ယံးရမံယၤ
၅၂ ဖဲစီၤစံးဒကံယၤ+ ကဲထီၣ်စီၤပၤအခါ အသးနံၣ်အိၣ်ဝဲ ၂၁ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၁ နံၣ်လီၤ. စီၤစံးဒကံယၤ အမိၢ်မ့ၢ်ဝဲ နီၢ်ဃမူတလး+ လၢအမ့ၢ် စီၤယံးရမံယၤ လၢအအိၣ်ဟဲလၢ ဝ့ၢ်လံးဘနၤန့ၣ် အဖိမုၣ်လီၤ. ၂ စီၤစံးဒကံယၤ ဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢ ဒ်စီၤယဟိၤယါကံၣ် မၤတ့ၢ်ဝဲအသိး ခဲလၢာ်လီၤ.+ ၃ ခီဖျိလၢ ယဟိဝၤယွၤ အတၢ်သးဒိၣ်ထီၣ်အဃိ တၢ်ကဲထီၣ်အသးဒ်အံၤလၢ ဝ့ၢ်ယရူၤၡလ့ၣ် ဒီးလၢယူဒၤဘီမုၢ်ပူၤ တုၤလၢ အနီဟးထီၣ်ကွံာ် အဝဲသ့ၣ်လၢ အမဲာ်ညါလီၤ.+ ဒီးစီၤစံးဒကံယၤ ထီဒါက့ၤ ကီၢ်ဘၤဘူၤလိၣ် အစီၤပၤလီၤ.+ ၄ ဖဲစီၤစံးဒကံယၤ ပၢတၢ်ခွံနံၣ်တနံၣ်, ဖဲလါအလါတဆံ, လါထီၣ် အသီတဆံန့ၣ် ဘၤဘူၤလိၣ် အစီၤပၤနဘူၤကးန့စၢ် ဒီးအသုးမုၢ် လဲၤဝဲလၢ ဝ့ၢ်ယရူၤၡလ့ၣ်လီၤ. အဝဲသ့ၣ် ဆီလီၤအသး ဒ်သိးကဒုးဝ့ၢ်အဂီၢ် ဒီးတ့ထီၣ် တၢ်ဒူၣ်ဝးတရံးဝ့ၢ်လီၤ.+ ၅ ဒီးဝ့ၢ်န့ၣ် ဘၣ်တၢ်ကဝီၤဃာ်အီၤ တုၤလၢ စီၤပၤစံးဒကံယၤ ပၢတၢ် ၁၁ နံၣ်အနံၣ်လီၤ.
၆ ဒီးဖဲလါ လွံၢ်လါတလါ, လါထီၣ်ခွံသီတသီန့ၣ်+ တၢ်သၣ်ဝံၤလီၤဒိ အိၣ်ဝဲလၢ ဝ့ၢ်ပူၤနးမး ဒီးလၢပှၤထံဖိကီၢ်ဖိအဂီၢ်န့ၣ် တၢ်အီၣ်တအိၣ်လၢၤဘၣ်.+ ၇ လၢခံ ပှၤက့ၤစ့းဖိတဖၣ် ဘၢၣ်ဖျိကွံာ်ဝ့ၢ်ဒူၣ် ဒီးဖဲအဝဲသ့ၣ် ကဝီၤဃာ်ဝ့ၢ်အခါ သုးဖိခဲလၢာ် ဃ့ၢ်ထီၣ်ကွံာ်လၢဝ့ၢ်ပူၤ လၢမုၢ်နၤခီ ဒီးဟးထီၣ်ကွံာ်ဝဲလၢ တြဲၤလၢ အအိၣ်ဝဲလၢ တၢ်ဒူၣ်ခံခါ အဘၢၣ်စၢၤလၢ စီၤပၤအတၤသၣ်လီၢ် အကပၤ ဒီးလဲၤဝဲလၢ ဧၤရဘၤအကျဲလီၤ.