-
ကစၢ်ယွၤ အတၢ်တိာ်ပာ်လၢပဂီၢ် အိၣ်ဒ်လဲၣ်အိၣ်မူလီၤထူလီၤယိာ် ပှဲၤဒီးတၢ်သးခု—တၢ်မၤလိသကိး လံာ်စီဆှံ
-
-
တၢ်မၤလိ ၂၅
ကစၢ်ယွၤ အတၢ်တိာ်ပာ်လၢပဂီၢ် အိၣ်ဒ်လဲၣ်
လံာ်စီဆှံ တဲဖျါထီၣ်ဝဲလၢ ပှၤဟီၣ်ခိၣ်ဖိန့ၣ် “အတၢ်အိၣ်မူဖုၣ် ဒီးပှဲၤဒီး တၢ်ကီတၢ်ခဲ.” (ယိၤဘး ၁၄:၁) ကစၢ်ယွၤ အဲၣ်ဒိးဝဲလၢ ပကအိၣ်မူဘၣ် တၢ်အိၣ်မူဒ်အံၤလီၤဧါ. မ့တမ့ၢ်ဘၣ်န့ၣ် ကစၢ်ယွၤ အတၢ်တိာ်ပာ် လၢပဂီၢ်အိၣ်ဒ်လဲၣ်. ကစၢ်ယွၤ အတၢ်တိာ်ပာ် လၢပဂီၢ်န့ၣ် ဟဲလၢထီၣ်ပှဲၤထီၣ် ကသ့ဒံးဧါ. ခဲအံၤ ပကတဲသကိး လံာ်စီဆှံ အတၢ်စံးဆၢလၢ အမၤမုာ်ထီၣ်ပသး.
၁. ယဟိဝၤယွၤ အဲၣ်ဒိးဝဲလၢ ပကအိၣ်မူဘၣ် တၢ်အိၣ်မူဒ်လဲၣ်.
ယဟိဝၤယွၤ အဲၣ်ဒိးဝဲလၢ ပကအိၣ်မူဘၣ် တၢ်အိၣ်မူလၢ အဂ့ၤကတၢၢ်. ယဟိဝၤယွၤ တ့လီၤ နီၣ်အံၣ်အု ဒီးစီၤအၤဒၣ် ဝံၤအလီၢ်ခံ ကစၢ်ယွၤ ဒုးအိၣ်အဝဲသ့ၣ်လၢ ပၤရဒံစူးလၢအဃံအလၤ လၢအမ့ၢ် ဧ့ၤဒ့ၣ်တၤသၣ်လီၢ်အပူၤ. ဝံၤဒီး “ကစၢ်ယွၤဆိၣ်ဂ့ၤ အဝဲသ့ၣ် ဒီးတဲအဝဲသ့ၣ်လၢ ‘မ်သုသၣ်ထီၣ် ဒီးအါထီၣ်ဂီၢ်ထီၣ် ဒီးမၤပှဲၤထီၣ်ဟီၣ်ခိၣ် ဒီးမၤနၢၤအီၤ.’” (၁ မိၤၡ့ ၁:၂၈) ယဟိဝၤယွၤ အဲၣ်ဒိးဝဲလၢ အဝဲသ့ၣ် ကထီၣ်ဖိထီၣ်လံၤ, မၤကဲထီၣ် ဟီၣ်ခိၣ်ဒီဘ့ၣ် လၢပၤရဒံစူး ဒီးကွၢ်ထွဲဆၣ်ဖိကီၢ်ဖိ. ကစၢ်ယွၤ အဲၣ်ဒိးဝဲလၢ ပှၤဟီၣ်ခိၣ်ဖိခဲလၢာ် ကအိၣ်ဒီး တၢ်အိၣ်ဆူၣ်အိၣ်ချ့လၢအဂ့ၤ ဒီးကအိၣ်မူဘၣ် လီၤထူလီၤယိာ်.
မုၢ်မဆါတနံၤအံၤ ပတအိၣ်မူဘၣ် တၢ်အိၣ်မူ ဒ်ကစၢ်ယွၤတိာ်ပာ်ဝဲ အသိးဒံးဘၣ်,a ဘၣ်ဆၣ် ကစၢ်ယွၤ အတၢ်တိာ်ပာ် လၢပှၤဟီၣ်ခိၣ်ဖိအဂီၢ်န့ၣ် တဆီတလဲဘၣ်. (ယၡါယၤ ၄၆:၁၀, ၁၁) ကစၢ်ယွၤအဲၣ်ဒိးဝဲလၢ ပှၤဟီၣ်ခိၣ်ဖိ လၢအဒိကနၣ် အကလုၢ်တဖၣ်န့ၣ် ကအိၣ်မူဘၣ် လီၤထူလီၤယိာ် ဒီးအိၣ်မူဘၣ် တၢ်အိၣ်မူလၢ အဂ့ၤကတၢၢ်.—ဖး လီၣ်ဖျါ ၂၁:၃, ၄.
