ယ့ၣ်ၡူး ကဲမတဂၤလဲၣ်

လၢတၢ်စံၣ်စိၤတဲစိၤအပူၤန့ၣ် ယ့ၣ်ၡူးကဲပှၤလၢ အမံၤဟူသၣ်ဖျါ ဒိၣ်ကတၢၢ်တဂၤ. ပှၤအါဂၤန့ၣ် နၢ်ဟူဘၣ်ယ့ၣ်ၡူးအမံၤ ဘၣ်ဆၣ် အဝဲသ့ၣ် တသ့ၣ်ညါယ့ၣ်ၡူးအဂ့ၢ် ဂ့ၤဂ့ၤဘၣ်. ဒီးယ့ၣ်ၡူး ကဲမတဂၤလဲၣ်န့ၣ် ပှၤအါဂၤ အိၣ်ဒီးတၢ်ထံၣ်အါမံၤ. ဘၣ်ဆၣ် ဘၣ်ဃးဒီး ယ့ၣ်ၡူးအဂ့ၢ်န့ၣ် လံာ်စီဆှံတဲဝဲဒ်လဲၣ်.

၁. ယ့ၣ်ၡူး ကဲမတဂၤလဲၣ်.

ယ့ၣ်ၡူးန့ၣ် အကဲဝဲ “ပှၤနီၢ်သးဖိ” လၢအစိအကမီၤဒိၣ်တဂၤ လၢအအိၣ်လၢမူခိၣ်. တချုးလၢ ယဟိဝၤယွၤ တ့လီၤတၢ်အဂၤ နီတမံၤဒံးဘၣ်န့ၣ် အဝဲတ့လီၤဆိယ့ၣ်ၡူး. အဃိ ယ့ၣ်ၡူးန့ၣ် ဘၣ်တၢ်ကိးအီၤလၢ “တၢ်ဘၣ်တ့ခဲလၢာ် အပှၤဝဲၢ်ကိ.” (ကလီးစဲ ၁:၁၅) တကးဒံးဘၣ် ခီဖျိလၢ ယဟိဝၤယွၤ အနီၢ်ကစၢ်ဒၣ်ဝဲ တ့လီၤယ့ၣ်ၡူးအဃိ လံာ်စီဆှံ ကိးယ့ၣ်ၡူးလၢ ကစၢ်ယွၤ “အဖိခွါနီၢ်နီၢ် ထဲတဂၤဧိၤ.” (ယိၤဟၣ် ၃:၁၆) ယ့ၣ်ၡူးန့ၣ် အမၤသကိးတၢ်ဒီး အပါယဟိဝၤယွၤ ဘူးဘူးတံၢ်တံၢ် ဒီးမၤစၢၤအပါ လၢကတ့လီၤ တၢ်ကိးမံၤဒဲး. (ဖး ကတိၤဒိ ၈:၃၀.) ဒီးယ့ၣ်ၡူးန့ၣ် ရ့လိာ်အသးဒီး အပါယဟိဝၤယွၤ ဘူးဘူးတံၢ်တံၢ် ထီဘိတုၤခဲအံၤလီၤ. ခီဖျိလၢ ယ့ၣ်ၡူးမၤတၢ် ဒ်သိးဒီး ကစၢ်ယွၤ အပှၤခၢၣ်စး ဒီးအဆှၢဝဲ ကစၢ်ယွၤအတၢ်ကစီၣ် ဒီးအတၢ်ဟံးစုနဲၣ်ကျဲ လၢမူခိၣ်ကလူး ဒီးပှၤဟီၣ်ခိၣ်ဖိတဖၣ် အအိၣ်အဃိ လံာ်စီဆှံ ကိးအီၤလၢ “တၢ်ကလုၢ်.”​—ယိၤဟၣ် ၁:၁၄.

၂. ဘၣ်မနုၤအဃိ ယ့ၣ်ၡူး ဟဲလီၤလၢ ဟီၣ်ခိၣ်လဲၣ်.

