တၢ်မၤလိ ၂၆
တၢ်အဲၣ်န့ၣ် မၤစၢၤပှၤလၢ ပမၤလီၤမၢ်ကွံာ် တၢ်ပျံၤတၢ်ဖုးသ့ဒ်လဲၣ်
“ယွၤအိၣ်လၢ ယအိၣ်တခီလီၤ. ပှၤကညီကမၤယၤ ဒ်လဲၣ်ဒ်လဲၣ်န့ၣ် ယတဘၣ်ယိၣ်ဘၣ်.” —စံးထီၣ်ပတြၢၤ ၁၁၈:၆.
တၢ်သးဝံၣ် ၁၀၅ “ယွၤမ့ၢ်တၢ်အဲၣ်တၢ်ကွံ”
တၢ်မၤလိအံၤ အတၢ်တိာ်ပာ်a
၁. ပှၤတနီၤပျံၤဝဲ တၢ်မနုၤလဲၣ်.
ပကကွၢ်သကိး ဒီပုၢ်ဝဲၢ်မုၣ်ခွါတနီၤ အတၢ်လဲၤခီဖျိ. ဒီပုၢ်ဝဲၢ်ခွါနဲၣ်စတၢၤ ဒီးအမါမရံယၤန့ၣ် အဝဲသ့ၣ်အဲၣ်ဒိး လဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိ.b ဒ်သိးအဝဲသ့ၣ် ကမၤဝဲဒ်န့ၣ်အဂီၢ် အဝဲသ့ၣ် ကဘၣ်သူစှၤလီၤကျိၣ်စ့. ဘၣ်ဆၣ် အဝဲသ့ၣ်ဘၣ်ယိၣ်ဝဲလၢ အဝဲသ့ၣ်မ့ၢ်သူစှၤလီၤ ကျိၣ်စ့န့ၣ် မ့ၢ်အဝဲသ့ၣ် ကသးခုဒံးဧါ. မ့မ့ၢ် ဒီပုၢ်ဝဲၢ်ခွါဘ့နံၤယၢၤန့ၣ် အဝဲအိၣ်ဘၣ်လၢ ထံကီၢ်လၢ ပှၤတြီဃာ် ပတၢ်စံၣ်တဲၤတဲလီၤ တၢ်ဖံးတၢ်မၤ. အဃိ ဖဲအဝဲကဲထီၣ် ယဟိဝၤပှၤအုၣ်အသးအခါန့ၣ် အဝဲသ့ၣ်ညါဝဲလၢ ဘၣ်သ့ၣ်သ့ၣ်န့ၣ် ပှၤကမၤအၢမၤနးအီၤ. အဃိန့ၣ် အဝဲပျံၤတၢ်ဒိၣ်မး. ဘၣ်ဆၣ် တၢ်လၢအပျံၤဝဲ အဒိၣ်ကတၢၢ်တခါန့ၣ် မ့ၢ်ဝဲအဟံၣ်ဖိဃီဖိ မ့ၢ်သ့ၣ်ညါလၢ အကဲထီၣ် ယဟိဝၤပှၤအုၣ်အသးန့ၣ် အဘၣ်ယိၣ်ဝဲလၢ အဝဲသ့ၣ်တရ့ဒီးအီၤ ဂ့ၤဂ့ၤလၢၤဘၣ်. မ့မ့ၢ် ဒီပုၢ်ဝဲၢ်မုၣ်ဘဲလရံၤန့ၣ် အဘၣ်ခဲစၢၣ်တၢ်ဆါ နးမး. ဒီးအဝဲတသွီ တၢ်သွံၣ်ဘၣ်အဃိ အကဃု ကသံၣ်သရၣ်လၢ အကဖွဲးအသးအဂီၢ် ကီဒိၣ်မး. တကးဒံးဘၣ် အဝဲပျံၤစ့ၢ်ကီးလၢ အကသံ.
၂. ဘၣ်မနုၤအဃိ ပကဘၣ်မၤလီၤမၢ်ကွံာ် ပတၢ်ပျံၤတၢ်ဖုးလဲၣ်.
၂ မ့ၢ်နထံၣ်ဘၣ်ဒီး တၢ်ပျံၤတၢ်ဖုး ဒ်သိးဒီး ပဒီပုၢ်ဝဲၢ်မုၣ်ခွါလၢ ပပာ်ဖျါထီၣ်အီၤ ဖဲမကၢာ်အသိး တဘျီဘျီဧါ. ပဝဲအါဂၤ ပထံၣ်ဘၣ်ဒီး တၢ်ပျံၤတၢ်ဖုး ဒ်သိးဒီးအဝဲသ့ၣ်. ဘၣ်ဆၣ် ပမ့ၢ်တမၤလီၤမၢ်ကွံာ် ပတၢ်ပျံၤတၢ်ဖုးသ့ၣ်တဖၣ်ဘၣ်န့ၣ် ဘၣ်သ့ၣ်သ့ၣ် ပကဆၢတဲာ်ဘၣ် တၢ်လၢအကမၣ် လၢအကမၤဘၣ်ဒိ ပတၢ်ရ့လိာ်သးဒီး ယဟိဝၤယွၤ. မုၣ်ကီၤလံၢ်န့ၣ် အဲၣ်ဒိးဝဲလၢ ပကမၤဘၣ် တၢ်ဆၢတဲာ်လၢ အကမၣ်ဒ်န့ၣ်. အဝဲဂုာ်ကျဲးစၢး သူဝဲတၢ်လၢ ပပျံၤအီၤသ့ၣ်တဖၣ် ဒ်သိးဒီး ပသုတဒိကနၣ် ယဟိဝၤယွၤ တၢ်သိၣ်တၢ်သီတဖၣ် လၢၤတဂ့ၤအဂီၢ်. အဒိ မုၣ်ကီၤလံၢ် သူဝဲတၢ်ပျံၤပှၤကညီ ဒ်သိးဒီး ပတဟး စံၣ်တဲၤတဲလီၤတၢ် လၢၤတဂ့ၤအဂီၢ်. (လီၣ်ဖျါ ၁၂:၁၇) မုၣ်ကီၤလံၢ်န့ၣ် အသးက့ၣ်, အတၢ်သးကညီၤတအိၣ်ဘၣ် ဒီးအစိကမီၤဒိၣ်မး. ဘၣ်ဆၣ် နမၤနၢၤကွံာ်အီၤသ့. နမၤနၢၤအီၤ ကသ့ဒ်လဲၣ်.
၃. ဒ်သိး ပတၢ်ပျံၤတၢ်ဖုး ကလီၤမၢ်ကွံာ်အဂီၢ် ပကဘၣ်နာ် တၢ်မနုၤလဲၣ်.
