ယံးရမံယၤ
၄၄ ဘၣ်ဃးဒီး ပှၤယူဒၤဖိတဖၣ်လၢ အအိၣ်လၢ ကီၢ်အဲၤကူပတူး,+ လၢအအိၣ်လၢ ဝ့ၢ်မံးကဒိးလး,+ ဝ့ၢ်တၤပါန့ၤ,+ ဝ့ၢ်နိဖး+ ဒီးပၤသြိၣ်အဟီၣ်ကဝီၤ+ အပူၤန့ၣ် ဝံယံးရမံယၤ တဲဝဲလၢ ၂ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘သုထံၣ်ဘၣ် တၢ်နးတၢ်ဖှီၣ်ခဲလၢာ်လၢ ယဒုးလီၤဘၣ် ဝ့ၢ်ယရူၤၡလ့ၣ်+ ဒီးယူဒၤအဝ့ၢ်ခဲလၢာ်လံ. ခဲအံၤ တၢ်လီၢ်တဖၣ်န့ၣ် ဟးဂီၤကွံာ်ဝဲ ဒီးပှၤတအိၣ်လၢအပူၤ နီတဂၤလၢၤဘၣ်.+ ၃ မ့ၢ်လၢ သုမၤတၢ်အၢတၢ်သီ ဒ်သိး ကမၤဆါယသးအဃိ တၢ်ကဲထီၣ်အသးဒ်န့ၣ်လီၤ. ယွၤအဂၤတဖၣ်လၢ သုမ့ၢ်ဂ့ၤ သုမိၢ်ပၢ်ဖံဖု လၢပျၢၤတဖၣ်မ့ၢ်ဂ့ၤ+ တသ့ၣ်ညါဝဲဘၣ်န့ၣ် သုလဲၤလုၢ်ထီၣ်တ့ၢ်တၢ် လၢအအိၣ်+ ဒီးဘူၣ်ထီၣ်ဘါထီၣ်အီၤလီၤ. ၄ ယဆှၢလီၤ ယခ့ယပှၤခဲလၢာ် လၢအမ့ၢ်ဝံတဖၣ် လၢသုအိၣ် တဘျီဝံၤတဘျီ ဒီးတဲလၢ “ဝံသးစူၤ တဘၣ်မၤ တၢ်လၢအလီၤသးဘၣ်အၢ လၢယသးဟ့အီၤ တခါအံၤတဂ့ၤ.”+ ၅ ဘၣ်ဆၣ် သုတဒိကနၣ် ယကလုၢ်ဘၣ် ဒီးတကနၣ်ဃုာ်တၢ်ဘၣ်.* သုဆဲးမၤတၢ်အၢတၢ်သီ ခီဖျိ သုဆဲးလုၢ်ထီၣ်တၢ်လၢ ယွၤအဂၤတဖၣ် အအိၣ်လီၤ.+ ၆ အဃိ ယပာ်ဖျါထီၣ် ယတၢ်သးဒိၣ် ဒီးယတၢ်သးထီၣ်လီၤ. ယတၢ်သးဒိၣ်န့ၣ် ကဲၤထီၣ်ဒ် မ့ၣ်အူအသိးလၢ ယူဒၤအဝ့ၢ်တဖၣ်အပူၤ ဒီးလၢဝ့ၢ်ယရူၤၡလ့ၣ် အကျဲတဖၣ်အပူၤအဃိ တၢ်လီၢ်တဖၣ်န့ၣ် ကဲထီၣ် တၢ်ဟးဂူာ်ဟးဂီၤ ဒီးတၢ်လီၢ်လၢ အအိၣ်သယုၢ်ဝဲ ဒ်မုၢ်မဆါတနံၤအံၤ အသိးလီၤ.’+
