ယံးရမံယၤ
၁၆ ယဟိဝၤယွၤ တဲဘၣ်ကဒီးယၤလၢ ၂ “နတဘၣ် ဟံးဖိဟံးမါ လၢတၢ်လီၢ်အံၤဘၣ်. ၃ ယၤ, ယဟိဝၤယွၤ ကတဲဘၣ်နၤ တၢ်လၢအကမၤအသးဒီး ဖိမုၣ်ဖိခွါတဖၣ်လၢ အအိၣ်ဖျဲၣ်ထီၣ်ဖဲအံၤ ဒီးအဝဲသ့ၣ် အမိၢ်လၢ အအိၣ်ဖျဲၣ်ထီၣ်အီၤ ဒီးအဝဲသ့ၣ် အပၢ်လၢအထီၣ်ဖိ အဝဲသ့ၣ်လၢ ကီၢ်အံၤအပူၤလီၤ. ၄ ‘အဝဲသ့ၣ် ကသံလၢ တၢ်ဆူးတၢ်ဆါလၢ အနးအဃိ+ ဘၣ်ဆၣ် ပှၤတဟီၣ် ဒီးခူၣ်လီၤကွံာ် အဝဲသ့ၣ်နီတဂၤဘၣ်. အဝဲသ့ၣ် ကကဲထီၣ် ဒ်သိးဒီး တၢ်အ့ၣ်တၢ်ဆံၣ်လၢ ဟီၣ်ခိၣ်လိၤလီၤ.+ အဝဲသ့ၣ် ကဟးဂီၤလၢတၢ်ဒုး ဒီးတၢ်သၣ်ဝံၤလီၤဒိ+ ဒီးအဝဲသ့ၣ် အစိၣ်တဖၣ် ကကဲထီၣ် ထိၣ်လၢအယူၤလၢ တၢ်ဖးဖီတဖၣ် အတၢ်အီၣ် ဒီးဆၣ်ဖိကီၢ်ဖိလၢအဒူတဖၣ် အတၢ်အီၣ်လီၤ.’
၅ ယဟိဝၤယွၤ တဲဝဲလၢ
‘ယတဟ့ၣ်လီၤ ပှၤဂီၢ်မုၢ်အံၤလၢ ယတၢ်ဃူတၢ်ဖိးလၢၤဘၣ်.
ဒီးယထုးထီၣ်ကွံာ် ယတၢ်အဲၣ်လၢအတီ ဒီးယတၢ်သးကညီၤလၢ အဝဲသ့ၣ်အအိၣ်လံ.’+
ယဟိဝၤယွၤ တဲဝဲလၢ ‘အဃိ တဘၣ်လဲၤနုာ်လၢ ဟံၣ်တဖျၢၣ်ဖဲ ပှၤမၤတၢ်ဟီၣ်တၢ်ယၢၤ အတၢ်အီၣ်မူးပွဲန့ၣ် အပူၤတဂ့ၤ.
တဘၣ်လဲၤဟီၣ်ကိးပသူ ဒီးပာ်ဖျါထီၣ် တၢ်သးကညီၤတဂ့ၤ.+
၆ ပှၤဒိၣ်ပှၤပှၢ်မ့ၢ်ဂ့ၤ, ပှၤပတီၢ်မုၢ်ဖိ မ့ၢ်ဂ့ၤ ကသံလၢ ကီၢ်အံၤအပူၤလီၤ.
ပှၤတခူၣ်လီၤ အဝဲသ့ၣ်ဘၣ်
ဒီးပှၤတဟီၣ်တယၢၤလၢ အဝဲသ့ၣ်အဃိ နီတဂၤဘၣ်.
ပှၤတကူးလီၤအသး မ့တမ့ၢ် လူၤအခိၣ်ဆူၣ်လၢ အဝဲသ့ၣ်အဃိ* နီတဂၤဘၣ်.
၇ ပှၤလၢအဟီၣ်အယၢၤလၢ ပှၤသံအဃိန့ၣ်
ပှၤတဟ့ၣ်ဒုးအီၣ် အဝဲသ့ၣ် တၢ်အီၣ်ဒ်သိး ကမၤမုာ်ထီၣ်အသးအဂီၢ် နီတဂၤဘၣ်.
ပှၤလၢအပၢ်သံမ့ၢ်ဂ့ၤ, အမိၢ်သံ မ့ၢ်ဂ့ၤန့ၣ်
ပှၤတဟ့ၣ်ဒုးအီ အဝဲသ့ၣ် စပံးထံတခွးလၢ ကမၤမုာ်ထီၣ်အသးအဂီၢ် နီတဂၤဘၣ်.
၈ တဘၣ်လဲၤနုာ်လၢ ဟံၣ်တဖျၢၣ်ဖဲ ပှၤမၤတၢ်အီၣ်မူးပွဲန့ၣ် အပူၤတဂ့ၤ.
တဘၣ်ဆ့ၣ်နီၤ အီၣ်တၢ်အီတၢ်ဒီး အဝဲသ့ၣ်တဂ့ၤ.’
