ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ တၢ်ဂ့ၢ်ဘျးစဲ
© 2025 Watch Tower Bible and Tract Society of Pennsylvania
လါနိၣ်ဝ့ဘၢၣ် ၃-၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ တၢ်သးဝံၣ်တဖၣ်အတၢ်သးဝံၣ် ၁-၂
တၢ်လဲၤခီဖျိလၢ ဘၣ်ဃးဒီး တၢ်အဲၣ်လၢအတီ
တၢး၁၅-E ၁/၁၅ ၃၀ ¶၉-၁၀
တၢ်အဲၣ်လၢအတီ အိၣ်နီၢ်ကီၢ်ဧါ
၉ ပှၤနီၢ်ဒီမိၢ်ဝၤတဖၣ် မ့ၢ်ပာ်ဖျါထီၣ် တၢ်အဲၣ် ဒီးတဲဖျါထီၣ် တၢ်အဲၣ်လၢ အသးသမူတံၤသကိး အဖီခိၣ်န့ၣ် အတၢ်ဆီဟံၣ်ဆီဃီ ကဂၢၢ်ကျၢၤထီၣ် ဒီးကပှဲၤဒီး တၢ်သးခု.
၁၀ ပှၤနီၢ်ဒီမိၢ်ဝၤတဖၣ် မ့ၢ်ပာ်ဖျါထီၣ်တၢ်အဲၣ်န့ၣ် ကကဲဘျုးလၢ ကျဲအဂၤဒံး. ဘၣ်ဃးဒီးတၢ်ဂ့ၢ်အံၤ ပကကွၢ် တၢ်လဲၤခီဖျိတခါ. စီၤပၤၡလိၤမိၤ တဲဝဲလၢ အကဟ့ၣ် ပှၤၡူလမးမုၣ်ဖိလၢ “တၢ်ကယၢကယဲလၢ ပှၤမၤအီၤလၢထူဒီးစ့တဖၣ်.” ဒီးအပတြၢၤဝဲလၢ ပှၤၡူလမးမုၣ်ဖိန့ၣ် “ဃံလၤဝဲ ဒ်လါဖိကပီၤအသိး ဒီးအစီဆှံဝဲဒ် မုၢ်အတၢ်ကပီၤအသိး.” (တၢ် ၁:၉-၁၁; ၆:၁၀) ဘၣ်ဆၣ် ပှၤၡူလမးမုၣ်ဖိန့ၣ် ဆဲးတီဒီး အတၢ်အဲၣ်တီ ပှၤကွၢ်သိ. ဖဲအဝဲအိၣ်ယံၤဒီး အတၢ်အဲၣ်တီအခါ တၢ်မနုၤ မၤစၢၤအီၤဒ်သိး အကဆဲးအိၣ်ဒီး တၢ်သးတီ ဒီးအသးကမုာ်ထီၣ်အဂီၢ်လဲၣ်. ဖဲ တၢ်သးဝံၣ်တဖၣ်အတၢ်သးဝံၣ် ၁:၂, ၃ န့ၣ်ပာ်ဖျါထီၣ်ဝဲလၢ အဝဲနီၣ်ဘၣ်ဝဲ ပှၤကွၢ်သိအ ‘တၢ်အဲၣ်လၢ အပာ်ဖျါထီၣ်’ န့ၢ်အီၤ. (ဖး) တၢ်အဲၣ်လၢ ပှၤကွၢ်သိ ပာ်ဖျါထီၣ်န့ၢ်အီၤန့ၣ် မၤမုာ်အသး. ဒီးပှၤကွၢ်သိအမံၤန့ၣ် လီၤဂာ်ဒ် “သိနၢမူလၢ အလူၤလီၤအသး” လၢပှၤခိၣ်လိၤ. (စံး ၂၃:၅; ၁၀၄:၁၅) ဒ်န့ၣ်အသိး ပှၤနီၢ်ဒီမိၢ်ဝၤတဖၣ် မ့ၢ်ပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်န့ၣ် အဝဲသ့ၣ် အတၢ်အဲၣ် ကဆဲးဂၢၢ်ကျၢၤဒိၣ်ထီၣ်. အဃိ အရ့ဒိၣ်ဒိၣ်မးလၢ အဝဲသ့ၣ် ကဘၣ်ပာ်ဖျါထီၣ် တၢ်အဲၣ်ခဲအံၤခဲအံၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၅-E ၁/၁၅ ၃၁ ¶၁၁
တၢ်အဲၣ်လၢအတီ အိၣ်နီၢ်ကီၢ်ဧါ
၁၁ တၢ်သးဝံၣ်တဖၣ်အတၢ်သးဝံၣ် ပာ်ဖျါထီၣ်စ့ၢ်ကီး တၢ်မၤလိလၢ ခရံာ်ဖိလၢ အသဘျ့အဂီၢ် လီၤဆီဒၣ်တၢ်လၢ ခရံာ်ဖိလၢ အအဲၣ်ဒိး ဆီဟံၣ်ဆီဃီတဖၣ်အဂီၢ်. ပှၤၡူလမးမုၣ်ဖိန့ၣ် တအဲၣ်ဝဲ စီၤၡလိၤမိၤဘၣ်. အဃိ အဝဲမၢ ပှၤယရူၤၡလ့ၣ်မုၣ်တဖၣ် အၢၣ်လီၤတၢ် ဒီးတဲဝဲလၢ “ယတၢ်အဲၣ် မ့ၢ်တဟဲအိၣ်ထီၣ် အနီၢ်ကစၢ်ဒံးဘၣ်န့ၣ် တဘၣ် ဂုာ်ကျဲးစၢး ထိၣ်ဟူးထိၣ်ဂဲၤထီၣ် ယတၢ်အဲၣ်တဂ့ၤ.” (တၢ် ၂:၇; ၃:၅) ဘၣ်မနုၤအဃိလဲၣ်. ပတကြၢးမ့ၢ်ပှၤလၢ အထံၣ်တဂၤ အဲၣ်တဂၤ, ထံၣ်တဂၤ အဲၣ်တဂၤန့ၣ်ဘၣ်. လၢတၢ်န့ၣ်အလီၢ် ခရံာ်ဖိလၢ အအဲၣ်ဒိး ဆီဟံၣ်ဆီဃီတဂၤန့ၣ် ကြၢးအိၣ်ခိးတၢ်လၢ တၢ်ဝံသးစူၤ ဒီးဆီဟံၣ်ဆီဃီဒီး ပှၤလၢအအဲၣ်ဝဲနီၢ်ကီၢ်တဂၤ.
လါနိၣ်ဝ့ဘၢၣ် ၁၀-၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ တၢ်သးဝံၣ်တဖၣ်အတၢ်သးဝံၣ် ၃-၅
တၢ်သူၣ်ဂ့ၤသးဝါ ဒီးတၢ်ဂ့ၤတၢ်ဝါ မ့ၢ်တၢ်လၢအရ့ဒိၣ်
တၢး၁၅-E ၁/၁၅ ၃၀ ¶၈
တၢ်အဲၣ်လၢအတီ အိၣ်နီၢ်ကီၢ်ဧါ
၈ ပှၤၡူလမးမုၣ်ဖိ ဒီးပှၤကွၢ်သိန့ၣ် တပတြၢၤလိာ်အသး တဂၤဒီးတဂၤ ထဲလၢ နီၢ်ခိတၢ်ဃံတၢ်လၤ တကပၤဘၣ်. အဒိ ပှၤကွၢ်သိန့ၣ် ပတြၢၤဝဲ ပှၤၡူလမးမုၣ်ဖိ ဘၣ်ဃးဒီး အတၢ်စံးတၢ်ကတိၤ. (ဖး တၢ်သးဝံၣ်တဖၣ်အတၢ်သးဝံၣ် ၄:၇, ၁၁) အဝဲတဲဝဲ ပှၤၡူလမးမုၣ်ဖိလၢ “ကနဲစီအခိၣ်ထံ ယွၤလီၤလၢ နထးခိၣ်” ဒီး “တၢ်နုၢ်ထံ ဒီးကနဲစီ အိၣ်လၢနပျ့ၤ အဖီလာ်.” အဲၣ်ဒိးတဲဝဲလၢ ပှၤၡူလမးမုၣ်ဖိ အတၢ်စံးတၢ်ကတိၤန့ၣ် အမၤမုာ်ပှၤသး ဒီးအဂ့ၤဝဲဒိၣ်မး. တကးဒံးဘၣ် အတဲဝဲလၢ “နဃံနလၤဒီဂၤ ဒီးနတၢ်လီၤတူာ်လီၤကာ် တအိၣ်နီတမံၤဘၣ်.” အဃိ တၢ်ကတိၤတဖၣ်အံၤ ပာ်ဖျါထီၣ်ဝဲလၢ ပှၤၡူလမးမုၣ်ဖိန့ၣ် တမ့ၢ်ထဲ အဃံလၤလၢ နီၢ်ခိတကပၤဘၣ်, အတၢ်ဂ့ၤတၢ်ဝါ အိၣ်ဝဲဒီဒူၣ်ဒံး.
