“ပှၤလၢအလီၤဘှါန့ၣ် ယွၤဟ့ၣ်ဝဲလၢ အဂံၢ်အဘါ”
၂၀၁၈ လံာ်စီဆှံ အဆၢလၢတနံၣ်အဂီၢ်– “မ့မ့ၢ်ပှၤလၢအမုၢ်လၢ်တၢ်လၢယွၤန့ၣ် အဂံၢ်အဘါကဆူၣ်ထီၣ်လီၤ.”—ယၡါယၤ ၄၀:၃၁.
၁. ပတူၢ်ဘၣ်တၢ်ကီတၢ်ခဲ မနုၤတဖၣ်လဲၣ်, ဘၣ်ဆၣ် ယဟိဝၤယွၤ ဘၣ်သူၣ်ဘၣ်သးဝဲ အခ့အပှၤလၢအတီဒီးအီၤတဖၣ် လၢတၢ်ဂ့ၢ်မနုၤအဃိလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
ပအိၣ်မူဘၣ်လၢ ဆၢကတီၢ်လၢ အကီခဲဒိၣ်မးလီၤ. အဒိ, သုဝဲဒီပုၢ်ဝဲၢ်မုၣ်ခွါအါဂၤ ကတူၢ်ဘၣ်တၢ်ဆူးတၢ်ဆါလၢ အနးနးကလဲာ်တဖၣ်လီၤ. ဒီးအဂၤတနီၤန့ၣ် အသးကပှၢ်လံဘၣ်ဆၣ် ကဘၣ်ကွၢ်ထွဲဒံး အဘူးအတံၢ်လၢ အသးပှၢ်တဖၣ်လီၤ. တကးဒံးဘၣ် တနီၤနီၤန့ၣ် အိၣ်ဒီးတၢ်ကီတၢ်ခဲလၢ ကလုၢ်အီၣ်လုၢ်အီ အဟံၣ်ဖိဃီဖိအဂီၢ်န့ၣ်လီၤ. ဒီးပသ့ၣ်ညါလၢသုဝဲသ့ၣ်အါဂၤန့ၣ် သုထံၣ်ဘၣ်တၢ်ကီတၢ်ခဲအါမးလၢ အဟဲဘၣ်သုတကတီၢ်ဃီန့ၣ်လီၤ. လၢတၢ်သ့ၣ်တဖၣ်အံၤအဃိ သုတၢ်ဆၢကတီၢ်, တၢ်ဂံၢ်တၢ်ဘါ ဒီးကျိၣ်စ့ ကလၢာ်ဝဲအါမးလီၤ. ဘၣ်ဆၣ် နနာ်သ့သပှၢ်ကတၢၢ်လၢ ယဟိဝၤယွၤ ကမၤစၢၤနၤလီၤ. နသ့ၣ်ညါလၢ ခါဆူညါန့ၣ်နတၢ်အိၣ်သးကဂ့ၤထီၣ် မ့ၢ်လၢယဟိဝၤယွၤ အၢၣ်လီၤဝဲလၢ ကမၤဂ့ၤထီၣ်ဝဲအဃိလီၤ. နတၢ်နာ်န့ၣ် ကမၤသးခုယဟိဝၤယွၤအသးဒိၣ်မးလီၤ.
၂. ယၡါယၤ ၄၀:၂၉ န့ၣ်ဟ့ၣ်ဂံၢ်ဟ့ၣ်ဘါပှၤဒ်လဲၣ်, ဘၣ်ဆၣ် ပမၤဘၣ် တၢ်ကမၣ်မနုၤသ့လဲၣ်.
၂ တဘျီတခီၣ် မ့ၢ်နတူၢ်ဘၣ်လၢ နတၢ်ကီတၢ်ခဲတဖၣ် ကီဒိၣ်မးတုၤဒၣ်လဲာ် နလဲၤခီဖျိအီၤတန့ၢ်ဘၣ်န့ၣ်ဧါ. နမ့ၢ်တူၢ်ဘၣ်ဒ်န့ၣ်န့ၣ် တမ့ၢ်ထဲနၤတဂၤဧိၤဘၣ်. ယဟိဝၤယွၤ အခ့အပှၤလၢညါတဖၣ်စ့ၢ်ကီး တူၢ်ဘၣ်ဝဲဒ်န့ၣ်လီၤ. (၁ စီၤပၤ ၁၉:၄; ယိၤဘး ၇:၇) ဒ်သိးအဝဲသ့ၣ် လဲၤခီဖျိတၢ်ကီတၢ်ခဲကန့ၢ်အဂီၢ် တၢ်မနုၤမၤစၢၤအီၤလဲၣ်. ဒ်သိးကန့ၢ်ဘၣ်တၢ်ဂံၢ်တၢ်ဘါအဂီၢ် အဝဲသ့ၣ်သန့ၤအသးလၢ ယဟိဝၤယွၤလီၤ. လံာ်စီဆှံ တဲဝဲလၢ “ပှၤလၢအလီၤဘှါန့ၣ် ယွၤဟ့ၣ်ဝဲလၢ အဂံၢ်အဘါလီၤ.” (ယၡါယၤ ၄၀:၂၉) လီၤသးအုးဒိၣ်မးလၢ မုၢ်မဆါတနံၤအံၤ ယွၤအခ့အပှၤတနီၤ ဒ်သိးလဲၤခီဖျိအတၢ်ကီတၢ်ခဲကန့ၢ်အဂီၢ် အဝဲသ့ၣ်တူၢ်ဘၣ်ဝဲလၢ ကဘၣ်ပတုာ်မၤ ယဟိဝၤယွၤအတၢ်မၤ တစိၢ်ဖိလီၤ. တၢ်မၤယွၤအတၢ်မၤန့ၣ် အဝဲသ့ၣ်တထံၣ်ဝဲလၢအမ့ၢ် တၢ်ဆိၣ်ဂ့ၤလၢၤဘၣ်. လၢတၢ်န့ၣ်အလီၢ် အဝဲသ့ၣ်ထံၣ်ဝဲလၢအမ့ၢ် တၢ်ဝံတၢ်ယိးတခါလီၤ. လၢတၢ်န့ၣ်အဃိ အဝဲသ့ၣ် တဖးလံာ်စီဆှံ, တထီၣ်တၢ်အိၣ်ဖှိၣ်ရိဖှိၣ် ဒီးတဟးစံၣ်တဲၤတဲလီၤတၢ်လၢၤဘၣ်. မုၣ်ကီၤလံၢ် အဲၣ်ဒိးဝဲလၢ အဝဲသ့ၣ်ကမၤဝဲဒ်အံၤလီၤ.
၃. (က) ဒ်သိးမုၣ်ကီၤလံၢ် မၤလီၤစၢ်ပနီၢ်သးအဂံၢ်အဘါ သုတန့ၢ်တဂ့ၤအဂီၢ် ပကဘၣ်မၤဒ်လဲၣ်. (ခ) လၢတၢ်မၤလိအံၤအပူၤ ပကမၤလိဘၣ် တၢ်ဂ့ၢ်မနုၤလဲၣ်.