၃ ပမ့ၢ်နာ်နီၢ်ကီၢ်လၢ ယဟိဝၤယွၤအဲၣ်ပှၤဒီး အိၣ်လၢပအိၣ်တခီန့ၣ် မုၣ်ကီၤလံၢ် မၤပျံၤပှၤတန့ၢ်ဘၣ်. (စံးထီၣ်ပတြၢၤ ၁၁၈:၆) အဒိ ဆိကမိၣ်ကွၢ် ပှၤကွဲးထါစံးထီၣ်ပတြၢၤ အဆၢဒိၣ် ၁၁၈ တဂၤအတၢ်အိၣ်သး. အဝဲထံၣ်ဘၣ်ဒီး တၢ်အိၣ်သးလၢ အကီအခဲအါမး. ပှၤလၢအထီဒါအီၤန့ၣ် အိၣ်ဒီဒူၣ်, လၢာ်ဃုာ်ဒီး ပှၤလၢအအိၣ်ဒီး အလီၢ်အလၤ လၢအပတီၢ်ထီတဖၣ် (အဆၢဖိ ၉, ၁၀). တဘျီတခီၣ်န့ၣ် ပှၤဆီၣ်သနံးအီၤနးမး (အဆၢဖိ ၁၃). တကးဒံးဘၣ် ယဟိဝၤယွၤ သိၣ်က့ၤသီက့ၤအီၤဆူၣ်ဆူၣ် (အဆၢဖိ ၁၈). ဘၣ်ဆၣ် အဝဲသးဝံၣ်ဝဲလၢ “ယတပျံၤတၢ်ဘၣ်.” ဘၣ်မနုၤအဃိ အဝဲတပျံၤတၢ်ဘၣ်လဲၣ်. အဝဲသ့ၣ်ညါဝဲလၢ ကစၢ်ယဟိဝၤယွၤ သိၣ်က့ၤသီက့ၤအီၤ သနာ်က့ ကစၢ်ယဟိဝၤယွၤ အဲၣ်အီၤဒံး. အဝဲနာ်ဝဲလၢ အမ့ၢ်ထံၣ်ဘၣ်ဒီး တၢ်အိၣ်သးဒ်လဲၣ်ဂ့ၤ ဒ်လဲၣ်ဂ့ၤ ကစၢ်ယွၤအဲၣ်အီၤဒီး ကမၤစၢၤအီၤထီဘိ.—စံးထီၣ်ပတြၢၤ ၁၁၈:၂၉.
၄. ပမ့ၢ်နာ်လၢ ကစၢ်ယွၤအဲၣ်ပှၤန့ၣ် ပတပျံၤ တၢ်မနုၤလၢၤဘၣ်လဲၣ်.
၄ ပကဘၣ်နာ်လၢ ယဟိဝၤယွၤအဲၣ်ပှၤ. ပမ့ၢ်နာ်လၢ ယဟိဝၤယွၤအဲၣ်ပှၤန့ၣ် ပကမၤလီၤမၢ်ကွံာ် ပတၢ်ပျံၤတၢ်ဖုး သၢခါလၢအမ့ၢ် (၁) ပဘၣ်ယိၣ်လၢ ပလုၢ်အီၣ်လုၢ်အီ ပဟံၣ်ဖိဃီဖိတန့ၢ်ဘၣ်. (၂) တၢ်ပျံၤပှၤကညီ ဒီး (၃) တၢ်ပျံၤတၢ်သံ. ပဒီပုၢ်ဝဲၢ်မုၣ်ခွါလၢ ပပာ်ဖျါထီၣ်အီၤလၢ လံာ်အဆိကတၢၢ်တဆၢန့ၣ် အဝဲသ့ၣ်နာ်ဝဲလၢ ကစၢ်ယွၤအဲၣ်အဝဲသ့ၣ်အဃိ အဝဲသ့ၣ်မၤလီၤမၢ်ကွံာ် အတၢ်ပျံၤတၢ်ဖုးန့ၢ်ဝဲ.
ပဘၣ်ယိၣ်လၢ ပလုၢ်အီၣ်လုၢ်အီ ပဟံၣ်ဖိဃီဖိတန့ၢ်ဘၣ်
ဒီပုၢ်ဝဲၢ်ခွါတဂၤ အဖိခွါအိၣ်လၢ အခီၣ်ထံး, အဝဲသ့ၣ်မၤအီၣ်ညၣ်လၢ ကလုၢ်အီၣ် အဟံၣ်ဖိဃီဖိအဂီၢ် (ကွၢ်လံာ်အဆၢ ၅)
၅. ဟံၣ်ခိၣ်တဂၤန့ၣ် ကဘၣ်ယိၣ်တၢ်လၢ အဟံၣ်ဖိဃီဖိအဂီၢ်ဒ်လဲၣ်. (ကွၢ်တၢ်ဂီၤ လၢလံာ်ကုခိၣ်.)
၅ ခရံာ်ဖိလၢ အကဲဟံၣ်ခိၣ်တဂၤန့ၣ် အဝဲအိၣ်ဒီး မူဒါဖးဒိၣ်တခါလၢ ကဘၣ်လုၢ်အီၣ်လုၢ်အီ အဟံၣ်ဖိဃီဖိ. (၁ တံၤမသ့း ၅:၈) အဃိ နမ့မ့ၢ်ဟံၣ်ခိၣ်န့ၣ် ဖဲတၢ်ဆါလီၤအခါ ဘၣ်သ့ၣ်သ့ၣ် နကဘၣ်ယိၣ်လၢ နတၢ်မၤတအိၣ်လၢၤဘၣ်. ဒီးဘၣ်သ့ၣ်သ့ၣ် နကဘၣ်ယိၣ်စ့ၢ်ကီးလၢ နဟ့ၣ်ဟံၣ်လဲတန့ၢ်ဘၣ် ဒီးနပှ့ၤတၢ်အီၣ်တၢ်အီလၢ နဟံၣ်ဖိဃီဖိအဂီၢ် တန့ၢ်ဘၣ်. တကးဒံးဘၣ် နကဘၣ်ယိၣ်လၢ နတၢ်မၤမ့ၢ်တအိၣ်လၢၤဘၣ်န့ၣ် နဃုတၢ်မၤလၢအသီ တဘၣ်လၢၤဘၣ်. မ့တမ့ၢ်ဘၣ်န့ၣ် နကဘၣ်ယိၣ်တၢ်ဒ်သိးဒီး ဒီပုၢ်ဝဲၢ်ခွါနဲၣ်စတၢၤ ဒီးအမါမရံယၤ လၢပပာ်ဖျါထီၣ်လၢ လံာ်အဆၢလၢ အခီၣ်ထံးအသိး. နကဆိကမိၣ်ဘၣ်လၢ နစ့မ့ၢ်တအိၣ်အါအါလၢၤဘၣ်န့ၣ် နတၢ်အိၣ်မူတမုာ် ဒ်သိးဒီးလၢညါလၢၤဘၣ်. ပှၤအါဂၤန့ၣ် ဘၣ်ယိၣ်ဝဲဒ်န့ၣ်အဃိ မုၣ်ကီၤလံၢ် မၤပတုာ်အဝဲသ့ၣ်လၢ အဝဲသ့ၣ် တမၤကစၢ်ယွၤ အတၢ်မၤလၢၤတဂ့ၤအဂီၢ်န့ၣ် န့ၢ်ဝဲ.
၆. မုၣ်ကီၤလံၢ် အဲၣ်ဒိးလၢ ပကနာ်တၢ်မနုၤလဲၣ်.
၆ မုၣ်ကီၤလံၢ် အဲၣ်ဒိးလၢ ပကနာ်လၢ ယဟိဝၤယွၤ တအဲၣ်ပှၤဘၣ် ဒီးတမၤစၢၤပှၤလၢ ပကလုၢ်အီၣ်လုၢ်အီ ပဟံၣ်ဖိဃီဖိအဂီၢ်ဘၣ်. အဃိ ဘၣ်သ့ၣ်သ့ၣ် ပကဆိကမိၣ်ဘၣ်လၢ ဒ်သိးပတၢ်မၤကအိၣ်ထီဘိအဂီၢ် ပကဘၣ်မၤတၢ်ကိးမံၤဒဲးလၢ ပမၤအီၤသ့. ပကဆိကမိၣ်ဘၣ်လၢ တၢ်လၢပမၤအီၤတဖၣ် မ့ၢ်ထီဒါလိာ်အသးဒီး ကစၢ်ယွၤအတၢ်သိၣ်တၢ်သီ သနာ်က့ ပမၤအီၤသ့.
