“ဒိကနၣ်တၢ်လၢ ယကတဲနၢ်ပၢၢ်သု”

၁, ၂. ဘၣ်မနုၤအဃိ စီၤပီလူး ရဲၣ်ကျဲၤဝဲလၢ ကဟဲက့ၤလၢ ဝ့ၢ်ယရူၤၡလ့ၣ်လဲၣ်​ ဒီးအဝဲကထံၣ်ဘၣ်​ တၢ်မၤကွၢ် မနုၤတဖၣ်လဲၣ်.

စီၤပီလူး ဟးကဒီးဝဲလၢ ဝ့ၢ်ယရူၤၡလ့ၣ်အကျဲ ဆံးဆံးဖိတဖၣ်အပူၤ လၢပှၤဂီၢ်မုၢ်အကျါ. ဝ့ၢ်ယရူၤၡလ့ၣ်​ ကဲဝဲတၢ်လီၢ်ခိၣ်သ့ၣ်​ လၢပှၤဘူၣ်ထီၣ်ဘါထီၣ်​ ယဟိဝၤယွၤန့ၣ်​ အိၣ်လၢအနံၣ်လၢ အကယၤတဖၣ်လံ. အဃိ ပှၤအိၣ်ဖဲန့ၣ်တဖၣ်န့ၣ်​ အဝဲသ့ၣ်​ ပာ်ကဖၢလၢသး လၢအဝ့ၢ် ဒီးအပှၤကလုာ်တဖၣ်အဃိ. ဒီးစီၤပီလူး သ့ၣ်ညါဝဲလၢ ခရံာ်ဖိအါဂၤန့ၣ်​ ပာ်ဒိၣ်ဝဲ စီၤမိၤၡ့အတၢ်သိၣ်တၢ်သီတဖၣ်​ ဒီးမၤယံာ်မၤနီၢ်အသးလၢ ကမၤထွဲဝဲ ကစၢ်ယွၤ အတၢ်သိၣ်တၢ်သီ လၢအသီတဖၣ်. အဃိ ဖဲစီၤပီလူး အိၣ်လၢဝ့ၢ်အ့းဖ့းစူးအခါ အဝဲရဲၣ်ကျဲၤဝဲလၢ ကဟဲက့ၤလၢ ဝ့ၢ်ယရူၤၡလ့ၣ်. ဒီးအကဟဲက့ၤဝဲန့ၣ်​ တမ့ၢ်ထဲ အကဟဲက့ၤစိာ် တိၢ်မၤဘူၣ်လၢ ဒီပုၢ်ဝဲၢ်တဖၣ်အဂီၢ်ဘၣ်. အကဟဲက့ၤ ဒ်သိး ကဘှီဘၣ်ထီၣ်ဝဲ ဒီပုၢ်ဝဲၢ်တဖၣ်​ အတၢ်ဆိကမိၣ်. (မၤတၢ် ၁၉:၂၁) တၢ်ဘၣ်ယိၣ်​ အိၣ်လၢအဂီၢ်သနာ်က့ အဝဲပာ်လီၤအသးလၢ အကဟဲက့ၤဝဲ.

^၂ စီၤပီလူး မ့ၢ်ဟဲက့ၤလၢ ဝ့ၢ်ယရူၤၡလ့ၣ်န့ၣ်​ အကထံၣ်ဘၣ်​ တၢ်ကီတၢ်ခဲ မနုၤလဲၣ်. အဝဲကထံၣ်ဘၣ်ဒီး တၢ်မၤကွၢ် လၢအဟဲလၢ ဒီပုၢ်ဝဲၢ်တဖၣ်အအိၣ်. ဒီပုၢ်ဝဲၢ်ဖဲန့ၣ်​ တနီၤန့ၣ်​ နၢ်ဟူဘၣ်ဝဲ ပှၤတဲစီၤပီလူးအဂ့ၢ် တတီတလိၤဘၣ်​ ဒီးအဝဲသ့ၣ်နာ်ဝဲ. ဒီးအဂၤတခါန့ၣ်​ စီၤပီလူးကထံၣ်ဘၣ်​ တၢ်မၤကွၢ်လၢ အဟဲလၢ ပှၤလၢအသးဟ့ ခရံာ်ဖိတဖၣ်အအိၣ်. ပှၤလၢအသးဟ့ ခရံာ်ဖိတဖၣ်န့ၣ်​ ကတဲဟးဂီၤအီၤ, တီၢ်အီၤ ဒီးတဲပျံၤတဲဖုးလၢ ကမၤသံအီၤ. အဃိ စီၤပီလူး ကဒိးန့ၢ်ဘၣ်​ တၢ်ခွဲးတၢ်ယာ် လၢကတဲဖျါထီၣ်​ အတၢ်စူၢ်တၢ်နာ်. စီၤပီလူး ထံၣ်ဘၣ်ဒီး တၢ်ကီတၢ်ခဲတဖၣ်အံၤသနာ်က့ အပာ်ဖျါထီၣ်​ တၢ်ဆီၣ်လီၤသး, တၢ်သးဒူ ဒီးတၢ်နာ်. အဃိ အကဲထီၣ်​ တၢ်ဒိတၢ်တဲာ်အဂ့ၤလၢ ခရံာ်ဖိလၢ မုၢ်မဆါတနံၤအံၤအဂီၢ်.

“အဝဲသ့ၣ်​ စံးထီၣ်ပတြၢၤ ကစၢ်ယွၤ” (မၤတၢ် ၂၁:၁၈-၂၀)

၃-၅. (က) လၢဝ့ၢ်ယရူၤၡလ့ၣ်န့ၣ်​ စီၤပီလူး အိၣ်ဖှိၣ်ဒီး မတဂၤသ့ၣ်တဖၣ်လဲၣ်​ ဒီးအဝဲသ့ၣ်​ တဲသကိး တၢ်ဂ့ၢ်မနုၤလဲၣ်. (ခ) ပန့ၢ်ဘၣ်​ တၢ်မၤလိမနုၤလဲၣ်.

^၃ ဖဲစီၤပီလူး ဒီးအသကိးတဖၣ်​ က့ၤတုၤလၢ ဝ့ၢ်ယရူၤၡလ့ၣ်​ တသီဝံၤအလီၢ်ခံ အဝဲသ့ၣ်​ လဲၤထံၣ်လိာ်အသးဒီး တၢ်အိၣ်ဖှိၣ်သးပှၢ်တဖၣ်​ လၢအဘၣ်မူဘၣ်ဒါ. ဘၣ်ဃးဒီး တၢ်ဂ့ၢ်တခါအံၤန့ၣ်​ လံာ်စီဆှံ တပာ်ဖျါထီၣ်ဝဲ တၢ်မၢဖိတဖၣ်အမံၤ နီတဂၤဘၣ်. အဃိ ဘၣ်သ့ၣ်သ့ၣ်​ ကမ့ၢ်လၢ ဖဲန့ၣ်အဆၢကတီၢ် အဝဲသ့ၣ်​ လဲၤမၤကစၢ်ယွၤ အတၢ်မၤလၢတၢ်လီၢ်အဂၤ. ဘၣ်ဆၣ်​ မ့မ့ၢ်ယ့ၣ်ၡူး အဒီပုၢ်ဝဲၢ်ခွါ စီၤယၤကိာ်န့ၣ်​ အိၣ်ဝဲဖဲန့ၣ်. (ကလၤ ၂:၉) ဒီးလီၤဂာ်လၢ ဖဲ “တၢ်အိၣ်ဖှိၣ်သးပှၢ် ကိးဂၤဒဲး” အိၣ်ဖှိၣ်ဝဲဒီး စီၤပီလူးအခါ စီၤယၤကိာ် တီခိၣ်ရိၤမဲတၢ်.—မၤတၢ် ၂၁:၁၈.