တၢး၀၀-E ၁၁/၁ ၁၁ ¶၁၇
ကစၢ်ယွၤ အတၢ်ထံၣ်လၢဘၣ်ဃးဒီး တၢ်သကဲာ်ပဝးလၢ အကဆှီ
၁၇ ပှၤလၢအအိၣ်ဒီး တၢ်သးတီ အဂၤတဂၤန့ၣ် မ့ၢ်ဝဲ ပှၤၡူလမးမုၣ်ဖိ. အီၤန့ၣ် တမ့ၢ်ထဲ ပှၤကွၢ်သိတဂၤ ဘၣ်သူၣ်ဘၣ်သးအီၤဘၣ်, စီၤပၤၡလိၤမိၤစ့ၢ်ကီး ဘၣ်သူၣ်ဘၣ်သးအီၤ. လံာ်တၢ်သးဝံၣ်တဖၣ် အတၢ်သးဝံၣ် ဒီတကတြူၢ်အပူၤန့ၣ် ပာ်ဖျါထီၣ်ဝဲလၢ ပှၤၡူလမးမုၣ်ဖိန့ၣ် အအိၣ်ဒီး လုၢ်လၢ်သကဲာ်ပဝး လၢအကဆှီ အဃိ ပှၤလၢအခိၣ်အဃၢၤတဖၣ် ပာ်လုၢ်ပာ်ပှ့ၤအီၤ. အဝဲတတူၢ်လိာ် စီၤၡလိၤမိၤ သနာ်က့ သးစီဆှံ ထိၣ်ဟူးထိၣ်ဂဲၤထီၣ် စီၤၡလိၤမိၤလၢ ကကွဲးလီၤ တၢ်ဂ့ၢ်အံၤ. ပှၤကွၢ်သိလၢ ပှၤၡူလမးမုၣ်ဖိ အဲၣ်ဝဲတဂၤန့ၣ် ပာ်လုၢ်ပာ်ပှ့ၤ ပှၤၡူလမးမုၣ်ဖိ အတၢ်သကဲာ်ပဝးလၢ အကဆှီစ့ၢ်ကီး. ဘၣ်တဘျီန့ၣ် ပှၤကွၢ်သိ တဲဝဲလၢ ပှၤၡူလမးမုၣ်ဖိန့ၣ် လီၤဂာ်ဒီး “တၤသၣ်လီၢ်လၢ တၢ်ခးတံၢ်ဃာ်အီၤ.” (တၢ်သးဝံၣ်တဖၣ်အတၢ်သးဝံၣ် ၄:၁၂) တၤသၣ်လီၢ်ဃံလၤလၢ ပှၤအံၣ်စရ့လးဖိအစိၤန့ၣ် အအိၣ်ဝဲဒီး တၢ်ဒိးတၢ်လၣ် အကလုာ်ကလုာ်, ဖီလၢအနၢမူနၢဆှီ ဒီးသ့ၣ်ထူၣ်ဖးဒိၣ်တဖၣ်. တၤသၣ်လီၢ်ဒ်အံၤန့ၣ် ပှၤကရၢဃာ်အီၤ မ့တမ့ၢ် ပှၤဒူၣ်ဃာ်အီၤ အဃိ ပှၤလဲၤနုာ်လီၤ သ့ထဲလၢ အတြဲၤ. (ယၡါယၤ ၅:၅) လၢပှၤကွၢ်သိအဂီၢ် ပှၤၡူလမးမုၣ်ဖိ လၢအလီၤအဲၣ်လီၤကွံ ဒီးအအိၣ်ဒီး အလုၢ်လၢ်သကဲာ်ပဝး လၢအဂ့ၤန့ၣ် လီၤဂာ်ဒ်သိးဒီး တၤသၣ်လီၢ်ဃံလၤလၢ အတအိၣ်ဝဲအါအါဘၣ်. ပှၤၡူလမးမုၣ်ဖိန့ၣ် အအိၣ်ဒီး တၢ်သကဲာ်ပဝးလၢ အကဆှီဒိၣ်မး. အဝဲပာ်ဖျါထီၣ် တၢ်အဲၣ်ထဲလၢ ပှၤလၢကကဲထီၣ် အသးသမူတံၤသကိး အဖီခိၣ်.
g04-E ၁၂/၂၂ ၉ ¶၂-၅
တၢ်ဃံတၢ်လၤလၢ အရ့ဒိၣ်ဒိၣ်မး
တၢ်သူၣ်ဂ့ၤသးဝါန့ၣ် အထုးန့ၢ်ပှၤသးသ့ဧါ. ကၠီၤကၠံၣ်နၤ လၢဆီဟံၣ်ဆီဃီ ဘူးကအိၣ် အနံၣ်တဆံတဂၤန့ၣ် တဲဝဲလၢ “လၢအနံၣ်တဖၣ်အတီၢ်ပူၤန့ၣ် ယဝၤန့ၣ် အတဲတၢ်ဒီးယၤ တီတီလိၤလိၤ ဒီးအတပာ်မၤအသးဘၣ်အဃိ အထုးန့ၢ်ယသးဒိၣ်မး. ဒီးတၢ်အရ့ဒိၣ်လၢအဂီၢ်န့ၣ်မ့ၢ်ဝဲ ကမၤတၢ်ဘၣ်ယွၤအသး အဃိ အဆိကမိၣ်န့ၢ်တၢ်လၢယဂီၢ် ဒီးအအဲၣ်ယၤ. ဖဲအဝဲဆၢတဲာ်တၢ်အခါ အကွၢ်န့ၢ်တၢ်လၢယဂီၢ် ဒီးအပာ်လုၢ်ပာ်ပှ့ၤယၤ. ယသ့ၣ်ညါလၢ အအဲၣ်ယၤသပှၢ်တၢၢ်.”
ဒဲနံးယၢၤ လၢအဆီဟံၣ်ဆီဃီဖဲ ၁၉၈၇ တဂၤန့ၣ် တဲဝဲလၢ “ယမါန့ၣ် အလီၤအဲၣ်ဘၣ်ယၤဒိၣ်မး. ယဘၣ်သူၣ်ဘၣ်သးအီၤန့ၣ် တမ့ၢ်ထဲလၢ အဒိၣ်တၢ်ဂ့ၤတခါဘၣ်. အအိၣ်ဒီး တၢ်ပာ်သူၣ်ပာ်သး လၢအဂ့ၤအဃိ ယအဲၣ်အီၤ ဒိၣ်ထီၣ်မးဒိၣ်ထီၣ်. ထီဘိန့ၣ် အဆိကမိၣ်န့ၢ်တၢ်လၢ ပှၤဂၤအဂီၢ်, အသူၣ်အိၣ်သးအိၣ်ပှၤဂၤ ဒီးမၤသးခုပှၤသး. အအိၣ်ဒီး ခရံာ်ဖိ အတၢ်ဂ့ၤတၢ်ဝါတဖၣ်. အဃိ ယအိၣ်ဒီးအီၤမုာ်မး.”
ပတဘၣ်ကွၢ်ထဲလၢ တၢ်လၢအအိၣ်ဖျါလၢခိဘၣ်. တၢ်ဃံတၢ်လၤ လၢခိလၢ ပှၤကိးဂၤဒဲး ကဘၣ်သူၣ်ဘၣ်သးဝဲန့ၣ် ပှၤမၤန့ၢ်အီၤတန့ၢ် ညီညီဘၣ် ဒီးအရ့တဒိၣ် ထဲန့ၣ်စ့ၢ်ကီးဘၣ်. ဘၣ်ဆၣ် မ့မ့ၢ် တၢ်သူၣ်ဂ့ၤသးဝါန့ၣ် ပှၤကိးဂၤဒဲး ဘၣ်သူၣ်ဘၣ်သးဝဲ ဒီးပှၤဒုးအိၣ်ထီၣ်ဝဲသ့. လံာ်စီဆှံ တဲဝဲလၢ “တၢ်လီၤအဲၣ်လီၤကွံန့ၣ် လီန့ၢ်တၢ်သ့ ဒီးတၢ်ဃံတၢ်လၤန့ၣ် လီၤမၢ်ကွံာ်ချ့ချ့ သ့ဝဲလီၤ. မ့မ့ၢ် ပိာ်မုၣ်လၢ အပျံၤ ယဟိဝၤယွၤန့ၣ် ကဘၣ်တၢ်စံးပတြၢၤအီၤလီၤ.” တကးဒံးဘၣ် လံာ်စီဆှံ ဟ့ၣ်ပလီၢ်ပှၤလၢ “ပိာ်မုၣ်လၢအဒိၣ်တၢ်ဂ့ၤ ဘၣ်ဆၣ် အသးတဆးဘၣ်န့ၣ် လီၤဂာ်ဒ်သိးဒီး နါဒ့ကွီၤထူ တကွီၤလၢ ထိးအနါဒ့လိၤလီၤ.”—ကတိၤဒိ ၁၁:၂၂; ၃၁:၃၀.
