တၢ်မၤလိ ၅၃
ဃုထၢ တၢ်မၤမုာ်မၤဖှံသးလၢ အမၤသးခု ယဟိဝၤယွၤအသး
ယဟိဝၤယွၤမ့ၢ် “ကစၢ်ယွၤလၢ အသးခုတဂၤ.” (၁ တံၤမသ့း ၁:၁၁) အဃိ အဝဲအဲၣ်ဒိးလၢ ပကအိၣ်ဒီး တၢ်သးခုလၢ ပတၢ်အိၣ်မူအပူၤ. ဖဲပဟံးန့ၢ် တၢ်ဆၢကတီၢ်လၢ ကအိၣ်ဘှံးအိၣ်သါ ဒီးမၤတၢ်သူၣ်ဖှံသးညီအဆၢကတီၢ် ကစၢ်ယွၤသးခု. လၢတၢ်မၤလိအံၤအပူၤ ပကသ့ၣ်ညါဘၣ်လၢ ဖဲပဟံးန့ၢ်တၢ်ဆၢကတီၢ်လၢ ပကအိၣ်ဘှံးအိၣ်သါအခါ ပသူတၢ်ဆၢကတီၢ်အံၤလၢ ပကသူၣ်ဖှံသးညီ ဒီးမၤသးခု ယဟိဝၤယွၤအသး ကသ့ဒ်လဲၣ်.
၁. ဖဲပဃုထၢ တၢ်မၤမုာ်မၤဖှံသးအခါ ပကဘၣ်သ့ၣ်နီၣ်ထီၣ် တၢ်မနုၤလဲၣ်.
ဖဲနအိၣ်ဘှံးအိၣ်သါ အဆၢကတီၢ် နအဲၣ်ဒိးမၤမနုၤလဲၣ်. ပှၤတနီၤအဲၣ်ဒိး အိၣ်ဘှံးအိၣ်သါလၢ ဟံၣ်ပူၤဒီးဖးလံာ်, ဒိကနၣ်တၢ်သးဝံၣ်, ကွၢ်တၢ်ဂီၤမူ မ့တမ့ၢ် ဃုကွၢ်တၢ်ဂ့ၢ်လၢ အ့ထၢၣ်နဲးအပူၤ. မ့မ့ၢ် ပှၤအဂၤတနီၤန့ၣ် အဲၣ်ဒိးဟးလိာ်ကွဲဒီး အသကိးတဖၣ်, လဲၤထီၣ်ကစၢၢ်, လဲၤပှီၢ်ထံ မ့တမ့ၢ် လိာ်ကွဲ တၢ်လိာ်ကွဲတမံၤမံၤ. ပမ့ၢ်ဃုထၢ တၢ်မၤမုာ်မၤဖှံသး တမံၤဂ့ၤတမံၤဂ့ၤန့ၣ် ပကဘၣ်ဃုထၢ တၢ်မၤမုာ်မၤဖှံသးလၢ “ကစၢ်ဘၣ်အသး.” (အ့းဖ့းစူး ၅:၁၀) မ့ၢ်လၢတၢ်သးဝံၣ် ဒီးတၢ်ဂီၤမူလၢ ဆၢကတီၢ်ခဲအံၤန့ၣ် အါတက့ၢ် ပၣ်ဃုာ်ဒီး တၢ်လၢယဟိဝၤယွၤ သးဟ့ဝဲတဖၣ် ဒ်သိးဒီး တၢ်မၤဆူၣ်မၤစိး, တၢ်မၤကမၣ်မုၣ်ကမၣ်ခွါ ဒီးတၢ်ဝံတၢ်နါ အတၢ်ဖံးတၢ်မၤအဃိ ပကဘၣ်ပလီၢ်ပသး. (ဖး စံးထီၣ်ပတြၢၤ ၁၁:၅.) ဒ်သိး ပကဃုထၢ တၢ်မၤမုာ်မၤဖှံသးလၢ အဘၣ်ကစၢ်ယွၤ အသးအဂီၢ် တၢ်မနုၤ ကမၤစၢၤပှၤလဲၣ်.