၇. ဘၣ်ဃးဒီး ယဟိဝၤယွၤန့ၣ် ယ့ၣ်ၡူးသိၣ်လိပှၤ တၢ်မနုၤလဲၣ်.
၇ ယ့ၣ်ၡူးသ့ၣ်ညါ အပၢ်အဂ့ၢ် ဂ့ၤန့ၢ်ဒံး ပှၤကိးဂၤဒဲး. ဘၣ်တဘျီ အတဲဝဲလၢ “တချုးလၢ သုဃ့တၢ်ဒံးဘၣ်န့ၣ် သုပၢ်အိၣ်လၢမူခိၣ်န့ၣ် သ့ၣ်ညါပာ်စၢၤဝဲ တၢ်လၢ သုလိၣ်ဘၣ်တဖၣ်.” (မးသဲ ၆:၈) အဃိ ယ့ၣ်ၡူးသ့ၣ်ညါဝဲလၢ ယဟိဝၤယွၤ ကဟ့ၣ်ပှၤတၢ်လၢ ပလိၣ်ဘၣ်သ့ၣ်တဖၣ်ကိးမံၤဒဲး. ပဝဲ ခရံာ်ဖိသ့ၣ်တဖၣ်န့ၣ် ပကဲကစၢ်ယွၤ အဟံၣ်ဖိဃီဖိ. မ့မ့ၢ် ယဟိဝၤယွၤန့ၣ် အကဲပဟံၣ်ခိၣ်. အဃိ ပနာ်သ့သပှၢ်တၢၢ်လၢ အဝဲကမၤလၢပှဲၤ အမူဒါ ဒ် ၁ တံၤမသ့း ၅:၈ တဲဝဲအသိး.
ယဟိဝၤယွၤ ကဟ့ၣ်ပှၤ တၢ်လၢပလိၣ်ဘၣ်တဖၣ်. အဝဲကသူ ဒီပုၢ်ဝဲၢ်မုၣ်ခွါတဖၣ်လၢ ကမၤစၢၤပှၤ. (ကွၢ်လံာ်အဆၢ ၈)d
၈. (က) ဒ်သိးပတဘၣ်ယိၣ်တၢ်လၢ ပကဘၣ်လုၢ်အီၣ်လုၢ်အီ ပဟံၣ်ဖိဃီဖိဒ်လဲၣ် တဂ့ၤအဂီၢ် ပကဘၣ်နာ် တၢ်မနုၤလဲၣ်. (မးသဲ ၆:၃၁-၃၃) (ခ) ဒ်တၢ်ဂီၤပူၤအသိး ပှၤဒီမိၢ်ဝၤခံဂၤလၢ လဲၤစိာ်ဒုးအီၣ်ဝဲ ဒီပုၢ်ဝဲၢ်မုၣ်တဂၤ အတၢ်အီၣ်န့ၣ် ပကွၢ်လိအဝဲသ့ၣ် ကသ့ဒ်လဲၣ်.
၈ ပမ့ၢ်နာ်လၢ ယဟိဝၤယွၤ အဲၣ်ပှၤဒီး အဲၣ်ပဟံၣ်ဖိဃီဖိန့ၣ် ပကနာ်နီၢ်ကီၢ်လၢ ပကအိၣ်ဒီးတၢ်လၢ ပလိၣ်ဘၣ်သ့ၣ်တဖၣ်. ယဟိဝၤယွၤန့ၣ် အိၣ်ဒီးတၢ်အဲၣ် ဒီးသးအိၣ်ဟ့ၣ်တၢ်အဃိ အဝဲအဲၣ်ဒိးဟ့ၣ်ပှၤ တၢ်လၢပလိၣ်ဘၣ်သ့ၣ်တဖၣ်. (ဖး မးသဲ ၆:၃၁-၃၃.) အဒိ, ဖဲအဝဲတ့လီၤ ဟီၣ်ခိၣ်ဖျၢၣ်အခါန့ၣ် အဝဲတတ့လီၤထဲ တၢ်လၢပလိၣ်ဘၣ်သ့ၣ်တဖၣ်ဘၣ်. အတ့လီၤစ့ၢ်ကီး တၢ်လၢအဂၤဒီဒူၣ် ဒ်သိးကမၤသးခုပသးအဂီၢ်. (၁ မိၤၡ့ ၂:၉) တၢ်လၢပလိၣ်ဘၣ်သ့ၣ်တဖၣ် မ့ၢ်အိၣ်ဒီးပှၤန့ၣ် ပကဘၣ်သ့ၣ်နီၣ်ထီၣ်လၢ တၢ်လၢအိၣ်ဒီးပှၤသ့ၣ်တဖၣ်အံၤန့ၣ် မ့ၢ်ဝဲယဟိဝၤယွၤ ဟ့ၣ်လီၤပှၤ. (မးသဲ ၆:၁၁) ဒီပုၢ်ဝဲၢ်ခွါနဲၣ်စတၢၤ ဒီးဒီပုၢ်ဝဲၢ်မုၣ်မရံယၤ ပပာ်ဖျါထီၣ်အဂ့ၢ်လၢ အခီၣ်ထံးန့ၣ် အဝဲသ့ၣ် သ့ၣ်ညါဘၣ်ဝဲလၢ ယဟိဝၤယွၤ ဟ့ၣ်ပှၤတၢ်အါန့ၢ်ဒံးတၢ်လၢ ပတူၢ်ၡူကွံာ်အီၤသ့ၣ်တဖၣ်. တကးဒံးဘၣ် ခါဆူၣ်ညါန့ၣ် အဝဲကဟ့ၣ်ပှၤ တၢ်မူအထူအယိာ်.—ယၡါယၤ ၆၅:၂၁, ၂၂.
၉. ဒီပုၢ်ဝဲၢ်ခွါနဲၣ်စတၢၤ ဒီးအမါမရံယၤ အအိၣ်န့ၣ် နမၤလိန့ၢ်ဘၣ် တၢ်မနုၤလဲၣ်.
