ယၡါယၤ
၄၇ အိ ဘၤဘူၤလိၣ် အဖိမုၣ် မုၣ်ကနီၤစီဆှံဧၢ,+
ဟဲလီၤဆ့ၣ်နီၤလၢ ဟီၣ်ခိၣ်ကမူၣ် အကျါတက့ၢ်.
အိ ပှၤက့ၤစ့းဖိ အဖိမုၣ်ဧၢ,
ပှၤတကိးနၤလၢ နီၢ်ပၤမုၣ် နီတဘျီလၢၤဘၣ်.
အဃိ ဆ့ၣ်နီၤလၢ ဟီၣ်ခိၣ်လိၤ ဖဲလီၢ်ပစိာ်တအိၣ်ဘၣ် အလီၢ်န့ၣ်တက့ၢ်.+
၂ ဟံးန့ၢ် ဆၢၣ်ဂူာ် ဒီးဂံာ်ကိၣ် ကမူၣ်သၢၤ.
ထုးကွံာ် နနီၣ်ကျၢၢ်ဘၢမဲာ်,
ဘ့ၣ်လီၤနစကၢး, ပာ်ဖျါထီၣ်နခီၣ်
ဒီးလဲၤခီဂာ် ထံကျိလၢ နခီၣ်သၢၤ.
၄ “ပှၤလၢအပှ့ၤက့ၤပှၤန့ၣ် မ့ၢ်ဝဲ
အံၣ်စရ့လး အကစၢ်ယွၤလၢ အစီဆှံတဂၤ+
ဒီးအမံၤမ့ၢ်ဝဲ တၢ်သုးမုၢ်ဂီၢ်မုၢ် အကစၢ် ယဟိဝၤယွၤလီၤ.”
၅ အိ ပှၤက့ၤစ့းဖိ အဖိမုၣ်ဧၢ,+
ဆ့ၣ်နီၤအိၣ်ကစုဒု ဒီးအိၣ်လၢ တၢ်ခံးကျါတက့ၢ်.
ပှၤတကိးနၤလၢ ဘီမုၢ်တဖၣ် အနီၢ်ပၤမုၣ် နီတဘျီလၢၤဘၣ်.+
၆ ယသးထီၣ် ယပှၤဂီၢ်မုၢ်လီၤ.+
ဘၣ်ဆၣ် နတပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ်ဘၣ်.+
ဒီးလၢပှၤသးပှၢ် အဖီခိၣ်ဒၣ်လဲာ် နပာ်ထီၣ် တၢ်ဝံတၢ်ယိး လၢအဃၢလီၤ.+
၇ နတဲလၢ “ယကကဲဘၣ် နီၢ်ပၤမုၣ် ထီဘိလီၤ.”+
နတဆိကမိၣ်ထံ တၢ်လၢနမၤ တဖၣ်ဘၣ်.
ဒီးလၢခံကတၢၢ် တၢ်ကမၤအသး ဒ်လဲၣ်န့ၣ် နတဆိကမိၣ်ထံဘၣ်.
၈ ပိာ်မုၣ်လၢ အအဲၣ်တၢ်မုာ်တၢ်ပၠီၣ်ဧၢ, ကနၣ်လၢအံၤ.+
နဆ့ၣ်နီၤလၢ တၢ်ဘံၣ်တၢ်ဘၢအပူၤ ဒီးနတဲလီၤနသးလၢ
“ယမ့ၢ် ပှၤလၢအရ့ဒိၣ် ဒီးပှၤလၢ အလီၤဂာ်ဒီးယၤ တအိၣ် နီတဂၤဘၣ်.+
ယတကဲထီၣ် မုၣ်ကမဲနီတဘျီဘၣ်.
ဒီးယဖိတဖၣ် တလီၤမၢ် နီတဘျီဘၣ်.”+
၉ ဘၣ်ဆၣ် တၢ်ခံမံၤအံၤ ကဟဲဘၣ်နၤ သတူၢ်ကလာ် လၢတနံၤဃီ အတီၢ်ပူၤလီၤ.+
နဖိတဖၣ် ကလီၤမၢ် ဒီးနကကဲထီၣ် မုၣ်ကမဲလီၤ.
တၢ်ခံမံၤန့ၣ် ကဟဲဘၣ်နၤ နးနးလီၤ.+
မ့ၢ်လၢ နအူတၢ်လိၢ်တၢ် အကလုာ်ကလုာ် ဒီးနတၢ်အူန့ၣ် အဆူၣ်ဒိၣ်မးအဃိလီၤ.+
၁၀ နမၤတၢ်အၢတၢ်သီ ဘၣ်ဆၣ် နဆိကမိၣ်လၢ တၢ်အၢတဟဲဘၣ်နၤဘၣ်.
