မ့ၢ်ဟီၣ်ခိၣ်တဖျၢၣ်အံၤ ကဟးဂီၤကွံာ်ဧါ

တၢ်မနုၤ တဟးဂီၤကွံာ်ဘၣ်လဲၣ်

ပှၤဟီၣ်ခိၣ်ဖိ

လံာ်စီဆှံ တဲဝဲလၢ– ကစၢ်ယွၤ “တ့လီၤ [ဟီၣ်ခိၣ်] . . . တမ့ၢ်ဘၣ်ဒ်သိး အကအိၣ်ကလီဒီး တ့လီၤဝဲဘၣ်. မ့ၢ်ဒ်သိးအကအိၣ်ဒီး ပှၤအိၣ်ဝဲဆိးဝဲ လၢအဖီခိၣ်လီၤ.” —ယၡါယၤ ၄၅:၁၈.

ဟီၣ်ခိၣ်ဖျၢၣ်တဖျၢၣ်အံၤ

လံာ်စီဆှံ တဲဝဲလၢ– “ပှၤတစိၤလဲၤဝဲဒီး ပှၤတစိၤဟဲဝဲလီၤ. မ့မ့ၢ်ဟီၣ်ခိၣ်​ အိၣ်ဝဲဆိးဝဲ လီၤထူလီၤယိာ်လီၤ.” —စံၣ်တဲၤတဲလီၤတၢ် ၁:၄.

အဲၣ်ဒိးတဲဝဲ– လံာ်စီဆှံ ပာ်ဖျါထီၣ်ဝဲလၢ ဟီၣ်ခိၣ်ဖျၢၣ်တဖျၢၣ်အံၤန့ၣ်​ ပှၤမၤဟးဂီၤအီၤ တန့ၢ်နီတဘျီဘၣ်​ ဒီးပှၤကအိၣ်လၢအပူၤ ထီဘိလီၤ. မ့မ့ၢ်ဒ်န့ၣ်န့ၣ်​ ဟီၣ်ခိၣ်​ ကဟးဂီၤကွံာ်ဝဲန့ၣ်​ အဲၣ်ဒိးတဲဝဲ မနုၤလဲၣ်.

ဆိကမိၣ်ကွၢ်– ဘၣ်ဃးဒီး ဟီၣ်ခိၣ်ကဟးဂီၤကွံာ် အဂ့ၢ်န့ၣ်​ လံာ်စီဆှံ ထိၣ်သတြီၤဝဲဒီး တၢ်မၤအသးလၢ စီၤနိအၤအစိၤ. ဖဲစီၤနိအၤအစိၤန့ၣ်​ ဟီၣ်ခိၣ်​ “ပှဲၤဝဲဒီး တၢ်မၤဆူၣ်မၤစိး” လီၤ. (၁ မိၤၡ့ ၆:၁၃) မ့မ့ၢ်စီၤနိအၤန့ၣ်​ အကဲပှၤတီပှၤလိၤတဂၤ. အဃိ ကစၢ်ယွၤ ပာ်မူဝဲ စီၤနိအၤဒီးအဟံၣ်ဖိဃီဖိ ဘၣ်ဆၣ်​ ပှၤအၢပှၤသီန့ၣ်​ ကစၢ်ယွၤ မၤဟးဂီၤကွံာ် အဝဲသ့ၣ်ခီဖျိ ထံလုၢ်ဘၢတၢ်. ဘၣ်ဃးဒီး တၢ်မၤအသးဖဲ စီၤနိအၤအစိၤန့ၣ်​ လံာ်စီဆှံတဲဝဲလၢ “ဟီၣ်ခိၣ်လၢ အအိၣ်ဝဲလၢ ဆၢကတီၢ်ဖဲန့ၣ်န့ၣ်​ ဟးဂီၤကွံာ်ဝဲ ဖဲထံလုၢ်ဘၢအီၤအခါလီၤ.” (၂ ပ့းတရူး ၃:၆) အဃိ ဖဲန့ၣ်အဆၢကတီၢ် ဟီၣ်ခိၣ်ဟးဂီၤကွံာ်ဝဲလီၤ. သနာ်က့ တၢ်မနုၤဟးဂီၤလဲၣ်. ပှၤအၢပှၤသီတဖၣ်​ လၢအအိၣ်လၢ ဟီၣ်ခိၣ်ချၢန့ၣ်​ ဟးဂီၤကွံာ်ဝဲလီၤ. တမ့ၢ်ဟီၣ်ခိၣ်ဖျၢၣ်ဘၣ်. အဃိ ဖဲလံာ်စီဆှံ တဲဘၣ်ဃးဒီး ဟီၣ်ခိၣ်ဟးဂီၤကွံာ် အဂ့ၢ်အခါ တအဲၣ်ဒိးတဲဝဲ ဘၣ်ဃးဒီး ဟီၣ်ခိၣ်ဖျၢၣ်​ ဟးဂီၤကွံာ်ဝဲ အဂ့ၢ်ဘၣ်. ဘၣ်ဆၣ်​ အဲၣ်ဒိးတဲဝဲ ဘၣ်ဃးဒီး ပှၤအၢပှၤသီ ဒီးတၢ်လၢအဝဲသ့ၣ်​ ဒုးအိၣ်ထီၣ်ဝဲလၢ စိၤခဲအံၤတဖၣ်​ ကဟးဂီၤကွံာ်ဝဲ အဂ့ၢ်လီၤ.

