ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
© 2023 Watch Tower Bible and Tract Society of Pennsylvania
လါနိၣ်ဝ့ဘၢၣ် ၆-၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၁၃-၁၄
“ပှၤတဂၤမ့ၢ်သံန့ၣ် မ့ၢ်အကမူထီၣ်က့ၤဒံးဧါ”
တၢး၉၉ ၁၀/၁၅ ၃ ¶၁-၃
ပှၤဟီၣ်ခိၣ်ဖိတဖၣ် ဃုကျဲလၢ အသးသမူ ကထီထီၣ်အဂီၢ်
လၢအပူၤကွံာ် အနံၣ် ၃,၅၀၀ န့ၣ်လံာ်စီဆှံ ပာ်ဖျါထီၣ်ဝဲလၢ ပှၤဟီၣ်ခိၣ်ဖိတဖၣ်န့ၣ် အတၢ်အိၣ်မူဖုၣ်. ပှၤလၢအတတူၢ်လိာ် တၢ်ကတိၤအံၤန့ၣ် ကအိၣ်ထဲစှၤကိာ်ဂၤလီၤ. ပှၤဟီၣ်ခိၣ်ဖိတဖၣ် ထံၣ်ဘၣ်ဝဲလၢ အဝဲသ့ၣ် အိၣ်မူဘၣ်ဝဲ ပှဲၤဒီးတၢ်အိၣ်ဆူၣ်အိၣ်ချ့, တၢ်ဂံၢ်တၢ်ဘါ တစိၢ်တလီၢ် ဒီးအသးပှၢ်ထီၣ် ဒီးဘၣ်သံဝဲအဃိ အသးတမံဘၣ်. အဃိ လၢအပူၤကွံာ်ဖးယံာ် တုၤလၢပစိၤခဲအံၤန့ၣ် ပှၤဃုကျဲလၢ ပှၤကမၤထီထီၣ် သးသမူအဂီၢ်.
လၢစီၤယိၤဘး အစိၤန့ၣ် ပှၤအဲၤကူပတူးဖိတဖၣ် အီၣ်ဝဲဆၣ်ဖိကီၢ်ဖိ အဒံၣ်ချံ ဒ်သိးအသးကစၢ်လီၤအဂီၢ် သနာ်က့ အတကဲထီၣ်ဒ် အဝဲသ့ၣ် ဆိကမိၣ်ဝဲအသိးဘၣ်. တကးဒံးဘၣ် လၢအပူၤကွံာ် အနံၣ်ဖးယံာ်န့ၣ် ပှၤမၤတၢ်ဝံတၢ်နါ အတၢ်ဖံးတၢ်မၤတဖၣ် ဒုးအိၣ်ထီၣ်ဝဲ ကသံၣ်တခါလၢ ကမၤထီထီၣ်ဝဲ သးသမူအဂီၢ်. ဒီးအဝဲသ့ၣ် အါဂၤန့ၣ် နာ်ဝဲလၢ ထူအတူးန့ၣ် ကမၤစၢၤအဝဲသ့ၣ် ဒ်သိး အကအိၣ်မူဘၣ် လီၤထူလီၤယိာ် ဒီးအဝဲသ့ၣ် မ့ၢ်အီၣ်တၢ်လၢ ခွးထူအပူၤန့ၣ် ကမၤစၢၤအဝဲသ့ၣ် ဒ်သိးအသးသမူကထီထီၣ်အဂီၢ်. လၢပျၢၤ တရူးလၢ အကဲဝဲ ထါဝ့းတဖၣ်န့ၣ် နာ်ဝဲလၢ ပှၤမ့ၢ်ဆိကမိၣ်ထံတၢ်, မၤတၢ်ကသါထီၣ်ကသါလီၤ တၢ်ဟူးတၢ်ဂဲၤ ဒီးဒုၣ်တၢ်အီၣ်န့ၣ် ပှၤအိၣ်မူဘၣ် လီၤထူလီၤယိာ်သ့.
ဃွါဖီစံၤဒံ လံၤဧိၤ လၢအကဲဝဲ စပ့ၣ် အပှၤဃုသ့ၣ်ညါတၢ်ဖိတဂၤန့ၣ် အမံၤဟူသၣ်ဖျါလၢ အဟးလူၤဃုသ့ၣ်ညါဝဲ ထံမူထီၣ်ပၢၢ်လၢ ကမၤစၢၤပှၤလၢ ပှၤသးကစၢ်ထီဘိအဂီၢ်. ဖဲ ၁၈ ယၤဖှိၣ်နံၣ် အတီၢ်ပူၤ လံာ်တဘ့ၣ်လၢအမ့ၢ် Hermippus Redivivus အပူၤန့ၣ် ကသံၣ်သရၣ်တဂၤ ကွဲးဝဲလၢ ဖဲတၢ်ကိၢ်ထီၣ်သီ အဆၢကတီၢ် ပှၤမ့ၢ်ပာ်ဝဲ မုၣ်ကနီၤစီဆှံတဂၤလၢ ဒၢးတဖျၢၣ်အပူၤ ဒီးဟံးန့ၢ်ကလံၤလၢ အကသါထီၣ်ဝဲ ဒီးဖၢနုာ်အီၤလၢ ပလီပူၤန့ၣ် ပှၤသူဝဲကလံၤတခါအံၤ ဒ်သိး ပှၤကတ့ထီၣ် ကသံၣ်လၢ ကမၤထီထီၣ် သးသမူအဂီၢ်သ့. အဃိ ဒ်တၢ်ဂ့ၢ်လၢ ပတဲတ့ၢ်တဖၣ်အသိး ပသ့ၣ်ညါဘၣ်လၢ ပှၤဃုဝဲကျဲအါဘိ သနာ်က့ အတကဲထီၣ်လိၣ်ထီၣ်ဝဲ နီတမံၤဘၣ်.
တၢး၁၅ ၄/၁၅ ၃၂ ¶၁-၂
သ့ၣ်တထူၣ်လၢ ပှၤကူၣ်လီၤကွံာ်အီၤန့ၣ် အကဒိးထီၣ်က့ၤလၢ အသီတဘျီဒံးဧါ
သ့ၣ်စၤယံးအထူၣ်န့ၣ် နမ့ၢ်ထိၣ်သတြီၤအီၤဒီး လဘၤနိၣ် အသ့ၣ်ဆှိအ့ရ့းဖးဒိၣ်န့ၣ် ဘၣ်သ့ၣ်သ့ၣ် အဖျါတလီၤထုးန့ၢ်သူၣ်ထုးန့ၢ်သးထဲသိးဒီး သ့ၣ်ဆှိအ့ရ့းဘၣ်. သ့ၣ်စၤယံးန့ၣ် မူခိၣ်ကလံၤသီၣ်ဂီၤ မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ အတူၢ်တၢ်န့ၢ်မး, တနီၤန့ၣ် အအိၣ်မူဝဲ အနံၣ် ၁,၀၀၀ ညါ. ပှၤမ့ၢ်ကူာ်လီၤကွံာ် အထူၣ်သနာ်က့ အဂံၢ်မ့ၢ်အိၣ်ဒံးန့ၣ် အဟဲက့ၤဒိးထီၣ်သ့ဒံး.
စီၤယိၤဘးနာ်ဝဲလၢ အမ့ၢ်သံနာ်က့ အဟဲက့ၤ ဂဲၤဆၢထၢၣ်သမူထီၣ်က့ၤသ့. (ဘး ၁၄:၁၃-၁၅) အဝဲသူဝဲ တၢ်အဒိလၢသ့ၣ်ထူၣ် ဒ်သိးအကပာ်ဖျါထီၣ်ဝဲလၢ အနာ်ဝဲလၢ ကစၢ်ယွၤ အိၣ်ဒီးတၢ်သ့တၢ်ဘၣ်လၢ ကမၤဂဲၤဆၢထၢၣ်သမူထီၣ်က့ၤပှၤသံ. ဘၣ်သ့ၣ်သ့ၣ် အဝဲကသူဝဲ သ့ၣ်စၤယံးအထူၣ် ဒ်တၢ်အဒိအသိး. စီၤယိၤဘးတဲဝဲလၢ “ပှၤမ့ၢ်ကူာ်လီၤကွံာ် သ့ၣ်ထူၣ်သနာ်က့” အတၢ် “မုၢ်လၢ်” အိၣ်ဒံး. ခီဖျိလၢ တၢ်ယီၤဃ့အဃိ သ့ၣ်စၤယံးအခိၣ်ဆၢၣ် မ့ၢ်ဃ့ထီကွံာ်ဘၣ်ဆၣ် ဖဲတၢ်စူၤလီၤအခါ သ့ၣ်စၤယံးအဂံၢ်န့ၣ် ဟဲက့ၤဒိးထီၣ်က့ၤဝဲသ့ ဒီး “အဒ့တဖၣ် ကဟဲထီၣ်ဝဲဒ် သ့ၣ်ဖိမဲထီၣ်သီသီ အသိးလီၤ.”—ဘး ၁၄:၇-၉.
တၢး၁၁ ၃/၁ ၂၂ ¶၅
“နကဆၢထံၣ်ဘၣ်က့ၤယၤ သပှၢ်တၢၢ်”
စီၤယိၤဘး အတၢ်ကတိၤန့ၣ် ဒုးသ့ၣ်ညါပှၤလၢ ယဟိဝၤယွၤ အိၣ်ဒီးတၢ်သးကညီၤ. ဒ်စီၤယိၤဘးအသိး ပှၤလၢအသန့ၤအသး လၢယဟိဝၤယွၤ ဒီးပျဲဝဲလၢ ကစၢ်ယွၤ ကဘှီဘၣ်ထီၣ်က့ၤအီၤ ဒ်အတၢ်ဘၣ်သး အိၣ်ဝဲအသိးန့ၣ် ကစၢ်ယဟိဝၤယွၤ အဲၣ်အဝဲသ့ၣ်ဒိၣ်မး. (ၡါ ၆၄:၈) ယဟိဝၤယွၤ ပာ်လုၢ်ပာ်ပှ့ၤ ပှၤလၢအဘူၣ်ထီၣ်ဘါထီၣ်အီၤတဖၣ်. ဒီးပှၤလၢအအိၣ်ဒီး တၢ်သးတီ လၢအသံသ့ၣ်တဖၣ်န့ၣ် ကစၢ်ယွၤ “ဆၢထံၣ်ဘၣ်က့ၤ” အဝဲသ့ၣ် “သပှၢ်တၢၢ်.” ပှၤကူၣ်ဘၣ်ကူၣ်သ့တဂၤ တဲဝဲလၢ ဧ့ၤဘြံၤအတၢ်ကတိၤ လၢအမ့ၢ် ဆၢထံၣ်ဘၣ်က့ၤ သပှၢ်တၢၢ်န့ၣ် အပာ်ဖျါထီၣ်ဝဲဒၣ် “တၢ်တူၢ်ဘၣ်လၢ အသဟီၣ် ဆူၣ်ဒိၣ်မး.” အဃိ ယဟိဝၤယွၤန့ၣ် သ့ၣ်နီၣ်ထီၣ်ဝဲ ပှၤလၢအဘူၣ်ထီၣ်ဘါထီၣ်အီၤတဖၣ် တကးဒံးဘၣ် အသးအိၣ် မၤဂဲၤဆၢထၢၣ်သမူထီၣ်က့ၤ အဝဲသ့ၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၁၉၁
ဖၣ်ဆါ
စီၤအၤဘြၤဟၣ်တဲဝဲ ယဟိဝၤယွၤလၢ “ယမ့ၢ်ဒၣ်ဟီၣ်ခိၣ်ကမူၣ် ဒီးဖၣ်ဆါကမူၣ်” လီၤ. အဃိ ပထံၣ်ဘၣ်လၢ ဖၣ်ဆါန့ၣ် ဘၣ်တၢ်ဒိလီၤအီၤ ဒ်တၢ်လၢ အရ့တဒိၣ်ဘၣ် မ့တမ့ၢ် အလုၢ်အပှ့ၤတအိၣ်, အဘျုးတအိၣ်ဘၣ်. (၁ မိၤ ၁၈:၂၇; ကွၢ်စ့ၢ်ကီး ၡါ ၄၄:၂၀; ဘး ၃၀:၁၉) ဒီးစီၤယိၤဘးစ့ၢ်ကီး တဲဝဲဒၣ်လၢ အသကိးတဖၣ် အတၢ်ကတိၤန့ၣ် “လီၤဂာ်ဒ်သိးဒီး ဖၣ်ဆါအ့ၣ်လၢ အဘျုးတအိၣ်ဘၣ်.”—ဘး ၁၃:၁၂.
လါနိၣ်ဝ့ဘၢၣ် ၁၃-၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၁၅-၁၇
“ဖဲနဟ့ၣ်ဂံၢ်ဟ့ၣ်ဘါပှၤဂၤအခါ တဘၣ်ကွၢ်လိ စီၤအလံဖးစးတဂ့ၤ”
တၢး၀၅ ၉/၁၅ ၂၆ ¶၄-၅
စီၤအလံဖးစး အတၢ်ကတိၤသၢဘျီလၢာ်န့ၣ် အဲၣ်ဒိးတဲဝဲလၢ တၢ်လၢကစၢ်ယွၤ အခ့အပှၤတဖၣ် မၤဝဲတမံၤဂ့ၤတမံၤဂ့ၤန့ၣ် ကစၢ်ယွၤ တဘၣ်သူၣ်ဘၣ်သးဝဲ နီတဘျီဘၣ်. စီၤအလံဖးစးတဲဝဲ စီၤယိၤဘးလၢ “အဝဲတနာ်န့ၢ် အခ့အပှၤတဖၣ်ဘၣ်, ဒီးအဝဲဃု အမူခိၣ်ကလူးတဖၣ် အတၢ်ကမၣ်လီၤ.” (ဘး ၄:၁၈) ဒီးဘၣ်ဃးဒီး ကစၢ်ယွၤန့ၣ် စီၤအလံဖးစး တဲဝဲလၢ “အဝဲတနာ်န့ၢ် အမူခိၣ်ကလူးတဖၣ်ဘၣ် ဒီးမူခိၣ်န့ၣ် တစီဆှံလၢ အမဲာ်ညါ စ့ၢ်ကီးဘၣ်.” (ဘး ၁၅:၁၅) ဒီးအသံကွၢ်ဝဲလၢ “နမ့မ့ၢ် ပှၤတီပှၤလိၤသနာ်က့ မ့ၢ်သ့တၢ်လၢာ်ကစၢ် ကပာ်သူၣ်ပာ်သးဝဲဧါ.” (ဘး ၂၂:၃) စီၤဘံးလဒး တူၢ်လိာ်ဝဲ စီၤအလံဖးစး အတၢ်ထံၣ်စ့ၢ်ကီး. အဝဲတဲဝဲလၢ “လၢအတၢ်ထံၣ်န့ၣ် လါဒၣ်လဲာ် တကပီၤဘၣ် ဒီးဆၣ်တဖၣ် တစီဆှံဘၣ်.”—ဘး ၂၅:၅.
ပကဘၣ်ပလီၢ်သး ဒ်သိး ပတဆိကမိၣ်တၢ် ဒ်န့ၣ်တဂ့ၤအဂီၢ်. ပမ့ၢ်ဆိကမိၣ် ဒ်န့ၣ်န့ၣ် ပကတူၢ်ဘၣ်လၢ ယဟိဝၤယွၤ အတၢ်သိၣ်တၢ်သီန့ၣ် ဃံးတလၢ. အဃိ ကမၤဘၣ်ဒိ ပတၢ်ရ့လိာ်သးဒီး ယဟိဝၤယွၤဒိၣ်မး. တကးဒံးဘၣ် ဖဲပှၤသိၣ်က့ၤသီက့ၤပှၤအခါ တမ့ၢ်လၢ ပကအိၣ်ဒီး တၢ်ဆီၣ်လီၤသး ဒီးတူၢ်လိာ်အီၤကညီဘၣ်. ပက “သးဒိၣ်ထီၣ် ယဟိဝၤယွၤ” ဒီးသးတမုာ်အီၤဘၣ်. (ကတိၤ ၁၉:၃) အဃိ ကမၤဘၣ်ဒိ ပတၢ်ရ့လိာ်သးဒီး ယဟိဝၤယွၤဒိၣ်မး.