၃ မုၣ်ကီၤလံၢ် တအဲၣ်ဒိးလၢ ပနီၢ်သးအဂံၢ်အဘါကဆူၣ်ဘၣ်. အဝဲသ့ၣ်ညါဝဲလၢ ပမ့ၢ်မၤ ယဟိဝၤယွၤ အတၢ်မၤဆူၣ်ဆူၣ်န့ၣ် ပနီၢ်သးအဂံၢ်အဘါကဆူၣ်ထီၣ်ဝဲလီၤ. လၢတၢ်န့ၣ်အဃိ ဖဲနတူၢ်ဘၣ်လၢ နလီၤဘှံးလီၤတီၤ ဒီးနသူၣ်လီၤဘှံးသးလီၤဘှံးအခါ တဘၣ်ထုးယံၤထီၣ်နသးဒီး ယဟိဝၤယွၤတဂ့ၤ. သုးဘူးနသးဆူ ယဟိဝၤယွၤအအိၣ်တက့ၢ်. လံာ်စီဆှံတဲဝဲလၢယွၤ– “ကမၤလၢထီၣ်ပှဲၤထီၣ်, ဂၢၢ်ထီၣ်ကျၢၤထီၣ်, ဆူၣ်ထီၣ်ချ့ထီၣ်သု” လီၤ. (၁ ပ့းတရူး ၅:၁၀; ယၤကိာ် ၄:၈) လၢတၢ်မၤလိအံၤအပူၤ ပကမၤလိဘၣ် ယၡါယၤ ၄၀:၂၆-၃၁ လၢအဘၣ်ဃးဒီး ယဟိဝၤယွၤ အတၢ်သ့တၢ်ဘၣ်လၢ ကမၤဆူၣ်ထီၣ်ပဂံၢ်ပဘါန့ၣ်လီၤ. တကးဒံးဘၣ် ပကမၤလိဘၣ် တၢ်အိၣ်သးခံခါလၢ အကမၤလီၤစၢ် ပတၢ်သူၣ်ဆူၣ်သးဆူၣ်လၢ ပကမၤယဟိဝၤယွၤအတၢ်မၤ ဒီးဒ်သိးပလဲၤခီဖျိ တၢ်ကီတၢ်ခဲတဖၣ်ကန့ၢ်အဂီၢ် လံာ်စီဆှံအတၢ်ဟံးစုနဲၣ်ကျဲတဖၣ် မၤစၢၤပှၤကသ့ဒ်လဲၣ်န့ၣ်လီၤ.
ပှၤလၢအမုၢ်လၢ်တၢ်လၢ ယဟိဝၤယွၤန့ၣ် ကဒိးန့ၢ်ဘၣ်တၢ်ဂံၢ်တၢ်ဘါ
၄. ယၡါယၤ ၄၀:၂၆ အပူၤန့ၣ် ပမၤလိန့ၢ်ဘၣ်တၢ်မနုၤလဲၣ်.
ဒ်သိးနလဲၤခီဖျိ တၢ်ကီတၢ်ခဲကန့ၢ်အဂီၢ် ယဟိဝၤယွၤဟ့ၣ်နၤ တၢ်ဂံၢ်တၢ်ဘါလၢ နလိၣ်ဘၣ်တဖၣ်သ့ဝဲလီၤ
၄ ဖး ယၡါယၤ ၄၀:၂၆ တက့ၢ်. ဆၣ်တဖၣ်န့ၣ် ပှၤဂံၢ်အီၤတသ့နီတဂၤဘၣ်. ပှၤစဲအ့ၣ်ဖိတဖၣ် တယာ်ဝဲလၢ ထဲလၢပကလဲးစံၣ် (galaxy) တခါအပူၤန့ၣ် ဆၣ်အိၣ်ဝဲ အကကွဲၢ်လွံၢ်ကလီၢ် ဃၣ်ဃၣ်ညါ. ဘၣ်ဆၣ် ယဟိဝၤယွၤ ယုၢ်န့ၢ်ဝဲဆၣ်တဖျၢၣ်စုာ်စုာ်အမံၤလီၤ. အဃိပသ့ၣ်ညါအါထီၣ် ယဟိဝၤယွၤ အဂ့ၢ်ဒ်လဲၣ်. ဆၣ်လၢအသးသမူတအိၣ်ဘၣ်ဒၣ်လဲာ် ယဟိဝၤယွၤ မ့ၢ်သးအိၣ်ဝဲထဲထဲအံၤန့ၣ် အဝဲကသးအိၣ်နၤထဲလဲၣ်န့ၣ် ဆိကမိၣ်ကွၢ်တက့ၢ်. နမၤယွၤအတၢ်မၤ မ့ၢ်လၢနအဲၣ်အီၤအဃိ အဝဲကသးအိၣ်နၤဖးဒိၣ်ညါ. (စံးထီၣ်ပတြၢၤ ၁၉:၁, ၃, ၁၄) ပပၢ်အိၣ်လၢမူခိၣ် သ့ၣ်ညါပဂ့ၢ်ခဲလၢာ်လီၤ. လံာ်စီဆှံ တဲဝဲလၢ “သုခိၣ်သူအဘိဒၣ်လဲာ် ဘၣ်တၢ်ဂံၢ်အီၤခဲလၢာ်လီၤ.” (မးသဲ ၁၀:၃၀) ယဟိဝၤယွၤ အဲၣ်ဒိးလၢပကသ့ၣ်ညါလၢ အဝဲ “ကွၢ်ထွဲပှၤလၢ အဒိကနၣ်အီၤ” န့ၣ်လီၤ. (စံးထီၣ်ပတြၢၤ ၃၇:၁၈, ခ့ခါစှီၤကျိာ်) နတၢ်ကီတၢ်ခဲတဖၣ်န့ၣ် ယဟိဝၤယွၤ ထံၣ်ဝဲခဲလၢာ် ဒီးဒ်သိးနလဲၤခီဖျိအီၤ တခါစုာ်စုာ်ကန့ၢ်အဂီၢ် အဝဲဟ့ၣ်နၤတၢ်ဂံၢ်တၢ်ဘါလၢ နလိၣ်ဘၣ်တဖၣ်သ့ဝဲလီၤ.
၅. ဘၣ်မနုၤအဃိ ပနာ်သ့လၢ ယဟိဝၤယွၤ ဟ့ၣ်ပှၤတၢ်ဂံၢ်တၢ်ဘါလၢ ပလိၣ်ဘၣ်တဖၣ်သ့လဲၣ်.
