၂ ကွဲးနီၣ်တၢ်
၂၃ ဖဲနွံနံၣ်တနံၣ်န့ၣ် စီၤယဟိၤယဒါ မၤတၢ်လၢ တၢ်သးဒူအပူၤ ဒီးမၤဝဲတၢ်အၢၣ်လီၤဒီး ပှၤအကယၤအခိၣ်တဖၣ်+ လၢအမ့ၢ်ဝဲ စီၤယရိဃၣ် အဖိခွါ စီၤဧစၤရယၤ, စီၤယိဃၤနာ် အဖိခွါ စီၤယံးၡမၤဧ့လး, စီၤဧိၤဘ့း အဖိခွါ စီၤဧစၤရယၤ, စီၤဧဒါယၤ အဖိခွါ စီၤမၤစ့ယၤ ဒီးစီၤစံးကရံ အဖိခွါ စီၤအလံၡဖးလီၤ. ၂ ဒီးအဝဲသ့ၣ် လဲၤဝဲလၢ ယူဒၤဘီမုၢ် ဒီတဘ့ၣ် ဒီးကိးဖှိၣ်ထီၣ်ဝဲ ပှၤလ့ၤဝံဖိတဖၣ်+ လၢအအိၣ်လၢ ယူဒၤအဝ့ၢ်ကိးဖျၢၣ်ဒဲး ဒီးအံၣ်စရ့လး အဒူၣ်ဖိထၢဖိ အခိၣ်အနၢ်တဖၣ်လီၤ. ဖဲအဝဲသ့ၣ် လဲၤတုၤလၢ ဝ့ၢ်ယရူၤၡလ့ၣ်အခါ ၃ တၢ်အိၣ်ဖှိၣ် ဒီတဖု မၤတၢ်အၢၣ်လီၤအီလီၤ+ ဒီးစီၤပၤ ဖဲယွၤလၢ အမ့ၢ်အတီတဂၤ အဟံၣ် ဝံၤဒီး စီၤယဟိၤယဒါ တဲအဝဲသ့ၣ်လၢ
“စီၤပၤအဖိခွါ ကပၢတၢ်ဒ် ယဟိဝၤယွၤ အၢၣ်လီၤပာ်စၢၤ ဘၣ်ဃးဒီး စီၤဒၤဝံး အဖိခွါတဖၣ်လီၤ.+ ၄ သုကဘၣ် မၤဒ်အံၤ, သုဝဲ ပှၤလုၢ်တၢ်ဒိၣ် ဒီးပှၤလ့ၤဝံဖိ သၢပူတပူ လၢအအိၣ်ဒီးမူဒါ+ ဖဲမုၢ်အိၣ်ဘှံးနံၤန့ၣ် ကဘၣ်ကဲ ပှၤခိးတြဲၤဖိတဖၣ်လီၤ.+ ၅ ဒီးသုဝဲလၢအဂၤ သၢပူတပူန့ၣ် ကဘၣ်အိၣ်လၢ စီၤပၤအဟံၣ်+ ဒီးသုဝဲလၢအဂၤ သၢပူတပူန့ၣ် ကဘၣ်အိၣ်လၢ တၢ်သူၣ်ထီၣ်အခီၣ်ထံး အတြဲၤတဘ့ၣ် ဒီးပှၤအဂၤ ခဲလၢာ်န့ၣ် ကဘၣ်အိၣ်လၢ ယဟိဝၤယွၤ အဟံၣ် အတၢ်ပျီတဖၣ် အပူၤလီၤ.+ ၆ တဘၣ်ပျဲနုာ် ပှၤလၢယဟိဝၤယွၤအဟံၣ် နီတဂၤတဂ့ၤ. ပှၤလဲၤနုာ်သ့ထဲ ပှၤလုၢ်တၢ်ဒိၣ် ဒီးပှၤလ့ၤဝံဖိတဖၣ်လၢ အမၤ တၢ်အခ့အပှၤ အတၢ်မၤတဖၣ်လီၤ.+ ပှၤသ့ၣ်တဖၣ်အံၤ လဲၤနုာ်ဝဲန့ၢ် မ့ၢ်လၢ အဝဲသ့ၣ် မ့ၢ်ပှၤလၢ အစီဆှံတဒူၣ်အဃိလီၤ. ဒီးပှၤအဂၤခဲလၢာ် ကဘၣ်မၤ အမူဒါလၢ ယဟိဝၤယွၤ ဟ့ၣ်လီၤအီၤလီၤ. ၇ ပှၤလ့ၤဝံဖိတဖၣ် ကဘၣ်အိၣ်ဝးတရံး စီၤပၤ ဒီးသုဝဲတဂၤစုာ်စုာ် ကဘၣ်စိာ်ဒီး တၢ်စုကဝဲၤတဖၣ်လီၤ. ပှၤတဂၤဂ့ၤ တဂၤဂ့ၤလၢ အဟဲနုာ်လီၤ လၢဟံၣ်န့ၣ် ကဘၣ်တၢ်မၤသံအီၤလီၤ. စီၤပၤမ့ၢ်လဲၤ ဖဲလဲၣ်ဂ့ၤ ဖဲလဲၣ်ဂ့ၤန့ၣ် လဲၤဒီးအီၤတက့ၢ်.”