ဒ်ပမၤလိဘၣ်လၢ တၢ်မၤလိ ၄၈ အပူၤအသိး “ပှၤလၢ အရ့ဒီး ပှၤကူၣ်တၢ်သ့န့ၣ် ကကဲထီၣ် ပှၤကူၣ်တၢ်သ့.” ဘၣ်ဆၣ် ပမ့ၢ်ရ့ဒီး ပှၤလၢအတအဲၣ် ကစၢ်ယွၤ အတၢ်သိၣ်တၢ်သီဘၣ်န့ၣ် “ပကထံၣ်ဘၣ် တၢ်ကီတၢ်ခဲ.” အဃိ ပမ့ၢ်ဃုထၢ ပသကိးလၢ အအဲၣ်ယဟိဝၤယွၤန့ၣ် ကကဲဘျုးလၢပဂီၢ် ဒီးကမၤစၢၤပှၤဒ်သိး ပကဃုထၢ တၢ်မၤမုာ်မၤဖှံသး လၢအဂ့ၤလီၤ.—ကတိၤဒိ ၁၃:၂၀.
၂. ပသူတၢ်ဆၢကတီၢ်လၢ တၢ်မၤမုာ်မၤဖှံသးအဂီၢ် အါထဲလဲၣ်န့ၣ် ဘၣ်မနုၤအဃိ ပကဘၣ်ပလီၢ်ပသးလဲၣ်.
ပမ့ၢ်ဃုထၢ တၢ်မၤမုာ်မၤဖှံသး လၢအဂ့ၤသနာ်က့ ပကဘၣ်ပလီၢ်ပသး ဒ်သိး ပသုတသူ တၢ်ဆၢကတီၢ် လၢတၢ်မၤမုာ်မၤဖှံသးအဂီၢ် အါတလၢတဂ့ၤ. ဒီးပမ့ၢ်သူတၢ်ဆၢကတီၢ် အါတလၢ လၢတၢ်မၤမုာ်မၤဖှံသးအဂီၢ်န့ၣ် ပကမၤတၢ်လၢ အရ့ဒိၣ်တဖၣ်အဂီၢ် ပတၢ်ဆၢကတီၢ် တအိၣ်အါအါလၢၤဘၣ်. အဃိ လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ “တၢ်ဆၢကတီၢ်လၢ အအိၣ်ဒီးသုန့ၣ် သူအီၤလၢ အဂ့ၤကတၢၢ်.”—ဖး အ့းဖ့းစူး ၅:၁၅, ၁၆.
ဃုသ့ၣ်ညါအါထီၣ်
ပကတဲသကိး ဘၣ်ဃးဒီး ဖဲနဃုထၢ တၢ်မၤမုာ်မၤဖှံသးအခါ နဆၢတဲာ်တၢ်လၢအဂ့ၤ ကသ့ဒ်လဲၣ်.
၃. တၢ်မၤမုာ်မၤဖှံသး လၢအတဂ့ၤဘၣ်န့ၣ် ဃုထၢအီၤတဂ့ၤ
ဖဲပဃုထၢ တၢ်မၤမုာ်မၤဖှံသးအခါ ဘၣ်မနုၤအဃိ ပဘၣ်ပလီၢ်ပသးလဲၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
ပှၤရိမ့ၤဖိလၢပျၢၤ အတၢ်လိာ်ကွဲတဖၣ်န့ၣ် လီၤဂာ်ဒ်သိးဒီး တၢ်လိာ်ကွဲတနီၤလၢ ဆၢကတီၢ်ခဲအံၤဒ်လဲၣ်.
လၢတၢ်ဂီၤမူအံၤအပူၤ ဘၣ်ဃးဒီး တၢ်မၤမုာ်မၤဖှံသးန့ၣ် ဒဲနံၤ န့ၢ်ဘၣ်တၢ်မၤလိဒ်လဲၣ်.
ဖး ရိမ့ၤ ၁၂:၉ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ဒ်သိး နကဃုထၢ တၢ်မၤမုာ်မၤဖှံသး လၢအဂ့ၤကတၢၢ်အဂီၢ် လံာ်စီဆှံတဆၢအံၤ ကမၤစၢၤနၤ ဒ်လဲၣ်.
