ပထံၣ်န့ၢ် “တၢ်မျၢ်ပလဲလၢ အလုၢ်ဒိၣ်ပှ့ၤဒိၣ်”

ဝ့(စ်)တၢၤ, နသ့ၣ်ညါထီၣ်​ ကစၢ်ယွၤဒ်လဲၣ်.

ယဒိၣ်ထီၣ်ဘၣ်လၢ စံာ်ပျီပူၤ လၢအအိၣ်လၢ ခွံ(စ်)လဲ, အီးစတြ့လံယါလီၤ. ပဟံၣ်ဖိဃီဖိတဖၣ်​ တဘူၣ်ထီၣ်ဘါထီၣ်​ တၢ်နီတမံၤဘၣ်. မ့ၢ်လၢပအိၣ်တၢ်လီၢ် ယံၤဒီးပှၤဂၤအဃိ ယတရ့ဘၣ်ဒီး ပှၤဂုၤပှၤဂၤအါအါဘၣ်. ဖဲယသးအိၣ်​ ၁၂ နံၣ်အခါ ယစးထီၣ်ဃုသ့ၣ်ညါ ကစၢ်ယွၤအဂ့ၢ်လီၤ. ယဃ့ဘါထုကဖၣ်​ လၢကစၢ်ယွၤကမၤစၢၤယၤ ဒ်သိးယကသ့ၣ်ညါထီၣ်​ တၢ်မ့ၢ်တၢ်တီ ဘၣ်ဃးဒီးအီၤအဂီၢ်လီၤ. လၢခံယတမၤတၢ် လၢစံာ်ပူၤလၢၤဘၣ်​ ဒီးယလဲၤမၤတၢ်လၢ အဲဒလ့ၤ, အီးစတြ့လံယါ ကလံၤထံးလီၤ. ဖဲယသးအိၣ်​ ၂၁ နံၣ်အခါ ယလဲၤဟးကသုၣ်ကသီလၢ စံဒနံၤ ဒီးယထံၣ်ဘၣ်ဒီး ဖဲၤ(မ်)လီၤ. ဒီးအဝဲတဲပၠးယၤ ဘၣ်ဃးဒီး ဘြံးတၢၣ်အံၣ်စရ့လး တၢ်ဘူၣ်တၢ်ဘါကရူၢ် လၢအတဲလီၤအသးလၢ ပှၤဘြံးတၢၣ်ဖိတဖၣ်န့ၣ်​ ဟဲလီၤစၢၤလၢ ပှၤအံၣ်စရ့လး အဒူၣ်ဖိထၢဖိတဖၣ်လၢ အဟါမၢ်န့ၣ်လီၤ. အဝဲသ့ၣ်​ အကရူၢ်တကရူၢ်န့ၣ်​ တဲဝဲလၢ အံၣ်စရ့အဒူၣ်ဖိထၢဖိလၢ အလီၤမၢ်တဖၣ်န့ၣ်​ မ့ၢ်ဝဲကလံၤစိး အံၣ်စရ့အဒူၣ်တဆံ လၢအဘၣ်လဲၤအိၣ်လၢထံဂၤကီၢ်ဂၤ ဖဲ ချ. ခ. န ဃိးယၤဖှိၣ်နံၣ်​ အဆၢကတီၢ်န့ၣ်လီၤ. အဃိဖဲယက့ၤကဒါလၢ အဲဒလ့ၤအခါ ယတဲသကိးတၢ်ဂ့ၢ်တခါအံၤ ဒီးပှၤလၢယတၢ်မၤလီၢ်တဂၤ လၢအမၤလိလံာ်စီဆှံဒီး ယဟိဝၤပှၤအုၣ်အသးတဖၣ်လီၤ. ဒီးတၢ်ဂ့ၢ်လၢပတဲအီၤအါတက့ၢ်န့ၣ်​ ဘၣ်ဃးဒီး ယဟိဝၤပှၤအုၣ်အသးတဖၣ်​ အတၢ်စူၢ်တၢ်နာ်အဂ့ၢ်လီၤ. ယတဲတၢ်ဒီးအီၤဝံၤကအိၣ်​ တနၣ်ရံၣ်ခံနၣ်ရံၣ်​ အလီၢ်ခံ ယတူၢ်ဘၣ်လၢ တၢ်ထုကဖၣ်လၢ ယဃ့အီၤလၢ ယနီၢ်ဆံးခါန့ၣ်​ ဘၣ်တၢ်စံးဆၢအီၤလီၤ. ယသ့ၣ်ညါဘၣ်​ တၢ်မ့ၢ်တၢ်တီ လၢအဘၣ်ဃးဒီး ယတၢ်ဘၣ်တ့ကစၢ် ဒီးအဘီအမုၢ်အဂ့ၢ်လံ. အဃိ လီၤဂာ်ဒ်ယထံၣ်န့ၢ် “တၢ်မျၢ်ပလဲလၢ အလုၢ်ဒိၣ်ပှ့ၤဒိၣ်” လီၤ.—မးသဲ ၁၃:၄၅, ၄၆.

ဖဲၤ(မ်), နၤစ့ၢ်ကီး နစးထီၣ်ဃုကစၢ်ယွၤ လၢနသးစၢ်ခါလီၤ. နသ့ၣ်ညါထီၣ်​ ကစၢ်ယွၤဒ်လဲၣ်.