ကစၢ်ယွၤ အကလုၢ်ကထါ မၤစၢၤပှၤ ဒ်သိးပကပာ်လုၢ်ပာ်ပှ့ၤ ‘တၢ်လၢ အအိၣ်ခူသူၣ်အသးလၢ ပှၤသူၣ်ကံၢ်သးလဲအပူၤ, တၢ်ဃံတၢ်လၤလၢ အဟးဂီၤတသ့ဘၣ် လၢအမ့ၢ် တၢ်ပာ်သး မုာ်မုာ်ခုၣ်ခုၣ် ဒီးတၢ်သူၣ်စူၤသးစူၤ . . . တၢ်အဝဲအံၤ မ့ၢ်တၢ်လၢ အလုၢ်ဒိၣ်ပှ့ၤဒိၣ်လၢ ကစၢ်ယွၤအမဲာ်ညါလီၤ.’ (၁ ပ့းတရူး ၃:၄) တၢ်သူၣ်ဂ့ၤသးဝါန့ၣ် အရ့ဒိၣ်န့ၢ်ဒံး နီၢ်ခိအတၢ်ဃံတၢ်လၤ စၢၢ်တလၢၢ်. ဒီးပှၤကိးဂၤဒဲး ဒုးအိၣ်ထီၣ်ဝဲသ့.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆-E ၁၁/၁၅ ၁၈ ¶၄
လံာ်စီဆှံ အတၢ်ပာ်ဖျါလၢလံာ် တၢ်သးဝံၣ်တဖၣ်အတၢ်သးဝံၣ်
၂:၇; ၃:၅—ဘၣ်မနုၤအဃိ ပှၤၡူလမးမုၣ်ဖိ မၢပိာ်မုၣ်လၢ နီပူၤတဖၣ် အၢၣ်လီၤတၢ်လၢ “တၤဟိမိၢ်ဒီးတၤဟိဖါလၢ အအိၣ်လၢ တၢ်ပျီပူၤ” အမဲာ်ညါလဲၣ်. တၤဟိမိၢ် ဒီးတၤဟိဖါတဖၣ်န့ၣ် ဖျါဃံလၤ ဒီးဒိၣ်တၢ်ဂ့ၤမး. အဃိ လီၤဂာ်ဒ်သိးဒီး ပှၤၡူလမးမုၣ်ဖိ မၢဝဲပိာ်မုၣ်လၢ နီပူၤတဖၣ် အၢၣ်လီၤတၢ်လၢ တၢ်ဃံတၢ်လၤခဲလၢာ် အမဲာ်ညါ ဒ်သိး အတထိၣ်ဟူးထိၣ်ဂဲၤထီၣ်အီၤလၢ တၢ်အဲၣ်တကပၤ တဂ့ၤအဂီၢ်.
ပကူတၢ်ကၤတၢ်ဒ်လဲၣ်န့ၣ် အရ့ဒိၣ်ဧါ
၁. ဖဲပဃုထၢလၢ ပကကူတၢ်ကၤတၢ်ဒ်လဲၣ် ဒီးပကမၤဃံမၤလၤထီၣ်ပသး ဒ်လဲၣ်အခါ ပကြၢးမၤထွဲ လံာ်စီဆှံ အတၢ်ဟံးစုနဲၣ်ကျဲ မနုၤတဖၣ်လဲၣ်.
ပကြၢး ‘ကူတၢ်သိးတၢ် ဂ့ၤဂ့ၤဘၣ်ဘၣ်လၢ အလီၤပာ်ကဲ ဒီးလၢအပာ်ဖျါထီၣ် လၢပမ့ၢ် ပှၤလၢ အဆိကမိၣ်ထံတၢ်သ့ဂ့ၤဂ့ၤ’ ဒီးဒ်သိးဒီး ပှၤဂၤ ကသ့ၣ်ညါလၢ ပကဲပှၤလၢ အ “အဲၣ်ထူအဲၣ်ယွၤ” အဂီၢ် ပဘၣ်ဖျါ ကဆှဲကဆှီထီဘိ. (၁ တံၤမသ့း ၂:၉, ၁၀) ပကတဲသကိး လံာ်စီဆှံ အတၢ်ဟံးစုနဲၣ်ကျဲ လွံၢ်မံၤ. (၁) ပကြၢး “ကူတၢ်သိးတၢ် ဂ့ၤဂ့ၤဘၣ်ဘၣ်.” ဒ်နထံၣ်ဘၣ်လၢ တၢ်အိၣ်ဖှိၣ်အသိး ယဟိဝၤပှၤအုၣ်အသးတဖၣ်န့ၣ် အဝဲသ့ၣ်ကၠဲး တၢ်ကူတၢ်ကၤ တဒ်သိးလိာ်အသးဘၣ်. ဘၣ်ဆၣ် ပတၢ်ကူတၢ်ကၤ ဒီးပမၤဃံမၤလၤထီၣ် ပသးဒ်လဲၣ်န့ၣ် အပာ်ဖျါထီၣ် လၢပပာ်ကဲ ပကစၢ်ယွၤ ထီဘိလီၤ. (၂) ကူတၢ်ကၤတၢ်လၢ “အလီၤပာ်ကဲ.” ပမ့ၢ်ကူတၢ်ကၤတၢ်လၢ အလီၤပာ်ကဲန့ၣ် ပတကူတၢ်ကၤတၢ်လၢ အဒုးအိၣ်ထီၣ်ပှၤဂၤ အတၢ်ဆိကမိၣ်လၢ အတကြၢးတဘၣ်ဘၣ်. ဒီးပတကူတၢ်ကၤတၢ် ဒ်သိးပှၤဂၤ ကသးစၢၢ်ဆၢပှၤ အါတလၢဘၣ်. (၃) ပမ့ၢ်တဟးပှ့ၤထဲ တၢ်ကူတၢ်ကၤ လၢအဟဲထီၣ်သီ ဒီးပှၤအါဂၤ ဘၣ်သူၣ်ဘၣ်သးဝဲဘၣ်န့ၣ် ပပာ်ဖျါထီၣ်လၢ ပမ့ၢ်ပှၤလၢအ “ဆိကမိၣ်ထံတၢ်သ့ဂ့ၤဂ့ၤ.” (၄) ပတၢ်ကူတၢ်ကၤ ဒီးပတၢ်မၤဃံမၤလၤထီၣ်သးန့ၣ် ကဘၣ်ပာ်ဖျါထီၣ်လၢ ပကဲပှၤလၢအ “အဲၣ်ထူအဲၣ်ယွၤ” ဒီးပကဲပှၤလၢ အဘူၣ်ထီၣ်ဘါထီၣ် ကစၢ်ယွၤလၢ အမ့ၢ်အတီထီဘိ.—၁ ကရံၣ်သူး ၁၀:၃၁.
၂. ပကကူတၢ်ကၤတၢ်ဒ်လဲၣ်န့ၣ် ဘၣ်မနုၤအဃိ ပဘၣ်ဆိကမိၣ်န့ၢ်တၢ်လၢ ပဒီပုၢ်ဝဲၢ်တဖၣ် အဂီၢ်လဲၣ်.
ပကကူကကၤတၢ် ဒ်လဲၣ်န့ၣ် ပဃုထၢသ့လီၤ. ဘၣ်ဆၣ် ပကဘၣ်သ့ၣ်နီၣ်ထီၣ်လၢ ပတၢ်ကူတၢ်ကၤန့ၣ် ကဲထီၣ်တၢ်သးဘၣ်တံာ်တာ် လၢပှၤဂၤအဂီၢ်သ့. ပအဲၣ်ဒိးဂုာ်ကျဲးစၢး “မၤသးခု ပှၤလၢပခိၣ်ပဃၢၤအသး ဒ်သိး ကဟ့ၣ်ဂံၢ်ဟ့ၣ်ဘါအီၤ အဂီၢ်” ဒီးပတအဲၣ်ဒိး ကဲထီၣ်တၢ်ကီတၢ်ခဲ လၢပှၤဂၤအဂီၢ်ဘၣ်.—ဖး ရိမ့ၤ ၁၅:၁, ၂.
၃. ပတၢ်ကူတၢ်ကၤန့ၣ် ထုးန့ၢ်ပှၤဂၤအသး ဒ်သိးအဝဲသ့ၣ် ကအဲၣ်ဒိးမၤလိ ယဟိဝၤယွၤအဂ့ၢ် သ့ဒ်လဲၣ်.
ပဂုာ်ကျဲးစၢး ကူတၢ်ကၤတၢ်လၢ အကြၢးအဘၣ်ထီဘိ ဒီးပတအဲၣ်ဒိးလၢ ပှၤလၢ ပစံၣ်တဲၤတဲလီၤအီၤတဖၣ်န့ၣ် ကသးဘၣ်တံာ်တာ် လၢပတၢ်ကူတၢ်ကၤအဃိဘၣ်. အဃိ လီၤဆီဒၣ်တၢ် ဖဲပထီၣ်တၢ်အိၣ်ဖှိၣ် ဒီးပစံၣ်တဲၤတဲလီၤတၢ်အခါ ပပလီၢ်ပသး အါတစဲး. ပပလီၢ်ပသးဒ်န့ၣ် မ့ၢ်လၢ ပအဲၣ်ဒိးလၢ ပတၢ်ကူတၢ်ကၤန့ၣ် ကထုးန့ၢ်ပှၤဂၤအသး ဒ်သိးအဝဲသ့ၣ် ကအဲၣ်ဒိးမၤလိ ကစၢ်ယွၤလၢ ပဘူၣ်ထီၣ်ဘါထီၣ်အီၤ တဂၤန့ၣ်အဂ့ၢ် ဒီးပအဲၣ်ဒိး “မၤဃံမၤလၤထီၣ် ကစၢ်ယွၤလၢအမ့ၢ် ပှၤလၢ အအုၣ်က့ၤခီၣ်က့ၤပှၤတဂၤ အတၢ်သိၣ်လိတဖၣ်” အဃိလီၤ.—တံတူး ၂:၁၀.
