တၢ်မၤလိ ၅
တၢ်ဂ့ၢ်လၢအအိၣ်လၢ လံာ်စီဆှံပူၤန့ၣ် မ့ၢ်ဝဲ ကစၢ်ယွၤအတၢ်ကတိၤ
လံာ်စီဆှံန့ၣ် မ့ၢ်ဝဲ တၢ်ဟ့ၣ်အဂ့ၤဒိၣ်မးတခါ လၢယဟိဝၤယွၤ ဟ့ၣ်လီၤပှၤ. ဒီးလံာ်စီဆှံန့ၣ် အကတြူၢ်အိၣ်ဝဲ ၆၆ ကတြူၢ်လီၤ. ဘၣ်သ့ၣ်သ့ၣ် နကဆိကမိၣ်ဘၣ်လၢ ‘လံာ်စီဆှံန့ၣ် ဟဲအိၣ်ထီၣ်ဝဲဒ်လဲၣ်. မတဂၤ ဒုးအိၣ်ထီၣ် လံာ်စီဆှံလဲၣ်.’ ဒ်သိးပကသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢအဂီၢ် ပကတဲသကိး ဘၣ်ဃးဒီး ကစၢ်ယွၤ ဟ့ၣ်လီၤပှၤဟီၣ်ခိၣ်ဖိ လံာ်စီဆှံဒ်လဲၣ်.
၁. လံာ်စီဆှံန့ၣ် ပှၤဟီၣ်ခိၣ်ဖိကွဲးဝဲအဃိ ဘၣ်မနုၤအဃိ ပတဲလၢ အဟဲလၢ ကစၢ်ယွၤအအိၣ်လဲၣ်.
လံာ်စီဆှံန့ၣ် ပှၤပိာ်ခွါအဂၤ ၄၀ ဃၣ်ဃၣ် ကွဲးဝဲ ဒီးဖဲအပူၤကွံာ် အနံၣ် သၢကထိ ယဲၢ်ကယၤဘျဲၣ်န့ၣ် ပှၤကွဲးဝဲ လံာ်စီဆှံ အဆိကတၢၢ် တကတြူၢ်. မ့မ့ၢ် လံာ်စီဆှံ အလီၢ်ခံကတၢၢ် တကတြူၢ်န့ၣ် ပှၤကွဲးအီၤ ဖဲအပူၤကွံာ် အနံၣ် တကထိ ခွံကယၤဘျဲၣ်လီၤ. ပှၤကွဲးလံာ်စီဆှံဖိတဖၣ်အံၤ အတၢ်အိၣ်သး တဒ်သိးလိာ်အသးဘၣ်. သနာ်က့ တၢ်ဂ့ၢ်လၢ အဝဲသ့ၣ်ကွဲးဝဲတဖၣ်န့ၣ် တထီဒါလိာ်အသး နီတမံၤဘၣ်. အကဲထီၣ်သး သ့ဒ်လဲၣ်. အကဲထီၣ်သးသ့ ခီဖျိလၢ ကစၢ်ယွၤ မ့ၢ်ပှၤလၢ အဒုးအိၣ်ထီၣ် လံာ်စီဆှံအဃိ. (ဖး ၁ သ့းစၤလနံ ၂:၁၃.) ပှၤကွဲးလံာ်စီဆှံဖိတဖၣ်အံၤ တကွဲးလီၤဝဲ အနီၢ်ကစၢ် အတၢ်ဆိကမိၣ်ဘၣ်. အဝဲသ့ၣ် ကွဲးလီၤဝဲ တၢ်လၢအဟဲလၢ ကစၢ်ယွၤအအိၣ် “ဒ်သးစီဆှံ ထိၣ်ဟူးထိၣ်ဂဲၤထီၣ် အဝဲသ့ၣ် အသးအသိးလီၤ.” (၂ ပ့းတရူး ၁:၂၁) ကစၢ်ယွၤသူဝဲ အသးစီဆှံ ဒ်သိးကထိၣ်ဟူးထိၣ်ဂဲၤထီၣ် ပှၤပိာ်ခွါတဖၣ်အံၤလၢ အဝဲသ့ၣ် ကကွဲးလီၤဝဲ ကစၢ်ယွၤ အတၢ်ကတိၤတဖၣ်.—၂ တံၤမသ့း ၃:၁၆.
