ဖဲနီၢ်အံၣ်အုဒီးစီၤအၤဒၣ်​ ဟးထီၣ်လၢဧ့ၤဒ့ၣ်တၤသၣ်လီၢ် ဝံၤအလီၢ်ခံ နီၢ်အံၣ်အု အိၣ်ဖျဲၣ်ထီၣ်ဝဲ အဖိအါဂၤ. အဝဲသ့ၣ်​ အဖိအဆိကတၢၢ်တဂၤန့ၣ်​ အမံၤမ့ၢ်စီၤကၤယံၣ်​ ဒီးအဝဲမ့ၢ်ပှၤလၢ အသူၣ်အီၣ်ဖျးအီၣ်တၢ်တဂၤ. အဝဲသ့ၣ်​ အဖိခံဂၤတဂၤန့ၣ်​ အမံၤမ့ၢ် စီၤဟ့းဘ့းလး ဒီးအဝဲမ့ၢ်ပှၤကွၢ်သိတဂၤလီၤ.

ဘၣ်တနံၤန့ၣ်​ စီၤကၤယံၣ်ဒီးစီၤဟ့းဘ့းလး ဟ့ၣ်လုၢ်ထီၣ်တၢ်ဆူ ယဟိဝၤယွၤအအိၣ်. တၢ်ဟ့ၣ်လုၢ်ထီၣ်တၢ်န့ၣ်​ မ့ၢ်တၢ်မနုၤလဲၣ်, မ့ၢ်နသ့ၣ်ညါဧါ. တၢ်ဟ့ၣ်လုၢ်ထီၣ်တၢ်န့ၣ်​ မ့ၢ်တၢ်ဟ့ၣ်လၢ ဘၣ်တၢ်ကတဲာ်ကတီၤအီၤ လီၤလီၤဆီဆီတခါ. ယဟိဝၤယွၤ ဘၣ်အသးလၢ စီၤဟ့းဘ့းလး အတၢ်ဟ့ၣ်လုၢ်ထီၣ်. မ့မ့ၢ်စီၤကၤယံၣ်​ အတၢ်ဟ့ၣ်လုၢ်ထီၣ်န့ၣ်​ ကစၢ်ယွၤတဘၣ်အသးဘၣ်. အဃိ စီၤကၤယံၣ်​ သးထီၣ်တၢ်ဒိၣ်မး. ဒီးယဟိဝၤယွၤ ဟ့ၣ်ပလီၢ် စီၤကၤယံၣ်​ ဒီးတဲဘၣ်အီၤလၢ နမ့ၢ်သးဒိၣ်ထီၣ်တၢ်ဒ်အံၤန့ၣ်​ နကမၤဘၣ်တၢ်အၢတၢ်သီ တမံၤမံၤ. ဘၣ်ဆၣ်​ စီၤကၤယံၣ်တဒိကနၣ်​ ကစၢ်ယွၤ အတၢ်ဟ့ၣ်ပလီၢ်ဘၣ်.

လၢခံန့ၣ်​ စီၤကၤယံၣ်တဲဘၣ်အပုၢ်လၢ ‘လဲၤဒီးယၤလၢ တၢ်ပျီပူၤ.’ ဖဲအဝဲသ့ၣ်​ အိၣ်ထဲခံဂၤလၢ တၢ်ပျီပူၤအခါ စီၤကၤယံၣ်​ တီၢ်သံဝဲအပုၢ်. ခီဖျိလၢ စီၤကၤယံၣ်​ မၤဝဲတၢ်အၢတၢ်သီအဃိ ယဟိဝၤယွၤ စံၣ်ညီၣ်အီၤဒ်လဲၣ်. ယဟိဝၤယွၤ စံၣ်ညီၣ်စီၤကၤယံၣ်အဃိ အဝဲဘၣ်လဲၤအိၣ်လၢ တၢ်လီၢ်လၢအယံၤဒီး အဟံၣ်ဖိဃီဖိ. ဒီးစီၤကၤယံၣ်တအိၣ်ဒီး တၢ်ခွဲးတၢ်ယာ်လၢ ကဟဲက့ၤဖဲန့ၣ်​ နီတဘျီလၢၤဘၣ်.

ပဒိးန့ၢ်ဘၣ်​ တၢ်မၤလိဒ်လဲၣ်. တဘျီတခီၣ်​ ပမၤတၢ်တမံၤမံၤ မ့ၢ်တဟဲကဲထီၣ်အသးဒ် ပမုၢ်လၢ်ပာ်စၢၤအသိးန့ၣ်​ ပသးထီၣ်တၢ်သ့ဝဲ. ဖဲပသးထီၣ်တၢ်အခါ မ့တမ့ၢ် ဖဲပှၤဂၤသ့ၣ်ညါလၢ ပသးထီၣ်တၢ် ဒီးအဝဲသ့ၣ်​ မ့ၢ်ဟ့ၣ်ပလီၢ်ပှၤန့ၣ်​ ပကြၢးဆီတလဲ ပတၢ်ပာ်သူၣ်ပာ်သး ဒီးပကဘၣ်မၤလီၤမၢ်ကွံာ် ပတၢ်သးထီၣ်​ လၢအချ့.

မ့ၢ်လၢ စီၤဟ့းဘ့းလး အဲၣ်ယဟိဝၤယွၤ ဒီးမၤတၢ်လၢအဘၣ်အဃိ ယဟိဝၤယွၤ တသးပ့ၤနီၣ်အီၤ နီတဘျီဘၣ်. ဖဲကစၢ်ယွၤမၤကဲထီၣ်က့ၤ ဟီၣ်ခိၣ်ဒီဘ့ၣ်လၢ ပၤရဒံစူးအခါ ကစၢ်ယွၤ ကမၤသမူထီၣ်က့ၤ စီၤဟ့းဘ့းလး.

