ယံးရမံယၤ
၄၂ သုးခိၣ်ခဲလၢာ်, စီၤကါရ့ၤအဖိခွါ စီၤယိဃၤနၣ်,+ စီၤဟိၤၡၤယၤအဖိခွါ စီၤယၤစါနယၤ ဒီးပှၤဂီၢ်မုၢ်ခဲလၢာ် စးထီၣ်လၢ ပှၤအဒိၣ်ကတၢၢ် တုၤလီၤလၢ ပှၤအဆံးကတၢၢ် ဟဲဝဲ ၂ ဒီးတဲဘၣ် ဝံယံးရမံယၤလၢ “ဒ်နထံၣ်ဘၣ်အသိး ပှၤလၢအအိၣ်လီၤတဲာ်တဖၣ် အိၣ်တ့ၢ်ထဲစှၤဂၤလီၤ.+ အဃိ ဝံသးစူၤ ဒိကနၣ်ဘၣ် ပတၢ်ဃ့ကညး ဒီးဃ့ထုကဖၣ်န့ၢ်တၢ်လၢ ပှၤတဖၣ်အံၤအဂီၢ် ဒီးလၢပဂီၢ် လၢနကစၢ် ယဟိဝၤယွၤ အအိၣ်တက့ၢ်. ၃ မ်နကစၢ် ယဟိဝၤယွၤ တဲဘၣ်ပှၤ ကျဲလၢပကြၢးလဲၤ ဒီးတၢ်လၢပဘၣ်မၤတက့ၢ်.”
၄ ဝံယံးရမံယၤ တဲဆၢက့ၤ အဝဲသ့ၣ်လၢ “ယနၢ်ဟူသုလံ ဒီးယကဃ့ထုကဖၣ်လၢ သုကစၢ် ယဟိဝၤယွၤအအိၣ် ဒ်သုမၢယၤအသိးလီၤ. ကယဲၢ်တၢ်ကတိၤလၢ ယဟိဝၤယွၤ တဲသုန့ၣ် ယကတဲဘၣ်သုလီၤ. ယတပာ်ခူသူၣ် တၢ်ကတိၤလၢသုအိၣ် နီတဖျၢၣ်ဘၣ်.”
၅ ဒီးအဝဲသ့ၣ် တဲဆၢက့ၤ ဝံယံးရမံယၤလၢ “တၢ်လၢ နကစၢ် ယဟိဝၤယွၤ တဲပှၤ ခီဖျိလၢနၤန့ၣ် ပမ့ၢ်တမၤထွဲအီၤ လီၤတံၢ်လီၤဆဲးဘၣ်န့ၣ် ဒ်ယဟိဝၤယွၤ မ့ၢ်ပှၤအုၣ်အသးလၢ အမ့ၢ်အတီလၢ ပှၤနာ်န့ၢ်အီၤသ့တဂၤအသိး မ်အသိၣ်ဃီၣ်ပှၤတက့ၢ်. ၆ ပမၢနသံကွၢ်တၢ်လၢ ပကစၢ် ယဟိဝၤယွၤအအိၣ် ဒီးတၢ်လၢအတဲပှၤန့ၣ် ကဂ့ၤလၢပဂီၢ်မ့ၢ်ဂ့ၤ, တဂ့ၤလၢပဂီၢ်ဘၣ်မ့ၢ်ဂ့ၤ ပကဒိကနၣ် အကလုၢ်လီၤ. ဒီးခီဖျိလၢ ပကဒိကနၣ် ပကစၢ် ယဟိဝၤယွၤ အကလုၢ်အဃိ တၢ်ကလဲၤအသးဒီးပှၤ ဂ့ၤဂ့ၤဘၣ်ဘၣ်လီၤ.”