၂. ခဲအံၤပအိၣ်ဒီး တၢ်သူၣ်ခုသးခု လၢပတၢ်အိၣ်မူအပူၤ ကသ့ဒ်လဲၣ်.
ယဟိဝၤယွၤ တ့လီၤပှၤ ဒ်သိးပက “လိၣ်ဘၣ် . . . အတၢ်ဟံးစုနဲၣ်ကျဲ” လၢပတၢ်အိၣ်မူအပူၤ. အဃိန့ၣ် ပအဲၣ်ဒိးသ့ၣ်ညါအီၤ ဒီးဘူၣ်ထီၣ်ဘါထီၣ်အီၤ. (ဖး မးသဲ ၅:၃-၆.) ကစၢ်ယွၤ အဲၣ်ဒိးဝဲလၢ ပကအိၣ်ဒီး တၢ်ရ့လိာ်သးဒီးအီၤ လၢအဂ့ၤ, “မၤအတၢ်ဘၣ်သးထီဘိ, . . . အဲၣ်အီၤ” ဒီးမၤအတၢ်မၤ “လၢ [ပ] သးဒီဖျၢၣ်.” (၅ မိၤၡ့ ၁၀:၁၂; စံးထီၣ်ပတြၢၤ ၂၅:၁၄) ပမ့ၢ်မၤဒ်န့ၣ်န့ၣ် ခဲအံၤ လၢပတၢ်အိၣ်မူပူၤ ပမ့ၢ်အိၣ်ဒီး တၢ်ကီတၢ်ခဲသနာ်က့ ပအိၣ်ဒီး တၢ်သးခုသ့ဒံး. ဒီးခီဖျိလၢ ပဘူၣ်ထီၣ်ဘါထီၣ် ယဟိဝၤယွၤ ဒီးပအိၣ်မူဒ် အတၢ်ဘၣ်သးအဃိ ပအိၣ်ဒီး တၢ်သးခု လၢပတၢ်အိၣ်မူပူၤသ့.
ဃုသ့ၣ်ညါအါထီၣ်
ခဲအံၤန့ၣ် ပကတဲသကိး ဘၣ်ဃးဒီး ဖဲယဟိဝၤယွၤ တ့လီၤဟီၣ်ခိၣ် လၢပှၤဟီၣ်ခိၣ်ဖိ အဂီၢ်အခါ အပာ်ဖျါထီၣ် တၢ်အဲၣ်ဒ်လဲၣ်. ဒီးလံာ်စီဆှံ သိၣ်လိပှၤ ဘၣ်ဃးဒီး ကစၢ်ယွၤ အတၢ်တိာ်ပာ် လၢပဂီၢ်အိၣ်ဒ်လဲၣ်.
၃. ယဟိဝၤယွၤ အဲၣ်ဒိးဝဲလၢ ပှၤဟီၣ်ခိၣ်ဖိ ကအိၣ်မူဘၣ် မုာ်မုာ်ခုၣ်ခုၣ်
ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
ဘၣ်မနုၤအဃိ ကစၢ်ယွၤ တ့လီၤဝဲ ဟီၣ်ခိၣ်လၢအဃံလၤ တဖျၢၣ်အံၤလဲၣ်.
ဖး စံၣ်တဲၤတဲလီၤတၢ် ၃:၁၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
လံာ်စီဆှံတဆၢအံၤ သိၣ်လိနၤ ဘၣ်ဃးဒီး ယဟိဝၤယွၤ အဂ့ၢ်ဒ်လဲၣ်.
၄. ယဟိဝၤယွၤ အတၢ်တိာ်ပာ် တဆီတလဲဘၣ်
ဖး စံးထီၣ်ပတြၢၤ ၃၇:၁၁, ၂၉ ဒီး ယၡါယၤ ၅၅:၁၁ ဝံၤဒီး တဲသကိး တၢ်သံကွၢ်လၢလာ်တဖျၢၣ်အံၤ–
ယဟိဝၤယွၤ အတၢ်တိာ်ပာ် တဆီတလဲဘၣ်န့ၣ် ပသ့ၣ်ညါဘၣ်ဒ်လဲၣ်.