၇ “ခဲအံၤ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘ဘၣ်မနုၤအဃိ သုဒုးအိၣ်ထီၣ် တၢ်ကီတၢ်ခဲဖးဒိၣ်လၢသုဂီၢ် ဒ်သိး ပှၤပိာ်ခွါ, ပှၤပိာ်မုၣ် ဒီးဖိဒံဖိသၣ် ကိးဂၤဒဲး ကဟးဂီၤကွံာ်လၢ ယူဒၤအပှၤဂီၢ်မုၢ်အကျါ ဒီးသုတအိၣ်တ့ၢ် နီတဂၤလၢၤဘၣ်န့ၣ်လဲၣ်. ၈ ဘၣ်မနုၤအဃိ သုမၤတၢ်လၢအမၤဆါယသး ခီဖျိ သုလုၢ်ထီၣ်တၢ်လၢ ယွၤအဂၤတဖၣ်အအိၣ် လၢကီၢ်အဲၤကူပတူး ဖဲသုလဲၤအိၣ်လဲၤဆိးလၢ အပူၤန့ၣ်လဲၣ်. သုကဟးဂီၤ, သုကကဲထီၣ် တၢ်ဆိၣ်အၢ ဒီးတၢ်ဒုၣ်ဒွဲၣ်အလီၢ်လၢ ပှၤကလုာ်ခဲလၢာ်လၢ ဟီၣ်ခိၣ်ချၢအဂီၢ်လီၤ.+ ၉ သုမိၢ်ပၢ်ဖံဖု လၢပျၢၤတဖၣ် အတၢ်မၤလၢ အအၢအသီ, ယူဒၤအစီၤပၤတဖၣ်+ ဒီးအဝဲသ့ၣ်အမါတဖၣ် အတၢ်မၤလၢ အအၢအသီ,+ သုနီၢ်ကစၢ် ဒီးသုမါတဖၣ် အတၢ်မၤလၢ အအၢအသီ+ လၢသုမၤအီၤလၢ ယူဒၤအဟီၣ်ကဝီၤ ဒီးလၢဝ့ၢ်ယရူၤၡလ့ၣ် အကျဲတဖၣ်အပူၤန့ၣ် သုသးပ့ၤနီၣ်ကွံာ်လံဧါ. ၁၀ တုၤလၢခဲအံၤဒၣ်လဲာ် သု* တပီၢ်ယၢ်လီၤက့ၤသုသး,* သုတပျံၤယၤဘၣ်,+ သုတမၤပိာ်ထွဲ ယတၢ်သိၣ်တၢ်သီ ဒီးတၢ်ဘျၢတဖၣ်လၢ ယပာ်လီၤလၢ သုဒီး သုမိၢ်ပၢ်ဖံဖု လၢပျၢၤတဖၣ် အမဲာ်ညါဘၣ်.’+
၁၁ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘ယပာ်လီၤယသးလၢ ယကဒုးလီၤဘၣ်သုလၢ တၢ်နးတၢ်ဖှီၣ် ဒီးမၤဟးဂီၤ ယူဒၤအပှၤဂီၢ်မုၢ် ခဲလၢာ်လီၤ. ၁၂ ဒီးယူဒၤအပှၤဂီၢ်မုၢ်လၢ အအိၣ်တ့ၢ်တဖၣ် လၢအပာ်လီၤအသးလၢ ကလဲၤအိၣ်လၢ ကီၢ်အဲၤကူပတူးန့ၣ် ယကဖီၣ်န့ၢ်အဝဲသ့ၣ် ဒီးအဝဲသ့ၣ် ကိးဂၤဒဲး ကဟးဂီၤကွံာ်လၢ ကီၢ်အဲၤကူပတူးလီၤ.