“ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ” တၢ်ဂ့ၢ်ဘျးစဲ

ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ

လါနိၣ်ဝ့ဘၢၣ် ၄-၁၀

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၀၅

“အဝဲသ့ၣ်နီၣ်ထီၣ်က့ၤ အတၢ်အၢၣ်လီၤအီလီၤ လီၤထူလီၤယိာ်”

ပကဘၣ် မၤဂၢၢ်ကျၢၤဒိၣ်ထီၣ် ပတၢ်နာ်လၢ ယဟိဝၤယွၤ အတၢ်အၢၣ်လီၤ ဘၣ်ဃးဒီး ဟီၣ်ခိၣ်သီ

^၁၁ ခဲအံၤ ပကကွၢ်သကီး တၢ်လၢယဟိဝၤယွၤ အၢၣ်လီၤအပှၤဂီၢ်မုၢ်လၢညါ လၢအလီၤဂာ်ဒ်သိးဒီး အကဲထီၣ်သးတသ့ဘၣ်. ယဟိဝၤယွၤ တဲဘၣ် စီၤအၤဘြၤဟၣ် ဒီးနီၢ်စၤရါလၢ အဝဲသ့ၣ် မ့ၢ်သးပှၢ်နာ်က့ အဖိကအိၣ်တဂၤ. (၁ မိၤၡ့ ၁၇:၁၅-၁၇) အအၢၣ်လီၤစ့ၢ်ကီး စီၤအၤဘြၤဟၣ်လၢ အစၢၤအသွဲၣ် ကန့ၢ်ဘၣ် ကီၢ်ကနၤဧၣ်. ဘၣ်ဆၣ် ဖဲစီၤအၤဘြၤဟၣ် အစၢၤအသွဲၣ် လၢအမ့ၢ် ပှၤအံၣ်စရ့လးဖိတဖၣ် ဘၣ်ကဲကုၢ်လၢ ကီၢ်အဲၤကူပတူးအခါ လီၤဂာ်လၢ တၢ်လၢယဟိဝၤယွၤ အၢၣ်လီၤ စီၤအၤဘြၤဟၣ်န့ၣ် ကဲထီၣ်သးတသ့ဘၣ်. သနာ်က့လၢခံ အဟဲလၢပှဲၤထီၣ်နီၢ်ကီၢ်. အဒိ ယဟိဝၤယွၤ တဲပာ်စၢၤဝဲလၢ နီၢ်အ့းလံၤစါဘ့း မ့ၢ်သးပှၢ်နာ်က့ အဖိကအိၣ်တဂၤ. တကးဒံးဘၣ် ယဟိဝၤယွၤ တဲဘၣ်စ့ၢ်ကီး မုၣ်ကနီၤတဂၤလၢ အမံၤမ့ၢ် နီၢ်မၤရံလၢ အကအိၣ်ဖျဲၣ်ထီၣ်ဝဲ ကစၢ်ယွၤအဖိခွါ. တၢ်လၢယဟိဝၤယွၤ တဲဆိပာ်စၢၤဝဲတဖၣ်အံၤ ကမၤလၢပှဲၤထီၣ် အတၢ်အၢၣ်လီၤလၢအတဲဆိပာ်စၢၤဝဲ ပူၤကွံာ်အနံၣ်လၢအကထိတဖၣ် ဖဲဧ့ၤဒ့ၣ်တၤသၣ်လီၢ်.—၁ မိၤၡ့ ၃:၁၅.

^၁၂ ပမ့ၢ်ဆိမိၣ်ဘၣ်ဃးဒီး တၢ်လၢယဟိဝၤယွၤ အၢၣ်လီၤဝဲခဲလၢာ် ဒီးအမၤလၢပှဲၤဝဲဒ်လဲၣ်န့ၣ် ပသ့ၣ်ညါဘၣ်လၢ ယဟိဝၤယွၤန့ၣ် အစိကမီၤဒိၣ်မး. ဒီးပတၢ်နာ် ဘၣ်ဃးဒီး ဟီၣ်ခိၣ်သီစ့ၢ်ကီး ကဂၢၢ်ကျၢၤဒိၣ်ထီၣ်. (ဖး ယိၤၡူ ၂၃:၁၄; ယၡါယၤ ၅၅:၁၀, ၁၁.) အဃိ ပကအိၣ်ကတီၤသးထီဘိလၢ ပကမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ်လၢ တၢ်အၢၣ်လီၤဘၣ်ဃးဒီး ဟီၣ်ခိၣ်သီန့ၣ် ကကဲထီၣ်သးနီၢ်ကီၢ် ဒီးအတကဲဝဲ တၢ်မံမီၢ်ဘၣ်. တကးဒံးဘၣ် ဘၣ်ဃးဒီး မူခိၣ်သီ ဒီးဟီၣ်ခိၣ်သီ အဂ့ၢ်န့ၣ် ယဟိဝၤယွၤ တဲဝဲလၢ “တၢ်ကတိၤတဖၣ်အံၤ ပှၤနာ်န့ၢ်အီၤသ့ ဒီးမ့ၢ်ဝဲတီဝဲ.”—လီၣ်ဖျါ ၂၁:၁, ၅.

it-2-E ၁၂၀၁

တၢ်ကတိၤ

ကစၢ်ယွၤ အတၢ်ဘၣ်တ့လၢ အသးသမူအိၣ်မ့ၢ်ဂ့ၤ တအိၣ်ဘၣ်မ့ၢ်ဂ့ၤ အမၤလၢပှဲၤဝဲ ကစၢ်ယွၤအတၢ်ကတိၤသ့ ဒီးကစၢ်ယွၤသူအီၤ ဒ်သိးအကမၤလၢပှဲၤထီၣ် အတၢ်တိာ်ပာ်အဂီၢ်သ့. (စံး ၁၀၃:၂၀; ၁၄၈:၈) ကစၢ်ယွၤ အကလုၢ်ကထါန့ၣ် ပှၤနာ်န့ၢ်အီၤသ့ ဒီးကစၢ်ယွၤန့ၣ် အကမၤလၢပှဲၤတၢ်လၢ အအၢၣ်လီၤဝဲတဖၣ်ထီဘိ ဒီးအဝဲတသးပ့ၤနီၣ်ဝဲဘၣ်. (၅ မိၤ ၉:၅; စံး ၁၀၅:၄၂-၄၅) ကစၢ်ယွၤ အနီၢ်ကစၢ်ဒၣ်ဝဲ တဲဝဲလၢ အကလုၢ်ကထါန့ၣ် “အိၣ်ဂၢၢ်ဆိးကျၢၤဝဲ လီၤထူလီၤယိာ်.” အဃိ အတၢ်တိာ်ပာ်န့ၣ် ကလၢထီၣ်ပှဲၤထီၣ်ဝဲ ဒီးတဟဲက့ၤကဒါက့ၤလၢ အအိၣ်ကလီကလီဘၣ်.—ၡါ ၄၀:၈; ၅၅:၁၀, ၁၁; ၁ ပ့း ၁:၂၅.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၈၆-E ၁၁/၁ ၁၉ ¶၁၅

တၢ်လၢပှၤသးစၢ်တဖၣ် မၤဝဲသ့ ဖဲနီၢ်သးဟံၣ်ဖိဃီဖိလၢ အအိၣ်ဒီးတၢ်သးခု ဒီးတၢ်ဃူတၢ်ဖိးအပူၤ

^၁၅ “အဝဲသ့ၣ် စၢဃာ် စီၤယိၤသးအခီၣ် လၢထးသွဲတဖၣ် ဒီးကွီၤဃာ်အကိာ် လၢထးကွီၤ တုၤလီၤလၢ ကစၢ်ယွၤအကလုၢ်ကထါ လၢထီၣ်ပှဲၤထီၣ်ဝဲလီၤ. ယဟိဝၤယွၤ အတၢ်ကတိၤန့ၣ် မ့ၢ်တၢ်လၢ အပှံၢ်စီ စီၤယိၤသးလီၤ.” (စံးထီၣ်ပတြၢၤ ၁၀၅:၁၇-၁၉) တချုးလၢ ယဟိဝၤယွၤ အတၢ်အၢၣ်လီၤအီလီၤ လၢထီၣ်ပှဲၤထီၣ်ဒံးဘၣ်န့ၣ် စီၤယိၤသးဘၣ်ကဲ ပှၤကုၢ် ဒီးအိၣ်ဘၣ်လၢ ဃိာ်ပူၤ ခဲလၢာ်ကအိၣ်ဝဲ ၁၃ နံၣ်ညါ. စီၤယိၤသး ဘၣ်တၢ်ပှံၢ်စီအီၤ ခီဖျိလၢ အတၢ်လဲၤခီဖျိအံၤ. ယဟိဝၤယွၤ တဒုးအိၣ်ထီၣ်ဝဲ တၢ်ကီတၢ်ခဲလၢ စီၤယိၤသးထံၣ်ဘၣ်ဝဲဘၣ်. ဘၣ်ဆၣ် အဝဲဟ့ၣ်အခွဲးလၢ စီၤယိၤသးကထံၣ်ဘၣ် တၢ်အိၣ်သးဒ်အံၤ ဒ်သိးအတၢ်တိာ်ပာ် ကလၢထီၣ်ပှဲၤထီၣ်အဂီၢ်. ဖဲစီၤယိၤသး ထံၣ်ဘၣ် တၢ်ကီတၢ်ခဲအဆၢကတီၢ် အဝဲမုၢ်လၢ်ဝဲလၢ ယဟိဝၤယွၤ အတၢ်ကတိၤန့ၣ် ကဟဲလၢထီၣ်ပှဲၤထီၣ်. ဒီးခီဖျိလၢ တၢ်ကီတၢ်ခဲလၢ အထံၣ်ဘၣ်ဝဲတဖၣ်အဃိ အတၢ်ဂ့ၤတၢ်ဝါတဖၣ် ဟဲအါထီၣ်, အတၢ်သးစူၤ, တၢ်ဆီၣ်လီၤသး ဟဲအါထီၣ် ဒီးအတၢ်ရ့လိာ်သးဒီး ယဟိဝၤယွၤဟဲဂၢၢ်ကျၢၤထီၣ်. တကးဒံးဘၣ် အဝဲပာ်လီၤအသးလၢ ကဟံးထီၣ်ဖီၣ်ထီၣ် မူဒါလၢအကီအခဲ. အဃိ ဒ်ထူလၢအဘၣ်တၢ်ပှံၢ်စီအီၤ ဒီးကဲထီၣ်ဝဲထူစီ ဒီးအလုၢ်ဒိၣ်ပှ့ၤဒိၣ်အသိး ဖဲစီၤယိၤသးထံၣ်ဘၣ် တၢ်ကီတၢ်ခဲဝံၤအလီၢ်ခံ အဝဲကဲထီၣ်ပှၤလၢ အဂ့ၤဒိၣ်န့ၢ်ဒံးအလီၢ် ဒီးအလုၢ်ဒိၣ်ပှ့ၤဒိၣ် လၢယဟိဝၤယွၤအမဲာ်ညါ ဒီးယဟိဝၤယွၤသူအီၤသ့ဝဲ.—၁ မိၤၡ့ ၄၁:၁၄, ၃၈-၄၁, ၄၆; ၄၂:၆, ၉.

လါနိၣ်ဝ့ဘၢၣ် ၁၁-၁၇

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၀၆

“အဝဲသ့ၣ် သးပ့ၤနီၣ်ကွံာ်ဝဲ ကစၢ်ယွၤလၢ အအုၣ်က့ၤခီၣ်က့ၤ အဝဲသ့ၣ်”

တၢး၁၈.၀၇ ၁၈ ¶၁၃

“မတၤအိၣ်လၢ ယွၤအအိၣ်တခီလဲၣ်”

^၁၃ ပှၤအံၣ်စရ့လးဖိတဖၣ် ထံၣ်ဘၣ်ဝဲ ယဟိဝၤယွၤအစိအကမီၤ ဒီးအဝဲသ့ၣ်ပျံၤတၢ်အဃိ မၢစီၤမိၤၡ့လဲၤတဲတၢ်ဒီး ယဟိဝၤယွၤ လၢအဝဲသ့ၣ်အခၢၣ်စး လၢကစၢၢ်စံၤနါအလိၤလီၤ. (၂ မိၤၡ့ ၂၀:၁၈-၂၁) အဝဲသ့ၣ်အိၣ်ခိးဝဲယံာ်လံဘၣ်ဆၣ် စီၤမိၤၡ့တဟဲက့ၤလီၤလၢ အဝဲသ့ၣ်အအိၣ်ဘၣ်. လီၤဂာ်ဒ်သိး အဝဲသ့ၣ်အိၣ်ကတာ်လၢ ပှၢ်မုၢ်ကနၢအကျါ ဒီးအခိၣ်အနၢ်တအိၣ်လၢၤဘၣ်. အဝဲသ့ၣ်မၤဝဲဒ်လဲၣ်. ဘၣ်သ့ၣ်သ့ၣ် ပှၤအံၣ်စရ့လးဖိတဖၣ် သန့ၤအသးလၢ အခိၣ်အနၢ်စီၤမိၤၡ့ အါတလၢလီၤ. လၢတၢ်န့ၣ်အဃိ အဝဲသ့ၣ်ဘၣ်ယိၣ်တၢ် ဒီးမၢဝဲစီၤအၤဟရိၣ်လၢ “ဂဲၤဆၢထၢၣ်, တ့န့ၢ်ပကစၢ်လၢ အကလဲၤတၢ်လၢပမဲာ်ညါတက့ၢ်. အဂ့ၢ်ဒ်အံၤ, တၢ်လၢစီၤမိၤၡ့, ပှၤလၢအဒုးဟဲထီၣ်ပှၤလၢ ကီၢ်အဲၤကူပတူးအပူၤတဂၤအံၤ မ့ၢ်တၢ်မၤအသးဒီးအီၤ ဒ်လဲၣ်ဒ်လဲၣ်န့ၣ် ပတသ့ၣ်ညါဘၣ်.”—၂ မိၤၡ့ ၃၂:၁, ၂.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၆-E ၇/၁၅ ၁၃ ¶၉

လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ သၢဘ့ၣ်တဘ့ၣ် ဒီးလွံၢ်ဘ့ၣ်တဘ့ၣ်အဂီၢ်

၁၀၆:၃၆, ၃၇. လံာ်စီဆှံ အဆၢတဖၣ်အံၤ ပာ်ဖျါထီၣ်ဝဲလၢ တၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်န့ၣ် အဘၣ်ထွဲလိာ်သးဒီး တၢ်လုၢ်ထီၣ်တၢ်လၢ တၢ်ဝံတၢ်နါတဖၣ်အအိၣ်. အဃိ ပာ်ဖျါထီၣ်ဝဲလၢ ပှၤလၢအသူတၢ်ဂီၤတၢ်ဖှီၣ်န့ၣ် မုၣ်ကီၤလံၢ် ကဒိၣ်စိလၢအဖီခိၣ်. အဃိ လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ “ဟးဆှဲး တၢ်ဂီၤတၢ်ဖှီၣ်တဖၣ်.”—၁ ယိၤဟၣ် ၅:၂၁.

လါနိၣ်ဝ့ဘၢၣ် ၁၈-၂၄

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၀၇-၁၀၈

“ယဟိဝၤယွၤ မ့ၢ်ပှၤလၢအဂ့ၤအဃိ စံးဘျုးအီၤ”

တၢး၀၇-E ၄/၁၅ ၂၀ ¶၂

ပှၤလၢတၢ်အိၣ်ဖှိၣ်ပူၤတဖၣ် စံးထီၣ်ပတြၢၤ ယဟိဝၤယွၤ

^၂ တၢ်အိၣ်ဖှိၣ်န့ၣ် တမ့ၢ်ဝဲ ပှၤဟဲအိၣ်ဖှိၣ်ဝဲ ယိယိဘၣ်. ဒီးတမ့ၢ်ဝဲ ပှၤလၢ အတၢ်ထံၣ်ဒ်သိးလိာ်အသး ဒီးတၢ်ပာ်သူၣ်ပာ်သး ဒ်သိးလိာ်သးတဖၣ် ဟဲအိၣ်ဖှိၣ်ဝဲန့ၣ်ဘၣ်. ပဟဲထီၣ် တၢ်အိၣ်ဖှိၣ် လၢပကစံးထီၣ်ပတြၢၤ ယဟိဝၤယွၤအဂီၢ်. လၢအပူၤကွံာ် အနံၣ်ဖးယံာ်န့ၣ် ပှၤကွဲးထါစံးထီၣ်ပတြၢၤ ပာ်ဖျါထီၣ်ဝဲ တၢ်ဂ့ၢ်တခါအံၤ. စံးထီၣ်ပတြၢၤ ၃၅:၁၈ တဲဝဲလၢ “ယကစံးဘျုးနၤလၢ တၢ်အိၣ်ဖှိၣ်ဖးဒိၣ်အပူၤ ဒီးယကစံးထီၣ်ပတြၢၤနၤလၢ ပှၤဂီၢ်မုၢ်အကျါ.” ဒီးစံးထီၣ်ပတြၢၤ ၁၀၇:၃၁, ၃၂ စ့ၢ်ကီး ဟ့ၣ်ဂံၢ်ဟ့ၣ်ဘါပှၤလၢ “ခီဖျိလၢ ယဟိဝၤယွၤ အတၢ်အဲၣ်လၢအတီ ဒီးအဝဲမၤတၢ်လၢ အလီၤလိၢ်လီၤလးတဖၣ် လၢပှၤဟီၣ်ခိၣ်ဖိ အဂီၢ်အဃိ မ်ပှၤဂီၢ်မုၢ် စံးဘျုးအီၤတက့ၢ်. မ်အဝဲသ့ၣ် ပာ်ထီၣ်ထီအီၤလၢ ပှၤဂီၢ်မုၢ် အတၢ်အိၣ်ဖှိၣ်အပူၤ.”