ယဒိၣ်ထီၣ်ဘၣ်လၢ ဟံၣ်ဖိဃီဖိလၢ အအဲၣ်တၢ်ဘူၣ်တၢ်ဘါ လၢဝ့ၢ် ခီၣ်(စ်) ဟါဘၢၤ, နူ စီး ဝ့(စ်) အပူၤလီၤ. ယမိယပါဒီး ယဖံယဖု နာ်ဝဲ ဘြံးတၢၣ်​ အံၣ်စရ့လး ကရူၢ် အတၢ်သိၣ်လိလီၤ. ယပုၢ်ပိာ်ခွါ, ယနီ, ယၤ ဒီးယတခွါအါဂၤန့ၣ်​ ဖဲပနီၢ်ဆံးခါလံၤလံၤ ပှၤသိၣ်လိပှၤလၢ ကစၢ်ယွၤဘၣ်သူၣ်ဘၣ်သးဝဲ ပှၤလၢအဟဲလီၤစၢၤလီၤသွဲၣ်လၢ ပှၤဘြံးတၢၣ်ဖိန့ၣ်လီၤ. ဘၣ်ဆၣ်​ ယတတူၢ်ဘၣ်လၢ ယဘူးဒီးကစၢ်ယွၤဘၣ်ဒီး ယတနာ်တၢ်သိၣ်လိတဖၣ်န့ၣ်​ စ့ၢ်ကီးဘၣ်. ဖဲယသးအိၣ်​ ၁၄ နံၣ်အခါ ယလဲၤလၢ သရိာ်တဘျုးဖျၢၣ်​ ပၣ်ဃုာ်ဒီး ဖှံထံ (အဲကလံးကၣ်), ဘျၢထံခရံာ်ဖိ ဒီးပှၤမုၢ်ဃုနံၤဖိလီၤ. ဘၣ်ဆၣ်​ အဝဲသ့ၣ်တမၤစၢၤယၤ ဒ်သိးယကသ့ၣ်ညါထီၣ်​ ကစၢ်ယွၤအဂီၢ်ဘၣ်.

လၢခံန့ၣ်​ ယဟံၣ်ဖိဃီဖိ လဲၤသုးလီၢ်သုးကျဲလၢ စံဒနံၤ လၢအမ့ၢ်တၢ်လီၢ်လၢ ယထံၣ်လိာ်သးဒီး ဝ့(စ်)တၢၤ ဖဲအဝဲလဲၤဟးကသုၣ်ကသီ ဖဲန့ၣ်အခါလီၤ. ဒ် ဝ့(စ်)တၢၤ တဲဝဲဖဲမကၢာ်အသိး ခီဖျိလၢ ပတဲသကိးဘၣ်ဃးဒီး တၢ်ဘူၣ်တၢ်ဘါအဂ့ၢ်အဃိ လၢခံအဝဲစးထီၣ်​ မၤလိလံာ်စီဆှံဒီး ယဟိဝၤပှၤအုၣ်အသးလီၤ. ပကွဲးအိၣ်သကိးလိာ်သးလံာ်ဒီး လၢခံအဝဲကွဲးန့ၢ်ယၤ လံာ်စီဆှံအဆၢတဖၣ်​ အါမးလီၤ. အခီၣ်ထံးခါဒု ယဘၣ်ယိၣ်တၢ် ဒီးသးဒိၣ်ထီၣ်တၢ်ဘၣ်ဆၣ်​ ကယီကယီန့ၣ်​ ယသ့ၣ်ညါထီၣ်လၢ တၢ်လၢအဝဲကွဲးဝဲတဖၣ်န့ၣ်​ မ့ၢ်တၢ်မ့ၢ်တၢ်တီလီၤ.

ဖဲ ၁၉၆၂ နံၣ်န့ၣ်​ ယလဲၤသုးလီၢ်သုးကျဲလၢ အဲဒလ့ၤ ဒ်သိး ယကဘူးဒိၣ်ထီၣ်ဒီး ဝ့(စ်)တၢၤလီၤ. အဝဲရဲၣ်ကျဲၤန့ၢ်ယၤ တၢ်လီၢ်လၢယကအိၣ်ဒီး ယဟိဝၤပှၤအုၣ်အသး ဒီးမါဝၤခံဂၤလၢအမ့ၢ် ထီမၢၣ်(စ်) ဒီးကၠဲနံၣ်(စ်) ၡလိၤမူၤလီၤ. ဒီးအဝဲသ့ၣ်မ့ၢ်ပှၤ လၢအလဲၤမၤဘၣ်​ မံးၡ့ၣ်နရ့ၣ်​ လၢကီၢ်ဖးပူၣ်အၣ်​ နယူကံၣ်နံၣ်လီၤ. အဝဲသ့ၣ်ပာ်ဖျါထီၣ်​ တၢ်အဲၣ်တၢ်ကွံလၢယဖီခိၣ်​ ဒိၣ်မးလီၤ. ဖဲန့ၣ်အဆၢကတီၢ် ယသးနံၣ်အိၣ်ထဲ ၁၈ နံၣ်​ ဒီးအဝဲသ့ၣ်မၤစၢၤယၤ ဒ်သိးယကသ့ၣ်ညါအါထီၣ်​ ယဟိဝၤယွၤအဂ့ၢ်လီၤ. အဃိယစးထီၣ်​ မၤလိလံာ်စီဆှံ တယံာ်ဘၣ်ဒီး ယနာ်လၢ ယထံၣ်န့ၢ်တၢ်မ့ၢ်တၢ်တီလံန့ၣ်လီၤ. ယၤဒီး ဝ့(စ်)တၢၤ ပဖျီသးဝံၤအလီၢ်ခံ ပစးထီၣ်မၤ ယဟိဝၤယွၤ အတၢ်မၤလီၤ. ပတၢ်ကီတၢ်ခဲအိၣ်ဘၣ်ဆၣ်​ တၢ်မၤကစၢ်ယွၤတၢ်မၤအံၤန့ၣ်​ မၤစၢၤပှၤဒ်သိး ပကပာ်လုၢ်ပာ်ပှ့ၤအါထီၣ်​ တၢ်မ့ၢ်တၢ်တီ အတၢ်မျၢ်ပလဲအံၤလီၤ.

ဝ့(စ်)တၢၤ, တဲပၠးပှၤ နတၢ်လဲၤခီဖျိလၢ နစးထီၣ်မၤယွၤအတၢ်မၤ သီသီအခါတက့ၢ်.

ယၤဒီး ဖဲၤ(မ်) ပဖျီသးဝံၤတယံာ်ဘၣ်ဒီး ယဟိဝၤယွၤ အိးထီၣ်န့ၢ်ပှၤ “တြဲၤလၢအဒိၣ်” အါမး ဒ်သိးပကမၤအါထီၣ်​ အတၢ်မၤအဂီၢ်လီၤ. (၁ ကရံၣ်သူး ၁၆:၉) တၢ်ခွဲးတၢ်ယာ်လၢ ပကမၤယဟိဝၤယွၤ အတၢ်မၤလၢလၢပှဲၤပှဲၤန့ၣ်မ့ၢ်ဝဲ ပမၤပှၤလဲၤလၢညါန့ၣ်လီၤ. ဒီပုၢ်ဝဲၢ်ခွါ ကၠဲၣ်​ ဖီထၢၤ ဒီးအမါ ရိၣ်စလဲ ဟ့ၣ်ဂံၢ်ဟ့ၣ်ဘါပှၤလၢ ပကမၤပှၤလဲၤလၢညါန့ၣ်လီၤ. အဝဲမၤတၢ်လၢ ပတၢ်အိၣ်ဖှိၣ်အပူၤ ဒီးလၢခံ အဝဲမၤ ကဝီၤအပှၤကွၢ်တၢ်လီၤ. ခဲအံၤပမၤ အီးစတြ့လ့ၡၢၣ်​ ဝဲၤတြၢ် ကမံးတံာ်တၢ်မၤ ဒ်သိးသိးလီၤ. ဖဲ(မ်) ဒီးယၤ ပမၤပှၤလဲၤလၢညါ ယဲၢ်နံၣ်လၢ တၢ်သူၣ်ခုသးခုအပူၤလီၤ. ဖဲယအိၣ်​ ၂၉ နံၣ်န့ၣ်​ ယၤဒီး ဖဲ(မ်) ပဘၣ်တၢ်ကွဲမုာ်ပှၤလၢ ပကမၤ ကဝီၤအပှၤကွၢ်တၢ်လၢ ပစံးဖံးကလံၤထံး အကီးတဖၣ်န့ၣ်လီၤ. လၢခံကီးတဖၣ်အံၤန့ၣ်​ အိၣ်လၢ ကီၢ်ဖံၣ်ကၠံၣ်ဝဲၤတြၢ် အတၢ်ကွၢ်ထွဲ အဖီလာ်န့ၣ်လီၤ. ကီးသ့ၣ်တဖၣ်န့ၣ်မ့ၢ်ဝဲ အမဲရကၤ စၤမိဝၤ, စၤမိဝၤ, ခံၣ်ရံၣ်ဘးထံၣ်, နၤရူ, နံ, တီၣ်ခုၣ်လီ, ထီကၢၤ, ထြူၤဘါလူၤ ဒီးဘၣ်နူၤအတူၣ်လီၤ.

ဖဲန့ၣ်အဆၢကတီၢ် ပှၤအိၣ်ဖဲကီးသ့ၣ်တဖၣ်န့ၣ်​ ထံၣ်ကမၣ်​ ယဟိဝၤပှၤအုၣ်သးတဖၣ်လီၤ. လၢတၢ်န့ၣ်အဃိ ပဘၣ်အိၣ်ဒီးတၢ်ပလီၢ် ဒီးတၢ်ကူၣ်သ့လီၤ. (မးသဲ ၁၀:၁၆) တၢ်အိၣ်ဖှိၣ်ဖဲန့ၣ်တဖၣ်န့ၣ်​ ဒီပုၢ်ဝဲၢ်မုၣ်ခွါအိၣ်ဒၣ်​ စှၤဂၤလီၤ. လၢတၢ်န့ၣ်အဃိ ဖဲပလဲၤလၢ တၢ်အိၣ်ဖှိၣ်တနီၤန့ၣ်​ ဒီပုၢ်ဝဲၢ်တနီၤ ကဟ့ၣ်မံပှၤအဂီၢ် တၢ်လီၢ်တအိၣ်ဘၣ်. ဒီးပဃ့မံလၢ သဝီဖိလၢ အိၣ်ဖဲန့ၣ်တဖၣ်​ အဟံၣ်လီၤ. အဝဲသ့ၣ်တဖၣ်န့ၣ်​ အသးဂ့ၤဒိၣ်မးလီၤ.

ဝ့(စ်)တၢၤ, ပသ့ၣ်ညါလၢ နဘၣ်သူၣ်ဘၣ်သး တၢ်ကွဲးကျိာ်ထံတၢ် အတၢ်ဖံးတၢ်မၤဒိၣ်မး. တၢ်မနုၤမၤစၢၤနၤဒ်သိး နကသးအိၣ်​ တၢ်မၤအံၤလဲၣ်.

