တၢ်မၤလိ ၂၃
နမ့ၢ်ဒိးဘျၢထံန့ၣ် နကဒိးန့ၢ်ဘၣ် တၢ်ဆိၣ်ဂ့ၤအါမး
ယ့ၣ်ၡူးတဲဝဲလၢ ခရံာ်ဖိကိးဂၤဒဲးန့ၣ် ကဘၣ်ဒိးဘျၢထံ. (ဖး မးသဲ ၂၈:၁၉, ၂၀.) ဘၣ်ဆၣ် တၢ်ဒိးဘျၢထံန့ၣ် မ့ၢ်မနုၤလဲၣ်. ဒီးဒ်သိး ပှၤတဂၤ ကတုၤထီၣ်ထီၣ်ဘးလၢ အဖီတၢၣ်လၢ ကဒိးဘျၢထံအဂီၢ် အကဘၣ်မၤမနုၤလဲၣ်.
၁. တၢ်ဒိးဘျၢထံန့ၣ် မ့ၢ်မနုၤလဲၣ်.
တၢ်ကတိၤ လၢအမ့ၢ် “တၢ်ဒိးဘျၢထံ” န့ၣ်မ့ၢ်ဝဲ ကြံးအတၢ်ကတိၤ လၢအအဲၣ်ဒိးတဲဝဲ “ဘျၢလီၤ” လၢထံအဖီလာ်. ဖဲယ့ၣ်ၡူး ဒိးဘျၢထံအခါ ပှၤဘျၢလီၤအီၤဒီတဂၤ လၢထံကျိယၢ်ဒ့ၣ်အပူၤ ဝံၤဒီးအ “ဟဲထီၣ်လၢထံကျါ.” (မၢ်ကူး ၁:၉, ၁၀) ဒ်ယ့ၣ်ၡူး မၤဝဲအသိး မုၢ်မဆါတနံၤအံၤ ဖဲခရံာ်ဖိအမ့ၢ်အတီတဖၣ် ဒိးဘျၢထံအခါ အနီၢ်ခိဒီဂၤညါန့ၣ် ပှၤဘျၢလီၤဝဲလၢ ထံဖီလာ်.
၂. ဖဲပှၤတဂၤ ဒိးဘျၢထံအခါ အပာ်ဖျါထီၣ်မနုၤလဲၣ်.
ဖဲပှၤတဂၤ ဒိးဘျၢထံအခါ အပာ်ဖျါထီၣ်ဝဲလၢ အဟ့ၣ်လုၢ်ထီၣ်အသး လၢယဟိဝၤယွၤအအိၣ် ဝံၤလံ. ပှၤတဂၤ ဟ့ၣ်လုၢ်ထီၣ်အသး လၢယဟိဝၤယွၤအအိၣ် သ့ဒ်လဲၣ်. တချုးလၢ အဒိးဘျၢထံဒံးဘၣ်န့ၣ် အကဘၣ် ဟ့ၣ်လုၢ်ထီၣ်အသး. ဒီးအဟ့ၣ်လုၢ်ထီၣ်အသး သ့ခီဖျိ အဃ့ထုကဖၣ် ဒီးတဲယဟိဝၤယွၤလၢ အအဲၣ်ဒိးမၤ ကစၢ်ယွၤအတၢ်မၤ တစိၤသး. တကးဒံးဘၣ် အအၢၣ်လီၤဝဲလၢ အကဘူၣ်ထီၣ်ဘါထီၣ် ထဲယဟိဝၤယွၤတဂၤ ဒီးအကပာ်ဆိ ကစၢ်ယွၤ အတၢ်ဘၣ်သးလၢ အတၢ်အိၣ်မူအပူၤ. အဆၢတဲာ်လီၤအသးလၢအ ‘တအိၣ်မူလၢ အနီၢ်ကစၢ်အဂီၢ်လၢၤဘၣ်’ ဒီးကဆဲးအိၣ်မူမၤထွဲဝဲ ယ့ၣ်ၡူးအတၢ်သိၣ်လိတဖၣ် ဒီးအဒိအတဲာ်. (မးသဲ ၁၆:၂၄) အတၢ်ဟ့ၣ်လုၢ်ထီၣ်သး ဒီးအတၢ်ဒိးဘျၢထံအံၤ မၤစၢၤအီၤဒ်သိး အတၢ်ရ့လိာ်သးဒီး ယဟိဝၤယွၤ ဒီးအဒီပုၢ်ဝဲၢ်မုၣ်ခွါတဖၣ် ကဂ့ၤဝဲအဂီၢ်.
