တၢ်မၤလိ ၁၄
ဒ်သိး ကစၢ်ယွၤ ကတူၢ်လိာ် ပတၢ်ဘူၣ်ထီၣ်ဘါထီၣ်အဂီၢ် ပဘၣ်မၤဒ်လဲၣ်
လၢတၢ်မၤလိ လၢအပူၤကွံာ်တခါန့ၣ် ပမၤလိဘၣ်လၢ ကစၢ်ယွၤတတူၢ်လိာ် တၢ်ဘူၣ်တၢ်ဘါခဲလၢာ်ဘၣ်. ဘၣ်ဆၣ် ပဘူၣ်ထီၣ်ဘါထီၣ် ပတၢ်ဘၣ်တ့ကစၢ် ဒ်အဘၣ်သးဝဲအသိးသ့. “တၢ်ဘူၣ်ထီၣ်ဘါထီၣ် [တၢ်ဘူၣ်တၢ်ဘါ]” လၢကစၢ်ယွၤ တူၢ်လိာ်ဝဲန့ၣ် မ့ၢ်ဖဲလဲၣ်တခါလဲၣ်. (ယၤကိာ် ၁:၂၇) ဘၣ်ဃးဒီး တၢ်ဘူၣ်ထီၣ်ဘါထီၣ် လၢကစၢ်ယွၤ တူၢ်လိာ်ဝဲန့ၣ် လံာ်စီဆှံတဲဝဲဒ်လဲၣ် ခဲအံၤပကတဲသကိး.
၁. ပတၢ်ဘူၣ်ထီၣ်ဘါထီၣ်န့ၣ် ကြၢးဒိးသန့ၤထီၣ်သးလၢ မနုၤလဲၣ်.
ပတၢ်ဘူၣ်ထီၣ်ဘါထီၣ်န့ၣ် ကြၢးဒိးသန့ၤထီၣ်အသး လၢလံာ်စီဆှံ. ယ့ၣ်ၡူးတဲဘၣ် ကစၢ်ယွၤလၢ “နကလုၢ်ကထါန့ၣ် မ့ၢ်တၢ်မ့ၢ်တၢ်တီလီၤ.” (ယိၤဟၣ် ၁၇:၁၇) ဘၣ်ဆၣ် တၢ်ဘူၣ်တၢ်ဘါ အါတက့ၢ်န့ၣ် ကွၢ်ကပာ်ကွံာ်ဝဲ တၢ်မ့ၢ်တၢ်တီ လၢအအိၣ်လၢ ကစၢ်ယွၤကလုၢ်ကထါ လံာ်စီဆှံအပူၤ. အဃိ အဝဲသ့ၣ် တသိၣ်လိဝဲ လံာ်စီဆှံ တၢ်မ့ၢ်တၢ်တီဘၣ်, ဘၣ်ဆၣ် အဝဲသ့ၣ် သိၣ်လိဝဲ ပှၤဟီၣ်ခိၣ်ဖိ အတၢ်သိၣ်လိ ဒီးအလုၢ်အလၢ်. ခီဖျိလၢ အဝဲသ့ၣ် “ကွၢ်ကပာ်ကွံာ် ကစၢ်ယွၤ အတၢ်သိၣ်တၢ်သီ” အဃိ ကစၢ်ယွၤ တတူၢ်လိာ် အဝဲသ့ၣ် တၢ်ဘူၣ်ထီၣ်ဘါထီၣ်ဘၣ်. (ဖး မၢ်ကူး ၇:၉.) မ့မ့ၢ်ပှၤလၢ အဒိးသန့ၤထီၣ် အတၢ်ဘူၣ်ထီၣ်ဘါထီၣ် လၢလံာ်စီဆှံ ဒီးမၤထွဲ လံာ်စီဆှံအတၢ်ဟ့ၣ်ကူၣ်န့ၣ် ယဟိဝၤယွၤ တူၢ်လိာ် အတၢ်ဘူၣ်ထီၣ်ဘါထီၣ်.
၂. ဒ်သိးယဟိဝၤယွၤ ကတူၢ်လိာ် ပတၢ်ဘူၣ်ထီၣ်ဘါထီၣ်အဂီၢ် ပကဘၣ်မၤဒ်လဲၣ်.