ယဟိဝၤယွၤ သးဟ့ဝဲ တၢ်မနုၤတဖၣ်လဲၣ်. ဖး ကတိၤဒိ ၆:၁၆, ၁၇ ဒီး ကလၤတံ ၅:၁၉-၂၁. ဖးလံာ်စီဆှံတဆၢဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ. ဝံၤဒီး ဖးလံာ်စီဆှံလၢခံတဆၢ ဒီးတဲသကိးကဒီး တၢ်သံကွၢ် လၢလာ်တဖျၢၣ်အံၤ–
တၢ်သကဲာ်ပဝး လၢလံာ်စီဆှံတဆၢအံၤ ပာ်ဖျါထီၣ်ဝဲန့ၣ် အပၣ်ဃုာ်လၢ တၢ်မၤမုာ်မၤဖှံသးလၢ အဆၢကတီၢ်ခဲအံၤဧါ. အပၣ်ဃုာ် ဖဲလဲၣ်တခါလဲၣ်.
တၢ်သံကွၢ်တဖၣ်လၢ အကမၤစၢၤနၤ လၢနကဃုထၢ တၢ်မၤမုာ်မၤဖှံသး လၢအဂ့ၤ
သံကွၢ်လီၤနသးလၢ–
တၢ်မၤမုာ်မၤဖှံသးတခါအံၤ အပၣ်ဃုာ်ဒီး တၢ်လၢ ယဟိဝၤယွၤ သးဟ့ဝဲ တမံၤမံၤဧါ.
ယမ့ၢ်မၤ တၢ်မၤမုာ်မၤဖှံသးတခါအံၤန့ၣ် အကမၤလီၤစှၤ ယတၢ်ဆၢကတီၢ်လၢ ယကမၤ တၢ်လၢအရ့ဒိၣ်တဖၣ်အဂီၢ်ဧါ.
ဖဲယမၤတၢ်မၤမုာ်မၤဖှံသး တခါအံၤအဆၢကတီၢ် ယဘၣ်ရ့ဒီး ပှၤလၢအတအဲၣ် ယဟိဝၤယွၤဘၣ် ထီဘိဧါ.
ပမ့ၢ်အိၣ်ယံၤဒီး တၢ်ဘၣ်ယိၣ်အလီၢ်န့ၣ် အဂ့ၤကတၢၢ်လီၤ. ဒ်န့ၣ်အသိး ပမ့ၢ်ဆိမိၣ်လၢ ဘၣ်သ့ၣ်သ့ၣ် တၢ်မၤမုာ်မၤဖှံသးတခါခါ တဂ့ၤလၢပဂီၢ်ဘၣ်န့ၣ် ပတဘၣ်မၤအီၤဘၣ်.
၄. သူနတၢ်ဆၢကတီၢ် လၢအဂ့ၤကတၢၢ်
ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
ဒီပုၢ်ဝဲၢ်ခွါတဂၤအံၤ အတကွၢ်တၢ်ဂီၤမူ လၢအတဂ့ၤဘၣ်သနာ်က့ အတၢ်မၤမုာ်မၤဖှံသးအံၤ မၤဘၣ်ဒိအီၤဒ်လဲၣ်.
ဖး ဖံလံးပံၤ ၁:၁၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ပကသူတၢ်ဆၢကတီၢ် လၢတၢ်မၤမုာ်မၤဖှံသးအဂီၢ် အါထဲလဲၣ်န့ၣ် လံာ်စီဆှံတဆၢအံၤ မၤစၢၤပှၤ ကသ့ဒ်လဲၣ်.
၅. ဃုထၢ တၢ်မၤမုာ်မၤဖှံသး လၢအကဲဘျုးလၢနဂီၢ်
တၢ်မၤမုာ်မၤဖှံသး လၢအတဘၣ် ယဟိဝၤယွၤအသးဘၣ်န့ၣ် အိၣ်ဝဲအါမး. ဘၣ်ဆၣ် တၢ်မၤမုာ်မၤ ဖှံသး လၢအဘၣ်ယဟိဝၤယွၤအသးန့ၣ် အိၣ်ဝဲစ့ၢ်ကီး. ဖး စံၣ်တဲၤတဲလီၤတၢ် ၈:၁၅ ဒီး ဖံလံးပံၤ ၄:၈ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
တၢ်မၤမုာ်မၤဖှံသးလၢအဂ့ၤ လၢနမၤအီၤမုာ်န့ၣ် မ့ၢ်မနုၤလဲၣ်.