+ အဝဲသ့ၣ်ကိးဂၤဒဲး စးထီၣ်လၢ ပှၤအဒိၣ်ကတၢၢ် တုၤလၢ ပှၤအဆံးကတၢၢ်န့ၣ် ကလီၤဃံၢ်လၢနး ဒီးတၢ်သၣ်ဝံၤလီၤဒိလီၤ. အဝဲသ့ၣ် ကသံလၢနး ဒီးတၢ်သၣ်ဝံၤလီၤဒိ အဃိလီၤ. ဒီးအဝဲသ့ၣ် ကဘၣ်ဆိၣ်အၢ, ကကဲထီၣ် တၢ်လီၤပျံၤလီၤဖုးအလီၢ်, ပှၤကတဲအၢတဲသီအဝဲသ့ၣ် ဒီးဒုၣ်ဒွဲၣ်အဝဲသ့ၣ်လီၤ.+ ၁၃ ဒ်ယစံၣ်ညီၣ် ဝ့ၢ်ယရူၤၡလ့ၣ် လၢတၢ်ဒုး, တၢ်သၣ်ဝံၤလီၤဒိ ဒီးတၢ်ဆါသံသတြိာ်အသိး ပှၤလၢအအိၣ်လၢ ကီၢ်အဲၤကူပတူးန့ၣ် ယကစံၣ်ညီၣ်အဝဲသ့ၣ် ဒ်န့ၣ်လီၤ.+ ၁၄ ဒီးယူဒၤအပှၤဂီၢ်မုၢ်လၢ အအိၣ်တ့ၢ်တဖၣ်လၢ အလဲၤအိၣ်လၢ ကီၢ်အဲၤကူပတူးန့ၣ် ဃ့ၢ်ပူၤဖျဲးအသး တန့ၢ်ဘၣ် ဒီးအသးသမူ တပူၤဖျဲးဘၣ် အဃိ အဝဲသ့ၣ် တဟဲက့ၤဘၣ်ကဒါက့ၤလၢ ယူဒၤအဟီၣ်ကဝီၤပူၤဘၣ်. အဝဲသ့ၣ်န့ၣ် ကအဲၣ်ဒိး ဟဲက့ၤအိၣ်လၢ ယူဒၤအဟီၣ်ကဝီၤပူၤ သပှၢ်တၢၢ် ဘၣ်ဆၣ် တဟဲက့ၤဘၣ်ဝဲဘၣ်, ကဟဲက့ၤဘၣ်ဝဲထဲ ပှၤစှၤကိာ်ဂၤလၢ အဃ့ၢ်ပူၤဖျဲးအသးလီၤ.’”
၁၅ ကယဲၢ်ပှၤပိာ်ခွါတဖၣ်လၢ အသ့ၣ်ညါလၢ အမါလုၢ်ထီၣ်တ့ၢ်တၢ်လၢ ယွၤအဂၤတဖၣ်အအိၣ် ဒီးကယဲၢ်ပှၤမုၣ်ပှၢ်တဖၣ်လၢ အဆၢထၢၣ်ဖဲန့ၣ်လၢ ပှၤဖးဒိၣ်တဒူၣ်အံၤအကျါ ဒီးကယဲၢ်ပှၤလၢ အအိၣ်လၢ ပၤသြိၣ်အဟီၣ်ကဝီၤ+ လၢကီၢ်အဲၤကူပတူးပူၤန့ၣ်+ တဲဆၢဝဲ ဝံယံးရမံယၤလၢ ၁၆ “တၢ်ကတိၤလၢ နတဲဘၣ်ပှၤလၢ ယဟိဝၤယွၤအမံၤပူၤန့ၣ် ပတကနၣ်ဘၣ်. ၁၇ ပကမၤ ဒ်ပတဲပာ်စၢၤအသိးခဲလၢာ် အဃိ ပကလုၢ်ထီၣ်တၢ်လၢ မူခိၣ်အနီၢ်ပၤမုၣ်* အအိၣ် ဒီးလူလီၤစပံးထံ ဒ်တၢ်လုၢ်တၢ်ပာ်အသိးလၢ အအိၣ်လီၤ.