^၄ စီၤပီလူး ဆၢဂ့ၤဆၢဝါဝဲ တၢ်အိၣ်ဖှိၣ်သးပှၢ်တဖၣ်​ ဒီး “တဲဘၣ်​ အဝဲသ့ၣ်​ တၢ်ဂ့ၢ်တၢ်ကျိၤ လီၤတံၢ်လီၤဆဲး ဘၣ်ဃးဒီး တၢ်လၢ ကစၢ်ယွၤမၤဝဲလၢ ပှၤကလုာ်တဖၣ်အကျါ ခီဖျိလၢ အတၢ်စံၣ်တဲၤတဲလီၤ တၢ်မၤ.” (မၤတၢ် ၂၁:၁၉) အဃိ ဖဲဒီပုၢ်ဝဲၢ်တဖၣ်​ နၢ်ဟူဘၣ်ဝဲ တၢ်လဲၤခီဖျိတဖၣ်အခါ အဝဲသ့ၣ်​ သးခုဒိၣ်မး. မုၢ်မဆါတနံၤအံၤစ့ၢ်ကီး ဖဲပနၢ်ဟူဘၣ်လၢ တၢ်စံၣ်တဲၤတဲလီၤတၢ်မၤ လဲၤထီၣ်လဲၤထီလၢ ထံကီၢ်အဂၤအခါ ပသးခုဒိၣ်မး.—ကတိၤ ၂၅:၂၅.

^၅ စီၤပီလူး တဲဖျါထီၣ်ဝဲ တၢ်မၤဘူၣ်လၢ အဟဲက့ၤစိာ်ဝဲလၢ ကီၢ်ယူရပၤအဂ့ၢ်. ဖဲဒီပုၢ်ဝဲၢ်တဖၣ်​ သ့ၣ်ညါဘၣ်ဝဲလၢ ဒီပုၢ်ဝဲၢ်လၢ အအိၣ်လၢ တၢ်လီၢ်ယံၤတဖၣ်​ သူၣ်အိၣ်သးအိၣ်​ အဝဲသ့ၣ်အခါ အဝဲသ့ၣ်​ သးခု ဒီးစံးဘျုးဘၣ်​ ဒီပုၢ်ဝဲၢ်တဖၣ်န့ၣ်ဒိၣ်မး. ဒီးဖဲအဝဲသ့ၣ်​ နၢ်ဟူဘၣ်ဝဲ တၢ်လဲၤခီဖျိလၢ စီၤပီလူးတဲဝဲတဖၣ်အခါ “အဝဲသ့ၣ်​ စံးထီၣ်ပတြၢၤ ကစၢ်ယွၤ.” (မၤတၢ် ၂၁:၂၀) ဆၢကတီၢ်ခဲအံၤစ့ၢ်ကီး ပဒီပုၢ်ဝဲၢ်လၢ အထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံး ဒီးဆိးက့တဖၣ်န့ၣ်​ ဖဲဒီပုၢ်ဝဲၢ်အဂၤတဖၣ်​ မၤစၢၤအီၤ ဒီးဟ့ၣ်ဂံၢ်ဟ့ၣ်ဘါအီၤအခါ အဝဲသ့ၣ်​ သးခု ဒီးစံးဘျုးဘၣ်​ ဒီပုၢ်ဝဲၢ်တဖၣ်ဒိၣ်မး.

ပှၤအါဂၤ “အသးဆူၣ်လၢ ကမၤထွဲ စီၤမိၤၡ့ အတၢ်သိၣ်တၢ်သီ” (မၤတၢ် ၂၁:၂၀, ၂၁)

၆. စီၤပီလူး သ့ၣ်ညါထီၣ်​ တၢ်ဂ့ၢ်မနုၤလဲၣ်.

^၆ တၢ်အိၣ်ဖှိၣ်သးပှၢ်တဖၣ်​ တဲဘၣ်စီၤပီလူးလၢ ဒီပုၢ်ဝဲၢ်တဖၣ်လၢ အအိၣ်လၢယူဒၤန့ၣ်​ အသးဘၣ်တံာ်တာ် ခီဖျိအနၢ်ဟူဘၣ်ဝဲ စီၤပီလူးအဂ့ၢ်တနီၤအဃိ. အဝဲသ့ၣ်​ တဲဝဲလၢ “ဒီပုၢ်ဝဲၢ်ဧၢ, နထံၣ်လၢ ပှၤစူၢ်က့ၤနာ်က့ၤတၢ်တဖၣ်​ လၢအမ့ၢ် ပှၤယူဒၤဖိန့ၣ်​ အိၣ်ဝဲလၢ အကလးတဖၣ်​ ဒီးအဝဲသ့ၣ်ခဲလၢာ် အသးဆူၣ်လၢ ကမၤထွဲ စီၤမိၤၡ့ အတၢ်သိၣ်တၢ်သီလီၤ. ဘၣ်ဆၣ်​ အဝဲသ့ၣ်နၢ်ဟူနဂ့ၢ် လၢနသိၣ်လိ ပှၤယူဒၤဖိခဲလၢာ်လၢ အအိၣ်လၢ ထံဂၤကီၢ်ဂၤတဖၣ်​ ဒ်သိး အကပာ်တ့ၢ်ကွံာ် စီၤမိၤၡ့ အတၢ်သိၣ်တၢ်သီ ဒီးလၢနတဲဘၣ်​ အဝဲသ့ၣ်လၢ အဝဲသ့ၣ်​ တဘၣ်ကူးတရံး အဖိတဖၣ်​ ဒီးတဘၣ်မၤထွဲ လုၢ်လၢ်တဖၣ်​ တဂ့ၤလီၤ.”a—မၤတၢ် ၂၁:၂၀, ၂၁.

၇, ၈. (က) ပှၤယူဒၤဖိအါဂၤန့ၣ်​ အတနၢ်ပၢၢ်ဝဲ တၢ်ဂ့ၢ်မနုၤဘၣ်လဲၣ်. (ခ) ပှၤယူဒၤဖိလၢ အကဲခရံာ်ဖိအါဂၤ တအိၣ်ဒီး တၢ်နၢ်ပၢၢ်လၢ အဘၣ်ဘၣ်သနာ်က့ ဘၣ်မနုၤအဃိ ပတဲသ့လၢ အဝဲသ့ၣ်​ တမ့ၢ်ပှၤလၢ အထီဒါက့ၤတၢ်မ့ၢ်တၢ်တီဘၣ်လဲၣ်.

