ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမ့ၤ ၆–၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ၂ ကရံၣ်သူး ၄–၆
“ပတဟ့ၣ်ၡူဘၣ်”
(၂ ကရံၣ်သူး ၄:၁၆) မၤသးဒ်န့ၣ်ဒီး ပတလီၤဘှံးဘၣ်. ပနီၢ်လၢခိအံၤမ့ၢ်ဟးဂီၤဘၣ်ဆၣ်ဒီး, ပနီၢ်လၢညါန့ၣ် ဘၣ်တၢ်မၤထီၣ်က့ၤအီၤ တနံၤဘၣ်တနံၤလီၤ.
တၢး၀၄ ၈/၁၅ ကဘျံးပၤ ၂၅ အဆၢ ၁၆-၁၇
လီၤဘှံးသနာ်က့ နီၢ်သးအဂံၢ်ဘါတလီၤစၢ်ဘၣ်
၁၆ တၢ်ကတီၤ နီၢ်သးတၢ်အိၣ်ဆူၣ်အိၣ်ချ့န့ၣ် မ့ၢ်တၢ်လၢ အရ့ဒိၣ်ကတၢၢ်လီၤ. ပတၢ်ရ့လိာ်သးဒီး ယဟိဝၤယွၤမ့ၢ်ဂ့ၤန့ၣ် ပနီၢ်ခိ မ့ၢ်လီၤဘှံး သနာ်က့ ပတလီၤဘှံးလၢ တၢ်ဘူၣ်ထီၣ်ဘါထီၣ်အီၤဘၣ်. မ့ၢ်လၢ “ပှၤလၢအလီၤဘှါန့ၣ် ယွၤဟ့ၣ်ဝဲလၢအဂံၢ်အဘါလီၤ. ဒီးပှၤလၢအဂံၢ်အဘါ တအိၣ်ဘၣ်န့ၣ် ဒုးဆူၣ်ထီၣ်ဝဲအဂံၢ်အဘါလီၤ.” (ယၡါယၤ ၄၀:၂၈, ၂၉) တၢ်ကတိၤအံၤ ဘၣ်ဝဲနီၢ်နီၢ်န့ၣ် တၢ်မၢဖိပီလူး လဲၤခီဖျိဘၣ်ဝဲလၢ အနီၢ်ကစၢ် ဒီးကွဲးဝဲလၢ “ပတလီၤဘှံးဘၣ်. ပနီၢ်လၢခိအံၤမ့ၢ်ဟးဂီၤဘၣ်ဆၣ်ဒီး, ပနီၢ်လၢညါန့ၣ် ဘၣ်တၢ်မၤထီၣ်က့ၤအီၤ တနံၤဘၣ်တနံၤလီၤ.”—၂ ကရံၣ်သူး ၄:၁၆.
၁၇ ပာ်သူၣ်ပာ်သး တၢ်ကတိၤလၢအမ့ၢ် “တနံၤဘၣ်တနံၤ” တက့ၢ်. တၢ်ကတိၤအံၤ အဲၣ်ဒိးစံးဝဲ ပကဘၣ်သူ တၢ်လၢယဟိဝၤယွၤ ကတဲာ်ကတီၤန့ၢ်ပှၤတဖၣ် ကိးနံၤဒဲးလီၤ. ဒီပုၢ်ဝဲၢ်မုၣ်လၢ အမၤမံးၡ့ၣ်နရ့ၣ်တၢ်မၤလၢ တၢ်သးတီအပူၤအိၣ် ၄၃ နံၣ်တဂၤ အနီၢ်ခိလီၤဘှံးလီၤတီၤ ဒီးအသးဟးဂီၤ အဆၢကတီၢ်အိၣ်ဝဲလီၤ. ဘၣ်ဆၣ် အဝဲအနီၢ်သးအဂံၢ်ဘါတလီၤစၢ်ဘၣ်. ဒီပုၢ်ဝဲၢ်မုၣ်အံၤ တဲဝဲလၢ– “ယမၤညီနုၢ်ယသးလၢ ယပၢၢ်ထီၣ်ဂီၤဂီၤအဃိ တချုးလၢယစးထီၣ် မၤတၢ်ဒံးဘၣ်န့ၣ် ယဃ့ဘါထုကဖၣ်ဆူ ယဟိဝၤယွၤအအိၣ် ဒီးယဖးအကလုၢ်ကထါချုးဝဲ. ယမၤဒ်အံၤ ကိးနံၤဒဲးအဃိ မၤစၢၤယၤလၢ ယကအိၣ်ဒီး တၢ်တူၢ်န့ၢ်ခီၣ်ကဲ တုၤခဲအံၤလီၤ.” ပမ့ၢ်ဃ့ဘါထုကဖၣ်ဆူ ယဟိဝၤယွၤအအိၣ်ထီဘိ, ပမ့ၢ်ဆိကမိၣ်ထံ အတၢ်ဂ့ၤတၢ်ဝါ ဒီးအတၢ်အၢၣ်လီၤတဖၣ် “တနံၤဘၣ်တနံၤ” န့ၣ် ပနာ်သ့သပှၢ်ကတၢၢ်လၢ ပကဒိးန့ၢ်ဘၣ် ကစၢ်ယွၤအတၢ်မၤစၢၤလီၤ.
(၂ ကရံၣ်သူး ၄:၁၇) အဂ့ၢ်ဒ်အံၤ, တၢ်နးတၢ်ဖှီၣ်ဘၣ်ပှၤဘီၣ်သလီၣ်, လၢအအိၣ်တစိၢ်ဖိအံၤ, မၤန့ၢ်ပှၤလၢ တၢ်လၤတၢ်ကပီၤအထူအယိာ်လၢ အအါန့ၢ်ဃၢန့ၢ်ဒိၣ်ဒိၣ်ကလဲာ်တက့ၢ်လီၤ.
it-1 ကဘျံးပၤ ၇၂၄-၇၂၅
တၢ်တူၢ်န့ၢ်ခီၣ်ကဲ
အရ့ဒိၣ်စ့ၢ်ကီးလၢ ခရံာ်ဖိ အတၢ်မုၢ်လၢ်လၢအမ့ၢ် တၢ်မူအထူအယိာ်လၢ ပူၤဖျဲးဒီးတၢ်ဒဲးဘး သုတလီၤမၢ်ကွံာ်ဝဲတဂ့ၤန့ၣ်လီၤ. ပမ့ၢ်ဘၣ်သံလၢ ပှၤလၢအမၤအၢမၤနးပှၤတဖၣ် အစုပူၤဒၣ်လဲာ် ပတၢ်မုၢ်လၢ်အံၤ လီၤမၢ်ကွံာ်ဝဲတသ့ဘၣ်. (ရိ. ၅:၄, ၅; ၁ သ့း. ၁:၃; လီၣ်. ၂:၁၀) တၢ်နးတၢ်ဖှီၣ်လၢ ပထံၣ်ဘၣ် ခဲအံၤတဖၣ် ပမ့ၢ်ထိၣ်သတြီၤအီၤဒီး တၢ်ဆၢကတီၢ်လၢ ပတၢ်မုၢ်လၢ်ကဟဲ လၢပှဲၤထီၣ်ဝဲအခါန့ၣ် တမ့ၢ်တၢ်နီတမံၤလၢၤဘၣ်. (ရိ. ၈:၁၈-၂၅) ပတူၢ်ဘၣ် တၢ်နးတၢ်ဖှီၣ် မ့ၢ်နးထဲလဲၣ်သနာ်က့ ပမ့ၢ်ထိၣ်သတြီၤအီၤဒီး တၢ်ဆၢကတီၢ်လၢ ပကအိၣ်မူဘၣ်လီၤထူလီၤယိာ်န့ၣ် မ့ၢ်ဝဲတၢ်လၢ “ဘီၣ်သလီၣ်, လၢအအိၣ်တစိၢ်ဖိ” လီၤ. (၂ ကရံၣ်. ၄:၁၆-၁၈) ပှၤလၢအသ့ၣ်နီၣ်ထီၣ်လၢ တၢ်မၤကွၢ်တဖၣ်အံၤ မ့ၢ်ဒၣ်တစိၢ်တလီၢ် ဒီးမ့ၢ်ဟံးဃာ်ဂၢၢ်ကျၢၤဝဲ ခရံာ်ဖိအတၢ်မုၢ်လၢ်န့ၣ် ကဒီသဒၢအီၤ ဒ်သိးအသုတတူၢ်ၡူအသးတဂ့ၤ ဒီးဆဲးတီဒီးယဟိဝၤယွၤကန့ၢ်အဂီၢ်လီၤ.
(၂ ကရံၣ်သူး ၄:၁၈) အဂ့ၢ်ဒ်အံၤ, ပတကွၢ်ဘၣ်တၢ်လၢအအိၣ်ဖျါဘၣ်, မ့ၢ်တၢ်လၢအတအိၣ်ဖျါဘၣ်လီၤ. အဂ့ၢ်ဒ်အံၤ, တၢ်လၢအအိၣ်ဖျါန့ၣ်အိၣ်တစိၢ်ဖိဧိၤလီၤ. မ့မ့ၢ်တၢ်လၢအတအိၣ်ဖျါဘၣ်န့ၣ်, အိၣ်ဝဲလီၤထူလီၤယိာ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ ကရံၣ်သူး ၄:၇) ဘၣ်ဆၣ်ဒီး ပအိၣ်ဒီး တၢ်လုၢ်ဒိၣ်ပှ့ၤဒိၣ်အံၤ, လၢသပၢၤဟီၣ်ခိၣ်အပူၤ, ဒ်သိးအစိအကမီၤဒိၣ်ကဲၣ်ဆိးအံၤ, ကဘၣ်ဃးဒီးယွၤ, ဒီးတမ့ၢ်ဘၣ်ပှၤဘၣ်လီၤ.
တၢး၁၂ ၂/၁ ကဘျံးပၤ ၂၈-၂၉
“မၤသးခု ယဟိဝၤယွၤ”
ပှၤပၢဆှၢတၢ် ကမံးတံာ် ဒ့ဘ့း စပျ့ သမံသမိးဝဲ တၢ်ဂ့ၢ်မိၢ်ပှၢ်လၢ ဟံးန့ၢ်ဝဲလၢ လံာ်စီဆှံအပူၤလီၤ. (၂ ကရံၣ်သူး ၄:၇) တၢ်လုၢ်ဒိၣ်ပှ့ၤဒိၣ် န့ၣ်မ့ၢ်မနုၤလဲၣ်. မ့ၢ်ဝဲတၢ်သ့ၣ်ညါနၢ်ပၢၢ်ဧါ မ့တမ့ၢ် တၢ်ကူၣ်သ့ဧါ. အဝဲစံးဆၢက့ၤဝဲလၢ “တမ့ၢ်ဘၣ်.” တၢ်လုၢ်ဒိၣ်ပှ့ၤဒိၣ်လၢ တၢ်မၢဖိပီလူးတဲဝဲန့ၣ်မ့ၢ်ဝဲ “တၢ်ပာ်ဖျါထီၣ် တၢ်မ့ၢ်တၢ်တီ” ခီဖျိတၢ်မၤကစၢ်ယွၤ အတၢ်မၤလီၤ. (၂ ကရံၣ်သူး ၄:၁, ၂, ၅) ဒီပုၢ်ဝဲၢ်စပျ့ ဒုးသ့ၣ်နီၣ်ထီၣ်က့ၤဝဲ ကၠိဖိတဖၣ်လၢ တၢ်မၤလိလၢ ယဲၢ်လါအတီၢ်ပူၤအံၤ ကတဲာ်ကတီၤ အဝဲသ့ၣ်လၢ မူဒါလီၤဆီလၢ တၢ်စံၣ်တဲၤတဲလီၤ တၢ်မၤအဂီၢ်လီၤ. မူဒါအံၤ မ့ၢ်တၢ်လၢကြၢးဘၣ် တၢ်ပာ်လုၢ်ပာ်ပှ့ၤအီၤဒိၣ်မးလီၤ.
ပှၤစံၣ်တဲၤတဲလီၤတၢ် တဲနၢ်ပၢၢ်ဝဲလၢ “သပၢၤဟီၣ်ခိၣ်” န့ၣ်အဲၣ်ဒိးစံးဝဲ ပနီၢ်ခိလီၤ. ဒီပုၢ်ဝဲၢ်ခွါ တဲနၢ်ပၢၢ်ဝဲ သပၢၤဟီၣ်ခိၣ် ဒီးသပၢၤထူ လီၤဆီလိာ်သးအဂ့ၢ်လီၤ. သပၢၤထူန့ၣ် ပှၤတသူအီၤကြီကြီဘၣ်. မ့မ့ၢ်သပၢၤဟီၣ်ခိၣ်န့ၣ် ပှၤသူအီၤအါလီၤ. ပမ့ၢ်ထၢနုာ် တၢ်လုၢ်ဒိၣ်ပှ့ၤဒိၣ်လၢ သပၢၤထူအပူၤန့ၣ် တမ့ၢ်လၢပှၤကသးစၢၢ်ဆၢ တၢ်အိၣ်လၢအပူၤဘၣ်, ပှၤကသးစၢၢ်ဆၢထဲ သပၢၤထူလီၤ. ဒီပုၢ်ဝဲၢ်စပျ့ စံးဝဲလၢ “သုဝဲကၠိဖိတဖၣ် သုတအဲၣ်ဒိးလၢ ပှၤကသးစၢၢ်ဆၢသုဘၣ်. ဒ်သုမ့ၢ် မံးၡ့ၣ်နရ့ၣ်တဖၣ်အသိး သုကအဲၣ်ဒိးလၢ ပှၤကသးစၢၢ်ဆၢ ယဟိဝၤယွၤလီၤ. သုမ့ၢ်သပၢၤဟီၣ်ခိၣ်လၢ အတပာ်ဒိၣ်ပာ်ထီအသးတဖၣ်လီၤ.”
(၂ ကရံၣ်သူး ၆:၁၃) ယကတိၤတၢ်ဒ်လၢ ယဖိအသိးလၢ တၢ်ဟ့ၣ် ဆၢတၢ်တမံၤဃီအံၤအဂီၢ်, မၤလဲၢ်ထီၣ်သုသးစ့ၢ်ကီးတက့ၢ်.
