“ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ” တၢ်ဂ့ၢ်ဘျးစဲ

ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ

လါမၢ်ၡး ၃-၉

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၃

ပာ်ဖျါထီၣ်လၢ နနာ်န့ၢ် ယဟိဝၤယွၤ

ijwbv-E တၢ်ကွဲးဖုၣ် ၁၄ ¶၄-၅

ကတိၤဒိ ၃:၅, ၆—“တဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ”

“နာ်န့ၢ် ယဟိဝၤယွၤလၢ နသးဒီဖျၢၣ်.” ပပာ်ဖျါထီၣ်လၢ ပနာ်ကစၢ်ယွၤ သ့ဝဲခီဖျိ ပမၤတၢ်တမံၤဂ့ၤတမံၤဂ့ၤ ဒ်အတၢ်ဘၣ်သး အိၣ်ဝဲအသိး. ပကဘၣ်နာ်န့ၢ် ယဟိဝၤယွၤ လၢလၢပှဲၤပှဲၤ လၢပသးဒီဖျၢၣ်. ဖဲလံာ်စီဆှံတဲဝဲလၢ သးအခါန့ၣ် အဲၣ်ဒိးတဲဝဲ ပှၤတဂၤ အတၢ်တူၢ်ဘၣ်, တၢ်လၢအအိၣ်လၢအသးပူၤ, အတၢ်ဆိကမိၣ် ဒီးအတၢ်ပာ်သူၣ်ပာ်သး. အဃိ ပနာ်ကစၢ်ယွၤလၢ ပသးဒီဖျၢၣ်န့ၣ် အတမ့ၢ်ထဲ ပတူၢ်ဘၣ်လၢ ပနာ်အီၤန့ၣ်ဘၣ်. အမ့ၢ်စ့ၢ်ကီးလၢ ပနာ်လၢအသ့ၣ်ညါ တၢ်ဂ့ၤကတၢၢ် လၢပဂီၢ်အဃိ ပဃုထၢလၢ ပကနာ်န့ၢ်အီၤ.—ရိမ့ၤ ၁၂:၁.

“တဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ.” ပဝဲခဲလၢာ်န့ၣ် ပတလၢတပှဲၤဘၣ် ဒီးပတနၢ်ပၢၢ် တၢ်ခဲလၢာ်ဘၣ်အဃိ ပသန့ၤသး လၢပနီၢ်ကစၢ် အတၢ်သ့ၣ်ညါနၢ်ပၢၢ် တသ့ဘၣ်. ပကဘၣ် သန့ၤသး လၢကစၢ်ယွၤ. ပမ့ၢ်သန့ၤသးလၢ ပနီၢ်ကစၢ် မ့တမ့ၢ် မၤဒ်ပတၢ်တူၢ်ဘၣ် အိၣ်ဝဲအသိးန့ၣ် ပကဆၢတဲာ်ဘၣ်တၢ်ဒ် လၢအခီၣ်ထံးခါ ပဆိကမိၣ်အီၤလၢအဂ့ၤလၢပဂီၢ် ဘၣ်ဆၣ် လၢခံမး အက့ၤမၤဘၣ်ဒိပှၤ. (ကတိၤဒိ ၁၄:၁၂; ယံးရမံယၤ ၁၇:၉) ကစၢ်ယွၤ အတၢ်ကူၣ်သ့န့ၣ် အဂ့ၤဒိၣ်န့ၢ်ဒံး ပတၢ်နၢ်ပၢၢ် စၢၢ်တလၢၢ်. (ယၡါယၤ ၅၅:၈, ၉) ပမ့ၢ်မၤထွဲ ကစၢ်ယွၤ အတၢ်ဟံးစုနဲၣ်ကျဲန့ၣ် ပကဒိးန့ၣ်ဘၣ် တၢ်သးခု လၢပတၢ်အိၣ်မူအပူၤ.—စံးထီၣ်ပတြၢၤ ၁:၁-၃; ကတိၤဒိ ၂:၆-၉; ၁၆:၂၀.

ijwbv-E တၢ်ကွဲးဖုၣ် ၁၄ ¶၆-၇

ကတိၤဒိ ၃:၅, ၆—“တဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ”

“လၢနတၢ်အိၣ်မူ ကိးသနၢၣ်ဒဲးန့ၣ် ဆိကမိၣ်ထံ အတၢ်ထံၣ်တက့ၢ်.” ပကြၢးဃုသ့ၣ်ညါ ကစၢ်ယွၤ အတၢ်ထံၣ် လၢအဘၣ်ဃးဒီး ပတၢ်အိၣ်မူ ကိးသနၢၢ်ဒဲး. တကးဒံးဘၣ် ဖဲပကဘၣ်မၤ တၢ်ဆၢတဲာ်လၢ အရ့ဒိၣ်အခါ ပကဘၣ်ဃုသ့ၣ်ညါ ကစၢ်ယွၤ အတၢ်ထံၣ်စ့ၢ်ကီး. ဒီးပမၤအီၤဒ်န့ၣ်သ့ခီဖျိ ပဃ့အတၢ်ဟံးစုနဲၣ်ကျဲလၢ တၢ်ထုကဖၣ်အပူၤ ဒီးမၤထွဲ တၢ်လၢအတဲဝဲ လၢအကလုၢ်ကထါ လံာ်စီဆှံအပူၤ.—စံးထီၣ်ပတြၢၤ ၂၅:၄; ၂ တံၤမသ့း ၃:၁၆, ၁၇.

“အဝဲကဒုးနဲၣ်နၤ ကျဲလၢအဘၣ်.” ကစၢ်ယွၤ ဒုးနဲၣ်ပှၤကျဲလၢအဘၣ် ခီဖျိအမၤစၢၤပှၤဒ်သိး ပအိၣ်မူမၤထွဲ ဒ်အတၢ်ဘျၢလၢ အတီအလိၤတဖၣ် ကန့ၢ်အဂီၢ်. (ကတိၤဒိ ၁၁:၅) အဝဲမၤစၢၤပှၤ ဒ်န့ၣ်အဃိ ပဟးဆှဲး တၢ်ကီတၢ်ခဲ န့ၢ်ဝဲဒီဒူၣ် ဒီးပဒိးန့ၢ်ဘၣ် တၢ်သးခုအါထီၣ်.—စံးထီၣ်ပတြၢၤ ၁၉:၇, ၈; ယၡါယၤ ၄၈:၁၇, ၁၈.

be-E ၇၆ ¶၄

ဆဲးလဲၤထီၣ်လဲၤထီ

လၢပတၢ်အိၣ်မူအပူၤ ပမ့ၢ်လဲၤခီဖျိဘၣ် တၢ်အိၣ်သးအါမံၤန့ၣ် ဖဲပထံၣ်ဘၣ်ဒီး တၢ်အိၣ်သး တမံၤမံၤအခါ ဘၣ်သ့ၣ်သ့ၣ် ပကဆိကမိၣ်ဘၣ်လၢ ‘ယလဲၤခီဖျိဘၣ် တၢ်အိၣ်သး ဒ်အံၤဝံၤလံ. အဃိ ယကဘၣ်မၤဒ်လဲၣ်န့ၣ် ယသ့ၣ်ညါလီၤ.’ ပမ့ၤမၤဒ်န့ၣ်န့ၣ် အမ့ၢ်ဝဲ ကျဲလၢအအိၣ်ဒီး တၢ်ကူၣ်သ့ဧါ. ကတိၤဒိ ၃:၇ တဲဝဲလၢ “တဘၣ် ဆိကမိၣ်လီၤနသးလၢ နမ့ၢ်ပှၤကူၣ်တၢ်သ့န့ၣ်တဂ့ၤ.” ဖဲပထံၣ်ဘၣ်ဒီး တၢ်အိၣ်သး တမံၤမံၤအခါ ပကြၢးသ့ၣ်နီၣ်ထီၣ် ပတၢ်လဲၤခီဖျိ လၢအပူၤကွံာ်. သနာ်က့ ပကဘၣ် သ့ၣ်နီၣ်ထီၣ်စ့ၢ်ကီးလၢ ဒ်သိး ပလဲၤခီဖျိတၢ် ကန့ၢ်အဂီၢ် ပလိၣ်ဘၣ် ယဟိဝၤယွၤ အတၢ်မၤစၢၤ. ပကဲထီၣ်ပှၤလၢ အလဲၤထီၣ်လဲၤထီတဂၤန့ၣ် အအိၣ်ဖျါထီၣ်ဝဲ ခီဖျိ ဖဲပထံၣ်ဘၣ်ဒီး တၢ်အိၣ်သးတမံၤမံၤအခါ ပဃုယဟိဝၤယွၤ အတၢ်ဟံးစုနဲၣ်ကျဲ ဒီးပတသန့ၤပသးလၢ ပနီၢ်ကစၢ်ဘၣ်. ပမ့ၢ်နာ်လၢ ယဟိဝၤယွၤ မ့ၢ်တဟ့ၣ်အခွဲးဘၣ်န့ၣ် ပမၤတၢ်တသ့နီတမံၤဘၣ် ဒီးပမ့ၢ်ဆဲးပၢၤဃာ် ပတၢ်နာ်န့ၢ်အီၤ ဒီးပတၢ်ရ့လိာ်သးဒီးအီၤန့ၣ် မ့ၢ်ဝဲ ပပာ်ဖျါထီၣ်လၢ ပလဲၤထီၣ်လဲၤထီ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၆-E ၉/၁၅ ၁၇ ¶၇

လံာ်စီဆှံ အတၢ်ပာ်ဖျါလၢလံာ် ကတိၤဒိအဂီၢ်

၃:၃. ဖဲလၢ အလုၢ်ဒိၣ်ပှ့ၤဒိၣ်တဘိန့ၣ် ပကပာ်လုၢ်ပာ်ပှ့ၤအီၤ ဒီးလံာ်အီၤလၢ ပကိာ်လိၤ. ဒ်န့ၣ်အသိး တၢ်အဲၣ်ဒီးတၢ်သးတီန့ၣ် ပကြၢးပာ်လုၢ်ပာ်ပှ့ၤအီၤ ဒီးပာ်ဖျါထီၣ်အီၤ. ဒီးပကဘၣ်ကွဲးလီၤ တၢ်ဂ့ၤတၢ်ဝါတဖၣ်အံၤ လၢပသးလိၤန့ၣ် အဲၣ်ဒိးတဲဝဲ ပကဘၣ်အိၣ်ဒီး တၢ်ဂ့ၤတၢ်ဝါတဖၣ်အံၤထီဘိ.

တၢး၁၁-E ၃/၁၅ ၁၄ ¶၇-၁၀

တၢ်အကတၢၢ် ဘူးထီၣ်လံအဃိ သန့ၤနသးလၢ ယဟိဝၤယွၤ

^၇ ပဒီပုၢ်ဝဲၢ်မုၣ်ခွါအါမးန့ၣ် စံၣ်တဲၤတဲလီၤဘၣ်တၢ်လၢ တၢ်လီၢ်လၢ ပှၤစံၣ်တဲၤတဲလီၤဘၣ်တၢ် ကီအလီၢ်. ဝံယံးရမံယၤစ့ၢ်ကီး အထံၣ်ဘၣ်ဒီး တၢ်အိၣ်သးဒ်န့ၣ် အဝဲအိၣ်မူဘၣ် ဖဲယူဒၤဘီမုၢ် တၢ်ပၢဘူးကကတၢၢ် ဒီးတၢ်သဘံၣ်သဘုၣ် အိၣ်ဝဲအဆၢကတီၢ်. အဝဲဒိကနၣ် ကစၢ်ယွၤအကလုၢ် ဒီးစံၣ်တဲၤတဲလီၤ တၢ်စံၣ်ညီၣ်အကစီၣ်အဃိ အတၢ်နာ် ဘၣ်တၢ်မၤကွၢ်အီၤ. ဘၣ်တဘျီန့ၣ် အနဲၣ်ရွဲၣ် စီၤဘၤရူးစ့ၢ်ကီး ကဒူးကဒ့ၣ်တၢ်. (ယံး ၄၅:၂, ၃) အဃိ ဝံယံးရမံယၤန့ၣ် အသးဟးဂီၤဝဲတဘျီဘျီဧါ. အဝဲအသးဟးဂီၤဝဲစ့ၢ်ကီး. အဝဲတဲဝဲလၢ “ယမ့ၢ်တအိၣ်ဖျဲၣ်ထီၣ်ဘၣ်န့ၣ် ဂ့ၤကတၢၢ်လီၤ. . . . ဘၣ်မနုၤအဃိ ယဘၣ်ဟဲထီၣ်လၢ ယမိအဒၢလီၢ်ပူၤဒ်သိး ယကထံၣ်ဘၣ် တၢ်ကိၢ်တၢ်ဂီၤ, တၢ်သူၣ်အုးသးအုး ဒီးဒ်သိး ယသးသမူ ကကတၢၢ်ကွံာ် လၢတၢ်မဲာ်ဆှးအပူၤလဲၣ်.”—ယံး ၂၀:၁၄, ၁၅, ၁၈.

^၈ ယံးရမံယၤ တဟ့ၣ်အၡူဘၣ်, အဝဲဆဲးသန့ၤအသးလၢ ယဟိဝၤယွၤအဃိန့ၣ် အဝဲ တူၢ်ဘၣ်ဝဲ ဒ်သိးဒီး ယဟိဝၤယွၤတဲဝဲအသိး. ဖဲယံးရမံယၤ ၁၇:၇, ၈ ယဟိဝၤယွၤ တဲဝဲလၢ “မ့မ့ၢ်ပှၤလၢ အနာ်န့ၢ် ယဟိဝၤယွၤ ဒီးသန့ၤအသးလၢ ယဟိဝၤယွၤန့ၣ် ဘၣ်ဆိၣ်ဂ့ၤဝဲလီၤ. အဝဲ ကလီၤဂာ် ဒ်သိးဒီး သ့ၣ်တထူၣ်လၢ အသူၣ်လီၤအသးလၢ ထံကျိဖိအကပၤ ဒီးစဲၤလီၤအဂံၢ်တဖၣ် လၢထံကျိဖိအပူၤလီၤ. ဖဲတၢ်ကိၢ်ထီၣ် အဆၢကတီၢ် အဝဲတဘၣ် တၢ်နီတမံၤဘၣ်. ဒီးအလၣ်တဖၣ် ကအိၣ်လါဟ့ဝဲ ထီဘိလီၤ. ဖဲတၢ်ယီၤဃ့အနံၣ်န့ၣ် အဝဲ တဘၣ်ယိၣ်တၢ်ဘၣ် ဒီးကဆဲးသၣ်ထီၣ်ဝဲ ထီဘိလီၤ.”

^၉ ဝံယံးရမံယၤ လီၤဂာ်ဒ်သ့ၣ်လၢအ “သူၣ်လီၤအသးလၢ ထံကျိဖိအကပၤ” ဒီး ‘ဆဲးသၣ်ထီၣ်ဝဲ ထီဘိ.’ ပှၤလၢအကပိာ်ကပၤတဖၣ် ဒုၣ်ဒွဲၣ်စံးအၢအီၤ သနာ်က့ အဝဲတဟ့ၣ်အၡူဘၣ်, အဆဲးတီဒီး ယဟိဝၤယွၤလၢအမ့ၢ် “ထံ” မူအဂံၢ်ခီၣ်ထံး ဒီးဒိကနၣ်တၢ်ကိးမံၤဒဲးလၢ ယဟိဝၤယွၤတဲအီၤ. (ဖး စံးထီၣ်ပတြၢၤ ၁:၁-၃; ယံး ၂၀:၉) ဝံယံးရမံယၤ အဒိအတဲာ်န့ၣ် အကဲဘျုးလၢ ပှၤလၢအအိၣ်လၢ တၢ်လီၢ်လၢ ပှၤစံၣ်တဲၤတဲလီၤဘၣ်တၢ်ကီအလီၢ်တဖၣ်အဂီၢ်ဒိၣ်မး. နမ့ၢ်ထံၣ်ဘၣ် တၢ်အိၣ်သး ဒ်န့ၣ်န့ၣ် ဆဲးသန့ၤနသးလၢ ယဟိဝၤယွၤဆူၣ်ဆူၣ်. အဝဲကဟ့ၣ်နၤ တၢ်ဂံၢ်တၢ်ဘါ ဒ်သိးဒီး န “အၢၣ်လီၤအမံၤလၢ ပှၤဂၤအမဲာ်ညါ” ကန့ၢ်အဂီၢ်.—ဧ့ၤ ၁၃:၁၅.

^၁၀ ဒ်သိးပလဲၤခီဖျိ တၢ်ကီတၢ်ခဲလၢ မုၢ်နံၤခံကတၢၢ်အတီၢ်ပူၤ ကသ့အဂီၢ် ယဟိဝၤယွၤ ကတဲာ်ကတီၤန့ၢ်ပှၤ တၢ်အါမံၤ. အဝဲဟ့ၣ်ပှၤ တၢ်ကွဲးကျိာ်ထံ လံာ်စီဆှံ လၢကျိာ်အကလုာ်ကလုာ်. ဒီးအဝဲဟ့ၣ်ပှၤ နီၢ်သးတၢ်အီၣ်တၢ်အီ ဘၣ်ဆၢဘၣ်ကတီၢ် ခီဖျိလၢ ကုၢ်လၢအတီဒီးကူၣ်တၢ်သ့. တကးဒံးဘၣ် အဟ့ၣ်ပှၤ ပဒီပုၢ်ဝဲၢ်မုၣ် ဒီပုၢ်ဝဲၢ်ခွါအါမး. ဖဲပလဲၤထီၣ်တၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်အခါ ပဒိးန့ၢ်ဘၣ် တၢ်ဂံၢ်တၢ်ဘါလၢ ဒီပုၢ်ဝဲၢ်မုၣ်ခွါတဖၣ်အံၤအအိၣ်အါမး. မ့ၢ်နဟံးန့ၢ်တၢ်ခွဲးတၢ်ယာ်လၢ နကဒိးန့ၢ်ဘၣ်အဘျုးလၢ တၢ်သ့ၣ်တဖၣ်အံၤဧါ. ပှၤလၢအမၤဝဲဒ်န့ၣ် “ကကိးပသူထီၣ်လၢ တၢ်သူၣ်ဖှံသးညီအပူၤ ခီဖျိလၢ အသးခုအဃိ.” ဘၣ်ဆၣ် ပှၤလၢအတဒိကနၣ် ကစၢ်ယွၤဘၣ်န့ၣ် ‘ကဟီၣ်ကိးပသူထီၣ်လၢ တၢ်သူၣ်အုးသးအုးအပူၤ ဒီး . . . ကဟီၣ်ကယၢၤ ခီဖျိလၢ အသူၣ်ဘၣ်ဒိသးဘၣ်ဒိနးမး အဃိလီၤ.’—ၡါ ၆၅:၁၃, ၁၄.