^၇ စီၤမိၤၡ့ အတၢ်သိၣ်တၢ်သီ ကတၢၢ်ကွံာ်ဝဲန့ၣ်​ အိၣ်လံအနံၣ်​ ၂၀ ဘျဲၣ်လံသနာ်က့ ဘၣ်မနုၤအဃိ ခရံာ်ဖိအါဂၤ သးဆူၣ်ဒံးလၢ ကမၤထွဲ စီၤမိၤၡ့ အတၢ်သိၣ်တၢ်သီလဲၣ်. (ကလီး ၂:၁၄) ဖဲ ခ.န ၄၉ န့ၣ်တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ်​ အိၣ်ဖှိၣ်ဝဲလၢ ဝ့ၢ်ယရူၤၡလ့ၣ်​ ဝံၤအလီၢ်ခံ အဝဲသ့ၣ်ဆှၢလီၤ လံာ်ပရၢလၢ တၢ်အိၣ်ဖှိၣ်တဖၣ်အအိၣ်လၢ ပှၤကလုာ်ဂၤတဖၣ်န့ၣ်​ တလိၣ်ဒိးတၢ်ကူးတရံးဘၣ်​ ဒီးတလိၣ်မၤထွဲ စီၤမိၤၡ့ အတၢ်သိၣ်တၢ်သီလၢၤဘၣ်. (မၤတၢ် ၁၅:၂၃-၂၉) ဘၣ်ဆၣ်​ လၢလံာ်ပူၤန့ၣ်​ တပာ်ဖျါထီၣ်ဝဲ ပှၤယူဒၤဖိလၢ အကဲခရံာ်ဖိတဖၣ်​ အဂ့ၢ်ဘၣ်အဃိ လီၤဂာ်လၢ အဝဲသ့ၣ်အါဂၤန့ၣ်​ တနၢ်ပၢၢ်ဝဲလၢ အဝဲသ့ၣ်စ့ၢ်ကီး တလိၣ်မၤထွဲ စီၤမိၤၡ့အတၢ်သိၣ်တၢ်သီဘၣ်.

^၈ ဘၣ်ဃးဒီး တၢ်ဂ့ၢ်တခါအံၤန့ၣ်​ ပှၤယူဒၤဖိလၢ အကဲခရံာ်ဖိအါဂၤ တအိၣ်ဒီး တၢ်နၢ်ပၢၢ်လၢ အဘၣ်ဘၣ်သနာ်က့ အဝဲသ့ၣ်​ ဆဲးတီဒီး ကစၢ်ယွၤဒံး. တချုးလၢ အဝဲသ့ၣ်ကဲထီၣ်​ ခရံာ်ဖိဒံးဘၣ်န့ၣ်​ အဝဲသ့ၣ်​ တဘူၣ်ထီၣ်ဘါထီၣ်​ ယွၤလၢအကမၣ်ဘၣ်​ ဒီးဖဲအဝဲသ့ၣ်​ ကဲထီၣ်ခရံာ်ဖိ ဝံၤအလီၢ်ခံစ့ၢ်ကီး အဝဲသ့ၣ်​ တမၤဝဲ တၢ်ဘူၣ်တၢ်ဘါကမၣ်​ အလုၢ်လၢ်တဖၣ်​ နီတမံၤဘၣ်. စီၤမိၤၡ့ အတၢ်သိၣ်တၢ်သီ လၢအဝဲသ့ၣ်​ ပာ်ဒိၣ်ဝဲန့ၣ်​ ဟဲလၢယဟိဝၤယွၤအအိၣ်​ ဒီးတဘၣ်ဃးဒီး တၢ်ဝံတၢ်နါဘၣ်အဃိ အဝဲသ့ၣ်​ ပာ်ဒိၣ်ဝဲန့ၣ်​ တကမၣ်ဘၣ်. သနာ်က့ စီၤမိၤၡ့ အတၢ်သိၣ်တၢ်သီန့ၣ်​ ဘၣ်ဃးဒီး တၢ်အၢၣ်လီၤအီလီၤ အလီၢ်လံၤ. မ့မ့ၢ် ခရံာ်ဖိတဖၣ်န့ၣ်​ အိၣ်လၢတၢ်အၢၣ်လီၤအီလီၤအသီ အဖီလာ်လံ. အဃိ ယဟိဝၤယွၤ ကတူၢ်လိာ်အဝဲသ့ၣ်​ အတၢ်ဘူၣ်ထီၣ်ဘါထီၣ်ဧါ တတူၢ်လိာ်ဝဲဘၣ်ဧါန့ၣ်​ တဒိးသန့ၤထီၣ်အသးလၢ အဝဲသ့ၣ်​ မၤထွဲဝဲ စီၤမိၤၡ့ အတၢ်သိၣ်တၢ်သီလၢၤဘၣ်. ပှၤယူဒၤဖိလၢ အကဲခရံာ်ဖိတနီၤ နာ်ဒံးဝဲလၢ ပှၤကဘၣ်မၤထွဲ စီၤမိၤၡ့ အတၢ်သိၣ်တၢ်သီ သပှၢ်တၢၢ်အဃိ လီၤဂာ်ဒ်သိး အဝဲသ့ၣ်​ တနာ်အီၣ်ဝဲ ယဟိဝၤယွၤ အတၢ်ရဲၣ်တၢ်ကျဲၤ လၢအသီဘၣ်. ပှၤကဘၣ်ဘူၣ်ထီၣ်ဘါထီၣ်အီၤ ဒ်လဲၣ်န့ၣ်​ ယဟိဝၤယွၤ ပာ်ဖျါထီၣ်ဝဲ တၢ်ဟံးစုနဲၣ်ကျဲလၢအသီ အဃိ အဝဲသ့ၣ်ကြၢးတူၢ်လိာ်ဝဲ တၢ်ဟံးစုနဲၣ်ကျဲအံၤ.b—ယံး ၃၁:၃၁-၃၄; လူၤ ၂၂:၂၀.

“တၢ်လၢ အဝဲသ့ၣ်​ နၢ်ဟူဘၣ်ဃးဒီး နဂ့ၢ်န့ၣ်​ တမ့ၢ်တၢ်နီၢ်ကီၢ်ဘၣ်” (မၤတၢ် ၂၁:၂၂-၂၆)

၉. ဘၣ်ဃးဒီး ပှၤမၤထွဲ စီၤမိၤၡ့ အတၢ်သိၣ်တၢ်သီန့ၣ်​ စီၤပီလူး တဲဝဲဒ်လဲၣ်.

