ဘၣ်မနုၤအဃိ ဘၣ်ယူးယီၣ်ပာ်ကဲ တၢ်န့ၢ်စိန့ၢ်ကမီၤလဲၣ်

၁, ၂. (က) ဘၣ်မနုၤအဃိ ပထံၣ်ဘၣ်လၢ တၢ်ပာ်ကဲတၢ်န့ၢ်စိန့ၢ်ကမီၤန့ၣ် ကီခဲဝဲလဲၣ်. (ခ) ပကဆိကမိၣ်သကိး တၢ်သံကွၢ်မနုၤတဖၣ်လဲၣ်.

နထံၣ်ဘၣ် ဖိသၣ်တဂၤမၤဆၢက့ၤတၢ်ဖဲ ပှၤမၢအမၤတၢ်မၤလၢ အဝဲတအဲၣ်ဒိးမၤဝဲ လ့ၤတက့ၤအခါန့ၣ်ဧါ. နကထံၣ်ဘၣ်လၢ တၢ်တဘၣ်သူၣ်ဘၣ်သးန့ၣ် အိၣ်ဖျါလၢဖိသၣ်အံၤအမဲာ်သၣ်န့ၣ်လီၤ. အဝဲနၢ်ဟူအမိၢ်အပၢ်အကလုၢ်ဒီး သ့ၣ်ညါဝဲလၢ ကဘၣ်မၤစၢၤဆီၣ်ထွဲ အမိၢ်အပၢ်အတၢ်န့ၢ်စိန့ၢ်ကမီၤလၢ တၢ်ယူးယီၣ်ပာ်ကဲလီၤ. ဘၣ်ဆၣ်, လၢတၢ်ဂ့ၢ်အံၤအပူၤန့ၣ် အဝဲတအဲၣ်ဒိးစူၢ်ဝဲ အမိၢ်အပၢ်လ့ၤတက့ၤဘၣ်. အဝဲအတၢ်တဘၣ်သူၣ်ဘၣ်သးအံၤ ပာ်ဖျါထီၣ်ဝဲ တၢ်မ့ၢ်တၢ်တီလၢ ပဝဲသ့ၣ်ခဲလၢာ် ပကွၢ်ဆၢၣ်မဲာ်ဘၣ်လီၤ.

^၂ တၢ်ယူးယီၣ်ပာ်ကဲ တၢ်န့ၢ်စိန့ၢ်ကမီၤန့ၣ် တညီလၢပဂီၢ်ထီဘိဘၣ်. ဘၣ်တဘျီဘျီ နကထံၣ်ဘၣ်လၢ နကဘၣ်ပာ်ကဲ ပှၤလၢအိၣ်ဒီးတၢ်န့ၢ်စိန့ၢ်ကမီၤဖဲအကြၢးလၢနဖီခိၣ်န့ၣ် ကီခဲဝဲန့ၣ်ဧါ. မ့မ့ၢ်ဒ်န့ၣ်ဒီး တၢ်တဘၣ်သူၣ်ဘၣ်သးအံၤ တမ့ၢ်ထဲနၤတဂၤဘၣ်. ပအိၣ်မူဘၣ်လၢ ဆၢကတီၢ်ဖဲ တၢ်ယူးယီၣ်ပာ်ကဲ တၢ်န့ၢ်စိန့ၢ်ကမီၤ စှၤလီၤအကတီၢ်န့ၣ်လီၤ. ဘၣ်ဆၣ်, လံာ်စီဆှံစံးဝဲ လိၣ်လၢပကဘၣ်ပာ်ဖျါ တၢ်ယူးယီၣ်ပာ်ကဲ ပှၤလၢအိၣ်ဒီး တၢ်န့ၢ်စိန့ၢ်ကမီၤလၢ ပဖီခိၣ်န့ၣ်လီၤ. (ကတိၤဒိ ၂၄:၂၁) နီၢ်နီၢ် ပမ့ၢ်အဲၣ်ဒိးအိၣ်ဂၢၢ်ဆိးကျၢၤလၢ ယွၤအတၢ်အဲၣ်အပူၤန့ၣ် ပတၢ်ယူးယီၣ်ပာ်ကဲ ကဘၣ်အိၣ်ဝဲလီၤ. လၢတၢ်န့ၣ်အဃိ, တၢ်သံကွၢ်အိၣ်ထီၣ်တနီၤလီၤ. ပကယူးယီၣ်ပာ်ကဲ တၢ်န့ၢ်စိန့ၢ်ကမီၤအဂီၢ် ဘၣ်မနုၤကီခဲဝဲထဲအံၤညါလဲၣ်. ဘၣ်မနၤအဃိ ယဟိဝၤဃ့တၢ်အံၤလၢ ပအိၣ်လဲၣ်, ဒီးတၢ်မနုၤကမၤစၢၤ ပှၤလၢပကစူၢ်တၢ်အံၤအဂီၢ်လဲၣ်. လၢခံကတၢၢ် ပပာ်ဖျါတၢ်ယူးယီၣ်ပာ်ကဲ တၢ်န့ၢ်စိန့ၢ်ကမီၤကသ့လၢ ကျဲဒ်လဲၣ်တဖၣ်လဲၣ်.

ဘၣ်မနုၤအဃိကီခဲ

၃, ၄. တၢ်ဒဲးဘးဒီး တၢ်တလၢပှဲၤ စးထီၣ်ဒ်လဲၣ်. ဒီးဘၣ်မနုၤအဃိ ပတၢ်တလၢပှဲၤန့ၣ် ဒုးအိၣ်ထီၣ် တၢ်ကီတၢ်ခဲလၢ ပကပာ်ကဲ တၢ်န့ၢ်စိန့ၢ်ကမီၤအဂီၢ်လဲၣ်.

^၃ ပကပာ်ဖျါထီၣ် တၢ်ယူးယီၣ်ပာ်ကဲ ပှၤလၢအိၣ်ဒီး တၢ်န့ၢ်စိန့ၢ်ကမီၤတဖၣ်အဂီၢ် ဘၣ်မနုၤအဃိ ဘၣ်ကီခဲဝဲထဲအံၤညါလဲၣ်န့ၣ် ပကဆိကမိၣ်ကွၢ်သကိး တၢ်ဂ့ၢ်ခံဘီအံၤဖုၣ်ကိာ်လီၤ. တၢတဘီ, ပဝဲသ့ၣ်တဖၣ် ပတလၢပှဲၤဘၣ်. ခံဘီတဘီန့ၣ် ပှၤလၢအိၣ်ဒီးတၢ်န့ၢ်စိန့ၢ်ကမီၤ လၢပဖီခိၣ်တဖၣ် တလၢပှဲၤစ့ၢ်ကီးဘၣ်. ပှၤကညီ အတၢ်ဒဲးဘးဒီး တၢ်တလၢပှဲၤန့ၣ် အိၣ်စးထီၣ်အသး ယံာ်တ့ၢ်မးလံလၢ အၤဒၣ်ဒီးအံၣ်အု ပူထီၣ်ထီဒါ ယဟိဝၤ ​အတၢ်န့ၢ်စိန့ၢ်ကမီၤလၢ ဧ့ၤဒ့ၣ်တၤသၣ်လီၢ်အပူၤန့ၣ်လီၤ. လၢတၢ်န့ၣ်အဃိ, တၢ်ဒဲးဘးစးထီၣ်ဃုာ်ဒီး တၢ်ပူထီၣ်န့ၣ်လီၤ. စးထီၣ်ဖဲန့ၣ်, သးလၢအဲၣ်ဒိးပူထီၣ်တၢ်အံၤ အိၣ်ထီၣ်လၢပအိၣ်ဖျဲၣ်လံၤလံၤလီၤ.—၁ မိၤၡ့ ၂:၁၅-၁၇; ၃:၁-၇; စံးထီၣ်ပတြၢၤ ၅၁:၅; ရိမ့ၤ ၅:၁၂.