ဟံၣ်လၢအဟးဂီၤ ဒီးပှၤတကွၢ်ထွဲအီၤလၢၤဘၣ် တဖျၢၣ်န့ၣ် ပှၤဘှီဂ့ၤထီၣ်က့ၤအီၤသ့. ဒ်န့ၣ်အသိး ဟီၣ်ခိၣ်ဖျၢၣ်လၢ ပှၤတကွၢ်ထွဲအီၤဘၣ်န့ၣ် ကစၢ်ယွၤ ကမၤဂ့ၤထီၣ်က့ၤဝဲ လၢပှၤလၢ အအဲၣ်အီၤ တဖၣ်အဂီၢ်
၅. ပဘူၣ်ထီၣ်ဘါထီၣ် ယဟိဝၤယွၤအဃိ ပအိၣ်ဒီးတၢ်သးခု လၢပတၢ်အိၣ်မူအပူၤသ့
ပမ့ၢ်သ့ၣ်ညါထီၣ် ကစၢ်ယွၤ အတၢ်တိာ်ပာ် လၢပဂီၢ်န့ၣ် ပအိၣ်ဒီးတၢ်သးခုသ့. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
ထဲၤရူမံၤ သ့ၣ်ညါထီၣ်ဘၣ်ဝဲ ကစၢ်ယွၤ အတၢ်တိာ်ပာ် လၢအဂီၢ်အဃိ ကဲဘျုးလၢ အဂီၢ်ဒ်လဲၣ်.
ဖး စံၣ်တဲၤတဲလီၤတၢ် ၁၂:၁၃ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ခီဖျိလၢ ယဟိဝၤယွၤ မၤတ့ၢ်တၢ်လၢပဂီၢ် အါမးအဃိ ပကြၢးမၤမနုၤလဲၣ်.
ပှၤတနီၤ သံကွၢ်ဝဲလၢ– “ပဘၣ်သံတလဲလဲလီၤဒၢး, ဘၣ်မနုၤအဃိ ကစၢ်ယွၤတ့လီၤပှၤဒံးလဲၣ်.”
ပှၤမ့ၢ်သံကွၢ်နၤ ဒ်အံၤန့ၣ် နကစံးဆၢက့ၤဒ်လဲၣ်.
တၢ်ဂ့ၢ်လၢအရ့ဒိၣ်
ယဟိဝၤယွၤ အဲၣ်ဒိးဝဲလၢ ပကအိၣ်မူဘၣ်လၢဟီၣ်ခိၣ် လီၤထူလီၤယိာ် ဒီးအိၣ်မူဘၣ်လၢ တၢ်အိၣ်သးလၢ အဂ့ၤကတၢၢ်. ပမ့ၢ်ဘူၣ်ထီၣ်ဘါထီၣ် ယဟိဝၤယွၤ လၢပသးဒီဖျၢၣ်ညါန့ၣ် ခဲအံၤစ့ၢ်ကီး ပအိၣ်ဒီး တၢ်သးခုလၢ ပတၢ်အိၣ်မူအပူၤသ့.
တၢ်ကွၢ်ကဒါက့ၤ
လၢအခီၣ်ထံးခါန့ၣ် ကစၢ်ယွၤအတၢ်တိာ်ပာ် လၢနီၣ်အံၣ်အု ဒီးစီၤအၤဒၣ်အဂီၢ် အိၣ်ဒ်လဲၣ်.
ကစၢ်ယွၤ အတၢ်တိာ်ပာ် လၢပှၤဟီၣ်ခိၣ်ဖိအဂီၢ် တဆီတလဲဒံးဘၣ်န့ၣ် ပသ့ၣ်ညါဘၣ်ဒ်လဲၣ်.
ပအိၣ်ဒီး တၢ်သးခု လၢပတၢ်အိၣ်မူအပူၤ ကသ့ဒ်လဲၣ်.
ဃုသ့ၣ်ညါ
လၢညါ ဧ့ၤဒ့ၣ်တၤသၣ်လီၢ် အိၣ်အနီၢ်ကီၢ်န့ၣ် ဘၣ်မနုၤအဃိ ပနာ်သ့သပှၢ်တၢၢ်လဲၣ်, ဖးကွၢ်.
“ဧ့ၤဒ့ၣ်တၤသၣ်လီၢ်န့ၣ် အအိၣ်နီၢ်ကီၢ်ဧါ မ့တမ့ၢ် အကဲပူကလီကလီဧါ” (တၢးထီခိးတၢ်, လါယနူၤအါရံၤ ၁, ၂၀၁၁)
ဘၣ်မနုၤအဃိ ပနာ်သ့လၢ ဟီၣ်ခိၣ်တဖျၢၣ်အံၤ ကအိၣ်ဝဲ လီၤထူလီၤယိာ်လဲၣ်, ဖးကွၢ်.
“မ့ၢ်ဟီၣ်ခိၣ်တဖျၢၣ်အံၤ ပှၤကမၤဟးဂီၤကွံာ်ဝဲဧါ” (တၢ်မၤလိလၢ အအိၣ်လၢ online အဖီခိၣ်)
လံာ်စီဆှံ တဲဝဲဘၣ်ဃးဒီး ကစၢ်ယွၤ အတၢ်တိာ်ပာ် လၢနဂီၢ်အိၣ်ဒ်လဲၣ်န့ၣ် မၤလိကွၢ်.