^၉ ပှၤတဲဝဲလၢ စီၤပီလူး သိၣ်လိဝဲ ပှၤယူဒၤဖိလၢ အအိၣ်လၢ ပှၤကလုာ်ဂၤတဖၣ်အကျါလၢ “အဝဲသ့ၣ်​ တဘၣ်ကူးတရံး အဖိတဖၣ်​ ဒီးတဘၣ်မၤထွဲ လုၢ်လၢ်တဖၣ်​ တဂ့ၤလီၤ.” စီၤပီလူးန့ၣ်​ အကဲဝဲ တၢ်မၢဖိလၢ ပှၤကလုာ်တဖၣ်အဂီၢ် ဒီးတၢ်ဆၢတဲာ်လၢ အဘၣ်ဃးဒီး ပှၤကလုာ်ဂၤတဖၣ်​ တလိၣ်ဒိးတၢ်ကူးတရံးလၢၤဘၣ်န့ၣ်​ အဝဲတဲဘၣ်ဝဲ ပှၤကလုာ်ဂၤတဖၣ်. တကးဒံးဘၣ်​ ပှၤလၢအမၢဆူၣ်​ ပှၤကလုာ်ဂၤ လၢအကဲခရံာ်ဖိတဖၣ်​ လၢကဒိးတၢ်ကူးတရံး ဒီးကမၤထွဲဝဲ စီၤမိၤၡ့အတၢ်သိၣ်တၢ်သီန့ၣ်​ စီၤပီလူး ပာ်ဖျါထီၣ်လၢ အဝဲသ့ၣ်မၤတၢ်န့ၣ်​ တဘၣ်ဘၣ်. (ကလၤ ၅:၁-၇) ဖဲစီၤပီလူးလဲၤလၢ ဝ့ၢ်တဖျၢၣ်ဘၣ်တဖျၢၣ်အခါ အဝဲစံၣ်တဲၤတဲလီၤဝဲ ပှၤယူဒၤဖိ လၢအထံၣ်ဝဲတဖၣ်. ဒီးအဝဲၡဲပၠး ပှၤလၢအဒိကနၣ်အီၤတဖၣ်လၢ ယ့ၣ်ၡူးအတၢ်သံန့ၣ်​ မၤကတၢၢ်ကွံာ် စီၤမိၤၡ့ အတၢ်သိၣ်တၢ်သီ အဃိ ပကကဲထီၣ်​ ပှၤတီပှၤလိၤအဂီၢ်န့ၣ်​ တဒိးသန့ၤထီၣ်အသးလၢ ပမၤထွဲ စီၤမိၤၡ့ အတၢ်သိၣ်တၢ်သီ အဃိလၢၤဘၣ်.—ရိ ၂:၂၈, ၂၉; ၃:၂၁-၂၆.

၁၀. ဘၣ်ဃးဒီး ပှၤမၤထွဲ စီၤမိၤၡ့ အတၢ်သိၣ်တၢ်သီ ဒီးပှၤဒိးတၢ်ကူးတရံးန့ၣ်​ စီၤပီလူး ထံၣ်အဝဲသ့ၣ်ဒ်လဲၣ်.

^၁၀ ပှၤတနီၤ အသးဆူၣ်လၢ ကမၤထွဲဝဲ ပှၤယူဒၤဖိအလုၢ်လၢ်တနီၤ ဒ်သိးဒီး ကဘၣ်အိၣ်ဘှံးလၢ မုၢ်အိၣ်ဘှံးနံၤ ဒီးဒုၣ်တၢ်အီၣ်. သနာ်က့ စီၤပီလူး ပာ်ဖျါထီၣ်လၢ အနၢ်ပၢၢ်စၢၤအဝဲသ့ၣ်. (ရိ ၁၄:၁-၆) ဒီးအဝဲတဒုးအိၣ်ထီၣ်​ တၢ်သိၣ်တၢ်သီ ဘၣ်ဃးဒီး တၢ်ဒိးတၢ်ကူးတရံးဘၣ်. စီၤပီလူး မၢဝဲစီၤတံၤမသ့း ဒိးတၢ်ကူးတရံး, မ့ၢ်လၢ ပှၤယူဒၤဖိတဖၣ်​ သ့ၣ်ညါဝဲလၢ စီၤတံၤမသ့းအပါန့ၣ်​ ကဲဝဲပှၤကြံးဖိ ဒီးစီၤပီလူး ဘၣ်ယိၣ်ဝဲလၢ ပှၤယူဒၤဖိတဖၣ်​ တတူၢ်လိာ် စီၤတံၤမသ့းဘၣ်အဃိ. (မၤတၢ် ၁၆:၃) ပှၤကဒိးတၢ်ကူးတရံးဧါ တဒိးဘၣ်ဧါန့ၣ်​ အကဲ ပှၤနီၢ်ကစၢ် အတၢ်ဆၢတဲာ်လီၤ. စီၤပီလူးတဲဘၣ်​ ပှၤကလုာ်ဂၤတဖၣ်လၢပှၤ “ဒိးတၢ်ကူးတရံးမ့ၢ်ဂ့ၤ, တဒိးတၢ်ကူးတရံးဘၣ်မ့ၢ်ဂ့ၤ အရ့တဒိၣ်ဘၣ်. မ့မ့ၢ် တၢ်နာ်လၢအမၤတၢ် ခီဖျိတၢ်အဲၣ်တၢ်ကွံန့ၣ်​ အရ့ဒိၣ်ဝဲ.” (ကလၤ ၅:၆) ပှၤမ့ၢ်ဒိးတၢ်ကူးတရံး ခီဖျိလၢ ပှၤအဲၣ်ဒိးမၤထွဲ စီၤမိၤၡ့အတၢ်သိၣ်တၢ်သီ မ့တမ့ၢ် လၢကဒိးန့ၢ်ဘၣ်​ ကစၢ်ယွၤ အတၢ်ဘၣ်သးအဂီၢ်န့ၣ်​ လီၤဂာ်ဒ်သိး ပှၤတအိၣ်ဒီးတၢ်နာ်ဘၣ်.

၁၁. တၢ်အိၣ်ဖှိၣ်သးပှၢ်တဖၣ်​ မၢစီၤပီလူး မၤမနုၤလဲၣ်​ ဒီးပနာ်သ့လၢ အဝဲတမၤဝဲ မနုၤဘၣ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)

^၁၁ စီၤပီလူးအဂ့ၢ်လၢ ပှၤတဲဝဲန့ၣ်​ တဘၣ်ဘၣ်သနာ်က့ ဒီပုၢ်ဝဲၢ်လၢ အကဲပှၤယူဒၤဖိတဖၣ်​ နာ်ဝဲ ဒီးအသးဘၣ်တံာ်တာ်ဒံး. အဃိ တၢ်အိၣ်ဖှိၣ်သးပှၢ်တဖၣ်​ တဲစီၤပီလူးလၢ “ပအိၣ်ဒီး ပိာ်ခွါလွံၢ်ဂၤ လၢအမၤတ့ၢ် တၢ်အၢၣ်လီၤအီလီၤ ဒီးယွၤလီၤ. လဲၤကိးဃုာ်ဒီး အဝဲသ့ၣ်​ ဒီးမၤသကိး တၢ်မၤကဆှီထီၣ်သး အလုၢ်လၢ်တဖၣ်​ ဒီးဟ့ၣ်လီၤန့ၢ် အဝဲသ့ၣ်​ အတၢ်လၢာ်ဘူၣ်လၢာ်စ့ၤတဖၣ်​ ဒ်သိးအဝဲသ့ၣ်​ ကတံာ်အခိၣ်ဆူၣ်​ ဖုၣ်ဖုၣ်အဂီၢ်တက့ၢ်. ဒီးပှၤကိးဂၤဒဲး ကသ့ၣ်ညါလၢ တၢ်လၢ အဝဲသ့ၣ်​ နၢ်ဟူဘၣ်ဃးဒီး နဂ့ၢ်န့ၣ်​ တမ့ၢ်တၢ်နီၢ်ကီၢ်ဘၣ်​ ဒီးကသ့ၣ်ညါလၢ နအိၣ်မူ ဂ့ၤဂ့ၤဘၣ်ဘၣ်​ ဒီးနမၤထွဲစီၤမိၤၡ့ အတၢ်သိၣ်တၢ်သီ စ့ၢ်ကီးလီၤ.”c—မၤတၢ် ၂၁:၂၃, ၂၄.