^၄ ပတလၢပှဲၤအဃိ ပဝဲအါတက့ၢ် ညီဒိၣ်မးလၢ ပကပာ်ထီၣ်ထီသးဒီး ပကပာ်ကဖၢလၢသးလီၤ. မ့မ့ၢ် တၢ်ဆီၣ်လီၤသးတခီ မ့ၢ်တၢ်ဂ့ၤတၢ်ဝါလၢ ပတညီနုၢ်ထံၣ်ဘၣ်အဃိ လိၣ်လၢပကဘၣ်ဂုာ်ကျဲးစၢး မၤဒိၣ်ထီၣ်ထီထီၣ်အီၤဒီး ပၢၤဃာ်အီၤလီၤ. ပမ့ၢ်မၤယွၤအတၢ်မၤလၢ တၢ်သးတီလၢအနံၣ်အါမးဒၣ်လဲာ် တၢ်ခိၣ်ကိၤဒီး တၢ်ပာ်ကဖၢလၢသး အိၣ်ထီၣ်ဝဲသ့လီၤ. အဒိ, ဆိကမိၣ်ကွၢ် ကိၤရးလၢအမ့ၢ် ပှၤတီပှၤလိၤလၢအလဲၤတၢ်ဒီး ယဟိဝၤအပှၤကလုာ်လၢ တၢ်ကီတၢ်ခဲအါမးအတီၢ်ပူၤန့ၣ်တက့ၢ်. သနာ်က့, အဝဲသးကွံထီၣ်ဝဲ တၢ်န့ၢ်စိန့ၢ်ကမီၤအါမးအဃိ ကဲခိၣ်ကဲနၢ်လၢ တၢ်ပူထီၣ်ထီဒါ မီၤၡ့လၢ အမ့ၢ်ပှၤ အသးစူၤကတၢၢ်လၢ ဖဲန့ၣ်အဆၢကတီၢ်န့ၣ်လီၤ. (၄ မိၤၡ့ ၁၂:၃; ၁၆:၁-၃) ဆိကမိၣ်ကွၢ်စ့ၢ်ကီး စီၤပၤဧူးစံယါလၢ အတၢ်ပာ်ကဖၢလၢအသးအဃိ လဲၤနုာ်ဆူယဟိဝၤ အတၢ်လုၢ်ဟံၣ်ဒီး မၤဝဲတၢ်မၤစီဆှံလၢ ထဲဒၣ်ပှၤလုၢ်တၢ်အဒိၣ်တဖၣ် ဘၣ်မၤဝဲန့ၣ်လီၤ. (၂ ကွဲးနီၣ်တၢ် ၂၆:၁၆-၂၁) အဝဲသ့ၣ်ဘၣ်တၢ် စံၣ်ညီၣ်အီၤလၢ အတၢ်ပူထီၣ်အဃိလီၤ. ​ဘၣ်ဆၣ်, အဝဲသ့ၣ်အဒိအတဲာ်လၢ အတဂ့ၤသ့ၣ်တဖၣ်အံၤ မ့ၢ်တၢ်ဟ့ၣ်ပလီၢ်လၢ အဘျုးအိၣ်လၢ ပဝဲသ့ၣ်ခဲလၢာ်အဂီၢ်လီၤ. လိၣ်လၢပကဘၣ် တြီဆၢတၢ်ပာ်ထီၣ်ထီသး လၢဒုးအိၣ်ထီၣ် တၢ်ကီတၢ်ခဲလၢ ပကပာ်ကဲ တၢ်န့ၢ်စိန့ၢ်ကမီၤအဂီၢ်လီၤ.

၅. ပှၤတလၢပှဲၤတဖၣ်န့ၣ် သူကမၣ်ဝဲ တၢ်န့ၢ်စိန့ၢ်ကမီၤဒ်လဲၣ်.

^၅ လၢအဝဲတခီန့ၣ်, ပှၤတလၢပှဲၤလၢ အိၣ်ဒီးတၢ်န့ၢ်စိန့ၢ်ကမီၤတဖၣ်န့ၣ် မၤဆံးလီၤစှၤလီၤ တၢ်ယူးယီၣ်ပာ်ကဲ တၢ်န့ၢ်စိန့ၢ်ကမီၤအါမးလီၤ. အဝဲသ့ၣ် အါတက့ၢ်န့ၣ် အသူၣ်အၢသးသီ, ကတိၤတရီတပါတၢ်ဒီး ပၢတၢ်ဖဲအသးန့ၣ်လီၤ. နီၢ်နီၢ်, ပှၤဟီၣ်ခိၣ်ဖိ အတၢ်စံၣ်စိၤတဲစိၤအပူၤ ပာ်ဖျါဝဲတၢ်သူကမၣ် တၢ်ပၢအခွဲးန့ၣ်လီၤ. (စံၣ်တဲၤတဲလီၤ ၈:၉) အဒိ, စီလူးမ့ၢ် ပှၤအဂ့ၤဒီး ပှၤဆီၣ်လီၤသးတဂၤ ဖဲယဟိဝၤ ဃုထၢအီၤလၢ စီၤပၤအခါန့ၣ်လီၤ. ဘၣ်ဆၣ်, အဝဲပာ်ထီၣ်ထီအသးဒီး တၢ်သူၣ်က့ၣ်သးကါအိၣ်ထီၣ်အဃိ မၤနးမၤဖှီၣ် ပှၤတီပှၤလိၤ ဒၤဝံးလီၤ. (၁ ၡမူၤအ့လး ၉:၂၀, ၂၁; ၁၀:၂၀-၂၂; ၁၈:၇-၁၁) ​လၢခံ, ဒၤဝံးကဲထီၣ် စီၤပၤအဂ့ၤကတၢၢ်လၢ ကီၢ်အံၣ်စရ့လးအပူၤလီၤ. ဘၣ်ဆၣ် အဝဲစ့ၢ်ကီးသူကမၣ်ဝဲ တၢ်န့ၢ်စိန့ၢ်ကမီၤဖဲ ဟံးန့ၢ်ဝဲ ပှၤဃ့ၤသးဖိ အူၤရံယၤ အမါဒီး ဆှၢထီၣ်ဝဲပှၤတၢ်ကမၣ်တအိၣ် တဂၤအံၤဆူ တၢ်ဒုးပျီအတၢ်မဲာ်ညါဒ်သိး တၢ်ကမၤသံအီၤလီၤ. (၂ ​ၡမူၤအ့လး ၁၁:၁- ၁၇) မ့ၢ်လီၤ, ပှၤကညီတဖၣ် တလၢပှဲၤအဃိ ကီခဲဝဲလၢ ကသူဝဲတၢ်န့ၢ်စိန့ၢ်ကမီၤလၢ အလီၢ်ဘၣ်န့ၣ်လီၤ. ဖဲပှၤလၢအိၣ်ဒီး တၢ်စိကမီၤတဖၣ် တယူးယီၣ်ပာ်ကဲ ယဟိဝၤအခါ, အဝဲသ့ၣ်သူကမၣ် တၢ်န့ၢ်စိန့ၢ်ကမီၤ အါန့ၢ်တက့ၢ်လီၤ. ပှၤဘြံးတ့ၢ်ဖိလၢ အပာ်ဃုာ်လၢ ထံဂ့ၢ်ကီၢ်ဂ့ၢ်တဂၤ ပာ်ဖျါဝဲတၢ်ဂ့ၢ်လၢ ပရံၣ်ကၠံၢ်စီၤသီ အဒိၣ်ကတၢၢ်တနီၤ မၤအၢမၤနးတၢ် သကုၤဆးဒးဝံၤအလီၢ်ခံ ကွဲးဝဲလၢ “တၢ်န့ၢ်စိန့ၢ်ကမီၤ ​ဒုးအိၣ်ထီၣ် တၢ်တတီတလိၤ, ဒီးတၢ်န့ၢ်စိန့ၢ်ကမီၤ လၢလၢပှဲၤပှဲၤန့ၣ် ဒုးအိၣ်ထီၣ်တၢ်တတီတလိၤ လၢာ်လၢာ်ဆ့ဆ့လီၤ.” တၢ်သူကမၣ် တၢ်န့ၢ်စိန့ၢ်ကမီၤအံၤ အတၢ်စံၣ်စိၤတဲစိၤန့ၣ် ပာ်အီၤလၢနသးပူၤဒီး ပကဆိကမိၣ်ကွၢ်သကိး တၢ်သံကွၢ်လၢ ဘၣ်မနုၤအဃိ ပဘၣ်ယူးယီၣ်ပာ်ကဲ တၢ်န့ၢ်စိန့ၢ်ကမီၤအံၤန့ၣ်တက့ၢ်.

