ပမၤစၢၤ ပှၤလၢအိၣ်ဒီး တၢ်သးလီၤစၢ်တၢ်ဆါ ကသ့ဒ်လဲၣ်
လံာ်စီဆှံတဲဝဲလၢ– “တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး ဒီးဖဲတၢ်ကိၢ်တၢ်ဂီၤအိၣ်ဝဲအခါ အကဲထီၣ်ဝဲ နဒီပုၢ်ဝဲၢ်.”—ကတိၤဒိ ၁၇:၁၇.
အဲၣ်ဒိးတဲဝဲ အခီပညီဒ်လဲၣ်
ပမ့ၢ်သ့ၣ်ညါလၢ ပသကီးတဂၤ တူၢ်ဘၣ်တၢ်သးလီၤစၢ်တၢ်ဆါန့ၣ် ပဝဲစ့ၢ်ကီး ပသးတမုာ်စၢၤအီၤဘၣ်. ဘၣ်ဆၣ် ပပာ်ဖျါထီၣ်လၢ ပအဲၣ်ဒီးပသးအိၣ်အီၤ သ့ခီဖျိပမၤစၢၤအီၤ ဒ်သိးအသးကမုာ်ထီၣ်အဂီၢ်. ပမၤစၢၤအီၤ ကသ့ဒ်လဲၣ်.
လံာ်စီဆှံ မၤစၢၤပှၤဒ်လဲၣ်
“သးအိၣ် ဒိကနၣ်တၢ်.”—ယၤကိာ် ၁:၁၉.
ကျဲအဂ့ၤကတၢၢ်တဘိ လၢပကမၤစၢၤပသကီးန့ၣ် မ့ၢ်ဝဲဖဲအတဲတၢ်အခါ ပကနၣ်န့ၢ်အီၤဂ့ၤဂ့ၤ. ဒီးဖဲအတဲတၢ်အခါ တလိၣ်ပက့ၤတဲဆၢအီၤ ကီးထံၣ်ဒဲးဘၣ်. ဆဲးကနၣ်န့ၢ်တၢ်လၢအတဲ ဒီးပာ်ဖျါထီၣ်လၢ နသးအိၣ်အီၤ. ကျဲးစၢးနၢ်ပၢၢ်စၢၤအီၤ ဒီးတဘၣ်ပာ်ဒ့ၣ်ပာ်ကမၣ်အီၤတဂ့ၤ. တဘျီတခီၣ် တၢ်လၢအတဲဝဲန့ၣ် တမ့ၢ်လၢအအဲၣ်ဒိးတဲဝဲဒ်န့ၣ်ဘၣ် အဃိလၢခံ အသးတမုာ်စ့ၢ်ကီးဘၣ်.—ယိၤဘး ၆:၂, ၃.
‘တဲမုာ်ထီၣ်က့ၤ ပှၤအသး.’ —၁ သ့းစၤလနံ ၅:၁၄.
ဖဲနသကီးသူၣ်ကိၢ်သးဂီၤတၢ် မ့တမ့ၢ် တူၢ်ဘၣ်လၢ အလုၢ်အပှ့ၤတအိၣ်ဘၣ်အခါ တဘျီတခီၣ် နဘၣ်တဲမုာ်ထီၣ်အသးဒ်လဲၣ်, မၤစၢၤအီၤဒ်လဲၣ် နမ့ၢ်တသ့ၣ်ညါဘၣ် သနာ်က့ ဆဲးပာ်ဖျါထီၣ်လၢ နသးအိၣ်အီၤ, မၤမုာ်ထီၣ်အသး ဒီးဟ့ၣ်ဂံၢ်ဟ့ၣ်ဘါအီၤ.
“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး.”—ကတိၤဒိ ၁၇:၁၇.
မၤန့ၢ်တၢ်လၢ အကကဲဘျုးလၢအဂီၢ်. ဒီးတဘၣ်ဆိမိၣ်လၢ နသ့ၣ်ညါလၢ နဘၣ်မၤစၢၤအီၤလံ န့ၣ်တဂ့ၤ, သံကွၢ်အီၤလၢ နကဘၣ် မၤစၢၤအီၤဒ်လဲၣ်. နသံကွၢ်အီၤလံ ဘၣ်ဆၣ်အတဲပၠးနၤ မ့ၢ်တဘၣ်ဒံးဘၣ်န့ၣ် တဲပၠးအီၤတၢ်လၢ နမၤသကီးဒီးအီၤ ကသ့တမံၤမံၤ ဒ်သိးဒီး လဲၤဟးလိၣ်ကွဲတပူၤဃီ, လဲၤပှ့ၤစၢၤန့ၢ်အတၢ်, မၤကဆှီစၢၤအီၤတၢ် ဒီးမၤစၢၤအီၤလၢ တၢ်အဂၤတမံၤမံၤ.—ကလၤတံ ၆:၂.
“ပာ်ဖျါထီၣ် တၢ်ဝံသးစူၤ.”—၁ သ့းစၤလနံ ၅:၁၄.