“တၢ်အိၣ်မူအတၢ်တိာ်ပာ်န့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)
ကွၢ်တၢ်ဂီၤမူလၢ အဘၣ်ဃးဒီး ပိာ်ခွါတဂၤလၢ အဆိကမိၣ်ဝဲလၢ အတၢ်အိၣ်မူန့ၣ် လၢပှဲၤခဲလၢာ်လံ, ဘၣ်ဆၣ် လၢခံန့ၣ် အထံၣ်န့ၢ်ဝဲ တၢ်လၢအရ့ဒိၣ်ကတၢၢ် လၢအတၢ်အိၣ်မူအဂီၢ်.
a တၢ်မၤလိ လၢခံတခါန့ၣ် နကမၤလိဘၣ် ဘၣ်ဃးဒီး ဘၣ်မနုၤအဃိ ပတအိၣ်မူဘၣ် တၢ်အိၣ်မူဒ် ကစၢ်ယွၤတိာ်ပာ်ဝဲ အသိးဒံးဘၣ်လဲၣ်.
-
-
ကစၢ်ယွၤအဘီအမုၢ်န့ၣ် မ့ၢ်မနုၤလဲၣ်အိၣ်မူလီၤထူလီၤယိာ် ပှဲၤဒီးတၢ်သးခု—တၢ်မၤလိသကိး လံာ်စီဆှံ
-
-
၂. မတဂၤ ပၢဃုာ်တၢ်ဒီး ယ့ၣ်ၡူးလဲၣ်.
ယ့ၣ်ၡူးတပၢတၢ် ထဲတဂၤဘၣ်. ပှၤလၢ အအိၣ်ဟဲလၢ “ကလုာ်ဒူၣ်ကိးဒူၣ်ဒဲး, ပှၤတဲတၢ်အကျိာ် ကိးကျိာ်ဒဲး, ပှၤကိးဒူၣ်ဒဲး ဒီးပှၤကိးကလုာ်ဒဲးအကျါန့ၣ် . . . အဝဲသ့ၣ်ကပၢဝဲ ဟီၣ်ခိၣ်ဒီဘ့ၣ် ဒ်စီၤပၤတဖၣ် အသိးလီၤ.” (လီၣ်ဖျါ ၅:၉, ၁၀) အဃိ ပှၤကပၢဃုာ်တၢ်ဒီး ယ့ၣ်ၡူးပှဲၤဂၤလဲၣ်. စးထီၣ်လၢ ယ့ၣ်ၡူးဟဲလီၤလၢ ဟီၣ်ခိၣ်ချၢ တုၤခဲအံၤန့ၣ် ပှၤဂီၢ်မုၢ်လၢ အကဲထီၣ်အပျဲၢ်အဘီၣ်န့ၣ် အိၣ်လၢ အကကွဲၢ်ညါ. ပှၤသ့ၣ်တဖၣ်အံၤကပၢဃုာ်တၢ်ဒီး ယ့ၣ်ၡူးကိးဂၤဒဲးဧါ. တပၢဃုာ်တၢ်ဒီး ယ့ၣ်ၡူးကိးဂၤဒဲးဘၣ်. ပှၤလၢ အကလဲၤထီၣ်လၢမူခိၣ် ဒီးကပၢဃုာ်တၢ်ဒီး ယ့ၣ်ၡူးန့ၣ် အိၣ်ထဲ တကလီၢ် လွံၢ်ကလး လွံၢ်ကထိလီၤ. (ဖး လီၣ်ဖျါ ၁၄:၁-၄.) မ့မ့ၢ် ခရံာ်ဖိအဂၤတဖၣ် လၢကအိၣ်မူဘၣ်လၢ ဟီၣ်ခိၣ်ချၢန့ၣ် အဝဲသ့ၣ်ကကဲထီၣ်ဝဲ ကစၢ်ယွၤအဘီမုၢ် အပှၤထံဖိကီၢ်ဖိ.—စံးထီၣ်ပတြၢၤ ၃၇:၂၉.
-
-
ကစၢ်ယွၤအဘီအမုၢ် ကမၤဝဲ မနုၤလဲၣ်အိၣ်မူလီၤထူလီၤယိာ် ပှဲၤဒီးတၢ်သးခု—တၢ်မၤလိသကိး လံာ်စီဆှံ
-
-
ကစၢ်ယွၤအဘီအမုၢ် ကမၤဝဲ မနုၤလဲၣ်
ကစၢ်ယွၤအဘီအမုၢ် ပၢတၢ်လၢ မူခိၣ်လံ. တယံာ်လၢၤဘၣ်န့ၣ် ကစၢ်ယွၤအဘီအမုၢ် ကပၢဟီၣ်ခိၣ် ဒီးကမၤဂ့ၤထီၣ်က့ၤ ဟီၣ်ခိၣ်တၢ်အိၣ်သးလီၤ. အဃိ ခဲအံၤ ပကတဲသကိး တၢ်လၢ ကစၢ်ယွၤအဘီအမုၢ် ကမၤဝဲတနီၤ.
