ လၢဝ့ၢ်ယရူၤၡလ့ၣ်အပူၤ ဖဲတၢ်လီၢ်လၢ စီၤဒၤဝံး ကတဲာ်ကတီၤပာ်စၢၤဝဲလၢ ပှၤယဘူၣ်ဖိ စီၤအၤရနၤ အကြဲၢ်ပူၤန့ၣ်လီၤ.+ ဖဲန့ၣ်န့ၣ် ယဟိဝၤယွၤ လီၣ်ဖျါထီၣ်တ့ၢ်အသးလၢ အပၢ်စီၤဒၤဝံး အအိၣ်လီၤ.+ ၂ ဖဲစီၤၡလိၤမိၤ ပၢတၢ်လွံၢ်နံၣ်တနံၣ်, လါခံလါတလါ, လါထီၣ်ခံသီတသီန့ၣ် အဝဲစးထီၣ် သူၣ်ထီၣ်ဝဲ ယွၤအဟံၣ်လီၤ. ၃ တၢ်အခီၣ်ထံးလၢ စီၤၡလိၤမိၤ သူၣ်လီၤဝဲ လၢကတ့ထီၣ် ယွၤလၢအမ့ၢ်အတီတဂၤ အဟံၣ်အဂီၢ်န့ၣ် အထီအိၣ်ဝဲ အပျၢ်* ၆၀ ဒီးအဒီၣ်ဃီၤအိၣ်ဝဲ အပျၢ် ၂၀+ ဒ်တၢ်ထိၣ်တၢ်ဒွး အိၣ်ပာ်စၢၤဝဲလၢညါ အသိးလီၤ. ၄ တၢ်လုၢ်ဟံၣ်အဘျီၣ်ဒိၣ် လၢအအိၣ်ဝဲလၢ အမဲာ်ညါတကပၤန့ၣ် အဒီၣ်ဃီၤအိၣ်ဝဲ အပျၢ် ၂၀ တုၤသိးသိးဒီး တၢ်လုၢ်ဟံၣ်အဒီၣ်ဃီၤ ဒီးအကစီၤထီၣ်ထီ အိၣ်ဝဲ အပျၢ် ၁၂၀ လီၤ. ဒီးစီၤၡလိၤမိၤ ကျးဝဲအပူၤလၢ ထူစီ အကဘျၣ်လီၤ.+ ၅ အဝဲကျးဝဲ ဟံၣ်ဖးဒိၣ်န့ၣ်လၢ သ့ၣ်ကၠူနံးဖၢၤ ဝံၤဒီးအကျးဘၢဝဲလၢ ထူလၢအဂ့ၤ+ ဒီးအဝဲကယၢကယဲထီၣ်ဝဲဒီး သ့ၣ်စူၣ်ပလိၣ်အဂီၤ+ ဒီးပျံၤထးအဂီၤတဖၣ်လီၤ.+ ၆ တကးဒံးဘၣ် အဝဲထီထီၣ် တၢ်လုၢ်ဟံၣ်လၢ လၢၢ်လၢ အလုၢ်ဒိၣ်ပှ့ၤဒိၣ် လၢအဃံလၤတဖၣ်+ ဒီးထူလၢ+ အဝဲသူဝဲန့ၣ် ဟဲလၢ ပးရဝဲၣ်န့ၣ်လီၤ. ၇ ဒီးဟံၣ်, ဟံၣ်အခိၣ်ဒုးလၢ အကိပူၤတပၤ, ဟံၣ်ဒူၣ်တဖၣ် ဒီးအတြဲၤတဖၣ်န့ၣ် အဝဲကျးဝဲလၢ ထူကဘျၣ်လီၤ.+ ဒီးအဝဲစိးပျၤဝဲ ခ့ရူာ်အဂီၤတဖၣ်လၢ ဟံၣ်ဒူၣ်တဖၣ်အလိၤလီၤ.+
၈ အဝဲတ့ထီၣ် တၢ်လီၢ်စီဆှံကတၢၢ်တဒၢး+ ဒီးအထီအိၣ်ဝဲ အပျၢ် ၂၀ ဒ်တၢ်လုၢ်ဟံၣ်အလဲၢ်အိၣ်ဝဲအသိး ဒီးဒၢးအံၤအလဲၢ် အိၣ်ဝဲအပျၢ် ၂၀ စ့ၢ်ကီးလီၤ. အဝဲကျးဒၢးတဖျၢၣ်အံၤ လၢထူကဘျၣ်+ အတၤလၣ်* ၆၀၀ လီၤ. ၉ ထူလၢ ထးပနဲာ်ဖိတဖၣ်အဂီၢ်န့ၣ် အတယၢၢ်အိၣ်ဝဲ ၡက့လး* ၅၀ လီၤ. ဒီးအဝဲကျးဝဲ ဒၢးတဖၣ်လၢဟံၣ်ခိၣ်န့ၣ် လၢထူကဘျၣ်လီၤ.
