ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
© 2025 Watch Tower Bible and Tract Society of Pennsylvania
လါမ့ၤ ၅-၁၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၂
ပှၤလၢအမၤတၢ် ဆူၣ်ဆူၣ်န့ၣ် ကဒိးန့ၢ်ဘၣ် တၢ်ဆိၣ်ဂ့ၤ
တၢ်ဂ့ၤတၢ်ဝါတခါလၢ အလုၢ်ဒိၣ်ပှ့ၤဒိၣ်န့ၢ်ဒံး တၢ်မျၢ်ပလဲ
ယဟိဝၤယွၤ အခ့အပှၤတနီၤ ဒ်သိးအဝဲသ့ၣ် ကန့ၢ်ဘၣ်စ့လၢလၢလီၢ်လီၢ်လၢ ကလုၢ်အီၣ်လုၢ်အီဝဲ အဟံၣ်ဖိဃီဖိအဂီၢ် ကကီဝဲလီၤ. ဘၣ်ဆၣ်ဒ်သိး အဝဲသ့ၣ်ကဒိးန့ၢ်ဘၣ် ကျိၣ်စ့အဂီၢ် တလံၣ်အီၣ်လီအီၣ်တၢ်ဘၣ်, လၢတၢ်န့ၣ်အလီၢ် အဝဲသ့ၣ် ခုဒီးမၤတၢ်ဆူၣ်ဆူၣ်လီၤ. ခီဖျိလၢ အဝဲသ့ၣ် မၤတၢ်တီတီလိၤလိၤအဃိ ပာ်ဖျါထီၣ်ဝဲ ကစၢ်ယွၤ အတၢ်ဂ့ၤတၢ်ဝါလၢ အပၣ်ဃုာ်ဒီး တၢ်မၤတၢ်တီတီလိၤလိၤလၢ အလုၢ်ဒိၣ်ပှ့ၤဒိၣ်န့ၢ်ဒံး တၢ်ထူးတၢ်တီၤကိးမံၤဒဲးန့ၣ်လီၤ.—ကတိၤဒိ ၁၂:၂၄; အ့းဖ့းစူး ၄:၂၈.
တၢး၁၅-E ၂/၁ ၅ ¶၄-၆
နမၤတၢ်ဆူၣ်ဆူၣ်လၢ တၢ်သးခုအပူၤ ကသ့ဒ်လဲၣ်
ဖဲပထံၣ်ဘၣ်လၢ ပတၢ်မၤ ကဲဘျုးလၢ ပှၤဂၤအဂီၢ်အခါ ပသးခု. ယ့ၣ်ၡူးတဲဝဲလၢ “ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ်ဒံးလီၤ.” (မၤတၢ် ၂၀:၃၅) ပမ့ၢ်မၤတၢ်ဆူၣ်ဆူၣ်န့ၣ် အကဲဘျုးလၢ ပှၤပှ့ၤတၢ်တဖၣ်အဂီၢ် ဒီးတၢ်မၤခိၣ်အဂီၢ်. တကးဒံးဘၣ် အကဲဘျုးလၢ ပဟံၣ်ဖိဃီဖိ ဒီးပှၤအဂၤလၢ အလိၣ်ဘၣ်တၢ်မၤစၢၤတဖၣ် အဂီၢ်စ့ၢ်ကီး.
လၢပဟံၣ်ဖိဃီဖိအဂီၢ်. ဟံၣ်ခိၣ်တဂၤ မ့ၢ်မၤတၢ်ဆူၣ်ဆူၣ်န့ၣ် ကကဲဘျုးလၢ ကျဲခံဘိ. တၢ, အဝဲမၤတၢ်ဆူၣ်ဆူၣ်အဃိ အဟံၣ်ဖိဃီဖိတဖၣ် ဒိးန့ၢ်ဘၣ် တၢ်လၢအလိၣ်ဘၣ်လၢ နီၢ်ခိတခီ. ဒ်သိးဒီး တၢ်အီၣ်တၢ်အီ, တၢ်ကူတၢ်သိး တၢ်အိၣ်တၢ်ဆိးအလီၢ်. အဃိလီၤဂာ်ဒ်သိး အဝဲမၤလၢပှဲၤအမူဒါလၢ ကစၢ်ယွၤဟ့ၣ်လီၤအီၤ လၢအက “အံးထွဲကွၢ်ထွဲ ပှၤလၢ အဘၣ်ဃးဒီးအီၤတဖၣ်.” (၁ တံၤ ၅:၈) ခံ, ခီဖျိလၢ အမၤတၢ်ဆူၣ်ဆူၣ်အဃိ အဒိအတဲာ်န့ၣ် ကကဲဘျုးလၢ အဟံၣ်ဖိဃီဖိတဖၣ်အဂီၢ်. ဒီပုၢ်ဝဲၢ် ၡ့ တဲဝဲလၢ “ယပါန့ၣ် အမၤတၢ်ဆူၣ်မးအဃိ အကဲပှၤလၢ အဒိဂ့ၤတဲာ်ဘၣ်လၢယဂီၢ်. အဝဲမၤတၢ် တီတီလိၤလိၤ လၢအတၢ်အိၣ်မူဒီတစိၤ. အဝဲမၤဝဲ လဲးသမါတၢ်မၤ. ယန့ၢ်ဘၣ်တၢ်မၤလိလၢ ယမ့ၢ်မၤတၢ်လၢ ယနီၢ်ကစၢ် ဒီးတ့ထီၣ်ဘှီထီၣ်တၢ်န့ၣ် ကကဲဘျုးလၢ ပှၤဂၤအဂီၢ်.”
လၢပှၤလၢ အလိၣ်ဘၣ်တၢ်မၤစၢၤအဂီၢ်. စီၤပီလူး ဟ့ၣ်ကူၣ်ဝဲခရံာ်ဖိတဖၣ် လၢက “မၤတၢ်ဆူၣ်ဆူၣ် . . . ဒ်သိး အကအိၣ်ဒီးတၢ်တမံၤမံၤလၢ ကဟ့ၣ်လီၤပှၤလၢ အလိၣ်ဘၣ် တၢ်မၤစၢၤအဂီၢ်.” (အ့းဖ့းစူး ၄:၂၈) ပမ့ၢ် မၤတၢ်ဆူၣ်ဆူၣ်လၢ ပနီၢ်ကစၢ် ဒီးပဟံၣ်ဖိဃီဖိအဂီၢ်န့ၣ် ဘၣ်သ့ၣ်သ့ၣ် ပမၤစၢၤဘၣ် ပှၤလၢ အတၢ်တအိၣ်အါအါဘၣ် ကသ့ဝဲစ့ၢ်ကီး. (ကတိၤဒိ ၃:၂၇) ပမ့ၢ်မၤတၢ်ဆူၣ်ဆူၣ်န့ၣ် ပမၤစၢၤပှၤဂၤကသ့ အဃိ ပကဒိးန့ၢ်ဘၣ်တၢ်သးခု ခီဖျိပဟ့ၣ်တၢ်အဃိ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ijwyp-E တၢ်ကွဲးဖုၣ် ၉၅ ¶၁၀-၁၁
ယတူၢ်တၢ်န့ၢ်ထဲလဲၣ်
● ဆိကမိၣ်ထံ ဘၣ်ဃးဒီး နတၢ်ကီတၢ်ခဲန့ၣ် အရ့ဒိၣ်ဝဲထဲလဲၣ်. သ့ၣ်ညါနီၤဖး နတၢ်ကီတၢ်ခဲန့ၣ် မ့ၢ်အကဲဝဲ တၢ်ကီတၢ်ခဲဖးဒိၣ်ဧါ မ့တမ့ၢ် တၢ်ကီတၢ်ခဲ ဆံးဆံးဖိဧါ. လံာ်စီဆှံ တဲဝဲလၢ “ပှၤဟးဂီၤဖိ ပာ်ဖျါထီၣ် အတၢ်သးအ့န့ တဘျီဃီ, မ့မ့ၢ် ပှၤလၢအအိၣ်ဒီး တၢ်ကူၣ်သ့န့ၣ် ကွၢ်ကပာ်ကွံာ်ဝဲ တၢ်တဲဆါလီၤ.” (ကတိၤဒိ ၁၂:၁၆) တၢ်ကီတၢ်ခဲ ကိးမံၤဒဲးန့ၣ် အမၤဘၣ်ဒိနၤ အါတလၢ တသ့ဘၣ်.
“ဖိသၣ်လၢကၠိတဖၣ်န့ၣ် တၢ်ဂ့ၢ်မ့တမ့ၢ် တၢ်နီတမံၤသနာ်က့ အဝဲသ့ၣ် မၤဒိၣ်ထီၣ်ဝဲ. အသကိးလၢ စိၤၡၢၤမံဒံယါ အပူၤတဖၣ် မ့ၢ်တဲဆၢက့ၤ တမံၤမံၤန့ၣ် တၢ်ဂ့ၢ်ကီတခါအံၤန့ၣ် နးဒိၣ်ထီၣ်ဝဲ. အဃိ တၢ်ဂ့ၢ်ကီတခါအံၤ အရ့ဒိၣ်ဧါ တဒိၣ်ဧါန့ၣ် အဝဲသ့ၣ် တယာ်ဝဲတဘၣ်လၢၤဘၣ်.”—ကၠိနံၤ.
ijwfq တၢ်ဂ့ၢ်ဖုၣ်ကိာ် ၃
ယဟိဝၤပှၤအုၣ်အသးတဖၣ် နာ်ဝဲလၢထဲဒၣ် အဝဲသ့ၣ်အတၢ်ဘူၣ်တၢ်ဘါန့ၣ် အမ့ၢ်အတီလီၤဧါ
ပှၤလၢအသးဆူၣ်လၢတၢ်ဘူၣ်တၢ်ဘါတဖၣ် ကဆိကမိၣ်ဝဲလၢ တၢ်လၢအဝဲသ့ၣ်ဃုထၢဝဲန့ၣ် ဘၣ်ကစၢ်ယွၤဒီးယ့ၣ်ၡူးအသးလီၤ. လၢအဝဲတခီန့ၣ်, ဘၣ်မနုၤအဃိ အဝဲသ့ၣ်ပာ်ဃုာ်လၢတၢ်အံၤအပူၤလဲၣ်. ယ့ၣ်ၡူးခရံာ်တတူၢ်လိာ်ဝဲတၢ်ထံၣ်လၢ တၢ်ဘူၣ်တၢ်ဘါအါမး, ကျဲအါမးန့ၣ်ဆှၢပှၤဆူ တၢ်အုၣ်က့ၤခီၣ်က့ၤဘၣ်. အါန့ၢ်အန့ၣ်, အဝဲစံးဝဲလၢ “မ့မ့ၢ်ကျဲစၢၤမ့ၢ်အအံၣ်, ဒီးကျဲမ့ၢ်အဆံးလၢအဆှၢဝဲဆူတၢ်မူန့ၣ်, ဒီးပှၤလၢအထံၣ်န့ၢ်အီၤတဖၣ်အိၣ်စှၤဂၤလီၤ.” (မးသဲ ၇:၁၄) ယဟိဝၤပှၤအုၣ်အသးတဖၣ် နာ်ဝဲလၢ အဝဲသ့ၣ်ထံၣ်န့ၢ်ဝဲကျဲအံၤလီၤ. အါန့ၢ်အန့ၣ်, အဝဲသ့ၣ်ဃုတ့ၢ်လံဝဲလၢ တၢ်ဘူၣ်တၢ်ဘါအဂၤအပူၤလံလီၤ.
လါမ့ၤ ၁၂-၁၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၃
တဘၣ်ပျဲ “ပှၤအၢပှၤသီ” အ “မ့ၣ်အူဒၢ” လီန့ၢ်နၤတဂ့ၤ
it-2-E ၁၉၆ ¶၂-၃
မ့ၣ်အူဒၢ
တၢ်အဒိ. မ့ၣ်အူဒၢန့ၣ် ဘၣ်တၢ်ဒိလီၤအီၤလၢ တၢ်လၢအဟံးစုနဲၣ်ကျဲ ပှၤတဂၤအကျဲ. ဘၣ်ဃးဒီး ပှၤတီပှၤလိၤ ဒီးပှၤအၢပှၤသီအဂ့ၢ်န့ၣ် လံာ်ကတိၤဒိသူဝဲ တၢ်အဒိအံၤ ဒီးတဲဝဲလၢ “ပှၤတီပှၤလိၤန့ၣ် လီၤဂာ်ဒ်သိးဒီး မ့ၣ်အူဒၢတဖျၢၣ်လၢ အကပီၤဝဲဒိၣ်မး, မ့မ့ၢ် ပှၤအၢပှၤသီန့ၣ် လီၤဂာ်ဒ်သိးဒီး မ့ၣ်အူဒၢတဖျၢၣ်လၢ အကလီၤပံာ်ကွံာ်လီၤ.” (ကတိၤ ၁၃:၉) ပှၤတီပှၤလိၤ အမ့ၣ်အူဒၢန့ၣ် ကဆဲးကပီၤဒိၣ်ထီၣ်ဝဲ, မ့မ့ၢ် ပှၤအၢပှၤသီအမ့ၣ်အူဒၢန့ၣ် အမ့ၢ်ဖျါလီၤဂာ်လၢ အကပီၤဝဲ ဒီးအဒိၣ်ထီၣ်ဝဲနာ်က့ အကတၢၢ်န့ၣ် ယဟိဝၤယွၤ ကမၤလီၤပံာ်အီၤ ဒီးအခီၣ်ကဘၣ်တိၢ် ဒီးလီၤဃံၢ်ဝဲ. ပှၤလၢအဆိၣ်အၢ အမိၢ်အပၢ်န့ၣ် အကျဲကကတၢၢ်ဝဲ ဒ်ပှၤအၢပှၤသီအသိး.—ကတိၤ ၂၀:၂၀.
ပှၤတဂၤအ ‘မ့ၣ်အူဒၢကလီၤပံာ်ကွံာ်’ န့ၣ်အခီပညီ မ့ၢ်စ့ၢ်ကီးဝဲ အတၢ်မုၢ်လၢ်လၢ ခါဆူညါအဂီၢ် တအိၣ်လၢၤဘၣ်. လံာ်ကတိၤဒိ အဂၤတဆၢ ပာ်ဖျါထီၣ်ဝဲလၢ “ပှၤအၢပှၤသီန့ၣ် အတၢ်မုၢ်လၢ်လၢ ခါဆူညါတအိၣ်ဘၣ်. ဒီးပှၤအၢပှၤသီန့ၣ် လီၤဂာ်ဒ်သိးဒီး မ့ၣ်အူဒၢတဖျၢၣ်လၢ အကလီၤပံာ်ကွံာ်လီၤ.”—ကတိၤ ၂၄:၂၀.
“ဃ့ၢ်ဟးဆှဲးကွံာ် တၢ်မၤကမၣ်မုၣ်ကမၣ်ခွါ”
၁၃ ပတံၤသကိးတဖၣ် ဆီၣ်ထွဲပှၤလၢပကမၤတၢ်ဂ့ၤ မ့တမ့ၢ် မၤတၢ်အၢသ့ဝဲလီၤ. နမ့ၢ်ဃုထၢနတံၤသကိးလၢ အမၤထွဲကစၢ်ယွၤ အတၢ်သိၣ်တၢ်သီတဖၣ်န့ၣ် အဝဲသ့ၣ်ကမၤစၢၤနၤလၢ နကမၤဒ်န့ၣ်အသိးစ့ၢ်ကီးလီၤ. (ကတိၤဒိ ၁၃:၂၀; ဖး ၁ ကရံၣ်သူး ၁၅:၃၃ တက့ၢ်.) ပမ့ၢ်ဆိကမိၣ်ထံ နီၢ်ဒံနၤအဂ့ၢ်န့ၣ် ပကနၢ်ပၢၢ်ထီၣ်လၢ ပကဃုထၢတံၤသကိးဒ်လဲၣ်တဖၣ်လဲၣ်န့ၣ် မ့ၢ်တၢ်ဃုထၢလၢအရ့ဒိၣ်တခါလီၤ. နီၢ်ဒံနၤမ့ၢ်စီၤယၤကိာ်အဖိမုၣ် ဒီးအဟံၣ်ဖိဃီဖိန့ၣ် ဘူၣ်ထီၣ်ဘါထီၣ်ယဟိဝၤယွၤလီၤ. နီၢ်ဒံနၤမ့ၢ်ပှၤလၢ အအိၣ်ဒီးလုၢ်လၢ်သကဲာ်ပဝးလၢအဂ့ၤ ဘၣ်ဆၣ်လၢခံန့ၣ် အဝဲရ့တံၤရ့သကိးဒီး ပှၤကနၤဧၣ်မုၣ်တဖၣ်လၢ အတဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. ပှၤကနၤဧၣ်ဖိတဖၣ် အတၢ်ထံၣ်ဘၣ်ဃးဒီးတၢ်မံဃုာ်န့ၣ် တဒ်သိးဒီးကစၢ်ယွၤ အပှၤဂီၢ်မုၢ်အတၢ်ထံၣ်ဘၣ်. ဒီးအဝဲသ့ၣ် မ့ၢ်ပှၤလၢအမံၤဟူသၣ်ဖျါလၢ တၢ်မၤကမၣ်မုၣ်ကမၣ်ခွါလီၤ. (၃ မိၤၡ့ ၁၈:၆-၂၅) ဖဲနီၢ်ဒံနၤအိၣ်ဒီး အတံၤသကိးတဖၣ်အံၤအခါ အဝဲထံၣ်လိာ်အသးဒီး ပှၤကနၤဧၣ်ပိာ်ခွါသးစၢ်တဂၤလၢ အမံၤမ့ၢ်စီၤၡက့ၣ်, ဒီးစီၤၡက့ၣ်ကွၢ်ဂ့ၤအီၤလီၤ. စီၤၡက့ၣ် မ့ၢ်ပှၤလၢ “အလၤအကပီၤဒိၣ်” ကတၢၢ်လၢအပၢ်အဟံၣ်ပူၤ ဘၣ်ဆၣ်အဝဲတအဲၣ် ယဟိဝၤယွၤဘၣ်.—၁ မိၤၡ့ ၃၄:၁၈, ၁၉.
၁၄ ခီဖျိလၢ စီၤၡက့ၣ်ကွၢ်ဂ့ၤ နီၢ်ဒံနၤအဃိ “ဟံးန့ၢ်” ဝဲနီၢ်ဒံနၤဒီး “မၤဟးဂီၤ” အသူးသ့ၣ်လၤကပီၤန့ၣ်လီၤ. လၢစီၤၡက့ၣ်အတၢ်ထံၣ်န့ၣ် အဝဲမၤဝဲဒ်အံၤ တဘၣ်တၢ်နီတမံၤဘၣ်ဒီး တမ့ၢ်တၢ်လၢအကမၣ်စ့ၢ်ကီးဘၣ်. (ဖး ၁ မိၤၡ့ ၃၄:၁-၄ တက့ၢ်.) ဒီးပှၤလၢအဘၣ်ဒိ လၢတၢ်ဂ့ၢ်အံၤအဃိန့ၣ် တမ့ၢ်ထဲနီၢ်ဒံနၤတဂၤဧိၤဘၣ်. တၢ်လၢအဟဲကဲထီၣ်အသးတဖၣ် မၤမဲာ်ဆှးဒီးမၤကီမၤခဲ အဟံၣ်ဖိဃီဖိခဲလၢာ်လီၤ.—၁ မိၤၡ့ ၃၄:၇, ၂၅-၃၁; ကလၤတံ ၆:၇, ၈.