ဖဲပစးထီၣ်မၤ တၢ်စံၣ်တဲၤတဲလီၤတၢ်မၤ ဖဲထီကၢၤအခါ ပလံာ်လဲၢ်လၢ ထီကၢၤအကျိာ်န့ၣ်​ တအိၣ်အါအါဒံးဘၣ်. လၢတၢ်စံၣ်တဲၤတဲလီၤအပူၤ အဝဲသ့ၣ်သူဝဲ လံာ်လၢအမ့ၢ် တၢ်မ့ၢ်တၢ်တီလၢ ကဆှၢပှၤဆူ တၢ်မူအထူအယိာ် (The Truth That Leads to Eternal Life) လၢကီၤလၤဝါကျိာ် ဒီးအဝဲသ့ၣ်​ သိၣ်လိပှၤဂၤလီၤ. လၢတၢ်န့ၣ်အဃိ တၢ်အိၣ်ဖှိၣ်သးပှၢ်သၢဂၤ လၢအအိၣ်လၢ လီၢ်ကဝီၤဖဲန့ၣ်န့ၣ်​ တသ့ကီၤလၤဝါကျိာ် ဂ့ၤဂ့ၤသနာ်က့ ဖဲအဝဲသ့ၣ်ထီၣ်ဝဲ တၢ်အိၣ်ဖှိၣ်သးပှၢ်ကၠိ လွံၢ်နွံအဆၢကတီၢ် အဝဲသ့ၣ်​ တူၢ်လိာ်ဝဲလၢ ကကွဲးကျိးထံဝဲ လံာ်အံၤလၢ ထီကၢၤအကျိာ်လီၤ. ဖဲၤ(မ်) ဒိလီၤလံာ် ဝံၤဒီးပဆှၢအီၤလၢ အမဲရကၤကီၢ်စၢဖှိၣ်​ အဝဲၤတြၢ်လၢ တၢ်ကစဲးကျံးထုးထီၣ်အီၤအဂီၢ်လီၤ. တၢ်မၤတခါအံၤ ကဝံၤခဲလၢာ်အဂီၢ်ယံာ်ဝဲ ဃိးနွံလီၤ. တၢ်ကွဲးကျိာ်ထံတခါအံၤ တဂ့ၤအါအါဘၣ်ဘၣ်ဆၣ်​ မၤစၢၤပှၤထီကၢၤဖိအါဂၤ ဒ်သိးအဝဲသ့ၣ်​ ကသ့ၣ်ညါထီၣ်​ တၢ်မ့ၢ်တၢ်တီအဂီၢ်လီၤ. ဖဲၤ(မ်) ဒီးယၤန့ၣ်​ ပတမ့ၢ် ပှၤကျိာ်ထံတၢ်ဖိဘၣ်​ ဘၣ်ဆၣ်​ တၢ်လဲၤခီဖျိတခါအံၤ မၤစၢၤပှၤဒ်သိး ပကဘၣ်သူၣ်ဘၣ်သး တၢ်ကွဲးကျိာ်ထံတၢ် အတၢ်ဖံးတၢ်မၤန့ၣ်လီၤ.

ဖဲၤ(မ်), နအိၣ်လၢကီးတဖၣ်န့ၣ်​ ဒီးနအိၣ်လၢအီးစတြ့လံယါန့ၣ်​ လီၤဆီလိာ်အသး ဒ်လဲၣ်.

တၢ်အိၣ်မူဖဲ ကီးတဖၣ်န့ၣ်​ ဒီးအီးစတြ့လံယါန့ၣ်​ လီၤဆီလိာ်အသး ဒိၣ်မးလီၤ. တၢ်လီၢ်တနီၤန့ၣ်​ ပစိၤအ့ၣ်တၢ်ဃၢ်ဖျး, တၢ်ကိၢ်တၢ်ခုၣ်​ တဘၣ်လီၢ်ဘၣ်စးဘၣ်, အိၣ်ဒီးယုၢ်တဖၣ်, တၢ်ဆူးတၢ်ဆါ ဒီးတဘျီတခီၣ်​ ပတၢ်အီၣ်တၢ်အီတအိၣ်​ အါအါဘၣ်. ဘၣ်ဆၣ်​ မ့ၢ်တုၤလၢဟါခီန့ၣ်​ ပအိၣ်ဘှံးအိၣ်သါလၢဟံၣ်​ ဒီးကွၢ်စိဃီၤတၢ်ဆူ ပီၣ်လဲၣ်ပူၤလီၤ. ဒီးပဟံၣ်န့ၣ်အခိၣ်ဒုး ဘၣ်တၢ်မၤအီၤလၢ ကဟံလၣ်​ ဒီးအဒူၣ်တအိၣ်ဘၣ်. ဘၣ်တဘျီဘျီ ဖဲမုၢ်နၤခီန့ၣ်​ လါကပီၤဂ့ၤမး အဃိပထံၣ်ဘၣ်​ ဃီၤထူၣ်တဖၣ်​ ဒီးလါအဒုကလၤဖျါလၢ ပီၣ်လဲၣ်ပူၤလီၤ. တၢ်ဆၢကတီၢ်ဒ်အံၤန့ၣ်​ မၤစၢၤပှၤလၢ ပကဃ့ဘါထုကဖၣ်​ ဒီးဆိကမိၣ်ထံတၢ်လီၤ. ဒီးမၤစၢၤပှၤ လၢပကဆိကမိၣ်​ တၢ်လၢအကဲထီၣ်​ တၢ်ဂံၢ်တၢ်ဘါအဂီၢ် ဒီးပသုတဆိကမိၣ်​ တၢ်လၢအကမၤလီၤစၢ် ပဂံၢ်ပဘါတဂ့ၤအဂီၢ်လီၤ.

ပအဲၣ်ဖိသၣ်တဖၣ်ဒိၣ်မးလီၤ. ဖဲအဝဲသ့ၣ်ထံၣ်​ ကီၤလၤဝါအခါ လီၤဆီဘၣ်အဝဲသ့ၣ်ဒိၣ်မးလီၤ. ဖဲပလဲၤဟးလၢ နံအခါန့ၣ်​ ဖိသၣ်ပိာ်ခွါဖိတဂၤ ဖူးလဲး ဝ့(စ်)တၢၤ အစုဆူၣ်ဒီး တဲဝဲလၢ “နထိၣ်ဆူၣ်တခါအံၤ ယကၠဲးညါ” လီၤ. ဖျါလီၤဂာ်လၢ အဝဲတထံၣ်ဘၣ်​ ပှၤလၢအိၣ်ဒီး အစုဆူၣ်ဒ်အံၤန့ၣ်​ နီတဘျီဘၣ်​ ဒီးကဘၣ်ကီးဝဲ ဒ်လဲၣ်န့ၣ်တသ့ၣ်ညါဝဲဘၣ်.