ဘၣ်မနုၤအဃိ ပဘၣ်ပာ်ကဲတၢ်န့ၢ်စိန့ၢ်ကမီၤ

၆, ၇. (က) ပတၢ်အဲၣ်ယဟိဝၤန့ၣ် ထိၣ်ဂဲၤထီၣ်ပှၤလၢ ပကမၤတၢ်မနုၤလဲၣ်. ဒီးလၢမနုၤအဃိလဲၣ်. (ခ) တၢ်အၢၣ်လီၤဒိကနၣ်န့ၣ် ပာ်ဃုာ်ဒီးတၢ်ပာ်သူၣ်ပာ်သးမနုၤလဲၣ်. ဒီးပပာ်ဖျါထီၣ်တၢ်အံၤကသ့ဒ်လဲၣ်.

^၆ တၢ်ဂ့ၢ်အဂ့ၤကတၢၢ်လၢ တၢ်ပာ်ကဲတၢ်န့ၢ်စိန့ၢ်ကမီၤန့ၣ် စးထီၣ်လၢ ပတၢ်အဲၣ်ယဟိဝၤ, ပှၤကညီကဒဲကဒဲ, ဒီးပတၢ်အဲၣ်လီၤက့ၤပသးန့ၣ်လီၤ. ပတၢ်အဲၣ်ယဟိဝၤ အါန့ၢ်ဒံး တၢ်အဂၤခဲလၢာ်အဃိ ပအဲၣ်ဒိးမၤမုာ် ကစၢ်အသးလီၤ. (ကတိၤဒိ ၂၇:၁၁; မၢ်ကူး ၁၂:၂၉, ၃၀) ပသ့ၣ်ညါလၢ ယဟိဝၤအစိကမီၤစိရိၤ, အတၢ်ပၢဘၣ်မူဟီၣ်ကယၢအခွဲးန့ၣ် ဘၣ်တၢ်ခီၣ်ရီၣ်အီၤလၢ ဟီၣ်ခိၣ်ချၢ စးထီၣ်ဖဲတၢ်ပူထီၣ်လၢ ဧ့ၤဒ့ၣ်ပူၤအခါ ပှၤအါတက့ၢ်အိၣ်ဆၢထၢၣ် လၢစၤတၣ်အိၣ်တခီဒီး ထီဒါယဟိဝၤအတၢ်ပၢလီၤ. မ့မ့ၢ် ပဝဲသ့ၣ် ပအိၣ်ဆၢထၢၣ်လၢ ယဟိဝၤအိၣ်တခီလၢ တၢ်သူၣ်ခုသးခုအပူၤလီၤ. ဖဲပဖးဘၣ် တၢ်ကတိၤလၢ လီၣ်ဖျါ ၄:၁၁ အခါ တၢ်အံၤ မၤဆူၣ်ထီၣ်ပသးလီၤ. ပသ့ၣ်ညါလီၤတံၢ်လီၤဆဲးလၢ ယဟိဝၤမ့ၢ် ကစၢ်လၢကြၢးပၢဘၣ်မူဟီၣ်ကယၢလီၤ. ပဆီၣ်ထွဲမၤစၢၤ ယဟိဝၤအစိကမီၤစိရိၤဒီး ပတူၢ်လိာ်ကစၢ်အတၢ်ပၢလၢ ပတၢ်အိၣ်မူကိးနံၤဒဲးန့ၣ်လီၤ.

^၇ တၢ်ယူးယီၣ်ပာ်ကဲဒ်သိးအံၤန့ၣ် အခီပညီအိၣ်အါန့ၢ်ဒံးတၢ်ဒိကနၣ်န့ၣ်လီၤ. ပအဲၣ်ယဟိဝၤအဃိ ပစူၢ်အီၤလၢပသးဒီဖျၢၣ်လီၤ. ဘၣ်ဆၣ်, ပကဒိကနၣ်တၢ်အဂီၢ် ကီခဲဒိၣ်မးအဆၢကတီၢ်န့ၣ်ကအိၣ်ဝဲစ့ၢ်ကီးလီၤ. ဒ်န့ၣ်အဆၢကတီၢ်န့ၣ်, ပလီၤဂာ်ဒီးဖိသၣ်လၢ တၢ်ပာ်ဖျါတ့ၢ်လၢညါ အသိး, ဒီးလိၣ်လၢပကဘၣ်မၤလိ တၢ်အၢၣ်လီၤဒိကနၣ်လီၤ. ပသ့ၣ်နီၣ်ထီၣ်လၢ ယ့ၣ်ၡူးအၢၣ်လီၤတူၢ်လိာ် အပၢ်အတၢ်ဘၣ်သးဖဲ လီၤဂာ်လၢကဘၣ်မၤဝဲ ကီခဲဒိၣ်မးအဆၢကတီၢ်ဒၣ်လဲာ်န့ၣ်လီၤ. ယ့ၣ်ၡူးစံးဘၣ်အပၢ်လၢ “ဘၣ်ဆၣ်ဒီးဖဲယသးဒၣ်ယဲတမ့ၢ်ဘၣ်, မ့ၢ်ဖဲဒၣ်နသးဒၣ်နဲတက့ၢ်.”—လူၤကၣ် ၂၂:၄၂.

၈. (က) မုၢ်မဆါတနံၤအံၤ တၢ်အၢၣ်လီၤဒိကနၣ် ယဟိဝၤအတၢ်န့ၢ်စိန့ၢ်ကမီၤန့ၣ် ပာ်ဃုာ်ဒီးတၢ်မနုၤလဲၣ်. ဒီးတၢ်မနုၤပာ်ဖျါထီၣ် ယဟိဝၤအတၢ်ထံၣ်လၢ ဘၣ်ဃးဒီးတၢ်ဂ့ၢ်အံၤလဲၣ်. (ခ) ပကဒိကနၣ် တၢ်ဟ့ၣ်ကူၣ်ဒီး ပကတူၢ်လိာ်တၢ်သိၣ်ဃီၣ်အဂီၢ် တၢ်မနုၤကမၤစၢၤပှၤလဲၣ်. (ကွၢ်တၢ်လွံၢ်နၢၣ်လၢ လံာ်ကဘျံးပၤ ၄၆-၇ တက့ၢ်.)