၂. လံာ်စီဆှံန့ၣ် ကဲဘျုးလၢ မတဂၤအဂီၢ်လဲၣ်.
ကစၢ်ယွၤ တဲဝဲလၢ တၢ်သးခုကစီၣ် လၢအအိၣ်လၢ လံာ်စီဆှံပူၤန့ၣ် ကကဲဘျုးလၢ “ပှၤကိးကလုာ်ဒဲး, ကလုာ်ဒူၣ်ကိးဒူၣ်ဒဲး, ပှၤတဲတၢ်အကျိာ်ကိးကျိာ်ဒဲး ဒီးပှၤကိးဒူၣ်ဒဲး” အဂီၢ်လီၤ. (ဖး လီၣ်ဖျါ ၁၄:၆.) အဃိ မုၢ်မဆါတနံၤအံၤ လံာ်စီဆှံန့ၣ် ပှၤဖးအီၤသ့လၢ ကျိာ်အါမး အါန့ၢ်ဒံး လံာ်အဂၤတဖၣ်. ဒီးပှၤမ့ၢ်အိၣ်လၢတၢ်လီၢ် ဖဲလဲၣ်ဂ့ၤဖဲလဲၣ်ဂ့ၤ, ပှၤမ့ၢ်တဲကျိာ် ဒ်လဲၣ်ဂ့ၤဒ်လဲၣ်ဂ့ၤ ပှၤအါတက့ၢ် ဖးဘၣ်ဝဲ လံာ်စီဆှံသ့.
၃. ယဟိဝၤယွၤ ဒီသဒၢ လံာ်စီဆှံဒ်လဲၣ်.
လံာ်စီဆှံန့ၣ် ပှၤကွဲးလီၤအီၤလၢ တၢ်လၢအတူၢ်တယံာ်ဘၣ်အလိၤ ဒ်သိးဒီး ဆၣ်ဖိကီၢ်ဖိအဘ့ၣ် ဒီးၡဲစးခိ. ဘၣ်ဆၣ် ပှၤလၢ အပာ်လုၢ်ပာ်ပှ့ၤ လံာ်စီဆှံန့ၣ် အဝဲသ့ၣ် ကွဲးကူဝဲ လံာ်စီဆှံ လီၤတံၢ်လီၤဆဲးလီၤ. ပှၤပၢတၢ်တနီၤ ဒီးတၢ်ဘူၣ်တၢ်ဘါ ခိၣ်နၢ်တနီၤ ဂုာ်ကျဲးစၢး မၤဟးဂီၤလံာ်စီဆှံ သနာ်က့ ပှၤအဂၤတနီၤန့ၣ် ဒ်သိး အဝဲသ့ၣ် ကဒီသဒၢ လံာ်စီဆှံအဂီၢ် အဝဲသ့ၣ် သးအိၣ်ဟ့ၣ်လီၤ အသးသမူ. အဃိ ပသ့ၣ်ညါဘၣ်လၢ ဒ်သိး ယဟိဝၤယွၤ ကတဲတၢ်ဒီးပှၤအဂီၢ် အဝဲတပျဲဝဲလၢ ပှၤတဂၤဂ့ၤတဂၤဂ့ၤ မ့တမ့ၢ် တၢ်တမံၤဂ့ၤတမံၤဂ့ၤ ကမၤပတုာ်အီၤဘၣ်. လံာ်စီဆှံ တဲဝဲလၢ “ပကစၢ်ယွၤ အတၢ်ကတိၤန့ၣ် အိၣ်ဂၢၢ်ဆိးကျၢၤဝဲ လီၤထူလီၤယိာ်လီၤ.”—ယၡါယၤ ၄၀:၈.