ပူၤကွံာ်အနံၣ် ခံကထိဘျဲၣ်န့ၣ် ယဟိဝၤယွၤ မၤဝဲတၢ်လီၤလးတခါ. ကစၢ်ယွၤ သူဝဲအသးစီဆှံ ဒ်သိးကပၢနုာ်ဝဲ ယ့ၣ်ၡူးအသးသမူ လၢမုၣ်ကနီၤ နီၢ်မၤရံ အဒၢလီၢ်ပူၤလီၤ. အဃိ ယ့ၣ်ၡူး ဟဲအိၣ်ဖျဲၣ်ထီၣ်ဝဲ ဒ်သိးဒီး ပှၤဟီၣ်ခိၣ်ဖိတဂၤ. (ဖး လူၤကၣ် ၁:​၃၄, ၃၅.) ယ့ၣ်ၡူးန့ၣ် ယဟိဝၤယွၤ ဆှၢလီၤအီၤဒ်သိး အကကဲထီၣ် မ့းၡံအၤဒီးခရံာ် လၢအကမၤပူၤဖျဲး ပှၤဟီၣ်ခိၣ်ဖိအဂီၢ်.a ဝံအတၢ်စံးပာ် လၢအဘၣ်ဃးဒီး မ့းၡံအၤ လၢအအိၣ်လၢ လံာ်စီဆှံပူၤန့ၣ် ယ့ၣ်ၡူး မၤလၢပှဲၤထီၣ်ဝဲ ခဲလၢာ်အဃိ အကဲထီၣ်တၢ်မၤစၢၤ ဒ်သိးပှၤအဂၤ ကသ့ၣ်ညါဘၣ်ဝဲလၢ ယ့ၣ်ၡူးန့ၣ် “မ့ၢ်ခရံာ် လၢအမ့ၢ်ယွၤလၢ အမူဝဲတဂၤအဖိခွါ.”​—မးသဲ ၁၆:၁၆.

၃. ခဲအံၤ ယ့ၣ်ၡူးအိၣ်ဖဲလဲၣ်.

ယ့ၣ်ၡူးသံဝဲ ဒ်ပှၤဟီၣ်ခိၣ်ဖိတဂၤအသိး ဝံၤအလီၢ်ခံ ကစၢ်ယွၤ မၤသမူထီၣ်က့ၤအီၤ ဒ်ပှၤနီၢ်သးဖိတဂၤအသိး ဒီးအဝဲက့ၤထီၣ်ကဒါက့ၤ လၢမူခိၣ်. လၢမူခိၣ်န့ၣ် “ကစၢ်ယွၤဟ့ၣ်အီၤ မံၤတဖျၢၣ်လၢ အဒိၣ်န့ၢ်ဒံး ကယဲၢ်မံၤအဂၤ ခဲလၢာ်လီၤ.” (ဖံလံးပံၤ ၂:၉) ခဲအံၤန့ၣ် ယ့ၣ်ၡူးကဲဝဲ မူခိၣ်ကလူး လၢအစိအကမီၤဒိၣ်တဂၤ ဒီးပှၤလၢအစိအကမီၤ ဒိၣ်န့ၢ်ယ့ၣ်ၡူးန့ၣ် အိၣ်ထဲ ယဟိဝၤယွၤတဂၤလီၤ.

၄. ယ့ၣ်ၡူးန့ၣ် အတကဲဝဲ သ့တၢ်လၢာ် ကစၢ်ယွၤဘၣ်

လံာ်စီဆှံ သိၣ်လိဝဲလၢ ယ့ၣ်ၡူးန့ၣ် အကဲဝဲ ပှၤနီၢ်သးဖိ လၢအစိအကမီၤဒိၣ်တဂၤ လၢအအိၣ်လၢမူခိၣ်. သနာ်က့ ယ့ၣ်ၡူးန့ၣ် အဒိကနၣ်ဝဲ ယဟိဝၤယွၤ လၢအမ့ၢ် အပါဒီးအကစၢ်ယွၤ အကလုၢ်. ပသ့ၣ်ညါဘၣ်ဒ်လဲၣ်. ကွၢ်တၢ်ဂီၤမူ လၢအပာ်ဖျါထီၣ်ဝဲ လံာ်စီဆှံ အတၢ်သိၣ်လိ လၢအဘၣ်ဃးဒီး သ့တၢ်လၢာ်ကစၢ်ယွၤ ဒီးယ့ၣ်ၡူးန့ၣ် လီၤဆီလိာ်သး ဒ်လဲၣ်အဂ့ၢ်.