၉ “အံၣ်စရ့လး အကစၢ်ယွၤ လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤန့ၣ် တဲဝဲလၢ ‘ယကမၤဘှ့ၣ် တၢ်သးခုအကလုၢ်, တၢ်သူၣ်ဖှံသးညီအကလုၢ်, တလးမူးပိာ်ခွါ အကလုၢ် ဒီးတလးမူးပိာ်မုၣ် အကလုၢ်လၢ အသီၣ်ထီၣ်လၢ တၢ်လီၢ်ဖဲအံၤ ဒီးယကမၤဒ်န့ၣ် ဖဲသုအိၣ်မူဒံးအဆၢကတီၢ် ဒီးယကမၤလၢ သုမဲာ်ညါ ပျီပျီလီၤ.’+
၁၀ “ဖဲနတဲဘၣ် ပှၤဂီၢ်မုၢ်လၢ တၢ်ကတိၤတဖၣ်အံၤ ခဲလၢာ်ဝံၤအခါ အဝဲသ့ၣ် ကသံကွၢ်နၤလၢ ‘ဘၣ်မနုၤအဃိ ယဟိဝၤယွၤ တဲဘၣ်ဃးဒီး အကဒုးလီၤဘၣ် တၢ်ကီတၢ်ခဲဖးဒိၣ်တဖၣ် လၢပလိၤလဲၣ်. ပမၤဘၣ် တၢ်ဒဲးဘး ဒီးမၤကမၣ်ဘၣ် ပကစၢ် ယဟိဝၤယွၤဒ်လဲၣ်.’+ ၁၁ နဘၣ်တဲဆၢက့ၤအဝဲသ့ၣ်လၢ ‘ယဟိဝၤယွၤ တဲဝဲလၢ “သုမိၢ်ပၢ်ဖံဖု လၢပျၢၤတဖၣ် ပာ်တ့ၢ်ကွံာ်ယၤ+ ဒီးအဝဲသ့ၣ် ဆဲးဘူၣ်ထီၣ်ဘါထီၣ် ယွၤအဂၤတဖၣ်, မၤယွၤအဂၤတဖၣ်အတၢ် ဒီးထိၣ်လီၤပှီၤသးလၢ ယွၤတဖၣ်န့ၣ်အမဲာ်ညါလီၤ.+ မ့မ့ၢ်ယၤန့ၣ် အဝဲသ့ၣ် ပာ်တ့ၢ်ကွံာ်ယၤ ဒီးအဝဲသ့ၣ် တအိၣ်မူမၤထွဲ ယတၢ်သိၣ်တၢ်သီဘၣ်.+ ၁၂ သုမၤတၢ်အၢဒိၣ်န့ၢ်ဒံး သုမိၢ်ပၢ်ဖံဖု လၢပျၢၤတဖၣ် စၢၢ်တလၢၢ်လီၤ.+ သုဝဲတဂၤစုာ်စုာ်န့ၣ် လၢကဒိကနၣ် ယကလုၢ်အလီၢ် သုခိၣ်ကိၤ ဒီးမၤထွဲဒ် သုသးလၢ အအၢအသီ ဟံးစုနဲၣ်ကျဲသုအသိးလီၤ.+ ၁၃ အဃိ ယကထုးထီၣ်ကွံာ်သုလၢ ကီၢ်တဘ့ၣ်အံၤ ဒီးယကကွံာ်လီၤသုလၢ ကီၢ်တဘ့ၣ်လၢ သုမ့ၢ်ဂ့ၤ, သုမိၢ်ပၢ်ဖံဖု လၢပျၢၤတဖၣ်မ့ၢ်ဂ့ၤ တသ့ၣ်ညါဝဲဘၣ်.+ ဒီးဖဲန့ၣ် သုကဘၣ်မၤ ယွၤအဂၤတဖၣ် အတၢ် လၢမုၢ်နၤဒီးမုၢ်ဆါ+ ခီဖျိလၢ ယတပာ်ဖျါထီၣ် တၢ်သးကညီၤလၢ သုဖီခိၣ်လၢၤဘၣ် အဃိလီၤ.”’
၁၄ ယဟိဝၤယွၤ တဲဝဲလၢ “‘ဘၣ်ဆၣ် တၢ်ဆၢကတီၢ်ကဟဲဝဲ ဖဲအဝဲသ့ၣ် အၢၣ်လီၤတၢ်အခါ အဝဲသ့ၣ် တတဲဝဲလၢ “ဒ်ယဟိဝၤယွၤလၢ အဒုးဟးထီၣ်ကွံာ် ပှၤအံၣ်စရ့လးဖိလၢ ကီၢ်အဲၤကူပတူးအပူၤတဂၤ မူဝဲသပှၢ်တၢၢ်အသိး”+ န့ၣ်လၢၤဘၣ်. ၁၅ လၢတၢ်န့ၣ်အလီၢ် ဖဲအဝဲသ့ၣ် အၢၣ်လီၤတၢ်အခါ အဝဲသ့ၣ် ကတဲဝဲလၢ “ဒ်ယဟိဝၤယွၤလၢ အဟဲက့ၤကိးထီၣ် ပှၤအံၣ်စရ့လးဖိလၢ ကီၢ်လၢကလံၤစိးတခီ ဒီးလၢကီၢ်အဂၤတဖၣ် ဖဲအမၤလီၤပြံလီၤပြါ အဝဲသ့ၣ်အလီၢ်တဂၤန့ၣ် မူဝဲသပှၢ်တၢၢ်အသိး” လီၤ. ဒီးယကက့ၤကိးက့ၤ အဝဲသ့ၣ်လၢ အထံကီၢ်လၢအမ့ၢ် ကီၢ်တဘ့ၣ်လၢ ယဟ့ၣ်လီၤတ့ၢ်အဝဲသ့ၣ် အမိၢ်ပၢ်ဖံဖု လၢပျၢၤတဖၣ်လီၤ.’+
၁၆ ယဟိဝၤယွၤ တဲဝဲလၢ ‘ယကကိးန့ၢ် ပှၤမၤညၣ်ဖိ
ဒီးပှၤတဖၣ်န့ၣ် ကဃုဖီၣ်န့ၢ် အဝဲသ့ၣ်လီၤ.
