၂ ၡမူၤအ့လး
၄ ဖဲစီၤစီလူး အဖိခွါ စီၤအံၤၡဘိၡ့း+ နၢ်ဟူဝဲလၢ စီၤအဘံန့ၢ် သံဝဲလၢ ဝ့ၢ်ဃ့ဘြိၣ်အပူၤအခါ+ အဝဲပျံၤတၢ် ဒီးပှၤအံၣ်စရ့လးဖိခဲလၢာ် သူၣ်ကိၢ်သးဂီၤတၢ်လီၤ. ၂ ဒီးစီၤစီလူး အဖိခွါ အသုးဖိအဒူၣ်တဖၣ်န့ၣ် အိၣ်ဝဲလၢ ပှၤခံဂၤ အတၢ်တီခိၣ်ရိၤမဲ အဖီလာ်လီၤ. တဂၤန့ၣ် အမံၤလၢ စီၤဘၤနါ ဒီးအဝဲတဂၤ အမံၤလၢ စီၤရ့ကးလီၤ. ဒီးအဝဲသ့ၣ် အပၢ်မ့ၢ်ဝဲ စီၤရံးမိၣ် ဒီးစီၤရံးမိၣ် မ့ၢ်ဝဲ ပှၤဘအ့ရိးဖိလၢ အပၣ်ဃုာ်လၢ ဘံၣ်ယၤမံၣ် အဒူၣ်အကျါလီၤ. (လၢညါန့ၣ် ပှၤပာ်ပနီၣ် ဝ့ၢ်ဘအ့ရိးလၢ+ ဘံၣ်ယၤမံၣ် အဟီၣ်ကဝီၤအကျါ စ့ၢ်ကီးလီၤ. ၃ ဒီးပှၤဘအ့ရိးဖိ ဃ့ၢ်ကွံာ်ဝဲလၢ ကံးတယၣ်+ ဒီးအဝဲသ့ၣ် လဲၤအိၣ်ဖဲန့ၣ် ဒ်ပှၤထံဂၤကီၢ်ဂၤဖိအသိး တုၤလၢ မုၢ်မဆါတနံၤအံၤလီၤ.)
၄ ဒီးစီၤစီလူး အဖိခွါ စီၤယိနၤသၣ်န့ၣ်+ အိၣ်ဒီးအဖိခွါလၢ အခီၣ်တဂ့ၤဘၣ်တဂၤလီၤ.+ ဖဲတၢ်ကစီၣ်ဟးထီၣ် လၢယံးစရ့လး+ ဘၣ်ဃးဒီး စီၤစီလူး ဒီးစီၤယိနၤသၣ် အဂ့ၢ်အခါ ပှၤလၢအကွၢ်ထွဲ စီၤယိနၤသၣ် အဖိခွါတဂၤ စိာ်ထီၣ် စီၤယိနၤသၣ် အဖိခွါ ဒီးဃ့ၢ်ကွံာ်ဝဲလီၤ. ဘၣ်ဆၣ် မ့ၢ်လၢအကရီ ဃ့ၢ်လၢ တၢ်သူၣ်ကနိး သးကနိးအပူၤအဃိ စီၤယိနၤသၣ် အဖိခွါလၢ အမံၤမ့ၢ် စီၤမဖံဘိၤၡ့းန့ၣ်+ လီၤတဲာ်ဝဲဒီး အခီၣ်* ဘၣ်ဒိဝဲလီၤ.
၅ ဒီးပှၤဘအ့ရိးဖိ စီၤရံးမိၣ် အဖိခွါတဖၣ်လၢအမ့ၢ် စီၤရ့ကး ဒီးစီၤဘၤနါ လဲၤဝဲလၢ စီၤအံၤၡဘိၡ့း အဟံၣ်ဖဲ မုၢ်ဆါခီ တၢ်ကိၢ်ဝဲ အဆၢကတီၢ်န့ၣ်လီၤ. ဖဲန့ၣ်အဆၢကတီၢ် စီၤအံၤၡဘိၡ့း မံအိၣ်ဘှံးဝဲလီၤ. ၆ အဝဲသ့ၣ် လဲၤနုာ်လီၤလၢ ဟံၣ်ပူၤ ဒီးပာ်မၤအသးဒ်သိး ကလဲၤဟံးန့ၢ်ဘု ဒီးအဝဲသ့ၣ်ဆဲးဝဲ စီၤအံၤၡဘိၡ့း အဟၢဖၢ ဒီးအဝဲသ့ၣ်+ ဃ့ၢ်ပူၤဖျဲးကွံာ် အသးလီၤ. ၇ ဖဲအဝဲသ့ၣ် လဲၤနုာ်လီၤလၢ ဟံၣ်ပူၤအခါ စီၤအံၤၡဘိၡ့း မံနီၤဝဲလၢ အလီၢ်မံခိၣ် လၢအဒၢးပူၤ ဒီးအဝဲသ့ၣ် ဆဲးအီၤ ဒီးမၤသံကွံာ်အီၤ ဝံၤဒီး အဝဲသ့ၣ် ဒီၣ်တဲာ်ကွံာ်ဝဲ အခိၣ်သၣ်ဃံလီၤ. ဒီးအဝဲသ့ၣ်ဟံးန့ၢ်ဝဲ အခိၣ်သၣ်ဃံ ဒီးလဲၤဝဲဒီတနၤကျၢၤ လၢကျဲလၢအလဲၤဆူ ဧၤရဘၤန့ၣ်လီၤ. ၈ ဒီးအဝဲသ့ၣ် လဲၤစိာ် စီၤအံၤၡဘိၡ့း+ အခိၣ်သၣ်ဃံလၢ စီၤပၤဒၤဝံး အအိၣ်လၢ ဝ့ၢ်ဃ့ဘြိၣ်အပူၤ ဒီးတဲဘၣ်အီၤလၢ “ကစၢ်စီၤပၤဧၢ, အအံၤမ့ၢ်ဝဲ နဒုၣ်နဒါ စီၤစီလူးလၢ+ အဃုမၤသံနၤတဂၤန့ၣ်+ အဖိခွါ စီၤအံၤၡဘိၡ့း အခိၣ်သၣ်ဃံလီၤ. တနံၤအံၤ ယဟိဝၤယွၤ ဟ့ၣ်ကၣ်က့ၤ စီၤစီလူး ဒီးအစၢၤအသွဲၣ်တဖၣ် လၢနဂီၢ်လံ.”
၉ ဘၣ်ဆၣ် စီၤဒၤဝံးတဲဆၢက့ၤ ပှၤဘအ့ရိးဖိ စီၤရံးမိၣ် အဖိခွါတဖၣ်လၢအမ့ၢ် စီၤရ့ကး ဒီးစီၤဘၤနါလၢ “ယဟိဝၤယွၤ လၢအမၤပူၤဖျဲးယၤလၢ တၢ်နးတၢ်ဖှီၣ်ခဲလၢာ် အပူၤတဂၤန့ၣ် ယအၢၣ်လီၤတၢ်လၢ အမဲာ်ညါလၢ,+ ၁၀ ဖဲပှၤတဂၤ ဟဲတဲဘၣ်ယၤလၢ ‘စီၤစီလူးသံလံ’+ အခါန့ၣ်အဝဲဆိကမိၣ်လၢ အဟဲတဲဘၣ်ယၤ တၢ်သးခုကစီၣ် ဘၣ်ဆၣ် ယဖီၣ်န့ၢ်အီၤ ဒီးမၤသံအီၤ+ ဖဲဝ့ၢ်စံကလးအပူၤလီၤ. အဝဲန့ၣ် မ့ၢ်ဝဲခိၣ်ဖးလၢ ပှၤစိာ်တၢ်ကစီၣ်ဖိတဂၤန့ၣ် ဒိးန့ၢ်ဘၣ်ဝဲလၢ ယအိၣ်လီၤ. ၁၁ ဒီးခဲအံၤတဘျီ ပှၤအၢပှၤသီတဖၣ် မၤသံပှၤတီပှၤလိၤလၢ အလီၢ်မံခိၣ် လၢအနီၢ်ကစၢ် အဟံၣ်ပူၤအဃိ ယမၤသံအဝဲသ့ၣ် ကကြၢးဒိၣ်န့ၢ်အန့ၣ် တမ့ၢ်ဧီၤ. သုလူလီၤဂၢ်လီၤ အသွံၣ်အဃိ+ ယကြၢးဟံးန့ၢ်အရ့ ဒီးမၤလီၤမၢ်ကွံာ်သုလၢ ဟီၣ်ခိၣ်ချၢ တမ့ၢ်ဧီၤ.” ၁၂ ဒီးစီၤဒၤဝံး ဟ့ၣ်လီၤတၢ်ကလုၢ်လၢ ပိာ်ခွါသးစၢ်တဖၣ် ကမၤသံကွံာ်အဝဲသ့ၣ်+ ဒီးပိာ်ခွါ သးစၢ်တဖၣ် ကျီတဲာ်ကွံာ် အဝဲသ့ၣ် အစု ဒီးအခီၣ် ဒီးဘျးထီၣ် အဝဲသ့ၣ်လၢ+ ကမါအကပၤလၢ ဝ့ၢ်ဃ့ဘြိၣ်န့ၣ်လီၤ. ဘၣ်ဆၣ် အဝဲသ့ၣ်ဟံးန့ၢ် စီၤအံၤၡဘိၡ့း အခိၣ်သၣ်ဃံ ဒီးခူၣ်လီၤဝဲဖဲ ပှၤခူၣ်လီၤ စီၤအဘံန့ၢ်အလီၢ် လၢဝ့ၢ်ဃ့ဘြိၣ်န့ၣ်လီၤ.