စံးထီၣ်ပတြၢၤ
လံာ်ခံဘ့ၣ်တဘ့ၣ်
(စံးထီၣ်ပတြၢၤ ၄၂-၇၂)
လၢတၢ်သူၣ်ဝံၣ်သးဆၢအခိၣ်အဂီၢ်. စီၤကိၤရးအဖိခွါတဖၣ်အတၢ်သးဝံၣ်.+ မၣ်စခ့.*
၄၂ ဒ်တၤဟိတဒု အဲၣ်ဒိးအီ ထံကျိဖိအထံအသိး
အိ ကစၢ်ယွၤဧၢ, ယအဲၣ်ဒိး မၤနတၢ်လီၤ.
၂ ဒ်ပှၤတဂၤလီၤဘဲအီထံအသိး ယလိၣ်ဘၣ် ယွၤလၢအမူဝဲတဂၤ သပှၢ်ကတၢၢ်လီၤ.+
ယလဲၤပာ်ဖျါထီၣ်ယသးလၢ ကစၢ်ယွၤအမဲာ်ညါ ကန့ၢ်အခါဖဲလဲၣ်.+
၃ လၢမုၢ်ဆါ ဒီးလၢမုၢ်နၤန့ၣ် ယမဲာ်ထံမ့ၢ်ယတၢ်အီၣ်လီၤ.
ဒီးဒီတနံၤညါန့ၣ် ပှၤတဲဆဲးအဲးယၤလၢ “နကစၢ်ယွၤ အိၣ်ဖဲလဲၣ်.”+
၄ လၢညါန့ၣ် ယပၣ်ဃုာ်လၢ ပှၤဂီၢ်မုၢ်အကျါ လၢအလဲၤဆူ ကစၢ်ယွၤအဟံၣ်လီၤ. ဖဲယနီၣ်ဘၣ်က့ၤ တၢ်ဂ့ၢ်တဖၣ်အံၤအခါ
ယတဲဖျါထီၣ် ယသးတၢ်တူၢ်ဘၣ်လၢ နအိၣ်ပျီပျီလီၤ.
ဖဲပလဲၤတၢ်အခါ ယဟးလၢတၢ်မဲာ်ညါ ကယီကယီ*
ဒီးပအိၣ်ဒီး တၢ်သူၣ်ဖှံသးညီ ဒီးပသးဝံၣ် စံးဘျုးစံးဖှိၣ်တၢ်
ဒ်ပှၤဂီၢ်မုၢ်လၢ အမၤမူးပွဲအသိးလီၤ.+
၅ ဘၣ်မနုၤအဃိ ယသးဟးဂီၤလဲၣ်.+
ဘၣ်မနုၤအဃိ ယသူၣ်ကိၢ်သးဂီၤလဲၣ်.
၆ ယကစၢ်ယွၤဧၢ, ယသးဟးဂီၤလီၤ.+
အဃိဖဲယအိၣ်လၢ ထံကျိယၢ်ဒ့ၣ် အဟီၣ်ကဝီၤ ဒီးလၢကစၢၢ်ဃ့ရမိၣ် အခိၣ်ဒီ
ဒီးလၢကစၢၢ်မံစၢ်* အခါန့ၣ်
ယသ့ၣ်နီၣ်ထီၣ်နၤလီၤ.+
၇ ထံယွၤလီၤဆူၣ်ဆူၣ်လၢ ယနၢ်ဟူဘၣ်အသီၣ်န့ၣ်
မ့ၢ်ဝဲနထံလီၤဆူ အသီၣ်လီၤ.
တၢ်ကီတၢ်ခဲတဖၣ် လုၢ်ဘၢယၤ ဒ်နလပီတဖၣ်အသိးလံ.+
၈ လၢမုၢ်ဆါခီန့ၣ် ယဟိဝၤယွၤ ကပာ်ဖျါန့ၢ်ယၤ အတၢ်အဲၣ်လၢအတီ
ဒီးလၢမုၢ်နၤခီန့ၣ် ယကသးဝံၣ် ကစၢ်ယွၤအဂ့ၢ်, ယကဃ့ထုကဖၣ်လၢ ယသးသမူ အကစၢ်ယွၤအအိၣ်လီၤ.+
၉ ယကတဲဘၣ် ကစၢ်ယွၤလၢ အမ့ၢ်ယလၢၢ်ယလ့လၢ
“ဘၣ်မနုၤအဃိ နသးပ့ၤနီၣ်ကွံာ်ယၤလဲၣ်.+
ဘၣ်မနုၤအဃိ ယဘၣ်ဟးဝ့ၤဝီၤ လၢတၢ်သးအုးအပူၤ ခီဖျိ ယဒုၣ်ယဒါ ဆီၣ်တံၢ်မၤနၢၤယၤ အဃိလဲၣ်.”+
၁၀ လၢတၢ်သူၣ်ဟ့သးဟ့အပူၤ ယဒုၣ်ယဒါတဖၣ် ဒုၣ်ဒွဲၣ်ယၤ
ဒီးဒီတနံၤညါန့ၣ် အဝဲသ့ၣ် တဲဆဲးအဲးယၤလၢ “နကစၢ်ယွၤ အိၣ်ဖဲလဲၣ်.”+
၁၁ ဘၣ်မနုၤအဃိ ယသးဟးဂီၤလဲၣ်.
ဘၣ်မနုၤအဃိ ယသူၣ်ကိၢ်သးဂီၤလဲၣ်.