၁. ကစၢ်ယွၤအဘီအမုၢ် ကဒုးအိၣ်ထီၣ်က့ၤ တၢ်ဃူတၢ်ဖိး ဒီးတၢ်တီတၢ်လိၤ လၢဟီၣ်ခိၣ်ချၢဒ်လဲၣ်.
ဖဲအၢ်မက့းဒိၣ် အတၢ်ဒုးအဆၢကတီၢ်န့ၣ် ယ့ၣ်ၡူးလၢအမ့ၢ် ကစၢ်ယွၤအဘီအမုၢ် အစီၤပၤန့ၣ် ကမၤဟးဂီၤကွံာ် ပှၤအၢပှၤသီ ဒီးဟီၣ်ခိၣ်အတၢ်ပၢတၢ်ပြးတဖၣ်. (ဖး လီၣ်ဖျါ ၁၆:၁၄, ၁၆) ဖဲန့ၣ်အခါ လံာ်စီဆှံ အတၢ်အၢၣ်လီၤ လၢအမ့ၢ် “တစိၢ်ဖိဒီးန့ၣ် ပှၤအၢပှၤသီ တအိၣ်လၢၤဘၣ်” န့ၣ်ကဟဲလၢထီၣ်ပှဲၤထီၣ်ဝဲလီၤ. (စံးထီၣ်ပတြၢၤ ၃၇:၁၀) တကးဒံးဘၣ် ယ့ၣ်ၡူး ကဒုးအိၣ်ထီၣ်ဝဲ တၢ်ဃူတၢ်ဖိး ဒီးတၢ်တီတၢ်လိၤ လၢဟီၣ်ခိၣ်ဒီဘ့ၣ်ညါ ခီဖျိ ကစၢ်ယွၤအဘီအမုၢ်.—ဖး ယၡါယၤ ၁၁:၄.
၂. ဖဲကစၢ်ယွၤ အတၢ်ဘၣ်သး ဟဲလၢထီၣ်ပှဲၤထီၣ်လၢ ဟီၣ်ခိၣ်ချၢအခါ ပှၤဟီၣ်ခိၣ်ဖိ အတၢ်အိၣ်မူ ကမၤအသးဒ်လဲၣ်.
လၢကစၢ်ယွၤအဘီအမုၢ် အတၢ်ပၢဖီလာ်န့ၣ် “ပှၤတီပှၤလိၤ ကန့ၢ်သါဘၣ် ဟီၣ်ခိၣ် ဒီးအဝဲသ့ၣ် ကအိၣ်ဘၣ်ဝဲလၢ ဟီၣ်ခိၣ်ချၢ လီၤထူလီၤယိာ်လီၤ.” (စံးထီၣ်ပတြၢၤ ၃၇:၂၉) ထံၣ်တမှံကွၢ် ပှၤခဲလၢာ်လၢ ဟီၣ်ခိၣ်ချၢန့ၣ် ကကဲပှၤတီပှၤလိၤ, ကအဲၣ်ယဟိဝၤယွၤ ဒီးကအဲၣ်လိာ်သး တဂၤဒီးတဂၤ. ပှၤတဆိးက့ နီတဂၤဘၣ် ဒီးပှၤကိးဂၤဒဲး ကအိၣ်မူဘၣ် လီၤထူလီၤယိာ်.
၃. ပှၤအၢပှၤသီ ဟးဂီၤကွံာ်ဝံၤအလီၢ်ခံ ကစၢ်ယွၤအဘီအမုၢ် ကမၤဝဲမနုၤလဲၣ်.