တၢး၀၄-E ၇/၁၅ ၃၁ ¶၆
“ပှၤလၢအကူၣ်တၢ်သ့န့ၣ် မၤတၢ်လၢ တၢ်ကူၣ်သ့အပူၤ”
ပှၤလၢအအိၣ်ဒီးတၢ်ကူၣ်သ့ ဒီးပှၤတီပှၤလိၤလၢ အမၤတၢ်လၢ တၢ်ကူၣ်သ့အပူၤန့ၣ် ကဒိးန့ၢ်ဘၣ် တၢ်ဆိၣ်ဂ့ၤ. စီၤၡလိၤမိၤ တဲဝဲလၢ “ပှၤတီပှၤလိၤ ကအီၣ်ဘၣ်တၢ် တုၤလၢအအီၣ်ဝဲ ဘျဲဘျဲ, မ့မ့ၢ် ပှၤအၢပှၤသီန့ၣ် အဟၢဖၢ ကလီၤဘဲဝဲလီၤ.” (ကတိၤ ၁၃:၂၅) ယဟိဝၤယွၤ သ့ၣ်ညါဝဲ တၢ်လၢအဂ့ၤကတၢၢ် လၢပဂီၢ်. ဘၣ်ဃးဒီး ပဟံၣ်ဖိဃီဖိ, ပတၢ်ရ့လိာ်သးဒီးပှၤဂၤ, ပတၢ်စံၣ်တဲၤတဲလီၤတၢ်မၤ ဒီးတၢ်သိၣ်က့ၤသီက့ၤန့ၣ် အဝဲသ့ၣ်ညါဝဲ တၢ်အဂ့ၤကတၢၢ် လၢပဂီၢ်. အဃိ ပမ့ၢ်မၤထွဲ အတၢ်ဟ့ၣ်ကူၣ်လၢ လံာ်စီဆှံပူၤန့ၣ် ပကဒိးန့ၢ်ဘၣ် တၢ်သးခုနီၢ်ကီၢ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
“ပိာ်ခွါကိးဂၤဒဲးအခိၣ် မ့ၢ်ခရံာ်”
၁၃ တၢ်မၤလိလၢပဂီၢ်. ကယဲၢ်တၢ်လၢဟံၣ်ခိၣ်မၤဝဲန့ၣ် ကဘၣ်မ့ၢ် တၢ်အဲၣ်ထိၣ်ဟူးထိၣ်ဂဲၤထီၣ်အီၤလီၤ. ဘၣ်မနုၤအဃိ အရ့ဒိၣ်ဒိၣ်မးလဲၣ်. တၢ်မၢဖိယိၤဟၣ် တဲဝဲလၢ “ပှၤလၢအတအဲၣ် အဒီပုၢ်ဝဲၢ်လၢ အထံၣ်ဝဲန့ၣ် အအဲၣ်ကစၢ်ယွၤလၢ အထံၣ်ဝဲတသ့ဘၣ်တဂၤန့ၣ် ကသ့ဒ်လဲၣ်.” (၁ ယိၤဟၣ် ၄:၁၁, ၂၀) လီၤဆီဒၣ်တၢ် ပိာ်ခွါလၢအအဲၣ် အဟံၣ်ဖိဃီဖိဒီး အအဲၣ်ဒိးကွၢ်လိ ယဟိဝၤယွၤဒီးယ့ၣ်ၡူးန့ၣ် ကကွၢ်ထွဲအဟံၣ်ဖိဃီဖိလၢ နီၢ်သးအတၢ်လိၣ်ဘၣ်, သးအတူၢ်ဘၣ် ဒီးနီၢ်ခိအတၢ်လိၣ်တဖၣ်န့ၣ်လီၤ. (၁ တံၤမသ့း ၅:၈) ဒီးအဝဲကဘၣ်သိၣ်လိအဖိ ဒီးဘှီဘၣ်ထီၣ်က့ၤအဖိလီၤ. တကးဒံးဘၣ် အဝဲကမၤတၢ်ဆၢတဲာ်လၢ ကမၤလၤကပီၤယဟိဝၤယွၤ ဒီးကကဲဘျုးကဲဖှိၣ်လၢ အဟံၣ်ဖိဃီဖိအဂီၢ်လီၤ. ခဲအံၤပကတဲသကိး တၢ်ဂ့ၢ်သ့ၣ်တဖၣ်အံၤ တခါဘၣ်တခါ ဒီးပကတဲသကိးစ့ၢ်ကီး ဟံၣ်ခိၣ်တဂၤ ကကွၢ်လိမၤဒိးဝဲ ယဟိဝၤယွၤဒီးယ့ၣ်ၡူး ကသ့လၢကျဲဒ်လဲၣ်.
လါမ့ၤ ၁၉-၂၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၄
ဖဲနထံၣ်ဘၣ် တၢ်ကီတၢ်ခဲအခါ တၢ်လၢနကမၤအီၤတဖၣ်န့ၣ် ဆိကမိၣ်ထံအီၤ လီၤတံၢ်လီၤဆဲး
ပာ်လုၢ်ပာ်ပှ့ၤသးသမူ လၢကစၢ်ယွၤဟ့ၣ်ပှၤ
၁၀ ခီဖျိလၢ န့ဆၢၣ် တၢ်ဘၣ်ဒိဘၣ်ထံး, တၢ်ဆူးတၢ်ဆါ ရၤလီၤသး ဒီးထံဖိကီၢ်ဖိ မၤတၢထီၣ်တၢလီၤတၢ်အဃိ တဘျီတခီၣ်န့ၣ် တၢ်ဘၣ်ဒိဘၣ်ထံး ကဲထီၣ်ဖုးသးဒီးပှၤသ့. အဃိ ဖဲတၢ်ဘၣ်ဒိဘၣ်ထံး ကဲထီၣ်ဖုးသးအခါ ဒ်သိးပကအိၣ် ပူၤပူၤဖျဲးဖျဲးအဂီၢ် ပကဘၣ် ကျဲးစၢးမၤထွဲ ပှၤဘၣ်မူဘၣ်ဒါ တၢ်ဟံးစုနဲၣ်ကျဲ လၢအဟ့ၣ်ပလီၢ်ပှၤ. (ရိမ့ၤ ၁၃:၁, ၅-၇) တချုးလၢ တၢ်ဘၣ်ဒိဘၣ်ထံး ကဲထီၣ်ဒံးဘၣ်န့ၣ် ပအိၣ်ကတီၤဆိပသးသ့. အဃိ လီၢ်ကဝီၤ ပှၤဘၣ်မူဘၣ်ဒါ မ့ၢ်ဟ့ၣ်လီၤပှၤ တၢ်ဟံးစုနဲၣ်ကျဲ တမံၤမံၤန့ၣ် ပကဘၣ်မၤထွဲအီၤ. အဒိ ပအိၣ်ကတီၤပာ်စၢၤသး ခီဖျိ ပပာ်ဃာ်ထံ, တၢ်အီၣ်တၢ်အီ လၢအဟးဂီၤတသ့ဘၣ် ဒီးကသံၣ်ကသီတနီၤ.
၁၁ တၢ်ဆူးတၢ်ဆါ မ့ၢ်ရၤလီၤသး လၢပတၢ်လီၢ်န့ၣ် ပကဘၣ်မၤဒ်လဲၣ်. ပကဘၣ် မၤထွဲ ပှၤဘၣ်မူဘၣ်ဒါ အတၢ်ဟံးစုနဲၣ်ကျဲ ဒ်သိးဒီး ပသ့စု, ပအိၣ်ယံၤဒီးပှၤဂၤ, ပကးဘၢနါဒ့ ဒီးပအိၣ်လီၤဆီဒီးပှၤဂၤ. ပမ့ၢ်မၤထွဲ တၢ်ဟံးစုနဲၣ်ကျဲတဖၣ်အံၤန့ၣ် ပပာ်ဖျါထီၣ်လၢ ပပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်လၢအမ့ၢ် သးသမူ.
၁၂ ဖဲတၢ်ဘၣ်ဒိဘၣ်ထံး ကဲထီၣ်ဖုးသးအခါ ပကနၢ်ဟူဘၣ် တၢ်ကစီၣ်လၢ အတဘၣ်လီၤတံၢ်ဘၣ်. ပကနၢ်ဟူဘၣ်လၢ ပသကီး, လၢပှၤလၢပခိၣ်ပဃၢၤ ဒီးလၢတၢ်ဂီၤမူပူၤ. အဃိ ပတဘၣ်နာ် “တၢ်ကတိၤ ကိးထံၣ်ဒဲး” ဘၣ်. ပကဘၣ်ကနၣ် တၢ်ကစီၣ်နီၢ်ကီၢ်လၢ ပဒိၣ်ဒီးကသံၣ်သရၣ် တဲလီၤဝဲ. (ဖး ကတိၤဒိ ၁၄:၁၅.) တချုးလၢ ပှၤပၢဆှၢတၢ်ကမံးတံာ် ဒီးဝဲၤတြၢ်တဖၣ် ဆှၢလီၤတၢ်ဟံးစုနဲၣ်ကျဲ ဘၣ်ဃးဒီး ပထီၣ်တၢ်အိၣ်ဖှိၣ် ဒီးတၢ်စံၣ်တဲၤတဲလီၤတၢ်မၤ ဒံးဘၣ်န့ၣ် အဝဲသ့ၣ်ကျဲးစၢး ဃုသ့ၣ်ညါဆိ တၢ်ဂ့ၢ်တၢ်ကျိၤ လီၤတံၢ်လီၤဆဲး. (ဧ့ၤဘြံၤ ၁၃:၁၇) အဃိ ပမ့ၢ်မၤထွဲ တၢ်ဟံးစုနဲၣ်ကျဲန့ၣ် ပဒီသဒၢလီၤပသး တကးဒံးဘၣ် ပဒီသဒၢပှၤဂၤစ့ၢ်ကီး. ဒီးပှၤလၢပခိၣ်ပဃၢၤ ကထံၣ်ဝဲလၢ ပပာ်လီၤတၢ်အဒိလၢအဂ့ၤ.—၁ ပ့းတရူး ၂:၁၂.
အိၣ်ဒီးတၢ်သးဒူ ဒ်သိးဒီး စီၤစၤဒိး
၁၁ ဖဲဒီပုၢ်ဝဲၢ်မုၣ်ခွါ ထံၣ်ဘၣ်တၢ်လီၤဘၣ်ယိၣ် ဒီးဃ့ပှၤတၢ်မၤစၢၤအခါ ပပာ်ဖျါထီၣ် တၢ်သးဒူ ဒ်သိးဒီး စီၤစၤဒိး ကသ့ဒ်လဲၣ်. (၁) ပကဘၣ် မၤထွဲတၢ်ဟံးစုနဲၣ်ကျဲ. ဖဲပထံၣ်ဘၣ် တၢ်လီၤဘၣ်ယိၣ်အခါ အရ့ဒိၣ်လၢ ပကဆဲးအိၣ်ဃူအိၣ်ဖိး. တကးဒံးဘၣ် ပကဘၣ် မၤထွဲ တၢ်ဟံးစုနဲၣ်ကျဲ လၢအဟဲလၢ လီၢ်ကဝီၤဝဲၤတြၢ်အအိၣ်. (ဧ့ၤ ၁၃:၁၇) အဒိ ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်အခါ ပကဘၣ် အိၣ်ကတဲာ်ကတီၤ ပသးဒ်လဲၣ် ဒီးပကဘၣ် မၤဒ်လဲၣ်န့ၣ် တၢ်အိၣ်ဖှိၣ်သးပှၢ်တဖၣ် ကဘၣ်ကွၢ်ကဒါက့ၤ လီၢ်ကဝီၤတၢ်ဟံးစုနဲၣ်ကျဲတဖၣ် ခဲအံၤခဲအံၤ. (၁ ကရံၣ် ၁၄:၃၃, ၄၀) (၂) ပကဘၣ် အိၣ်ဒီးတၢ်သးဒူ ဘၣ်ဆၣ် ပကဘၣ်ပလီၢ်သး. (ကတိၤ ၂၂:၃) တချုးလၢ ပမၤတၢ်တမံၤမံၤဒံးဘၣ်န့ၣ် ပကဘၣ် ဆိကမိၣ်ထံအီၤ လီၤတံၢ်လီၤဆဲး. ဒီးပကဘၣ် ဟးဆှဲးတၢ်လၢ ကကဲထီၣ် တၢ်လီၤဘၣ်ယိၣ် လၢပဂီၢ်. (၃) ပကဘၣ် သန့ၤသးလၢ ယဟိဝၤယွၤ. သ့ၣ်နီၣ်ထီၣ်လၢ ယဟိဝၤယွၤ သးအိၣ်ပှၤ ဒီးဒီပုၢ်ဝဲၢ်မုၣ်ခွါခဲလၢာ် ဒီးအအဲၣ်ဒိးလၢ ပကအိၣ်ဘၣ် ပူၤပူၤဖျဲးဖျဲး. တကးဒံးဘၣ် ဒ်သိး ပမၤစၢၤက့ၤ ဒီပုၢ်ဝဲၢ်မုၣ်ခွါ ကသ့အဂီၢ် ယဟိဝၤယွၤ ကမၤစၢၤပှၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ပဆၢတဲာ်တၢ်လၢအဘၣ် ကသ့ဒ်လဲၣ်
လံာ်စီဆှံတဲဝဲလၢ “ပှၤကူၣ်တၢ်သ့န့ၣ် ဆိကမိၣ်ထံ အခီၣ်ခါ ကိးခါဒဲး.” (ကတိၤဒိ ၁၄:၁၅) အဃိ ပသ့ၣ်ညါဘၣ်လၢ တချုးလၢ ပဆၢတဲာ်တၢ်ဒံးဘၣ်န့ၣ် ပကဘၣ် ဟံးန့ၢ်တၢ်ဆၢကတီၢ် လၢပကဆိကမိၣ်ထံဆိ ပတၢ်ဃုထၢတဖၣ်အဂ့ၢ်. ဖဲပဆိကမိၣ်ထံ ပတၢ်ဃုထၢ တခါဘၣ်တခါ အဂ့ၢ်အဆၢကတီၢ် ပကြၢးသံကွၢ်လီၤပသးလၢ ‘လံာ်စီဆှံ အတၢ်ဟံးစုနဲၣ်ကျဲ လၢအဘၣ်ထွဲဒီး ယတၢ်ဃုထၢအံၤ အိၣ်ဧါ. တၢ်ဃုထၢလၢ အကဟ့ၣ်ယၤ တၢ်သးမံန့ၣ် ကမ့ၢ်ဖဲလဲၣ်တခါလဲၣ်. ယတၢ်ဃုထၢအံၤ အကမၤဘၣ်ဒိပှၤဂၤဧါ. ဒီးတၢ်လၢအရ့ဒိၣ်ကတၢၢ်န့ၣ် မ့ၢ်ယဟိဝၤယွၤ ကသးခုလၢ ယတၢ်ဃုထၢအံၤအဃိဧါ.’—၅ မိၤၡ့ ၃၂:၂၉.
ယဟိဝၤယွၤ အိၣ်ဒီးတၢ်ခွဲးတၢ်ယာ်လၢ အကပာ်ပနီၣ်ဝဲ တၢ်လၢအဂ့ၤ ဒီးတၢ်လၢအအၢ. ပမ့ၢ်သ့ၣ်ညါ ယဟိဝၤယွၤ အတၢ်သိၣ်တၢ်သီ ဒီးအတၢ်ဟံးစုနဲၣ်ကျဲဂ့ၤဂ့ၤ တကးဒံးဘၣ် ပမ့ၢ်ပာ်လီၤပသးလၢ ပကမၤထွဲအီၤန့ၣ် ပကအိၣ်ဒီး သးလၢအသ့ၣ်ညါဒၣ်တၢ် လၢအကဆှီလီၤ. သးလၢအသ့ၣ်ညါဒၣ်တၢ်န့ၣ် အကဲဝဲ သးအတၢ်တူၢ်ဘၣ်တခါလၢ အဒုးသ့ၣ်ညါပှၤ တၢ်လၢအဘၣ် ဒီးတၢ်လၢအကမၣ်. (ရိမ့ၤ ၂:၁၄, ၁၅) ဒီးပမ့ၢ် သိၣ်လိ ပသးလၢ အသ့ၣ်ညါဒၣ်တၢ်န့ၣ် အကမၤစၢၤပှၤ ဒ်သိး ပကဆၢတဲာ်တၢ်လၢအဘၣ်.
လါမ့ၤ ၂၆–လါယူၤ ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၅
မၤစၢၤပှၤဂၤ ဒ်သိးအဝဲသ့ၣ် ကအိၣ်ဒီးတၢ်သးခု
တၢ်တူၢ်လိာ်တမှံၤန့ၣ်—မ့ၢ်တၢ်လၢအရ့ဒိၣ်
၁၅ နတၢ်တူၢ်ဘၣ်အိၣ်ဒ်လဲၣ်. နအဲၣ်ဒိးတူၢ်လိာ်တမှံၤ ဘၣ်ဆၣ်နတူၢ်ဘၣ်လၢ နမၤတန့ၢ်ဘၣ်အိၣ်တဘျီဘျီဧါ. ဘၣ်သ့ၣ်သ့ၣ် မ့ၢ်လၢနမဲာ်ဆှး မ့တမ့ၢ် နဘၣ်ယိၣ်လၢ ပှၤတမှံၤတၢ်ကကၢၣ်အသးအဃိလီၤ. မ့တမ့ၢ် ဘၣ်သ့ၣ်သ့ၣ် ကမ့ၢ်လၢ နစ့တအိၣ်အါအါဘၣ်အဃိ နဘၣ်ယိၣ်လၢ နတူၢ်လိာ်ပှၤတမှံၤတန့ၢ်ထဲသိး ဒီပုၢ်ဝဲၢ်မုၣ်ခွါအဂၤတဖၣ်ဘၣ်အဃိလီၤ. သ့ၣ်နီၣ်ထီၣ်လၢ တလိၣ်လၢနဟံၣ်ကဘၣ်ဒိၣ်ဘၣ်. နဟံၣ်မ့ၢ်အိၣ် ကဆှဲကဆှီ ဒီးနသးမ့ၢ်ဂ့ၤန့ၣ် နပှၤတမှံၤကသးခုဝဲလီၤ.
၁၆ နမ့ၢ်ဘၣ်ယိၣ်တၢ်လၢ နကကွဲမုာ်ပှၤတမှံၤအဂီၢ်န့ၣ် တမ့ၢ်ထဲနၤတဂၤဧိၤဘၣ်. တၢ်အိၣ်ဖှိၣ်သးပှၢ်တဂၤလၢ အအိၣ်လၢကီၢ်ဘြံးတၢၣ်န့ၣ် တဲဝဲလၢ “ပဘၣ်ကတဲာ်ကတီၤတၢ်လၢ ပှၤတမှံၤအဂီၢ်န့ၣ် ပသူၣ်ကိၢ်သးဂီၤတၢ်ဒိၣ်မးလီၤ. ဘၣ်ဆၣ် တၢ်ဆိၣ်ဂ့ၤဒီး တၢ်သူၣ်မံသးမုာ်လၢ ပဒိးန့ၢ်ဘၣ်အီၤခီဖျိ ပမၤတၢ်တမံၤလၢ်လၢ်လၢ ပကဘူၣ်ထီၣ်ဘါထီၣ် ယဟိဝၤယွၤအဂီၢ်န့ၣ် ဂ့ၤဒိၣ်န့ၢ် ပတၢ်ကိၢ်တၢ်ဂီၤလီၤ. ပဆ့ၣ်နီၤတဲသကိးတၢ် ဒီးအီသကိးထံချီ ဒီးပှၤတမှံၤတဖၣ်န့ၣ် မုာ်ဘၣ်ယၤဒိၣ်မး.” တၢ်ပာ်ဖျါထီၣ်တၢ်သူၣ်အိၣ်သးအိၣ် ပှၤတမှံၤန့ၣ် မ့ၢ်ဝဲလုၢ်လၢ်လၢအဂ့ၤတခါလီၤ. (ဖံလံးပံၤ ၂:၄) ပှၤအါဂၤန့ၣ် တဲပၠးပှၤဂၤလၢ အနီၢ်ကစၢ်အတၢ်လဲၤခီဖျိမုာ်ဝဲလီၤ. အဃိဘၣ်သ့ၣ်သ့ၣ် ပမ့ၢ်ကွဲမုာ်အဝဲသ့ၣ်လၢပဟံၣ်မး ပကနၢ်ဟူဘၣ် အဝဲသ့ၣ်အတၢ်လဲၤခီဖျိလီၤ. တၢ်အိၣ်ဖှိၣ်သးပှၢ်တဂၤကွဲးဝဲလၢ “ယကွဲဒီပုၢ်ဝဲၢ်လၢ တၢ်အိၣ်ဖှိၣ်ပူၤတဖၣ်လၢ ယဟံၣ်အဃိ ယနၢ်ပၢၢ်ထီၣ်အဝဲသ့ၣ်အတၢ်အိၣ်သး ဒီးယသ့ၣ်ညါအါထီၣ် အဝဲသ့ၣ်အဂ့ၢ်လီၤ. လီၤဆီဒၣ်တၢ် ယသ့ၣ်ညါဘၣ်လၢ အဝဲသ့ၣ်ဒိးန့ၢ်ဘၣ် တၢ်မ့ၢ်တၢ်တီဒ်လဲၣ်အဂ့ၢ်န့ၣ်လီၤ.” နမ့ၢ်ပာ်ဖျါထီၣ် တၢ်သူၣ်အိၣ်သးအိၣ်လၢ ပှၤတမှံၤအဖီခိၣ်န့ၣ် နနာ်သ့သပှၢ်ကတၢၢ်လၢ ပှၤခဲလၢာ်ကသးခုဝဲလီၤ.