နဃုထၢ တၢ်မၤမုာ်မၤဖှံသးလၢ အကဲဘျုးလၢနဂီၢ်သ့
ပှၤတနီၤတဲဝဲလၢ– “ယတမၤ တၢ်မၤဆူၣ်မၤစိး, တၢ်မၤကမၣ်မုၣ်ကမၣ်ခွါ ဒီးတၢ်ဝံတၢ်နါ အတၢ်ဖံးတၢ်မၤဘၣ် သနာ်က့ ယမ့ၢ်ကွၢ်တၢ်ဂီၤမူ မ့တမ့ၢ် ဒိကနၣ် တၢ်သးဝံၣ် လၢအပၣ်ဃုာ်ဒီး တၢ်သ့ၣ်တဖၣ်အံၤန့ၣ် မ့ၢ်အကမၣ်စ့ၢ်ကီးဧါ.”
နၤမီၤ နဆိကမိၣ် ဒ်လဲၣ်.
တၢ်ဂ့ၢ်လၢအရ့ဒိၣ်
ယဟိဝၤယွၤ အဲၣ်ဒိးလၢ ပကဃုထၢ တၢ်မၤမုာ်မၤဖှံသး လၢအကဲဘျုးလၢပဂီၢ်.
တၢ်ကွၢ်ကဒါက့ၤ
ခရံာ်ဖိတဖၣ် ကဘၣ်ဟးဆှဲး တၢ်မၤမုာ်မၤဖှံသး ဒ်လဲၣ်တဖၣ်လဲၣ်.
ပကသူတၢ်ဆၢကတီၢ်လၢ တၢ်မၤမုာ်မၤဖှံသးအဂီၢ် အါထဲလဲၣ်န့ၣ် ဘၣ်မနုၤအဃိ ပကဘၣ်ပလီၢ်သးလဲၣ်.
ဘၣ်မနုၤအဃိ နအဲၣ်ဒိးဃုထၢ တၢ်မၤမုာ်မၤဖှံသး လၢအဘၣ်ယဟိဝၤယွၤအသးလဲၣ်.
ဃုသ့ၣ်ညါ
ဖးတၢ်ဂ့ၢ် ဘၣ်ဃးဒီး ပကဃုထၢ တၢ်မၤမုာ်မၤဖှံသး မနုၤလဲၣ်န့ၣ် အကဲမတဂၤ အတၢ်ဆၢတဲာ်လဲၣ်.
ဘၣ်ဃးဒီး တၢ်မၤမုာ်မၤဖှံသးန့ၣ် ဒ်သိးန ဆၢတဲာ်တၢ်လၢအဘၣ် ကသ့အဂီၢ် နကဘၣ်မၤဒ်လဲၣ်န့ၣ် ဖးတၢ်ဂ့ၢ်လၢလာ်အံၤ.
“နတၢ်မၤမုာ်မၤဖှံသးန့ၣ် အကဲဘျုးဧါ” (တၢးထီခိးတၢ်, လါအီးကထိဘၢၣ် ၁၅, ၂၀၁၁)
လၢတၢ်လဲၤခီဖျိ လၢအခိၣ်တီမ့ၢ်ဝဲ “ယတထံၣ်ဆံး ပှၤဂၤလၢၤဘၣ်” အပူၤန့ၣ် ပကထံၣ်ဘၣ်လၢ ဘၣ်မနုၤအဃိ ပှၤတဂၤ ဃုထၢဝဲ တၢ်မၤမုာ်မၤဖှံသး လၢအသီလဲၣ်.
“လံာ်စီဆှံဆီတလဲ ပတၢ်အိၣ်မူ” (တၢးထီခိးတၢ်, လါဖ့ၤဘြူၤအါရံၤ ၁, ၂၀၁၀)
ဖဲမိတဂၤ ကွၢ်တၢ်ဂီၤမူအခါ အထံၣ်ဝဲလၢ အပၣ်ဃုာ်ဒီး တၢ်ဝံတၢ်နါအဂ့ၢ်အဃိ အဝဲမၤဝဲဒ်လဲၣ်.
ဟးဆှဲးတၢ်မၤမုာ်မၤဖှံသးလၢ ပၣ်ဃုာ်ဒီးတၢ်ဝံတၢ်နါ အတၢ်ဖံးတၢ်မၤ (၂:၀၂)