တၢ်ဂီၤမူ– ယ့ၣ်ၡူးခရံာ်န့ၣ် အကဲ ကစၢ်ယွၤဧါ (၃:၂၂)

လံာ်စီဆှံအဆၢ လၢလာ်တဖၣ်အံၤ ကမၤစၢၤပှၤ ဒ်သိးဒီး ပကနၢ်ပၢၢ်ဘၣ်လၢ ယဟိဝၤယွၤ ဒီးယ့ၣ်ၡူးန့ၣ် လီၤဆီလိာ်အသး ဒီးအဝဲသ့ၣ် တမ့ၢ်တဂၤဃီဘၣ်. ဖးလံာ်စီဆှံအဆၢတဖၣ်အံၤ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

ဖး လူၤကၣ် ၁:​၃၀-၃၂.

• မူခိၣ်ကလူးတဂၤ တဲဖျါထီၣ်ဝဲလၢ ယဟိဝၤယွၤ လၢအမ့ၢ် “တၢ်ထီကတၢၢ်တဂၤ” ဒီးယ့ၣ်ၡူးန့ၣ် လီၤဆီလိာ်အသး ဒ်လဲၣ်.

ဖး မးသဲ ၃:​၁၆, ၁၇.

• ဖဲယ့ၣ်ၡူး ဒိးဘျၢထံအခါ တၢ်ကလုၢ်လၢ အသီၣ်ထီၣ်လၢမူခိၣ်န့ၣ် တဲဝဲဒ်လဲၣ်.

• နဆိကမိၣ် တၢ်ကလုၢ်အံၤ အကဲဝဲ မတဂၤ အကလုၢ်လဲၣ်.

ဖး ယိၤဟၣ် ၁၄:၂၈.

• ပှၤခံဂၤအံၤ အသးပှၢ်ဒိၣ် ဒီးအအိၣ်ဒီး တၢ်စိတၢ်ကမီၤဒိၣ် ဖဲလဲၣ်တဂၤလဲၣ်. အပါဧါ အဖိခွါဧါ.

• ယ့ၣ်ၡူးန့ၣ် အကိးဝဲ ယဟိဝၤယွၤ လၢပါအဃိ ပသ့ၣ်ညါဘၣ်လၢ ယ့ၣ်ၡူးန့ၣ် အကဲမတဂၤလဲၣ်.

ဖး ယိၤဟၣ် ၁၂:၄၉.

• ယ့ၣ်ၡူးန့ၣ် အဆိကမိၣ်လီၤအသးလၢ အီၤဒီးအပါန့ၣ် ကဲဝဲပှၤတဂၤဃီဧါ. နၤမီၤ နဆိကမိၣ်ဒ်လဲၣ်.

၅. ယ့ၣ်ၡူးကဲဝဲ မ့းၡံအၤန့ၣ် တၢ်မနုၤ ပာ်ဖျါထီၣ်ဝဲလဲၣ်.

တၢ်ဂီၤမူ– ယ့ၣ်ၡူး မၤလၢပှဲၤထီၣ် ဝံအတၢ်စံးပာ် (၃:၀၃)

ဖးဝံအတၢ်စံးပာ်တဖၣ်အံၤ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

ဖး မံကၤ ၅:၂ လၢအပာ်ဖျါထီၣ်ဝဲလၢ မ့းၡံအၤ ကအိၣ်ဖျဲၣ်ထီၣ် လၢတၢ်လီၢ်ဖဲလဲၣ်အဂ့ၢ်.b

• ဖဲယ့ၣ်ၡူး အိၣ်ဖျဲၣ်ထီၣ်အခါ ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်ဧါ.​—မးသဲ ၂:၁.

ဖး စံးထီၣ်ပတြၢၤ ၃၄:၂၀ ဒီး စကၤရယၤ ၁၂:၁၀ လၢအပာ်ဖျါထီၣ်ဝဲ ဝံအတၢ်စံးပာ် ဘၣ်ဃးဒီး မ့းၡံအၤ အတၢ်သံအဂ့ၢ်.

• ဝံအတၢ်စံးပာ်တဖၣ်အံၤ ဟဲလၢထီၣ်ပှဲၤထီၣ်ဧါ.​—ယိၤဟၣ် ၁၉:၃၃-၃၇.