၁၂. စီၤပီလူး သးအိၣ်ဒိကနၣ်​ တၢ်အိၣ်ဖှိၣ်သးပှၢ် လၢဝ့ၢ်ယရူၤၡလ့ၣ်န့ၣ်​ အပာ်ဖျါထီၣ်ဝဲ ဒ်လဲၣ်.

^၁၂ စီၤပီလူး မ့ၢ်တဲဝဲလၢ ပှၤယူဒၤဖိလၢ အကဲခရံာ်ဖိတဖၣ်​ အသးဘၣ်တံာ်တာ်န့ၣ်​ မ့ၢ်လၢအဝဲသ့ၣ်​ အသးဆူၣ်လၢ ကမၤထွဲဒံးဝဲ စီၤမိၤၡ့အတၢ်သိၣ်တၢ်သီအဃိ ဒီးတမ့ၢ်လၢ အဝဲသ့ၣ်​ နၢ်ဟူပှၤတဲစီၤပီလူး အဂ့ၢ်တတီတလိၤ အဃိန့ၣ်ဘၣ်. စီၤပီလူး မ့ၢ်အဲၣ်ဒိးတဲဝဲဒ်န့ၣ်န့ၣ်​ အတဲဝဲသ့ သနာ်က့ အတတဲဝဲ ဒ်န့ၣ်ဘၣ်. တၢ်လၢတၢ်အိၣ်ဖှိၣ်သးပှၢ်တဖၣ်​ မၢအမၤန့ၣ်​ တထီဒါလိာ်သးဒီး ကစၢ်ယွၤ အတၢ်သိၣ်တၢ်သီဘၣ်အဃိ အဝဲမၤထွဲဝဲလၢ တၢ်သးအိၣ်အပူၤ. လၢအပူၤကွံာ်န့ၣ်​ အဝဲကွဲးဝဲလၢ “ယတအိၣ်လၢ တၢ်သိၣ်တၢ်သီ အဖီလာ်ဘၣ်. ဘၣ်ဆၣ်​ လၢပှၤအိၣ်လၢ တၢ်သိၣ်တၢ်သီ အဖီလာ်တဖၣ်အဂီၢ်န့ၣ်​ ယကဲထီၣ်ဒ်သိးဒီး ပှၤအိၣ်လၢ တၢ်သိၣ်တၢ်သီအဖီလာ် တဂၤ ဒ်သိးယကမၤန့ၢ် ပှၤအိၣ်လၢ တၢ်သိၣ်တၢ်သီ အဖီလာ်တဖၣ်အဂီၢ်.” (၁ ကရံၣ်​ ၉:၂၀) တဘျီအံၤန့ၣ်​ စီၤပီလူး ဒိကနၣ်ဝဲ တၢ်အိၣ်ဖှိၣ်သးပှၢ်လၢ ဝ့ၢ်ယရူၤၡလ့ၣ်​ အကလုၢ် ဒီးအဝဲကဲထီၣ်​ “ဒ်သိးဒီး ပှၤအိၣ်လၢ တၢ်သိၣ်တၢ်သီအဖီလာ်.” စီၤပီလူး ပာ်လီၤန့ၢ်ပှၤ တၢ်အဒိအတဲာ်လၢ ပကဘၣ်ဒိကနၣ်​ တၢ်အိၣ်ဖှိၣ်သးပှၢ်အကလုၢ် ဒီးတဘၣ်မၤဖဲပသးဘၣ်.—ဧ့ၤ ၁၃:၁၇.

“အဝဲကြၢးသံလံ” (မၤတၢ် ၂၁:၂၇–၂၂:၃၀)

၁၃. (က) ပှၤယူဒၤဖိတဖၣ်​ မၤတၢထီၣ်တၢလီၤတၢ်လၢ တၢ်လုၢ်ဟံၣ်အပူၤ လၢတၢ်ဂ့ၢ်မနုၤအဃိလဲၣ်. (ခ) စီၤပီလူး အသးသမူ ပူၤဖျဲးဝဲဒ်လဲၣ်.

^၁၃ လၢတၢ်လုၢ်ဟံၣ်န့ၣ်​ တၢ်ကီတၢ်ခဲ အိၣ်ထီၣ်ဝဲ. ဖဲမုၢ်နံၤတဖၣ်လၢ ပှၤပိာ်ခွါလွံၢ်ဂၤ ကဲဝဲပှၤနစၤရံဖိပှဲၤထီၣ်​ ဒီးအဝဲသ့ၣ်​ ဒီးစီၤပီလူး ဟဲဝဲလၢတၢ်လုၢ်ဟံၣ်ခါ ပှၤယူဒၤဖိလၢ အဟဲလၢကီၢ်အၤစံန့ၣ်​ ထံၣ်ဝဲစီၤပီလူး. ဒီးတဲဝဲလၢ စီၤပီလူး ဟဲကိးဝဲ ပှၤကလုာ်ဂၤတဖၣ်​ လၢတၢ်လုၢ်ဟံၣ်အဃိ တၢ်တၢထီၣ်တၢလီၤ အိၣ်ထီၣ်ဝဲ. ရိမ့ၤအသုးခိၣ်​ မ့ၢ်တဟဲနုာ်လီၤတြီဝဲဘၣ်န့ၣ်​ ဘၣ်သ့ၣ်သ့ၣ်​ ပှၤကတီၢ် စီၤပီလူးတုၤလၢအသံ. ရိမ့ၤအသုးခိၣ်​ က့ၤဖီၣ်စီၤပီလူး. စးထီၣ်ဖဲန့ၣ်န့ၣ်​ ဒ်သိးစီၤပီလူး ကန့ၢ်ဘၣ်က့ၤ တၢ်သဘျ့အဂီၢ် ယံာ်ဝဲလွံၢ်နံၣ်ညါ. ရိမ့ၤအသုးခိၣ်​ က့ၤဖီၣ်စီၤပီလူးသနာ်က့ စီၤပီလူးထံၣ်ဘၣ်ဒီး တၢ်လီၤဘၣ်ယိၣ်ဒံး. သုးခိၣ်သံကွၢ်ဝဲ ပှၤယူဒၤဖိတဖၣ်လၢ ဘၣ်မနုၤအဃိ အဝဲသ့ၣ်​ တီၢ်စီၤပီလူးလဲၣ်အခါ အဝဲသ့ၣ်​ ကိးပသူထီၣ်​ ဒီးတဲတၢ်တဂၤတမံၤ. ဒီးခီဖျိလၢ ပှၤကလုၢ်သီၣ်ဖးဒိၣ်အဃိ သုးခိၣ်တဂၤအံၤ တနၢ်ပၢၢ်ဝဲ တၢ်ဂ့ၢ်နီတမံၤဘၣ်. လၢခံကတၢၢ်န့ၣ်​ ပှၤဘၣ်စိာ်ထီၣ်​ စီၤပီလူး လၢပှၤဂီၢ်မုၢ်အကျါ. ဖဲစီၤပီလူး ဒီးရိမ့ၤအသုးဖိတဖၣ်​ လဲၤကတုၤလၢ သုးဖိတဖၣ်​ အိၣ်တၢ်လီၢ်အခါ စီၤပီလူးတဲဘၣ်ဝဲ သုးခိၣ်လၢ “ယဃ့ကညးနၤလၢ နကဟ့ၣ်ယၤအခွဲးလၢ ယကတဲတၢ်ဒီး ပှၤဂီၢ်မုၢ်.” (မၤတၢ် ၂၁:၃၉) ဒီးရိမ့ၤအသုးခိၣ်​ ဟ့ၣ်အီၤအခွဲးအဃိ စီၤပီလူး တဲဖျါထီၣ်​ အတၢ်နာ်လၢ တၢ်သးဒူအပူၤ.

