ယံးရမံယၤ
၄၃ ဖဲဝံယံးရမံယၤ တဲဘၣ် ပှၤဂီၢ်မုၢ်ခဲလၢာ်လၢ အဝဲသ့ၣ် အကစၢ် ယဟိဝၤယွၤ အတၢ်ကတိၤကိးထံၣ်ဒဲးလၢ ယဟိဝၤယွၤ မၢဝံယံးရမံယၤ တဲဘၣ်အဝဲသ့ၣ် ဝံၤအခါ ၂ စီၤဟိၤၡၤယၤအဖိခွါ စီၤဧစၤရယၤ, စီၤကါရ့ၤအဖိခွါ စီၤယိဃၤနၣ်+ ဒီးပှၤလၢ အပာ်ထီၣ်ထီသးကိးဂၤဒဲး တဲဘၣ် ဝံယံးရမံယၤလၢ “တၢ်လၢနတဲန့ၣ် တမ့ၢ်တတီဘၣ်. ပကစၢ် ယဟိဝၤယွၤ တမၢနတဲပှၤလၢ ‘တဘၣ်လဲၤအိၣ်လၢ ကီၢ်အဲၤကူပတူးတဂ့ၤ’ န့ၣ်ဘၣ်. ၃ စီၤန့ၤရံယၤအဖိခွါ စီၤဘၤရူး+ ဟ့ၣ်သဆၣ်ထီၣ်နၤလၢ နကဟ့ၣ်လီၤကွံာ်ပှၤလၢ ပှၤက့ၤစ့းဖိအစုပူၤလၢ ကမၤသံပှၤ မ့တမ့ၢ် က့ၤဖီၣ်ပှၤလၢ ဘၤဘူၤလိၣ်အဂီၢ်လီၤ.”+
၄ အဃိ စီၤကါရ့ၤအဖိခွါ စီၤယိဃၤနၣ်, သုးခိၣ်တဖၣ် ဒီးပှၤဂီၢ်မုၢ်န့ၣ် တဒိကနၣ် ယဟိဝၤယွၤအကလုၢ် လၢကဘၣ်အိၣ်တ့ၢ်ဖဲ ယူဒၤအဟီၣ်ကဝီၤပူၤဘၣ်. ၅ ဒီးစီၤကါရ့ၤအဖိခွါ စီၤယိဃၤနၣ် ဒီးသုးခိၣ်ခဲလၢာ်န့ၣ် လဲၤကိးဃုာ်ဒီး ယူဒၤအပှၤဂီၢ်မုၢ်လၢ အအိၣ်တ့ၢ်ဒံးတဖၣ်လီၤ. လၢညါ ပှၤတဖၣ်န့ၣ် ဘၣ်တၢ်မၤလီၤပြံလီၤပြါအီၤလၢ ပှၤကလုာ်တဖၣ်အကျါ ဝံၤဒီးဟဲက့ၤကဒါက့ၤဝဲလၢ ယူဒၤအဟီၣ်ကဝီၤပူၤလီၤ.+ ၆ ပှၤလၢ အဝဲသ့ၣ် လဲၤကိးဝဲတဖၣ်န့ၣ် ပၣ်ဃုာ်ဒီး ပိာ်ခွါ, ပိာ်မုၣ်, ဖိသၣ်, စီၤပၤအဖိမုၣ်တဖၣ် ဒီးပှၤကိးဂၤဒဲးလၢ ပှၤခိးတၢ်ဖိအခိၣ် စီၤနဘူစၢ်ရဒၣ်+ ပာ်တ့ၢ်ဝဲလၢ စီၤၡၤဖၣ်+ အလံၤခွါ စီၤကဒါလယၤ+ လၢအမ့ၢ် စီၤအဃံကၣ်+ အဖိခွါ အစုပူၤလီၤ. အဝဲသ့ၣ် လဲၤကိးဃုာ်စ့ၢ်ကီးဒီး ဝံယံးရမံယၤ ဒီးစီၤန့ၤရံယၤအဖိခွါ စီၤဘၤရူးလီၤ. ၇ အဝဲသ့ၣ် တဒိကနၣ် ယဟိဝၤယွၤ အကလုၢ်ဘၣ် ဒီးလဲၤဝဲလၢ ကီၢ်အဲၤကူပတူး ဒီးလဲၤဝဲ ပၢၢ်တုၤလၢ ဝ့ၢ်တၤပါန့ၤလီၤ.+