^၈ နီၢ်နီၢ်, မုၢ်မဆါတနံၤအံၤ ယဟိဝၤတကတိၤတၢ်ဒီးပှၤ တဂၤစုာ်စုာ်ဘၣ်. ကစၢ်သူဝဲ အကလုၢ်ကထါဒီး ပှၤကညီလၢအမၤခၢၣ်စးတၢ်လၢ ဟီၣ်ခိၣ်ချၢလီၤ. လၢတၢ်န့ၣ်အဃိ, ပပာ်ဖျါထီၣ် ပတၢ်အၢၣ်လီၤဒိကနၣ် ယဟိဝၤအတၢ်န့ၢ်စိန့ၢ်ကမီၤ ခီဖျိ ပပာ်ကဲပှၤလၢ ကစၢ်ပာ်လီၤဝဲတဖၣ်, မ့တမ့ၢ် ကစၢ်ဟ့ၣ်ဒံးအခွဲးလၢ ကပၢဘၣ်ပှၤတဖၣ်န့ၣ်လီၤ. အဒိ, ပမ့ၢ်ပူထီၣ်ထီဒါ ပှၤတဖၣ်အံၤခီဖျိ ပတတူၢ်လိာ် အဝဲသ့ၣ်အတၢ်ဟ့ၣ်ကူၣ်ဒီး အတၢ်မၤလိၤက့ၤလၢ သန့ၤထီၣ်ဝဲလၢ လံာ်စီဆှံပူၤန့ၣ် မ့ၢ်ပမၤကမၣ်ယွၤလီၤ. ဖဲပှၤအံၣ်စရ့လးဖိတဖၣ် ကဒုးကဒ့ၣ်တၢ်ဒီး ပူထီၣ်ထီဒါမိၤၡ့အခါ, ယဟိဝၤထံၣ် အဝဲသ့ၣ်အတၢ်မၤတဖၣ်လၢ မ့ၢ်ဒ်သိးတၢ်ထီဒါအီၤ လိၤလိၤလီၤ.—၄ မိၤၡ့ ၁၄:၂၆, ၂၇.

၉. ဘၣ်မနုၤအဃိ ပတၢ်အဲၣ်ပှၤကညီကဒဲကဒဲန့ၣ် ထိၣ်ဂဲၤထီၣ်ပှၤလၢ ပကယူးယီၣ်ပာ်ကဲ တၢ်န့ၢ်စိန့ၢ်ကမီၤလဲၣ်. ဟ့ၣ်တၢ်အဒိတက့ၢ်.

^၉ မ့ၢ်လၢ ပအဲၣ်ပှၤကညီကဒဲကဒဲအဃိ ပပာ်ဖျါထီၣ် တၢ်ယူးယီၣ်ပာ်ကဲ တၢ်န့ၢ်စိန့ၢ်ကမီၤလီၤ. လၢမနုၤအဃိလဲၣ်. ဆိကမိၣ်လီၤက့ၤနသးလၢ နမ့ၢ်သုးဖိတဂၤလၢ သုးမုၢ်သံၣ်ဘိတဖုအပူၤန့ၣ်တက့ၢ်. သုးမုၢ်သံၣ်ဘိ အတၢ်မၤနၢၤ, အတၢ်အိၣ်ဂၢၢ်ကျၢၤဆူညါဒၣ်လဲာ်, သန့ၤထီၣ်အသးလၢ သုးဖိတဂၤစုာ်စုာ်အတၢ်မၤသကိး, အတၢ်ဒိကနၣ်, ဒီးအတၢ်ယူးယီၣ်ပာ်ကဲ တၢ်ပၢတဆီဘၣ်တဆီန့ၣ်လီၤ. နမ့ၢ်တဒိကနၣ်တၢ်န့ၢ်စိန့ၢ်ကမီၤဘၣ်ဒီး, တၢ်ဘၣ်ယိၣ်အလီၢ်အိၣ်အါမးလၢ နတံၤသကိးသုးဖိတဖၣ်အဂီၢ်လီၤ. မ့ၢ်လီၤ, မုၢ်မဆါတနံၤအံၤ ပှၤကညီသုးမုၢ်သံၣ်ဘိတဖၣ် မၤဟးဂီၤတၢ်လၢ ဟီၣ်ခိၣ်ချၢအါမးလီၤ. ဘၣ်ဆၣ်, ယဟိဝၤအိၣ်ဒီး သုးမုၢ်သံၣ်ဘိလၢ မၤထဲဒၣ်တၢ်အဂ့ၤလီၤ. လံာ်စီဆှံပာ်ဖျါဝဲ ယဟိဝၤလၢ “တၢ်သုးမုၢ်ဂီၢ်မုၢ်အယွၤ” န့ၣ်အိၣ်အဘျီလၢအကယၤလီၤ. (၁ ၡမူၤအ့လး ၁:၃) ကစၢ်မ့ၢ် နီၢ်သးတၢ်ဘၣ်တ့လၢ အိၣ်ဒီးအစိကမီၤဖးဒိၣ်တဖု အခိၣ်လီၤ. ဘၣ်တဘျီဘျီ, ယဟိဝၤထိၣ်သတြီၤ အတၢ်မၢဖိလၢ ဟီၣ်ခိၣ်ချၢတဖၣ်လၢ သုးမုၢ်သံၣ်ဘိလီၤ. (စံးထီၣ်ပတြၢၤ ၆၈:၁၁; ယဃ့းစက့လး ၃၇:၁-၁၀) ပမ့ၢ်ပူထီၣ်ထီဒါ ပှၤကညီလၢယဟိဝၤပာ်ထီၣ်အီၤလၢ ကပၢဘၣ်ပှၤတဖၣ်န့ၣ်, တၢ်ဘၣ်ယိၣ်အလီၢ်အိၣ်လၢ ပနီၢ်သးသုးဖိကဒဲကဒဲအဂီၢ်တမ့ၢ်ဘၣ်ဧါ. ဖဲခရံာ်ဖိတဂၤပူထီၣ်ထီဒါ ပှၤပၢဘၣ်ကွၢ်ထွဲတၢ်လၢ တၢ်ပာ်ထီၣ်အီၤတဖၣ်အခါ, ဘၣ်ဒိပှၤအဂၤတဖၣ်လၢ တၢ်အိၣ်ဖှိၣ်အပူၤသ့လီၤ. (၁ ကရံၣ်သူး ၁၂:၁၄, ၂၅, ၂၆) ဖဲဖိသၣ်တဂၤပူထီၣ်အမိၢ်အပၢ်အခါ, ဘၣ်ဒိဟံၣ်ဖိဃီဖိကိးဂၤဒဲးသ့လီၤ. လၢတၢ်န့ၣ်အဃိ ပပာ်ဖျါပတၢ်အဲၣ်ပှၤကညီကဒဲကဒဲခီဖျိ ပမၤဒိၣ်ထီၣ်ထီထီၣ် တၢ်ယူးယီၣ်ပာ်ကဲ ဒီးတၢ်မၤသကိးဃုာ်တၢ်လီၤ.

၁၀, ၁၁. တၢ်သးအဲၣ်ဒိးအဂ့ၤလၢ အဘျုးအိၣ်လၢပဂီၢ်န့ၣ် ထိၣ်ဂဲၤထီၣ်ပှၤလၢ ပကစူၢ်တၢ်န့ၢ်စိန့ၢ်ကမီၤဒ်လဲၣ်.

^၁၀ ပယူးယီၣ်ပာ်ကဲ တၢ်န့ၢ်စိန့ၢ်ကမီၤအဃိ အဘျုးအိၣ်လၢပဂီၢ်လီၤ. ဖဲယဟိဝၤဃ့ပှၤလၢ ပကယူးယီၣ်ပာ်ကဲတၢ်န့ၢ်စိန့ၢ်ကမီၤအခါ, ကစၢ်ပာ်ဖျါထီၣ်ဝဲတၢ်အဘျုးလၢ ပမ့ၢ်မၤဒ်န့ၣ်ဒီး ပကဒိးန့ၢ်ဘၣ်တၢ်တဖၣ်န့ၣ်လီၤ. အဒိ, ကစၢ်စံးဘၣ်ဖိသၣ်တဖၣ်လၢ ကဒိကနၣ်အမိၢ်အပၢ်အကလုၢ် ဒ်သိးဒီး ကအိၣ်ကၢအိၣ်ခိးဒီး ကအိၣ်မူဘၣ် ဂ့ၤဂ့ၤဘၣ်ဘၣ်အဂီၢ်လီၤ. (၅ မိၤၡ့ ၅:၁၆; အ့းဖ့းစူး ၆:၂, ၃) ကစၢ်စံးဘၣ်ပှၤလၢ ပကဘၣ်ပာ်ကဲ တၢ်အိၣ်ဖှိၣ်ပှၤပၢဘၣ်ကွၢ်ထွဲတၢ်တဖၣ်လီၤ. ပမ့ၢ်တပာ်ကဲဘၣ်ဒီး ကဘၣ်ဒိပတၢ်ရ့လိာ်သးဒီး ယဟိဝၤလီၤ. (ဧ့ၤဘြံၤ ၁၃:၇, ၁၇) ဒီးပကဒိးန့ၢ်ဘၣ်တၢ်ဒီသဒၢအဂီၢ် ကစၢ်စံးဘၣ်ပှၤလၢ ပကဘၣ်ဒိကနၣ် ဟီၣ်ခိၣ်အပှၤပၢတၢ်တဖၣ်လီၤ.—ရိမ့ၤ ၁၃:၄.