တၢ်န့ၣ်ဝံၤအလီၢ်ခံ ယကကိးန့ၢ် ပှၤခးအီၣ်တၢ်ဖိအါဂၤ
ဒီးပှၤတဖၣ်န့ၣ် ကလဲၤလူၤဖီၣ် အဝဲသ့ၣ်လၢ ကစၢၢ်ဒီးတၢ်လူၢ် ကိးဖျၢၣ်ဒဲးအလိၤ
ဒီးလၢလ့ကအိ လၢၢ်ကအိပူၤလီၤ.
၁၇ ယထံၣ်တၢ်လၢ အဝဲသ့ၣ်မၤဝဲ ကိးမံၤဒဲးလီၤ.
တၢ်လၢအဝဲသ့ၣ် မၤဝဲတဖၣ်န့ၣ် တအိၣ်ခူသူၣ်လၢ ယမဲာ်ညါဘၣ်.
ဒီးအဝဲသ့ၣ် အတၢ်ကမၣ်တဖၣ် စ့ၢ်ကီး တအိၣ်ခူသူၣ်လၢ ယမဲာ်ညါဘၣ်.
၁၈ အဝဲသ့ၣ် မၤဘၣ်အၢယကီၢ်ဒီး တၢ်ဂီၤတၢ်ဖှီၣ်လၢ အလီၤသးဘၣ်အၢ လၢအသးသမူတအိၣ်ဘၣ်တဖၣ်
ဒီးမၤပှဲၤယတၢ်န့ၢ်သါဒီး တၢ်လၢအလီၤသးဘၣ်အၢတဖၣ်အဃိ+
အဆိကတၢၢ်န့ၣ် ယကဟ့ၣ်ကၣ်က့ၤ အဝဲသ့ၣ်လၢ အတၢ်ကမၣ် ဒီးအတၢ်ဒဲးဘးအဃိ ပှဲၤပှဲၤလီၤ.’”+
၁၉ ယဟိဝၤယွၤဧၢ, နမ့ၢ်ယတၢ်ဂံၢ် တၢ်ဘါ ဒီးယတၢ်အိၣ်သဒၢအလီၢ်
ဒီးဖဲတၢ်ကီတၢ်ခဲအဆၢကတီၢ် န့ၣ် နမ့ၢ်ယတၢ်ဃ့ၢ်ပူၤဖျဲးသး အလီၢ်လီၤ.+
ပှၤကလုာ်တဖၣ်လၢ ဟီၣ်ခိၣ်ဒီဘ့ၣ်န့ၣ် ကဟဲလၢနအိၣ်
ဒီးအဝဲသ့ၣ် ကတဲဝဲလၢ “ပမိၢ်ပၢ်ဖံဖု လၢပျၢၤတဖၣ် န့ၢ်သါဘၣ် တၢ်ဂီၤတၢ်ဖှီၣ်တဖၣ်,*
တၢ်ကလီကလီ ဒီးတၢ်လၢ အတ ကဲဘျုး နီတမံၤဘၣ်တဖၣ်လီၤ.”+
၂၀ ပှၤဟီၣ်ခိၣ်ဖိ တ့ထီၣ် ယွၤတဖၣ်လၢ အနီၢ်ကစၢ်အဂီၢ် ကသ့နီၢ်ကီၢ်ဧါ.
တၢ်လၢအဝဲသ့ၣ် တ့ထီၣ်ဝဲန့ၣ် တမ့ၢ် ယွၤနီၢ်ကီၢ်ဘၣ်.+
၂၁ “အဃိ ယကဒုးနၢ်ပၢၢ်ထီၣ် အဝဲသ့ၣ်လီၤ.
ဖဲန့ၣ်အဆၢကတီၢ် ယကဒုးသ့ၣ်ညါအဝဲသ့ၣ်လၢ ယစိယကမီၤ ဒီးယတၢ်ဂံၢ်တၢ်ဘါလီၤ.
ဒီးအဝဲသ့ၣ် ကဘၣ်သ့ၣ်ညါလၢ ယမံၤမ့ၢ် ယဟိဝၤလီၤ.”