စံးထီၣ်ပတြၢၤ
၇၈ ယပှၤဂီၢ်မုၢ်သ့ၣ်ဧၢ, ဒိကနၣ်ယတၢ်သိၣ်တၢ်သီ
ဒီးဒိကနၣ်* ယတၢ်ကတိၤတဖၣ်တက့ၢ်.
၂ ယကအိးထီၣ် ယထးခိၣ် ဒီးတဲဖျါထီၣ် တၢ်ကတိၤဒိတခါ
ဒီးတၢ်ကတိၤလီၤဘၢ လၢပျၢၤတဖၣ်န့ၣ် ယကတဲဖျါထီၣ်အီၤလီၤ.+
၃ တၢ်လၢပနၢ်ဟူဘၣ် ဒီးသ့ၣ်ညါဘၣ်တဖၣ်
လၢပပၢ်တဖၣ် တဲဘၣ်ပှၤန့ၣ်+
၄ ပတပာ်ခူသူၣ်အီၤလၢ အဝဲသ့ၣ် အစၢၤအသွဲၣ်တဖၣ် အအိၣ်ဘၣ်.
ပကတဲဘၣ်ပှၤလၢခံတစိၤ+
ဘၣ်ဃးဒီး ယဟိဝၤယွၤ အတၢ်မၤလၢ အလီၤစံးပတြၢၤတဖၣ် ဒီးအစိအကမီၤ+
ဒီးတၢ်လၢအမၤဝဲလၢ အလီၤလိၢ်လီၤလးတဖၣ်အဂ့ၢ်လီၤ.+
၅ အဝဲဟ့ၣ်လီၤ စီၤယၤကိာ်* လၢတၢ်ဘျၢ
ဒီးအဝဲပာ်လီၤ တၢ်သိၣ်တၢ်သီလၢ အံၣ်စရ့လးအပူၤ.
အဝဲမၤလိာ် ပမိၢ်ပၢ်ဖံဖု လၢပျၢၤတဖၣ်လၢ
ကဒုးသ့ၣ်ညါ အဖိတဖၣ်လၢ တၢ်သ့ၣ်တဖၣ်အံၤ+
၆ ဒ်သိး ပှၤလၢခံတစိၤ
ကသ့ၣ်ညါဝဲ တၢ်သ့ၣ်တဖၣ်အံၤ+
ဒီးလၢခံ အဝဲသ့ၣ်စ့ၢ်ကီး ကဒုးသ့ၣ်ညါက့ၤ အဖိတဖၣ်အဂီၢ်လီၤ.+
၇ ဒီးအဝဲသ့ၣ် အဖိတဖၣ်စ့ၢ်ကီး ကသန့ၤအသးလၢ ကစၢ်ယွၤ
ဒီးတသးပ့ၤနီၣ်တၢ်လၢ ကစၢ်ယွၤမၤတ့ၢ်ဝဲတဖၣ်ဘၣ်.+
ဒီးအဝဲသ့ၣ် ကမၤထွဲ ကစၢ်ယွၤ အတၢ်မၤလိာ်တဖၣ်လီၤ.+
၈ အန့ၣ်မး အဝဲသ့ၣ် တကဲထီၣ် ဒ်သိးဒီး အမိၢ်ပၢ်ဖံဖု လၢပျၢၤတဖၣ်
လၢအမ့ၢ် ပှၤတစိၤလၢ အခိၣ်ကိၤ ဒီးအနၢ်က့ၣ်န့ၣ်ဘၣ်.+
ပှၤတစိၤန့ၣ် အသးတဂၢၢ်တကျၢၤဘၣ်+
ဒီးအဝဲသ့ၣ် အသးတတီလၢ ကစၢ်ယွၤအဖီခိၣ်ဘၣ်.
၉ ပှၤအ့ဖရဲၣ်ဖိတဖၣ် စိာ်ဒီးချံၣ်
ဘၣ်ဆၣ် အဝဲသ့ၣ် ဃ့ၢ်ထီၣ်ကွံာ်ဝဲလၢ တၢ်ဒုးပျီအပူၤလီၤ.