၅ ဖး ယၡါယၤ ၄၀:၂၈ တက့ၢ်. ယဟိဝၤယွၤ မ့ၢ်တၢ်ဂံၢ်တၢ်ဘါ အဂံၢ်ခိၣ်သ့ၣ်လီၤ. ဆိကမိၣ်ကွၢ် မုၢ်အဂ့ၢ်တက့ၢ်. မုၢ်န့ၣ်ဒုးဟးထီၣ်ဝဲ တၢ်ကိၢ်အသဟီၣ်အါမးလီၤ. ပှၤစဲအ့ၣ်ဖိလၢအမ့ၢ် ဒ့ဘ့း ဘိဒ့န့း တဲဝဲဒ်အံၤလီၤ. လၢတစဲးကီးအတီၢ်ပူၤန့ၣ် မုၢ်ဒုးဟးထီၣ်ဝဲ တၢ်ကိၢ်အသဟီၣ်ဆူၣ်ထဲသိးဒီး မ့ၣ်ပိၢ်ဖးဒိၣ် (atomic bombs) အဖျၢၣ်အကကွဲၢ်လၢအကထိ ပိၢ်ဖးဝဲန့ၣ်လီၤ. ပှၤစဲအ့ၣ်ဖိလၢအဂၤတဂၤ ဒွးဝဲလၢ မုၢ်ဒုးဟးထီၣ်တၢ်ကိၢ်အသဟီၣ်လၢ တစဲးကီးအတီၢ်ပူၤန့ၣ် ကလၢဝဲလၢ ပှၤဟီၣ်ခိၣ်ဖိခဲလၢာ် ကသူဝဲလီမ့ၣ်အူလၢအနံၣ် ၂၀၀,၀၀၀ ဃၣ်ဃၣ်ညါ. မ့ၢ်လၢယဟိဝၤယွၤ တ့လီၤဝဲမုၢ်လၢအိၣ်ဒီး တၢ်ဂံၢ်တၢ်ဘါအါထဲထဲအံၤအဃိ ဒ်သိးပလဲၤခီဖျိ တၢ်ကီတၢ်ခဲကန့ၢ်အဂီၢ် တၢ်ဂံၢ်တၢ်ဘါလၢပလိၣ်ဘၣ်တဖၣ်န့ၣ် ယဟိဝၤယွၤဟ့ၣ်ပှၤသ့လီၤ.
၆. ယ့ၣ်ၡူးအနီၣ်ယိးဘိန့ၣ် ဖှံဝဲလၢပဂီၢ်ဒ်လဲၣ် ဒီးကဲဘျုးလၢပဂီၢ်ဒ်လဲၣ်.
၆ ဖး ယၡါယၤ ၄၀:၂၉ တက့ၢ်. ယဟိဝၤယွၤ အတၢ်မၤန့ၣ် ဟ့ၣ်ပှၤတၢ်သူၣ်ခုသးခုဒိၣ်မးလီၤ. ယ့ၣ်ၡူး တဲဘၣ်အပျဲၢ်အဘီၣ်တဖၣ်လၢ– “ဟံးထီၣ်ယနီၣ်ယိးဘိလၢသုလိၤ” တက့ၢ်. ဒီးတဲကဒီးဝဲလၢ– “သုကထံၣ်န့ၢ် တၢ်အိၣ်ဘှံးလၢ သုသးအဂီၢ်လီၤ. အဂ့ၢ်ဒ်အံၤ, ယနီၣ်ယိးဘိမ့ၢ်အညီ, ဒီးယတၢ်ဝံတၢ်ယိးမ့ၢ်အဖှံလီၤ.” (မးသဲ ၁၁:၂၈-၃၀) ယ့ၣ်ၡူးအတၢ်ကတိၤအံၤ မ့ၢ်ဝဲတီဝဲလီၤ. တဘျီတခီၣ် တချုးလၢပလဲၤထီၣ်တၢ်အိၣ်ဖှိၣ် မ့တမ့ၢ် ပလဲၤစံၣ်တဲၤတဲလီၤတၢ်ဒံးဘၣ်အခါ ပကတူၢ်ဘၣ်လၢ ပလီၤဘှံးလီၤတီၤဒိၣ်မးလီၤ. ဘၣ်ဆၣ် ဖဲပလဲၤထီၣ်တၢ်အိၣ်ဖှိၣ် မ့တမ့ၢ် ပလဲၤစံၣ်တဲၤတဲလီၤတၢ်ဝံၤအခါ ပတူၢ်ဘၣ်ဒ်လဲၣ်. ပသးကဖှံထီၣ် ဒီးပကအိၣ်ဒီးတၢ်ဂံၢ်တၢ်ဘါလၢ ပလဲၤခီဖျိတၢ်ကီတၢ်ခဲကန့ၢ်အဂီၢ်လီၤ. ယ့ၣ်ၡူးအနီၣ်ယိးဘိန့ၣ် ဖှံဝဲနီၢ်နီၢ်လီၤ.
၇. မးသဲ ၁၁:၂၈-၃၀ ဘၣ်ဝဲနီၢ်နီၢ်န့ၣ် ဟ့ၣ်တၢ်အဒိတခါတက့ၢ်.
၇ ပကတဲသကိး ဒီပုၢ်ဝဲၢ်မုၣ်တဂၤအဂ့ၢ်လီၤ. အဝဲတူၢ်ဘၣ်ဝဲတၢ်ဆါယံာ်ယံာ်ထၢထၢ လၢအမ့ၢ် အလီၤဘှံးညီ, အသးဂံၢ်ဘါလီၤစၢ် ဒီးအခိၣ်သၣ်ဃံဆါနးမးလီၤ. လၢတၢ်န့ၣ်အဃိ တဘျီတခီၣ် အဝဲကလဲၤထီၣ် တၢ်အိၣ်ဖှိၣ်အဂီၢ် ကီဒိၣ်မးလီၤ. ဘၣ်တနံၤ အဝဲဂုာ်ကျဲးစၢးလဲၤထီၣ်တၢ်အိၣ်ဖှိၣ်လီၤ. အဝဲကွဲးဝဲလၢ– “တၢ်စံၣ်တဲၤတဲလီၤတၢ်န့ၣ် ဘၣ်ဃးဒီးသးဂံၢ်ဘါလီၤစၢ်အဂ့ၢ်လီၤ. ဒီပုၢ်ဝဲၢ်လၢအဟ့ၣ် တၢ်စံၣ်တဲၤတဲလီၤတၢ်တဂၤန့ၣ် ဟ့ၣ်ဝဲတၢ်စံၣ်တဲၤတဲလီၤတၢ် ပှဲၤဒီးတၢ်ဒိသူၣ်ဒိသး ဒီးတၢ်သူၣ်အိၣ်သးအိၣ်အဃိ ယမဲာ်ထံလီၤဝဲလီၤ. မ့ၢ်ဝဲတၢ်ဟ့ၣ်ပလီၢ်လၢ ယကဘၣ်ထီၣ်တၢ်အိၣ်ဖှိၣ်ထီဘိလီၤ.” ခီဖျိလၢအဝဲထဲးဂံၢ်ထဲးဘါ ဒီးလဲၤထီၣ်တၢ်အိၣ်ဖှိၣ်အဃိ အသးခုဝဲဒိၣ်မးလီၤ.
