ယံးရမံယၤ
၃ ပှၤသံကွၢ်ဝဲလၢ “ပှၤတဂၤမ့ၢ် နီဟးထီၣ်အမါ ဒီးအမါမ့ၢ်ဟးထီၣ်လၢအအိၣ် ဒီးကဲထီၣ် ပိာ်ခွါအဂၤတဂၤအမါလံန့ၣ် အဟံးန့ၢ်ကဒါက့ၤအီၤ ကကြၢးဧါ.”
ကီၢ်တဘ့ၣ်အံၤ ဘၣ်အၢလံ, တမ့ၢ်ဧီၤ.+
“န* ဆါလီၤအီၣ်နသးလၢ ပှၤအါဂၤအအိၣ်လံ+
ဒီးခဲအံၤန့ၣ် နဟဲက့ၤကဒါက့ၤလၢ ယအိၣ်န့ၣ် ကကြၢးဧါ.” ယဟိဝၤယွၤ တဲဝဲဒ်န့ၣ်လီၤ.
၂ “ကွၢ်ထီၣ်တၢ်လၢ တၢ်လူၢ်တဖၣ် အဒီခိၣ်တက့ၢ်.
တၢ်လီၢ် ဖဲပှၤတမံဃုာ်ဒီး နၤဘၣ်န့ၣ် အိၣ်ဒံးတတီၤတီၤဧါ.
နဆ့ၣ်နီၤခိးအဝဲသ့ၣ်လၢ ကျဲကပၤ
ဒ်ပှၤဟးဝ့ၤဝီၤဖိတဂၤ* လၢပှၢ်မုၢ်ကနၢအပူၤ အသိးလီၤ.
နမၤဘၣ်အၢထံကီၢ်
ခီဖျိလၢ နဆါလီၤအီၣ်နသး ဒီးနတၢ်အၢတၢ်သီအဃိလီၤ.+
၃ အဃိ မူခိၣ်တစူၤဘၣ်+
ဒီးတၢ်ကိၢ်ထီၣ်သီ အမူခိၣ်ထံ တစူၤလီၤဘၣ်.
နလီၤဂာ်ဒီး မါလၢအဆါလီၤအီၣ်သး လံတကံ
ဒီးနမဲာ်တဆှးဘၣ်.+
၄ ဘၣ်ဆၣ် ခဲအံၤ နတဲယၤလၢ
‘ပါဧၢ, နမ့ၢ်ယသကိး ဘူးဘူးတံၢ်တံၢ် လၢယသးစၢ်အခါလံ.+
၅ မ့ၢ်ပှၤတဂၤ ကြၢးစၢဃာ်ပှၤဂၤ အတၢ်ကမၣ် လီၤထူလီၤယိာ်
ဒီးတပျၢ်ကွံာ်ဝဲ နီတဘျီဘၣ်ဧါ.’
နတဲဒ်န့ၣ်
ဘၣ်ဆၣ် ကယဲၢ်တၢ်အၢတၢ်သီလၢ နမၤအီၤသ့န့ၣ် နဆဲးမၤအီၤ ကိးမံၤဒဲးလီၤ.”+
၆ ဖဲစီၤပၤ ယိၤၡံယၤ ပၢတၢ်အစိၤန့ၣ်+ ယဟိဝၤယွၤ တဲဘၣ်ယၤလၢ “‘ပိာ်မုၣ် အံၣ်စရ့လးလၢ အသးတတီဘၣ်တဂၤန့ၣ် မၤတ့ၢ်မနုၤလဲၣ်န့ၣ် မ့ၢ်နထံၣ်ဘၣ်လံဧါ. အဝဲလဲၤထီၣ်လၢ ကစၢၢ်ဖးထီ ကိးဖျၢၣ်ဒဲးအလိၤ ဒီးလၢသ့ၣ်လါဟ့လၢ အပှဲၤဒီးအလၣ် ကိးထူၣ်ဒဲး အခီၣ်ထံးဒီး အဝဲဆါလီၤအီၣ်အသးလီၤ.+ ၇ အဝဲမၤ တၢ်သ့ၣ်တဖၣ်န့ၣ် ကိးမံၤဒဲး သနာ်က့ ယမၢအဝဲ ဟဲက့ၤကဒါက့ၤ လၢယအိၣ်+ တလီၢ်လီၢ် ဘၣ်ဆၣ် အဝဲတဟဲက့ၤဘၣ်. ဒီးယူဒၤ ဆဲးကွၢ်ဝဲ တၢ်လၢ အနီလၢအသးတတီဘၣ် တဂၤန့ၣ် မၤဝဲလီၤ.