၁၀ အဝဲသ့ၣ် တမၤလၢပှဲၤ တၢ်အၢၣ်လီၤအီလီၤ လၢကစၢ်ယွၤမၤဝဲဒီး အဝဲသ့ၣ်န့ၣ်ဘၣ်.+
ဒီးအဝဲသ့ၣ် တအိၣ်မူမၤထွဲဝဲဒ် ကစၢ်ယွၤ အတၢ်သိၣ်တၢ်သီအသိးဘၣ်.+
၁၁ အဝဲသ့ၣ် သးပ့ၤနီၣ်ကွံာ်စ့ၢ်ကီး တၢ်လၢကစၢ်ယွၤ မၤတ့ၢ်ဝဲတဖၣ်+
ဒီးတၢ်လီၤလးတဖၣ်လၢ ကစၢ်ယွၤဒုးထံၣ်တ့ၢ် အဝဲသ့ၣ်လီၤ.+
၁၂ လၢကီၢ်အဲၤကူပတူးအပူၤ ဒီးလၢစိၤဧၣ် အဟီၣ်ကဝီၤန့ၣ်+ ကစၢ်ယွၤ
မၤဝဲတၢ်လီၤလးတဖၣ်လၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အမဲာ်ညါလီၤ.+
၁၄ လၢမုၢ်ဆါခီ အဆၢကတီၢ်န့ၣ် ကစၢ်ယွၤ ဆှၢအဝဲသ့ၣ် ခီဖျိတၢ်အၢၣ် အထူၣ်.
ဒီးလၢမုၢ်နၤခီ အဆၢကတီၢ်န့ၣ် ကစၢ်ယွၤဆှၢအဝဲသ့ၣ် ခီဖျိမ့ၣ်အူ အထူၣ်လီၤ.*+
၁၅ အဝဲမၤသ့ၣ်ဖး လၢၢ်တဖၣ်လၢ ပှၢ်မုၢ်ကနၢပူၤ
ဒီးအဝဲဒုးအီအဝဲသ့ၣ်လၢထံဘျဲဘျဲ ဒ်အဝဲသ့ၣ်အီဘၣ်ထံလၢ ထံယိာ်ပူၤအသိးလီၤ.+
၁၆ အဝဲဒုးဟဲထီၣ်ထံကျိဖိတဖၣ်လၢ လၢၢ်ပူၤ
ဒီးဒုးယွၤလီၤထံဒ် ထံကျိတဖၣ်အသိးလီၤ.+
၁၇ ဘၣ်ဆၣ် အဝဲသ့ၣ် ဆဲးမၤကမၣ် ကစၢ်ယွၤ လၢအမ့ၢ် တၢ်ထီကတၢၢ်တဂၤ
ခီဖျိ ထီဒါအီၤလၢ မဲးမုၢ်ပျီလီၤ.+
၁၈ ခီဖျိလၢ အဝဲသ့ၣ် ဃ့န့ၢ်ဆူၣ်တၢ်အီၣ်လၢ အအဲၣ်ဒိးအီၣ်ဝဲတဖၣ်အဃိ
မ့ၢ်ဒၣ်အဝဲသ့ၣ် မၤကွၢ်ကစၢ်ယွၤလၢ အဝဲသ့ၣ်အသးပူၤလီၤ.+
၁၉ အဝဲသ့ၣ် ကဒူးကဒ့ၣ် ကစၢ်ယွၤလၢ
“လၢပှၢ်မုၢ်ကနၢအပူၤန့ၣ် မ့ၢ်ကစၢ်ယွၤ ဟ့ၣ်ပှၤတၢ်အီၣ်ကသ့ဧါ.”+
၂၀ အဝဲတီၢ်လၢၢ်
ဒီးထံဟဲဖျိးထီၣ်ဝဲ ဒီးထံတဖၣ်ယွၤလီၤဝဲ အါအါဂီၢ်ဂီၢ်လီၤ.+
အဝဲသ့ၣ်ဆဲးတဲဝဲလၢ “မ့ၢ်ကစၢ်ယွၤ ဟ့ၣ်ပှၤကိၣ်ကသ့ဧါ.