ပထံၣ်ဘၣ်​ ပှၤဂၤသ့ၣ်တဖၣ်​ အတၢ်အိၣ်မူကီခဲ ဒီးဖှီၣ်ဒိၣ်မးအဃိ ပသးဘၣ်ဒိ ဒိၣ်မးလီၤ. တၢ်လၢအိၣ်လၢ အခိၣ်အဃၢၤသ့ၣ်တဖၣ်န့ၣ်​ ဃံလၤဒိၣ်မး ဘၣ်ဆၣ်​ လၢအဝဲသ့ၣ်​ တၢ်အိၣ်ဆူၣ်အိၣ်ချ့အဂီၢ်န့ၣ်​ ကသံၣ်ကသီတအိၣ်​ လၢလၢပှဲၤပှဲၤ ဒီးထံလၢအဝဲသ့ၣ်​ ကအီအဂီၢ်န့ၣ်​ တအိၣ်အါအါဘၣ်. ဘၣ်ဆၣ်သနာ်က့ ပဒီပုၢ်ဝဲၢ်တဖၣ်န့ၣ်ဖျါလၢ အတဘၣ်ယိၣ်တၢ်ဘၣ်​ ဒီးလၢအဝဲသ့ၣ်အဂီၢ်န့ၣ်​ တမ့ၢ်တၢ်နီတမံၤဘၣ်. အဝဲသ့ၣ်အိၣ်​ ဘၣ်ဒီးအဟံၣ်ဖိဃီဖိ ဘူးဘူးတံၢ်တံၢ်, အိၣ်ဒီး တၢ်ဘူၣ်ထီၣ်ဘါထီၣ်အလီၢ် ဒီးအိၣ်ဒီး တၢ်ခွဲးတၢ်ယာ်လၢ စံးထီၣ်ပတြၢၤဘၣ်​ ယဟိဝၤယွၤ အဃိအဝဲသ့ၣ်​ သးခုဒိၣ်မးလီၤ. အဝဲသ့ၣ်​ အဒိအတဲာ် မၤစၢၤပှၤဒ်သိး ပကသးစၢၢ်ဆၢ တၢ်လၢအရ့ဒိၣ်ကတၢၢ် ဒီးအိၣ်မူယိယိဖိလီၤ.

ဖဲၤ(မ်), တဘျီတခီၣ်​ နဘၣ်ဖီအီၣ်​ တၢ်အီၣ်တၢ်အီ ဒီးနကဘၣ်မၤန့ၢ်ထံလၢ လၢကျဲလၢအသီတဘိအဃိ နမၤအီၤဒ်လဲၣ်.

မ့ၢ်လၢယပါ သိၣ်လိယၤတၢ်အါမး အဃိယစံးဘျုးဘၣ်အီၤ ဒိၣ်မးလီၤ. အဝဲသိၣ်လိယၤလၢ ယကဘၣ်မၤကဲၤလီၤ မ့ၣ်အူလၢဖၣ်ကပူၤ ဒီးဖီအီၣ်တၢ်ဒ်လဲၣ်, ဒီးတၢ်ပီးတၢ်လီ မ့ၢ်တအိၣ်ဒီးယၤ အါအါဘၣ်ဘၣ်ဆၣ်​ ယကဘၣ်ဆဲးအိၣ်မူ ဒီးမၤအီၣ်မၤအီ ဒ်လဲၣ်န့ၣ်လီၤ. ဘၣ်တဘျီ ဖဲပလဲၤလၢ ကီးခံၣ်ရံၣ်ဘးထံၣ်အခါ ပဘၣ်အိၣ်လၢဟံၣ်လၢအခိၣ်ဒုး လၢဘၣ်တၢ်ဒုးအီၤဒီး ကဟံလၣ်, အဒါန့ၣ်​ ဘၣ်တၢ်တ့အီၤဒီး လၢၢ်တကလုာ် ဒီးအဒူၣ်န့ၣ်​ ဘၣ်တၢ်ဒူၣ်အီၤလၢ ဖုဒါန့ၣ်လီၤ. ယကဖီအီၣ်​ ဟါတၢ်အီၣ်ယိယိဖိအဂီၢ်န့ၣ်​ ယခူၣ်လီၤတၢ်ပူၤ ဒ်သိးယကမၤကဲၤထီၣ်​ မ့ၣ်အူအဂီၢ် ဒီးယမၤန့ၢ်မ့ၣ်အူဆၣ်လၢ ဃီၤဘ့ၣ်ကု ဒီးထၢနုာ်လီၤလၢတၢ်ပူၤလီၤ. ဒ်သိးယကလဲၤဒၢၣ်ထံအဂီၢ် ယလဲၤရဲၣ်လီၤယသးလၢ ထံကမျၢ (ထံပူၤ) လီၤ. အဝဲသ့ၣ်​ သူဝဲသ့ၣ်ဖိတဘိလၢ ကအိၣ်ဃုပ့ၣ်​ ဒီးလၢအကတၢၢ်န့ၣ်​ စၢဃာ်ဝဲပျံၤ ဒီးလၢပျံၤအခိၣ်ထိးန့ၣ်​ လၢကစၢဃာ်ဝဲ ထံစဲၤတဖျၢၣ်​ ဒ်တခွဲအသိးလီၤ. ပှၤပိာ်မုၣ်သ့ၣ်တဖၣ်န့ၣ်​ ကွံာ်လီၤထံစဲၤ ဒီးထံစဲၤဃၣ်သးလၢအကပၤဒီး ထံနုာ်လီၤပှဲၤပှဲၤ အပူၤလီၤ. ယဆိကမိၣ်ဒု ညီညီဖိလီၤ. ဘၣ်ဆၣ်တုၤလၢ ယကလဲးဘျီဒု ယကွံာ်လီၤထံစဲၤဒီး ထံစဲၤထီၣ်ဖီဒ်န့ၣ်လီၤ. ဒီးအဝဲသ့ၣ်​ နံၤဘၣ်ယၤလီၤ. အဝဲသ့ၣ်နံၤဘၣ်ယၤဝံၤ ပိာ်မုၣ်လၢ အဝဲသ့ၣ်အကျါတဂၤန့ၣ်​ မၤစၢၤယၤလီၤ. အဝဲသ့ၣ်တဖၣ်န့ၣ်​ အသးဂ့ၤဒီး သးအိၣ်မၤစၢၤပှၤဂၤ ထီဘိလီၤ.