တၢး၁၅ ၂/၁၅ ၉ ¶၁၆
ကွၢ်လိယ့ၣ်ၡူး အတၢ်ဆီၣ်လီၤသး ဒီးတဲတၢ်မုာ်မုာ်
၁၆ ပတၢ်ကတိၤလၢ အမုာ်. ပမ့ၢ်အိၣ်ဒီး တၢ်သးကညီၤန့ၣ် ပကအဲၣ်ဒိး “တဲမုာ်ထီၣ်က့ၤ ပှၤလၢ အသးအုးတဖၣ်အသး.” (၁ သ့း ၅:၁၄) ပဟ့ၣ်ဂံၢ်ဟ့ၣ်ဘါ ပှၤလၢအသးအုးတဖၣ် ကသ့ဒ်လဲၣ်. ပမၤမုာ်ထီၣ်အဝဲသ့ၣ် အသးသ့ ခီဖျိ ပပာ်ဖျါထီၣ်လၢ ပသူၣ်အိၣ်သးအိၣ် အဝဲသ့ၣ် ဒီးဘၣ်ယိၣ်တၢ်လၢ အဝဲသ့ၣ်အဂီၢ် အနီၢ်ကီၢ်. ပမၤဒ်န့ၣ် သ့ခီဖျိလၢ ပပတြၢၤအဝဲသ့ၣ် ဒ်သိး အဝဲသ့ၣ် ကထံၣ်လီၤ အတၢ်ဂ့ၤတၢ်ဝါ ဒီးအတၢ်သ့တၢ်ဘၣ်တဖၣ်. တကးဒံးဘၣ် ပဒုးသ့ၣ်နီၣ်ထီၣ်က့ၤ အဝဲသ့ၣ်လၢ ယဟိဝၤယွၤ မိၤအီၤဆူ အဖိခွါအအိၣ်အဃိ အဝဲသ့ၣ် အလုၢ်ဒိၣ်ပှ့ၤဒိၣ် လၢယဟိဝၤယွၤအဂီၢ်ဒိၣ်မး. (ယိၤ ၆:၄၄) ဒီးပတဲဘၣ် အဝဲသ့ၣ်သ့လၢ ယဟိဝၤယွၤ သူၣ်အိၣ်သးအိၣ်ဝဲ အခ့အပှၤလၢ “အသးသ့ၣ်ဖး” ဒီး “အသးလီၤသဘှံး” တဖၣ်ဒိၣ်မး. (စံး ၃၄:၁၈) ပတၢ်ကတိၤ လၢအမုာ်န့ၣ် ကမၤမုာ်ထီၣ်က့ၤ ပှၤလၢအတူၢ်ဘၣ်တၢ်တဖၣ်အသး.—ကတိၤ ၁၆:၂၄.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၃/၁၅ ၁၄ ¶၁၁
လံာ်စီဆှံ အတၢ်ပာ်ဖျါလၢ လံာ်ယိၤဘးအဂီၢ်
၇:၉, ၁၀; ၁၀:၂၁; ၁၆:၂၂—တၢ်ကတိၤတဖၣ်အံၤန့ၣ် အဲၣ်ဒိးတဲဝဲလၢ စီၤယိၤဘး တနာ်ဝဲ တၢ်ဂဲၤဆၢထၢၣ်သမူထီၣ်က့ၤဘၣ်န့ၣ်ဧါ. စီၤယိၤဘး တဲဝဲတၢ်ကတိၤတဖၣ်အံၤန့ၣ် အအဲၣ်ဒိးတဲဝဲ ဘၣ်ဃးဒီး တၢ်အိၣ်သးဖဲအသံအခါ. ဘၣ်သ့ၣ်သ့ၣ် အကအဲၣ်ဒိးတဲဝဲလၢ အမ့ၢ်သံန့ၣ် ပှၤတစိၤဃီဒီးအီၤတဖၣ် တထံၣ်ဘၣ်အီၤ နီတဂၤလၢၤဘၣ်. ဒီးတချုး တၢ်ဆၢကတီၢ်ဘၣ်လၢ ကစၢ်ယွၤ မၤသမူထီၣ်က့ၤ ပှၤသံဒံးဘၣ်န့ၣ် ပှၤတထံၣ်ဘၣ်လၢ အဝဲဟဲက့ၤလၢဟံၣ်ဘၣ် ဒီးအဝဲတသ့ၣ်ညါအါထီၣ် တၢ်နီတမံၤဘၣ်. မ့တမ့ၢ် ဘၣ်သ့ၣ်သ့ၣ် အကအဲၣ်ဒိးတဲဝဲလၢ ပှၤသံတဖၣ်န့ၣ် ဟဲက့ၤဟးထီၣ်လၢ တၢ်သွၣ်ခိၣ် လၢအနီၢ်ကစၢ် တသ့နီတဂၤဘၣ်. ဒီးဖဲယိၤဘး ၁၄:၁၃-၁၅ န့ၣ်ပသ့ၣ်ညါဘၣ်လၢ စီၤယိၤဘးနာ်ဝဲ တၢ်ဂဲၤဆၢထၢၣ်သမူထီၣ်က့ၤ အနီၢ်ကီၢ်.
လါနိၣ်ဝ့ဘၢၣ် ၂၀-၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၁၈-၁၉
“တဘၣ်သးပ့ၤနီၣ်မၤစၢၤ နဒီပုၢ်ဝဲၢ်မုၣ်ခွါတဖၣ် နီတဘျီတဂ့ၤ”
ယ့ၣ်ၡူးအမဲာ်ထံလီၤဝဲန့ၣ် ပမၤလိန့ၢ်ဘၣ် တၢ်မနုၤလဲၣ်
၉ နမၤစၢၤ ပှၤလၢအသးဘၣ်ဒိတဖၣ်သ့. တမ့ၢ်ထဲ ယ့ၣ်ၡူးဟီၣ်စၢၤဝဲ နီၢ်မၢ်သၤ ဒီးနီၢ်မၤရံဘၣ်, အဝဲဒိကနၣ်န့ၢ်အဝဲသ့ၣ် ဒီးတဲမုာ်ထီၣ် အဝဲသ့ၣ်အသးလီၤ. ပဝဲသ့ၣ်စ့ၢ်ကီး ပမၤစၢၤပှၤလၢအသးဘၣ်ဒိတဖၣ် ဒ်န့ၣ်သ့. ဒီပုၢ်ဝဲၢ်ခွါဒဲ လၢအမ့ၢ် တၢ်အိၣ်ဖှိၣ်သးပှၢ်လၢ အအိၣ်လၢ အီးစတြ့လံယါန့ၣ် တဲဝဲလၢ “ဖဲယမါသံသဒၣ်ယၤအခါ ယလိၣ်ဘၣ်တၢ်မၤစၢၤ. ပှၤဒီမါဝၤတနီၤန့ၣ် အဝဲသ့ၣ် မၤချုးမၤဒးအသး လၢကဒိကနၣ်န့ၢ်ယၤ ဒီးဖဲယပာ်ဖျါထီၣ် ယတၢ်သူၣ်အုးသးအုး ဒီးယမဲာ်ထံမဲာ်နိလီၤအခါ အဝဲသ့ၣ် နၢ်ပၢၢ်စၢၤယၤ ဒီးအဝဲသ့ၣ် တမၤမဲာ်ဆှးယၤဘၣ်. အဝဲသ့ၣ် မၤစၢၤယၤ ဒ်သိးဒီး သ့ဃၢၤန့ၢ်ယကါ, လဲၤပှ့ၤန့ၢ်ယၤတၢ်အီၣ်တၢ်အီ ဒီးဖီန့ၢ်ယၤတၢ်အီၣ် ဖဲယမၤတၢ်သ့ၣ်တဖၣ်အံၤ တကဲဘၣ်အခါလီၤ. အဝဲသ့ၣ် ဃ့ဘါထုကဖၣ်ဒီးယၤ တလီၢ်လီၢ်, အဝဲသ့ၣ်ပာ်ဖျါထီၣ်လၢ အမ့ၢ်တံၤသကိးနီၢ်ကီၢ် ဒီးဒီပုၢ်ဝဲၢ်လၢအ ‘အိၣ်ဖျဲၣ်ဝဲလၢ တၢ်မၤကိၢ်မၤဂီၤအဂီၢ်လီၤ.’”—ကတိၤဒိ ၁၇:၁၇.
ဖဲပှၤလၢပအဲၣ်ဘၣ်အီၤတဂၤ ပာ်တ့ၢ်ကွံာ် ယဟိဝၤယွၤအခါ
၁၆ ဆဲးမၤစၢၤဟံၣ်ဖိဃီဖိ လၢအဆဲးအိၣ်ဒီး တၢ်သးတီတဖၣ်အံၤတက့ၢ်. အဝဲသ့ၣ်လိၣ်ဘၣ် ပတၢ်အဲၣ်ဒီး ပတၢ်ဟ့ၣ်ဂံၢ်ဟ့ၣ်ဘါအီၤ လီၤလီၤဆီဆီလီၤ. (ဧ့ၤဘြံၤ ၁၀:၂၄, ၂၅) ပှၤလၢအဘၣ် တၢ်ဟီထီၣ်ကွံာ်အီၤတဂၤ အဟံၣ်ဖိဃီဖိန့ၣ် တဘျီတခီၣ် အဝဲသ့ၣ်တူၢ်ဘၣ်ဝဲလၢ တၢ်အိၣ်ဖှိၣ်ပူၤန့ၣ် ဒီပုၢ်ဝဲၢ်မုၣ်ခွါတဖၣ် တတဲတၢ်ဒီးအဝဲသ့ၣ်လၢၤဘၣ်. ပတအဲၣ်ဒိးလၢ အဝဲသ့ၣ်ကတူၢ်ဘၣ်ဝဲဒ်န့ၣ်ဘၣ်. ဟံၣ်ဖိဃီဖိလၢအဖိ ပာ်တ့ၢ်ကွံာ်တၢ်မ့ၢ်တၢ်တီတဖၣ်န့ၣ် ပကဘၣ်ဟ့ၣ်ဂံၢ်ဟ့ၣ်ဘါအဝဲသ့ၣ် ဒီးစံးပတြၢၤအဝဲသ့ၣ်လီၤ. ဒီပုၢ်ဝဲၢ်မုၣ်မရံယၤ အဝၤလၢ အဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤဒီး ပာ်တ့ၢ်ကွံာ်အဟံၣ်ဖိဃီဖိန့ၣ် အတဲဝဲလၢ “ယတံၤသကိးတနီၤ ဟဲလၢယဟံၣ်ဒီး ဖီဒုးအီၣ်ယၤတၢ်အီၣ် ဒီးသိၣ်လိမၤစၢၤဝဲ ယဖိတဖၣ်လံာ်စီဆှံ. တကးဒံးဘၣ် အဝဲသ့ၣ်သးဘၣ်ဒိ ဒီးဟီၣ်ဃုာ်ဒီးယၤလီၤ. ဖဲပှၤတဲအီၣ်ယဂ့ၢ်တဂ့ၤတဘၣ်အခါ အဝဲသ့ၣ်တဲစၢၤန့ၢ် တၢ်လၢယဂီၢ်လီၤ. ဒီးအဝဲသ့ၣ် ကဲထီၣ်တၢ်ဂံၢ်တၢ်ဘါ လၢယဂီၢ်ဒိၣ်မး.”—ရိမ့ၤ ၁၂:၁၃, ၁၅.
တၢး၉၀ ၉/၁ ၂၂ ¶၂၀
မ့ၢ်နဆဲး လဲၤထီၣ်လဲၤထီဧါ
၂၀ ဒီပုၢ်ဝဲၢ်တဂၤန့ၣ် လၢအပူၤကွံာ် ပှၤမ့ၢ်ပာ်ပတုာ်အီၤလၢ တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်မ့ၢ်ဂ့ၤ, အမ့ၢ်အိၣ်ပတုာ်လၢ အနီၢ်ကစၢ်မ့ၢ်ဂ့ၤ တၢ်အိၣ်ဖှိၣ်သးပှၢ်ကရူၢ် ကြၢးသ့ၣ်ညါဝဲလၢ ဒီပုၢ်ဝဲၢ်တဂၤအံၤ အသးကဘၣ်ဒိဝဲ. ဒီးဒီပုၢ်ဝဲၢ်တဂၤအံၤန့ၣ် ပှၤမ့ၢ်တနီဟးထီၣ်ကွံာ်အီၤလၢ တၢ်အိၣ်ဖှိၣ်ပူၤဘၣ်ဆၣ် အသးမ့ၢ်ဘၣ်ဒိန့ၣ် တၢ်အိၣ်ဖှိၣ်သးပှၢ်တဖၣ် ကဆဲးမၤစၢၤအီၤလၢ နီၢ်သးတခီ လၢတၢ်အဲၣ်တၢ်ကွံအပူၤ. (၁ သ့း ၅:၁၄) ဒီးတၢ်အိၣ်ဖှိၣ်သးပှၢ်တဖၣ် ကမၤစၢၤအီၤဒ်သိး အကတူၢ်ဘၣ်ဝဲလၢ ပှၤလိၣ်ဘၣ်အီၤ လၢတၢ်အိၣ်ဖှိၣ်ပူၤ. တကးဒံးဘၣ် အဝဲသ့ၣ် ကဒုးသ့ၣ်ညါအီၤလၢ ပှၤတဂၤ မ့ၢ်ဘၣ်တၢ်သိၣ်အီၤ သနာ်က့ မ့ၢ်အိၣ်ဒီး တၢ်ဆီၣ်လီၤသး ဒီးတၢ်ဒိကနၣ်န့ၣ် အကဒိးန့ၢ်ဘၣ်က့ၤ တၢ်ခွဲးတၢ်ယာ်လၢ တၢ်အိၣ်ဖှိၣ်ပူၤအဂီၢ် တၢ်ဆၢကတီၢ် တယံာ်ဝဲ ထဲန့ၣ်ဘၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၄ ၁၀/၁ ၃၂
တၢ်ကတိၤလၢအမုာ်န့ၣ် အိၣ်ဒီးအစိအကမီၤ
ဖဲစီၤယိၤဘး လိၣ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါအခါ စီၤအလံဖးစး ဒီးအသကိးတဖၣ်န့ၣ် တတဲဝဲတၢ်ကတိၤ လၢအမုာ်ဘၣ်. အဝဲသ့ၣ်အဲၣ်ဒိးတဲဝဲလၢ စီၤယိၤဘး ထံၣ်ဘၣ် တၢ်ကီတၢ်ခဲန့ၣ် ကဘၣ်မ့ၢ်လၢ အမၤခူသူၣ် တၢ်ကမၣ်အဃိ. (ဘး ၄:၈) လံာ်လၢအမ့ၢ် The Interpreter’s Bible ပာ်ဖျါထီၣ်ဝဲလၢ “စီၤယိၤဘး လိၣ်ဘၣ်ဝဲ ပှၤတၢ်သးကညီၤ. သနာ်က့ အဝဲဒိးန့ၢ်ဘၣ်ထဲ တၢ်ကတိၤလၢ အပာ်ဒ့ၣ်ပာ်ကမၣ်အီၤ ဒီးမၤဘၣ်ဒိအသး.” စီၤယိၤဘး အသးဘၣ်ဒိလၢ စီၤအလံဖးစး ဒီးအသကိးတဖၣ် အတၢ်ကတိၤအဃိ အဝဲကိးပသူထီၣ်ဝဲလၢ “သုကမၤအ့န့ယသး လၢတၢ်ကတိၤလၢ အမၤလီၤကလဲယၤန့ၣ် ဆံးယံာ်ဒံးလဲၣ်.”—ဘး ၁၉:၂.
ပမ့ၢ်တဆိကမိၣ်ထံတၢ်ဘၣ် ဒီးတဲတၢ်ကတိၤ လၢအတမုာ်ဘၣ်န့ၣ် ကမၤဘၣ်ဒိ ပဒီပုၢ်ဝဲၢ်မုၣ်ခွါတဖၣ်အသးသ့. အဃိ ပတကြၢးတဲ တၢ်ကတိၤဒ်န့ၣ်ဘၣ်. (ထိၣ်သတြီၤဒီး ၅ မိၤ ၂၄:၁၅.) လံာ်စီဆှံ ဟ့ၣ်ပလီၢ်ပှၤလၢ “ပျ့ၤန့ၣ် အိၣ်ဒီးတၢ်စိတၢ်ကမီၤလၢ ကမၤသံတၢ် မ့တမ့ၢ် မၤမူတၢ်အဂီၢ်လီၤ. ဒီးပှၤလၢအတဲတၢ်မုာ်န့ၣ် ကအီၣ်ဘၣ် အတၤသၣ်လီၤ.”—ကတိၤ ၁၈:၂၁.
ဟ့ၣ်ဂံၢ်ဟ့ၣ်ဘါ ပှၤမၤလိလံာ်စီဆှံဖိတဖၣ် လၢကရ့လိာ်သးဒီး ပှၤလၢတၢ်အိၣ်ဖှိၣ်အပူၤ
၁၀ ပှၤလၢအသိၣ်လိတၢ်တဖၣ်န့ၣ် ကဘၣ်ပာ်ဖျါထီၣ် တၢ်သူၣ်အိၣ်သးအိၣ်လၢ ပှၤမၤလိလံာ်စီဆှံဖိတဖၣ် အဖီခိၣ်လီၤ. နကဘၣ်ထံၣ် အဝဲသ့ၣ်လၢခါဆူညါန့ၣ် ကကဲထီၣ်ဝဲ နဒီပုၢ်ဝဲၢ်မုၣ်ခွါလၢ နီၢ်သးတခီလီၤ. (ဖး ၂ သ့းစၤလနံ ၂:၇, ၈ တက့ၢ်.) အဝဲသ့ၣ်ဘၣ်ပာ်တ့ၢ်ကွံာ် အတံၤသကိးလၢ တၢ်ချၢဒီး မၤတၢ်ဆီတလဲလၢ ကမၤယဟိဝၤယွၤ အတၢ်မၤအဂီၢ်န့ၣ် တညီဝဲဘၣ်. ပကဘၣ်မၤစၢၤအဝဲသ့ၣ် လၢကထံၣ်န့ၢ် တံၤသကိးနီၢ်နီၢ်လၢ တၢ်အိၣ်ဖှိၣ်အပူၤလီၤ. နကဘၣ်ရ့ဒီး နပှၤမၤလိလံာ်စီဆှံဖိန့ၣ် တမ့ၢ်ထဲနမၤလိအီၤ လံာ်စီဆှံအခါဘၣ်. ဒီးလၢတၢ်ဆၢကတီၢ်အဂၤစ့ၢ်ကီး နရ့ဒီးအီၤသ့လီၤ. နမ့ၢ်ကိးအီၤလၢ လီတဲစိ, ဆှၢန့ၢ်အီၤ မဲးစ့း ဒီးလဲၤဟးအိၣ်သကိးအီၤန့ၣ် နပာ်ဖျါထီၣ်လၢ နသူၣ်အိၣ်သးအိၣ်အီၤနီၢ်နီၢ်လီၤ.
၁၁ တၢ်ကတိၤဒိတခါ တဲဝဲလၢ “ဖိသၣ်တဂၤကဒိၣ်ထီၣ် အဂီၢ်လိၣ်ဘၣ်ဝဲ သဝီဒီတဖျၢၣ် အတၢ်မၤစၢၤလီၤ.” ဒ်န့ၣ်အသိး ပတဲသ့စ့ၢ်ကီးလၢ “ပှၤကကဲထီၣ်ခရံာ် အပျဲၢ်အဘီၣ်တဂၤအဂီၢ် လိၣ်ဘၣ်ဝဲ တၢ်အိၣ်ဖှိၣ်ဒီတဖျၢၣ် အတၢ်မၤစၢၤလီၤ.” ပှၤသိၣ်လိ လံာ်စီဆှံဖိလၢအဂၤန့ၣ် မၤစၢၤအပှၤမၤလိ လံာ်စီဆှံဖိလၢ ကသ့ၣ်ညါထီၣ်ဝဲ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ ဒ်သိးဒီပုၢ်ဝဲၢ်တဖၣ်အံၤ မၤစၢၤအဝဲသ့ၣ်လၢ ကဘူးထီၣ်ဒီး ယဟိဝၤယွၤအဂီၢ်လီၤ. ခီဖျိလၢ ပှၤမၤလိလံာ်စီဆှံဖိတဖၣ်န့ၣ် ရ့လိာ်ဘၣ်အသးဒီး ယွၤအခ့အပှၤတဖၣ်အဃိ ပှၤသ့ၣ်တဖၣ်အံၤ မၤစၢၤအဝဲသ့ၣ်လၢ နီၢ်ခိဒီးနီၢ်သးသ့လီၤ. ပအဲၣ်ဒိးလၢ ပပှၤမၤလိလံာ်စီဆှံဖိ တူၢ်ဘၣ်ဝဲလၢ ပတူၢ်လိာ်အဝဲသ့ၣ်ဒီး ပအဲၣ်အဝဲသ့ၣ် ဒ်ပဟံၣ်ဖိဃီဖိလၢ နီၢ်သးတခီအသိးလီၤ. တကးဒံးဘၣ် ပအဲၣ်ဒိးလၢအဝဲသ့ၣ် ကသ့ၣ်ညါဘၣ်ဝဲ ပဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ်လီၤ. ပမ့ၢ်မၤဒ်န့ၣ်န့ၣ် ကမၤစၢၤအဝဲသ့ၣ် လၢအတရ့လိာ်အသး ဘူးဘူးတံၢ်တံၢ်ဒီး ပှၤတၢ်ချၢလၢအတအဲၣ် ယဟိဝၤယွၤဘၣ်န့ၣ်လီၤ. (ကတိၤဒိ ၁၃:၂၀) ဒီးအဝဲသ့ၣ် အတံၤသကိးလၢ အရ့တ့ၢ်ဝဲတဖၣ် မ့ၢ်ပာ်တ့ၢ်ကွံာ်အီၤ သနာ်က့ အကဒိးန့ၢ်ဘၣ်က့ၤ တံၤသကိးနီၢ်နီၢ်လၢ ယဟိဝၤယွၤ အတၢ်ကရၢကရိ အပူၤလီၤ.—မၢ်ကူး ၁၀:၂၉, ၃၀; ၁ ပ့းတရူး ၄:၄.