တဘျီတခီၣ်န့ၣ် ဘၣ်သ့ၣ်သ့ၣ် နသကီးတအဲၣ်ဒိး တဲတၢ်ဘၣ်. ဘၣ်ဆၣ်ဒုးသ့ၣ်ညါအီၤလၢ နအိၣ်ကတီၤသးလၢ ကဒိကနၣ်န့ၢ် တၢ်လၢအတဲထီဘိ. နသကီးန့ၣ် အအိၣ်တဆူၣ်ဘၣ်အဃိ ဘၣ်သ့ၣ်သ့ၣ် အကတဲဘၣ် မ့တမ့ၢ် မၤဘၣ်တၢ်လၢ အမၤဘၣ်ဒိနၤ. ဒီးဘၣ်သ့ၣ်သ့ၣ် အမ့ၢ်တူၢ်လိာ်ဝဲလၢ အကမၤသကိးတၢ်ဒီးနၤဘၣ်ဆၣ် လၢခံအတအဲၣ်ဒိးမၤဝဲလၢၤဘၣ် မ့တမ့ၢ် တဘျီတခီၣ်န့ၣ် အသးကအ့န့. ဘၣ်ဆၣ်နဘၣ်အိၣ်ဒီး တၢ်ဝံသးစူၤ ဒီးနၢ်ပၢၢ်စၢၤအီၤ.—ကတိၤဒိ ၁၈:၂၄.
နမၤစၢၤ အဝဲသ့ၣ်အဃိ အဘျုးအိၣ်လၢ အဝဲသ့ၣ်အဂီၢ်
ဖါရၤa အသကီးန့ၣ် အိၣ်ဒီး တၢ်ဆါလၢ အအီၣ်တၢ် တဘၣ်လီၢ်ဘၣ်စးဘၣ် ဒီးတၢ်သးလီၤစၢ်တၢ်ဆါ. ဖါရၤတဲဝဲလၢ “ယတဲဘၣ်ယသကီးလၢ အဝဲမ့ၢ်အဲၣ်ဒိးတဲပၠးယၤ တၢ်တမံၤမံၤန့ၣ် အတဲပၠးယၤသ့. တၢ်ကီတၢ်ခဲလၢ အတဲပၠးယၤန့ၣ် ယမၤစၢၤအီၤ မ့ၢ်တသ့ခဲလၢာ်ဘၣ်နာ်က့ ယကျဲးစၢး ဒိကနၣ်န့ၢ်အီၤထံထံ. တဘျီတခီၣ် ပှၤမ့ၢ်ဒိကနၣ်န့ၢ်အီၤန့ၣ် အသးမုာ်လီၤ.”
ဟၤအၤ လၢအအိၣ်ဒီး တၢ်သးလီၤစၢ်တၢ်ဆါန့ၣ် တဲဝဲလၢ “ယသကီးအိၣ်တဂၤန့ၣ် အဟ့ၣ်ဂံၢ်ဟ့ၣ်ဘါတၢ်သ့မး ဒီးအသးဂ့ၤမး. အဝဲဖီဒုးအီၣ်ယၤ ကသူဝံၣ်ဝံၣ် ဒီးဖဲယလဲၤဟးလၢ အဟံၣ်အခါ ယသ့ၣ်ညါဘၣ်လၢအအဲၣ်ယၤ အဃိယတဲဘၣ်အီၤ ယတၢ်တူၢ်ဘၣ်ညီဝဲ. ဒီးခီဖျိလၢအမၤဝဲ ဒ်န့ၣ်အဃိ ကဲထီၣ်တၢ်ဟ့ၣ်ဂံၢ်ဟ့ၣ်ဘါ လၢယဂီၢ်ဒိၣ်မး.”
ကၠဲးခီး လၢအမါအိၣ်ဒီး တၢ်သးလီၤစၢ်တၢ်ဆါန့ၣ် တဲဝဲလၢ “တၢ်ဝံသးစူၤန့ၣ် မ့ၢ်တၢ်လၢအရ့ဒိၣ်ဒိၣ်မး. ဖဲယမါမၤတၢ်တမံၤမံၤလၢ အမၤသးထီၣ်ယၤအခါ ယဆိမိၣ်ထီၣ်လၢ ယမါမၤဒ်အံၤန့ၣ် တမ့ၢ်လၢအအဲၣ်ဒိးမၤဒ်န့ၣ်ဘၣ်, ခီဖျိလၢအတၢ်ဆါဃိလီၤ. မ့ၢ်လၢယဆိမိၣ် ဒ်န့ၣ်အဃိ ယနၢ်ပၢၢ်စၢၤအီၤ ဒီးယတသးထီၣ်တၢ်ဘၣ်.”
အဲၤရံခိၤ လၢအအိၣ်ဒီး တၢ်သူၣ်ကိၢ်သးဂီၤတၢ်ဆါန့ၣ် တဲဝဲလၢ “ယမါန့ၣ် မ့ၢ်ပှၤဖၣ်ကၠးနးတဂၤညါ. ဖဲယသးအုး ဒီးယသးကိၢ်တၢ်အခါ တၢ်လၢယတအဲၣ်ဒိးမၤဘၣ်န့ၣ် အတမၢန့ၢ်ဆူၣ် ယမၤနီတခါဘၣ်. တဘျီတခီၣ် ခီဖျိလၢယဃိန့ၣ် တၢ်လၢအအဲၣ်ဒိးမၤတဖၣ်န့ၣ် အမၣ်တမၤဘၣ်ဝဲဘၣ်. အမ့ၢ်ပှၤလၢအသးဂ့ၤ ဒီးဟ့ၣ်လီၤသးလၢ ယဂီၢ်အဃိ အမ့ၢ်ပှၤလၢအလုၢ်ဒိၣ်ပှ့ၤဒိၣ် လၢယဂီၢ်ဒိၣ်မး.”
a ပှၤမံၤတနီၤန့ၣ် ပှၤဆီတလဲဝဲ.