၁၇ ဒီပုၢ်ဝဲၢ်မုၣ်တဂၤ လၢအမၤပှၤလဲၤလၢညါန့ၣ် အဝဲတူၢ်လိာ်ဝဲ ပှၤကၠိဖိလၢအဟဲထီၣ်ကၠိလၢ တၢ်ကရၢကရိဒုးအိၣ်ထီၣ်ဝဲတဖၣ်န့ၣ်လီၤ. အဝဲတဲဝဲလၢ “အခီၣ်ထံးန့ၣ် ယဘၣ်ယိၣ်တၢ် မ့ၢ်လၢယဟံၣ်န့ၣ် တၢ်တအိၣ်အါအါဘၣ် အိၣ်ဒၣ်ထဲတၢ်ပီးတၢ်လီလၢ ပှၤဟ့ၣ်ယၤတဖၣ်လီၤ. ပှၤသိၣ်လိနဲၣ်လိတၢ် အမါတဂၤ တဲတၢ်တမံၤလၢ အမၤမုာ်ယသးဒိၣ်မးန့ၣ်လီၤ. အဝဲတဲလၢ ဖဲအဝဲဒီးအဝၤမၤကဝီၤအပှၤကွၢ်တၢ် တၢ်မၤအခါ အဝဲသ့ၣ်လဲၤအိၣ်တမှံၤလၢ ပှၤလၢအနီၢ်သးဆူၣ် ဒီးအိၣ်မူတၢ်အိၣ်မူယိယိဖိတဖၣ် အဟံၣ်န့ၣ် မ့ၢ်တၢ်လၢအဂ့ၤကတၢၢ်လီၤ. ယသ့ၣ်နီၣ်က့ၤ ဖဲပနီၢ်ဆံးအခါ ယမိသူဝဲတၢ်ကတိၤလၢအမ့ၢ် ‘ပအီၣ်တၢ်ဒိးတၢ်လၣ် အိၣ်ဒီးတၢ်အဲၣ်န့ၣ် ဂ့ၤဒိၣ်တက့ၢ်လီၤ.’” (ကတိၤဒိ ၁၅:၁၇) ပတလိၣ်ဘၣ်ယိၣ်တၢ်ဘၣ်. တၢ်လၢအရ့ဒိၣ်ကတၢၢ်န့ၣ် ပကဘၣ်ပာ်ဖျါထီၣ် တၢ်အဲၣ်လၢ ပှၤတမှံၤအဖီခိၣ်လီၤ.
ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ “ဒံးအါထီၣ်တက့ၢ်”
၁၆ နမ့ၢ်တူၢ်ဘၣ်လၢ နဟ့ၣ်ဂံၢ်ဟ့ၣ်ဘါ ပှၤဂၤတသ့ဘၣ်န့ၣ် နမၤတၢ်မနုၤသ့ဝဲလဲၣ်. တၢ်ဟ့ၣ်ဂံၢ်ဟ့ၣ်ဘါပှၤဂၤန့ၣ် တမ့ၢ်တၢ်လၢအကီဘၣ်. အဒိ, ဂုာ်ကျဲးစၢးနံၤကမှံပၠး ပှၤတဂၤတက့ၢ်. အဝဲမ့ၢ်တနံၤကမှံဆၢက့ၤနၤန့ၣ် ဘၣ်သ့ၣ်သ့ၣ် အဝဲကအိၣ်ဒီး တၢ်ကီတၢ်ခဲတမံၤမံၤ ဒီးကလိၣ်ဘၣ်ပှၤတဂၤဂၤလၢ ကတဲသကိးတၢ်အဂီၢ်လီၤ. နမၤမုာ်ထီၣ်က့ၤအီၤသ့ခီဖျိ ဖဲအဝဲတဲတၢ်အခါ ဒိကနၣ်အီၤဂ့ၤဂ့ၤန့ၣ်လီၤ.—ယၤကိာ် ၁:၁၉.
၁၇ ဒီပုၢ်ဝဲၢ်သးစၢ်တဂၤလၢ အမံၤမ့ၢ် ဟဲနရံၤ န့ၣ်အဘူးအတံၢ်တနီၤ ပာ်တ့ၢ်ကွံာ် တၢ်မ့ၢ်တၢ်တီလီၤ. တကးဒံးဘၣ် အပၢ်လၢအကဲဝဲ တၢ်အိၣ်ဖှိၣ်သးပှၢ်န့ၣ် ပာ်တ့ၢ်ကွံာ် တၢ်မ့ၢ်တၢ်တီစ့ၢ်ကီးလီၤ. ကဝီၤအပှၤကွၢ်တၢ်တဂၤ ထံၣ်ဝဲလၢ ဟဲနရံၤအသးအုးအဃိ အဝဲလဲၤကိးဝဲလၢ ကအီခီဖံၣ်ဒီးအီၤလီၤ. ဖဲဟဲနရံၤတဲဖျါထီၣ် အတၢ်တူၢ်ဘၣ်အခါ အဝဲဒိကနၣ်ဝဲလၢ တၢ်သူၣ်အိၣ်သးအိၣ်အပူၤလီၤ. ဖဲန့ၣ်အခါ ဟဲနရံၤ သ့ၣ်ညါထီၣ်ဝဲလၢ ကျဲထဲတဘိလၢ အကမၤစၢၤအဘူးအတံၢ်တဖၣ် ဒ်သိးကဟဲက့ၤလၢ တၢ်မ့ၢ်တၢ်တီအပူၤအဂီၢ်န့ၣ် အဝဲကဘၣ်တီဒီးယဟိဝၤယွၤလီၤ. အဝဲဒိးန့ၢ်ဘၣ် တၢ်မၤမုာ်ထီၣ်က့ၤ ခီဖျိဖးဝဲ စံးထီၣ်ပတြၢၤ ၄၆, စဖါနယၤ ၃:၁၇ ဒီး မၢ်ကူး ၁၀:၂၉, ၃၀ န့ၣ်လီၤ.
၁၈ ပဟံးန့ၢ်တၢ်မၤလိလၢ ဒီပုၢ်ဝဲၢ်မုၣ်မၤသၤ ဒီးဒီပုၢ်ဝဲၢ်ဟဲနရံၤ အအိၣ်ကသ့ဒ်လဲၣ်. ပသ့ၣ်ညါဘၣ်လၢ ပဝဲသ့ၣ်တဖၣ် ပမၤမုာ်ထီၣ်က့ၤ ဒီးပဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါလၢ အလိၣ်ဘၣ် တၢ်မၤမုာ်ထီၣ်က့ၤတဖၣ်သ့ဝဲလီၤ. စီၤပၤၡလိၤမိၤ ကွဲးဝဲလၢ “တၢ်ကတိၤတထံၣ်လၢ ပှၤကတိၤဝဲဖဲ အဆၢအကတီၢ်ဒၣ်ဝဲန့ၣ် ဂ့ၤဆံးဒိၣ်လဲၣ်. တၢ်ကစီၣ်လၢအဂ့ၤ မၤဘီၣ်ထီၣ်ပဃံလီၤ.” (ကတိၤဒိ ၁၅:၂၃, ၃၀) ပှၤလၢနသ့ၣ်ညါလၢအလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါ အိၣ်ဝဲတဂၤဂၤဧါ. မ့ၢ်အိၣ်န့ၣ် နဖးန့ၢ်အဝဲသ့ၣ် တၢ်ဂ့ၢ်တၢ်ကျိၤလၢ တၢးထီခိးတၢ် အပူၤ မ့တမ့ၢ် လၢပပှာ်ယဲၤသန့အပူၤသ့ဝဲလီၤ. တကးဒံးဘၣ် စီၤပီလူးတဲဝဲလၢ တၢ်သးဝံၣ်သကိး ဘီမုၢ်တၢ်သးဝံၣ် ဒ်သိးသိးန့ၣ် မၤမုာ်ထီၣ်ပသးသ့ဝဲလီၤ. အဝဲကွဲးဝဲလၢ “သိၣ်လိလိာ်သုသး ဒီးသဆၣ်ထီၣ်လိာ်သုခံ လၢထါစံးထီၣ်ပတြၢၤ, ဒီးတၢ်သးဝံၣ်, ဒီးအုၣ်တၢ်ဘၣ်ဃးဒီးသးန့ၣ်, ဒီးသးဝံၣ်ထီၣ်ယွၤ, အိၣ်ဒီးတၢ်ဘျုးတၢ်ဖှိၣ်လၢ သုသးကံၢ်ပူၤတက့ၢ်.”—ကလီးစဲ ၃:၁၆; မၤတၢ် ၁၆:၂၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ijwbq-E တၢ်ကွဲးဖုၣ် ၃၉ ¶၃
ခရံာ်ဖိတဖၣ်န့ၣ် တူၢ်လိာ်တၢ်ကူစါယါဘျါသ့ဧါ
၂. ယကြၢး လဲၤဃ့တၢ်ဟ့ၣ်ကူၣ်လၢ ကသံၣ်သရၣ်အဂၤတဖၣ်အအိၣ်ဧါ. နတၢ်ဆါမ့ၢ်နး ဒီးတၢ်လီၤဘၣ်ယိၣ် မ့ၢ်အိၣ်န့ၣ် “ပှၤဟ့ၣ်ကူၣ်တၢ် မ့ၢ်အိၣ်အါဂၤ” န့ၣ်ကကဲဘျုးဝဲ.—ကတိၤဒိ ၁၅:၂၂.
လါယူၤ ၂-၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံ အပူၤ | ကတိၤဒိ ၁၆
တၢ်သံကွၢ်သၢဖျၢၣ်လၢ ကမၤစၢၤပှၤဒ်သိး ပဆၢတဲာ်တၢ်လၢ အဂ့ၤကတၢၢ်ကသ့အဂီၢ်
တၢး၁၄-E ၁/၁၅ ၁၉-၂၀ ¶၁၁-၁၂
ဖဲနသးစၢ်အခါ မၤတၢ်ဃုထၢလၢအဘၣ်
၁၁ ပမ့ၢ်မၤ ယဟိဝၤယွၤတၢ်မၤန့ၣ် ပကဒိးန့ၢ်ဘၣ် တၢ်သးခုအနီၢ်ကီၢ်. (ကတိၤ ၁၆:၂၀) လီၤဂာ်လၢ ဝံယံးရမံယၤ အနဲၣ်ရွဲၢ် စီၤဘၤရူးန့ၣ် အသးပ့ၤနီၣ်ဝဲ တၢ်ဂ့ၢ်တခါအံၤ. ဘၣ်တဘျီ အဝဲမၤယဟိဝၤယွၤ အတၢ်မၤတမုာ်လၢၤဘၣ်. အဃိ ယဟိဝၤယွၤတဲအီၤလၢ “နဃု တၢ်လၢအဒိၣ်အမုၢ်တဖၣ် လၢနနီၢ်ကစၢ်အဂီၢ်လီၤ. ဘၣ်ဆၣ် တဘၣ်ဃုတၢ်သ့ၣ်တဖၣ်န့ၣ် လၢၤတဂ့ၤ. . . . ယကဒုးလီၤဘၣ် တၢ်နးတၢ်ဖှီၣ်လၢ ပှၤခဲလၢာ် အဖီခိၣ်န့ၣ် ဘူးထီၣ်လံ. ဒီးဖဲတၢ်လီၢ်တပူၤဂ့ၤ တပူၤဂ့ၤလၢ နလဲၤန့ၣ် ယကပျဲလၢ နသးသမူ ကပူၤဖျဲးလီၤ.” (ယံး ၄၅:၃, ၅) နဆိကမိၣ် တၢ်လၢအမၤသးခု စီၤဘၤရူးန့ၣ် ကမ့ၢ်မနုၤလဲၣ်. ကမ့ၢ်ဝဲ အဃု တၢ်လၢအဒိၣ်အမုၢ်တဖၣ်ဧါ မ့တမ့ၢ် အပူၤဖျဲးဖဲ ပှၤမၤဟးဂီၤ ဝ့ၢ်ယရူၤၡလ့ၣ်အခါဧါ.—ယၤ ၁:၁၂.
၁၂ ဒီပုၢ်ဝဲၢ် ရမံရိၤန့ၣ် အမၤစၢၤပှၤဂၤအဃိ အဒိးန့ၢ်ဘၣ်တၢ်သးခု. အဝဲတဲဝဲလၢ “ယဟံၣ်ဖိဃီဖိန့ၣ် အဖှီၣ် ဒီးပအိၣ်လၢ သဝီတဖျၢၣ်လၢ ကစၢၢ်ခိၣ်. ယကၠီတဲဝဲလၢ ယမ့ၢ်ထီၣ် ဖၠၣ်စိမိၤန့ၣ် အကလိးန့ၢ်ယၤအပှ့ၤ. အဃိ အကဲဝဲ တၢ်ခွဲးတၢ်ယာ်ဖးဒိၣ်. ဒီးဖဲန့ၣ်အခါ ယဒိးဘျၢထံဝံၤ တယံာ်ဒံးဘၣ်. ဒီးဒီပုၢ်ဝဲၢ်ပှၤလဲၤလၢညါတဂၤ ကွဲမုာ်ယၤလၢ ယကလဲၤစံၣ်တဲၤတဲလီၤတၢ်ဒီးအီၤလၢ ဝ့ၢ်ဆံးဆံးဖိတဖျၢၣ်. ယလဲၤဖဲန့ၣ် ဒီးယမၤလိသ့ထီၣ်ယသးလၢ ပှၤတံာ်ခိၣ်တကပၤ. ဒီးယအိးထီၣ်ဆဲၢ် ဒ်သိးဒီး ယကလုၢ်အီၣ် သးသမူအဂီၢ်. ပတဲဘၣ်ပှၤဂၤလၢ လံာ်စီဆှံ ဒီးပှၤအဲၣ်ဒိးမၤလိ လံာ်စီဆှံအိၣ်အါမး. လၢခံယလဲၤပၣ်ဃုာ်လၢ တၢ်အိၣ်ဖှိၣ်သီသီတဖျၢၣ်လၢ အတဲဝဲပှၤဖဲန့ၣ်အကျိာ်. ခဲအံၤ ယမၤကစၢ်ယွၤ အတၢ်မၤလၢ ဆၢကတီၢ်လၢပှဲၤအိၣ် အနံၣ်တဆံလံ. ယတဲဘၣ်ပှၤဂၤ တၢ်သးခုကစီၣ်လၢ ပှၤအနီၢ်ကစၢ်အကျိာ်အဃိ ယသးခုဒိၣ်မး. တၢ်မၤအဂၤလၢ အကဟ့ၣ်ယၤ တၢ်သးခုဒ်အံၤန့ၣ် တအိၣ်နီတခါဘၣ်.”
တၢး၁၃-E ၉/၁၅ ၁၇ ¶၁-၃
မ့ၢ်နဆီတလဲသးလံဧါ
ပဝဲသ့ၣ်တဖၣ်န့ၣ် ပဒိၣ်ထီၣ်တၢ်လီၢ် ဒီးပဒိၣ်ထီၣ်ဘၣ် ဒ်လဲၣ်န့ၣ် အလီၤဆီလိာ်အသး. အဃိ ဘၣ်ဃးဒီး တၢ်ကူတၢ်သိး, တၢ်အီၣ်တၢ်အီ ဒီးတၢ်အိၣ်ထီၣ်အိၣ်လီၤန့ၣ် ပတၢ်ဃုထၢ လီၤဆီလိာ်သး ဒီးပဘၣ်သူၣ်ဘၣ်သးအီၤ လီၤဆီလိာ်သးစ့ၢ်ကီး.
၂ တၢ်လၢအရ့ဒိၣ်န့ၢ်ဒံး တၢ်သ့ၣ်တဖၣ်အံၤန့ၣ် အိၣ်ဝဲဒံး. အဒိ ပှၤသိၣ်လိပှၤဘၣ်ဃးဒီး တၢ်အဘၣ် ဒီးတၢ်အကမၣ် ဒီးတၢ်လၢ ပှၤတူၢ်လိာ်အီၤသ့ ဒီးပှၤတူၢ်လိာ်အီၤ တသ့ဘၣ်န့ၣ် လီၤဆီလိာ်အသး. ဒီးဘၣ်သ့ၣ်သ့ၣ် ပတၢ်ဃုထၢတဖၣ်န့ၣ် ကဒိးသန့ၤထီၣ်အသးလၢ ပသးလၢအသ့ၣ်ညါဒၣ်တၢ် အဖီခိၣ်. လံာ်စီဆှံတဲဝဲလၢ “ပှၤကလုာ်အဂၤတဖၣ်န့ၣ် တအိၣ်ဒီး တၢ်သိၣ်တၢ်သီဘၣ်. ဘၣ်ဆၣ် ဖဲအဝဲသ့ၣ်မၤတၢ်လၢ အနီၢ်ကစၢ် အကျိာ်အကျာ်အခါ အဝဲသ့ၣ်မၤဝဲ ဒ်တၢ်သိၣ်တၢ်သီ အိၣ်ဝဲအသိး.” (ရိ ၂:၁၄) အဃိ ကစၢ်ယွၤ အတၢ်သိၣ်တၢ်သီ မ့ၢ်တအိၣ်လီၤတံၢ်လီၤဆဲးဘၣ်န့ၣ် ပကြၢးမၤထွဲဒ် ပှၤလၢ ပလီၢ်ကဝီၤပူၤ အတၢ်ထံၣ် ဒီးအတၢ်ဘျၢအိၣ်ဝဲအသိးဧါ.