လါနိၣ်ဝ့ဘၢၣ် ၁၇-၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ တၢ်သးဝံၣ်တဖၣ်အတၢ်သးဝံၣ် ၆-၈
ကဲထီၣ်တၢ်ဒူၣ် ဒီးတဘၣ်ကဲထီၣ် ဒ်ပဲတြီတဂ့ၤ
it “တၢ်သးဝံၣ်တဖၣ်အတၢ်သးဝံၣ်” ¶၁၁
တၢ်သးဝံၣ်တဖၣ်အတၢ်သးဝံၣ်
လၢခံန့ၣ် စီၤၡလိၤမိၤ ပျဲဟဲက့ၤ ပှၤၡူလမးမုၣ်ဖိ လၢအဟံၣ်. ဖဲအဟဲက့ၤ ဒီးအကၠီတဖၣ် ထံၣ်စိအီၤအခါ အဝဲသ့ၣ် တဲဝဲလၢ “ပှၤလၢ အဟးသန့ၤအသးလၢ အပှၤသးဘိအလိၤ လၢအဟဲထီၣ်လၢ ပှၢ်မုၢ်ကနၢန့ၣ် မ့ၢ်မတဂၤလဲၣ်.” (တၢ် ၈:၅) ပှၤၡူလမးမုၣ်ဖိ အကၠီတဖၣ်န့ၣ် တသ့ၣ်ညါဝဲလၢ အဒ့မုၣ် အတၢ်အဲၣ်တီအိၣ်ဒံးဘၣ်. လၢအပူၤကွံာ် အနံၣ်တဖၣ်န့ၣ် ဘၣ်ဃးဒီး အဒ့မုၣ်န့ၣ် အကၠီတဂၤ တဲဝဲလၢ “ပဒ့မုၣ်ဖိအိၣ်တဂၤ ဒီးအနုၢ်တထီၣ်ဒံးဘၣ်. ဖဲမုၢ်နံၤလၢ ပှၤဟဲဃ့ဖျီသးဒီးအီၤန့ၣ် ပကဘၣ်မၤန့ၢ်အီၤ တၢ်မနုၤလဲၣ်.” (၈:၈) ဒီးအကၠီအဂၤတဂၤ တဲဝဲလၢ “အဝဲမ့မ့ၢ် တၢ်ဒူၣ်န့ၣ် ပကတ့ထီၣ်န့ၢ်အီၤ တၢ်အခိၣ် လၢစ့ညၣ်လီၤ. ဒီးအဝဲမ့မ့ၢ် ပဲတြီန့ၣ် ပကတြီတံာ်ဃာ်န့ၢ်အီၤလၢ သ့ၣ်ဆှိအ့ရ့း အသ့ၣ်ဘ့ၣ်ဘၣ်လီၤ.” (၈:၉) ပှၤၡူလမးမုၣ်ဖိ တြီဆၢကွံာ် တၢ်ကွဲန့ၢ်လွဲန့ၢ် န့ၢ်ဝဲ, အသးမံဒီး အစပံးကျီး လၢအအိၣ်ဒီးအီၤ ဒီးအဆဲးတီဒီး အတၢ်အဲၣ်တီအဃိ အတဲဝဲ ဒ်အံၤသ့, အတဲဝဲလၢ “ယမ့ၢ်တၢ်ဒူၣ် ဒီးယနုၢ်လီၤဂာ် တၢးထီတဖၣ်လီၤ. လၢအတၢ်ထံၣ်န့ၣ် ယမ့ၢ် ပှၤခုၣ်ခုၣ်ဖိတဂၤလီၤ.”—တၢ် ၈:၆, ၇, ၁၀-၁၂.
yp-E ၁၈၈ ¶၂
ပှၤမ့ၢ်မံဃုာ် တချုးလၢ ဖျီသးဒံးဘၣ်န့ၣ် အကမၣ်ဧါ မ့တမ့ၢ် အဘၣ်ဧါ
ပှၤသးစၢ်တဖၣ် မ့ၢ်အိၣ်ဒီး တၢ်သကဲာ်ပဝး လၢအကဆှီန့ၣ် အဝဲသ့ၣ် တထံၣ်ဘၣ်ဒီး တၢ်လၢကကဲထီၣ်အသး လၢအလီၤပျံၤလီၤဖုးတဖၣ်ဘၣ်. တကးဒံးဘၣ် အကဒိးန့ၢ်ဘၣ် အဘျုးလၢအဂၤဒံး. လံာ်စီဆှံ ပာ်ဖျါထီၣ်န့ၢ်ပှၤ ပှၤၡူလမးမုၣ် သးစၢ်တဂၤန့ၣ် အအဲၣ်အတၢ်အဲၣ်တီဒိၣ်မး သနာ်က့ အဆဲးအိၣ်ဒီး တၢ်သကဲာ်ပဝး လၢအကဆှီ. အဃိ အတဲဝဲသ့လၢ “ယမ့ၢ်တၢ်ဒူၣ် ဒီးယနုၢ်လီၤဂာ် တၢးထီတဖၣ်လီၤ.” ဖဲအထံၣ်ဘၣ်ဒီး တၢ်မၤကွၢ်လၢ ကမၤကမၣ်မုၣ်ကမၣ်ခွါအခါ အဝဲတလီၤဂာ်ဒ် ‘ပဲတြီ’ လၢအအိးထီၣ်အသး ညီညီဘၣ်. အဝဲလီၤဂာ်ဒ် ဝ့ၢ်ဒူၣ်လၢအကျၢၤလၢ အအိၣ်ဒီး တၢးထီလၢ ဒုၣ်ဒါတဖၣ် လဲၤနုာ်လီၤ တသ့ဝဲန့ၣ်ဘၣ်. အဃိ ပှၤတဲအီၤလၢ “အစီဆှံဝဲ” န့ၣ်ကြၢးဝဲဘၣ်ဝဲလီၤ. ဒီးအတဲဝဲ ပှၤလၢကကဲထီၣ်အဝၤဒ်အံၤသ့, အဝဲတဲဝဲလၢ “လၢအတၢ်ထံၣ်န့ၣ် ယမ့ၢ် ပှၤခုၣ်ခုၣ်ဖိတဂၤလီၤ.” ခီဖျိလၢ အဝဲဆဲးအိၣ်ဒီး တၢ်သကဲာ်ပဝးလၢ အကဆှီအဃိ အဝဲသ့ၣ်ခံဂၤလၢာ် ဒိးန့ၢ်ဘၣ် တၢ်သူၣ်မံသးမုာ်.—တၢ်သးဝံၣ်တဖၣ်အတၢ်သးဝံၣ် ၆:၉, ၁၀; ၈:၉, ၁၀.
yp2-E ၃၃
ပှၤၡူလမးမုၣ်ဖိလၢ အဒိဂ့ၤတဲာ်ဘၣ်
ဘၣ်ဃးဒီးတၢ်အဲၣ်န့ၣ် ပှၤၡူလမးမုၣ်ဖိ သ့ၣ်ညါဝဲလၢ အတဘၣ် ဒိးသန့ၤထီၣ်အသး ထဲလၢအတၢ်တူၢ်ဘၣ် အဖီခိၣ်ဘၣ်. အကဘၣ် ဆိကမိၣ်ထံတၢ် လီၤတံၢ်လီၤဆဲး. အဝဲတဲဝဲ အသကိးတဖၣ်လၢ “ယကမၢ သုအၢၣ်လီၤတၢ်လၢ ယတၢ်အဲၣ် မ့ၢ်တဟဲအိၣ်ထီၣ် အနီၢ်ကစၢ်ဒံးဘၣ်န့ၣ် တဘၣ် ဂုာ်ကျဲးစၢး ထိၣ်ဟူးထိၣ်ဂဲၤထီၣ် ယတၢ်အဲၣ်တဂ့ၤ. ပှၤၡူလမးမုၣ်ဖိ သ့ၣ်ညါဝဲလၢ တၢ်တူၢ်ဘၣ်န့ၣ် လုၢ်ဘၢကွံာ် တၢ်ဆိကမိၣ်ထံတၢ် လီၤတံၢ်လီၤဆဲးသ့. အဒိ အဝဲသ့ၣ်ညါဝဲလၢ ခီဖျိလၢ ပှၤဂၤအတၢ်ဆီၣ်သနံးအဃိ အဝဲကအဲၣ်ဘၣ်ဖုး ပှၤလၢအတကြၢးအဲၣ်ဝဲသ့. ဒီးအနီၢ်ကစၢ် အတၢ်တူၢ်ဘၣ်ဒၣ်လဲာ်န့ၣ် ဆှၢကမၣ်အီၤ လၢကဆၢတဲာ်တၢ်လၢ အကမၣ်သ့. အဃိ အဝဲပာ်လီၤအသးလၢ ကအိၣ်ဂၢၢ်ဂၢၢ်ကျၢၤကျၢၤဒ် “တၢ်ဒူၣ်.”—တၢ်သးဝံၣ်တဖၣ်အတၢ်သးဝံၣ် ၈:၄, ၁၀.