လါမၢ်ၡး ၁၀-၁၆

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၄

“ဒီသဒၢနသး”

တၢး၁၉.၀၁ ၁၅ ¶၄

နဒီသဒၢနသး ကသ့ဒ်လဲၣ်

^၄ လၢ ကတိၤဒိ ၄:၂၃ အပူၤတၢ်ကတိၤလၢအမ့ၢ် “သး” န့ၣ်အခီပညီအိၣ်စ့ၢ်ကီးလၢ ပတၢ်ဆိကမိၣ်, ပတၢ်တူၢ်ဘၣ်, ပတၢ်သူၣ်ဟူးသးဂဲၤ ဒီးပတၢ်အဲၣ်ဒိးတဖၣ်လီၤ. ဒီးမ့ၢ်ဝဲ တၢ်လၢအအိၣ်လၢပသးပူၤနီၢ်နီၢ် ဒီးတမ့ၢ်ထဲ တၢ်လၢအအိၣ်ဖျါလၢခိန့ၣ်ဘၣ်.

တၢး၁၉.၀၁ ၁၇ ¶၁၀-၁၁

နဒီသဒၢနသး ကသ့ဒ်လဲၣ်

^၁၀ ဒ်သိးပဒီသဒၢလီၤပသး ကန့ၢ်အဂီၢ် ပကဘၣ်သ့ၣ်ညါနီၤဖး တၢ်လၢအလီၤဘၣ်ယိၣ်တဖၣ်ဝံၤ ပကတြီဆၢကွံာ်အီၤ တဘျီဃီလီၤ. လၢ ကတိၤဒိ ၄:၂၃ အပူၤ တၢ်ကတိၤလၢအမ့ၢ် “ပၢၤ” မ့တမ့ၢ် “ဒီသဒၢ” န့ၣ်ဒုးသ့ၣ်နီၣ်ထီၣ်ပှၤလၢ ပှၤခိးတၢ်ဖိတဂၤ အတၢ်မၤလီၤ. လၢစီၤၡလိၤမိၤအစိၤန့ၣ် ပှၤခိးတၢ်ဖိတဖၣ် ဆၢထၢၣ်လၢ ဝ့ၢ်ခိၣ်ဒူဒီး အဝဲသ့ၣ်မ့ၢ်ထံၣ်ဝဲ တၢ်လီၤဘၣ်ယိၣ်တမံၤမံၤန့ၣ် မၤသီၣ်ဝဲတၢ်ကလုၢ်လီၤ. တၢ်ဂ့ၢ်တခါအံၤ မၤစၢၤပှၤဒ်သိး ပကနၢ်ပၢၢ်ထီၣ်လၢ ပကဒီသဒၢပသးလၢ မုၣ်ကီၤလံၢ် အတၢ်ဆိကမိၣ်တဖၣ်အဂီၢ် ပကဘၣ်မၤဒ်လဲၣ်န့ၣ်လီၤ.

^၁၁ လၢပျၢၤန့ၣ် ပှၤခိးတၢ်ဖိတဖၣ် မၤသကိးတၢ်ဘူးဘူးတံၢ်တံၢ်ဒီး ပှၤခိးဝ့ၢ်အပဲတြီလီၤ. (၂ ၡမူၤအ့လး ၁၈:၂၄-၂၆) အဝဲသ့ၣ် မၤသကိးတၢ်ဒ်သိးသိး ဒီးဒီသဒၢဝဲဝ့ၢ် ခီဖျိကးတံာ်ဃာ်ဝဲ ဝ့ၢ်အပဲတြီ ဖဲဒုၣ်ဒါတဖၣ် ဟဲဘူးဒီးအဝဲသ့ၣ်အဝ့ၢ် အဆၢကတီၢ်န့ၣ်လီၤ. (နဃ့မယၤ ၇:၁-၃) မုၣ်ကီၤလံၢ် ဂုာ်ကျဲးစၢးနုာ်လီၤထီဒါပသး ပမ့ၢ်တဲလၢကျဲအဂၤတဘိန့ၣ် မုၣ်ကီၤလံၢ် ဂုာ်ကျဲးစၢးဝဲဒ်သိး ပတၢ်ဆိကမိၣ်, ပတၢ်တူၢ်ဘၣ်, ပတၢ်သူၣ်ဟူးသးဂဲၤ ဒီးပတၢ်အဲၣ်ဒိးတဖၣ် ကလီၤဂာ်ဒ်သိးဒီးအီၤလီၤ. ဖဲန့ၣ်အခါ ခရံာ်ဖိအသးလၢအသ့ၣ်ညါဒၣ်တၢ် မၤတၢ်ဒ်ပှၤခိးတၢ်ဖိအသိး ဒီးဟ့ၣ်ပလီၢ်ပှၤလီၤ. ဖဲပသးလၢအသ့ၣ်ညါဒၣ်တၢ် ဟ့ၣ်ပလီၢ်ပှၤ တဘျီလၢ်လၢ်န့ၣ် ပကြၢးဒိကနၣ်အီၤဒီး တသ့ဖဲအသ့ ပကဘၣ်မၤတၢ် ဒ်သိးပကဟးဆှဲး တၢ်လၢအလီၤဘၣ်ယိၣ်တဖၣ်လီၤ.

တၢး၁၉.၀၁ ၁၈ ¶၁၄

နဒီသဒၢနသး ကသ့ဒ်လဲၣ်

^၁၄ ဒ်သိးပကဒီသဒၢလီၤပသးအဂီၢ် တမ့ၢ်ထဲ ပကဘၣ်တြီဆၢကွံာ် တၢ်လၢအတဂ့ၤတဖၣ်န့ၣ်ဘၣ် ပကဘၣ်တူၢ်လိာ် တၢ်လၢအဂ့ၤတဖၣ်စ့ၢ်ကီးလီၤ. ဆိကမိၣ်ကွၢ်ကဒီး တၢ်အဒိလၢ ဘၣ်ဃးဒီး ဝ့ၢ်ခိၣ်ဒူန့ၣ်တက့ၢ်. ဖဲဒုၣ်ဒါတဖၣ် ဟဲဘူးဒီးဝ့ၢ်အခါ ပှၤခိးပဲတြီဖိတဂၤ ကးတံာ်ဃာ်ပဲတြီ ဒ်သိးကဒီသဒၢဝဲ ဝ့ၢ်အဂီၢ်လီၤ. ဘၣ်ဆၣ် လၢတၢ်ဆၢကတီၢ်အဂၤန့ၣ် အဝဲကအိးထီၣ်ဃာ်ပဲတြီ ဒ်သိးပှၤကဆှၢနုာ် တၢ်အီၣ်တၢ်အီဒီး တၢ်အဂၤသ့ၣ်တဖၣ်အဂီၢ်လီၤ. အဝဲမ့ၢ်တအိးထီၣ် ပဲတြီနီတဘျီဘၣ်န့ၣ် ပှၤအိၣ်လၢဝ့ၢ်ပူၤတဖၣ် ကလီၤဒိဝဲလီၤ. ဒ်န့ၣ်အသိး ပကဘၣ်အိးထီၣ်ပသး ဒ်သိးကစၢ်ယွၤ အတၢ်ဆိကမိၣ်တဖၣ် ကနုာ်လီၤလၢ ပသးပူၤအဂီၢ်လီၤ.

တၢး၁၂-E ၅/၁ ၃၂ ¶၂

“ဒီသဒၢနသး”

ဘၣ်မနုၤအဃိ ပကြၢးဒီသဒၢ ပသးလဲၣ်. ကစၢ်ယွၤမၢ စီၤၡလိၤမိၤ ကွဲးဝဲလၢ “မ့ၢ်လၢ နသးသမူ ဒိးသန့ၤထီၣ်အသးလၢ နသးအဖီခိၣ်အဃိ နကဘၣ်ဒီသဒၢနသး ဒိၣ်န့ၢ်ဒံး တၢ်အဂၤခဲလၢာ်လီၤ.” (ကတိၤဒိ ၄:၂၃) ပတၢ်အိၣ်မူ ခဲအံၤမၤသးဒ်လဲၣ် ဒီးခါဆူညါ ကမၤအသးဒ်လဲၣ်န့ၣ် ဒိးသန့ၤထီၣ်အသးလၢ တၢ်အိၣ်လၢပသးပူၤ နီၢ်ကီၢ်. ဘၣ်မနုၤအဃိလဲၣ်. မ့ၢ်လၢကစၢ်ယွၤန့ၣ် ထံၣ်ဝဲ တၢ်အိၣ်လၢပသးပူၤအဃိ. (၁ ၡမူၤအ့လး ၁၆:၇) ကစၢ်ယွၤ ကထံၣ်ပှၤ ဒ်လဲၣ်န့ၣ် ဒိးသန့ၤထီၣ်အသးလၢ ‘တၢ်လၢ အအိၣ်ခူသူၣ်အသးလၢ ပသူၣ်ကံၢ်သးလဲအပူၤ’ လၢအမ့ၢ် တၢ်လၢအအိၣ်လၢပသးပူၤ အနီၢ်ကီၢ်.—၁ ပ့းတရူး ၃:၄.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၁.၀၈ ၈ ¶၄

မ့ၢ်နကအိၣ်ခိး ယဟိဝၤယွၤလၢ တၢ်ဝံသးစူၤအပူၤဧါ

^၄ ကတိၤဒိ ၄:၁၈ တဲဝဲလၢ “ပှၤတီပှၤလိၤအကျဲန့ၣ် မၤသးဒ်မုၢ်ဆ့ၣ်ထီၣ်အတၢ်ကပီၤ ဒံးယံာ်ဒံးကပီၤထီၣ်, ဒံးယံာ်ဒံးကပီၤထီၣ်, တုၤလၢမုၢ်ထူၣ်အသိးန့ၣ်လီၤ.” တၢ်ကတိၤအံၤ ဒုးသ့ၣ်ညါပှၤလၢ ယဟိဝၤယွၤမၤစၢၤ အပှၤဂီၢ်မုၢ်ဒ်သိး ကနၢ်ပၢၢ်ထီၣ် အတၢ်တိာ်ပာ်တဖၣ်လီၤ. ဘၣ်ဆၣ် လံာ်စီဆှံတဆၢအံၤ ဒုးသ့ၣ်ညါစ့ၢ်ကီးပှၤလၢ ခရံာ်ဖိတဂၤအတၢ်အိၣ်မူ ဆီတလဲအသးဒ်လဲၣ် ဒီးအသုးဘူးအသးလၢ ယဟိဝၤယွၤအအိၣ် ဒ်လဲၣ်န့ၣ်လီၤ. နီၢ်သးအတၢ်ဒိၣ်ထီၣ် ထီထီၣ်န့ၣ် ပမၤဒိၣ်ထီၣ်ထီထီၣ်အီၤ ချ့ချ့တသ့ဘၣ်. ဒ်သိးပှၤတဂၤ အတၢ်အဲၣ်ယဟိဝၤယွၤ ကဒိၣ်ထီၣ်အဂီၢ် အကဘၣ်ဟံးန့ၢ် တၢ်ဆၢကတီၢ်လီၤ. ပကဘၣ်မၤလိလံာ်စီဆှံ ဒီးမၤထွဲတၢ်ဟ့ၣ်ကူၣ်ဟ့ၣ်ဖးလၢ လံာ်စီဆှံအပူၤ ဒီးမၤထွဲတၢ်ဟ့ၣ်ကူၣ်လၢအဟဲလၢ ကစၢ်ယွၤ အတၢ်ကရၢကရိအအိၣ်လီၤ. ပမ့ၢ်မၤဒ်န့ၣ်န့ၣ် ခရံာ်ဖိအတၢ်ဂ့ၤတၢ်ဝါတဖၣ် ကအိၣ်ဖျါထီၣ်ဝဲလီၤ. ပကသ့ၣ်ညါအါထီၣ် ကစၢ်ယွၤကလုၢ်ကထါစ့ၢ်ကီးလီၤ. ပကကွၢ်သကိး ယ့ၣ်ၡူးဟ့ၣ်တၢ်အဒိ ဘၣ်ဃးဒီးတၢ်ဂ့ၢ်အံၤလီၤ.

Ijwfq တၢ်ကွဲးဖုၣ် ၁၉

ဘၣ်မနုၤအဃိ ယဟိဝၤပှၤအုၣ်အသးတဖၣ် တမၤအံးစထၢၣ်အမူးလဲၣ်

တၢ်နၢ်ပၢၢ်ကမၣ်တဖၣ်

ပှၤဂၤအတၢ်ဃဲၤ– တၢ်ဂ့ၢ်လၢ ဘၣ်မနုၤ ယဟိဝၤပှၤအုၣ်အသးတဖၣ် တမၤဝဲ အံးစထၢၣ်အမူးလဲၣ်န့ၣ် မ့ၢ်လၢအဝဲသ့ၣ်တမ့ၢ်ခရံာ်ဖိအဃိလီၤ.

တၢ်မ့ၢ်တၢ်တီ– ပနာ်လၢယ့ၣ်ၡူးခရံာ်မ့ၢ် ပအုၣ်ခီၣ်ကစၢ်, ဒီးပမၤအဂ့ၤကတၢၢ်လၢ “ပကယီၢ်အခီၣ်လီၢ်” အဂီၢ်န့ၣ်လီၤ.—၁ ပ့းတရူး ၂:၂၁; လူၤကၣ် ၂:၁၁.

ပှၤဂၤအတၢ်ဃဲၤ– သုတနာ်လၢယ့ၣ်ၡူးန့ၣ် ဂဲၤဆၢထၢၣ်သမူထီၣ်က့ၤလၢတၢ်သံဘၣ်လီၤ.

တၢ်မ့ၢ်တၢ်တီ– ပနာ်ယ့ၣ်ၡူး အတၢ်ဂဲၤဆၢထၢၣ်သမူထီၣ်က့ၤလီၤ. ပအၢၣ်လီၤတူၢ်လိာ်တၢ်အံၤ ဒ်တၢ်အခီၣ်တဃၣ်လၢ ခရံာ်ဖိတၢ်နာ်အဂီၢ် ဒီးပပာ်ဖျါထီၣ်အီၤလၢ ပတၢ်စံၣ်တဲၤတဲလီၤအပူၤလီၤ.—၁ ကရံၣ်သူး ၁၅:၃, ၄, ၁၂-၁၅.

ပှၤဂၤအတၢ်ဃဲၤ– သုဖိတဖၣ် တဒိးန့ၢ်ဘၣ် အံးစထၢၣ်နံၤသဘျ့ အတၢ်သူၣ်ခုသးခုန့ၣ် သုတသးအုးဘၣ်လီၤ.

တၢ်မ့ၢ်တၢ်တီ– ပအဲၣ်ပဖိတဖၣ်လီၤ. ပဟ့ၣ်လီၤပသးလၢ တၢ်သိၣ်လိအဝဲသ့ၣ် ဒီးပမၤစၢၤအဝဲသ့ၣ်လၢ ကသူၣ်ခုသးခုအဂီၢ်လီၤ.—တံတူး ၂:၄.

ဘၣ်မနုၤအဃိ ယဟိဝၤပှၤအုၣ်အသးတဖၣ် တမၤအံးစထၢၣ်အမူးလဲၣ်.

• တၢ်မၤအံးစထၢၣ် နံၤသဘျ့အမူးန့ၣ် တသန့ၤထီၣ်အသးလၢ လံာ်စီဆှံအပူၤဘၣ်.

• ယ့ၣ်ၡူးမၤလိာ်ဝဲလၢ ပကဘၣ်သ့ၣ်နီၣ်ထီၣ် အတၢ်သံလီၤ, တမ့ၢ်အတၢ်ဂဲၤဆၢထၢၣ်သမူထီၣ်က့ၤဘၣ်. ပမၤတၢ်သ့ၣ်နီၣ်ထီၣ်အမူးအံၤကိးနံၣ်ဒဲးဖဲ ယ့ၣ်ၡူးအတၢ်သံဆၢက့ၤအလီၢ် ဒ်လၢပျၢၤပှၤအံၣ်စရ့လးဖိတဖၣ် အလံာ်နံၣ်လံာ်လါအသိးန့ၣ်လီၤ.—လူၤကၣ် ၂၂:၁၉, ၂၀.

• ပနာ်လၢအံးစထၢၣ်လုၢ်လၢ်အထူအထံး, လၢအဟဲလီၤလၢ လၢပျၢၤတၢ်ချံဂ့ၤသၣ်ဂ့ၤလုၢ်လၢ်, န့ၣ်တဘၣ်ကစၢ်ယွၤအသးဘၣ်လီၤ. ကစၢ်ယွၤဃ့ဝဲလၢ ပကဘၣ်ဟ့ၣ်အီၤ တၢ်ဘူၣ်ထီၣ်ဘါထီၣ်လၢ သးဒီဖျၢၣ်လီၤ. ဒီးကစၢ်အသးဘၣ်ဒိလၢ တၢ်ဘူၣ်ထီၣ်ဘါထီၣ်လၢအပာ်ဃုာ်ဒီး လုၢ်လၢ်လၢအဝဲတဘၣ်သူၣ်ဘၣ်သးတဖၣ်န့ၣ်လီၤ.—၂ မိၤၡ့ ၂၀:၅, New world Translation; ၁ စီၤပၤ ၁၈:၂၁.

ပနာ်လၢပတၢ်ပာ်လီၤသးလၢ ပတပာ်ဃုာ်လၢ အံးစထၢၣ်အမူးအပူၤန့ၣ် သန့ၤထီၣ်အသးကျၢၤကျၢၤလၢ လံာ်စီဆှံအဖီခိၣ်လီၤ. တၢ်အံၤဟ့ၣ်ဂံၢ်ဟ့ၣ်ဘါဝဲလၢ တၢ်ကသူ တၢ်လူၤထွဲပှၤကညီအလုၢ်အလၢ်အလီၢ် တၢ်ကသူ ‘တၢ်ကူၣ်သ့အမူာ်အနီၢ် ဒီးတၢ်ပလီၢ်သး’ လီၤ. (ကတိၤဒိ ၃:၂၁; မးသဲ ၁၅:၃) ဖဲပနီၤလီၤပတၢ်နာ်ဘၣ်ဃး အံးစထၢၣ်ဖဲ ပှၤဂၤသံကွၢ်ပှၤအခါ, ပပာ်ကဲစ့ၢ်ကီး ပှၤတဂၤစုာ်စုာ်အတၢ်ခွဲးတၢ်ယာ်လၢ အဝဲမၤဝဲလီၤ.—၁ ပ့းတရူး ၃:၁၅.