+ လၢညါစ့ၢ်ကီး ဖဲပအီၣ်ဘၣ်ဘျဲဘျဲ, ပအိၣ်ဘၣ် ဘီၣ်ဘီၣ်ညီညီ ဒီးပတထံၣ်ဘၣ် တၢ်ကီတၢ်ခဲနီတမံၤဘၣ်အခါ ပဝဲမ့ၢ်ဂ့ၤ, ပမိၢ်ပၢ်ဖံဖု လၢပျၢၤတဖၣ်မ့ၢ်ဂ့ၤ, ပစီၤပၤတဖၣ်မ့ၢ်ဂ့ၤ, ပပဒိၣ်ဖးဒိၣ်တဖၣ်မ့ၢ်ဂ့ၤ မၤဝဲဒ်န့ၣ်လၢ ယူဒၤအဝ့ၢ်တဖၣ်အပူၤ ဒီးလၢဝ့ၢ်ယရူၤၡလ့ၣ် အကျဲတဖၣ်အပူၤလီၤ. ၁၈ စးထီၣ်လၢ ပတလုၢ်ထီၣ်တၢ်လၢ မူခိၣ်အနီၢ်ပၤမုၣ်အအိၣ် ဒီးတလူလီၤစပံးထံ ဒ်တၢ်လုၢ်တၢ်ပာ်အသိးလၢ အအိၣ်လၢၤဘၣ်န့ၣ် ပတၢ်တအိၣ်ဒီးပှၤ နီတမံၤလၢၤဘၣ် ဒီးပဟးဂီၤကွံာ်လၢနး ဒီးတၢ်သၣ်ဝံၤလီၤဒိလီၤ.”
၁၉ ဒီးပှၤပိာ်မုၣ်တဖၣ်န့ၣ် တဲဝဲလၢ “လၢညါ ဖဲပလုၢ်ထီၣ်တၢ်လၢ မူခိၣ်အနီၢ်ပၤမုၣ်အအိၣ်ဒီး လူလီၤစပံးထံ ဒ်တၢ်လုၢ်တၢ်ပာ်အသိး လၢအအိၣ် ဒီးပလုၢ်ထီၣ်ကိၣ်လၢ ပတ့အီၤဒ်အက့ၢ်အဂီၤအသိးဒီး လူလီၤစပံးထံ ဒ်တၢ်လုၢ်တၢ်ပာ်အသိး လၢအအိၣ်အခါ ပဝၤဟ့ၣ်ပှၤအခွဲး တမ့ၢ်ဧီၤ.”
၂၀ ဒီးပှၤပိာ်ခွါတဖၣ်, အဝဲသ့ၣ် အမါတဖၣ် ဒီးပှၤခဲလၢာ်လၢ အတဲတၢ်ဒီး ဝံယံးရမံယၤန့ၣ် ဝံယံးရမံယၤ တဲဘၣ်အဝဲသ့ၣ်လၢ ၂၁ “တၢ်လုၢ်တၢ်ပာ်တဖၣ်လၢ သုဝဲမ့ၢ်ဂ့ၤ, သုမိၢ်ပၢ်ဖံဖု လၢပျၢၤတဖၣ်မ့ၢ်ဂ့ၤ, သုစီၤပၤတဖၣ်မ့ၢ်ဂ့ၤ, သုပဒိၣ်ဖးဒိၣ်တဖၣ်မ့ၢ်ဂ့ၤ ဒီးပှၤထံဖိကီၢ်ဖိတဖၣ်မ့ၢ်ဂ့ၤ လုၢ်ထီၣ်ဝဲလၢ ယူဒၤအဝ့ၢ်တဖၣ်အပူၤ ဒီးလၢဝ့ၢ်ယရူၤၡလ့ၣ် အကျဲတဖၣ်+ အပူၤန့ၣ် ယဟိဝၤယွၤ သ့ၣ်နီၣ်ထီၣ်ဝဲ ဒီးသးပ့ၤနီၣ်ဝဲတန့ၢ်ဘၣ်.