+ ၈ ဘၣ်ဆၣ် ပှၤက့ၤစ့းဖိ အသုးမုၢ်လူၤဝဲ စီၤပၤစံးဒကံယၤ+ ဒီးချုးန့ၢ်အီၤဖဲ ဝ့ၢ်ယရံၤဃိ အတၢ်ပၢၤခိၣ်လီၤ. ဒီးစီၤပၤ အသုးဖိခဲလၢာ် လီၤမုၢ်ပြံပြါကွံာ်ဝဲလၢ အအိၣ်လီၤ. ၉ ဒီးအဝဲသ့ၣ် ဖီၣ်န့ၢ်စီၤပၤ ဒီးက့ၤကိးအီၤလၢ ဘၤဘူၤလိၣ် အစီၤပၤအအိၣ် လၢဝ့ၢ်ရံးဘလၤ လၢဃမါသး အဟီၣ်ကဝီၤ ဒီးဘၤဘူၤလိၣ်အစီၤပၤ စံၣ်ညီၣ်အီၤလီၤ. ၁၀ ဘၤဘူၤလိၣ်အစီၤပၤ မၤသံဝဲ စီၤစံးဒကံယၤ အဖိခွါတဖၣ်လၢ စီၤစံးဒကံယၤ အမဲာ်ညါ ဒီးမၤသံစ့ၢ်ကီးဝဲ ယူဒၤအပဒိၣ်ဖးဒိၣ်ခဲလၢာ် ဖဲဝ့ၢ်ရံးဘလၤလီၤ. ၁၁ ဝံၤဒီး ဘၤဘူၤလိၣ်အစီၤပၤ တူခွဲးထီၣ်ကွံာ် စီၤစံးဒကံယၤ အမဲာ်ချံ,+ စၢဃာ်အီၤလၢ ထးသွဲတိၢ်ဘီတဖၣ် ဒီးက့ၤကိးအီၤဆူ ဝ့ၢ်ဘၤဘူၤလိၣ်လီၤ. ဒီးအဝဲပာ်အီၤလၢ ဃိာ်ပူၤ တုၤလၢအသံတစုလီၤ.
၁၂ ဖဲဘၤဘူၤလိၣ် အစီၤပၤ နဘူၤကးန့စၢ် ပၢတၢ် ၁၉ နံၣ်တနံၣ်, လါယဲၢ်လါတလါ, လါထီၣ်အသီတဆံန့ၣ် ဘၤဘူၤလိၣ် အစီၤပၤ အခ့အပှၤလၢအမ့ၢ် ပှၤခိးတၢ်ဖိအခိၣ် စီၤနဘူစၢ်ရဒၣ်န့ၣ် လဲၤတုၤလၢ ဝ့ၢ်ယရူၤၡလ့ၣ် အပူၤလီၤ.+ ၁၃ အဝဲဒွဲၣ်အူထီၣ်ကွံာ် ယဟိဝၤယွၤ အတၢ်လုၢ်ဟံၣ်,+ စီၤပၤအဟံၣ် ဒီးဟံၣ်ခဲလၢာ်လၢ ဝ့ၢ်ယရူၤၡလ့ၣ်အပူၤလီၤ. ဒီးအဝဲဒွဲၣ်အူထီၣ်ကွံာ်စ့ၢ်ကီး ဟံၣ်ဖးဒိၣ်ကိးဖျၢၣ်ဒဲးလီၤ. ၁၄ ဒီးပှၤက့ၤစ့းဖိ အသုးမုၢ်ဒီတဖု လၢအအိၣ်ဒီး ပှၤခိးတၢ်ဖိအခိၣ်န့ၣ် မၤလီၤပှီၢ်ကွံာ်ဝဲ ယရူၤၡလ့ၣ် အဝ့ၢ်ဒူၣ်လီၤ.+