တၢ်မနုၤ ကလီၤမၢ်ကွံာ်လဲၣ်

တၢ်ကီတၢ်ခဲ ဒီးတၢ်အၢတၢ်သီတဖၣ်

လံာ်စီဆှံ တဲဝဲလၢ– “အိၣ်ဒံးတစိၢ်ဖိ, ဒီးပှၤတတီတလိၤ တအိၣ်လၢၤဘၣ်. မ့ၢ်လံ, နကကွၢ်ဆိကမိၣ်အလီၢ် ထံထံဆးဆး, ဒီးတအိၣ်လၢၤဘၣ်လီၤ. မ့မ့ၢ်ပှၤလၢအသးစူၤ ကန့ၢ်ဘၣ်သါထံဧိၤကီၢ်ဧိၤ, ဒီးကမုာ်လၤတၢ်လၢ တၢ်ဃူတၢ်ဖိးအါအါကလဲာ်အပူၤလီၤ.” —စံးထီၣ်ပတြၢၤ ၃၇:၁၀, ၁၁.

အဲၣ်ဒိးတဲဝဲ– ထံလုၢ်ဘၢတၢ်ဖဲ စီၤနိအၤအစိၤန့ၣ်​ တမၤလီၤမၢ်ကွံာ် တၢ်အၢတၢ်သီ ထဲတဘျီဒီး တၢ်အၢတၢ်သီလီၤမၢ်ကွံာ် ဖဲန့ၣ်ဘၣ်. ထံလုၢ်ဘၢတၢ်ဝံၤအလီၢ်ခံ ပှၤအၢပှၤသီ ဒုးအိၣ်ထီၣ်ကဒီး တၢ်အၢတၢ်သီလၢ ပှၤကိးဂၤဒဲးအဂီၢ်. ဘၣ်ဆၣ်​ တယံာ်လၢၤဘၣ်န့ၣ်​ ကစၢ်ယွၤ ကမၤကတၢၢ်ကွံာ် တၢ်အၢတၢ်သီ. တကးဒံးဘၣ်​ ဒ်ပှၤကွဲးထါစံးထီၣ်ပတြၢၤ တဂၤအံၤ တဲဝဲအသိး “ပှၤတတီတလိၤ တအိၣ်လၢၤဘၣ်.” ကစၢ်ယွၤ ကမၤကတၢၢ်ကွံာ် တၢ်အၢတၢ်သီ ခီဖျိ အဘီအမုၢ်လီၤ. ဘီမုၢ်အဝဲန့ၣ်မ့ၢ်ဝဲ တၢ်ပၢတၢ်ပြးတခါလၢ အပၢတၢ်လၢမူခိၣ်​ ဒီးကပၢဝဲ ပှၤဟီၣ်ခိၣ်ဖိတဖၣ်လၢ အဒိကနၣ်​ ကစၢ်ယွၤ အကလုၢ်လီၤ.

ဆိကမိၣ်ကွၢ်– မ့ၢ်ဟီၣ်ခိၣ်​ အပဒိၣ်ပပှၢ်တဖၣ်​ ကသးအိၣ်ဆီၣ်ထွဲ ကစၢ်ယွၤ အဘီအမုၢ်ဧါ. လံာ်စီဆှံ ပာ်ဖျါထီၣ်ဝဲလၢ အဝဲသ့ၣ်​ တဆီၣ်ထွဲဝဲ ကစၢ်ယွၤ အဘီအမုၢ်ဘၣ်​ ဒီးကထီဒါဝဲလီၤ. (စံးထီၣ်ပတြၢၤ ၂:၂) အဃိ တၢ်ကကဲထီၣ်အသး ဒ်လဲၣ်. ကစၢ်ယွၤ အဘီအမုၢ် ကမၤလီၤမၢ်ကွံာ် ပှၤဟီၣ်ခိၣ်ဖိ အတၢ်ပၢတၢ်ပြးခဲလၢာ် ‘ဒီးဘီမုၢ်အဝဲန့ၣ်​ ကအိၣ်လီၤထူလီၤယိာ်လီၤ.’ (ဒၤနံးယ့လး ၂:၄၄) ဘၣ်ဆၣ်​ ဘၣ်မနုၤအဃိ ပှၤဟီၣ်ခိၣ်ဖိ အတၢ်ပၢတၢ်ပြး ကဘၣ်ကတၢၢ်ကွံာ်ဝဲလဲၣ်.