ယဟိဝၤယွၤန့ၣ် အကဲ ပတၢ်ဘၣ်တ့ကစၢ်အဃိ ပကြၢးတီဒီးအီၤ လၢပသးဒီဖျၢၣ်. (လီၣ်ဖျါ ၄:၁၁) အဃိ ပကဘၣ်အဲၣ် ကစၢ်ယွၤ ဒီးဘူၣ်ထီၣ်ဘါထီၣ် ထဲအီၤတဂၤလီၤ. ဒီးဖဲပဘူၣ်ထီၣ်ဘါထီၣ် ကစၢ်ယွၤအခါ ပတကြၢးသူ တၢ်ဂီၤတၢ်ဖှီၣ်တဖၣ်ဘၣ်.—ဖး ယၡါယၤ ၄၂:၈.
ဒ်သိး ယဟိဝၤယွၤက “တူၢ်လိာ်” ပတၢ်ဘူၣ်ထီၣ်ဘါထီၣ်အဂီၢ် ပတၢ်ဘူၣ်ထီၣ်ဘါထီၣ်န့ၣ် ကဘၣ် “စီဆှံဝဲ.” (ရိမ့ၤ ၁၂:၁) အဃိ ပကဘၣ်ဒိကနၣ် ဒီးမၤထွဲ ကစၢ်ယွၤ အတၢ်သိၣ်တၢ်သီ. အဒိ ပှၤလၢအအဲၣ် ယဟိဝၤယွၤန့ၣ် ဒိကနၣ် ဒီးမၤထွဲဝဲ ကစၢ်ယွၤ အတၢ်သိၣ်တၢ်သီ ဘၣ်ဃးဒီး တၢ်ဆီဟံၣ်ဆီဃီ. တကးဒံးဘၣ် လုၢ်လၢ်လၢ အတဂ့ၤဘၣ် ဒ်သိးဒီး တၢ်သူကသံၣ်မူၤဘှီးမ့ၢ်ဂ့ၤ, တၢ်အီမီာ်မ့ၢ်ဂ့ၤ, တၢ်အီၣ်သဘျုၣ်သဲးသၣ်မ့ၢ်ဂ့ၤ ဒီးတၢ်အီမူၤသံးမ့ၢ်ဂ့ၤ အဝဲသ့ၣ်ဟးဆှဲးဝဲ.a
၃. ဘၣ်မနုၤအဃိ ပဘၣ်ဘူၣ်ထီၣ်ဘါထီၣ် ယဟိဝၤယွၤ တပူၤဃီဃုာ်ဒီး ပှၤလၢအဘူၣ်ထီၣ်ဘါထီၣ်အီၤတဖၣ်လဲၣ်.
တၢ်အိၣ်ဖှိၣ် လၢပမၤအီၤ ကိးနွံဒဲးန့ၣ် ဟ့ၣ်ပှၤတၢ်ခွဲးတၢ်ယာ် လၢပက “စံးထီၣ်ပတြၢၤ ယဟိဝၤယွၤလၢ . . . တၢ်အိၣ်ဖှိၣ်အပူၤ.” (စံးထီၣ်ပတြၢၤ ၁၁၁:၁, ၂) ပမ့ၢ်သးဝံၣ်တၢ် လၢတၢ်အိၣ်ဖှိၣ်န့ၣ် မ့ၢ်ဝဲကျဲတဘိလၢ ပစံးထီၣ်ပတြၢၤကစၢ်ယွၤ. (ဖး စံးထီၣ်ပတြၢၤ ၁၀၄:၃၃.) ယဟိဝၤယွၤန့ၣ် အအဲၣ်ပှၤ ဒီးအသ့ၣ်ညါဝဲလၢ တၢ်အိၣ်ဖှိၣ်န့ၣ် ကမၤစၢၤပှၤ ဒ်သိးပကဒိးန့ၢ်ဘၣ် တၢ်မူအထူအယိာ်အဃိ အဝဲမၢပထီၣ်တၢ်အိၣ်ဖှိၣ်. အဃိ ဖဲပထီၣ်တၢ်အိၣ်ဖှိၣ်အခါ ပဟ့ၣ်ဂံၢ်ဟ့ၣ်ဘါပှၤဂၤ ဒီးပှၤဂၤစ့ၢ်ကီး ဟ့ၣ်ဂံၢ်ဟ့ၣ်ဘါပှၤ.
ဃုသ့ၣ်ညါအါထီၣ်
ဘၣ်မနုၤအဃိ ယဟိဝၤယွၤ တအဲၣ်ပသူတၢ်ဂီၤတၢ်ဖှီၣ် လၢတၢ်ဘူၣ်ထီၣ်ဘါထီၣ် အပူၤဘၣ်လဲၣ်. ပစံးထီၣ်ပတြၢၤ ကစၢ်ယွၤကသ့ဒ်လဲၣ်, ခဲအံၤ ပကတဲသကိး တၢ်ဂ့ၢ်တနီၤ.