လါနိၣ်ဝ့ဘၢၣ် ၂၇–လါဒံၣ်စ့ဘၢၣ် ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၂၀-၂၁
“တၢ်တီတၢ်လိၤန့ၣ် တဒိးသန့ၤထီၣ်အသးလၢ တၢ်ထူးတၢ်တီၤဘၣ်”
တၢး၀၇ ၈/၁ ၂၉ ¶၁၂
မ့ၢ် ‘ကစၢ်ယွၤထံၣ်နၤလၢ ပှၤထူးပှၤတီၤ’ ဧါ
၁၂ ယ့ၣ်ၡူးအတၢ်ကတိၤန့ၣ် ပာ်ဖျါထီၣ်ဝဲလၢ ပကဲပှၤထူးပှၤတီၤ လၢကစၢ်ယွၤ အမဲာ်ညါန့ၣ် အတအဲၣ်ဒိးတဲဝဲ ပကဲပှၤထူးပှၤတီၤ လၢနီၢ်ခိတခီန့ၣ်ဘၣ်. ယ့ၣ်ၡူးအဲၣ်ဒိးတဲဝဲလၢ လၢပတၢ်အိၣ်မူပူၤ တၢ်လၢပကြၢး သးစၢၢ်ဆၢအီၤ ဒိၣ်ကတၢၢ်န့ၣ် တမ့ၢ်ဝဲ ပကပာ်ဖှိၣ် တၢ်ထူးတၢ်တီၤ မ့တမ့ၢ် သူၣ်ဖှံသးညီလၢ တၢ်လၢအအိၣ်ဒီးပှၤ အဃိန့ၣ်ဘၣ်. ပကြၢးသူ တၢ်လၢအအိၣ်ဒီးပှၤတဖၣ် ဒ်သိး ကမၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤ. ပမ့ၢ်မၤဒ်န့ၣ်န့ၣ် ကစၢ်ယွၤ ကအိးထီၣ်ကျဲလၢ ပကဒိးန့ၢ် အတၢ်ဆိၣ်ဂ့ၤအဂီၢ်. အဃိ ကစၢ်ယွၤ ကထံၣ်ပှၤဒ် ပှၤထူးပှၤတီၤအသိး. လံာ်စီဆှံတဲဝဲလၢ “ယဟိဝၤယွၤ အတၢ်ဆိၣ်ဂ့ၤန့ၣ် မ့ၢ်တၢ်လၢ အဒုးဘီၣ်ထီၣ်ညီထီၣ် ပှၤတၢ်အိၣ်မူ ဒီးအတမၤဘၣ်ဒိဘၣ်ထံး ပှၤနီတမံၤဘၣ်”—ကတိၤ ၁၀:၂၂.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၅ ၁/၁ ၉ ¶၁၉
တၢ်မၤနၢၤကွံာ် မုၣ်ကီၤလံၢ် ဒီးအတၢ်မၤတဖၣ်
၁၉ မုၣ်ကီၤလံၢ်သူဝဲ စီၤအလံဖးစး ဒီးစီၤစိဖၢ် ဒ်သိးက “မၤဘံဘူ” စီၤယိၤဘး အ “တၢ်ဆိကမိၣ်.” (ဘး ၄:၁၃-၁၈; ၂၀:၂, ၃) အဃိ စီၤယိၤဘး ‘သူၣ်ကိၢ်သးဂီၤတၢ်’ ဒီး အဝဲ “ဟးတဲကြီတၢ်” ဘၣ်ဃးဒီး “တၢ်ပျံၤတၢ်ဖုး” အဂ့ၢ်. (ဘး ၆:၂-၄; ၃၀:၁၅, ၁၆) စီၤအလံဟူၤ ဒိကနၣ်န့ၢ် စီၤယိၤဘးဂ့ၤဂ့ၤ ဝံၤဒီးအမၤစၢၤ စီၤယိၤဘးဒ်သိး စီၤယိၤဘးကသ့ၣ်ညါဝဲ ယဟိဝၤယွၤအတၢ်ထံၣ် ဘၣ်ဃးဒီး တၢ်ဂ့ၢ်တဖၣ်. ဒ်န့ၢ်အသိး တၢ်အိၣ်ဖှိၣ်သးပှၢ်လၢ အနၢ်ပၢၢ်စၢၤတၢ်တဖၣ်န့ၣ် အတ “ဆီၣ်သနံး” ဝဲပှၤလၢအထံၣ်ဘၣ်ဒီး တၢ်ကီတၢ်ခဲတဖၣ်ဘၣ်. ဒ်စီၤအလံဟူၤအသိး အဝဲသ့ၣ် ဒိကနၣ်န့ၢ်ဝဲ ပှၤလၢအထံၣ်ဘၣ်ဒီးတၢ်ကီတၢ်ခဲတဖၣ်ဂ့ၤဂ့ၤ ဒီးဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကစၢ်ယွၤကလုၢ်ကထါ. (ဘး ၃၃:၁-၃, ၇; ယၤ ၅:၁၃-၁၅) အဃိ လၢတၢ်အိၣ်ဖှိၣ်ပူၤန့ၣ် ပှၤလၢအသူၣ်ဘၣ်ဒိသးဘၣ်ဒိ ခီဖျိလၢ တၢ်ကဲထီၣ်အသးနီၢ်ကီၢ်အဃိမ့ၢ်ဂ့ၤ လၢတၢ်တကဲထီၣ်သးနီၢ်ကီၢ်ဒံးဘၣ် အဃိမ့ၢ်ဂ့ၤ ပှၤလၢ အပျံၤတၢ်ဖုးတၢ် ခီဖျိလၢ “တၢ်မံမီၢ် ဒီး . . . တၢ်ထံၣ်လၢညါခီတဖၣ်” န့ၣ်ဒိးန့ၢ်ဘၣ်ဝဲ တၢ်မၤမုာ်ထီၣ်က့ၤလၢ လံာ်စီဆှံအပူၤသ့.—ဘး ၇:၁၄; ယၤ ၄:၇.
g ၅/၀၉ ၁၂-၁၃
ကစၢ်ယွၤ အဲၣ်ဒိးလၢ နကကဲထီၣ် ပှၤထူးပှၤတီၤဧါ
တၢ်ဘူၣ်တၢ်ဘါ အါတက့ၢ်န့ၣ် နာ်ဝဲဒၣ်လၢ ကစၢ်ယွၤ ဆိၣ်ဂ့ၤပှၤလၢ တၢ်ထူးတၢ်တီၤ. အဝဲသ့ၣ် တဲဝဲလၢ နမ့ၢ်မၤ ကစၢ်ယွၤ အတၢ်ဘၣ်သးန့ၣ် ကစၢ်ယွၤ ကမၤစၢၤနၤ ဒ်သိးနကဒိးန့ၢ်ဘၣ် တၢ်ထူးတၢ်တီၤလၢ ဆၢကတီၢ်ခဲအံၤ တကးဒံးဘၣ် နသံဝံၤအလီၢ်ခံနာ်က့ ကဆိၣ်ဂ့ၤနၤဒံး. တၢ်သိၣ်လိတခါအံၤန့ၣ် ပှၤဘၣ်သူၣ်ဘၣ်သးအီၤဒိၣ်မး. ဒီးလံာ်လၢ အကွဲးဝဲ တၢ်ဂ့ၢ်တဖၣ်အံၤန့ၣ် ပှၤဆါဘၣ်အီၤအါမး. “တၢ်သိၣ်လိလၢဘၣ်ဃးဒီး တၢ်ထူးထီၣ်တီၤထီၣ်” တခါအံၤန့ၣ် လီၤပလိာ်လိာ်အသးဒီး လံာ်စီဆှံ အတၢ်သိၣ်တၢ်သီဧါ.
လံာ်စီဆှံ တဲဝဲလၢ တၢ်ဘၣ်တ့ကစၢ်န့ၣ် မ့ၢ် “ကစၢ်ယွၤလၢ အသးခုတဂၤ.” (၁ တံၤ ၁:၁၁; စံး ၁:၁-၃) အဃိ အဝဲအဲၣ်ဒိးလၢ ပတၢ်အိၣ်မူန့ၣ် ကပှဲၤဒီး တၢ်သးခု. တကးဒံးဘၣ် အဝဲဆိၣ်ဂ့ၤဝဲ ပှၤလၢအမၤ အတၢ်ဘၣ်သးတဖၣ်. (ကတိၤ ၁၀:၂၂) ဘၣ်ဆၣ် မ့မ့ၢ်လၢ ပစိၤခဲအံၤန့ၣ် ပှၤတဂၤ မ့ၢ်ဒိးန့ၢ်ဘၣ်ဝဲ တၢ်ထူးတၢ်တီၤန့ၣ် မ့ၢ်ဝဲ ကစၢ်ယွၤ ဆိၣ်ဂ့ၤအီၤဧါ. ဒ်သိး ပကသ့ၣ်ညါ တၢ်စံးဆၢအဂီၢ် ပကဘၣ် နၢ်ပၢၢ်လၢ တၢ်ဆၢကတီၢ်လၢ ပအိၣ်မူခဲအံၤန့ၣ် မ့ၢ်တၢ်ဆၢကတီၢ်ဒ်လဲၣ်.
ဆၢကတီၢ်ခဲအံၤန့ၣ် မ့ၢ်ဝဲတၢ်ဆၢကတီၢ်လၢ ပကဘၣ်ဃု တၢ်ထူးတၢ်တီၤ အဆၢကတီၢ်ဧါ
ပမ့ၢ်ကွၢ် စီၤယိၤဘး ဒီးစီၤၡလိၤမိၤ အဒိအတဲာ်န့ၣ် ပာ်ဖျါထီၣ်ဝဲလၢ ကစၢ်ယွၤဆိၣ်ဂ့ၤ အခ့အပှၤတနီၤလၢ တၢ်ထူးတၢ်တီၤ. (၁ စီၤပၤ ၁၀:၂၃; ဘး ၄၂:၁၂) ဘၣ်ဆၣ် ပှၤအါဂၤလၢ အဘူၣ်ထီၣ်ဘါထီၣ် ကစၢ်ယွၤ ဒ်သိးဒီး ပှၤဘျၢတၢ်စီၤယိၤဟၣ် ဒီးယ့ၣ်ၡူးခရံာ်န့ၣ် အတၢ်တအိၣ်အါအါဘၣ်. (မၢ် ၁:၆; လူၤကၣ် ၉:၅၈) ဘၣ်မနုၤအဃိ တၢ်လီၤဆီလိာ်သး ဒ်န့ၣ်လဲၣ်. ဒ်လံာ်စီဆှံ ပာ်ဖျါထီၣ်ဝဲအသိး ဖဲန့ၣ်အဆၢကတီၢ် ကစၢ်ယွၤ ဟ့ၣ်လီၤဝဲ အခ့အပှၤတဖၣ်တၢ် ဒ်သိး ကမၤလၢပှဲၤဝဲ အတၢ်တိာ်ပာ် တမံၤမံၤအဂီၢ်. (စံၣ်တဲၤ ၃:၁) လံာ်စီဆှံ အတၢ်ဟံးစုနဲၣ်ကျဲအံၤ ဘၣ်ထွဲလိာ်အသးဒီးပှၤ ဒ်လဲၣ်.
လံာ်စီဆှံ တဲဝဲလၢ ပအိၣ်မူဘၣ်လၢ “တၢ်အစိၤလၢ အလီၢ်ခံကတၢၢ်” ဒီး “မုၢ်နံၤခံကတၢၢ်တဖၣ်အပူၤ.” မုၢ်နံၤခံကတၢၢ်တဖၣ် အတၢ်ပနီၣ်န့ၣ် မ့ၢ်ဝဲ တၢ်ဒုးတၢ်ယၤ, တၢ်ဆူးတၢ်ဆါ, တၢ်သၣ်ဝံၤလီၤဒိ, ဟီၣ်ခိၣ်ဟူး ဒီးပှၤဟီၣ်ခိၣ်ဖိတဖၣ် အတၢ်သကဲာ်ပဝး လီၤရၢၢ်လီၤစၢၢ်. စးထီၣ်လၢ ၁၉၁၄ နံၣ်လံၤလံၤန့ၣ် တၢ်သ့ၣ်တဖၣ်အံၤ ကဲထီၣ်အသးအါမး. (မး ၂၄:၃; ၂ တံၤ ၃:၁-၅; လူၤကၣ် ၂၁:၁၀, ၁၁; လီၣ် ၆:၃-၈) ဒီးပမ့ၢ်တဲလၢအဂၤတမံၤန့ၣ် ဟီၣ်ခိၣ်တဘ့ၣ်အံၤ လီၤဂာ်ဒ် ကဘီတဘ့ၣ်လၢ ကလီၤဘျၢ ဘူးထီၣ်လံ. အဃိ မ့ၢ်ကစၢ်ယွၤ ကအဲၣ်ဒိးလၢ အခ့အပှၤတဖၣ် ကကဲထီၣ် ပှၤထူးပှၤတီၤဧါ. မ့တမ့ၢ် အကအဲၣ်ဒိးလၢ အခ့အပှၤတဖၣ် မၤတၢ်အဂၤ တမံၤမံၤဧါ.
ယ့ၣ်ၡူး ထိၣ်သတြီၤဝဲ ပစိၤ ဒီးစီၤနိအၤအစိၤ. အဝဲတဲဝဲလၢ “မုၢ်နံၤတဖၣ်လၢ တချုးဖဲ ထံလုၢ်ဘၢတၢ် ဟဲဒံးဘၣ်န့ၣ် ပှၤအီၣ်တၢ်ဒီးအီတၢ် ဒီးန့ၢ်မါန့ၢ်ဝၤ တုၤလီၤလၢ မုၢ်တနံၤဖဲ စီၤနိအၤ လဲၤနုာ်လီၤလၢ ကဘီအပူၤလီၤ. အဝဲသ့ၣ်န့ၣ် တပာ်သူၣ်ပာ်သးဝဲ တၢ်ကဲထီၣ်အသးတဖၣ်ဘၣ် တုၤလီၤလၢ ထံလုၢ်ဘၢတၢ်ဟဲဒီး စိာ်ကွံာ် အဝဲသ့ၣ်ခဲလၢာ်လီၤ. ဖဲပှၤကညီဖိခွါ ဟဲက့ၤအိၣ်ဒီးသု အဆၢကတီၢ်န့ၣ် တၢ်ကမၤအသးဒ်န့ၣ်အသိး စ့ၢ်ကီးလီၤ.” (မး ၂၄:၃၇-၃၉) ဒီးယ့ၣ်ၡူး ထိၣ်သတြီၤဝဲပစိၤဒီး စီၤလိာ်အစိၤစ့ၢ်ကီး. ပှၤလၢအအိၣ်လၢ စီၤလိာ်အကပိာ်ကပၤ လၢအအိၣ်လၢ ဝ့ၢ်စဒိၣ် ဒီးဝ့ၢ်ဂမိရၤတဖၣ်စ့ၢ်ကီး “အီၣ်တၢ်, အီတၢ်, ပှ့ၤတၢ်, ဆါတၢ်, သူၣ်တၢ်ဖျးတၢ် ဒီးသူၣ်ဟံၣ်သူၣ်ဃီ.” ယ့ၣ်ၡူးတဲကဒီးဝဲလၢ “မုၢ်နံၤဖဲစီၤလိာ် ဟးထီၣ်ကွံာ်လၢ ဝ့ၢ်စဒိၣ်အပူၤန့ၣ် မ့ၣ်အူဒီးကး ဟဲစူၤလီၤဝဲလၢမူခိၣ် ဒီးမၤဟးဂီၤကွံာ် ပှၤတဖၣ်န့ၣ် ခဲလၢာ်လီၤ. မုၢ်နံၤလၢ ပှၤကညီဖိခွါ ကလီၣ်ဖျါထီၣ်အသးန့ၣ် တၢ်ကမၤအသးဒ်န့ၣ်အသိး စ့ၢ်ကီးလီၤ.”—လူၤ ၁၇:၂၈-၃၀.
ပှၤအီၣ်တၢ်အီတၢ်, န့ၢ်မါန့ၢ်ဝၤ, ဆါတၢ်ပှ့ၤတၢ်န့ၣ် တမ့ၢ်တၢ်လၢ အကမၣ်ဘၣ်. ဘၣ်ဆၣ် ပမ့ၢ်သးစၢၢ်ဆၢ တၢ်သ့ၣ်တဖၣ်န့ၣ် အါတလၢန့ၣ် ပကသးပ့ၤနီၣ်ကွံာ်လၢ ပအိၣ်မူတၢ် အဆၢကတီၢ်န့ၣ် မ့ၢ်ဝဲ တၢ်ဆၢကတီၢ်လၢ အရ့ဒိၣ်ဒိၣ်မး. အဃိ တၢ်လီၤဘၣ်ယိၣ် အိၣ်ဝဲဒိၣ်မး. အဃိ သံကွၢ်လီၤနသးလၢ ‘ကစၢ်ယွၤ မ့ၢ်ဆိၣ်ဂ့ၤပှၤလၢ တၢ်လၢကကဲထီၣ် တၢ်ကီတၢ်ခဲ လၢပဂီၢ်န့ၣ် ပတဲလၢ ကစၢ်ယွၤ အတၢ်ဆိၣ်ဂ့ၤ ကသ့ဧါ.’ ပတဲဒ်န့ၣ် တသ့ဘၣ်. ကလီၤဂာ်ဒ်သိး ကစၢ်ယွၤ မၤကီမၤခဲပှၤဟီ. ဘၣ်ဆၣ် ကစၢ်ယွၤလၢ အအိၣ်ဒီး တၢ်အဲၣ်တၢ်ကွံတဂၤန့ၣ် တမ့ၢ်လၢကမၤဝဲဒ်န့ၣ်ဘၣ်.—၁ တံၤ ၆:၁၇; ၁ ယိၤ ၄:၈.
