ခရံာ်ဖိအမ့ၢ်အတီန့ၣ် ပသ့ၣ်ညါနီၤဖးအီၤ ကသ့ဒ်လဲၣ်

ပှၤအါဂၤ တဲလီၤအသးလၢ အကဲခရံာ်ဖိ. ဘၣ်ဆၣ် အဝဲသ့ၣ် တၢ်စူၢ်တၢ်နာ်န့ၣ် တဒ်သိးလိာ်အသးဘၣ် ဒီးအဝဲသ့ၣ် တအိၣ်မူမၤထွဲ တၢ်သိၣ်တၢ်သီ တမံၤဃီဘၣ်. အဃိ ခရံာ်ဖိအမ့ၢ်အတီန့ၣ် ပသ့ၣ်ညါနီၤဖးအီၤ ကသ့ဒ်လဲၣ်.

၁. ခရံာ်ဖိအမ့ၢ်အတီန့ၣ် မ့ၢ်မတၤတဖၣ်လဲၣ်.

တၢ်လၢခရံာ်ဖိန့ၣ် မ့ၢ်ဝဲ ပှၤတဂၤလၢအကဲ ယ့ၣ်ၡူးခရံာ် အပျဲၢ်အဘီၣ် ဒီးအပိာ်ဝဲ ယ့ၣ်ၡူးခရံာ်အခံ. (ဖး မၤတၢ် ၁၁:၂၆.) အဝဲသ့ၣ်ကဲ ယ့ၣ်ၡူးအပျဲၢ်အဘီၣ်န့ၣ် အဝဲသ့ၣ် ပာ်ဖျါထီၣ်ဝဲဒ်လဲၣ်. ယ့ၣ်ၡူး တဲဝဲလၢ “သုမ့ၢ်မၤထွဲ ယတၢ်ကတိၤတဖၣ် ထီဘိန့ၣ် သုမ့ၢ်ယပျဲၢ်ယဘီၣ်တဖၣ် အနီၢ်ကီၢ်လီၤ.” (ယိၤဟၣ် ၈:၃၁) ယ့ၣ်ၡူး အတၢ်ကတိၤအံၤ အဲၣ်ဒိးတဲဝဲ ခရံာ်ဖိအမ့ၢ်အတီန့ၣ် ကဘၣ်ဒိကနၣ် ဒီးမၤထွဲတၢ်လၢ ယ့ၣ်ၡူးသိၣ်လိဝဲတဖၣ်. ဒီးထီဘိန့ၣ် ယ့ၣ်ၡူး သိၣ်လိတၢ်လၢ အအိၣ်လၢလံာ်စီဆှံပူၤ အဃိ ခရံာ်ဖိအမ့ၢ်အတီတဖၣ်န့ၣ် သိၣ်လိတၢ် ဒ်ယ့ၣ်ၡူးမၤဝဲအသိး.​—ဖး လူၤကၣ် ၂၄:၂၇.

၂. ခရံာ်ဖိအမ့ၢ်အတီတဖၣ် ပာ်ဖျါထီၣ်တၢ်အဲၣ်ဒ်လဲၣ်.

ယ့ၣ်ၡူး တဲဘၣ်အပျဲၢ်အဘီၣ်တဖၣ်လၢ “အဲၣ်လိာ်သုသး တဂၤဒီးတဂၤ ဒ်ယအဲၣ်သု အသိးတက့ၢ်.” (ယိၤဟၣ် ၁၅:၁၂) ယ့ၣ်ၡူး အဲၣ်အပျဲၢ်အဘီၣ်န့ၣ် အပာ်ဖျါထီၣ်ဝဲဒ်လဲၣ်. ယ့ၣ်ၡူး ပာ်ဖျါထီၣ်ဝဲခီဖျိ ယ့ၣ်ၡူးရ့လိာ်သးဒီး အဝဲသ့ၣ်, ယ့ၣ်ၡူးဟ့ၣ်ဂံၢ်ဟ့ၣ်ဘါ အဝဲသ့ၣ် ဒီးမၤစၢၤအဝဲသ့ၣ်. တကးဒံးဘၣ် ယ့ၣ်ၡူး ဟ့ၣ်လီၤကွံာ် အသးသမူ လၢအဝဲသ့ၣ်အဂီၢ်. (၁ ယိၤဟၣ် ၃:၁၆) ဒ်န့ၣ်အသိး ခရံာ်ဖိအမ့ၢ်အတီတဖၣ်န့ၣ် တသိၣ်လိဝဲထဲ တၢ်အဲၣ်တၢ်ကွံအဂ့ၢ်ဘၣ်. အဝဲသ့ၣ် ပာ်ဖျါထီၣ်စ့ၢ်ကီး တၢ်အဲၣ်လိာ်သး တဂၤဒီးတဂၤ ခီဖျိ တၢ်လၢအဝဲသ့ၣ်မၤဝဲတဖၣ်.