တၢး၁၅-E ၁/၁၅ ၉ ¶၄

စံးဘျုးယဟိဝၤယွၤ ဒီးနကန့ၢ်ဘၣ်တၢ်ဆိၣ်ဂ့ၤ

^၄ နမ့ၢ်ပာ်သူၣ်ပာ်သး ဒီးဆိကမိၣ်ထံ တၢ်လၢယဟိဝၤယွၤ မၤန့ၢ်နၤတဖၣ် ဒီးအတၢ်အဲၣ်လၢအတီလၢ အပာ်ဖျါထီၣ်လၢနဖီခိၣ်န့ၣ် နတၢ်စံးဘျုးစံးဖှိၣ်အီၤ ကဟဲဒိၣ်ထီၣ် ဒီးနကအဲၣ်ဒိး စံးဘျုးစံးဖှိၣ်အီၤထီဘိ. ဖဲပှၤကွဲးထါစံးထီၣ်ပတြၢၤ မၤဝဲဒ်အံၤအခါ အဝဲကမၢကမၣ်ဝဲ ခီဖျိလၢ တၢ်လီၤလိၢ်လီၤလးလၢ ယဟိဝၤယွၤ မၤဝဲတဖၣ်အဃိ.—ဖး စံးထီၣ်ပတြၢၤ ၄၀:၅; ၁၀၇:၄၃.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-2-E ၄၂၀ ¶၄

မိၤအး

ဖဲစီၤဒၤဝံးပၢတၢ်အခါ ပှၤအံၣ်စရ့လးဖိ ဒီးပှၤမိၤအးဖိတဖၣ် ဒုးလိာ်အသး ဒီးစီၤဒၤဝံး မၤနၢၤဝဲ ပှၤမိၤအးဖိတဖၣ်. ဒီးပှၤမိၤအးဖိတဖၣ်န့ၣ် ဘၣ်ဟ့ၣ်တၢ်ခိတၢ်သွဲလၢ စီၤဒၤဝံးအအိၣ်. လီၤဂာ်လၢ ဖဲတၢ်ဒုးဝံၤအလီၢ်ခံ ပှၤမိၤအးဖိအသုးဖိ သၢပူခံပူၤန့ၣ် ဘၣ်တၢ်မၤသံအီၤ. ဖျါလၢစီၤဒၤဝံး မၢအဝဲသ့ၣ် မံနီၤရဲၣ်လီၤအသးလၢ ဟီၣ်ခိၣ်လိၤ ဒီးထိၣ်အဝဲသ့ၣ်ဝံၤ စီၤဒၤဝံး မၢပှၤမၤသံကွံာ်အဝဲသ့ၣ် သၢပူခံပူ ဒီးလၢအအိၣ်တ့ၢ်တပူန့ၣ် အပာ်မူဝဲ. (၂ မူၤ ၈:၂, ၁၁, ၁၂; ၁ ကွဲး ၁၈:၂, ၁၁) စီၤယဟိၤယဒါ အဖိခွါစီၤဘနါယၤ “မၤသံ ပှၤမိၤအးဖိ စီၤအရံၤအ့လးအဖိခွါခံဂၤ” န့ၣ် ဘၣ်သ့ၣ်သ့ၣ် ကမ့ၢ်ဝဲလၢတၢ်ဒုးတခါဃီန့ၣ်လီၤ. (၂ မူၤ ၂၃:၂၀; ၁ ကွဲး ၁၁:၂၂) စီၤဒၤဝံးမၤနၢၤဝဲ ပှၤမိၤအးဖိအဃိ ဝံအတၢ်စံးပာ်လၢ စီၤဘံးလၣ် တဲဆိပာ်စၢၤဝဲလၢ အပူၤကွံာ်အနံၣ် ၄၀၀ န့ၣ် ဟဲလၢထီၣ်ပှဲၤထီၣ်ဝဲ. အတဲဝဲလၢ “ဆၣ်တဖျၢၣ် ကဟဲထီၣ်လၢ ယၤကိာ်အအိၣ် ဒီးဘီမုၢ် အနီၣ်ထိးဘိန့ၣ် ကဟဲထီၣ်လၢ အံၣ်စရ့လး အအိၣ် ဒီးအဝဲ ကတီၢ်သ့ၣ်ဖး မိၤအး အခိၣ်တိသၣ် ဒီးပှၤလၢ အစုဆူၣ်ခီၣ်တကးတဖၣ် အခိၣ်သၣ်ဃံလီၤ.” (၄ မိၤ ၂၄:၁၇) ဖဲပှၤကွဲးထါစံးထီၣ်ပတြၢၤ ကွဲးဝဲလၢ မိၤအး မ့ၢ်ဝဲ “သပၢၤလၢ တၢ်သ့ဃၢၤတၢ်” အခါ ဘၣ်သ့ၣ်သ့ၣ် အကအဲၣ်ဒိးတဲဝဲဘၣ်ဃးဒီး တၢ်ဒုးလၢ စီၤဒၤဝံး မၤနၢၤဝဲတခါအံၤ.—စံး ၆၀:၈; ၁၀၈:၉.

ijwyp-E ၉၀

ပဟးဆှဲး တၢ်ထံၣ်လၢ အတဂ့ၤဘၣ် ကသ့ဒ်လဲၣ်

တၢ်လၢနမၤသ့

• အိၣ်ဒီးတၢ်ထံၣ်လၢအကြၢးအဘၣ်လၢ နတၢ်ကမၣ်အဖီခိၣ်.

လံာ်စီဆှံတဲဝဲလၢ “လၢဟီၣ်ခိၣ်ချၢအံၤ ပှၤတီပှၤလိၤလၢ အမၤတၢ်လၢအဘၣ်ထီဘိ ဒီးတမၤကမၣ်တၢ် နီတဘျီဘၣ်န့ၣ် တအိၣ်နီတဂၤဘၣ်.” (စံၣ်တဲၤတဲလီၤတၢ် ၇:၂၀) တၢ်လၢပှၤဟီၣ်ခိၣ်ဖိန့ၣ် အမၤကမၣ်ဘၣ်တၢ်သ့လီၤ. အဃိ နမ့ၢ်မၤကမၣ်ဘၣ်တၢ်န့ၣ် တမ့ၢ်တၢ်လၢ အလီၤကမၢကမၣ်ဘၣ်. ဒီးအခီပညီတမ့ၢ်လၢ နကဲပှၤလၢ ပှၤသူအီၣ်အီၤ တသ့ဘၣ်န့ၣ်ဘၣ်.

နအိၣ်ဒီးတၢ်ထံၣ်လၢ အကြၢးအဘၣ် ကသ့ဒ်လဲၣ်– ဆဲးမၤဂ့ၤထီၣ်နသး ဘၣ်ဆၣ် တဘၣ်မုၢ်လၢ်လၢ နကကဲထီၣ် ပှၤလၢပှၤပှဲၤတဂ့ၤ. ခ့လ့း လၢအကဲပှၤသးစၢ်တဂၤန့ၣ် တဲဝဲလၢ “ယဂုာ်ကျဲးစၢး ဒ်သိးယတဆိကမိၣ်ထဲ ယတၢ်ကမၣ်တဂ့ၤအဂီၢ်. ဒီးယဟံးန့ၢ်တၢ်မၤလိလၢ ယတၢ်ကမၣ်လၢအပူၤကွံာ် ဒ်သိးယဆဲးမၤဂ့ၤထီၣ် ယသးကသ့အဂီၢ်.”

• ထိၣ်သတြီၤနသးဒီး ပှၤဂၤတဂ့ၤ.

လံာ်စီဆှံ တဲဝဲလၢ “မ်ပသုတကဲထီၣ် ပှၤလၢအပာ်ထီၣ်ထီအသးတဂ့ၤ, တဘၣ်ဒုးအိၣ်ထီၣ် တၢ်ပြၢလိာ်သးတဂ့ၤ ဒီးတဘၣ် သူၣ်က့ၣ်သးကါလိာ်သးတဂ့ၤ.” (ကလၤတံ ၅:၂၆) ဖဲနကွၢ်လီၤ တၢ်ဂီၤလၢ စိၤၡၢၤမံဒံယါအခါ နမ့ၢ်တူၢ်ဘၣ်လၢ နသကိးတကွဲမုာ်နၤ ဖဲန့ၣ်အခါဘၣ်န့ၣ် ဘၣ်သ့ၣ်သ့ၣ် နသးတမုာ်ဘၣ် ဒီးနကသးထီၣ်ဘၣ် နသကိး.

နအိၣ်ဒီးတၢ်ထံၣ်လၢ အကြၢးအဘၣ် ကသ့ဒ်လဲၣ်– သ့ၣ်နီၣ်ထီၣ်လၢ တမ့ၢ်လၢ ပှၤကွဲမုာ်နၤ ကသ့ဝဲကိးဘျီဒဲးဘၣ်. ထဲဒၣ် နကွၢ်တၢ်ဂီၤလၢ စိၤၡၢၤမံဒံယါန့ၣ် တမ့ၢ်လၢ နကသ့ၣ်ညါ တၢ်ဂ့ၢ်နီၢ်ကီၢ် ခဲလၢာ်ဘၣ်. အလဲးစံၤ လၢအမ့ၢ် ပှၤသးစၢ်တဂၤန့ၣ် အတဲဝဲလၢ “လၢစိၤၡၢၤမံဒံယါန့ၣ် ညီနုၢ် ပှၤပာ်ထီၣ်ဝဲ တၢ်လၢအမုာ်တဖၣ်. ဘၣ်ဆၣ် တၢ်လၢအတမုာ်ဘၣ်န့ၣ် ညီနုၢ်ပှၤတပာ်ထီၣ်ဝဲဘၣ်.”

• ကဲထီၣ်ပှၤလၢ အမၤဃူမၤဖိးတၢ်—လီၤဆီဒၣ်တၢ် လၢဟံၣ်ဖိဃီဖိအပူၤ.

လံာ်စီဆှံ တဲဝဲလၢ “ဒ်သုမၤသ့အသိး ဂုာ်ကျဲးစၢး အဂ့ၤကတၢၢ်ဒ်သိး သုကအိၣ်ဃူအိၣ်ဖိးဒီး ပှၤကိးဂၤဒဲးတက့ၢ်.” (ရိမ့ၤ ၁၂:၁၈) တၢ်လၢပှၤဂၤ မၤဝဲန့ၣ် နတြီအီၤတသ့ ခဲလၢာ်ဘၣ်. သနာ်က့ နကမၤဆၢက့ၤအီၤ ဒ်လဲၣ်န့ၣ် နဃုထၢသ့ နဃုထၢလၢ နကအိၣ်ဃူအိၣ်ဖိးဒီး ပှၤဂၤသ့.

ပအိၣ်ဒီးတၢ်ထံၣ်လၢ အကြၢးအဘၣ် ကသ့ဒ်လဲၣ်– တဘၣ်ဟ့ၣ်အခွဲးလၢ နဟံၣ်ဖိဃီဖိ တၢ်ရ့လိာ်သး ကနးဒိၣ်ထီၣ်တဂ့ၤ. လၢတၢ်န့ၣ်အလီၢ် ပကဘၣ်မၤဃူမၤဖိးတၢ် ဒ်သိးပတၢ်ရ့လိာ်သး ကဂ့ၤဒိၣ်ထီၣ်အဂီၢ်. မလံဒၤ လၢအမ့ၢ် ပှၤသးစၢ်တဂၤန့ၣ် တဲဝဲလၢ “ပတလၢပှဲၤနီတဂၤဘၣ် အဃိ တဘျီမ့တမ့ၢ် တဘျီန့ၣ် ပကမၤကမၣ်ဘၣ်လိာ်ပသးသ့. အဃိ ပကအိၣ်ဃူအိၣ်ဖိး ဒီးပှၤဂၤဧါ တအိၣ်ဃူအိၣ်ဖိးဘၣ်ဧါန့ၣ် ပဃုထၢသ့.”

• ပာ်ဖျါထီၣ် တၢ်စံးဘျုးစံးဖှိၣ်.

လံာ်စီဆှံ တဲဝဲလၢ “ပာ်ဖျါထီၣ် တၢ်စံးဘျုးစံးဖှိၣ် ထီဘိတက့ၢ်.” (ကလီးစဲ ၃:၁၅) နမ့ၢ်ကဲ ပှၤလၢအသးအိၣ် စံးဘျုးစံးဖှိၣ်တၢ်န့ၣ် အကမၤစၢၤနၤဒ်သိး နတသးစၢၢ်ဆၢထဲ တၢ်လၢအလဲၤကမၣ်အသးလၢ နတၢ်အိၣ်မူအပူၤဘၣ်. ကမၤစၢၤနၤဒ်သိး နကသးစၢၢ်ဆၢ တၢ်အဂ့ၤလၢ အကဲထီၣ်အသးလၢ နတၢ်အိၣ်မူအပူၤစ့ၢ်ကီး.

နအိၣ်ဒီးတၢ်ထံၣ်လၢ အကြၢးအဘၣ် ကသ့ဒ်လဲၣ်– သ့ၣ်နီၣ်ထီၣ်လၢ တၢ်ကီတၢ်ခဲန့ၣ် ကအိၣ်ဝဲ သနာ်က့ တဘၣ်သးပ့ၤနီၣ် တၢ်အဂ့ၤလၢ အကဲထီၣ်အသးလၢ နတၢ်အိၣ်မူအပူၤတဂ့ၤ. ရံးဘခၤ လၢအမ့ၢ် ပိာ်မုၣ်သးစၢ်တဂၤန့ၣ် တဲဝဲလၢ “တနံၤဘၣ်တနံၤန့ၣ် ယကွဲးလီၤ တၢ်အဂ့ၤတမံၤလၢ အကဲထီၣ်အသးလၢ ယတၢ်အိၣ်မူပူၤ. ယမၤဒ်န့ၣ် ဒ်သိး ယကသ့ၣ်နီၣ်ထီၣ်လၢ တၢ်အဂ့ၤလၢ ယဆိကမိၣ်ထီၣ်သ့န့ၣ် အိၣ်ဒီဒူၣ်.”

• သမံသမိးလီၤက့ၤ နတၢ်ရ့တံၤရ့သကိး.

လံာ်စီဆှံ တဲဝဲလၢ “တၢ်ရ့လိာ်လၢ အတဂ့ၤဘၣ်တဖၣ်န့ၣ် မၤဟးဂီၤဝဲ လုၢ်လၢ်လၢအဂ့ၤတဖၣ်လီၤ.” (၁ ကရံၣ်သူး ၁၅:၃၃) နမ့ၢ်ရ့ဒီး ပှၤလၢ အကဒူးကဒ့ၣ်တၢ်, အဒုၣ်ဒွဲၣ်စံးအၢပှၤဂၤ ဒီးအသးထီၣ်တၢ်ဆူၣ်န့ၣ် အဝဲသ့ၣ် အတၢ်ပာ်သူၣ်ပာ်သး လုၢ်ဘၢနၤသ့.

နအိၣ်ဒီးတၢ်ထံၣ်လၢ အကြၢးအဘၣ် ကသ့ဒ်လဲၣ်– နသကိးတဂၤ မ့ၢ်ထံၣ်ဘၣ်ဒီး တၢ်ကီတၢ်ခဲန့ၣ် ဘၣ်သ့ၣ်သ့ၣ် အဝဲကအိၣ်ဒီး တၢ်ထံၣ်လၢ အတဂ့ၤတဘၣ် တစိၢ်တလီၢ်. ဖဲန့ၣ်အခါန့ၣ် နမၤစၢၤအီၤသ့ ဘၣ်ဆၣ် တဘၣ်ဟ့ၣ်အခွဲးလၢ အတၢ်ကီတၢ်ခဲတဖၣ် ကဒုးအိၣ်ထီၣ် နတၢ်ထံၣ်လၢတဂ့ၤဘၣ်န့ၣ်တဂ့ၤ. မံးၡဲ လၢအမ့ၢ်ပိာ်မုၣ်သးစၢ်တဂၤန့ၣ် တဲဝဲလၢ “နတကြၢးရ့ထဲ ပှၤလၢအအိၣ်ဒီး တၢ်ထံၣ်လၢအတဂ့ၤတဖၣ်န့ၣ်ဘၣ်. နမ့ၢ်အိၣ်ပာ်စၢၤဒီးတၢ်ထံၣ်လၢ အတဂ့ၤလံန့ၣ် နမ့ၢ်ရ့ဒီး ပှၤလၢအအိၣ်ဒီးတၢ်ထံၣ်လၢ အတဂ့ၤန့ၣ် နတၢ်ထံၣ်လၢအတဂ့ၤဘၣ် ကဟဲအါဒိၣ်ထီၣ်.”

လါနိၣ်ဝ့ဘၢၣ် ၂၅–လါဒံၣ်စ့ဘၢၣ် ၁

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၀၉-၁၁၂

ဆီၣ်ထွဲ ပစီၤပၤယ့ၣ်ၡူး

တၢး၀၆-E ၉/၁ ၁၃ ¶၆

လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ ယဲၢ်ဘ့ၣ်တဘ့ၣ်အဂီၢ်

၁၁၀:၁, ၂—ဖဲ “[စီၤဒၤဝံးအ] ကစၢ်” ယ့ၣ်ၡူးခရံာ် ဆ့ၣ်နီၤလၢ ကစၢ်ယွၤအစုထွဲ အခါ အဝဲမၤမနုၤလဲၣ်. ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ အဝဲက့ၤထီၣ်လၢမူခိၣ် ဒီးအအိၣ်ခိးတၢ်လၢ ကစၢ်ယွၤအစုထွဲ တုၤလၢ ၁၉၁၄ ဒီးအဝဲကဲထီၣ်ဘၣ်စီၤပၤ. ဖဲအအိၣ်ခိးတၢ် အဆၢကတီၢ် အဝဲပၢဆှၢဝဲ ပှၤလၢအဘၣ်တၢ်ဒိးဖှူအီၤတဖၣ် ဒီးဟံးစုနဲၣ်ကျဲ အဝဲသ့ၣ် လၢတၢ်စံၣ်တဲၤတဲလီၤ ဒီးတၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ် တၢ်မၤအပူၤ. တကးဒံးဘၣ် ယ့ၣ်ၡူးကတဲာ်ကတီၤ အဝဲသ့ၣ်လၢ ကပၢတၢ်ဒီးအီၤလၢ ယွၤအဘီအမုၢ်အပူၤ.—မးသဲ ၂၄:၁၄; ၂၈:၁၈-၂၀; လူၤကၣ် ၂၂:၂၈-၃၀.