ပှၤအၢပှၤသီ ဟးဂီၤကွံာ်ဝံၤအလီၢ်ခံ ယ့ၣ်ၡူးကပၢတၢ် ဒ်စီၤပၤအသိး အနံၣ်တကထိ. ဖဲအနံၣ်တကထိ အတီၢ်ပူၤန့ၣ် ယ့ၣ်ၡူး ဒီးပှၤလၢအပၢဃုာ်တၢ်ဒီးအီၤ အဂၤ တကလီၢ် လွံၢ်ကလး လွံၢ်ကထိန့ၣ် ကမၤစၢၤ ပှၤလၢအအိၣ်မူဘၣ် လၢဟီၣ်ခိၣ် ဒ်သိးအဝဲသ့ၣ်ကကဲထီၣ် ပှၤလၢပှၤပှဲၤ. ဒီးအနံၣ်တကထိ မ့ၢ်ပှဲၤထီၣ်န့ၣ် ဟီၣ်ခိၣ်အံၤ ကမ့ၢ်ဝဲ ပၤရဒံစူးလၢ အဃံအလၤ. ဒီးခီဖျိလၢ ပှၤဟီၣ်ခိၣ်ဖိတဖၣ် ကဒိကနၣ်ဝဲ ယဟိဝၤယွၤ အတၢ်သိၣ်တၢ်သီအဃိ အဝဲသ့ၣ် ကအိၣ်ဒီးတၢ်သးခု. အနံၣ်တကထိ မ့ၢ်ဝံၤန့ၣ် ယ့ၣ်ၡူးကဟ့ၣ်က့ၤ ဘီမုၢ်လၢ အပါယဟိဝၤယွၤ အစုပူၤ. ဒီးယဟိဝၤယွၤ အ “မံၤ [ကဘၣ်] တၢ်ပာ်စီဆှံအီၤ.” (မးသဲ ၆:၉, ၁၀) ကစၢ်ယွၤအဘီအမုၢ်အံၤ ကပာ်ဖျါထီၣ်ဝဲလၢ ယဟိဝၤယွၤန့ၣ် အကဲဝဲပှၤပၢတၢ် လၢအဂ့ၤတဂၤ ဒီးအကဲပှၤလၢ အသူၣ်အိၣ်သးအိၣ် ပှၤလၢအအိၣ်လၢ အတၢ်ပၢအဖီလာ်. ဒီးလၢခံကတၢၢ်န့ၣ် ယဟိဝၤယွၤ ကမၤဟးဂီၤကွံာ် မုၣ်ကီၤလံၢ်, တၢ်ဝံတၢ်နါတဖၣ် ဒီးပှၤတဂၤဂ့ၤ တဂၤဂ့ၤလၢ အထီဒါ ကစၢ်ယွၤအတၢ်ပၢ. (လီၣ်ဖျါ ၂၀:၇-၁၀) တကးဒံးဘၣ် တၢ်အိၣ်သးအဂ့ၤ လၢကစၢ်ယွၤအဘီအမုၢ် ဒုးအိၣ်ထီၣ်ဝဲန့ၣ် ကအိၣ်ဝဲ လီၤထူလီၤယိာ်.
ဃုသ့ၣ်ညါအါထီၣ်
ကစၢ်ယွၤ ကသူဝဲအဘီအမုၢ် ဒ်သိးကမၤလၢပှဲၤထီၣ် လံာ်စီဆှံအတၢ်စံးပာ် လၢအဘၣ်ဃးဒီး ခါဆူညါန့ၣ် ဘၣ်မနုၤအဃိ ပနာ်သ့လဲၣ်. ပကတဲသကိး.
၄. ကစၢ်ယွၤအဘီအမုၢ် ကမၤကတၢၢ်ကွံာ် ပှၤဟီၣ်ခိၣ်ဖိ အတၢ်ပၢတၢ်ပြး
လံာ်စီဆှံ တဲဝဲလၢ “ဖဲပှၤဟီၣ်ခိၣ်ဖိ ကဒဲကဒဲ ပၢလိာ်သး အဆၢကတီၢ်န့ၣ် ပှၤဘၣ်နးဘၣ်ဖှီၣ် ထီဘိ.” (စံၣ်တဲၤတဲလီၤတၢ် ၈:၉) အဃိ ယဟိဝၤယွၤ ကသူဝဲအဘီအမုၢ် ဒ်သိးကမၤကတၢၢ်ကွံာ်တၢ်တတီတလိၤတဖၣ်အံၤ.
ဖး ဒၤနံးယ့လး ၂:၄၄ ဒီး ၂ သ့းစၤလနံ ၁:၆-၈ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ပှၤဟီၣ်ခိၣ်ဖိလၢ အပၢတၢ်တဖၣ် ဒီးပှၤလၢအဆီၣ်ထွဲအဝဲသ့ၣ်န့ၣ် ယဟိဝၤယွၤ ဒီးအဖိခွါယ့ၣ်ၡူး ကမၤအဝဲသ့ၣ်ဒ်လဲၣ်.
ဒ်နမၤလိဘၣ်အသိး ဘၣ်မနုၤအဃိ နနာ်လၢ တၢ်ခဲလၢာ်လၢ ယဟိဝၤယွၤဒီးယ့ၣ်ၡူး ကမၤဝဲန့ၣ် ကတီဝဲလိၤဝဲလဲၣ်.
