လိၣ်နကမၤလိကစၢ်ယွၤအဂ့ၢ်

နကကဲထီၣ်ယွၤအတံၤသကိးအဂီၢ် လိၣ်နကမၤလိအဂ့ၢ်န့ၣ်လီၤ. နတံၤသကိးတဖၣ်​ သ့ၣ်ညါနမံၤဒီး သူဝဲစ့ၢ်ကီးဧါ? သူဝဲသ့ၣ်လီၤ. ကစၢ်ယွၤအဲၣ်ဒိးလၢ နကသ့ၣ်ညါအမံၤ, ဒီးသူအမံၤစ့ၢ်ကီး­န့ၣ်လီၤ. ယွၤအမံၤမ့ၢ် ယဟိဝၤန့ၣ်လီၤ. (စံးထီၣ်ပတြၢၤ ၈၃:၁၈; ­မးသဲ ၆:၉) နကဘၣ်သ့ၣ်ညါစ့ၢ်ကီး တၢ်လၢအအဲၣ်ဝဲဒီး တၢ်လၢတအဲၣ်ဝဲန့ၣ်လီၤ. နကဘၣ်သ့ၣ်ညါ မတၤမ့ၢ်အတံၤသကိးတဖၣ်​ ဒီးမတၤမ့ၢ်အဒုၣ်အဒါတဖၣ်လဲၣ်န့ၣ်လီၤ. လၢပကသ့ၣ်ညါပှၤတဂၤ ဂၤအဂီၢ် တၢ်ဆၢ­ကတီၢ်ကလိၣ်ဝဲန့ၣ်လီၤ. လံာ်စီဆှံစံးဝဲဒၣ်​ ပမ့ၢ်ပာ်လီၤဆီတၢ်ဆၢကတီၢ် လၢပကမၤလိယဟိဝၤအဂ့ၢ်အဂီၢ်န့ၣ်​ ပအိၣ်ဒီးတၢ်ကူၣ်ဘၣ်ကူၣ်သ့လီၤ.​—အ့းဖ့းစူး ၅:​၁၅, ၁၆.

ယွၤအတံၤသကိးတဖၣ်န့ၣ်​ မၤတၢ်ဘၣ်ကစၢ်အသးန့ၣ်လီၤ. ကွၢ်ဆိကမိၣ်​ နတံၤသကိးတဖၣ်အဂ့ၢ်တက့ၢ်. နမ့ၢ်တရ့လိာ်နသးဒီးအဝဲသ့ၣ်ဂ့ၤဂ့ၤဘၣ်ဘၣ်​ ဒီးမ့ၢ်မၤတၢ်လၢအဝဲသ့ၣ်သးဟ့သၢပျၢၤ, အဝဲသ့ၣ်ဘၣ်ကအိၣ်ကျၢၤဒီးနၤဧါ? တမ့ၢ်ကအိၣ်ကျၢၤဘၣ်. ဒ်န့ၣ်အသိး, နမ့ၢ်သးအိၣ်ကဲယွၤအတံၤသကိးန့ၣ်​ လိၣ်နကမၤတၢ်ဘၣ်ယွၤအသးန့ၣ်လီၤ.​—ယိၤဟၣ်​ ၄:၂၄.

တမ့ၢ်တၢ်ဘူၣ်တၢ်ဘါခဲလၢာ် ဒုးကဲထီၣ်​ တၢ်ရ့လိာ်မုာ်လိာ်သးဒီးယွၤဘၣ်. ယွၤအတံၤသကိးအဘူးကတၢၢ်ယ့ၣ်ၡူး စံးတ့ၢ်ဝဲဒၣ်​ ကျဲခံဘိအဂ့ၢ်န့ၣ်လီၤ. ကျဲတဘိန့ၣ်​ လဲၢ်ဝဲဒီးပှဲၤမးဒီးပှၤကညီန့ၣ်လီၤ. ကျဲအံၤပညိၣ်အခိၣ်ဆူတၢ်ဟးဂီၤလီၤ. ကျဲလၢခံတဘိန့ၣ်​ အံၣ်ဝဲဒီး ပှၤလဲၤတၢ်က့ၤတၢ်လၢအပူၤ အိၣ်စှၤကိာ်ဖိလီၤ. ကျဲအဝဲန့ၣ်​ ဆှၢပှၤဆူ တၢ်မူအထူအယိာ်လီၤ. သးအိၣ်စံးဝဲဒၣ်လၢ နမ့ၤသးအိၣ်ကဲယွၤအတံၤသကိးန့ၣ်​ နကဘၣ်မၤလိ တၢ်ဘူၣ်ထီၣ်ဘါထီၣ်ယွၤ တၢ်ဘျၢအမ့ၢ်အတီန့ၣ်လီၤ.​—မးသဲ ၇:​၁၃, ၁၄.