+ ၈ ဖဲယထံၣ်ဘၣ် တၢ်မၤအသး ဒ်န့ၣ်အခါ ယဟ့ၣ်လီၤ အံၣ်စရ့လးလၢ လံာ်လီၤဖးမူာ်နီၢ်တဘ့ၣ်+ ဒီးဒုးဟးထီၣ်အီၤ ခီဖျိလၢ အထီဒါက့ၤယၤ ဒီးအအဲၣ်ဘၢယၤ အဃိလီၤ.+ ဘၣ်ဆၣ် ယူဒၤ လၢအမ့ၢ် အံၣ်စရ့လး အဒ့မုၣ်လၢ အသးတတီဘၣ်တဂၤန့ၣ် တပျံၤတၢ်ဘၣ်. ဒီးအဝဲလဲၤ ဆါလီၤအီၣ်အသး စ့ၢ်ကီးလီၤ.+ ၉ အဝဲ ဆါလီၤအီၣ်အသးန့ၣ် အတပာ်ဝဲလၢ တၢ်နီတမံၤဘၣ်. အဝဲဆဲးမၤဘၣ်အၢကီၢ်ပူၤ ဒီးမၤကမၣ်မုၣ် ကမၣ်ခွါဒီး လၢၢ်တဖၣ်ဒီး သ့ၣ်ထူၣ်တဖၣ်လီၤ.+ ၁၀ တၢ်မၤအသးဒ်န့ၣ် သနာ်က့ ယူဒၤ လၢအမ့ၢ် အံၣ်စရ့လး အဒ့မုၣ်လၢ အသးတတီဘၣ်တဂၤန့ၣ် တဟဲက့ၤကဒါက့ၤ လၢယအိၣ်လၢ အသးဒီဖျၢၣ်ဘၣ်. အိၣ်ဒၣ် အပာ်မၤအသးလီၤ.’ ယဟိဝၤယွၤ တဲဝဲဒ်န့ၣ်လီၤ.”
၁၁ ဒီးယဟိဝၤယွၤ တဲယၤလၢ “အံၣ်စရ့လးလၢ အသးတတီဘၣ်တဂၤန့ၣ် အတၢ်ကမၣ် စှၤန့ၢ်ဒံး ယူဒၤ လၢအသးတတီဘၣ် တဂၤန့ၣ်လီၤ.+ ၁၂ လဲၤတဲဖျါထီၣ် တၢ်ကတိၤတဖၣ်အံၤလၢ ကလံၤစိးတက့ၢ်.+ တဲလၢ ယဟိဝၤယွၤ တဲဝဲလၢ
‘ပှၤအံၣ်စရ့လးဖိလၢ အထီဒါက့ၤတၢ်တဖၣ်ဧၢ, ဟဲက့ၤတက့ၢ်.+ ယဟိဝၤယွၤ တဲဝဲလၢ ယမ့ၢ်ပှၤလၢ အသးတီအဃိ ယတကွၢ်လီၤသုလၢ တၢ်သးထီၣ်အပူၤဘၣ်.+ ယတစၢဃာ် သုတၢ်ကမၣ် လီၤထူလီၤယိာ်ဘၣ်. ၁၃ ထဲဒၣ် သုဘၣ်အၢၣ်လီၤတူၢ်လိာ်လၢ သုတၢ်ကမၣ်အိၣ်, မ့ၢ်လၢ သုထီဒါက့ၤယၤ, သုကစၢ် ယဟိဝၤယွၤ အဃိလီၤ. သုမၤကမၣ်မုၣ်ကမၣ်ခွါဒီး ပှၤထံဂၤကီၢ်ဂၤဖိတဖၣ်* လၢသ့ၣ်လါဟ့တဖၣ် လၢအပှဲၤဒီးအလၣ် ကိးထူၣ်ဒဲး အခီၣ်ထံး ဘၣ်ဆၣ် သုတဒိကနၣ် ယကလုၢ်ဘၣ်. ယဟိဝၤယွၤ တဲဝဲဒ်န့ၣ်လီၤ.’