၉ ဒီပုၢ်ဝဲၢ်ခွါနဲၣ်စတၢၤ ဒီးအမါမရံယၤ လၢအအိၣ်လၢ ကီၢ်ခိၣ်လီၣ်ဘံၣ်ယၣ်န့ၣ် အဝဲသ့ၣ်အိၣ်ဘၣ် ဘီၣ်ဘီၣ်ညီညီ. အဝဲသ့ၣ်တဲဝဲလၢ “ပဆိကမိၣ်လၢ ပကအိၣ်မူက့ၤယိယိဖိ ဒီးမၤအါထီၣ် တၢ်စံၣ်တဲၤတဲလီၤတၢ်မၤ. ဘၣ်ဆၣ် ပဘၣ်ယိၣ်လၢ ပမ့ၢ်သူစှၤလီၤကျိၣ်စ့န့ၣ် မ့ၢ်ပကသးခုဒံးဧါ.” ဒ်သိး အဝဲသ့ၣ်တဘၣ်ယိၣ်တၢ် လၢၤတဂ့ၤအဂီၢ်န့ၣ် အဝဲသ့ၣ်မၤဝဲဒ်လဲၣ်. အဝဲသ့ၣ် ဆိကမိၣ်ထံဘၣ်ဃးဒီး ယဟိဝၤယွၤ ပာ်ဖျါထီၣ်တၢ်အဲၣ်လၢ အဝဲသ့ၣ်ဖီခိၣ်. အဃိ အဝဲသ့ၣ်နာ်ဝဲလၢ ယဟိဝၤယွၤ ကကွၢ်ထွဲအဝဲသ့ၣ် ထီဘိ. လၢခံအဝဲသ့ၣ် ဟးထီၣ်ကွံာ်လၢ အတၢ်မၤလၢ အန့ၢ်ဘၣ်လါလဲဂ့ၤ ဒီးဆါကွံာ်ဝဲ အဟံၣ်. ဝံၤဘျီ အဝဲသ့ၣ် လဲၤသုးလီၢ်သုးကျဲလၢ တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိ. အဝဲသ့ၣ် မၤဝဲဒ်န့ၣ်အဃိန့ၣ် အဝဲသ့ၣ်သးခုကၠ့ၤဧါ. ဒီပုၢ်ဝဲၢ်ခွါ နဲၣ်စတၢၤ တဲဝဲလၢ “တၢ်ကတိၤဖဲ မးသဲ ၆:၃၃ န့ၣ်ဘၣ်နီၢ်ကီၢ်လီၤ. တၢ်လၢပလိၣ်ဘၣ်လၢ နီၢ်ခိတခီန့ၣ် အိၣ်ဒီးပှၤကီးမံၤဒဲး. ခဲအံၤန့ၣ် ပသးခုအါန့ၢ်ဒံးလၢညါ.”
တၢ်ပျံၤပှၤကညီ
၁၀. ဘၣ်မနုၤအဃိ ပှၤကညီတဂၤဒီးတဂၤ ပျံၤလိာ်အသးလဲၣ်.
၁၀ စးထီၣ်လၢ နီၢ်အံၣ်အု ဒီးစီၤအၤဒၣ်အစိၤ တုၤလီၤလၢ ပစိၤခဲအံၤန့ၣ် ပှၤကညီသ့ၣ်တဖၣ် မၤအၢမၤသီလိာ်သး တဂၤဒီးတဂၤ. (စံၣ်တဲၤတဲလီၤတၢ် ၈:၉) အဒိ ပှၤကညီတဖၣ်န့ၣ် သူကမၣ် အတၢ်စိတၢ်ကမီၤ, မၤဆူၣ်မၤစိးပှၤဂၤ, မၤနၢၤအီၣ်အသကီးလၢကၠိ ဒီးမၤပျံၤမၤဖုး အဝဲသ့ၣ်. ဒီးမ့မ့ၢ် ပှၤတနီၤနီၤ မၤနၢၤအီၣ်ဃီၣ် အဟံၣ်ဖိဃီဖိ အၢအၢသီသီ. အဃိန့ၣ် ပှၤကညီပျံၤလိာ်အသး တဂၤဒီးတဂၤ. ဖဲမုၣ်ကီၤလံၢ် ထံၣ်ဝဲဒ်န့ၣ်အခါ အသူဝဲတၢ်ပျံၤပှၤကညီ ဒ်သိးဒီး ကမၤယံၤထီၣ်ပှၤဒီး ယဟိဝၤယွၤဒ်လဲၣ်.
၁၁-၁၂. မုၣ်ကီၤလံၢ်သူဝဲ တၢ်ပျံၤပှၤကညီဒ်လဲၣ်.
၁၁ မုၣ်ကီၤလံၢ်သူဝဲ တၢ်ပျံၤပှၤကညီ ဒ်သိး ပကပတုာ် စံၣ်တဲၤတဲလီၤတၢ် ဒီးပတမၤတၢ်လၢ ယဟိဝၤယွၤ မၢပမၤတဖၣ် လၢၤတဂ့ၤအဂီၢ်. အဒိ, ပဒိၣ်ပပှၢ်သ့ၣ်တဖၣ်န့ၣ် မုၣ်ကီၤလံၢ် အတၢ်ပာ်သးဒိၣ်စိ လၢအဝဲသ့ၣ်ဖီခိၣ်အဃိ အဝဲသ့ၣ်တဟ့ၣ်အခွဲးလၢ ပတစံၣ်တဲၤတဲလီၤတၢ်နီတစဲးဘၣ် ဒီးမၤအၢမၤနးပှၤ. (လူၤကၣ် ၂၁:၁၂; လီၣ်ဖျါ ၂:၁၀) ဟီၣ်ခိၣ်လၢ မုၣ်ကီၤလံၢ်ပၢဝဲအံၤန့ၣ် ပှၤအါဂၤရၤလီၤဝဲ တၢ်ကစီၣ်လၢ အတမ့ၢ်တတီဘၣ် ဒီးတဲဟးဂီၤ ဘၣ်ဃးဒီး ယဟိဝၤပှၤအုၣ်အသးအဂ့ၢ်. အဃိ ပှၤလၢအနာ် တၢ်လံၣ်တၢ်လီတဖၣ်န့ၣ် အဝဲသ့ၣ်ထီဒါပှၤ, မၤဆဲးအဲးပှၤ ဒီးမၤဒၢၣ်မၤဆါပှၤ. (မးသဲ ၁၀:၃၆) မုၣ်ကီၤလံၢ်သူဝဲ တၢ်မၤအၢမၤနးတဖၣ်အံၤန့ၣ် တမ့ၢ်တၢ်အသီလၢ ပဂီၢ်ဘၣ်. ပထံၣ်ဘၣ်လၢ မုၣ်ကီၤလံၢ် သူဝဲတၢ်သ့ၣ်တဖၣ်အံၤန့ၣ် လၢခရံာ်ဖိလၢ တၢ်မၢဖိအစိၤလံ.—မၤတၢ် ၅:၂၇, ၂၈, ၄၀.
ပဟံၣ်ဖိဃီဖိ မ့ၢ်ထီဒါပှၤဘၣ်ဆၣ် ပနာ်သ့သပှၢ်ကတၢၢ်လၢ ယဟိဝၤယွၤအဲၣ်ပှၤ (ကွၢ်လံာ်အဆၢ ၁၂-၁၄)e
၁၂ မုၣ်ကီၤလံၢ်န့ၣ် တသူဝဲထဲ ပဒိၣ်ပပှၢ်တဖၣ် ကထီဒါပှၤဒ်သိး ပကပျံၤတၢ်အဂီၢ်ဘၣ်. အသူဝဲကျဲ လၢအဂၤအိၣ်ဒံး. ပှၤတနီၤန့ၣ် ခီဖျိလၢအကဲထီၣ် ယဟိဝၤပှၤအုၣ်အသးအဃိ အဝဲသ့ၣ်တပျံၤဝဲလၢ ကထံၣ်ဘၣ်တၢ်မၤအၢမၤနးဘၣ်. သနာ်က့ အဝဲသ့ၣ်ဘၣ်ယိၣ်ဝဲဒိၣ်မးလၢ အဟံၣ်ဖိဃီဖိ တရ့ဒီးအီၤဂ့ၤဂ့ၤ ဒ်သိးဒီးလၢညါလၢၤဘၣ်. အဝဲသ့ၣ် အဲၣ်အဟံၣ်ဖိဃီဖိဒိၣ်မး ဒီးအဲၣ်ဒိးဝဲလၢ အဟံၣ်ဖိဃီဖိ ကသ့ၣ်ညါထီၣ် ယဟိဝၤယွၤ ဒီးအဲၣ်ယဟိဝၤယွၤ. အဃိ အဝဲသ့ၣ် အဟံၣ်ဖိဃီဖိ မ့ၢ်တဲအၢတဲသီ ယဟိဝၤယွၤ ဒီးဒီပုၢ်ဝဲၢ်မုၣ်ခွါတဖၣ်န့ၣ် အဝဲသ့ၣ်သးဘၣ်ဒိ ဒိၣ်မး. ဘၣ်ဆၣ် ပဒီပုၢ်ဝဲၢ်မုၣ်ခွါတနီၤန့ၣ် အခီၣ်ထံးခါ အဝဲသ့ၣ် အဟံၣ်ဖိဃီဖိထီဒါ တၢ်မ့ၢ်တၢ်တီဘၣ်ဆၣ် လၢခံန့ၣ် အဝဲသ့ၣ်ကဲထီၣ်က့ၤ ယဟိဝၤပှၤအုၣ်အသး. အဃိ ခီဖျိလၢ ပကဲထီၣ် ယဟိဝၤပှၤအုၣ်အသး အဃိ ပဟံၣ်ဖိဃီဖိ မ့ၢ်ထီဒါပှၤန့ၣ် ပကမၤဒ်လဲၣ်.