တၢး၀၉ ၁၁/၁၅ ကဘျံးပၤ ၂၁ အဆၢ ၇
ဆဲးမၤအါထီၣ် ဒီပုၢ်ဝဲၢ်တၢ်အဲၣ်
၇ မ့မ့ၢ် ပဝဲဒၣ်သ့ၣ်တဖၣ်မီၤ. ဒ်သိးပကပာ်ဖျါထီၣ် ဒီပုၢ်ဝဲၢ်တၢ်အဲၣ်အဂီၢ်ပ “မၤလဲၢ်ထီၣ်” ပသးကသ့ဒ်လဲၣ်. ပှၤလၢအသးအနံၣ် မ့ၢ်ထဲသိးလိာ်သး မ့တမ့ၢ် ကလုာ်ဒူၣ်မ့ၢ်ဒ်သိးလိာ်အသးတဖၣ် ပာ်ဖျါထီၣ်တၢ်အဲၣ်လၢ တဂၤဒီးတဂၤအဖီခိၣ်ညီမးလီၤ. ပမ့ၢ်မၤတၢ်မၤမုာ်မၤဖှံသးဒီး ပှၤလၢအကၠဲးတၢ်မၤမုာ်မၤဖှံသး တမံၤဃီဒီးပှၤန့ၣ် ပကရ့လိာ်ပသးအါတစဲးလီၤ. ဘၣ်ဆၣ် ပ “မၤလဲၢ်ထီၣ်” ပသးသ့ခီဖျိလၢ ပရ့လိာ်သးဒီး ခရံာ်ဖိလၢတကၠဲး တၢ်မၤမုာ်မၤဖှံသး ဒ်ပှၤအသိးတဖၣ်လီၤ. ပကြၢးသံကွၢ်လီၤပသးဒ်အံၤ ‘လၢတၢ်စံၣ်တဲၤတဲလီၤတၢ်မၤအပူၤမ့ၢ်ဂ့ၤ တၢ်ရ့လိာ်မုာ်လိာ်အဆၢကတီၢ်မ့ၢ်ဂ့ၤ မ့ၢ်ယရ့ဒီးဒီပုၢ်ဝဲၢ်မုၣ်ခွါလၢ ယတသ့ၣ်ညါအီၤအါအါတဖၣ်ဧါ. လၢဘီမုၢ်ဘျီၣ်ဒိၣ်န့ၣ် ယတရ့ဒီးပှၤအသီတဖၣ် ခီဖျိယဆိကမိၣ်လၢ ယတကြၢးရ့ဒီး အဝဲသ့ၣ်အါအါဒံးဘၣ်အဃိဧါ. လၢတၢ်အိၣ်ဖှိၣ်လီၢ်န့ၣ် မ့ၢ်ယဟံးစုကွၢ်မဲာ် ပှၤသးပှၢ် ဒီးပှၤသးစၢ်တဖၣ်ဧါ.
တၢ်ဖးလံာ်စီဆှံ
(၂ ကရံၣ်သူး ၄:၁-၁၅) မၤသးဒ်န့ၣ်ဒီး ပအိၣ်ဒီးတၢ်မၤအံၤဒီး, မ်ပဘၣ်တၢ်သးကညီၤအသိး, ပတလီၤဘှံးဘၣ်. ၂ မ့ၢ်ပညိကွံာ်တၢ်ခူသူၣ်ဘၣ်ဃးဒီးတၢ်မဲာ်ဆှး, ဒီးပတလဲၤဘၣ်လၢတၢ်လီတၢ်ဝ့ၤဘၣ်, ဒီးပတကျီၣ်ကျဲဘၣ်ယွၤအကလုၢ်အကထါဘၣ်. မ့မ့ၢ်ပာ်ဖျါထီၣ်တၢ်မ့ၢ်တၢ်တီသတးဒီး, ပဒုးဘၣ်ကယဲၢ်ပှၤကညီအသး လၢအသ့ၣ်ညါဒၣ်တၢ်လၢပှၤ, လၢယွၤအမဲာ်ညါလီၤ. ၃ ဘၣ်ဆၣ်ဒီး ပတၢ်သးခုအကစီၣ် မ့ၢ်အိၣ်ကျၢၢ်ဘၢဒီး, မ့ၢ်အအိၣ်ကျၢၢ်ဘၢလၢ ပှၤတုၤတၢ်ဟးဂီၤတဖၣ်အမဲာ်ညါလီၤ. ၄ လၢအဝဲသ့ၣ်အပူၤဟီၣ်ခိၣ်အကစၢ်မၤခံးပှၤလၢ အတစူၢ်တနာ်ဘၣ်အသး, ဒ်သိးခရံာ်လၢအမ့ၢ် ယွၤအက့ၢ်အဂီၤ တဂၤန့ၣ်အလၤကပီၤ, အတၢ်သးခုအကစီၣ်အတၢ်ကပီၤ, သုတကပီၤထီၣ်ဘၣ်အီၤတဂ့ၤလီၤ. ၅ အဂ့ၢ်ဒ်အံၤ, ပတစံၣ်တဲၤတဲလီၤပကစၢ်ဒၣ်ပဝဲဘၣ်, မ့ၢ်ကစၢ်ယ့ၣ်ၡူးခရံာ်, ဒီးပကစၢ်ဒၣ်ပဝဲလၢ သုခ့သုပှၤလၢ ယ့ၣ်ၡူးအဃိလီၤ. ၆ အဂ့ၢ်ဒ်အံၤ, ယွၤလၢအစံးကဲထီၣ်တၢ်ကပီၤလၢ တၢ်ခံးအပူၤတဂၤန့ၣ် ကပီၤထီၣ်လၢ ပသးကံၢ်ပူၤ, လၢတၢ်ကပီၤဘၣ်ဃးဒီး တၢ်သ့ၣ်ညါယွၤအလၤကပီၤ, လၢအကဲၤကပီၤလၢ ယ့ၣ်ၡူးအမဲာ်အလိၤ အဃိလီၤ. ၇ ဘၣ်ဆၣ်ဒီး ပအိၣ်ဒီးတၢ်လုၢ်ဒိၣ်ပှ့ၤဒိၣ်အံၤ, လၢသပၢၤဟီၣ်ခိၣ်အပူၤ, ဒ်သိးအစိအကမီၤ ဒိၣ်ကဲၣ်ဆိးအံၤ, ကဘၣ်ဃးဒီးယွၤ, ဒီးတမ့ၢ်ဘၣ်ပှၤဘၣ်လီၤ. ၈ တၢ်မၤတံာ်တာ်ပှၤလၢ တၢ်ကိးမံၤဒဲးဘၣ်ဆၣ်ဒီး, တၢ်ဆီၣ်အံၣ်လီၤပတၢ်တမ့ၢ်ဘၣ်. ပကမၤဒ်လဲၣ်ပကူၣ်တဘၣ်ဘၣ်, မ့မ့ၢ်ပတၢ်မုၢ်လၢ်တဟါမၢ်ဘၣ်. ၉ တၢ်မၤအၢမၤနးပှၤ ဘၣ်ဆၣ်ဒီးတၢ်တလဲၤသဒၣ်ဘၣ်ပှၤဘၣ်. တၢ်မၤလီၤဃံၤပှၤဘၣ်ဆၣ်ဒီး, ပတဟးဂီၤဘၣ်. ၁၀ ပစိာ်ယ့ၣ်ၡူးအတၢ်ဒိးသံအသးလၢပနီၢ်ခိ တဘိယူၢ်ဃီ, ဒ်သိးယ့ၣ်ၡူး အတၢ်မူကအိၣ်ဖျါထီၣ်စ့ၢ်ကီး လၢပနီၢ်ခိလီၤ. ၁၁ အဂ့ၢ်ဒ်အံၤ, ပှၤလၢအမူပဝဲဒၣ်အံၤ, ပဘၣ်တၢ်ဟ့ၣ်လီၤပှၤဆူတၢ်သံ, လၢယ့ၣ်ၡူးအဃိ တဘိယူၢ်ဃီ, ဒ်သိးယ့ၣ်ၡူးအတၢ်မူ ကအိၣ်ဖျါထီၣ် လၢပဖံးပညၣ်လၢအသံသ့အံၤအပူၤလီၤ. ၁၂ မၤသးဒ်န့ၣ်ဒီး တၢ်သံန့ၣ်မၤတၢ်လၢပပူၤ, မ့မ့ၢ်တၢ်မူန့ၣ်လၢသုပူၤလီၤ. ၁၃ ပအိၣ်ဒီး တၢ်နာ်အသးတမံၤဃီ ဒ်တၢ်ကွဲးအသးအသိး, ယနာ်တၢ်သတးဒီး, ယကတိၤတၢ်လီၤ. ဒီးပဝဲဒၣ်အံၤ, ပနာ်တၢ်သတးဒီး, ပကတိၤတၢ်စ့ၢ်ကီးလီၤ. ၁၄ အဂ့ၢ်ဒ်အံၤ, ပသ့ၣ်ညါလၢပှၤလၢအဒုးဂဲၤဆၢထၢၣ်က့ၤကစၢ်ယ့ၣ်ၡူး, ကဒုးဂဲၤဆၢထၢၣ် က့ၤပှၤစ့ၢ်ကီးဒီးယ့ၣ်ၡူး, ဒီးကပာ်ပှၤဒီးသုလၢအမဲာ်ညါလီၤ. ၁၅ အဂ့ၢ်ဒ်အံၤ, တၢ်ခဲလၢာ်မ့ၢ်လၢသုဂီၢ်, ဒ်သိးတၢ်အဘျုးအဖှိၣ် လၢအအါထီၣ်လၢ ပှၤအါဂၤအဃိ, ကဒုးအါထီၣ်တၢ်စံးထီၣ်ပတြၢၤတၢ် အဘျုးအဖှိၣ်လၢယွၤအလၤကပီၤအဂီၢ်လီၤ.
ခရံာ်ဖိလၢ အဒိးဘျၢထံဝံၤတဂၤ ပာ်တၢ်အဲၣ်တီဒီး ပှၤစံၣ်တဲၤတဲလီၤတၢ်ဖိလၢ တဒိးဘျၢထံဒံးဘၣ်တဂၤသ့ဧါ
ပမ့ၢ်တဲလီၤတံၢ်လီၤဆဲးန့ၣ် စီၤပီလူးအတၢ်ကတိၤလၢ ၂ ကရံၣ်သူး ၆:၁၄ အပူၤအံၤ တဘၣ်ထွဲလိာ်အသးဒီး ပှၤလၢအဒိးဘျၢထံဝံၤတဂၤ ဆီဟံၣ်ဆီဃီဒီး ပှၤစံၣ်တဲၤတဲလီၤတၢ်ဖိလၢ တဒိးဘျၢထံဒံးဘၣ်တဂၤအဃိ ပှၤလၢအဒိးဘျၢထံဝံၤတဂၤ မ့ၢ်ဆီဟံၣ်ဆီဃီဒီး ပှၤစံၣ်တဲၤတဲလီၤတၢ်ဖိလၢ တဒိးဘျၢထံဒံးဘၣ်တဂၤန့ၣ် မ့ၢ်ပှၤလၢအိၣ်ဒီးတၢ်ကူၣ်သ့ဧါ. တမ့ၢ်ဘၣ်. ဘၣ်မနုၤအဃိလဲၣ်. ပသ့ၣ်ညါသ့ခီဖျိလၢ စီၤပီလူးအတၢ်ကတိၤလၢ အတဲဝဲ ခရံာ်ဖိလၢအကဲထီၣ်မုၣ်ကမဲတဖၣ်လီၤ. အဝဲတဲဝဲလၢ “မ့မ့ၢ်အဝၤမ့ၢ်သံဒီး, ထူၣ်ဖျဲးဝဲ, ဒီးကန့ၢ်ဘၣ်အဝၤဖဲအသး ဘၣ်ဆၣ်ဒီး, ထဲလၢကစၢ်အပူၤဧိၤလီၤ.” (၁ ကရံၣ်သူး ၇:၃၉) ဒ်သိးကလီၤပလိာ်ဒီး တၢ်ဟ့ၣ်ကူၣ်အံၤအဂီၢ် ခရံာ်ဖိလၢအဟ့ၣ်လုၢ်ထီၣ်အသးဝံၤတဖၣ် ဘၣ်တၢ်ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဃုထၢသးသမူတံၤသကိးလၢ ပှၤလၢအဟ့ၣ်လုၢ်ထီၣ်အသးဝံၤ “ထဲလၢကစၢ်အပူၤ” တဖၣ်လီၤ.
တၢ်ကတိၤလၢအမ့ၢ် “ကစၢ်အပူၤ” ဒီးတၢ်ကတိၤလၢ အဘၣ်ထွဲလိာ်အသးဒီးအီၤ လၢအမ့ၢ် “ခရံာ်အပူၤ” န့ၣ် အခီပညီမ့ၢ်မနုၤလဲၣ်. ရိမ့ၤ ၁၆:၈-၁၀ ဒီး ကလီးစဲ ၄:၇ န့ၣ်စီၤပီလူး တဲဝဲပှၤလၢအအိၣ်လၢ “ကစၢ်အပူၤ” မ့တမ့ၢ် “ခရံာ်အပူၤ” အဂ့ၢ်လီၤ. ဖဲအဆၢဖိတဖၣ်အံၤအပူၤန့ၣ် ပဖးဘၣ်လၢ “ပှၤလၢအမၤဃုာ်တၢ်ဒီးပှၤ,” “ပှၤလၢတၢ်မၤကွၢ်တ့ၢ်အီၤ,” “ဒီပုၢ်ဝဲၢ်လၢအဘၣ်တၢ်အဲၣ်အီၤ,” “တၢ်အခ့အပှၤလၢ အကလုၢ်တီ ဒီးကုၢ်သကိးကုၢ်” လီၤ.
ပှၤတဂၤကဲထီၣ်ဝဲ ‘ကုၢ်လၢကစၢ်အပူၤ’ ဖဲလဲၣ်အဆၢကတီၢ်လဲၣ်. ပှၤတဂၤကဲထီၣ်ဝဲကုၢ် ဖဲအဝဲဟ့ၣ်လီၤအသး ဒီးမၤဝဲတၢ်မၤ ဒ်ကုၢ်တဂၤမၤဝဲအသိးအခါန့ၣ်လီၤ. ယ့ၣ်ၡူးတဲနၢ်ပၢၢ်ပှၤလၢ “ပှၤမ့ၢ်မိၣ်ပိာ်အသးလၢ ယခံတဂၤဂၤန့ၣ်, မ်အညိကွံာ်အသးဒၣ်ဝဲ, ဒီးဟံးန့ၢ်အထူၣ်စုညါ, ဒီးပိာ်ယခံတက့ၢ်.” (မးသဲ ၁၆:၂၄) ဖဲပှၤတဂၤဟ့ၣ်လုၢ်ထီၣ်အသးလၢ ကစၢ်ယွၤအအိၣ် ဒီးစးထီၣ်ပိာ်ယ့ၣ်ၡူးအခံအခါ အဝဲတူၢ်လိာ်ဝဲ ကစၢ်ယွၤအတၢ်ဘၣ်သး လၢလၢပှဲၤပှဲၤလီၤ. လၢခံအဝဲဒိးဘျၢထံ ဒီးကဲထီၣ်ပှၤလၢအမၤ တၢ်သးခုကစီၣ်တၢ်မၤ လၢအဒိးန့ၢ်ဘၣ် ယွၤအတၢ်ဘၣ်သးလီၤ. လၢတၢ်န့ၣ်အဃိ တၢ်ဆီဟံၣ်ဆီဃီ “ထဲလၢကစၢ်အပူၤ” န့ၣ်အဲၣ်ဒိးစံးဝဲ တၢ်ဆီဟံၣ်ဆီဃီဒီး ပှၤလၢအပာ်ဖျါထီၣ်လၢ အမ့ၢ်ပှၤစူၢ်တၢ်နာ်တၢ်နီၢ်နီၢ်, ဟ့ၣ်လုၢ်ထီၣ်အသး ဒီးကဲထီၣ် “ယွၤဒီးကစၢ်ယ့ၣ်ၡူးခရံာ်အခ့အပှၤ” န့ၣ်လီၤ.—ယၤကိာ် ၁:၁.