တၢး၀၀-E ၄/၁ ၁၈ ¶၃

ပှၤလၢအထီဒါ ကစၢ်ယွၤန့ၣ် တမၤနၢၤတၢ်ဘၣ်

^၃ စးထီၣ်လၢ ၁၉၀၀ နံၣ်အလီၢ်ခံန့ၣ် ပှၤထီဒါဝဲ ယဟိဝၤယွၤ အခ့အပှၤတဖၣ်. ဒီးလၢထံကီၢ်အါဘ့ၣ်န့ၣ် ပှၤအၢပှၤသီတဖၣ် ဂုာ်ကျဲးစၢး မၤပတုာ်ဝဲ ပတၢ်စံၣ်တဲၤတဲလီၤ ဘီမုၢ်တၢ်သးခုကစီၣ်. အဝဲသ့ၣ်န့ၣ် ပဒုၣ်ပဒါ အဒိၣ်ကတၢၢ် လၢအမ့ၢ်မုၣ်ကီၤလံၢ်န့ၣ် ဒိၣ်စိလၢ အဝဲသ့ၣ်အဖီခိၣ်. ဒီးမုၣ်ကီၤလံၢ်န့ၣ်အ “ဟးဝ့ၤဝီၤ ဒ်ခ့ယုၢ်လၢ အကညီၤတၢ် ရုၢ်ရုၢ်အသိး ဒီးဃုပှၤတဂၤဂၤလၢ အကယူၢ်လီၤကွံာ်ဝဲ.” (၁ ပ့းတရူး ၅:၈) ဖဲ ၁၉၁၄ န့ၣ် “တၢ်ဆၢကတီၢ်လၢ အဘၣ် တၢ်ပာ်ပနီၣ်အီၤ လၢပှၤကလုာ်တဖၣ်အဂီၢ်” န့ၣ်ကတၢၢ်ကွံာ်ဝဲ. ဒီးဖဲတၢ်ဆၢကတီၢ်အံၤ ကတၢၢ်ကွံာ်အခါ ယဟိဝၤယွၤ ပာ်ထီၣ်ယ့ၣ်ၡူး လၢစီၤပၤ ဒီးမၢယ့ၣ်ၡူး ‘လဲၤမၤနၢၤတၢ်လၢ အဒုၣ်အဒါတဖၣ် အကျါ.’ (လူၤကၣ် ၂၁:၂၄; စံးထီၣ်ပတြၢၤ ၁၁၀:၂) အဃိ ယ့ၣ်ၡူးသူဝဲ အတၢ်စိတၢ်ကမီၤ ဒီးတၢၤလီၤကွံာ် မုၣ်ကီၤလံၢ်လၢ ဟီၣ်ခိၣ်လိၤ. မုၣ်ကီၤလံၢ် သ့ၣ်ညါဝဲလၢ အတၢ်ဆၢကတီၢ် အိၣ်ထဲတစဲးဖိအဃိ အဝဲသးထီၣ်ဝဲ ခရံာ်ဖိလၢ အဘၣ်တၢ်ဒိးဖှူအီၤတဖၣ် ဒီးခရံာ်ဖိအဂၤတဖၣ်. (လီၣ်ဖျါ ၁၂:၉, ၁၇) ဒုၣ်ဒါလၢ အထီဒါကစၢ်ယွၤတဖၣ်အံၤ တၢ်ကမၤအသးဒီး အဝဲသ့ၣ်ဒ်လဲၣ်.

be-E ၇၆ ¶၂

ဆဲးလဲၤထီၣ်လဲၤထီ

ဒ်သိး နသူနတၢ်သ့တၢ်ဘၣ်ကသ့အဂီၢ် နကဘၣ်စးထီၣ်မၤတၢ် တမံၤမံၤ. မ့ၢ်နကွဲမုာ် ဒီပုၢ်ဝဲၢ်အဂၤလၢ ကဟးစံၣ်တဲၤတဲလီၤတၢ်ဒီးနၤဧါ. မ့ၢ်နဃုတၢ်ခွဲးတၢ်ယာ်လၢ နကမၤစၢၤပှၤအသီ, ပှၤသးစၢ် မ့တမ့ၢ် ပှၤလၢ အတၢ်အိၣ်ဆူၣ်အိၣ်ချ့တဂ့ၤဘၣ် လၢနတၢ်အိၣ်ဖှိၣ်ပူၤဧါ. ဒီးနမၤကဆှဲကဆှီတၢ်အိၣ်ဖှိၣ်လီၢ် မ့တမ့ၢ် နမၤစၢၤတၢ်လၢ တၢ်အိၣ်ဖှိၣ်ဖးဒိၣ် ဒီးကဝီၤတၢ်အိၣ်ဖှိၣ် ဘၣ်ဝဲအခါဧါ. နတီၣ်ထီၣ်လၢ နကမၤပှၤလဲၤလၢညါ မၤစၢၤတၢ်ဧါ. နမၤပှၤလဲၤလၢညါ မ့တမ့ၢ် လဲၤမၤစၢၤတၢ်လၢ တၢ်အိၣ်ဖှိၣ်လၢ အလိၣ်ဘၣ်တၢ်မၤစၢၤဧါ. ဒီးနမ့ၢ်ကဲ ဒီပုၢ်ဝဲၢ်ခွါန့ၣ် နဂုာ်ကျဲးစၢး ဒ်သိးဒီး နကကဲထီၣ်ဘၣ် တၢ်အိၣ်ဖှိၣ် အပှၤမၤစၢၤတၢ် မ့တမ့ၢ် တၢ်အိၣ်ဖှိၣ်သးပှၢ်ဧါ. နမ့ၢ်သးအိၣ်မၤစၢၤပှၤဂၤ ဒီးတူၢ်လိာ်မူဒါန့ၣ် အပာ်ဖျါထီၣ်ဝဲလၢ နကဲပှၤလၢ အလဲၤထီၣ်လဲၤထီ.—စံးထီၣ်ပတြၢၤ ၁၁၀:၃.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-1-E ၅၂၄ ¶၂

တၢ်အၢၣ်လီၤအီလီၤ

တၢ်အၢၣ်လီၤအီလီၤလၢ အဘၣ်ဃးဒီး ပှၤလုၢ်တၢ်ဒိၣ် ဒ်မၤလကံစဒ့း. တၢ်အၢၣ်လီၤအီလီၤတခါအံၤ ပထံၣ်ဘၣ်အီၤဖဲ စံးထီၣ်ပတြၢၤ ၁၁၀:၄. ဒီးဖဲ ဧ့ၤဘြံၤ ၇:၁-၃, ၁၅-၁၇ န့ၣ် ပှၤကွဲးလံာ်ဧ့ၤဘြံၤ ပာ်ဖျါထီၣ်ဝဲလၢ တၢ်အၢၣ်လီၤအံၤ ဘၣ်ဃးဒီး ယ့ၣ်ၡူးခရံာ်. ဒီးယဟိဝၤယွၤ မၤဝဲတၢ်အၢၣ်လီၤအံၤ ဒီးယ့ၣ်ၡူးခရံာ်ထဲတဂၤ. ဖဲယ့ၣ်ၡူး မၤဝဲ ဘီမုၢ်အတၢ်အၢၣ်လီၤအီလီၤဒီး အပျဲၢ်အဘီၣ်တဖၣ်အခါ အဖျါလီၤဂာ်လၢ အတဲဝဲဘၣ်ဃးဒီး တၢ်ဂ့ၢ်အံၤ. (လူၤ ၂၂:၂၉) ခီဖျိလၢ ယဟိဝၤယွၤ မၤတၢ်အၢၣ်လီၤအီလီၤ ဒီးယ့ၣ်ၡူးအဃိ ယ့ၣ်ၡူးခရံာ်လၢ အကဲဝဲ ကစၢ်ယွၤအဖိခွါ လၢမူခိၣ်န့ၣ် ကကဲဘၣ် ပှၤလုၢ်တၢ်ဒိၣ် ဒ်မၤလကံစဒ့းအသိး. မၤလကံစဒ့းန့ၣ် အကဲဝဲ စီၤပၤ ဒီးပှၤလုၢ်တၢ်ဒိၣ်လၢ ဟီၣ်ခိၣ်ချၢ. မ့မ့ၢ် ယ့ၣ်ၡူးန့ၣ် အကကဲထီၣ်ဝဲ စီၤပၤဒီး ပှၤလုၢ်တၢ်ခိၣ် အဒိၣ်ကတၢၢ် လၢမူခိၣ်. ဒီးဖဲယ့ၣ်ၡူး က့ၤထီၣ်လၢ မူခိၣ်ဝံၤအလီၢ်ခံ အဝဲဒိးန့ၢ်ဘၣ်ဝဲ မူဒါအံၤ. (ဧ့ၤ ၆:၂၀; ၇:၂၆, ၂၈; ၈:၁) တၢ်အၢၣ်လီၤအီလီၤအံၤ ကအိၣ်ဝဲ လီၤထူလီၤယိာ်အဃိ ယ့ၣ်ၡူးန့ၣ် အကကဲဝဲ စီၤပၤဒီး ပှၤလုၢ်တၢ်ခိၣ် အဒိၣ်ကတၢၢ် လီၤထူလီၤယိာ် လၢယဟိဝၤယွၤ အတၢ်ဟံးစုနဲၣ်ကျဲဖီလာ်.—ဧ့ၤ ၇:၃.

ijwfq ၂၃

ဘၣ်မနုၤအဃိ ယဟိဝၤပှၤအုၣ်အသးတဖၣ် တပၣ်ဃုာ်လၢ တၢ်ဒုးတၢ်ယၤအပူၤဘၣ်လဲၣ်

တၢ်ဂ့ၢ်လၢ လာ်တဖၣ်အံၤအဃိ ယဟိဝၤပှၤအုၣ်အသးတဖၣ် တပၣ်ဃုာ်လၢ တၢ်ဒုးတၢ်ယၤပူၤဘၣ်လီၤ–

၁. တၢ်ဒိကနၣ် ကစၢ်ယွၤ အကလုၢ်အဃိလီၤ. လံာ်စီဆှံစံးဝဲလၢ ယွၤအခ့အပှၤတဖၣ် “ကပိာ်က့ၤအနးလၢ ထဲၣ်အကနၣ်” ဒီး “တမၤလိ တၢ်ဒုးသုးလၢၤဘၣ်လီၤ.”—ယၡါယၤ ၂:၄.

၂. တၢ်ဒိကနၣ် ယ့ၣ်ၡူး အကလုၢ်အဃိလီၤ. ယ့ၣ်ၡူးစံးဝဲ တၢ်မၢဖိပ့းတရူးလၢ “ဖျီၣ်နုာ်က့ၤနနးဆူ အလီၢ်ဒၣ်ဝဲအပူၤတက့ၢ်. အဂ့ၢ်ဒ်အံၤ, ကယဲၢ်ပှၤလၢအဟံးနး, ကဟးဂီၤလၢနးကိးဂၤဒဲးလီၤ.” (မးသဲ ၂၆:၅၂) လၢတၢ်န့ၣ်အဃိ ယ့ၣ်ၡူးပာ်ဖျါဝဲလၢ ပှၤပိာ်အခံတဖၣ်န့ၣ် တစိာ်တၢ်ဒုးတၢ်ယၤ အတၢ်စုကဝဲၤဘၣ်လီၤ.

ယ့ၣ်ၡူးအပျဲၢ်အဘီၣ်တဖၣ် ဒိကနၣ်အတၢ်မၤလိာ်လၢ “တဘၣ်ဃးဘၣ်ဒီးဟီၣ်ခိၣ်” ခီဖျိ ဟံးဃာ်ဂၢၢ်ကျၢၤ တၢ်အိၣ်ဘၢၣ်စၢၤ လၢထံဂ့ၢ်ကီၢ်ဂ့ၢ်န့ၣ်လီၤ. (ယိၤဟၣ် ၁၇:၁၆) အဝဲသ့ၣ်တပူထီၣ်ထီဒါ ဘၣ်ဃးသုးအတၢ်ဖံးတၢ်မၤတဖၣ် မ့တမ့ၢ် တမၤတံာ်တာ် ပှၤလၢအဃုထၢလၢ ကမၤသုးအတၢ်မၤတဖၣ်ဘၣ်.

၃. တၢ်အဲၣ်ပှၤဂၤအဃိလီၤ. ယ့ၣ်ၡူးမၤလိာ် အပျဲၢ်အဘီၣ်တဖၣ်လၢ ‘ကအဲၣ်လိာ်ကွံလိာ်သး သကိးသကိး’ လီၤ. (ယိၤဟၣ် ၁၃:၃၄, ၃၅) ယ့ၣ်ၡူးအပျဲၢ်အဘီၣ်တဖၣ်န့ၣ် မ့ၢ်ဟီၣ်ခိၣ်ဒီဘ့ၣ် ဒီပုၢ်ဝဲၢ်တၢ်ကရၢကရိအဃိ ပှၤလၢအိၣ်လၢ တၢ်ကရၢကရိအံၤအပူၤတဂၤန့ၣ် တပၣ်ဃုာ်လၢ တၢ်ဒုးလိာ်သးဒီးအဒီပုၢ်ဝဲၢ်မုၣ် မ့တမ့ၢ် ဒီပုၢ်ဝဲၢ်ခွါ နီတဘျီဘၣ်လီၤ.—၁ ယိၤဟၣ် ၃:၁၀–၁၂.

၄. ခရံာ်ဖိလၢ တၢယၤဖှိၣ်တဖၣ် အဒိအတဲာ်အဃိလီၤ. လံာ်တဘ့ၣ် (Encyclopedia of Religion and War) ပာ်ဖျါဝဲလၢ “ယ့ၣ်ၡူးအပျဲၢ်အဘီၣ် လၢညါတဖၣ်န့ၣ် ဂ့ၢ်လိာ်ဝဲ တၢ်ဒုးတၢ်ယၤဒီး သုးအတၢ်မၤတဖၣ်လီၤ.” မ့ၢ်လၢအၢၣ်လီၤတူၢ်လိာ်ဝဲလၢ တၢ်မၤညီနုၢ်တဖၣ်အံၤ “တဘၣ်လိာ်ဖိးဒ့လိာ်သးဒီး ယ့ၣ်ၡူးအတၢ်သိၣ်တၢ်သီဘၣ်ဃးတၢ်အဲၣ် ဒီးတၢ်မၤလိာ်လၢ ကဘၣ်အဲၣ်ဒုၣ်ဒါန့ၣ်ဘၣ် အဃိလီၤ.” ဒ်န့ၣ်အသိး ဘၣ်ဃးဒီး ယ့ၣ်ၡူးအပျဲၢ်အဘီၣ်လၢညါတဖၣ်န့ၣ် ကၠၢမနံၣ် အပှၤမၤလိယွၤဂ့ၢ်ပီညါ ဖံထၢၣ်မ့ၣ်ဟိ စံးဝဲလၢ “တၢ်ကဲထီၣ်ခရံာ်ဖိဒီး သုးဖိတဂၤန့ၣ် ဆိကမိၣ်ဝဲသ့ၣ်လၢ တဃူလိာ်ဖိးလိာ်သးဘၣ်လီၤ.”

တၢ်မၤစၢၤ ပှၤအတဝၢ

ယဟိဝၤပှၤအုၣ်အသးတဖၣ်န့ၣ် မ့ၢ်ပှၤလၢမၤကဲဘျုး ပှၤကညီအတၢ်ကရၢကရိဒီး တမၤပျံၤမၤဖုး ထံကီၢ်အတၢ်အိၣ်ပူၤဖျဲးလၢ အဝဲသ့ၣ်အိၣ်အလီၢ်ဘၣ်. ပပာ်ကဲတၢ်န့ၢ်စိန့ၢ်ကမီၤ ဘၣ်ဃးပဒိၣ်တဖၣ်, လၢအလီၤပလိာ်ဒီး လံာ်စီဆှံအတၢ်မၤလိာ်တဖၣ်အံၤလီၤ.

• “မ်ပှၤပာ်အသးလၢ တၢ်စိတၢ်ကမီၤ အဒိၣ်တဖၣ်အဖီလာ် ကိးအဂၤဒဲးတက့ၢ်.”—ရိမ့ၤ ၁၃:၁.

• “ဟ့ၣ်ကဲစၢ်လၢ ကဲစၢ်အတၢ်, ဒီးယွၤလၢ ယွၤအတၢ်တက့ၢ်.”—မးသဲ ၂၂:၂၁.

လၢတၢ်န့ၣ်အဃိ, ပစူၢ်တၢ်ဘျၢ, ပဟ့ၣ်တၢ်ခိတၢ်သွဲ, ဒီးပမၤသကိးဃုာ်တၢ်ဒီး ပဒိၣ်ပပှၢ်တဖၣ် အတၢ်ဂုာ်ကျဲးစၢးမၤတၢ်လၢ ကမျၢၢ်အဘျုးအဂီၢ်လီၤ.