နတဲလၢ “တၢ်လၢယမၤန့ၣ် ပှၤတထံၣ်ဝဲ နီတဂၤဘၣ်.”
နတၢ်ကူၣ်သ့ ဒီးတၢ်သ့ၣ်ညါနၢ်ပၢၢ်န့ၣ် ဆှၢကမၣ်နၤလီၤ.
ဒီးနတဲလီၤနသးလၢ “ယမ့ၢ် ပှၤလၢအရ့ဒိၣ် ဒီးပှၤလၢအလီၤဂာ်ဒီးယၤ တအိၣ်နီတဂၤဘၣ်.”
၁၁ ဘၣ်ဆၣ် တၢ်နးတၢ်ဖှီၣ် ကဟဲဘၣ်နၤ
ဒီးနတၢ်အူတၢ်သမူတၢ် မၤပတုာ်ဝဲ တန့ၢ်ဘၣ်.
တၢ်ကီတၢ်ခဲ ကဟဲဘၣ်နၤ ဒီးနဟးဆှဲးအီၤ တန့ၢ်ဘၣ်.
တၢ်ဟးဂီၤလၢ နတသ့ၣ်ညါဘၣ် နီတဘျီဘၣ်န့ၣ် ကဟဲဘၣ်နၤ သတူၢ်ကလာ်လီၤ.+
၁၂ အဃိ နတၢ်အူတၢ်လိၢ် အကလုာ်ကလုာ်လၢ နမၤအီၤ+
စးထီၣ်လၢ နသးစၢ်ခါန့ၣ် ဆဲးမၤအီၤဟီ.
ဘၣ်သ့ၣ်သ့ၣ် အဘျုးကအိၣ် လၢနဂီၢ် တမံၤမံၤဧါသၢၤ.
ဒီးဘၣ်သ့ၣ်သ့ၣ် နကမၤပျံၤမၤဖုးဘၣ် ပှၤဂၤဧါသၢၤ.
၁၃ နပှၤဟ့ၣ်ကူၣ်ဟ့ၣ်ဖးတၢ်တဖၣ်န့ၣ် မ့ၢ်နသးလၢာ် အဝဲသ့ၣ်လံဧါ.
ပှၤလၢအကွၢ်ထံကွၢ်ဆး ဆၣ်တဖၣ်,+ ပှၤလၢ အဘူၣ်ထီၣ်ဘါထီၣ် တၢ်အိၣ်လၢမူခိၣ်*
ဒီးဖဲလါထီၣ်သီန့ၣ် ပှၤလၢ အဒုးသ့ၣ်ညါနၤ
တၢ်လၢအကဟဲကဲထီၣ် အသးဒီး နၤန့ၣ်
မၢအဝဲသ့ၣ် ဟဲမၤပူၤဖျဲးနၤ ခဲအံၤသၢၤ.
၁၄ အဝဲသ့ၣ် လီၤဂာ်ဒ်သိးဒီး လီၢ်ဘိ
ဒီးမ့ၣ်အူကအီၣ်ကွံာ် အဝဲသ့ၣ်လီၤ.
အဝဲသ့ၣ် မၤပူၤဖျဲးအသးလၢ မ့ၣ်အူလၣ်လၢ အကဲၤဆူၣ် တသ့ဘၣ်.
မ့ၣ်အူလၣ်တဖၣ်န့ၣ် တမ့ၢ် မ့ၣ်အူအ့ၣ်လၢ ပှၤကမၤကလၢၤသး အဂီၢ်ဘၣ်
ဒီးအတမ့ၢ် မ့ၣ်အူလၢ ပှၤကဆ့ၣ်နီၤအိၣ်လၢ အမဲာ်ညါအဂီၢ်ဘၣ်.
၁၅ ပှၤအူတၢ်သမူတၢ်တဖၣ်လၢ နမၤသကိးတၢ်ဒီး အဝဲသ့ၣ် စးထီၣ်လၢ နသးစၢ်ခါန့ၣ်
တၢ်ကကဲထီၣ်အသးဒီး အဝဲသ့ၣ် ဒ်န့ၣ်လီၤ.
အဝဲသ့ၣ် ကဟးဝ့ၤဝီၤ ဒီးကလဲၤဝဲလၢ ကျဲတဂၤတဘိ
ဒီးပှၤလၢအကမၤပူၤဖျဲးနၤန့ၣ် တအိၣ်နီတဂၤဘၣ်.+