၃ ခရံာ်ဖိတဖၣ်န့ၣ် တကြၢးမၤဝဲဒ်န့ၣ်ဘၣ်. ဘၣ်မနုၤအဃိလဲၣ်န့ၣ် တၢ်ဂ့ၢ်အိၣ်ဝဲခံထံၣ်. အဆိကတၢၢ်တထံၣ်န့ၣ် လံာ်စီဆှံတဲဝဲလၢ “ပှၤတဂၤ ဆိကမိၣ်ဝဲလၢ အလဲၤကျဲလၢအဘၣ်, ဘၣ်ဆၣ် လၢခံကတၢၢ်န့ၣ် အကျဲဆှၢအီၤဆူ တၢ်သံလီၤ.” (ကတိၤ ၁၆:၂၅) မ့ၢ်လၢ ပတလၢတပှဲၤဘၣ်အဃိ ပတသ့ၣ်ညါ တၢ်အဂ့ၤကတၢၢ်လၢ ပဂီၢ်ဘၣ် ဒီးပလိၣ်ဘၣ် တၢ်ဟံးစုနဲၣ်ကျဲ. (ကတိၤ ၂၈:၂၆; ယံး ၁၀:၂၃) ခံခါတခါန့ၣ် လံာ်စီဆှံပာ်ဖျါထီၣ်ဝဲလၢ မုၣ်ကီၤလံၢ် မ့ၢ် “ဟီၣ်ခိၣ်အကစၢ်” အဃိ မုၣ်ကီၤလံၢ်န့ၣ် အဒိၣ်စိလၢ ပှၤဟီၣ်ခိၣ်ဖိတဖၣ် အတၢ်ပာ်သူၣ်ပာ်သး ဒီးအတၢ်ထံၣ်တဖၣ်အဖီခိၣ်. (၂ ကရံၣ် ၄:၄; ၁ ယိၤ ၅:၁၉) အဃိ ပမ့ၢ်အဲၣ်ဒိး ဒိးန့ၢ်ဘၣ် ယဟိဝၤယွၤ အတၢ်ဆိၣ်ဂ့ၤ ဒီးအဲၣ်ဒိးလၢ အဘၣ်သူၣ်ဘၣ်သးပှၤန့ၣ် ပကဘၣ်မၤထွဲ အတၢ်ဟ့ၣ်ကူၣ်ဖဲ ရိမ့ၤ ၁၂:၂.—ဖးတက့ၢ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1-E ၆၂၉
တၢ်သိၣ်က့ၤသီက့ၤ
ပှၤလၢအဒိကနၣ် တၢ်သိၣ်က့ၤသီက့ၤ ဒီးပှၤလၢတဒိကနၣ် တၢ်သိၣ်က့ၤသီက့ၤဘၣ်န့ၣ် ထံၣ်ဘၣ်တၢ်ဒ်လဲၣ်. ပှၤအၢပှၤသီ, ပှၤနါစိၤ ဒီးပှၤလၢအသကဲာ်ပဝး တဂ့ၤဘၣ်တဖၣ်န့ၣ် အဝဲသ့ၣ် ပာ်ဖျါထီၣ်ဝဲလၢ အသးဟ့ ယဟိဝၤယွၤ အတၢ်သိၣ်က့ၤသီက့ၤ ခီဖျိ အတဒိကနၣ်ဝဲ နီတစဲးဘၣ်. (စံး ၅၀:၁၆, ၁၇; ကတိၤ ၁:၇) အဃိ အဝဲသ့ၣ် ဒိးန့ၢ်ဘၣ်အါထီၣ် တၢ်သိၣ်က့ၤသီက့ၤ ခီဖျိ အထံၣ်ဘၣ်ဝဲ တၢ်ကီတၢ်ခဲ နးမး. တနီၤန့ၣ် အဝဲသ့ၣ် ထံၣ်ဘၣ်ဒီး တၢ်ဖှီၣ်တၢ်ယာ်, တၢ်လီၤမဲာ်ဆှး တၢ်ဆူးတၢ်ဆါ ဒီးဘၣ်သံဆိဆိ. အဃိ တၢ်ကဲထီၣ်သးဒီးအဝဲသ့ၣ် ဒ်ကတိၤဒိတဲဝဲအသိး. ကတိၤဒိ တဲဝဲလၢ “ပှၤဟးဂီၤဖိ အတၢ်မၤနါစိၤတဖၣ်န့ၣ် ကဲထီၣ် တၢ်သိၣ်က့ၤသီက့ၤလၢ အနီၢ်ကစၢ် အဂီၢ်လီၤ.” (ကတိၤ ၁၆:၂၂) ပှၤအံၣ်စရ့လးဖိတဖၣ် အတၢ်လဲၤခီဖျိန့ၣ် ပထံၣ်ဘၣ်လၢ ပှၤလၢတဒိကနၣ် တၢ်သိၣ်က့ၤသီက့ၤဘၣ်န့ၣ် ကထံၣ်ဘၣ်ဒီး တၢ်လၢအလီၤသးအုးဖးဒိၣ်. ဝံတဖၣ် သိၣ်က့ၤသီက့ၤ အဝဲသ့ၣ် ဒီးဘှီဘၣ်ထီၣ်က့ၤ အဝဲသ့ၣ်နာ်က့ အဝဲသ့ၣ် တဒိကနၣ်ဝဲဘၣ်. တကးဒံးဘၣ် ယဟိဝၤယွၤ သိၣ်က့ၤသီက့ၤ အဝဲသ့ၣ် ခီဖျိ အတဆိၣ်ဂ့ၤ အဝဲသ့ၣ်လၢၤဘၣ် ဒီးတဒီသဒၢ အဝဲသ့ၣ်လၢၤဘၣ်. သနာ်က့ အဝဲသ့ၣ် တကနၣ်ဃုာ်ဝဲဘၣ်. အဃိ လၢခံန့ၣ် ဒ်ဝံအတၢ်စံးပာ် အိၣ်ဝဲအသိး ပှၤမၤနၢၤအဝဲသ့ၣ် ဒီးက့ၤဖီၣ် အဝဲသ့ၣ်.—ယံး ၂:၃၀; ၅:၃; ၇:၂၈; ၁၇:၂၃; ၃၂:၃၃; ဟိၤ ၇:၁၂-၁၆; ၁၀:၁၀; ဖါ ၃:၂.
ကတိၤဒိ ၁၆:၃—“တၢ်လၢနမၤတမံၤဂ့ၤ တမံၤဂ့ၤန့ၣ် အးလီၤအီၤလၢ ယဟိဝၤယွၤအစုပူၤတက့ၢ်”
“တၢ်လၢနမၤတမံၤဂ့ၤ တမံၤဂ့ၤန့ၣ် အးလီၤအီၤလၢ ယဟိဝၤယွၤအစုပူၤတက့ၢ်. ဒီးနတၢ်ရဲၣ်တၢ်ကျဲၤ ကကဲထီၣ်လိၣ်ထီၣ်လီၤ.”—ကတိၤဒိ ၁၆:၃, ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ.
“တလ့ၣ်နမၤတၢ်တဖၣ် လၢယွၤအလိၤတက့ၢ်, ဒီးနကူၣ်ထီၣ်ဖးလီၤတၢ်န့ၣ် ကကဲထီၣ်တၢ်လီၤ.”—ကတိၤဒိ ၁၆:၃, မ့ၤစံၣ်.
ကတိၤဒိ ၁၆:၃ အခီပညီ
လံာ်စီဆှံတဆၢအံၤ ဒုးနာ်န့ၢ်ပှၤလၢ ပှၤလၢအဘူၣ်ထီၣ်ဘါထီၣ် ကစၢ်ယွၤအမ့ၢ်အတီန့ၣ် အဝဲသ့ၣ် မ့ၢ်သန့ၤအသးလၢ ယဟိဝၤယွၤ ခီဖျိ ဃုအတၢ်ဟံးစုနဲၣ်ကျဲ ဒီးမၤထွဲအီၤန့ၣ် အဝဲသ့ၣ် အတၢ်ရဲၣ်တၢ်ကျဲၤတဖၣ် ကကဲထီၣ်လိၣ်ထီၣ်ဝဲ.
“တၢ်လၢနမၤတမံၤဂ့ၤ တမံၤဂ့ၤန့ၣ် အးလီၤအီၤလၢ ယဟိဝၤယွၤအစုပူၤ.” ပှၤလၢအဘူၣ်ထီၣ်ဘါထီၣ် ယဟိဝၤယွၤတဖၣ်န့ၣ် အဝဲသ့ၣ် ဃုယဟိဝၤယွၤ အတၢ်ဟံးစုနဲၣ်ကျဲ လၢတၢ်ဆီၣ်လီၤသးအပူၤ. (ယၤကိာ် ၁:၅) ဘၣ်မနုၤအဃိလဲၣ်. တၢ်ဂ့ၢ်အိၣ်ဝဲအါမံၤ. တၢ်ဂ့ၢ်တခါန့ၣ် မ့ၢ်ဝဲ ညီနုၢ် ပဝဲပှၤဟီၣ်ခိၣ်ဖိတဖၣ်န့ၣ် တၢ်ကကဲထီၣ်အသးဒီးပှၤ ဒ်လဲၣ်ဒ်လဲၣ်န့ၣ် ပတသ့ၣ်ညါလီၤတံၢ်ဘၣ် ဒီးဘၣ်သ့ၣ်သ့ၣ် ပမၤတသ့ နီတမံၤဘၣ်. (စံၣ်တဲၤတဲလီၤတၢ် ၉:၁၁; ယၤကိာ် ၄:၁၃-၁၅) ဒီးအဂၤတခါန့ၣ် တဘျီတခီၣ် ပကဘၣ်မၤ ကဲထီၣ်လိၣ်ထီၣ် ပတၢ်ရဲၣ်တၢ်ကျဲၤ ဒ်လဲၣ်န့ၣ် ပတသ့ၣ်ညါစ့ၢ်ကီးဘၣ်. ခီဖျိလၢ တၢ်ဂ့ၢ်တဖၣ်အံၤအဃိ ပှၤအါဂၤန့ၣ် အးလီၤသးလၢ ကစၢ်ယွၤ အစုပူၤ. အဝဲသ့ၣ် မၤဝဲဒ်န့ၣ် ခီဖျိ အဃ့ကစၢ်ယွၤ အတၢ်ဟံးစုနဲၣ်ကျဲ ဒီးအိၣ်မူမၤထွဲဝဲ ဒ်ကစၢ်ယွၤ အကလုၢ်ကထါ လံာ်စီဆှံတဲဝဲအသိး.—ကတိၤဒိ ၃:၅, ၆; ၂ တံၤမသ့း ၃:၁၆, ၁၇.
ဖဲလံာ်စီဆှံ တဆၢအံၤတဲဝဲ “တၢ်လၢနမၤတမံၤဂ့ၤ တမံၤဂ့ၤန့ၣ် အးလီၤအီၤလၢ ယဟိဝၤယွၤအစုပူၤ” န့ၣ်အခီပညီလိၤလိၤ မ့ၢ်ဝဲ “တလ့ၣ်နမၤတၢ်တဖၣ် လၢယွၤအလိၤ.” လံာ်တဘ့ၣ် ပာ်ဖျါထီၣ်ဝဲလၢ တၢ်ကတိၤအံၤ အဒုးထံၣ်တမှံပှၤလၢ “ပှၤတဂၤ ပာ်ထီၣ်အတၢ်ဝံဃၢလၢ ပှၤလၢအစိကမီၤဒိၣ်န့ၢ်အီၤတဂၤ အဖီခိၣ်.” အဃိ ပှၤလၢအအးလီၤသးလၢ ယဟိဝၤယွၤအစုပူၤန့ၣ် အနာ်ဝဲသ့သပှၢ်ကတၢၢ်လၢ ယဟိဝၤယွၤ ကမၤစၢၤအီၤ ဒီးမၤဂၢၢ်မၤကျၢၤအီၤ.—စံးထီၣ်ပတြၢၤ ၃၇:၅; ၅၅:၂၂.
ဘၣ်ဆၣ် ဖဲအတဲဝဲ “တၢ်လၢနမၤတမံၤဂ့ၤ တမံၤဂ့ၤ” န့ၣ် အခီပညီတမ့ၢ်လၢ ကစၢ်ယွၤ ကဘၣ်သူၣ်ဘၣ်သး ဒီးဆိၣ်ဂ့ၤ တၢ်လၢပှၤကမၤအီၤ ကိးမံၤဒဲးဘၣ်. ဒ်သိး ပကဒိးန့ၢ်ဘၣ် ယဟိဝၤယွၤ အတၢ်ဆိၣ်ဂ့ၤအဂီၢ် တၢ်လၢပမၤအီၤတဖၣ်န့ၣ် ကဘၣ်ဘၣ်လိာ်အသးဒီး ကစၢ်ယွၤ အတၢ်ဘျၢ ဒီးအတၢ်ဘၣ်သး. (စံးထီၣ်ပတြၢၤ ၁၂၇:၁; ၁ ယိၤဟၣ် ၅:၁၄) ကစၢ်ယွၤ တဆိၣ်ဂ့ၤ ပှၤလၢအတဒိကနၣ်တၢ်ဘၣ်. ဒီး “ပှၤအၢပှၤသီ အတၢ်ကူၣ်ထီၣ်ဖးလီၤန့ၣ် အဝဲမၤတံာ်တာ်ဝဲလီၤ.” (စံးထီၣ်ပတြၢၤ ၁၄၆:၉) မ့မ့ၢ်ပှၤလၢ အအးလီၤအသးလၢ ယဟိဝၤယွၤအစုပူၤ ခီဖျိ အဒိကနၣ် အတၢ်ဟံးစုနဲၣ်ကျဲ လၢလံာ်စီဆှံပူၤန့ၣ် ယဟိဝၤယွၤ ကမၤစၢၤ အဝဲသ့ၣ်.—စံးထီၣ်ပတြၢၤ ၃၇:၂၃.
“နတၢ်ရဲၣ်တၢ်ကျဲၤ ကကဲထီၣ်လိၣ်ထီၣ်.” လၢကီၤလၤဝါကျိၤန့ၣ် ပှၤတနီၤကွဲးကျိာ်ထံဝဲ လံာ်စီဆှံတဆၢအံၤလၢ “နတၢ်ရဲၣ်တၢ်ကျဲၤ အခီၣ်ထံးခီၣ်ဘိ ကဂၢၢ်ကျၢၤဝဲ.” တၢ်ကတိၤလၢအမ့ၢ် “အခီၣ်ထံးခီၣ်ဘိ ကဂၢၢ်ကျၢၤဝဲ” န့ၣ်အဒုးဆိကမိၣ်ပှၤလၢ ပှၤပာ်လီၤ တၢ်သူၣ်ထီၣ် အခီၣ်ထံး. ဒီးအါဘျီန့ၣ် ပှၤသူတၢ်ကတိၤအံၤ ဒ်သိး ကပာ်ဖျါထီၣ်လၢ ကစၢ်ယွၤ အတၢ်ဘၣ်တ့တဖၣ် အိၣ်ဂၢၢ်ကျၢၤဝဲ. (ကတိၤဒိ ၃:၁၉; ယံးရမံယၤ ၁၀:၁၂) အဃိ တၢ်လၢပကမၤအီၤတဖၣ် မ့ၢ်ဘၣ်ကစၢ်ယွၤအသးန့ၣ် ကစၢ်ယွၤ ကမၤစၢၤပှၤ ဒ်သိး ပတၢ်ရဲၣ်တၢ်ကျဲၤတဖၣ် ကဂၢၢ်ကျၢၤဝဲ. ဒီးပကအိၣ်ဘၣ်ပူၤပူၤဖျဲးဖျဲး ဒီးအိၣ်ဒီးတၢ်အိၣ်မူလၢ အပှဲၤဒီး တၢ်မုာ်တၢ်ပၢၤ ဒီးတၢ်သးခု.—စံးထီၣ်ပတြၢၤ ၂၀:၄; ကတိၤဒိ ၁၂:၃.
တၢ်ဂ့ၢ်အဂၤလၢ အဘၣ်ဃးဒီး ကတိၤဒိ ၁၆:၃
လံာ်ကတိၤဒိအပူၤ တၢ်ဂ့ၢ်အါတက့ၢ်န့ၣ် စီၤၡလိၤမိၤကွဲးဝဲ. ဒီးအကွဲးဝဲ ကတိၤဒိ အဆၢဒိၣ် ၁၆ စ့ၢ်ကီး. ခီဖျိလၢ စီၤပၤၡလိၤမိၤအိၣ်ဒီး တၢ်ကူၣ်သ့လၢ အဟဲလၢ ကစၢ်ယွၤအအိၣ်အဃိ အဝဲတဲဝဲ တၢ်ကတိၤဒိ သ့ဝဲအါမး.—၁ စီၤပၤ ၄:၂၉, ၃၂; ၁၀:၂၃, ၂၄.
လံာ်ကတိၤဒိ အဆၢဒိၣ် ၁၆ အခီၣ်ထံးန့ၣ် စီၤၡလိၤမိၤ စံးပတြၢၤ ကစၢ်ယွၤ အတၢ်ကူၣ်သ့ ဒီးပာ်ဖျါထီၣ်ဝဲလၢ ယဟိဝၤယွၤသးဟ့ဝဲ ပှၤလၢအပာ်ထီၣ်ထီသး. (ကတိၤဒိ ၁၆:၁-၅) ဒီးအဆၢဖိ လၢခံတဖၣ်န့ၣ် အသိၣ်လိပှၤ တၢ်ဂ့ၢ်လၢအရ့ဒိၣ်တခါ လၢပထံၣ်ဘၣ်အီၤ လၢလံာ်ကတိၤဒိပူၤ အဘျီအါမး. တၢ်ဂ့ၢ်တခါအံၤ မ့ၢ်ဝဲဒၣ် ပှၤဟီၣ်ခိၣ်ဖိတဖၣ်န့ၣ် အမ့ၢ်အိၣ်ဒီး တၢ်ဆီၣ်လီၤသး ဒီးပျဲလၢ ယဟိဝၤယွၤ ကဟံးစုနဲၣ်ကျဲအီၤမး အဝဲသ့ၣ် ကကဲထီၣ် ပှၤလၢအကူၣ်တၢ်သ့ ဒီးမၤတၢ် ကကဲထီၣ်လိၣ်ထီၣ်. (ကတိၤဒိ ၁၆:၃, ၆-၈, ၁၈-၂၃) တၢ်ဂ့ၢ်အရ့ဒိၣ် တခါအံၤန့ၣ် ပထံၣ်ဘၣ်အီၤလၢ လံာ်စီဆှံပူၤ အဘျီအါမး.—စံးထီၣ်ပတြၢၤ ၁:၁-၃; ယၡါယၤ ၂၆:၃; ယံးရမံယၤ ၁၇:၇, ၈; ၁ ယိၤဟၣ် ၃:၂၂.
လါယူၤ ၉-၁၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၇
ပှၤနီၢ်ဒီမိၢ်ဝၤခံဂၤ အိၣ်ဃူအိၣ်ဖိး ကသ့ဒ်လဲၣ်
g-E ၉/၁၄ ၁၁ ¶၂
ပပျၢ်တၢ်ကမၣ်ကသ့ဒ်လဲၣ်
သံကွၢ်လီၤနသး တီတီလိၤလိၤ. လံာ်စီဆှံတဲဝဲလၢ ပှၤတနီၤန့ၣ် “အသးထီၣ်တၢ်ချ့ “ ဒီး “အသးချ့.” (ကတိၤဒိ ၂၉:၂၂) နကဲပှၤဒ်န့ၣ်ဧါ. သံကွၢ်လီၤနသးလၢ ‘မ့ၢ်ယသးဘၣ်ဒိညီဧါ, ယသးထီၣ်တၢ်ညီဧါ ဒီးယဒုးကဲထီၣ် တၢ်ဂ့ၢ်ဆံးဆံးဖိလၢ တၢ်ဂ့ၢ်ဖးဒိၣ်ဧါ.’ လံာ်စီဆှံ တဲဝဲလၢ “ပှၤတဂၤ မ့ၢ်တဲဝံၤတဲက့ၤ တၢ်ကမၣ်တခါန့ၣ် အဂ့ၢ်န့ၣ် သကိးလၢ အရ့လိာ်သး ဘူးဘူးဒၣ်လဲာ် ကလီၤဖးဝဲလီၤ.” (ကတိၤ ၁၇:၉; စံၣ် ၇:၉) လၢတၢ်ဆီဟံၣ်ဆီဃီအပူၤနာ်က့ တၢ်ကဲထီၣ်အသးဒ်န့ၣ်သ့. အဃိ နမ့ၢ်ကဟံးဃာ် နသးသမူတံၤသကိး အတၢ်ကမၣ်န့ၣ် သံကွၢ်လီၤနသးလၢ ‘ယဆဲးအိၣ်ဒီး တၢ်သးစူၤလၢအဖီခိၣ် အါန့ၢ်ဒံးအလီၢ်ကသ့ဧါ.’—လံာ်စီဆှံ တၢ်ဟံးစုနဲၣ်ကျဲ– ၁ ပ့းတရူး ၄:၈.