သုဘၣ်သူၣ်ဘၣ်သး သုမူဒါ ဖဲကီးသ့ၣ်တဖၣ်န့ၣ်​ ဒိၣ်မး. သုတဲပၠးပှၤ သုတၢ်လဲၤခီဖျိ လီၤလီၤဆီဆီတနီၤ ကသ့ဧါ.

ဝ့(စ်)တၢၤ– ဒ်သိးပကနၢ်ပၢၢ်ထီၣ်​ တၢ်ဆဲးတၢ်လၤတခါစုာ်စုာ်အဂီၢ်န့ၣ်​ ပလိၣ်ဘၣ်တၢ်ဆၢကတီၢ်လီၤ. အဒိ ဖဲဒီပုၢ်ဝဲၢ်တဖၣ်​ ကွဲဒုးအီၣ်ပှၤတၢ်အီၣ်အခါ အဝဲသ့ၣ်​ ဟဲပာ်လီၤန့ၢ်ပှၤ တၢ်အီၣ်လၢအိၣ်ဒီးအဝဲသ့ၣ်​ ခဲလၢာ်လီၤ. အခီၣ်ထံးခါ ပတသ့ၣ်ညါလၢ ပကြၢးပာ်တ့ၢ်တၢ်အီၣ်လၢ အဝဲသ့ၣ်အဂီၢ်တနီၤအဃိ ပအီၣ်တၢ်အီၣ်လၢ အဝဲသ့ၣ်ပာ်လီၤလၢ ပမဲာ်ညါခဲလၢာ်လီၤ. ဘၣ်ဆၣ်​ ဖဲပသ့ၣ်ညါထီၣ်​ တၢ်အိၣ်သးအံၤအခါ ပပာ်တ့ၢ်တၢ်အီၣ်လၢ အဝဲသ့ၣ်အဂီၢ်တနီၤလီၤ. ပတပလီၢ်ပသးအဃိ တၢ်ကဲထီၣ်သးဒ်အံၤဘၣ်ဆၣ်​ ပဒီပုၢ်ဝဲၢ်သ့ၣ်တဖၣ်​ နၢ်ပၢၢ်စၢၤပှၤလီၤ. ဖဲပက့ၤအိၣ်သကိး အဝဲသ့ၣ်ဃုလါတဘျီအခါ အဝဲသ့ၣ်သးခုဒိၣ်မးလီၤ. ဖဲန့ၣ်အဆၢကတီၢ် ဒီပုၢ်ဝဲၢ်လၢတၢ်အိၣ်ဖှိၣ်အဂၤ လၢအဝဲသ့ၣ်​ ရ့ဘၣ်ဝဲန့ၣ်​ အိၣ်ထဲပဝဲခံဂၤလီၤ.

ပတၢ်လဲၤအိၣ်သကိးအံၤ ကဲထီၣ်စ့ၢ်ကီး တၢ်အုၣ်သးလၢ ပှၤလၢအအိၣ်ဖဲန့ၣ်တဖၣ်အဂီၢ် စ့ၢ်ကီးလီၤ. မ့ၢ်လၢပှၤဖဲန့ၣ်အါဂၤန့ၣ်​ ဆိၣ်ကမိၣ်ဝဲဒၣ်လၢ ပတၢ်ဘူၣ်တၢ်ဘါတခါအံၤန့ၣ်​ အိၣ်ဒၣ်ပဒီပုၢ်ဝဲၢ်ဖဲန့ၣ်တဖၣ်​ ဒုးအိၣ်ထီၣ်ဝဲလီၤ. ဘၣ်ဆၣ်​ ဖဲယၤဒီးယမါ လဲၤအိၣ်သကိး ဒီပုၢ်ဝဲၢ်ဖဲန့ၣ်တဖၣ်အခါ ပှၤလီၢ်ကဝီၤဖိတဖၣ်​ နၢ်ပၢၢ်ထီၣ်ဝဲလၢ ပတၢ်ကရၢကရိအံၤ မ့ၢ်တၢ်နီၢ်ကီၢ်တခါ ဒီးသးအိၣ်လိာ်သးတဂၤဒီးတဂၤလီၤ. ဒီးတကးဒံးဘၣ်​ အဝဲသ့ၣ်ကမၢကမၣ်​ ဒိၣ်မးလီၤ.