၅. ယ့ၣ်ၡူးန့ၣ် အကဲစီၤပၤလၢ အဂ့ၤကတၢၢ်တဂၤ
ဒ်ကစၢ်ယွၤအဘီအမုၢ် အစီၤပၤတဂၤအသိး ယ့ၣ်ၡူးကမၤတၢ်အါမံၤလၢ အကဲဘျုးလၢ ပှၤဟီၣ်ခိၣ်ဖိအဂီၢ်. ကွၢ်တၢ်ဂီၤမူ လၢအပာ်ဖျါထီၣ်ဝဲလၢ ယ့ၣ်ၡူးအဲၣ်ဒိးမၤစၢၤ ပှၤဟီၣ်ခိၣ်ဖိ ဒီးကစၢ်ယွၤဟ့ၣ်လီၤအီၤ တၢ်စိတၢ်ကမီၤလၢ အကမၤစၢၤ ပှၤဟီၣ်ခိၣ်ဖိ.
ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ တၢ်လၢအမၤဝဲတဖၣ်န့ၣ် ပာ်ဖျါထီၣ်ဝဲ တၢ်လၢကစၢ်ယွၤအဘီအမုၢ် ကမၤဝဲလၢခါဆူညါ. တၢ်ဆိၣ်ဂ့ၤ လၢလာ်တဖၣ်အံၤ နအဲၣ်ဒိးထံၣ်ဘၣ်အီၤ အဒိၣ်ကတၢၢ် ဖဲလဲၣ်တခါလဲၣ်. ဖးလံာ်စီဆှံအဆၢ လၢလာ်တဖၣ်အံၤ လၢအပာ်ဖျါထီၣ်န့ၢ်ပှၤ တၢ်ဆိၣ်ဂ့ၤလၢ ပကဒိးန့ၢ်ဘၣ်တဖၣ်.
ဖဲယ့ၣ်ၡူးအိၣ်လၢ ဟီၣ်ခိၣ်အခါ . . .
ခါဆူညါန့ၣ် ယ့ၣ်ၡူးက . . .
အဝဲမၤပတုာ်ကလံၤမုၢ်.—မၢ်ကူး ၄:၃၆-၄၁.
မၤလီၤမၢ်ကွံာ် ကလံၤမုၢ်, ဟီၣ်ခိၣ်ဟူး ဒီးတၢ်အဂၤတဖၣ် လၢအမၤဟးဂီၤ ဟီၣ်ခိၣ်.—ယၡါယၤ ၃၅:၁, ၂.
အဝဲမၤတၢ်လီၤလး ဒီးလုၢ်အီၣ်လုၢ်အီ ပှၤလၢအကထိတဖၣ်.—မးသဲ ၁၄:၁၇-၂၁.
မၤလီၤမၢ်ကွံာ် တၢ်သၣ်ဝံၤလီၤဒိ လၢဟီၣ်ခိၣ်ချၢ.—စံးထီၣ်ပတြၢၤ ၇၂:၁၆.
အဝဲမၤဘျါက့ၤ ပှၤဆူးပှၤဆါအါမး. —လူၤကၣ် ၁၈:၃၅-၄၃.
မၤလီၤမၢ်ကွံာ် တၢ်ဆူးတၢ်ဆါခဲလၢာ် ဒီးပှၤခဲလၢာ် ကအိၣ်ဆူၣ်အိၣ်ချ့. —ယၡါယၤ ၃၃:၂၄.
အဝဲမၤသမူထီၣ်က့ၤပှၤသံ.—လူၤကၣ် ၈:၄၉-၅၅.
မၤသမူထီၣ်က့ၤပှၤသံ ဒီးမၤလီၤမၢ်ကွံာ် တၢ်သံ.—လီၣ်ဖျါ ၂၁:၃, ၄.
၆. ခါဆူညါန့ၣ် ကစၢ်ယွၤအဘီအမုၢ် ကဒုးအိၣ်ထီၣ် တၢ်အိၣ်သး လၢအဂ့ၤကတၢၢ်
ခါဆူညါန့ၣ် ကစၢ်ယွၤအဘီအမုၢ် ကဒုးအိၣ်ထီၣ် တၢ်အိၣ်သး လၢအဂ့ၤ ကတၢၢ် လၢပှၤဟီၣ်ခိၣ်ဖိအဂီၢ် ဒ်ယဟိဝၤယွၤ တိာ်ပာ်ဝဲလၢ အခီၣ်ထံးအသိး. ပှၤဟီၣ်ခိၣ်ဖိ ကအိၣ်မူဘၣ် လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤ. ကွၢ်တၢ်ဂီၤမူ လၢအပာ်ဖျါထီၣ်ဝဲ ယဟိဝၤယွၤ သူဝဲအဖိခွါယ့ၣ်ၡူးခရံာ် ဒ်သိးကမၤလၢပှဲၤထီၣ် အတၢ်တိာ်ပာ်.