^၁၁ ပသ့ၣ်ညါပာ်လၢ ဘၣ်မနုၤအဃိ ယဟိဝၤအဲၣ်ဒိးပပာ်ဖျါတၢ်ဒိကနၣ်န့ၣ် မၤစၢၤပှၤလၢ ပကယူးယီၣ်ပာ်ကဲတၢ်န့ၢ်စိန့ၢ်ကမီၤတမ့ၢ်ဘၣ်ဧါ. လၢတၢ်န့ၣ်အဃိ, တၢ်အိၣ်မူအသနၢၣ် အကါဒိၣ်သၢမံၤလၢ ပပာ်ဖျါတၢ်ယူးယီၣ်ပာ်ကဲ တၢ်န့ၢ်စိန့ၢ်ကမီၤသ့ဒ်လဲၣ်န့ၣ် ပကဆိကမိၣ်ကွၢ်သကိးတက့ၢ်.

တၢ်ယူးယီၣ်ပာ်ကဲလၢ ဟံၣ်ဖိဃီဖိအပူၤ

၁၂. ဟံၣ်ဖိဃီဖိအပူၤ ယဟိဝၤဟ့ၣ်ဝၤလၢအမ့ၢ်ပၢ်လၢ မူဒါမနုၤလဲၣ်. ဒီးအဝဲမၤလၢပှဲၤထီၣ်မူဒါအံၤကသ့ဒ်လဲၣ်.

^၁၂ ယဟိဝၤအနီၢ်ကစၢ်ဒၣ်ဝဲ ပာ်လီၤဝဲဟံၣ်ဖိဃီဖိ အတၢ်ရဲၣ်တၢ်ကျဲၤလီၤ. ယွၤမ့ၢ်ကစၢ်လၢ အသုးကျဲၤတၢ်လၢအလီၢ်အကျဲထီဘိအဃိ အဝဲသုးကျဲၤဝဲလၢဟံၣ်ဖိဃီဖိ ကအိၣ်ဒီးတၢ်မုာ်တၢ်ပၢၤအဂီၢ်လီၤ. (၁ ကရံၣ်သူး ၁၄:၃၃) ကစၢ်ဟ့ၣ်ဝဲဝၤလၢအမ့ၢ်ပၢ်တဂၤလၢ တၢ်န့ၢ်စိန့ၢ်ကမီၤလၢ ကမၤတၢ်ဒ်ဟံၣ်ခိၣ်အသိးလီၤ. ဝၤန့ၣ်ပာ်ဖျါတၢ်ပာ်ကဲအခိၣ်နၢ် ယ့ၣ်ၡူးခရံာ်ခီဖျိ ကွၢ်လိမၤဒိးယ့ၣ်ၡူးအတၢ်ကဲခိၣ်ကဲနၢ်လၢ တၢ်အိၣ်ဖှိၣ်အဖီခိၣ်န့ၣ်လီၤ. (အ့းဖ့းစူး ၅:၂၃) လၢတၢ်အံၤအဃိ, ဝၤန့ၣ်တဘၣ်ကွၢ်ကပာ်အမူဒါတဖၣ်ဘၣ်ဒီး ကဘၣ်မၤပှဲၤဝဲဒ်ပိာ်ခွါနီၢ်နီၢ်န့ၣ်လီၤ. အဝဲတမၤနးမၤဖှီၣ်တၢ် မ့တမ့ၢ် တမၤတပျုာ်တပျီၤတၢ်ဘၣ်. လၢတၢ်န့ၣ်အလီၢ်, အဝဲအိၣ်ဒီးတၢ်အဲၣ်တၢ်ကွံ, တၢ်နၢ်ပၢၢ်စၢၤ, ဒီးတၢ်သးကညီၤလီၤ. အဝဲသ့ၣ်ညါဝဲလၢ အတၢ်န့ၢ်စိန့ၢ်ကမီၤန့ၣ် တထီန့ၢ်ဒံး ယဟိဝၤအတၢ်န့ၢ်စိန့ၢ်ကမီၤ လ့ၤတက့ၤဘၣ်လီၤ.

၁၃. မါလၢအမ့ၢ်မိၢ်တဂၤန့ၣ် လၢအဟံၣ်ဃီအပူၤ မၤလၢပှဲၤထီၣ်အမူဒါလၢ အဘၣ်ယဟိဝၤအသး ကသ့ဒ်လဲၣ်.

^၁၃ မါလၢအမ့ၢ်မိၢ်တဂၤန့ၣ် မၤတၢ်ဒ်ပှၤလၢအမၤစၢၤအဝၤလီၤ. လံာ်စီဆှံစံးဝဲလၢ “နမိၢ်အသိၣ်က့ၤသီက့ၤတၢ်”အဃိ, အဝဲအိၣ်စ့ၢ်ကီးဒီးတၢ်န့ၢ်စိန့ၢ်ကမီၤလၢ ဟံၣ်ပူၤလီၤ. (ကတိၤဒိ ၁:၈) နီၢ်နီၢ်, အဝဲအတၢ်န့ၢ်စိန့ၢ်ကမီၤန့ၣ် ဖုၣ်န့ၢ်အဝၤလီၤ. မါလၢအမ့ၢ်ခရံာ်ဖိတဂၤ ပာ်ဖျါတၢ်ယူးယီၣ်ပာ်ကဲ အဝၤအတၢ်န့ၢ်စိန့ၢ်ကမီၤခီဖျိ မၤစၢၤအဝၤလၢ ကမၤလၢပှဲၤအမူဒါဒ် ဟံၣ်ခိၣ်အသိးန့ၣ်လီၤ. အဝဲတမၤဆံးလီၤစှၤလီၤအဝၤအလၤကပီၤ, တပၢဆှၢရဲၣ်ကျဲၤအဝၤ, မ့တမ့ၢ် တဟံးန့ၢ်ဆူၣ်အဝၤအလီၢ်ဘၣ်. လၢတၢ်န့ၣ်အလီၢ်, အဝဲမ့ၢ်ပှၤလၢအဟ့ၣ်တၢ်မၤစၢၤဒီး မၤသကိးဃုာ်တၢ်ဒီးအဝၤလီၤ. ဖဲအဝဲတဘၣ်အသးလၢ အဝၤအတၢ်စံၣ်ညီၣ်တဲာ်အခါ, အဝဲပာ်ဖျါထီၣ်အတၢ်ဆိကမိၣ်လၢ တၢ်ယူးယီၣ်ပာ်ကဲသ့ဘၣ်ဆၣ် အိၣ်ဒံးဒီးတၢ်အၢၣ်လီၤဒိကနၣ်လီၤ. အဝၤမ့မ့ၢ်ပှၤတစူၢ်က့ၤနာ်က့ၤတၢ်န့ၣ်, အဝဲကွၢ်ဆၢၣ်မဲာ်ဘၣ်ဝဲဒီးတၢ်ကီတၢ်ခဲသ့လီၤ. ဘၣ်ဆၣ် အဝဲအလုၢ်လၢ်လၢ အၢၣ်လီၤဒိကနၣ်တၢ်န့ၣ် ကထိၣ်ဂဲၤထီၣ်အဝၤလၢ ကဃုယဟိဝၤလီၤ.—၁ ပ့းတရူး ၃:၁.