တၢး၀၈-E ၅/၁ ၁၀ ¶၆-၁၁ ¶၁
မၤဘၣ်ဂီၢ်က့ၤ တၢ်ဂ့ၢ်ကီ
၁. ပာ်ပနီၣ်ဃာ် တၢ်ဆၢကတီၢ်လၢ ကမၤဘၣ်ဂီၢ်က့ၤ တၢ်ဂ့ၢ်ကီ. လံာ်စီဆှံတဲဝဲလၢ “တၢ်ဆၢကတီၢ် အိၣ်ဝဲလၢ တၢ်ခဲလၢာ်အဂီၢ် . . . တၢ်ဆၢကတီၢ်လၢ ပှၤကအိၣ်ဘှ့ၣ်အဂီၢ် ဒီးတၢ်ဆၢကတီၢ်လၢ ပှၤကတဲတၢ်အဂီၢ်.” (စံၣ်တဲၤတဲလီၤတၢ် ၃:၁, ၇) ဒ်လံာ်စီဆှံတဆၢအံၤ တဲဝဲအသိး တၢ်ကီတၢ်ခဲတနီၤန့ၣ် မၤသးဒိၣ်ထီၣ်ပှၤ ဖးဒိၣ်သ့. တၢ်မ့ၢ်ကဲထီၣ်အသးဒီးပှၤ ဒ်န့ၣ်န့ၣ် တချုးလၢ ပသးဒိၣ်ထီၣ်တၢ် ဖးဒိၣ်ဒံးဘၣ်အခါ ပမ့ၢ် “အိၣ်ဘှ့ၣ်” န့ၣ် ကမၤစၢၤပှၤဒ်သိး ပကပၢၤပသး. လံာ်စီဆှံ ဟ့ၣ်ကူၣ်ဝဲလၢ “ပှၤစးထီၣ်တၢ်အ့ၣ်လိာ်န့ၣ် လီၤဂာ်ဒ်သိးဒီး ပှၤပျၢ်လီၤထံတမၢၣ်လီၤ. တချုးလၢ တၢ်အ့ၣ်လိာ် ကဲထီၣ်ဒံးဘၣ်န့ၣ် ဟးထီၣ်ဆိတက့ၢ်.” (ကတိၤ ၁၇:၁၄) အဃိ ပမ့ၢ်မၤထွဲ လံာ်စီဆှံအတၢ်ဟ့ၣ်ကူၣ်အံၤန့ၣ် ကမၤစၢၤပှၤဒ်သိး ပကအိၣ်ဃူအိၣ်ဖိး ဒီးပသးသမူတံၤသကိး.
ဘၣ်ဆၣ် “တၢ်ဆၢကတီၢ်လၢ ပှၤကတဲတၢ်အဂီၢ်” န့ၣ် အိၣ်ဝဲစ့ၢ်ကီး. ဖဲတၢ်ကီတၢ်ခဲ အိၣ်ထီၣ်အခါ နမ့ၢ်တမၤဘၣ်ဂီၢ်က့ၤအီၤဘၣ်န့ၣ် လၢခံ တၢ်ကီတၢ်ခဲအံၤ ဒိၣ်ထီၣ်ဝဲသ့. အဃိ တဘၣ်ဆိကမိၣ်လၢ တၢ်ကီတၢ်ခဲအံၤ ကဘၣ်ဂီၢ်က့ၤလၢ အနီၢ်ကစၢ်န့ၣ်တဂ့ၤ. နမ့ၢ်ဆၢတဲာ်လၢ နကတဲသကိးတၢ်ဂ့ၢ်အံၤ ဒီးနသးသမူတံၤသကိး လၢခံတဘျီန့ၣ် ဃုထၢ တၢ်ဆၢကတီၢ် လၢအဂ့ၤ. နမ့ၢ်မၤ ဒ်န့ၣ်န့ၣ် မ့ၢ်ဝဲ နပာ်ဖျါထီၣ်လၢ နပာ်ကဲအီၤ. နမ့ၢ်အၢၣ်လီၤအီၤလၢ နကတဲသကိးက့ၤ တၢ်ဂ့ၢ်အံၤန့ၣ် ကမၤစၢၤနၤ ဒီးနသးသမူတံၤသကိးလၢ ကမၤထွဲ တၢ်ဟ့ၣ်ကူၣ် လၢအမ့ၢ် “တဘၣ်ပျဲ သုတၢ်သးဒိၣ် အိၣ်ဒံးတုၤလၢ မုၢ်လီၤနုာ်တဂ့ၤ.” (အ့းဖ့းစူး ၄:၂၆) ဒီးမၤဒ် နအၢၣ်လီၤအီၤအသိး.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ပမ့ၢ်ပျံၤယဟိဝၤယွၤန့ၣ် ကကဲဘျုးလၢပဂီၢ်ထီဘိ
၃ ပသ့ၣ်ညါလၢ ယဟိဝၤယွၤ သမံသမိးပသးအဃိ အရ့ဒိၣ်လၢ ပကဒီသဒၢပသး. ဖဲယဟိဝၤယွၤ သမံသမိးပသးအခါ အထံၣ်ဝဲ တၢ်အိၣ်လၢပသးပူၤ ဒီးပတၢ်ပာ်သးအိၣ်ဒ်လဲၣ်န့ၣ် အသ့ၣ်ညါဝဲ ဂ့ၤကတၢၢ်. (ဖး ကတိၤဒိ ၁၇:၃.) ဒီးယဟိဝၤယွၤ အတၢ်ဟ့ၣ်ကူၣ်န့ၣ် ကမၤစၢၤပှၤဒ်သိး ပကန့ၢ်ဘၣ် တၢ်မူထူယိာ်အဃိ ပမ့ၢ်ဆိမိၣ်ထံ အတၢ်ဟ့ၣ်ကူၣ်ထီဘိန့ၣ် အကအဲၣ်ပှၤ. (ယိၤဟၣ် ၄:၁၄) တကးဒံးဘၣ် ပတပျဲလၢ မုၣ်ကီၤလံၢ်အတၢ်လံၣ်တၢ်လီ ဒိၣ်စိလၢပဖီခိၣ်ဘၣ် ဒီးပတကွၢ်လိ ပှၤဟီၣ်ခိၣ်ဖိ အလုၢ်လၢ်လၢ အတဂ့ၤတဖၣ်ဘၣ်. (၁ ယိၤဟၣ် ၅:၁၈, ၁၉) တကးဒံးဘၣ် ပတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤဒိၣ်ထီၣ်န့ၣ် ပကအဲၣ်အီၤဒိၣ်ထီၣ် ဒီးပကပာ်ကဲအီၤအါထီၣ်. ခီဖျိလၢ ပတဘၣ်သး မၤဘၣ်ဒိ ယဟိဝၤယွၤအသးဘၣ်အဃိ လၢပတၢ်ဆိမိၣ်ပူၤနာ်က့ ပတဘၣ်သးမၤကမၣ်အီၤဘၣ်. အဃိ ပမ့ၢ်ထံၣ်ဘၣ်ဒီး တၢ်လ့ပစီလၢ ပကမၤကမၣ်တၢ်န့ၣ် ပကဘၣ် သံကွၢ်လီၤပသးလၢ ‘ဘၣ်မနုၤအဃိ ယဘၣ်သး မၤဘၣ်ဒိ ပှၤလၢအအဲၣ်ယၤဒိၣ်မးတဂၤ အသးလဲၣ်.’—၁ ယိၤဟၣ် ၄:၉, ၁၀.
ကတိၤဒိ ၁၇:၁၇—“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး”
“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး ဒီးဖဲတၢ်ကိၢ်တၢ်ဂီၤအိၣ်ဝဲအခါ အကဲထီၣ်ဝဲ နဒီပုၢ်ဝဲၢ်လီၤ.”—ကတိၤ ၁၇:၁၇, ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ.
“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး ဒီးဖဲတၢ်ကိၢ်တၢ်ဂီၤအိၣ်ဝဲအခါ အကဲထီၣ်ဝဲ နဒီပုၢ်ဝဲၢ်လီၤ.”—ကတိၤ ၁၇:၁၇, မ့ၤစံၣ်.
ကတိၤဒိ ၁၇:၁၇ အခီပညီ
တံၤသကိးတံၢ်နီၢ်န့ၣ် ပနာ်န့ၢ်အီၤသ့. အဝဲသ့ၣ် လီၤဂာ်ဒ်သိးဒီး ပဒီပုၢ်ဝဲၢ်တံၢ်နီၢ် လၢအသူၣ်အိၣ်သးအိၣ်ပှၤ ဒီးတီဒီးပှၤ လီၤဆီဒၣ်တၢ် ဖဲပထံၣ်ဘၣ်ဒီး တၢ်ကီတၢ်ခဲ အဆၢကတီၢ်.
“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး.” တၢ်ကတိၤအံၤ အခီပညီအိၣ်စ့ၢ်ကီးလၢ “တံၤသကိးန့ၣ် ပာ်ဖျါထီၣ်တၢ်အဲၣ်ထီဘိ.” ဧ့ၤဘြံၤအတၢ်ကတိၤ လၢအမ့ၢ် “တၢ်အဲၣ်” န့ၣ်အတမ့ၢ်ထဲ တၢ်တူၢ်ဘၣ်တခါဘၣ်. အခီပညီအိၣ်စ့ၢ်ကီးလၢ ပမ့ၢ်အဲၣ်ပှၤတဂၤန့ၣ် ပကတူၢ်ဆါသး လၢအဂီၢ် ဒီးပာ်ဖျါထီၣ်လၢပအဲၣ်အီၤ. (၁ ကရံၣ်သူး ၁၃:၄-၇) တံၤသကိးလၢအအိၣ်ဒီး တၢ်အဲၣ်ဒ်န့ၣ်န့ၣ် ဖဲအဝဲသ့ၣ် နၢ်ပၢၢ်ကမၣ်လိာ်သး မ့တမ့ၢ် ထံၣ်ဘၣ်ဒီးတၢ်ကီတၢ်ခဲအခါ ကကဲထီၣ် တၢ်မၤကွၢ်လၢ အဝဲသ့ၣ် အဘၢၣ်စၢၤနာ်က့ အဝဲသ့ၣ် ဆဲးတီလိာ်သးဒံး. ဒီးအဝဲသ့ၣ် သးအိၣ်ပျၢ်လိာ်သးတၢ်ကမၣ်. (ကတိၤဒိ ၁၀:၁၂) ဒီးအဝဲတဂၤ မ့ၢ်ဒိးန့ၢ်ဘၣ် တၢ်လၢအဂ့ၤ တမံၤမံၤန့ၣ် အဝဲတဂၤ တသူၣ်က့ၣ်သးက့ၣ်အီၤဘၣ် ဒီးသးခုစၢၤအီၤ.—ရိမ့ၤ ၁၂:၁၅.
“တံၤသကိးတံၢ်နီၢ်န့ၣ် . . . ဖဲတၢ်ကိၢ်တၢ်ဂီၤ အိၣ်ဝဲအခါ အကဲထီၣ်ဝဲ နဒီပုၢ်ဝဲၢ်.” လံာ်ကတိၤဒိ အဲၣ်ဒိးတဲဝဲလၢ တံၤသကိးတံၢ်နီၢ်န့ၣ် အကဲထီၣ်ဒ် ပဒီပုၢ်ဝဲၢ်အသိးသ့. တၢ်လၢဒီပုၢ်ဝဲၢ်တံၢ်နီၢ်န့ၣ် မၤစၢၤလိာ်သး ဖဲတၢ်ကီတၢ်ခဲ အိၣ်ထီၣ်ဝဲအခါ. ဒ်န့ၣ်အသိး ဖဲပသကိးတဂၤ ထံၣ်ဘၣ်ဒီး တၢ်ကီတၢ်ခဲအခါ ပမ့ၢ်မၤစၢၤအီၤလၢ အဂ့ၤကတၢၢ်န့ၣ် ပကကဲထီၣ် အဒီပုၢ်ဝဲၢ်နီၢ်ကီၢ်. ဒီးတံၤသကိး တံၢ်နီၢ်လၢ အလီၤဂာ်ဒ်သိးဒီး ဒီပုၢ်ဝဲၢ်န့ၣ် ဖဲအဝဲသ့ၣ် ထံၣ်ဘၣ်ဒီး တၢ်မၤကွၢ်အခါ အဝဲသ့ၣ် ပာ်ဖျါထီၣ် တၢ်အဲၣ် ဒီးတၢ်ပာ်ကဲလိာ်သးအဃိ အဝဲသ့ၣ် အတၢ်ရ့လိာ်သး တဟးဂီၤဘၣ်, လၢတၢ်န့ၣ်အလီၢ် အဝဲသ့ၣ် အတၢ်ရ့လိာ်သး ဂၢၢ်ကျၢၤထီၣ်ဝဲ.
ကတိၤဒိ ၁၇:၁၇ အတၢ်ဂ့ၢ်လၢ အမဲာ်ညါ ဒီးအလီၢ်ခံ
လၢလံာ်ကတိၤဒိအပူၤန့ၣ် တၢ်ဟ့ၣ်ကူၣ်လၢအဂ့ၤ အိၣ်ဝဲအါမး. တၢ်ဟ့ၣ်ကူၣ်တဖၣ်န့ၣ် ပှၤကွဲးအီၤဖုၣ်ဖုၣ်ဖိ ဒီးလီၤထုးန့ၢ်သူၣ်ထုးန့ၢ်သး. လံာ်ကတိၤဒိအပူၤ တၢ်ဂ့ၢ်အါတက့ၢ်န့ၣ် စီၤၡလိၤမိၤကွဲးဝဲ ဒီးအကွဲးဝဲ ဒ်သိးဒီး ပှၤကွဲးဧ့ၤဘြံၤအထါတဖၣ်. အဃိ ထါအါတက့ၢ်န့ၣ် တသီၣ်သဃဲၤလိာ်သးဘၣ်. ဒီးထါတနီၤန့ၣ် ပှၤသူဝဲ တၢ်ထိၣ်သတြီၤလၢ အလီၤဂာ်လိာ်သး ဒီးတနီၤန့ၣ်ပှၤသူဝဲ တၢ်ထိၣ်သတြီၤလၢ အလီၤဆီလိာ်သး. သနာ်က့ ထါခံကျိၤတကျိၤန့ၣ် ဒိးသန့ၤထီၣ်အသးလၢ တၢ်ဂ့ၢ်လၢတၢတကျိၤအပူၤ. အဒိ ကတိၤဒိ ၁၇:၁၇ န့ၣ်အသူဝဲ တၢ်ထိၣ်သတြီၤလၢ အလီၤဂာ်လိာ်သး. ဒီးတၢ်ဂ့ၢ်လၢ လံာ်ခံကျိၤတကျိၤန့ၣ် အဆီၣ်ထွဲဝဲ တၢ်ဂ့ၢ်လၢ လံာ်တၢတကျိၤ. မ့မ့ၢ် ကတိၤဒိ ၁၈:၂၄ န့ၣ်အသူဝဲ တၢ်ထိၣ်သတြီၤလၢ အလီၤဆီလိာ်သး. ဖဲန့ၣ်တဲဝဲလၢ “တံၤသကိးလၢ အမၤဆါလိာ်သး တဂၤဒီးတဂၤန့ၣ် အိၣ်ဝဲ, ဘၣ်ဆၣ် တံၤသကိးလၢ အတီဒီးနၤ ဒိၣ်န့ၢ်ဒံး နဒီပုၢ်ဝဲၢ်န့ၣ် အိၣ်ဝဲစ့ၢ်ကီးလီၤ.”
ဖဲစီၤၡလိၤမိၤကွဲးဝဲ ကတိၤဒိ ၁၇:၁၇ အခါ ဘၣ်သ့ၣ်သ့ၣ် အဝဲကဆိကမိၣ်ဘၣ်ဝဲ အပါစီၤဒၤဝံး ဒီးစီၤပၤစီလူးအဖိခွါ စီၤယိနၤသၣ် ဒီသကိးအဂ့ၢ်. (၁ ၡမူၤအ့လး ၁၃:၁၆; ၁၈:၁; ၁၉:၁-၃; ၂၀:၃၀-၃၄, ၄၁, ၄၂; ၂၃:၁၆-၁၈) စီၤဒၤဝံး ဒီးစီၤယိနၤသၣ်န့ၣ် တဒီဘူးဒီတံၢ်လိာ်သး သနာ်က့ အဝဲသ့ၣ် တီလိာ်သး တဂၤဒီးတဂၤ ဒိၣ်န့ၢ်ဒံး အဒီပုၢ်ဝဲၢ်ဒံး. စီၤယိနၤသၣ်န့ၣ် တၢ်လီၤဘၣ်ယိၣ်အိၣ်လၢ အသးသမူအဂီၢ် သနာ်က့ အဝဲဒီသဒၢ အသကိး စီၤဒၤဝံး.
ကတိၤဒိ ၁၇:၁၇ လၢလံာ်စီဆှံ တၢ်ကွဲးကျိးထံအဂၤ
“တံၤသကိးတဖၣ်ဒုးနဲၣ်အတၢ်အဲၣ်တၢ်ကွံထီဘိလီၤ. မ့တမ့ၢ်လၢ တၢ်နီၤတူၢ်သကိး တၢ်ကီတၢ်ခဲဘၣ်ဒီး ဒီပုၢ်ဝဲၢ်တဖၣ် အိၣ်လၢမနုၤအဂီၢ်လဲၣ်.”—ခ့ခါစှီၤကျိာ်.
လါယူၤ ၁၆-၂၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၈
ဟ့ၣ်ဂံၢ်ဟ့ၣ်ဘါ ပှၤလၢအတၢ်အိၣ်ဆူၣ်အိၣ်ချ့ တဂ့ၤဘၣ်တဖၣ်
တၢ်ကူၣ်သ့နီၢ်ကီၢ် ကီးပသူထီၣ်ဖးဒိၣ်
၁၇ တချုးလၢ နတဲတၢ်ဒံးဘၣ်န့ၣ် ဆိကမိၣ်ဆိ. ပမ့ၢ်တပလီၢ်ပသးဘၣ်န့ၣ် ပတၢ်ကတိၤတဖၣ် မၤဘၣ်ဒိပှၤဂၤသ့. အဃိ လံာ်စီဆှံ တဲဝဲလၢ “တၢ်ကတိၤလၢ ပှၤတဆိကမိၣ်ဆိအီၤဘၣ်ဒီး တဲအီၤန့ၣ် လီၤဂာ်ဒ်သိးဒီး နးလၢအဆဲးတၢ်တဘ့ၣ်, မ့မ့ၢ် ပှၤကူၣ်တၢ်သ့ အပျ့ၤန့ၣ် မၤဘျါက့ၤတၢ်လီၤ.” (ကတိၤဒိ ၁၂:၁၈) ပမ့ၢ်ဘၣ်သး အိၣ်ဃူအိၣ်ဖိးဒီးပှၤဂၤန့ၣ် ပှၤဂ့ၢ်လၢ အတမ့ၢ်တတီဘၣ်တဖၣ် ပတဘၣ်ဟးတဲဘၣ်. (ကတိၤဒိ ၂၀:၁၉) တကးဒံးဘၣ် ပမ့ၢ်အဲၣ်ဒီးလၢ ပတၢ်ကတိၤကမၤမုာ်ပှၤသး ဒီးတမၤဘၣ်ဒိပှၤသးဘၣ်န့ၣ် ပကဘၣ်ဖးလံာ်စီဆှံ ဒီးဆိကမိၣ်ထံအီၤ. (လူၤကၣ် ၆:၄၅) ပမ့ၢ်ဆိကမိၣ်ထံ တၢ်လၢလံာ်စီဆှံတဲဝဲန့ၣ် သိးဒီး ပတၢ်ကတိၤတဖၣ် ကလီၤဂာ်ဒ် “တၢ်ကူၣ်သ့ အထံထီၣ်ပၢၢ်” လၢကကဲထီၣ် တၢ်ဂံၢ်တၢ်ဘါ လၢပှၤဂၤအဂီၢ်.—ကတိၤဒိ ၁၈:၄.
mrt-E တၢ်ကွဲးဖုၣ် ၁၉ တၢ်လွံၢ်နၢၣ်
ဖဲနတၢ်အိၣ်ဆူၣ်အိၣ်ချ့တဂ့ၤလၢၤဘၣ် သတူၢ်လာ်အခါ နလဲၤခီဖျိအီၤ ကန့ၢ်အဂီၢ် နကဘၣ်မၤဒ်လဲၣ်
ဒိကနၣ်န့ၢ်အီၤဂ့ၤဂ့ၤ. ကျဲအဂ့ၤကတၢၢ်တဘိလၢ နမၤစၢၤ နသကိးသ့န့ၣ် မ့ၢ်ဝဲ ဖဲအဝဲဘၣ်သး တဲတၢ်အခါ နဒိကနၣ်န့ၢ်အီၤ. ဒီးတဘၣ်ဆိကမိၣ်လၢ နကဘၣ်စံးဆၢ တၢ်လၢအဝဲတဲဝဲ ခဲလၢာ်န့ၣ်တဂ့ၤ. ညီနုၢ်န့ၣ် ထဲဒၣ် နဒိကနၣ်န့ၢ်အီၤန့ၣ် လၢပှဲၤလၢအဂီၢ်လံ. ဂုာ်ကျဲးစၢးအိၣ်ဒီး တၢ်ထံၣ်လၢအလဲၢ် ဒီးတဘၣ် ဆိကမိၣ်ကမၣ်အီၤတဂ့ၤ. လီၤဆီဒၣ်တၢ် အတၢ်ဆါ မ့ၢ်တကဲ တၢ်ဆါလၢ အအိၣ်ဖျါလၢခိဘၣ်န့ၣ် တဘၣ်ဆိကမိၣ်လၢ နနၢ်ပၢၢ် တၢ်လၢအတူၢ်ဘၣ်တဂ့ၤ.—ကတိၤဒိ ၁၁:၂.