လါဒံၣ်စ့ဘၢၣ် ၂-၈

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၁၃-၁၁၈

ပပာ်ဖျါထီၣ် တၢ်စံးဘျုးစံးဖှိၣ် ယဟိဝၤယွၤ ကသ့ဒ်လဲၣ်

တၢး၀၁-E ၁/၁ ၁၁ ¶၁၃

ပျဲလၢ တၢ်အဲၣ်ထိၣ်ဟူးထိၣ်ဂဲၤထီၣ်နၤ

^၁၃ ပမ့ၢ်ကွၢ်တၢ်ကတိၤလၢ ယ့ၣ်ၡူးတဲဝဲန့ၣ် ပသ့ၣ်ညါဘၣ်လၢ တၢ်လၢအရ့ဒိၣ်ကတၢၢ်န့ၣ် မ့ၢ်ဝဲပကဘၣ်အဲၣ် ယဟိဝၤယွၤ. ဘၣ်ဆၣ် ဖဲပအိၣ်ဖျဲၣ်ထီၣ်အခါ ပတအိၣ်ဖျဲၣ်ထီၣ်ဃုာ်ဒီး တၢ်အဲၣ်ယဟိဝၤယွၤ လၢလၢပှဲၤပှဲၤဘၣ်. အဃိ ပကဘၣ်ဒုးအိၣ်ထီၣ် တၢ်အဲၣ်ယဟိဝၤယွၤ. ဖဲပနၢ်ဟူဘၣ် ယဟိဝၤယွၤအဂ့ၢ်အခါ ပအဲၣ်ဒိးသ့ၣ်ညါအါထီၣ်အဂ့ၢ်. ဒီးပမၤလိဘၣ်လၢ ယဟိဝၤယွၤတ့လီၤ ဟီၣ်ခိၣ်လၢ ပှၤဟီၣ်ခိၣ်ဖိတဖၣ်အဂီၢ်. (၁ မိၤၡ့ ၂:၅-၂၃) ဒီးပသ့ၣ်ညါဘၣ်လၢ အဝဲရ့ဒီး ပှၤဟီၣ်ခိၣ်ဖိတဖၣ်ဒ်လဲၣ်. ဒီးဖဲပှၤဟီၣ်ခိၣ်ဖိတဖၣ် မၤတၢ်ဒဲးဘးအခါ အဝဲတမၤဟးဂီၤကွံာ်ဝဲ တဘျီဃီဘၣ်. အဝဲကတဲာ်ကတီၤဝဲ တၢ်ပှ့ၤက့ၤလၢပဂီၢ်. (၁ မိၤၡ့ ၃:၁-၅, ၁၅) ဒီးအဝဲရ့ဒီး ပှၤလၢအအိၣ်ဒီး တၢ်သးတီတဖၣ်ဂ့ၤဂ့ၤ အဟ့ၣ်လီၤအဖိခွါ ဒ်သိးပတၢ်ဒဲးဘး ကပျၢ်ကွံာ်အဂီၢ်. (ယိၤဟၣ် ၃:၁၆, ၃၆) ပသ့ၣ်ညါဘၣ် တၢ်ဂ့ၢ်တဖၣ်အံၤအဃိ ပတၢ်စံးဘျုးစံးဖှိၣ် ယဟိဝၤယွၤ ဟဲအိၣ်အါထီၣ်. (ယၡါယၤ ၂၅:၁) စီၤဒၤဝံး တဲဝဲလၢ အအဲၣ်ယဟိဝၤယွၤ ခီဖျိလၢ ယဟိဝၤယွၤ ပာ်ဖျါထီၣ် တၢ်အဲၣ် ဒီးတၢ်သူၣ်အိၣ်သးအိၣ် လၢအဖီခိၣ်အဃိ. (စံးထီၣ်ပတြၢၤ ၁၁၆:၁-၉) ဆၢကတီၢ်ခဲအံၤ စ့ၢ်ကီး ယဟိဝၤယွၤ ပာ်ဖျါထီၣ် တၢ်သူၣ်အိၣ်သးအိၣ်လၢ ပဖီခိၣ်, အဟံးစုနဲၣ်ကျဲပှၤ, ဟ့ၣ်ဂံၢ်ဟ့ၣ်ဘါပှၤ ဒီးမၤဆူၣ်ထီၣ်ပသး. ပသ့ၣ်ညါ ယဟိဝၤယွၤ အဂ့ၢ်ဒံးအါထီၣ်န့ၣ် ပတၢ်အဲၣ်အီၤစ့ၢ်ကီး ဟဲဒိၣ်ထီၣ်ဝဲ.—စံးထီၣ်ပတြၢၤ ၃၁:၂၃; စဖါနယၤ ၃:၁၇; ရိမ့ၤ ၈:၂၈.

တၢး၀၉-E ၇/၁၅ ၂၉ ¶၄-၅

အိၣ်ဒီးတၢ်စံးဘျုးစံးဖှိၣ် ဒီးဟ့ၣ်တၢ်လၢသးဒီဖျၢၣ်

ပှၤကွဲးထါစံးထီၣ်ပတြၢၤ တဲဝဲလၢ “ယဟိဝၤယွၤ မၤဂ့ၤတၢ်လၢယဂီၢ် အိၣ်ဝဲဒီဒူၣ်အဃိ ယကဟ့ၣ်ဆၢက့ၤအီၤ မနုၤလဲၣ်.” (စံး ၁၁၆:၁၂) ဘၣ်မနုၤအဃိ အဝဲတဲဝဲ ဒ်န့ၣ်လဲၣ်. လၢအပူၤကွံာ်န့ၣ် ဖဲအဝဲထံၣ်ဘၣ် “တၢ်ကိၢ်တၢ်ဂီၤ ဒီးတၢ်သးအုး” အခါ ယဟိဝၤယွၤ မၤစၢၤအီၤ တကးဒံးဘၣ် ယဟိဝၤယွၤ “မၤပူၤဖျဲး [အီၤ] လၢတၢ်သံ.” အဃိ အဝဲအဲၣ်ဒိး “ဟ့ၣ်ဆၢက့ၤ” ယဟိဝၤယွၤလၢ ကျဲတဘိဘိ. အဃိ အဝဲမၤဝဲ မနုၤလဲၣ်. အဝဲတဲဝဲလၢ “တၢ်လၢယအၢၣ်လီၤ ယဟိဝၤယွၤန့ၣ် ယကမၤလၢပှဲၤအီၤ.” (စံး ၁၁၆:၃, ၄, ၈, ၁၀-၁၄) အဝဲပာ်လီၤအသး ဂၢၢ်ဂၢၢ်ကျၢၤကျၢၤလၢ ကမၤလၢပှဲၤ အတၢ်အၢၣ်လီၤလၢ အမၤဝဲဒီး ယဟိဝၤယွၤ ဒီးကမၤလၢပှဲၤ အမူဒါလၢ ယဟိဝၤယွၤ ဟ့ၣ်အီၤတဖၣ်.

ပဝဲစ့ၢ်ကီး ပမၤဒ်န့ၣ်သ့ခီဖျိ ပမၤထွဲ ကစၢ်ယွၤအတၢ်သိၣ်တၢ်သီ ဒီးအတၢ်ဟံးစုနဲၣ်ကျဲ လၢပတၢ်အိၣ်မူ ကိးသနၢၣ်ဒဲး. ဒီးပပာ်ဆိ တၢ်ဘူၣ်ထီၣ်ဘါထီၣ် ယဟိဝၤယွၤလၢ နီၣ်ဂံၢ်တၢ ဒီးပျဲလၢ ယဟိဝၤယွၤ အသးစီဆှံ ဟံးစုနဲၣ်ကျဲပှၤလၢ တၢ်ကိးမံၤဒဲးလၢ ပမၤအီၤ. (စံၣ် ၁၂:၁၃; ကလၤ ၅:၁၆-၁၈) နီၢ်ကီၢ်န့ၣ် ပဟ့ၣ်ဆၢက့ၤ ယဟိဝၤယွၤတၢ် လၢလၢပှဲၤပှဲၤတသ့ဘၣ် သနာ်က့ ပမ့ၢ်မၤကစၢ်ယွၤတၢ်မၤ လၢသးဒီဖျၢၣ်န့ၣ် ပကမၤသးခုအသး. (ကတိၤ ၂၇:၁၁) ပမၤသးခုဘၣ် ယဟိဝၤယွၤအသး လၢကျဲဒ်အံၤအဃိ ပသးခုစ့ၢ်ကီး.

တၢး၁၉.၁၁ ၂၂-၂၃ ¶၉-၁၁

ပဒိးန့ၢ်ဘၣ်တၢ်မၤလိလၢ လံာ် ၃ မိၤၡ့အပူၤသ့

^၉ တၢ်မၤလိခံခါတခါ– ပမၤယဟိဝၤယွၤအတၢ်မၤ ခီဖျိလၢ ပအဲၣ်ဒိး စံးဘျုးစံးဖှိၣ်အီၤ အဃိလီၤ. ဒ်သိးပကနၢ်ပၢၢ် တၢ်ဂ့ၢ်အံၤအဂီၢ် ခဲအံၤပကဘၣ်မၤလိ တၢ်ဂ့ၢ်လၢဘၣ်ဃးဒီး ပှၤအံၣ်စရ့လးဖိတဖၣ် အတၢ်လုၢ်မၤဃူမၤဖိးတၢ်လီၤ. လၢလံာ် ၃ မိၤၡ့အပူၤန့ၣ် ပမၤလိဘၣ်လၢ ပှၤအံၣ်စရ့လးဖိတဂၤ လုၢ်ထီၣ်တၢ်လုၢ်မၤဃူမၤဖိးတၢ် လၢအကပာ်ဖျါထီၣ် “တၢ်စံးဘျုးစံးဖှိၣ်” အဂီၢ်သ့လီၤ. (၃ မိၤၡ့ ၇:၁၁-၁၃, ၁၆-၁၈, ခ့ခါစှီၤကျိာ်) တၢ်သိၣ်တၢ်သီတအိၣ်လၢ အဝဲကဘၣ်မၤဝဲဒ်န့ၣ်ဘၣ် ဘၣ်ဆၣ် အဝဲမ့ၢ်အဲၣ်ဒိး ဟ့ၣ်လုၢ်ထီၣ်တၢ်လုၢ်အံၤန့ၣ် ဟ့ၣ်ဝဲသ့လီၤ. အဝဲအသးအိၣ်မၤဝဲဒ်အံၤ ခီဖျိလၢ အတၢ်အဲၣ်ယဟိဝၤယွၤအဃိလီၤ. ဖဲအဝဲလဲၤဟ့ၣ်လုၢ်ထီၣ် တၢ်ဟ့ၣ်အံၤအခါ အဝဲဒီးအဟံၣ်ဖိဃီဖိ ဒီးပှၤလုၢ်တၢ်အဒိၣ်တဖၣ် ကအီၣ်သကိး ဆၣ်ဖိကီၢ်ဖိလၢ အဘၣ်တၢ်ဟ့ၣ်လုၢ်ထီၣ်အီၤအညၣ် ဒ်သိးသိးလီၤ. ဘၣ်ဆၣ် ဆၣ်ဖိကီၢ်ဖိလၢ ပှၤဟ့ၣ်လုၢ်ထီၣ်အီၤအံၤ အကူာ်အခီတနီၤန့ၣ် ကဘၣ်မ့ၢ် ထဲလၢယဟိဝၤယွၤအဂီၢ်လီၤ. ဆၣ်ဖိကီၢ်ဖိ အကူာ်အခီ မနုၤတဖၣ်လဲၣ်.

^၁၀ တၢ်မၤလိသၢခါတခါ– မ့ၢ်လၢပအဲၣ် ယဟိဝၤယွၤ အဃိ ပမၤအတၢ်မၤ လၢအဂ့ၤကတၢၢ်လီၤ. ဆၣ်ဖိကီၢ်ဖိအသိန့ၣ် ယဟိဝၤယွၤထံၣ်ဝဲဒ် တၢ်လၢအဂ့ၤကတၢၢ်လီၤ. ဒီးအဝဲတဲဝဲလၢ ဆၣ်ဖိကီၢ်ဖိအကူာ်အခီတနီၤ ဃုာ်ဒီးအကလ့ၢ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ် လၢအဂီၢ်ဒိၣ်မးလီၤ. (ဖး ၃ မိၤၡ့ ၃:၆, ၁၂, ၁၄-၁၆ တက့ၢ်.) လီၤဆီဒၣ်တၢ် ဖဲပှၤအံၣ်စရ့လးဖိတဖၣ် ဟ့ၣ်လုၢ်ထီၣ်ဝဲ ဆၣ်ဖိကီၢ်ဖိ အကူာ်အခီတဖၣ်အံၤ ဒီးအသိအခါ ယဟိဝၤယွၤ ဘၣ်သူၣ်ဘၣ်သးဝဲဒိၣ်မးလီၤ. ပှၤအံၣ်စရ့လးဖိလၢ အဟ့ၣ်လုၢ်ထီၣ် ယဟိဝၤယွၤ လၢတၢ်လုၢ်အံၤန့ၣ် ပာ်ဖျါထီၣ်ဝဲလၢ အဝဲသ့ၣ် အဲၣ်ဒိးဟ့ၣ် ယဟိဝၤယွၤလၢ တၢ်လၢအဂ့ၤကတၢၢ်လီၤ. ဒ်န့ၣ်အသိး ယ့ၣ်ၡူးစ့ၢ်ကီး အသးအိၣ်ဟ့ၣ် ယဟိဝၤယွၤ တၢ်လၢအဂ့ၤကတၢၢ် ခီဖျိအမၤ ကစၢ်ယွၤအတၢ်မၤ လၢအသးဒီဖျၢၣ် လၢတၢ်အဲၣ်တၢ်ကွံအပူၤအဃိလီၤ. (ယိၤဟၣ် ၁၄:၃၁) တၢ်မၤကစၢ်ယွၤအတၢ်မၤန့ၣ် မ့ၢ်တၢ်သးခုလၢ ယ့ၣ်ၡူးအဂီၢ်ဒိၣ်မး ဒီးအဝဲအဲၣ်ကစၢ်ယွၤ အတၢ်သိၣ်တၢ်သီ ဒိၣ်မးလီၤ. (စံးထီၣ်ပတြၢၤ ၄၀:၈) ဖဲယဟိဝၤယွၤ ထံၣ်ဝဲလၢ ယ့ၣ်ၡူးသးအိၣ်မၤ အတၢ်မၤအခါ အဝဲကသးခုဒိၣ်မးလီၤ.

^၁၁ မ့ၢ်လၢပတၢ်မၤ ယဟိဝၤယွၤအတၢ်မၤန့ၣ် ပာ်ဖျါထီၣ်ဝဲလၢ ပအဲၣ်အီၤဒိၣ်မးအဃိ လီၤဂာ်ဒ်ပှၤလုၢ်ထီၣ် တၢ်လုၢ်မၤဃူမၤဖိးတၢ်အသိးလီၤ. ပဟ့ၣ်ယဟိဝၤယွၤ တၢ်လၢအဂ့ၤကတၢၢ် ဒီးပမၤဒ်န့ၣ် ခီဖျိလၢ ပအဲၣ်အီၤလၢ ပသးဒီဖျၢၣ်အဃိလီၤ. ယဟိဝၤယွၤထံၣ် ပှၤလၢအဘူၣ်ထီၣ်ဘါထီၣ်အီၤ လၢအကကွဲၢ်တဖၣ် မၤအတၢ်မၤခီဖျိလၢ အဝဲသ့ၣ်အဲၣ်အီၤ ဒီးအဲၣ်အတၢ်သိၣ်တၢ်သီအဃိ အဝဲကသးခုဒိၣ်မးလီၤ. ဒီးပသ့ၣ်ညါဘၣ်လၢ ယဟိဝၤယွၤ ထံၣ်ဒီးပာ်လုၢ်ပာ်ပှ့ၤဝဲ ပတၢ်မၤတဖၣ် တကးဒံးဘၣ် ပတၢ်အဲၣ်အီၤအဃိ ပသးမုာ်ထီၣ်လီၤ. အဒိ နသးမ့ၢ်ပှၢ် ဒီးနမၤကစၢ်ယွၤအတၢ်မၤ ထဲသိးဒီးနအဲၣ်ဒိးမၤအီၤ မ့ၢ်တသ့ဘၣ်န့ၣ် နနာ်သ့လၢ ယဟိဝၤယွၤ နၢ်ပၢၢ်နၤလီၤ. ဘၣ်သ့ၣ်သ့ၣ် နကတူၢ်ဘၣ်လၢ နမၤယဟိဝၤယွၤ အတၢ်မၤ တန့ၢ်အါအါဘၣ် သနာ်က့ နအဲၣ်ယဟိဝၤယွၤ ဒီးနမၤအတၢ်မၤ ဖဲတၢ်သ့အိၣ်ဒီးနၤန့ၣ် အဝဲသ့ၣ်ညါဝဲလီၤ. တသ့ဖဲအသ့ နမၤကစၢ်ယွၤအတၢ်မၤ လၢအဂ့ၤကတၢၢ်အဃိ အဝဲသးခုဒိၣ်မးလီၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၂-E ၅/၁၅ ၂၂ ¶၁-၂

ပှၤဖးလံာ်ဖိတဖၣ် အတၢ်သံကွၢ်

ပှၤကွဲးထါ စံးထီၣ်ပတြၢၤ တဲဝဲလၢ “ပှၤလၢအသးတီဒီး ယဟိဝၤယွၤတဖၣ် အတၢ်သံန့ၣ် မ့ၢ်တၢ်ၡူကွံာ်ဖးဒိၣ်တခါ လၢအဂီၢ်လီၤ.” (စံး ၁၁၆:၁၅) ယဟိဝၤယွၤ ပာ်လုၢ်ပာ်ပှ့ၤဝဲ ပှၤလၢအဘူၣ်ထီၣ်ဘါထီၣ်အီၤတဖၣ် အသးသမူ ကိးဂၤဒဲး. တၢ်ကတိၤဖဲ စံးထီၣ်ပတြၢၤ ၁၁၆ အပူၤန့ၣ် တမ့ၢ်ထဲ အအဲၣ်ဒိးတဲဝဲ ဘၣ်ဃးဒီး ပှၤတဂၤသံဝဲအဂ့ၢ်န့ၣ်ဘၣ်.