၁၅ ပှၤခိးတၢ်ဖိအခိၣ် စီၤနဘူစၢ်ရဒၣ် က့ၤဖီၣ်ဝဲ ပှၤလၢအပတီၢ်ဖုၣ်တနီၤ လၢအအိၣ်လၢ ပှၤဂီၢ်မုၢ်အကျါ ဒီးပှၤလၢ အအိၣ်ဒံးလၢ ဝ့ၢ်ပူၤလီၤ. ဒီးအဝဲက့ၤဖီၣ်စ့ၢ်ကီး ပှၤလၢအလဲၤအိၣ်ဃူ ဘၤဘူၤလိၣ်အစီၤပၤ ဒီးပှၤစုသ့ဖိလၢ အမၤတၢ်သ့ဂ့ၤဂ့ၤလၢ အအိၣ်တ့ၢ်ဒံးတဖၣ်လီၤ.+ ၁၆ ဘၣ်ဆၣ် စီၤနဘူစၢ်ရဒၣ် လၢအမ့ၢ် ပှၤခိးတၢ်ဖိအခိၣ် ပာ်တ့ၢ်ဝဲ ပှၤလၢအဖှီၣ်ကတၢၢ်တနီၤလၢ ကီၢ်ပူၤ ဒ်သိး ကမၤတၢ်လၢ စပံးကျီး ဒီးမၤတၢ်ဒ် ပှၤလၢအဘၣ် တၢ်မၢဆူၣ်အီၤလၢ ကမၤတၢ်အဂီၢ်လီၤ.+
၁၇ ဒီးယဟိဝၤယွၤ အဟံၣ် အတၢ်ထူၣ်တဖၣ်လၢ အဘၣ်တၢ်မၤအီၤလၢ တိၢ်ဘီ,+ လ့ၣ်ဆီၣ်တဖၣ်ဒီး+ ထံဒၢဖးဒိၣ်တဖျၢၣ်လၢ ပှၤကိးဝဲလၢ ပီၣ်လဲၣ်တိၢ်ဘီ+ လၢအအိၣ်လၢ ယဟိဝၤယွၤ အဟံၣ်ပူၤန့ၣ် အဝဲသ့ၣ် မၤတဲာ်ကွံာ်ဝဲ တကူာ်ဘၣ်တကူာ် ဒီးအဝဲသ့ၣ် က့ၤစိာ်ဝဲ တိၢ်ဘီခဲလၢာ်ဆူ ကီၢ်ဘၤဘူၤလိၣ်လီၤ.+ ၁၈ အဝဲသ့ၣ် က့ၤစိာ်စ့ၢ်ကီး ထံစဲၤတဖၣ်, နီၣ်တရီာ်တၢ်တဖၣ်, ထးရံးတဖၣ်, လီခီဖျၢၣ်တဖၣ်,+ ထံခွးတဖၣ်+ ဒီးတၢ်ပီးတၢ်လီလၢ အဘၣ်တၢ်တ့အီၤလၢ တိၢ်ဘီ လၢပှၤသူအီၤလၢ တၢ်လုၢ်ဟံၣ်အပူၤ ခဲလၢာ်လီၤ. ၁၉ ပှၤခိးတၢ်ဖိအခိၣ်န့ၣ် က့ၤစိာ်စ့ၢ်ကီး ထံဒၢတဖၣ်,+ တၢ်စိာ်မ့ၣ်အူအ့ၣ်အခွးတဖၣ်, လီခီဖျၢၣ်တဖၣ်, ထံစဲၤတဖၣ်, မ့ၣ်အူဒၢတဖၣ်,+ ထံခွးတဖၣ် ဒီးလီခီဖျၢၣ်တဖၣ်လၢ ဘၣ်တၢ်တ့အီၤလၢ ထူစီ ဒီးစ့ညၣ်တဖၣ်လီၤ.+ ၂၀ မ့မ့ၢ် တၢ်အထူၣ် ခံထူၣ်, ထံဒၢဖးဒိၣ်တဖျၢၣ်လၢ ပှၤကိးဝဲလၢ ပီၣ်လဲၣ်တိၢ်ဘီ, ကျီၢ်ဖါတိၢ်ဘီ ၁၂ ဒု+ လၢအအိၣ်လၢ ထံဒၢဖးဒိၣ်လၢ ပှၤကိးဝဲလၢ ပီၣ်လဲၣ်တိၢ်ဘီ အဖီလာ် ဒီးလ့ၣ်ဆီၣ်တဖၣ်လၢ စီၤပၤၡလိၤမိၤ တ့ထီၣ်ပာ်စၢၤဝဲလၢ ယဟိဝၤယွၤ အဟံၣ်အဂီၢ်န့ၣ် အတိၢ်ဘီအိၣ်ဝဲ အါတလၢ လၢပှၤကစီၤဝဲအဂီၢ်လီၤ.