ဖဲၤ(မ်)– တၢ်မၤအသးလၢ ယသ့ၣ်နီၣ်ဘၣ်အီၤ အဒိၣ်ကတၢၢ် န့ၣ်မ့ၢ်ဝဲ ကီးခံၣ်ရံၣ်ဘးထံၣ်​ အတၢ်အိၣ်ဖှိၣ်လီၤ. ဖဲန့ၣ်န့ၣ်​ ဒီပုၢ်ဝဲၢ်မုၣ်ခွါ အိၣ်စှၤကိာ်ဂၤလီၤ. တၢ်အိၣ်ဖှိၣ်သးပှၢ်အိၣ်ထဲ တဂၤဧိၤဒီး အမံၤလၢ အဲၤတံၤနဲက့ၤ မၤတ့ရၤ ဒီးတသ့ဖဲအသ့ အဝဲဂုာ်ကျဲးစၢး ကွၢ်ထွဲပှၤလီၤ. ဘၣ်တနံၤန့ၣ်​ အဝဲစိာ်ဒီး တၢ်ဒၢတဖျၢၣ်ဒီး လၢတၢ်ဒၢအံၤ အပူၤန့ၣ်​ အိၣ်ဒီးဆီဒံၣ်တဖျၢၣ်​ ဒီးအဝဲတဲယၤလၢ “အအံၤမ့ၢ်နဂီၢ်” လီၤ. ဖဲန့ၣ်ဆၢကတီၢ်န့ၣ်​ ပှၤတဟ့ၣ်ဒုးအီၣ်​ ကြီပှၤဆီဒံၣ်ဘၣ်. တၢ်ဟ့ၣ်အံၤ မ့ၢ်တၢ်လၢ အဆံးဘၣ်ဆၣ်​ ခီဖျိလၢ အဝဲဟ့ၣ်ပှၤလၢ တၢ်သးအိၣ်​ အပူၤအဃိ ဘၣ်ပသးမုာ်ဒိၣ်မး လီၤ.

ဒီပုၢ်ဝဲၢ်မုၣ်​ ဖဲ(မ်), ပူၤကွံာ်တဘျုးနံၣ်​ ဝံၤအလီၢ်ခံ နဟုးဟးဂီၤအဃိ နလဲၤခီဖျိတၢ်ကီတၢ်ခဲတဖၣ်အံၤ န့ၢ်ဒ်လဲၣ်.

ဖဲ ၁၉၇၃ နံၣ်, ယၤဒီး ဝ့(စ်)တၢၤ ပအိၣ်လၢ ပစံးဖံးကလံၤထံးအခါ ယဒၢထီၣ်အဃိ ပက့ၤလၢ အီးစတြ့လံယါလီၤ. ပက့ၤအိၣ်ဖဲန့ၣ်​ လွံၢ်လါဝံၤအလီၢ်ခံ ယဟုးဟးဂီၤလီၤ. ဖိသၣ်တဂၤအံၤန့ၣ်မ့ၢ် ဝ့(စ်)တၢၤ အဖိစ့ၢ်ကီး အဃိအဝဲ သးဘၣ်ဒိဒိၣ်မးလီၤ. ဒ်တၢ်ဆၢကတီၢ် လဲၤပူၤကွံာ်အသိးန့ၣ်​ ယတၢ်သးအုး လီၤမၢ်ဝဲ ကယီကယီလီၤ. ဘၣ်ဆၣ်​ တချုးလၢ ယန့ၢ်ဘၣ်​ တၢးထီခိးတၢ် လၢအမ့ၢ် April 15, 2009, issue of The Watchtower ဒံးဘၣ်န့ၣ်​ ယတၢ်သးအုးတဖၣ်​ တလီၤမၢ်ဘၣ်. လၢလံာ်အံၤန့ၣ်​ “ပှၤဖးလံာ်ဖိတဖၣ် အတၢ်သံကွၢ်” ပာ်ဖျါထီၣ်ဝဲ တၢ်သံကွၢ်လၢအမ့ၢ် “ဖိသၣ်လၢ အသံလၢအမိၢ်အဒၢလီၢ်ပူၤန့ၣ်​ အတၢ်မုၢ်လၢ်အိၣ်လၢ ကဟဲက့ၤဂဲၤဆၢထၢၣ်သမူထီၣ်က့ၤ ဒံးဧါ.” တၢ်မၤလိအံၤ ပာ်ဖျါထီၣ်ဝဲလၢ တၢ်ဂ့ၢ်ကီတဖၣ်န့ၣ်​ အိၣ်လၢယဟိဝၤယွၤအစုပူၤ ဒီးထီဘိန့ၣ်​ အဝဲကမၤဝဲတၢ်လၢအဘၣ်လီၤ. အဝဲကမၤလီၤမၢ်ကွံာ် တၢ်သူၣ်အုးသးအုးခဲလၢာ် လၢပှၤဟီၣ်ခိၣ်ဖိတဖၣ်​ ထံၣ်ဘၣ်ဝဲလၢ ဟီၣ်ခိၣ်လၢ အအၢအသီအံၤအပူၤလီၤ. အဝဲကမၢအဖိခွါ “မၤဟးဂီၤကွံာ် မုၣ်ကီၤလံၢ်အတၢ်မၤတဖၣ်လီၤ.” (၁ ယိၤဟၣ်​ ၃:၈) ဒီးဒ်ပမ့ၢ် ယဟိဝၤယွၤအခ့အပှၤအသိး တၢ်မၤလိတခါအံၤ မၤစၢၤပှၤဒ်သိး ပကပာ်လုၢ်ပာ်ပှ့ၤအါထီၣ်​ တၢ်မ့ၢ်တၢ်တီအ “တၢ်မျၢ်ပလဲ” အံၤလီၤ. ပအိၣ်ဒီးတၢ်မုၢ်လၢ်လၢ ယွၤအဘီအမုၢ်အပူၤအဃိ ပသးမုာ်ထီၣ်ဒိၣ်မးလီၤ.

ယဟုးဟးဂီၤ ဝံၤအလီၢ်ခံ ပက့ၤမၤကဒါက့ၤ ကစၢ်ယွၤအတၢ်မၤလၢ ဆၢကတီၢ်လၢပှဲၤလီၤ. ပမၤတၢ်လၢအီးစတြ့လံယါ ဘ့ၤသ့လး တဘျုးလါ ဒီးလၢခံန့ၣ်​ ပစးထီၣ်​ ကဒါက့ၤ ကဝီၤအပှၤကွၢ်တၢ် တၢ်မၤလီၤ. ပမၤတၢ်လၢ နူ စီး ဝ့(စ်) ဒီး စံဒနံၤ လွံၢ်နံၣ်ဝံၤ ဖဲ ၁၉၈၁ န့ၣ်ပှၤကွဲမုာ်ကဒီးပှၤ လၢပကလဲၤမၤတၢ်လၢ အီးစတြ့လံယါ ဘ့ၤသ့လးလီၤ. ပအိၣ်ဖဲန့ၣ်​ တုၤခဲအံၤလီၤ.