လါဒံၣ်စ့ဘၢၣ် ၄-၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၂၂-၂၄
“တၢ်လၢ ပှၤကညီန့ၣ် ကစၢ်ယွၤ သူအီၣ်အီၤကသ့ဧါ”
တၢး၀၅ ၉/၁၅ ၂၇ ¶၁-၃
ထီဒါကွံာ်တၢ်ဆိကမိၣ်လၢအကမၣ်
ဖဲစီၤအလံဖးစးတဲတၢ် သၢဘျီတဘျီအခါ အဝဲသံကွၢ်ဝဲလၢ “တၢ်လၢ ပှၤကညီန့ၣ် ကစၢ်ယွၤ သူအီၣ်အီၤကသ့ဧါ. ပှၤလၢအအိၣ်ဒီး တၢ်ကူၣ်သ့နာ်က့ မ့ၢ်အကကဲဘျုးလၢ ကစၢ်ယွၤအဂီၢ်ဧါ.” (ဘး ၂၂:၂) စီၤအလံဖးစး အတၢ်ကတိၤန့ၣ် အဖျါလီၤဂာ်လၢ အဲၣ်ဒိးတဲဝဲလၢ ကစၢ်ယွၤန့ၣ် အကဲပှၤလၢအဃံးတလၢ တကးဒံးဘၣ် အဝဲအဲၣ်ဒိးတဲဝဲလၢ ပှၤဟီၣ်ခိၣ်ဖိတဖၣ်န့ၣ် ကစၢ်ယွၤသူအီၣ်အီၤတသ့ဘၣ်. စီၤဘံးလဒးစ့ၢ်ကီး တဲဝဲလၢ “မ့မ့ၢ်ဒ်န့ၣ်န့ၣ် ပှၤဟီၣ်ခိၣ်ဖိ တီဝဲလိၤဝဲလၢ ကစၢ်ယွၤ အမဲာ်ညါကသ့ဧါ. ဒီးပှၤလၢ ပိာ်မုၣ် အိၣ်ဖျဲၣ်ထီၣ်အီၤန့ၣ် အတၢ်ကမၣ် တအိၣ်ဘၣ် ကသ့ဒ်လဲၣ်.” (ဘး ၂၅:၄) တၢ်ကတိၤအံၤန့ၣ် အအဲၣ်ဒီးတဲဝဲလၢ စီၤယိၤဘးလၢ အကဲပှၤဟီၣ်ခိၣ်ဖိတဂၤအံၤ အကဲထီၣ်ပှၤတီပှၤလိၤလၢ ကစၢ်ယွၤအမဲာ်ညါတသ့နီတဘျီဘၣ်.
လၢပစိၤခဲအံၤ ပှၤတနီၤန့ၣ် ဆိကမိၣ်ဆံးလီၤအသးဒိၣ်မး. အဝဲသ့ၣ်ထံၣ်ဆံးလီၤသး မ့ၢ်လၢ အဝဲသ့ၣ်ဒိၣ်ထီၣ်တၢ်လီၢ်, ထံၣ်ဘၣ်တၢ်ကီတၢ်ခဲ မ့တမ့ၢ် ခီဖျိလၢ ပှၤသးဟ့အဝဲသ့ၣ် ခီဖျိလၢ အကလုာ်ဒူၣ်အဃိ. မုၣ်ကီၤလံၢ်ဒီး အတၢ်ဝံတၢ်နါတဖၣ်န့ၣ် အဲၣ်ဒိးမၤဟးဂီၤပှၤသး အဃိ ပှၤသးမ့ၢ်ဟးဂီၤန့ၣ် အဝဲသ့ၣ်သးခုဒိၣ်မး. မုၣ်ကီၤလံၢ်မၤဝဲဒ်သိး ပှၤကတူၢ်ဘၣ်လၢ ပှၤမ့ၢ်မၤတၢ်ဒ်လဲၣ်ဂ့ၤဒ်လဲၣ်ဂ့ၤ သ့တၢ်လၢာ်ကစၢ် တဘၣ်သူၣ်ဘၣ်သးဝဲဘၣ်. ဒီးပှၤမ့ၢ်တူၢ်ဘၣ်ဒ်န့ၣ်န့ၣ် ပှၤသးကဟးဂီၤညီဒိၣ်ထီၣ် ဒီးပှၤကသုးယံၤထီၣ်သးဒီး ယဟိဝၤယွၤ ဒီးလၢခံပှၤကပာ်တ့ၢ်ကွံာ်ကစၢ်ယွၤ.—ဧ့ၤ ၂:၁; ၃:၁၂.
ခီဖျိလၢ ပသးပှၢ်ထီၣ်ဒီး တၢ်အိၣ်ဆူၣ်အိၣ်ချ့တဂ့ၤလၢၤဘၣ်အဃိ ပမၤတၢ်တန့ၢ်ထဲသိးဒီးလၢညါလၢၤဘၣ်. အဃိ ပမ့ၢ်ထိၣ်သတြီၤကွၢ် ကစၢ်ယွၤအတၢ်မၤလၢ ပမၤအီၤခဲအံၤ ဒီးလၢအပူၤကွံာ်န့ၣ် ပကတူၢ်ဘၣ်လၢ တၢ်လၢပမၤအီၤအခဲအံၤန့ၣ် အိၣ်ထဲတစဲးဖိလီၤ. အဃိ အရ့ဒိၣ်ဒိၣ်မးလၢ ပကဘၣ်သ့ၣ်နီၣ်ထီၣ်လၢ မုၣ်ကီၤလံၢ်ဒီး အတၢ်ဝံနါတဖၣ်န့ၣ် အဲၣ်ဒိးဝဲလၢ ပကတူၢ်ဘၣ်လၢ တၢ်လၢပမၤတဖၣ်န့ၣ် ကစၢ်ယွၤတပာ်လုၢ်ပာ်ပှ့ၤဝဲဘၣ်. ပကဘၣ်တြီဆၢက့ၤ ပတၢ်ဆိကမိၣ် ဒ်န့ၣ်တဖၣ်.
တၢး၉၅ ၂/၁၅ ၂၇ ¶၆
တၢ်မၤလိလၢ ဘၣ်ဃးဒီး ပကဘၣ်မၤဘၣ်ထီၣ်က့ၤ တၢ်ကီတၢ်ခဲဒ်လဲၣ်
စီၤယိၤဘး အသကိးသၢဂၤန့ၣ် မၤဟးဂီၤအသးခီဖျိ အတဲဝဲထဲ အနီၢ်ကစၢ်တၢ်ထံၣ် ဒီးတတဲဝဲ ယဟိဝၤယွၤ အတၢ်ထံၣ်ဘၣ်. စီၤအလံဖးစး တဲဝဲလၢ ကစၢ်ယွၤတနာ်န့ၢ် အခ့အပှၤတဖၣ်ဘၣ်. ဒီးစီၤယိၤဘး မ့ၢ်ကဲပှၤတီပှၤလိၤမ့ၢ်ဂ့ၤ ပှၤကဲဒိၣ်မ့ၢ်ဂ့ၤ အရ့တဒိၣ်လၢ ကစၢ်ယွၤအဂီၢ်ဘၣ်. (ဘး ၄:၁၈; ၂၂:၂, ၃) တၢ်ကတိၤတဖၣ်အံၤန့ၣ် တဘၣ်နီတစဲးဘၣ် ဒီးအကမၤဟးဂီၤပှၤသး သပှၢ်ကတၢၢ်. အဃိ လၢခံန့ၣ် ယဟိဝၤယွၤ ပာ်ဒ့ၣ်ပာ်ကမၣ် စီၤအလံဖးစး ဒီးအသကိးလၢ အတဲဟးဂီၤအမံၤ. ယဟိဝၤယွၤ တဲဝဲလၢ “နၤ ဒီးနသကိးခံဂၤန့ၣ် . . . သုတတဲ တၢ်မ့ၢ်တၢ်တီ ဘၣ်ဃးဒီးယဂ့ၢ်ဘၣ်.” (ဘး ၄၂:၇) စီၤယိၤဘးအသကိးတဖၣ် တဲဒံးဝဲ တၢ်ကတိၤလၢ အနးန့ၢ်အန့ၢ်ဒံး.
တၢး၀၃ ၄/၁၅ ၁၄-၁၅ ¶၁၀-၁၂
ပှၤသးစၢ်လၢ အမၤသးခုယဟိဝၤယွၤအသးတဖၣ်
၁၀ လံာ်စီဆှံ ပာ်ဖျါထီၣ်ဝဲလၢ မုၣ်ကီၤလံၢ် အဲၣ်ဒိးတဲဝဲလၢ စီၤယိၤဘး တီဒီးယဟိဝၤယွၤန့ၣ် တမ့ၢ်လၢ အအဲၣ်ယဟိဝၤယွၤအဃိဘၣ်. ဒီးအတဲဝဲဒ်န့ၣ်န့ၣ် တမ့ၢ်ထဲ အတဲဝဲ စီၤယိၤဘးတဂၤဘၣ်, အတဲဝဲ ပှၤကိးဂၤဒဲးလၢ အဘူၣ်ထီၣ်ဘါထီၣ် ကစၢ်ယွၤ အဃိ ပၣ်ဃုာ်ဒီးနၤစ့ၢ်ကီး. ဘၣ်ဃးဒီး ပှၤဟီၣ်ခိၣ်ဖိတဖၣ်န့ၣ် မုၣ်ကီၤလံၢ် တဲယဟိဝၤယွၤလၢ “ပှၤကညီတဂၤ [တမ့ၢ်ထဲစီၤယိၤဘးဘၣ်, ပှၤတဂၤဂ့ၤတဂၤဂ့ၤ] ကဟ့ၣ်လီၤကွံာ် တၢ်ခဲလၢာ်လၢ အအိၣ်ဒီးအီၤ ဒ်သိး အသးသမူ သုတလီၤမၢ်တဂ့ၤ အဂီၢ်လီၤ.” (ဘး ၂:၄) နၤနာ်က့ မုၣ်ကီၤလံၢ်တဲနၤ ဒ်န့ၣ်န့ၣ် နပာ်သူၣ်ပာ်သးဧါ. ဖဲ ကတိၤဒိ ၂၇:၁၁ န့ၣ် ယဟိဝၤယွၤ ပာ်ဖျါထီၣ်ဝဲလၢ တၢ်လၢနဟ့ၣ်အီၤသ့န့ၣ် အိၣ်ဝဲ. ခီဖျိလၢ နဃိန့ၣ် ယဟိဝၤယွၤ စံးဆၢက့ၤဝဲ မုၣ်ကီၤလံၢ်လၢ အထီဒါအီၤ ကသ့ဝဲ. ကစၢ်ယွၤလၢ အအိၣ်ဒီးတၢ်ခွဲးတၢ်ယာ်လၢ ကပၢမူခိၣ်ဒီးဟီၣ်ခိၣ်န့ၣ် ဟ့ၣ်နၤတၢ်ခွဲးတၢ်ယာ်လၢ နကမၤဒ်န့ၣ်အဃိ မ့ၢ်ဝဲ တၢ်ခွဲးတၢ်ယာ် လီၤဆီဖးဒိၣ်. အဃိ မ့ၢ်နကမၤ ဒ်အတၢ်ဘၣ်သးအသိးဧါ. မ့မ့ၢ် စီၤယိၤဘးဒု မၤဝဲဒ်န့ၣ်လံ. (ဘး ၂:၉, ၁၀) ယ့ၣ်ၡူး ဒီးပှၤအါဂၤ ဒီးပှၤသးစၢ်အါဂၤန့ၣ် မၤဝဲဒ်န့ၣ်စ့ၢ်ကီး. (ဖံလံး ၂:၈; လီၣ် ၆:၉) နၤစ့ၢ်ကီး နမၤဒ်န့ၣ်သ့. ဘၣ်ဃးဒီး တၢ်ဂ့ၢ်တခါအံၤန့ၣ် နအိၣ်လၢ တၢ်ဘၢၣ်စၢၤ တသ့ဘၣ်. နတၢ်မၤတဖၣ်န့ၣ် ကပာ်ဖျါထီၣ်ဝဲလၢ နဆီၣ်ထွဲ မုၣ်ကီၤလံၢ် မ့တမ့ၢ် နအိၣ်လၢ ယဟိဝၤယွၤ အအိၣ်တကပၤ. အဃိ နကအိၣ်ဖဲလဲၣ်တကပၤလဲၣ်.
ယဟိဝၤယွၤ သူၣ်အိၣ်သးအိၣ်နၤ
၁၁ ဒ်သိး ယဟိဝၤယွၤ ကစံးဆၢက့ၤ မုၣ်ကီၤလံၢ်အဂီၢ် ပှၤတီဒီးယဟိဝၤယွၤ အိၣ်အါမးလံ. အဃိ နမ့ၢ်ဃုထၢလၢ နကမၤဒ်လဲၣ်ဂ့ၤ ဒ်လဲၣ်ဂ့ၤ အရ့ဒိၣ်လၢ ယဟိဝၤယွၤ အဂီၢ်ဒံးဧါ. မုၣ်ကီၤလံၢ် တဲဝဲလၢ ပှၤတဘူၣ်ထီၣ်ဘါထီၣ် ယဟိဝၤယွၤ ခီဖျိလၢ ပှၤအဲၣ်အီၤအဃိ နီတဂၤဘၣ်. ဘၣ်ဆၣ် မုၣ်ကီၤလံၢ်တဲတၢ် ကမၣ်န့ၣ် တၢ်အစၢဖျါထီၣ်လံ. သနာ်က့ မ့ၢ်လၢ ယဟိဝၤယွၤအဲၣ်နၤအဃိ အဝဲ အဲၣ်ဒိးလၢ နကအိၣ်လၢ အအိၣ်တခီဒံး. ယ့ၣ်ၡူးတဲဝဲလၢ “ယပၢ်အိၣ်လၢမူခိၣ်န့ၣ် တအဲၣ်ဒိးဝဲလၢ ပှၤအဆံးတဖၣ်အံၤ တဂၤဒၣ်လဲာ် ကလီၤမၢ်ဝဲဘၣ်.”—မး ၁၈:၁၄.
၁၂ နဃုထၢတၢ် ဒ်လဲၣ်န့ၣ် အရ့ဒိၣ်လၢ ယဟိဝၤယွၤအဂီၢ်ဒိၣ်မး. နတၢ်ဃုထၢန့ၣ် အမၤသးခုအီၤ မ့တမ့ၢ် မၤဘၣ်ဒိအသးသ့. ဖဲပှၤဟီၣ်ခိၣ်ဖိတဖၣ် မၤတၢ်ဂ့ၤ မ့တမ့ၢ် မၤတၢ်အၢတၢ်သီအခါ ယဟိဝၤယွၤ တူၢ်ဘၣ်ဝဲဒ်လဲၣ်န့ၣ် လံာ်စီဆှံ ပာ်ဖျါထီၣ်ဝဲ လီၤတံၢ်လီၤဆဲး. အဒိ, ဖဲပှၤအံၣ်စရ့လးဖိတဖၣ် တဒိကနၣ် အကလုၢ် တဘျီဝံၤတဘျီအခါ ယဟိဝၤယွၤ “သးအုး” ဒိၣ်မး. (စံး ၇၈:၄၀, ၄၁) တချုး ထံလုၢ်ဘၢတၢ်ဖဲ စီၤနိအၤ အစိၤဒံးဘၣ်န့ၣ် “ပှၤဟီၣ်ခိၣ်ဖိ အတၢ်အၢတၢ်သီန့ၣ် အိၣ်ဝဲ အါအါဂီၢ်ဂီၢ်” အဃိ ကစၢ်ယွၤ “အသးဘၣ်ဒိဝဲ.” (၁ မိၤ ၆:၅, ၆) အဃိ ပသ့ၣ်ညါဘၣ်လၢ နမ့ၢ်ဃုထၢ ကျဲလၢအကမၣ်န့ၣ် တၢ်ဘၣ်တ့ကစၢ် အသးဘၣ်ဒိဝဲသ့. ဘၣ်ဆၣ် အခီပညီ တမ့ၢ်လၢ ကစၢ်ယွၤန့ၣ် အသးဘၣ်ဒိညီဘၣ်. အဝဲအဲၣ်နၤ ဒီးအဲၣ်ဒိးလၢနကဒိးန့ၢ်ဘၣ်အဘျုး. နမ့ၢ်ဃုထၢ ကျဲလၢအဘၣ်န့ၣ် အသးခုဝဲ. အသးခုန့ၣ် တမ့ၢ်လၢ အစံးဆၢက့ၤ မုၣ်ကီၤလံၢ် သ့ဝဲအဃိဘၣ်. အသးခုဝဲခီဖျိလၢ အကဆိၣ်ဂ့ၤဘၣ်နၤအဃိ. ဒီးအဝဲအဲၣ်ဒိးမၤဝဲဒ်န့ၣ်. (ဧ့ၤ ၁၁:၆) အဃိ ယဟိဝၤယွၤန့ၣ် အလီၤဂာ်ဒ် ပၢ်လၢအအိၣ်ဒီး တၢ်အဲၣ်တၢ်ကွံ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၄ ၇/၁၅ ၂၁-၂၂
ပာ်လီၤဖီတၢၣ်လၢ ကမၤလၤကပီၤ တၢ်ဘၣ်တ့ကစၢ်
ဆိကမိၣ်ကွၢ် ယဟိဝၤယွၤ တ့လီၤဝဲ မူခိၣ်ဒီးဟီၣ်ခိၣ် တုၤလၢအဝံၤဒ်လဲၣ်. ယဟိဝၤယွၤ တဲဝဲလၢ “ဟါခီအိၣ်ဝဲ ဒီးဂီၤခီအိၣ်ဝဲ” အဃိပာ်ဖျါထီၣ်ဝဲလၢ ဖဲအတ့လီၤတၢ်အခါ အပာ်ပနီၣ်ဝဲ တၢ်ဆၢကတီၢ် တတီၤဘၣ်တတီၤ. (၁ မိၤ ၁:၅, ၈, ၁၃, ၁၉, ၂၃, ၃၁) ဖဲအဝဲ စးထီၣ်တ့လီၤတၢ် တနံၤဘၣ်တနံၤအခါ အအိၣ်ဒီး တၢ်တိာ်ပာ် မ့တမ့ၢ် ဖီတၢၣ်လၢ တၢ်တနံၤန့ၣ်အဂီၢ်. ဒီးအဝဲမၤလၢပှဲၤဝဲ အတၢ်တိာ်ပာ်လၢ ကတ့လီၤတၢ်. (လီၣ် ၄:၁၁) စီၤယိၤဘး တဲဝဲလၢ “[ယဟိဝၤယွၤ] မ့ၢ်အဲၣ်ဒိး မၤတၢ်တမံၤမံၤန့ၣ် အမၤဝဲလီၤ.” (ဘး ၂၃:၁၃) ယဟိဝၤယွၤ ဘၣ်သူၣ်ဘၣ်သးဝဲ “တၢ်လၢအတ့လီၤဝဲ ကိးမံၤဒဲး” အဃိ အတဲဝဲလၢ တၢ်လၢအတ့လီၤဝဲ ကိးမံၤဒဲးန့ၣ် “ဂ့ၤဝဲဒိၣ်မးလီၤ.”—၁ မိၤ ၁:၃၁.