ပှၤလၢအမၤလိလံာ်စီဆှံဒီး ယဟိဝၤပှၤအုၣ်အသး ဒီးလဲၤထီၣ်လဲၤထီလၢ နီၢ်သးတခီတဖၣ်န့ၣ် လီၤစံးပတြၢၤလီၤ. ဘၣ်ဆၣ် အဝဲသ့ၣ်တဟ့ၣ်လုၢ်ထီၣ်အသးလၢ ယဟိဝၤယွၤအအိၣ်ဒံးဘၣ် ဒီးတဟ့ၣ်လီၤအသးလၢ ကမၤကစၢ်ယွၤ အတၢ်မၤအဂီၢ်ဒံးဘၣ်. အဝဲဘၣ်မၤ တၢ်ဆီတလဲအဖၢမုၢ်ဒံးလီၤ. တချုးလၢ အဝဲဆိကမိၣ်ထီၣ်ဝဲ တၢ်ဆီတလဲအဂၤတမံၤလၢအမ့ၢ် တၢ်ဆီဟံၣ်ဆီဃီဒံးဘၣ်န့ၣ် အဝဲကဘၣ်မၤ တၢ်ဆီတလဲတဖၣ် လၢကဟ့ၣ်လုၢ်ထီၣ်အသး ဒီးကကဲထီၣ်ခရံာ်ဖိလၢ အဒိးဘျၢထံတဂၤ လၢညါန့ၣ်လီၤ.
ခရံာ်ဖိတဂၤ မ့ၢ်ပာ်တၢ်အဲၣ်တီဒီး ပှၤမၤလိာ်လံာ်စီဆှံဖိတဂၤ လၢအလဲၤထီၣ်လဲၤထီ ဒီးဘၣ်သ့ၣ်သ့ၣ် ကတိာ်ပာ်ဝဲလၢ ကအိၣ်ခိးဝဲတုၤလၢ အဝဲဒိးဘျၢထံဝံၤမးကဖျီအသးန့ၣ် မ့ၢ်အကြၢးဝဲဘၣ်ဝဲဧါ. တကြၢးဝဲဘၣ်ဝဲဘၣ်. ပှၤမၤလိလံာ်စီဆှံဖိတဂၤ မ့ၢ်သ့ၣ်ညါဝဲလၢ အဝဲဒိးဘျၢထံမ့ၢ်ဝံၤမး ပှၤလၢအဒိးဘျၢထံဝံၤတဂၤ ကဖျီအသးဒီးအီၤန့ၣ် တၢ်လၢကထိၣ်ဟူးထိၣ်ဂဲၤထီၣ်အီၤလၢ ကဒိးဘျၢထံအဂီၢ်န့ၣ် ဘၣ်သ့ၣ်သ့ၣ် တမ့ၢ်အတၢ်အဲၣ်ယဟိဝၤယွၤအဃိဘၣ်.
ပှၤစံၣ်တဲၤတဲလီၤတၢ်ဖိလၢ တဒိးဘျၢထံဒံးဘၣ်တဂၤ မ့ၢ်တတုၤထီၣ်ထီၣ်ဘးလၢ ကဒိးဘျၢထံဒံးဘၣ် သနာ်က့ ဒ်သိးအဝဲကဒိးဘျၢထံအဂီၢ် ဘၣ်အိၣ်ခိးဝဲတၢ်ဆၢကတီၢ်န့ၣ် အါတက့ၢ် တယံာ်အါအါဘၣ်. လၢတၢ်န့ၣ်အဃိ တၢ်ဟ့ၣ်ကူၣ်လၢ ဆီဟံၣ်ဆီဃီထဲလၢကစၢ်အပူၤန့ၣ် တမ့ၢ်တၢ်လၢ အဃံးတလၢဘၣ်. ဘၣ်ဆၣ် ပှၤဒိၣ်တုာ်ခိၣ်ပှဲၤလၢ အဆီဟံၣ်ဆီဃီသ့လံတဂၤ မ့ၢ်ဒိၣ်ထီၣ်လၢ တၢ်မ့ၢ်တၢ်တီအပူၤ, ပာ်ဖှိၣ်မၤသကိးတၢ်ဒီး တၢ်အိၣ်ဖှိၣ်အနံၣ်ဖးယံာ် ဒီးကဲထီၣ်ပှၤစံၣ်တဲၤတဲလီၤတၢ်ဖိ လၢအသူၣ်ဆူၣ်သးဆူၣ် လၢတဒိးဘျၢထံဒံးဘၣ်တခီမီၤ. တၢ်မနုၤမၤတံာ်တာ်အီၤဒ်သိး အသုတဟ့ၣ်လုၢ်ထီၣ်အသးဆူ ယဟိဝၤယွၤအအိၣ်ဘၣ်လဲၣ်. ဘၣ်မနုၤအဃိ အဝဲမၤယံာ်မၤနီၢ်အသးလဲၣ်. မ့ၢ်အဝဲအသးဒ့ဒီအဃိဧါ. အဝဲမ့ၢ်ပှၤစူၢ်တၢ်နာ်တၢ် သနာ်က့ ပပာ်အီၤလၢ ပှၤလၢ “ကစၢ်အပူၤ” တသ့ဘၣ်.
စီၤပီလူးအတၢ်ဟ့ၣ်ကူၣ်လၢ ဘၣ်ဃးဒီးတၢ်ဆီဟံၣ်ဆီဃီန့ၣ် ကဲဘျုးလၢပဂီၢ်ဒိၣ်မးလီၤ. (ယၡါယၤ ၄၈:၁၇) ပှၤလၢကဆီဟံၣ်ဆီဃီခံဂၤ မ့မ့ၢ်ပှၤလၢအဟ့ၣ်လုၢ်ထီၣ်အသးလၢ ယဟိဝၤယွၤအအိၣ်ဝံၤလံန့ၣ် အဝဲသ့ၣ် အတၢ်အၢၣ်လီၤအီလီၤလိာ်သး လၢဘၣ်ဃးဒီးတၢ်ဆီဟံၣ်ဆီဃီ ကဂၢၢ်ကျၢၤဝဲလီၤ. အဝဲသ့ၣ် အတၢ်သကဲာ်ပဝး ဒီးအဖီတၢၣ်ကဒ်သိးလိာ်အသးလီၤ. တၢ်အံၤကဒုးအိၣ်ထီၣ် ဟံၣ်မုာ်ဃီပၢၤ တကးဒံးဘၣ် ခီဖျိလၢ ပဆီဟံၣ်ဆီဃီ “ထဲလၢကစၢ်အပူၤ” အဃိ ပပာ်ဖျါထီၣ်လၢ ပတီဒီးယဟိဝၤယွၤလီၤ. ပမ့ၢ်မၤဒ်အံၤန့ၣ် ပကဒိးန့ၢ်ဘၣ် တၢ်ဆိၣ်ဂ့ၤအါမး, မ့ၢ်လၢ ယဟိဝၤယွၤ ‘ကပာ်ဂ့ၤအသးလၢ ပှၤလၢအဂ့ၤ’ တဖၣ်အဖီခိၣ်လီၤ.—စံးထီၣ်ပတြၢၤ ၁၈:၂၅.
လါမ့ၤ ၁၃–၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကရံၣ်သူး ၇–၁၀
“တၢ်မၤစၢၤ”
(၂ ကရံၣ်သူး ၈:၁-၃) ဒီးပုၢ်သ့ၣ်ဝဲၢ်သ့ၣ်ဧၢ, ပဘိးဘၣ်သ့ၣ်ညါသုလၢ ယွၤအဘျုးအဖှိၣ်လၢတၢ်ဟ့ၣ်လၢ တၢ်အိၣ်ဖှိၣ်တဖၣ်လၢမၤက့းဒနံအဂ့ၢ်လီၤ. ၂ အဝဲသ့ၣ် ဘၣ်တၢ်မၤကွၢ်အီၤဖးဒိၣ် လၢတၢ်နးတၢ်ဖှီၣ်အဖၢမုၢ်ဒီး, အတၢ်သးခုဒိၣ်ဝဲ, ဒီးဒ်အတၢ်ဖှီၣ်တၢ်ယာ်ယိာ်ဝဲအသိးန့ၣ်, မၤဘူၣ်တၢ်လၢအအါ ထူးထူးတီၤတီၤလီၤ. ၃ အဂ့ၢ်ဒ်အံၤ, ယအုၣ်ယသးလၢအဝဲသ့ၣ်အဂီၢ်, လၢအသးအိၣ် ပာ်မၤဝဲဖဲအသ့, အခိၣ်တလိာ်အါန့ၢ် အသ့တၢ်တက့ၢ်လီၤ.
တၢး၉၈ ၁၁/၁ ကဘျံးပၤ ၂၅ အဆၢ ၁
ကစၢ်ယွၤအဲၣ် ပှၤလၢအဟ့ၣ်တၢ်လၢ တၢ်သူၣ်အိၣ်သးအိၣ်တဖၣ်
အဆိကတၢၢ်, စီၤပီလူး တဲပၠးဝဲ ပှၤကရံၣ်သူးဖိတဖၣ် တၢ်ဂ့ၢ်ဘၣ်ဃးဒီး ပှၤမၤက့းဒနံဖိတဖၣ် အတၢ်ဂုာ်ကျဲးစၢး ဟ့ၣ်မၤစၢၤတၢ် အဒိအတဲာ်န့ၣ်လီၤ. စီၤပီလူး ကွဲးဝဲလၢ “အဝဲသ့ၣ် ဘၣ်တၢ်မၤကွၢ်အီၤဖးဒိၣ် လၢတၢ်နးတၢ်ဖှီၣ်အဖၢမုၢ်ဒီး, အတၢ်သးခုဒိၣ်ဝဲ, ဒီးဒ်အတၢ်ဖှီၣ်တၢ်ယာ်ယိာ်ဝဲအသိးန့ၣ်, မၤဘူၣ်တၢ်လၢအအါ ထူးထူးတီၤတီၤလီၤ.” ပှၤမၤက့းဒနံဖိတဖၣ် တလိၣ်လၢပှၤကဘၣ် ဟ့ၣ်သဆၣ်ထီၣ်အဝဲသ့ၣ်လၢ ကဟ့ၣ်တၢ်အဂီၢ်ဘၣ်. လၢတၢ်န့ၣ်အလီၢ် စီၤပီလူးကွဲးဝဲလၢ “ဃ့ကညးပှၤအါအါကလဲာ် လၢတၢ်ဘျုးဒီး တၢ်မၤဃုာ်ဘၣ်ဃးဒီး တၢ်မၤစၢၤပှၤစီဆှံတမံၤအံၤလီၤ.” ပမ့ၢ်ကွၢ်န့ၣ် ပှၤမၤက့းဒနံဖိတဖၣ် “အတၢ်ဖှီၣ်တၢ်ယာ်ယိာ်ဝဲ” သနာ်က့ အဝဲသ့ၣ် အတၢ်သးအိၣ်ဟ့ၣ်တၢ်န့ၣ် လီၤပတြၢၤဒိၣ်မးလီၤ.—၂ ကရံၣ်. ၈:၂-၄.
kr ကဘျံးပၤ ၂၀၉ အဆၢ ၁
တၢ်မၤစၢၤ
ဖဲ ခ.န ၄၆ ဃၣ်ဃၣ်န့ၣ် တၢ်သၣ်ဝံၤလီၤဒိ အိၣ်ထီၣ်လၢကီၢ်ယူဒၤအပူၤလီၤ. ပှၤယူဒၤဖိလၢ အကဲထီၣ်ခရံာ်အပျဲၢ်အဘီၣ် လၢအအိၣ်ဖဲန့ၣ်တဖၣ် အတၢ်အီၣ်တၢ်အီတအိၣ်လၢၤဘၣ်. တၢ်အီၣ်တၢ်အီတဖၣ် အပှ့ၤဒိၣ်ထီၣ်အဃိ အဝဲသ့ၣ်ပှ့ၤအီၣ်ဝဲတန့ၢ်ဘၣ်. အဝဲသ့ၣ် တူၢ်ဘၣ်တၢ်သၣ်ဝံၤလီၤဒိလီၤ. ဘၣ်ဆၣ် အဝဲသ့ၣ် ဒိးန့ၢ်ဘၣ်ဝဲ ယဟိဝၤယွၤ အတၢ်ဒီသဒၢလၢကျဲတဘိလၢ အဝဲသ့ၣ် တဒိန့ၢ်ဘၣ်ဝဲနီတဘျီဒံးဘၣ်. ကမ့ၢ်ဝဲတၢ်မနုၤလဲၣ်.
(၂ ကရံၣ်သူး ၈:၄) ဒီးဃ့ကညးပှၤအါအါကလဲာ် လၢတၢ်ဘျုးဒီးတၢ်မၤဃုာ်ဘၣ်ဃးဒီး တၢ်မၤစၢၤပှၤစီဆှံတမံၤအံၤလီၤ.
kr ကဘျံးပၤ ၂၀၉-၂၁၀ အဆၢ ၄-၆
တၢ်မၤစၢၤ
၄ လံာ်ခံကရံၣ်သူး အပူၤန့ၣ် စီၤပီလူး ပာ်ဖျါထီၣ်ဝဲလၢ ခရံာ်ဖိတဖၣ် အတၢ်သးခုကစီၣ် တၢ်မၤအပူၤန့ၣ် အိၣ်ဒီးသနၢၣ်ခံခါလီၤ. အဝဲကွဲးဝဲလံာ်လၢ ခရံာ်ဖိလၢအဘၣ်တၢ်ဒိးဖှူအီၤတဖၣ် အဂီၢ်သနာ်က့ ဘၣ်ထွဲလိာ်အသးဒီး ခရံာ်ဖိလၢအမ့ၢ် ‘သိအဂုၤအဂၤ’ လၢမုၢ်မဆါတနံၤအံၤတဖၣ်စ့ၢ်ကီးလီၤ. (ယိၤ. ၁၀:၁၆) သနၢၣ်တၢတခါန့ၣ် မ့ၢ်ဝဲ ‘တၢ်မၤဘၣ်လိာ်က့ၤ အတၢ်မၤ’ လၢအမ့ၢ် တၢ်စံၣ်တဲၤတဲလီၤတၢ် ဒီးတၢ်သိၣ်လိနဲၣ်လိတၢ်မၤလီၤ. (၂ ကရံၣ်. ၅:၁၈-၂၀; ၁ တံၤ. ၂:၃-၆) သနၢၣ်ခံခါတခါန့ၣ်မ့ၢ်ဝဲ ပမၤစၢၤ ပှၤစူၢ်တၢ်နာ်တၢ်ကဒဲကဒဲတဖၣ်လီၤ. စီၤပီလူး ပာ်ဖျါထီၣ်ဝဲ လီၤဆီဒၣ်တၢ် “တၢ်မၤစၢၤ” ပဒီပုၢ်ဝဲၢ်တဖၣ်လီၤ. (၂ ကရံၣ်. ၈:၄) ကြံးအတၢ်ကတိၤလၢ ဒံၣ်အဲခိၣ်နံယၤ (di·a·ko·niʹa) န့ၣ်ဘၣ်တၢ်ကွဲးကျိာ်က့ၤအီၤလၢ ‘တၢ်မၤဘၣ်လိာ်က့ၤ အတၢ်မၤ’ ဒီး “တၢ်မၤစၢၤ” တၢ်န့ၣ်လီၤ. တၢ်န့ၣ်အဲၣ်ဒိးစံးဝဲ တၢ်သးခုကစီၣ်တၢ်မၤလီၤ. ဘၣ်မနုၤအဃိ လီၤဆီဝဲလဲၣ်.