* ၂၂ သုတၢ်မၤလၢ အအၢအသီတဖၣ် ဒီးတၢ်လၢအလီၤသးဘၣ်အၢလၢ သုမၤတ့ၢ်တဖၣ်န့ၣ် သုမၤအီၤတုၤလၢ ယဟိဝၤယွၤ ဝံသးစူၤဝဲ တကဲလၢၤဘၣ်. သုတၢ်လီၢ်န့ၣ် ကကဲထီၣ် တၢ်ဟးဂူာ်ဟးဂီၤအလီၢ်, တၢ်လီၤပျံၤလီၤဖုးအလီၢ်, ပှၤကယၢၤထီၣ်ဝဲဒ် တၢ်ဆိၣ်အၢအသိး ဒီးပှၤတအိၣ်လၢအပူၤ နီတဂၤလၢၤဘၣ် ဒ်လၢမုၢ်မဆါတနံၤအံၤ အသိးလီၤ.+ ၂၃ သုလုၢ်ထီၣ်တၢ်ဒ်န့ၣ် ဒီးသုမၤကမၣ် ယဟိဝၤယွၤ ခီဖျိ သုတဒိကနၣ် ယဟိဝၤယွၤ အကလုၢ်, အတၢ်သိၣ်တၢ်သီ, အတၢ်ဘျၢ ဒီးအတၢ်ဒုးသ့ၣ်နီၣ်ထီၣ်တဖၣ်ဘၣ်. လၢတၢ်န့ၣ်အဃိ တၢ်နးတၢ်ဖှီၣ်တခါအံၤ ဟဲလီၤဘၣ်သု ဒ်လၢမုၢ်မဆါတနံၤအံၤ အသိးလီၤ.”+
၂၄ ဝံယံးရမံယၤ ဆဲးတဲဝဲ ပှၤဂီၢ်မုၢ်ခဲလၢာ် ဒီးပှၤပိာ်မုၣ်ခဲလၢာ်လၢ “သုဝဲယူဒၤအပှၤဂီၢ်မုၢ် လၢအအိၣ်လၢ ကီၢ်အဲၤကူပတူးအပူၤ ခဲလၢာ်သ့ၣ်ဧၢ, ဒိကနၣ်တၢ်လၢ ယဟိဝၤယွၤ ကတဲဝဲတက့ၢ်. ၂၅ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘သုဒီးသုမါတဖၣ် တဲပာ်စၢၤလၢ သုကမၤလၢပှဲၤ သုတၢ်အၢၣ်လီၤလၢ သုကလုၢ်ထီၣ်တၢ်လၢ မူခိၣ်အနီၢ်ပၤမုၣ်အအိၣ် ဒီးလူလီၤစပံးထံ ဒ်တၢ်လုၢ်တၢ်ပာ်အသိး လၢအအိၣ်လီၤ.+ တၢ်လၢ သုတဲပာ်စၢၤလၢ သုထးခိၣ်န့ၣ် သုမၤလၢပှဲၤထီၣ်အီၤဒီး သုစုလံ. သုဒီးသုမါတဖၣ်န့ၣ် သုကမၤလၢပှဲၤ သုတၢ်အၢၣ်လီၤန့ၣ် လီၤတံၢ်လံ.’