ပဝဲစ့ၢ်ကီး ဒ်သိးပမၤလၢပှဲၤ ပဖီတၢၣ်ကန့ၢ်အဂီၢ် ပကဘၣ်အိၣ်ဒီး တၢ်သးဆူၣ်လၢ ပကမၤလၢပှဲၤအီၤအဂီၢ်. မ့မ့ၢ်ဒ်န့ၣ်န့ၣ် ဒ်သိး ပကအိၣ်ဒီးတၢ်သးဆူၣ်အဂီၢ် ပကဘၣ်မၤဒ်လဲၣ်. ထံၣ်တမှံကွၢ်လၢ ဖဲဟီၣ်ခိၣ်အက့ၢ်အဂီၤ တဖျါထီၣ်ဒံးဘၣ် ဒီးတၢ်တအိၣ်လၢ အပူၤနီတမံၤဒံးဘၣ်အခါ ယဟိဝၤယွၤ ထံၣ်ဆိဝဲ ဟီၣ်ခိၣ်လၢ အဃံအလၤတဖျၢၣ် အိၣ်လၢတၢ်ဖးဖီ ဒီးကဲထီၣ် တၢ်လၤကပီၤလၢအဂီၢ်. ဒ်န့ၣ်အသိး ပဝဲစ့ၢ်ကီး ပမၤဆူၣ်ထီၣ်ပသးလၢ ပကမၤလၢပှဲၤ ပဖီတၢၣ်အဂီၢ်သ့ ခီဖျိ ပဆိကမိၣ်ထံဝဲ ပမ့ၢ်မၤလၢပှဲၤ ပဖီတၢၣ်န့ၣ် ကကဲဘျုးဝဲဒ်လဲၣ်သ့. ပကဆိကမိၣ်ကွၢ် ထိနံၤ လၢအသးအိၣ် ၁၉ နံၣ်တဂၤ အတၢ်လဲၤခီဖျိ. ဖဲအဝဲလဲၤဟးအိၣ်သကိးဝဲ ယဟိဝၤပှၤအုၣ်အသးတဖၣ် အဝဲၤတြၢ်လၢမုၢ်နုာ် ယူရပၤအခါ အဝဲဘၣ်သူၣ်ဘၣ်သးဝဲဒိၣ်မး. စးထီၣ်ဖဲန့ၣ် အဝဲသံကွၢ်လီၤအသးလၢ ‘ယမ့ၢ်မၤဘၣ်တၢ် ဖဲအံၤန့ၣ် ကမၤသးဒ်လဲၣ်.’ အဝဲဆဲးဆိကမိၣ်ဝဲ တၢ်ဂ့ၢ်တဖၣ်အံၤ ဒီးဂုာ်ကျဲးစၢးဝဲ ဒ်သိး ကတုၤထီၣ်ထီၣ်ဘး လၢကမၤတၢ်ဖဲန့ၣ်. ဒီးလၢခံန့ၣ် အဝဲတီၣ်ထီၣ်လံာ်လၢ ကမၤတၢ်ဖဲဝဲၤတြၢ် ဒီးပှၤတူၢ်လိာ်အလံာ်အဃိ အဝဲသးခုဒိၣ်မး.
ပမ့ၢ်အိၣ်ဒီး တၢ်ထံၣ်လၢအဂ့ၤန့ၣ် ကမၤစၢၤပှၤဒ်သိး ပကဆဲးမၤယဟိဝၤယွၤ အတၢ်မၤလၢတၢ်သးခု
၁၇ ပှၤမ့ၢ်တဒိကနၣ် တၢ်ကစီၣ်လၢ ယ့ၣ်ၡူးတဲဝဲတဖၣ်ဒၣ်လဲာ် ယ့ၣ်ၡူးဆဲးအိၣ်ဒီး တၢ်ထံၣ်လၢအဂ့ၤ ဒီးဆဲးစံၣ်တဲၤတဲလီၤတၢ်လီၤ. ဘၣ်မနုၤအဃိလဲၣ်. မ့ၢ်လၢ ယ့ၣ်ၡူးသ့ၣ်ညါဝဲလၢ ပှၤဟီၣ်ခိၣ်ဖိတဖၣ် ကဘၣ်သ့ၣ်ညါတၢ်မ့ၢ်တၢ်တီလီၤ. ဒီးအအဲၣ်ဒိးမၤစၢၤပှၤအါဂၤ ဒ်သိးကတူၢ်လိာ် ဘီမုၢ်တၢ်သးခုကစီၣ်အဂီၢ်လီၤ. တကးဒံးဘၣ် အဝဲသ့ၣ်ညါစ့ၢ်ကီးလၢ ပှၤတနီၤန့ၣ် လၢအခီၣ်ထံးခါတသးအိၣ် ဒိကနၣ်တၢ်ဘၣ် ဘၣ်ဆၣ်လၢခံ အဝဲသ့ၣ်ကတူၢ်လိာ် တၢ်မ့ၢ်တၢ်တီလီၤ. ပကကွၢ်သကိး တၢ်မၤအသးဒီး ယ့ၣ်ၡူးအဟံၣ်ဖိဃီဖိလီၤ. ဖဲယ့ၣ်ၡူးမၤတၢ်စံၣ်တဲၤတဲလီၤတၢ်မၤ သၢနံၣ်တဝာ်အတီၢ်ပူၤန့ၣ် အဒီပုၢ်ဝဲၢ်တဖၣ် တကဲထီၣ်အပျဲၢ်အဘီၣ်နီတဂၤဘၣ်. (ယိၤဟၣ် ၇:၅) ဘၣ်ဆၣ် ဖဲယ့ၣ်ၡူးဂဲၤဆၢထၢၣ်သမူထီၣ်က့ၤ ဝံၤအလီၢ်ခံန့ၣ် အဒီပုၢ်ဝဲၢ်တဖၣ် ကဲထီၣ်ဝဲခရံာ်ဖိလီၤ.—မၤတၢ် ၁:၁၄.
၁၈ ပှၤလၢပသိၣ်လိအီၤလံာ်စီဆှံန့ၣ် အဝဲသ့ၣ်ကကဲထီၣ် ကစၢ်ယွၤအခ့အပှၤဧါ, တကဲထီၣ်ဧါန့ၣ် ပတသ့ၣ်ညါဘၣ်. ပှၤတနီၤကတူၢ်လိာ် တၢ်မ့ၢ်တၢ်တီအဂီၢ်န့ၣ် ကယံာ်ဒိၣ်န့ၢ်ဒံးပှၤအဂၤတဖၣ်လီၤ. ပှၤလၢအတတူၢ်လိာ် ပတၢ်ကစီၣ်ဘၣ်တဖၣ်ဒၣ်လဲာ် အဝဲသ့ၣ်ထံၣ်ပလုၢ်လၢ် သကဲာ်ပဝးလၢအဂ့ၤ ဒီးပအိၣ်ဒီးတၢ်ထံၣ်လၢအဂ့ၤ အဃိ လၢခံအဝဲသ့ၣ်ကကဲထီၣ် ပှၤလၢ “ကမၤလၤကပီၤကစၢ်ယွၤ” လီၤ.—၁ ပ့းတရူး ၂:၁၂.
၁၉ ပကဘၣ်သ့ၣ်ညါလၢ ပမ့ၢ်ပှၤလၢအသူၣ်လီၤတၢ်ဒီး လူတၢ်ထံ ဒီးမ့မ့ၢ်ကစၢ်ယွၤန့ၣ် ဒုးဒိၣ်ထီၣ်တၢ်လီၤ. (ဖး ၁ ကရံၣ်သူး ၃:၆, ၇ တက့ၢ်.) ဒီပုၢ်ဝဲၢ်ခွါခဲထဟၢး အမၤကစၢ်ယွၤတၢ်မၤလၢ ကီၢ်အံးသံးယိဖၠံယါန့ၣ် တဲဝဲလၢ “ဖဲအနံၣ်ခံဆံအတီၢ်ပူၤ လၢတၢ်လီၢ်အဝဲအံၤန့ၣ် ယဟိဝၤပှၤအုၣ်အသးအိၣ်ထဲယၤတဂၤဧိၤလီၤ. ဘၣ်ဆၣ် ခဲအံၤ ပှၤစံၣ်တဲၤတဲလီၤတၢ်ဖိအိၣ် ၁၄ ဂၤလံ. အဝဲသ့ၣ် ၁၃ ဂၤန့ၣ် ဒိးဘျၢထံ လၢန့ၣ်အကျါ ပၣ်ဃုာ်ဒီး ယမါဒီးယဖိသၢဂၤလီၤ. ဒီးပှၤဟဲထီၣ်တၢ်အိၣ်ဖှိၣ်အနီၣ်ဂံၢ်န့ၣ် အိၣ်ဝဲ ၃၂ ဂၤလီၤ.” ဒီပုၢ်ဝဲၢ်ခွါခဲထဟၢး ဆဲးစံၣ်တဲၤတဲလီၤတၢ်လၢ တၢ်ဝံသးစူၤအပူၤ ဒီးအထံၣ်ဘၣ်လၢ ယဟိဝၤယွၤမူၤဃီၤဝဲ ပှၤလၢအသးဘျၢတဖၣ်လၢ အတၢ်ကရၢကရိအပူၤလီၤ.—ယိၤဟၣ် ၆:၄၄.
၂၀ ယဟိဝၤယွၤပာ်လုၢ်ပာ်ပှ့ၤ ပှၤသးသမူခဲလၢာ်လီၤ. အဝဲဟ့ၣ်ပှၤတၢ်ခွဲးတၢ်ယာ်လၢ ပကမၤသကိးတၢ်ဒီး အဖိခွါလၢ ကပာ်ဖှိၣ်ပှၤကလုာ်ဒူၣ်တဖၣ် တချုးလၢတၢ်အကတၢၢ်ဟဲတုၤဒံးဘၣ်န့ၣ်လီၤ. (ဃးကဲ ၂:၇) ပတၢ်စံၣ်တဲၤတဲလီၤတၢ်မၤန့ၣ် အလီၤဂာ်ဒ် ပှၤမၤပူၤဖျဲးပှၤဂၤအသးသမူလီၤ. ပလီၤဂာ်ဒီးပှၤလၢ အဘၣ်လဲၤမၤစၢၤပှၤလၢ အအိၣ်ကတးထီ လၢဟီၣ်ခိၣ်ဖီလာ်လီၤ. ပှၤလၢအပူၤဖျဲးအိၣ်ထဲစှၤကိာ်ဂၤ သနာ်က့ ပှၤလၢအလဲၤမၤစၢၤတၢ်တဖၣ်န့ၣ် ထံၣ်ဝဲလၢတၢ်မၤအံၤအရ့ဒိၣ်မးလီၤ. ဒ်န့ၣ်အသိး ပတၢ်စံၣ်တဲၤတဲလီၤတၢ်မၤန့ၣ် မ့ၢ်တၢ်လၢအရ့ဒိၣ်စ့ၢ်ကီးလီၤ. ပှၤလၢပကဘၣ်မၤပူၤဖျဲးအီၤလၢ ဟီၣ်ခိၣ်လၢမုၣ်ကီၤလံၢ်ပၢဝဲတဘ့ၣ်အံၤ အိၣ်ဒံးထဲလဲၣ်န့ၣ် ပတသ့ၣ်ညါဘၣ်. ဘၣ်ဆၣ် ယဟိဝၤယွၤသူပှၤလၢ ပကမၤစၢၤပှၤဂၤလီၤ. ဒီပုၢ်ဝဲၢ်မုၣ်အၤဒြ့ယဲၤ(စ်) လၢအအိၣ်လၢ ကီၢ်ဘိၣ်လ့ဘံယါ တဲဝဲလၢ “ဖဲပှၤတဂၤမၤလိလံာ်စီဆှံ ဒီးဒိးဘျၢထံအခါ ယသ့ၣ်ညါဘၣ်လၢ ပှၤအါဂၤဘၣ်မၤသကိးတၢ် ဒ်သိးကမၤစၢၤအီၤအဂီၢ်လီၤ.” မ်ပဆဲးအိၣ်ဒီးတၢ်ထံၣ်လၢအဂ့ၤ လၢပတၢ်စံၣ်တဲၤတဲလီၤတၢ်မၤအပူၤတက့ၢ်. ပမ့ၢ်မၤဒ်န့ၣ်န့ၣ် ယဟိဝၤယွၤကဆိၣ်ဂ့ၤပှၤ ဒီးပကသးခုလၢ ပတၢ်စံၣ်တဲၤတဲလီၤတၢ်မၤအပူၤထီဘိလီၤ.
လါဒံၣ်စ့ဘၢၣ် ၁၁-၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၂၅-၂၇
“ပှၤတလၢတပှဲၤနာ်က့ အိၣ်ဒီးတၢ်သးတီသ့”
it-1 ၁၂၁၀ ¶၄
တၢ်သးတီ
စီၤယိၤဘး. ဖျါလၢစီၤယိၤဘးန့ၣ် အအိၣ်မူဝဲဖဲ စီၤယိၤသး သံဝံၤအလီၢ်ခံ ဒီးစီၤမိၤၡ့အစိၤ အဘၢၣ်အစၢၤ. ဒီးလံာ်စီဆှံ ပာ်ဖျါထီၣ်ဝဲလၢ စီၤယိၤဘး “မ့ၢ်ပှၤတီပှၤလိၤ လၢအအိၣ်ဒီး တၢ်သးတီလီၤ. ဒီးအမ့ၢ် ပှၤတဂၤလၢ အပျံၤယွၤ ဒီးဟးဆှဲး တၢ်အၢလီၤ.” (ဘး ၁:၁) ဖဲမူခိၣ်ကလူးတဖၣ် အိၣ်ဖှိၣ်ဝဲလၢ မူခိၣ်အခါ မုၣ်ကီၤလံၢ်ဟဲဝဲ ဒီးယဟိဝၤယွၤ သံကွၢ်အီၤ ဘၣ်ဃးဒီး စီၤယိၤဘးအဂ့ၢ်. အဃိ ပသ့ၣ်ညါဘၣ်လၢ ယဟိဝၤယွၤ ဒီးမုၣ်ကီၤလံၢ်န့ၣ် တဲအါလိာ်အသး ဘၣ်ဃးဒီး ပှၤဟီၣ်ခိၣ်ဖိ အတၢ်သးတီအဂ့ၢ်. မုၣ်ကီၤလံၢ် တဲဝဲလၢ စီၤယိၤဘး ဘူၣ်ထီၣ်ဘါထီၣ် ကစၢ်ယွၤန့ၣ် တမ့ၢ်လၢ အအဲၣ်ကစၢ်ယွၤ အဃိဘၣ်, မ့ၢ်လၢ အဒိးန့ၢ်ဘၣ်အဘျုးအဃိ. ဘၣ်ဃးဒီး စီၤယိၤဘး အတၢ်သးတီဒီး ကစၢ်ယွၤန့ၣ် မုၣ်ကီၤလံၢ် ဒုးအိၣ်ထီၣ်ဝဲ တၢ်သးဒ့ဒီ. အဃိ ကစၢ်ယွၤဟ့ၣ်အခွဲးလၢ မုၣ်ကီၤလံၢ် ကမၤဟးဂီၤကွံာ် စီၤယိၤဘး အတၢ်ဖိတၢ်လံၤ ဒီးအဖိတဖၣ်. သနာ်က့ မုၣ်ကီၤလံၢ် မၤဟးဂီၤဝဲ စီၤယိၤဘး အတၢ်သးတီတန့ၢ်ဘၣ်. (ဘး ၁:၆–၂:၃) မုၣ်ကီၤလံၢ်တဲဝဲလၢ စီၤယိၤဘး အဖိတဖၣ်သံ ဒီးအတၢ်ဖိတၢ်လံၤတဖၣ် လီၤမၢ်ကွံာ်ဝဲန့ၣ် အတူၢ်တၢ်မ့ၢ်ကဲသနာ်က့ အမ့ၢ်ဘၣ်သံန့ၣ် အတတီဒီး ကစၢ်ယွၤလၢၤဘၣ်. (ဘး ၂:၄, ၅) အဃိ မုၣ်ကီၤလံၢ် မၤဝဲဒ်သိး စီၤယိၤဘး ကတူၢ်ဘၣ် တၢ်ဆူးတၢ်ဆါနးမး, ဒီးအမါကတဲဟးဂီၤအသး တကးဒံးဘၣ် အသကိးတဖၣ် လၢအတဲတၢ်လၢ အတလီၤပလိာ်ဒီး ကစၢ်ယွၤ အတၢ်သိၣ်တၢ်သီ ဒီးအတၢ်တိာ်ပာ်န့ၣ် ပာ်ဒ့ၣ်ပာ်ကမၣ်အီၤ ဒီးဒုၣ်ဒွဲၣ်စံးအၢအီၤ. (ဘး ၂:၆-၁၃; ၂၂:၁, ၅-၁၁) စီၤယိၤဘးန့ၣ် ပာ်လီၤဃာ်အသးလၢ အကဆဲးအိၣ်ဒီး တၢ်သးတီ အဃိ အဝဲတဲဝဲလၢ “တုၤလၢယသံဒၣ်လဲာ် ယတမၤဟးဂီၤ ယတၢ်သးတီဘၣ်. ယကဟံးဃာ် ယတၢ်တီတၢ်လိၤ ဒီးယတပျၢ်ကွံာ်အီၤ နီတဘျီဘၣ်. ဖဲယအိၣ်မူဒံးအခါန့ၣ် ယသးတပာ်ဒ့ၣ်ပာ်ကမၣ်လီၤ ယနီၢ်ကစၢ်ဘၣ်.” (ဘး ၂၇:၅, ၆) စီၤယိၤဘး ဆဲးအိၣ်ဒီး တၢ်သးတီအဃိ ပာ်ဖျါထီၣ်ဝဲလၢ ကစၢ်ယွၤ အဒုၣ်အဒါ မုၣ်ကီၤလံၢ်တဲတၢ်န့ၣ် ကမၣ်.