၁၄. ဖိသၣ်တဖၣ် မၤသးခုအမိၢ်အပၢ်ဒီး ယဟိဝၤကသ့ဒ်လဲၣ်.

^၁၄ ဖိသ့ၣ်တဖၣ် မၤသးခုယဟိဝၤအသးဖဲ အဝဲသ့ၣ်စူၢ်အမိၢ်အပၢ်အကလုၢ်အခါလီၤ. မ့ၢ်စ့ၢ်ကီး တၢ်မၤလၤကပီၤဒီး တၢ်မၤသးခုအမိၢ်အပၢ်လီၤ. (ကတိၤဒိ ၁၀:၁) ​ဖိသၣ်လၢအဒိၣ်ထီၣ်လၢ အိၣ်ထဲအမိၢ်တဂၤ မ့တမ့ၢ် ထဲအပၢ်တဂၤတဖၣ်န့ၣ် မၤထွဲဝဲတၢ်သိၣ်တၢ်သီလၢ ဘၣ်ဃးဒီးတၢ်ဒိကနၣ်အံၤလီၤ. ဒီးသ့ၣ်ညါဝဲလၢ အဝဲသ့ၣ်အမိၢ်မ့တမ့ၢ် အပၢ်န့ၣ် လိၣ်ဘၣ်အဝဲသ့ၣ်အတၢ်မၤစၢၤဆီၣ်ထွဲ မ့တမ့ၢ် အတၢ်မၤသကိးဃုာ်တၢ်အါန့ၢ်တက့ၢ်လီၤ. ဟံၣ်ဖိဃီဖိကိးဂၤဒဲး မ့ၢ်မၤလၢပှဲၤထီၣ်အမူဒါလၢ ကစၢ်ယွၤသုးကျဲၤပာ်လၢအဝဲသ့ၣ်အဂီၢ်န့ၣ်, ကမ့ၢ်ဟံၣ်ဃီလၢအပှဲၤဒီးတၢ်ဃူတၢ်ဖိးဒီး တၢ်သူၣ်ခုသးခုဒိၣ်မးလီၤ. တၢ်အံၤမ့ၢ်တၢ်မၤလၤကပီၤ ယဟိဝၤယွၤ, လၢအမ့ၢ်ကစၢ်လၢအစးထီၣ်ပာ်လီၤ ဟံၣ်ဖိဃီဖိခဲလၢာ်လီၤ.—အ့းဖ့းစူး ၃:၁၄, ၁၅.

တၢ်ယူးယီၣ်ပာ်ကဲလၢ တၢ်အိၣ်ဖှိၣ်ပူၤ

၁၅. (က) ပယူးယီၣ်ပာ်ကဲ ယဟိဝၤအတၢ်န့ၢ်စိန့ၢ်ကမီၤန့ၣ် ပပာ်ဖျါထီၣ်လၢတၢ်အိၣ်ဖှိၣ်ပူၤကသ့ဒ်လဲၣ်. (ခ) တၢ်သိၣ်တၢ်သီမနုၤတဖၣ် ကမၤစၢၤပှၤလၢ ပကဒိကနၣ် ပှၤလၢအပၢဘၣ်ပှၤတဖၣ်လဲၣ်. (ကွၢ်တၢ်လွံၢ်နၢၣ်လၢ လံာ်ကဘျံးပၤ ၄၈-၉.)

^၁၅ ယဟိဝၤပာ်ထီၣ်အဖိခွါ ဒ်ပှၤပၢတၢ်လၢ ခရံာ်ဖိတၢ်အိၣ်ဖှိၣ်အဖီခိၣ်လီၤ. (ကလီးစဲ ၁:၁၃) ယ့ၣ်ၡူးစ့ၢ်ကီး ဃုထၢဝဲ “တၢ်အကုၢ်အပှၤလၢ အကလုၢ်တီဒီးအကူၣ်တၢ်သ့” လၢကကွၢ်ထွဲ ယွၤအပှၤဂီၢ်မုၢ်လၢ ဟီၣ်ခိၣ်ချၢတဖၣ် အနီၢ်သးတၢ်လိၣ်ဘၣ်အဂီၢ်လီၤ. (မးသဲ ၂၄:၄၅-၄၇) ယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ် ခၢၣ်စးဝဲကုၢ်တဖုန့ၣ်လီၤ. ဒ်ခရံာ်ဖိတၢ်အိၣ်ဖှိၣ်လၢ နံၣ်တၢကယၤအတီၢ်ပူၤအသိး, မုၢ်မဆါတနံၤအံၤ ​ပှၤပၢဘၣ်ကွၢ်ထွဲတၢ်တဖၣ် ဒိးန့ၢ်ဘၣ်ဝဲ တၢ်သိၣ်လိသီလိဒီး တၢ်ဟ့ၣ်ကူၣ်ဟ့ၣ်ဖးတဖၣ်လၢ ပှၤပၢဆှၢတၢ်ကမံးတံာ်အအိၣ်လိၤလိၤမ့ၢ်ဂ့ၤ, ခီဖျိပှၤမၤခၢၣ်စးတၢ် ဒ်သိးဒီး ပှၤလဲၤတရံးအံးက့ၤကွၢ်က့ၤတၢ်တဖၣ်အအိၣ်မ့ၢ်ဂ့ၤန့ၣ်လီၤ. ဖဲပဝဲသ့ၣ်တဂၤစုာ်စုာ် ပယူးယီၣ်ပာ်ကဲ ခရံာ်ဖိအပှၤပၢဘၣ်ကွၢ်ထွဲတၢ်တဖၣ်အခါ, မ့ၢ်ပစူၢ်ယဟိဝၤအကလုၢ်လီၤ.—ဧ့ၤဘြံၤ ၁၃:၁၇.

၁၆. ပှၤပၢဘၣ်ကွၢ်ထွဲတၢ်တဖၣ် ဘၣ်တၢ်ပာ်ထီၣ်အီၤခီဖျိသးစီဆှံန့ၣ် မ့ၢ်တၢ်ဒ်လဲၣ်.

^၁၆ ပှၤပၢဘၣ်ကွၢ်ထွဲတၢ်ဒီး တၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ် တလၢပှဲၤဘၣ်. အဝဲသ့ၣ်အိၣ်ဒီး တၢ်ဂံၢ်စၢ်ဘါစၢ်ဒ်သိးပှၤလီၤ. ဘၣ်ဆၣ်, ပှၤပၢဘၣ်ကွၢ်ထွဲတၢ်တဖၣ်န့ၣ်မ့ၢ် “တၢ်ဘျုးတၢ်ဖှိၣ်လၢပှၤကညီ”, လၢအမၤစၢၤ တၢ်အိၣ်ဖှိၣ်ကအိၣ်ဒီး တၢ်ရ့လိာ်သးဒီးယွၤ ဂၢၢ်ဂၢၢ်ကျၢၤကျၢၤန့ၣ်လီၤ.(အ့းဖ့းစူး ၄:၈) ပှၤပၢဘၣ်ကွၢ်ထွဲတၢ်တဖၣ်န့ၣ် ဘၣ်တၢ်ပာ်ထီၣ်အီၤခီဖျိသးစီဆှံလီၤ. (မၤတၢ် ၂၀:၂၈) မ့ၢ်ဒ်လဲၣ်. အဆိကတၢၢ်, အဝဲသ့ၣ်ကဘၣ်တုၤထီၣ်ထီၣ်ဘးလၢ တၢ်ဂ့ၤတၢ်ဝါလၢ အိၣ်လၢလံာ်စီဆှံပူၤန့ၣ်လီၤ. (၁ တံၤမသ့း ၃:၁-၇, ၁၂; တံတူး ၁:၅- ၉) အါန့ၢ်အန့ၣ်, ပှၤပၢဘၣ်ကွၢ်ထွဲတၢ်လၢ အဘၣ်နီၤဖးဒီပုၢ်ဝဲၢ်တဂၤ အတၢ်တုၤထီၣ်ထီၣ်ဘးအံၤ ကဃ့ဘါထုကဖၣ်လၢတၢ်သးဆူၣ်လၢ ယဟိဝၤအသးစီဆှံကနဲၣ်လိအီၤအဂီၢ်လီၤ.