၈ လၢဝ့ၢ်တၤပါန့ၤန့ၣ် ယဟိဝၤယွၤတဲ ဝံယံးရမံယၤလၢ ၉ “ဟံးန့ၢ် လၢၢ်ဖးဒိၣ်တဖၣ် ဒီးပာ်ခူသူၣ်အီၤဖဲ အူးခဲအလီၤပတီၢ် ဒီးဘျၢလီၤအီၤလၢ ဘံလၣ်မၠ့ၤအကျါ ဖဲဖၤရိၤအဟံၣ် အကျဲနုာ်လီၤအလီၢ်လၢ ဝ့ၢ်တၤပါန့ၤ အပူၤတက့ၢ်. ဒီးနဘၣ်မၤဒ်န့ၣ်လၢ ယူဒၤအပှၤပိာ်ခွါတဖၣ် အမဲာ်ညါလီၤ. ၁၀ ဒီးတဲအဝဲသ့ၣ်လၢ ‘တၢ်သုးမုၢ်ဂီၢ်မုၢ်အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ “ယကကိးန့ၢ် ယခ့ယပှၤ+ လၢအမ့ၢ် ဘၤဘူၤလိၣ်အစီၤပၤ နဘူၤကးန့စၢ် ဒီးယကဆီလီၤ အလီၢ်ပစိာ်လၢ လၢၢ်လၢ ယပာ်ခူသူၣ်အီၤတဖၣ်အံၤ အဖီခိၣ်လီၤ. ဒီးအဝဲကသူၣ်ထီၣ်အဒဲလၢ လၢၢ်တဖၣ်အံၤ အဖီခိၣ်လီၤ.+ ၁၁ ဒီးအဝဲကဟဲနုာ်လီၤဒုး ကီၢ်အဲၤကူပတူးလီၤ.+ ပှၤတနီၤ ကဘၣ်သံဝဲလၢ တၢ်ဆါသံသတြိာ်အဃိ, ပှၤတနီၤန့ၣ် ကဘၣ်တၢ်က့ၤဖီၣ်အီၤ ဒီးပှၤတနီၤ ကဘၣ်တၢ်မၤသံအီၤလၢ နးလီၤ.+ ၁၂ ယကဒွဲၣ်အူထီၣ်ကွံာ် ကီၢ်အဲၤကူပတူး အယွၤတဖၣ်+ အဟံၣ်လီၤ.* ဒီးစီၤနဘူၤကးန့စၢ် ကဒွဲၣ်အူထီၣ်ကွံာ် ဟံၣ်တဖၣ်န့ၣ် ဒီးကက့ၤစိာ်ဝဲ တၢ်ဂီၤတၢ်ဖှီၣ် လၢအမ့ၢ် ယွၤတဖၣ်န့ၣ်လီၤ. ဒီးဒ်ပှၤကွၢ်သိတဂၤ ကၤထီၣ်အဆ့ကၤ ညီညီဖိအသိး စီၤနဘူၤကးန့စၢ် ကမၤန့ၢ်ဝဲ ကီၢ်အဲၤကူပတူးဒီဘ့ၣ် ညီညီဖိ ဒီးကဟးထီၣ်ကွံာ်ဖဲန့ၣ် မုာ်မုာ်ခုၣ်ခုၣ်လီၤ. ၁၃ ဒီးအဝဲကမၤလီၤကလဲကွံာ် ဘ့ၤသၡ့မ့ၣ် အထူၣ်တဖၣ်လၢ အအိၣ်ဝဲလၢ ကီၢ်အဲၤကူပတူးအပူၤ ဒီးအဝဲကဒွဲၣ်အူထီၣ်ကွံာ် ကီၢ်အဲၤကူပတူး အယွၤတဖၣ် အဟံၣ်လီၤ.”’”*