၁၃. ပဟံၣ်ဖိဃီဖိ မ့ၢ်တကနၣ်ဃုာ် ပှၤလၢၤဘၣ်နာ်က့ ပမ့ၢ်နာ်လၢ ကစၢ်ယွၤအဲၣ်ပှၤန့ၣ် ကမၤစၢၤပှၤဒ်လဲၣ်. (စံးထီၣ်ပတြၢၤ ၂၇:၁၀)
၁၃ တၢ်ကတိၤဖဲ စံးထီၣ်ပတြၢၤ ၂၇:၁၀ န့ၣ် မၤမုာ်ထီၣ်ပသးဒိၣ်မး. (ဖး.) ပမ့ၢ်နီၣ်ဘၣ်က့ၤလၢ ယဟိဝၤယွၤ အဲၣ်ပှၤဒိၣ်မးန့ၣ် ပမ့ၢ်ထံၣ်ဘၣ်ဒီး တၢ်ထီဒါ ဒ်လဲၣ်ဂ့ၤဒ်လဲၣ်ဂ့ၤ ပတဘၣ်ယိၣ်တၢ်ဘၣ်. ပနာ်သ့သပှၢ်တၢၢ်လၢ ပမ့ၢ်အိၣ်ဒီး တၢ်တူၢ်န့ၢ်ခီၣ်ကဲန့ၣ် အဝဲကဟ့ၣ်ပှၤခိၣ်ဖး. ယဟိဝၤယွၤ ကဟ့ၣ်လီၤပှၤ တၢ်လၢပလိၣ်ဘၣ် လၢနီၢ်ခိတခီ ဒီးအဝဲကမၤစၢၤပှၤ ဒ်သိးပကဆဲးအိၣ်ဒီး တၢ်သးခု ဒီးပတၢ်ရ့လိာ်သးဒီးအီၤ ကဂ့ၤအဂီၢ်. ပှၤလၢအမၤစၢၤပှၤသ့ ဒ်သိးဒီး ယဟိဝၤယွၤန့ၣ် တအိၣ်နီတဂၤဘၣ်. ဒီပုၢ်ဝဲၢ်ခွါဘ့နံၤယၢၤ လၢပတဲဖျါထီၣ် အဂ့ၢ်လၢအခီၣ်ထံးန့ၣ် အဝဲတဲဝဲလၢ ကစၢ်ယွၤ မၤစၢၤအီၤဒ်န့ၣ်လီၤ.
၁၄. လၢဒီပုၢ်ဝဲၢ်ခွါဘ့နံၤယၢၤ အအိၣ်န့ၣ် ပဒိးန့ၢ်ဘၣ် တၢ်မၤလိမနုၤလဲၣ်.
၁၄ ဒီပုၢ်ဝဲၢ်ခွါဘ့နံၤယၢၤ သ့ၣ်ညါဝဲလၢ လၢအထံအကီၢ်န့ၣ် ပဒိၣ်ပပှၢ်သ့ၣ်တဖၣ် မၤအၢမၤနး ဒီပုၢ်ဝဲၢ်မုၣ်ခွါတဖၣ် နးဒိၣ်မး ဘၣ်ဆၣ် အဝဲဆၢတဲာ်လီၤအသးလၢ အကကဲထီၣ် ယဟိဝၤပှၤအုၣ်အသး. အဃိ ဆိကမိၣ်ကွၢ် ဘ့နံၤယၢၤ သ့ၣ်ညါဝဲလၢ ယဟိဝၤယွၤ အဲၣ်အီၤအဃိ မၤစၢၤအီၤလၢ အတပျံၤ ပှၤကညီလၢၤဘၣ်ဒ်လဲၣ်. အဝဲတဲဝဲလၢ “ပဒိၣ်ပပှၢ် မၤအၢမၤနး ယဟိဝၤပှၤအုၣ်အသး နးဒိၣ်န့ၢ်ဒံး ယဆိကမိၣ်ဘၣ်ဒံး. ဘၣ်ဆၣ် ယဟံၣ်ဖိဃီဖိထီဒါယၤန့ၣ် ယပျံၤအီၤဒိၣ်န့ၢ်ဒံး ပဒိၣ်ပပှၢ်တဖၣ် အတၢ်မၤအၢမၤနးယၤဒံး. ယကဲထီၣ် ယဟိဝၤပှၤအုၣ်အသး အဃိန့ၣ် ယဘၣ်ယိၣ်လၢ ယပါသးကဘၣ်ဒိ ဒီးယဟံၣ်ဖိဃီဖိ တပာ်ကဲယၤဘၣ်. ဘၣ်ဆၣ်ဒ်သိး ဒီပုၢ်ဝဲၢ်ခွါဘ့နံၤယၢၤ တပျံၤပှၤကညီလၢၤ တဂ့ၤအဂီၢ်န့ၣ် တၢ်မနုၤမၤစၢၤအီၤလဲၣ်.” ဒီပုၢ်ဝဲၢ်ခွါဘ့နံၤယၢၤ သ့ၣ်ညါဝဲလၢ ယဟိဝၤယွၤ ဒီသဒၢဝဲ ပှၤလၢအအဲၣ်ဝဲတဖၣ် ထီဘိ. အဃိ အဝဲတဲဝဲလၢ “ယဆိကမိၣ်ထံဘၣ်ဃးဒီး ယဟိဝၤယွၤ မၤစၢၤဝဲ ဒီပုၢ်ဝဲၢ်မုၣ်ခွါတဖၣ် လၢအထံၣ်ဘၣ်ဒီး ကျိၣ်စ့တၢ်ကီတၢ်ခဲ, ပှၤထံၣ်ဆံးအဝဲသ့ၣ် ဒီးပှၤမၤအၢမၤနး အဝဲသ့ၣ်အဂ့ၢ်. အဃိ ယသ့ၣ်ညါလၢ ယမ့ၢ်ဆဲးတီဒီး ယဟိဝၤယွၤန့ၣ် ယဟိဝၤယွၤ ကမၤစၢၤယၤ. ပှၤဖီၣ်ယၤဒီး ပှၤထိယၤတီၢ်ယၤ တဘျုးဘျီညါ သနာ်က့ ယသ့ၣ်ညါဘၣ်လၢ ပမ့ၢ်ဆဲးသးတီဒီး ယဟိဝၤယွၤန့ၣ် ဖဲပလိၣ်ဘၣ် တၢ်မၤစၢၤ တဘျီဂ့ၤတဘျီဂ့ၤန့ၣ် အဝဲကမၤစၢၤပှၤ.” လၢခံ ဒီပုၢ်ဝဲၢ်ခွါဘ့နံၤယၢၤ ထံၣ်ယဟိဝၤယွၤ ဒ်အပၢ်နီၢ်ကီၢ်တဂၤ ဒီးအထံၣ်စ့ၢ်ကီး ဒီပုၢ်ဝဲၢ်မုၣ်ခွါတဖၣ် ဒ်အဟံၣ်ဖိဃီဖိနီၢ်ကီၢ်အသိး.