လါမၢ်ၡး ၁၇-၂၃

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၅

ဟးဆှဲး တၢ်မၤကမၣ်မုၣ်ကမၣ်ခွါ မ့ၢ်ယံၤ

တၢး၀၀-E ၇/၁၅ ၂၉ ¶၁

ပှၤအါဂၤ အတၢ်သကဲာ်ပဝး လီၤရၢၢ်နာ်က့ နအိၣ်ကဆှီသ့

ပိာ်မုၣ်ဟးဂီၤလၢ လံာ်ကတိၤဒိအံၤအပူၤန့ၣ် ဘၣ်တၢ်ပာ်ဖျါထီၣ်အီၤဒ် ပိာ်မုၣ်လၢ အဆါလီၤအီၣ်သး. ဒီးတၢ်ကတိၤလၢ အတဲဝဲတဖၣ်န့ၣ် အဆၢဒ်သိးဒီးကနဲစီ ဒီးအဘျ့န့ၢ်ဒံးသိ. တၢ်လ့ပစီလၢ အဘၣ်ဃးဒီး တၢ်မၤကမၣ်မုၣ်ကမၣ်ခွါန့ၣ် လီၤဂာ်ဒ်န့ၣ်အသိးလီၤ. အဒိ ပကဆိကမိၣ်ကွၢ် အ့မံၤ လၢအသးအိၣ် ၂၇ နံၣ်တဂၤ အတၢ်လဲၤခီဖျိ. အဝဲတဲဝဲလၢ “ပှၤပိာ်ခွါတဂၤလၢ ယတၢ်မၤလီၢ်န့ၣ် အပာ်ဖျါထီၣ် တၢ်သူၣ်အိၣ်သးအိၣ်ယၤ ဒီးအဝဲပတြၢၤယၤ ထီဘိလီၤ. အမၤဝဲဒ်န့ၣ်န့ၣ် ယတူၢ်ဘၣ်မုာ်မး. သနာ်က့ ယသ့ၣ်ညါလၢ အိၣ်ဒၣ်အဝဲ သးစၢၢ်ဆၢလၢ တၢ်မံဃုာ်တကပၤ အဃိ ယပလီၢ်ယသး.” ပှၤလၢအလ့ပစီတၢ်တဖၣ် အတၢ်ကတိၤန့ၣ် နမ့ၢ်တသ့ၣ်ညါ အဝဲသ့ၣ် အတၢ်တိာ်ပာ်ဘၣ်န့ၣ် နကနၣ်အီၤ မုာ်ဒိၣ်မး. အဃိ နကဘၣ် ဆိကမိၣ် ပဲာ်ထံနီၤဖးတၢ်ဂ့ၤဂ့ၤ.

တၢး၂၃.၀၆ ၂၂-၂၃ ¶၉-၁၀

ပမ့ၢ်ပျံၤယဟိဝၤယွၤန့ၣ် ကကဲဘျုးလၢပဂီၢ်ထီဘိ

^၉ ဘၣ်မနုၤအဃိ ပကဘၣ်ဟးဆှဲး တၢ်မၤကမၣ်မုၣ်ကမၣ်ခွါလဲၣ်န့ၣ် တၢ်ဂ့ၢ်အိၣ်အါမး. ပထံၣ်ဘၣ်လၢ “ပိာ်မုၣ်လၢ အသးတဆးဘၣ်” န့ၣ်တဲဝဲလၢ “ထံလၢ ပှၤဟုၣ်အီဝဲန့ၣ် ဆၢမး.” အဃိ “ထံလၢ ပှၤဟုၣ်အီဝဲန့ၣ်” အဲၣ်ဒိးတဲဝဲ မနုၤလဲၣ်. လံာ်စီဆှံ ထိၣ်သတြီၤဝဲ ပှၤဒီမိၢ်ဝၤခံဂၤ အတၢ်မံဃုာ် ဒ်သိးဒီး ထံလၢ အမၤမုာ်ထီၣ်ပှၤသး. (ကတိၤဒိ ၅:၁၅-၁၈) တၢ်မံဃုာ်အိၣ်ဃုာ်န့ၣ် ကဲဝဲထဲလၢ ပှၤပိာ်မုၣ်ဒီးပှၤပိာ်ခွါ လၢအဆီဟံၣ်ဆီဃီ ဝံၤခံဂၤအဂီၢ်. မ့မ့ၢ် “ထံလၢ ပှၤဟုၣ်အီဝဲန့ၣ်” ဘၣ်သ့ၣ်သ့ၣ် ကမ့ၢ် တၢ်မံဃုာ်အိၣ်ဃုာ် လၢအတဘၣ်ဒီး တၢ်သိၣ်တၢ်သီဘၣ်, တၢ်မံဃုာ်လၢ အလီၤရၢၢ် ဒီးအလီၤသးဘၣ်အၢ. ပှၤလၢ အမၤကမၣ်မုၣ်ကမၣ်ခွါန့ၣ် ညီနုၢ်အဝဲသ့ၣ် ကဲပှၤလၢအမၤခူသူၣ်တၢ် ဒ်သိးဒီး ပှၤဟုၣ်တၢ်ဖိ မၤဝဲအသိး. တကးဒံးဘၣ် “ထံလၢ ပှၤဟုၣ်အီဝဲန့ၣ်” ဖဲပှၤလၢအဟုၣ်အီဝဲတဂၤ မ့ၢ်ဆိမိၣ်လၢ ပှၤတသ့ၣ်ညါ တၢ်လၢအမၤဝဲနီတဂၤဘၣ်အခါ အလီၤဂာ်ဒ်သိး ထံန့ၣ်အ “ဆၢမး.” ဘၣ်ဆၣ် ခီဖျိလၢ ယဟိဝၤယွၤ ထံၣ်တၢ်လၢ အဝဲသ့ၣ်မၤဝဲခဲလၢာ် အဃိ အဝဲသ့ၣ် အတၢ်ဆိမိၣ်န့ၣ် ကမၣ်လံ. ပမ့ၢ်တန့ၢ်ဘၣ် ယဟိဝၤယွၤ အတၢ်ဘၣ်သးလၢၤဘၣ်န့ၣ် ပတသးခုလၢၤဘၣ်.—၁ ကရံၣ်သူး ၆:၉, ၁၀.

^၁၀ ပှၤလၢအမၤကမၣ်မုၣ်ကမၣ်ခွါန့ၣ် အဝဲသ့ၣ် ကထံၣ်ဘၣ်ဒီး တၢ်မဲာ်ဆှး, ကတူၢ်ဘၣ်လၢ အလုၢ်အပှ့ၤတအိၣ်ဘၣ်, ကဒၢထီၣ်, ဒီးအဟံၣ်ဖိဃီဖိ ကလီၤဖး. တကးဒံးဘၣ် အဝဲသ့ၣ် အတၢ်ရ့လိာ်သးဒီး ယဟိဝၤယွၤ ကဟးဂီၤ ဒီးဘၣ်သ့ၣ်သ့ၣ် အဝဲသ့ၣ် ကန့ၢ်ဘၣ်တၢ်ဆါ အဃိ အသးသမူတထီလၢၤဘၣ်. မ့မ့ၢ် ပှၤလၢအကူၣ်တၢ်သ့န့ၣ် အတလဲၤလၢ ပိာ်မုၣ်လၢ အသးတဆးဘၣ်အ “ဟံၣ်” ဒီးအီၣ်တၢ်ဖဲန့ၣ်ဘၣ်. (ကတိၤဒိ ၇:၂၃, ၂၆) ဖဲ ကတိၤဒိ ၉:၁၈ န့ၣ်တဲဝဲလၢ “ပှၤလၢ ပိာ်မုၣ်တဂၤအံၤ ကိးနုာ်ဝဲတဖၣ် လီၤဘျၢလၢ တၢ်သွၣ်ခိၣ်.” အဃိ ပှၤလၢအလဲၤနုာ်လၢ ပိာ်မုၣ်တဂၤအံၤအဟံၣ်န့ၣ် ကထံၣ်ဘၣ်ဒီးတၢ်သံ. ဘၣ်ဆၣ် ဘၣ်မနုၤအဃိ ပှၤအါဂၤလဲၤဝဲဒံးလဲၣ်.—ကတိၤဒိ ၉:၁၃-၁၈.

တၢး၁၅ ၆/၁ ၂၀-၂၁ ¶၈-၁၀

ပအိၣ်စီဆှံသ့လီၤ

^၈ ဖဲ ကတိၤဒိ ၅:၈ န့ၣ်ယွၤအကလုၢ်ကထါ ဟ့ၣ်ပလီၢ်ပှၤ ဒ်သိးပကဟးဆှဲး တၢ်မၤကမၣ်မုၣ်ကမၣ်ခွါန့ၣ်လီၤ. လၢကတိၤဒိ အဆၢဒိၣ် ၇ ဒီတဆၢအပူၤပဖးဘၣ် ပိာ်ခွါသးစၢ်တဂၤအဂ့ၢ်လီၤ. အဝဲ လဲၤဝဲဆူ ပိာ်မုၣ်ဟးဂီၤတဂၤ အဟံၣ်ခီၣ်ထံးလၢ မုၢ်နၤခီလီၤ. ပိာ်မုၣ်ဝဲန့ၣ် အိၣ်လၢကျဲအသနၢၣ်ဒီး “ကူသိးဝဲ ပှၤဃဲသဲမုၣ်အကူအသိး” လီၤ. ပိာ်မုာ်န့ၣ်လဲၤဆူအအိၣ် ထုးဃီၤအီၤ, ဒီးနၢမူအီၤ ဝံၤဒီး တဲဝဲတၢ်ကတိၤလၢ အမၤကတၢထီၣ်အသးန့ၣ်လီၤ. ပိာ်ခွါသးစၢ်အံၤ တဂ့ၢ်လိာ်ဝဲ အတၢ်မိၣ်န့ၢ်သးလီတဖၣ်န့ၣ်ဘၣ် ဒီးမံဃုာ်ဝဲဒီး ပိာ်မုၣ်အံၤလီၤ. အဝဲတပာ်လီၤအသးလၢ ကမၤတၢ်ကမၣ်သနာ်က့ မၤကမၣ်ဘၣ်ဝဲလီၤ. ခီဖျိမၤဝဲဒ်န့ၣ်အဃိ တူၢ်ဘၣ်ဝဲ တၢ်သူၣ်အုးသးအုးန့ၣ်လီၤ. အဝဲမ့ၢ်သ့ၣ်ညါဝဲလၢ ကတူၢ်ဘၣ်ဝဲတၢ်အံၤန့ၣ် အဝဲကဟးယံၤဝဲဒီး ပိာ်မုၣ်တဂၤအံၤန့ၣ်လီၤ.—ကတိၤဒိ ၇:၆-၂၇.

^၉ ဒ်ပိာ်ခွါသးစၢ်တဂၤအံၤအသိး ပမ့ၢ်တနၢ်ပၢၢ် တၢ်လီၤဘၣ်ယိၣ်အကျဲဘၣ်ဒီး ပဃုထၢဘၣ်ကျဲလၢ အကမၣ်သ့လီၤ. အဒိ လၢမုၢ်နၤန့ၣ် ကွဲၤဟူဖျါ (TV) အကျိၤတနီၤန့ၣ် ဒုးနဲၣ်ဝဲ တၢ်ဂီၤမူဘၣ်ဃး တၢ်မၤကမၣ်မုၣ်ကမၣ်ခွါန့ၣ်လီၤ. လၢတၢ်န့ၣ်အဃိ နမ့ၢ်ဃုကွၢ် ကွဲၤဟူဖျါအကျိၤတခါဝံၤ တခါန့ၣ် တၢ်ဘၣ်ယိၣ်အလီၢ် အိၣ်ထီၣ်သ့ဝဲလီၤ. ဖဲပဆီၣ်လီၤ အ့ထၢၣ်နဲး အကျိၤတနီၤလၢ ကဟဲဖျါထီၣ်တၢ်မနုၤလဲၣ် ပတသ့ၣ်ညါဘၣ်န့ၣ် တၢ်ဘၣ်ယိၣ်အလီၢ် အိၣ်ဝဲလီၤ. ပမ့ၢ်လဲၤနုာ်ကွၢ် တၢ်တဲသကိးတၢ် လၢအ့ထၢၣ်နဲး (chat rooms) မ့တမ့ၢ် ပှာ်ယဲၤသန့တဖၣ် (web sites) လၢအိၣ်ဝဲဒီး တၢ်ဘိးဘၣ်သ့ၣ်ညါ (ကြော်ငြာ) ဘၣ်ဃး တၢ်မၤကမၣ်မုၣ်ကမၣ်ခွါ ဒီးတၢ်ဘျးစဲလိာ်အသးဒီး တၢ်ဂီၤဘ့ၣ်ဆ့န့ၣ် တၢ်ဘၣ်ယိၣ်အလီၢ် အိၣ်ဝဲစ့ၢ်ကီးလီၤ. ပမ့ၢ်ကွၢ် တၢ်သ့ၣ်တဖၣ်အံၤန့ၣ် ဒုးအိၣ်ထီၣ် တၢ်မၤကမၣ်မုၣ်ကမၣ်ခွါ အတၢ်သးကွံ ဒီးတၢ်အဝဲအံၤ ဆှၢပှၤဆူတၢ်တဒိကနၣ် ယဟိဝၤယွၤ အကလုၢ်သ့န့ၣ်လီၤ.

^၁၀ ပိာ်မုၣ်ဒီးပိာ်ခွါ ကဘၣ်ရ့လိာ်အသး တဂၤဒီးတဂၤဒ်လဲၣ်န့ၣ် လံာ်စီဆှံပာ်ဖျါန့ၢ်ပှၤလီၤ. (ဖး ၁ တံၤမသ့း ၅:၂ တက့ၢ်.) ပှၤလၢအတမ့ၢ် ပသးသမူတံၤသကိး မ့တမ့ၢ် ပှၤလၢပကဖျီပသးဒီးအီၤတဂၤန့ၣ် ပတကြၢးပာ်ဖျါထီၣ် တၢ်အဲၣ်လၢ အတကြၢးတဘၣ်ဘၣ်န့ၣ်ဘၣ်. ခရံာ်ဖိတဖၣ် တဂဲၤလိာ်ကွဲတၢ်အဲၣ် ဒီးပှၤဂၤဘၣ်. ပှၤတနီၤ ဆိကမိၣ်ဝဲလၢ အဝဲသ့ၣ် မ့ၢ်ဂဲၤလိာ်ကွဲတၢ်အဲၣ် ဒ်သိးဒီး နီၢ်ခိတၢ်ဟူးတၢ်ဂဲၤ, တၢ်နဲၣ်စုနဲၣ်ခီၣ်, ကျ့ၣ်ကွၢ်တၢ် ဘၣ်ဆၣ် မ့ၢ်တဖူးလဲးဖူးသူအီၤဘၣ်န့ၣ် တဘၣ်တၢ်နီတမံၤဘၣ်. ဖဲပှၤခံဂၤ ပာ်ဖျါထီၣ်ဝဲ တၢ်ဟူးတၢ်ဂဲၤတဖၣ်အံၤအခါ ကဲထီၣ်ဝဲတၢ်ဆိကမိၣ်လၢ အဘၣ်ထွဲလိာ်သးဒီး တၢ်မၤကမၣ်မုၣ်ကမၣ်ခွါအဂ့ၢ် ဒီးအဝဲသ့ၣ် မၤကမၣ်ဘၣ်တၢ်သ့န့ၣ်လီၤ. လၢအပူၤကွံာ် တၢ်သ့ၣ်တဖၣ်အံၤ ကဲထီၣ်တ့ၢ် အသးဒီး ခဲအံၤစ့ၢ်ကီး ကဲထီၣ်သ့ဝဲလီၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၀-E ၇/၁၅ ၂၉ ¶၇

ပှၤအါဂၤ အတၢ်သကဲာ်ပဝး လီၤရၢၢ်နာ်က့ နအိၣ်ကဆှီသ့

စီၤၡလိၤမိၤ ပာ်ဖျါထီၣ်ဝဲ ပှၤလၢအမၤကမၣ်မုၣ်ကမၣ်ခွါန့ၣ် အကဘၣ်တူၢ်ၡူကွံာ်တၢ်ဖးဒိၣ်. ပှၤလၢအဲၣ်ဘၢမါအဲၣ်ဘၢဝၤန့ၣ် အမံၤအသၣ်ကဟးဂီၤ မ့တမ့ၢ် အတၢ်ပာ်ကဲလီၤ နီၢ်ကစၢ်သးတအိၣ်လၢၤဘၣ်. ပှၤလၢအမၤကမၣ်မုၣ်ကမၣ်ခွါ ဒ်သိးဒီး ကမၤလၢပှဲၤ အနီၢ်ကစၢ်တၢ်မိၣ်န့ၢ်သးလီ မ့တမ့ၢ် မၤလၢပှဲၤ ပှၤဂၤအတၢ်မိၣ်န့ၢ်သးလီန့ၣ် အမံၤအသၣ်ကဟးဂီၤ. ဒီးပှၤလၢအအဲၣ်ဘၢမါ အဲၣ်ဘၢဝၤန့ၣ် အတၢ်ပာ်ကဲလီၤနီၢ်ကစၢ်သး တအိၣ်လၢၤဘၣ်.

လါမၢ်ၡး ၂၄-၃၀

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၆

ပမၤလိန့ၢ်တၢ်မနုၤလၢ တၢၢ်တဖၣ်အိၣ်လဲၣ်

it-1-E ၁၁၅ ¶၁-၂

တၢၢ်

‘ကူၣ်တၢ်သ့ဒိၣ်မး.’ တၢၢ်တဖၣ်န့ၣ် အဝဲသ့ၣ်ဆိကမိၣ် ပဲာ်ထံနီၤဖးတၢ် တသ့ဘၣ်နာ်က့ အအိၣ်ဒီး အနီၢ်ကစၢ်တၢ်သ့ၣ်ညါ လၢတၢ်ဘၣ်တ့ကစၢ် ဟ့ၣ်လီၤပာ် အဝဲသ့ၣ်. ဘၣ်ဃးဒီး တၢၢ်န့ၣ် လံာ်စီဆှံ တဲဝဲလၢ “ဖဲတၢ်ကိၢ်ခါ အဆၢကတီၢ်န့ၣ် အဝဲသ့ၣ် ထၢဖှိၣ်ဝဲ အတၢ်အီၣ်တၢ်အီ ဒီးဖဲပှၤကူးတၢ် အဆၢကတီၢ်န့ၣ် အဝဲသ့ၣ် ပာ်ဖှိၣ်ဝဲ အတၢ်အီၣ်တၢ်အီတဖၣ်လီၤ.” (ကတိၤ ၆:၈) တၢၢ်အါတက့ၢ်လၢ ပထံၣ်ဘၣ်အီၤလၢ ကီၢ်ပာ်လဲးစတဲအပူၤန့ၣ် ဖဲတၢ်ကိၢ်ထီၣ်သီ ဒီးတၢ်ကိၢ်ခါ အဆၢကတီၢ်န့ၣ် အဝဲသ့ၣ် ဟးဃုတၢ်အီၣ် ဒီးပာ်ဖှိၣ်ဃာ်တၢ်အီၣ် ဃုာ်ဒီးတၢ်ဂိၢ်ခါအဂီၢ်. မ့ၢ်လၢ တၢ်ဂိၢ်ခါန့ၣ် အဝဲသ့ၣ် ဟးဃုဘၣ်တၢ်အီၣ် တညီဘၣ်အဃိ. တၢၢ်တဖၣ်အံၤန့ၣ် ညီနုၢ်ပထံၣ်ဘၣ်အီၤလၢ တၢ်ချံ ဒီးဘုတဖၣ် အိၣ်ဝဲအါအလီၢ် ဖဲပှၤမၤဘုအလီၢ် အကပိာ်ကပၤ. မူခိၣ်မ့ၢ်စူၤလီၤ ဒီးထံမ့ၢ်ဟဲထီၣ်တုၤလၢ အဝဲသ့ၣ် ပာ်ဖှိၣ်ဃာ်တၢ်အလီၢ်န့ၣ် အဝဲသ့ၣ်ထုးထီၣ်ဝဲ တၢ်ချံတဖၣ် ဒီးလိဝဲလၢမုၢ်. တကးဒံးဘၣ် တၢၢ်တဖၣ်အံၤန့ၣ် အဝဲသ့ၣ် အ့ၣ်တဲာ်ဝဲ တၢ်ချံတဖၣ် အခိၣ်မ့ ဒ်သိးဒီး တၢ်ချံတဖၣ် တမဲထီၣ်တဂ့ၤအဂီၢ်. တၢၢ်တဖၣ်အံၤ လဲၤတၢ်အလီၢ်န့ၣ် အိၣ်ဝဲဒီးအကျိၤ ဒီးအဝံပူၣ်န့ၣ် အိၣ်ဝဲဒီး တၢ်ချံအဘ့ၣ်တဖၣ်.