ဒီးမ့ၢ်အဝဲဟ့ၣ်စ့ၢ်ကီး အပှၤဂီၢ်မုၢ်လၢ တၢ်ညၣ်ကသ့ဧါ.”+
၂၁ ဖဲယဟိဝၤယွၤ နၢ်ဟူဝဲဒ်န့ၣ်အခါ အသးပှံၢ်ထီၣ်တၢ်ဒိၣ်မး+
အဃိ မ့ၣ်အူ+ အီၣ်ကွံာ်ဝဲ စီၤယၤကိာ် အစၢၤအသွဲၣ်တဖၣ်
ဒီးအတၢ်သးထီၣ် ကဲၤကပျီၤထီၣ်လၢ ပှၤအံၣ်စရ့လးဖိအကျါ,+
၂၂ မ့ၢ်လၢ အဝဲသ့ၣ် တနာ်ကစၢ်ယွၤဘၣ်+
ဒီးအဝဲသ့ၣ် တနာ်ဝဲလၢ ကစၢ်ယွၤ မၤပူၤဖျဲးအဝဲသ့ၣ် သ့ဘၣ်အဃိလီၤ.
၂၃ အဃိ အဝဲမၢလီၤ မူခိၣ်အၢၣ်အုးလၢ တၢ်ဖးဖီ
ဒီးအဝဲအိးထီၣ် မူခိၣ်အတြဲၤတဖၣ်လီၤ.
၂၆ အဝဲထိၣ်ဟူးထိၣ်ဂဲၤထီၣ် မုၢ်ထီၣ်အကလံၤ လၢမူခိၣ်
ဒီးအဝဲဒုးအူ ကလံၤထံးအကလံၤ လၢအစိအကမီၤလီၤ.+
၂၇ အဝဲဒုးလီၤန့ၢ် အဝဲသ့ၣ်လၢ တၢ်ညၣ်တဖၣ် အါဝဲဒ် ဟီၣ်ခိၣ်ကမူၣ်အသိး
ဒီးဒုးလီၤဝဲထိၣ်တဖၣ် အါဝဲဒ် မဲးလၢ ပီၣ်လဲၣ်နံၤအသိးလီၤ.
၂၈ အဝဲဒုးလီၤ ထိၣ်တဖၣ်လၢ အဝဲသ့ၣ်* အဒဲကဝီၤပူၤ
ဒီးဒုးလီၤဝဲ ဝးတရံးအဝဲသ့ၣ် အဒဲတဖၣ်လီၤ.
၂၉ ကစၢ်ယွၤ ဟ့ၣ်လီၤအဝဲသ့ၣ် တၢ်လၢအဝဲသ့ၣ် လီကီဝဲတဖၣ်+
ဒီးအဝဲသ့ၣ် အီၣ်ဝဲအါတလၢ.
၃၀ ဘၣ်ဆၣ် လၢတၢ်သးကွံအဃိ အဝဲသ့ၣ်အီၣ်တၢ် တဘျဲဘၣ်အီၤဒံးဘၣ်
ဒီးဖဲတၢ်အီၣ်အိၣ်ဒံးလၢ အဝဲသ့ၣ်အကိာ်ပူၤအခါ
၃၁ ကစၢ်ယွၤ သးပှံၢ်ထီၣ်အဝဲသ့ၣ်လီၤ.+
အဝဲမၤသံကွံာ် ပှၤလၢအဂံၢ်ဆူၣ်ဘါဆူၣ် ကတၢၢ်တဖၣ်လၢ အဝဲသ့ၣ်အကျါ+
ဒီးအဝဲမၤသံကွံာ် ပှၤပိာ်ခွါသးစၢ်တဖၣ် လၢအံၣ်စရ့လးအပူၤလီၤ.