၈ ပှၤလ့ၤဝံဖိတဖၣ် ဒီးယူဒၤအပှၤဂီၢ်မုၢ် ခဲလၢာ် မၤဝဲဒ် ပှၤလုၢ်တၢ်ဒိၣ် စီၤယဟိၤယဒါ မၤလိာ်ဝဲအသိးလီၤ. ဒီးမ့ၢ်လၢ ပှၤလုၢ်တၢ်ဒိၣ် စီၤယဟိၤယဒါ တဟ့ၣ်အခွဲးလၢ ကရူၢ်တဖၣ်+ ကပတုာ်အမူဒါတဖၣ်ဘၣ်အဃိ ပှၤအခိၣ် တဂၤစုာ်စုာ် ကိးထီၣ်ဝဲ အပှၤလၢ အအိၣ်ဒီးမူဒါ ဖဲမုၢ်အိၣ်ဘှံးနံၤ+ ဃုာ်ဒီး အပှၤလၢ အတအိၣ်ဒီးမူဒါ ဖဲမုၢ်အိၣ်ဘှံးနံၤဘၣ်လီၤ. ၉ ပှၤလုၢ်တၢ်ဒိၣ် စီၤယဟိၤယဒါ ဟ့ၣ်လီၤဝဲ ပှၤအကယၤ အခိၣ်တဖၣ်လၢ+ စီၤပၤဒၤဝံး အဘီတဖၣ်, အကတီၤဖိတဖၣ်* ဒီးအကတီၤတဖၣ်လၢ+ အအိၣ်လၢ ယွၤလၢအမ့ၢ်အတီတဂၤ အဟံၣ်ပူၤလီၤ.+ ၁၀ ဒီးအဝဲဆီလီၤပှၤခဲလၢာ် ဝးတရံးဝဲ စီၤပၤ စးထီၣ်လၢ ဟံၣ်အထွဲတကပၤ တုၤလၢ ဟံၣ်အစ့ၣ်တကပၤ လၢတၢ်လုၢ်လီၢ် ဒီးဟံၣ်အဃၢၤန့ၣ်လီၤ. ဒီးအဝဲသ့ၣ် တဂၤစုာ်စုာ်န့ၣ် စိာ်ဝဲဒီး တၢ်စုကဝဲၤလီၤ. ၁၁ ဝံၤဒီး အဝဲသ့ၣ် ဟဲကိးထီၣ် စီၤပၤ အဖိခွါ+ ဒီးပာ်ထီၣ် ခိၣ်သလုးဒီး တၢ်အၢၣ်လီၤအီလီၤအလံာ်*+ လၢအခိၣ်လိၤ ဒီးအဝဲသ့ၣ် ပာ်ထီၣ်အီၤလၢ စီၤပၤလီၤ. ဒီးစီၤယဟိၤယဒါဒီး အဖိခွါတဖၣ် ဒိးဖှူအီၤလီၤ. ဝံၤဒီး အဝဲသ့ၣ်တဲဝဲလၢ “မ်စီၤပၤ အိၣ်မူဘၣ် ယံာ်ယံာ်တက့ၢ်.”+