၂၁ တၢ်ထူၣ်တထူၣ်စုာ်စုာ်န့ၣ် အထီအိၣ်ဝဲ ၁၈ ပျၢ်လီၤ. ဒ်သိး ပှၤကစၢဝးတရံး တၢ်အထူၣ်တထူၣ် အဂီၢ်န့ၣ် ကလိၣ်ဘၣ် တၢ်ထိၣ်ပျံၤတဘိလၢ အထီဝဲ ၁၂ ပျၢ်လီၤ.+ တၢ်အထူၣ်န့ၣ် တီၣ်ဝဲ စုမုၢ်လွံၢ်ဒူ* ဒီးတၢ်အထူၣ်န့ၣ် အိၣ်ဒီးအကိပူၤလီၤ. ၂၂ ဒီးတၢ်ထူၣ် အခိၣ်ထိးန့ၣ် ဘၣ်တၢ်တ့အီၤလၢ တိၢ်ဘီ ဒီးတၢ်ထူၣ်တထူၣ်န့ၣ် အခိၣ်ထိးအထီအိၣ်ဝဲ ယဲၢ်ပျၢ်လီၤ.+ ဒီးတၢ်ကယၢကယဲလၢ အလီၤဂာ်ဒ်ပှာ်အသိး ဒီးတၢ်ကယၢကယဲတဖၣ်လၢ အလီၤဂာ်ဒ်သလဲသၣ်အသိးန့ၣ် အိၣ်ဝးတရံး တၢ်အခိၣ်ထိး ဒီးဘၣ်တၢ်တ့အီၤလၢ တိၢ်ဘီခဲလၢာ်လီၤ. ဒီးတၢ်အထူၣ် ခံထူၣ်တထူၣ် လၢအအိၣ်ဒီး တၢ်ကယၢကယဲလၢ အလီၤဂာ်ဒ် ပှာ်ဒီးသလဲသၣ်တဖၣ်အသိးန့ၣ် ဘၣ်တၢ်တ့အီၤ ဒ်န့ၣ်စ့ၢ်ကီးလီၤ. ၂၃ လၢတၢ်ကယၢကယဲလၢ အလီၤဂာ် ဒ်ပှာ်အသိးအလိၤန့ၣ် တၢ်ကယၢကယဲတဖၣ်လၢ အလီၤဂာ်ဒ်သလဲသၣ်အသိး အိၣ်ဝးတရံးအီၤ အဖျၢၣ် ၁၀၀ လီၤ. ဘၣ်ဆၣ် ပှၤကွၢ်အီၤဖျါထဲ ၉၆ ဖျၢၣ်လီၤ.+
၂၄ ပှၤခိးတၢ်ဖိအခိၣ် က့ၤကိးစ့ၢ်ကီး ပှၤလုၢ်တၢ်ဒိၣ်အခိၣ် စီၤစရါယၤ,+ ပှၤလုၢ်တၢ်ဒိၣ် ခံဂၤတဂၤ စီၤစဖါနယၤ+ ဒီးပှၤခိးတြဲၤဖိ သၢဂၤလီၤ.+ ၂၅ ဒီးလၢဝ့ၢ်ပူၤန့ၣ် အဝဲက့ၤကိးပဒိၣ်တဂၤ လၢအမ့ၢ် ပှၤသုးဖိအခိၣ်, စီၤပၤအပှၤဟ့ၣ်ကူၣ်တၢ် နွံဂၤလၢ အအိၣ်လၢ ဝ့ၢ်ပူၤ, သုးခိၣ်ကျၢၢ် အနဲၣ်ရွဲၣ်လၢ အထၢသုးဖိအသီတဖၣ် ဒီးပှၤပိာ်ခွါအဂၤ ၆၀ လၢအအိၣ်လၢ ဝ့ၢ်ပူၤလီၤ. ၂၆ ပှၤခိးတၢ်ဖိအခိၣ် စီၤနဘူစၢ်ရဒၣ် က့ၤကိးအဝဲသ့ၣ်လၢ ဘၤဘူၤလိၣ် အစီၤပၤအအိၣ် ဖဲဝ့ၢ်ရံးဘလၤလီၤ. ၂၇ ဒီးဘၤဘူၤလိၣ် အစီၤပၤ မၤသံကွံာ်အဝဲသ့ၣ် ဖဲဝ့ၢ်ရံးဘလၤ+ လၢဃမါသး အဟီၣ်ကဝီၤလီၤ. အဃိ ယူဒၤအပှၤဂီၢ်မုၢ် ဘၣ်တၢ်က့ၤကိးအီၤ ဖးယံၤဒီး အထံကီၢ်လီၤ.+
၂၈ ဖဲစီၤနဘူၤကးန့စၢ် ပၢတၢ် နွံနံၣ်တနံၣ်န့ၣ် အဝဲက့ၤဖီၣ်ဝဲ ပှၤယူဒၤဖိ ၃,၀၂၃ ဂၤလီၤ.+
၂၉ ဖဲစီၤနဘူၤကးန့စၢ်+ ပၢတၢ် ၁၈ နံၣ်တနံၣ်န့ၣ် အဝဲက့ၤဖီၣ်ဝဲ ပှၤလၢအအိၣ်လၢ ဝ့ၢ်ယရူၤၡလ့ၣ်အပူၤ ၈၃၂ ဂၤလီၤ.