၃. ခရံာ်ဖိအမ့ၢ်အတီတဖၣ်န့ၣ် မၤဝဲတၢ်မၤ မနုၤလဲၣ်.

ယ့ၣ်ၡူး ဟ့ၣ်လီၤ အပျဲၢ်အဘီၣ်တဖၣ် လၢတၢ်မၤ. “ဒီးအဝဲဆှၢလီၤအဝဲသ့ၣ် ဒ်သိးကစံၣ်တဲၤတဲလီၤ ကစၢ်ယွၤအဘီအမုၢ်.” (လူၤကၣ် ၉:၂) ခရံာ်ဖိလၢညါတဖၣ်န့ၣ် စံၣ်တဲၤတဲလီၤတၢ် လၢအဝဲသ့ၣ် အတၢ်ဘူၣ်ထီၣ်ဘါထီၣ်အလီၢ် တကးဒံးဘၣ် အဝဲသ့ၣ် စံၣ်တဲၤတဲလီၤတၢ် လၢကမျၢၢ်အကျါ ဒီးလၢပှၤဂၤအဟံၣ်. (ဖး မၤတၢ် ၅:၄၂; ၁၇:၁၇.) မုၢ်မဆါတနံၤအံၤ ခရံာ်ဖိအမ့ၢ်အတီတဖၣ်စ့ၢ်ကီး စံၣ်တဲၤတဲလီၤဝဲ လံာ်စီဆှံတၢ်မ့ၢ်တၢ်တီ လၢတၢ်လီၢ်ကိးတီၤဒဲး. ဒီးခီဖျိလၢ အဝဲသ့ၣ် အဲၣ်ပှၤဂၤအဃိ အဝဲသ့ၣ် သးအိၣ်သူဝဲ အတၢ်ဆၢကတီၢ် ဒီးအဂံၢ်အဘါ ဒ်သိး ကတဲဘၣ်ပှၤဂၤလၢ လံာ်စီဆှံအတၢ်ကစီၣ် လၢအမၤမုာ်ထီၣ်က့ၤပှၤသး ဒီးဟ့ၣ်ပှၤဂၤတၢ်မုၢ်လၢ်.​—မၢ်ကူး ၁၂:၃၁.

ဃုသ့ၣ်ညါအါထီၣ်

၄. ခရံာ်ဖိအမ့ၢ်အတီတဖၣ် ဃုသ့ၣ်ညါဝဲ လံာ်စီဆှံ တၢ်မ့ၢ်တၢ်တီ

ပှၤလၢအတဲလီၤအသးလၢ အကဲခရံာ်ဖိန့ၣ် အတပာ်လုၢ်ပာ်ပှ့ၤ လံာ်စီဆှံ တၢ်မ့ၢ်တၢ်တီ ကိးဂၤဒဲးဘၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.

တၢ်ဂီၤမူ– ပှၤမၤဟးဂီၤ ခရံာ်ဖိအတၢ်ဘူၣ်တၢ်ဘါဒ်လဲၣ် (၅:၁၁)

• ဒ်သိး ပှၤသုတမၤလိဘၣ်တၢ်လၢ ယ့ၣ်ၡူးသိၣ်လိတ့ၢ်ဝဲ တဂ့ၤအဂီၢ် ပှၤလၢအတဲလီၤအသးလၢ အကဲခရံာ်ဖိတဖၣ် မၤဝဲဒ်လဲၣ်.

ယ့ၣ်ၡူး သိၣ်လိတၢ်မ့ၢ်တၢ်တီ လၢအအိၣ်လၢ ကစၢ်ယွၤ အကလုၢ်ကထါအပူၤ. ဖး ယိၤဟၣ် ၁၈:၃၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဒ်ယ့ၣ်ၡူးတဲဝဲအသိး ပသ့ၣ်ညါနီၤဖး ခရံာ်ဖိလၢ “အအိၣ်လၢ တၢ်မ့ၢ်တၢ်တီအအိၣ် တကပၤ” ကသ့ဒ်လဲၣ်.