ပၢၤဃာ် နတၢ်သးတီ
၃ ကစၢ်ယွၤ အခ့အပှၤတဖၣ် ပာ်ဖျါထီၣ်တၢ်သးတီကသ့ဒ်လဲၣ်. ပပာ်ဖျါထီၣ်တၢ်သးတီ သ့ခီဖျိ ပအဲၣ်ယဟိဝၤယွၤလၢ ပသးဒီဖျၢၣ်, ပအဲၣ်အီၤလၢ တၢ်အဲၣ်လၢ အဟးဂီၤတသ့ဘၣ် ဒီးပမၤအတၢ်ဘၣ်သး ထီဘိန့ၣ်လီၤ. ပကဆိကမိၣ်ကွၢ် တၢ်ကတိၤလၢအမ့ၢ် တၢ်သးတီန့ၣ် လၢလံာ်စီဆှံအပူၤ ပှၤသူဝဲဒ်လဲၣ်န့ၣ်လီၤ. လၢလံာ်စီဆှံအပူၤ တၢ်ကတိၤလၢအမ့ၢ် “တၢ်သးတီ” န့ၣ် လၢဧ့ၤဘြံၤကျိာ်န့ၣ် အခီပညီမ့ၢ်စ့ၢ်ကီးဝဲလၢ လၢာ်လၢာ်ဆ့ဆ့ မ့တမ့ၢ် လၢလၢပှဲၤပှဲၤလီၤ. အဒိ စီၤမိၤၡ့အတၢ်သိၣ်တၢ်သီတဲဝဲလၢ ပှၤအံၣ်စရ့လးဖိတဖၣ်န့ၣ် ကဘၣ်ဟ့ၣ်လုၢ်ထီၣ် ယဟိဝၤယွၤလၢ ဆၣ်ဖိကီၢ်ဖိလၢ အလၢအပှဲၤလီၤ. (၃ မိၤၡ့ ၂၂:၂၁, ၂၂) အဝဲသ့ၣ် တဘၣ်လုၢ်ထီၣ်ဝဲ ဆၣ်ဖိကီၢ်ဖိလၢ အခီၣ်, အနၢ် ဒီးအမဲာ်ချံဟးဂီၤ ဒီးအအိၣ်တဆူၣ်ဘၣ်တဖၣ်န့ၣ်ဘၣ်. အဝဲသ့ၣ် ကဘၣ်ဟ့ၣ်လုၢ်ထီၣ် ယဟိဝၤယွၤလၢ ဆၣ်ဖိကီၢ်ဖိလၢ အလၢအပှဲၤန့ၣ် မ့ၢ်တၢ်လၢ အရ့ဒိၣ်ဒိၣ်မးလီၤ. (မၤလကံ ၁:၆-၉) ဘၣ်မနုၤအဃိ ယဟိဝၤယွၤ သးစၢၢ်ဆၢဝဲ တၢ်လၢတၢ်ပှဲၤလဲၣ်န့ၣ် ပနၢ်ပၢၢ်သ့လီၤ. ဖဲပပှ့ၤတၢ်တမံၤမံၤ ဒ်သိးဒီးတၤသူတၤသၣ်, လံာ် မ့တမ့ၢ် တၢ်ဖိတၢ်လံၤတမံၤမံၤအခါ ပတအဲၣ်ဒိးပှ့ၤ တၤသူတၤသၣ်လၢအအုၣ်, လံာ်လၢအကဘျံးပၤတလၢပှဲၤ မ့တမ့ၢ် တၢ်ဖိတၢ်လံၤလၢ အဟးဂီၤတမံၤမံၤန့ၣ်ဘၣ်. ပအဲၣ်ဒိးပှ့ၤတၢ်လၢ အအိၣ်လၢလၢပှဲၤပှဲၤဒီး အဂ့ၤခဲလၢာ်လီၤ. ဒ်န့ၣ်အသိး ယဟိဝၤယွၤစ့ၢ်ကီး အဲၣ်ဒိးဝဲလၢ ပတၢ်အဲၣ်အီၤဒီး ပတၢ်သးတီဒီးအီၤန့ၣ် ကဘၣ်မ့ၢ်တၢ်လၢ အလၢအပှဲၤ ဒီးလၢာ်လၢာ်ဆ့ဆ့လီၤ.
၄ ဒ်သိးပကအိၣ်ဒီး တၢ်သးတီအဂီၢ် ပကြၢးဆိကမိၣ်လၢ ပကဘၣ်မ့ၢ် ပှၤလၢအလၢအပှဲၤဧါ. ပမ့ၢ်ဆိကမိၣ်ဒ်န့ၣ်န့ၣ် ပကတူၢ်ဘၣ်လၢ ပမၤကမၣ်ဘၣ် တၢ်အါမးလီၤ. ဆိကမိၣ်ကွၢ် တၢ်ဂ့ၢ်ခံမံၤလၢအမ့ၢ် ဒ်သိးပကအိၣ်ဒီး တၢ်သးတီအဂီၢ် ပတလိၣ်မ့ၢ် ပှၤလၢပှၤပှဲၤဘၣ် န့ၣ်တက့ၢ်. တၢ်ဂ့ၢ်တၢတမံၤန့ၣ် ယဟိဝၤယွၤတကွၢ်ထဲ ပတၢ်ကမၣ်တဖၣ်ဘၣ်. လံာ်စီဆှံတဲဝဲလၢ “ယွၤဧၢ, နမ့ၢ်ကွၢ်ဟုၣ် ပလီၤကမၣ်တၢ်ဒီး, ကစၢ်ဧၢ, မ့ၢ်မတၤကဆၢထၢၣ်တဂၤလဲၣ်.” (စံးထီၣ်ပတြၢၤ ၁၃၀:၃) အဝဲသ့ၣ်ညါဝဲလၢ ပတမ့ၢ်ပှၤလၢပှၤပှဲၤဘၣ် ဒီးအဝဲသးအိၣ် ပျၢ်ကွံာ်ပတၢ်ကမၣ်လီၤ. (စံးထီၣ်ပတြၢၤ ၈၆:၅) တၢ်ဂ့ၢ်ခံမံၤတမံၤန့ၣ် ယဟိဝၤယွၤသ့ၣ်ညါ တၢ်လၢပမၤသ့ ဒီးတၢ်လၢ ပမၤတသ့ဘၣ်တဖၣ်အဃိ အဝဲတမုၢ်လၢ်တၢ်လၢပအိၣ် အါန့ၢ်ဒံးပမၤသ့န့ၣ်ဘၣ်. (ဖး စံးထီၣ်ပတြၢၤ ၁၀၃:၁၂-၁၄ တက့ၢ်.) မ့မ့ၢ်ဒ်န့ၣ်န့ၣ် ပကဲထီၣ်တၢ်လၢအလၢအပှဲၤ လၢကစၢ်ယွၤအမဲာ်ညါ ကသ့ဒ်လဲၣ်.
၅ ဒ်ပမ့ၢ်ယဟိဝၤယွၤ အခ့အပှၤတဖၣ်အသိး ပကအိၣ်ဒီးတၢ်သးတီအဂီၢ် ပကဘၣ်အိၣ်ဒီးတၢ်အဲၣ်န့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. ပတၢ်အဲၣ်ဒီး ပတၢ်သးတီဒီး ပပၢ်လၢမူခိၣ်န့ၣ် ကဘၣ်လၢပှဲၤဝဲလီၤ. ဖဲပထံၣ်ဘၣ် တၢ်မၤကွၢ်အခါ ပတၢ်အဲၣ်မ့ၢ်အိၣ် ဒ်န့ၣ်န့ၣ် မ့ၢ်ဝဲပအိၣ်ဒီး တၢ်သးတီလီၤ. (၁ ကွဲးနီၣ်တၢ် ၂၈:၉; မးသဲ ၂၂:၃၇) က့ၤဆိကမိၣ်ကွၢ်ကဒီး ယဟိဝၤပှၤအုၣ်အသးသၢဂၤ လၢပတဲဖျါထီၣ်တ့ၢ်အဂ့ၢ် လၢအခီၣ်ထံးန့ၣ်တက့ၢ်. အဝဲသ့ၣ်မၤဝဲဒ်လဲၣ် ဒီးဘၣ်မနုၤအဃိ အဝဲသ့ၣ်မၤဝဲဒ်န့ၣ်လဲၣ်. မ့ၢ်ပဒီပုၢ်ဝဲၢ်မုၣ်ဖိတဂၤန့ၣ် တအဲၣ်ဒိး သူၣ်ဖှံသးညီဒီး အတံၤသကိး လၢကၠိတဖၣ်န့ၣ်ဘၣ်ဧါ. ဒီးပဒီပုၢ်ဝဲၢ်ခွါဖိတဂၤ အဲၣ်ဒိးဒိးန့ၢ်ဘၣ် တၢ်မဲာ်ဆှးလၢ ပှၤဟံၣ်မဲာ်ညါန့ၣ်ဧါ. ဒီးပဒီပုၢ်ဝဲၢ်ခွါလၢ အဘၣ်လုၢ်အီၣ်လုၢ်အီ အဟံၣ်ဖိဃီဖိန့ၣ် မ့ၢ်အအဲၣ်ဒိးလၢ ပှၤကနီဟးထီၣ်ကွံာ်အီၤ လၢအတၢ်မၤန့ၣ်ဧါ. တမ့ၢ်ဒ်န့ၣ်ဘၣ်. အဝဲသ့ၣ်သ့ၣ်ညါဝဲလၢ ယဟိဝၤယွၤန့ၣ် အိၣ်ဒီးတၢ်ဘျၢလၢအတီအလိၤ ဒီးအဝဲသ့ၣ် သးစၢၢ်ဆၢဝဲလၢ ကမၤတၢ်ဘၣ် အပၢ်လၢမူခိၣ်အသးလီၤ. ခီဖျိလၢအဝဲသ့ၣ် အဲၣ်ယဟိဝၤယွၤအဃိ တချုးလၢအဝဲသ့ၣ်မၤ တၢ်ဆၢတဲာ်ဒံးဘၣ်န့ၣ် ဆိကမိၣ်ထံဝဲ ကစၢ်ယွၤအတၢ်သိၣ်တၢ်သီ ထီဘိလီၤ. အဝဲသ့ၣ်ပာ်ဖျါထီၣ်ဝဲ အတၢ်သးတီလၢ ကျဲဒ်အံၤလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢ်ရဲၣ်တၢ်ကျဲၤလၢ အလီၤပလိာ်ဒီး လံာ်စီဆှံ
၃ ဖဲပထံၣ်ဘၣ် ကယဲၢ်တၢ်လၢ ယဟိဝၤယွၤတ့လီၤဝဲတဖၣ်အခါ ပသ့ၣ်ညါလၢ အမ့ၢ်ယွၤလၢ အရဲၣ်ကျဲၤတၢ်ဂ့ၤဂ့ၤဘၣ်ဘၣ်တဂၤလီၤ. ကစၢ်ယွၤ “ပာ်လီၤဟီၣ်ခိၣ်အခီၣ်ထံး လၢတၢ်ကူၣ်သ့, တ့လီၤမူခိၣ်လၢတၢ်ကူၣ်တၢ်ဆးလီၤ.” (ကတိၤဒိ ၃:၁၉) ယဟိဝၤယွၤ အတၢ်ဘၣ်တ့တဖၣ်န့ၣ် ပတသ့ၣ်ညါအဂ့ၢ်ခဲလၢာ်ဘၣ် လၢတၢ်န့ၣ်အဃိ လံာ်စီဆှံပာ်ဖျါထီၣ်ဝဲလၢ ပှၤနၢ်ဟူထဲအတၢ်ကတိၤ “ကသွံဒံ” ဖိလီၤ. (ယိၤဘး ၂၆:၁၄) ပသ့ၣ်ညါ ကစၢ်ယွၤအတၢ်ဘၣ်တ့ဘၣ်ဃး မူဟီၣ်ကယၢထဲတစဲးဖိသနာ်က့ ပသ့ၣ်ညါလၢ ကစၢ်ယွၤန့ၣ် အမ့ၢ်ယွၤလၢ အရဲၣ်ကျဲၤတၢ်ဂ့ၤဂ့ၤဘၣ်ဘၣ်တဂၤလီၤ. (စံးထီၣ်ပတြၢၤ ၈:၃, ၄) ပမ့ၢ်ကွၢ် ဆၣ်လၢအကကွဲၢ်တဖၣ်န့ၣ် လဲၤတရံးအသးလၢ အကျိၤအကျဲဂ့ၤဂ့ၤဘၣ်ဘၣ် ဒီးမူဖျၢၣ်တဖၣ် လဲၤတရံးဝဲမုၢ်ဘၣ်လီၢ်ဘၣ်စးလီၤ. မူဖျၢၣ်ဒီးဆၣ်တဖၣ်အံၤ လဲၤတရံးအသးဂ့ၤဂ့ၤဘၣ်ဘၣ် မ့ၢ်လၢယဟိဝၤယွၤ ရဲၣ်လီၤကျဲၤလီၤဝဲအဃိလီၤ. ဖဲပထံၣ်ဘၣ်လၢ ကစၢ်ယွၤတ့လီၤ မူခိၣ်ပှဲၤဝဲဒီး “တၢ်ကူၣ်သ့” အခါပအဲၣ်ဒိးစံးထီၣ်ပတြၢၤအီၤ, ဘူၣ်ထီၣ်ဘါထီၣ်အီၤဒီး တီဒီးအီၤလီၤ.—စံးထီၣ်ပတြၢၤ ၁၃၆:၁, ၅-၉.
လါဒံၣ်စ့ဘၢၣ် ၁၈-၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၂၈-၂၉
“နအိၣ်ဒီး မံၤဂ့ၤသၣ်ဂ့ၤ ဒ်စီၤယိၤဘးအသိးဧါ”
တၢး၀၂ ၅/၁၅ ၂၂ ¶၁၉
ပာ်ဖျါထီၣ် တၢ်အဲၣ် ဒီးတၢ်သးကညီၤ လၢပှၤလၢအလိၣ်ဘၣ် တၢ်မၤစၢၤတဖၣ် အဖီခိၣ်
၁၉ တၢ်ဂ့ၢ်တၢ်ကျိၤ လၢလံာ်စီဆှံပူၤ လၢပတဲသကိးတ့ၢ်အီၤတဖၣ်န့ၣ် ပာ်ဖျါထီၣ်ဝဲဒၣ်လၢ ပကဘၣ်ပာ်ဖျါထီၣ် တၢ်အဲၣ်ဒီးတၢ်သးကညီၤလၢ ပှၤလၢအလိၣ်ဘၣ်တၢ်မၤစၢၤတဖၣ် အဖီခိၣ်. စီၤအၤဘြၤဟၣ်န့ၣ် ဒ်သိးအစၢၤအသွဲၣ် ကအိၣ်အဂီၢ် အလိၣ်ဘၣ်ဝဲ စီၤဘသူၤအ့လး အတၢ်မၤစၢၤ. စီၤယၤကိာ်စ့ၢ်ကီး ဖဲအသံဝံၤအလီၢ်ခံ ဒ်သိးပှၤကက့ၤပာ်အီၤလၢ ကီၢ်ကနၤဧၣ်အဂီၢ် အလိၣ်ဘၣ်ဝဲ စီၤယိၤသး အတၢ်မၤစၢၤ. ဒီးမ့မ့ၢ် နီၢ်နၤဧမံန့ၣ် ဒ်သိး အစၢၤအသွဲၣ် ကအိၣ်ဒံးအဂီၢ် အလိၣ်ဘၣ်ဝဲ နီၢ်ရူၤသး အတၢ်မၤစၢၤ. စီၤအၤဘြၤဟၣ်, စီၤယၤကိာ် ဒီးနီၢ်နၤဧမံန့ၣ် မၤလၢပှဲၤဝဲ အတၢ်လိၣ်ဘၣ်တဖၣ်အံၤ လၢအနီၢ်ကစၢ်တသ့ဘၣ်. အဝဲသ့ၣ်လိၣ်ဘၣ် ပှၤဂၤအတၢ်မၤစၢၤ. ဒ်န့ၣ်အသိး လီၤဆီဒၣ်တၢ် လၢပစိၤခဲအံၤန့ၣ် ပကြၢးပာ်ဖျါထီၣ် တၢ်အဲၣ်ဒီးတၢ်သးကညီၤ လၢပှၤလၢအလိၣ်ဘၣ် တၢ်မၤစၢၤတဖၣ် အဖီခိၣ်. (ကတိၤ ၁၉:၁၇) ပကြၢးကွၢ်လိ စီၤယိၤဘး လၢအမၤစၢၤ “ပှၤဖှီၣ်ဖိယာ်ဖိ လၢအဃ့ တၢ်မၤစၢၤ ဒီးပှၤဖိၣ်ဃဲ ဒီးပှၤလၢ ပှၤမၤစၢၤအီၤ တအိၣ်ဘၣ်” ဒီး “ပှၤလၢအဘၣ်ကီဘၣ်ခဲ ဘူးလၢအကသံ.” တကးဒံးဘၣ် စီၤယိၤဘးန့ၣ် “မၤသးခု မုၣ်ကမဲ အသး” ဒီး ‘ကဲထီၣ် မဲာ်ချံလၢ ပှၤမဲာ်တထံၣ်တၢ်အဂီၢ် ဒီးကဲထီၣ်ခီၣ်လၢ ပှၤခီၣ်ဟးဂီၤ အဂီၢ်လီၤ.’—ဘး ၂၉:၁၂-၁၅.