၈, ၉. စီၤပီလူးကွဲးဝဲလၢ– “တုၤယဂံၢ်စၢ်ယဘါစၢ်ဒီး, ယအိၣ်ဒီးယစိယကမီၤ” န့ၣ်အဲၣ်ဒိးစံးဝဲတၢ်မနုၤလဲၣ်.
၈ ဖး ယၡါယၤ ၄၀:၃၀ တက့ၢ်. ပဝဲသ့ၣ်တဖၣ်ပမ့ၢ်အိၣ်ဒီး တၢ်သ့တၢ်ဘၣ်အါမးသနာ်က့ ပသ့ၣ်ညါဘၣ်လၢ ပမၤတၢ်လၢပနီၢ်ကစၢ်အဂံၢ်အဘါ တသ့ခဲလၢာ်ဘၣ်. ပဟံးန့ၢ်တၢ်မၤလိလၢ တၢ်မၢဖိပီလူးအအိၣ်သ့ဝဲလီၤ. အဝဲအိၣ်ဒီးတၢ်သ့တၢ်ဘၣ်အါမး ဘၣ်ဆၣ် တၢ်လၢအဝဲအဲၣ်ဒိးမၤဝဲန့ၣ် မၤဝဲတသ့ခဲလၢာ်ဘၣ်. ဖဲအဝဲတဲပၠး ယဟိဝၤယွၤလၢအတၢ်တူၢ်ဘၣ်အခါ ယဟိဝယွၤ စံးဆၢက့ၤအီၤလၢ– “ယစိယကမီၤလၢထီၣ်ပှဲၤထီၣ်လၢ တၢ်အဂံၢ်စၢ်ဘါစၢ်အပူၤလီၤ.” စီၤပီလူး နၢ်ပၢၢ်ထီၣ်ဝဲတၢ်လၢ ယဟိဝၤယွၤ တဲအီၤန့ၣ်လီၤ. ဒီးအဝဲတဲဝဲလၢ– “တုၤယဂံၢ်စၢ်ယဘါစၢ်ဒီး, ယအိၣ်ဒီးယစိယကမီၤလီၤ.” (၂ ကရံၣ်သူး ၁၂:၇-၁၀) အဝဲအဲၣ်ဒိးစံးဝဲတၢ်မနုၤလဲၣ်.
၉ စီၤပီလူးသ့ၣ်ညါဝဲလၢ အဝဲမၤတၢ်လၢအနီၢ်ကစၢ် အဂံၢ်အဘါတသ့ခဲလၢာ်ဘၣ်. အဝဲလိၣ်ဘၣ် တၢ်မၤစၢၤလၢ ပှၤလၢအိၣ်ဒီး တၢ်စိတၢ်ကမီၤတဂၤအအိၣ်လီၤ. ဖဲအဂံၢ်လီၤစၢ်အခါ ယွၤဟ့ၣ်အီၤအသးစီဆှံလီၤ. တၢ်လၢစီၤပီလူးမၤဝဲလၢ အနီၢ်ကစၢ်တသ့ဘၣ်တဖၣ်ဒၣ်လဲာ် ဒ်သိးအမၤဝဲကသ့အဂီၢ် ယွၤအသးစီဆှံ ဟ့ၣ်အီၤတၢ်ဂံၢ်တၢ်ဘါသ့လီၤ. တၢ်ကဲထီၣ်အသးဒီးပှၤ ဒ်န့ၣ်အသိးသ့စ့ၢ်ကီးလီၤ. ယဟိဝၤယွၤ မ့ၢ်ဟ့ၣ်ပှၤအသးစီဆှံန့ၣ် ပဂံၢ်ပဘါကဆူၣ်ထီၣ်လီၤ.
၁၀. ဒ်သိးစီၤဒၤဝံး လဲၤခီဖျိအတၢ်ကီတၢ်ခဲတဖၣ်ကန့ၢ်အဂီၢ် ယဟိဝၤယွၤမၤစၢၤအီၤဒ်လဲၣ်.
၁၀ ပှၤကွဲးထါ စံးထီၣ်ပတြၢၤ စီၤဒၤဝံး ဒိးန့ၢ်ဘၣ်ဝဲယွၤအသးစီဆှံ အတၢ်မၤစၢၤ ဒ်သိးအဂံၢ်အဘါကဆူၣ်ထီၣ်အဂီၢ်လီၤ. အဝဲသးဝံၣ်ထီၣ်ဝဲလၢ– “ယဃ့ၢ်နုာ်ဖျိလံ ပှၤတဖုလၢနၤ, ဒီးယစံၣ်ကပာ်လံ တၢ်အဒူၣ်လၢယကစၢ်တဂၤန့ၣ်လံ.” (စံးထီၣ်ပတြၢၤ ၁၈:၂၉) ဒ်တၢ်ဒူၣ်ဖးထီလၢ ပထီၣ်အီၤတညီဘၣ်အသိး တဘျီတခီၣ်န့ၣ် ပတူၢ်ဘၣ်လၢ ပတၢ်ကီတၢ်ခဲတဖၣ်ကီဒိၣ်တလၢအဃိ ပမၤဘၣ်ဂီၢ်အီၤလၢ ပနီၢ်ကစၢ်တသ့ဘၣ်. လၢတၢ်န့ၣ်အဃိ ပလိၣ်ဘၣ်ယဟိဝၤယွၤအတၢ်မၤစၢၤလီၤ.
၁၁. ဒ်သိးပလဲၤခီဖျိ ပတၢ်ကီတၢ်ခဲကန့ၢ်အဂီၢ် ယွၤအသးစီဆှံမၤစၢၤပှၤဒ်လဲၣ်.