၄. ပတဘၣ်သူ တၢ်ဂီၤတၢ်ဖှီၣ် လၢပတၢ်ဘူၣ်ထီၣ်ဘါထီၣ် အပူၤဘၣ်
ပမ့ၢ်သူတၢ်ဂီၤတၢ်ဖှီၣ် လၢပတၢ်ဘူၣ်ထီၣ်ဘါထီၣ် အပူၤန့ၣ် ကစၢ်ယွၤ တဘၣ်သးဝဲဘၣ်. ပသ့ၣ်ညါဘၣ်ဒ်လဲၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
ဖဲကစၢ်ယွၤ အပှၤဂီၢ်မုၢ်လၢပျၢၤတဖၣ် သူဝဲတၢ်ဂီၤတၢ်ဖှီၣ် လၢအတၢ်ဘူၣ်ထီၣ်ဘါထီၣ် အပူၤအခါ တၢ်ကဲထီၣ်အသးဒ်လဲၣ်.
ပှၤတနီၤန့ၣ် အဲၣ်ဒိးရ့လိာ်သးဒီး ကစၢ်ယွၤဘူးဘူးအဃိ ဖဲအဝဲသ့ၣ် ဘူၣ်ထီၣ်ဘါထီၣ် ကစၢ်ယွၤအခါ အဝဲသ့ၣ်သူဝဲ တၢ်ဂီၤတၢ်ဖှီၣ်. အဝဲသ့ၣ် မၤဝဲဒ်န့ၣ်သနာ်က့ အဘူးထီၣ်ဒီး ကစၢ်ယွၤအနီၢ်ကီၢ်ဧါ. ဖး ၂ မိၤၡ့ ၂၀:၄-၆ ဒီး စံးထီၣ်ပတြၢၤ ၁၀၆:၃၅, ၃၆ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ပှၤတနီၤ ဘူၣ်ထီၣ်ဘါထီၣ် တၢ်ဂီၤတၢ်ဖှီၣ် မနုၤတဖၣ်လဲၣ်.
တၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်န့ၣ် ယဟိဝၤယွၤ ထံၣ်ဝဲဒ်လဲၣ်.
မ့မ့ၢ်နၤမီၤ တၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်န့ၣ် နထံၣ်အီၤဒ်လဲၣ်.
၅. ပမ့ၢ်ဘူၣ်ထီၣ်ဘါထီၣ် ထဲယဟိဝၤယွၤတဂၤန့ၣ် ပကပူၤဖျဲးထီၣ်ကွံာ်လၢ တၢ်သိၣ်လိလၢအကမၣ်
ပကကွၢ်သကိး တၢ်ဂီၤမူဘၣ်ဃးဒီး ပမ့ၢ်ဘူၣ်ထီၣ်ဘါထီၣ် ယဟိဝၤယွၤ ဒ်အဘၣ်သးဝဲအသိးန့ၣ် ပကထူၣ်ဖျဲးထီၣ်လၢ တၢ်သိၣ်လိလၢ အကမၣ်. ကွၢ်တၢ်ဂီၤမူ.
ဖး စံးထီၣ်ပတြၢၤ ၉၁:၁၄ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ပမ့ၢ်ပာ်ဖျါထီၣ်လၢ ပအဲၣ်ယဟိဝၤယွၤ ဒီးဘူၣ်ထီၣ်ဘါထီၣ် ထဲအီၤတဂၤန့ၣ် ယဟိဝၤယွၤ အၢၣ်လီၤပှၤလၢ အကမၤန့ၢ်ပှၤ တၢ်မနုၤလဲၣ်.
၆. ပဘူၣ်ထီၣ်ဘါထီၣ် ကစၢ်ယွၤ တပူၤဃီဃုာ်ဒီး ပဒီပုၢ်ဝဲၢ်မုၣ်ခွါတဖၣ် လၢတၢ်အိၣ်ဖှိၣ်အပူၤ
ပစံးထီၣ်ပတြၢၤ ယဟိဝၤယွၤ ဒီးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ခီဖျိ ပသးဝံၣ်တၢ် ဒီးဟ့ၣ်ထီၣ်တၢ်စံးဆၢ လၢတၢ်အိၣ်ဖှိၣ်. ဖး စံးထီၣ်ပတြၢၤ ၂၂:၂၂ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ဖဲနနၢ်ဟူ ပှၤဂၤ ဟ့ၣ်ထီၣ်တၢ်စံးဆၢအခါ အကဲထီၣ် တၢ်ဂံၢ်တၢ်ဘါ လၢနဂီၢ်ဧါ.