ဃုသ့ၣ်ညါအါထီၣ်
ခဲအံၤ ပကဃုသ့ၣ်ညါ ဘၣ်ဃးဒီး ကစၢ်ယွၤ ထိၣ်ဟူးထိၣ်ဂဲၤထီၣ် ပှၤပိာ်ခွါတဖၣ်လၢ ကကွဲးဝဲလံာ်စီဆှံ ဒ်လဲၣ်, ကစၢ်ယွၤ ဒီသဒၢလံာ်စီဆှံဒ်လဲၣ် ဒီးဒ်သိး ပှၤဟီၣ်ခီၣ်ဖိ ကဖးဘၣ် လံာ်စီဆှံအဂီၢ် ကစၢ်ယွၤ မၤဝဲဒ်လဲၣ်.
၄. လံာ်စီဆှံ ပာ်ဖျါထီၣ်န့ၢ်ပှၤလၢ ကစၢ်ယွၤဒုးအိၣ်ထီၣ် လံာ်စီဆှံ
ကွၢ်တၢ်ဂီၤမူ ဝံၤဒီး ဖး ၂ တံၤမသ့း ၃:၁၆ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
လံာ်စီဆှံအံၤ ပှၤဟီၣ်ခိၣ်ဖိ မ့ၢ်ကွဲးဝဲန့ၣ် ဘၣ်မနုၤအဃိ ပှၤကိးအီၤလၢ ကစၢ်ယွၤကလုၢ်ကထါလဲၣ်.
ကစၢ်ယွၤ ဒုးသ့ၣ်ညါ ပှၤကွဲးလံာ်စီဆှံဖိတဖၣ် လၢအတၢ်ဆိကမိၣ်န့ၣ် နဆိကမိၣ် အကဲထီၣ်သး ကသ့ဧါ.
တၢ်မၤခိၣ်တဂၤ ကမၢဝဲအနဲၣ်ရွဲၣ် ကွဲးလီၤန့ၢ်အီၤလံာ်ပရၢ. ဒ်န့ၣ်အသိး ယဟိဝၤယွၤ မၢဝဲ ပှၤဟီၣ်ခိၣ်ဖိ ကွဲးလီၤန့ၢ်အီၤ အတၢ်ကတိၤတဖၣ် လၢလံာ်စီဆှံအပူၤ
၅. လံာ်စီဆှံ အိၣ်ဒံးတုၤလၢ ပစိၤခဲအံၤ
လံာ်စီဆှံန့ၣ် ဟဲလၢ ကစၢ်ယွၤအအိၣ်အဃိ ကစၢ်ယွၤဒီသဒၢဝဲ လံာ်စီဆှံ ဒီးလံာ်စီဆှံ အိၣ်ဒံးတုၤလၢ ပစိၤခဲအံၤညါ. လၢတၢ်စံၣ်စိၤတဲစိၤအပူၤန့ၣ် ပထံၣ်ဘၣ်လၢ ပှၤလၢအအိၣ်ဒီး တၢ်စိတၢ်ကမီၤတဖၣ် ဂုာ်ကျဲးစၢး မၤဟးဂီၤဝဲ လံာ်စီဆှံ. ဒီးတၢ်ဘူၣ်တၢ်ဘါခိၣ်နၢ်တဖၣ် ဂုာ်ကျဲးစၢး ပာ်ခူသူၣ်ဝဲ လံာ်စီဆှံ. ဘၣ်ဆၣ် ပှၤအါဂၤန့ၣ် အဝဲသ့ၣ် မ့ၢ်ထံၣ်ဘၣ်ဒီး တၢ်ထီဒုၣ်ထီဒါ ဒီးတၢ်လီၤဘၣ်ယိၣ် လၢအဝဲသ့ၣ် အသးသမူအဂီၢ် မ့ၢ်အိၣ်သနာ်က့ ဒ်သိး ကဒီသဒၢ လံာ်စီဆှံအဂီၢ် အဝဲသ့ၣ် ဟ့ၣ်လီၤအသးသမူဘူၣ်ဝဲ. ဒ်သိး နကသ့ၣ်ညါဘၣ် ပှၤပိာ်ခွါတဂၤလၢ အမၤဝဲဒ်န့ၣ် အဂ့ၢ်န့ၣ် ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
ခဲအံၤ နသ့ၣ်ညါဘၣ်လၢ ဒ်သိးကဒီသဒၢ လံာ်စီဆှံအဂီၢ် ပှၤအါဂၤ သးအိၣ်ဟ့ၣ်လီၤ အသးသမူအဃိ နအဲၣ်ဒိး ဖးအါထီၣ်လံာ်စီဆှံဧါ.