ဖး စံးထီၣ်ပတြၢၤ ၁၄၅:၁၆ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
နသ့ၣ်ညါဘၣ်လၢ ယဟိဝၤယွၤက “မၤလၢပှဲၤ တၢ်သးသမူခဲလၢာ် အတၢ်မိၣ်န့ၢ်သးလီတဖၣ်” အဃိ နသးမၤသးဒ်လဲၣ်.
ပှၤတနီၤတဲဝဲလၢ– “ပမ့ၢ်ဖီၣ်လိာ်စု ဒီးမၤသကိးတၢ် ဃူဃူဖိးဖိးန့ၣ် ပမၤဘၣ်ဂီၢ်က့ၤ ဟီၣ်ခိၣ်တၢ်ကီတၢ်ခဲသ့လီၤ.”
တၢ်ကီတၢ်ခဲလၢ ပှၤဟီၣ်ခိၣ်ဖိအတၢ်ပၢတၢ်ပြး မၤဘၣ်ဂီၢ်က့ၤဝဲတသ့ဘၣ် ဘၣ်ဆၣ် ကစၢ်ယွၤအဘီအမုၢ် ကမၤဘၣ်ဂီၢ်က့ၤဝဲန့ၣ် မ့ၢ်မနုၤလဲၣ်.
တၢ်ဂ့ၢ်လၢအရ့ဒိၣ်
ကစၢ်ယွၤအဘီအမုၢ် ကမၤလၢထီၣ်ပှဲၤထီၣ်ဝဲ ကစၢ်ယွၤအတၢ်ဘၣ်သး. ဘီမုၢ်အံၤ ကမၤကဲထီၣ်က့ၤ ဟီၣ်ခိၣ်ဒီဘ့ၣ်လၢ ပၤရဒံစူး ဒီးလၢဟီၣ်ခိၣ်အံၤ ကအိၣ်တ့ၢ်က့ၤထဲ ပှၤလၢအဂ့ၤ ဒီးအဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤ လီၤထူလီၤယိာ်.
တၢ်ကွၢ်ကဒါက့ၤ
ကစၢ်ယွၤအဘီအမုၢ် ကပာ်စီဆှံ ယဟိဝၤယွၤအမံၤ လၢကျဲဒ်လဲၣ်.
ကစၢ်ယွၤအဘီအမုၢ် ကမၤလၢထီၣ်ပှဲၤထီၣ် လံာ်စီဆှံ အတၢ်စံးပာ်တဖၣ်န့ၣ် ဘၣ်မနုၤအဃိ ပနာ်သ့လဲၣ်.
တၢ်ဆိၣ်ဂ့ၤလၢ ပကဒိးန့ၢ်ဘၣ် လၢကစၢ်ယွၤအဘီအမုၢ် တၢ်ပၢဖီလာ်န့ၣ် နအဲၣ်ဒိးထံၣ်ဘၣ် အဒိၣ်ကတၢၢ် ဖဲလဲၣ်တခါလဲၣ်.
ဃုသ့ၣ်ညါ
ဖးကွၢ် တၢ်ဂ့ၢ်လၢ အပာ်ဖျါထီၣ်ဝဲ အၢ်မက့းဒိၣ်န့ၣ် မ့ၢ်မနုၤလဲၣ်.
“အၢ်မက့းဒိၣ် အတၢ်ဒုးန့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)
ဃုသ့ၣ်ညါအါထီၣ် ဘၣ်ဃး “တၢ်နးတၢ်ဖှီၣ်ဖးဒိၣ်” အဂ့ၢ်.—မးသဲ ၂၄:၂၁.
“တၢ်နးတၢ်ဖှီၣ်ဖးဒိၣ်န့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)
ကွၢ်တၢ်ဂီၤမူ လၢအပာ်ဖျါထီၣ်ဝဲ ဟံၣ်ဖိဃီဖိတဖၣ် ထံၣ်တမှံလၢ အဝဲသ့ၣ်အိၣ်ဘၣ်တပူၤဃီလၢ ပၤရဒံစူးအပူၤန့ၣ် ကသ့ဒ်လဲၣ်.
လၢတၢ်လဲၤခီဖျိ လၢအခိၣ်တီမ့ၢ်ဝဲ “ယသးဘၣ်တံာ်တာ်လၢ တၢ်သံကွၢ်အါဖျၢၣ်အဃိ” အပူၤန့ၣ် ဖးဘၣ်ဃးဒီး ပှၤတဂၤလၢ အထီဒါက့ၤ ပဒိၣ်ပပှၢ်န့ၣ် အထံၣ်န့ၢ်ဝဲ တၢ်စံးဆၢလၢ အဟးဃုဝဲ.
“လံာ်စီဆှံဆီတလဲ ပတၢ်အိၣ်မူ” (တၢ်ဂ့ၢ်လၢ အအိၣ်လၢ တၢးထီခိးတၢ် အပူၤ)
-