၅ ဘၣ်ဃးဒီး တၢ်မၤခံခါအံၤအဂီၢ်န့ၣ် စီၤပီလူး သူဝဲ ကြံးအတၢ်ကတိၤ တဖျၢၣ်ဃီလီၤ. တၢ်မၤစၢၤတၢ် တၢ်မၤ ဒီးတၢ်သးခုကစီၣ်တၢ်မၤအဂၤလၢ ဘၣ်တၢ်မၤအီၤလၢ တၢ်အိၣ်ဖှိၣ်အပူၤန့ၣ် စီၤပီလူး ပာ်ဖှိၣ်ဝဲတမံၤဃီလီၤ. အဝဲတဲဝဲလၢ “တၢ်အခ့အပှၤအတၢ်မၤ အိၣ်လီၤဆီအါမံၤဘၣ်ဆၣ်ဒီး, ကစၢ်မ့ၢ်တဂၤဃီလီၤ. ဒီးတၢ်ဖံးတၢ်မၤ အိၣ်လီၤဆီအါမံၤ ဘၣ်ဆၣ်ဒီး . . . မၤအသးလၢ သးတဂၤဃီဒၣ်တၢ်” လီၤ. (၁ ကရံၣ်. ၁၂:၄-၆, ၁၁) နီၢ်နီၢ်န့ၣ် စီၤပီလူး ပာ်ဖျါထီၣ်ဝဲ တၢ်မၤအကလုာ်ကလုာ်လၢ ဘၣ်တၢ်မၤအီၤလၢ တၢ်အိၣ်ဖှိၣ်အပူၤန့ၣ် ဘၣ်ထွဲလိာ်အသးဒီး တၢ်မၤ “စီဆှံ” လီၤ. (ရိ. ၁၂:၁, ၆-၈) လၢတၢ်န့ၣ်အဃိ အဝဲတူၢ်ဘၣ်ဝဲလၢ ဒ်သိး “ကမၤပှၤစီဆှံတဖၣ် အတၢ်” အဂီၢ်အဝဲဘၣ်သူဝဲ အတၢ်ဆၢကတီၢ်လီၤ.—ရိ. ၁၅:၂၅, ၂၆.
၆ စီၤပီလူး မၤစၢၤဝဲ ပှၤကရံၣ်သူးဖိတဖၣ် ဒ်သိးကသ့ၣ်ညါဝဲလၢ တၢ်မၤစၢၤတၢ်န့ၣ် ပၣ်ဃုာ်လၢ တၢ်ဘူၣ်ထီၣ်ဘါထီၣ် ယဟိဝၤယွၤ ဒီးတၢ်သးခုကစီၣ်တၢ်မၤအပူၤလီၤ. ပာ်သူၣ်ပာ်သး စီၤပီလူး တဲနၢ်ပၢၢ်ဝဲတၢ်ဂ့ၢ်အံၤလၢ ခရံာ်ဖိတဖၣ် “အၢၣ်လီၤအီလီၤ ဘၣ်ဃးဒီးခရံာ်အတၢ် သးခုကစီၣ်” အဃိ အဝဲသ့ၣ် ဟ့ၣ်မၤစၢၤတၢ်လီၤ. (၂ ကရံၣ်. ၉:၁၃) ခီဖျိလၢ အဝဲသ့ၣ်တဖၣ် သးအိၣ်မၤထွဲဝဲ ခရံာ်ဖိအတၢ်သိၣ်တၢ်သီတဖၣ်အဃိ ထိၣ်ဟူးထိၣ်ဂဲၤထီၣ်အီၤလၢ ကမၤစၢၤပှၤစူၢ်တၢ်နာ်တၢ် ကဒဲကဒဲတဖၣ်လီၤ. စီၤပီလူးတဲဝဲလၢ ပတၢ်ဖံးတၢ်မၤလၢ အိၣ်ဒီးတၢ်အဲၣ်လၢ ပမၤစၢၤဒီပုၢ်ဝဲၢ်တဖၣ်န့ၣ် မ့ၢ်ဒၣ်ပပာ်ဖျါထီၣ် “ယွၤအဘျုးအဖှိၣ်ဖးဒိၣ်” န့ၣ်လီၤ. (၂ ကရံၣ်. ၉:၁၄; ၁ ပ့း. ၄:၁၀) ဘၣ်ဃးဒီး တၢ်မၤစၢၤဒီပုၢ်ဝဲၢ်လၢ အလိၣ်ဘၣ်တၢ်မၤစၢၤတဖၣ် ဃုာ်ဒီးတၢ်မၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်အလီၢ်န့ၣ် ၁၉၇၅, လါဒံၣ်စ့ဘၢၣ် ၁, တၢးထီခိးတၢ် ပာ်ဖျါထီၣ်ဝဲလၢ “တၢ်မၤအံၤ အရ့ဒိၣ်လၢ ယဟိဝၤယွၤ ဒီးအဖိခွါ ယ့ၣ်ၡူးခရံာ်အဂီၢ်န့ၣ် ပတကြၢးသးဒ့ဒီဘၣ်.” တၢ်မၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်အလီၢ်န့ၣ် မ့ၢ်တၢ်မၤအလုၢ်ဒိၣ်ပှ့ၤဒိၣ်လၢ တၢ်မၤစီဆှံအဂီၢ်လီၤ.—ရိ. ၁၂:၁, ၇; ၂ ကရံၣ်. ၈:၇; ဧ့ၤ. ၁၃:၁၆.
(၂ ကရံၣ်သူး ၉:၇, ၈) ပှၤတဂၤဒီးတဂၤ, ဒ်အတိာ်ဝဲလၢ အသးကံၢ်ပူၤအသိးန့ၣ်, တမ့ၢ်ဘၣ်လၢ တၢ်သးအုးဒီးတၢ်မၢဆူၣ်ဘၣ်ဒီး, မ်အဟ့ၣ်တၢ်ကိးဂၤဒဲးတက့ၢ်. ၈ အဂ့ၢ်ဒ်အံၤ, ယွၤဘၣ်အသးလၢပှၤလၢအဟ့ၣ်ညီတၢ်လီၤ.
kr ကဘျံးပၤ ၁၉၆ အဆၢ ၁၀
ဆီၣ်ထွဲမၤစၢၤ ဘီမုၢ်တၢ်ဖံးတၢ်မၤလၢ ကျိၣ်စ့
၁၀ အဆိကတၢၢ်, ပဟ့ၣ်မၤဘူၣ်တၢ်လၢ တၢ်သူၣ်အိၣ်သးအိၣ်န့ၣ် မ့ၢ်လၢပအဲၣ်ယဟိဝၤယွၤ ဒီးပအဲၣ်ဒိးမၤအ “တၢ်ဘၣ်အသး” အဃိလီၤ. (၁ ယိၤ. ၃:၂၂) ယဟိဝၤယွၤ ဘၣ်သူၣ်ဘၣ်သးဝဲ ပှၤလၢအဟ့ၣ်တၢ်လၢ တၢ်သူၣ်အိၣ်သးအိၣ်တဖၣ်လီၤ. ပကသမံသမိးကွၢ် တၢ်မၢဖိပီလူး အတၢ်ကတိၤလၢ ဘၣ်ဃးဒီး ခရံာ်ဖိတဖၣ်ဟ့ၣ်မၤစၢၤတၢ်အဂ့ၢ်လီၤ. (ဖး ၂ ကရံၣ်သူး ၉:၇, ၈ တက့ၢ်) ခရံာ်ဖိနီၢ်နီၢ်တဖၣ် ဟ့ၣ်တၢ်လၢတၢ်သူၣ်အိၣ်သးအိၣ် ဒီးတမ့ၢ်လၢတၢ်မၢဆူၣ်အဃိဘၣ်. အဝဲသ့ၣ်ဟ့ၣ်တၢ် “ဒ်အတိာ်ဝဲလၢ အသးကံၢ်ပူၤအသိး” လီၤ. အဲၣ်ဒိးစံးဝဲ အဝဲသ့ၣ် ဆိကမိၣ်ဝဲ ပှၤဂၤအတၢ်လိၣ်ဘၣ် ဒီးမၤစၢၤဝဲကသ့ဒ်လဲၣ် ဝံၤမးဟ့ၣ်မၤစၢၤတၢ်လီၤ. တဲဝဲလၢ “ယွၤဘၣ်အသးလၢ ပှၤလၢအဟ့ၣ်ညီတၢ်” အဃိ ပှၤလၢအဟ့ၣ်တၢ်လၢ တၢ်သူၣ်အိၣ်သးအိၣ်တဖၣ်န့ၣ် ယဟိဝၤယွၤအဲၣ်အဝဲသ့ၣ်လီၤ. တၢ်ကွဲးကျိာ်ထံ လံာ်စီဆှံအဂၤတဘ့ၣ် ကွဲးဝဲလၢ “ကစၢ်ယွၤအဲၣ်ဝဲ ပှၤလၢအသးအိၣ်ဟ့ၣ်တၢ်တဖၣ်လီၤ.”
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ ကရံၣ်သူး ၉:၁၅) မ်ပှၤစံးထီၣ်ပတြၢၤယွၤလၢ အတၢ်ဟ့ၣ်လၢ ပစံးတသ့ဘၣ်တမံၤ, အဃိန့ၣ်တက့ၢ်.
မ်ယွၤ “အတၢ်ဟ့ၣ် လၢပစံး တသ့ဘၣ်” ထိၣ်ဟူးထိၣ်ဂဲၤထီၣ် နၤတက့ၢ်
၂ စီၤပီလူးသ့ၣ်ညါဝဲလၢ ခီဖျိယ့ၣ်ၡူး အတၢ်ဟ့ၣ်လုၢ်ထီၣ်သးအဃိ ပနာ်သ့သပှၢ်ကတၢၢ်လၢ ကယဲၢ်ကစၢ်ယွၤအတၢ်အၢၣ်လီၤအီလီၤခဲလၢာ် ကဟဲလၢထီၣ်ပှဲၤထီၣ်ဝဲလီၤ. (ဖး ၂ ကရံၣ်သူး ၁:၂၀ တက့ၢ်.) လၢတၢ်န့ၣ်အဃိ ကစၢ်ယွၤ “အတၢ်ဟ့ၣ်လၢ ပစံးတသ့ဘၣ်တမံၤ” အံၤပၣ်ဃုာ်ဒီး ယ့ၣ်ၡူးအတၢ်ဟ့ၣ်လုၢ်ထီၣ်အသး ဒီးတၢ်အဲၣ်လၢအတီ ဒီးတၢ်ဂ့ၤခဲလၢာ်လၢ ယဟိဝၤယွၤ ကဟ့ၣ်ပှၤန့ၣ်လီၤ. တၢ်ဟ့ၣ်အလုၢ်ဒိၣ်ပှ့ၤဒိၣ်အံၤ ပတဲဖျါထီၣ်အခီပညီ တလၢာ်ဘၣ်. ဘၣ်ဃးဒီး တၢ်ဟ့ၣ်လုၢ်ဒိၣ်ပှ့ၤဒိၣ်အံၤန့ၣ် နတူၢ်ဘၣ်ဒ်လဲၣ်. ဖဲပကတဲာ်ကတီၤလၢ တၢ်သ့ၣ်နီၣ်ထီၣ်က့ၤခရံာ်အတၢ်သံ လၢလါမၢ်ၡး ၂၃, ၂၀၁၆ မုၢ်သၢနံၤအဂီၢ်အခါ တၢ်ဟ့ၣ်တခါအံၤ ကြၢးထိၣ်ဟူးထိၣ်ဂဲၤထီၣ်ပှၤလၢပကမၤတၢ်မနုၤလဲၣ်.
(၂ ကရံၣ်သူး ၁၀:၁၇) မ့မ့ၢ်ပှၤလၢ အပာ်အသးကဖၢလၢန့ၣ်, မ်အပာ်အသးကဖၢလၢ လၢကစၢ်အပူၤတက့ၢ်.
g၉၉ ၇/၈ ကဘျံးပၤ ၂၀-၂၁
တၢ်ပာ်ကဖၢလၢသးန့ၣ် ကမၣ်ဧါ
လံာ်စီဆှံလၢကြံးကျိာ်တကတြူၢ်အပူၤ တၢ်ကတိၤလၢအမ့ၢ် ခိးခ့ကၠ့ၢ်အိၣ်မါ (kau·khaʹo·mai) န့ၣ်ဘၣ်တၢ်ကွဲးကျိာ်ထံအီၤလၢ “တၢ်ပာ်ကဖၢလၢသး, သးခုဒိၣ်ဒိၣ်ကလဲာ်, ပတြၢၤလီၤအသး” ဒီးဘၣ်တၢ်သူအီၤလၢ အဂ့ၤတကပၤ ဒီးအအၢတကပၤ ခံမံၤလၢာ်လီၤ. အဒိ စီၤပီလူးတဲဝဲလၢပ “သူၣ်ဖှံသးညီလၢတၢ်မုၢ်လၢ်ယွၤ အလၤကပီၤအပူၤလီၤ.” ဒီးတဲစ့ၢ်ကီးဝဲလၢ “ပှၤလၢ အပာ်အသးကဖၢလၢန့ၣ်, မ်အပာ်အသးကဖၢလၢ လၢကစၢ်အပူၤတက့ၢ်.” (ရိမ့ၤ ၅:၂; ၂ ကရံၣ်သူး ၁၀:၁၇) အဲၣ်ဒိးတဲဝဲ ပပာ်ကဖၢလၢပသး ခီဖျိပဘူၣ်ထီၣ်ဘါထီၣ်ဘၣ် ယဟိဝၤယွၤ ဒီးပသးခုလၢ ကစၢ်ယွၤအမံၤဂ့ၤသၣ်ဂ့ၤအဃိလီၤ.