၂၆ “အဃိ သုဝဲယူဒၤအပှၤဂီၢ်မုၢ် လၢအအိၣ်လၢ ကီၢ်အဲၤကူပတူးအပူၤ ခဲလၢာ်သ့ၣ်ဧၢ, ဒိကနၣ်တၢ်လၢ ယဟိဝၤယွၤ ကတဲဝဲတက့ၢ်. ယဟိဝၤယွၤ တဲဝဲလၢ ‘သုဝဲ ယူဒၤအပှၤဂီၢ်မုၢ် လၢအအိၣ်လၢ ကီၢ်အဲၤကူပတူးအပူၤန့ၣ် လၢညါ သုအၢၣ်လီၤတၢ် ဒီးတဲလၢ ‘ဒ်တၢ်ပၢကစၢ် ယဟိဝၤယွၤ မူဝဲသပှၢ်တၢၢ်အသိး’+ လီၤ. ဘၣ်ဆၣ် ယအၢၣ်လီၤလၢ ယနီၢ်ကစၢ်အမံၤလၢ အဒိၣ်အမုၢ်အံၤအပူၤလၢ သုတကိးထီၣ်ယမံၤလၢ တၢ်အၢၣ်လီၤအပူၤ နီတဂၤလၢၤဘၣ်.+ ၂၇ ခဲအံၤ ယပာ်လီၤယသးလၢ ယကဒုးလီၤဘၣ် အဝဲသ့ၣ်လၢ တၢ်နးတၢ်ဖှီၣ် ဒီးတမ့ၢ်တၢ်လၢအဂ့ၤဘၣ်.+ အဃိ ယူဒၤအပှၤပိာ်ခွါခဲလၢာ်လၢ အအိၣ်လၢ ကီၢ်အဲၤကူပတူးအပူၤန့ၣ် ကသံလၢနး ဒီးတၢ်သၣ်ဝံၤလီၤဒိ တုၤလၢ အဝဲသ့ၣ် တအိၣ်လၢၤဘၣ်လီၤ.+ ၂၈ ပှၤလၢအကပူၤဖျဲးဝဲလၢနး, ကဟးထီၣ်ဘၣ်လၢ ကီၢ်အဲၤကူပတူးအပူၤ ဒီးဟဲက့ၤဘၣ်လၢ ယူဒၤအဟီၣ်ကဝီၤပူၤန့ၣ် ကအိၣ်ထဲဒၣ်စှၤကိာ်ဂၤလီၤ.+ ဖဲန့ၣ်အခါ ယူဒၤအပှၤဂီၢ်မုၢ် လၢအအိၣ်တ့ၢ်လၢ အလဲၤအိၣ်ပာ်စၢၤလၢ ကီၢ်အဲၤကူပတူးအပူၤ ကိးဂၤဒဲးန့ၣ် ကသ့ၣ်ညါဘၣ်ဝဲလၢ မတဂၤ အတၢ်ကတိၤ ဟဲလၢထီၣ်ပှဲၤထီၣ်လဲၣ်, ယတၢ်ကတိၤဧါ မ့တမ့ၢ် အဝဲသ့ၣ် အတၢ်ကတိၤဧါန့ၣ်လီၤ.’”
၂၉ “ယဟိဝၤယွၤ တဲဝဲလၢ ‘ယကဟ့ၣ်သုလၢ တၢ်ပနီၣ်တခါ ဒ်သိး ယကဒုးနဲၣ်သုလၢ ယကစံၣ်ညီၣ်သု ဖဲတၢ်လီၢ်အံၤလီၤ. ဒီးသုကသ့ၣ်ညါဘၣ်လၢ တၢ်နးတၢ်ဖှီၣ်လၢ ယအၢၣ်လီၤလၢ ယကဒုးလီၤဘၣ်သုန့ၣ် ကဟဲလၢထီၣ်ပှဲၤထီၣ် သပှၢ်တၢၢ်လီၤ. ၃၀ ယဟိဝၤယွၤ တဲဝဲလၢ “ဒ်ယဟ့ၣ်လီၤကွံာ် ယူဒၤအစီၤပၤ စံးဒကံယၤ လၢဘၤဘူၤလိၣ် အစီၤပၤနဘူၤကးန့စၢ် လၢအမ့ၢ် အဒုၣ်အဒါ ဒီးပှၤလၢအဃုမၤသံအီၤတဂၤ အစုပူၤအသိး ယကဟ့ၣ်လီၤကွံာ် ကီၢ်အဲၤကူပတူး အစီၤပၤဖၤရိၤဃါပြိၤ လၢအဒုၣ်အဒါတဖၣ် ဒီးပှၤလၢအဃုမၤသံအီၤတဖၣ် အစုပူၤလီၤ.”’”+