ဖဲပှၤဟ့ၣ်တၢ်စံၣ်တဲၤတဲလီၤလၢ ခရံာ်ဖိလၢအသံတဂၤ အဂီၢ်အခါ ခရံာ်ဖိတဂၤအံၤ အမ့ၢ်အိၣ်ဒီးတၢ်သးတီ တုၤလၢအသံ သနာ်က့ ပှၤတကြၢးသူဝဲ စံးထီၣ်ပတြၢၤ ၁၁၆:၁၅ န့ၣ်ဘၣ်. ဘၣ်မနုၤအဃိလဲၣ် မ့ၢ်လၢ လံာ်စီဆှံ တဆၢအံၤန့ၣ် အခီပညီ အိၣ်ဝဲအါမံၤသ့အဃိ. လံာ်စီဆှံတဆၢအံၤ အအဲၣ်ဒိးတဲဝဲ ယဟိဝၤယွၤ ပာ်လုၢ်ပာ်ပှ့ၤဝဲ ပှၤလၢအတီဒီးအီၤတဖၣ် အသးသမူဒိၣ်မး အဃိ အဝဲတဘၣ်သးဝဲလၢ အခ့အပှၤလၢ အအိၣ်ဒီးတၢ်သးတီတဖၣ် ကသံဝဲခဲလၢာ်ဘၣ်.—ကွၢ် စံးထီၣ်ပတြၢၤ ၇၂:၁၄; ၁၁၆:၈.

လါဒံၣ်စ့ဘၢၣ် ၉-၁၅

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၁၉:၁-၅၆

“ပိာ်ခွါသးစၢ်တဂၤ အိၣ်မူတၢ်အိၣ်မူလၢ အကဆှီ ကသ့ဒ်လဲၣ်”

တၢး၈၇-E ၁၁/၁ ၁၈ ¶၁၀

နအိၣ်ကဆှီလၢ နတၢ်အိၣ်မူ ကိးသနၢၣ်ဒဲးအပူၤဧါ

^၁၀ ဖဲ အ့းဖ့းစူး ၅:၅ န့ၣ်စီၤပီလူး ဟ့ၣ်ပလီၢ်ဝဲလၢ “သုသ့ၣ်ညါဒီး သုနၢ်ပၢၢ် လီၤတံၢ်လီၤဆဲးလၢ ပှၤလၢ အမၤကမၣ်မုၣ်ကမၣ်ခွါ မ့ၢ်ဂ့ၤ, ပှၤလၢ အမၤတၢ်လၢ အတကဆှီဘၣ်မ့ၢ်ဂ့ၤ, ပှၤလၢ အသးကွံတၢ်မ့ၢ်ဂ့ၤန့ၣ် (တၢ်သးကွံတၢ်န့ၣ် မ့ၢ်ဝဲတၢ်ဘါတၢ်ဂီၤတကလုာ်) တန့ၢ်သါဘၣ်တၢ်လၢ ခရံာ်ဒီးကစၢ်ယွၤ အဘီအမုၢ်အပူၤ နီတဂၤဘၣ်.” တနံၣ်ဘၣ်တနံၣ်န့ၣ် ပှၤလၢအကထိတဖၣ် ဘၣ်တၢ်သိၣ်ဃီၣ်အီၤ မ့တမ့ၢ် ဘၣ်တၢ်နီဟးထီၣ်ကွံာ်အီၤလၢ တၢ်အိၣ်ဖှိၣ်ပူၤ ခီဖျိလၢ အမၤကမၣ်မုၣ်ကမၣ်ခွါ လၢအ ‘မၤကမၣ်ဘၣ် အနီၢ်ခိအဃိ.’ (၁ ကရံၣ်သူး ၆:၁၈) အဝဲသ့ၣ် မၤဘၣ်ဝဲဒ်န့ၣ် မ့ၢ်လၢ အတ “အိၣ်ပလီၢ်အသး ဒီးမၤထွဲ ဒ် [ကစၢ်ယွၤ] ကလုၢ်ကထါ အိၣ်ဝဲအသိး” အဃိ. (စံးထီၣ်ပတြၢၤ ၁၁၉:၉) အဒိ ပဒီပုၢ်ဝဲၢ်အါဂၤန့ၣ် ဖဲအဝဲသ့ၣ် ဟးကသုၣ်ကသီအခါ အတပလီၢ်အသးဘၣ် အဝဲသ့ၣ် တမၤထွဲ ကစၢ်ယွၤ အတၢ်သိၣ်တၢ်သီလၢ အဘၣ်ဃးဒီး တၢ်ရ့တံၤရ့သကိးဘၣ်. အဝဲသ့ၣ် ရ့လိာ်သးဒီး ပှၤတၢ်ချၢတဖၣ် ဒီးအထံၣ်ဝဲလၢ ပှၤတၢ်ချၢတဖၣ်အံၤ အမ့ၢ်ပှၤဂ့ၤ ဒီးအဝဲသ့ၣ် မၤပိာ်ဝဲ ပှၤတဖၣ်န့ၣ်အခံ ဒီးမၤဝဲတၢ်လၢ အတကြၢးတဘၣ်လၢ ခရံာ်ဖိတဖၣ်အဂီၢ်. ဒီးမ့မ့ၢ် အဂၤတနီၤန့ၣ် အရ့ဒီး ပှၤလၢတၢ်မၤလီၢ် အါတလၢ. အဒိ, တၢ်အိၣ်ဖှိၣ်သးပှၢ်တဂၤန့ၣ် အရ့ဒီး ပိာ်မုၣ်တဂၤလၢ အတၢ်မၤလီၢ် ဒီးလၢခံန့ၣ် အဝဲပာ်တ့ၢ်ကွံာ် အဟံၣ်ဖိဃီဖိဒီး အိၣ်ဒီးပိာ်မုၣ်တဂၤန့ၣ်. အဃိ အဘၣ်တၢ်နီဟးထီၣ်ကွံာ်အီၤ လၢတၢ်အိၣ်ဖှိၣ်ပူၤ. ပထံၣ်ဘၣ်လၢ တၢ်ကဲထီၣ်အသး ဒ်လံာ်စီဆှံ တဲဝဲအသိး. လံာ်စီဆှံတဲဝဲလၢ “တၢ်ရ့လိာ်လၢ အတဂ့ၤဘၣ်တဖၣ်န့ၣ် မၤဟးဂီၤဝဲ လုၢ်လၢ်လၢအဂ့ၤတဖၣ်လီၤ.”—၁ ကရံၣ်သူး ၁၅:၃၃.

တၢး၀၆-E ၆/၁၅ ၂၅ ¶၁

“ယဘၣ်သူၣ်ဘၣ်သး နတၢ်ဒုးသ့ၣ်နီၣ်ထီၣ်က့ၤတဖၣ်”

ဒ်သိးပလဲၤခီဖျိ တၢ်ကီတၢ်ခဲလၢ ဆၢကတီၢ်ခဲအံၤတဖၣ် ကန့ၢ်အဂီၢ် ယဟိဝၤယွၤ ဟ့ၣ်ပလီၢ်ပှၤထီဘိ. ဒီးတၢ်ဟ့ၣ်ပလီၢ်တနီၤန့ၣ် ပဒိးန့ၢ်ဘၣ်အီၤ ခီဖျိလၢ နီၢ်ကစၢ် တၢ်မၤလိလံာ်စီဆှံ မ့တမ့ၢ် ဖဲပထီၣ် တၢ်အိၣ်ဖှိၣ်အခါ. တၢ်လၢပဖးဘၣ်အီၤ မ့တမ့ၢ် နၢ်ဟူဘၣ်အီၤ အါတက့ၢ်န့ၣ် အတမ့ၢ် တၢ်ဂ့ၢ်အသီဘၣ်. လၢအပူၤကွံာ်န့ၣ် ပနၢ်ဟူဘၣ်အီၤ သနာ်က့ ပသးပ့ၤနီၣ်တၢ် သ့အဃိ ဘၣ်ဃးဒီး ယဟိဝၤယွၤ အတၢ်တိာ်ပာ်, အတၢ်သိၣ်တၢ်သီ ဒီးအတၢ်ဟံးစုနဲၣ်ကျဲတဖၣ်န့ၣ် ပလိၣ်ဘၣ် တၢ်ဟ့ၣ်ပလီၢ်ထီဘိ. အဃိ ဖဲပနၢ်ဟူဘၣ် ကစၢ်ယွၤ အတၢ်ဒုးသ့ၣ်နီၣ်ထီၣ်အခါ ပကြၢးပာ်လုၢ်ပာ်ပှ့ၤအီၤ. တၢ်သ့ၣ်တဖၣ်အံၤ မၤဆူၣ်ထီၣ်ပသး ဒ်သိးဒီး ပကဆဲးအိၣ်မူဒ် ကစၢ်ယွၤ အတၢ်ဘၣ်သးအသိး. အဃိ ပှၤကွဲးထါစံးထီၣ်ပတြၢၤ တဲယဟိဝၤယွၤလၢ “ယဘၣ်သူၣ်ဘၣ်သး နတၢ်ဒုးသ့ၣ်နီၣ်ထီၣ်က့ၤတဖၣ်.”—စံးထီၣ်ပတြၢၤ ၁၁၉:၂၄.

တၢး၁၀-E ၄/၁၅ ၂၀ ¶၂

ဃၣ်ကွံာ်နမဲာ်လၢ တၢ်လၢအဘျုးတအိၣ်ဘၣ်တဖၣ်

^၂ တၢ်လၢပကွၢ်အီၤတဖၣ်န့ၣ် အမၤဘၣ်ဒိပှၤသ့ဝဲ. တၢ်လၢပကွၢ်အီၤ ဒီးပတၢ်ပာ်သူၣ်ပာ်သးန့ၣ် အဘၣ်ထွဲလိာ်အသးဒိၣ်မး. အဃိ တၢ်လၢပထံၣ်အီၤတဖၣ်န့ၣ် အဒုးအိၣ်ထီၣ် မ့တမ့ၢ် အမၤဒိၣ်ထီၣ်ဝဲ ပတၢ်သူၣ်လီသးကွံလၢ ပသးပူၤသ့. ဒီးပအိၣ်မူဘၣ်လၢ ဟီၣ်ခိၣ်လၢ အပှဲၤဒီး ပှၤလၢအတၢ်သကဲာ်ပဝး တဂ့ၤဘၣ် ဒီးအအဲၣ်လီၤထဲအသး လၢမုၣ်ကီၤလံၢ် ပၢဝဲတဘ့ၣ်အံၤအဃိ ပထံၣ်ဘၣ် တၢ်ဂီၤ ဒီးနၢ်ဟူဘၣ် တၢ်သိၣ်လိလၢ အဆှၢကမၣ်ပှၤ သ့ဝဲညီညီဖိ. ဒီးတၢ်သ့ၣ်တဖၣ်အံၤန့ၣ် ပမ့ၢ်ကွၢ်အီၤ ထဲတဘျးဖိဒၣ်လဲာ် အကဲထီၣ် တၢ်လီၤဘၣ်ယိၣ်လၢ ပဂီၢ်သ့. (၁ ယိၤဟၣ် ၅:၁၉) အဃိ ပှၤကွဲးထါစံးထီၣ်ပတြၢၤ ဃ့ကညး ယဟိဝၤယွၤလၢ “ဒ်သိး ယသုတကွၢ်တၢ်လၢ အဘျုးတအိၣ်ဘၣ်တဖၣ် တဂ့ၤအဂီၢ် မၤစၢၤယၤတက့ၢ်. ဒီးဒုးလဲၤယၤ လၢနကျဲ ဒ်သိးယကဆဲးမူအဂီၢ် န့ၣ်တက့ၢ်.”—စံးထီၣ်ပတြၢၤ ၁၁၉:၃၇.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၅-E ၄/၁၅ ၁၀ ¶၂

နာ်န့ၢ်ယဟိဝၤယွၤ အတၢ်ကတိၤ

^၂ စံးထီၣ်ပတြၢၤ ၁၁၉ န့ၣ် ပာ်ဖျါထီၣ်ဝဲလၢ ကစၢ်ယွၤ အကလုၢ်ကထါန့ၣ် အလုၢ်အပှ့ၤဒိၣ်ဒိၣ်မး. ဒ်သိးဒီး ပှၤတိၢ်နီၣ်အီၤ ကဘၣ်ညီညီဖိအဂီၢ် ပှၤကွဲးအီၤ ဒ်ဧ့ၤဘြံၤ အလံာ်မဲာ်ဖျၢၣ် မိၢ်ပှၢ်အိၣ်ဝဲအသိး. လံာ်စီဆှံ အဆၢဖိခဲလၢာ် အိၣ်ဝဲ ၁၇၆ ဆၢ. ဧ့ၤဘြံၤ အလံာ်မဲာ်ဖျၢၣ်မိၢ်ပှၢ်ခဲလၢာ်န့ၣ် အိၣ်ဝဲ ၂၂ ဖျၢၣ်. အဃိ ပမ့ၢ်ကွၢ်လၢ တၢ်ကွဲးအသးအခီၣ်ထံး လၢဧ့ၤဘြံၤအကျိာ်န့ၣ် စံးထီၣ်ပတြၢၤ အဆၢဒိၣ်တဆၢအံၤ အိၣ်ဝဲ ၂၂ ကူာ် ဒီးပှၤရဲၣ်လီၤအီၤ ဒ်ဧ့ၤဘြံၤအလံာ်မဲာ်ဖျၢၣ် အိၣ်ဝဲအသိး. ဒီးတကူာ်ဘၣ်တကူာ်န့ၣ် လံာ်ကျိၤအိၣ်ဝဲ ၈ ကျိၤ. ဒီးလၢတကူာ်ဘၣ်တကူာ်အပူၤ လံာ်ကျိၤ ၈ ကျိၤလၢာ်န့ၣ် ပှၤစးထီၣ်အီၤလၢ ဧ့ၤဘြံၤ လံာ်မဲာ်ဖျၢၣ်မိၢ်ပှၢ်တဖျၢၣ်ဃီ. စံးထီၣ်ပတြၢၤ အဆၢဒိၣ်တဆၢအံၤန့ၣ် ပာ်ဖျါထီၣ်ဝဲ ကစၢ်ယွၤ အကလုၢ်ကထါ, အတၢ်ဘျၢ, အတၢ်မၤလိာ်, တၢ်သိၣ်တၢ်သီ ဒီးကစၢ်ယွၤအကျဲတဖၣ်. စံးထီၣ်ပတြၢၤ အဆၢဒိၣ်တဆၢအံၤန့ၣ် ပှၤကွဲးကျိာ်ထံအီၤ လီၤတံၢ်လီၤဆဲး ဒ်တၢ်ကွဲးအသးအခီၣ်ထံး လၢဧ့ၤဘြံၤအကျိာ် အိၣ်ဝဲအသိး. တၢ်မၤလိတခါအံၤ ဒီးတၢ်မၤလိလၢခံတခါန့ၣ် ပကတဲသကိးအါထီၣ် ဘၣ်ဃးဒီး လံာ်စီဆှံ အဆၢဒိၣ်တဆၢအံၤ. ဖဲပမၤလိဘၣ်ဃးဒီး ကစၢ်ယွၤအခ့အပှၤ လၢအပူၤကွံာ် ဒီးလၢပစိၤခဲအံၤ အဂ့ၢ်အခါ ကမၤစၢၤပှၤဒ်သိးဒီး ပကပာ်လုၢ်ပာ်ပှ့ၤအါထီၣ် လံာ်စီဆှံတဆၢအံၤ. တကးဒံးဘၣ် ပကအဲၣ်ဒိး စံးဘျုးစံးဖှိၣ်အါထီၣ် ကစၢ်ယွၤ ခီဖျိလၢ အဟ့ၣ်လီၤပှၤ လံာ်စီဆှံအဃိ.

ijwyp-E ၈၃

ယတြီဆၢကွံာ် တၢ်လ့ပစီ ကသ့ဒ်လဲၣ်

တၢ်လၢနမၤအီၤသ့

မၤဂၢၢ်ကျၢၤထီၣ်နတၢ်နာ်. နမ့ၢ်တနၢ်ပၢၢ် တၢ်လၢနနာ်အီၤဘၣ်န့ၣ် ပှၤကွဲန့ၢ်လွဲန့ၢ်နၤ ကန့ၢ်ဝဲညီညီဖိ. အဃိ နမ့ၢ်မၤထွဲ လံာ်စီဆှံ အတၢ်ဟံးစုနဲၣ်ကျဲ တခါအံၤန့ၣ် ကကဲဘျုးဝဲဒိၣ်မး. လံာ်စီဆှံ တဲဝဲလၢ “တၢ်တမံၤဂ့ၤ တမံၤဂ့ၤ မ့ၢ်အဘၣ်ဧါ တဘၣ်ဧါန့ၣ် ဃုသ့ၣ်ညါအီၤ လီၤတံၢ်လီၤဆဲးတက့ၢ်. ဒီးဟံးဃာ်တၢ်လၢ အဂ့ၤတက့ၢ်.” (၁ သ့းစၤလနံ ၅:၂၁) နမ့ၢ်နၢ်ပၢၢ် တၢ်လၢ နနာ်အီၤတဖၣ်ဂ့ၤဂ့ၤန့ၣ် နတသးဒ့ဒီ ညီညီဖိဘၣ် ဒီးအကမၤစၢၤနၤဒ်သိး နတြီဆၢ တၢ်လ့ပစီ ကန့ၢ်အါထီၣ်အဂီၢ်.

တၢ်လၢ ပကဘၣ်ဆိကမိၣ်ထံအီၤ– ဘၣ်မနုၤအဃိ နနာ်လၢ ကစၢ်ယွၤ အတၢ်သိၣ်တၢ်သီန့ၣ် အကဲဘျုးလၢနဂီၢ်လဲၣ်.

“ဖဲယမၤထွဲ ဒ်တၢ်လၢ ယနာ်အီၤ ဒီးယတဟ့ၣ်ၡူဘၣ် တဘျီလၢ်လၢ်န့ၣ် ယထံၣ်ဘၣ်လၢ ပှၤပာ်ကဲယၤအါထီၣ်.”—ခ့ဘၢၤလံး.