၁၄, ၁၅. (က) စီၤပီလူး တဲဝဲပှၤယူဒၤဖိတဖၣ်​ လၢတၢ်ဂ့ၢ်မနုၤလဲၣ်. (ခ) ဒ်သိး ရိမ့ၤသုးခိၣ်တဂၤ ကသ့ၣ်ညါဝဲလၢ ဘၣ်မနုၤအဃိ ပှၤယူဒၤဖိတဖၣ်​ သးပှံၢ်ထီၣ်စီၤပီလူးလဲၣ်အဂီၢ် အမၤဝဲမနုၤလဲၣ်.

^၁၄ စီၤပီလူး စးထီၣ်တဲဝဲလၢ “ဒိကနၣ်တၢ်လၢ ယကတဲနၢ်ပၢၢ်သု.” (မၤတၢ် ၂၂:၁) စီၤပီလူး တဲတၢ်ဒီး ပှၤဂီၢ်မုၢ်တဖၣ်လၢ ဧ့ၤဘြံၤကျိာ်အဃိ အဝဲသ့ၣ်​ အိၣ်ဘှ့ၣ်ဝဲ. ဒီးအတဲဘၣ်အဝဲသ့ၣ်​ လၢအကဲထီၣ်​ ခရံာ်ဖိဒ်လဲၣ်အဂ့ၢ်. ဒီးလၢတၢ်ကူၣ်သ့အပူၤ အဝဲတဲဝဲ တၢ်ဂ့ၢ်လၢ ပှၤယူဒၤဖိတဖၣ်​ မ့ၢ်ဘၣ်သးသ့ၣ်ညါလီၤတံၢ်န့ၣ်​ အဃုသ့ၣ်ညါဝဲသ့. လီၤဂာ်လၢ ပှၤဒိကနၣ်အီၤတနီၤ သ့ၣ်ညါပာ်စၢၤဝဲလၢ စီၤပီလူးန့ၣ်​ လၢအပူၤကွံာ် အမၤလိဘၣ်တၢ်လၢ စီၤကမၤလ့လးအအိၣ်​ ဒီးအမၤအၢမၤနး ခရံာ်ဖိတဖၣ်. ဖဲစီၤပီလူး လဲၤလၢ ဝ့ၢ်ဒၤမ့ၤစ့းအခါ လၢကျဲန့ၣ်​ အဝဲထံၣ်ဘၣ်​ တၢ်ထံၣ်လၢညါခီလၢ ယ့ၣ်ၡူးခရံာ်လၢ အဂဲၤဆၢထၢၣ်သမူထီၣ်က့ၤတဂၤ တဲတၢ်ဒီးအီၤ. မ့မ့ၢ် စီၤပီလူး အသကိးတဖၣ်န့ၣ်​ အထံၣ်ဝဲ တၢ်ကပီၤ ဒီးအနၢ်ဟူ တၢ်ကလုၢ်သီၣ်​ ဘၣ်ဆၣ်​ ပှၤတဲတၢ်ဂ့ၢ်မနုၤလဲၣ်န့ၣ်​ အဝဲသ့ၣ်​ တနၢ်ပၢၢ်ဝဲဘၣ်. (မၤတၢ် ၉:၇; ၂၂:၉) ခီဖျိလၢ တၢ်ထံၣ်လၢညါခီအဃိ စီၤပီလူး အမဲာ်တထံၣ်တၢ်လၢၤဘၣ်​ အဃိ အသကိးတဖၣ်​ ဘၣ်လဲၤဆှၢအီၤလၢ ဝ့ၢ်ဒၤမ့ၤစ့း. ဖဲန့ၣ်စီၤအနၤနံ မၤစၢၤစီၤပီလူး လၢတၢ်လီၤလးအပူၤ ဒ်သိးအကထံၣ်ထီၣ်က့ၤတၢ် ဒီးပှၤယူဒၤဖိလၢ အအိၣ်ဖဲန့ၣ်တဖၣ်​ ဘၣ်သ့ၣ်သ့ၣ်​ ကသ့ၣ်ညါထွဲဝဲတၢ်ဂ့ၢ်အံၤ.

^၁၅ စီၤပီလူး တဲဝဲလၢဖဲအဟဲက့ၤတုၤလၢ ဝ့ၢ်ယရူၤၡလ့ၣ်​ ဝံၤအလီၢ်ခံ ယ့ၣ်ၡူးလီၣ်ဖျါထီၣ်အသး လၢအမဲာ်ညါ လၢတၢ်လုၢ်ဟံၣ်. ဖဲပှၤယူဒၤဖိတဖၣ်​ နၢ်ဟူဘၣ်လၢ စီၤပီလူး တဲဝဲဒ်န့ၣ်အခါ အဝဲသ့ၣ်​ သးပှံၢ်ထီၣ်တၢ်ဒိၣ်မး ဒီးကိးပသူထီၣ်ဝဲလၢ “တဘၣ်ပာ်မူ ပှၤတဂၤအံၤ လၢၤတဂ့ၤ, အဝဲကြၢးသံလံ.” (မၤတၢ် ၂၂:၂၂) အဃိသုးခိၣ်မၢပှၤလဲၤကိး စီၤပီလူးလၢ သုးဖိတဖၣ်အိၣ်တၢ်အလီၢ် ဒ်သိး ကမၤပူၤဖျဲး စီၤပီလူးအဂီၢ်. သုးခိၣ်တဂၤန့ၣ်​ အဲၣ်ဒိးသ့ၣ်ညါဝဲလၢ ဘၣ်မနုၤအဃိ ပှၤယူဒၤဖိတဖၣ်​ သးပှံၢ်ထီၣ်စီၤပီလူးလဲၣ်. အဃိ အဝဲမၢသုးဖိတဖၣ်​ ဖျ့စီၤပီလူး ဒီးသံကွၢ်သံဒိးအီၤ. တချုးပှၤသုးဖိတဖၣ်​ ကဖျ့အီၤဒံးဘၣ်န့ၣ်​ စီၤပီလူး တဲဝဲလၢ အီၤန့ၣ်အကဲဝဲ ရိမ့ၤအထံဖိကီၢ်ဖိအဃိ အဝဲသ့ၣ်​ တအိၣ်ဒီးတၢ်ခွဲးတၢ်ယာ် လၢကဖျ့အီၤဘၣ်. မုၢ်မဆါတနံၤအံၤစ့ၢ်ကီး ဖဲတၢ်ဂ့ၢ်ကီအိၣ်ထီၣ်​ ခီဖျိလၢ တၢ်စူၢ်တၢ်နာ်အဃိအခါ ယဟိဝၤပှၤအုၣ်အသးတဖၣ်​ သူဝဲပဒိၣ်​ အတၢ်သိၣ်တၢ်သီ ဒ်သိး ကဒီသဒၢလီၤအသး. (ကွၢ်တၢ်လွံၢ်နၢၣ်​ လၢအမ့ၢ် “ရိမ့ၤအတၢ်သိၣ်တၢ်သီ ဒီးရိမ့ၤ အပှၤထံဖိကီၢ်ဖိ” ဒီး “တၢ်ဂ့ၢ်တနီၤလၢ ဘၣ်ဃးဒီး ပှၤထီၣ်ရူထီၣ်တ့ လၢပစိၤခဲအံၤ.”) ဖဲသုးခိၣ်တဂၤအံၤ သ့ၣ်ညါဝဲလၢ စီၤပီလူးကဲဝဲ ရိမ့ၤအထံဖိကီၢ်ဖိအခါ အဝဲဃုကဒီး ကျဲလၢအဂၤတဘိ. အဃိ လၢခံတနံၤန့ၣ်​ အဝဲလဲၤကိး စီၤပီလူးလၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် ဒ်သိး ကသ့ၣ်ညါဝဲလၢ ပှၤပာ်ဒ့ၣ်ပာ်ကမၣ်​ စီၤပီလူးလၢ တၢ်ဂ့ၢ်မနုၤအဃိလဲၣ်.