၃. ဒ်သိး နကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် နကဘၣ်မၤမနုၤလဲၣ်.
တချုးလၢ နဒိးဘျၢထံဒံးဘၣ်န့ၣ် အရ့ဒိၣ်လၢ နကဘၣ်မၤလိ ယဟိဝၤယွၤအဂ့ၢ် ဒီးမၤအါထီၣ် နတၢ်နာ်န့ၢ်အီၤ. (ဖး ဧ့ၤဘြံၤ ၁၁:၆.) နသ့ၣ်ညါ ယဟိဝၤယွၤအဂ့ၢ် မ့ၢ်အါထီၣ် ဒီးနတၢ်နာ်အီၤ မ့ၢ်အါထီၣ်န့ၣ် နတၢ်အဲၣ်အီၤစ့ၢ်ကီး ကအါထီၣ်ဝဲ. ဝံၤဒီး နကအဲၣ်ဒိး တဲဘၣ်ပှၤဂၤလၢ ကစၢ်ယွၤအဂ့ၢ် ဒီးအိၣ်မူမၤထွဲ အတၢ်သိၣ်တၢ်သီတဖၣ်. (၂ တံၤမသ့း ၄:၂; ၁ ယိၤဟၣ် ၅:၃) ပှၤတဂၤမ့ၢ်အိၣ်မူ “ဒ်ပှၤလၢအကြၢးဝဲဘၣ်ဝဲဒီး ယဟိဝၤယွၤ” ဒီး “မၤတၢ်ဘၣ်အသးလၢ တၢ်ခဲလၢာ်အပူၤ” န့ၣ်အကအဲၣ်ဒိး ဟ့ၣ်လုၢ်ထီၣ်အသးလၢ ကစၢ်ယွၤအအိၣ် ဒီးဒိးဘျၢထံ.—ကလီးစဲ ၁:၉, ၁၀.a
ဃုသ့ညါအါထီၣ်
ခဲအံၤ ပကတဲသကိး ဘၣ်ဃးဒီး ယ့ၣ်ၡူး အတၢ်ဒိးဘျၢထံအဂ့ၢ်. ဒီးဒ်သိးပှၤတဂၤ ကအိၣ်ကတဲာ်ကတီၤအသးလၢ တၢ်ဒိးဘျၢထံအဂီၢ် အကဘၣ်မၤဒ်လဲၣ်.
၄. ဘၣ်ဃးဒီး ယ့ၣ်ၡူးအတၢ်ဒိးဘျၢထံအဂ့ၢ်န့ၣ် ပသ့ၣ်ညါဘၣ် တၢ်မနုၤလဲၣ်.
ဒ်သိး နကသ့ၣ်ညါအါထီၣ် ဘၣ်ဃးဒီး ယ့ၣ်ၡူး အတၢ်ဒိးဘျၢထံအဂီၢ် ဖး မးသဲ ၃:၁၃-၁၇ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ဖဲယ့ၣ်ၡူး ဒိးဘျၢထံအခါန့ၣ် အကဲဖိသၣ်လၢ အအိၣ်ဖျဲၣ်ထီၣ်သီဧါ.
ယ့ၣ်ၡူး ဒိးဘျၢထံဒ်လဲၣ်. ပှၤဖှံအီၤလၢထံလီၤဧါ.
ယ့ၣ်ၡူး ဒိးဘျၢထံဝံၤအလီၢ်ခံ အဝဲစးထီၣ်မၤဝဲ တၢ်မၤလီၤလီၤ ဆီဆီတခါလၢ ကစၢ်ယွၤဟ့ၣ်အီၤ လၢအကမၤဝဲ လၢဟီၣ်ခိၣ်ချၢ. ဖး လူၤကၣ် ၃:၂၁-၂၃ ဒီး ယိၤဟၣ် ၆:၃၈ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ယ့ၣ်ၡူး ဒိးဘျၢထံဝံၤအလီၢ်ခံ တၢ်မၤလၢ အပာ်ဆိဝဲလၢ အတၢ်အိၣ်မူအပူၤန့ၣ် မ့ၢ်မနုၤလဲၣ်.