တၢ်ဖးလံာ်စီဆှံ
(၂ ကရံၣ်သူး ၇:၁-၁၂) မၤသးဒ်န့ၣ်ဒီး ပှၤသးဘိသ့ၣ်သုဧၢ, ပအိၣ်ဒီးတၢ်စံးပာ်တဖၣ်အံၤဒီး, မ်ပမၤကဆှီပသးလၢကယဲၢ် တၢ်ဃံၣ်တၢ်မူး, ဘၣ်ဃးဒီးပဖံးပညၣ်, ဒီးပသူၣ်ပသးခဲလၢာ်တက့ၢ်. ဒီးလၢတၢ်ပျံၤယွၤအပူၤန့ၣ်, မ်ပမၤလၢထီၣ်ပှဲၤထီၣ်တၢ်စီဆှံတက့ၢ်. ၂ တူၢ်လိာ်ပှၤတက့ၢ်. ပတမၤဘၣ်ပှၤလၢ တၢ်တတီတလိၤနီတဂၤဘၣ်, ပတလီန့ၢ်ပှၤအတၢ်နီတဂၤဘၣ်. ၃ ယစံးတၢ်အံၤ ဒ်သိးယကစံၣ်ညီၣ်ဃၣ် သုတမ့ၢ်ဘၣ်. အဂ့ၢ်ဒ်အံၤ, ယစံးတ့ၢ်လံလၢသုအိၣ်လၢ ပသးလၢပကသံဃုာ်, ဒီးမူဃုာ်ဒီးသုလီၤ. ၄ ယသးခူတလ့ၢ်ဒိၣ်မးလၢသုဂ့ၢ်, ယပာ်ယသးကဖၢလၢဒိၣ်မးလၢသုဃိ, တၢ်မၤမုာ်ထီၣ်က့ၤယၤအိၣ်ပှဲၤယပူၤ, ယသးခုဒိၣ်မးလၢ ပတၢ်နးတၢ်ဖှီၣ်ခဲလၢာ်အပူၤလီၤ. ၅ အဂ့ၢ်ဒ်အံၤ, လၢပဟဲတုၤလၢမၤက့းဒနံ, ပဖံးပညၣ်တအိၣ်ဘှံး ဘၣ်လ့ၤတက့ၤဘၣ်, မ့ၢ်ပဘၣ်တၢ်နး တၢ်ဖှီၣ်လၢတၢ်ခဲလၢာ်လီၤ. လၢခိမ့ၢ်တၢ်ဒုးတၢ်ယၤ, လၢညါမ့ၢ်တၢ်ပျံၤတၢ်ဖုးလီၤ. ၆ ဘၣ်ဆၣ်ဒီးယွၤလၢ အမၤမုာ်ထီၣ်က့ၤပှၤလၢ အဘၣ် တၢ်ဆီၣ်လီၤ အီၤတဖၣ်န့ၣ်, မၤမုာ်ထီၣ်က့ၤပှၤလၢစီၤတံတူးဟဲတုၤအဃိလီၤ. ၇ ဒီးထဲအဟဲတုၤဧိၤတမ့ၢ်ဘၣ်. မ့ၢ်လၢတၢ်မၤမုာ်, လၢအဝဲဒၣ်ဘၣ်တၢ်မၤမုာ်အီၤလၢသုဂ့ၢ်န့ၣ်စ့ၢ်ကီးလီၤ. ဒီးတုၤအစံးဘၣ်တဲဘၣ်ပှၤလၢ သုဆၢ တၢ်သပှၢ်ပှၢ်, သုသးအုး, သုသးဂဲၤလိာ်လၢယၤဒီး, ယသးခုဒိၣ်န့ၢ်အန့ၣ်တက့ၢ်လီၤ. ၈ အဂ့ၢ်ဒ်အံၤ, မ့ၢ်ယမၤသးအုးသုလၢ ယလံာ်တဘ့ၣ်ဒီး, ယပီၢ်ယၢ်လီၤက့ၤတ့ၢ်ယသးနာ်သက့ဒီး, ယတပီၢ်ယၢ်လီၤက့ၤလၢၤဘၣ် ယသးဘၣ်. အဂ့ၢ်ဒ်အံၤ, ယထံၣ်လၢ လံာ်တဘ့ၣ်န့ၣ်မၤသးအုးသုဘၣ်ဆၣ်ဒီး, မ့ၢ်တစိၢ်ဖိဧိၤလီၤ. ၉ ခဲကနံၣ်အံၤ ယသးခုလၢ သုဘၣ်တၢ်သးအုးတမ့ၢ်ဘၣ်, မ့ၢ်လၢ သုသးအုးတုၤလၢ တၢ်ပီၢ်ယၢ်လီၤက့ၤသုသးအဃိန့ၣ်လီၤ. အဂ့ၢ်ဒ်အံၤ, သုသးအုးန့ၣ်ဘၣ်ဃးဒီးယွၤ, ဒ်သိးသုသုတဘၣ်တၢ် ဆံးလီၤစှၤလီၤလၢပဃိ, နီတမံၤတဂ့ၤန့ၣ်လီၤ. ၁၀ အဂ့ၢ်ဒ်အံၤ, တၢ်သးအုးဘၣ်ဃးဒီးယွၤန့ၣ်, ဒုးအိၣ်ထီၣ် တၢ်ပီၢ်ယၢ်လီၤက့ၤပသးတုၤလၢ တၢ်အုၣ်က့ၤခီၣ်က့ၤလၢပသးအုးလၢ အဃိအလီၢ်တအိၣ်ဘၣ်. မ့မ့ၢ်တၢ်သးအုး ဘၣ်ဃးဒီးဟီၣ်ခိၣ်န့ၣ်, ဒုးအိၣ်ထီၣ်တၢ်သံလီၤ. ၁၁ အဂ့ၢ်ဒ်အံၤ, ကွၢ်ကွၢ်, တၢ်အံၤတမံၤဒၣ်ဝဲ, လၢသုသးအုးဘၣ်ဃးဒီးယွၤအဃိဒီး, မ့ၢ်အဒုးအိၣ်ထီၣ် သုကျဲးစၢးတၢ် သပှၢ်ပှၢ်ဆံးအါလဲၣ်. မ့ၢ်လံ, သုကတိၤပူၤဖျဲးတၢ်, မ့ၢ်လံ, သုသးဟ့တၢ်, မ့ၣ်လံ, သုပျံၤတၢ်, မ့ၢ်လံ, သုဆၢတၢ်သပှၢ်ပှၢ်, မ့ၢ်လံ, သုသးဂဲၤလိာ်, မ့ၢ်လံ, သုဟ့ၣ်ဆၢတၢ်န့ၣ်ဆံးဒိၣ်လဲၣ်. လၢတၢ်ခဲလၢာ်အပူၤ, သုပာ်ဖျါသုသးလၢသုစီဆှံလၢ တၢ်အံၤအဂ့ၢ်လီၤ. ၁၂ မ်ဒ်န့ၣ်ဒီး ယကွဲးတ့ၢ်သုလံာ်တဘ့ၣ်, တမ့ၢ်ဘၣ်လၢပှၤမၤတၢ် တတီတလိၤဘၣ်တဂၤန့ၣ်အဃိဘၣ်, ဒီးတမ့ၢ်ဘၣ်လၢပှၤဘၣ်တၢ်မၤအီၤတတီတလိၤအဃိဘၣ်, မ့ၢ်ဒ်သိးသုကျဲးစၢးတၢ်လၢပဂီၢ်, ကအိၣ်ဖျါလၢယွၤအမဲာ်ညါ, လၢသုဂီၢ်လီၤ.
လါမ့ၤ ၂၀–၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကရံၣ်သူး ၁၁–၁၃
“တၤဆှုၣ်အိၣ်လၢ စီၤပီလူး အဖံးအညၣ်အကျါ”
(၂ ကရံၣ်သူး ၁၂:၇) ဒီးဒ်သိးယသုတပာ်ထီၣ်ထီယသးဒိၣ်ကဲၣ်ဆိး, လၢယထံၣ်တၢ်လၢညါခီအါအဃိတဂ့ၤဒီး, တၢ်ဟ့ၣ်ယၤလၢ တၤဆှုၣ်အိၣ် လၢယဖံးယညၣ်အကျါ, ဒ်ပစံးတၢ်အသိး, မုၣ်ကီၤလံၢ်အကလူး ဒ်သိးအကထိဘၣ်ယၤ, ဒ်သိးယသုတပာ်ယသးထီကဲၣ်ဆိးတဂ့ၤလီၤ.
တၢး၀၈ ၆/၁၅ ကဘျံးပၤ ၃–၄
ယဂံၢ်စၢ်ယဘါစၢ်သနာ်က့ ယအိၣ်ဒီးယစိယကမီၤ
ယဟိဝၤယွၤအခ့အပှၤလၢ အသးတီအဂၤတဂၤ ဃ့ယဟိဝၤယွၤလၢ ကသုးကွံာ်န့ၢ်အီၤ ‘တၤဆှုၣ်လၢ အဖံးအညၣ်အကျါ’ လီၤ. တၢ်မၢဖိပီလူး ဃ့ကညး ကစၢ်ယွၤသၢဘျီလၢ ကမၤထူၣ်ဖျဲးထီၣ်အီၤလၢ တၢ်ကီတၢ်ခဲအံၤလီၤ. အတၢ်ကီတၢ်ခဲန့ၣ် မ့မ့ၢ်တၢ်မနုၤဂ့ၤ, မနုၤဂ့ၤ လီၤဂာ်ဒ်တၤဆှုၣ်လၢ အမၤတံာ်တာ်အီၤ ဒီးမၤလီၤစှၤ အတၢ်သူၣ်ခုသးခုလၢ တၢ်မၤယဟိဝၤယွၤ အတၢ်မၤအပူၤလီၤ. အဃိ စီၤပီလူး ထိၣ်သတြီၤဝဲဒ်အမ့ၢ် တၢ်လၢအမၤဆါအီၤ ထီဘိလီၤ. ယဟိဝၤယွၤ စံးဆၢက့ၤအီၤဒ်အံၤ– “ယဘျုးယဖှိၣ် အါလံလၢနဂီၢ်လံ. အဂ့ၢ်ဒ်အံၤ, ယစိယကမီၤလၢထီၣ်ပှဲၤထီၣ်လၢ တၢ်အဂံၢ်စၢ်အဘါစၢ်အပူၤလီၤ.” ယဟိဝၤယွၤ တမၤလီၢ်မၢ်ကွံာ်န့ၢ်အီၤ တၤဆှုၣ်လၢအဖံးအညၣ်အကျါဘၣ်. စီၤပီလူး ကဘၣ်ဂုာ်ကျဲးစၢးဝဲ သပှၢ်ပှၢ်လီၤ. ဘၣ်ဆၣ် အဝဲတဲဝဲလၢ– “အဂ့ၢ်ဒ်အံၤ, တုၤယဂံၢ်စၢ်ယဘါစၢ်ဒီး, ယအိၣ်ဒီးယစိယကမီၤလီၤ.” (၂ ကရံၣ်. ၁၂:၇-၁၀) အဝဲအဲၣ်ဒိး တဲဝဲတၢ်မနုၤလဲၣ်.
(၂ ကရံၣ်သူး ၁၂:၈, ၉) လၢတၢ်န့ၢ်အဂ့ၢ်, ဒ်သိးအကဟးဖးဒီးယၤဒီး, ယဃ့ကညးကစၢ်သၢစုလီၤ. ၉ ဒီးအဝဲဒၣ်စံးဘၣ်ယၤ, ယဘျုးယဖှိၣ် အါလံလၢနဂီၢ်လံ. အဂ့ၢ်ဒ်အံၤ, ယစိယကမီၤလၢထီၣ်ပှဲၤထီၣ်လၢ တၢ်အဂံၢ်စၢ်အဘါစၢ်အပူၤလီၤ. မၤသးဒ်န့ၣ်ဒီး, ဒ်သိးခရံာ်အစိအကမီၤကအိၣ်ကဆိးလၢယလိၤဒီး, ယသးခုဒီး, ယကပာ်ယသးကဖၢလၢ လၢယဂံၢ်စၢ်ဘါစၢ်အဃိလီၤ.
တၢး၀၆ ၁၂/၁၅ ကဘျံးပၤ ၂၄ အဆၢ ၁၇-၁၈
ယဟိဝၤဟ့ၣ် “ပှၤလၢအဃ့တၢ်လၢအီၤတဖၣ်လၢသးစီဆှံ”
၁၇ ဘၣ်ဃးဒီး စီၤပီလူး အတၢ်ထုကဖၣ်န့ၣ် ကစၢ်ယွၤ စံးဘၣ်အီၤလၢ– “ယဘျုးယဖှိၣ် အါလံလၢနဂီၢ်လံ. အဂ့ၢ်ဒ်အံၤ, ယစိယကမီၤလၢထီၣ်ပှဲၤထီၣ်လၢ တၢ်အဂံၢ်စၢ်အဘါစၢ်အပူၤလီၤ.” စီၤပီလူးစံးဝဲလၢ– ‘မၤသးဒ်န့ၣ်ဒီး, ဒ်သိးခရံာ်အစိအကမီၤကအိၣ်ကဆိးလၢယလိၤ [“ဒ်ဒဲအသိး,” NWT] ဒီး, ယသးခုဒီး, ယကပာ် ယသးကဖၢလၢ လၢယဂံၢ်စၢ်ဘါစၢ်အဃိလီၤ.’ (၂ ကရံၣ်သူး ၁၂:၉; စံးထီၣ်ပတြၢၤ ၁၄၇:၅) စီၤပီလူး သ့ၣ်ညါဘၣ်ဝဲလၢ ခီဖျိလၢခရံာ်န့ၣ် ကစၢ်ယွၤအစိကမီၤ အတၢ်ဒီသဒၢ မၤဘၢအီၤဒ် ဒဲအသိးလီၤ. စိၤခဲအံၤစ့ၢ်ကီး ယဟိဝၤယွၤ စံးဆၢက့ၤ ပတၢ်ထုကဖၣ် ဒ်န့ၣ်အသိးလီၤ. ဒ်တၢ်အိၣ်သဒၢလီၢ်တခါအသိး အဝဲဒီသဒၢဝဲ အခ့အပှၤတဖၣ်လီၤ.