တၢၢ်အဒိအတဲာ်လၢအဂ့ၤ. ပသ့ၣ်ညါဘၣ်တၢၢ်အဂ့ၢ် ထဲတစဲးဖိသနာ်က့ ကဲထီၣ်တၢ်ဂံၢ်တၢ်ဘါ လၢပဂီၢ်. လံာ်စီဆှံ တဲဝဲလၢ “ပှၤကၢၣ်ဖိဧၢ, လဲၤမၤလိန့ၢ်တၢ်လၢ တၢၢ်တဖၣ်အအိၣ်တက့ၢ်. ကွၢ်တၢ်လၢ တၢၢ်တဖၣ်မၤဝဲ ဒီးကဲထီၣ် ပှၤကူၣ်တၢ်သ့တက့ၢ်.” (ကတိၤ ၆:၆) တၢၢ်တဖၣ်န့ၣ် အအိၣ်ဒီးတၢ်သ့ၣ်ညါလၢ ကကတဲာ်ကတီၤပာ်စၢၤတၢ်လၢ ခါဆူညါအဂီၢ်. တကးဒံးဘၣ် အဝဲသ့ၣ်န့ၣ် မၤတၢ်ဆူၣ် ဒီးတဟ့ၣ်ၡူတၢ်ဘၣ်. ညီနုၢ်န့ၣ် ပထံၣ်ဘၣ်လၢ တၢၢ်တဖၣ်န့ၣ် အဝဲသ့ၣ် စိာ်တၢ်လၢအဃၢန့ၢ်ဒံး အဝဲသ့ၣ်ခံစး မ့တမ့ၢ် အါန့ၢ်အန့ၣ်. ဒီးအဝဲသ့ၣ် မၤတၢ်ကိးမံၤဒဲး လၢကမၤလၢပှဲၤ အမူဒါအဂီၢ်. တကးဒံးဘၣ် အဝဲသ့ၣ် မ့ၢ်လီၤတဲာ်မ့ၢ်ဂ့ၤ မ့ၢ်လီၤတလ့ၣ်လၢ တၢ်ဖးထီၣ်မ့ၢ်ဂ့ၤ အဝဲသ့ၣ် တက့ၤကဒါက့ၤလၢ လီၢ်ခံဘၣ်. အဝဲသ့ၣ် မၤသကိးတၢ်ဃူဃူ, ပာ်အလီၢ်အကျဲ ကဆှဲကဆှီဒိၣ်မး. ဒီးကွၢ်န့ၢ်တၢ်လၢ တၢၢ်တဘ့ၣ်ဒီးတဘ့ၣ်အဂီၢ်. ဒီးအသကိးမ့ၢ်ဘၣ်ဒိ မ့တမ့ၢ် မ့ၢ်လီၤဘှံးန့ၣ် အဝဲသ့ၣ် ဟဲက့ၤစိာ်လိာ်သး လၢအအိၣ်တၢ်လီၢ်.

တၢး၀၀-E ၉/၁၅ ၂၆ ¶၃-၄

ဂုာ်ကျဲးစၢးဒ်သိးနကအိၣ်ဒီး မံၤဂ့ၤသၣ်ဂ့ၤ

ပကြၢးမၤတၢ်ဆူၣ်ဆူၣ် ဒ်တၢၢ်အသိး. ဖဲပှၤထံၣ်ပှၤအခါမ့ၢ်ဂ့ၤ ပှၤတထံၣ်ဘၣ်အခါမ့ၢ်ဂ့ၤ ပကြၢးမၤတၢ်ဆူၣ်ဆူၣ် ဒီးမၤတၢ် မူာ်မူာ်နီၢ်နီၢ်. ဖဲပအိၣ်လၢ ကၠိအခါမ့ၢ်ဂ့ၤ လၢတၢ်မၤလီၢ်မ့ၢ်ဂ့ၤ ဒီးဖဲပမၤနီၢ်သး အတၢ်ဖံးတၢ်မၤတဖၣ်အခါမ့ၢ်ဂ့ၤ ပကြၢးမၤအီၤလၢ အဂ့ၤကတၢၢ်. ဒ်တၢၢ်တဖၣ် မၤတၢ်ဆူၣ်ဆူၣ် ဒီးဒိးန့ၢ်ဘၣ်အဘျုးအသိး ကစၢ်ယွၤအဲၣ်ဒိးလၢ ပကဒိးန့ၢ်ဘၣ်တၢ် “သးခုလၢ ပတၢ်မၤခဲလၢာ် အပူၤ.” (စံၣ်တဲၤတဲလီၤတၢ် ၃:၁၃, ၂၂; ၅:၁၈) ပမ့ၢ်မၤတၢ်ဆူၣ်ဆူၣ်န့ၣ် ပကအိၣ်ဒီး သးလၢအသ့ၣ်ညါဒၣ်တၢ်လၢ အကဆှီ ဒီးတၢ်သူၣ်မံသးမုာ်.—စံၣ်တဲၤတဲလီၤတၢ် ၅:၁၂.

စီၤၡလိၤမိၤ တဲဘၣ်ပှၤကၢၣ်ဖိလၢ“ပှၤကၢၣ်ဖိဧၢ, နကမံနီၤ ယံာ်ဒံးထဲလဲၣ်. နကပၢၢ်ထီၣ် ဆံးယံာ်လဲၣ်. နမံတစဲးစဲး, မံခ့တစဲးစဲး, သံၣ်ထီၣ်စုဒီး အိၣ်ဘှံးတစဲးစဲးဒု တၢ်ဖှီၣ်တၢ်ယာ် ကချုးန့ၢ်နၤ ဒ်တမျိၤတမျာ် လၢအအိၣ်ဒီး စုကဝဲၤအသိးလီၤ.” (ကတိၤဒိ ၆:၉-၁၁). ပှၤလၢအကၢၣ်န့ၣ် ကထံၣ်ဘၣ်ဒီး တၢ်ဖှီၣ်တၢ်ယာ် သတူၢ်ကလာ် ဒ်တမျိာ်တမျာ် လၢအိၣ်ဒီးအစုကဝဲၤ ဟဲတမျာ်တၢ် သတူၢ်ကလာ်အသိး. ဒီးအစံာ်ပျီပူၤန့ၣ် ကပှဲၤဒီးနီၣ် ဒီးလးဆါအထူၣ်ချ့ချ့. (ကတိၤဒိ ၂၄:၃၀, ၃၁) ပှၤလၢအကၢၣ်န့ၣ် မၤတၢ်တကဲထီၣ်လိၣ်ထီၣ်ဘၣ်. ပှၤလၢအကၢၣ်တဂၤန့ၣ် အတၢ်မၤခိၣ်တူၢ်လိာ်အီၤ ဖးယံာ်တကဲဘၣ်. ဒီးကၠိဖိလၢ အကၢၣ်တဂၤစ့ၢ်ကီး တမ့ၢ်လၢ အကဲထီၣ် ကၠိဖိလၢအဖၠဲးတသ့ဘၣ်.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၀-E ၉/၁၅ ၂၇ ¶၃

ဒီသဒၢနမံၤ

တၢ်ဒဲးဘးနွံခါလၢ လံာ်ကတိၤဒိ ပာ်ဖျါထီၣ်ဝဲအံၤန့ၣ် အကဲဝဲ တၢ်ဒဲးဘးတဖၣ် အခိၣ်သ့ၣ် ဒီးအဘၣ်ဃးဒီး တၢ်ဒဲးဘး ဘူးကခဲလၢာ်ညါ. “မဲာ်ချံလၢ အပာ်ထီၣ်ထီအသး” ဒီး “သးလၢ အကူၣ်ထီၣ်တၢ်အၢ” န့ၣ် အဲၣ်ဒိးတဲဝဲ တၢ်ဆိကမိၣ်လၢ အကမၣ်တဖၣ်. ဒီး “ပျ့ၤလၢအလံၣ်တၢ်လီတၢ်” ဒီး “ပှၤအုၣ်အသးလၢ အတဲထဲ တၢ်လံၣ်တၢ်လီတဖၣ်” န့ၣ် အဲၣ်ဒိးတဲဝဲ တၢ်ကတိၤလၢ အကမၣ်တဖၣ်. ဒီး “စုလၢ အလူလီၤ ပှၤလၢ အတၢ်ကမၣ် တအိၣ်ဘၣ် အသွံၣ်” ဒီး “ခီၣ်လၢ အလဲၤဃ့ၢ်ချ့ချ့ဆူ တၢ်အၢအအိၣ်” န့ၣ်အဲၣ်ဒိးတဲဝဲ တၢ်မၤလၢအကမၣ်တဖၣ်. တၢ်အဂၤတမံၤလၢ ယဟိဝၤယွၤ သးဟ့ဝဲဖးဒိၣ်န့ၣ် မ့ၢ်ဝဲ ပှၤလၢမၤဟးဂီၤ တၢ်ဃူတၢ်ဖိး. လံာ်ကတိၤဒိအံၤ ပာ်ဖျါထီၣ်ဝဲ တၢ်ဒဲးဘး ဃုခါဝံၤ နွံခါအဃိ ပာ်ဖျါထီၣ်ဝဲလၢ တၢ်ဒဲးဘးတဖၣ်န့ၣ် တကတၢၢ်ဝဲဖဲန့ၣ်ဘၣ် အကဟဲအါထီၣ်, မ့ၢ်လၢပှၤဟီၣ်ခိၣ်ဖိတဖၣ်န့ၣ် အမၤတၢ်ဒဲးဘး အါထီၣ်မးအါထီၣ်အဃိ.

လါမၢ်ၡး ၃၁–လါအ့ဖြ့ၣ် ၆

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၇

ဟးဆှဲးတၢ်အိၣ်သးလၢ ကကဲထီၣ် တၢ်လ့ပစီ

တၢး၀၀-E ၁၁/၁၅ ၂၉ ¶၅

“မၤထွဲ ယတၢ်မၤလိာ်တဖၣ် ဒီးဆဲးမူတက့ၢ်”

စီၤၡလိၤမိၤ ကွၢ်စိလီၤတၢ်လၢ ပဲတြီဖိအပူၤ ဒီးဖဲမုၢ်ဟါလီၤကယီကယီအခါ လၢကျဲန့ၣ် တၢ်ခံးဝဲ. ဒီးအထံၣ်ဘၣ်ဝဲ ပိာ်ခွါတဂၤ ဟးလၢကျဲပူၤ. ဒီးပိာ်ခွါအံၤ အမ့ၢ်ပှၤသးစၢ်လၢ အသးတဆးဘၣ် ဒီးအသ့ၣ်ညါ ပဲာ်ထံနီၤဖးတၢ် တသ့ဂ့ၤဂ့ၤဘၣ်. တၢ်လီၢ်လၢ အလဲၤဝဲန့ၣ် မၤသးဒ်လဲၣ် ဒီးအဝဲမ့ၢ်လဲၤဖဲန့ၣ်န့ၣ် တၢ်ကကဲထီၣ်အသးဒီးအီၤ ဒ်လဲၣ်န့ၣ် ဖျါလၢအသ့ၣ်ညါဝဲ. သနာ်က့ အဝဲလဲၤလၢ “ကျဲနၢၣ်ထံး” လၢအလဲၤလိၤလိၤဆူ ပိာ်မုၣ်တဂၤန့ၣ်အဟံၣ်. ပိာ်မုၣ်တဂၤအံၤ အကဲမတဂၤလဲၣ် ဒီးအမၤမနုၤလဲၣ်.

တၢး၁၅ ၆/၁ ၂၀ ¶၈

ပအိၣ်စီဆှံသ့လီၤ

တၢး၂၃.၀၆ ၂၃ ¶၁၀

ပမ့ၢ်ပျံၤယဟိဝၤယွၤန့ၣ် ကကဲဘျုးလၢပဂီၢ်ထီဘိ

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၀-E ၁၁/၁၅ ၂၉ ¶၁

“မၤထွဲ ယတၢ်မၤလိာ်တဖၣ် ဒီးဆဲးမူတက့ၢ်”

“စၢထီၣ်တၢ်သ့ၣ်တဖၣ် [ယတၢ်သိၣ်တၢ်သီတဖၣ်] န့ၣ်လၢ နစုနၢတဖၣ်အလိၤ ဒီးကွဲးလီၤအီၤလၢ နသးအဘ့ၣ်ဘၣ်လိၤတက့ၢ်.” (ကတိၤဒိ ၇:၃) ပစုနၢဘိတဖၣ်န့ၣ် အအိၣ်လၢ ပမဲာ်ညါ ဒီးပထံၣ်ဘၣ်အီၤထီဘိ. ဒီးပသူအီၤ ဒီးပမၤတၢ်လၢ ပအဲၣ်ဒိးမၤတဖၣ်သ့ဝဲ. ဒ်န့ၣ်အသိး တၢ်လၢ ပမၤလိဘၣ် ဒီးသ့ၣ်ညါထီၣ်ဘၣ်အီၤ လၢအအိၣ်လၢ လံာ်စီဆှံပူၤတဖၣ်န့ၣ် ပကဘၣ် သ့ၣ်နီၣ်ထီၣ်အီၤထီဘိ ဒီးပျဲလၢ အဟံးစုနဲၣ်ကျဲပှၤ လၢတၢ်ကိးမံၤဒဲးအပူၤ. ဒီးပကဘၣ်ကွဲးလီၤ တၢ်သ့ၣ်တဖၣ်န့ၣ်လၢ ပသးလိၤန့ၣ် အဲၣ်ဒိးတဲဝဲ ပကဘၣ်ပာ်အီၤလၢ ပသးပူၤထီဘိ.

လါအ့ဖြ့ၣ် ၇-၁၃

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၈

ဒိကနၣ် ယ့ၣ်ၡူးအတၢ်ဟ့ၣ်ကူၣ်

cf-E ၁၃၁ ¶၇

“ယအဲၣ်ပၢ်”

^၇ အဆၢဖိ ၂၂ ပာ်ဖျါထီၣ်ဝဲလၢ တၢ်ကူၣ်သ့ တဲဝဲလၢ “ယဟိဝၤယွၤ တ့လီၤယၤ အဆိကတၢၢ် ဒီးလၢအတၢ်မၤလၢပျၢၤတဖၣ် အကျါန့ၣ် ယမ့ၢ် တၢ်အဆိကတၢၢ်လီၤ.” လံာ်စီဆှံအဆၢအံၤ တတဲဝဲဘၣ်ဃးဒီး ကစၢ်ယွၤ တ့လီၤဝဲ တၢ်ကူၣ်သ့အဂ့ၢ်ဘၣ်. မ့ၢ်လၢတၢ်ကူၣ်သ့န့ၣ် တဘၣ်တၢ်တ့လီၤအီၤ နီတဘျီဘၣ်. ဒီးကစၢ်ယွၤန့ၣ် အကူၣ်တၢ်သ့ထီဘိ ဒီးကစၢ်ယွၤန့ၣ် အအိၣ်ပာ်စၢၤထီဘိ အဃိ တၢ်ကူၣ်သ့န့ၣ် အစးထီၣ်ခီၣ်ထံး တအိၣ်ဘၣ်. (စံးထီၣ်ပတြၢၤ ၉၀:၂) မ့မ့ၢ် ကစၢ်ယွၤအဖိခွါန့ၣ် မ့ၢ်ဝဲ “တၢ်ဘၣ်တ့ခဲလၢာ် အပှၤဝဲၢ်ကိ.” (ကလီးစဲ ၁:၁၅) ဒီးဒ်ကတိၤဒိ ပာ်ဖျါထီၣ်ဝဲအသိး ကစၢ်ယွၤအဖိခွါန့ၣ် ဘၣ်တၢ်တ့လီၤအီၤ တချုးလၢ မူခိၣ်ဒီးဟီၣ်ခိၣ် ဘၣ်တၢ်တ့လီၤအီၤဒံးဘၣ်အခါ. ဒီးအဝဲမ့ၢ်ဝဲ တၢ်ကလုၢ်လၢ အတဲန့ၢ်တၢ်လၢ ကစၢ်ယွၤအခၢၣ်စး အဃိ ပထံၣ်ဘၣ် ယဟိဝၤယွၤ အတၢ်ကူၣ်သ့ခီဖျိလၢအီၤ.—ယိၤဟၣ် ၁:၁.

cf-E ၁၃၁-၁၃၂ ¶၈-၉

“ယအဲၣ်ပၢ်”

^၈ တချုးလၢ ကစၢ်ယွၤအဖိခွါ ဟဲလီၤလၢ ဟီၣ်ခိၣ်ဒံးဘၣ်အခါ အဝဲမၤဝဲ မနုၤလဲၣ်. အဆၢဖိ ၃၀ န့ၣ်ပာ်ဖျါထီၣ်ဝဲလၢ အဝဲအိၣ်လၢ ကစၢ်ယွၤအကပၤ ဒ် “ပှၤမၤတၢ်သ့ဂ့ၤဂ့ၤတဂၤ” အသိး. အဲၣ်ဒိးတဲဝဲ အခီပညီဒ်လဲၣ်. ဖဲကလီးစဲ ၁:၁၆ န့ၣ်တဲဝဲလၢ “ခီဖျိလၢအီၤအဃိ တၢ်တ့လီၤ တၢ်အဂုၤအဂၤလၢ အအိၣ်လၢမူခိၣ် ဒီးလၢဟီၣ်ခိၣ်ခဲလၢာ်, . . . တၢ်တ့လီၤ တၢ်အဂုၤအဂၤခဲလၢာ် ခီဖျိလၢအီၤ ဒီးမ့ၢ်ဝဲလၢအဂီၢ်လီၤ.” ယဟိဝၤယွၤ သူဝဲအဖိခွါ လၢအမ့ၢ် ပှၤမၤတၢ်သ့ဂ့ၤဂ့ၤတဂၤ ဒ်သိးကတ့လီၤဝဲ ပှၤနီၢ်သးဖိအဂၤတဖၣ်ခဲလၢာ်လၢ အအိၣ်လၢမူခိၣ် ဒီးအတ့လီၤဝဲ တၢ်ခဲလၢာ်လၢ ဟီၣ်ခိၣ်ချၢ လၢပထံၣ်အီၤသ့တဖၣ်. အဒိ အတ့လီၤဝဲ တၢ်မုၢ်တၢ်ဘိ ဆၣ်ဖိကီၢ်ဖိ ဒီးပှၤဟီၣ်ခိၣ်ဖိတဖၣ်. ကစၢ်ယွၤ မၤသကိးတၢ်ဒီး အဖိခွါ ယ့ၣ်ၡူးန့ၣ် လီၤဂာ်ဒ်သိးဒီး ပှၤဆွဲထီၣ် တၢ်သူၣ်ထီၣ်အဂီၤတဂၤ မၤသကိးတၢ်ဒီး ပှၤလၢအသူၣ်ထီၣ်တၢ်တဂၤ. ပှၤလၢအသူၣ်ထီၣ် တၢ်သူၣ်ထီၣ်တဂၤန့ၣ် အသူၣ်ထီၣ် တၢ်သူၣ်ထီၣ်သနာ်က့ ညီနုၢ်န့ၣ် ပှၤစံးပတြၢၤဝဲ ပှၤလၢအဆွဲထီၣ် တၢ်သူၣ်ထီၣ်အဂီၤတဂၤ. ဒ်န့ၣ်အသိး ဖဲပထံၣ်ဘၣ် တၢ်ဘၣ်တ့လၢ အလီၤကမၢကမၣ်အခါ ပဟ့ၣ်တၢ်လၤတၢ်ကပီၤလၢ တၢ်ဘၣ်တ့ကစၢ်လၢ အဒုးအိၣ်ထီၣ်ဝဲ တၢ်ဘၣ်တ့. (စံးထီၣ်ပတြၢၤ ၁၉: ၁) ဒီးအဂၤတမံၤန့ၣ် ပသ့ၣ်ညါဘၣ်လၢ တၢ်ဘၣ်တ့ကစၢ် ဒီး “ပှၤမၤတၢ်သ့ဂ့ၤဂ့ၤတဂၤ” မၤသကိးတၢ်ဖးယံာ် ဒီးမၤသကိးတၢ်လၢ တၢ်သးခုအပူၤ.