၁၂ ဖဲနီၢ်ဧသၤလယၤ နၢ်ဟူဝဲလၢ ပှၤဂီၢ်မုၢ်ဃ့ၢ်သီၣ် ဒီးစံးပတြၢၤဝဲ စီၤပၤအခါ အဝဲလဲၤလၢ ပှၤဂီၢ်မုၢ်အအိၣ်လၢ ယဟိဝၤယွၤ အဟံၣ်တဘျီဃီလီၤ.+ ၁၃ ဒီးအဝဲထံၣ်စီၤပၤ ဆၢထၢၣ်ဖဲန့ၣ် ဘူးဒီးတၢ်အထူၣ် ဖဲကျဲနုာ်လီၤအလီၢ်န့ၣ်လီၤ. ပဒိၣ်ဖးဒိၣ်တဖၣ်+ ဒီးပှၤအူကွဲၤတဖၣ် အိၣ်ဒီးစီၤပၤ ဒီးပှၤထံဖိကီၢ်ဖိတဖၣ် သူၣ်ဖှံသးညီ+ ဒီးအူထီၣ်ဝဲကွဲၤ ဒီးပှၤသးဝံၣ်တၢ်ဖိလၢ အအိၣ်ဒီး တၢ်ဒ့တၢ်အူ အတၢ်ပီးတၢ်လီတဖၣ်န့ၣ် တီခိၣ်ရိၤမဲဝဲ တၢ်သူၣ်ဖှံသးညီတဘျီအံၤလီၤ. အဃိ နီၢ်ဧသၤလယၤ ဖှီညာ်အဆ့ကၤ ဒီးကိးပသူထီၣ်ဝဲလၢ “ပှၤကူၣ်ခူသူၣ်တၢ်လံ, ပှၤကူၣ်ခူသူၣ်တၢ်လံ.” ၁၄ ဘၣ်ဆၣ် ပှၤလုၢ်တၢ်ဒိၣ် စီၤယဟိၤယဒါ တဲပာ်စၢၤဝဲလၢ “တဘၣ် မၤသံအီၤလၢ ယဟိဝၤယွၤ အဟံၣ်ပူၤတဂ့ၤ.” အဃိ စီၤယဟိၤယဒါ ကိးထီၣ်ဝဲ ပှၤအကယၤ အခိၣ်တဖၣ်လၢ အအိၣ်ဝဲလၢ သုးမုၢ်အဖီခိၣ် ဒီးတဲအဝဲသ့ၣ်လၢ “ဒုးဟးထီၣ်အီၤလၢ သုးဖိလၢ အအိၣ်ရဲၣ်လီၤအသးတဖၣ်အအိၣ် ဒီးပှၤတဂၤဂ့ၤ တဂၤဂ့ၤ မ့ၢ်ပိာ်ထီၣ်အခံန့ၣ် မၤသံအီၤလၢနးတက့ၢ်.” ၁၅ အဃိ အဝဲသ့ၣ် ဖီၣ်န့ၢ်အီၤ ဒီးလဲၤကိးအီၤတုၤလၢ ကသ့ၣ်အတြဲၤ ဖဲစီၤပၤအဟံၣ်* ဒီးအဝဲသ့ၣ် မၤသံကွံာ်အီၤဖဲန့ၣ် တဘျီဃီလီၤ.