၃၃ အဃိ ကစၢ်ယွၤ မၤကတၢၢ် အဝဲသ့ၣ် အတၢ်အိၣ်မူလၢ အလီၤဂာ်ဒ်သိးဒီး တၢ်ကသါလီၤထဲတထံၣ်+
ဒီးဒုးလီၤဘၣ်အဝဲသ့ၣ်လၢ တၢ်လီၤပျံၤလီၤဖုးတဖၣ် သတူၢ်ကလာ် ဒီးအဝဲသ့ၣ်သံဝဲလီၤ.
၃၄ ဘၣ်ဆၣ် တဘျီဂ့ၤတဘျီဂ့ၤ ဖဲကစၢ်ယွၤ မၤသံအဝဲသ့ၣ်တနီၤအခါ အဝဲသ့ၣ် ဃ့ကစၢ်ယွၤ အတၢ်မၤစၢၤ+
ဒီးဟဲက့ၤကဒါက့ၤလၢ ကစၢ်ယွၤအအိၣ် ဒီးဃုအီၤလီၤ.
၃၅ အဝဲသ့ၣ် သ့ၣ်နီၣ်ထီၣ်က့ၤဝဲလၢ ကစၢ်ယွၤ မ့ၢ်အဝဲသ့ၣ်အလၢၢ်+
ဒီးကစၢ်ယွၤလၢ အထီကတၢၢ်တဂၤန့ၣ် မ့ၢ်ပှၤလၢအပှ့ၤက့ၤ အဝဲသ့ၣ်လီၤ.+
၃၆ အဝဲသ့ၣ် ဂုာ်ကျဲးစၢး လံၣ်န့ၢ်လီန့ၢ်အီၤလၢ အထးခိၣ်
ဒီးအဝဲသ့ၣ် တဲလံၣ်တဲလီအီၤလၢ အပျ့ၤလီၤ.
လၢအကပာ်ဖျါထီၣ် အတၢ်သးဒိၣ်ခဲလၢာ်ခဲဆ့အလီၢ်န့ၣ်
အဝဲပၢၤဃာ်အတၢ်သးထီၣ် အါဘျီလီၤ.+
၃၉ ကစၢ်ယွၤ သ့ၣ်နီၣ်ထီၣ်က့ၤဝဲလၢ အဝဲသ့ၣ် မ့ၢ်ဒၣ်ပှၤဟီၣ်ခိၣ်ဖိ*+
ဒီးအဝဲသ့ၣ်လီၤဂာ်ဒ်သိးဒီး ကလံၤလၢ အဒံတလၢကွံာ် ဒီးတဟဲက့ၤကဒါက့ၤလၢၤဘၣ်လီၤ.
၄၂ အဝဲသ့ၣ် တသ့ၣ်နီၣ်ထီၣ်က့ၤ ကစၢ်ယွၤ အတၢ်စိတၢ်ကမီၤ
ဒီးမုၢ်နံၤလၢ ကစၢ်ယွၤ မၤပူၤဖျဲး* အဝဲသ့ၣ်လၢ ဒုၣ်ဒါအစုပူၤန့ၣ်ဘၣ်.+
၄၃ ကစၢ်ယွၤ ပာ်ဖျါထီၣ် တၢ်ပနီၣ်လီၤလးတဖၣ်လၢ ကီၢ်အဲၤကူပတူး+
ဒီးတၢ်လီၤလးတဖၣ်လၢ စိၤဧၣ်အဟီၣ်ကဝီၤလီၤ.
၄၄ ကစၢ်ယွၤ ဒုးကဲထီၣ် ထံကျိနံၤလါ အထံကျိၤတဖၣ် လၢတၢ်သွံၣ်+
ဒ်သိး ပှၤအီထံလၢ ထံကျိနံၤလါ အထံကျိဖိတဖၣ်အပူၤ သုတသ့တဂ့ၤအဂီၢ်လီၤ.