နတၢ်ထံၣ်ဘၣ်ဃးဒီး တၢ်အဲၣ်န့ၣ် လီၤဂာ်ဒ်သိးဒီး ပှၤၡူလမးမုၣ်ဖိဧါ. နကဒိးသန့ၤထီၣ်သးထဲလၢ တၢ်တူၢ်ဘၣ်ဧါ, မ့တမ့ၢ် နကဆိကမိၣ်ထံတၢ် လီၤတံၢ်လီၤဆဲးဧါ. (ကတိၤဒိ ၂:၁၀, ၁၁) တဘျီတခီၣ် ပှၤဂၤကဆီၣ်သနံးနၤလၢ နကပာ်တၢ်အဲၣ်တီ တချုးလၢ နအိၣ်ကတဲာ်ကတီၤသးလၢ ကဆီဟံၣ်ဆီဃီဒံးဘၣ်. မ့တမ့ၢ်ဘၣ် နနီၢ်ကစၢ်န့ၣ် ကဘၣ်သးပာ်တၢ်အဲၣ်တီ တချုးလၢ အဆၢကတီၢ် ဘၣ်ဒံးဘၣ်. အဒိ ဖဲနထံၣ်ဘၣ် ပှၤဒီတၢ်အဲၣ်တီ ဟးဖီၣ်လိာ်သးစုအခါ နဘၣ်သး ပာ်တၢ်အဲၣ်တီဧါ. မ့ၢ်နကပာ်တၢ်အဲၣ်တီဒီး ပှၤလၢအတၢ်စူၢ်တၢ်နာ် တဒ်သိးဒီးနၤဧါ. ဘၣ်ဃးဒီး တၢ်အဲၣ်န့ၣ် ပှၤၡူလမးမုၣ်ဖိ ဆၢတဲာ်တၢ်ဒ် ပှၤလၢအဒိၣ်တုာ်ခိၣ်ပှဲၤတဂၤသ့. နၤစ့ၢ်ကီး နမၤဒ်န့ၣ်သ့ဝဲ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၅-E ၁/၁၅ ၂၉ ¶၃
တၢ်အဲၣ်လၢအတီ အိၣ်နီၢ်ကီၢ်ဧါ
၃ ဖး တၢ်သးဝံၣ်တဖၣ်အတၢ်သးဝံၣ် ၈:၆. တၢ်ကတိၤ လၢအမ့ၢ် “ယဟိဝၤယွၤ အမ့ၣ်အူလၣ်” န့ၣ်ပာ်ဖျါထီၣ်ဝဲလၢ တၢ်အဲၣ်န့ၣ် အသဟီၣ်ဆူၣ်ဝဲဒိၣ်မး. တၢ်အဲၣ်လၢအတီန့ၣ် လီၤဂာ်ဒ်သိး “ယဟိဝၤယွၤ အမ့ၣ်အူလၣ်,” မ့ၢ်လၢ တၢ်အဲၣ်လၢအတီန့ၣ် အခီၣ်ထံးခီၣ်ဘိ ဟဲစးထီၣ်လၢ ယဟိဝၤယွၤအအိၣ်အဃိ. ယဟိဝၤယွၤ တ့လီၤဝဲ ပှၤဟီၣ်ခိၣ်ဖိ ဒ်အက့ၢ်အဂီၤအသိး အဃိ ပှၤဟီၣ်ခိၣ်ဖိတဖၣ် ကွၢ်လိအီၤ ဒီးအိၣ်ဒီးတၢ်အဲၣ် ဒ်သိးဒီးအီၤသ့. (၁ မိၤ ၁:၂၆, ၂၇) ဖဲကစၢ်ယွၤ ဟဲကိးန့ၢ် နီၢ်အံၣ်အုလၢ စီၤအၤဒၣ်အအိၣ်အခါ တၢ်လၢစီၤအၤဒၣ်တဲဝဲန့ၣ် ပာ်ဖျါထီၣ်လၢ အအဲၣ်ဘၣ် နီၢ်အံၣ်အု. ဒီးနီၢ်အံၣ်အုစ့ၢ်ကီး အဲၣ်ဘၣ် စီၤအၤဒၣ်, မ့ၢ်လၢ အဝဲ “ဟဲအိၣ်ထီၣ်” ခီဖျိလၢအီၤ. (၁ မိၤ ၂:၂၁-၂၃) ဖဲယဟိဝၤယွၤ တ့လီၤပိာ်မုၣ် ဒီးပိာ်ခွါအခါ အတ့လီၤဃုာ်ဝဲဒီး တၢ်သ့တၢ်ဘၣ်လၢ အဝဲသ့ၣ် အဲၣ်လိာ်သးနီၢ်ကီၢ်သ့ ဒီးပာ်ဖျါထီၣ် တၢ်အဲၣ်လၢအတီ လၢတဂၤဒီးတဂၤ အဖီခိၣ်သ့.
ဘၣ်ဃးဒီး တၢ်ပာ်တၢ်အဲၣ်တီန့ၣ် ယဟိဝၤပှၤအုၣ်အသးတဖၣ် အိၣ်ဒီးတၢ်သိၣ်တၢ်သီဒ်လဲၣ်.
ယဟိဝၤပှၤအုၣ်အသးတဖၣ် နာ်ဝဲလၢ တၢ်သိၣ်တၢ်သီမိၢ်ပှၢ်ဒီး တၢ်မၤလိာ်လၢ လံာ်စီဆှံအပူၤန့ၣ် မၤစၢၤပှၤသ့လၢ ပကဆၢတဲာ်တၢ်လၢ အဘၣ်ယွၤအသး ဒီးကဲဘျုးလၢပဂီၢ်လီၤ. (ယၡါယၤ ၄၈:၁၇, ၁၈) ပတထုးထီၣ် တၢ်သိၣ်တၢ်သီမိၢ်ပှၢ် ဒီးတၢ်မၤလိာ်တဖၣ်အံၤဘၣ်. ဘၣ်ဆၣ် ပမၤထွဲဒ် လံာ်စီဆှံ အတၢ်သိၣ်တၢ်သီတဖၣ် အိၣ်ဝဲအသိးလီၤ. ပကဆိကမိၣ်ကွၢ် တၢ်ဂ့ၢ်လၢလာ်တဖၣ်အံၤ လၢအဘၣ်ဃးဒီး တၢ်ပာ်တၢ်အဲၣ်တီ အဂ့ၢ်န့ၣ်လီၤ.
တၢ်ဆီဟံၣ်ဆီဃီန့ၣ် ကဘၣ်အိၣ်ဂၢၢ်ကျၢၤဝဲ ထီဘိလီၤ. (မးသဲ ၁၉:၆) လၢတၢ်န့ၣ်အဃိ ယဟိဝၤပှၤအုၣ်အသးတဖၣ် ထံၣ်ဝဲတၢ်ပာ်တၢ်အဲၣ်တီန့ၣ် မ့ၢ်ခီၣ်ခါတခါလၢ ပှၤခံဂၤကကတဲာ် ကတီၤအသးလၢ ကဖျီအသးအဂီၢ်လီၤ. တၢ်အံၤပထံၣ်အီၤဒ် တၢ်လၢအရ့ဒိၣ်တခါလီၤ.
တၢ်ဆီဟံၣ်ဆီဃီန့ၣ် မ့ၢ်ထဲဒၣ်ပှၤလၢ အဒိၣ်တုာ်ခိၣ်ပှဲၤ တဖၣ်အဂီၢ်လီၤ. လၢတၢ်န့ၣ်အဃိ ပှၤလၢအပာ်တၢ်အဲၣ်တီန့ၣ် ကဘၣ်မ့ၢ်ပှၤလၢ ‘အယူာ်အထံးတလၢကွံာ်’ လံ. တၢ်အံၤအဲၣ်ဒိးစံးဝဲ ဖဲတၢ်သးကတၢ အသဟီၣ်ဆူၣ် တလၢပူၤကွံာ် အခါန့ၣ်လီၤ.—၁ ကရံၣ်သူး ၇:၃၆.
ပှၤလၢအပာ်တၢ်အဲၣ်တီန့ၣ် ကြၢးမ့ၢ်ပှၤလၢ အိၣ်ဒီးတၢ်သဘျ့လၢ ကဖျီအသးအဂီၢ်လီၤ. ပှၤတနီၤ မၤလီၤဖးအသးလၢ ပဒိၣ်အမဲာ်ညါဝံၤ ဘၣ်ဆၣ် မ့တမ့ၢ်လၢ တၢ်မၤကမၣ်မုၣ်ကမၣ်ခွါ အဃိန့ၣ် ကစၢ်ယွၤ တဟ့ၣ်အခွဲးလၢ အဝဲသ့ၣ် ကဖျီအသးဒီး ပှၤလၢအသီတဂၤဘၣ်.—မးသဲ ၁၉:၉.