၁၁ ဖး ယၡါယၤ ၄၀:၃၁ တက့ၢ်. လံာ်ကြီကြာ်တဖၣ်န့ၣ် ဖဲအယူၤလၢကလံၤကျါအခါ အဝဲသ့ၣ်တသူထဲ အနီၢ်ကစၢ်အဂံၢ်အဘါဘၣ်. ကလံၤကလၢၤန့ၣ် စိာ်ကဖီထီၣ်အီၤအဃိ အဝဲသ့ၣ် ယူၤဝဲဖးယံၤဘၣ်ဆၣ် အဂံၢ်အဘါတလၢာ်အါအါဘၣ်. လၢတၢ်န့ၣ်အဃိ ဖဲပအိၣ်ဒီးတၢ်ကီတၢ်ခဲဖးဒိၣ်အခါ သ့ၣ်နီၣ်ထီၣ်လံာ်ကြီကြာ်အဂ့ၢ်တက့ၢ်. ဃ့ကညးယဟိဝၤယွၤလၢ ကဟ့ၣ်နၤ “ပှၤမၤစၢၤတၢ်, သးစီဆှံ” ဒ်သိးနကအိၣ်ဒီး တၢ်ဂံၢ်တၢ်ဘါအဂီၢ်န့ၣ်တက့ၢ်. (ယိၤဟၣ် ၁၄:၂၆) တကးဒံးဘၣ် နဃ့ယဟိဝၤယွၤလၢ ကဟ့ၣ်နၤအသးစီဆှံ ကိးဆၢကိးကတီၢ်ဒဲးသ့ဝဲလီၤ. လီၤဆီဒၣ်တၢ် ဖဲပတၢ်ဂ့ၢ်သဘံၣ်သဘုၣ်အိၣ်ထီၣ် ဒီးဒီပုၢ်ဝဲၢ်တဂၤလၢတၢ်အိၣ်ဖှိၣ်ပူၤအခါ ပဃ့ယွၤအသးစီဆှံ အတၢ်မၤစၢၤသ့ဝဲလီၤ. ဘၣ်ဆၣ် ဘၣ်မနုၤအဃိ တၢ်ဂ့ၢ်သဘံၣ်သဘုၣ် အိၣ်ထီၣ်ဝဲလဲၣ်.
၁၂, ၁၃. (က) တဘျီတခီၣ် ဘၣ်မနုၤအဃိ တၢ်သဘံၣ်သဘုၣ်အိၣ်ထီၣ်လၢ ခရံာ်ဖိတဖၣ် အဘၢၣ်စၢၤသ့လဲၣ်. (ခ) ဘၣ်ဃးဒီးစီၤယိၤသး အတၢ်လဲၤခီဖျိန့ၣ် သိၣ်လိပှၤ ယဟိဝၤယွၤအဂ့ၢ်ဒ်လဲၣ်.
၁၂ ခီဖျိလၢ ပတလၢတပှဲၤဘၣ်အဃိ တၢ်သဘံၣ်သဘုၣ်အိၣ်ထီၣ်ဝဲသ့လီၤ. တဘျီတခီၣ် ပှၤကတဲကမၣ် မ့တမ့ၢ် မၤကမၣ်ပှၤ ဒီးပဝဲစ့ၢ်ကီး ပကတဲကမၣ် မ့တမ့ၢ် မၤကမၣ်ဘၣ်ပှၤဂၤသ့လီၤ. တၢ်မ့ၢ်ကဲထီၣ်အသးဒ်အံၤန့ၣ် မ့ၢ်ဝဲတၢ်မၤကွၢ်တခါလီၤ. ဘၣ်ဆၣ် ဖဲန့ၣ်အခါ ပဒိးန့ၢ်ဘၣ်တၢ်ခွဲးတၢ်ယာ်လၢ ပကပာ်ဖျါထီၣ် ပတၢ်သးတီဒီးယဟိဝၤယွၤန့ၣ်လီၤ. လၢကျဲဒ်လဲၣ်. ခီဖျိပဂုာ်ကျဲးစၢး မၤသကိးတၢ်ဒီး ပဒီပုၢ်ဝဲၢ်တဖၣ်လီၤ. ပဒီပုၢ်ဝဲၢ်တဖၣ် တလၢတပှဲၤဘၣ်သနာ်က့ ယဟိဝၤယွၤ အဲၣ်အဝဲသ့ၣ်အဃိ ပဝဲစ့ၢ်ကီး ပကြၢးအဲၣ်အဝဲသ့ၣ်လီၤ.
ယဟိဝၤယွၤ တပာ်တ့ၢ်ဝဲ စီၤယိၤသးဘၣ် ဒီးတပာ်တ့ၢ်စ့ၢ်ကီးနၤဘၣ် (ကွၢ်လံာ်အဆၢ ၁၃)
၁၃ ပမ့ၢ်ကွၢ်လၢ စီၤယိၤသးအတၢ်လဲၤခီဖျိန့ၣ် ပသ့ၣ်ညါဘၣ်လၢ ယဟိဝၤယွၤတဒီသဒၢဝဲ အခ့အပှၤတဖၣ် ဒ်သိးအသုတဘၣ် တၢ်မၤကွၢ်တဂ့ၤအဂီၢ်န့ၣ်ဘၣ်. ဖဲစီၤယိၤသးအသးစၢ်ဒံးအခါ အဒီပုၢ်ဝဲၢ်တဖၣ် အသးက့ၣ်အီၤအဃိ ဆါလီၤကွံာ်အီၤဒ်ကုၢ်တဂၤအသိး ဒီးဘၣ်တၢ်က့ၤကိးအီၤလၢ ကီၢ်အဲၤကူပတူးလီၤ. (၁ မိၤၡ့ ၃၇:၂၈) တၢ်မၤအသးတဖၣ်အံၤန့ၣ် ယဟိဝၤယွၤ ထံၣ်ဝဲခဲလၢာ်အဃိ ဖဲအတံၤသကိး စီၤယိၤသးလၢအိၣ်ဒီးတၢ်သးတီတဂၤ ဘၣ်တၢ်မၤအၢမၤနးအီၤအခါ ယဟိဝၤယွၤ အသးကဘၣ်ဒိဒိၣ်မးလီၤ. ဘၣ်ဆၣ် ယဟိဝၤယွၤ တမၤပတုာ်ကွံာ်ဝဲ တၢ်ကဲထီၣ်အသးတဖၣ်အံၤဘၣ်. လၢခံဖဲ ပှၤပာ်ဒ့ၣ်ပာ်ကမၣ် စီၤယိၤသးလၢ အဖီၣ်န့ၢ်ဆူၣ်ဝဲစီၤပိၤတံၤဖၢ်အမါ ဒီးပှၤဖၢနုာ်အီၤလၢ ဃိာ်ပူၤအခါဒၣ်လဲာ် ယဟိဝၤယွၤ တမၤပူၤဖျဲးအီၤဒံးဘၣ်. မ့ၢ်ယွၤပာ်တ့ၢ်ကွံာ် စီၤယိၤသးဧါ. တမ့ၢ်ဒ်န့ၣ်ဘၣ်. လံာ်စီဆှံ တဲဝဲလၢ “ယွၤအိၣ်ဒီးစီၤယိၤသး, ဒီးအတၢ်မၤန့ၣ် ယွၤဒုးကဲထီၣ်ဝဲလီၤ.”—၁ မိၤၡ့ ၃၉:၂၁-၂၃.
၁၄. ပမ့ၢ်သးဒိၣ်ထီၣ်တၢ်န့ၣ် ကမၤဘၣ်ဒိပှၤဒ်လဲၣ်.