ဖး စံးထီၣ်ပတြၢၤ ၁၁၉:၉၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ဒ်သိး ပှၤအါဂၤကကွဲးကျိာ်ထံ ဒီးထုးထီၣ်ရၤလီၤ လံာ်စီဆှံအဂီၢ် တၢ်ဘၣ်ယိၣ်အလီၢ် လၢအဝဲသ့ၣ် အသးသမူအဂီၢ် အိၣ်ဝဲသနာ်က့ ဘၣ်မနုၤအဃိ အဝဲသ့ၣ်မၤဝဲဒ်န့ၣ်လဲၣ်.
၆. လံာ်တဘ့ၣ်လၢ ပှၤကိးဂၤဒဲးအဂီၢ်
လံာ်စီဆှံ မ့ၢ်လံာ်တဘ့ၣ်လၢ ပှၤကွဲးကျိာ်ထံအီၤ ဒီးထုးထီၣ်ရၤလီၤအီၤ အါကတၢၢ်လီၤ. ဖး မၤတၢ် ၁၀:၃၄, ၃၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ဘၣ်မနုၤအဃိ ကစၢ်ယွၤ အဲၣ်ဒိးဝဲလၢ ပှၤကကွဲးကျိာ်ထံ ဒီးထုးထီၣ်ရၤလီၤ အကလုၢ်ကထါ လံာ်စီဆှံ အါကတၢၢ်လဲၣ်.
လၢတၢ်မၤလိအံၤအပူၤ ဘၣ်ဃးဒီး လံာ်စီဆှံန့ၣ် တၢ်ဂ့ၢ်လၢ နဘၣ်သူၣ်ဘၣ်သး အဒိၣ်ကတၢၢ်န့ၣ် မ့ၢ်မနုၤလဲၣ်.
လၢဟီၣ်ခိၣ်ချၢန့ၣ်
ပှၤကိးဂၤဒဲး
ဃၣ်ဃၣ်
ဖးဝဲလံာ်စီဆှံလၢ ကျိာ်လၢ အဝဲသ့ၣ်နၢ်ပၢၢ်ဝဲန့ၣ်သ့
ပှၤဒိးန့ၢ်ဘၣ် လံာ်စီဆှံ
ဒီဘ့ၣ်မ့ၢ်ဂ့ၤ လၢအကတြူၢ်တနီၤမ့ၢ်ဂ့ၤ
လၢကျိာ်
သၢကထိဘျဲၣ်လံ
လၢဟီၣ်ခိၣ်ဒီဘ့ၣ်န့ၣ် ပှၤစဲကျံးထုးထီၣ် လံာ်စီဆှံ အိၣ်ဝဲအဘ့ၣ်
အကကွဲၢ် ယဲၢ်ကထိ
ဒီးပှၤထုးထီၣ်ဝဲ အါန့ၢ်ဒံး လံာ်အဂၤတဖၣ်
ပှၤတနီၤတဲဝဲလၢ– “လံာ်စီဆှံန့ၣ် အကဲဝဲ လံာ်လၢပျၢၤတဘ့ၣ် လၢပှၤဟီၣ်ခိၣ်ဖိကွဲးဝဲလီၤ.”