ခရံာ်ဖိတဖၣ်လၢ အဲၣ်ဒိးဖျီအသးန့ၣ် ကြၢးဒိကနၣ် ကစၢ်ယွၤ အတၢ်မၤလိာ်လၢ ကဘၣ်ဃုထၢထဲဒၣ် ပှၤလၢအစူၢ်တၢ်နာ်တၢ် ဒ်သိးသိးဒီးအီၤလီၤ. (၁ ကရံၣ်သူး ၇:၃၉) ယဟိဝၤပှၤအုၣ်အသးတဖၣ် နၢ်ပၢၢ်ဝဲလၢ တၢ်မၤလိာ်အံၤ တအဲၣ်ဒိးစံးဝဲထဲ ပှၤလၢအယူးယီၣ်ပာ်ကဲ ပတၢ်စူၢ်တၢ်နာ်ဘၣ်. ကဘၣ်မ့ၢ် ပှၤလၢအဘျၢထံဝံၤ ဒ်ယဟိဝၤပှၤအုၣ်အသးအသိး ဒီးမၤထွဲဝဲဒ် ပတၢ်စူၢ်တၢ်နာ် အိၣ်ဝဲအသိးန့ၣ်လီၤ. (၂ ကရံၣ်သူး ၆:၁၄) လၢပျၢၤလံၤလံၤန့ၣ် ကစၢ်ယွၤနဲၣ်လိဝဲ ပှၤလၢအဘူၣ်ထီၣ်ဘါထီၣ်အီၤ တဖၣ်လၢ အဝဲသ့ၣ် ကဘၣ်ဖျီအသးဒီး ပှၤလၢအတၢ်နာ် တမံၤဃီလီၤ. (၁ မိၤၡ့ ၂၄:၃; မၤလကံ ၂:၁၁) ပှၤဃုသ့ၣ်ညါတၢ်လၢ မုၢ်မဆါတနံၤညါအံၤတဖၣ် ထံၣ်ဝဲလၢ တၢ်မၤလိာ်အံၤန့ၣ် အဘျုးအိၣ်ဝဲလီၤ.
ဖိသ့ၣ်တဖၣ် ကြၢးဒိကနၣ်မိၢ်ပၢ် အကလုၢ်လီၤ. (ကတိၤဒိ ၁:၈; ကလီးစဲ ၃:၂၀) လၢတၢ်န့ၣ်အဃိ ဖိတဖၣ်လၢအိၣ်လၢ မိၢ်ပၢ်အဟံၣ်ပူၤန့ၣ် ကဘၣ်ဒိကနၣ်မိၢ်ပၢ် အတၢ်ဆၢတဲာ်လၢ ဘၣ်ဃးဒီး တၢ်ပာ်တၢ်အဲၣ်တီန့ၣ်လီၤ. အဒိ ဖိမုၣ်မ့ၢ်ဂ့ၤ ဖိခွါမ့ၢ်ဂ့ၤ အဝဲသ့ၣ် ပာ်တၢ်အဲၣ်တီသ့လၢ အသးအနံၣ်ထဲလဲၣ် ဒီးဖဲပာ်တၢ်အဲၣ်တီအခါ အဝဲသ့ၣ် ကြၢးအိၣ်ဒ်လဲၣ်ဒီး ကဘၣ်ပလီၢ်အသး ဒ်လဲၣ်န့ၣ် ကဘၣ်ဒိကနၣ် အမိၢ်အပၢ် အကလုၢ်လီၤ.
ပဝဲယဟိဝၤ ပှၤအုၣ်အသးတဂၤစုာ်စုာ် ပကပာ်တၢ်အဲၣ်တီဧါ, တပာ်တၢ်အဲၣ်တီဧါ ဒီးပကပာ်တၢ်အဲၣ်တီဒီး မတၤတဂၤလဲၣ်န့ၣ် ပကဘၣ်ဆၢတဲာ်လီၤ ပသးဒၣ်ပဝဲဒ် လံာ်စီဆှံနဲၣ်လိပှၤ အသိးလီၤ. တၢ်အံၤလီၤပလိာ်လိာ်အသးဒီး လံာ်စီဆှံ တၢ်သိၣ်တၢ်သီမိၢ်ပှၢ်လၢ “ပှၤဘၣ်ဝံအတၢ်ဝံဒၣ်ဝဲ, ကိးဂၤဒဲးလီၤ.” (ကလၤတံ ၆:၅) ဘၣ်ဆၣ် ဖဲအပာ်တၢ်အဲၣ်တီအခါ အဝဲသ့ၣ်အါဂၤ ဃ့တၢ်ဟ့ၣ်ကူၣ်လၢ ဒီပုၢ်ဝဲၢ်လၢ အဒိၣ်တုာ်ခိၣ်ပှဲၤလၢ အသးအိၣ်မၤစၢၤပှၤဂၤ အအိၣ်န့ၣ်လီၤ.—ကတိၤဒိ ၁:၅.
ဖဲပာ်တၢ်အဲၣ်တီအခါ ပှၤအါဂၤမၤဘၣ်ဝဲ တၢ်ကမၣ်ဖးဒိၣ်လီၤ. အဒိ, လံာ်စီဆှံမၤလိာ်ပှၤလၢ ပကဘၣ်ဟးဆှဲးတၢ်မၤကမၣ်မုၣ်ကမၣ်ခွါလီၤ. တၢ်ကတိၤတဖျၢၣ်အံၤ အခီပညီတမ့ၢ်ထဲလၢ တၢ်မံဃုာ်လိာ်အသးတခါဘၣ်. ပၣ်ဃုာ်စ့ၢ်ကီးဒီး သကဲာ်ပဝးဘၣ်အၢဘၣ်သီလၢ ပှၤခံဂၤလၢ တဖျီဘၣ်အသးဒံးမၤဝဲ, ဒ်သိးဒီး တၢ်ဖူးလဲး ပှၤအဂၤတဂၤအမုၣ်ခွါက့ၢ်ဂီၤလၢ တၢ်သးကတၢအပူၤ, တၢ်မံဃုာ်လိာ်အသးလၢ အကိာ်ပူၤ မ့တမ့ၢ် လၢအခံပူၤလီၤ. (၁ ကရံၣ်သူး ၆:၉-၁၁) တကးဒံးဘၣ် ပှၤခံဂၤလၢ တဖျီဘၣ်အသးဒံးဘၣ် မ့ၢ်တမၤကမၣ်မုၣ်ကမၣ်ခွါ ဘၣ်ဆၣ်မၤဝဲလုၢ်လၢ်သကဲာ်ပဝးဘၣ်အၢဘၣ်သီလၢ အဒုးအိၣ်ထီၣ်တၢ်သးကတၢန့ၣ် ကစၢ်ယွၤတဘၣ်အသးဘၣ် ဒီးမ့ၢ်တၢ် “တကဆှီ” ဘၣ်လၢအမဲာ်ညါလီၤ. (ကလၤတံ ၅:၁၉-၂၁, ခ့ခါစှီၤကျိာ်) ဒီးတၢ်တဲသကိး “တၢ်ကတိၤမဲာ်ဆှး” လၢဘၣ်ဃးဒီး တၢ်မၤကမၣ်မုၣ်ကမၣ်ခွါအဂ့ၢ်န့ၣ် မ့ၢ်တၢ်လၢလံာ်စီဆှံတြီဝဲလီၤ.—ကလီးစဲ ၃:၈.
တၢ်လၢသးန့ၣ် လီန့ၢ်တၢ်သ့လီၤ. (ယံးရမံယၤ ၁၇:၉) လၢတၢ်န့ၣ်အဃိ ပမ့ၢ်သ့ၣ်ညါ တၢ်လၢအတဂ့ၤ ဘၣ်ဆၣ်ပသးန့ၣ် ကလီန့ၢ်ပှၤလၢ ပကမၤကမၣ်တၢ်လီၤ. ဒ်သိးအသုတမၤကမၣ်ဘၣ်တၢ်တဂ့ၤအဂီၢ် ပှၤလၢအပာ်တၢ်အဲၣ်တီန့ၣ် တကြၢးအိၣ်ထဲခံဂၤလၢ တၢ်အိၣ်အသးလၢ အကကဲထီၣ်တၢ်လ့ပစီ လၢအဝဲသ့ၣ်အဂီၢ်န့ၣ်ဘၣ်. လၢတၢ်န့ၣ်အဃိ ဖဲအဝဲသ့ၣ်ဟးတပူၤလၢ်လၢ်အခါ ဘၣ်သ့ၣ်သ့ၣ် အဝဲသ့ၣ်ကအဲၣ်ဒိးလဲၤသကိးဒီးအတံၤသကိးဒီဒူၣ် မ့တမ့ၢ် ကိးဃုာ်ဒီး အတံၤသကိးလၢအကြၢးဝဲဘၣ်ဝဲတဂၤလၢ ကပိာ်အခံန့ၣ်လီၤ. (ကတိၤဒိ ၂၈:၂၆) ခရံာ်ဖိလၢအအိၣ်သဘျ့တဖၣ် မ့ၢ်ဃုအသးသမူတံၤသကိးလၢ online အပူၤန့ၣ် တၢ်ဘၣ်ယိၣ်အလီၢ်အိၣ်ဝဲလီၤ. လီၤဆီဒၣ်တၢ်လၢ online အဖီခိၣ်န့ၣ် အဝဲသ့ၣ်မ့ၢ်ဒုးအိၣ်ထီၣ် တၢ်ရ့လိာ်သးဒီးပှၤလၢ အတသ့ၣ်ညါဝဲဂ့ၤဂ့ၤန့ၣ် တၢ်ဘၣ်ယိၣ်အလီၢ်အိၣ်ဝဲလီၤ.—စံးထီၣ်ပတြၢၤ ၂၆:၄.