၁၄ တၢ်အဒိလၢ အဂၤတခါန့ၣ် မ့ၢ်ဝဲစီၤဒၤဝံး အဂ့ၢ်လီၤ. ပှၤတထံၣ်ဘၣ်တၢ်ကီတၢ်ခဲ ထဲသိးဒီး စီၤဒၤဝံးကြီကြီဘၣ်. စီၤဒၤဝံးထံၣ်ဘၣ် တၢ်ကီတၢ်ခဲဘၣ်ဆၣ် အဝဲတသးပှံၢ်ထီၣ်တၢ်ဘၣ်. အဝဲကွဲးဝဲလၢ– “ဆိတ့ၢ်လၢတၢ်သးထီၣ်န့ၣ်, ဒီးလဲၤသဒၣ်တၢ်သးကဲၤထီၣ်န့ၣ်တက့ၢ်. မၤကိၢ်ထီၣ်နသး တုၤနမၤတၢ်အၢန့ၣ်တဂ့ၤ.” (စံးထီၣ်ပတြၢၤ ၃၇:၈) ပမ့ၢ် “ဆိတ့ၢ်” ကွံာ်တၢ်သးထီၣ် မ့တမ့ၢ် ပမ့ၢ်တသးထီၣ်တၢ်ဘၣ်န့ၣ် မ့ၢ်ဒၣ်ပကွၢ်လိမၤဒိး ယဟိဝၤယွၤလီၤ. ကစၢ်ယွၤန့ၣ် “တမၤဘၣ်ပှၤဒ်ပတၢ်ဒဲးဘးအသိးဘၣ်.” တကးဒံးဘၣ် ပျၢ်ကွံာ်ပတၢ်ကမၣ်စ့ၢ်ကီးလီၤ. (စံးထီၣ်ပတြၢၤ ၁၀၃:၁၀) ပမ့ၢ်သးထီၣ်တၢ်န့ၣ် ကမၤဘၣ်ဒိပှၤအါမးလီၤ. အဒိ, ပမ့ၢ်သးဒိၣ်ထီၣ်တၢ်န့ၣ် ပသွံၣ်ထီၣ်သ့ ဒီးကဲထီၣ်တၢ်ကီတၢ်ခဲလၢ ပကလံၤကျိၤအဂီၢ်သ့ဝဲလီၤ. ဒီးမၤဘၣ်ဒိဝဲ ပသူၣ်ဒီးပကပီၤ (pancreas) ဒီးကဲထီၣ်တၢ်ကီတၢ်ခဲလၢ ပကဖုကဂံာ်ဘျဲးတၢ်အီၣ်အဂီၢ်လီၤ. တကးဒံးဘၣ် ဖဲပသးဒိၣ်ထီၣ်တၢ်အခါ ပဆိကမိၣ်တၢ် တချုးလၢၤဘၣ်. လၢတၢ်န့ၣ်အဃိ တဘျီတခီၣ် ပကတဲကမၣ် မ့တမ့ၢ် မၤဘၣ်တၢ်တမံၤမံၤလၢ အမၤဘၣ်ဒိပှၤဂၤ ဒီးမ့ၢ်လၢပမၤဘၣ်ဒ်န့ၣ်အဃိ ပကသးအုးဖးယံာ်ညါလီၤ. လၢတၢ်န့ၣ်အဃိ ပမ့ၢ်ကီၤပသးန့ၣ် ကကဲဘျုးဝဲဒိၣ်မးလီၤ. လံာ်စီဆှံတဲဝဲလၢ– “ပှၤအသးမုာ်န့ၣ်မ့ၢ်ပှၤအဖံးအညၣ်အတၢ်မူလီၤ.” (ကတိၤဒိ ၁၄:၃၀) ဖဲပှၤဂၤမၤဘၣ်ဒိပသးအခါ ပကဘၣ်မၤဒ်လဲၣ်. ဒီးပမၤဃူမၤဖိးတၢ်ဒီး ပဒီပုၢ်ဝဲၢ်တဖၣ်ကသ့ဒ်လဲၣ်. ပမၤထွဲဒ်လံာ်စီဆှံ အတၢ်ဟံးစုနဲၣ်ကျဲအသိးသ့ဝဲလီၤ.
ဖဲပဒီပုၢ်ဝဲၢ်တဖၣ် မၤဘၣ်ဒိပှၤအခါ
၁၅, ၁၆. ဖဲပှၤတဂၤဂၤ မၤဘၣ်ဒိပှၤအခါ ပကြၢးမၤဒ်လဲၣ်.
၁၅ ဖး အ့းဖ့းစူး ၄:၂၆ တက့ၢ်. ပှၤတၢ်ချၢတဖၣ် မ့ၢ်မၤဘၣ်ဒိပှၤန့ၣ် ပတူၢ်အီၤကဲလီၤ. ဘၣ်ဆၣ် ပဟံၣ်ဖိဃီဖိ မ့တမ့ၢ် ဒီပုၢ်ဝဲၢ်လၢတၢ်အိၣ်ဖှိၣ်ပူၤ တဂၤဂၤမ့ၢ်မၤဘၣ်ဒိပှၤန့ၣ် ပသးကဘၣ်ဒိ ဒီးပတူၢ်ဘၣ်အီၤကကီဒိၣ်မးလီၤ. ဖဲန့ၣ်အခါ ပသးပ့ၤနီၣ်တၢ်လၢ အဝဲသ့ၣ်မၤဝဲတဖၣ်မ့ၢ်တန့ၢ်ဘၣ်န့ၣ် ပကမၤဒ်လဲၣ်. မ့ၢ်ပကသးဒိၣ်အဝဲသ့ၣ် ယံာ်လၢအနံၣ်တဖၣ်ဧါ. မ့တမ့ၢ် မ့ၢ်ပကမၤထွဲ လံာ်စီဆှံအတၢ်ဟံးစုနဲၣ်ကျဲ ဒီးမၤဘၣ်ဂီၢ်က့ၤ တၢ်ဂ့ၢ်ကီတဖၣ်လၢအဆိအချ့ဧါ. ပမ့ၢ်ထုးယံာ်တၢ်ဆၢကတီၢ်န့ၣ် ပမၤဃူမၤဖိးတၢ်ဒီးပဒီပုၢ်ဝဲၢ်တဖၣ် ကကီဒိၣ်ထီၣ်ဝဲလီၤ.