၁၈ ဒဲန့ၣ် တမၤပတုာ်ကွံာ်ဝဲ တၢ်ဟဲစူၤ မ့တမ့ၢ် ကလံၤအူတၢ်ဘၣ် သနာ်က့ ဒီသဒၢပှၤလၢ မူခိၣ်ထံ ဒီးကလံၤလီၤ. ဒ်န့ၣ်အသိး တၢ်အိၣ်သဒၢအလီၢ် လၢပဒိးန့ၢ်ဘၣ်ခီဖျိလၢ ခရံာ်အစိအကမီၤန့ၣ် တမၤပတုာ်ကွံာ်န့ၢ်ပှၤ တၢ်လ့ပစီလၢအဘၣ်ပှၤ မ့တမ့ၢ် တၢ်ကီတၢ်ခဲတဖၣ်ဘၣ်. ဘၣ်ဆၣ် တၢ်အိၣ်သဒၢအလီၢ်န့ၣ် ဒီသဒၢပှၤလၢ နီၢ်သးတခီ လၢဘၣ်ဃးဒီး ဟီၣ်ခိၣ်တၢ်ပာ်သူၣ်ပာ်သး ဒီးမုၣ်ကီၤလံၢ် အတၢ်လ့ပစီတဖၣ်လီၤ. (လီၣ်ဖျါ ၇:၉, ၁၅, ၁၆) အဃိ, နမ့ၢ်ထံၣ်ဘၣ် တၢ်မၤကွၢ်လၢအတ ‘ဟးဖးဒီးနၤ’ သနာ်က့ နနာ်သ့သပှၢ်တၢၢ်လၢ ယဟိဝၤယွၤ ထံၣ်ဝဲနတၢ်ဂုာ်ကျဲးစၢး ဒီးအဝဲကစံးဆၢက့ၤဝဲန “ကိးထီၣ်တၢ်” လီၤ. (ယၡါယၤ ၃၀:၁၉; ၂ ကရံၣ်သူး ၁:၃,၄) စီၤပီလူးကွဲးဝဲလၢ– “တမ့ၢ်ဘၣ်သုဘၣ် တၢ်လ့ပစီလၢ အတဘၣ်ဒံးဘၣ် ပှၤကညီဘၣ်. ဒီးယွၤမၤဝဲ အကလုၢ်တီသတးဒီး, တၢ်လ့ပစီလၢအဆူၣ်ကဲၣ်ဆိး, လၢသုဒိးတကဲဘၣ်န့ၣ်, တဒုးဒိးဘၣ်သုဘၣ်. မ့မ့ၢ်လၢတၢ်လ့ပစီအပူၤ, ကမၤထီၣ်ကျဲဒ်သိး သုကပူၤဖျဲးလၢအီၤလီၤ.”—၁ ကရံၣ်သူး ၁၀:၁၃; ဖံလံးပံၤ ၄:၆, ၇.
(၂ ကရံၣ်သူး ၁၂:၁၀) မၤသးဒ်န့ၣ်ဒီး ဘၣ်ယသးလၢယဂံၢ်စၢ် ယဘါစၢ်အပူၤ, လၢတၢ်မၤယၤတရီတပါအပူၤ, လၢတၢ်ဖှီၣ်တၢ်ယာ်အပူၤ, လၢတၢ်မၤအၢမၤသီယၤအပူၤ, လၢတၢ်ကီတၢ်ခဲအပူၤ လၢခရံာ်အဃိလီၤ. အဂ့ၢ်ဒ်အံၤ, တုၤယဂံၢ်စၢ်ယဘါစၢ်ဒီး, ယအိၣ်ဒီးယစိယကမီၤလီၤ.
“ပှၤလၢအလီၤဘှါန့ၣ် ယွၤဟ့ၣ်ဝဲလၢ အဂံၢ်အဘါ”
၈ ဖး ယၡါယၤ ၄၀:၃၀ တက့ၢ်. ပဝဲသ့ၣ်တဖၣ်ပမ့ၢ်အိၣ်ဒီး တၢ်သ့တၢ်ဘၣ်အါမးသနာ်က့ ပသ့ၣ်ညါဘၣ်လၢ ပမၤတၢ်လၢပနီၢ်ကစၢ်အဂံၢ်အဘါ တသ့ခဲလၢာ်ဘၣ်. ပဟံးန့ၢ်တၢ်မၤလိလၢ တၢ်မၢဖိပီလူးအအိၣ်သ့ဝဲလီၤ. အဝဲအိၣ်ဒီးတၢ်သ့တၢ်ဘၣ်အါမး ဘၣ်ဆၣ် တၢ်လၢအဝဲအဲၣ်ဒိးမၤဝဲန့ၣ် မၤဝဲတသ့ခဲလၢာ်ဘၣ်. ဖဲအဝဲတဲပၠး ယဟိဝၤယွၤလၢအတၢ်တူၢ်ဘၣ်အခါ ယဟိဝၤယွၤ စံးဆၢက့ၤအီၤလၢ– “ယစိယကမီၤလၢထီၣ်ပှဲၤထီၣ်လၢ တၢ်အဂံၢ်စၢ်ဘါစၢ်အပူၤလီၤ.” စီၤပီလူး နၢ်ပၢၢ်ထီၣ်ဝဲတၢ်လၢ ယဟိဝၤယွၤ တဲအီၤန့ၣ်လီၤ. ဒီးအဝဲတဲဝဲလၢ– “တုၤယဂံၢ်စၢ်ယဘါစၢ်ဒီး, ယအိၣ်ဒီးယစိယကမီၤလီၤ.” (၂ ကရံၣ်သူး ၁၂:၇-၁၀) အဝဲအဲၣ်ဒိးစံးဝဲတၢ်မနုၤလဲၣ်.
၉ စီၤပီလူးသ့ၣ်ညါဝဲလၢ အဝဲမၤတၢ်လၢအနီၢ်ကစၢ် အဂံၢ်အဘါတသ့ခဲလၢာ်ဘၣ်. အဝဲလိၣ်ဘၣ် တၢ်မၤစၢၤလၢ ပှၤလၢအိၣ်ဒီး တၢ်စိတၢ်ကမီၤတဂၤအအိၣ်လီၤ. ဖဲအဂံၢ်လီၤစၢ်အခါ ယွၤဟ့ၣ်အီၤအသးစီဆှံလီၤ. တၢ်လၢစီၤပီလူးမၤဝဲလၢ အနီၢ်ကစၢ်တသ့ဘၣ်တဖၣ်ဒၣ်လဲာ် ဒ်သိးအမၤဝဲကသ့အဂီၢ် ယွၤအသးစီဆှံ ဟ့ၣ်အီၤတၢ်ဂံၢ်တၢ်ဘါသ့လီၤ. တၢ်ကဲထီၣ်အသးဒီးပှၤ ဒ်န့ၣ်အသိးသ့စ့ၢ်ကီးလီၤ. ယဟိဝၤယွၤ မ့ၢ်ဟ့ၣ်ပှၤအသးစီဆှံန့ၣ် ပဂံၢ်ပဘါကဆူၣ်ထီၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ ကရံၣ်သူး ၁၂:၂-၄) အိၣ်တ့ၢ်တဆံလွံၢ်နံၣ်န့ၣ်, ယသ့ၣ်ညါပှၤကညီအိၣ်လၢ ခရံာ်အပူၤတဂၤ, မ့ၢ်အိၣ်နီၢ်ခိယတသ့ၣ်ညါဘၣ်, မ့ၢ်တအိၣ်နီၢ်ခိယတသ့ၣ်ညါဘၣ်, ယွၤသ့ၣ်ညါဝဲ, ပှၤဒ်န့ၣ်တဂၤန့ၣ် ဘၣ်တၢ်ထုးန့ၢ်အီၤဆူမူခိၣ်သၢတီၤတတီၤလီၤ. ၃ ဒီးယသ့ၣ်ညါပှၤကညီဒ်န့ၣ်တဂၤ, မ့ၢ်အိၣ်နီၢ်ခိ တအိၣ်နီၢ်ခိလဲၣ်န့ၣ်, ယတသ့ၣ်ညါဘၣ်, ယွၤသ့ၣ်ညါဝဲလီၤ. ၄ အဝဲဒၣ်န့ၣ်, ဘၣ်တၢ်ထုးန့ၢ်အီၤဆူပၤရဒံစူး, ဒီးနၢ်ဟူတၢ်ကတိၤလၢ ပှၤစံးတသ့ဘၣ်, ဒီးတဂ့ၤကတိၤဘၣ်ပှၤကညီဘၣ်.
ပှၤဖးလံာ်ဖိတဖၣ် အတၢ်သံကွၢ်
“မူခိၣ်သၢတီၤတတီၤ” လၢ ၂ ကရံၣ်သူး ၁၂:၂ ပာ်ဖျါဝဲန့ၣ် ကမ့ၢ် မ့းၡံအၤဘီမုၢ်လၢ ယ့ၣ်ၡူးဒီးပှၤ ၁၄၄,၀၀၀ ပၢဝဲလၢအမ့ၢ် “မူခိၣ်အသီ” လီၤ.—၂ ပ့း. ၃:၁၃.
ဘီမုၢ်အံၤ ဘၣ်တၢ်ကိးအီၤလၢ “မူခိၣ်သၢတီၤတတီၤ” ခီဖျိလၢအမ့ၢ်တၢ်ပၢလၢ အပတီၢ်ထီ ဒီးဘီမုၢ်လၢအဂ့ၤကတၢၢ်အဃိလီၤ.
လၢတၢ်ထံၣ်လၢညါခီအပူၤ စီၤပီလူးဘၣ် “တၢ်ထုးန့ၢ်အီၤ” ဆူ “ပၤရဒံစူး” အပူၤန့ၣ် ကအဲၣ်ဒိးတဲဝဲ သၢခါလီၤ. (၁) ပၤရဒံစူးလၢ ကဟဲကဲထီၣ်အသး ဖဲဟီၣ်ခိၣ်အံၤ, (၂) ဖဲန့ၣ်အဆၢကတီၢ် နီၢ်သးပၤရဒံစူးလၢ ကဂ့ၤဒိၣ်န့ၢ်ဒံး နီၢ်သးပၤရဒံစူးလၢ အိၣ်ပာ်စၢၤခဲအံၤ, (၃) “ကစၢ်ယွၤ အပၤရဒံစူး” လၢမူခိၣ် လၢအပၣ်ဃုာ်လၢ ကစၢ်ယွၤအတၢ်ရဲၣ်တၢ်ကျဲၤလၢအသီအပူၤလီၤ.
(၂ ကရံၣ်သူး ၁၃:၁၂) ကတိၤဒိၣ်လိာ်သုသးဒီး တၢ်နၢမူစီဆှံတက့ၢ်.
it-2 ကဘျံးပၤ ၁၇၇
တၢ်နၢမူ
“တၢ်နၢမူစီဆှံ” န့ၣ် ဘၣ်သ့ၣ်သ့ၣ် ကမ့ၢ်ပိာ်မုၣ်သကိးပိာ်မုၣ်, ပိာ်ခွါသကိးပိာ်ခွါ ဆၢဂ့ၤဆၢဝါလိာ်အသးလၢ တၢ်နၢမူ (ရိ. ၁၆:၁၆; ၁ ကရံၣ်. ၁၆:၂၀; ၂ ကရံၣ်. ၁၃:၁၂; ၁ သ့း. ၅:၂၆) လၢအမ့ၢ် “တၢ်အဲၣ်တၢ်ကွံအနၢမူ” လီၤ. (၁ ပ့း. ၅:၁၄) ခရံာ်ဖိလၢညါတဖၣ် အတၢ်ဆၢဂ့ၤဆၢဝါလိာ်သးန့ၣ် ကလီၤဂာ်လိာ်အသးဒီး လၢညါပှၤဧ့ၤဘြံၤဖိတဖၣ် အလုၢ်အလၢ်လၢ အဆၢဂ့ၤဆၢဝါလိာ်အသးလၢ တၢ်နၢမူလီၤ. လံာ်စီဆှံ တပာ်ဖျါထီၣ်ဝဲ တၢ်ဂ့ၢ်အံၤ လီၤတံၢ်လီၤဆဲး သနာ်က့ တၢ်ကတိၤလၢအမ့ၢ် “တၢ်နၢမူစီဆှံ” မ့တမ့ၢ် “တၢ်အဲၣ်တၢ်ကွံအနၢမူ” အံၤပာ်ဖျါထီၣ်ဝဲလၢ ခရံာ်ဖိတၢ်အိၣ်ဖှိၣ်အပူၤ အိၣ်ဒီးတၢ်အဲၣ်လၢအကဆှီ ဒီးတၢ်ဃူတၢ်ဖိးလီၤ.—ယိၤ. ၁၃:၃၄, ၃၅.