“ယမ့ၢ်ပှၤဖၤရံၤၡဲ” (မၤတၢ် ၂၃:၁-၁၀)

၁၆, ၁၇. (က) ဖဲစီၤပီလူး တဲတၢ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အခါ တၢ်ကဲထီၣ်အသး ဒ်လဲၣ်. (ခ) ပှၤဒဲစီၤပီလူး အထးခိၣ်​ သနာ်က့ စီၤပီလူး ပာ်ဖျါထီၣ်​ တၢ်ဆီၣ်လီၤသးဒ်လဲၣ်.

^၁၆ လၢပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤန့ၣ်​ စီၤပီလူး တဲဝဲလၢ “ဒီပုၢ်ဝဲၢ်ခွါသ့ၣ်ဧၢ, လၢကစၢ်ယွၤ အမဲာ်ညါန့ၣ်​ တုၤလၢ မုၢ်မဆါတနံၤအံၤန့ၣ်​ ယသးလၢ အသ့ၣ်ညါဒၣ်တၢ် တပာ်တၢ်ကမၣ်လၢ ယလိၤနီတစဲးဘၣ်.” (မၤတၢ် ၂၃:၁) စီၤပီလူးတဲဝဲဒ်န့ၣ်​ ဝံၤဒီး တချုးလၢ အဆဲးတဲတၢ်ဒံးဘၣ်န့ၣ်​ “ပှၤလုၢ်တၢ်ခိၣ်​ အဒိၣ်ကတၢၢ် စီၤအနၤနံ ဟ့ၣ်လီၤတၢ်ကလုၢ် ဒ်သိး ပှၤလၢအဆၢထၢၣ်ဘူးဒီး စီၤပီလူးန့ၣ်​ ကဒဲစီၤပီလူး အထးခိၣ်.” (မၤတၢ် ၂၃:၂) အဃိ ကကဲထီၣ်​ တၢ်လီၤမဲာ်ဆှး လၢစီၤပီလူးအဂီၢ်ဒိၣ်မး. တကးဒံးဘၣ်​ ပှၤလုၢ်တၢ်ခိၣ်​ အဒိၣ်ကတၢၢ် မၤဝဲဒ်န့ၣ်န့ၣ်​ အပာ်ဖျါထီၣ်စ့ၢ်ကီးဝဲလၢ အကွၢ်ဒိၣ်ဆံးအါစှၤတၢ် ဒီးတချုးလၢ စီၤပီလူး တဲဖျါထီၣ်တၢ်ဂ့ၢ်ဒံးဘၣ်န့ၣ်​ အဆိကမိၣ်ပာ်စၢၤဝဲလၢ စီၤပီလူးန့ၣ်​ တဲလံၣ်တၢ်လံ. အဃိ စီၤပီလူး တဲအဝဲသ့ၣ်လၢ “ပှၤပာ်မၤအသးဧၢ, ကစၢ်ယွၤ ကတီၢ်နၤလီၤ. နဆ့ၣ်နီၤ စံၣ်ညီၣ်ယၤဒ် စီၤမိၤၡ့ အတၢ်သိၣ်တၢ်သီအသိး ဒီးတကတီၢ်ဃီန့ၣ်​ နကမၤကမၣ်​ စီၤမိၤၡ့ အတၢ်သိၣ်တၢ်သီ ခီဖျိ နမၢ ပှၤတီၢ်ယၤန့ၣ်ဧါ.”—မၤတၢ် ၂၃:၃.

^၁၇ စီၤပီလူးတဲဆၢက့ၤ ပှၤလုၢ်တၢ်ခိၣ်အဒိၣ်ကတၢၢ်ဒ်န့ၣ်အဃိ ပှၤအိၣ်ဖဲန့ၣ်တနီၤ ဖုးဘၣ်အသးဒိၣ်မး. အဃိ အဝဲသ့ၣ်​ တဲဝဲလၢ “မ့ၢ်န ကတဲဆါ ယွၤအပှၤလုၢ်တၢ်ခိၣ်​ အဒိၣ်ကတၢၢ်တဂၤ ဒ်အံၤဧါ.” ဖဲန့ၣ်န့ၣ်​ စီၤပီလူး ပာ်ဖျါထီၣ်လၢ အအိၣ်ဒီး တၢ်ဆီၣ်လီၤသး ဒီးအပာ်ကဲ စီၤမိၤၡ့အတၢ်သိၣ်တၢ်သီ. အဃိ အဝဲ တဲဝဲလၢ “ဒီပုၢ်ဝဲၢ်ခွါသ့ၣ်ဧၢ, အဝဲမ့ၢ် ပှၤလုၢ်တၢ်ခိၣ်​ အဒိၣ်ကတၢၢ်န့ၣ်​ ယတသ့ၣ်ညါဘၣ်. တၢ်ကွဲးအသး အိၣ်ဝဲလၢ ‘နတဘၣ်​ ဒုၣ်ဒွဲၣ်စံးအၢ နပှၤဂီၢ်မုၢ် အခိၣ်အနၢ်တဂ့ၤ.’”d (မၤတၢ် ၂၃:၄, ၅; ၂ မိၤ ၂၂:၂၈) ဝံၤဒီးစီၤပီလူး တဲက့ၤအဝဲသ့ၣ်လၢ တၢ်ဂ့ၢ်လၢ အဂၤတခါ. စီၤပီလူး သ့ၣ်ညါဝဲလၢ ပှၤအိၣ်လၢ ကွီၢ်ဘျီၣ်ပူၤတဖၣ်န့ၣ်​ အကဲဝဲ ပှၤဖၤရံၤၡဲ ဒီးပှၤစးဒူၤကဲ အဃိ အတဲဝဲလၢ “ဒီပုၢ်ဝဲၢ်ခွါသ့ၣ်ဧၢ, ယမ့ၢ်ပှၤဖၤရံၤၡဲ ဒီးပှၤဖၤရံၤၡဲတဖၣ်​ အဖိခွါတဂၤလီၤ. ယဘၣ်တၢ်စံၣ်ညီၣ်ဒ်အံၤ မ့ၢ်လၢ ယနာ်လၢ ပှၤသံကဂဲၤဆၢထၢၣ်​ သမူထီၣ်က့ၤအဃိလီၤ.”—မၤတၢ် ၂၃:၆.