၁၆ ဒီပုၢ်ဝဲၢ်တဂၤ မ့ၢ်မၤကမၣ်နၤ ဒီးနသးပ့ၤနီၣ်တၢ်လၢ အမၤဝဲတဖၣ်မ့ၢ်တန့ၢ်ဘၣ်န့ၣ်နကမၤဒ်လဲၣ်. နမၤဃူမၤဖိးတၢ်ဒီးအီၤကသ့ဒ်လဲၣ်. တၢတထံၣ်န့ၣ် ဃ့ဘါထုကဖၣ်လၢ ယဟိဝၤယွၤအအိၣ်တက့ၢ်. ဒ်သိး နလဲၤတဲသကိးတၢ်ဒီးအီၤလၢ တၢ်ကတိၤမုာ်မုာ်ကသ့အဂီၢ် ဃ့တၢ်မၤစၢၤလၢ ယဟိဝၤယွၤအအိၣ်တက့ၢ်. သ့ၣ်နီၣ်ထီၣ်လၢ နဒီပုၢ်ဝဲၢ်န့ၣ် မ့ၢ်ဝဲယဟိဝၤယွၤအတံၤသကိးန့ၣ်တက့ၢ်. (စံးထီၣ်ပတြၢၤ ၂၅:၁၄) ဒီးကစၢ်ယွၤအဲၣ်အီၤစ့ၢ်ကီးလီၤ. ယဟိဝၤယွၤန့ၣ် ရ့ဒီးအတံၤသကိးတဖၣ်လၢ တၢ်အဲၣ်တၢ်ကွံအပူၤအဃိ အဝဲအဲၣ်ဒိးလၢ ပကမၤဒ်န့ၣ်အသိးစ့ၢ်ကီးလီၤ. (ကတိၤဒိ ၁၅:၂၃; မးသဲ ၇:၁၂; ကလီးစဲ ၄:၆) ဒီးခံထံၣ်တထံၣ်န့ၣ် နကတဲတၢ်ဂ့ၢ် မနုၤလဲၣ်န့ၣ် ဆိကမိၣ်ဆိအီၤဂ့ၤဂ့ၤတက့ၢ်. တဘၣ်ဆိကမိၣ်လၢ အဝဲအဲၣ်ဒိးမၤဘၣ်ဒိနၤတဂ့ၤ. ဘၣ်သ့ၣ်သ့ၣ် ကမ့ၢ်လၢ အဝဲနၢ်ပၢၢ်ကမၣ်နၤ မ့တမ့ၢ် နနၢ်ပၢၢ်ကမၣ်အီၤအဃိလီၤ. ဒီးသးအိၣ်တူၢ်လိာ်လၢ တၢ်သဘံၣ်သဘုၣ်ဟဲကဲထီၣ်အသးလၢ နဃိစ့ၢ်ကီးတက့ၢ်. နစးထီၣ်တဲအီၤဒ်အံၤ သ့ဝဲလီၤ, “ဘၣ်သ့ၣ်သ့ၣ် ကမ့ၢ်လၢ ယသးချ့အဃိ, ဘၣ်ဆၣ် တၢ်ကတိၤလၢ နတဲယၤ ဖဲမဟါတနံၤန့ၣ် ယတူၢ်ဘၣ်လၢ . . . ” နမၤဒ်န့ၣ်ဘၣ်ဆၣ် နမၤဃူမၤဖိးတၢ်မ့ၢ်တန့ၢ်ဒံးဘၣ်န့ၣ် တဘၣ်ဟ့ၣ်အၡူတဂ့ၤ ဆဲးဂုာ်ကျဲးစၢးတက့ၢ်. ဃ့ဘါထုကဖၣ်န့ၢ်တၢ်လၢ နဒီပုၢ်ဝဲၢ်အဂီၢ်တက့ၢ်. ဒီးဃ့လၢယွၤကဆိၣ်ဂ့ၤအီၤ ဒီးဃ့စ့ၢ်ကီးလၢ နကဃုထံၣ်န့ၢ် နဒီပုၢ်ဝဲၢ်အတၢ်ဂ့ၤတၢ်ဝါတဖၣ်တက့ၢ်. နသးအိၣ်ဂုာ်ကျဲးစၢး မၤဃူမၤဖိးတၢ်ဒီး နဒီပုၢ်ဝဲၢ်လၢအမ့ၢ် ယဟိဝၤယွၤအတံၤသကိးအဃိ နနာ်သ့သပှၢ်ကတၢၢ်လၢ ယဟိဝၤယွၤကသးခုဝဲဒိၣ်မးလီၤ.
ဖဲပသးဟးဂီၤလၢ တၢ်ကမၣ်လၢ ပမၤဘၣ်လၢ အပူၤကွံာ်တဖၣ်အဃိအခါ
၁၇. ဖဲပမၤကမၣ်တၢ်အခါ ဒ်သိးပတၢ်ရ့လိာ်သးဒီးယဟိဝၤယွၤ ကဂ့ၤထီၣ်က့ၤအဂီၢ် ယဟိဝၤယွၤ မၤစၢၤပှၤဒ်လဲၣ်. ဒီးဘၣ်မနုၤအဃိ ပကဘၣ်တူၢ်လိာ်တၢ်မၤစၢၤလဲၣ်.
၁၇ ပှၤတနီၤနီၤန့ၣ် မၤဘၣ်တၢ်ကမၣ်ဖးဒိၣ်အဃိ အဝဲသ့ၣ်တူၢ်ဘၣ်ဝဲလၢ တကြၢးဒီး ယဟိဝၤယွၤ အတၢ်မၤလၢၤဘၣ်. နမ့ၢ်တူၢ်ဘၣ်ဒ်န့ၣ်န့ၣ် နဂံၢ်နဘါကလီၤစၢ် ဒီးနတၢ်သူၣ်ခုသးခုတအိၣ်လၢၤဘၣ်. ဖဲစီၤပၤဒၤဝံး တူၢ်ဘၣ်ဝဲလၢ အအိၣ်ဒီးတၢ်ကမၣ်အခါ အဝဲသးအုးဝဲဒိၣ်မးလီၤ. အဝဲတဲဝဲလၢ– “ဖဲယအိၣ်ဘှီၣ်ကလာ်ဒီး, ယဃံလီၢ်လံၤဝဲလၢ ယကိးပသူထီၣ် သ့သ့တနံၤအဃိလီၤ. အဂ့ၢ်ဒ်အံၤ, လၢမုၢ်ဆါဆဲးလၢမုၢ်နၤန့ၣ် နစုအိၣ်ဃၢလၢယလိၤလီၤ.” ဘၣ်ဆၣ် လၢတၢ်သးဒူအပူၤ အဝဲမၤဝဲဒ် ယဟိဝၤယွၤအဲၣ်ဒိးဝဲအသိးလီၤ. အဝဲတဲဝဲလၢ, “ယဘိးဘၣ်သ့ၣ်ညါနၤလၢ ယတၢ်ဒဲးဘး . . . ဒီးနပျၢ်ကွံာ် ယတၢ်ဒဲးဘးလီၤ.” (စံးထီၣ်ပတြၢၤ ၃၂:၃-၅) နမ့ၢ်မၤဘၣ် တၢ်ကမၣ်ဖးဒိၣ် ဘၣ်ဆၣ် ယဟိဝၤယွၤ သးအိၣ်ပျၢ်နတၢ်ကမၣ်လီၤ. အဝဲအဲၣ်ဒိး မၤစၢၤနၤ ဒ်သိးနတၢ်ရ့လိာ်သးဒီးအီၤ ကဂ့ၤထီၣ်က့ၤအဂီၢ်လီၤ. ဘၣ်ဆၣ် နကဘၣ်တူၢ်လိာ် တၢ်မၤစၢၤလၢ အဝဲကတဲာ်ကတီၤန့ၢ်နၤ ခီဖျိတၢ်အိၣ်ဖှိၣ်သးပှၢ်တဖၣ်န့ၣ်လီၤ. (ကတိၤဒိ ၂၄:၁၆; ယၤကိာ် ၅:၁၃-၁၅) နကဒိးန့ၢ်ဘၣ် တၢ်မူအထူအယိာ်ဧါ တဒိးန့ၢ်ဘၣ်ဧါန့ၣ် သန့ၤထီၣ်အသးလၢ တၢ်ဂ့ၢ်အံၤအဖီခိၣ်လီၤ. လၢတၢ်န့ၣ်အဃိ တဘၣ်မၤယံာ်မၤနီၢ်နသးလၢ ကလဲၤဃ့တၢ်မၤစၢၤလၢ တၢ်အိၣ်ဖှိၣ်သးပှၢ်အအိၣ်တဂ့ၤ. ဘၣ်ဆၣ် နတၢ်ကမၣ် မ့ၢ်ဘၣ်တၢ်ပျၢ်အီၤဝံၤလံ ဒီးနမ့ၢ်တူၢ်ဘၣ်လၢ နတၢ်ကမၣ်အိၣ်ဒံးန့ၣ် နကဘၣ်မၤဒ်လဲၣ်.