တၢ်ဖးလံာ်စီဆှံ
(၂ ကရံၣ်သူး ၁၁:၁-၁၅) ဘၣ်ယသးလၢ သုကဝံသးစူၤယၤလၢ ယတၢ်ဟးဂီၤတစဲးလီၤ. ဒီးဝံသးစူၤယၤတက့ၢ်. ၂ အဂ့ၢ်ဒ်အံၤ, ယသးက့ၣ်သုလၢတၢ်သးက့ၣ်ဘၣ်ဃးဒီးယွၤလီၤ. အဂ့ၢ်ဒ်အံၤ, ယဒုးအဲၣ်တီသုဒီးဝၤတဂၤ, ဒ်သိးယကပာ်သုလၢမုၣ်ကနီၤစီဆှံလၢ ခရံာ်အမဲာ်ညါလီၤ. ၃ ဘၣ်ဆၣ်ဒီးဒ်ဂုၢ်လီန့ၢ်နီၢ်အံၣ်အုလၢ အတၢ်လီတၢ်ဝံၤ အသိးန့ၣ်, ယဘၣ်ယိၣ်လၢတၢ်ကမၤ ဟးဂီၤကွံာ်သုသးလၢ တၢ်တီတၢ်လိၤဘၣ်ဃးဒီးခရံာ်လီၤ. ၄ အဂ့ၢ်ဒ်အံၤ, ပှၤလၢအဟဲန့ၣ်, မ့ၢ်စံၣ်တဲၤတဲလီၤယ့ၣ်ၡူးအဂၤတဂၤ, လၢပတစံၣ်တဲၤတဲလီၤဘၣ်ပဝဲမ့ၢ်ဂ့ၤ, သုမ့ၢ်ဒိးန့ၢ်သးအဂၤ, လၢသုတဒိးန့ၢ်ဒံးဘၣ်မ့ၢ်ဂ့ၤ, သုမ့ၢ်တူၢ်လိာ်တၢ်သးခု အကစီၣ်အဂၤ, လၢသုတတူၢ်လိာ်ဒံးဘၣ်မ့ၢ်ဂ့ၤဒီး, ဂ့ၤလၢသုဝံသးစူၤတၢ်လီၤ. ၅ အဂ့ၢ်ဒ်အံၤ, ယဆိကမိၣ်လီၤယသးလၢ ယတဆံးန့ၢ်ဘၣ်ပှၤတၢ်မၢဖိ လၢအဒိၣ်ကတၢၢ်တဖၣ်န့ၣ်, လၢတၢ်နီတမံၤဘၣ်လီၤ. ၆ ဒီးယမ့ၢ်ပှၤအမံၤလၢတၢ်ကတိၤနာ်သက့ဒီး, ယတမ့ၢ်ဘၣ်လၢတၢ်သ့ၣ်ညါန့ၣ်ဘၣ်. မ့မ့ၢ်လၢတၢ်ခဲလၢာ်အပူၤ, ပဒုးအိၣ်ဖျါထီၣ်အီၤလၢသုဂီၢ် လၢပှၤခဲလၢာ်အကျါလီၤ. ၇ မ့ၢ်ယစံၣ်တဲၤတဲလီၤသုလၢ ယွၤအတၢ်သးခု အကစီၣ်လၢအဘူးအလဲတအိၣ်ဘၣ်, ဒီးဆီၣ်လီၤယသးဒ်သိးသုကဘၣ်တၢ်ထီၣ်ထီဒီး, မ့ၢ်ယမၤကမၣ်တၢ်ဧါ. ၈ ယဂုာ်န့ၢ်တၢ်အိၣ်ဖှိၣ် အဂုၤအဂၤတဖၣ် အတၢ်, ဒီးဟံးန့ၢ်တၢ်အဘူးအလဲဒ်သိး ယကမၤသုတၢ်လီၤ. ၉ ဒီးဖဲယအိၣ်ဒီးသုအဖၢမုၢ်ဒီး, ယတၢ်တလၢတပှဲၤဘၣ်ဆၣ်ဒီး, ယတအိၣ်ဃၢလၢသုလိၤနီတဂၤဘၣ်. အဂ့ၢ်ဒ်အံၤ, ယတၢ်တလၢဘၣ်တဖၣ်န့ၣ်, ဒီပုၢ်ဝဲၢ်လၢအဟဲလၢမၤက့းဒနံတဖၣ်, မၤပှဲၤထီၣ်ဝဲလီၤ. ဒီးဒ်သိးယသုတမၤဃၢ ယတၢ်လၢသုလိၤ လၢတၢ်နီတမံၤတဂ့ၤဒီး, ယပလီၢ်ယသးဒီးယကပလီၢ်ဒံးယသးလီၤ. ၁၀ ဒ်ခရံာ်အတၢ်မ့ၢ်တၢ်တီ အိၣ်လၢယပူၤအသိးန့ၣ်, ယပာ်ယသးကဖၢလၢ လၢကီၢ်အဃါယၤ အပူၤန့ၣ်, ယတတူၢ်မးတၢ်တြီယၤ လၢပှၤနီတဂၤဘၣ်. ၁၁ မ့ၢ်အဘၣ်မနုၤလဲၣ်, မ့ၢ်ယတအဲၣ်ဘၣ် သုအဃိဧါ. ယွၤသ့ၣ်ညါဝဲဒၣ်လီၤ. ၁၂ ဘၣ်ဆၣ်ဒီး တၢ်လၢယမၤန့ၣ်, ယကမၤဒံးစ့ၢ်ကီး, ဒ်သိးယကမၤတူာ်ကွံာ် ပှၤအလီၢ်လၢအဃုအလီၢ်, ဒ်သိးတၢ်လၢအဝဲသ့ၣ် ပာ်အသးကဖၢလၢလၢအဃိန့ၣ်, အဝဲသ့ၣ်ကအိၣ်ဖျါဒ် ပဝဲအသိးလီၤ. ၁၃ အဂ့ၢ်ဒ်အံၤ, ပှၤဒ်န့ၣ်သိးတဖၣ်, မ့ၢ်ပှၤတၢ်မၢဖိအဘျၣ်, ပှၤမၤလီတၢ်, ဒီးပျိာ်လဲအသးလၢ ခရံာ်အပှၤတၢ်မၢဖိလီၤ. ၁၄ ဒီးပကမၢကမၣ် အလီၢ်တအိၣ်ဘၣ်. အဂ့ၢ်ဒ်အံၤ, မုၣ်ကီၤလံၢ်အကစၢ်ဒၣ်လဲာ်, ပျိာ်လဲအသးလၢတၢ်ကပီၤအကလူးလီၤ. ၁၅ မၤသးဒ်န့ၣ်ဒီး, အခ့အပှၤတဖၣ် မ့ၢ်ပျိာ်လဲအသးလၢ တၢ်တီတၢ်လိၤအခ့အပှၤဒီး, တမ့ၢ်ဘၣ်တၢ်ဒိၣ် တၢ်မုၢ်ဘၣ်. အဝဲသ့ၣ်အကတၢၢ်ကမ့ၢ်ဝဲဒ်အတၢ်မၤအသိးန့ၣ်လီၤ.
လါမ့ၤ ၂၇–လါယူၤ ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကလၤတံ ၁–၃
“မ့ၢ်လၢအတၢ်ကမၣ်အိၣ်အဃိ ယကတိၤတၢ်ဒီးအီၤ မဲာ်သကိးမဲာ်”
(ကလၤတံ ၂:၁၁-၁၃) ဘၣ်ဆၣ်ဒီး တုၤစီၤပ့းတရူးဟဲဆူအၣ်တံၤအီာ်ဒီး, ယဂ့ၢ်လိာ်ဘှီလိာ်အီၤ လၢအမဲာ်သၣ်ပူၤလီၤ. အဂ့ၢ်ဒ်အံၤ, ပာ်တၢ်ကမၣ် လၢအလိၤ အလီၢ်အိၣ်လီၤ. ၁၂ အဂ့ၢ်ဒ်အံၤ, တချုးပှၤတနီၤနီၤဟဲလၢစီၤယၤကိာ်အအိၣ်ဒီး, အဝဲဒၣ်အီၣ်ဃုာ်တၢ်ဒီးပှၤကလုာ်တဖၣ်လီၤ. မ့မ့ၢ်တုၤအဝဲသ့ၣ်ဟဲတုၤဒီး, ပျံၤပှၤဒိးတၢ်ကူးတရံးဒီးဂုၤက့ၤအသး, ဒီးမၤလီၤဖးအသးလီၤ. ၁၃ ဒီးပှၤယူဒၤဖိအဂၤတဖၣ်လီဃုာ်တၢ်စ့ၢ်ကီး ဒီးအီၤတုၤစီၤဘၢ်နါဘၤဒၣ်လဲာ် လဲၤဃုာ်ဒီးအီၤ လၢအလီတၢ်အပူၤလီၤ.
တၢး၁၇.၀၄ ကဘျံးပၤ ၂၅, ၂၆ အဆၢ ၁၆
ယဟိဝၤယွၤ အတၢ်စံၣ်ညီၣ်တီန့ၣ် မ့ၢ်နထံၣ်အီၤဒ်လဲၣ်
၁၆ ဖး ကလၤတံ ၂:၁၁-၁၄ တက့ၢ်. စီၤပ့းတရူး ပျံၤပှၤကညီလီၤ. (ကတိၤဒိ ၂၉:၂၅) ယဟိဝၤယွၤ ထံၣ်ဝဲပှၤတခီဘီမုၢ်ဖိတဖၣ် ဒ်လဲၣ်န့ၣ် စီၤပ့းတရူးသ့ၣ်ညါဝဲလီၤ. ဘၣ်ဆၣ် စီၤပ့းတရူး ဘၣ်ယိၣ်ဝဲလၢ ပှၤယူဒၤဖိလၢ အဒိးတၢ်ကူးတရံးတဖၣ် မ့ၢ်ထံၣ်လၢအဝဲရ့ဒီး ပှၤတခီဘီမုၢ်ဖိလၢ တဒိးတၢ်ကူးတရံးဘၣ်တဖၣ်န့ၣ် အဝဲသ့ၣ်ကထံၣ်ဆံးအီၤလီၤ. တၢ်မၢဖိပီလူး တဲဘၣ်စီၤပ့းတရူးလၢ အမ့ၢ်ပှၤလၢ အပာ်မၤအသးလီၤ. ဘၣ်မနုၤအဃိ တဲဝဲဒ်န့ၣ်လဲၣ်. မ့ၢ်လၢအပူၤကွံာ် ဖဲ ခ.န. ၄၉ နံၣ်ပှၤမၤတၢ်အိၣ်ဖှိၣ်လၢ ဝ့ၢ်ယရူၤၡလ့ၣ်အခါ စီၤပီလူးထံၣ်ဘၣ်ဝဲ စီၤပ့းတရူး ဆၢထၢၣ်တဲတၢ်လၢ ပှၤတခီဘီမုၢ်ဖိတဖၣ် အဂီၢ်အဃိလီၤ. (မၤတၢ် ၁၅:၁၂; ကလၤ. ၂:၁၃) စီၤပ့းတရူးမၤဝဲဒ်န့ၣ်အဃိ ပှၤတခီဘီမုၢ်ဖိလၢ အကဲထီၣ်ခရံာ်ဖိတဖၣ် အသးဘၣ်ဒိဝဲလီၤ. ဘၣ်ဆၣ်အဝဲသ့ၣ်မၤဝဲဒ်လဲၣ်. မ့ၢ်အဝဲသ့ၣ် ကလီၤဃံၢ်လၢ စီၤပ့းတရူးအဃိဧါ. စီၤပ့းတရူး မၤဘၣ်တၢ်ကမၣ်အဃိ မ့ၢ်အမူဒါ ကလီၤမၢ်ကွံာ်ဝဲဧါ.
(ကလၤတံ ၂:၁၄) မ့မ့ၢ်တုၤယထံၣ်လၢ ပှၤတဖၣ်တလဲၤ စၢၢ်ဆၢဘၣ်ဒီး တၢ်သးခုအကစီၣ် အတၢ်မ့ၢ်တၢ်တီဘၣ်ဒီး, ယစံးဘၣ် စီၤပ့းတရူးလၢ ပှၤခဲလၢာ်အမဲာ်ညါ, ပှၤယူဒၤဖိတဂၤနဲဒၣ်အံၤ, နမ့ၢ်တိၢ်န့ၢ်ပှၤကလုာ်တဖၣ်အလုၢ်အလၢ်, ဒီးတတိၢ်န့ၢ်ဘၣ်ပှၤယူဒၤဖိအလုၢ်အလၢ်ဘၣ်ဒီး, ဘၣ်မနုၤလၢနမၢဆူၣ်ပှၤကလုာ်တဖၣ်မၤဒ်ပှၤယူဒၤဖိအသိးလဲၣ်.
တၢး၁၃ ၃/၁၅ ကဘျံးပၤ ၅ အဆၢ ၁၂
ပှၤလၢအအဲၣ် ယဟိဝၤယွၤန့ၣ် “အခီၣ်တဘၣ်တိၢ်ဒီးလီၤဃံၢ်ဘၣ်”
၁၂ စီၤပ့းတရူး ဘၣ်ယိၣ်ဝဲလၢ ပှၤကထံၣ်အီၤဒ်လဲၣ် ဒီးပျံၤတၢ်အဃိ မၤဘၣ်တၢ်ကမၣ် ခဲအံၤခဲအံၤ သနာ်က့ အဝဲဆဲးပၢၤဃာ် အတၢ်သးတီဒီး ယ့ၣ်ၡူး ဒီးယဟိဝၤယွၤလီၤ. အဒိ လၢကမျၢၢ်အမဲာ်ညါ အဝဲဂ့ၢ်လိာ်ဝဲလၢ တသ့ၣ်ညါဘၣ်အကစၢ်ဘၣ်န့ၣ် သၢဘျီညါ. (လူၤ. ၂၂:၅၄-၆၂) လၢခံတဘျီန့ၣ် စီၤပ့းတရူးတမၤဝဲဒ် ခရံာ်ဖိတဖၣ်အလုၢ်အလၢ်အသိးဘၣ်. ပှၤတခီဘီမုၢ်ဖိလၢ အကဲထီၣ်ခရံာ်ဖိတဖၣ်န့ၣ် အဝဲတရ့ဝဲဂ့ၤဂ့ၤ ဒ်သိးဒီး ပှၤယူဒၤဖိလၢအကဲထီၣ်ခရံာ်ဖိ ဒီးဒိးတၢ်ကူးတရံးတဖၣ်ဘၣ်. တၢ်မၢဖိပီလူး သ့ၣ်ညါဝဲတၢ်ဂ့ၢ်အံၤဂ့ၤဂ့ၤလီၤ. တၢ်ကွၢ်တလီၤကလုာ်ဒူၣ်န့ၣ် တကြၢးအိၣ်လၢ တၢ်အိၣ်ဖှိၣ်အပူၤဘၣ်. စီၤပ့းတရူး အတၢ်ပာ်သူၣ်ပာ်သးကမၣ်လီၤ. စီၤပ့းတရူးအတၢ်ပာ်သူၣ်ပာ်သးန့ၣ် ဘၣ်ကူဘၣ်ဂာ်ပှၤလၢ တၢ်အိၣ်ဖှိၣ်အပူၤတဖၣ် သ့ဝဲအဃိ စီၤပီလူး သိၣ်ဃီၣ်အီၤလီၤ. (ကလၤ. ၂:၁၁-၁၄) ခီဖျိလၢ အဘၣ်တၢ်သိၣ်ဃီၣ်အဃိ စီၤပ့းတရူး အသးထီၣ်တၢ် ဒီးဟးထီၣ်ကွံာ်လၢ တၢ်ဃ့ၢ်ပြၢလၢသးသမူ အကျဲဖီခိၣ်ဧါ. တဟးထီၣ်ကွံာ်ဘၣ်. အဝဲတူၢ်လိာ်ဝဲ စီၤပီလူးအတၢ်ဟ့ၣ်ကူၣ် ဒီးဆီတလဲအတၢ်ပာ်သူၣ်ပာ်သး ဒီးဆဲးဃ့ၢ်ဝဲလၢ တၢ်မူအကျဲဖီခိၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ကလၤတံ ၂:၂၀) ယဒိးသံဃုာ်လံယသး လၢထူၣ်စုညါအလိၤဒီးခရံာ်န့ၣ်လံ, ဘၣ်ဆၣ်ဒီးယမူလီၤ. ဘၣ်ဆၣ်တမ့ၢ်လၢၤဘၣ် ယၤဘၣ်, မ့ၢ်ခရံာ်မူလၢယပူၤလီၤ. ဒီးတၢ်လၢယမူလၢတၢ်ဖံးတၢ်ညၣ်အပူၤခဲကနံၣ်အံၤ, မ့ၢ်ယမူလၢတၢ်နာ်ဘၣ်ဃးဒီးယွၤအဖိခွါတဂၤ, လၢအအဲၣ်ယၤဒီးဟ့ၣ်လီၤကွံာ်အသးလၢယဂီၢ်လီၤ.