၅. တၢ်ဒိးဘျၢထံန့ၣ် ကဲဝဲဖီတၢၣ်တခါ လၢနမၤလၢပှဲၤအီၤန့ၢ်
လၢအခီၣ်ထံးခါန့ၣ် နကဆိကမိၣ်လၢ နဟ့ၣ်လုၢ်ထီၣ်သး ဒီးဒိးဘျၢထံတဘူၣ်ဘၣ်. ဘၣ်ဆၣ် နမ့ၢ်ဆဲးမၤလိအါထီၣ် ဘၣ်ဃးဒီး ယဟိဝၤယွၤအဂ့ၢ် ဒီးဃုသ့ၣ်ညါအါထီၣ်အဂ့ၢ်န့ၣ် နတၢ်သးဒူကအါထီၣ် ဒီးနမၤတၢ်ဆၢတဲာ်လၢ အရ့ဒိၣ်အံၤကဘူၣ်. ဒ်သိး နကထံၣ်ဘၣ် ပှၤလၢအမၤတ့ၢ်ဝဲ တၢ်ဆၢတဲာ်ဒ်န့ၣ်အဂီၢ် ကွၢ်တၢ်ဂီၤမူ.
ဖး ယိၤဟၣ် ၁၇:၃ ဒီး ယၤကိာ် ၁:၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ဒ်သိး ပှၤတဂၤ ကအိၣ်ကတဲာ်ကတီၤအသး လၢတၢ်ဒိးဘျၢထံအဂီၢ် တၢ်မနုၤ ကမၤစၢၤအီၤလဲၣ်.
၁. ပဟ့ၣ်လုၢ်ထီၣ်သး လၢယဟိဝၤယွၤ အအိၣ် ခီဖျိ ပတဲအီၤလၢ ပအဲၣ်ဒိးမၤ အတၢ်မၤ တစိၤသး
၂. ဖဲပဒိးဘျၢထံအခါ ပပာ်ဖျါထီၣ်လၢ ပှၤအါဂၤအမဲာ်ညါလၢ ပဟ့ၣ်လုၢ်ထီၣ်သး လၢကစၢ်ယွၤအအိၣ် ဝံၤလံ
၆. ပမ့ၢ်ဒိးဘျၢထံန့ၣ် ပကဲထီၣ် ယဟိဝၤယွၤ အဟံၣ်ဖိဃီဖိ
ပဒိးဘျၢထံဝံၤအလီၢ်ခံ ပပၣ်ဃုာ်လၢ နီၢ်သးအဟံၣ်ဖိဃီဖိ လၢအမၤသကိးတၢ် ဃူဃူဖိးဖိး လၢအအိၣ်လၢ ဟီၣ်ခိၣ်ဒီဘ့ၣ်ညါ. ပကလုာ်ဒူၣ် ဒီးတၢ်ဆဲးတၢ်လၤ မ့ၢ်လီၤဆီလိာ်သး သနာ်က့ ပအိၣ်ဒီး တၢ်စူၢ်တၢ်နာ်တမံၤဃီ ဒီးပမၤထွဲ လံာ်စီဆှံ အတၢ်သိၣ်တၢ်သီတမံၤဃီ. ဖး စံးထီၣ်ပတြၢၤ ၂၅:၁၄ ဒီး ၁ ပ့းတရူး ၂:၁၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
တၢ်ဒိးဘျၢထံန့ၣ် ကမၤဂ့ၤထီၣ် ပှၤတဂၤ အတၢ်ရ့လိာ်သးဒီး ယဟိဝၤယွၤ ဒီးအတၢ်ရ့လိာ်သးဒီး ပှၤလၢ အဘူၣ်ထီၣ်ဘါထီၣ် ကစၢ်ယွၤန့ၣ်ဒ်လဲၣ်.
ပှၤတနီၤတဲဝဲလၢ– “ယဒိးဘျၢထံတဘူၣ်ဒံးဘၣ်.”
နမ့ၢ်တူၢ်ဘၣ် ဒ်န့ၣ်န့ၣ် လၢခါဆူညါမီၤ နပာ်လီၤနသးလၢ နကဒိးဘျၢထံစ့ၢ်ကီးဧါ.