တၢ်ပျံၤတၢ်သံ
၁၅. ဘၣ်မနုၤအဃိ ပပျံၤတၢ်သံလဲၣ်.
၁၅ လံာ်စီဆှံတဲဝဲလၢ တၢ်သံန့ၣ် အကဲဝဲဒုၣ်ဒါ. (၁ ကရံၣ်သူး ၁၅:၂၅, ၂၆) အဃိ ပမ့ၢ်ဆိကမိၣ် ဘၣ်ဃးဒီး တၢ်သံန့ၣ် ပကပျံၤတၢ်ဒိၣ်မး. လီၤဆီဒၣ်တၢ် ဖဲပဆိးက့နးမး မ့တမ့ၢ် ပှၤလၢပအဲၣ်ဘၣ်အီၤတဂၤဂၤ ဆိးက့နးမးအခါ. ဘၣ်မနုၤအဃိ ပပျံၤလၢ ပကသံလဲၣ်. ယဟိဝၤယွၤ တ့လီၤပှၤလၢ ပကအဲၣ်ဒိးအိၣ်မူ လီၤထူလီၤယိာ်အဃိန့ၣ် ပပျံၤလၢပကသံ. (စံၣ်တဲၤတဲလီၤတၢ် ၃:၁၁) ဘၣ်ဆၣ် ပမ့ၢ်ပျံၤတၢ်သံဖဲ အကြၢးအဘၣ်န့ၣ် ကမၤစၢၤပှၤလၢ ပကဒီသဒၢလီၤ ပတၢ်အိၣ်မူ. အဒိ, ပမ့ၢ်ပျံၤတၢ်သံဖဲအကြၢးန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကအီၣ်တၢ်အီၣ်လၢ အန့ၢ်ဂံၢ်န့ၢ်ဘါ ဒီးမၤနီၢ်ခိ တၢ်ဟူးတၢ်ဂဲၤထီဘိ. ပအိၣ်မ့ၢ်တဆူၣ်ဘၣ်န့ၣ် ပကလဲၤလၢ ကသံၣ်သရၣ်အိၣ် ဒီးအီကသံၣ်ဒ်သိး ပကဘျါက့ၤအဂီၢ်. တကးဒံးဘၣ် ပကဟးဆှဲးတၢ်လၢ အလီၤဘၣ်ယိၣ်လၢ ပသးသမူအဂီၢ်.
၁၆. မုၣ်ကီၤလံၢ် သ့ၣ်ညါလၢ ပပျံၤလၢပကသံအဃိ အဝဲဂုာ်ကျဲးစၢးသူဝဲ တၢ်ပျံၤတခါအံၤဒ်လဲၣ်.
၁၆ မုၣ်ကီၤလံၢ် သ့ၣ်ညါဝဲလၢ ပပာ်လုၢ်ပာ်ပှ့ၤ ပသးသမူ. အဃိ အတဲဝဲလၢ ပကမၤတၢ်ကိးမံၤဒဲး ဒ်သိး ပကဆဲးအိၣ်မူဘၣ်အဂီၢ်. တၢ်လၢပကမၤအီၤတဖၣ် မ့ၢ်မၤဘၣ်ဒိ ပတၢ်ရ့လိာ်သးဒီး ယဟိဝၤယွၤ သနာ်က့ ပကမၤအီၤဒံး. (ယိၤဘး ၂:၄, ၅) မုၣ်ကီၤလံၢ် တဲတၢ်န့ၣ် ကမၣ်ဖးဒိၣ်ညါ. ဘၣ်ဆၣ် မုၣ်ကီၤလံၢ်န့ၣ် အကဲ “ပှၤလၢအဒုးအိၣ်ထီၣ်တၢ်သံ” ဒီးအဝဲသ့ၣ်ညါလၢ ပပျံၤလၢ ပကသံအဃိ အဝဲဂုာ်ကျဲးစၢးသူဝဲ တၢ်ပျံၤတခါအံၤ ဒ်သိးဒီး ပကပာ်တ့ၢ်ကွံာ် ယဟိဝၤယွၤအဂီၢ်. (ဧ့ၤဘြံၤ ၂:၁၄, ၁၅) တဘျီတခီၣ် မုၣ်ကီၤလံၢ် ကသူဝဲ ပှၤကညီတဖၣ် ဒ်သိး ကမၤပျံၤမၤဖုးပှၤလၢ ပမ့ၢ်တပာ်တ့ၢ်ကွံာ် ပတၢ်စူၢ်တၢ်နာ်ဘၣ်န့ၣ် အဝဲသ့ၣ် ကမၤသံပှၤ. တဘျီတခီၣ် ဖဲပဆိးက့ နးနးအခါ မုၣ်ကီၤလံၢ် ဟံးန့ၢ်တၢ်ခွဲးတၢ်ယာ် ဒ်သိးဒီး ပကမၤကမၣ် ကစၢ်ယွၤ အတၢ်သိၣ်တၢ်သီအဂီၢ်. အဒိ, ကသံၣ်သရၣ် မ့တမ့ၢ် ပဟံၣ်ဖိဃီဖိလၢ အတစူၢ်တနာ်တၢ် သ့ၣ်တဖၣ်န့ၣ် အဝဲသ့ၣ် ကမၢဆူၣ်ပှၤလၢ ပကမၤကမၣ် ကစၢ်ယွၤ အတၢ်သိၣ်တၢ်သီ ဒ်သိး ပကတူၢ်လိာ် တၢ်သွီသွံၣ်. မ့တမ့ၢ် ဘၣ်သ့ၣ်သ့ၣ် ပှၤတဂၤဂၤ ကကွဲန့ၢ်လွဲန့ၢ်ပှၤဒ်သိးဒီး ပကတူၢ်လိာ် တၢ်ကူစါယါဘျါ အကျိၤအကျဲ လၢအထီဒါလိာ်သးဒီး လံာ်စီဆှံတၢ်သိၣ်တၢ်သီ.
၁၇. ဒ် ရိမ့ၤ ၈:၃၇-၃၉ တဲဝဲအသိး ဘၣ်မနုၤအဃိ ပတလိၣ်ပျံၤလၢ ပကသံဘၣ်လဲၣ်.