၁၈. ပှၤလၢအတူၢ်ဘၣ်ဝဲလၢ တကြၢးဒီး ယဟိဝၤယွၤ အတၢ်မၤလၢၤဘၣ်န့ၣ် စီၤပီလူး အဒိအတဲာ်မၤစၢၤ အဝဲသ့ၣ်ကသ့ဒ်လဲၣ်.
၁၈ တဘျီတခီၣ် တၢ်မၢဖိပီလူးစ့ၢ်ကီး အသူၣ်အုးသးအုးခီဖျိလၢ အဝဲမၤကမၣ်တၢ် လၢညါတဖၣ်အဃိလီၤ. အဝဲတဲဝဲလၢ– “ယဲဒၣ်အံၤ ယမ့ၢ်ပှၤတၢ်မၢဖိအဆံးကတၢၢ်လၢ ယမၤအၢမၤသီယွၤအတၢ်အိၣ်ဖှိၣ်အဃိ, ဒီးတၢ်တဂ့ၤကိးဘၣ်ယၤလၢ ပှၤတၢ်မၢဖိဘၣ်.” ဘၣ်ဆၣ် အဝဲတဲကဒီးဝဲလၢ– “လၢယွၤအဘျုးအဖှိၣ်အဃိဒီး, ယမ့ၢ်တၢ်လၢယမ့ၢ်” လီၤ. (၁ ကရံၣ်သူး ၁၅:၉, ၁၀) ယဟိဝၤယွၤ သ့ၣ်ညါဝဲလၢ စီၤပီလူးမ့ၢ်ပှၤတလၢတပှဲၤဘၣ်. ဘၣ်ဆၣ် အဝဲတူၢ်လိာ်ဝဲ စီၤပီလူး ဒီးအဝဲအဲၣ်ဒိးလၢ စီၤပီလူးကသ့ၣ်ညါဝဲ တၢ်ဂ့ၢ်အံၤလီၤ. ဖဲနမၤဘၣ်တၢ်ကမၣ်အခါ နမ့ၢ်ပီၢ်ယၢ်လီၤက့ၤနသးနီၢ်နီၢ်န့ၣ် တဲဘၣ်ယဟိဝၤယွၤလၢ နတၢ်ဂ့ၢ်တၢ်ကျိၤ ဒီးအလီၢ်မ့ၢ်အိၣ်လၢ နကဘၣ်လဲၤတဲ တၢ်အိၣ်ဖှိၣ်သးပှၢ်န့ၣ် လဲၤတဲအီၤလၢအဆိအချ့တက့ၢ်. နမ့ၢ်မၤဒ်န့ၣ်န့ၣ် ယဟိဝၤယွၤ ကပျၢ်ကွံာ်နတၢ်ကမၣ်သပှၢ်တၢၢ်လီၤ. နာ်လၢယဟိဝၤယွၤ ပျၢ်ကွံာ်နတၢ်ကမၣ်နီၢ်နီၢ် ဒီးတူၢ်လိာ်လၢ အဝဲပျၢ်နတၢ်ကမၣ်တက့ၢ်.—ယၡါယၤ ၅၅:၆, ၇.
၁၉. ၂၀၁၈ လံာ်စီဆှံအဆၢလၢ တနံၣ်အဂီၢ်န့ၣ် မ့ၢ်မနုၤလဲၣ် ဒီးဘၣ်မနုၤအဃိ အရ့ဒိၣ်လဲၣ်.
၁၉ မ့ၢ်လၢတၢ်အကတၢၢ် ဘူးထီၣ်ဝဲလံအဃိ ပသ့ၣ်ညါလၢ ပကထံၣ်ဘၣ် တၢ်ကီတၢ်ခဲအါထီၣ်လီၤ. ဘၣ်ဆၣ် ပကဘၣ်သ့ၣ်နီၣ်ထီၣ်လၢ “ပှၤလၢအလီၤဘှါန့ၣ် ယွၤဟ့ၣ်ဝဲလၢအဂံၢ်အဘါလီၤ. ဒီးပှၤလၢအဂံၢ်အဘါတအိၣ်ဘၣ်န့ၣ် ဒုးဆူၣ်ထီၣ်ဝဲ အဂံၢ်အဘါလီၤ.” လၢတၢ်န့ၣ်အဃိ ဒ်သိးပကဆဲးမၤအတၢ်မၤလၢ တၢ်သးတီပူၤအဂီၢ် တၢ်ဂံၢ်တၢ်ဘါလၢ ပလိၣ်ဘၣ်တဖၣ်န့ၣ် ယဟိဝၤယွၤ ဟ့ၣ်ပှၤသ့လီၤ. (ယၡါယၤ ၄၀:၂၉; စံးထီၣ်ပတြၢၤ ၅၅:၂၂; ၆၈:၁၉) လၢ ၂၀၁၈ ဒီတနံၣ်အတီၢ်ပူၤ ဖဲပလဲၤထီၣ်တၢ်အိၣ်ဖှိၣ် တဘျီလၢ်လၢ်အခါန့ၣ် ပကထံၣ်ဘၣ် လံာ်စီဆှံအဆၢလၢ အကဒုးသ့ၣ်နီၣ်ထီၣ်ပှၤ တၢ်ဂ့ၢ်အံၤန့ၣ်လီၤ. လံာ်စီဆှံအဆၢလၢ တနံၣ်အဂီၢ် တဲဝဲလၢ– “မ့မ့ၢ်ပှၤလၢ အမုၢ်လၢ်တၢ်လၢယွၤန့ၣ် အဂံၢ်အဘါကဆူၣ်ထီၣ်လီၤ.”—ယၡါယၤ ၄၀:၃၁.