it-1 ၆၅၅ ¶၁၀
တၢ်ကူတၢ်သိး
တၢ်ကူတၢ်သိးန့ၣ် ပှၤသူအီၤ ဒ်သိး ကဒိလီၤတၢ်တမံၤမံၤအဂီၢ်န့ၣ် အိၣ်ဝဲအါဘျီ. တဘျီတခီၣ် တၢ်ကူတၢ်သိးတနီၤန့ၣ် ပာ်ဖျါထီၣ်ဝဲလၢ ပှၤတဂၤ အိၣ်လၢတၢ်ကရၢကရိ ဖဲလဲၣ်တဖုလဲၣ် ဒီးအဆီၣ်ထွဲဝဲ တၢ်မနုၤလဲၣ်. အဃိ တဘျီတခီၣ် လံာ်စီဆှံသူဝဲ တၢ်ကူတၢ်သိး ဒ်တၢ်အဒိအသိးန့ၣ် မ့ၢ်ဒ်သိး အကပာ်ဖျါထီၣ်ဝဲလၢ ပှၤတဂၤ အမၤဝဲမနုၤလဲၣ် ဒီးအနာ်မနုၤလဲၣ်. ဘၣ်တဘျီ ယ့ၣ်ၡူးသူဝဲ တၢ်ဖျီအမူး အကူအသိး ဒ်သိး ကဟ့ၣ်တၢ်အဒိဒ်န့ၣ်အဂီၢ်. (မး ၂၂:၁၁, ၁၂) ဖဲ လီၣ်ဖျါ ၁၆:၁၄, ၁၅ န့ၣ်ယ့ၣ်ၡူး ဟ့ၣ်ပလီၢ်တၢ် ဘၣ်ဃးဒီး ပှၤလၢအမံခ့မံသပ့ၤလၢ နီၢ်သးတကပၤန့ၣ် တၢ်ကဘ့ၣ်လီၤကွံာ် အတၢ်ကူတၢ်သိး. ဒီးတၢ်ကူတၢ်သိးအံၤန့ၣ် ကဲတၢ်ပနီၣ်လၢ အပာ်ဖျါထီၣ်ဝဲ ပှၤတဂၤမ့ၢ် ယွၤလၢအမ့ၢ်အတီတဂၤ အခ့အပှၤ. ပှၤလၢအတမၤထွဲ တၢ်ဟ့ၣ်ပလီၢ်အံၤဘၣ်န့ၣ် ကတုၤလၢ တၢ်ဟးဂီၤဖဲ “သ့တၢ်လၢာ်ကစၢ်ယွၤ အမုၢ်နံၤဖးဒိၣ်” ဘၣ်ဝဲအခါ.—လီၣ် ၁၆:၁၄, ၁၅.
တၢး၀၉ ၂/၁ ၁၅ ¶၃-၄
နမံၤဟူသၣ်ဟူဒ်လဲၣ်
ဖဲပအိၣ်ဖျဲၣ်ထီၣ်အခါ ပှၤကကိးန့ၢ်ပမံၤ ဒ်လဲၣ်န့ၣ် ပတဲတသ့ နီတမံၤဘၣ်. သနာ်က့ ပအဲၣ်ဒိးလၢ ပမံၤကဟူသၣ်ကဟူ ဒ်လဲၣ်န့ၣ် ပနီၢ်ကစၢ် မၤဝဲသ့. (ကတိၤ ၂၀:၁၁) သံကွၢ်လီၤနသးလၢ ‘ယ့ၣ်ၡူး ဒီးတၢ်မၢဖိတဖၣ် မ့ၢ်အိၣ်ဒီး တၢ်ခွဲးတၢ်ယာ်လၢ ကကိးန့ၢ်ယမံၤန့ၣ် ကကိးဝဲဒ်လဲၣ်. ဒီးယကြၢးဒီးမံၤဒ်လဲၣ်.’
ပကဘၣ်သံကွၢ်လီၤပသး ဒ်န့ၣ်န့ၣ် မ့ၢ်တၢ်လၢအရ့ဒိၣ်ဒိၣ်မး. စီၤပၤၡလိၤမိၤ လၢအအိၣ်ဒီးတၢ်ကူၣ်သ့န့ၣ် ကွဲးဝဲလၢ “တၢ်မံၤဂ့ၤသၣ်ဂ့ၤန့ၣ် ဂ့ၤဒိၣ်န့ၢ်ဒံး တၢ်ထူးတၢ်တီၤအါအါ.” (ကတိၤ ၂၂:၁) ပမ့ၢ်အိၣ်ဒီး တၢ်မံၤဂ့ၤသၣ်ဂ့ၤန့ၣ် လီၤဂာ်ဒ် ပဒိးန့ၢ်ဘၣ်ဝဲ တၢ်လုၢ်ဒိၣ်ပှ့ၤဒိၣ်. ဒီးပမ့ၢ်အိၣ်ဒီး တၢ်မံၤဂ့ၤသၣ်ဂ့ၤ လၢကစၢ်ယွၤ အမဲာ်ညါန့ၣ် ပကဒိးန့ၢ်ဘၣ် တၢ်လုၢ်ဒိၣ်ပှ့ၤဒိၣ် လၢအကအိၣ်ဝဲ လီၤထူလီၤယိာ်. မ့ၢ်လၢ ကစၢ်ယွၤ အၢၣ်လီၤဝဲလၢ အကကွဲးလီၤဝဲ ပှၤလၢအပျံၤအီၤတဖၣ် အမံၤလၢ “လံာ်တၢ်သ့ၣ်နီၣ်ထီၣ်က့ၤ” အပူၤ ဒီးအဟ့ၣ်အဝဲသ့ၣ်လၢ တၢ်မုၢ်လၢ်လၢ ကအိၣ်မူဘၣ် လီၤထူလီၤယိာ်.—မၤ ၃:၁၆; လီၣ် ၃:၅; ၂၀:၁၂-၁၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
g၀၀ ၇/၈ ၁၁ ¶၃
တၢ်နံၤကမှံန့ၣ် ဂ့ၤလၢနဂီၢ်
တၢ်နံၤကမှံန့ၣ် ကဲဘျုးဝဲ သပှၢ်တၢၢ်ဧါ. ခီဖျိလၢ ပှၤတဂၤဂၤ နံၤကမှံပၠးနၤအဃိ နသးခုထီၣ် မ့တမ့ၢ် နသးဖှံထီၣ်က့ၤန့ၣ် အိၣ်တဘျီဘျီဧါ. မ့တမ့ၢ်ဘၣ်န့ၣ် ခီဖျိလၢ ပှၤတနံၤပၠးနၤအဃိ နဘၣ်ယိၣ်တၢ် မ့တမ့ၢ် နတူၢ်ဘၣ်လၢ ပှၤတဘၣ်သူၣ်ဘၣ်သးနၤန့ၣ် အိၣ်တဘျီဘျီဧါ. တၢ်နံၤကမှံန့ၣ် ကဲဘျုးဝဲသ့. ကဲဘျုးဝဲလၢ ပှၤလၢအနံၤတဂၤ ဒီးပှၤလၢအဘၣ်တၢ်နံၤပၠးအီၤတဂၤ အဂီၢ်စ့ၢ်ကီး. ပှၤကွဲးလံာ်စီဆှံ စီၤယိၤဘး တဲဝဲလၢ “ဖဲယနံၤပၠးအဝဲသ့ၣ်အခါ တလီၤနာ်ဘၣ် အဝဲသ့ၣ်ဘၣ်. ဖဲအဝဲသ့ၣ် ထံၣ်ဘၣ် ယတၢ်မဲာ်မုာ်နါဆၢအခါ အဝဲသ့ၣ် အသးမုာ်ထီၣ်ဝဲလီၤ.” (ဘး ၂၉:၂၄) စီၤယိၤဘးအ “တၢ်မဲာ်မုာ်နါဆၢ” န့ၣ်ပာ်ဖျါထီၣ်ဝဲလၢ အဝဲအသးခုဝဲ သပှၢ်တၢၢ်.
လါဒံၣ်စ့ဘၢၣ် ၂၅-၃၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၃၀-၃၁
“စီၤယိၤဘး ဆဲးပၢၤဃာ် အတၢ်သကဲာ်ပဝး လၢအကဆှီ”
တၢး၁၀ ၄/၁၅ ၂၁ ¶၈
တဘၣ်ကွၢ် တၢ်လၢအတကဲဘျုးဘၣ်တဖၣ် တဂ့ၤ
၈ မဲာ်ချံ အတၢ်သူၣ်လီသးကွံ ဒီးဖံးညၣ် အတၢ်သူၣ်လီသးကွံန့ၣ် အမၤဘၣ်ဒိဝဲ ခရံာ်ဖိတဖၣ် သ့ဝဲစ့ၢ်ကီး. အဃိ ဘၣ်ဃးဒီး တၢ်လၢပကွၢ်အီၤ ဒီးတၢ်လၢပသူၣ်လီသးကွံအီၤန့ၣ် လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကအိၣ်ဒီး တၢ်ကီၤသူၣ်ကီၤသး. (၁ ကရံၣ် ၉:၂၅, ၂၇; ဖး ၁ ယိၤ ၂:၁၅-၁၇.) ပှၤတီပှၤလိၤ စီၤယိၤဘး သ့ၣ်ညါဝဲလၢ တၢ်လၢပှၤကွၢ်အီၤတဖၣ်န့ၣ် ဒုးအိၣ်ထီၣ် တၢ်သူၣ်လီသးကွံလၢ အတဂ့ၤဘၣ်သ့ဝဲ. အဝဲတဲဝဲလၢ “ယမၤတၢ်အၢၣ်လီၤအီလီၤ ဒီးယမဲာ်ချံဝံၤလံ. အဃိ ယကွၢ်မုၣ်ကနီၤလၢ တၢ်သးကတၢအပူၤ ကသ့ဒ်လဲၣ်.” (ဘး ၃၁:၁) စီၤယိၤဘး တမၤဘူးဝဲ ပှၤပိာ်မုၣ်အဂၤလၢ တၢ်သးကတၢအပူၤဘၣ် တကးဒံးဘၣ် လၢအသးပူၤနာ်က့ တဆိကမိၣ်ဝဲဒ်န့ၣ်ဘၣ်. ယ့ၣ်ၡူးတဲဝဲလၢ “ပှၤတဂၤဂၤလၢ အဆဲးကွၢ်ပိာ်မုၣ်လၢ တၢ်သးကတၢအပူၤန့ၣ် အဲၣ်ဘၢတၢ်ဒီးအီၤလၢ အသးပူၤလံ.” (မး ၅:၂၈) ယ့ၣ်ၡူးအဲၣ်ဒိးတဲဝဲလၢ လၢပသးပူၤဒၣ်လဲာ် ပတၢ်ဆိကမိၣ်န့ၣ် ကဘၣ်ကဆှီဝဲ ဒီးဟးဆှဲး တၢ်ဆိကမိၣ်လၢ အလီၤရၢၢ်လီၤစၢၢ်.
တၢး၀၈ ၉/၁ ၁၁ ¶၄
ဆိကမိၣ်ထံ တၢ်ကကဲထီၣ်အသးဒီးနၤ “ခါဆူညါ”
တချုးလၢ နခါထီၣ်နခီၣ်လၢ ကျဲတဘိန့ၣ်ဒံးဘၣ်အခါ သံကွၢ်လီၤနသးလၢ ‘ကျဲတဘိအံၤ ကဆှၢယၤဖဲလဲၣ်.’ နမ့ၢ်အိၣ်ပတုာ် ဒီးဆိကမိၣ်ထံ တၢ်လၢကကဲထီၣ်အသးဒီးနၤ ခါဆူညါန့ၣ် ကမၤစၢၤနၤဒ်သိး နတထံၣ်ဘၣ် တၢ်ကီတၢ်ခဲဖးဒိၣ် လၢအကဟဲကဲထီၣ်အသး တဂ့ၤအဂီၢ်. ပှၤအါဂၤလၢ အတဒိကနၣ်ဝဲ တၢ်ဟ့ၣ်ပလီၢ်အံၤဘၣ်န့ၣ် အတူၢ်ဘၣ်ဝဲ တၢ်ဆါအ့း (AIDS) ဒီးတၢ်ဆူးတၢ်ဆါလၢ အဘၣ်ကူဘၣ်ဂာ် ခီဖျိလၢ တၢ်မံဃုာ်အဃိ, ဒီးအိၣ်ထီၣ်ဒီး ဟုးသးလၢ တလီကီဝဲဘၣ်, အမၤလီၤတဲာ်အဖိ, အတၢ်ရ့လိာ်သးဒီးပှၤဂၤဟးဂီၤ ဒီးအသးလၢအသ့ၣ်ညါဒၣ်တၢ် တကဆှီလၢၤစ့ၢ်ကီးဘၣ်. ပှၤလၢအမၤဝဲ လုၢ်လၢ်သကဲာ်ပဝး လၢအတကဆှီတဖၣ် အကျဲကကတၢၢ်ဝဲ ဒ်လဲၣ်န့ၣ် တၢ်မၢဖိပီလူး ပာ်ဖျါထီၣ်ဝဲ. အဝဲတဲဝဲလၢ ပှၤသ့ၣ်တဖၣ်န့ၣ် “တန့ၢ်သါဘၣ် ကစၢ်ယွၤအဘီအမုၢ်ဘၣ်.”—၁ ကရံၣ် ၆:၉, ၁၀.
တၢး၁၀ ၁၁/၁၅ ၅-၆ ¶၁၅-၁၆
သးစၢ်သ့ၣ်ဧၢ ဒိကနၣ် ကစၢ်ယွၤ အကလုၢ်ကထါ အတၢ်ဟံးစုနဲၣ်ကျဲ
၁၅ နဆိကမိၣ် နတၢ်သးတီန့ၣ် ကဘၣ်တၢ်မၤကွၢ်အီၤ နးဒိၣ်ကတၢၢ် ဖဲလဲၣ်အဆၢကတီၢ်လဲၣ်. ဖဲနအိၣ်တဂၤအခါဧါ, မ့တမ့ၢ် ဖဲနအိၣ်ဒီးပှၤဂၤအခါဧါ. ဖဲနအိၣ်လၢကၠိ မ့တမ့ၢ် လၢတၢ်မၤလီၢ်အခါ နကပလီၢ်နသး ဘၣ်ဃးဒီး တၢ်လၢအကမၤဘၣ်ဒိ နတၢ်ရ့လိာ်သးဒီး ယဟိဝၤယွၤ ဒီးနကပလီၢ်နသး ဒိၣ်မး. သနာ်က့ ဖဲနအိၣ်ထဲတဂၤ ဒီးနတပလီၢ်နသးဘၣ်အခါ နကထံၣ်ဘၣ် တၢ်မၤကွၢ်လၢ ဘၣ်ဃးဒီး တၢ်သကဲာ်ပဝး နးဒိၣ်တစဲး.
၁၆ ဖဲပအိၣ်တဂၤအခါ ပကြၢးဒိကနၣ် ယဟိဝၤယွၤ အကလုၢ်. ဘၣ်မနုၤအဃိလဲၣ်. မ့ၢ်လၢတၢ်လၢပမၤအီၤတဖၣ်န့ၣ် အမၤဘၣ်ဒိ ယဟိဝၤယွၤအသး မ့တမ့ၢ် အမၤသးခု ယဟိဝၤယွၤအသး သ့အဃိ. (၁ မိၤ ၆:၅, ၆; ကတိၤ ၂၇:၁၁) “ကစၢ်ယွၤ သးအိၣ်ပှၤ” ဒိၣ်မးအဃိ ပတၢ်မၤတဖၣ်န့ၣ် မၤသးခုအီၤ မ့တမ့ၢ် မၤဘၣ်ဒိအသးသ့. (၁ ပ့း ၅:၇) အဝဲအဲၣ်ဒိးလၢ ပကဒိကနၣ် အကလုၢ် ဒ်သိး ပကဒိးန့ၢ်ဘၣ်အဘျုးအဂီၢ်. (ၡါ ၄၈:၁၇, ၁၈) ဖဲပှၤအံၣ်စရ့လးဖိတဂၤဂၤ တဒိကနၣ် ယဟိဝၤယွၤ အကလုၢ်အခါ ယဟိဝၤယွၤ အသးဘၣ်ဒိဝဲဒိၣ်မး. (စံး ၇၈:၄၀, ၄၁) ယဟိဝၤယွၤန့ၣ် အဲၣ်ဝဲဝံဒၤနံးယ့လးဒိၣ်မး အဃိ အဝဲကိးဝဲ ဝံဒၤနံးယ့လးလၢ “ပှၤလၢ အလုၢ်ဒိၣ်ပှ့ၤဒိၣ်ဒိၣ်မး.” (ဒၤ ၁၀:၁၁) စီၤဒၤနံးယ့လးန့ၣ် ဖဲပှၤထံၣ်အခါမ့ၢ်ဂ့ၤ တထံၣ်အခါဘၣ်မ့ၢ်ဂ့ၤ အတီဒီး ယဟိဝၤယွၤ အဃိ ယဟိဝၤယွၤ ပာ်လုၢ်ပာ်ပှ့ၤအီၤဒိၣ်မး.—ဖး ဒၤနံးယ့လး ၆:၁၀.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၅ ၁၁/၁၅ ၁၁ ¶၃
ဒိကနၣ်န့ၢ်ပှၤဂၤ လၢတၢ်အဲၣ်တၢ်ကွံအပူၤ
စီၤယိၤဘး အသကိးတဖၣ် နၢ်ဟူဘၣ်ဝဲ စီၤယိၤဘး အတၢ်ကတိၤ အါန့ၢ်ဒံး အထံၣ်တဆံဒံး. သနာ်က့ စီၤယိၤဘး တဲဝဲလၢ “ပှၤဒိကနၣ်ယၤ မ့ၢ်အိၣ်န့ၣ် ကဂ့ၤဝဲလီၤ.” (ဘး ၃၁:၃၅) ဘၣ်မနုၤအဃိလဲၣ်. စီၤယိၤဘး အသကိးတဖၣ် အတၢ်ဒိကနၣ်အီၤန့ၣ် တမၤမုာ်အသးဘၣ်. အဝဲသ့ၣ် တကနၣ် စီၤယိၤဘးဘၣ် ဒီးတအဲၣ်ဒိးသ့ၣ်ညါဝဲ စီၤယိၤဘး အတၢ်တူၢ်ဘၣ်စ့ၢ်ကီးဘၣ်. အဝဲသ့ၣ် တဒိသူၣ်ဒိသး ဒီးဒိကနၣ် တၢ်လၢစီၤယိၤဘး တဲဝဲဘၣ်. တၢ်မၢဖိ ပ့းတရူး ဟ့ၣ်ဂံၢ်ဟ့ၣ်ဘါဝဲလၢ “သုဝဲခဲလၢာ် ဘၣ်အိၣ်ဒီးတၢ်သးတဖျၢၣ်ဃီ, တၢ်ဒိသူၣ်ဒိသး, ဒီပုၢ်ဝဲၢ်တၢ်အဲၣ်, တၢ်သးကညီၤ ဒီးတၢ်ဆီၣ်လီၤသးလီၤ.” (၁ ပ့း ၃:၈) ပပာ်ဖျါထီၣ်လၢ ပနၢ်ပၢၢ်စၢၤ ပှၤဂၤအတၢ်တူၢ်ဘၣ်သ့ခီဖျိ ပပာ်ဖျါထီၣ်လၢ ပအဲၣ်ဒိး နၢ်ပၢၢ်အဝဲသ့ၣ် အတၢ်တူၢ်ဘၣ် ဒီးဂုာ်ကျဲးစၢး နၢ်ပၢၢ်စၢၤအဝဲသ့ၣ်. ဒီးပတဲအဝဲသ့ၣ် ဒ်အံၤသ့. “နသးကဘၣ်ဒိ ဖးဒိၣ်ညါ” မ့တမ့ၢ် “နကတူၢ်ဘၣ်လၢ ပှၤနၢ်ပၢၢ် ကမၣ်နၤနီၤ.” ဒီးအဂၤတခါန့ၣ် ပပာ်ဖျါထီၣ်လၢ ပနၢ်ပၢၢ် တၢ်လၢအဝဲသ့ၣ်တဲဝဲသ့ ခီဖျိ ပတဲက့ၤ တၢ်ကတိၤလၢ အဝဲသ့ၣ်တဲဝဲ. ပဒိကနၣ် ပှၤဂၤလၢ တၢ်အဲၣ်တၢ်ကွံအပူၤန့ၣ် အဲၣ်ဒိးတဲဝဲ ပဒိကနၣ် တၢ်လၢအဝဲသ့ၣ်တဲဝဲထံထံ တကးဒံးဘၣ် ပဂုာ်ကျဲးစၢး ဒ်သိး ပကနၢ်ပၢၢ် အဝဲသ့ၣ် အတၢ်တူၢ်ဘၣ်.