ပှၤဒိတဲာ်လၢ လံာ်စီဆှံပူၤ– စီၤဒၤနံးယ့လး. ဖဲစီၤဒၤနံးယ့လး အသးစၢ်အခါအ “ဆၢတဲာ်လီၤအသး ဂၢၢ်ဂၢၢ်ကျၢၤကျၢၤလၢ” အကဒိကနၣ် ကစၢ်ယွၤ တၢ်သိၣ်တၢ်သီ.—ဒၤနံးယ့လး ၁:၈.

သ့ၣ်ညါလီၤ နတၢ်ဂံၢ်စၢ်ဘါစၢ်. လံာ်စီဆှံ တဲဝဲလၢ ဖဲနသးစၢ်အခါ “ပှၤသးစၢ် အတၢ်သူၣ်လီသးကွံ” န့ၣ် အသဟီၣ်ဆူၣ်ဒိၣ်မး. (၂ တံၤမသ့း ၂:၂၂) ပှၤသးစၢ် အတၢ်သူၣ်လီသးကွံန့ၣ် တမ့ၢ်ထဲ တၢ်သးကွံလၢ တၢ်မံဃုာ်တကပၤဘၣ် အပၣ်ဃုာ်စ့ၢ်ကီးဒီး နဘၣ်သးလၢ နသကိးတဖၣ် ကတူၢ်လိာ်နၤ ဒီးနအဲၣ်ဒိးဆၢထၢၣ်လၢ နကစၢ်ခီၣ် တချုးလၢ နမၤအီၤသ့ဒံးဘၣ်အခါ.

တၢ်လၢ နကဘၣ်ဆိကမိၣ်ထံအီၤ– လံာ်စီဆှံတဲဝဲလၢ “ပှၤတဂၤစုာ်စုာ်န့ၣ် ဘၣ်တၢ်မၤကွၢ်အီၤ ခီဖျိလၢ အနီၢ်ကစၢ် အတၢ်သူၣ်လီသးကွံ ကွဲန့ၢ်လွဲန့ၢ်အီၤ ဒီးလ့ပစီအီၤအဃိလီၤ. (ယၤကိာ် ၁:၁၄) နတၢ်သူၣ်လီသးကွံလၢ အကဲထီၣ် တၢ်လ့ပစီလၢ နဂီၢ်အဒိၣ်ကတၢၢ်န့ၣ် မ့ၢ်မနုၤလဲၣ်.

“သမံသမိးလီၤနသး တီတီလိၤလိၤ ဘၣ်ဃးဒီး တၢ်လၢအကဲထီၣ် တၢ်လ့ပစီလၢ နတြီဆၢအီၤ အကီကတၢၢ်န့ၣ် မ့ၢ်မနုၤလဲၣ်. ဝံၤဒီး ဃုသ့ၣ်ညါဘၣ်ဃးဒီး နတြီဆၢအီၤ ကသ့ဒ်လဲၣ်. ဝံၤဒီးကွဲးလီၤ တၢ်လၢနမၤထွဲအီၤ ကသ့တဖၣ် နမ့မၤဒ်န့ၣ်န့ၣ် လၢခံဖဲနထံၣ်ဘၣ်ဒီး တၢ်မၤကွၢ်အခါ နကဘၣ် တြီဆၢအီၤဒ်လဲၣ်န့ၣ် နကသ့ၣ်ညါ.”—စဲဘံယၤ.

ပှၤဒိတဲာ်လၢ လံာ်စီဆှံအပူၤ– စီၤဒၤဝံး. တဘျီတခီၣ် စီၤဒၤဝံး တြီဆၢကွံာ် တၢ်လ့ပစီလၢ ပှၤဂၤအအိၣ် ဒီးအနီၢ်ကစၢ် အတၢ်သူၣ်လီသးကွံ တန့ၢ်ဘၣ်. သနာ်က့ အဝဲဟံးန့ၢ် တၢ်မၤလိလၢ အတၢ်ကမၣ် ဒီးဂုာ်ကျဲးစၢး မၤဂ့ၤထီၣ်အသး အဝဲဃ့ ယဟိဝၤယွၤလၢ “ဟ့ၣ်ယၤ သးလၢအကဆှီ ဒီးဟ့ၣ်ယၤ တၢ်ပာ်သူၣ်ပာ်သးလၢအသီ ဒီးလၢအဂၢၢ်ကျၢၤတက့ၢ်.”—စံးထီၣ်ပတြၢၤ ၅၁:၁၀.

အိၣ်ဒီးတၢ်ကီၤသူၣ်ကီၤသး. လံာ်စီဆှံတဲဝဲလၢ “တဘၣ်ပျဲတၢ်အၢ မၤနၢၤနၤတဂ့ၤ.” (ရိမ့ၤ ၁၂:၂၁) အဃိ အအဲၣ်ဒိးတဲဝဲ တဘၣ်ဟ့ၣ်ၡူ တၢ်လ့ပစီတဂ့ၤ. နဃုထၢလၢ နကမၤတၢ်လၢအဘၣ်သ့.

ဖဲနထံၣ်ဘၣ်ဒီး တၢ်လ့ပစီလၢ နကမၤကမၣ်တၢ်အဂီၢ်အခါ နမ့ၢ်အိၣ်ဒီး တၢ်ကီၤသူၣ်ကီၤသးန့ၣ် အကကဲဘျုး လၢနဂီၢ်ဒ်လဲၣ်.

“ယဆိကမိၣ်လၢ ဖဲယထံၣ်ဘၣ်ဒီး တၢ်လ့ပစီအခါ ယမ့ၢ်ဟ့ၣ်ၡူန့ၣ် ဘၣ်သ့ၣ်သ့ၣ် ယကသးခု တစိၢ်တလီၢ် သနာ်က့ တမ့ၢ်လၢ ယကသးခုထီဘိဘၣ်. ယတၢ်အိၣ်သး ကနးထီၣ် အဃိ အတကြၢးဒီး တၢ်လၢ ယကဘၣ် ဟ့ၣ်ၡူအီၤန့ၣ်ဘၣ်.”—စိၤဖံၤယၤ.

ပှၤဒိပှၤတဲာ်လၢ လံာ်စီဆှံပူၤ– စီၤပီလူး. စီၤပီလူးန့ၣ် အအၢၣ်လီၤတူၢ်လိာ်ဝဲလၢ အအိၣ်ဒီး တၢ်မိၣ်န့ၢ်သးလီလၢတဂ့ၤ ဘၣ်ဆၣ် အဝဲအိၣ်ဒီး တၢ်ကီၤသူၣ်ကီၤသး. အဝဲတဲဝဲလၢ “ယဒိလီၤတီၢ်လီၤ ယနီၢ်ခိ ဒီးဒုးကဲထီၣ်အီၤ လၢကုၢ်လီၤ.”—၁ ကရံၣ်သူး ၉:၂၇.

တၢ်ဂ့ၢ်လၢအရ့ဒိၣ်– နကမၤဆၢက့ၤ တၢ်လ့ပစီ ဒ်လဲၣ်န့ၣ် အိၣ်လၢနစုပူၤလီၤ.

သ့ၣ်နီၣ်ထီၣ်လၢ တၢ်လ့ပစီတဖၣ်န့ၣ် အကဲဝဲ တစိၢ်တလီၢ်လီၤ. မလံစၤ လၢအသးနံၣ်အိၣ် ၂၀ န့ၣ် အတဲဝဲလၢ “တၢ်လ့ပစီလၢ ပထံၣ်ဘၣ်အီၤဖဲ ယထီၣ်ကၠိအခါန့ၣ် လၢအပူၤကွံာ်န့ၣ် အကဲဝဲ တၢ်ကီတၢ်ခဲဖးဒိၣ် လၢယဂီၢ်. သနာ်က့ မ့ၢ်ဆိမိၣ်ခဲအံၤန့ၣ် အတကဲ တၢ်နီတမံၤလၢၤဘၣ်. အဃိ ယသ့ၣ်ညါဘၣ်လၢ တၢ်လ့ပစီလၢ ယထံၣ်ဘၣ်အီၤ ခဲအံၤတဖၣ်န့ၣ် အကလဲၤပူၤကွံာ်ဒီး ဖဲယက့ၤဆိကမိၣ်ထံက့ၤအီၤအခါ ယကတူၢ်ဘၣ်လၢ ကိၢ်ညၢ်လၢ ယတြီဆၢတ့ၢ် တၢ်လ့ပစီတဖၣ်အံၤမီၤ.”

လါဒံၣ်စ့ဘၢၣ် ၁၆-၂၂

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၁၉:၅၇-၁၂၀

ပလဲၤခီဖျိ တၢ်နးတၢ်ဖှီၣ် ကသ့ဒ်လဲၣ်

တၢး၀၆-E ၆/၁၅ ၂၀ ¶၂

“ယအဲၣ်နတၢ်သိၣ်တၢ်သီဒိၣ်မး”

^၂ ဘၣ်သ့ၣ်သ့ၣ် နကဆိကမိၣ်ဘၣ်လၢ “ကစၢ်ယွၤ အတၢ်သိၣ်တၢ်သီန့ၣ် အမၤမုာ်ထီၣ် ပှၤကွဲးထါစံးထီၣ်ပတြၢၤဒ်လဲၣ်.” တၢ်လၢအမၤစၢၤအီၤ တမံၤန့ၣ် မ့ၢ်ဝဲ အနာ်ဝဲလၢ ယဟိဝၤယွၤ ဟ့ၣ်လီၤအီၤ တၢ်သိၣ်တၢ်သီန့ၣ် မ့ၢ်လၢယဟိဝၤယွၤ သးအိၣ်အီၤအဃိ. ဒီးမ့ၢ်လၢ အသ့ၣ်ညါ ကစၢ်ယွၤအတၢ်သိၣ်တၢ်သီအဃိ ဖဲအထံၣ်ဘၣ်ဒီး တၢ်ကီတၢ်ခဲခီဖျိလၢ အဒုၣ်အဒါတဖၣ်အဃိအခါ မၤစၢၤအီၤလၢ အကဆဲးအိၣ်ဒီးတၢ်သးခု. အဝဲနာ်ဝဲလၢ ယဟိဝၤယွၤ ကွၢ်ထွဲအီၤဂ့ၤဂ့ၤ တကးဒံးဘၣ် အဝဲမၤထွဲဝဲ ကစၢ်ယွၤ အတၢ်သိၣ်တၢ်သီအဃိ အထံၣ်ဘၣ်ဝဲလၢ အကဲထီၣ်ပှၤလၢ အကူၣ်တၢ်သ့ ဒိၣ်န့ၢ်ဒံး အဒုၣ်အဒါတဖၣ်. ဒီးမၤစၢၤအီၤ ဒ်သိးဒီး အသးသမူ ကပူၤဖျဲးအဂီၢ် တကးဒံးဘၣ် ခီဖျိလၢ အမၤထွဲ ကစၢ်ယွၤ အတၢ်သိၣ်တၢ်သီအဃိ အဒိးန့ၢ်ဘၣ် တၢ်သူၣ်မံသးမုာ် ဒီးသးလၢအသ့ၣ်ညါဒၣ်တၢ်လၢ အကဆှီ.—စံးထီၣ်ပတြၢၤ ၁၁၉:၁, ၉, ၆၅, ၉၃, ၉၈, ၁၆၅.

တၢး၀၀-E ၁၂/၁ ၁၄ ¶၃

နတၢ်အဲၣ် ယဟိဝၤယွၤ အတၢ်သိၣ်တၢ်သီ ဟဲဒိၣ်ထီၣ်ဧါ

^၃ ပှၤကွဲးထါ စံးထီၣ်ပတြၢၤတဂၤ အဲၣ်ကစၢ်ယွၤ အတၢ်သိၣ်တၢ်သီဒိၣ်မး. အဝဲတဲဝဲလၢ “ယမၤချ့ချ့ ဒီးယတမၤယံာ်မၤနီၢ်ယသး ဒ်သိး ယကအိၣ်မူမၤထွဲ နတၢ်မၤလိာ်တဖၣ်အဂီၢ်ဘၣ်. ပှၤအၢပှၤသီ ဆီၣ်တံၢ်မၤနၢၤယၤ ဘၣ်ဆၣ် ယတသးပ့ၤနီၣ် နတၢ်သိၣ်တၢ်သီတဖၣ်ဘၣ်.” (စံးထီၣ်ပတြၢၤ ၁၁၉:၆၀, ၆၁) ယဟိဝၤယွၤ အတၢ်သိၣ်တၢ်သီန့ၣ် မၤစၢၤပှၤဒ်သိးဒီး ပကအိၣ်ဒီး တၢ်တူၢ်န့ၢ်ခီၣ်ကဲ ဖဲပထံၣ်ဘၣ်ဒီး တၢ်မၤအၢမၤနးအခါ, မ့ၢ်လၢပသ့ၣ်ညါလၢ ကစၢ်ယွၤန့ၣ် အမၤလီၤမၢ်ကွံာ်ဝဲ ဒုၣ်ဒါတဖၣ် အတၢ်ထီဒုၣ်ထီဒါပှၤသ့. ဒီးဖဲဆၢကတီၢ်ဘၣ်ဝဲအခါန့ၣ် အဝဲမၤပူၤဖျဲးထီၣ်ပှၤ ဒ်သိးဒီး ပဟးစံၣ်တဲၤတဲလီၤ ဘီမုၢ်တၢ်သးခုကစီၣ်ကသ့အဂီၢ်.—မၢ်ကူး ၁၃:၁၀.

တၢး၀၆-E ၉/၁ ၁၄ ¶၄

လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ ယဲၢ်ဘ့ၣ်တဘ့ၣ်အဂီၢ်

၁၁၉:၇၁—ပကွၢ်ဆၢၣ်မဲာ်ဘၣ် တၢ်နးဖှီၣ်န့ၣ် ဘၣ်မနုၤအဃိ ဂ့ၤဝဲလဲၣ်. ဖဲပထံၣ်ဘၣ် တၢ်နးတၢ်ဖှီၣ်အခါ ပသ့ၣ်ညါထီၣ်လၢ ပကဘၣ် သန့ၤအါထီၣ်ပသး လၢယဟိဝၤယွၤ, ဃ့ထုကဖၣ်လၢ သူၣ်ဒီဖျၢၣ်သးဒီဖျၢၣ်အါထီၣ်, ပကမၤလိအါထီၣ် လံာ်စီဆှံ ဒီးမၤထွဲတၢ်လၢ ပမၤလိဘၣ်တဖၣ်. တကးဒံးဘၣ် ပထံၣ်ဘၣ် တၢ်ကီတၢ်ခဲ ဝံၤအလီၢ်ခံ ပသ့ၣ်ညါထီၣ်လၢ ပကဘၣ် မၤဂ့ၤထီၣ်ပသးဒ်လဲၣ်. ဖဲပထံၣ်ဘၣ် တၢ်ကီတၢ်ခဲအခါ ပမ့ၢ်ဟ့ၣ်အခွဲးလၢ အကမၤဂ့ၤထီၣ်ပှၤန့ၣ် တမ့ၢ်လၢ ပကသးဟးဂီၤဘၣ်.

တၢး၁၇.၀၇ ၁၀ ¶၃, ၅

“ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်”

^၃ ပပၢ်ယဟိဝၤယွၤလၢ အပှဲၤဒီးတၢ်အဲၣ်တၢ်ကွံတဂၤ ကမၤမုာ်ထီၣ်က့ၤပှၤလီၤ. (ဖး ၂ ကရံၣ်သူး ၁:၃, ၄ တက့ၢ်.) ဘၣ်ဃးဒီး တၢ်ဒိသူၣ်ဒိသးလၢ ပှၤဂၤအဖီခိၣ်န့ၣ် အဝဲမ့ၢ်ပှၤလၢ အဒိအတဲာ်ဂ့ၤကတၢၢ်လီၤ. ဒီးအဝဲအၢၣ်လီၤအခ့အပှၤတဖၣ်လၢ “ယဲဒၣ်, ယၤအံၤယမ့ၢ်ပှၤလၢ အမၤမုာ်ထီၣ်က့ၤသုလီၤ.”—ယၡါယၤ ၅၁:၁၂; စံးထီၣ်ပတြၢၤ ၁၁၉:၅၀, ၅၂, ၇၆.