ပအဲၣ်ဒိးလၢ—ပှၤဟီၣ်ခိၣ်ဖိ အတၢ်ပၢတၢ်ပြး ကကတၢၢ်ကွံာ်

လံာ်စီဆှံ တဲဝဲလၢ– “ပှၤကညီတပၢဘၣ်​ အကျဲဘၣ်.”—ယံးရမံယၤ ၁၀:၂၃.

အဲၣ်ဒိးတဲဝဲ– ကစၢ်ယွၤ တတ့လီၤပှၤဟီၣ်ခိၣ်ဖိလၢ အဝဲသ့ၣ်​ ကပၢလီၤအသးဒၣ်ဝဲဘၣ်. အဃိ အဝဲသ့ၣ်​ ကွၢ်ထွဲပှၤဂၤ ဒီးမၤဘၣ်ဂီၢ်က့ၤ ပှၤဂၤအတၢ်ကီတၢ်ခဲ တသ့ဂ့ၤဂ့ၤဘၣ်.

ဆိကမိကွၢ်– လံာ်တဘ့ၣ်​ တဲဖျါထီၣ်ဝဲလၢ “ဟီၣ်ခိၣ်အပဒိၣ်ပပှၢ်တဖၣ်​ မၤလီၤမၢ်ကွံာ်ဝဲ တၢ်ကီတၢ်ခဲ ဒ်သိးဒီး တၢ်ဖှီၣ်တၢ်ယာ်, တၢ်သၣ်ဝံၤလီၤဒိ, တၢ်ဆူးတၢ်ဆါ, န့ဆၢၣ်​ တၢ်ဘၣ်ဒိဘၣ်ထံး, တၢ်ဒုးတၢ်ယၤ ဒီးတၢ်မၤဆူၣ်မၤစိးအဂၤတဖၣ်​ တသ့ဘၣ်.” လံာ်တဘ့ၣ်အံၤ ဆဲးတဲဝဲလၢ “ပှၤတနီၤ . . . နာ်ဝဲလၢ ပှၤလၢအမၤဘၣ်ဂီၢ်က့ၤ တၢ်ကီတၢ်ခဲတဖၣ်အံၤသ့န့ၣ်​ အိၣ်ဒၣ်ထဲ ဟီၣ်ခိၣ်အပဒိၣ်ပပှၢ်လီၤ.” ဘၣ်ဆၣ်​ ဟီၣ်ခိၣ်အပဒိၣ်ပပှၢ်တဖၣ်​ မ့ၢ်ပာ်ဖှိၣ်မၤသကိးတၢ် သနာ်က့ အဝဲသ့ၣ်ကဲဒံး ပှၤတလၢတပှဲၤဘၣ်အဃိ အဝဲသ့ၣ်​ မၤလီၤမၢ်ကွံာ်ဝဲ တၢ်ကီတၢ်ခဲတဖၣ်န့ၣ်​ တန့ၢ်ဘၣ်. တၢ်ပၢတၢ်ပြးလၢ အမၤလီၤမၢ်ကွံာ် ဟီၣ်ခိၣ်အတၢ်ကီတၢ်ခဲ ခဲလၢာ်သ့န့ၣ်​ အိၣ်ဒၣ်ထဲ ကစၢ်ယွၤအဘီအမုၢ်လီၤ.

အဃိ ဒ်လံာ်စီဆှံ ပာ်ဖျါထီၣ်ဝဲအသိး ဘၣ်ဃးဒီး ဟီၣ်ခိၣ်အစိၤလၢ အအၢအသီအံၤ ကကတၢၢ်ကွံာ်ဝဲ အဂ့ၢ်န့ၣ်​ ပှၤအဂ့ၤတဖၣ်​ တလိၣ်ပျံၤဝဲဘၣ်. သနာ်က့ ပကြၢးကွၢ်လၢ် တၢ်အကတၢၢ်အံၤ မ့ၢ်လၢ ကစၢ်ယွၤ ကမၤဟးဂီၤကွံာ် ဟီၣ်ခိၣ်လီၢ်လံၤ ဒီးဒုးအိၣ်ထီၣ်က့ၤ ဟီၣ်ခိၣ်အသီလီၤ.

ကစၢ်ယွၤ ကမၤဝဲလၢ အခါဖဲလဲၣ်. တၢ်ဂ့ၢ်လၢခံတခါ ကပာ်ဖျါထီၣ်ဝဲ လံာ်စီဆှံ အတၢ်စံးဆၢ.