တၢ်ပာ်တၢ်အဲၣ်တီန့ၣ် အဲၣ်ဒိးစံးဝဲမနုၤလဲၣ်
ပှၤခံဂၤမ့ၢ်သးစဲလိာ်အသး ဒီးမ့ၢ်ပာ်ဖျါထီၣ် တၢ်အဲၣ်တၢ်ကွံ လၢတဂၤဒီးတဂၤအဖီခိၣ် လၢကျဲဒ်လဲၣ်ဂ့ၤဒ်လဲၣ်ဂ့ၤန့ၣ် အခီပညီမ့ၢ်ဒၣ်အဝဲသ့ၣ် ပာ်တၢ်အဲၣ်တီန့ၣ်လီၤ. အဝဲသ့ၣ်မ့ၢ်ပာ်ဖျါထီၣ် အတၢ်အဲၣ်လိာ်သး လၢပှၤမဲာ်ညါမ့ၢ်ဂ့ၤ, ပှၤလီၢ်ခံမ့ၢ်ဂ့ၤ, မ့ၢ်တဲသကိးတၢ်လၢလီတဲစိမ့ၢ်ဂ့ၤ မ့တမ့ၢ်ဆှၢလိာ်အသးလံာ်လၢ လီတဲစိအပူၤမ့ၢ်ဂ့ၤန့ၣ် မ့ၢ်ဒၣ်အဝဲသ့ၣ်ပာ်တၢ်အဲၣ်တီလီၤ. ဘၣ်ဃးဒီး တၢ်ပာ်တၢ်အဲၣ်တီန့ၣ် ယဟိဝၤပှၤအုၣ်အသးတဖၣ် တပာ်ဝဲဒ် တၢ်ဂဲၤလိာ်ကွဲအသိးဘၣ်, အဝဲသ့ၣ်ထံၣ်ဝဲလၢ တၢ်ပာ်တၢ်အဲၣ်တီန့ၣ် မ့ၢ်ဝဲလၢပှၤခံဂၤ ကအိၣ်ကတဲာ်ကတီၤအသးလၢ ကဖျီအသးအဂီၢ်လီၤ.
လါနိၣ်ဝ့ဘၢၣ် ၂၄-၃၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ ယၡါယၤ ၁-၂
တၢ်မုၢ်လၢ်အိၣ်လၢ ပှၤလၢ “အပှဲၤဒီး တၢ်ကမၣ်ဖးဒိၣ်တဖၣ်” အဂီၢ်
ip-1-E ၁၄ ¶၈
ပၢ်ဒီးအဖိလၢ အနၣ်က့ၣ်တဖၣ်
၈ ဝံယၡါယၤ တဲဝဲပှၤယူဒၤဖိတဖၣ်လၢ“သုဝဲလၢ အမ့ၢ်ပှၤတၢ်ဒဲးဘးဖိ တကလုာ်, ပှၤလၢအပှဲၤဒီး တၢ်ကမၣ်ဖးဒိၣ်တဖၣ် ဒီးဖိလၢ အဟးဂီၤ ဒီးအၢသီတဒူၣ်ဧၢ, သုကဘၣ်နးဘၣ်ဖှီၣ် သပှၢ်တၢၢ်လီၤ. သုပာ်တ့ၢ် ယဟိဝၤယွၤ, သုတပာ်ကဲ အံၣ်စရ့လး အကစၢ်ယွၤလၢ အစီဆှံတဂၤဘၣ်. သုဃၣ်ဒူၣ်ချၢသုသးလၢ အအိၣ်လံ.” (ယၡါယၤ ၁:၄) ဝံယၡါယၤ တဲဝဲလၢ ပှၤယူဒၤဖိတဖၣ်န့ၣ် “ပှဲၤဒီး တၢ်ကမၣ်ဖးဒိၣ်တဖၣ်.” တကးဒံးဘၣ် အတဲဝဲလၢ အဝဲသ့ၣ်မ့ၢ် “ဖိလၢ အဟးဂီၤ ဒီးအၢသီ.” အဝဲသ့ၣ် လီၤဂာ်ဒီး ဖိလၢ အမၤကမၣ်တၢ်. အဝဲသ့ၣ် ‘ဃၣ်ဒူၣ်ချၢအသး’ လၢအပၢ်အအိၣ်. လံာ်စီဆှံ လၢအမ့ၢ် New Revised Standard Version တဲဝဲလၢ အဝဲသ့ၣ် “ဟးသဒၣ်ကွံာ်” အပၢ်.
ip-1-E ၂၈-၂၉ ¶၁၅-၁၇
“ပကတဲသကိးတၢ် ဒီးယကမၤစၢၤသု ဒ်သိးသုကမၤဘၣ်ဂီၢ်က့ၤ သုတၢ်ရ့လိာ်သးဒီးယၤအဂီၢ်”
၁၅ ယဟိဝၤယွၤ တဲဝဲတၢ်ကတိၤလၢ အအိၣ်ဒီး တၢ်အဲၣ် ဒီးတၢ်သးကညီၤ. လံာ်စီဆှံ တဲဝဲလၢ “ယဟိဝၤယွၤ တဲဝဲလၢ ‘ဟဲ ပှၤဂီၢ်မုၢ်သ့ၣ်ဧၢ, ပကတဲသကိးတၢ် ဒီးယကမၤစၢၤသု ဒ်သိးသုကမၤဘၣ်ဂီၢ်က့ၤ သုတၢ်ရ့လိာ်သးဒီးယၤအဂီၢ်လီၤ. သုတၢ်ဒဲးဘးတဖၣ် မ့ၢ်ဂီၤဆှုၣ်ကလာ် ဘၣ်ဆၣ် အကဝါထီၣ်က့ၤဒ် မူခိၣ်ဖီအသိး ဒီးသုတၢ်ဒဲးဘး မ့ၢ်ဂီၤဒ် တၢ်သွံၣ်အသိး ဘၣ်ဆၣ် အကဝါထီၣ်က့ၤဒ် သိဆူၣ်အသိးလီၤ.’” (ယၡါယၤ ၁:၁၈) ပှၤတနီၤ နၢ်ပၢၢ်ကမၣ်ဝဲ လံာ်စီဆှံအဆၢအံၤ. အဒိ လံာ်စီဆှံတဘ့ၣ် လၢအမ့ၢ် The New English Bible န့ၣ်တဲဝဲလၢ “တဲအါလိာ်သး.” အဃိ ဒုးနၢ်ပၢၢ် ကမၣ်ပှၤလၢ ပှၤခံကပၤလၢာ်န့ၣ် ကဘၣ်ဟ့ၣ်ၡူလိာ်သး ဒ်သိး ကအိၣ်ဒီး တၢ်ဃူတၢ်ဖိးအဂီၢ်. သနာ်က့ ယဟိဝၤယွၤန့ၣ် အတၢ်ကမၣ်တအိၣ်ဘၣ် ဒီးမၤတၢ်တီတီလိၤလိၤ လၢပှၤလၢထီဒါအီၤ ဒီးပာ်မၤအသးတဖၣ် အဖီခိၣ်. (၅ မိၤၡ့ ၃၂:၄, ၅) လံာ်စီဆှံတဆၢအံၤ တအဲၣ်ဒိးတဲဝဲ ဘၣ်ဃးဒီး တၢ်တဲသကိးတၢ်လၢ ပှၤလၢအအိၣ်ဒီး တၢ်ကမၣ်ခံဂၤ အဘၢၣ်စၢၤဘၣ်. တၢ်အိၣ်သးန့ၣ် အလီၤဂာ်ဒ် ပှၤထီၣ်ရူ ဒ်သိး ကပာ်ဂၢၢ်ပာ်ကျၢၤ တၢ်တီတၢ်လိၤအဂီၢ်. အဃိ အလီၤဂာ်ဒ်သိး ယဟိဝၤယွၤ မၢပှၤအံၣ်စရ့လးဖိတဖၣ် ဟဲထီၣ်စံၣ်ညီၣ်ကွီၢ်အရူဒီးအီၤ.
၁၆ ဘၣ်သ့ၣ်သ့ၣ် အကဖျါလီၤပျံၤဘၣ်ဆၣ် ယဟိဝၤယွၤန့ၣ် မ့ၢ်စံၣ်ညီၣ်ကွီၢ် လၢအအိၣ်ဒီး တၢ်သးကညီၤ ဒီးတၢ်အဲၣ်တၢ်ကွံ. (စံးထီၣ်ပတြၢၤ ၈၆:၅) ထဲဒၣ်ယဟိဝၤယွၤတဂၤန့ၣ် မၤကဆှီထီၣ်ကွံာ် ပှၤအံၣ်စရ့လးဖိ အတၢ်ဒဲးဘးလၢအ “ဂီၤဆှုၣ်ကလာ်” ဒ်သိး “အကဝါထီၣ်က့ၤဒ် မူခိၣ်ဖီအသိး” သ့. ပှၤဟီၣ်ခိၣ်ဖိ တဂၤဂ့ၤတဂၤဂ့ၤ, တၢ်လုၢ်တၢ်ပာ် ဒီးတၢ်ထုကဖၣ် တမံၤဂ့ၤတမံၤဂ့ၤန့ၣ် မၤလီၤမၢ်ကွံာ် တၢ်ဒဲးဘးတန့ၢ်ဘၣ်. ယဟိဝၤယွၤ မ့ၢ်ပျၢ်ကွံာ် တၢ်ကမၣ်မး ပှၤတၢ်ဒဲးဘး လီၤမၢ်ကွံာ်သ့. ဘၣ်ဆၣ် ပှၤမ့ၢ်ပီၢ်ယၢ်လီၤသး နီၢ်ကီၢ်မး ယဟိဝၤယွၤ ကပျၢ်ကွံာ် အတၢ်ကမၣ်.