တဲတၢ်လၢ အကဲထီၣ်တၢ်ဂံၢ်တၢ်ဘါ. ဘၣ်သ့ၣ်သ့ၣ် နကဘၣ်တဲ တၢ်မနုၤလဲၣ်န့ၣ် နတသ့ၣ်ညါဘၣ်. သနာ်က့ နမ့ၢ်တဲတၢ်ကတိၤထဲ စှၤကိာ်ထံၣ် ဒီးပာ်ဖျါထီၣ်လၢ နနၢ်ပၢၢ်စၢၤ တၢ်လၢ အဝဲလဲၤခီဖျိဘၣ်ဝဲန့ၣ် ကမၤမုာ်ထီၣ်အသး ဒိၣ်န့ၢ်ဒံး နတတဲ တၢ်နီတမံၤဘၣ်ဒံး. နတဲတၢ် မ့ၢ်တဘၣ်အါအါဘၣ်န့ၣ် နတဲအီၤ တၢ်ကတိၤယိယိဖိလၢ ဟဲထီၣ်လၢ နသးပူၤသ့. အဒိ နတဲအီၤလၢ “ယကဘၣ်တဲ တၢ်မနုၤလဲၣ်မး ယတသ့ၣ်ညါဘၣ်, ဘၣ်ဆၣ် ယဘၣ်သး ဒုးသ့ၣ်ညါနၤလၢ ယသးတမုာ်စၢၤနၤဘၣ်.” ပလီၢ်နသး ဒ်သိး နတတဲဘၣ် တၢ်ကတိၤ ဒ်သိးဒီး ကိညၢ်လၢ နတၢ်ဆါန့ၣ် တနးထဲန့ၢ်ညါဘၣ်” မ့တမ့ၢ် “ကိညၢ်လၢ နတၢ်ဆါန့ၣ် တမ့ၢ် . . . ”
နသးအိၣ်အီၤန့ၣ် နပာ်ဖျါထီၣ်သ့ ခီဖျိ နဃုသ့ၣ်ညါအါထီၣ် အတၢ်ဆါအဂ့ၢ်. နမ့ၢ်မၤဒ်န့ၣ်န့ၣ် အဝဲကပာ်လုၢ်ပာ်ပှ့ၤ နတၢ်ဂုာ်ကျဲးစၢး ဒ်သိးနကနၢ်ပၢၢ်တၢ်လၢ အလဲၤခီဖျိဝဲ ဒီးတၢ်လၢနတဲတဖၣ်န့ၣ် ကကဲထီၣ် တၢ်ဂံၢ်တၢ်ဘါ လၢအဂီၢ်. (ကတိၤဒိ ၁၈:၁၃) ဘၣ်ဆၣ် နကဘၣ်ပလီၢ်သးလၢ အဝဲမ့ၢ်တဃ့ တၢ်ဟ့ၣ်ကူၣ်ဘၣ်န့ၣ် တဘၣ်ဟ့ၣ်ကူၣ်အီၤတဂ့ၤ.
မၤစၢၤအီၤ. တဘၣ်ဆိကမိၣ်လၢ နကဘၣ်မၤစၢၤအီၤဒ်လဲၣ်န့ၣ် နသ့ၣ်ညါလံတဂ့ၤ. သံကွၢ်အီၤလၢ နဘၣ်မၤစၢၤအီၤ မနုၤလဲၣ်. ဒီးသ့ၣ်နီၣ်ထီၣ်လၢ ဘၣ်သ့ၣ်သ့ၣ် နသကိးန့ၣ် ကအါနၣ်ဘၣ်နၤအဃိ ကတဲဝဲလၢ အတလိၣ်ဘၣ် တၢ်မၤစၢၤဘၣ်. အမ့ၢ်မၤဝဲ ဒ်န့ၣ်န့ၣ် တဲဖျါထီၣ် တၢ်ဂ့ၢ်တမံၤခံမံၤလၢ နမၤစၢၤအီၤကသ့. အဒိ ဒ်သိးဒီး နကလဲၤပှ့ၤန့ၢ်အီၤတၢ်, မၤကဆှီစၢၤအီၤတၢ် မ့တမ့ၢ် မၤန့ၢ်အီၤ တၢ်အဂၤတမံၤမံၤ.
တဘၣ်ဟ့ၣ်အၡူတဂ့ၤ. နသကိးန့ၣ် အတူၢ်ဘၣ် တၢ်ဆူးတၢ်ဆါအဃိ တဘျီတခီၣ် အဝဲတအဲၣ်ဒိးမၤဝဲ တၢ်လၢအအၢၣ်လီၤပာ်စၢၤနၤလၢၤဘၣ် မ့တမ့ၢ် အဝဲတအဲၣ်ဒိး တဲတၢ်ဒီးနၤဘၣ်သ့. တၢ်မ့ၢ်ကဲထီၣ်အသး ဒ်န့ၣ်န့ၣ် ဝံသးစူၤအီၤ, နၢ်ပၢၢ်စၢၤအီၤ ဒီးဆဲးဆီၣ်ထွဲမၤစၢၤအီၤ.—ကတိၤဒိ ၁၈:၂၄.
ပမၤစၢၤ ပှၤလၢအိၣ်ဒီး တၢ်သးလီၤစၢ်တၢ်ဆါ ကသ့ဒ်လဲၣ်
‘တဲမုာ်ထီၣ်က့ၤ ပှၤအသး.’—၁ သ့းစၤလနံ ၅:၁၄.
ဖဲနသကီးသူၣ်ကိၢ်သးဂီၤတၢ် မ့တမ့ၢ် တူၢ်ဘၣ်လၢ အလုၢ်အပှ့ၤတအိၣ်ဘၣ်အခါ တဘျီတခီၣ် နဘၣ်တဲမုာ်ထီၣ်အသးဒ်လဲၣ်, မၤစၢၤအီၤဒ်လဲၣ် နမ့ၢ်တသ့ၣ်ညါဘၣ် သနာ်က့ ဆဲးပာ်ဖျါထီၣ်လၢ နသးအိၣ်အီၤ, မၤမုာ်ထီၣ်အသး ဒီးဟ့ၣ်ဂံၢ်ဟ့ၣ်ဘါအီၤ.
“တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး.”—ကတိၤဒိ ၁၇:၁၇.
မၤန့ၢ်တၢ်လၢ အကကဲဘျုးလၢအဂီၢ်. ဒီးတဘၣ်ဆိမိၣ်လၢ နသ့ၣ်ညါလၢ နဘၣ်မၤစၢၤအီၤလံ န့ၣ်တဂ့ၤ, သံကွၢ်အီၤလၢ နကဘၣ် မၤစၢၤအီၤဒ်လဲၣ်. နသံကွၢ်အီၤလံ ဘၣ်ဆၣ်အတဲပၠးနၤ မ့ၢ်တဘၣ်ဒံးဘၣ်န့ၣ် တဲပၠးအီၤတၢ်လၢ နမၤသကီးဒီးအီၤ ကသ့တမံၤမံၤ ဒ်သိးဒီး လဲၤဟးလိၣ်ကွဲတပူၤဃီ, လဲၤပှ့ၤစၢၤန့ၢ်အတၢ်, မၤကဆှီစၢၤအီၤတၢ် ဒီးမၤစၢၤအီၤလၢ တၢ်အဂၤတမံၤမံၤ.—ကလၤတံ ၆:၂.
“ပာ်ဖျါထီၣ် တၢ်ဝံသးစူၤ.”—၁ သ့းစၤလနံ ၅:၁၄.
တဘျီတခီၣ်န့ၣ် ဘၣ်သ့ၣ်သ့ၣ် နသကီးတအဲၣ်ဒိး တဲတၢ်ဘၣ်. ဘၣ်ဆၣ်ဒုးသ့ၣ်ညါအီၤလၢ နအိၣ်ကတီၤသးလၢ ကဒိကနၣ်န့ၢ် တၢ်လၢအတဲထီဘိ. နသကီးန့ၣ် အအိၣ်တဆူၣ်ဘၣ်အဃိ ဘၣ်သ့ၣ်သ့ၣ် အကတဲဘၣ် မ့တမ့ၢ် မၤဘၣ်တၢ်လၢ အမၤဘၣ်ဒိနၤ. ဒီးဘၣ်သ့ၣ်သ့ၣ် အမ့ၢ်တူၢ်လိာ်ဝဲလၢ အကမၤသကိးတၢ်ဒီးနၤဘၣ်ဆၣ် လၢခံအတအဲၣ်ဒိးမၤဝဲလၢၤဘၣ် မ့တမ့ၢ် တဘျီတခီၣ်န့ၣ် အသးကအ့န့. ဘၣ်ဆၣ်နဘၣ်အိၣ်ဒီး တၢ်ဝံသးစူၤ ဒီးနၢ်ပၢၢ်စၢၤအီၤ.—ကတိၤဒိ ၁၈:၂၄.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဖဲနထံၣ်ဘၣ် တၢ်အိၣ်သးကီခဲနးမးအခါ ယဟိဝၤယွၤ ကမၤစၢၤနၤ
၁၃ ယဟိဝၤယွၤ ကမၤစၢၤပှၤဒ်လဲၣ်. ယဟိဝၤယွၤ အၢၣ်လီၤဝဲလၢ အကဆီၣ်ထွဲမၤစၢၤပှၤ. (ဖး စံးထီၣ်ပတြၢၤ ၉၄:၁၈.) ဒ်ပှၤဃ့ၢ်ပြၢတၢ်ဖိ လၢအဘၣ်ဒိတဂၤ လိၣ်ဘၣ် တၢ်ဆီၣ်ထွဲမၤစၢၤအသိး ပဝဲစ့ၢ်ကီး ဒ်သိးပကဆဲးမၤ ယဟိဝၤယွၤအတၢ်မၤအဂီၢ် ပကလိၣ်ဘၣ် တၢ်မၤစၢၤ. ဖဲပလိၣ်ဘၣ် တၢ်မၤစၢၤအခါ ယဟိဝၤယွၤ အၢၣ်လီၤပှၤ ဒီးတဲဘၣ်ပှၤလၢ “ယၤ, သုကစၢ် ယဟိဝၤယွၤအံၤ ကဖီၣ်ဃာ် သုစုထွဲလီၤ. ဒီးယမ့ၢ်ပှၤတဂၤလၢ အတဲသုလၢ ‘တဘၣ်ပျံၤတၢ်တဂ့ၤ. ယကမၤစၢၤသု.’” (ၡါ ၄၁:၁၃) လၢညါန့ၣ် စီၤပၤဒၤဝံး ဒိးန့ၢ်ဘၣ်ဝဲ တၢ်မၤစၢၤအံၤ သပှၢ်တၢၢ်. ဖဲအထံၣ်ဘၣ် တၢ်ကီတၢ်ခဲ ဒီးဘၣ်သဂၢၢ်ဒီး ဒုၣ်ဒါတဖၣ်အခါ အတဲဘၣ် ယဟိဝၤယွၤလၢ “နစုထွဲ ဆီၣ်ထွဲယၤ.” (စံး ၁၈:၃၅) မ့မ့ၢ်ဒ်န့ၣ်န့ၣ် ယဟိဝၤယွၤ ကဆီၣ်ထွဲမၤစၢၤပှၤဒ်လဲၣ်.
ဘၣ်မနုၤအဃိ ယဟိဝၤပှၤအုၣ်အသးတဖၣ် တသူထူၣ်စုညါလၢ အတၢ်ဘူၣ်ထီၣ်ဘါထီၣ်အပူၤလဲၣ်
ပှၤအါဂၤထံၣ်ဝဲ ထူၣ်စုညါဒ် ဟီၣ်ခိၣ်ဒီဘ့ၣ်ခရံာ်ဖိတၢ်ဘူၣ်တၢ်ဘါ အတၢ်ပနီၣ်လီၤ. ပဝဲယဟိဝၤပှၤအုၣ်အသးတဖၣ် ပမ့ၢ်ခရံာ်ဖိသနာ်က့, ပတသူထူၣ်စုညါလၢ ပတၢ်ဘူၣ်ထီၣ်ဘါထီၣ်အပူၤဘၣ်. လၢမနုၤအဃိလဲၣ်.
တၢ်ဂ့ၢ်တၢတမံၤန့ၣ် လံာ်စီဆှံဒုးနဲၣ်ဖျါဝဲလၢ ယ့ၣ်ၡူးတသံလၢ ထူၣ်စုညါ (cross) အလိၤဘၣ်, သံဒၣ်လၢ တၢၣ်ယိယိဖိတတၢၣ် (stake) အလိၤလီၤ. အါန့ၢ်အန့ၣ်, လံာ်စီဆှံ ဟ့ၣ်ပလီၢ်ခရံာ်ဖိတဖၣ် ဃံးဃံးလၢ “ဃ့ၢ်ဟးဆှဲးတၢ်ဘါတၢ်ဂီၤ”, လၢအခီပညီမ့ၢ် တဘၣ်သူထူၣ်စုညါလၢ တၢ်ဘူၣ်ထီၣ်ဘါထီၣ်အပူၤဘၣ်လီၤ.—၁ ကရံၣ်သူး ၁၀:၁၄; ၁ ယိၤဟၣ် ၅:၂၁.
ယ့ၣ်ၡူးစံးဝဲဒၣ် “လၢသုအဲၣ်လိာ်ကွံလိာ်သုသးအဃိဒီး, ပှၤခဲလၢာ်ကသ့ၣ်ညါလၢ သုမ့ၢ်ယပျဲၢ်ယဘီၣ်လီၤ.” (ယိၤဟၣ် ၁၃:၃၄, ၃၅) လၢတၢ်န့ၣ်အဃိ, ယ့ၣ်ၡူးဒုးနဲၣ်ဖျါဝဲလၢ တၢ်သ့ၣ်ညါနီၤဖး ယ့ၣ်ၡူးအပျဲၢ်အဘီၣ်နီၢ်နီၢ်န့ၣ် မ့ၢ်တၢ်အဲၣ်လၢတကွၢ်ထဲအဘျုးဒၣ်ဝဲလီၤ. တမ့ၢ်ထူၣ်စုညါ မ့တမ့ၢ် တၢ်ဂီၤတၢ်ဖီၣ်တမံၤမံၤဘၣ်.
လါယူၤ ၂၃-၂၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၁၉
ကဲထီၣ်သကိးနီၢ်ကီၢ်လၢ ဒီပုၢ်ဝဲၢ်မုၣ်ခွါတဖၣ်အဂီၢ်
ပဆဲးမၤဒိၣ်ထီၣ်အါထီၣ် ပတၢ်အဲၣ်လၢ တဂၤဒီးတဂၤ အဖီခိၣ်ကသ့ဒ်လဲၣ်
၁၆ ပကဘၣ် သးစၢၢ်ဆၢလၢ ပဒီပုၢ်ဝဲၢ်မုၣ်ခွါ အတၢ်ဂ့ၤတခီ ဒီးပတဘၣ် သးစၢၢ်ဆၢလၢ အတၢ်လီၤတူာ်လီၤကာ်တခီဘၣ်. အဒိ ဆိကမိၣ်ကွၢ် တၢ်အိၣ်သးတခါအံၤ. နၤဒီးဒီပုၢ်ဝဲၢ်မုၣ်ခွါတကရူၢ် ရ့လိာ်သးမုာ်မး. ဒီးဖဲနအီၣ်သကိးအီသကိးတၢ် ဝံၤအလီၢ်ခံ နဒိသကိးတၢ်ဂီၤဒီး ဒီပုၢ်ဝဲၢ်မုၣ်ခွါ. ဒီးနဘၣ်ယိၣ်လၢ တၢ်ဂီၤဖျါတဂ့ၤဘၣ်အဃိ နဒိတၢ်ဂီၤသၢဘ့ၣ်. လၢတၢ်ဂီၤသၢဘ့ၣ် အကျါတဘ့ၣ်န့ၣ် နထံၣ်လၢ ဒီပုၢ်ဝဲၢ်ခွါတဂၤ တနံၤကမှံဘၣ်. အဃိ နဖၠဲးကွံာ်တၢ်ဂီၤတဘ့ၣ်န့ၣ်. ဘၣ်ဆၣ် နတၢ်ဂီၤအိၣ်တ့ၢ်ခံဘ့ၣ်ဒံး ဒီးလၢတၢ်ဂီၤခံဘ့ၣ်အပူၤန့ၣ် ဒီပုၢ်ဝဲၢ်ခွါတဂၤန့ၣ် အနံၤကမှံစ့ၢ်ကီး.
၁၇ တၢ်ဂီၤလၢ ပပာ်ဃာ်ခံဘ့ၣ်န့ၣ် အလီၤဂာ်ဒ်သိးဒီး တၢ်ဂ့ၢ်လၢ ပပာ်လၢပခိၣ်နူာ်ပူၤ. ဖဲပရ့လိာ်သးဒီး ဒီပုၢ်ဝဲၢ်မုၣ်ခွါအခါ ညီနုၢ်န့ၣ် ပနီၣ်ဘၣ်က့ၤ တၢ်လၢအမၤမုာ်ပသး. ဘၣ်ဆၣ် ပမ့ၢ်နီၣ်ဘၣ်က့ၤလၢ ပဒီပုၢ်ဝဲၢ်မုၣ်ခွါတဂၤဂၤ တဲတၢ်မ့တမ့ၢ် မၤတၢ်တမံၤမံၤလၢ အမၤဘၣ်ဒိပသးန့ၣ် ပကမၤဒ်လဲၣ်. ဒ်ပဖၠဲးကွံာ်တၢ်ဂီၤ လၢပကွၢ်တဂ့ၤဘၣ် တဘ့ၣ်အသိး ဖဲပနီၣ်ဘၣ်က့ၤ တၢ်လၢအမၤ ဘၣ်ဒိပသးအခါ ပကဘၣ်ကျဲးစၢး ထုးထီၣ်ကွံာ်လၢ ပခိၣ်နူာ်ပူၤ. (ကတိၤ ၁၉:၁၁; အ့း ၄:၃၂) ခီဖျိလၢ ပနီၣ်ဘၣ်က့ၤ တၢ်လၢအမၤမုာ်ပသး သ့ဒီဒူၣ်ညါအဃိ တၢ်ကမၣ်တစဲးတမွဲးန့ၣ် ပတလိၣ် ပာ်လၢပခိၣ်နူာ်ပူၤလၢၤဘၣ်. ပကဘၣ် နီၣ်ဘၣ်က့ၤ တၢ်လၢအမၤမုာ်ပသး ဒီးပာ်လုၢ်ပာ်ပှ့ၤအီၤ.