^၉ ပှၤလၢ အတလၢတပှဲၤဘၣ်ခံဂၤ မ့ၢ်မၤသကိးတၢ်န့ၣ် တဘျီတခီၣ် တၢ်ကီတၢ်ခဲ ကအိၣ်ထီၣ်လၢ အဝဲသ့ၣ် အဘၢၣ်စၢၤ. ဘၣ်ဆၣ် မ့မ့ၢ် ယဟိဝၤယွၤ ဒီးယ့ၣ်ၡူးန့ၣ် တမ့ၢ်ဒ်န့ၣ်ဘၣ်. ကစၢ်ယွၤ အဖိခွါယ့ၣ်ၡူး မၤသကိးတၢ်ဒီး အပါဖးယံာ် သနာ်က့ အဝဲတဲဝဲလၢ “ယသူၣ်ဖှံသးညီ လၢအမဲာ်ညါ ထီဘိလီၤ” (ကတိၤဒိ ၈:၃၀) အဃိ ပသ့ၣ်ညါဘၣ်လၢ ဖိခွါန့ၣ် မၤသကိးတၢ်ဒီးအပါ မုာ်မး. ဒီးအပါစ့ၢ်ကီး တူၢ်ဘၣ်တဲဒ်န့ၣ်. ယ့ၣ်ၡူးန့ၣ် အကွၢ်လိဝဲ အပါအတၢ်ဂ့ၤတၢ်ဝါ အဃိ ကယီကယီန့ၣ် အဝဲလီၤဂာ်ဒိၣ်ထီၣ်ဒီးအပါ. အဝဲသ့ၣ် မၤသကိးတၢ်န့ၢ် အနံၣ်ဖးယံာ်အဃိ အတၢ်ရ့လိာ်သး ဟဲဂၢၢ်ကျၢၤဒိၣ်ထီၣ်ဝဲ. အဝဲသ့ၣ် အတၢ်အဲၣ် ဒီးအတၢ်ရ့လိာ်သးန့ၣ် အအိၣ်ဝဲ အယံာ်ကတၢၢ် ဒီးအဂၢၢ်ကျၢၤကတၢၢ်.

တၢး၀၉-E ၄/၁၅ ၃၁ ¶၁၄

စံးဘျုးယ့ၣ်ၡူး လၢအမ့ၢ် ပှၤလၢအဒိၣ်န့ၢ် စီၤဒၤဝံး ဒီးစီၤၡလိၤမိၤ

^၁၄ လၢဟီၣ်ခိၣ်ချၢန့ၣ် ပှၤလၢအကူၣ်တၢ်သ့ ဒိၣ်န့ၢ်ဒံး စီၤၡလိၤမိၤန့ၣ် အိၣ်ထဲတဂၤ ဒီးပှၤတဂၤန့ၣ် မ့ၢ်ဝဲ ယ့ၣ်ၡူး. ဒီးယ့ၣ်ၡူးန့ၣ် အတဲလီၤအသးလၢ အမ့ၢ် “ပှၤလၢအဒိၣ်န့ၢ်ဒံး စီၤၡလိၤမိၤ.” (မး ၁၂:၄၂) ယ့ၣ်ၡူးတဲဝဲ “တၢ်ကတိၤလၢ အဘၣ်ဃးဒီး တၢ်မူအထူအယိာ်.” (ယိၤဟၣ် ၆:၆၈) အဒိ ဖဲအဝဲစံၣ်တဲၤတဲလီၤတၢ်လၢ တၢ်လူၢ်ခိၣ်အခါ အဝဲတဲပၠးအါထီၣ်ဝဲ တၢ်ဂ့ၢ်လၢ အအိၣ်လၢ စီၤၡလိၤမိၤ အတၢ်ကတိၤတဖၣ်အကျါ. စီၤၡလိၤမိၤန့ၣ် အပာ်ဖျါထီၣ်ဝဲ တၢ်ဂ့ၢ်အါမံၤ လၢအဘၣ်ဃးဒီး တၢ်လၢ ပှၤဘူၣ်ထီၣ်ဘါထီၣ် ယဟိဝၤယွၤတဖၣ်မၤဝဲ ဒ်သိး အဝဲသ့ၣ် ကန့ၢ်ဘၣ်တၢ်သးခုအဂီၢ်. (ကတိၤ ၃:၁၃; ၈:၃၂, ၃၃; ၁၄:၂၁; ၁၆:၂၀) ယ့ၣ်ၡူး ပာ်ဖျါထီၣ်ဝဲလၢ တၢ်သးခုနီၢ်ကီၢ်န့ၣ် အဟဲခီဖျိလၢ တၢ်ဘူၣ်ထီၣ်ဘါထီၣ် ယဟိဝၤယွၤ ဒီးကစၢ်ယွၤ တၢ်အၢၣ်လီၤအီလီၤတဖၣ် ဟဲလၢထီၣ်ပှဲၤထီၣ်ဝဲ. အဝဲတဲဝဲလၢ “ပှၤလၢ အသ့ၣ်ညါလီၤအသးလၢ အလိၣ်ဘၣ် ကစၢ်ယွၤ အတၢ်ဟံးစုနဲၣ်ကျဲန့ၣ် ကသးခုဝဲ, မ့ၢ်လၢ မူခိၣ်အဘီအမုၢ်န့ၣ် မ့ၢ်အဝဲသ့ၣ် အတၢ်အဃိလီၤ.” (မး ၅:၃) ပှၤလၢအမၤထွဲ ယ့ၣ်ၡူး အတၢ်ဟံးစုနဲၣ်ကျဲတဖၣ်န့ၣ် အဘူးဒိၣ်ထီၣ်ဒီး ယဟိဝၤယွၤလၢအမ့ၢ် “တၢ်မူအဂံၢ်ခီၣ်ထံး.” (စံး ၃၆:၉; ကတိၤ ၂၂:၁၁; မး ၅:၈) ယ့ၣ်ၡူးန့ၣ် အပာ်ဖျါထီၣ်ဝဲ “ကစၢ်ယွၤ အတၢ်ကူၣ်သ့.” (၁ ကရံၣ် ၁:၂၄, ၃၀) အဝဲမ့ၢ်ဝဲ စီၤပၤမ့းၡံအၤ လၢအအိၣ်ဒီး “တၢ်ကူၣ်သ့”—ၡါ ၁၁:၂.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၂.၁၀ ၁၈-၁၉ ¶၁-၂

တၢ်ကူၣ်သ့နီၢ်ကီၢ် ကီးပသူထီၣ်ဖးဒိၣ်

လၢထံကီၢ်အါဘ့ၣ်န့ၣ် ညီနုၢ်ပထံၣ်ဘၣ်လၢ ပဒီပုၢ်ဝဲၢ်မုၣ်ခွါတဖၣ် ဆၢထၢၣ်လၢ လ့ၣ်ဆီၣ်လၢ တၢ်စံၣ်တဲၤတဲလီၤတၢ် အကပၤ လၢတၢ်လီၢ်လၢ ပှၤလ့ၢ်ထီၣ်လ့ၢ်လိၤအါအလီၢ် ဒီးဟ့ၣ်လီၤဝဲ လံာ်လဲၢ်တဖၣ်လၢ ပှၤလၢအဲၣ်ဒီးဖးဝဲ. နၤစ့ၢ်ကီး နမ့ၢ်မၤဘၣ် လ့ၣ်ဆီၣ်လၢ တၢ်စံၣ်တဲၤတဲလီၤတၢ်န့ၣ် ဘၣ်သ့ၣ်သ့ၣ် နကနီၣ်ဘၣ် လံာ်စီဆှံအဆၢလၢ ကတိၤဒိအပူၤ လၢအတဲဘၣ်ဃးဒီး တၢ်ကူၣ်သ့နီၢ်ကီၢ် ကီးပသူထီၣ်ဖးဒိၣ် လၢကျဲပူၤ ဒ်သိးဒီး ပှၤကနၢ်ဟူဘၣ် အတၢ်ကူၣ်သ့. (ဖး ကတိၤဒိ ၁:၂၀, ၂၁.) တကးဒံးဘၣ် လံာ်စီဆှံဒီး ပတၢ်ကရၢကရိ လံာ်လဲၢ်တဖၣ်န့ၣ် အအိၣ်ဒီး “တၢ်ကူၣ်သ့နီၢ်ကီၢ်” လၢအကဲဝဲ ယဟိဝၤယွၤ အတၢ်ကူၣ်သ့. တၢ်ကူၣ်သ့တခါအံၤ ကမၤစၢၤပှၤဒ်သိး ပကဒိးန့ၢ်ဘၣ် တၢ်မူထူယိာ်အဃိ အရ့ဒိၣ်လၢ ပကဘၣ်သ့ၣ်ညါအီၤ. ဒီးပှၤတဂၤဂၤ ဖးဝဲပတၢ်ကရၢကရိလံာ်လဲၢ် မ့ၢ်မုာ်န့ၣ် ပသးခုညါ. သနာ်က့ ပှၤတဘၣ်သးဖးဝဲ ကီးဂၤဒဲးဘၣ်. ပှၤတနီၤန့ၣ် တဘၣ်သး သ့ၣ်ညါဝဲတၢ်လၢ လံာ်စီဆှံတဲဝဲဘၣ်. မ့မ့ၢ်လၢ အဂၤတနီၤန့ၣ် ဆိကမိၣ်ဝဲလၢ လံာ်စီဆှံအတၢ်ဟ့ၣ်ကူၣ်န့ၣ် တကဲဘျုးလၢ ဆၢကတီၢ်ခဲအံၤလၢၤဘၣ်. အဃိ အဝဲသ့ၣ်ထံၣ်ပှၤဘျီ နံၤဘၣ်ပှၤ. တကးဒံးဘၣ် ပှၤအဂၤတနီၤန့ၣ် ဆိကမိၣ်ဝဲလၢ ပှၤလၢအအိၣ်မူမၤထွဲ လံာ်စီဆှံ အတၢ်ဟံးစုနဲၣ်ကျဲန့ၣ် အတရ့ဒီးပှၤဂၤ ဂ့ၤဂ့ၤဘၣ်. ဒီးအဝဲသ့ၣ် ထံၣ်လီၤအသးလၢ အကဲပှၤတီပှၤလိၤ. ဘၣ်ဃးဒီး ယဟိဝၤယွၤ အတၢ်ကူၣ်သ့န့ၣ် ပှၤအါဂၤအတၢ်ထံၣ် မ့ၢ်အိၣ်ဒ်လဲၣ်ဒ်လဲၣ် သနာ်က့ ယဟိဝၤယွၤ အဲၣ်ပှၤကီးဂၤဒဲး အဃိ အဟ့ၣ်လီၤ ပှၤကီးဂၤဒဲးလၢ အတၢ်ကူၣ်သ့ထီဘိ. ယဟိဝၤယွၤဟ့ၣ်လီၤပှၤ အတၢ်ကူၣ်သ့ဒ်လဲၣ်.

^၂ ယဟိဝၤယွၤ အတၢ်ကူၣ်သ့န့ၣ် အိၣ်လၢအကလုၢ်ကထါ လံာ်စီဆှံအပူၤ. ပှၤအါတက့ၢ်န့ၣ် အလံာ်စီဆှံအိၣ်ဝဲ. ဒီးပတၢ်ကရၢကရိလံာ်လဲၢ် လၢအသန့ၤထီၣ်သး လၢလံာ်စီဆှံန့ၣ် အအိၣ်လၢကျီာ် ၁,၀၀၀ ဘျဲၣ်ညါ. အဃိ ပှၤလၢအဖး ဒီးမၤထွဲဝဲ လံာ်စီဆှံ ဒီးပတၢ်ကရၢကရိ လံာ်လဲၢ်တဖၣ်န့ၣ် အဝဲသ့ၣ် ကဒိးန့ၢ်ဘၣ် တၢ်ကူၣ်သ့နီၢ်ကီၢ်. သနာ်က့ ပှၤအါတက့ၢ်န့ၣ် တဘၣ်သးကနၣ်ဃုာ်ဝဲ ကစၢ်ယွၤ အတၢ်ကူၣ်သ့ဘၣ်. အဃိ အဝဲသ့ၣ်မ့ၢ်ဘၣ်ဆၢတဲာ်တၢ်န့ၣ် အဝဲသ့ၣ်သန့ၤအသးလၢ အနီၢ်ကစၢ် အတၢ်ကူၣ်သ့ ဒီးမၤထွဲဝဲ ပှၤဟီၣ်ခိၣ်ဖိ အတၢ်ဟ့ၣ်ကူၣ်. တကးဒံးဘၣ် အဝဲသ့ၣ် ဆိကမိၣ်ဆံးဝဲ ပှၤလၢအမၤထွဲလံာ်စီဆှံ အတၢ်ဟံးစုနဲၣ်ကျဲတဖၣ်. ဘၣ်မနုၤအဃိ ပှၤတနီၤအိၣ်ဒီး တၢ်ထံၣ်ဒ်အံၤလဲၣ်. အဆိကတၢၢ်န့ၣ် ပကတဲသကီး ဘၣ်ဃးဒီး ပကကဲထီၣ် ပှၤကူၣ်တၢ်သ့အဂီၢ် ပကဘၣ်မၤဒ်လဲၣ်.

ijwbq တၢ်ကွဲးဖုၣ်– ၁၆၀

ဘၣ်မနုၤအဃိ ယ့ၣ်ၡူးန့ၣ် ပှၤကိးအီၤလၢ ကစၢ်ယွၤအဖိခွါလဲၣ်

လံာ်စီဆှံ တဲဝဲလၢ

လၢလံာ်စီဆှံပူၤ ယ့ၣ်ၡူးန့ၣ် ညီနုၢ်ဘၣ်တၢ်ကိးအီၤလၢ “ယွၤအဖိခွါ” လီၤ. (ယိၤဟၣ် ၁:၄၉) တၢ်ကတိၤလၢအမ့ၢ် “ယွၤအဖိခွါ” န့ၣ်ပာ်ဖျါထီၣ်ဝဲလၢ ကစၢ်ယွၤမ့ၢ်ဝဲ တၢ်ဘၣ်တ့ကစၢ်, သးသမူခဲလၢာ်အဂံၢ်ခီၣ်ထံး, အတ့လီၤယ့ၣ်ၡူး ဒီးဟ့ၣ်လီၤအီၤအသးသမူလီၤ. (စံးထီၣ်ပတြၢၤ ၃၆:၉; လီၣ်ဖျါ ၄:၁၁) လံာ်စီဆှံ တပာ်ဖျါထီၣ်ဝဲဒၣ်လၢ ကစၢ်ယွၤန့ၣ် မ့ၢ်ပၢ်လၢအထီၣ်ဖိထီၣ်လံၤဒ် ပှၤဟီၣ်ခိၣ်ဖိအသိးဘၣ်.

လံာ်စီဆှံပာ်ဖျါထီၣ်ဝဲ မူခိၣ်ကလူးတဖၣ် ဒ်သိးဒီး “ယွၤအဖိခွါတဖၣ်” လီၤ. (ယိၤဘး ၁:၆) ဒီးပှၤဟီၣ်ခိၣ်ဖိ အဆိကတၢၢ်တဂၤလၢ အမ့ၢ်စီၤအၤဒၣ်စ့ၢ်ကီး လံာ်စီဆှံပာ်ဖျါထီၣ်ဝဲလၢ အမ့ၢ် “ယွၤအဖိခွါ” လီၤ. (လူၤကၣ် ၃:၃၈) ဘၣ်ဆၣ် ယ့ၣ်ၡူးန့ၣ် ကစၢ်ယွၤတ့လီၤအီၤအဆိကတၢၢ်. ထဲဒၣ်အီၤန့ၣ် ကစၢ်ယွၤတ့လီၤအီၤလၢ အနီၢ်ကစၢ်ဒၣ်ဝဲအဃိ လံာ်စီဆှံပာ်ဖျါထီၣ်ဝဲ ယ့ၣ်ၡူးဒ်ကစၢ်ယွၤအဖိခွါ ဝဲၢ်ကိလီၤ.

• တချုးလၢ ယ့ၣ်ၡူးဟဲအိၣ်ဖျဲၣ်ထီၣ်လၢ ဟီၣ်ခိၣ်ဒံးဘၣ်န့ၣ် မ့ၢ်အအိၣ်လၢ မူခိၣ်ဧါ.

• တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ် အမၤတၢ်မနုၤလဲၣ်.

တချုးလၢ ယ့ၣ်ၡူးဟဲအိၣ်ဖျဲၣ်ထီၣ်လၢ ဟီၣ်ခိၣ်ဒံးဘၣ်န့ၣ် မ့ၢ်အအိၣ်လၢ မူခိၣ်ဧါ

တချုးလၢ ယ့ၣ်ၡူးဟဲအိၣ်ဖျဲၣ်ထီၣ်လၢ ဟီၣ်ခိၣ်ဒံးဘၣ်န့ၣ် လၢညါအမ့ၢ်ဝဲ ပှၤနီၢ်သးဖိ ဒီးအအိၣ်လၢမူခိၣ်လီၤ. အဃိ ယ့ၣ်ၡူးအနီၢ်ကစၢ်ဒၣ်ဝဲ တဲဝဲလၢ “ယဟဲလီၤလၢ မူခိၣ်” လီၤ.—ယိၤဟၣ် ၆:၃၈; ၈:၂၃

တချုးလၢ ကစၢ်ယွၤတ့လီၤ တၢ်နီတမံၤဒံးဘၣ်အခါန့ၣ် အတ့လီၤဆိဝဲ ယ့ၣ်ၡူးလီၤ. ဘၣ်ဃးဒီး ယ့ၣ်ၡူးန့ၣ် လံာ်စီဆှံတဲဝဲလၢ

• “အဝဲဒၣ်န့ၣ်မ့ၢ် . . . တၢ်ဘၣ်တ့ခဲလၢာ် အပှၤဝဲၢ်ကိလီၤ.”—ကလီးစဲ ၁:၁၅.