၁၄ ယဟိဝၤယွၤ တဲဝဲလၢ “ဖိခွါလၢ အထီဒါက့ၤတၢ်တဖၣ်ဧၢ, ဟဲက့ၤတက့ၢ်. ယကဲထီၣ် သုကစၢ်* ထဲတဂၤ အဃိ ယကဟံးန့ၢ်သုလီၤ. လၢဝ့ၢ်ပူၤန့ၣ် ယကဟံးန့ၢ်သုတဂၤ ဒီးလၢဟံၣ်ဖိဃီဖိ တဒူၣ်အကျါန့ၣ် ယကဟံးန့ၢ်သု ခံဂၤ ဒီးယကဟဲက့ၤကိးသုလၢ ဝ့ၢ်စံယိၣ်လီၤ.+ ၁၅ ယကဟ့ၣ်လီၤသု ပှၤကွၢ်သိတဖၣ်လၢ အမၤဒ် ယတၢ်ဘၣ်သးအသိး+ ဒီးအဝဲသ့ၣ် ကဒုးအီၣ်သုလၢ တၢ်သ့ၣ်ညါ ဒီးတၢ်နၢ်ပၢၢ် လီၤတံၢ်လီၤဆဲးလီၤ.” ၁၆ ယဟိဝၤယွၤ တဲဝဲလၢ “ဖဲန့ၣ်အဆၢကတီၢ် လၢကီၢ်ပူၤန့ၣ် သုကသၣ်ထီၣ် ဒီးအါထီၣ်ဂီၢ်ထီၣ်လီၤ.+ သုတတဲလၢ ‘ပကစၢ် ယဟိဝၤယွၤ အတလါစီဆှံ’ လၢၤဘၣ်. သုတဆိကမိၣ်ထီၣ် တလါအဂ့ၢ်လၢၤဘၣ် ဒီးသုတသ့ၣ်နီၣ်ထီၣ်က့ၤအီၤ ဒီးသးသယုၢ်အီၤလၢၤဘၣ်. ဒီးပှၤတတ့ထီၣ်ကဒီး တလါလၢၤဘၣ်. ၁၇ ဖဲန့ၣ်အဆၢကတီၢ် ပှၤကကိး ဝ့ၢ်ယရူၤၡလ့ၣ်လၢ ယဟိဝၤယွၤ အလီၢ်ပစိာ်လီၤ.+ ဒီးပှၤကလုာ်ခဲလၢာ် ကဘၣ် တၢ်ဟဲကိးဖှိၣ်အီၤ တပူၤဃီ လၢဝ့ၢ်ယရူၤၡလ့ၣ် ဒ်သိး အဝဲသ့ၣ် ကမၤလၤကပီၤ ယဟိဝၤယွၤအမံၤ အဂီၢ်လီၤ.+ ဒီးအဝဲသ့ၣ် အခိၣ်တကိၤ ဒီးတမၤထွဲဒ် အသးလၢအအၢ ဟံးစုနဲၣ်ကျဲအီၤအသိးလၢၤဘၣ်.”
၁၈ “ဖဲန့ၣ်အဆၢကတီၢ် အံၣ်စရ့လးအပှၤဂီၢ်မုၢ် ဒီးယူဒၤအပှၤဂီၢ်မုၢ် ကလဲၤသကိးတၢ် ဒ်သိးသိးလီၤ.+ အဝဲသ့ၣ် ကဟးထီၣ်ဖဲ အဝဲသ့ၣ်အိၣ်ဝဲအလီၢ် လၢကလံၤစိးတခီန့ၣ် တပူၤဃီ ဒီးအဝဲသ့ၣ် ကဟဲက့ၤလၢ ထံကီၢ်လၢ ယဟ့ၣ်လီၤ သုမိၢ်ပၢ်ဖံဖု လၢပျၢၤတဖၣ် ဒ်တၢ်န့ၢ်သါအသိးလီၤ.+ ၁၉ ဒီးလၢညါ ယဆိကမိၣ်လၢ ‘လၢတၢ်သးခုအပူၤန့ၣ် ယကပာ်နၤ* လၢယဖိခွါတဖၣ်အကျါ ဒီးဟ့ၣ်လီၤနၤလၢ ကီၢ်လၢ အလီၤအိၣ်တဘ့ၣ် လၢအမ့ၢ် တၢ်န့ၢ်သါလၢ အဃံလၤဒိၣ်ကတၢၢ်လၢ ပှၤကလုာ်တဖၣ် အကျါလီၤ.’+ ဒီးယဆိကမိၣ်စ့ၢ်ကီးလၢ သုကကိးယၤလၢပါ ဒီးယတဆိကမိၣ်လၢ သုကပာ်တ့ၢ်ယၤဘၣ်. ၂၀ ‘ဒ်မါလၢ အသးတတီဘၣ်တဂၤ ပာ်တ့ၢ်ကွံာ်အဝၤအသိး, အိ အံၣ်စရ့လး အပှၤဂီၢ်မုၢ်သ့ၣ်ဧၢ, သုဝဲစ့ၢ်ကီး သုတသးတီဒီးယၤဘၣ် ဒ်န့ၣ်အသိးလီၤ.’+ ယဟိဝၤယွၤ တဲဝဲဒ်န့ၣ်လီၤ.”