၅. ခရံာ်ဖိအမ့ၢ်အတီတဖၣ်န့ၣ် စံၣ်တဲၤ တဲလီၤဝဲ လံာ်စီဆှံ တၢ်မ့ၢ်တၢ်တီ

တချုးလၢ ယ့ၣ်ၡူးက့ၤထီၣ် လၢမူခိၣ်ဒံးဘၣ်န့ၣ် အဟ့ၣ်လီၤဝဲ အပျဲၢ်အဘီၣ်တဖၣ် တၢ်မၤတခါလၢ အဝဲသ့ၣ်ကဘၣ်မၤဝဲ တုၤလၢမုၢ်မဆါတနံၤအံၤ. ဖး မးသဲ ၂၈:​၁၉, ၂၀ ဒီး မၤတၢ် ၁:၈ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ခရံာ်ဖိအမ့ၢ်အတီတဖၣ် ကစံၣ်တဲၤတဲလီၤတၢ် အါထဲလဲၣ် ဒီးကမၤဝဲတုၤလၢ တၢ်လီၢ်ဖဲလဲၣ်.

၆. ခရံာ်ဖိအမ့ၢ်အတီတဖၣ်န့ၣ် အိၣ်မူမၤထွဲဝဲ ဒ်တၢ်လၢအဝဲသ့ၣ် စံၣ်တဲၤတဲလီၤဝဲ

ပိာ်ခွါတဂၤလၢ အမံၤမ့ၢ် ထါ(မ်) န့ၣ်တၢ်မနုၤ မၤစၢၤအီၤလၢ အနာ်ဝဲလၢ အထံၣ်န့ၢ် ခရံာ်ဖိအမ့ၢ်အတီလံလဲၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

တၢ်ဂီၤမူ– ယသးလၢာ် တၢ်ဘူၣ်တၢ်ဘါ (၅:၂၀)

• လၢတၢ်ဂီၤမူအပူၤန့ၣ် ဘၣ်မနုၤအဃိ ထါ(မ်) တဲဝဲလၢ အသးလၢာ် တၢ်ဘူၣ်တၢ်ဘါလဲၣ်.

• ဘၣ်မနုၤအဃိ ထါ(မ်) နာ်ဝဲလၢ အထံၣ်န့ၢ် တၢ်မ့ၢ်တၢ်တီလံလဲၣ်.

တၢ်လၢပမၤန့ၣ် အရ့ဒိၣ်န့ၢ်ဒံး တၢ်လၢပတဲ. ဖး မးသဲ ၇:၂၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• တၢ်လၢအရ့ဒိၣ် လၢယ့ၣ်ၡူးအဂီၢ်န့ၣ် မ့ၢ်မနုၤလဲၣ်. အကဲဝဲ တၢ်လၢပတဲဧါ မ့တမ့ၢ် တၢ်လၢပမၤဧါ.

၇. ခရံာ်ဖိအမ့ၢ်အတီတဖၣ်န့ၣ် အဲၣ်လိာ်သး တဂၤဒီးတဂၤ

ခရံာ်ဖိအမ့ၢ်အတီတဖၣ်န့ၣ် သးအိၣ်ဟ့ၣ်လီၤ အသးသမူ လၢတဂၤဒီးတဂၤအဂီၢ် သပှၢ်တၢၢ်ဧါ. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

တၢ်ဂီၤမူ– အသးအိၣ်ဟ့ၣ်လီၤကွံာ် အသးသမူ (၂:၅၅)

• လၢတၢ်ဂီၤမူအပူၤန့ၣ် ဘၣ်မနုၤအဃိ ဒီပုၢ်ဝဲၢ်ခွါလွ့ၣ် သးအိၣ်ဟ့ၣ်လီၤကွံာ် အသးသမူ လၢဒီပုၢ်ဝဲၢ်ခွါ ယိၤဟဲစၢၤ အဂီၢ်လဲၣ်.

• တၢ်လၢ ဒီပုၢ်ဝဲၢ်ခွါလွ့ၣ် မၤဝဲန့ၣ် နဆိကမိၣ် အပာ်ဖျါထီၣ်လၢ အကဲခရံာ်ဖိအမ့ၢ်အတီ အနီၢ်ကီၢ်ဧါ.

• ယ့ၣ်ၡူး အပျဲၢ်အဘီၣ် (ခရံာ်ဖိအမ့ၢ်အတီတဖၣ်) အကလုာ်ဒူၣ် မ့ၢ်တဒ်သိးလိာ်အသးဘၣ် သနာ်က့ အဝဲသ့ၣ် ရ့လိာ်အသးဒ်လဲၣ်.

• ဖဲတၢ်ဒုးအဆၢကတီၢ်န့ၣ် ခရံာ်ဖိအမ့ၢ်အတီတဖၣ် ပာ်ဖျါထီၣ်တၢ်အဲၣ်ဒ်လဲၣ်.

