အိၣ်မူဒ် ခရံာ်ဖိအသိး
နာ်သပှၢ်တၢၢ်လၢ ဖဲတၢ်အကတၢၢ်ဟဲတုၤအခါ နကပူၤဖျဲး
တယံာ်လၢၤဘၣ်န့ၣ် ယဟိဝၤယွၤ တဝံသးစူၤဝဲ မုၣ်ကီၤလံၢ်အတၢ်ပၢတၢ်ပြးလၢၤဘၣ်. ယဟိဝၤယွၤ ကမၤဟးဂီၤကွံာ်ဝဲ တၢ်ဘူၣ်တၢ်ဘါလၢအကမၣ်. ဒီးထံကီၢ်လၢ အပာ်ဖှိၣ်ထီၣ်အသးလၢ ကထီဒါဝဲ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ယဟိဝၤယွၤ ကမၤဟးဂီၤကွံာ်အဝဲသ့ၣ်ဖဲ အၢ်မက့းဒိၣ်. ခရံာ်ဖိသ့ၣ်တဖၣ် ခိးကွၢ်လၢ်ဝဲ တၢ်ဆၢကတီၢ်အဝဲန့ၣ်လီၤ.
ဘၣ်ဃးဒီး တၢ်နးတၢ်ဖှီၣ်ဖးဒိၣ်အဂ့ၢ်န့ၣ် ပတသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲးခဲလၢာ်ဘၣ်. အဒိ ဒ်သိးဒီး တၢ်နးတၢ်ဖှီၣ်ဖးဒိၣ် ကစးထီၣ်အခါဖဲလဲၣ် ပတသ့ၣ်ညါဘၣ် ဒီးထံကီၢ်ပဒိၣ်ပပှၢ်တဖၣ် အဝဲသ့ၣ် ကမၤဟးဂီၤကွံာ်ဝဲ တၢ်ဘူၣ်တၢ်ဘါတဖၣ်လၢ တၢ်ဂ့ၢ်မနုၤအဃိလဲၣ်န့ၣ် ပတသ့ၣ်ညါဘၣ်. ဒီးပှၤကလုာ်တဖၣ် ကဒုးဝဲ ကစၢ်ယွၤအပှၤဂီၢ်မုၢ်ယံာ်ထဲလဲၣ် ဒီးကဒုးဝဲဒ်လဲၣ်န့ၣ် ပတသ့ၣ်ညါဘၣ်. ဒီးလၢအၢ်မက့းဒိၣ် ခဲကၢာ်န့ၣ် ကစၢ်ယွၤကစံၣ်ညီၣ်ဝဲ ပှၤအၢပှၤသီတဖၣ်လၢ တၢ်မနုၤလဲၣ်န့ၣ် ပတသ့ၣ်ညါလီၤတံၢ်စ့ၢ်ကီးဘၣ်.
ဘၣ်ဆၣ် ခါဆူညါ တၢ်ကမၤအသးဒ်လဲၣ်န့ၣ် ဒ်သိးပကသ့ၣ်ညါ ဒီးပလဲၤခီဖျိ တၢ်နးတၢ်ဖှီၣ်ဖးဒိၣ်ကန့ၢ်အဂီၢ် ယဟိဝၤယွၤ ဟ့ၣ်ပှၤလံာ်စီဆှံအဆၢလၢ ပလိၣ်ဘၣ်တဖၣ်. အဒိ ပသ့ၣ်ညါဘၣ်လၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်အပူၤ.” (၂ တံၤ ၃:၁) ဒီးဖဲပဒိၣ်ပပှၢ်တဖၣ် မၤဟးဂီၤဝဲ တၢ်ဘူၣ်တၢ်ဘါ လၢအကမၣ်တဖၣ်အခါ ဒ်သိးတၢ်ဘူၣ်တၢ်ဘါ လၢအမ့ၢ်အတီ သုတဟးဂီၤတဂ့ၤအဂီၢ် ယဟိဝၤယွၤ က “မၤလီၤစှၤ” မုၢ်နံၤမုၢ်သီ. (မး ၂၄:၂၂) ဒီးပသ့ၣ်ညါလၢ ယဟိဝၤယွၤ ကမၤပူၤဖျဲး ပှၤလၢဘူၣ်ထီၣ်ဘါထီၣ်အီၤ. (၂ ပ့း ၂:၉) ဒီးပသ့ၣ်ညါစ့ၢ်ကီးလၢ ယဟိဝၤယွၤ ဃုထၢထီၣ်ဝဲ ပှၤတီပှၤလိၤ ဒီးပှၤလၢအစိကမီၤဒိၣ်တဖၣ်လၢ ကမၤပူၤဖျဲးဝဲ ပှၤဂီၢ်မုၢ်ဖးဒိၣ်လၢ အၢ်မက့းဒိၣ် ဒီးကစံၣ်ညီၣ်ဝဲ ပှၤအၢပှၤသီတဖၣ်.—လီၣ် ၁၉:၁၁, ၁၅, ၁၆.
တၢ်လၢကမၤအသးလၢ ခါဆူညါတဖၣ်န့ၣ် ပှၤဟီၣ်ခိၣ်ဖိတဖၣ် က “ဘၣ်ယိၣ်တၢ်” နီၢ်ကီၢ်လီၤ. ဘၣ်ဆၣ် ပမ့ၢ်ဖး ဒီးဆိကမိၣ်ထံဘၣ်ဃး လၢအပူၤကွံာ်ကစၢ်ယွၤ မၤပူၤဖျဲး အပှၤဂီၢ်မုၢ်တဖၣ်ဒ်လဲၣ် ဒီးပမ့ၢ်ဆိကမိၣ်ထံဘၣ်ဃးဒီး ယဟိဝၤယွၤ ပာ်ဖျါထီၣ်န့ၢ်ပှၤ တၢ်ကမၤအသး ခါဆူညါအဂ့ၢ်န့ၣ် ပ ‘ဆၢထၢၣ်ဘျၢဘျၢ ဒီးမိာ်ထီၣ် ပခိၣ်’ ဘူၣ်ဝဲ ဒီးပကနာ်သပှၢ်တၢၢ်လၢ ပတၢ်အုၣ်က့ၤခီၣ်က့ၤအမုၢ်နံၤ ဘူးထီၣ်လံ.—လူၤ ၂၁:၂၆, ၂၈.