၄၆ အဝဲဆှၢလီၤ ဒွဲၣ်တဖၣ် ဒ်သိးကအီၣ်ကွံာ် အဝဲသ့ၣ် အတၢ်မုၢ်တၢ်ဘိတဖၣ်
ဒီးအဝဲသ့ၣ် အတၤသူတၤသၣ်တဖၣ်လီၤ.+
၄၇ ကစၢ်ယွၤ မၤဟးဂီၤအဝဲသ့ၣ် အစပံးမုၢ်တဖၣ်+
ဒီးအဝဲသ့ၣ် အသိးဝံာ်ဒၢအထူၣ်တဖၣ် လၢသူၣ်တဖၣ်လီၤ.
၄၉ ကစၢ်ယွၤ ဒုးလီၤဘၣ် အတၢ်သးထီၣ်လၢ အကဲၤထီၣ်ဝဲ,
တၢ်သူၣ်ဒိၣ်သးဖျိး ဒီးတၢ်ကိၢ်တၢ်ဂီၤလၢ အဝဲသ့ၣ်အလိၤလီၤ.
အဝဲဆှၢလီၤ မူခိၣ်ကလူး အကရူၢ်တဖၣ်လၢ အဒုးလီၤဝဲ တၢ်ကီတၢ်ခဲတဖၣ်လီၤ.
၅၀ အဝဲပျၢ်လီၤ အတၢ်သးထီၣ်လၢ အဝဲသ့ၣ်အလိၤ
ဒီးတပျဲပူၤအဝဲသ့ၣ် အသးသမူဘၣ်,
အမၤသံအဝဲသ့ၣ်လၢ တၢ်ဆါသံသတြိာ်လီၤ.
၅၁ လၢခံကတၢၢ်န့ၣ် အဝဲမၤသံ ကယဲၢ်ဖိဝဲၢ်ကိတဖၣ်လၢ ကီၢ်အဲၤကူပတူးအပူၤ+
လၢအမ့ၢ် ပှၤလၢအအိၣ်ဖျဲၣ်ထီၣ် အဆိကတၢၢ်လၢ စီၤဃၣ်အဒဲတဖၣ်အပူၤလီၤ.
၅၂ ဝံၤဒီး အဝဲဒုးဟးထီၣ် အပှၤဂီၢ်မုၢ်လၢ ကီၢ်အဲၤကူပတူးအပူၤ+
ဒီးဆှၢအဝဲသ့ၣ် ဒ်သိတဖုအသိး လၢပှၢ်မုၢ်ကနၢလီၤ.
၅၃ ကစၢ်ယွၤ ဆှၢအဝဲသ့ၣ် ပူၤပူၤဖျဲးဖျဲး
အဃိ အဝဲသ့ၣ်တပျံၤတၢ်ဘၣ်.+
ဒီးပီၣ်လဲၣ်လုၢ်ဘၢ အဝဲသ့ၣ်အဒုၣ်အဒါတဖၣ်လီၤ.+
၅၅ အဝဲနီဟးထီၣ်ကွံာ် ပှၤကလုာ်တဖၣ်လၢ အပှၤဂီၢ်မုၢ် အမဲာ်ညါ+
ဒီးနီၤလီၤ တၢ်န့ၢ်သါလၢ အဝဲသ့ၣ်အဂီၢ် ခီဖျိလၢ နီၣ်ထိၣ်ပျံၤ+
ဒီးဒုးအိၣ်ဒုးဆိး အံၣ်စရ့လး အဒူၣ်တဖၣ်လၢ အဝဲသ့ၣ်အနီၢ်ကစၢ်အဟံၣ်လီၤ.+
၅၆ ဘၣ်ဆၣ် အဝဲသ့ၣ် မၤကွၢ်ဒံး ကစၢ်ယွၤ လၢအထီကတၢၢ်တဂၤ ဒီးအဝဲသ့ၣ် ထီဒါအီၤလီၤ.+
အဝဲသ့ၣ် တကနၣ်ဃုာ် ကစၢ်ယွၤ အတၢ်ဒုးသ့ၣ်နီၣ်ထီၣ်တဖၣ်ဘၣ်.+