၁၆ ဒီးစီၤယဟိၤယဒါ ဒုးအိၣ်ထီၣ် တၢ်အၢၣ်လီၤအီလီၤ လၢအနီၢ်ကစၢ် ဒီးပှၤဂီၢ်မုၢ် ဒီးစီၤပၤ အဘၢၣ်စၢၤ လၢအဝဲသ့ၣ် ကဆဲးကဲဝဲ ယဟိဝၤယွၤ အပှၤဂီၢ်မုၢ်န့ၣ်လီၤ.+ ၁၇ ဝံၤဒီး ပှၤဂီၢ်မုၢ်ခဲလၢာ် လဲၤလၢ ဘဧၤလးအဟံၣ်* ဒီးမၤလီၤပှီၢ်ကွံာ်ဝဲ ဘဧၤလးအဟံၣ်,+ မၤသဘှံးဝဲ အတၢ်လုၢ်လီၢ်တဖၣ် ဒီးအတၢ်ဂီၤတၢ်ဖှီၣ်တဖၣ်+ ဒီးအဝဲသ့ၣ် မၤသံကွံာ်ဝဲ စီၤမးတၣ် လၢအမ့ၢ် ဘဧၤလး အပှၤလုၢ်တၢ်ဒိၣ်+ လၢတၢ်လုၢ်လီၢ်တဖၣ် အမဲာ်ညါလီၤ. ၁၈ ဒီးစီၤယဟိၤယဒါ ပာ်ထီၣ်ဝဲ ပှၤလုၢ်တၢ်ဒိၣ် ဒီးပှၤလ့ၤဝံဖိတဖၣ်လၢ ကတီခိၣ်ရိၤမဲတၢ်လၢ ယဟိဝၤယွၤအဟံၣ်လီၤ. ဒီးအဝဲသ့ၣ် မၤဝဲမူဒါလၢ တၢ်သူၣ်ဝံၣ်သးဆၢ ဒီးတၢ်သူၣ်ဖှံသးညီအပူၤ ဒ်စီၤဒၤဝံး မၤလိာ်ဝဲအသိးလီၤ. လၢညါန့ၣ် စီၤဒၤဝံး နီၤဖးလီၤ အဝဲသ့ၣ်လၢ ကရူၢ်တဖၣ်လၢ ကအံးထွဲကွၢ်ထွဲ ယဟိဝၤယွၤအဟံၣ် ဒီးဟ့ၣ်လုၢ်ထီၣ် တၢ်လုၢ်ဒွဲၣ်အူတဖၣ်လၢ ယဟိဝၤယွၤအအိၣ်+ ဒ်တၢ်ကွဲးအသးလၢ စီၤမိၤၡ့ အတၢ်သိၣ်တၢ်သီအပူၤ+ အိၣ်ဝဲအသိးလီၤ. ၁၉ စီၤယဟိယဒါ ဆီလီၤစ့ၢ်ကီး ပှၤခိးတြဲၤဖိတဖၣ်+ ဖဲယဟိဝၤယွၤ အဟံၣ်တြဲၤတဖၣ် အခီၣ်ထံး ဒ်သိးပှၤလၢ အတကဆှီဘၣ်တဖၣ် လဲၤနုာ်ဖဲန့ၣ် သုတန့ၢ် နီတဂၤတဂ့ၤအဂီၢ်လီၤ. ၂၀ ဒီးအဝဲလဲၤကိးဃုာ်ဒီး ပှၤအကယၤ အခိၣ်တဖၣ်,+ ပှၤဒိၣ်ပှၤပှၢ်တဖၣ်, ပှၤဂီၢ်မုၢ်ခိၣ်နၢ်တဖၣ် ဒီးပှၤထံဖိကီၢ်ဖိခဲလၢာ် ဒီးအဝဲသ့ၣ် လဲၤဆှၢ စီၤပၤလၢ အအိၣ်လၢ ယဟိဝၤယွၤအဟံၣ် ဆူစီၤပၤအနီပူၤလီၤ. ဒီးအဝဲသ့ၣ် လဲၤနုာ်လီၤဝဲ ခီဖျိလၢ စီၤပၤအဟံၣ် အတြဲၤလၢ တၢ်ဖီခိၣ်တဘ့ၣ် ဝံၤဒီးဒုးဆ့ၣ်နီၤ+ စီၤပၤလၢ စီၤပၤအလီၢ်ပစိာ်+ အဖီခိၣ်လီၤ. ၂၁ ဒီးအဝဲသ့ၣ် မၤသံကွံာ် နီၢ်ဧသၤလယၤ လၢနးလံ အဃိ ပှၤထံဖိကီၢ်ဖိခဲလၢာ် သူၣ်ခုသးခု ဒီးဝ့ၢ်ပူၤန့ၣ် အိၣ်ဝဲဒီး တၢ်မုာ်တၢ်ခုၣ်လီၤ.