နၤမီၤ နအဲၣ်ဒိး ဟ့ၣ်ထီၣ်တၢ်စံးဆၢဧါ.
၇. ပမ့ၢ်တဲဘၣ်ပှၤဂၤ ဘၣ်ဃးဒီး တၢ်လၢပမၤလိဘၣ်န့ၣ် ယဟိဝၤယွၤ ကသးခု
ပတဲပၠးပှၤဂၤ လၢလံာ်စီဆှံ အတၢ်မ့ၢ်တၢ်တီ သ့လၢကျဲအါဘိ. ဖး စံးထီၣ်ပတြၢၤ ၉:၁ ဒီး ၃၄:၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
တၢ်ဂ့ၢ်လၢ နမၤလိဘၣ် လၢလံာ်စီဆှံအပူၤန့ၣ် နအဲၣ်ဒိးတဲဘၣ်ပှၤဂၤ ဖဲလဲၣ်တခါလဲၣ်.
ပှၤတနီၤတဲဝဲလၢ– “ကစၢ်ယွၤန့ၣ် ပမၤသးခုအသး တသ့ဘၣ်.”
နၤမီၤ နဆိကမိၣ်ဒ်န့ၣ်ဧါ.
တၢ်ဂ့ၢ်လၢအရ့ဒိၣ်
ပမ့ၢ်ဘူၣ်ထီၣ်ဘါထီၣ် ထဲပတၢ်ဘၣ်တ့ကစၢ်, စံးထီၣ်ပတြၢၤအီၤ လၢတၢ်အိၣ်ဖှိၣ် ဒီးတဲဘၣ်ပှၤဂၤ လၢတၢ်လၢပမၤလိဘၣ်န့ၣ် ပမၤသးခုအသး.
တၢ်ကွၢ်ကဒါက့ၤ
ကစၢ်ယွၤ မၢပဘူၣ်ထီၣ်ဘါထီၣ်အီၤ လၢတၢ်လီၢ်ဖဲလဲၣ်.
ဘၣ်မနုၤအဃိ ပဘၣ်ဘူၣ်ထီၣ်ဘါထီၣ် ထဲယဟိဝၤယွၤ တဂၤလဲၣ်.
ဘၣ်မနုၤအဃိ ပဘၣ်ဘူၣ်ထီၣ်ဘါထီၣ် ကစၢ်ယွၤ တပူၤဃီဃုာ်ဒီး ပှၤလၢအအဲၣ်ဒိး မၤသးခုအသးလဲၣ်.
ဃုသ့ၣ်ညါ
လၢတၢ်ဂ့ၢ်ခိၣ်တီ လၢအမ့ၢ် “ယတကဲတၢ်ဂီၤတၢ်ဖှီၣ် အကုၢ်လၢၤဘၣ်” အပူၤန့ၣ် ဖးကွၢ်ဘၣ်ဃးဒီး ပိာ်မုၣ်တဂၤ ထူၣ်ဖျဲးထီၣ်ကွံာ် လၢတၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်.
ဖးကွၢ် တၢ်ဂ့ၢ်လၢ ကမၤစၢၤနၤဒ်သိး နကဟ့ၣ်ထီၣ် တၢ်စံးဆၢလၢ တၢ်အိၣ်ဖှိၣ်အပူၤ.
“စံးထီၣ်ပတြၢၤ ယဟိဝၤယွၤ လၢတၢ်အိၣ်ဖှိၣ်အပူၤ” (တၢးထီခိးတၢ်, လါယနူၤအါရံၤ ၂၀၁၉)
ကွၢ်တၢ်ဂီၤမူ လၢအပာ်ဖျါထီၣ်ဝဲ ပိာ်ခွါသးစၢ်တဂၤ ကလဲၤထီၣ်တၢ်အိၣ်ဖှိၣ်န့ၣ် တညီလၢအဂီၢ်ဘၣ်. ဘၣ်ဆၣ် အလဲၤထီၣ်ဝဲအဃိ အဒိးန့ၢ်ဘၣ်အဘျုးဒ်လဲၣ်.
ပှၤအါဂၤနာ်ဝဲလၢ ထူၣ်စုညါန့ၣ် အကဲဝဲ ခရံာ်ဖိအတၢ်ပနီၣ်. ဘၣ်ဆၣ် ပကြၢးသူ ထူၣ်စုညါ လၢပတၢ်ဘူၣ်ထီၣ်ဘါထီၣ် အပူၤဧါ.
a တၢ်ဂ့ၢ်သ့ၣ်တဖၣ်အံၤ တၢ်မၤလိလၢခံတဖၣ် ကပာ်ဖျါအါထီၣ်န့ၢ်ပှၤ.