ကယီကယီန့ၣ်​ ပှၤဟီၣ်ခိၣ်ဖိအါထီၣ်ဝဲလၢ ဟီၣ်ခိၣ်ချၢ ဒီးအဝဲသ့ၣ်အါတက့ၢ်န့ၣ်​ မၤတၢ်အၢတၢ်သီ. မူခိၣ်ကလူးတနီၤန့ၣ်​ စးထီၣ်မၤဝဲ တၢ်အၢတၢ်သီစ့ၢ်ကီး. မူခိၣ်ကလူးတဖၣ်အံၤ ပာ်တ့ၢ်ကွံာ် အတၢ်အိၣ်တၢ်ဆိးအလီၢ် လၢမူခိၣ်​ ဒီးဟဲလီၤဆူဟီၣ်ခိၣ်ချၢ. ဘၣ်မနုၤအဃိ အဝဲသ့ၣ်ဟဲလီၤလၢ ဟီၣ်ခိၣ်ချၢလဲၣ်. အဝဲသ့ၣ်မၤကဲထီၣ်အသးဒ် ပှၤဟီၣ်ခိၣ်ဖိအက့ၢ်အဂီၤအသိး ဒီးဟံးန့ၢ်အမါလၢ ပှၤဟီၣ်ခိၣ်ဖိ.

မူခိၣ်ကလူးတဖၣ်အမါန့ၣ်​ အိၣ်ဖျဲၣ်ထီၣ်ဝဲအဖိတဖၣ်. ဖဲအဝဲသ့ၣ်​ အဖိခွါတဖၣ်ဒိၣ်ထီၣ်အခါ အဂံၢ်ဆူၣ်ဘါဆူၣ်​ ဒီးမၤနၢၤအီၣ်ပှၤဂၤ. ဒီးအဝဲသ့ၣ်မၤဘၣ်ဒိဘၣ်ထံး ပှၤဂၤစ့ၢ်ကီး. ယဟိဝၤယွၤ ဟ့ၣ်အခွဲးလၢ တၢ်အၢတၢ်သီတဖၣ်​ ကအိၣ်လၢ ဟီၣ်ခိၣ်ချၢ တသ့လၢၤဘၣ်. အဃိ ကစၢ်ယွၤ ဆၢတဲာ်လီၤအသးလၢ ကမၤဟးဂီၤကွံာ် ပှၤအၢပှၤသီတဖၣ်လၢထံ.

ဘၣ်ဆၣ်​ လၢပှၤအၢပှၤသီအကျါန့ၣ်​ ပှၤဂ့ၤအိၣ်ဝဲတဂၤ. အမံၤမ့ၢ်စီၤနိအၤ ဒီးအဝဲမ့ၢ်ပှၤတဂၤလၢ အဲၣ်ယဟိဝၤယွၤ. အဝဲအိၣ်ဒီးအမါ ဒီးအဖိခွါသၢဂၤ. အဖိခွါသၢဂၤအံၤ အမံၤမ့ၢ်ဝဲ စီၤၡ့ၣ်, စီၤဃၣ်​ ဒီးစီၤယ့ဖ့းသး. ဒီးအဖိခွါ ကိးဂၤဒဲးန့ၣ်​ အိၣ်ဒီးအမါ. ယဟိဝၤယွၤမၢ စီၤနိအၤတ့ထီၣ်​ ကဘီဖးဒိၣ်တဘ့ၣ်လၢ အလီၤဂာ်ဒီး တလါဖးဒိၣ်တဖျၢၣ်. ဖဲထံလုၢ်ဘၢတၢ်အခါ ကဘီဖးဒိၣ်အံၤ ကထီၣ်ဖီလၢထံဖီခိၣ်​ ဒ်သိး စီၤနိအၤဒီး အဟံၣ်ဖိဃီဖိ ကပူၤဖျဲးဝဲအဂီၢ်လီၤ. ဒီးယဟိဝၤယွၤ တဲဘၣ်စ့ၢ်ကီး စီၤနိအၤလၢ ကကိးနုာ်လီၤဝဲ ဆၣ်ဖိကီၢ်ဖိတဖၣ်လၢ ကဘီအပူၤ ဒ်သိး ကပူၤဖျဲးဝဲအဂီၢ်.

တဘျီဃီန့ၣ်​ စီၤနိအၤစးထီၣ်တ့ထီၣ်ဝဲ ကဘီဖးဒိၣ်တဘ့ၣ်. စီၤနိအၤ ဒီးအဟံၣ်ဖိဃီဖိန့ၣ်​ တ့ထီၣ်ကဘီ ယံာ်ဝဲအနံၣ်​ ၅၀ ဃၣ်ဃၣ်. အဝဲသ့ၣ်​ တ့ထီၣ်ကဘီဒ် ယဟိဝၤယွၤ တဲဘၣ်အဝဲသ့ၣ်အသိး. ဒီးဖဲန့ၣ်အဆၢကတီၢ် စီၤနိအၤ ဟ့ၣ်ပလီၢ်စ့ၢ်ကီးပှၤဂၤလၢ ထံကလုၢ်ဘၢဟီၣ်ခိၣ်. ဘၣ်ဆၣ်​ ပှၤတဒိကနၣ်​ အတၢ်ကစီၣ်နီတဂၤဘၣ်.

ခဲအံၤ တၢ်ဆၢကတီၢ်ဘၣ်လၢ စီၤနိအၤဒီးအဟံၣ်ဖိဃီဖိ ကနုာ်လီၤလၢ ကဘီအပူၤ. တၢ်ကမၤအသးဒ်လဲၣ်န့ၣ်​ ပကမၤလိအါထီၣ်လၢ တၢ်မၤလိလၢခံတခါအပူၤ.