တၢ်ဂ့ၢ်လၢအရ့ဒိၣ်
ယ့ၣ်ၡူးတဲဝဲလၢ ခရံာ်ဖိကိးဂၤဒဲး ကဘၣ်ဒိးဘျၢထံ. အဃိ တချုးလၢ ပှၤတဂၤ ဒိးဘျၢထံဒံးဘၣ်န့ၣ် အဝဲကဘၣ် မၤဂၢၢ်ကျၢၤထီၣ် အတၢ်ရ့လိာ်သးဒီး ယဟိဝၤယွၤ, အိၣ်မူပိာ်ထွဲဝဲဒ် ယဟိဝၤယွၤ အတၢ်သိၣ်တၢ်သီ အိၣ်ဝဲအသိး ဒီးဟ့ၣ်လုၢ်ထီၣ်အသးလၢ ယဟိဝၤယွၤအအိၣ်.
တၢ်ကွၢ်ကဒါက့ၤ
တၢ်ဒိးဘျၢထံန့ၣ် မ့ၢ်မနုၤလဲၣ်. ဒီးဘၣ်မနုၤအဃိ တၢ်ဒိးဘျၢထံန့ၣ် အရ့ဒိၣ်လဲၣ်.
ဖဲပှၤတဂၤ ဒိးဘျၢထံအခါ အပာ်ဖျါထီၣ်ဝဲ မနုၤလဲၣ်.
တချုးလၢ ပှၤတဂၤဟ့ၣ်လုၢ်ထီၣ်သး ဒီးဒိးဘျၢထံဒံးဘၣ်န့ၣ် အကဘၣ်မၤ တၢ်မနုၤလဲၣ်.
ဃုသ့ၣ်ညါ
ဖးကွၢ် တၢ်ဂ့ၢ်လၢအပာ်ဖျါထီၣ်ဝဲ တၢ်ဒိးဘျၢထံန့ၣ် မ့ၢ်မနုၤလဲၣ်.
“တၢ်ဒိးဘျၢထံန့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)
ကွၢ်ကဒါက့ၤ တၢ်ဟ့ၣ်ကူၣ်တနီၤလၢ အကမၤစၢၤနၤ ဒ်သိး နကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်.
ဖးကွၢ်တၢ်ဂ့ၢ်လၢ အပာ်ဖျါထီၣ်ဝဲ တၢ်မနုၤထိၣ်ဟူးထိၣ်ဂဲၤထီၣ် ပိာ်ခွါတဂၤလၢ ကဒိးဘျၢထံလဲၣ်.
“အဝဲသ့ၣ် အဲၣ်ဒိးလၢ ယကနာ် တၢ်မ့ၢ်တၢ်တီလၢ ယနီၢ်ကစၢ်” (တၢးထီခိးတၢ်, လါဖ့ၤဘြူၤအါရံၤ ၁, ၂၀၁၃)
နမ့ၢ်ဒိးဘျၢထံန့ၣ် နကဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်. ဒီးနအိၣ်ကတဲာ်ကတီၤနသး ကသ့ဒ်လဲၣ်.
“မ့ၢ်ယကြၢးဒိးဘျၢထံဧါ” (သးစၢ် အတၢ်သံကွၢ်တဖၣ်—တၢ်စံးဆၢလၢ အကဲဘျုး, အကူာ် ၂, တၢ်မၤလိ ၃၇)
a ပှၤတဂၤဒိးဘျၢထံလၢ တၢ်ဘူၣ်တၢ်ဘါ အဂၤတခါခါ မ့ၢ်ဝံၤသနာ်က့ ဒ်သိးအကကဲထီၣ် ယဟိဝၤပှၤအုၣ်အသး တဂၤအဂီၢ် အကဘၣ်ဒိးဘျၢကဒီးထံ. ဘၣ်မနုၤအဃိ အဘၣ်မၤဝဲဒ်န့ၣ်လဲၣ်. ခီဖျိလၢ အတၢ်ဘူၣ်တၢ်ဘါ လၢညါတခါန့ၣ် တသိၣ်လိအီၤ တၢ်မ့ၢ်တၢ်တီ လၢလံာ်စီဆှံပူၤဘၣ်.—ကွၢ် မၤတၢ် ၁၉:၁-၅ ဒီး တၢ်မၤလိ ၁၃.