ဘၣ်ဃးဒီး မုၣ်သကိးမုၣ် ခွါသကိးခွါ အဲၣ်လိာ်အသးန့ၣ် လံာ်စီဆှံ တဲဝဲဒ်လဲၣ်
ပှၤတၢ်ဆဲးတၢ်လၤတခါဒီးတခါ ဒီးပှၤတစိၤဒီးတစိၤန့ၣ် အတၢ်ထံၣ်ဘၣ်ဃးဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်မံဃုာ်န့ၣ် လီၤဆီဝဲလီၤ. ဘၣ်ဆၣ် ခရံာ်ဖိလၢ အမ့ၢ်အတီတဖၣ် တနာ်မူသူ ဒီးတနာ်ကြီတၢ် ဒ်ပှၤအါဂၤအသိးဘၣ် ဒီးအဝဲသ့ၣ်တ “ဘၣ်တၢ်ဆှၢကဒံ ဆှၢကဒါအီၤ ခီဖျိလၢ တၢ်သိၣ်လိ အကလုာ်ကလုာ် လၢအလီၤဂာ်ဒ် ကလံၤအသိး” ဘၣ်. (အ့းဖ့းစူး ၄:၁၄) အဃိ ဘၣ်ဃးဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်မံဃုာ်မ့ၢ်ဂ့ၤ, လုၢ်လၢ်သကဲာ်ပဝးလၢ အဂၤတဖၣ်မ့ၢ်ဂ့ၤ ခရံာ်ဖိလၢ အမ့ၢ်အတီတဖၣ် အတၢ်ထံၣ်န့ၣ် ဒိးသန့ၤထီၣ်အသးလၢ လံာ်စီဆှံအတၢ်သိၣ်တၢ်သီ အဖီခိၣ်လီၤ.
ဘၣ်ဃးဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်မံဃုာ်န့ၣ် လံာ်စီဆှံအတၢ်သိၣ်တၢ်သီ ပာ်ဖျါန့ၢ်ပှၤ ၡဲၡဲဖိလီၤ. လံာ်စီဆှံ တဲဝဲလၢ—
“နတဘၣ် မံဃုာ်ဒီး ပှၤပိာ်ခွါ ဒ်နမံဃုာ်ဒီး ပှၤပိာ်မုၣ် အသိးန့ၣ်တဂ့ၤ.”—၃ မိၤၡ့ ၁၈:၂၂.
“ကစၢ်ယွၤဟ့ၣ် အဝဲသ့ၣ်အခွဲးလၢ ကမၤဝဲဒ် အဝဲသ့ၣ် အတၢ်သူၣ်လီသးကွံ . . . ဟ့ၣ်အခွဲးလၢ အဝဲသ့ၣ် အတၢ်သးကတၢလၢ အလီၤမဲာ်ဆှးန့ၣ် ကဒိၣ်စိလၢ အဝဲသ့ၣ်အဖီခိၣ်လီၤ. ဒီးပိာ်မုၣ်လၢ အဝဲသ့ၣ်အကျါန့ၣ် တအိၣ်မူဝဲဒ် ပိာ်မုၣ်အန့ဆၢၣ် အိၣ်ဝဲအသိးလၢၤဘၣ်.”—ရိမ့ၤ ၁:၂၄, ၂၆.
“တဘၣ်လံၣ်န့ၢ်လီန့ၢ်လီၤ သုနီၢ်ကစၢ်အသးတဂ့ၤ. ပှၤလၢ အမၤကမၣ်မုၣ်ကမၣ်ခွါ မ့ၢ်ဂ့ၤ, ပှၤဘါတၢ်ဂီၤတၢ်ဖှီၣ်မ့ၢ်ဂ့ၤ, ပှၤအဲၣ်ဘၢမါ အဲၣ်ဘၢဝၤမ့ၢ်ဂ့ၤ, ပိာ်ခွါလၢ အဟ့ၣ်အခွဲးလၢ ပိာ်ခွါကဒဲကဒဲ ကမၤအီၤလၢ လုၢ်လၢ်လၢ အထီဒါလိာ်သးဒီး န့ဆၢၣ်မ့ၢ်ဂ့ၤ, ပိာ်ခွါလၢအမံဃုာ်ဒီး ပိာ်ခွါကဒဲကဒဲမ့ၢ်ဂ့ၤ, ပှၤလၢ အဟုၣ်တၢ်မ့ၢ်ဂ့ၤ, ပှၤလၢ အသးကွံတၢ်မ့ၢ်ဂ့ၤ, ပှၤလၢ အအီမူၤသံးမ့ၢ်ဂ့ၤ, ပှၤလၢ အဒုၣ်ဒွဲၣ်စံးအၢပှၤဂၤမ့ၢ်ဂ့ၤ, ပှၤလၢ အဟံးန့ၢ်ဆူၣ် ပှၤဂၤအတၢ်မ့ၢ်ဂ့ၤ တန့ၢ်သါဘၣ် ကစၢ်ယွၤအဘီအမုၢ်ဘၣ်.”—၁ ကရံၣ်သူး ၆:၉, ၁၀.
ပိာ်ခွါလၢအအဲၣ်ဒိးအဲၣ်ပိာ်ခွါမ့ၢ်ဂ့ၤ ပိာ်ခွါလၢအအဲၣ်ဒိးအဲၣ်ပိာ်မုၣ်မ့ၢ်ဂ့ၤ ပဝဲကိးဂၤဒဲး ပကဘၣ်မၤထွဲကစၢ်ယွၤအတၢ်သိၣ်တၢ်သီ. ဒ်လဲၣ်ဂ့ၤဒ်လဲၣ်ဂ့ၤ လုၢ်လၢ်သကဲာ်ပဝး လၢကစၢ်ယွၤ တဘၣ်သူၣ်ဘၣ်သးတဖၣ် မ့ၢ်အိၣ်ထီၣ်လၢ ပသးပူၤန့ၣ် အရ့ဒိၣ်လၢ ပကဘၣ်ပၢၤ ပသးလီၤ.—ကလီးစဲ ၃:၅.
မ့ၢ်လံာ်စီဆှံအဲၣ်ဒိးတဲဝဲ ပကဘၣ်သးဟ့ ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါလၢ အအဲၣ်လိာ်အသးတဖၣ်ဧါ.
တမ့ၢ်ဒ်န့ၣ်ဘၣ်. လံာ်စီဆှံတအဲၣ်ဒိးလၢ ပကသးဟ့ ပှၤနီတဂၤဘၣ် အဃိ ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါလၢ အအဲၣ်လိာ်သးမ့ၢ်ဂ့ၤ ပှၤအဂၤတဖၣ်မ့ၢ်ဂ့ၤ ပတဘၣ်သးဟ့အဝဲသ့ၣ်ဘၣ်. ဒီးလံာ်စီဆှံတဲပှၤလၢ ပှၤတဂၤအမ့မ့ၢ် ပှၤဒ်လဲၣ်ဂ့ၤဒ်လဲၣ်ဂ့ၤ ပကဘၣ် “ဂုာ်ကျဲးစၢး အိၣ်ဃူအိၣ်ဖိးဒီး ပှၤခဲလၢာ်.” (ဧ့ၤဘြံၤ ၁၂:၁၄) အဃိ ပတဘၣ်ရ့ဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါလၢ အအဲၣ်လိာ်အသးတဖၣ် အၢအၢသီသီဘၣ်, ပတဘၣ်မၤနၢၤအီၣ် အဝဲသ့ၣ်ဘၣ် ဒီးပတဘၣ်သးဟ့ အဝဲသ့ၣ်ဘၣ်.
ပဒိၣ်အတၢ်သိၣ်တၢ်သီမ့ၢ်အိၣ်လၢ အတူၢ်လိာ် ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်ဒိးတ့ဒိးဖျီန့ၣ် ခရံာ်ဖိလၢ အမ့ၢ်အတီတဖၣ် ကြၢးထီဒါဝဲဧါ.
လံာ်စီဆှံပာ်ဖျါထီၣ်န့ၢ်ပှၤလၢ ကစၢ်ယွၤအတၢ်သိၣ်တၢ်သီ အိၣ်ထဲဒၣ်လၢ ပိာ်မုၣ်တဂၤ ဒီးပိာ်ခွါတဂၤ ဒိးတ့ဒိးဖျီအသးသ့. (မးသဲ ၁၉:၄-၆) ဒီးမ့ၢ်လၢ ပဒိၣ်ထုးထီၣ်တၢ်သိၣ်တၢ်သီလၢ ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါလၢ အဒိးတ့ဒိးဖျီအသးသ့ အဃိတၢ်ဂ့ၢ်အံၤန့ၣ် အဘၣ်ထွဲလိာ်သးဒီး ထံဂ့ၢ်ကီၢ်ဂ့ၢ်. လံာ်စီဆှံတဲဝဲလၢ ခရံာ်ဖိလၢအမ့ၢ်အတီတဖၣ်န့ၣ် တဘၣ်မၤဘၣ်ထွဲလိာ်အသးဒီး ထံဂ့ၢ်ကီၢ်ဂ့ၢ်ဘၣ်. (ယိၤဟၣ် ၁၈:၃၆) အဃိ ပဒိၣ်တၢ်သိၣ်တၢ်သီလၢ အဘၣ်ဃးဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်ဒိးတ့ဒိးဖျီမ့ၢ်ဂ့ၤ ဒီးပှၤလၢအိၣ်ဒီးလုၢ်လၢ်သကဲာ်ပဝးဒ်န့ၣ်တဖၣ်မ့ၢ်ဂ့ၤ ခရံာ်ဖိလၢအမ့ၢ်အတီတဖၣ် တဆီၣ်ထွဲဝဲ တၢ်သိၣ်တၢ်သီအံၤဘၣ် ဒီးတထီဒါဝဲစ့ၢ်ကီးဘၣ်.
ပှၤတဂၤလၢအအဲၣ် ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါန့ၣ် မ့ၢ်အဆီတလဲ ဒီးပာ်တ့ၢ်ကွံာ် အလုၢ်အလၢ်အံၤကန့ၢ်ဒံးဧါ.
န့ၢ်ဝဲ. ဒီးပှၤတနီၤလၢ တၢ်မၢဖိအစိၤန့ၣ် ဆီတလဲဒီး ပာ်တ့ၢ်ကွံာ်လုၢ်လၢ်ဒ်အံၤအိၣ်ဝဲ. လံာ်စီဆှံပာ်ဖျါထီၣ် ပှၤလၢအမံဃုာ်ဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါတဖၣ်န့ၣ် တန့ၢ်သါဘၣ် ကစၢ်ယွၤအဘီအမုၢ်ဘၣ်. ဝံၤအလီၢ်ခံ ဆဲးတဲဝဲလၢ “သုဝဲတနီၤနီၤန့ၣ် သုမ့ၢ်တ့ၢ်ပှၤဒ်န့ၣ်.”—၁ ကရံၣ်သူး ၆:၁၁.
ပှၤလၢအပတုာ်ကွံာ် အလုၢ်လၢ်လၢ အမံဃုာ်ဒီး ပိာ်မုၣ်သကီးပိာ်မုၣ်မ့ၢ်ဂ့ၤ ပိာ်ခွါသကီးပိာ်ခွါမ့ၢ်ဂ့ၤ မ့ၢ်အတၢ်တူၢ်ဘၣ်တခါအံၤ အိၣ်ထီၣ်က့ၤတသ့လၢၤဘၣ်ဧါ. တမ့ၢ်ဒ်န့ၣ်ဘၣ်. လံာ်စီဆှံတဲဝဲလၢ “ဒုးအိၣ်ထီၣ် လုၢ်လၢ်သကဲာ်ပဝးအသီလၢ ကစၢ်ယွၤ ဟ့ၣ်လီၤဝဲတက့ၢ်. ခီဖျိ တၢ်သ့ၣ်ညါ လီၤတံၢ်လီၤဆဲးအဃိ ပလုၢ်လၢ်သကဲာ်ပဝး ဘၣ်တၢ်ဆီတလဲအီၤထီဘိ ဒီးကဲထီၣ်တၢ်အသီ.” (ကလီးစဲ ၃:၁၀) အဃိ ပကဘၣ်ဆဲးတြီဆၢပတၢ်တူၢ်ဘၣ်လၢ အတဂ့ၤသ့ၣ်တဖၣ်ထီဘိ.
ပှၤတဂၤဂၤလၢ အအဲၣ်ဒိးမၤထွဲ ကစၢ်ယွၤအတၢ်သိၣ်တၢ်သီ ဘၣ်ဆၣ် မ့ၢ်အိၣ်ဒီးသးလၢ အဲၣ်ဒိးအဲၣ် ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါဒံးန့ၣ် အကဘၣ်မၤဒ်လဲၣ်.
ပှၤလၢအဲၣ်ဒိးအဲၣ် ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါဒံးန့ၣ် အဃုထၢဝဲလၢ အတြီဆၢကွံာ် အတၢ်တူၢ်ဘၣ်အံၤသ့. ဘၣ်ဆၣ် အတြီဆၢကွံာ်ဝဲ ကသ့ဒ်လဲၣ်. လံာ်စီဆှံတဲဝဲလၢ “လဲၤတၢ်ဒ်သးစီဆှံ အတၢ်ဟံးစုနဲၣ်ကျဲအသိးတက့ၢ်. သုမ့ၢ်မၤဒ်န့ၣ်န့ၣ် တမ့ၢ်လၢသုကမၤထွဲ တၢ်ဖံးတၢ်ညၣ် အတၢ်သူၣ်လီသးကွံ နီတမံၤလၢၤဘၣ်.”—ကလၤတံ ၅:၁၆.
လံာ်စီဆှံတဆၢန့ၣ် တဲဝဲလၢ ပှၤတဂၤ အတၢ်ဖံးတၢ်ညၣ် အတၢ်သူၣ်လီသးကွံ တအိၣ်လၢၤဘၣ်န့ၣ် တမ့ၢ်ဘၣ်. ဘၣ်ဆၣ် အမ့ၢ်မၤလိာ်လံာ်စီဆှံထီဘိ ဒီးဃ့ထုကဖၣ်လၢ ကစၢ်ယွၤအိၣ်ထီဘိန့ၣ် အတြီဆၢကွံာ် အတၢ်သူၣ်လီသးကွံလၢ အတဂ့ၤသ့ၣ်တဖၣ် န့ၢ်ဝဲ.
ဒ့ဘ့းလၢ ပပာ်ဖျါထီၣ်အဂ့ၢ်လၢ အဖီခိၣ်န့ၣ် ဖဲအတဲဘၣ်အမိၢ်အပၢ် အတၢ်ကီတၢ်ခဲဝံၤအခါ ကဲထီၣ်တၢ်မၤစၢၤလၢအဂီၢ်ဒိၣ်မး. ဒီးအတဲဝဲလၢ “လီၤဂာ်ဒ်သိး ယတၢ်ဝံတၢ်ယိးတခါအံၤန့ၣ် ဖှံလီၤဝဲဖးဒိၣ်ညါ. ဘၣ်ဆၣ် ယမ့ၢ်တဲဘၣ် ယမိၢ်ယပၢ် ယတၢ်ကီတၢ်ခဲအံၤ လၢအခီၣ်ထံးခါန့ၣ် ယတၢ်ဝံတၢ်ယိးအံၤ ကဖှံလီၤဝဲ ဖးယံာ်လံ.”
ပမ့ၢ်မၤထွဲ ယဟိဝၤယွၤ အတၢ်သိၣ်တၢ်သီန့ၣ် ပကသးခုဒိၣ်မး. ဒီးပနာ်သပှၢ်ကတၢၢ်လၢ အတၢ်သိၣ်တၢ်သီန့ၣ် “တီဝဲလိၤဝဲ ဒီးမၤသးခုပသး . . . ဒီးပှၤလၢအမၤထွဲဝဲန့ၣ် ဒိးန့ၢ်ဘၣ်အဘျုး အါမးလီၤ.”—စံးထီၣ်ပတြၢၤ ၁၉:၈, ၁၁.