၇ အသီတဆံဝံၤအလီၢ်ခံ ယဟိဝၤယွၤ တဲတၢ်ဒီး ဝံယံးရမံယၤလီၤ. ၈ အဃိ ဝံယံးရမံယၤ ကိးန့ၢ်ဝဲ စီၤကါရ့ၤအဖိခွါ စီၤယိဃၤနၣ်, သုးခိၣ်ခဲလၢာ် လၢအအိၣ်ဒီးအီၤ ဒီးပှၤဂီၢ်မုၢ်ခဲလၢာ် စးထီၣ်လၢ ပှၤအဒိၣ်ကတၢၢ် တုၤလီၤလၢ ပှၤအဆံးကတၢၢ်လီၤ.+ ၉ ဝံယံးရမံယၤ တဲအဝဲသ့ၣ်လၢ “အံၣ်စရ့လး အကစၢ် ယဟိဝၤယွၤလၢ သုမၢယလဲၤတဲဖျါထီၣ် သုတၢ်ဃ့ကညးလၢ တၢ်သးကညီၤအဂီၢ် လၢအမဲာ်ညါန့ၣ် တဲဝဲလၢ ၁၀ ‘သုမ့ၢ်အိၣ်တ့ၢ်ဖဲ တၢ်လီၢ်တတီၤအံၤ သပှၢ်တၢၢ်န့ၣ် ယကသးအုးလၢ တၢ်နးတၢ်ဖှီၣ်လၢ ယဒုးလီၤဘၣ်သုအဃိလီၤ. ဒီးယကဒုးဘီၣ်ထီၣ်ညီထီၣ်သု ဒီးယတမၤလီၤပှီၢ်သုဘၣ်. ယကသူၣ်လီၤသု ဒီးယတထဲးထီၣ်ကွံာ်သုဘၣ်.+ ၁၁ ဘၤဘူၤလိၣ်အစီၤပၤလၢ သုပျံၤအီၤန့ၣ် တဘၣ်ပျံၤအီၤတဂ့ၤ.’+
“ယဟိဝၤယွၤ တဲဝဲလၢ ‘တဘၣ်ပျံၤအီၤတဂ့ၤ, မ့ၢ်လၢ ယကအိၣ်ဒီးသု, အုၣ်က့ၤခီၣ်က့ၤသု ဒီးမၤပူၤဖျဲးသုလၢ အစုပူၤအဃိလီၤ. ၁၂ ယကပာ်ဖျါထီၣ် တၢ်သးကညီၤလၢသုဖီခိၣ်+ ဒီးဘၤဘူၤလိၣ်အစီၤပၤ ကသးကညီၤသု ဒီးဒုးဟဲက့ၤသုလၢ သုထံသုကီၢ်လီၤ.
၁၃ “‘ဘၣ်ဆၣ် ဘၣ်သ့ၣ်သ့ၣ် သုကတဲလၢ “ဟၢၤအၢ, ပတအိၣ်တ့ၢ်ဖဲ တၢ်လီၢ်တတီၤအံၤဘၣ်” ဒီးသုမ့ၢ် တဒိကနၣ် သုကစၢ်ယဟိဝၤယွၤ အကလုၢ်ဘၣ် ၁၄ ခီဖျိသုတဲလၢ “ဟၢၤအၢ, ပကလဲၤလၢ ကီၢ်အဲၤကူပတူးဟီ.+ ဖဲန့ၣ်န့ၣ် တၢ်ဒုးမ့ၢ်ဂ့ၤ, ကွဲၤအသီၣ်မ့ၢ်ဂ့ၤ ဒီးတၢ်သၣ်ဝံၤလီၤဒိမ့ၢ်ဂ့ၤ ပတနၢ်ဟူဒီး ထံၣ်ဘၣ်အီၤဘၣ်. အဃိ ပကလဲၤအိၣ်လၢ တၢ်လီၢ်ဖဲန့ၣ်လီၤ.” ၁၅ ယူဒၤအပှၤဂီၢ်မုၢ်လၢ အအိၣ်တ့ၢ်တဖၣ်ဧၢ, ကနၣ်တၢ်လၢ ယဟိဝၤယွၤ တဲဝဲတက့ၢ်. တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ “သုမ့ၢ်ပာ်လီၤသုသး သပှၢ်တၢၢ်လၢ သုကလဲၤလၢ ကီၢ်အဲၤကူပတူးအပူၤ ဒီးသုမ့ၢ်လဲၤအိၣ် ဖဲန့ၣ်န့ၣ် ၁၆ နးလၢသုပျံၤအီၤတဘ့ၣ်န့ၣ် ကဟဲဘၣ်သုလၢ ကီၢ်အဲၤကူပတူးအပူၤဖဲန့ၣ် ဒီးတၢ်သၣ်ဝံၤလီၤဒိလၢ သုပျံၤအီၤန့ၣ် ကဘၣ်သုလၢ ကီၢ်အဲၤကူပတူးအပူၤ ဒီးသုကသံဖဲန့ၣ်လီၤ.+ ၁၇ ဒီးကယဲၢ်ပှၤလၢ အပာ်လီၤအသးလၢ ကလဲၤအိၣ်လၢ ကီၢ်အဲၤကူပတူးအပူၤန့ၣ် အဝဲသ့ၣ် ကသံလၢ တၢ်ဒုး, တၢ်သၣ်ဝံၤလီၤဒိ ဒီးတၢ်ဆါသံသတြိာ်လီၤ. အဝဲသ့ၣ်တဂၤမး တမူ ဒီးပူၤဖျဲးလၢ တၢ်နးတၢ်ဖှီၣ်လၢ ယကဒုးလီၤဘၣ် အဝဲသ့ၣ်ဘၣ်.”’