၁၇. တဘျီတခီၣ်ခရံာ်ဖိပိာ်မုၣ်တဖၣ် မၤဝဲတၢ်မၤလၢတၢ်အိၣ်ဖှိၣ်ပူၤအခါ ဘၣ်မနုၤအဃိ ဘၣ်ဖၢၣ်ဘၢဃာ်အခိၣ်လဲၣ်.

^၁၇ လၢတၢ်အိၣ်ဖှိၣ်ပူၤ, ညီနုၢ်ပှၤကဟံးန့ၢ်မူဒါဒ်သိး တၢ်စုးရိဖှိၣ်လၢ စံၣ်ပျီတၢ်သးခုကစီၣ်တၢ်မၤအဂီၢ် ပှၤပၢဘၣ်ကွၢ်ထွဲတၢ်ဒီး တၢ်အိၣ်ဖှိၣ်အပှၤမၤစၢၤတၢ်တအိၣ် အဆၢကတီၢ်ကအိၣ်ဝဲလီၤ. ဒ်န့ၣ်အဆၢကတီၢ်န့ၣ်, ဒီပုၢ်ဝဲၢ်ခွါလၢအဘျၢထံဝံၤတဖၣ် မၤပှဲၤဝဲမူဒါအံၤသ့လီၤ. မ့ၢ်တအိၣ်နီတဂၤဘၣ်ဒီး ခရံာ်ဖိဒီပုၢ်ဝဲၢ်မုၣ်လၢ အတုၤထီၣ်ထီၣ်ဘးတဖၣ် မၤပှဲၤဝဲမူဒါအံၤသ့လီၤ. ဘၣ်ဆၣ်, ဖဲပိာ်မုၣ်တဂၤ မၤပှဲၤမူဒါလၢ ညီနုၢ်ပိာ်ခွါလၢအဘျၢထံဝံၤတဂၤ ကဘၣ်မၤဝဲအခါ အဝဲကဘၣ်ဖၢၣ်ဘၢဃာ်အခိၣ်လီၤ.a (၁ ကရံၣ်သူး ၁၁:၃- ၁၀) တၢ်ဃ့အံၤတမ့ၢ်တၢ်မၤစှၤလီၤ ပိာ်မုၣ်တဖၣ်အလၤကပီၤဘၣ်. လၢတၢ်န့ၣ်အလီၢ်, တၢ်အံၤဟ့ၣ်ပှၤတၢ်ခွဲးတၢ်ယာ်လၢ ပကပာ်ဖျါထီၣ် တၢ်ယူးယီၣ်ပာ်ကဲ ယဟိဝၤအတၢ်ရဲၣ်တၢ်ကျဲၤလၢ တၢ်ကဲခိၣ်ကဲနၢ် လၢဟံၣ်ဖိဃီဖိအပူၤမ့ၢ်ဂ့ၤ တၢ်အိၣ်ဖှိၣ်အပူၤမ့ၢ်ဂ့ၤလီၤ.

တၢ်ယူးယီၣ်ပာ်ကဲ ဟီၣ်ခိၣ်အပှၤန့ၢ်စိန့ၢ်ကမီၤတဖၣ်

၁၈, ၁၉. (က) နကတဲနၢ်ပၢၢ် တၢ်သိၣ်တၢ်သီဖဲ ရိမ့ၤ ၁၃:၁-၇ အံၤဒ်လဲၣ်. (ခ) ပပာ်ဖျါထီၣ် တၢ်ယူးယီၣ်ပာ်ကဲ ဟီၣ်ခိၣ်အပဒိၣ်တဖၣ်သ့ဒ်လဲၣ်.

^၁၈ ခရံာ်ဖိနီၢ်နီၢ်တဖၣ် ဒိကနၣ်ဝဲ တၢ်သိၣ်တၢ်သီလၢ ဘၣ်တၢ်ပာ်ဖျါထီၣ်ဖဲ ရိမ့ၤ ၁၃:၁-၇ အံၤလၢတၢ်သူၣ်ဆးသးဆးလီၤ. ဖဲနဖးကွၢ်လံာ်စီဆှံအဆၢအံၤအခါ, နကထံၣ်ဘၣ်လၢ “တၢ်စိတၢ်ကမီၤအဒိၣ်တဖၣ်” န့ၣ်ပာ်ဖျါဝဲလၢမ့ၢ်ဒၣ် ဟီၣ်ခိၣ်အပဒိၣ်ပပှၢ်တဖၣ်လီၤ. ဒ်ယဟိဝၤဟ့ၣ်အခွဲးလၢ ဟီၣ်ခိၣ်ပဒိၣ်တဖၣ်ကအိၣ်ဒံးအခါ, အဝဲသ့ၣ်မၤဝဲတၢ်မၤလၢအကါဒိၣ်တဖၣ်လီၤ. အဝဲသ့ၣ်ပၢၤဃာ်ဝဲ တၢ်မုာ်တၢ်ခုၣ်ဖဲအကြၢးဒီး သုးကျဲၤတၢ်လၢထံဖိကီၢ်ဖိအဂီၢ်လီၤ. ပပာ်ဖျါထီၣ် တၢ်ယူးယီၣ်ပာ်ကဲပှၤန့ၢ်စိန့ၢ်ကမီၤတဖၣ်အံၤခီဖျိ ပဒိကနၣ်တၢ်ဘျၢတဖၣ်န့ၣ်လီၤ. ပဟ့ၣ်တၢ်ခိတၢ်သွဲတမံၤလၢ်လၢ်လၢ ပဘၣ်ဟ့ၣ်လီၤ. ပကွဲးပှဲၤလံာ်လဲၢ်လၢ ပဒိၣ်ဃ့ဝဲတဖၣ်လီၤတံၢ်လီၤဆဲးလီၤ. ဒီးပဒိကနၣ်တၢ်ဘျၢတနီၤလၢ ဘၣ်ဃးဒီးပှၤ, ပဟံၣ်ဖိဃီဖိ, တၢ်ဖံးတၢ်မၤ, မ့တမ့ၢ် တၢ်စုလီၢ်ခီၣ်ခိၣ်တဖၣ်လီၤ. ဘၣ်ဆၣ်, ပတအၢၣ်လီၤဒိကနၣ် ဟီၣ်ခိၣ်အပဒိၣ်တဖၣ်ဖဲ အဝဲသ့ၣ်မ့ၢ်စံးဘၣ်ပှၤလၢ မ်ပသုတဒိကနၣ်ကစၢ်ယွၤအကလုၢ်တဂ့ၤ အခါန့ၣ်လီၤ. လၢတၢ်န့ၣ်အလီၢ်, ပစံးဆၢက့ၤဒ်တၢ်မၢဖိလၢညါတဖၣ်အသိးလၢ, “ပဘၣ်စူၢ်ယွၤအါန့ၢ် ပစူၢ်ပှၤကညီတက့ၢ်လီၤ.”—မၤတၢ် ၅:၂၈, ၂၉; ကွၢ်တၢ်လွံၢ်နၢၣ်လၢ လံာ်ကဘျံးပၤ ၄၂ အပူၤ, “ကြၢးယစူၢ်မတၤအတၢ်န့ၢ်စိန့ၢ်ကမီၤလဲၣ်”န့ၣ်တက့ၢ်.