^၅ ပနာ်သ့သပှၢ်ကတၢၢ်လၢ ယဟိဝၤယွၤကမၤစၢၤပှၤလီၤ. လၢတၢ်န့ၣ်အဃိ ပကြၢးဃ့ဘါထုကဖၣ်ထီဘိ ဒီးပာ်ဖျါထီၣ်ပတၢ်တူၢ်ဘၣ် ဒီးပတၢ်သူၣ်အုးသးအုးလၢ အအိၣ်လီၤ. ပသ့ၣ်ညါလၢ ယဟိဝၤယွၤနၢ်ပၢၢ် ပတၢ်တူၢ်ဘၣ် ဒီးမၤမုာ်ထီၣ်က့ၤပှၤအဃိ ပသးခုဒိၣ်မးလီၤ. ဘၣ်ဆၣ် အဝဲကမၤမုာ်ထီၣ်က့ၤပှၤဒ်လဲၣ်.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၆-E ၉/၁ ၁၄ ¶၅

လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ ယဲၢ်ဘ့ၣ်တဘ့ၣ်အဂီၢ်

၁၁၉:၉၆—လံာ်စီဆှံတဲဝဲလၢ တၢ်လၢတၢ်ပှဲၤခဲလၢာ် အတၢ်လီၤတူာ်လီၤကာ် အိၣ်ဝဲန့ၣ် အဲၣ်ဒိးတဲဝဲ အခီပညီဒ်လဲၣ်. တၢ်လၢတၢ်ပှဲၤလၢ စံးထီၣ်ပတြၢၤတဲဝဲန့ၣ် အဲၣ်ဒိးတဲဝဲ တၢ်လၢတၢ်ပှဲၤလၢ အဘၣ်ဃးဒီး ပှၤဟီၣ်ခိၣ်ဖိအတၢ်ထံၣ်. ဒီးလီၤဂာ်လၢ အအဲၣ်ဒိးတဲဝဲ တၢ်လၢ ပှၤဟီၣ်ခိၣ်ဖိ ထံၣ်ဝဲလၢ အလၢအပှဲၤန့ၣ် အတဘၣ်ဝဲ ထီဘိဘၣ်. ဘၣ်ဆၣ် မ့မ့ၢ် ကစၢ်ယွၤ အတၢ်သိၣ်တၢ်သီန့ၣ် တမ့ၢ်ဒ်န့ၣ်ဘၣ် အဘၣ်ဝဲထီဘိ ဒီးအကဲဘျုးလၢ ပှၤတၢ်အိၣ်မူ ကိးသနၢၣ်ဒဲးအဂီၢ်. ဘၣ်ဃးဒီး လံာ်စီဆှံတဆၢအံၤန့ၣ် လံာ်လၢအမ့ၢ် New International Version ကွဲးကျိာ်ထံဝဲလၢ “ယထံၣ်လၢ တၢ်လၢတၢ်ပှဲၤခဲလၢာ်န့ၣ် အတၢ်လီၤတူာ်လီၤကာ်အိၣ်ဝဲ ဘၣ်ဆၣ် နတၢ်မၤလိာ်တဖၣ်န့ၣ် အကတၢၢ်တအိၣ်ဘၣ်.”

ijwbq-E ၁၅၇

ဘၣ်ဃးဒီး န့ဆၢၣ် တၢ်ဘၣ်ဒိဘၣ်ထံးန့ၣ် လံာ်စီဆှံတဲဝဲဒ်လဲၣ်

လံာ်စီဆှံ တဲဝဲလၢ

ကစၢ်ယွၤတဒုးအိၣ်ထီၣ်ဝဲ န့ဆၢၣ်တၢ်ဘၣ်ဒိဘၣ်ထံးလၢ ပထံၣ်ဘၣ်အီၤလၢ ဆၢကတီၢ်ခဲအံၤဘၣ်. သနာ်က့ အဝဲသူၣ်အိၣ်သးအိၣ်ဝဲ ပှၤလၢအထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံးတဖၣ် အဃိ ကစၢ်ယွၤအဘီမုၢ် ကမၤလီၤမၢ်ကွံာ်ဝဲ န့ဆၢၣ်တၢ်ဘၣ်ဒိဘၣ်ထံးလၢ အဒုးအိၣ်ထီၣ်ဝဲ တၢ်ကီတၢ်ခဲ. တကးဒံးဘၣ် ကစၢ်ယွၤ မၤမုာ်ထီၣ်ဝဲ ပှၤလၢအထံၣ်ဘၣ်ဒီး န့ဆၢၣ်အတၢ်ဘၣ်ဒိဘၣ်ထံး.—၂ ကရံၣ်သူး ၁:၃.

ဘၣ်မနုၤအဃိ ပနာ်သ့လၢ န့ဆၢၣ်အတၢ်ဘၣ်ဒိဘၣ်ထံးတဖၣ်န့ၣ် တမ့ၢ်ဝဲ ကစၢ်ယွၤ အတၢ်စံၣ်ညီၣ်ဘၣ်လဲၣ်

ဒ်လံာ်စီဆှံ ပာ်ဖျါထီၣ်ဝဲအသိး န့ဆၢၣ်အတၢ်ဘၣ်ဒိဘၣ်ထံးန့ၣ် လီၤဆီလိာ်အသးဒီး န့ဆၢၣ်အသဟီၣ်လၢ ကစၢ်ယွၤသူဝဲလၢ ကမၤတၢ်တမံၤမံၤအဂီၢ်.

• န့ဆၢၣ် အတၢ်ဘၣ်ဒိဘၣ်ထံးန့ၣ် အမၤသံ မ့တမ့ၢ် အမၤဘၣ်ဒိဝဲ ပှၤဂ့ၤမ့ၢ်ဂ့ၤ ပှၤအၢမ့ၢ်ဂ့ၤ. ဘၣ်ဆၣ် ဒ်လံာ်စီဆှံ ပာ်ဖျါထီၣ်ဝဲအသိး မ့မ့ၢ် ကစၢ်ယွၤ အတၢ်စံၣ်ညီၣ်န့ၣ် တမ့ၢ်ဒ်န့ၣ်ဘၣ်. အဝဲစံၣ်ညီၣ်ထဲ ပှၤအၢပှၤသီတဖၣ်. အဒိ ဖဲကစၢ်ယွၤ မၤဟးဂီၤဝဲ ဝ့ၢ်လၢပျၢၤ လၢအမ့ၢ်ဝဲ ဝ့ၢ်စဒိၣ် ဒီးဂမိရၤအခါန့ၣ် အဝဲမၤပူၤဖျဲးဝဲ စီၤလိာ် ဒီးအဖိမုၣ်ခံဂၤ. (၁ မိၤၡ့ ၁၉:၂၉, ၃၀) ကစၢ်ယွၤန့ၣ် အသ့ၣ်ညါပှၤသး ဒီးအမၤဟးဂီၤထဲဒၣ် ပှၤအၢပှၤသီတဖၣ်.—၁ မိၤၡ့ ၁၈:၂၃-၃၂; ၁ ၡမူၤအ့လး ၁၆:၇.

• န့ဆၢၣ် အတၢ်ဘၣ်ဒိဘၣ်ထံးန့ၣ် တချုးလၢ အဟဲကဲထီၣ်အသးဒံးဘၣ်အခါ နသ့ၣ်ညါဆိပာ်စၢၤတစဲး မ့တမ့ၢ် နတသ့ၣ်ညါဆိအီၤ နီတစဲးဘၣ်. ဘၣ်ဆၣ် မ့မ့ၢ် န့ဆၢၣ်အသဟီၣ်လၢ ကစၢ်ယွၤသူဝဲ ဒ်သိးဒီး ကစံၣ်ညီၣ် ပှၤအၢပှၤသီအဂီၢ်န့ၣ် အတမ့ၢ် ဒ်န့ၣ်ဘၣ်. ကစၢ်ယွၤ ဟ့ၣ်ပလီၢ်ဆိဝဲ ပှၤကိးဂၤဒဲး. အဃိ ပှၤလၢအဒိကနၣ်ဝဲ တၢ်ဟ့ၣ်ပလီၢ်တဖၣ်န့ၣ် အအိၣ်ဒီး တၢ်ခွဲးတၢ်ယာ်လၢ အကပူၤဖျဲးဝဲ.—၁ မိၤၡ့ ၇:၁-၅; မးသဲ ၂၄:၃၈, ၃၉.

• ဒီးတဘျီတခီၣ်န့ၣ် န့ဆၢၣ် တၢ်ဘၣ်ဒိဘၣ်ထံးကဲထီၣ်ဝဲ ခီဖျိလၢ ပှၤဟီၣ်ခိၣ်ဖိ မၤဝဲအဃိ. အဒိ အဝဲသ့ၣ် မၤဘၣ်ဒိဘၣ်ထံး ခိၣ်ဃၢၤန့ဆၢၣ် ဒီးလဲၤတ့ထီၣ် တၢ်သူၣ်ထီၣ်လၢ တၢ်လီၢ်လၢ အတကြၢးတ့ဘၣ် ဒ်သိးဒီး တၢ်လီၢ်လၢ ဟီၣ်ခိၣ်ဟူးညီ, ထံဒိၣ်အလီၢ် ဒီးမူခိၣ်ကလံၤသီၣ်ဂီၤ တဘၣ်လီၢ်ဘၣ်စး ဒိၣ်တလၢအလီၢ်အဃိ န့ဆၢၣ် တၢ်ဘၣ်ဒိဘၣ်ထံး ကဲထီၣ်ဝဲ. (လီၣ်ဖျါ ၁၁:၁၈) အဃိ ပပာ်ထီၣ် တၢ်ကမၣ်လၢ ကစၢ်ယွၤအလိၤတသ့ဘၣ်.—ကတိၤဒိ ၁၉:၃.

န့ဆၢၣ်အတၢ်ဘၣ်ဒိဘၣ်ထံးတဖၣ်န့ၣ် အမ့ၢ်ဝဲ တၢ်ပနီၣ်တမံၤမံၤဧါ

ဝံအတၢ်စံးပာ် ပာ်ဖျါထီၣ်ဝဲလၢ ဖဲ “တၢ်အစိၤလၢ အလီၢ်ခံကတၢၢ်” လၢအမ့ၢ် “မုၢ်နံၤခံကတၢၢ်တဖၣ်အပူၤ” န့ၣ် န့ဆၢၣ် အတၢ်ဘၣ်ဒိဘၣ်ထံး ကကဲထီၣ်ဝဲ. (မးသဲ ၂၄:၃; ၂ တံၤမသ့း ၃:၁) အဒိ ဘၣ်ဃးဒီး တၢ်ကမၤအသးလၢ ပစိၤခဲအံၤန့ၣ် ယ့ၣ်ၡူးတဲဝဲလၢ “တၢ်သၣ်ဝံၤလီၤဒိ ကအိၣ်ထီၣ်ဝဲ ဒီးဟီၣ်ခိၣ်ကဟူးဝဲလၢ တၢ်လီၢ်တတီၤဝံၤတတီၤ.” (မးသဲ ၂၄:၇) တယံာ်လၢၤဘၣ်န့ၣ် ကစၢ်ယွၤ ကမၤလီၤမၢ်ကွံာ်ဝဲ တၢ်လၢအကဒုးအိၣ်ထီၣ် တၢ်ဆူးတၢ်ဆါ ဒီးတၢ်ကီတၢ်ခဲ ဒီးန့ဆၢၣ်တၢ်ဘၣ်ဒိဘၣ်ထံးတဖၣ်.—လီၣ်ဖျါ ၂၁:၃, ၄.

လါဒံၣ်စ့ဘၢၣ် ၂၃-၂၉

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၁၉:၁၂၁-၁၇၆

ဒ်သိး ပသုတထံၣ်ဘၣ် တၢ်လၢအလီၤသးအုး တဂ့ၤအဂီၢ် ပဘၣ်မၤဒ်လဲၣ်

တၢး၁၈.၀၆ ၁၆ ¶၅-၆

ဒ်သိးနသးလၢ အသ့ၣ်ညါဒၣ်တၢ် ကမၤတၢ်ဂ့ၤဂ့ၤအဂီၢ် ပျဲယွၤအတၢ်သိၣ်တၢ်သီ ဒီးအတၢ်ဟံးစုနဲၣ်ကျဲ သိၣ်လိနၤတက့ၢ်

^၅ ပမ့ၢ်အဲၣ်ဒိးလၢ ယွၤအတၢ်သိၣ်တၢ်သီ ကမၤစၢၤပှၤန့ၣ် ထဲဒၣ်ပဖးဒီးသ့ၣ်ညါ ယွၤအတၢ်သိၣ်တၢ်သီန့ၣ် တလၢပှဲၤဒံးဘၣ်. ပကဘၣ်အဲၣ်ယွၤအတၢ်သိၣ်တၢ်သီ ဒီးပာ်ကဲအီၤလီၤ. လံာ်စီဆှံတဲဝဲလၢပကဘၣ် “သးဟ့တၢ်အၢ, ဒီးအဲၣ်တၢ်ဂ့ၤ” လီၤ. (ဧၤမိၣ် ၅:၁၅) ဘၣ်ဆၣ် ပမၤအီၤကသ့ဒ်လဲၣ်. ပကဘၣ်မၤလိပသး ဒ်သိးပကအိၣ်ဒီးတၢ်ထံၣ်ဒ် ယဟိဝၤယွၤအသိးလီၤ. ဆိကမိၣ်ကွၢ် တၢ်ဂ့ၢ်တခါအံၤတက့ၢ်. အဒိ နမံတန့ၢ်ဘၣ် ဒီးကသံၣ်သရၣ်တဲနၤလၢ နကဘၣ်အီၣ်တၢ်အီၣ်လၢ အန့ၢ်ဂံၢ်န့ၢ်ဘါ, မၤနီၢ်ခိတၢ်ဟူးတၢ်ဂဲၤ ဒီးဆီတလဲ နတၢ်အိၣ်မူလီၤ. မ့ၢ်လၢနမၤထွဲ အတၢ်ဟံးစုနဲၣ်ကျဲအဃိ နမံန့ၢ်က့ၤလံလီၤ. မ့မ့ၢ်ဒ်န့ၣ်န့ၣ် ကသံၣ်သရၣ် အတၢ်ဟံးစုနဲၣ်ကျဲတဖၣ်န့ၣ် နကထံၣ်အီၤဒ်လဲၣ်.

^၆ ဒ်န့ၣ်အသိး ပတၢ်ဘၣ်တ့ကစၢ်ဟ့ၣ်လီၤပှၤ တၢ်သိၣ်တၢ်သီတဖၣ်လၢ အကဒီသဒၢပှၤ ဒ်သိးပသုတမၤဘၣ် တၢ်ကမၣ်ဒီးထံၣ်ဘၣ် တၢ်ကီတၢ်ခဲတဂ့ၤအဂီၢ် ဒီးဒ်သိးပတၢ်အိၣ်မူ ကလဲၤထီၣ်လဲၤထီအဂီၢ်လီၤ. အဒိ လံာ်စီဆှံတဲဝဲလၢ ပတဘၣ်လံၣ်တၢ်လီတၢ်, ဟုၣ်တၢ်, မၤကမၣ်မုၣ်ကမၣ်ခွါ, မၤဆူၣ်မၤစိးတၢ် ဒီးပတဘၣ်မၤဘၣ်ဃးပသးဒီး တၢ်ဝံတၢ်နါ အတၢ်ဖံးတၢ်မၤတဖၣ်န့ၣ်ဘၣ်. (ဖး ကတိၤဒိ ၆:၁၆-၁၉ တက့ၢ်; လီၢ်ဖျါ ၂၁:၈) ပမ့ၢ်ဒိကနၣ် ယဟိဝၤယွၤအကလုၢ်န့ၣ် ပကဒိးန့ၢ်ဘၣ် တၢ်အဘျုးအဖှိၣ်အါမးလီၤ. လၢတၢ်န့ၣ်အဃိ ပတၢ်အဲၣ်ယွၤ ဒီးအတၢ်သိၣ်တၢ်သီ ကအါထီၣ်စ့ၢ်ကီးလီၤ.

တၢး၉၃-E ၄/၁၅ ၁၇ ¶၁၂

ပှၤသးစၢ်တဖၣ် သုသးစၢၢ်ဆၢ မနုၤလဲၣ်

^၁၂ နကဘၣ်ဂုာ်ကျဲးစၢး ဒ်သိး နကသးဟ့ ဒီးသးဘၣ်အၢ တၢ်လၢအအၢ (စံးထီၣ်ပတြၢၤ ၉၇:၁၀) နသးဟ့ တၢ်အၢလၢ အဖျါလီၤဂာ်လၢ အကမၤမုာ်နသးတဖၣ် ကသ့ဒ်လဲၣ်. နမၤအီၤသ့ခီဖျိ နဆိကမိၣ်ထံ တၢ်ပိာ်ထွဲလၢ အကဟဲကဲထီၣ်အသးတဖၣ်. လံာ်စီဆှံ တဲဝဲလၢ “တဘၣ်လံၣ်န့ၢ်လီန့ၢ်လီၤ သုနီၢ်ကစၢ်အသးတဂ့ၤ. ကစၢ်ယွၤန့ၣ် ပှၤလံၣ်န့ၢ်လီန့ၢ်အီၤ တန့ၢ်ဘၣ်. ပှၤတဂၤ ကကူးဘၣ်က့ၤတၢ်လၢ အဖှံဝဲလီၤ. ပှၤလၢအဖှံတၢ် ဒ်အတၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးန့ၣ် ကကူးဘၣ်က့ၤ တၢ်အုၣ်သံကျၣ်သံလၢ အဟဲအိၣ်ထီၣ် ခီဖျိလၢ အတၢ်ဖံးတၢ်ညၣ် အတၢ်သူၣ်လီသးကွံ အဃိလီၤ.” (ကလၤတံ ၆:၇, ၈) ဖဲနထံၣ်ဘၣ်ဒီး တၢ်လ့ပစီလၢ နကမၤဒ် နတၢ်သူၣ်လီသးကွံ အိၣ်ဝဲအသိးအခါ ဆိကမိၣ်ထံ တၢ်ပိာ်ထွဲလၢ အကဟဲကဲထီၣ်အသး ဒီးအကမၤဘၣ်ဒိ ယဟိဝၤယွၤအသး ဒ်လဲၣ်. (ထိၣ်သတြီၤဒီး ၇၈:၄၁.) ဒီးဆိကမိၣ် ဘၣ်ဃးဒီး နကဒၢထီၣ် မ့တမ့ၢ် နကဒိးန့ၢ်ဘၣ် တၢ်ဆါလၢ အဘၣ်ကူဘၣ်ဂာ်တၢ် ဒ်သိးဒီး AIDS သ့. တကးဒံးဘၣ် ဆိကမိၣ်ထံ ဘၣ်ဃးဒီး နမ့ၢ်မၤဒ်န့ၣ်န့ၣ် အကမၤဘၣ်ဒိ နသးအတၢ်တူၢ်ဘၣ် မ့တမ့ၢ် တၢ်ပာ်ကဲလီၤသး ကလီၤမၢ်ကွံာ်. ဒီးအမၤဘၣ်ဒိနၤ ဖးယံၤသ့. ဒီပုၢ်ဝဲၢ်မုၣ်တဂၤ တဲဝဲလၢ “တချုးလၢ ယၤဒီးယဝၤ ပထံၣ်လိာ်သးဒံးဘၣ်န့ၣ် ပမံဃုာ်ဒီး ပှၤဂၤ. အဃိ ခဲအံၤန့ၣ် ပကဲထီၣ် ခရံာ်ဖိခံဂၤလၢာ်လံ သနာ်က့ ပအ့ၣ်လိာ်သး ဒီးသးက့ၣ်လိာ်သး ခီဖျိလၢ တၢ်လၢပမၤတ့ၢ်လၢ အပူၤကွံာ်တဖၣ်အဃိ.” ဒီးအဂၤတမံၤန့ၣ် နမ့ၢ်မၤ တၢ်သ့ၣ်တဖၣ်န့ၣ်န့ၣ် နဘၣ်တူၢ်ၡူကွံာ် တၢ်ခွဲးတၢ်ယာ် လၢတၢ်အိၣ်ဖှိၣ်ပူၤ မ့တမ့ၢ် ပှၤနီဟးထီၣ်ကွံာ်နၤလၢ တၢ်အိၣ်ဖှိၣ်ပူၤသ့. (၁ ကရံၣ်သူး ၅:၉-၁၃) အဃိ တၢ်မုာ်တၢ်ပၠီၣ် တစိၢ်တလီၢ်န့ၣ် အမၤဘၣ်ဒိနၤ သ့ဝဲအါမး.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၃.၀၁ ၂ ¶၂

