ယံးရမံယၤ
၄၁ ဖဲလါ နွံလါတလါန့ၣ် စီၤအလံၡမၤအလံၤခွါ စီၤယံးၡမၤဧ့လး+ လၢအမ့ၢ် စီၤနသၤနံယၤအဖိခွါန့ၣ် ဟဲဒီးအပှၤအဂၤတဆံ လၢစီၤအဃံကၣ်အဖိခွါ စီၤကဒါလယၤအအိၣ် ဖဲဝ့ၢ်မံးစပၤလီၤ.+ စီၤယံးၡမၤဧ့လးန့ၣ် မ့ၢ်ဝဲ စီၤပၤအစၢၤအသွဲၣ်ဒီး ပှၤလၢစီၤပၤအပှၤဒိၣ်ပှၤပှၢ် အကျါတဂၤလီၤ. ဖဲအဝဲသ့ၣ် အီၣ်သကိးတၢ်လၢ ဝ့ၢ်မံးစပၤအပူၤအခါ ၂ စီၤနသၤနံယၤအဖိခွါ စီၤယံးၡမၤဧ့လး ဒီးအပှၤအဂၤတဆံ လၢအဟဲဒီးအီၤန့ၣ် ဂဲၤဆၢထၢၣ် ကျီသံကွံာ်ဝဲ စီၤၡၤဖၣ်အလံၤ လၢအမ့ၢ် စီၤအဃံကၣ်အဖိခွါ စီၤကဒါလယၤ လၢနးလီၤ. အဃိ စီၤယံးၡမၤဧ့လး မၤသံကွံာ်ဝဲ ပှၤလၢ ဘၤဘူၤလိၣ်အစီၤပၤ ပာ်ထီၣ်ဝဲလၢ ကပၢတၢ်လၢ ယူဒၤအဟီၣ်ကဝီၤအပူၤ တဂၤန့ၣ်လီၤ. ၃ တကးဒံးဘၣ် စီၤယံးၡမၤဧ့လး ကျီသံကွံာ်ဝဲ ကယဲၢ်ပှၤယူဒၤဖိလၢ အအိၣ်ဒီး စီၤကဒါလယၤလၢ ဝ့ၢ်မံးစပၤအပူၤ ဒီးကျီသံစ့ၢ်ကီး ပှၤက့ၤစ့းဖိအသုးဖိလၢ အအိၣ်ဖဲန့ၣ်တဖၣ်လီၤ.
၄ ဖဲပှၤမၤသံ စီၤကဒါလယၤ ဝံၤတသီ ဒီးတချုးလၢ ပှၤသ့ၣ်ညါဝဲ နီတဂၤဒံးဘၣ်အခါန့ၣ် ၅ ပှၤပိာ်ခွါအဂၤ ၈၀ လၢအအိၣ်လၢ ဝ့ၢ်ၡက့ၣ်,+ ၡံလိၤ,+ ဝ့ၢ်ၡၤမရံန့ၣ်+ ဟဲတုၤဝဲလီၤ. အဝဲသ့ၣ် လူၤပာ်စၢၤ အခၣ်ဆူၣ်, အဆ့ကူဆ့ကၤတဖၣ်ညာ်ဝဲ ဒီးအဝဲသ့ၣ် ကူးလီၤအနီၢ်ကစၢ်အသးလီၤ.+ ဒီးအဝဲသ့ၣ် အိၣ်ဒီး တၢ်လုၢ်ဘု ဒီးလီၢ်ဘၣ်*+ ဒ်သိး ကလဲၤစိာ်ဝဲလၢ ယဟိဝၤယွၤ အဟံၣ်အဂီၢ်လီၤ. ၆ အဃိ စီၤနသၤနံယၤအဖိခွါ စီၤယံးၡမၤဧ့လး ဟးထီၣ်လၢ ဝ့ၢ်မံးစပၤ ဒ်သိး ကလဲၤထံၣ်လိာ်သးဒီး အဝဲသ့ၣ် ဒီးအလဲၤဝဲတခီခီ ဟီၣ်ဝဲတခီခီလီၤ. ဖဲစီၤယံးၡမၤဧ့လး တိနိၣ်ဒီးအဝဲသ့ၣ်အခါ အတဲဘၣ် အဝဲသ့ၣ်လၢ “ပကလဲၤလၢ စီၤအဃံကၣ်အဖိခွါ စီၤကဒါလယၤ အအိၣ်မီၤ.” ၇ ဒီးဖဲအဝဲသ့ၣ် ဟဲနုာ်လီၤလၢ ဝ့ၢ်ပူၤအခါ စီၤနသၤနံယၤအဖိခွါ စီၤယံးၡမၤဧ့လး ဒီးအပှၤတဖၣ် မၤသံကွံာ်အဝဲသ့ၣ် ဒီးကွံာ်လီၤအဝဲသ့ၣ်အစိၣ်လၢ ထံကမါပူၤလီၤ.