• ဒ်သိး ဝံအတၢ်စံးပာ်တခါအံၤ ကဟဲလၢပှဲၤထီၣ်အဂီၢ် နဆိကမိၣ် ယ့ၣ်ၡူး ရဲၣ်လီၤကျဲၤလီၤ ဆိပာ်စၢၤဝဲဧါ.

• ဝံအတၢ်စံးပာ်တခါအံၤ ပာ်ဖျါထီၣ်ဝဲလၢ ယ့ၣ်ၡူးကဲမတဂၤလဲၣ်.

တၢ်ဂ့ၢ်လၢအရ့ဒိၣ်

ယ့ၣ်ၡူးန့ၣ် အကဲဝဲ ပှၤနီၢ်သးဖိ လၢအစိအကမီၤဒိၣ်တဂၤ, အကဲဝဲ ကစၢ်ယွၤအဖိခွါ ဒီးအကဲဝဲ မ့းၡံအၤ.

တၢ်ကွၢ်ကဒါက့ၤ

• ဘၣ်မနုၤအဃိ ယ့ၣ်ၡူးန့ၣ် ဘၣ်တၢ်ကိးအီၤလၢ “တၢ်ဘၣ်တ့ခဲလၢာ် အပှၤဝဲၢ်ကိ” လဲၣ်.

• တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ် အမၤဝဲတၢ်မနုၤလဲၣ်.

• ယ့ၣ်ၡူးကဲဝဲ မ့းၡံအၤန့ၣ် ပသ့ၣ်ညါဘၣ်ဒ်လဲၣ်.

ဃုသ့ၣ်ညါ

ယ့ၣ်ၡူးကဲဝဲ မ့းၡံအၤန့ၣ် ပသ့ၣ်ညါဘၣ်ဒ်လဲၣ်, ဃုသ့ၣ်ညါကွၢ်.

“ဝံအတၢ်စံးပာ် ဘၣ်ဃးဒီး မ့းၡံအၤန့ၣ် ပာ်ဖျါထီၣ်လၢ ယ့ၣ်ၡူးကဲဝဲ မ့းၡံအၤဧါ” (တၢ်မၤလိလၢ အအိၣ်လၢ online အဖီခိၣ်)

ဃုသ့ၣ်ညါကွၢ်လၢ လံာ်စီဆှံ ပာ်ဖျါထီၣ်ဝဲလၢ ကစၢ်ယွၤ ကဲထီၣ် ယ့ၣ်ၡူးအပါလၢ ကျဲဒ်လဲၣ်.

“ဘၣ်မနုၤအဃိ ယ့ၣ်ၡူးန့ၣ် ပှၤကိးအီၤလၢ ကစၢ်ယွၤအဖိခွါလဲၣ်” (တၢ်မၤလိလၢ အအိၣ်လၢ online အဖီခိၣ်)

ဖးကွၢ် တၢ်ဂ့ၢ်လၢ အပာ်ဖျါထီၣ်ဝဲလၢ ဘၣ်မနုၤအဃိ တၢ်သိၣ်လိဘၣ်ဃးဒီး ယွၤသၢဂၤတဂၤဃီန့ၣ် တမ့ၢ် လံာ်စီဆှံ အတၢ်သိၣ်လိဘၣ်လဲၣ်.

“ယ့ၣ်ၡူးန့ၣ် အကဲကစၢ်ယွၤဧါ” (တၢးထီခိးတၢ်, လါအ့ဖြ့ၣ် ၁, ၂၀၀၉)

ဖးကွၢ် ဘၣ်ဃးဒီး ပိာ်မုၣ်တဂၤ ဃုသ့ၣ်ညါဝဲ တၢ်လၢလံာ်စီဆှံ တဲဝဲဘၣ်ဃးဒီး ယ့ၣ်ၡူးအဂ့ၢ်အဃိ ကဲဘျုးလၢအဂီၢ်ဒ်လဲၣ်.

“ပှၤယူဒၤမုၣ်တဂၤ တဲဖျါထီၣ်လၢ ဘၣ်မနုၤအဃိ အက့ၤဆိကမိၣ်ထံက့ၤ အတၢ်စူၢ်တၢ်နာ်လဲၣ်” (ပၢၢ်ထီၣ်! လါမ့ၤ ၂၀၁၃)