• ယ့ၣ်ၡူးမ့ၢ်ဝဲ “ကစၢ်ယွၤအတၢ်ဘၣ်တ့ အဆိကတၢၢ်” လီၤ.—လီၣ်ဖျါ ၃:၁၄.

ယ့ၣ်ၡူးမၤလၢပှဲၤ ဝံအတၢ်စံးပာ်လၢ အဘၣ်ဃးဒီး “ပှၤတဂၤန့ၣ် ဟဲဝဲလၢပျၢၤလံၤလံၤ, လၢမုၢ်နံၤလၢ တၢ်လီၤထူလီၤယိာ်န့ၣ်လီၤ.”—မံကၤ ၅:၂; မးသဲ ၂:၄-၆.

တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ် အမၤတၢ်မနုၤလဲၣ်

လၢမူခိၣ်န့ၣ် အအိၣ်ဒီးအလီၢ်အလၤလၢ အပတီၢ်ထီ. ယ့ၣ်ၡူးဃ့ဘါထုကဖၣ်လၢ “ပၢ်ဧၢ, ဒုးလၤဒုးကပီၤယၤလၢ . . . တၢ်လၤတၢ်ကပီၤလၢ အအိၣ်ဒီးယၤ, လၢယအိၣ်ဒီးနၤလၢ ဟီၣ်ခိၣ် တချုးကဲထီၣ်ဒံးဘၣ်န့ၣ်တက့ၢ်.” အဃိ ပသ့ၣ်ညါဘၣ်လၢလၢမူခိၣ်န့ၣ် ယ့ၣ်ၡူးအိၣ်ဒီးအလီၢ်အလၤလီၤ.—ယိၤဟၣ် ၁၇:၅.

ဖဲအပၢ်တ့လီၤတၢ်ခဲလၢာ်အခါ ယ့ၣ်ၡူးမၤစၢၤအပၢ်. ဖဲန့ၣ်အဆၢကတီၢ် ယ့ၣ်ၡူးမၤသကိးတၢ်ဒီးအပၢ်ဒ် “ပှၤမၤတၢ်သ့တဂၤအသိး” လီၤ. (ကတိၤဒိ ၈:၃၀) ဘၣ်ဃးဒီး ယ့ၣ်ၡူးန့ၣ် လံာ်စီဆှံတဲဝဲလၢ “တၢ်အိၣ်လၢမူခိၣ်, ဒီးတၢ်အိၣ်လၢဟီၣ်ခိၣ်” ဒီး “တၢ်ခဲလၢာ်ဘၣ်တ့အသးလၢအစုပူၤ” လီၤ.—ကလီးစဲ ၁:၁၆.

ကစၢ်ယွၤသူဝဲ ယ့ၣ်ၡူးလၢကတ့လီၤဝဲ တၢ်ဘၣ်တ့အဂၤခဲလၢာ်လီၤ. တၢ်ဘၣ်တ့သ့ၣ်တဖၣ်အံၤန့ၣ် ပၣ်ဃုာ်ဒီး ပှၤနီၢ်သးဖိလၢအဂၤခဲလၢာ် ဒီးတၢ်အိၣ်လၢ မူခိၣ်ဟီၣ်ခိၣ်ဒီး တၢ်လၢပထံၣ်အီၤသ့တဖၣ်လီၤ. (လီၣ်ဖျါ ၅:၁၁) ကစၢ်ယွၤမၤသကိးတၢ်ဒီး ယ့ၣ်ၡူးန့ၣ် လီၤဂာ်ဝဲဒ်သိးဒီး ပှၤဆွဲထီၣ်တၢ်သူၣ်ထီၣ်အဂီၤတဂၤ မၤသကိးတၢ်ဒီး ပှၤလၢအတ့ထီၣ်တၢ်သူၣ်ထီၣ်တဂၤလီၤ.

ယ့ၣ်ၡူး မ့ၢ်ဝဲတၢ်ကလုၢ်. လံာ်စီဆှံပာ်ဖျါထီၣ်လၢ တချုးဖဲ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ် ယ့ၣ်ၡူးမ့ၢ် “တၢ်ကလုၢ်” လီၤ. (ယိၤဟၣ် ၁:၁) ကစၢ်ယွၤသူဝဲ ယ့ၣ်ၡူးလၢ ကတဲဘၣ် ပှၤနီၢ်သးဖိတဖၣ် တၢ်ကစီၣ် ဒီးဟံးစုနဲၣ်ကျဲ အဝဲသ့ၣ်လီၤ.

တကးဒံးဘၣ် ဒ်သိးကစၢ်ယွၤကတဲတၢ်ဒီး ပှၤဟီၣ်ခိၣ်ဖိအဂီၢ် လီၤဂာ်လၢ ယ့ၣ်ၡူးတဲန့ၢ်တၢ်လၢ ကစၢ်ယွၤအခၢၣ်စးလီၤ. ဖဲကစၢ်ယွၤဟံးစုနဲၣ်ကျဲဝဲ နီၢ်အံၣ်အု ဒီးစီၤအၤဒၣ်လၢ ဧ့ၤဒ့ၣ်တၤသၣ်လီၢ်ပူၤအခါ လီၤဂာ်လၢ ယ့ၣ်ၡူးတဲန့ၢ်တၢ်လၢ အဂီၢ်တဆီလီၤ. (၁ မိၤၡ့ ၂:၁၆, ၁၇) ဒီးမူခိၣ်ကလူးလၢ အဆှၢဝဲ ပှၤအံၣ်စရ့လးဖိတဖၣ် လၢပှၢ်မုၢ်ကနၢ ဒီးပှၤအံၣ်စရ့လးဖိတဖၣ် ဘၣ်ဒိကနၣ်အကလုၢ်န့ၣ် ဘၣ်သ့ၣ်သ့ၣ် ကမ့ၢ်ဝဲဒၣ် ယ့ၣ်ၡူးလီၤ.—၂ မိၤၡ့ ၂၃:၂၀-၂၃.a

လါအ့ဖြ့ၣ် ၁၄-၂၀

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၉

ကဲထီၣ်ပှၤကူၣ်တၢ်သ့ ဒီးတဲဆဲးအဲးတၢ်တဂ့ၤ

တၢး၂၂.၀၂ ၉ ¶၄

“ကနၣ်ပှၤကူၣ်တၢ်သ့ အတၢ်ကတိၤ”

^၄ ဘၣ်သ့ၣ်သ့ၣ် တၢ်ဟ့ၣ်ကူၣ်လၢ အဟဲလိၤလိၤန့ၣ် ကကီလၢ ပကဒိကနၣ် ဒီးမၤထွဲအီၤအဂီၢ် တကးဒံးဘၣ် ပသးဘၣ်ဒိသ့. ဘၣ်မနုၤအဃိလဲၣ်. ပသ့ၣ်ညါလီၤပသးလၢ ပတလၢတပှဲၤဘၣ်ဒၣ်လဲာ် ဖဲပှၤဟဲတဲဘၣ်ပှၤ တၢ်လၢပကဘၣ် ဘှီဘၣ်ထီၣ်က့ၤပသးအခါ ကီလၢပကတူၢ်လိာ်အီၤဒံး. (ဖး စံၣ်တဲၤတဲလီၤတၢ် ၇:၉.) ဒီးအဂၤတခါန့ၣ် ဘၣ်သ့ၣ်သ့ၣ် ပတဘၣ်သူၣ်ဘၣ်သး ပှၤလၢအဟ့ၣ်ကူၣ်ပှၤတဂၤ အတၢ်ပာ်သူၣ်ပာ်သး ဒီးကျဲလၢအဟ့ၣ်ကူၣ်ပှၤဘၣ်. ဒီးဘၣ်သ့ၣ်သ့ၣ် ပကဃု ပှၤလၢအဟဲဟ့ၣ်ကူၣ်ပှၤတဂၤ အတၢ်ကမၣ် ဒီးပကဆိကမိၣ်လၢ ‘အဟဲဟ့ၣ်ကူၣ်ယၤဘၣ်လဲၣ်, အတလီၤဆီဒီးယၤဒၢး.’ ဒီးအဂၤတခါန့ၣ် ပမ့ၢ်တဘၣ်သူၣ်ဘၣ်သး တၢ်ဟ့ၣ်ကူၣ်လၢ ပဒိးန့ၢ်ဘၣ်အီၤဘၣ်န့ၣ် ဘၣ်သ့ၣ်သ့ၣ် ပတဒိကနၣ်အီၤဘၣ် ဒီးပကလဲၤဃ့တၢ်ဟ့ၣ်ကူၣ်လၢ ပှၤအဂၤတဂၤအအိၣ်, မ့ၢ်လၢပမုၢ်လၢ်လၢ အဝဲကတဲပှၤ ဒ်ပအဲၣ်ဒိးနၢ်ဟူအသိးအဃိ.

တၢး၂၂.၀၂ ၁၂ ¶၁၂-၁၄

“ကနၣ်ပှၤကူၣ်တၢ်သ့ အတၢ်ကတိၤ”

^၁၂ ဒ်သိး ပကသးအိၣ်တူၢ်လိာ် တၢ်ဟ့ၣ်ကူၣ်အဂီၢ် ပကဘၣ်မၤဒ်လဲၣ်. ပကဘၣ် အိၣ်ဒီးတၢ်ဆီၣ်လီၤသး ဒီးသ့ၣ်နီၣ်ထီၣ်လၢ ပမ့ၢ်ပှၤတလၢတပှဲၤဘၣ် ဒီးပဟးမၤဘၣ်တၢ် တကျးဒးသ့. ဒ်ပတဲသကိးတ့ၢ်အသိး လၢအခီၣ်ထံးခါန့ၣ် စီၤယိၤဘး အိၣ်ဒီးတၢ်ထံၣ်လၢအကမၣ်. ဘၣ်ဆၣ် လၢခံအဘှီဘၣ်ထီၣ်က့ၤ အတၢ်ထံၣ် ဒီးယဟိဝၤယွၤ ဆိၣ်ဂ့ၤအီၤ. ဘၣ်မနုၤအဃိလဲၣ်. မ့ၢ်လၢအဆီၣ်လီၤအသးအဃိ. အဝဲအိၣ်ဒီး တၢ်ဆီၣ်လီၤသးခီဖျိ စီၤအလံဟူၤ မ့ၢ်ပှၤလၢ အညါဘီၣ်န့ၢ်အီၤ သနာ်က့ အတူၢ်လိာ်ဝဲ အတၢ်ဟ့ၣ်ကူၣ်. (ယိၤဘး ၃၂:၆, ၇) ဖဲပတူၢ်ဘၣ်လၢ ပှၤတကြၢးဟ့ၣ်ကူၣ်ပှၤဘၣ် မ့တမ့ၢ် ပှၤလၢအဟ့ၣ်ကူၣ်ပှၤတဂၤ အသးစၢ်န့ၢ်ဒံးပှၤအခါဒၣ်လဲာ် ပမ့ၢ်အိၣ်ဒီး တၢ်ဆီၣ်လီၤသးန့ၣ် ကညီလၢပကဒိကနၣ် တၢ်ဟ့ၣ်ကူၣ်လီၤ. တၢ်အိၣ်ဖှိၣ်သးပှၢ်တဂၤ လၢအအိၣ်လၢ ကီၢ်ခဲနဒၣ်န့ၣ် တဲဝဲလၢ “ပတထံၣ်လီၤပသးဒ် ပှၤဂၤထံၣ်ပှၤအသိးဘၣ် အဃိ ပှၤဟ့ၣ်ကူၣ်ပှၤ မ့ၢ်တအိၣ်ဘၣ်န့ၣ် ပတလဲၤထီၣ်လဲၤထီဘၣ်.” ပဝဲခဲလၢာ်န့ၣ် ပကဘၣ်မၤဒိၣ်ထီၣ်အါထီၣ် နီၢ်သးအတၢ်ဂ့ၤတၢ်ဝါတဖၣ် ဒီးပကဘၣ်ကဲထီၣ် ပှၤသိၣ်လိတၢ် ဒီးစံၣ်တဲၤတဲလီၤ တၢ်သးခုကစီၣ် လၢအဂ့ၤတဂၤလီၤ.—ဖး စံးထီၣ်ပတြၢၤ ၁၄၁:၅.

^၁၃ တၢ်ဟ့ၣ်ကူၣ်န့ၣ် ပကဘၣ်ထံၣ်အီၤဒ် အမ့ၢ်ကစၢ်ယွၤအတၢ်အဲၣ်. ယဟိဝၤယွၤ ဘၣ်သးဝဲလၢ ပကန့ၢ်ဘၣ် တၢ်လၢအဂ့ၤကတၢၢ် လၢပဂီၢ်. (ကတိၤဒိ ၄:၂၀-၂၂) အဃိ ဖဲအဟ့ၣ်ကူၣ်ပှၤ ခီဖျိလၢ အကလုၢ်ကထါ, လံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံ မ့တမ့ၢ် ပဒီပုၢ်ဝဲၢ်ခွါတဖၣ်အခါ မ့ၢ်ဒၣ်အပာ်ဖျါထီၣ်တၢ်အဲၣ် လၢပဖီခိၣ်လီၤ. ဧ့ၤဘြံၤ ၁၂:၉, ၁၀ တဲဝဲလၢ “ကစၢ်ယွၤန့ၣ် အဝဲသိၣ်က့ၤသီက့ၤပှၤ လၢပကန့ၢ်ဘျုးအဂီၢ်” လီၤ.

^၁၄ သးစၢၢ်ဆၢလၢ တၢ်ဂ့ၢ်တၢ်ကျိၤ, တဘၣ်သးစၢၢ်ဆၢ လၢကျဲလၢပှၤဟဲတဲနၤ ဒ်လဲၣ်ဒ်လဲၣ်တဂ့ၤ. တဘျီတခီၣ် ပကတူၢ်ဘၣ်လၢ ပှၤဟဲဟ့ၣ်ကူၣ်ပှၤ အကျိၤအကျဲန့ၣ် တဘၣ်ဘၣ်. ပှၤလၢအဟ့ၣ်ကူၣ်တၢ်တဂၤန့ၣ် ကြၢးဂုာ်ကျဲးစၢး အဂ့ၤကတၢၢ် ဒ်သိးပှၤတူၢ်လိာ် အတၢ်ဟ့ၣ်ကူၣ် ကညီအဂီၢ်. (ကလၤတံ ၆:၁) ဒီးဖဲပှၤဟ့ၣ်ကူၣ်ပှၤအခါ ပမ့ၢ်တူၢ်ဘၣ်လၢ ပှၤကြၢးဟ့ၣ်ကူၣ်ပှၤလၢ ကျဲအဂၤတဘိသနာ်က့ ပကဘၣ်သးစၢၢ်ဆၢ တၢ်ဂ့ၢ်တၢ်ကျိၤ လၢအတဲပှၤလီၤ. ပသံကွၢ်လီၤပသး ဒ်အံၤသ့. ‘ယမ့ၢ်တဘၣ်သူၣ်ဘၣ်သး ကျဲလၢအဟဲဟ့ၣ်ကူၣ်ယၤ သနာ်က့ တၢ်လၢအတဲဝဲန့ၣ် မ့ၢ်အဘၣ် အိၣ်တမံၤမံၤဧါ. မ့ၢ်ယကွၢ်ကပာ် ပှၤလၢအဟ့ၣ်ကူၣ်ယၤတဂၤ အတၢ်ဂံၢ်စၢ်ဘါစၢ် ဒီးယဟံးန့ၢ်တၢ်မၤလိလၢအအိၣ် ကသ့ဧါ.’ ဖဲပှၤဟ့ၣ်ကူၣ်ပှၤ တဘျီဂ့ၤတဘျီဂ့ၤအခါ ပမ့ၢ်ဂုာ်ကျဲးစၢးဟံးန့ၢ် တၢ်မၤလိန့ၣ် မ့ၢ်ဒၣ်ကျဲလၢ ပအိၣ်ဒီး တၢ်ကူၣ်သ့လီၤ.—ကတိၤဒိ ၁၅:၃၁.

တၢး၀၁-E ၅/၁၅ ၃၀ ¶၁-၂

‘ခီဖျိလၢတၢ်ကူၣ်သ့ အဃိ နသးသမူ ကထီ’

ပှၤလၢအအိၣ်ဒီး တၢ်ကူၣ်သ့တဂၤန့ၣ် ဖဲပှၤသိၣ်ဃီၣ်အီၤအခါ အတမၤဝဲဒ် ပှၤလၢအတဲဆဲးအဲးတၢ် တဂၤအသိးဘၣ်. စီၤၡလိၤမိၤတဲဝဲလၢ “သိၣ်ဃီၣ်ပှၤလၢ အကူၣ်တၢ်သ့တက့ၢ်, အကအဲၣ်နၤလီၤ. ဟံးစုနဲၣ်ကျဲ ပှၤကူၣ်တၢ်သ့တက့ၢ်, အတၢ်ကူၣ်သ့ ကအါထီၣ်လီၤ.” (ကတိၤဒိ ၉:၈, ၉) ပှၤလၢအအိၣ်ဒီး တၢ်ကူၣ်သ့တဂၤန့ၣ် အသ့ၣ်ညါဝဲလၢ “ဖဲပဘၣ် တၢ်သိၣ်က့ၤသီက့ၤပှၤအခါ အတဖျါဒ် တၢ်လၢအလီၤသးခုအသိး တဘျီဃီဘၣ်. အဘၣ်ပှၤဆါလီၤ. ဘၣ်ဆၣ် လၢခံန့ၣ် ပှၤလၢအဘၣ် တၢ်သိၣ်လိနဲၣ်လိအီၤ ခီဖျိလၢ တၢ်သိၣ်က့ၤသီက့ၤအဃိန့ၣ် ကဒိးန့ၢ်ဘၣ် တၢ်မုာ်တၢ်ခုၣ် ဒီးတၢ်အိၣ်မူလၢ အတီအလိၤလီၤ.” (ဧ့ၤဘြံၤ ၁၂:၁၁) အဃိ တၢ်ဟ့ၣ်ကူၣ်တဖၣ်န့ၣ် မ့ၢ်မၤဘၣ်ဒိပသးနာ်က့ မ့ၢ်ကဲဘျုးလၢ ပဂီၢ်န့ၣ် ပကြၢးတူၢ်လိာ်အီၤတမ့ၢ်ဧီၤ.