တၢး၁၄ ၉/၁၅ ကဘျံးပၤ ၁၆ အဆၢ ၂၀-၂၁
“ဘၣ်ဖှီၣ်ဘၣ်နးအါမး” သနာ်က့ မၤယွၤအတၢ်မၤလၢ တၢ်သးတီအပူၤ
၂၀ ပမၤနၢၤမုၣ်ကီၤလံၢ် အတၢ်လ့ပစီတဖၣ် ကသ့ဒ်လဲၣ်. အဒိ ပမ့ၢ်တူၢ်ဘၣ် တၢ်သးဟးဂီၤန့ၣ် ပမၤနၢၤကွံာ်အီၤကသ့ဒ်လဲၣ်. ကျဲအဂ့ၤကတၢၢ်တဘိန့ၣ် မ့ၢ်ဝဲ တၢ်ဆိကမိၣ်ထံ တၢ်ပှ့ၤက့ၤအဂ့ၢ်လီၤ. တၢ်မၢဖိပီလူး မၤဝဲဒ်န့ၣ်လီၤ. တဘျီတခီၣ် အဝဲအသးဟးဂီၤ သနာ်က့ သ့ၣ်ညါဝဲလၢ ယ့ၣ်ၡူးတတူၢ်သံအသးလၢ ပှၤလၢပှၤပှဲၤတဖၣ်အဂီၢ်ဘၣ်. ယ့ၣ်ၡူးတူၢ်သံအသးလၢ ပှၤတၢ်ဒဲးဘးဖိ ဒ်သိးဒီးအီၤတဖၣ်အဂီၢ်လီၤ. အဝဲကွဲးဝဲလၢ “ယမူလၢတၢ်နာ်ဘၣ်ဃးဒီး ယွၤအဖိခွါတဂၤ, လၢအအဲၣ်ယၤ ဒီးဟ့ၣ်လီၤကွံာ်အသးလၢ ယဂီၢ်လီၤ.” (ကလၤ. ၂:၂၀) စီၤပီလူး တူၢ်လိာ်ဝဲ တၢ်ပှ့ၤက့ၤ ဒီးအၢၣ်လီၤတူၢ်လိာ်ဝဲလၢ တၢ်ပှ့ၤက့ၤန့ၣ် မ့ၢ်အဝဲအဂီၢ်လီၤ.
၂၁ နၤစ့ၢ်ကီး နမ့ၢ်တူၢ်လိာ်လၢ တၢ်ပှ့ၤက့ၤ မ့ၢ်တၢ်ဟ့ၣ်တခါလၢ ယဟိဝၤယွၤ ဟ့ၣ်လီၤနၤန့ၣ် ကကဲဘျုးလၢနဂီၢ်ဒိၣ်မးလီၤ. ပတဲဒ်အံၤအဃိ အခီပညီတမ့ၢ်လၢ နတၢ်တူၢ်ဘၣ်တဖၣ် ကလီၤမၢ်ကွံာ်ဝဲတဘျီဃီဘၣ်. ပှၤတနီၤန့ၣ် ကအိၣ်ဒီးတၢ်တူၢ်ဘၣ်ဒ်အံၤ တုၤဟီၣ်ခိၣ်သီဟဲတုၤတစုလီၤ. ဘၣ်ဆၣ် သ့ၣ်နီၣ်ထီၣ်လၢ ပှၤလၢတဟ့ၣ်ၡူဘၣ်န့ၣ် ကဒိးန့ၢ်ဘၣ်ခိၣ်ဖးလီၤ. တၢ်ဆၢကတီၢ်လၢ ယွၤအဘီအမုၢ် ကဒုးအိၣ်ထီၣ် တၢ်ဃူတၢ်ဖိး ဒီးပှၤဟီၣ်ခိၣ်ဖိလၢ အတီအလိၤခဲလၢာ် ကကဲထီၣ်ပှၤလၢပှၤပှဲၤန့ၣ် ဟဲဘူးထီၣ်ဝဲ တနံၤဘၣ်တနံၤလီၤ. တၢ်ကီတၢ်ခဲမ့ၢ်အါထဲလဲၣ် သနာ်က့ ပာ်လီၤနသးလၢ နကနုာ်လီၤလၢ ဘီမုၢ်အံၤအပူၤတက့ၢ်.
(ကလၤတံ ၃:၁) ပှၤဟးဂီၤ, ပှၤကလၤတံဖိ, လၢတၢ်ပာ်ဖျါထီၣ်ယ့ၣ်ၡူးခရံာ်ဒိးသံအသး လၢထူၣ်စုညါအလိၤ လၢသုမဲာ်ညါသ့ၣ်ဧၢ, မ့ၢ်မတၤမၤကဒါသုမဲာ်တဂၤလဲၣ်. တၢ်မိၣ်သ့ၣ်ညါယသးလၢသုထဲအံၤတမံၤ,
it-1 ကဘျံးပၤ ၈၈၀
လံာ် ကလၤတံ
စီၤပီလူး ကွဲးဝဲလၢ “ပှၤဟးဂီၤ, ပှၤကလၤတံဖိ” န့ၣ်တၢ်အုၣ်သးတအိၣ်လၢ အဝဲအဲၣ်ဒိးတဲဝဲထဲ ပှၤတကလုာ်လၢ အဟဲလီၤစၢၤလီၤသွဲၣ်လၢ ကါလဲး(စ်) စတီၣ် (Gallic stock) လၢအအိၣ်လၢ ကီၢ်ကလၤတံကလံၤစိး တခီန့ၣ်ဘၣ်. (ကလၤ. ၃:၁) လၢတၢ်န့ၣ်အလီၢ် စီၤပီလူးပာ်ဒ့ၣ်ပာ်ကမၣ်ဝဲ ပှၤတနီၤလၢ အမၤထွဲဝဲ ပှၤယူဒၤဖိအလုၢ်လၢ်ထူသနူတဖၣ်န့ၣ်လီၤ. ပှၤယူဒၤဖိတဖၣ်အံၤ တတဲဝဲလၢ အဝဲသ့ၣ်ကဲထီၣ် ‘ပှၤတီပှၤလိၤလၢ တၢ်နာ်’ ခီဖျိတၢ်အၢၣ်လီၤအီလီၤအသီအဃိဘၣ်. လၢတၢ်န့ၣ်အလီၢ် တဲဝဲလၢ အဝဲသ့ၣ်ကဲထီၣ် ပှၤတီပှၤလိၤ ခီဖျိမၤထွဲဝဲ စီၤမိၤၡ့ အတၢ်သိၣ်တၢ်သီအဃိလီၤ. (၂:၁၅–၃:၁၄; ၄:၉, ၁၀) ဖဲစီၤပီလူး ကွဲးလံာ်လၢ “တၢ်အိၣ်ဖှိၣ်တဖၣ်အိၣ်လၢကီၢ်ကလၤတံ” အဆၢကတီၢ်န့ၣ် ပှၤယူဒၤဖိ ဒီးပှၤလၢတမ့ၢ် ပှၤယူဒၤဖိ အိၣ်ကျဲၣ်ကျီလိာ်အသးလၢ တၢ်အိၣ်ဖှိၣ်အပူၤလီၤ. (၁:၂) ပှၤလၢတမ့ၢ် ပှၤယူဒၤဖိတဖၣ်အကျါန့ၣ် ပၣ်ဃုာ်ဒီး ပှၤတခီဘီမုၢ်ဖိလၢ အနုာ်လီၤလၢ ပှၤယူဒၤဖိအတၢ်ဘူၣ်တၢ်ဘါ ဒီးဒိးတၢ်ကူးတရံး ဒီးပှၤတခီဘီမုၢ်ဖိလၢ တဒိးတၢ်ကူးတရံးဘၣ်တဖၣ်လီၤ. ဒီးလၢအဝဲသ့ၣ်အကျါန့ၣ် ပၣ်ဃုာ်ဒီး ပှၤတကလုာ်လၢ အဟဲလီၤစၢၤလၢ ပှၤစဲ(လ်) ထံးဖိ (Celtic descent) န့ၣ်လီၤ. (မၤတၢ်. ၁၃:၁၄, ၄၃; ၁၆:၁; ကလၤ. ၅:၂) အဝဲသ့ၣ်ခဲလၢာ်န့ၣ် အိၣ်ဝဲဆိးဝဲလၢ ကီၢ်ကလၤတံအပူၤအဃိ ဘၣ်တၢ်ကိးအီၤလၢ ခရံာ်ဖိလၢကလၤတံ န့ၣ်လီၤ. စီၤပီလူး ကွဲးဝဲလံာ်အံၤဆူ ပှၤလၢအသ့ၣ်ညါဝဲဂ့ၤဂ့ၤတဖၣ်အအိၣ် လၢအအိၣ်လၢ ရိမ့ၤအတၢ်ပၢ လၢကလံၤထံးတခီန့ၣ်လီၤ. မ့မ့ၢ်လၢကလံၤစိးတခီန့ၣ် ဖျါလၢအဝဲတလဲၤဘၣ်ဝဲ နီတဘျီဘၣ်.
တၢ်ဖးလံာ်စီဆှံ
(ကလၤတံ ၂:၁၁-၂၁) ဘၣ်ဆၣ်ဒီး တုၤစီၤပ့းတရူးဟဲဆူအၣ်တံၤအီာ်ဒီး, ယဂ့ၢ်လိာ်ဘှီလိာ်အီၤ လၢအမဲာ်သၣ်ပူၤလီၤ. အဂ့ၢ်ဒ်အံၤ, ပာ်တၢ်ကမၣ် လၢအလိၤ အလီၢ်အိၣ်လီၤ. ၁၂ အဂ့ၢ်ဒ်အံၤ, တချုးပှၤတနီၤနီၤဟဲလၢစီၤယၤကိာ်အအိၣ်ဒီး, အဝဲဒၣ်အီၣ်ဃုာ်တၢ်ဒီးပှၤကလုာ်တဖၣ်လီၤ. မ့မ့ၢ်တုၤအဝဲသ့ၣ်ဟဲတုၤဒီး, ပျံၤပှၤဒိးတၢ်ကူးတရံးဒီးဂုၤက့ၤအသး, ဒီးမၤလီၤဖးအသးလီၤ. ၁၃ ဒီးပှၤယူဒၤဖိအဂၤတဖၣ်လီဃုာ်တၢ်စ့ၢ်ကီး ဒီးအီၤတုၤစီၤဘၢ်နါဘၤဒၣ်လဲာ် လဲၤဃုာ်ဒီးအီၤ လၢအလီတၢ်အပူၤလီၤ. ၁၄ မ့မ့ၢ်တုၤယထံၣ်လၢ ပှၤတဖၣ်တလဲၤ စၢၢ်ဆၢဘၣ်ဒီး တၢ်သးခုအကစီၣ် အတၢ်မ့ၢ်တၢ်တီဘၣ်ဒီး, ယစံးဘၣ် စီၤပ့းတရူးလၢ ပှၤခဲလၢာ်အမဲာ်ညါ, ပှၤယူဒၤဖိတဂၤနဲဒၣ်အံၤ, နမ့ၢ်တိၢ်န့ၢ်ပှၤကလုာ်တဖၣ်အလုၢ်အလၢ်, ဒီးတတိၢ်န့ၢ်ဘၣ်ပှၤယူဒၤဖိအလုၢ်အလၢ်ဘၣ်ဒီး, ဘၣ်မနုၤလၢ နမၢဆူၣ်ပှၤကလုာ်တဖၣ် မၤဒ်ပှၤယူဒၤဖိအသိးလဲၣ်. ၁၅ ပှၤလၢအတမ့ၢ်ဘၣ်ပှၤတၢ်ဒဲးဘးဖိ ဘၣ်ဃးဒီးပှၤကလုာ်တဖၣ်, ပှၤယူဒၤဖိပဝဲဒၣ်အံၤ, ၁၆ ပသ့ၣ်ညါလၢပှၤကညီတဘၣ်တၢ်ပာ်တီပာ်လိၤလၢ တၢ်မၤဘၣ်ဃးဒီးတၢ်သိၣ်တၢ်သီဘၣ်. မ့ၢ်လၢတၢ်နာ်ဘၣ်ဃးဒီးယ့ၣ်ၡူးခရံာ်လီၤ. ဒီးပဝဲဒၣ်အံၤ, ပစူၢ်က့ၤနာ်က့ၤယ့ၣ်ၡူးခရံာ်ဒ်သိးပကဘၣ် တၢ်ပာ်တီပာ်လိၤပှၤလၢတၢ်နာ်ဘၣ်ဃးဒီးခရံာ်, ဒီးတမ့ၢ်ဘၣ်လၢတၢ်မၤ ဘၣ်ဃးဒီးတၢ်သိၣ်တၢ်သီဘၣ်လီၤ. အဂ့ၢ်ဒ်အံၤ, တၢ်ညၣ်တဘၣ်တၢ်ပာ်တီပာ်လိၤလၢ တၢ်မၤဘၣ်ဃးဒီးတၢ်သိၣ်တၢ်သီနီတဂၤဘၣ်. ၁၇ ဘၣ်ဆၣ်ဒီး ပဃုတၢ်ပာ်တီပာ်လိၤပှၤလၢ ခရံာ်အပူၤအဖၢမုၢ်ဒီး, တၢ်မ့ၢ်ထံၣ်န့ၢ် ပှၤလၢပှၤတၢ်ဒဲးဘးဖိဒီး, ခရံာ်မ့ၢ်တၢ်ဒဲးဘးအခ့အပှၤန့ၣ်ဧါ, မ်အသုတမၤအသးဒ်န့ၣ်တဂ့ၤ. ၁၈ အဂ့ၢ်ဒ်အံၤ, တၢ်လၢယမၤလီၤပှီၢ်အီၤတဖၣ်န့ၣ်, ယမ့ၢ်မၤထီၣ်က့ၤကဒီးအီၤဒီး, ယမၤဖျါထီၣ်ယသးလၢ ပှၤမၤကမၣ်တၢ်ဖိလီၤ. ၁၉ အဂ့ၢ်ဒ်အံၤ, မ့ၢ်တၢ်သိၣ်တၢ်သီသတးဒီး, ယသံသဒၣ်ကွံာ် တၢ်သိၣ်တၢ်သီ ဒ်သိးယကမူထီၣ် လၢယွၤအဂီၢ်လီၤ. ၂၀ ယဒိးသံဃုာ်လံယသး လၢထူၣ်စုညါအလိၤဒီးခရံာ်န့ၣ်လံ, ဘၣ်ဆၣ်ဒီးယမူလီၤ. ဘၣ်ဆၣ်တမ့ၢ်လၢၤဘၣ် ယၤဘၣ်, မ့ၢ်ခရံာ်မူလၢယပူၤလီၤ. ဒီးတၢ်လၢယမူလၢ တၢ်ဖံးတၢ်ညၣ်အပူၤခဲကနံၣ်အံၤ, မ့ၢ်ယမူလၢတၢ်နာ်ဘၣ်ဃးဒီးယွၤအဖိခွါတဂၤ, လၢအအဲၣ်ယၤ ဒီးဟ့ၣ်လီၤကွံာ်အသးလၢယဂီၢ်လီၤ. ၂၁ ယတမၤဘၣ်ယွၤအဘျုးအဖှိၣ် လၢတၢ်ကလီကလီဘၣ်. အဂ့ၢ်ဒ်အံၤ, ပှၤမ့ၢ်ဘၣ်တၢ် ပာ်တီပာ်လိၤအီၤလၢ တၢ်သိၣ်တၢ်သီဒီး, ခရံာ်ဒိးသံအသးကလီကလီလီၤ.