၁၇ ပတအဲၣ်ဒိးသံဘၣ် ဘၣ်ဆၣ် ပမ့ၢ်သံသနာ်က့ ပသ့ၣ်ညါလၢ ယဟိဝၤယွၤ အဲၣ်ပှၤဒံး. (ဖး ရိမ့ၤ ၈:၃၇-၃၉.) ယဟိဝၤယွၤ အပှၤဂီၢ်မုၢ်တဖၣ် မ့ၢ်သံဘၣ်ဆၣ် ယဟိဝၤယွၤ သ့ၣ်နီၣ်အဝဲသ့ၣ်ဒံး. လၢအဂီၢ်န့ၣ် လီၤဂာ်ဒ်သိးဒီး အဝဲသ့ၣ်အိၣ်မူဒံး. (လူၤကၣ် ၂၀:၃၇, ၃၈) တကးဒံးဘၣ် ကစၢ်ယွၤအဲၣ်ဒိး မၤမူထီၣ်က့ၤ အဝဲသ့ၣ်သပှၢ်တၢၢ်. (ယိၤဘး ၁၄:၁၅) အဃိ ဒ်သိးပ “ကန့ၢ်ဘၣ် တၢ်မူအထူအယိာ်” အဂီၢ်န့ၣ် ယဟိဝၤယွၤဟ့ၣ်လီၤပှၤ တၢ်ပှ့ၤက့ၤ. (ယိၤဟၣ် ၃:၁၆) ပသ့ၣ်ညါလၢ ယဟိဝၤယွၤ ကဟုကယာ်ပှၤဒီး အဲၣ်ပှၤဒိၣ်မး အဃိ ဖဲပဆိးက့အခါ ဒီးပှၤဂၤမၤပျံၤမၤဖုးပှၤလၢ ကမၤသံပှၤအခါန့ၣ် ပတအဲၣ်ဒိးပာ်တ့ၢ်ကွံာ် ယဟိဝၤယွၤဘၣ်. ဖဲပထံၣ်ဘၣ်ဒီး တၢ်အိၣ်သးဒ်န့ၣ်အခါန့ၣ် ပကသန့ၤပသးလၢ ကစၢ်ယဟိဝၤယွၤအအိၣ် ဒ်သိး ပသးကမုာ်ထီၣ်က့ၤ ဒီးအကဟ့ၣ်ပှၤတၢ်ကူၣ်သ့ ဒီးတၢ်ဂံၢ်တၢ်ဘါအဂီၢ်. ဒီပုၢ်ဝဲၢ်မုၣ်ဘဲလရံၤ ဒီးအဝၤ လၢပပာ်ဖျါထီၣ်အဂ့ၢ် လၢအခီၣ်ထံးန့ၣ် အဝဲသ့ၣ် မၤဝဲဒ်န့ၣ်.—စံးထီၣ်ပတြၢၤ ၄၁:၃.
၁၈. လၢဒီပုၢ်ဝဲၢ်မုၣ်ဘဲလရံၤ အအိၣ်န့ၣ် နဒိးန့ၢ်ဘၣ် တၢ်မၤလိမနုၤလဲၣ်.
၁၈ ဖဲဒီပုၢ်ဝဲၢ်မုၣ်ဘဲလရံၤ အိၣ် ၃၅ နံၣ်အခါ အဝဲသ့ၣ်ညါဘၣ်လၢ အအိၣ်ဒီး ခဲစၢၣ်တၢ်ဆါ လၢအနးတကလုာ်. ဘၣ်ဆၣ် တၢ်အဲၣ်မၤစၢၤအီၤ ဒ်သိးဒီး အဝဲတပျံၤလၢ အတသံတဂ့ၤအဂီၢ်ဒ်လဲၣ်. အတဲဝဲလၢ “ဖဲယသ့ၣ်ညါလၢ ယအိၣ်ဒီး ခဲစၢၣ်တၢ်ဆါအခါ ယၤဒီးယဝၤ ပဖုးဘၣ်ပသးဖးဒိၣ်ညါ. ဒ်သိး ယကဆဲးအိၣ်မူဘၣ်အဂီၢ် ယကဘၣ်ဖွဲးသး အဃိ ယတဲသကိးတၢ်ဒီး ကသံၣ်သရၣ် လၢအဖွဲးပှၤဆါ တဘျုးဂၤညါ. ဘၣ်ဆၣ် ယတတူၢ်လိာ် တၢ်သွီသွံၣ်ဘၣ်အဃိ အဝဲသ့ၣ်တဂၤမၣ် တဖွဲးယၤဘၣ်. ယမ့ၢ်ဘၣ်တဲတီတီဒု ယပျံၤတၢ် ဘၣ်ဆၣ် ယတအဲၣ်ဒိးမၤကမၣ် ကစၢ်ယွၤ တၢ်သိၣ်တၢ်သီဘၣ်အဃိ ယတတူၢ်လိာ် တၢ်သွီသွံၣ်ဘၣ်. လၢယတၢ်အိၣ်မူအပူၤန့ၣ် ယထံၣ်ဘၣ်လၢ ယဟိဝၤယွၤ ပာ်ဖျါထီၣ် တၢ်အဲၣ်လၢယဖီခိၣ်အါမး အဃိ ခဲအံၤန့ၣ် ယန့ၢ်ဘၣ် တၢ်ခွဲးတၢ်ယာ်လၢ ယကပာ်ဖျါထီၣ်က့ၤ တၢ်အဲၣ်လၢအဖီခိၣ်. ဖဲယနၢ်ဟူဘၣ် တၢ်ကစီၣ်လၢ အလီၤသးအုး တဘျီဂ့ၤတဘျီဂ့ၤန့ၣ် ယပာ်လီၤသး ဂၢၢ်ဂၢၢ်လၢ ယကမၤသးခု ယဟိဝၤယွၤအသး ဒီးတပျဲလၢ မုၣ်ကီၤလံၢ်ကသးခုဘၣ်. ယတတူၢ်လိာ် တၢ်သွီသွံၣ်ဘၣ် သနာ်က့န့ၣ် လၢခံဖဲယလဲၤဖွဲးသးအခါ လဲၤအသးဘျ့ဘျ့ဆှီဆှီ. ခဲအံၤ ယတၢ်ဆါတဘျါက့ၤဒံးဘၣ် ဘၣ်ဆၣ် ယဟိဝၤယွၤ ဟ့ၣ်ပှၤတၢ်လၢ ပလိၣ်ဘၣ်တဖၣ်ထီဘိ. အဒိ တချုးလၢ ယသ့ၣ်ညါလၢ ယဘၣ်ခဲစၢၣ်တၢ်ဆါဒံးဘၣ်တနွံ ဖဲနွံကတၢၢ်တၢ်အိၣ်ဖှိၣ်န့ၣ် ပမၤလိာ်သကိး တၢးထီခိးတၢ် တခါလၢအမ့ၢ် ‘ဆၢကတီၢ်ခဲအံၤ လဲၤခီဖျိ တၢ်ကီတၢ်ခဲလၢ တၢ်သးဒူအပူၤ.’c တၢ်မၤလိတခါအံၤ မၤမုာ်ထီၣ်ပသးဒိၣ်မး. အဃိ ပက့ၤဖးအီၤ ခဲအံၤခဲအံၤ, တၢ်မၤလိဒ်အံၤသ့ၣ်တဖၣ်န့ၣ် မၤစၢၤယၤဒီးယဝၤလၢ ပကဆဲးစံၣ်တဲၤတဲလီၤတၢ် ဒီးထီၣ်တၢ်အိၣ်ဖှိၣ်ထီဘိ ဒ်သိးဒီးပပာ်ပသး မုာ်မုာ်ခုၣ်ခုၣ်ကသ့အဂီၢ်. ဒီးအမၤစၢၤစ့ၢ်ကီးပှၤလၢ ပကဆၢတဲာ်တၢ်လၢအဘၣ်.”