၅၇ အဝဲသ့ၣ် ပာ်တ့ၢ်ကစၢ်ယွၤ ဒီးထီဒါတၢ် ဒ်သိးဒီး အဝဲသ့ၣ် အမိၢ်ပၢ်ဖံဖု လၢပျၢၤတဖၣ်လီၤ.+
အဝဲသ့ၣ်န့ၣ် လီၤဂာ်ဒ်သိးဒီး ပျၢ်လၢအက့ၣ်တဘိလၢ ပှၤနာ်န့ၢ်အီၤတသ့ဘၣ်န့ၣ်လီၤ.+
၅၈ အဝဲသ့ၣ် မၤသးထီၣ်ကစၢ်ယွၤ တဘျီဝံၤတဘျီ ခီဖျိလၢ အဝဲသ့ၣ်ဘူၣ်ထီၣ်ဘါထီၣ် တၢ်လၢ တၢ်လီၢ်ထီၣ်ထီတဖၣ်+
ဒီးမၤပှံၢ်ထီၣ်အသး* ခီဖျိလၢ အဝဲသ့ၣ် အတၢ်ဂီၤတၢ်ဖှီၣ်တဖၣ်အဃိလီၤ.+
၅၉ ကစၢ်ယွၤ ထံၣ်ဝဲဒီး အသးပှံၢ်ထီၣ်တၢ်ဒိၣ်မး+
အဃိ ကစၢ်ယွၤ ပာ်တ့ၢ် ပှၤအံၣ်စရ့လးဖိ တဲာ်တဲာ်ဖျုဖျုလီၤ.
၆၁ အဝဲပျဲ ဒုၣ်ဒါတဖၣ် ဟံးန့ၢ် တလါစီဆှံ,+
အဝဲသ့ၣ် က့ၤစိာ်ကွံာ် ယွၤအစိကမီၤ ဒီးအလၤကပီၤ အတၢ်ပနီၣ်လီၤ.
၆၃ မ့ၣ်အူအီၣ်ကွံာ် အပှၤဖိသၣ်ခွါတဖၣ်
ဒီးပှၤတသးဝံၣ်န့ၢ် အပှၤမုၣ်ကနီၤတဖၣ်လၢ တၢ်ဖျီအတၢ်သးဝံၣ် နီတဂၤလၢၤဘၣ်.
၆၅ ဘၣ်ဆၣ် ဖဲန့ၣ်အခါ လီၤဂာ်ဒ်သိးဒီး ယဟိဝၤယွၤ မံပၢၢ်ထီၣ်,+
ဒ်ပှၤဂံၢ်ဆူၣ်ဘါဆူၣ်တဂၤလၢ+ အမံဝဲလၢ အအီစပံးထံ အါတလၢအဃိ ဝံၤဒီးပၢၢ်ထီၣ်ဝဲအသိးလီၤ.
၆၆ ကစၢ်ယွၤ နီထီၣ်ကွံာ် အဒုၣ်အဒါတဖၣ်+
ဒီးမၤမဲာ်ဆှး အဒုၣ်အဒါတဖၣ် လီၤထူလီၤယိာ်လီၤ.
၆၇ ကစၢ်ယွၤ တတူၢ်လိာ် စီၤယိၤသး အဒူၣ်*
ဒီးအဝဲတဃုထၢ အ့ဖရဲၣ်အဒူၣ်ဘၣ်.
၆၉ အဝဲတ့ထီၣ် အတၢ်ဘူၣ်ထီၣ်ဘါထီၣ်အလီၢ် လၢကအိၣ်ဂၢၢ်ဆိးကျၢၤဝဲ ဒ်မူခိၣ်အသိး+
ဒီးကဂၢၢ်ကျၢၤဝဲ ဒ်ဟီၣ်ခိၣ်လၢ အတ့လီၤဝဲလၢ ကအိၣ်ဝဲ လီၤထူလီၤယိာ်န့ၣ်လီၤ.+