ဟိၤၡ့

၁ ဖဲယူဒၤအစီၤပၤ+ ဧူးစံယါ, ယိၤသၣ်, အၤဃး ဒီးဃံးစကံယၤ+ အစိၤ ဒီးဖဲအံၣ်စရ့လး အစီၤပၤ ယၤရၤဘၣ်+ လၢအမ့ၢ်စီၤယိးအၣ်​ အဖိခွါအစိၤန့ၣ်​ ယဟိဝၤယွၤ ဟ့ၣ်လီၤ တၢ်ကစီၣ်အံၤလၢ စီၤဘအ့ရံၤ အဖိခွါ စီၤဟိၤၡ့ အအိၣ်လီၤ. ၂ ယဟိဝၤယွၤ တဲတၢ်ဒီး အပှၤဂီၢ်မုၢ် ခီဖျိလၢ စီၤဟိၤၡ့လီၤ. ယဟိဝၤယွၤ တဲဘၣ်​ စီၤဟိၤၡ့လၢ “လဲၤဖျီနသးဒီး ပိာ်မုၣ်လၢ အကမၤထီၣ်အသးဒ် ပိာ်မုၣ်ဆါလီၤအီၣ်သး* တဂၤအသိးတက့ၢ်. ဒီးခီဖျိလၢ အကမၤထီၣ်အသးဒ် ပိာ်မုၣ်ဆါလီၤအီၣ်သးတဂၤ အသိးအဃိ နကန့ၢ်ဘၣ်​ နဖိတဖၣ်လီၤ. တၢ်ကဘၣ်​ ကဲထီၣ်အသးဒ်အံၤ မ့ၢ်လၢ ပှၤလၢကီၢ်တဘ့ၣ်အံၤအပူၤန့ၣ်​ တတီဒီး ယဟိဝၤယွၤလၢၤဘၣ်​ ဒီးအဝဲသ့ၣ်​ မၤအသးဒ် ပိာ်မုၣ်ဆါလီၤအီၣ်သးတဖၣ်အသိး အဃိလီၤ.”+

၃ အဃိ အဝဲလဲၤဖျီအသးဒီး စီၤဒံးဘလဲၣ်​ အဖိမုၣ်​ နီၢ်ကိမၢၤလီၤ. ဒီးနီၢ်ကိမၢၤဒၢထီၣ်​ ဒီးအိၣ်ဖျဲၣ်ထီၣ်န့ၢ်အီၤ ဖိခွါတဂၤလီၤ.

၄ ဒီးယဟိဝၤယွၤ တဲစီၤဟိၤၡ့လၢ “ကိးန့ၢ်အမံၤလၢ စီၤယံးစရ့လး* မ့ၢ်လၢ တယံာ်လၢၤဘၣ်န့ၣ်​ ယကသိၣ်ဃီၣ်​ စီၤယ့ၤဟူ+ အစၢၤအသွဲၣ်​ ခီဖျိလၢ ဝ့ၢ်ယံးစရ့လး အတၢ်မၤသံမၤဝီ အဃိလီၤ. ဒီးယကမၤဟးဂီၤကွံာ် အံၣ်စရ့လး အဘီအမုၢ်လီၤ.+ ၅ ဖဲတၢ်တနံၤန့ၣ်​ ယကဘိးကၢ် အံၣ်စရ့လးအချံၣ်​ လၢယံးစရ့လး အတၢ်တြီၤပူၤလီၤ.”

၆ နီၢ်ကိမၢၤ ဒၢထီၣ်ကဒီး ဒီးအိၣ်ဖျဲၣ်ထီၣ်​ အဖိမုၣ်တဂၤလီၤ. ဒီးကစၢ်ယွၤ တဲစီၤဟိၤၡ့လၢ “ကိးန့ၢ်အမံၤလၢ နီၢ်လိၤရူဃမၤ,* မ့ၢ်လၢ ယတပာ်ဖျါထီၣ်​ တၢ်သးကညီၤ+ လၢအံၣ်စရ့လး အပှၤဂီၢ်မုၢ်* အဖီခိၣ်လၢၤဘၣ်​ အဃိလီၤ. ယကနီဟးထီၣ်ကွံာ် အဝဲသ့ၣ်​ သပှၢ်ကတၢၢ်လီၤ.+ ၇ ဘၣ်ဆၣ်​ ယကပာ်ဖျါထီၣ်​ တၢ်သးကညီၤလၢ ယူဒၤအပှၤဂီၢ်မုၢ်*+ အဖီခိၣ်​ ဒီးယၤ ယဟိဝၤ လၢအမ့ၢ် အဝဲသ့ၣ်​ အကစၢ်ယွၤန့ၣ်​ ယကမၤပူၤဖျဲး အဝဲသ့ၣ်လီၤ.+ ဘၣ်ဆၣ်​ ယတမၤပူၤဖျဲး အဝဲသ့ၣ်​ ခီဖျိလၢ ချံၣ်, နး, တၢ်ဒုးတၢ်ယၤ, ကသ့ၣ်​ ဒီးပှၤဒိးကသ့ၣ်ဖိတဖၣ်​ အဃိဘၣ်.”+

၈ ဖဲနီၢ်လိၤရူဃမၤ ဖှၣ်နုၢ်ဝံၤအလီၢ်ခံ နီၢ်ကိမၢၤ ဒၢထီၣ်​ ဒီးအိၣ်ဖျဲၣ်ထီၣ်​ အဖိခွါတဂၤလီၤ. ၉ ဒီးကစၢ်ယွၤ တဲဝဲလၢ “ကိးန့ၢ်အမံၤလၢ စီၤလိၤဧၣ်မံၤ,* မ့ၢ်လၢ သုတမ့ၢ် ယပှၤဂီၢ်မုၢ်ဘၣ်​ ဒီးယတမ့ၢ် သုကစၢ်ယွၤဘၣ်​ အဃိလီၤ.

၁၀ “ဒီးပှၤအံၣ်စရ့လးဖိတဖၣ်​ အနီၣ်ဂံၢ်န့ၣ်​ ကအိၣ်အါ ထဲသိးဒီး ပီၣ်လဲၣ်အမဲးတဖၣ်လၢ ပှၤဂံၢ်ကွၢ်ဒွးကွၢ်အီၤ တသ့ဘၣ်.+ ဒီးဖဲတၢ်လီၢ်လၢ ယတဲအဝဲသ့ၣ်လၢ ‘သုတမ့ၢ်ယပှၤဂီၢ်မုၢ်ဘၣ်’+ န့ၣ်ယကကိး အဝဲသ့ၣ်လၢ ‘ကစၢ်ယွၤလၢအမူဝဲတဂၤ အဖိခွါတဖၣ်လီၤ.’+ ၁၁ ဒီးယူဒၤ အပှၤဂီၢ်မုၢ် ဒီးအံၣ်စရ့လး အပှၤဂီၢ်မုၢ် ကပာ်ဖှိၣ်ထီၣ်အသး ဃူဃူဖိးဖိး+ ဒီးအဝဲသ့ၣ်​ ကဃုထၢထီၣ်​ အခိၣ်အနၢ်တဂၤ ဒီးကဟးထီၣ်ဝဲလၢ ကီၢ်ပူၤလီၤ. အဝဲန့ၣ်​ ကမ့ၢ်ဝဲ မုၢ်နံၤဖးဒိၣ်တနံၤလၢ ယံးစရ့လး အဂီၢ်လီၤ.+