၁၈. ဘၣ်မနုၤအဃိ စီၤပီလူး တဲလီၤအသးလၢအကဲ ပှၤဖၤရံၤၡဲလဲၣ်​ ဒီးဖဲပစံၣ်တဲၤတဲလီၤပှၤဂၤအခါ ပကွၢ်လိ စီၤပီလူး ကသ့ဒ်လဲၣ်.

^၁၈ ဘၣ်မနုၤအဃိ စီၤပီလူး တဲလီၤအသးလၢ အကဲဝဲ ပှၤဖၤရံၤၡဲလဲၣ်. မ့ၢ်လၢ စီၤပီလူးအဟံၣ်ဖိဃီဖိန့ၣ်​ အပၣ်ဃုာ်လၢ ပှၤဖၤရံၤၡဲတဖၣ်အကျါအဃိ အဝဲကဲဝဲ “ပှၤဖၤရံၤၡဲတဖၣ်​ အဖိခွါတဂၤ.” အဃိ ပှၤအါဂၤ ကထံၣ်အီၤ ဒ်ပှၤဖၤရံၤၡဲအသိးဒံး.e ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤန့ၣ်​ ပှၤဖၤရံၤၡဲတဖၣ်​ အိၣ်ဒီးတၢ်စူၢ်တၢ်နာ် လၢအကမၣ်. အဝဲသ့ၣ်​ နာ်ဝဲလၢ ပှၤမ့ၢ်သံန့ၣ်​ ပှၤကလၤတသံဘၣ်​ ဒီးမ့မ့ၢ်ပှၤတီပှၤလိၤန့ၣ်​ အကလၤကလဲၤအိၣ်ကဒီး လၢပှၤကညီအကိပူၤ. မ့မ့ၢ်စီၤပီလူးန့ၣ်​ အတနာ်ဝဲ ဒ်န့ၣ်ဘၣ်သနာ်က့ ဘၣ်မနုၤအဃိ စီၤပီလူးတဲလီၤအသးလၢ အကဲပှၤဖၤရံၤၡဲလဲၣ်. မ့ၢ်လၢ အဝဲနာ်ဝဲ တၢ်ဂဲၤဆၢထၢၣ်သမူထီၣ်က့ၤ လၢယ့ၣ်ၡူး သိၣ်လိဝဲအဃိ. (ယိၤ ၅:၂၅-၂၉) စီၤပီလူး ဒီးပှၤဖၤရံၤၡဲတဖၣ်န့ၣ်​ အတၢ်ထံၣ်လီၤဂာ် အိၣ်ဝဲတခါလၢ ဖဲပှၤသံဝံၤအလီၢ်ခံ ပှၤတၢ်မုၢ်လၢ်အိၣ်ဒံး. အဃိ အဝဲသ့ၣ်​ အတၢ်ထံၣ်န့ၣ်​ လီၤဆီလိာ်အသးဒီး ပှၤစးဒူၤကဲ လၢအတနာ်ဝဲ တၢ်ဂဲၤဆၢထၢၣ်သမူထီၣ်က့ၤဘၣ်တဖၣ်. ခဲအံၤစ့ၢ်ကီး ဖဲပတဲသကိးတၢ်ဒီး ခဲးသလ့း ဒီးခရံာ်ဖိအဂၤတဖၣ်အခါ ပတဲတၢ်ဒီးအဝဲသ့ၣ်​ လၢကျဲဒ်န့ၣ်သ့. အဝဲသ့ၣ်​ နာ်ဝဲ ယွၤသၢဂၤတဂၤဃီ ဒီးပနာ် ကစၢ်ယွၤ လၢလံာ်စီဆှံတဲဝဲ. အဃိ ပတၢ်နာ် လီၤဆီလိာ်သးသနာ်က့ တၢ်လၢအလီၤဂာ်လိာ်သးတခါန့ၣ်​ မ့ၢ်ဝဲ ပနာ်လၢကစၢ်ယွၤအိၣ်ဝဲ.

၁၉. လၢပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤန့ၣ်​ ဘၣ်မနုၤအဃိ တၢ်သဘံၣ်သဘုၣ်​ အိၣ်ထီၣ်လဲၣ်.

^၁၉ စီၤပီလူး အတၢ်ကတိၤန့ၣ်​ မၤလီၤဖး ပှၤလၢအအိၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤ. လံာ်စီဆှံ ပာ်ဖျါထီၣ်ဝဲလၢ “အဝဲသ့ၣ်​ ကိာ်ဃါလိာ်သးလၢ အကလုၢ်ဖးဒိၣ်​ ဒီးပှၤဖၤရံၤၡဲ အပှၤကွဲးလံာ်ဖိတနီၤ ဂဲၤဆၢထၢၣ်​ တဲအါတၢ်ဆူၣ်ဆူၣ်လၢ ‘ပှၤတဂၤအံၤ အတၢ်ကမၣ်​ တအိၣ်နီတစဲးဘၣ်, ကမ့ၢ်မူခိၣ်ကလူး မ့တမ့ၢ် ပှၤနီၢ်သးဖိတဂၤဂၤ တဲတၢ်ဒီးအီၤဧါသၢၤ.’” (မၤတၢ် ၂၃:၉) ပှၤစးဒူၤကဲတဖၣ်န့ၣ်​ တနာ်ဝဲ မူခိၣ်ကလူးတဖၣ်ဘၣ်​ အဃိ ဖဲအဝဲသ့ၣ်နၢ်ဟူ ပှၤဖၤရံၤၡဲ တဲဝဲဒ်န့ၣ်အခါ အဝဲသ့ၣ်​ သးပှံၢ်ထီၣ်တၢ်. (ကွၢ်တၢ်လွံၢ်နၢၣ်​ လၢအမ့ၢ် “ပှၤဖၤရံၤၡဲ ဒီးပှၤစးဒူၤကဲ.”) ပှၤကိးပသူ ဒိၣ်ထီၣ်အဃိ ရိမ့ၤအသုးခိၣ်​ ဘၣ်ဟဲမၤပူၤဖျဲးကဒီး စီၤပီလူး. (မၤတၢ် ၂၃:၁၀) သနာ်က့ စီၤပီလူး အိၣ်လၢတၢ်လီၤဘၣ်ယိၣ်အပူၤဒံး. တၢ်ကဆဲးကဲထီၣ်အသးဒီး စီၤပီလူး ဒ်လဲၣ်. လၢတၢ်မၤလိ လၢခံတခါန့ၣ်​ ပကမၤလိအါထီၣ်ဘၣ်​ တၢ်ဂ့ၢ်အံၤ.