၈ ဘၣ်ဆၣ် ပှၤအဂၤတဆံလၢ အဝဲသ့ၣ်အကျါန့ၣ် တဲစီၤယံးၡမၤဧ့လးလၢ “ပပာ်ခူသူၣ်ဃာ် ဘု, ဘုမုယီၤ, သိ ဒီးကနဲစီတဖၣ်လၢ ပျီပူၤအဃိ တဘၣ်မၤသံပှၤတဂ့ၤ.” အဃိ စီၤယံးၡမၤဧ့လး တမၤသံ အဝဲသ့ၣ်ဃုာ်ဒီး အဝဲသ့ၣ် အဒီပုၢ်ဝဲၢ်တဖၣ်န့ၣ်ဘၣ်. ၉ ဒီးထံကမါဖးဒိၣ်လၢ စီၤယံးၡမၤဧ့လး ကွံာ်လီၤဝဲ ပှၤလၢအမၤသံဝဲတဖၣ် အစိၣ်ခဲလၢာ်န့ၣ် မ့ၢ်ဝဲ ထံကမါလၢ စီၤပၤအၤစါ ခူၣ်ပာ်စၢၤဝဲ ဖဲအဝဲဒုးတၢ်ဒီး အံၣ်စရ့လး အစီၤပၤဘါၡၤ အခါလီၤ.+ ထံကမါတဘ့ၣ်အံၤန့ၣ် မ့ၢ်ဝဲထံကမါလၢ စီၤနသၤနံယၤအဖိခွါ စီၤယံးၡမၤဧ့လး မၤပှဲၤဝဲဒီး ပှၤသံစိၣ်လီၤ.
၁၀ ဒီးစီၤယံးၡမၤဧ့လးန့ၣ် က့ၤဖီၣ်ဝဲ ပှၤအဂၤလၢ အအိၣ်လၢ ဝ့ၢ်မံးစပၤအပူၤ+ ကိးဂၤဒဲး ပၣ်ဃုာ်ဒီး စီၤပၤအဖိမုၣ်တဖၣ် ဒီးကယဲၢ်ပှၤလၢ အအိၣ်တ့ၢ်ဒံးလၢ ဝ့ၢ်မံးစပၤလၢ ပှၤခိးတၢ်ဖိအခိၣ် စီၤနဘူစၢ်ရဒၣ် အးလီၤဝဲလၢ စီၤအဃံကၣ်+ အဖိခွါ စီၤကဒါလယၤ အစုပူၤလီၤ. စီၤနသၤနံယၤအဖိခွါ စီၤယံးၡမၤဧ့လးန့ၣ် က့ၤဖီၣ်ပှၤတဖၣ်န့ၣ် ဒီးလဲၤဝဲလၢ ပှၤဧၣ်မိၣ်ဖိ အအိၣ်လီၤ.+
၁၁ ဖဲစီၤကါရ့ၤအဖိခွါ စီၤယိဃၤနၣ်+ ဒီးသုးခိၣ်ခဲလၢာ် လၢအအိၣ်ဒီးအီၤ နၢ်ဟူဝဲ ဘၣ်ဃးဒီး တၢ်အၢတၢ်သီလၢ စီၤနသၤနံယၤအဖိခွါ စီၤယံးၡမၤဧ့လး မၤတ့ၢ်ဝဲအခါ ၁၂ အဝဲသ့ၣ် ကိးထီၣ် အပှၤတဖၣ် ဒီးလဲၤဒုးဝဲ စီၤနသၤနံယၤအဖိခွါ စီၤယံးၡမၤဧ့လးလီၤ. ဒီးအဝဲသ့ၣ် ထံၣ်န့ၢ်အီၤဖဲ ကမါအကပၤ လၢဝ့ၢ်ကံးဘိၣ် အပူၤလီၤ.