၃၀ ဖဲစီၤနဘူၤကးန့စၢ် ပၢတၢ် ၂၃ နံၣ်တနံၣ်န့ၣ် ပှၤခိးတၢ်ဖိအခိၣ် စီၤနဘူစၢ်ရဒၣ် က့ၤဖီၣ်ဝဲ ပှၤယူဒၤဖိ ၇၄၅ ဂၤလီၤ.+
ပှၤလၢ ဘၣ်တၢ်က့ၤဖီၣ်အီၤန့ၣ် ခဲလၢာ်ခဲဆ့အိၣ်ဝဲ ၄,၆၀၀ ဂၤလီၤ.
၃၁ ဒီးဖဲယူဒၤအစီၤပၤ ယဟိၤယါခံၣ်+ ဘၣ်တၢ်က့ၤဖီၣ်အီၤ ပှဲၤထီၣ် ၃၇ နံၣ်တနံၣ်, လါ ၁၂ လါတလါ, လါထီၣ် ၂၅ သီတသီန့ၣ် ဘၤဘူၤလိၣ် အစီၤပၤအ့ဝလးမရၤဒိး ပျၢ်ကွံာ် ယူဒၤ အစီၤပၤယဟိၤယါခံၣ် လၢဃိာ်ပူၤလီၤ. တၢ်ကဲထီၣ်အသးဒ်န့ၣ် ဖဲစီၤအ့ဝလးမရၤဒိး ကဲထီၣ်စီၤပၤ အဆိကတၢၢ်တနံၣ် အတီၢ်ပူၤလီၤ.+ ၃၂ ဘၤဘူၤလိၣ် အစီၤပၤန့ၣ် တဲတၢ်ဒီးစီၤယဟိၤယါခံၣ် မုာ်မုာ် ဒီးအဝဲပာ်ထီၣ် စီၤယဟိၤယါခံၣ် ထီန့ၢ်ဒံး* စီၤပၤအဂၤတဖၣ်လၢ အဘၣ်တၢ်က့ၤဖီၣ်အီၤ လၢဘၤဘူၤလိၣ်အပူၤလီၤ. ၃၃ အဃိ စီၤယဟိၤယါခံၣ် ဘ့ၣ်လီၤကွံာ် ပှၤဃိာ်ဖိအတၢ်ကူတၢ်ကၤ ဒီးဖဲအဝဲအိၣ်မူဒံးဝဲ အဆၢကတီၢ်န့ၣ် အဝဲအီၣ်တၢ်လၢ စီၤပၤအစီၢ်နီၤခိၣ် ထီဘိလီၤ. ၃၄ ဖဲအဝဲ အိၣ်မူဒံးဝဲ အဆၢကတီၢ်န့ၣ် ဘၤဘူၤလိၣ်အစီၤပၤ ဟ့ၣ်လီၤအီၤ တၢ်အီၣ်တၢ်အီ တနံၤဘၣ်တနံၤ ထီဘိ တုၤလၢအသံတစုလီၤ.