တၢ်မၤလိ ၁၇
ဒ်သိးတၢ်ရ့လိာ်မုာ်လိာ်ကဂၢၢ်ကျၢၤအဂီၢ် နကဘၣ်မ့ၢ်တံၤသကိးတဂၤ
တၢ်ကဲတံၤသကိးစံးတၢ်န့ၣ် အိၣ်သန့ၤအသးလၢ တၢ်အဲၣ်အဖီခိၣ်န့ၣ်လီၤ. နတၢ်သ့ၣ်ညါယဟိဝၤအဂ့ၢ် မ့ၢ်ဒံးယံာ်ဒံးအါဒီး နတၢ်အဲၣ်အီၤ ဒံးယံာ်ဒံးအါန့ၣ်လီၤ. နတၢ်အဲၣ်ယွၤမ့ၢ်ဟဲအါထီၣ်ဒီး နတၢ်သးအိၣ်မၤအတၢ်မၤစ့ၢ်ကီး ကအါထီၣ်ဝဲဒၣ်န့ၣ်လီၤ. တၢ်န့ၣ် ကထိၣ်ဟူးနသး ဒ်နကကဲထီၣ် ယ့ၣ်ၡူးခရံာ်အပျဲၢ်တဂၤန့ၣ်လီၤ. (မးသဲ ၂၈:၁၉) နမ့ၢ်ရ့လိာ်မၤသကိးတၢ်ဒီး ယဟိဝၤအပှၤအုၣ်အသးတဖၣ်အဟံၣ်ဖိဃီဖိ လၢအအိၣ်ဒီးတၢ်သူၣ်ခုသးခုန့ၣ် နကကဲထီၣ်ဘၣ်ယွၤအတံၤသကိး လီၤထူလီၤယိာ်လီၤ. ကကဲထီၣ်ဒ်န့ၣ်အဂီၢ် နကဘၣ်မၤနဲမနုၤလဲၣ်?
နကဘၣ်ပာ်ဖျါထီၣ်နတၢ်အဲၣ်ယွၤ ခီဖျိလၢတၢ်တိၢ်န့ၢ်အတၢ်သိၣ်တၢ်သီတဖၣ်န့ၣ်လီၤ. “တၢ်အဲၣ်ယွၤမ့ၢ်အအံၤ, လၢပတိၢ်န့ၢ်အတၢ်မၤလိာ်လီၤ. ဒီးအတၢ်မၤလိာ်န့ၣ် တကီတခဲဘၣ်လီၤ.”—၁ ယိၤဟၣ် ၅:၃.
မၤထွဲတၢ်လၢနသ့ၣ်ညါတဖၣ်န့ၣ်တက့ၢ်. ယ့ၣ်ၡူးပာ်ဖျါထီၣ်ဝဲတၢ်ဂ့ၢ်အံၤ ခီဖျိလၢတၢ်ကတိၤဒိတခါန့ၣ်လီၤ. ပှၤကူၣ်ဘၣ်ကူၣ်သ့တဂၤန့ၣ် သူၣ်လီၤအဟံၣ်လၢ လၢၢ်အဖီခိၣ်လီၤ. မ့မ့ၢ်ပှၤအမၢးတဂၤသူၣ်လီၤအဟံၣ်လၢ မဲးခိၣ်န့ၣ်လီၤ. ဖဲကလံၤ မုၢ်ဖးဒိၣ်လီၤအခါ ဟံၣ်လၢအဘၣ်တၢ်သူၣ်အီၤလၢ လၢၢ်အဖီခိၣ်န့ၣ်တလီၤပှီၢ်ဘၣ်. မ့မ့ၢ်ဟံၣ်လၢအဘၣ်တၢ်သူၣ်လီၤအီၤလၢမဲးဖီခိၣ်န့ၣ် ဟးဂီၤဝဲဒိၣ်ဒိၣ်ကလဲာ်လီၤ. ယ့ၣ်ၡူးစံးဝဲဒၣ် ပှၤလၢအနၢ်ဟူအတၢ်သိၣ်ဒီးမၤထွဲဝဲတဖၣ် လီၤဂာ်ဒ်ပှၤကူၣ်ဘၣ်ကူၣ်သ့ လၢအသူၣ်ဟံၣ်လၢလၢၢ်အဖီခိၣ်န့ၣ်လီၤ. ဘၣ်ဆၣ်, ပှၤလၢအနၢ်ဟူ ယ့ၣ်ၡူးအတၢ်သိၣ်ဒီးတမၤထွဲဝဲတဖၣ် လီၤဂာ်ဒ်ပှၤအမၢး လၢအသူၣ်ဟံၣ်လၢမဲးအဖီခိၣ်န့ၣ်လီၤ. နၤအံၤ နအဲၣ်ဒိးလီၤဂာ်ဒ်မတၤလဲၣ်?—မးသဲ ၇:၂၄-၂၇.
တၢ်ဟ့ၣ်လုၢ်ထီၣ်သး. စံးတၢ်န့ၣ်မ့ၢ်နတဲယဟိဝၤလၢ နသးအိၣ်မၤတၢ်ဘၣ်အသးလီၤစိၤ ခီဖျိလၢတၢ်ထုကဖၣ်န့ၣ်လီၤ. နမ့မၤတၢ်ဘၣ်ယွၤအသးန့ၣ် မ့ၢ်နပာ်ဖျါထီၣ်နသးလၢ နမ့ၢ်ယ့ၣ်ၡူးခရံာ်အပျဲၢ်တဂၤလီၤ.—မးသဲ ၁၁:၂၉.
တၢ်ဒိးဘျၢသးလၢထံ. “ဒိးဘျၢနသးလၢထံ ဒီးပျဲနတၢ်ဒဲးဘးဘၣ်တၢ်သ့စီကွံာ်အီၤ ခီဖျိနကိးထီၣ်အမံၤ န့ၣ်တက့ၢ်.”—မၤတၢ် ၂၂:၁၆, ခ့ခါစှီၤကျိာ်.
မၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်တက့ၢ်. ‘ကယဲၢ်သုမၤ တၢ်တမံၤလၢ်လၢ်န့ၣ် မၤလၢသူၣ်ကံၢ်သးလဲ ဒ်လၢကစၢ်အဂီၢ်အသိး, ဒီးတမ့ၢ်ဘၣ်ဒ်လၢ ပှၤကညီအဂီၢ်အသိးဘၣ်တက့ၢ်.’—ကလီးစဲ ၃:၂၃.