“ဆဲးအိၣ်လၢ ကစၢ်ယွၤ အတၢ်အဲၣ်တၢ်ကွံအပူၤ”

^၂ ပကဲယဟိဝၤယွၤ အပှၤဂီၢ်မုၢ်အဃိ ပနာ်လၢ ယဟိဝၤယွၤကဲ “တၢ်မ့ၢ်တၢ်တီကစၢ်.” ဒီးအဘၣ်သးဟ့ၣ်ပှၤ တၢ်လၢအဂ့ၤကတၢၢ်ထီဘိ. (စံးထီၣ်ပတြၢၤ ၃၁:၅; ယၡါယၤ ၄၈:၁၇) တကးဒံးဘၣ် “[ကစၢ်ယွၤ] ကလုၢ်ကထါခဲလၢာ်န့ၣ် မ့ၢ်တၢ်မ့ၢ်တၢ်တီ” အဃိ ပသ့ၣ်ညါလၢ တၢ်လၢပဖးဘၣ်လၢ လံာ်စီဆှံပူၤန့ၣ် ပနာ်န့ၢ်အီၤသ့. (ဖး စံးထီၣ်ပတြၢၤ ၁၁၉:၁၆၀.) ပှၤကူၣ်ဘၣ်ကူၣ်သ့ လၢလံာ်စီဆှံတကပၤတဂၤ တဲဝဲလၢ “တၢ်လၢကစၢ်ယွၤတဲဝဲန့ၣ် အတကမၣ်နီတဘျီဘၣ်. ဒီးအဟဲလၢပှဲၤထီၣ် ထီဘိ. အဃိ တၢ်လၢကစၢ်ယွၤတဲဝဲန့ၣ် ကစၢ်ယွၤအပှၤဂီၢ်မုၢ် နာ်ဝဲသ့ခဲလၢာ်.”

လါဒံၣ်စ့ဘၢၣ် ၃၀–လါယနူၤအါရံၤ ၅

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၂၀-၁၂၆

အဝဲသ့ၣ် ဖှံလီၤတၢ်ချံလၢ တၢ်မဲာ်ထံမဲာ်နိအပူၤ ဘၣ်ဆၣ်ကူးဘၣ်တၢ်လၢ တၢ်သးခုအပူၤ

တၢး၀၄-E ၆/၁ ၁၆ ¶၁၀

ပှၤလၢအမၤလၤကပီၤ ကစၢ်ယွၤန့ၣ် ကဒိးန့ၢ်ဘၣ်တၢ်ဆိၣ်ဂ့ၤ

^၁၀ စးထီၣ်လၢ ပကဲယ့ၣ်ၡူး အပျဲၢ်အဘီၣ်န့ၣ် လီၤဂာ်ဒ်သိးဒီး ပထီဒါမုၣ်ကီၤလံၢ်. ယၤကိာ် ၄:၇ တဲဝဲလၢ “ထီဒါမုၣ်ကီၤလံၢ် . . . ဒီးအဝဲ ကဃ့ၢ်ထီၣ်ကွံာ်လၢ သုအိၣ်လီၤ.” ဘၣ်ဆၣ် ပကမၤဒ်န့ၣ်အဂီၢ်န့ၣ် တညီဝဲထီဘိဘၣ်. ပကမၤကစၢ်ယွၤ အတၢ်မၤအဂီၢ်န့ၣ် ပကဘၣ် ထဲးဂံၢ်ထဲးဘါ. (လူၤကၣ် ၁၃:၂၄) ဘၣ်ဆၣ် ဖဲ စံးထီၣ်ပတြၢၤ ၁၂၆:၅ န့ၣ် လံာ်စီဆှံ အၢၣ်လီၤဝဲလၢ “ပှၤလၢအဖှံလီၤတၢ်ချံလၢ တၢ်မဲာ်ထံမဲာ်နိ အပူၤန့ၣ် ကကူးဘၣ်တၢ်လၢ တၢ်သးခုအပူၤလီၤ.” ပဘူၣ်ထီၣ်ဘါထီၣ်ဘၣ် ကစၢ်ယွၤလၢ အပာ်လုၢ်ပာ်ပှ့ၤဝဲ တၢ်လၢပှၤမၤန့ၢ်အီၤတဖၣ်. ဒီးအဝဲမ့ၢ် ပှၤလၢအ “ဟ့ၣ်လီၤခိၣ်ဖးဆူ ပှၤလၢအဃုအီၤလၢ တၢ်သူၣ်ဆူၣ်သးဆူၣ် အပူၤ” အဃိန့ၣ် အဝဲဆိၣ်ဂ့ၤဝဲ ပှၤလၢ အမၤလၤကပီၤအီၤတဖၣ်.—ဧ့ၤဘြံၤ ၁၁:၆.

တၢး၂၁.၁၁ ၂၄ ¶၁၇

ဒ်သိး နတၢ်နာ်ကဂၢၢ်ကျၢၤအဂီၢ် နကဘၣ်မၤဒ်လဲၣ်

^၁၇ မ့ၢ်ပှၤလၢနအဲၣ်ဘၣ်အီၤတဂၤ သံသဒၣ်ကွံာ်နၤအဃိ နသူၣ်အုးသးအုးဧါ. မၤဂၢၢ်ကျၢၤထီၣ် နတၢ်နာ်လၢ တၢ်ဂဲၤဆၢထၢၣ်သမူထီၣ်က့ၤအဂ့ၢ် ခီဖျိဟံးန့ၢ်တၢ်ဆၢကတီၢ်လၢ နကဖးလံာ်စီဆှံ လၢတၢ်ဂ့ၢ်လၢ ဘၣ်ထွဲလိာ်သးဒီး တၢ်ဂဲၤဆၢထၢၣ်သမူထီၣ်က့ၤန့ၣ်တက့ၢ်. မ့ၢ်ပှၤလၢ နဟံၣ်ဖိဃီဖိအပူၤတဂၤဂၤ ဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤအဃိ နသးအုးဧါ. ဃုသ့ၣ်ညါအါထီၣ် တၢ်ဂ့ၢ်ဘၣ်ဃးဒီးကစၢ်ယွၤ အတၢ်သိၣ်ဃီၣ်န့ၣ် မ့ၢ်ကျဲလၢအဂ့ၤကတၢၢ်ထီဘိတက့ၢ်. နမ့ၢ်ထံၣ်ဘၣ်ဒီး တၢ်အိၣ်သးလၢ အကီခဲဒ်လဲၣ်ဂ့ၤဒ်လဲၣ်ဂ့ၤ ထံၣ်အီၤဒ် တၢ်ခွဲးတၢ်ယာ် လၢနကမၤဂၢၢ်ကျၢၤထီၣ် နတၢ်နာ်အဂီၢ်. နတၢ်တူၢ်ဘၣ် အိၣ်ဒ်လဲၣ်န့ၣ် တဲဘၣ်ယဟိဝၤယွၤ လီၤတံၢ်လီၤဆဲးတက့ၢ်. နတဘၣ်အိၣ်ထဲတဂၤဧိၤဘၣ်, လၢနကအိၣ်ထဲတဂၤဧိၤအလီၢ် ဂုာ်ကျဲးစၢးရ့ဒီး ဒီပုၢ်ဝဲၢ်မုၣ်ခွါတဖၣ်. (ကတိၤဒိ ၁၈:၁) နမ့ၢ်သးအုး ဒီးနမဲာ်ထံမ့ၢ်လီၤလၢ တၢ်ကီတၢ်ခဲလၢ နထံၣ်ဘၣ်အီၤတဖၣ် အဃိသနာ်က့ ဆဲးမၤတၢ်လၢ ကမၤစၢၤနၤဒ်သိး နကအိၣ်ဒီး တၢ်တူၢ်န့ၢ်ခီၣ်ကဲ. (စံးထီၣ်ပတြၢၤ ၁၂၆:၅, ၆) အဃိ ဆဲးထီၣ်တၢ်အိၣ်ဖှိၣ်, ဟးစံၣ်တဲၤတဲလီၤတၢ် ဒီးဖးလံာ်စီဆှံ ထီဘိ. ဒီးဆဲးသးစၢၢ်ဆၢ တၢ်ဆိၣ်ဂ့ၤတဖၣ်လၢ ယဟိဝၤယွၤ ကဟ့ၣ်လီၤနၤလၢ ခါဆူညါ. ဖဲနထံၣ်ဘၣ်လၢ ယဟိဝၤယွၤ မၤစၢၤနၤအခါ နတၢ်နာ်န့ၢ်အီၤန့ၣ် ကဟဲဒိၣ်ထီၣ်အါထီၣ်ဝဲလီၤ.

တၢး၀၁-E ၇/၁၅ ၁၈-၁၉ ¶၁၃-၁၄

ဆဲးပၣ်ဃုာ်လၢ တၢ်ကူးဘုတၢ်မၤအပူၤ

^၁၃ စံးထီၣ်ပတြၢၤ ၁၂၆:၅, ၆ တဲဝဲလၢ “ပှၤလၢအဖှံလီၤတၢ်ချံလၢ တၢ်မဲာ်ထံမဲာ်နိအပူၤန့ၣ် ကကူးဘၣ်တၢ်လၢ တၢ်သးခုအပူၤလီၤ. ပှၤလၢအမဲာ်ထံလီၤဝဲ သနာ်က့ လဲၤဒံးဝဲလၢ ပျီပူၤ စိာ်ဃုာ်ဒီး တၢ်ချံလၢ အကဖှံလီၤဝဲတဖၣ်န့ၣ် ကဟဲက့ၤစိာ်ဃုာ်ဒီး ဘုကဒိၣ်တဖၣ် ဒီးကကိးပသူထီၣ်လၢ တၢ်သးခုအပူၤလီၤ.” ပှၤလၢ အပၣ်ဃုာ်လၢ တၢ်ကူးဘုအတၢ်မၤတဖၣ်အဂီၢ်န့ၣ် ကကဲထီၣ် တၢ်ဂံၢ်တၢ်ဘါလၢ အဝဲသ့ၣ်အဂီၢ်ဒိၣ်မး. လီၤဆီဒၣ်တၢ် ပှၤလၢအထံၣ်ဘၣ်ဒီး တၢ်မၤအၢမၤနးတဖၣ်န့ၣ် လံာ်စီဆှံတဆၢအံၤ ကကဲထီၣ် တၢ်ဂံၢ်တၢ်ဘါလၢ အဝဲသ့ၣ်အဂီၢ်. ပှၤကွဲးထါ စံးထီၣ်ပတြၢၤ ကွဲးဝဲတၢ်ကတိၤလၢ အဘၣ်ဃးဒီး ပှၤဖှံလီၤတၢ် ဒီးပှၤကူးဘၣ်တၢ်န့ၣ် အပာ်ဖျါထီၣ်ဝဲ ဘၣ်ဃးဒီး ယဟိဝၤယွၤ အသူၣ်အိၣ်သးအိၣ် ဒီးအဆိၣ်ဂ့ၤဝဲ ပှၤလၢအဟဲက့ၤဟးထီၣ်လၢ ဘၤဘူၤလိၣ် ဒီးဟဲက့ၤလၢ ဝ့ၢ်ယရူၤၡလ့ၣ်တဖၣ်. အဝဲသ့ၣ် ဟးထီၣ်ဘၣ်လၢ ဘၤဘူၤလိၣ်အဃိန့ၣ် အကသးခုဒိၣ်မး. သနာ်က့ အဝဲသ့ၣ် ဘၣ်ဟဲက့ၤ သူၣ်လီၤဖျးလီၤတၢ်လၢ တၢ်လီၢ်လၢ ပှၤတအိၣ်ဘၣ် အနံၣ် ၇၀ န့ၣ် တမ့ၢ်ကညီလၢအဂီၢ်ဘၣ်. သနာ်က့ ပှၤလၢအဆဲးသူၣ်လီၤဖျးလီၤတၢ် ဒီးတ့ထီၣ်ဘှီထီၣ်တၢ်တဖၣ်န့ၣ် အကအီၣ်ဘၣ် တၤသူတၤသၣ် ဒီးဒိးန့ၢ်ဘၣ် တၢ်သူၣ်မံသးမုာ်.

^၁၄ ဖဲပထံၣ်ဘၣ်ဒီးတၢ်မၤကွၢ် မ့တမ့ၢ် ဖဲပနီၢ်ကစၢ်ဒၣ်ဝဲ မ့တမ့ၢ် ပဒီပုၢ်ဝဲၢ်မုၣ်ခွါတဖၣ် ထံၣ်ဘၣ်တၢ်ကီတၢ်ခဲ ခီဖျိလၢ ပတၢ်စူၢ်တၢ်နာ်အဃိအခါန့ၣ် ပမဲာ်ထံကလီၤဝဲ. (၁ ပ့းတရူး ၃:၁၄) ဒီးတဘျီတခီၣ်န့ၣ် ကဖျါလၢ ပတၢ်စံၣ်တဲၤတဲလီၤတၢ်န့ၣ် တလဲၤထီၣ်လဲၤထီဘၣ် အဃိန့ၣ် ကကီလၢပဂီၢ်. ဘၣ်ဆၣ် ပမ့ၢ်ဆဲးဖှံလီၤတၢ် ဒီးလူလီၤထံန့ၣ် ကစၢ်ယွၤ ကဒုးဒိၣ်ထီၣ်တၢ် ဒ်ကျဲလၢ ပတမုၢ်လၢ်ဘၣ်အသိး. (၁ ကရံၣ်သူး ၃:၆) ဖဲပဟးဟ့ၣ်နီၤလီၤပှၤဂၤ လံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံအခါ ပှၤအါဂၤ သ့ၣ်ညါထီၣ်ဝဲ တၢ်မ့ၢ်တၢ်တီအဃိ ပထံၣ်ဘၣ်လၢ ယဟိဝၤယွၤ ဒုးဒိၣ်ထီၣ်တၢ်.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

cl-E ၇၃ ¶၁၅

တၢ်စိတၢ်ကမီၤလၢ ကဒီးသဒၢပှၤ—“ကစၢ်ယွၤမ့ၢ် ပတၢ်ဒီသဒၢအလီၢ်”

^၁၅ ကစၢ်ယွၤ ဒီသဒၢပှၤလၢ နီၢ်ခိတကပၤ. ဒ်ပမ့ၢ် ယဟိဝၤယွၤအခ့အပှၤအသိး ပမုၢ်လၢ်လၢ ကစၢ်ယွၤ ကဒီသဒၢပှၤ ဒ်ပှၤဒီတကရူၢ်အသိးသ့ဝဲ. အဝဲ မ့ၢ်တဒီသဒၢပှၤဘၣ်န့ၣ် မုၣ်ကီၤလံၢ် မၤနၢၤပှၤ ကန့ၢ်ညီညီဖိ. ဆိကမိၣ်ကွၢ် ဘၣ်ဃးဒီး မုၣ်ကီၤလံၢ် လၢအမ့ၢ် “ဟီၣ်ခိၣ်အခိၣ်” န့ၣ် အအဲၣ်ဒိး မၤလီၤမၢ်ကွံာ်ဝဲ တၢ်ဘူၣ်တၢ်ဘါ အမ့ၢ်အတီ သပှၢ်ကတၢၢ်. (ယိၤဟၣ် ၁၂:၃၁; လီၣ်ဖျါ ၁၂:၁၇) အဃိ ပမ့ၢ်ကွၢ်န့ၣ် ပဒိၣ်ပပှၢ်လၢ အအိၣ်ဒီး တၢ်စိတၢ်ကမီၤတဖၣ် အဂုာ်ကျဲးစၢးတြီဝဲ ပတၢ်စံၣ်တဲၤတဲလီၤတၢ်မၤ တကးဒံးဘၣ် ဂုာ်ကျဲးစၢး ဝဲဒ်သိး ပတၢ်ဖံးတၢ်မၤ ကပတုာ်ကွံာ်ဝဲ လၢာ်လၢာ်ဆ့ဆ့. ဘၣ်ဆၣ် ယဟိဝၤပှၤအုၣ်အသးတဖၣ်န့ၣ် ဆဲးအိၣ်ဂၢၢ်ကျၢၤဝဲ ဒီးဆဲးစံၣ်တဲၤတဲလီၤတၢ်. ဘၣ်မနုၤအဃိ ပှၤလၢ အအိၣ်ဒီး တၢ်စိတၢ်ကမီၤတဖၣ်အံၤ အမၤပတုာ်ဝဲ ပဝဲခရံာ်ဖိတဖၣ် အတၢ်ဖံးတၢ်မၤ တန့ၢ်ဘၣ်လဲၣ်. မ့ၢ်လၢ ယဟိဝၤယွၤ ဒီသဒၢပှၤလၢ အဒံးဆ့ အဖီလာ်အဃိ အဝဲသ့ၣ် မၤဝဲတန့ၢ်ဘၣ်.—စံးထီၣ်ပတြၢၤ ၁၇:၇, ၈.