ဆဲးမၤဒိၣ်ထီၣ် နတၢ်အဲၣ် ယဟိဝၤယွၤ ဒီးပှၤဂၤ
၁၀ ပဝဲစ့ၢ်ကီး ပဃုကျဲလၢ ပကမၤစၢၤ ပဒီပုၢ်ဝဲၢ်မုၣ်ခွါတဖၣ်. (ဧ့ၤ ၁၃:၁၆) ပကတဲသကိး ဒီပုၢ်ဝဲၢ်မုၣ်အဲနၤ လၢပတဲတ့ၢ်အဂ့ၢ်လၢ တၢ်မၤလိလၢ အပူၤကွံာ်တခါ အတၢ်လဲၤခီဖျိ. ဖဲကလံၤမုၢ်ဖးဒိၣ်လီၤ ဝံၤအလီၢ်ခံ ဒီပုၢ်ဝဲၢ်မုၣ်အဲနၤ ဒီးအဝၤ လဲၤလၢဒီပုၢ်ဝဲၢ်မုၣ်ခွါ အဟံၣ်တဖျၢၣ် ဒီးအဝဲသ့ၣ်ထံၣ်ဝဲလၢ ဟံၣ်တဖျၢၣ်န့ၣ် အခိၣ်ဒုးလီၤပှီၢ်ဝဲ. အဃိ ဟံၣ်ဖိဃီဖိတဒူၣ်န့ၣ် အတၢ်ကူတၢ်ကၤ လၢအကဆှီ တအိၣ်လၢၤဘၣ်. ဒီပုၢ်ဝဲၢ်မုၣ်အဲနၤ တဲဝဲလၢ “ပက့ၤစိာ်အဝဲသ့ၣ် တၢ်ကူတၢ်ကၤ ဒီးဆှုၣ်န့ၢ်အဝဲသ့ၣ် ဒီးပထူးဘျ့ထီၣ် ဒီးချံးထီၣ်တၢ်ကူတၢ်ကၤ ဝံၤဘျီ ပလဲၤဆှၢန့ၢ်က့ၤ အဝဲသ့ၣ်. တၢ်လၢ ပမၤစၢၤအဝဲသ့ၣ်န့ၣ် တကီလၢပဂီၢ်ဘၣ်. ဒီးခီဖျိလၢ ပမၤစၢၤအဝဲသ့ၣ် ဒ်န့ၣ်အဃိ ပရ့ဘၣ်ဒီး အဝဲသ့ၣ်ဂ့ၤဂ့ၤ တုၤလၢခဲအံၤ.” ဒီပုၢ်ဝဲၢ်မုၣ်အဲနၤ ဒီးအဝၤန့ၣ် အဲၣ်ဒီပုၢ်ဝဲၢ်မုၣ်ခွါတဖၣ်အဃိ အဝဲသ့ၣ်ကျဲးစၢးမၤစၢၤ ဒီပုၢ်ဝဲၢ်မုၣ်ခွါ လၢအဂ့ၤကတၢၢ်.—၁ ယိၤ ၃:၁၇, ၁၈.
၁၁ ပမ့ၢ်အဲၣ်ပှၤဂၤ ဒီးသးဂ့ၤလၢ ပှၤဂၤအဖီခိၣ်န့ၣ် အဝဲသ့ၣ်ကထံၣ်ဝဲလၢ ပကျဲးစၢး ကွၢ်လိ ယဟိဝၤယွၤ. ဒီးအဝဲသ့ၣ် ကပာ်လုၢ်ပာ်ပှ့ၤ တၢ်လၢပမၤတဖၣ်န့ၣ် အါန့ၢ်ပဆိမိၣ်ဒံး. ဒီပုၢ်ဝဲၢ်မုၣ်ခၤ လၢပတဲအဂ့ၢ် ဖဲမကၢာ်န့ၣ် အနီၣ်ဘၣ်က့ၤဝဲ ပှၤမၤစၢၤတ့ၢ်အီၤဒ်လဲၣ်န့ၣ် ဂ့ၤဂ့ၤ. ဒီးအတဲဝဲလၢ “ဒီပုၢ်ဝဲၢ်မုၣ်တဖၣ်န့ၣ် ကွဲယၤလၢ ယကလဲၤစံၣ်တဲၤတဲလီၤတၢ်ဒီး အဝဲသ့ၣ်အဃိ ယသးခုဒိၣ်မး ဒီးယစံးဘျုးအဝဲသ့ၣ်ဒိၣ်မး. အဝဲသ့ၣ်ဟဲအိၣ်စိၢ်ယၤ ဒီးကွဲယၤလၢ ကလဲၤအီၣ်သကိးတၢ်ဒီးအဝဲသ့ၣ် ဒီးအဝဲသ့ၣ်ဟဲက့ၤဆှၢယၤ လၢဟံၣ်ဂ့ၤဂ့ၤ. အခဲအံၤ ယသ့ၣ်ညါထီၣ်လၢ အဝဲသ့ၣ်ကမၤဝဲဒ်န့ၣ်အဂီၢ် အဘၣ်ထဲးဂံၢ်ထဲးဘါညါ. ဒီးခီဖျိလၢ အဝဲသ့ၣ်အဲၣ်ယၤအဃိ အဝဲသ့ၣ်မၤဝဲကဲ.” အါတက့ၢ် ပှၤလၢပမၤစၢၤအဝဲသ့ၣ်န့ၣ် အဝဲသ့ၣ် တစံးဘျုးက့ၤပှၤ ကိးဘျီဒဲးဘၣ်. ဘၣ်ဃးဒီး ပှၤလၢအမၤစၢၤအီၤန့ၣ် ဒီပုၢ်ဝဲၢ်မုၣ်ခၤ တဲဝဲလၢ “ပှၤလၢအသးဂ့ၤလၢ ယဖီခိၣ်န့ၣ် ယဘၣ်သး မၤစၢၤကဒါအဝဲသ့ၣ်ညါ. ဘၣ်ဆၣ် ခဲအံၤ အဝဲသ့ၣ်အိၣ်တၢ်လီၢ်ဖဲလဲၣ်န့ၣ် ယတသ့ၣ်ညါဘၣ်. သနာ်က့ ယဟိဝၤယွၤ သ့ၣ်ညါဝဲ. ဒီးယဃ့ထုကဖၣ်လၢ ယဟိဝၤယွၤ ကမၤစၢၤအဝဲသ့ၣ်.” ဒီပုၢ်ဝဲၢ်မုၣ်ခၤ တဲတၢ်န့ၣ်ဖၣ်ဘၣ်ညါ. ပမ့ၢ်မၤဂ့ၤတၢ်လၢ ပှၤဂၤအဖီခိၣ် အါမ့ၢ်ဂ့ၤ စှၤမ့ၢ်ဂ့ၤ ယဟိဝၤယွၤ ထံၣ်ဝဲခဲလၢာ်. တကးဒံးဘၣ် ယဟိဝၤယွၤထံၣ်ဝဲ ပတၢ်ဟ့ၣ်လီၤသး ဒီးအပာ်လုၢ်ပာ်ပှ့ၤဝဲ ဒီးအထံၣ်ဝဲဒ်သိးဒီး အကမၢ်အိၣ်ဒီးပှၤ ဒီးအကလိးကဒါပှၤ.—ဖး ကတိၤဒိ ၁၉:၁၇.
ဆဲးပာ်ဖျါထီၣ် တၢ်အဲၣ်လၢအတီ လၢတဂၤဒီးတဂၤအဖီခိၣ်
၆ မုၢ်မဆါတနံၤအံၤ ပှၤတဂၤမ့ၢ်မၤတၢ်လၢ ခီပနံာ်တဖျၢၣ်လၢ အနံၣ်အါမးန့ၣ် ပှၤပာ်ပနီၣ်အီၤဒ် ပှၤမၤတၢ်ဖိလၢအအိၣ်ဒီး တၢ်သးတီတဂၤလီၤ. ဘၣ်သ့ၣ်သ့ၣ် အမၤတၢ်လၢ အနံၣ်အါမးသနာ်က့ အတထံၣ်လိာ်သးဒီး ခီပနံာ်အခိၣ်တဖၣ် နီတဘျီဘၣ်. ဘၣ်သ့ၣ်သ့ၣ် အဝဲတသးလီၤပလိာ်ဒီး ခီပနံာ်အတၢ်ဘျၢတဖၣ် ခဲလၢာ်ဘၣ် ဒီးအဝဲတကၠဲးခီပနံာ်ဘၣ်. ဘၣ်ဆၣ် မ့ၢ်လၢခီပနံာ်ဟ့ၣ်အီၤစ့အဃိ အမၤတၢ်ဖဲန့ၣ်မုာ်မး. ဒီးဘၣ်သ့ၣ်သ့ၣ် အဝဲကဆဲးမၤတၢ်ဖဲန့ၣ် တုၤလၢအဘၣ်အိၣ်ဘှံးတစု မ့တမ့ၢ် တုၤလၢအန့ၢ်ဘၣ် တၢ်မၤအဂၤလၢ အဂ့ၤန့ၢ်အန့ၣ်တစုလီၤ.
၇ တၢ်သးတီလၢ ဘၣ်တၢ်ပာ်ဖျါထီၣ်အီၤလၢ လံာ်အဆၢ ၆ အပူၤန့ၣ် လီၤဆီဒီး တၢ်အဲၣ်လၢအတီလၢ ပှၤတဂၤ ပာ်ဖျါထီၣ်ဝဲလီၤ. မ့ၢ်လၢတၢ်ဂ့ၢ်လၢ ပှၤတဂၤပာ်ဖျါထီၣ် တၢ်သးတီ ဒီးတၢ်ဂ့ၢ်လၢပှၤတဂၤ ပာ်ဖျါထီၣ် တၢ်အဲၣ်လၢအတီန့ၣ် တဒ်သိးလိာ်အသးဘၣ် အဃိလီၤ. ကစၢ်ယွၤအခ့အပှၤလၢ လံာ်စီဆှံအစိၤတဖၣ်န့ၣ် ဘၣ်မနုၤအဃိ အဝဲသ့ၣ်ပာ်ဖျါထီၣ် တၢ်အဲၣ်လၢအတီလဲၣ်. အဝဲသ့ၣ်ပာ်ဖျါထီၣ်ဝဲ တၢ်အဲၣ်လၢအတီန့ၣ် တမ့ၢ်လၢအဘၣ် ပာ်ဖျါထီၣ်ဝဲအဃိဘၣ်, မ့ၢ်လၢ အဝဲသ့ၣ် သးအိၣ်ပာ်ဖျါထီၣ်ဝဲ အဃိလီၤ. ခဲအံၤ ပကကွၢ်သကိး စီၤဒၤဝံးအတၢ်လဲၤခီဖျိ. စီၤယိနၤသၣ်အပါန့ၣ် အဲၣ်ဒိးမၤသံစီၤဒၤဝံး ဘၣ်ဆၣ် စီၤဒၤဝံး ပာ်ဖျါထီၣ်တၢ်အဲၣ်လၢအတီ လၢအသကိး စီၤယိနၤသၣ် အဖီခိၣ်လီၤ. စီၤယိနၤသၣ်သံဝံၤ အနံၣ်ဖးယံာ်လံ သနာ်က့ စီၤဒၤဝံးဆဲးပာ်ဖျါထီၣ် တၢ်အဲၣ်အတီလၢ စီၤယိနၤသၣ်အဖိခွါ စီၤမဖံဘိၤၡ့း အဖီခိၣ်လီၤ.—၁ ၡမူၤအ့လး ၂၀:၉, ၁၄, ၁၅; ၂ ၡမူၤအ့လး ၄:၄; ၈:၁၅; ၉:၁, ၆, ၇.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၈၇-E ၅/၁၅ ၂၉
လံာ်စီဆှံ အတၢ်ပာ်ဖျါလၢ ကတိၤဒိ ၁:၁–၃၁:၃၁
၁၉:၁၇—ပမ့ၢ်ပာ်ဖျါထီၣ် တၢ်သးကညီၤလၢ ပှၤပတီၢ်ဖုၣ်အဖီခိၣ်န့ၣ် အလီၤဂာ်လၢ ပဟ့ၣ်လိၢ်တၢ်လၢ ယဟိဝၤယွၤဒ်လဲၣ်.
ပှၤဖှီၣ်ဖိယာ်ဖိန့ၣ် ကဲယဟိဝၤယွၤအတၢ်အဃိ ပရ့ဒီးအဝဲသ့ၣ် ဒ်လဲၣ် မၤအဝဲသ့ၣ် ဒ်လဲၣ်န့ၣ် အရ့ဒိၣ်လၢ ယဟိဝၤယွၤအဂီၢ်. (ကတိၤဒိ ၁၄:၃၁) ပမ့ၢ်ဟ့ၣ်တၢ်, ပာ်ဖျါထီၣ် တၢ်အဲၣ် ဒီးတၢ်သူၣ်အိၣ်သးအိၣ်လၢ ပှၤလၢအပတီၢ်ဖုၣ်တဖၣ် ဒီးပှၤဖှီၣ်ဖိယာ်ဖိတဖၣ် အဖီခိၣ် ဘၣ်ဆၣ် ပမ့ၢ်တမုၢ်လၢ်က့ၤတၢ်လၢ အဝဲသ့ၣ်အအိၣ် နီတမံၤဘၣ်န့ၣ် ယဟိဝၤယွၤ ကဘၣ်သူၣ်ဘၣ်သးဝဲ. တကးဒံးဘၣ် ယဟိဝၤယွၤ ကတူၢ်ဘၣ်ဝဲလၢ အကမၢ်ထီၣ်ဒီးပှၤ ဒီးကဘၣ်လိးက့ၤပှၤလၢ တၢ်ဆိၣ်ဂ့ၤ.—လူၤကၣ် ၁၄:၁၂-၁၄.
လါယူၤ ၃၀–လါယူၤလံ ၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၀
ပှၤဒီတၢ်အဲၣ်တီတဖၣ် ဆၢတဲာ်တၢ်လၢအဘၣ် ကသ့ဒ်လဲၣ်
ဖဲနပာ်တၢ်အဲၣ်တီအခါ နဆၢတဲာ် တၢ်လၢအဘၣ် ကသ့ဒ်လဲၣ်
၃ ဖဲပှၤခံဂၤ ပာ်တၢ်အဲၣ်တီအခါ အကဲဝဲ တၢ်ဆၢကတီၢ်လၢ အလီၤသးခု သနာ်က့ အရ့ဒိၣ်လၢ အဝဲသ့ၣ် ကဆိကမိၣ်ထံ ဘၣ်ဃးဒီး တၢ်ဆီဟံၣ်ဆီဃီစ့ၢ်ကီး. ပမ့ၢ်ဘၣ်ကွၢ် ဖဲတလးမူးပိာ်မုၣ် ဒီးတလးမူးပိာ်ခွါ ဖျီသးတနံၤန့ၣ် အဝဲသ့ၣ် မၤတၢ်အၢၣ်လီၤလၢ ယဟိဝၤယွၤ အမဲာ်ညါလၢ အဝဲသ့ၣ် ကအဲၣ်လိာ်သး ဒီးပာ်ကဲလိာ်သး တုၤလၢအသံ. ဒီးပသ့ၣ်ညါလၢ တချုးလၢ ပမၤတၢ်အၢၣ်လီၤ တမံၤမံၤဒံးဘၣ်န့ၣ် ပကဘၣ် ဆိကမိၣ်ထံဆိတၢ်ဂ့ၢ် လီၤတံၢ်လီၤဆဲး. (ဖး ကတိၤဒိ ၂၀:၂၅.) တၢ်ဆီဟံၣ်ဆီဃီ အတၢ်အၢၣ်လီၤစ့ၢ်ကီး ပကဘၣ် ဆိကမိၣ်ထံအဂ့ၢ် လီၤတံၢ်လီၤဆဲး. အဃိ ဖဲပှၤခံဂၤ ပာ်တၢ်အဲၣ်တီအခါ အဝဲသ့ၣ်အိၣ်ဒီး တၢ်ဆၢကတီၢ်လၢ ကဃုသ့ၣ်ညါလိာ်သးဂ့ၢ် ဒီးလၢခံ ကဆၢတဲာ် တၢ်လၢအဘၣ်. တၢ်ဆၢတဲာ် လၢအဘၣ်န့ၣ် အဲၣ်ဒိးတဲဝဲ ပှၤခံဂၤ ဆၢတဲာ်လီၤသးလၢ ကဖျီသး မ့တမ့ၢ် တပာ်တၢ်အဲၣ်တီလၢၤဘၣ်. ဒီးပှၤဒီတၢ်အဲၣ်တီခံဂၤ မ့ၢ်လီၤဖးန့ၣ် တမ့ၢ်ခီဖျိလၢ အဝဲသ့ၣ် အတၢ်ဆၢတဲာ်ကမၣ် အဃိဘၣ်. နီၢ်ကီၢ်န့ၣ် အဝဲသ့ၣ် ကဖျီသးဧါ တဖျီသးဘၣ်ဧါန့ၣ် ဖဲအပာ်တၢ်အဲၣ်တီအခါ အသ့ၣ်ညါဘၣ်ဝဲ တၢ်စံးဆၢအဃိ အဝဲသ့ၣ် ဆၢတဲာ်တၢ် လၢအဘၣ်.
၄ ဒီပုၢ်ဝဲၢ်မုၣ်ခွါ သဘျ့တဖၣ် ကဘၣ်သ့ၣ်နီၣ်ထီၣ်လၢ ပှၤခံဂၤ ပာ်တၢ်အဲၣ်တီန့ၣ် မ့ၢ်ဒ်သိး အကသ့ၣ်ညါအါထီၣ်လိာ်သး ဒီးမ့ၢ်အဝဲသ့ၣ် ကဆၢတဲာ်လၢ ကဖျီသးဧါ တဖျီသးဘၣ်ဧါအဂီၢ်. အဃိ ပှၤတဂၤဂၤလၢ အဝဲသ့ၣ် မ့ၢ်တဘၣ်သး ဖျီသးဒီးအီၤဘၣ်န့ၣ် အဝဲသ့ၣ် တဘၣ်ပာ်တၢ်အဲၣ်တီဒီးအီၤဘၣ်. တၢ်ပာ်တၢ်အဲၣ်တီ အတၢ်တိာ်ပာ် မ့ၢ်မနုၤလဲၣ်န့ၣ် ဒီပုၢ်ဝဲၢ်မုၣ်ခွါသဘျ့ ကိးဂၤဒဲး ဒီးပဝဲခဲလၢာ် ကဘၣ် အိၣ်ဒီး တၢ်ထံၣ်အကြၢးအဘၣ် ဒီးသ့ၣ်ညါ တၢ်ဂ့ၢ်အံၤဂ့ၤဂ့ၤ. အဒိ ပှၤတနီၤ ဆိကမိၣ်ဝဲလၢ ပှၤခံဂၤ မ့ၢ်ပာ်တၢ်အဲၣ်တီန့ၣ် အဝဲသ့ၣ် ကဘၣ်ဖျီသး. တၢ်ထံၣ်တခါအံၤ ကမၤဘၣ်ဒိ ဒီပုၢ်ဝဲၢ်မုၣ်ခွါ သဘျ့တဖၣ် အတၢ်ဆၢတဲာ်ဒ်လဲၣ်. ဒီပုၢ်ဝဲၢ်မုၣ်မလံစၤ လၢအအိၣ်လၢ ကီၢ်အမဲရကၤန့ၣ် အတဲဝဲလၢ “ဖဲဒီပုၢ်ဝဲၢ်မုၣ်ခွါ သဘျ့ခံဂၤ ပာ်တၢ်အဲၣ်တီအခါ ပှၤတနီၤ ထံၣ်ဝဲလၢ အဝဲသ့ၣ် ကဘၣ်ဖျီသး. အဃိ ပှၤဒီတၢ်အဲၣ်တီ တနီၤန့ၣ် အဝဲသ့ၣ် တကြၢးလိာ်သးလၢ တဂၤဒီးတဂၤအဂီၢ်ဘၣ် သနာ်က့ အဝဲသ့ၣ် ဆဲးပာ်တၢ်အဲၣ်တီ. မ့မ့ၢ် ဒီပုၢ်ဝဲၢ်မုၣ်ခွါသဘျ့ လၢအဂၤတနီၤန့ၣ် မၣ်တဘၣ်သး ပာ်တၢ်အဲၣ်တီလၢၤဘၣ်. တၢ်ထံၣ်ဒ်အံၤန့ၣ် ဒုးအိၣ်ထီၣ် တၢ်သူၣ်ကိၢ်သးဂီၤလၢ ပှၤသဘျ့အဂီၢ်အါမး.”