စီၤပၤလၢ အအိၣ်ဒီး တၢ်ကူၣ်သ့တဂၤအံၤ ဆဲးတဲဝဲလၢ“သိၣ်လိ ပှၤတီပှၤလိၤတက့ၢ်, အဝဲ ကမၤလိန့ၢ်တၢ် အါထီၣ်လီၤ.” (ကတိၤဒိ ၉:၉) ပသးနံၣ် မ့ၢ်အိၣ်ထဲလဲၣ်မ့ၢ်ဂ့ၤ ပမ့ၢ် ကူၣ်တၢ်သ့ထဲလဲၣ်မ့ၢ်ဂ့ၤ ပဘၣ်ဆဲးမၤလိတၢ်ထီဘိ. ဖဲပထံၣ်ဘၣ်လၢ ပှၤသးပှၢ်တဖၣ် တူၢ်လိာ်တၢ်မ့ၢ်တၢ်တီ ဒီးဟ့ၣ်လုၢ်ထီၣ်အသးလၢ ယဟိဝၤယွၤအအိၣ်အခါ ပသးခုဒိၣ်မး. အဃိ ပဝဲနာ်က့ ပကဆဲးမၤလိတၢ်ထီဘိ.

တၢး၀၁-E ၅/၁၅ ၃၀ ¶၅

‘ခီဖျိလၢတၢ်ကူၣ်သ့ အဃိ နသးသမူ ကထီ’

ပကကဲထီၣ် ပှၤလၢအကူၣ်တၢ်သ့အဂီၢ် ပကဘၣ်ဂုာ်ကျဲးစၢးလၢ ပနီၢ်ကစၢ်. ဘၣ်ဃးဒီး တၢ်ဂ့ၢ်အံၤန့ၣ် စီၤၡလိၤမိၤကွဲးဝဲလၢ “နမ့ၢ်ကဲထီၣ် ပှၤကူၣ်တၢ်သ့န့ၣ် နကဲထီၣ် ပှၤကူၣ်တၢ်သ့လၢ နနီၢ်ကစၢ် အဘျုးအဂီၢ်လီၤ. ဒီးနမ့မ့ၢ် ပှၤလၢအတဲဆဲးအဲးတၢ်န့ၣ် နကတူၢ်ဘၣ်တၢ် ထဲနၤတဂၤလီၤ.” (ကတိၤဒိ ၉:၁၂) ပမ့ၢ်ကဲပှၤလၢ အကူၣ်တၢ်သ့န့ၣ် ပကဒိးန့ၢ်ဘၣ်အဘျုး. ဘၣ်ဆၣ် ပမ့ၢ်ကဲပှၤလၢ အတဲဆဲးအဲးတၢ်န့ၣ် ပကထံၣ်ဘၣ် တၢ်ကီတၢ်ခဲ ခီဖျိလၢ ပနီၢ်ကစၢ်အဃိလီၤ. ပကကူးဘၣ် တၢ်လၢပဖှံလီၤအီၤ အဃိ မ်ပ ‘ဒိးပနၢ်လၢ တၢ်ကူၣ်သ့’ တက့ၢ်.—ကတိၤဒိ ၂:၂.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၃.၀၆ ၂၂-၂၃ ¶၉-၁၀

ပမ့ၢ်ပျံၤယဟိဝၤယွၤန့ၣ် ကကဲဘျုးလၢပဂီၢ်ထီဘိ

လါအ့ဖြ့ၣ် ၂၁-၂၇

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၀

ပအိၣ်ဒီး တၢ်သးခုနီၢ်ကီၢ် ကသ့ဒ်လဲၣ်

တၢး၀၁-E ၇/၁၅ ၂၅ ¶၁-၃

‘ပှၤတီပှၤလိၤန့ၣ် ကန့ၢ်ဘၣ်တၢ်ဆိၣ်ဂ့ၤတဖၣ်’

ပှၤတီပှၤလိၤတဂၤန့ၣ် အဘၣ်ဆိၣ်ဂ့ၤလၢ ကျဲလၢအဂၤတဘိဒံး.“ပှၤလၢအကၢၣ်န့ၣ် ကဖှီၣ်လီၤဝဲ မ့မ့ၢ် ပှၤလၢအခုန့ၣ် ကထူးထီၣ်တီၤထီၣ်လီၤ. ဖိခွါ လၢအကူၣ်တၢ်သ့န့ၣ် ထၢဖှိၣ်တၢ်လၢ အမဲထီၣ်သၣ်ထီၣ်ဖဲ တၢ်ကိၢ်ခါ အဆၢကတီၢ်လီၤ. မ့မ့ၢ် ဖိခွါလၢ အမံဝဲဖဲ ပှၤကူးတၢ် အဆၢကတီၢ်န့ၣ် ဒုးအိၣ်ထီၣ် တၢ်မဲာ်ဆှးလီၤ.”—ကတိၤဒိ ၁၀:၄, ၅.

စီၤပၤ အတၢ်ကတိၤအံၤန့ၣ် အကဲဘျုးလၢ ပှၤမၤတၢ်ဖိလၢ ပှၤကူးတၢ်အဆၢကတီၢ်အဂီၢ်. ဖဲပှၤကူးတၢ်အဆၢကတီၢ်န့ၣ် တမ့ၢ်ဝဲ တၢ်ဆၢကတီၢ်လၢ ပှၤကဘၣ်မံ ဒီးကၢၣ်အဆၢကတီၢ်ဘၣ်. မ့ၢ်ဝဲ တၢ်ဆၢကတီၢ်လၢ ပှၤကဘၣ်မၤတၢ်ဆူၣ်ဆူၣ် ဒီးဘၣ်မၤတၢ်ဖးယံာ် ဒီးပှၤကဘၣ်မၤအီၤလၢ အဆိအချ့.

ယ့ၣ်ၡူးတဲ အပျဲၢ်အဘီၣ်တဖၣ်လၢ “တၢ်လၢပှၤကဘၣ်ကူးအီၤန့ၣ် အိၣ်ဝဲအါမး ဘၣ်ဆၣ် ပှၤမၤတၢ်ဖိန့ၣ် အိၣ်ထဲစှၤဂၤလီၤ. အဃိ ဃ့ကညး စံာ်ကစၢ် [ယဟိဝၤယွၤ] လၢ အကဆှၢလီၤ ပှၤမၤတၢ်ဖိတဖၣ် ဒ်သိး ကဟဲကူးတၢ်အဂီၢ်တက့ၢ်.” (မးသဲ ၉:၃၅-၃၈) ယ့ၣ်ၡူး တအဲၣ်ဒိးတဲဝဲ ဘၣ်ဃးဒီးဘုဘၣ်. အဲၣ်ဒိးတဲဝဲ ဘၣ်ဃးဒီး ပှၤကညီ. ဖဲ ၂၀၀၀ နံၣ်န့ၣ် ပှၤဟဲထီၣ်ဝဲ ယ့ၣ်ၡူး အတၢ်သ့ၣ်နီၣ်ထီၣ်က့ၤအမူး ကအိၣ်လၢ ၁၄ ကကွဲၢ်ညါ. နီၣ်ဂံၢ်တခါအံၤန့ၣ် အအိၣ်ဝဲ ယဟိဝၤပှၤအုၣ်အသးတဖၣ် အနီၣ်ဂံၢ် ခံစးညါ. အဃိ လီၤဂာ်ဒ်သိး ‘စံာ်ပျီတဖၣ် ဘီထီၣ် လၢပှၤကကူးအီၤ အဂီၢ်လံ.’ (ယိၤဟၣ် ၄:၃၅) ပှၤလၢအအိၣ်လၢ တၢ်ဘူၣ်တၢ်ဘါအမ့ၢ်အတီတဖၣ်န့ၣ် အဃ့ကညး စံာ်ကစၢ်လၢ ကဆှၢလီၤအါထီၣ် ပှၤမၤတၢ်ဖိ. တကးဒံးဘၣ် အဝဲသ့ၣ် အနီၢ်ကစၢ်ဒၣ်ဝဲ ဂုာ်ကျဲးစၢးပၣ်ဃုာ်လၢ တၢ်ဒုးကဲထီၣ်ပှၤလၢ ခရံာ်အပျဲၢ်အဘီၣ်တၢ်မၤ. (မးသဲ ၂၈:၁၉, ၂၀) အဃိ ယဟိဝၤယွၤ ဆိၣ်ဂ့ၤ အတၢ်ဂုာ်ကျဲးစၢး ဒီးဖဲ တၢ်မၤအနံၣ် ၂၀၀၀ န့ၣ် ပှၤဒိးဘျၢထံ ကအိၣ်ဝဲ ၂၈၀,၀၀၀. အဝဲသ့ၣ် စ့ၢ်ကီး ဂုာ်ကျဲးစၢးကဲထီၣ်ဝဲ ပှၤလၢအသိၣ်လိ ကစၢ်ယွၤ အကလုၢ်ကထါ. အဃိ ပဝဲနာ်က့ မ်ပကပၣ်ဃုာ်လၢ တၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်တၢ်မၤ လၢလၢပှဲၤပှဲၤ. ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်သးခု ဒီးတၢ်သူၣ်မံသးမုာ်စ့ၢ်ကီး.

တၢး၀၁-E ၉/၁၅ ၂၄ ¶၃-၄

လဲၤတၢ်လၢ ‘ကျဲတီကျဲလိၤ’

စီၤၡလိၤမိၤ ပာ်ဖျါထီၣ်ဝဲလၢ တၢ်လၢအရ့ဒိၣ်န့ၣ် မ့ၢ်ဝဲ တၢ်တီတၢ်လိၤ. အဝဲတဲဝဲလၢ “ပှၤကဲဒိၣ် အတၢ်ထူးတၢ်တီၤတဖၣ်န့ၣ် လီၤဂာ်ဒ်သိးဒီး ဝ့ၢ်လၢ အအိၣ်ဒီး အဒူၣ်လၢအကျၢၤလီၤ. ပှၤဖှီၣ်ဖိ တုၤလၢတၢ်ဟးဂီၤ ခီဖျိလၢ အတၢ်ဖှီၣ်တၢ်ယာ် အဃိလီၤ. တၢ်လၢ ပှၤတီပှၤလိၤ မၤဝဲတဖၣ်န့ၣ် ကဲထီၣ်တၢ်မူလီၤ. ပှၤအၢပှၤသီ သူတၢ်လၢအအိၣ်ဒီးအဝဲသ့ၣ် ဒ်သိးကမၤ တၢ်ဒဲးဘးအဂီၢ်လီၤ.”—ကတိၤဒိ ၁၀:၁၅, ၁၆.

ပှၤလၢအအိၣ်လၢ ဝ့ၢ်လၢအကျၢၤန့ၣ် အကဒိးန့ၢ်ဘၣ် တၢ်ဒီသဒၢ ဖဲအကြၢး. ဒ်န့ၣ်အသိး တၢ်ထူးတၢ်တီၤန့ၣ် အကဲထီၣ် တၢ်ဒီသဒၢ ဖဲအကြၢးသ့. ပတၢ်ထူးတၢ်တီၤ မ့ၢ်တအိၣ်ဘၣ်န့ၣ် ဖဲပထံၣ်ဘၣ်ဒီး တၢ်အိၣ်သး သတူၢ်ကလာ်တမံၤမံၤအခါ ကဲထီၣ် တၢ်ကီတၢ်ခဲလၢပဂီၢ်သ့. (စံၣ်တဲၤတဲလီၤတၢ် ၇:၁၂) ဘၣ်ဆၣ် စီၤပၤလၢ အအိၣ်ဒီး တၢ်ကူၣ်သ့တဂၤအံၤန့ၣ် အပာ်ဖျါထီၣ်ဝဲလၢ တၢ်ထူးတၢ်တီၤမ့ၢ်ဂ့ၤ တၢ်ဖှီၣ်တၢ်ယာ်မ့ၢ်ဂ့ၤန့ၣ် တၢ်လီၤဘၣ်ယိၣ်အိၣ်ဝဲ. ပှၤလၢအထူးအတီၤတဂၤန့ၣ် ဘၣ်သ့ၣ်သ့ၣ် အဝဲကထံၣ်ဝဲ အတၢ်ထူးတၢ်တီၤဒ် “တၢ်ဒူၣ်လၢ အဒီသဒၢအီၤ” အဃိ ကသန့ၤအသးလၢ အတၢ်ထူးတၢ်တီၤ. (ကတိၤဒိ ၁၈:၁၁) ဒီးမ့မ့ၢ် ပှၤလၢ အဖှီၣ်အယာ်န့ၣ် အကဆိကမိၣ်လီၤအသးလၢ အတၢ်မုၢ်လၢ် တအိၣ်လၢၤဘၣ်. အဃိ ပှၤထူးပှၤတီၤမ့ၢ်ဂ့ၤ ပှၤဖှီၣ်မ့ၢ်ဂ့ၤ အမ့ၢ်အိၣ်ဒီး တၢ်ထံၣ်ဒ်န့ၣ်န့ၣ် အဝဲသ့ၣ် တဂုာ်ကျဲးစၢး ဒုးအိၣ်ထီၣ် အတၢ်ရ့လိာ်သးဒိး ယဟိဝၤယွၤလၢၤဘၣ်.

it-1-E ၃၄၀

တၢ်ဆိၣ်ဂ့ၤ

ယဟိဝၤယွၤ ဆိၣ်ဂ့ၤ ပှၤဟီၣ်ခိၣ်ဖိ. “ယဟိဝၤယွၤ အတၢ်ဆိၣ်ဂ့ၤန့ၣ် မ့ၢ်တၢ်လၢ အဒုးဘီၣ်ထီၣ်ညီထီၣ် ပှၤတၢ်အိၣ်မူ ဒီးအတမၤဘၣ်ဒိဘၣ်ထံး ပှၤနီတမံၤဘၣ်.” (ကတိၤဒိ ၁၀:၂၂) ယဟိဝၤယွၤ ဆိၣ်ဂ့ၤဝဲ ပှၤလၢ အဘၣ်သူၣ်ဘၣ်သးဝဲတဖၣ် ခီဖျိဒီသဒၢဝဲ, မၤစၢၤဝဲဒ်သိး အဝဲသ့ၣ် ကဘီၣ်ထီၣ်ညီထီၣ်, ဟံးစုနဲၣ်ကျဲဝဲ, မၤစၢၤဝဲဒ်သိး အတၢ်မၤကကဲထီၣ်လိၣ်ထီၣ် ဒီးဟ့ၣ်အဝဲသ့ၣ် တၢ်လၢအလိၣ်ဘၣ်တဖၣ်.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၆-E ၅/၁၅ ၃၀ ¶၁၈

အိၣ်ဒီးတၢ်သးတီအဃိ ဒိးန့ၢ်ဘၣ် တၢ်သးခု

^၁၈ “ယဟိဝၤယွၤ အတၢ်ဆိၣ်ဂ့ၤ” န့ၣ်မ့ၢ်ဝဲ တၢ်အါအါဂီၢ်ဂီၢ် လၢယဟိဝၤယွၤ ဟ့ၣ်လီၤပှၤလၢ နီၢ်သးတကပၤ. ဒီးတၢ်သ့ၣ်တဖၣ်အံၤ “အတမၤဘၣ်ဒိဘၣ်ထံး ပှၤနီတမံၤဘၣ်.” (ကတိၤဒိ ၁၀:၂၂) မ့မ့ၢ်ဒ်န့ၣ်န့ၣ် ဘၣ်မနုၤအဃိ ကစၢ်ယွၤ အခ့ပှၤလၢအအိၣ်ဒီး တၢ်သးတီတဖၣ် ထံၣ်ဘၣ်ဒီး တၢ်ကီတၢ်ခဲတဖၣ်လဲၣ်. ဘၣ်မနုၤအဃိ ပှၤထံၣ်ဘၣ် တၢ်ကီတၢ်ခဲလဲၣ်န့ၣ် တၢ်ဂ့ၢ်အိၣ်ဝဲသၢထံၣ်. (၁) ပတလၢတပှဲၤဘၣ်အဃိ ပမၤကမၣ်ဘၣ်တၢ်. (၁ မိၤၡ့ ၆:၅; ၈:၂၁; ယၤကိာ် ၁:၁၄, ၁၅) (၂) မုၣ်ကီၤလံၢ် ဒီးတၢ်ဝံတၢ်နါတဖၣ်. (အ့းဖ့းစူး ၆:၁၁, ၁၂) (၃) ဟီၣ်ခိၣ်လၢအပှဲၤဒီး တၢ်အၢတၢ်သီ. (ယိၤဟၣ် ၁၅:၁၉) ယဟိဝၤယွၤ ပျဲဝဲလၢ ပကထံၣ်ဘၣ် တၢ်အၢတၢ်သီန့ၣ် အခီပညီတမ့ၢ်လၢ အဝဲဒုးအိၣ်ထီၣ် တၢ်အၢတၢ်သီဘၣ်. နီၢ်ကီၢ်န့ၣ် “တၢ်ဟ့ၣ်လၢအဂ့ၤ ဒီးတၢ်ဟ့ၣ်လၢအလၢအပှဲၤ ခဲလၢာ်န့ၣ် ဟဲလၢထးခီ ဒီးဟဲလီၤဝဲလၢ ပၢ်လၢအတ့လီၤ မူခိၣ် အတၢ်ကပီၤတဖၣ် အအိၣ်လီၤ.” (ယၤကိာ် ၁:၁၇) ယဟိဝၤယွၤ အတၢ်ဆိၣ်ဂ့ၤန့ၣ် တမၤဘၣ်ဒိပှၤ နီတဘျီဘၣ်.

လါအ့ဖြ့ၣ် ၂၈–လါမ့ၤ ၄

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၁

ပလီၢ်သးလၢ နတၢ်စံးတၢ်ကတိၤ

တၢး၀၂-E ၅/၁၅ ၂၆ ¶၄

တၢ်သးတီ ကဟံးစုနဲၣ်ကျဲဝဲ ပှၤတီပှၤလိၤ

ပှၤတီပှၤလိၤလၢ အအိၣ်ဒီးတၢ်သးတီန့ၣ် အကဲဘျုးလၢ ပှၤဂၤအဂီၢ်သ့. ပှၤလၢအမၤတၢ်ကမၣ်န့ၣ် အမၤဘၣ်ဒိ ပှၤဂၤသ့. အံၣ်စရ့လး အစီၤပၤတဂၤ တဲဝဲလၢ “ပှၤလၢအစူးကွံာ်ညိကွံာ်တၢ်နာ်န့ၣ် အတၢ်ကတိၤ မၤဟးဂီၤ ပှၤလၢအဃၢၤလီၤ. ပှၤတီပှၤလိၤန့ၣ် အိၣ်ဒီးတၢ်သ့ၣ်ညါအဃိ အဝဲသ့ၣ် ကပူၤဖျဲးလီၤ.” (ကတိၤဒိ ၁၁:၉) တၢ်လံၣ်တၢ်လီ, တၢ်တဲဟးဂီၤပှၤဂ့ၢ်, တၢ်ကတိၤလၢ အလီၤသးဘၣ်အၢ ဒီးအတကဲဘျုးဘၣ်တဖၣ်န့ၣ် အမၤဘၣ်ဒိပှၤဂၤသ့. မ့မ့ၢ် ပှၤတီပှၤလိၤန့ၣ် အတမ့ၢ်ဒ်န့ၢ်ဘၣ်. အဝဲတဲတၢ်ကတိၤလၢ အစီဆှံ ဒီးတချုးလၢ အတဲတၢ်အခါ အဆိကမိၣ်ထံဝဲဂ့ၤဂ့ၤ ဒီးအဆိကမိၣ်န့ၢ်တၢ်လၢ ပှၤဂၤအဂီၢ်. ပှၤမ့ၢ်တဲဟးဂီၤအီၤနာ်က့ အတၢ်သးတီန့ၣ် ကဲထီၣ်တၢ်အုၣ်သးလၢ ပှၤလၢအတဲဟးဂီၤအီၤတဖၣ်န့ၣ် တဲတၢ်တဘၣ်ဘၣ်. အဃိ လီၤဂာ်ဒ်သိး အတၢ်သ့ၣ်ညါ မၤပူၤဖျဲးအီၤ.