နၤမီၤ နဆိကမိၣ်ဒ်န့ၣ်ဧါ.
လံာ်စီဆှံမ့ၢ်ဝဲ ကစၢ်ယွၤ ကလုၢ်ကထါန့ၣ် ပသ့ၣ်ညါဘၣ်ဒ်လဲၣ်.
တၢ်ဂ့ၢ်လၢအရ့ဒိၣ်
လံာ်စီဆှံန့ၣ် မ့ၢ်ဝဲ ကစၢ်ယွၤကလုၢ်ကထါ ဒီးကစၢ်ယွၤ မၤဝဲဒ်သိး ပှၤကိးဂၤဒဲး ကဖးဘၣ်လံာ်စီဆှံ.
တၢ်ကွၢ်ကဒါက့ၤ
ကစၢ်ယွၤ ထိၣ်ဟူးထိၣ်ဂဲၤထီၣ် ပှၤပိာ်ခွါတဖၣ် လၢကကွဲးလံာ်စီဆှံန့ၣ် အဲၣ်ဒိးတဲဝဲ အခီပညီဒ်လဲၣ်.
လၢတၢ်မၤလိအံၤအပူၤ ဘၣ်ဃးဒီး ပှၤကွဲးကျိာ်ထံ လံာ်စီဆှံ, ပှၤထုးထီၣ်ရၤလီၤ လံာ်စီဆှံ ဒီးလံာ်စီဆှံ အိၣ်တုၤလၢ ခဲအံၤန့ၣ် တၢ်ဂ့ၢ်လၢ နဘၣ်သူၣ်ဘၣ်သး အဒိၣ်ကတၢၢ်န့ၣ် မ့ၢ်ဖဲလဲၣ်တခါလဲၣ်.
နသ့ၣ်ညါဘၣ်လၢ ကစၢ်ယွၤ သးအိၣ်တဲတၢ် ဒီးနၤအဃိ နသးခုဧါ.
ဃုသ့ၣ်ညါ
ဖးဘၣ်ဃးဒီး ပှၤကွဲးထုးထီၣ်လံာ်စီဆှံအဂ့ၢ် စးထီၣ်လၢ တၢ်ကွဲးအသးအခီၣ်ထံးခီၣ်ဘိ တုၤလီၤလၢ တၢ်ကွဲးကျိာ်ထံ လၢစိၤခဲအံၤ.
လံာ်စီဆှံန့ၣ် ပှၤဂုာ်ကျဲးစၢး မၤဟးဂီၤအီၤ ဘၣ်ဆၣ် အအိၣ်ဒံးတုၤလၢ ပစိၤခဲအံၤ ဒ်လဲၣ်န့ၣ် ဖးကွၢ်.
“လံာ်စီဆှံ—မ့ၢ်လံာ်လၢ အဟးဂီၤတသ့ဘၣ်တဘ့ၣ်” (တၢ်ဂ့ၢ်လၢ အအိၣ်လၢ တၢးထီခိးတၢ် အပူၤ)
ကွၢ်တၢ်ဂီၤမူ လၢအဘၣ်ဃးဒီး ပှၤတနီၤ ဟ့ၣ်လီၤအသးသမူ လၢကကွဲးကျိာ်ထံ လံာ်စီဆှံအဂီၢ်.
လံာ်စီဆှံန့ၣ် ပှၤကွဲးကူအီၤ ဒီးပှၤကွဲးကျိာ်ထံအီၤ အဘျီအါမး. ဘၣ်ဆၣ် ဘၣ်မနုၤအဃိ ပနာ်သ့လၢ တၢ်ကစီၣ်လၢ လံာ်စီဆှံအပူၤန့ၣ် တဆီတလဲဘၣ်လဲၣ်.
“တၢ်ကစီၣ်လၢ အအိၣ်လၢ လံာ်စီဆှံ အပူၤန့ၣ် ပှၤဆီတလဲဝဲဧါ” (တၢ်မၤလိလၢ အအိၣ်လၢ online အဖီခိၣ်)