၁၃ ဖဲပှၤလၢ စီၤယံးၡမၤဧ့လး က့ၤဖီၣ်ဝဲတဖၣ် ထံၣ်ဝဲ စီၤကါရ့ၤအဖိခွါ စီၤယိဃၤနၣ် ဒီးသုးခိၣ်လၢ အအိၣ်ဒီးအီၤ ခဲလၢာ်အခါ အဝဲသ့ၣ် သးခုဝဲဒိၣ်မးလီၤ. ၁၄ ဒီးကယဲၢ်ပှၤလၢ စီၤယံးၡမၤဧ့လး ဖီၣ်န့ၢ်ဝဲလၢ ဝ့ၢ်မံးစပၤန့ၣ်+ ဃၣ်က့ၤအသးဒီး က့ၤပိာ်ဝဲ စီၤကါရ့ၤအဖိခွါ စီၤယိဃၤနၣ်အခံလီၤ. ၁၅ ဘၣ်ဆၣ် စီၤနသၤနံယၤအဖိခွါ စီၤယံးၡမၤဧ့လး ဒီးအပှၤဃိးဂၤန့ၣ် ဃ့ၢ်ပူၤဖျဲးအသးလၢ စီၤယိဃၤနၣ် ဒီးလဲၤဝဲလၢ ပှၤဧၣ်မိၣ်ဖိအအိၣ်လီၤ.
၁၆ စီၤကါရ့ၤအဖိခွါ စီၤယိဃၤနၣ် ဒီးသုးခိၣ်လၢ အအိၣ်ဒီးအီၤတဖၣ်န့ၣ် က့ၤကိးက့ၤဝဲ ပှၤလၢ အဝဲသ့ၣ်မၤပူၤဖျဲးဝဲလၢ စီၤနသၤနံယၤအဖိခွါ စီၤယံးၡမၤဧ့လး အစုပူၤလီၤ. ပှၤတဖၣ်န့ၣ် မ့ၢ်ပှၤလၢ စီၤယံးၡမၤဧ့လး ဖီၣ်န့ၢ်ဝဲလၢ ဝ့ၢ်မံးစပၤအပူၤ ဖဲအဝဲမၤသံ စီၤအဃံကၣ်အဖိခွါ စီၤကဒါလယၤ+ ဝံၤအလီၢ်ခံလီၤ. ဒီးလၢဝ့ၢ်ကံးဘိၣ်န့ၣ် စီၤယိဃၤနၣ် ဒီးသုးခိၣ်တဖၣ် က့ၤကိးက့ၤဝဲ ပှၤပိာ်ခွါ, သုးဖိ, ပိာ်မုၣ်, ဖိသၣ် ဒီးပဒိၣ်တဖၣ်လီၤ. ၁၇ ဒီးအဝဲသ့ၣ် လဲၤအိၣ်ပတုာ်ဆိဝဲဖဲ ကံးမဟၣ် အတၢ်အိၣ်ဘှံးအလီၢ် လၢအအိၣ်ဘူးဒီး ဘ့ၤသလ့ဃ့ၣ်လီၤ.+ ဒီးအဝဲသ့ၣ် ပာ်လီၤအသးလၢ အကဆဲးလဲၤဝဲလၢ ကီၢ်အဲၤကူပတူး+ ၁၈ မ့ၢ်လၢ အဝဲသ့ၣ်ပျံၤဝဲ ပှၤက့ၤစ့းဖိ အဃိလီၤ. အဝဲသ့ၣ် ပျံၤဝဲ ပှၤက့ၤစ့းဖိ ခီဖျိလၢ စီၤနသၤနံယၤအဖိခွါ စီၤယံးၡမၤဧ့လး မၤသံဝဲ စီၤအဃံကၣ်အဖိခွါ စီၤကဒါလယၤလၢ ဘၤဘူၤလိၣ်အစီၤပၤ ပာ်ထီၣ်ဝဲလၢ ကပၢဝဲ ယူဒၤအဟီၣ်ကဝီၤ အဃိလီၤ.+