^၁၉ ပပာ်ဖျါထီၣ်စ့ၢ်ကီးတၢ်ယူးယီၣ်ပာ်ကဲ ဟီၣ်ခိၣ်ပဒိၣ်တဖၣ်သ့ခီဖျိ ပတၢ်စံးတၢ်ကတိၤဒီးတၢ်ပာ်သူၣ်ပာ်သးလီၤ. တဘျီတခီၣ်, ပကဘၣ်ကတိၤဆဲးကျိးလိာ်သးဒီး ပဒိၣ်ပပှၢ်တဖၣ်လီၤ. တၢ်မၢဖိပီလူးထံၣ်လိာ်ကတိၤတၢ်ဒီး ပှၤပၢဘၣ်တၢ်ဒ်သိး စီၤပၤအကြံးပၤဒီး ပဒိၣ်ဖ့စတူးလီၤ. အဝဲသ့ၣ်မ့ၢ်ပှၤမၤတၢ်အၢအၢသီသီဘၣ်ဆၣ် ပီလူးကတိၤတၢ်ဒီးအီၤလၢ တၢ်ယူးယီၣ်ပာ်ကဲလီၤ. (မၤတၢ် ၂၆:၂, ၂၅) ပကွၢ်လိမၤဒိး ပီလူးအဒိအတဲာ် ဖဲပထံၣ်လိာ်ကတိၤတၢ်ဒီး ပှၤခိၣ်ပှၤနၢ်လၢအမ့ၢ် ပှၤန့ၢ်စိန့ၢ်ကမီၤတဂၤမ့ၢ်ဂ့ၤ, ပှၤပၢၤကီၢ်လၢပလီၢ်ကဝီၤပူၤတဂၤမ့ၢ်ဂ့ၤန့ၣ်လီၤ. လၢကၠိန့ၣ်, ခရံာ်ဖိသးစၢ်တဖၣ် ဂုာ်ကျဲးစၢးပာ်ဖျါ တၢ်ယူးယီၣ်ပာ်ကဲဒ်သိးန့ၣ်လၢ အသရၣ်တဖၣ်ဒီး ပှၤမၤတၢ်လၢကၠိပူၤခဲလၢာ်လီၤ. နီၢ်နီၢ်, ပတပာ်လီၤပသးလၢ ပကယူးယီၣ်ပာ်ကဲထဲဒၣ် ပှၤလၢအဘၣ်သူၣ်ဘၣ်သး ပတၢ်စူၢ်တၢ်နာ်တဖၣ်ဘၣ်. ပပာ်ဖျါစ့ၢ်ကီးတၢ်ယူးယီၣ်ပာ်ကဲဖဲ ပထံၣ်လိာ်သးဒီး ပှၤလၢအထီဒါ ယဟိဝၤအပှၤအုၣ်အသးတဖၣ်န့ၣ်လီၤ. ပှၤလၢအတစူၢ်တနာ်တၢ်တဖၣ် ကြၢးသ့ၣ်ညါနၢ်ပၢၢ်ဝဲလၢ ပမ့ၢ်ပှၤလၢအယူးယီၣ်ပာ်ကဲတၢ်လီၤ.—ရိမ့ၤ ၁၂:၁၇, ၁၈; ၁ ပ့းတရူး ၃:၁၅.

၂၀, ၂၁. ပကဒိးန့ၢ်ဘၣ် တၢ်ဆိၣ်ဂ့ၤမနုၤတနီၤလၢ တၢ်ပာ်ဖျါထီၣ် တၢ်ယူးယီၣ်ပာ်ကဲတၢ်န့ၢ်စိန့ၢ်ကမီၤ လၢအကြၢးအဘၣ်န့ၣ်လဲၣ်.

^၂၀ တၢ်မၢဖိပ့းတရူးကွဲးဝဲလၢ, “ယူးယီၣ်ပှၤကညီခဲလၢာ်တက့ၢ်.” (၁ ပ့းတရူး ၂:၁၇) လၢတၢ်န့ၣ်အဃိ, မ်ပကပာ်ဖျါထီၣ် တၢ်ယူးယီၣ်ပာ်ကဲထီဘိတက့ၢ်. ဖဲပှၤကညီတဖၣ် သ့ၣ်ညါဝဲလၢ ပအိၣ်ဒီးတၢ်ယူးယီၣ်ပာ်ကဲအဝဲသ့ၣ်အခါ, တၢ်အံၤထုးန့ၢ်အသးသ့လီၤ. သ့ၣ်နီၣ်ထီၣ်လၢမုၢ်မဆါတနံၤအံၤ ညီနုၢ်ပတထံၣ်ဘၣ်လၢၤ တၢ်ဂ့ၤတၢ်ဝါအံၤလၢၤဘၣ်. လၢတၢ်န့ၣ်အဃိ, တၢ်ပာ်ဖျါထီၣ် တၢ်ယူးယီၣ်ပာ်ကဲန့ၣ် မ့ၢ်ကျဲတမံၤလၢ ပတိၢ်န့ၢ်​ယ့ၣ်ၡူးအတၢ်မၤလိာ်လီၤ– “ဒ်န့ၣ်အသိး သုတၢ်ကပီၤန့ၣ် ဒုးကပီၤထီၣ်အီၤလၢ ပှၤကညီအမဲာ်ညါဒ်သိး အကထံၣ်ဘၣ်သုမၤတၢ်ဂ့ၤ, ဒီးကစံးထီၣ်ပတြၢၤ သုပၢ်အိၣ်လၢမူခိၣ်န့ၣ်တက့ၢ်.”—မးသဲ ၅:၁၆.

^၂၁ လၢဟီၣ်ခိၣ်တၢ်ခံးယိာ်အံၤအပူၤ, ပှၤသူၣ်ဂ့ၤသးဝါတဖၣ်န့ၣ် ကဘၣ်တၢ်ထုးန့ၢ်အီၤဆူ နီၢ်သးတၢ်ကပီၤအအိၣ်လီၤ. လၢတၢ်န့ၣ်အဃိ, ပတၢ်ပာ်ဖျါထီၣ် တၢ်ယူးယီၣ်ပာ်ကဲလၢ ဟံၣ်ဃီပူၤ, တၢ်အိၣ်ဖှိၣ်ပူၤ, တၢ်အိၣ်သးအကလုာ်ကလုာ်အပူၤန့ၣ် ထုးန့ၢ်ပှၤတနီၤဒီး ထိၣ်ဂဲၤထီၣ်အဝဲသ့ၣ်လၢ ကလဲၤတၢ်ဒီးပှၤလၢ တၢ်ကပီၤအပူၤလီၤ. မ့ၢ်မးတၢ်မုၢ်လၢ်လၢအဂ့ၤဒိၣ်မးလီၤ. ဘၣ်ဆၣ်, မ့ၢ်တထုးန့ၢ် ပှၤကညီလၢယွၤအအိၣ်ဒၣ်လဲာ်, ပနာ်သ့သပှၢ်တၢၢ်လၢ တၢ်အံၤမၤသးခုယဟိဝၤဖဲ ပယူးယီၣ်ပာ်ကဲပှၤဂၤဒီး တၢ်အံၤမၤစၢၤစ့ၢ်ကီးပှၤလၢ ပကအိၣ်ဂၢၢ်ဆိးကျၢၤလၢယွၤအတၢ်အဲၣ်အပူၤလီၤ. တၢ်ဆိၣ်ဂ့ၤမနုၤဒိၣ်န့ၢ်တၢ်အံၤကအိၣ်လဲၣ်.