၂၁ လၢတၢ်လူၢ်တဖၣ် အဒီခိၣ်န့ၣ် တၢ်ကလုၢ်သီၣ်ဝဲလီၤ.
အံၣ်စရ့လး အပှၤဂီၢ်မုၢ်တဖၣ် ဟီၣ်ဝဲယၢၤဝဲ ဒီးဃ့ကညးတၢ်
မ့ၢ်လၢ အဝဲသ့ၣ် လဲၤဘၣ်ဝဲလၢ ကျဲလၢ အက့ၣ်အကူအဃိလီၤ.
အဝဲသ့ၣ် သးပ့ၤနီၣ်ကွံာ် အကစၢ် ယဟိဝၤယွၤလီၤ.+
၂၂ “သုဝဲ ဖိခွါလၢ အထီဒါက့ၤတၢ်တဖၣ်ဧၢ, ဟဲက့ၤတက့ၢ်.
ယကမၤဘျါက့ၤ သုသးလၢ အအဲၣ်ဒိးထီဒါက့ၤတၢ်လီၤ.”+
ပကတဲလၢ “နမ့ၢ်ပကစၢ် ယဟိဝၤယွၤအဃိ
ပဟဲက့ၤလၢနအိၣ်လံ. ပအိၣ် ဖဲအံၤလီၤ.+
၂၃ လၢညါ ဖဲပဟးမၤသီၣ်မၤသဲတၢ်လၢ တၢ်လူၢ်ခိၣ် ဒီးကစၢၢ်တဖၣ် အလိၤအခါ အိၣ်ဒၣ် ပလံၣ်န့ၢ်လီန့ၢ်လီၤ ပနီၢ်ကစၢ်သးလီၤ.+
နီၢ်ကီၢ်န့ၣ် အံၣ်စရ့လး အတၢ်အုၣ်က့ၤခီၣ်က့ၤန့ၣ် အိၣ်ဟဲဝဲလၢ ပကစၢ် ယဟိဝၤယွၤ အအိၣ်လီၤ.+
၂၄ စးထီၣ်လၢ ပသးစၢ်အခါလံၤလံၤန့ၣ် ယွၤလၢအလီၤမဲာ်ဆှးတဂၤ ဟံးန့ၢ်ကွံာ်ဝဲ တၢ်ကိးမံၤဒဲးလၢ ပမိၢ်ပၢ်ဖံဖု လၢပျၢၤတဖၣ် ဘၣ်မၤဝဲဆူၣ်ဆူၣ် ဒ်သိးကန့ၢ်ဘၣ်ဝဲ အဂီၢ်လီၤ.+
ယွၤတဂၤန့ၣ် အီၣ်ကွံာ်ဝဲ အဝဲသ့ၣ် အသိတဖၣ်ဒီး အကျီၢ်တဖၣ်
ဒီးအီၣ်ကွံာ်ဝဲ အဝဲသ့ၣ် အဖိမုၣ် ဒီးအဖိခွါတဖၣ်လီၤ.
၂၅ စးထီၣ်လၢ ပသးစၢ်အခါလံၤလံၤ တုၤလၢ ခဲအံၤန့ၣ်+
ပဝဲ ဒီးပမိၢ်ပၢ်ဖံဖု လၢပျၢၤတဖၣ် မၤကမၣ်ဘၣ် ပကစၢ် ယဟိဝၤယွၤ+
ဒီးပတဒိကနၣ် ပကစၢ် ယဟိဝၤယွၤ အကလုၢ်ဘၣ်.
အဃိ မ်ပမံနီၤလၢ တၢ်မဲာ်ဆှးအပူၤ
ဒီးမ်ပတၢ်မဲာ်ဆှး မၤဘၢပှၤတက့ၢ်.”