တၢး၀၂-E ၅/၁၅ ၂၇ ¶၂-၃

တၢ်သးတီ ကဟံးစုနဲၣ်ကျဲ ပှၤတီပှၤလိၤ

ပှၤဝ့ၢ်ဖိတဖၣ်လၢ အမၤတၢ်တီတီလိၤလိၤန့ၣ် ကဒုးအိၣ်ထီၣ် တၢ်ဃူတၢ်ဖိး. ဒီးအဝဲသ့ၣ် ကမၤတၢ်လၢ အကဲဘျုးလၢ ဝ့ၢ်ဒီးပှၤဂၤအဂီၢ်. အဃိ ဝ့ၢ်န့ၣ် တၢ်လဲၤထီၣ်လဲၤထီကအိၣ်ဝဲ. ဘၣ်ဆၣ် ပှၤလၢအတဲဟးဂီၤတၢ်, တဲဆါတၢ် ဒီးတဲတၢ်လၢအကမၣ်န့ၣ် ကဒုးအိၣ်ထီၣ် တၢ်လီၤမုၢ်လီၤဖး ဒီးတၢ်ကီတၢ်ခဲ. လီၤဆီဒၣ်တၢ် ပှၤလၢအအိၣ်ဒီး တၢ်စိတၢ်ကမီၤတဂၤ မ့ၢ်တဲတၢ်ဒ်န့ၣ်န့ၣ် တၢ်အိၣ်သး ကဟဲကဲထီၣ်ဝဲဒ်န့ၣ်. အဃိ ဝ့ၢ်တဖျၢၣ်န့ၣ် အကအိၣ်ဒီး တၢ်သဘံၣ်သဘုၣ်, တၢ်တတီတလိၤဘၣ်, တၢ်သကဲာ်ပဝးလီၤရၢၢ် ဒီးစံပွါယ့ကလီၤ.

တၢ်ဟံးစုနဲၣ်ကျဲလၢ ကတိၤဒိ ၁၁:၁၁ န့ၣ် အဘၣ်ထွဲလိာ်သးဒီး ယဟိဝၤယွၤ အပှၤဂီၢ်မုၢ်. အဝဲသ့ၣ် အတၢ်အိၣ်ဖှိၣ်န့ၣ် ပထိၣ်သတြီၤအီၤ ဒ်ဝ့ၢ်တဖျၢၣ်အသိးသ့. လၢတၢ်အိၣ်ဖှိၣ်ပူၤန့ၣ် အအိၣ်ဒီးပှၤလၢအနီၢ်သးဆူၣ်တဖၣ် လၢအအိၣ်ဒီး တၢ်တီတၢ်လိၤ. အဃိ တၢ်အိၣ်ဖှိၣ်န့ၣ် အိၣ်ဒီး တၢ်သးခု တၢ်သူၣ်ဆူၣ်သးဆူၣ်, မၤစၢၤလိာ်သးတဂၤဒီးတဂၤ ဒီးမၤလၤကပီၤယဟိဝၤယွၤ. အဃိ ယဟိဝၤယွၤ ဆိၣ်ဂ့ၤဝဲ တၢ်အိၣ်ဖှိၣ် ဒီးတၢ်အိၣ်ဖှိၣ်န့ၣ် လဲၤထီၣ်လဲၤထီဝဲလၢ နီၢ်သးတခီ. ဘၣ်ဆၣ် ပှၤတနီၤန့ၣ် ဘၣ်ဃးဒီး တၢ်လၢပှၤမၤကဲထီၣ်လိၣ်ထီၣ်တဖၣ်န့ၣ် အဝဲသ့ၣ် တသးမံဘၣ်. အဝဲသ့ၣ် သးထီၣ်တၢ် ထံၣ်တၢ်ကမၣ် ဒီးတဲဟးဂီၤတၢ်. အဝဲသ့ၣ်န့ၣ် လီၤဂာ်ဒ် “တၢ်အဂံၢ်လၢ အအိၣ်ဒီး တၢ်စုၣ်တၢ်ပျၢ်.” အဃိ အဝဲသ့ၣ် အတၢ်ထံၣ်န့ၣ် အမၤဘၣ်ဒိပှၤဂၤ သ့စ့ၢ်ကီး. (ဧ့ၤဘြံၤ ၁၂:၁၅) အဝဲသ့ၣ် တဲဝဲလၢ တၢ်အိၣ်ဖှိၣ် မ့တမ့ၢ် တၢ်အိၣ်ဖှိၣ်သးပှၢ်တဖၣ်န့ၣ် အမၤတၢ် တတီတလီၤဘၣ် ဒီးအအိၣ်ဒီး ကလုာ်ဒူၣ် တၢ်ကွၢ်တလီၤလိာ်သး . အဝဲသ့ၣ် အတၢ်ကတိၤတဖၣ်အံၤန့ၣ် အဒုးကဲထီၣ် တၢ်လီၤမုၢ်လီၤဖးလၢ တၢ်အိၣ်ဖှိၣ်ပူၤသ့. အဃိ ပတကြၢးဒိကနၣ် အဝဲသ့ၣ် အတၢ်ကတိၤဘၣ်. ပကြၢးဂုာ်ကျဲးစၢး ဒ်သိးဒီး ကကဲထီၣ်ပှၤလၢအနီၢ်သးဆူၣ် ဒီးအဆီၣ်ထွဲမၤစၢၤ တၢ်အိၣ်ဖှိၣ် ဒ်သိးတၢ်အိၣ်ဖှိၣ် ကအိၣ်ဒီး တၢ်ဃူတၢ်ဖိး ဒီးတၢ်မုာ်တၢ်ခုၣ်.

တၢး၂၀.၀၃ ၂၂ ¶၁၂-၁၃

ပကြၢးတဲတၢ် လၢဆၢကတီၢ်ဖဲလဲၣ်

^၁၂ နမ့ၢ်ထံၣ်ဘၣ်ဒီး ဒီပုၢ်ဝဲၢ်မုၣ် မ့တမ့ၢ် ဒီပုၢ်ဝဲၢ်ခွါတဂၤဂၤ လၢအသ့ၣ်ညါ တၢ်ဂ့ၢ်ခူသူၣ်န့ၣ် နကမၤဒ်လဲၣ်. အဒိ နမ့ၢ်ထံၣ်ဘၣ်ဒီး ပှၤတဂၤဂၤ လၢအအိၣ်လၢ ထံကီၢ်လၢပှၤတြီဃာ် ပတၢ်ဖံးတၢ်မၤန့ၣ် မ့ၢ်နကအဲၣ်ဒိးသံကွၢ်အီၤလၢ ဖဲအဝဲအထံအကီၢ်န့ၣ် ပှၤမၤပတၢ်ဖံးတၢ်မၤတဖၣ် ဒ်လဲၣ်န့ၣ်ဧါ. တမ့ၢ်လၢ နအဲၣ်ဒိးမၤဘၣ်ဒိအီၤအဃိ နသံကွၢ်အီၤဘၣ်. ပအဲၣ်ပဒီပုၢ်ဝဲၢ်မုၣ်ခွါတဖၣ် ဒီးပအဲၣ်ဒိးသ့ၣ်ညါ တၢ်လၢအကဲထီၣ်အသးဒီး အဝဲသ့ၣ်န့ၣ်လီၤ. ဒီးပအဲၣ်ဒိး ဃ့ထုကဖၣ်န့ၢ်တၢ်လၢအဂီၢ် လီၤတံၢ်လီၤဆဲးအဃိ ပကအဲၣ်ဒိးသံကွၢ်အီၤဒ်န့ၣ်လီၤ. ဘၣ်ဆၣ် ဖဲန့ၣ်အဆၢကတီၢ် ပကဘၣ်ပၢၤဃာ် ပထးခိၣ်လီၤ. ပမ့ၢ်မၢဆူၣ်ပှၤတဂၤဂၤ လၢအသ့ၣ်ညါပာ်စၢၤ တၢ်ဂ့ၢ်ခူသူၣ်န့ၣ် မ့ၢ်ဒၣ်ပပာ်ဖျါထီၣ်လၢ ပတအဲၣ်ပဒီပုၢ်ဝဲၢ်တဂၤအံၤ ဒီးပဒီပုၢ်ဝဲၢ်မုၣ်ခွါအဂၤလၢ အနာ်လၢ အကပာ်ခူသူၣ် တၢ်ဂ့ၢ်တဖၣ်အံၤန့ၣ်လီၤ. ပဝဲတဂၤဂ့ၤတဂၤဂ့ၤ ပတအဲၣ်ဒိးမၤအါထီၣ် ပဒီပုၢ်ဝဲၢ်မုၣ်ခွါလၢ အအိၣ်လၢတၢ်လီၢ်လၢ ပှၤတြီဃာ်ပတၢ်ဖံးတၢ်မၤတဖၣ် အတၢ်ကီတၢ်ခဲဘၣ်. ဒ်န့ၣ်အသိး ဒီပုၢ်ဝဲၢ်မုၣ်ခွါ လၢအအိၣ်လၢ ထံကီၢ်ဖဲန့ၣ်တဖၣ်စ့ၢ်ကီး တမ့ၢ်လၢကတဲဘၣ်ပှၤဂၤလၢ ပဒီပုၢ်ဝဲၢ်လၢ အအိၣ်ဖဲန့ၣ်တဖၣ် ဟးစံၣ်တဲၤတဲလီၤတၢ် မ့တမ့ၢ် မၤပတၢ်ဖံးတၢ်မၤတဖၣ် ဒ်လဲၣ်န့ၣ်ဘၣ်.

^၁၃ လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်မၤထွဲ တၢ်ဟ့ၣ်ကူၣ်ဖဲ ကတိၤဒိ ၁၁:၁၃ အပူၤလီၤ. (ဖးတက့ၢ်.) ပှၤလၢအတကြၢးသ့ၣ်ညါ တၢ်ဂ့ၢ်တၢ်ကျိၤတဖၣ်န့ၣ် အဝဲသ့ၣ် တတဲပၠးဝဲဘၣ်. လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ် လၢအဆီဟံၣ်ဆီဃီန့ၣ် ကကီလၢ အဝဲသ့ၣ်အဂီၢ်တစဲးလီၤ. ပှၤနီၢ်ဒီမါဝၤတဖၣ်န့ၣ် မၤဂၢၢ်ကျၢၤထီၣ်အတၢ်ရ့လိာ်သး ခီဖျိတဲသကိး အတၢ်ဆိကမိၣ်, အတၢ်တူၢ်ဘၣ် ဒီးအတၢ်ကိၢ်တၢ်ဂီၤတဖၣ်လီၤ. ဘၣ်ဆၣ် တၢ်အိၣ်ဖှိၣ်သးပှၢ်တဖၣ်န့ၣ် တဘၣ်တဲဘၣ်အမါလၢ ပှၤအဂၤလၢ တၢ်အိၣ်ဖှိၣ်ပူၤတဖၣ် အတၢ်ဂ့ၢ်ခူသူၣ်ဘၣ်. အဝဲသ့ၣ် မ့ၢ်တဲဝဲန့ၣ် ဒီပုၢ်ဝဲၢ်တဖၣ်အံၤ နာ်န့ၢ်အီၤတသ့လၢၤဘၣ် ဒီးကမၤဘၣ်ဒိ အမံၤဂ့ၤသၣ်ဂ့ၤလီၤ. ပှၤလၢအဒိးန့ၢ်ဘၣ်မူဒါလၢ တၢ်အိၣ်ဖှိၣ်ပူၤတဖၣ်န့ၣ် တကြၢးမ့ၢ်ပှၤလၢ အအိၣ်ဒီး “အပျ့ၤခံဘ့ၣ်” မ့တမ့ၢ် ပှၤလၢအလံၣ်တၢ်လီတၢ်ဘၣ်. (၁ တံၤမသ့း ၃:၈) အခီပညီန့ၣ် အဝဲသ့ၣ် တကြၢးတဲလံၣ်တဲလီ မ့တမ့ၢ် တဲအီၣ်ပှၤဂၤအဂ့ၢ်ဘၣ်. တၢ်အိၣ်ဖှိၣ်သးပှၢ်တဂၤ မ့ၢ်အဲၣ်အမါန့ၣ် အဝဲတတဲဘၣ်အမါလၢ တၢ်ဂ့ၢ်တၢ်ကျိၤလၢ အမါတကြၢးသ့ၣ်ညါဝဲန့ၣ်ဘၣ်.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၈.၁၂ ၃၂ ¶၄-၆

တၢ်သူၣ်ကညီၤသးကညီၤ တၢ်ဂ့ၤတၢ်ဝါတခါလၢ ဘၣ်တၢ်ပာ်ဖျါထီၣ်အီၤလၢ တၢ်ကတိၤဒီးတၢ်မၤ

လံာ်စီဆှံတဲဝဲလၢ “ဖဲနသးကညီၤတၢ်န့ၣ်, နမၤဘျုးမၤဖှိၣ်လီၤနသးတမံၤလီၤ.” (ကတိၤဒိ ၁၁:၁၇, ခ့ခါစှီၤကျိာ်) ပှၤအါဂၤန့ၣ် အဲၣ်ဒိးအိၣ်ဒီးပှၤလၢ အသးကညီၤတၢ် ဒီးအဝဲသ့ၣ်စ့ၢ်ကီး က့ၤရ့ကဒါက့ၤ ပှၤလၢအသးကညီၤတၢ်တဂၤ လၢတၢ်သးကညီၤအပူၤလီၤ. ယ့ၣ်ၡူးတဲဝဲလၢ “ဒ်သုဃီၣ်ဟ့ၣ်တၢ်အသိးန့ၣ်, တၢ်ကဃီၣ်ဟ့ၣ်က့ၤသုလီၤ.” (လူၤကၣ် ၆:၃၈) လၢတၢ်န့ၣ်အဃိ ပှၤလၢအအိၣ်ဒီးတၢ်သးကညီၤတဖၣ်န့ၣ် ကန့ၢ်ဘၣ်အတံၤသကိးလၢအဂ့ၤအဂီၢ် တကီဘၣ် ဒီးအဝဲသ့ၣ် ဆဲးပၢၤဃာ်အတၢ်ရ့လိာ်သး ကန့ၢ်ဝဲလီၤ.

တၢ်မၢဖိပီလူးတဲဝဲ အ့းဖ့းစူးတၢ်အိၣ်ဖှိၣ်ဖိတဖၣ်လၢ “ဝံသးစူၤလိာ်သုသး, သူၣ်ကညီၤသးကညီၤလိာ်သုသး, ပျၢ်လိာ်သုတၢ်” တက့ၢ်. (အ့းဖ့းစူး ၄:၃၂) ပှၤကိးဂၤဒဲး မ့ၢ်အိၣ်ဒီးတၢ်သးကညီၤန့ၣ် တၢ်အိၣ်ဖှိၣ်ကဂၢၢ်ထီၣ်ကျၢၤထီၣ်ဒီး တၢ်ဃူတၢ်ဖိးကအါထီၣ်ဝဲလီၤ. လၢတၢ်န့ၣ်အဃိ ပတဘၣ်စံၣ်ညီၣ်ပဒီပုၢ်ဝဲၢ်တဖၣ်, တဲဟးဂီၤအဝဲသ့ၣ်အဂ့ၢ်, တဲတၢ်တမံၤမံၤလၢ အဆူၣ်အကိၤ မ့တမ့ၢ် တဲလီၤနံၤတၢ်တမံၤမံၤ လၢကမၤဘၣ်ဒိ အဝဲသ့ၣ်န့ၣ်ဘၣ်. လၢတၢ်န့ၣ်အလီၢ် ပအဲၣ်ဒိးတဲတၢ်ကတိၤလၢ ကကဲထီၣ်တၢ်မၤစၢၤ ဒီးတၢ်ဂံၢ်တၢ်ဘါလၢ ပှၤဂၤအဂီၢ်လီၤ. (ကတိၤဒိ ၁၂:၁၈) ပမ့ၢ်မၤဒ်န့ၣ်န့ၣ် ပဒီပုၢ်ဝဲၢ်လၢ တၢ်အိၣ်ဖှိၣ်အပူၤခဲလၢာ် ကမၤယဟိဝၤယွၤ အတၢ်မၤလၢတၢ်သးခုအပူၤလီၤ.

ဒ်ပမၤလိဘၣ်အသိး တၢ်သးကညီၤန့ၣ် မ့ၢ်ဝဲတၢ်ဂ့ၤတၢ်ဝါတခါလၢ ပကဘၣ်ပာ်ဖျါထီၣ်အီၤလၢ ပတၢ်ကတိၤဒီး တၢ်မၤန့ၣ်လီၤ. ပမ့ၢ်အိၣ်ဒီး တၢ်သးကညီၤန့ၣ်မ့ၢ်ဝဲ ပကွၢ်လိမၤဒိး ယဟိဝၤယွၤလၢ အအိၣ်ဒီးတၢ်အဲၣ်ဒီး အသးအိၣ်ဟ့ၣ်တၢ်န့ၣ်လီၤ. (အ့းဖ့းစူး ၅:၁) ပမ့ၢ်အိၣ်ဒီးတၢ်သးကညီၤန့ၣ် ကမၤဂၢၢ်ကျၢၤထီၣ် ပတၢ်အိၣ်ဖှိၣ် ဒီးကထိၣ်ဟူးထိၣ်ဂဲၤထီၣ် ပှၤဂၤလၢ ကမၤယဟိဝၤယွၤ အတၢ်မၤအဂီၢ်လီၤ. လၢတၢ်န့ၣ်အဃိ တသ့ဖဲအသ့ မ်ပပာ်ဖျါထီၣ်တၢ်သးကညီၤ ဒ်သိးပှၤအဂၤတဖၣ်ကထံၣ်လၢ ယဟိဝၤပှၤအုၣ်အသးတဖၣ်န့ၣ် မ့ၢ်ပှၤလၢအအိၣ်ဒီးတၢ်သးကညီၤန့ၣ်တက့ၢ်.

[တၢ်ဂ့ၢ်အဘျဲၣ်]

a တၢ်ကလုၢ်န့ၣ် တမ့ၢ်ထဲ မူခိၣ်ကလူးတဂၤလၢ အတဲတၢ်လၢ ကစၢ်ယွၤအခၢၣ်စးဘၣ်. အဒိ, ကစၢ်ယွၤသူဝဲ အဖိခွါဝဲၢ်ကိ တကးဒံးဘၣ် အသူဝဲမူခိၣ်ကလူးအဂၤတဖၣ် လၢအကတဲဘၣ်ဝဲ ပှၤအံၣ်စရ့လးဖိတဖၣ် လၢစီၤမိၤၡ့အတၢ်သိၣ်တၢ်သီလီၤ.—မၤတၢ် ၇:၅၃; ကလၤတံ ၃:၁၉; ဧ့ၤဘြံၤ ၂:၂, ၃.