၁၀ လၢတၢ်လီၢ်စီဆှံကတၢၢ်တဒၢး အပူၤန့ၣ် အဝဲတ့ထီၣ် ခ့ရူာ်အဂီၤခံဒု ဒီးကျးဝဲဒီး ထူကဘျၣ်လီၤ.+ ၁၁ ပှၤမ့ၢ်ပာ်ဖှိၣ် ခ့ရူာ်တဖၣ်+ အဒံးဆ့လွံၢ်ဘ့ၣ်န့ၣ် အထီအိၣ်ဝဲ အပျၢ် ၂၀ လီၤ. ခ့ရူာ်အဆိကတၢၢ်တဒု အဒံးဆ့တဘ့ၣ်န့ၣ် အထီအိၣ်ဝဲ ယဲၢ်ပျၢ် ဒီးထိးဘၣ်ဝဲ ဟံၣ်ဒူၣ်ကပၤ ဒီးအဒံးဆ့လၢ အဝဲတဘ့ၣ်န့ၣ် အထီအိၣ်ဝဲ ယဲၢ်ပျၢ် ဒီးအထိးဘၣ်ဝဲ ခ့ရူာ်လၢ အဝဲတဒု အဒံးဆ့လီၤ. ၁၂ ဒီးခ့ရူာ်လၢ အဝဲတဒု အဒံးဆ့တဘ့ၣ်န့ၣ် အထီအိၣ်ဝဲ ယဲၢ်ပျၢ် ဒီးထိးဘၣ်ဝဲ ဟံၣ်ဒူၣ်လၢ အဝဲတကပၤ ဒီးအဒံးဆ့လၢ အဝဲတဘ့ၣ်န့ၣ် အထီအိၣ်ဝဲ ယဲၢ်ပျၢ် ဒီးအထိးလိာ်သးဒီး ခ့ရူာ်အဆိကတၢၢ်တဒုန့ၣ် အဒံးဆ့လီၤ. ၁၃ ခ့ရူာ်တဖၣ် အဒံးဆ့လၢ အသလၣ်ထီၣ်အသးလွံၢ်ဘ့ၣ်အံၤ အထီအိၣ်ဝဲ အပျၢ် ၂၀ လီၤ. ခ့ရူာ်တဖၣ် ဆၢထၢၣ်ဘျၢဘျၢဒီး အမဲာ်ကွၢ်တၢ် လိၤလိၤလၢ တၢ်ကိပူၤလီၤ.*
၁၄ အဝဲမၤထီၣ်ဝဲ ယၣ်ဘျးသဒၢ+ လၢလုၣ်လၢ အလါအဲး, သိဆူၣ်လၢ အလွဲၢ်လုး, လုၣ်လၢ အလွဲၢ်ဂီၤ, တၢ်ကံးညာ်လၢအဂ့ၤ ဒီးဆးထီၣ်ဝဲ ခ့ရူာ်အဂီၤ လၢအလိၤလီၤ.+
၁၅ ဝံၤဒီး အဝဲတ့ထီၣ်ဝဲ တၢ်အထူၣ် ခံထူၣ်လၢ+ ဟံၣ်မဲာ်ညါ လၢအထီအိၣ်ဝဲ ၃၅ ပျၢ်န့ၣ်လီၤ. ဒီးတၢ်ခိၣ်ထိးလၢ အအိၣ်လၢ အထူၣ်တထူၣ်စုာ်စုာ် အဖီခိၣ်န့ၣ် အိၣ်ဝဲ ယဲၢ်ပျၢ်လီၤ.+ ၁၆ ဒီးအဝဲတ့ထီၣ်ဝဲ ပျံၤထးတဖၣ် လၢအလီၤဂာ်ဒ် ဖဲတဖၣ်အသိး ဒီးဘျးလီၤဝဲလၢ တၢ်အထူၣ်တဖၣ် အဖီခိၣ်လီၤ. ဒီးအဝဲတ့ထီၣ်ဝဲ တၢ်ကယၢကယဲလၢ အလီၤဂာ်ဒီးသလဲသၣ် အဖျၢၣ် ၁၀၀ ဒီးဘျးလီၤဝဲလၢ ပျံၤထးတဖၣ်အလိၤလီၤ. ၁၇ အဝဲဆီလီၤ တၢ်အထူၣ်ခံထူၣ်အံၤ လၢတၢ်လုၢ်ဟံၣ် အမဲာ်ညါ လၢစုထွဲတကပၤ* ဒီးလၢစုစ့ၣ်* တကပၤလီၤ. တၢ်အထူၣ်လၢ စုထွဲတကပၤန့ၣ် အကိးန့ၢ်ဝဲအမံၤလၢ ယၤကံၣ်* ဒီးတၢ်အထူၣ်လၢ စုစ့ၣ်တကပၤန့ၣ် အကိးန့ၢ်ဝဲ အမံၤလၢ ဘိၤဧးလီၤ.*