ဒီပုၢ်ဝဲၢ် ဝ့(စ်)တၢၤ, ဖဲနမၤတၢ်ဒ် အီးစတြ့လ့ၡၢၣ်​ ဝဲၤတြၢ်ကမံးတံာ်အခါ နတၢ်လဲၤခီဖျိလၢ ပစံးဖံးကလံၤထံး ကီးတဖၣ်န့ၣ်​ မၤစၢၤနၤဒ်လဲၣ်.

မ့ၢ်, မၤစၢၤယၤလၢ ကျဲအါဘိညါ. အီးစတြ့လံယါန့ၣ်​ ကဘၣ်ကွၢ်ထွဲက့ၤဝဲ အမဲရကၤ စၤမိဝၤ ဒီးကီးစၤမိဝၤလီၤ. ဒီးလၢခံန့ၣ်​ ပှၤက့ၤပာ်ဖှိၣ်​ နယူစံလဲၣ်ဝဲၤတြၢ် ဒီးအီးစတြ့လံယါဝဲၤတြၢ် တဖျၢၣ်ဃီလီၤ. ခဲအံၤန့ၣ်​ အီးစတြ့လ့ၡၢၣ်​ ဝဲၤတြၢ် န့ၣ်ဘၣ်ကွၢ်ထွဲဝဲ ဟီၣ်ကဝီၤလၢ အီးစတြ့လံယါ, အမဲရကၤ စၤမိဝၤ ဒီးကီးစၤမိဝၤ, ခူၣ်အကီးတဖၣ်, နယူစံလဲၣ်, နံ, ထံမိၣ်​ လဲးတံၣ်, တီၣ်ခုၣ်လီ ဒီးကီးထီကၢၤလီၤ. လၢတၢ်လီၢ်တဖၣ်အံၤအကျါ ယလဲၤဘၣ်အီၤအါတီၤ ဒ်ဝဲၤတြၢ်အပှၤခၢၣ်စးတဂၤအသိးလီၤ. မ့ၢ်လၢယမၤသကိးဘၣ်တၢ်ဒီး ဒီပုၢ်ဝဲၢ်မုၣ်ခွါလၢ အအိၣ်လၢကီးတဖၣ်အံၤအဃိ ဖဲယမၤဘၣ်တၢ်လၢ ဝဲၤတြၢ်လၢအဝဲသ့ၣ်အဂီၢ်အခါ ကဲထီၣ်တၢ်မၤစၢၤလၢယဂီၢ်ဒိၣ်မးလီၤ.

ယမ့ၢ်ဘၣ်တဲန့ၣ်​ လၢအပူၤကွံာ်အနံၣ်အါမးလံၤလံၤန့ၣ်​ ဖဲ(မ်) ဒီးယၤပသ့ၣ်ညါဘၣ်လၢ ပှၤလၢအဃုယွၤန့ၣ်​ တမ့ၢ်ထဲလၢ ပှၤလၢအဒိၣ်တုာ်ခိၣ်ပှဲၤတဖၣ်ဘၣ်. ပသ့ၣ်ညါထီၣ်ဘၣ်တၢ်ဂ့ၢ်အံၤ ခီဖျိလၢ ပနီၢ်ကစၢ်အတၢ်လဲၤခီဖျိ အဃိလီၤ. ပှၤသးစၢ်တဖၣ်စ့ၢ်ကီး အဝဲသ့ၣ်အဟံၣ်ဖိဃီဖိတဖၣ်​ မ့ၢ်တအဲၣ်ဒိးဃုယွၤဒၣ်လဲာ် အဝဲသ့ၣ်​ လီကီဝဲတၢ်မ့ၢ်တၢ်တီအ “တၢ်မျၢ်ပလဲလၢ အလုၢ်ဒိၣ်ပှ့ၤဒိၣ်” တခါအံၤလီၤ. (၂ စီၤပၤ ၅:၂, ၃; ၂ ကွဲးနီၣ်တၢ် ၃၄:၁-၃) ပသ့ၣ်ညါလီၤတံၢ်လၢ ယဟိဝၤယွၤ မ့ၢ်ပှၤလၢ အအိၣ်ဒီး တၢ်အဲၣ်တၢ်ကွံ ဒီးအဝဲအဲၣ်ဒိးလၢ ပှၤခဲလၢာ်လၢ အသးပှၢ်မ့ၢ်ဂ့ၤ, အသးစၢ်မ့ၢ်ဂ့ၤ ကန့ၢ်ဘၣ်တၢ်မူလီၤ.

လၢအပူၤကွံာ်အနံၣ်​ ၅၀ ဘျဲၣ်ဖဲ ဖဲ(မ်) ဒီးယၤပစးထီၣ်ဃု ကစၢ်ယွၤအခါန့ၣ်​ တၢ်ကမၤအသးဒ်လဲၣ်န့ၣ်​ ပတသ့ၣ်ညါဘၣ်. တၢ်မ့ၢ်တၢ်တီလၢ ဘၣ်ဃးဒီးယွၤအဘီအမုၢ်န့ၣ်​ လီၤဂာ်ဒ် ပလဲလၢအလုၢ်ဒိၣ်ပှ့ၤဒိၣ်ဒိၣ်မးလီၤ. ပပာ်လီၤပသးလၢ ပကဖီၣ်ဃာ်ပလဲအံၤ ကျၢၤကျၢၤလီၤ.