နဃုထၢ သးသမူတံၤသကိး လၢအဂ့ၤ ကသ့ဒ်လဲၣ်
၈ နဃုသ့ၣ်ညါဆိ ပှၤတဂၤအဂ့ၢ် လၢတၢ်ကူၣ်သ့အပူၤ ကသ့ဒ်လဲၣ်. ဖဲနလဲၤထီၣ် တၢ်အိၣ်ဖှိၣ် မ့တမ့ၢ် လဲၤရ့လိာ်သးဒီး ဒီပုၢ်ဝဲၢ်မုၣ်ခွါအခါ နကသ့ၣ်ညါဘၣ်လၢ ပှၤတဂၤအံၤ အနီၢ်သး, အတၢ်ပာ်သူၣ်ပာ်သး ဒီးအသကဲာ်ပဝး အိၣ်ဒ်လဲၣ်. အရ့လိာ်သးဒီး မတဂၤလဲၣ် ဒီးအတဲ ဘၣ်ဃးဒီး တၢ်ဂ့ၢ်မနုၤလဲၣ်. (လူၤ ၆:၄၅) အဖီတၢၣ်န့ၣ် လီၤဂာ်ဒ်သိးဒီး နဖီတၢၣ်ဧါ. ဒီးနသံကွၢ်အဂ့ၢ်လၢ တၢ်အိၣ်ဖှိၣ်သးပှၢ် မ့တမ့ၢ် အသကိးလၢ အနီၢ်သးဆူၣ် လၢအသ့ၣ်ညါအီၤဂ့ၤဂ့ၤတဖၣ် အအိၣ်သ့. (ကတိၤ ၂၀:၁၈) အအိၣ်ဒီး မံၤဂ့ၤသၣ်ဂ့ၤဧါ ဒီးအအိၣ်ဒီး တၢ်ဂ့ၤတၢ်ဝါ မနုၤလဲၣ်န့ၣ် နသံကွၢ် အဝဲသ့ၣ်သ့. (ရူၤ ၂:၁၁) ဒီးဖဲနဃုသ့ၣ်ညါဆိ ပှၤတဂၤအံၤ အဂ့ၢ်အခါ တဘၣ်မၤတၢ်လၢ ကမၤတံာ်တာ် အသးတဂ့ၤ. နကဘၣ် နၢ်ပၢၢ်စၢၤ အတၢ်တူၢ်ဘၣ် ဒီးပာ်ကဲ အတၢ်ထံၣ်.
ဖဲနပာ်တၢ်အဲၣ်တီအခါ နဆၢတဲာ် တၢ်လၢအဘၣ် ကသ့ဒ်လဲၣ်
၇ နကသ့ၣ်ညါဘၣ် နတၢ်အဲၣ်တီ အတၢ်ပာ်သး ဂ့ၤဂ့ၤအဂီၢ် နကဘၣ်မၤဒ်လဲၣ်. နမၤသ့ခီဖျိ နသံကွၢ်လိာ်သး တၢ်သံကွၢ် ဒီးဒိကနၣ်န့ၢ်လိာ်သး* ဂ့ၤဂ့ၤ. နကဘၣ်တဲဖျါထီၣ် နတၢ်တူၢ်ဘၣ် ဒီးတဲလိာ်သးတၢ် တီတီလိၤလိၤ ခံဂၤလၢာ်. (ကတိၤ ၂၀:၅; ယၤ ၁:၁၉) ဒ်သိး နကတဲသကိးဘၣ်တၢ်အဂီၢ် ဘၣ်သ့ၣ်သ့ၣ် နရဲၣ်ကျဲၤလၢ နကအီၣ်သကိးတၢ်, လဲၤဟးလိာ်ကွဲလၢ ပှၤအိၣ်အါအလီၢ် မ့တမ့ၢ် ဟးစံၣ်တဲၤတဲလီၤတၢ် ဒ်သိးသိးသ့. ဒီးဖဲနအိၣ်သကိး ဒီးရ့လိာ်သးဒီး ဟံၣ်ဖိဃီဖိ ဒီးတံၤသကိးအခါ နဃုသ့ၣ်ညါအါထီၣ်လိာ်သးဂ့ၢ် သ့စ့ၢ်ကီး. တကးဒံးဘၣ် ဒ်သိးနကသ့ၣ်ညါဘၣ်လၢ နတၢ်အဲၣ်တီ ရ့ဒီးပှၤဂၤဒ်လဲၣ် ဒီးလၢတၢ်အိၣ်သးတနီၤန့ၣ် အတၢ်ပာ်သးအိၣ်ဒ်လဲၣ်အဂီၢ် နရဲၣ်ကျဲၤ ဒီးကိးအိၣ်သကိး ပှၤအါဂၤသ့. အဒိ ဒီပုၢ်ဝဲၢ်ခွါအဲးၡဝ့ လၢအအိၣ်လၢ ကီၢ်နဲသၢၤလဲၤန့ၣ် အမၤဝဲဒ်န့ၣ်. ဘၣ်ဃးဒီး အပာ်တၢ်အဲၣ်တီဒီး ဒီပုၢ်ဝဲၢ်မုၣ်အၤလံၡါန့ၣ် အတဲဝဲဒ်အံၤ. “ပရဲၣ်ကျဲၤ တၢ်တမံၤမံၤလၢ ကမၤစၢၤပှၤဒ်သိး ပကသ့ၣ်ညါအါထီၣ်လိာ်သးဂ့ၢ်. ဒီးတၢ်လၢပမၤန့ၣ် အကဲဝဲ တၢ်ယိယိဖိ ဒ်သိးဒီး ပဖီအီၣ်သကိးတၢ် မ့တမ့ၢ် ပမၤတၢ်လၢအဂၤ တမံၤမံၤ. ဒီးဖဲပမၤသကိးတၢ် ဒ်သိးသိးအခါ ပသ့ၣ်ညါဘၣ်လိာ်သး တၢ်ဂ့ၤတၢ်ဝါ ဒီးတၢ်ဂံၢ်စၢ်ဘါစၢ်.”
၈ ကျဲအဂၤလၢ နဃုသ့ၣ်ညါအါထီၣ်လိာ်သးဂ့ၢ်သ့န့ၣ် မ့ၢ်ဝဲ နမၤလိသကိး လံာ်စီဆှံ ဒ်သိးသိး. ဒီးနဖျီသးမ့ၢ်ဝံၤန့ၣ် နကဘၣ် ပာ်ပနီၣ်ဃာ် တၢ်ဆၢကတီၢ်လၢ ဟံၣ်ဖိဃီဖိ တၢ်မၤလိလံာ်စီဆှံအဂီၢ်. နမ့ၢ်မၤဒ်အံၤမၣ် နၤဒီးနသးသမူတံၤသကိး ကပာ်ဆိ ယဟိဝၤယွၤ လၢနီၣ်ဂံၢ်တၢ လၢသုတၢ်အိၣ်မူပူၤ. (စံၣ် ၄:၁၂) အဃိ ဖဲနပာ်တၢ်အဲၣ်တီအခါ ရဲၣ်ကျဲၤ တၢ်ဆၢကတီၢ်လၢ သုကမၤလိသကိး လံာ်စီဆှံ ဒ်သိးသိး. နီၢ်ကီၢ်ဒု ပှၤလၢအပာ်တၢ်အဲၣ်တီခံဂၤန့ၣ် တကဲထီၣ် ဟံၣ်ဖိဃီဖိဒံးဘၣ် ဒီးဒီပုၢ်ဝဲၢ်ခွါန့ၣ် တကဲထီၣ် ဒီပုၢ်ဝဲၢ်မုၣ် အဟံၣ်ခိၣ်ဒံးဘၣ်. သနာ်က့ နမ့ၢ်မၤလိသကိး လံာ်စီဆှံ ဒ်သိးသိးန့ၣ် နကသ့ၣ်ညါဘၣ် တဂၤဒီးတဂၤ တၢ်ရ့လိာ်သးဒီး ယဟိဝၤယွၤ အိၣ်ဒ်လဲၣ်အဂ့ၢ်. အဒိ ဒီပုၢ်ဝဲၢ်ခွါမဲၣ် ဒီးအတၢ်အဲၣ်တီမုၣ်လ့စၤ လၢအအိၣ်လၢ ကီၢ်အမဲရကၤ ဒိးန့ၢ်ဘၣ်အဘျုး ဒ်လဲၣ်န့ၣ် အတဲဝဲဒ်အံၤ. “ဖဲပစးထီၣ် ပာ်တၢ်အဲၣ်တီ သီသီအခါ ပမၤလိသကိး ပတၢ်ကရၢကရိ လံာ်လဲၢ် လၢအဘၣ်ဃးဒီး တၢ်ပာ်တၢ်အဲၣ်တီ, တၢ်ဆီဟံၣ်ဆီဃီ ဒီးဟံၣ်ဖိဃီဖိအဂ့ၢ်. ပမၤလိသကိး တၢ်ဂ့ၢ်တဖၣ်န့ၣ်အဃိ မၤစၢၤပှၤလၢ ပကတဲသကိး ပတၢ်ထံၣ် ဘၣ်ဃးဒီး တၢ်ဂ့ၢ်အရ့ဒိၣ်လၢ ပတဲသကိးအီၤ တဘူၣ်အါအါဘၣ်.”
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
သးစၢ်သ့ၣ်ဧၢ—နကဘျၢထံအဂီၢ် မ့ၢ်နအိၣ်ကတဲာ်ကတီၤနသးလံဧါ
၄ လံာ်စီဆှံတတဲဝဲလၢ နဘျၢထံန့ၢ်ဒၣ်ဖဲနညါအိၣ်ထီၣ်အခါ မ့တမ့ၢ် တပာ်ပနီၣ်ဝဲနသးအနံၣ်လၢ နကဘျၢထံအဂီၢ်န့ၣ်ဘၣ်. ကတိၤဒိ ၂၀:၁၁ ပာ်ဖျါထီၣ်ဝဲလၢ– “ဖိသၣ်ဒၣ်လဲာ်န့ၣ် အမၤတၢ်ကဆှီဧါ. အမၤတၢ်လိၤဧါန့ၣ် ပှၤသ့ၣ်ညါအီၤလၢအမၤတၢ်လီၤ.” ဖိသၣ်ဒၣ်လဲာ် အဝဲသ့ၣ်မ့ၢ်နၢ်ပၢၢ်တၢ်လၢအဘၣ် ဒီးနၢ်ပၢၢ်စ့ၢ်ကီး တၢ်ဟ့ၣ်လုၢ်ထီၣ်သးလၢ ကစၢ်ယွၤအအိၣ် အခီပညီန့ၣ် ဒိးဘျၢအသးလၢထံသ့ဝဲလီၤ. တၢ်ဒိးဘျၢထံအံၤန့ၣ် မ့ၢ်တၢ်လၢအရ့ဒိၣ်လၢ ပှၤသးစၢ်တဖၣ်အဂီၢ် ဒီးအဝဲသ့ၣ်မ့ၢ်ဒိၣ်တုာ်ခိၣ်ပှဲၤ ဒီးဟ့ၣ်လုၢ်ထီၣ်အသး ဆူယဟိဝၤယွၤအအိၣ်ဝံၤလံန့ၣ် ကြၢးလၢအဝဲသ့ၣ်ဒိးဘျၢထံန့ၣ်လီၤ.—ကတိၤဒိ ၂၀:၇.
၅ တၢ်ဒိၣ်တုာ်ခိၣ်ပှဲၤန့ၣ် အဲၣ်ဒိးစံးဝဲတၢ်မနုၤလဲၣ်. တၢ်ဒိၣ်တုာ်ခိၣ်ပှဲၤန့ၣ် တဒိးသန့ၤထီၣ်အသးထဲလၢ ပှၤသးအနံၣ် မ့တမ့ၢ် နီၢ်ခိအတၢ်ဒိၣ်တုာ်ခိၣ်ပှဲၤန့ၣ်ဘၣ်. လံာ်စီဆှံစံးဝဲလၢ ပှၤလၢအဒိၣ်တုာ်ခိၣ်ပှဲၤန့ၣ် သိၣ်လိအသးဒီး အဝဲသ့ၣ်အိၣ်ဒီး “တၢ်သူၣ်ဆးသးဆး”လၢကသ့ၣ်ညါနီၤဖး တၢ်ဂ့ၤဒီးတၢ်အၢအဂီၢ်လီၤ. (ကတိၤဒိ ၃:၁၃, ဧ့ၤဘြံၤ ၅:၁၄) ပှၤလၢအဒိၣ်တုာ်ခိၣ်ပှဲၤတဂၤန့ၣ် သ့ၣ်ညါတၢ်လၢအဘၣ် ဒီးပာ်လီၤအသးလၢ ကမၤတၢ်လၢအဘၣ်ထီဘိလီၤ. လၢတၢ်န့ၣ်အဃိ တၢ်ကကွဲန့ၢ်လွဲန့ၢ်အီၤလၢ ကမၤဘၣ်တၢ်အၢအဂီၢ် တညီဝဲဘၣ်. တကးဒံးဘၣ် ကမၤဝဲတၢ်ဂ့ၤအဂီၢ် တလိၣ်လၢပှၤကဘၣ်တဲအီၤဘၣ်. ပမုၢ်လၢ်လၢ ပှၤသးစၢ်လၢအဘျၢထံဝံၤတဖၣ် ကမၤတၢ်လၢအဘၣ် ဖဲအမိၢ်အပၢ်ဒီး တၢ်အိၣ်ဖှိၣ်သးပှၢ်တဖၣ် မ့ၢ်တအိၣ်ဘူးဒီးအီၤအခါဒၣ်လဲာ်န့ၣ်လီၤ.—ထိၣ်သတြီၤဒီး ဖံလံးပံၤ ၂:၁၂.
ijwbq-E တၢ်ကွဲးဖုၣ် ၁၅၉
ဆၣ်ဖိကီၢ်ဖိတဖၣ် မ့ၢ်သံန့ၣ် ကထီၣ်ဘၣ်လၢမူခိၣ်ဧါ
လံာ်စီဆှံတဲဝဲဒ်လဲၣ်
လံာ်စီဆှံ သိၣ်လိဝဲလၢ လၢတၢ်ဘၣ်တ့လၢ ဟီၣ်ခိၣ်ချၢအကျါ ပှၤလၢအကထီၣ်ဘၣ်လၢ မူခိၣ်န့ၣ် မ့ၢ်ဝဲပှၤဟီၣ်ခိၣ်ဖိ. ဒီးပှၤဟီၣ်ခိၣ်ဖိဒၣ်လဲာ်န့ၣ် ကလဲၤထီၣ်ဘၣ်ဆူမူခိၣ် ထဲဒၣ်တနီၤလီၤ. (လီၣ်ဖျါ ၁၄:၁, ၃) အဝဲသ့ၣ် ကလဲၤထီၣ်ပၢဃုာ်တၢ်ဒီး ယ့ၣ်ၡူးလၢမူခိၣ် ဒ်စီၤပၤ ဒီးပှၤလုၢ်တၢ်ဒိၣ်အသိး. (လူၤကၣ် ၂၂:၂၈-၃၀; လီၣ်ဖျါ ၅:၉, ၁၀) ဒီးမ့မ့ၢ် ပှၤဟီၣ်ခိၣ်ဖိ အဂၤတဖၣ်န့ၣ် ကဂဲၤဆၢထၢၣ် သမူထီၣ်က့ၤ လၢဟီၣ်ခိၣ်ပၤရဒံစူးအပူၤ.—စံးထီၣ်ပတြၢၤ ၃၇:၁၁, ၂၉.
လံာ်စီဆှံ တပာ်ဖျါထီၣ်ဝဲလၢ ဆၣ်ဖိကီၢ်ဖိလၢ ပှၤဘူၣ်ကွၢ်ကီအီၤတဖၣ် မ့တမ့ၢ် ထွံၣ်တဖၣ် ကလဲၤထီၣ်ဆူမူခိၣ်ဘၣ်. တချုးလၢ ပှၤတဂၤ “ဘၣ်တၢ်ကိးန့ၢ်အီၤလၢ ကလဲၤထီၣ်ဆူ မူခိၣ်” န့ၣ် တၢ်လၢအကဘၣ် မၤဝဲန့ၣ်အိၣ်ဝဲ. (ဧ့ၤဘြံၤ ၃:၁) အကဘၣ် သ့ၣ်ညါကစၢ်ယွၤ, ပာ်ဖျါထီၣ်တၢ်နာ် ဒီးမၤထွဲ ကစၢ်ယွၤ အတၢ်သိၣ်တၢ်သီ. (မးသဲ ၁၉:၁၇; ယိၤဟၣ် ၃:၁၆; ၁၇:၃) မ့မ့ၢ် ဆၣ်ဖိကီၢ်ဖိတဖၣ်န့ၣ် အမၤဝဲ တၢ်သ့ၣ်တဖၣ်န့ၣ် တသ့ဘၣ် အဃိ အဝဲသ့ၣ် လဲၤထီၣ်ဆူမူခိၣ် တသ့ဘၣ်. ထဲဒၣ် ပှၤဟီၣ်ခိၣ်ဖိတဖၣ်န့ၣ် ကစၢ်ယွၤတ့လီၤအီၤ ဒ်သိး ကအိၣ်မူဘၣ် လီၤထူလီၤယိာ်အဂီၢ်.—၁ မိၤၡ့ ၂:၁၆, ၁၇; ၃:၂၂, ၂၃.
ပှၤဟီၣ်ခိၣ်ဖိလၢ အကလဲၤထီၣ်ဆူမူခိၣ်န့ၣ် အကဘၣ်သံဝံၤမး ကဂဲၤဆၢထၢၣ်သမူထီၣ်က့ၤဆူမူခိၣ်. (၁ ကရံၣ်သူး ၁၅:၄၂) လံာ်စီဆှံ ပာ်ဖျါထီၣ်ဝဲ တၢ်ဂဲၤဆၢထၢၣ်သမူထီၣ်က့ၤ အဂ့ၢ်အိၣ်ဝဲတနီၤ. (၁ စီၤပၤ ၁၇:၁၇-၂၄; ၂ စီၤပၤ ၄:၃၂-၃၇; ၁၃:၂၀, ၂၁; လူၤ ၇:၁၁-၁၅; ၈:၄၁, ၄၂, ၄၉-၅၆; ယိၤ ၁၁:၃၈-၄၄; မၤတၢ် ၉:၃၆-၄၂; ၂၀:၇-၁၂) ဖဲန့ၣ်အကျါန့ၣ် ဆၣ်ဖိကီၢ်ဖိတပၣ် နီတဒုဘၣ်.