၁၈ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘ဒ်ယပာ်ဖျါထီၣ် ယတၢ်သးဒိၣ် ဒီးယတၢ်သးထီၣ်လၢ ပှၤလၢအအိၣ်လၢ ဝ့ၢ်ယရူၤၡလ့ၣ် အပူၤတဖၣ်+ အဖီခိၣ်အသိး သုမ့ၢ်လဲၤလၢ ကီၢ်အဲၤကူပတူးန့ၣ် ယကပာ်ဖျါထီၣ် ယတၢ်သးထီၣ်လၢ သုဖီခိၣ်လီၤ. ဒီးသုကဘၣ်ဆိၣ်အၢ, သုကကဲထီၣ် တၢ်လီၤပျံၤလီၤဖုးအလီၢ်, ပှၤကတဲအၢတဲသီသု, ပှၤကဒုၣ်ဒွဲၣ်သု+ ဒီးသုတထံၣ်ဘၣ် တၢ်လီၢ်အံၤ နီတဘျီလၢၤဘၣ်.’
၁၉ “ယူဒၤအပှၤဂီၢ်မုၢ်လၢ အအိၣ်တ့ၢ်တဖၣ်သ့ၣ်ဧၢ, ယဟိဝၤယွၤ တဲသုဝံၤလံ, တဘၣ်လဲၤလၢ ကီၢ်အဲၤကူပတူးတဂ့ၤ. သုဘၣ်သ့ၣ်ညါ လီၤတံၢ်လီၤဆဲးလၢ တနံၤအံၤ ယဟ့ၣ်ပလီၢ်သုလၢ ၂၀ သုသးသမူ ကၡူကွံာ်လၢ သုတၢ်ကမၣ်တခါန့ၣ် အဃိလီၤ. နီၢ်ကီၢ်န့ၣ် သုဆှၢယၤလၢ သုကစၢ် ယဟိဝၤယွၤအအိၣ် ဒီးသုတဲပာ်စၢၤလၢ ‘ဃ့ထုကဖၣ်န့ၢ်တၢ်လၢပဂီၢ် လၢပကစၢ် ယဟိဝၤယွၤ အအိၣ် ဒီးတဲပှၤတၢ်ခဲလၢာ်လၢ ပကစၢ် ယဟိဝၤယွၤ တဲဝဲ ဒီးပကမၤထွဲအီၤလီၤ.’+ ၂၁ တနံၤအံၤ ယတဲဘၣ်သုဝံၤလံ. ဘၣ်ဆၣ် သုတဒိကနၣ် သုကစၢ် ယဟိဝၤယွၤ အကလုၢ် ဒီးသုတမၤတၢ်လၢ အမၢယတဲဘၣ်သုန့ၣ် နီတမံၤဘၣ်.+ ၂၂ အဃိ သ့ၣ်ညါ သပှၢ်တၢၢ်လၢ သုကသံလၢ တၢ်ဒုး, တၢ်သၣ်ဝံၤလီၤဒိ ဒီးတၢ်ဆါသံသတြိာ် ဖဲတၢ်လီၢ်လၢ သုအဲၣ်ဒိးလဲၤအိၣ်လၢ အပူၤန့ၣ်တက့ၢ်.”+