တၢ်ဂ့ၢ်လၢအရ့ဒိၣ်

ခရံာ်ဖိအမ့ၢ်အတီတဖၣ်န့ၣ် အိၣ်မူမၤထွဲ လံာ်စီဆှံအတၢ်သိၣ်လိ, ပာ်ဖျါထီၣ်တၢ်အဲၣ်ဒီး တၢ်တူၢ်ဆါသး လၢပှၤဂၤအဂီၢ် ဒီးအဝဲသ့ၣ် စံၣ်တဲၤတဲလီၤဝဲ တၢ်မ့ၢ်တၢ်တီ လၢအအိၣ်လၢလံာ်စီဆှံပူၤ.

တၢ်ကွၢ်ကဒါက့ၤ

• ခရံာ်ဖိအမ့ၢ်အတီတဖၣ် အတၢ်နာ်န့ၣ် ဒိးသန့ၤထီၣ်အသး လၢမနုၤလဲၣ်.

• ဒ်သိး ပှၤသ့ၣ်ညါနီၤဖး ခရံာ်ဖိအမ့ၢ်အတီ ကဘၣ်အဂီၢ် ခရံာ်ဖိအမ့ၢ်အတီတဖၣ်န့ၣ် ကဘၣ်အိၣ်ဒီး တၢ်ဂ့ၤတၢ်ဝါ မနုၤတခါလဲၣ်.

• ခရံာ်ဖိအမ့ၢ်အတီတဖၣ်န့ၣ် မၤဝဲ တၢ်မၤမနုၤလဲၣ်.

ဃုသ့ၣ်ညါ

ကွၢ်တၢ်ဂီၤမူ လၢအပာ်ဖျါထီၣ် ဘၣ်ဃးဒီး ပှၤတကရူၢ်လၢ အဂုာ်ကျဲးစၢး ကွၢ်လိယ့ၣ်ၡူး ဒီးအိၣ်မူမၤထွဲ အတၢ်သိၣ်လိတဖၣ် အဂ့ၢ်.

ယဟိဝၤပှၤအုၣ်အသးန့ၣ် မ့ၢ်မတၤတဖၣ်လဲၣ် (၁:၁၃)

ဖးကွၢ်တၢ်ဂ့ၢ်လၢ အဘၣ်ဃးဒီး ပိာ်မုၣ်တဂၤလၢ အကဲတ့ၢ်ဖံဝါန့ၣ် အဒိးန့ၢ်ဘၣ် အဟံၣ်ဖိဃီဖိလၢ နီၢ်သးတခီဒ်လဲၣ်.

“အဝဲသ့ၣ် သူဝဲလံာ်စီဆှံ ဒ်သိး ကစံးဆၢ တၢ်သံကွၢ်ခဲလၢာ်” (တၢးထီခိးတၢ်, လါအ့ဖြ့ၣ် ၁, ၂၀၁၄)

ကွၢ်တၢ်ဂီၤမူ လၢအပာ်ဖျါထီၣ်ဝဲ ခရံာ်ဖိအမ့ၢ်အတီတဖၣ် ပာ်ဖျါထီၣ်တၢ်အဲၣ် လၢအဒီပုၢ်ဝဲၢ်ခရံာ်ဖိ လၢအလိၣ်ဘၣ် တၢ်မၤစၢၤတဖၣ် အဖီခိၣ်ဒ်လဲၣ်.

မၤစၢၤပဒီပုၢ်ဝဲၢ် ဖဲန့ဆၢၣ်တၢ်ဘၣ်ဒိဘၣ်ထံး အိၣ်ထီၣ်အခါ​—တၢ်ဂီၤမူဖုၣ်ကိာ် (၃:၅၇)

ဖးကွၢ် တၢ်ဂ့ၢ်လၢ အဘၣ်ဃးဒီး တၢ်လၢခရံာ်ဖိအမ့ၢ်အတီ မၤဝဲလၢ မုၢ်မဆါတနံၤအံၤန့ၣ် အဒ်သိးလိာ်သးဒီး ခရံာ်ဖိလၢညါတဖၣ်ဒ်လဲၣ်. ဒီးတၢ်လၢအဝဲသ့ၣ် မၤဝဲတဖၣ်န့ၣ် ပာ်ဖျါထီၣ်လၢ အဝဲသ့ၣ်မ့ၢ် ယ့ၣ်ၡူးအပျဲၢ်အဘီၣ်နီၢ်ကီၢ်.

“ခရံာ်ဖိအမ့ၢ်အတီ အတၢ်ပနီၣ်န့ၣ် မ့ၢ်မနုၤလဲၣ်” (တၢးထီခိးတၢ်, လါမၢ်ၡး ၁, ၂၀၁၂)