မ့ၢ်နသ့ၣ်ညါဧါ
လၢပျၢၤန့ၣ် ပှၤလဲၤတၢ်လၢပီၣ်လဲၣ်ပူၤတဖၣ် ဘၣ်လဲၤတၢ်ဒ်လဲၣ်
လၢစီၤပီလူးအစိၤန့ၣ် ကဘီလီၤလီၤဆီဆီလၢ ပှၤလဲၤတၢ်ဖိတဖၣ်အဂီၢ်တအိၣ်ဘၣ်. ပှၤတဂၤ မ့ၢ်အဲၣ်ဒိးလဲၤတၢ်လၢကဘီန့ၣ် အဝဲကဘၣ်ဟးသံကွၢ်တၢ်လၢ ပှၤကၤတၢ်ဖိအကဘီလၢ အကလဲၤလၢ တၢ်လီၢ်လၢ အဝဲအဲၣ်ဒိးလဲၤဝဲအလီၢ် မ့ၢ်အအိၣ်ဧါ, တအိၣ်ဧါ ဒီးမ့ၢ်အိၣ်န့ၣ် အဝဲလဲၤဒိးပိာ် အဝဲသ့ၣ်အခံသ့ဧါ တသ့ဧါန့ၣ်လီၤ. (မၤတၢ် ၂၁:၂, ၃) ဒီးကဘီလၢပှၤလဲၤတၢ်ဖိတဂၤ လဲၤဒိးဝဲတဘ့ၣ်အံၤ မ့ၢ်တလဲၤတုၤလၢ တၢ်လီၢ်လၢ အဝဲအဲၣ်ဒိးလဲၤဝဲဘၣ်န့ၣ် အဝဲကဘၣ်ဃုကဒီး ကဘီအဂၤလၢ အကဆှၢအီၤဆူ အဘူးဒီးတၢ်လီၢ်လၢ အအဲၣ်ဒိးလဲၤဝဲန့ၣ်လီၤ.—မၤတၢ် ၂၇:၁-၆.
လၢတနံၣ်အတီၢ်ပူၤန့ၣ် ကဘီလဲၤတၢ်လၢ တၢ်ဆၢကတီၢ်လၢ ပှၤပာ်ပနီၣ်အီၤ ဒီးတၢ်ရဲၣ်တၢ်ကျဲၤ တအိၣ်လီၤတံၢ်လီၤဆဲးဘၣ်. တဘျီတခီၣ် ခီဖျိလၢ မူခိၣ်ကလံၤသီၣ်ဂီၤတဂ့ၤဘၣ်အဃိ ကဘီတလဲၤတၢ်ဘၣ်. ဒီးတဘျီတခီၣ် ခီဖျိလၢ ပှၤမၤတၢ်လၢ ကဘီပူၤတဖၣ် အတၢ်ဒုၣ်တၢ်ထုအဃိ ပှၤဘၣ်သုးတၢ်ဆၢကတီၢ်လီၤ. ပှၤကဘီဖိတဖၣ် မ့ၢ်ထံၣ်ဘၣ် စိးဝၣ်ဃးစီၢ်လီၤလၢ အကဘီယၢ်လၣ် အတၢၣ်လိၤ ဒီးမ့ၢ်ထံၣ်ဘၣ်ဝဲလၢ ကဘီအဂၤတဖၣ် အတၢ်ဟးဂူာ်ဟးဂီၤ လၢပီၣ်လဲၣ်ကၢၢ်နံၤန့ၣ် အဝဲသ့ၣ်နာ်ဝဲလၢ တၢ်အိၣ်သးတဂ့ၤဘၣ်. ဒီးမူခိၣ်ကလံၤသီၣ်ဂီၤမ့ၢ်ဂ့ၤန့ၣ် ကဘီလဲၤတၢ်လီၤ. ဖဲပှၤလဲၤတၢ်ဖိတဂၤ ထံၣ်န့ၢ်ကဘီလၢအတူၢ်လိာ်အီၤအခါ အဝဲဘၣ်အိၣ်ခိးတၢ် ဖဲကဘီသန့ ဒီးအတၢ်ဘံၣ်တၢ်ဘိၣ် ဒီးအိၣ်ခိးကနၣ်ဝဲလၢ ကဘီကဟးထီၣ် အခါဖဲလဲၣ်န့ၣ်လီၤ.
ပှၤလၢအကွဲး တၢ်စံၣ်စိၤတဲစိၤ လဲနၢၤ ခဲစီ တဲဝဲလၢ “လၢဝ့ၢ်ရိမ့ၤန့ၣ် ပှၤမၤတၢ်မၤလၢအမ့ၢ် ပှၤဟးဃုန့ၢ် ကဘီလၢ ပှၤလဲၤတၢ်ဖိတဖၣ်အဂီၢ်အိၣ်ဝဲလီၤ. ပှၤလဲၤတၢ်ဖိတဖၣ် တလိၣ်ဟးဃုဝဲလၢ အနီၢ်ကစၢ်ဘၣ်. လၢထ့ဘၢၣ် ထံကျိန့ၣ်ကဘီသန့အိၣ်ဝဲလီၤ. ဝ့ၢ်အီ(စ်)တံၤယၤ န့ၣ်အိၣ်ဘူးဒီး ထ့ဘၢၣ်ထံကျိ ဒီးဖဲဝ့ၢ်အံၤန့ၣ် ကဘီသန့အရူ အိၣ်ဝဲအါမးလီၤ. ဖဲန့ၣ်န့ၣ် ကဘီလၢအလဲၤဆူ နၤဘိၣ် [ခဲအံၤ ကီၢ်ဖြၣ်စ့ၣ်] ကဘီသန့, ကဘီလၢအလဲၤဆူ ခါသ့ၤ [ခဲအံၤ ထူၣ်န့ၣ်စံၤယၤ] ကဘီသန့, ဒီးကဘီသန့အဂၤတဖၣ်အိၣ်ဝဲလီၤ. ပှၤလၢအဲၣ်ဒိးလဲၤတၢ်လၢ ကဘီတဖၣ်န့ၣ် လဲၤလၢကဘီသန့အရူ ဒီးဃုသ့ၣ်ညါတၢ် ဘၣ်ဃးဒီး ကဘီကလဲၤပတုာ်လၢ တၢ်လီၢ်ဖဲလဲၣ် သ့ဝဲလီၤ.”
ပှၤမ့ၢ်လဲၤတၢ်လၢကဘီန့ၣ် တၢ်ဆၢကတီၢ်လၢာ်စှၤလီၤ ဘၣ်ဆၣ် တၢ်ဘၣ်ယိၣ်အိၣ်အါမးလီၤ. ဖဲစီၤပီလူး လဲၤတၢ်လၢ မံးၡ့ၣ်နရ့ၣ်အခါ ကဘီဟးဂီၤ တဘျုးဘျီညါလီၤ.—၂ ကရံၣ်သူး ၁၁:၂၅.