မၤလီၤမၢ်ကွံာ်ပတၢ်ပျံၤ
၁၉. တယံာ်လၢၤဘၣ်န့ၣ် တၢ်မနုၤ ကကဲထီၣ်အသးလဲၣ်.
၁၉ ပဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ်န့ၣ် မ့ၢ်လၢ ယဟိဝၤယွၤ မၤစၢၤအဝဲသ့ၣ်အဃိ အဝဲသ့ၣ်လဲၤခီဖျိ တၢ်အိၣ်သးလၢ အကီအခဲသ့ၣ်တဖၣ်န့ၢ် ဒီးတြီဆၢက့ၤ မုၣ်ကီၤလံၢ် အတၢ်ထီဒါန့ၢ်ဝဲ. (၁ ပ့းတရူး ၅:၈, ၉) အဃိ နၤစ့ၢ်ကီး နလဲၤခီဖျိ တၢ်အိၣ်သးလၢ အကီအခဲကန့ၢ် ဒီးတြီဆၢက့ၤ မုၣ်ကီၤလံၢ် အတၢ်ထီဒါ ကန့ၢ်ဝဲ. တယံာ်လၢၤဘၣ် ယဟိဝၤယွၤ ကမၢဝဲယ့ၣ်ၡူး ဒီးပှၤလၢအပၢဃုာ်တၢ်ဒီးအီၤတဖၣ် “မၤဟးဂီၤကွံာ်ဝဲ မုၣ်ကီၤလံၢ် အတၢ်မၤတဖၣ်.” (၁ ယိၤဟၣ် ၃:၈) အဝဲသ့ၣ်မၤဝဲဒ်န့ၣ် မ့ၢ်ဝံၤန့ၣ် ကစၢ်ယွၤ အပှၤဂီၢ်မုၢ်လၢ အအိၣ်လၢဟီၣ်ခိၣ်န့ၣ် ‘တၢ်လၢကမၤပျံၤမၤဖုးအဝဲသ့ၣ် တအိၣ်နီတမံၤဘၣ် ဒီးအဝဲသ့ၣ်တပျံၤ တၢ်နီတမံၤဘၣ်.’ (ယၡါယၤ ၅၄:၁၄; မံကၤ ၄:၄) ဘၣ်ဆၣ် တချုးလၢ တၢ်ဆၢကတီၢ်အဝဲန့ၣ် တုၤဒံးဘၣ်န့ၣ် ဆၢကတီၢ်ခဲအံၤ ပကဘၣ်ဂုာ်ကျဲးစၢး မၤလီၤမၢ်ကွံာ် ပတၢ်ပျံၤတၢ်ဖုး.
၂၀. ဒ်သိး ပမၤလီၤမၢ်ကွံာ် ပတၢ်ပျံၤကန့ၢ်အဂီၢ် တၢ်မနုၤကမၤစၢၤပှၤလဲၣ်.
၂၀ ပကဘၣ်နာ်နီၢ်ကီၢ်လၢ ယဟိဝၤယွၤအဲၣ် အပှၤဂီၢ်မုၢ် ဒီးဒီသဒၢအပှၤဂီၢ်မုၢ်. ဒ်သိး ပကနာ်ဒ်န့ၣ်အဂီၢ် ပကဘၣ်ဆိကမိၣ်ထံ ဘၣ်ဃးဒီး ယဟိဝၤယွၤ မၤစၢၤအပှၤဂီၢ်မုၢ် လၢညါတဖၣ်ဒ်လဲၣ်. ဒီးပကဘၣ်တဲဘၣ်ပှၤဂၤ ဘၣ်ဃးဒီး တၢ်ဂ့ၢ်သ့ၣ်တဖၣ်အံၤ. တကးဒံးဘၣ် ဖဲပထံၣ်ဘၣ်ဒီး တၢ်အိၣ်သးလၢ အကီအခဲအခါန့ၣ် ပကဘၣ်ပာ်သူၣ်ပာ်သးလၢ ကစၢ်ယွၤ မၤစၢၤပှၤဒ်လဲၣ်. ခီဖျိလၢ ယဟိဝၤယွၤ အတၢ်မၤစၢၤအဃိ ပမၤလီၤမၢ်ကွံာ် ပတၢ်ပျံၤ ကန့ၢ်ဝဲ သပှၢ်ကတၢၢ်.—စံးထီၣ်ပတြၢၤ ၃၄:၄.
တၢ်သးဝံၣ် ၁၂၉ ပကဆဲးအိၣ်ဂၢၢ်ဆိးကျၢၤတုၤလၢအကတၢၢ်
a တဘျီတခီၣ် ပပျံၤတၢ်န့ၣ် တကမၣ်ဘၣ်. အမၤစၢၤပှၤဒ်သိး ပကဟးဆှဲး တၢ်လီၤဘၣ်ယိၣ်သ့ၣ်တဖၣ်. ဘၣ်ဆၣ် ပမ့ၢ်ပျံၤတၢ်အါတလၢန့ၣ် အမၤဘၣ်ဒိပှၤသ့. ဘၣ်မနုၤအဃိ ပတဲဒ်န့ၣ်လဲၣ်န့ၣ် မ့ၢ်လၢမုၣ်ကီၤလံၢ် ဂုာ်ကျဲးစၢး မၤပျံၤမၤဖုးပှၤ ဒ်သိးဒီး ပကဆၢတဲာ် ကမၣ်ဘၣ်တၢ်အဂီၢ်. အဃိန့ၣ် အရ့ဒိၣ်ဒိၣ်မးလၢ ပကဘၣ်ဂုာ်ကျဲးစၢး မၤလီၤမၢ်ကွံာ် တၢ်ပျံၤတၢ်ဖုး. ဘၣ်ဆၣ် တၢ်မနုၤကမၤစၢၤပှၤလၢ ပကမၤလီၤမၢ်ကွံာ် ပတၢ်ပျံၤတၢ်ဖုးအဂီၢ်လဲၣ်. လၢတၢ်မၤလိတခါအံၤအပူၤန့ၣ် ပကသ့ၣ်ညါဘၣ်လၢ ပမ့ၢ်နာ်နီၢ်ကီၢ်လၢ ယဟိဝၤယွၤ အိၣ်ဒီးပှၤ ဒီးအဲၣ်ပှၤန့ၣ် ပမၤလီၤမၢ်ကွံာ် ပတၢ်ပျံၤတၢ်ဖုး တမံၤဂ့ၤ တမံၤဂ့ၤသ့.
b ပှၤမံၤတနီၤန့ၣ် ပှၤဆီတလဲဝဲ.
d တၢ်ဂီၤ အခီပညီ– ပှၤဒီမိၢ်ဝၤခံဂၤလၢ တၢ်အိၣ်ဖှိၣ်အပူၤန့ၣ် လဲၤစိာ်ဒုးအီၣ်ဝဲ ဒီပုၢ်ဝဲၢ်မုၣ်လၢ အမၤတၢ်မၤဆူၣ်ဆူၣ်တဂၤ ဒီးအဟံၣ်ဖိဃီဖိတၢ်အီၣ်.
e တၢ်ဂီၤ အခီပညီ– ဒီပုၢ်ဝဲၢ်ခွါ သးစၢ်တဂၤ အမိအပါထီဒါ အတၢ်စူၢ်တၢ်နာ်ဘၣ်ဆၣ် အနာ်ဝဲသပှၢ်တၢၢ်လၢ ယဟိဝၤယွၤ ကမၤစၢၤအီၤ.