၁၇ ယဟိဝၤယွၤ တဲကဒီးဝဲ တၢ်ဂ့ၢ်လၢအရ့ဒိၣ်အံၤ လၢကျဲအဂၤတဘိ. အတဲဝဲလၢ တၢ်ဒဲးဘးလၢ အလီၤဂာ်ဒ် “တၢ်သွံၣ်” န့ၣ်ကဝါထီၣ်က့ၤဒ် သိဆူၣ်လၢ ပှၤတမၤဘၣ်အလွဲၢ် နီတမံၤဒံးဘၣ်. ယဟိဝၤယွၤ အဲၣ်ဒိးလၢ ပကသ့ၣ်ညါလၢ အဝဲမ့ၢ်ပှၤလၢ အပျၢ်ကွံာ်တၢ်ကမၣ် နီၢ်ကီၢ်. ဒီးပှၤမ့ၢ်မၤဘၣ် တၢ်ကမၣ် ဒိၣ်ထဲလဲၣ် သနာ်က့ ပှၤမ့ၢ်ပီၢ်ယၢ်လီၤသး နီၢ်ကီၢ်န့ၣ် အဝဲပျၢ်ကွံာ် တၢ်ကမၣ်နီၢ်ကီၢ်. ပှၤလၢအဆိကမိၣ်လၢ ကစၢ်ယွၤပျၢ်ကွံာ် အတၢ်ကမၣ် တသ့ဘၣ်န့ၣ် အဆိကမိၣ်ထံ စီၤမနၤၡ့ၤ အဒိအတဲာ်သ့. စီၤမနၤၡ့ၤန့ၣ် အမၤတၢ်ကမၣ် လၢအအၢအသီဒိၣ်မး လၢအနံၣ်အါမးအတီၢ်ပူၤ. သနာ်က့ အဝဲပီၢ်ယၢ်လီၤအသးအဃိ ကစၢ်ယွၤ ပျၢ်ကွံာ် အတၢ်ကမၣ်. (၂ ကွဲးနီၣ်တၢ် ၃၃:၉-၁၆) ယဟိဝၤယွၤ အဲၣ်ဒိးလၢ ပဝဲကိးဂၤဒဲး လၢာ်ဃုာ်ဒီး ပှၤလၢအမၤကမၣ်တၢ် ဖးဒိၣ်တဖၣ်န့ၣ် ‘ကမၤဘၣ်ဂီၢ်က့ၤ အတၢ်ရ့လိာ်သးဒီးအီၤ.’
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ip-1-E ၃၉ ¶၉
ယဟိဝၤယွၤအဟံၣ် ဘၣ်တၢ်ပာ်ထီၣ်ထီအီၤ
၉ လၢပစိၤခဲအံၤန့ၣ် ကစၢ်ယွၤအပှၤဂီၢ်မုၢ်တဖၣ် တလဲၤဘူၣ်ထီၣ်ဘါထီၣ်တၢ် လၢတၢ်လုၢ်ဟံၣ်လၢ အအိၣ်လၢ ကစၢၢ်ခိၣ်ဘၣ်. ယဟိဝၤယွၤ အတၢ်လုၢ်ဟံၣ် လၢဝ့ၢ်ယရူၤၡလ့ၣ်န့ၣ် ပှၤရိမ့ၤဖိတဖၣ် မၤဟးဂီၤကွံာ်အီၤဖဲ ခ.န ၇၀ အခါလံ. စီၤပီလူးတဲဝဲလၢ တၢ်လုၢ်ဟံၣ်လၢ ဝ့ၢ်ယရူၤၡလ့ၣ် ဒီးဒဲစီဆှံန့ၣ် အကဲဝဲတၢ်အဒိ. ဒီးအခၢၣ်စးဝဲ “ဒဲနီၢ်ကီၢ်” လၢ “ယဟိဝၤယွၤ သူၣ်ထီၣ်ဝဲဒီး တမ့ၢ်လၢ ပှၤဟီၣ်ခိၣ်ဖိ သူၣ်ထီၣ်ဝဲဘၣ်.” (ဧ့ၤဘြံၤ ၈:၂) နီၢ်သးအဒဲအံၤန့ၣ် အကဲဝဲ ယဟိဝၤယွၤ အတၢ်ရဲၣ်တၢ်ကျဲၤတခါလၢ အကတူၢ်လိာ်ဝဲ တၢ်ဘူၣ်ထီၣ်ဘါထီၣ်အီၤ. ဒီးတၢ်ရဲၣ်တၢ်ကျဲၤအံၤ ကဲထီၣ်သးသ့ ခီဖျိ ယ့ၣ်ၡူးအတၢ်ပှ့ၤက့ၤအဃိ. (ဧ့ၤဘြံၤ ၉:၂-၁၀, ၂၃) ဒ်န့ၣ်အသိး ဖဲ ယၡါယၤ ၂:၂ အပူၤ တၢ်ကတိၤလၢအမ့ၢ် “ယဟိဝၤယွၤ အတၢ်လုၢ်ဟံၣ် အကစၢၢ်” န့ၣ်အဲၣ်ဒိးတဲဝဲ ယဟိဝၤယွၤ အတၢ်ဘူၣ်ထီၣ်ဘါထီၣ်စီဆှံ လၢအဘၣ် တၢ်ပာ်ထီၣ်ထီအီၤ လၢပစိၤခဲအံၤ. ဒီးပှၤလၢအပၣ်ဃုာ် ဖဲန့ၣ်တဖၣ် တလဲၤပာ်ဖှိၣ်ထီၣ်အသးလၢ တၢ်လီၢ်ထီၣ်ထီနီၢ်ကီၢ် တတီၤတီၤဘၣ်. အဝဲသ့ၣ် ကအိၣ်ဒီး တၢ်ဃူတၢ်ဖိး လၢတၢ်ဘူၣ်ထီၣ်ဘါထီၣ်အပူၤ.
တၢး၂၅.၀၂ ၂-၃ ¶၂-၃ ဒီးတၢ်လွံၢ်နၢၣ် “တၢ်ဒဲးဘး”
ယဟိဝၤယွၤ ပျၢ်ကွံာ် ပတၢ်ကမၣ်အဃိ ပစံးဘျုးအီၤ
၂ ပဝဲစ့ၢ်ကီး ပတၢ်အိၣ်သး လီၤဂာ်ဒီး ပိာ်ခွါသးစၢ်တဂၤအံၤ. ပမိပပါ လၢအကဲဝဲ နီၢ်အံၣ်အု ဒီးစီၤအၤဒၣ်န့ၣ် တဘျီခါ အဝဲသ့ၣ်ကဲ ပှၤလၢပှၤပှဲၤ ဒီးအိၣ်ဘၣ်လၢ ပၤရဒံစူး လၢအမ့ၢ် ကရၢၢ်ဃံလၤအပူၤ. (၁ မိၤ ၁:၂၇; ၂:၇-၉) အဝဲသ့ၣ် အိၣ်ဒီးတၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ် ပှဲၤဒီးတၢ်သးခု. ဘၣ်ဆၣ် လၢခံန့ၣ် အဝဲသ့ၣ် မၤကမၣ်တၢ် ဒီးကဲထီၣ် ပှၤတၢ်ဒဲးဘးဖိ. အဃိအဝဲသ့ၣ် တအိၣ်မူဘၣ် လီၤထူလီၤယိာ်လၢ ဟီၣ်ခိၣ်ပၤရဒံစူး အပူၤလၢၤဘၣ်. တကးဒံးဘၣ် အဝဲသ့ၣ် အဖိအလံၤစ့ၢ်ကီး ဒိးန့ၢ်ဘၣ် တၢ်ဒဲးဘး. လံာ်စီဆှံ တဲဝဲလၢ “တၢ်ဒဲးဘး ဟဲနုာ်လီၤလၢ ဟီၣ်ခိၣ် ခီဖျိပိာ်ခွါတဂၤ [စီၤအၤဒၣ်] ဒီးတၢ်သံန့ၣ် ဟဲအိၣ်ထီၣ်ခီဖျိလၢ တၢ်ဒဲးဘးအဃိလီၤ. လၢတၢ်န့ၣ်အဃိ တၢ်သံရၤလီၤအသးလၢ ပှၤဟီၣ်ခိၣ်ဖိ ခဲလၢာ်အအိၣ် မ့ၢ်လၢပှၤခဲလၢာ် အိၣ်ဒီးတၢ်ဒဲးဘးအဃိ.” (ရိ ၅:၁၂) ခီဖျိလၢ ပဒိးန့ၢ်ဘၣ် တၢ်ဒဲးဘးလၢ စီၤအၤဒၣ် အအိၣ်အဃိ ပဘၣ်သံ ဒီးတၢ်ဒဲးဘးလၢ ပဒိးန့ၢ်ဘၣ်န့ၣ် အလီၤဂာ်ဒ်သိးဒီး ပကမၢ်ထီၣ်ဒီဒူၣ် ဒီးပလိးက့ၤလၢ ပနီၢ်ကစၢ်ဂံၢ်ဘါ တန့ၢ်ဘၣ်.—စံး ၄၉:၈.
၃ တၢ်ကတိၤ လၢအမ့ၢ် တၢ်ဒဲးဘးန့ၣ် လံာ်စီဆှံ ထိၣ်သတြီၤဝဲဒီး “ကမၢ်.” (မး ၆:၁၂; လူၤ ၁၁:၄, တၢ်ဂ့ၢ်အဘျဲၣ်.) ဖဲပမၤကမၣ်တၢ်အခါ လီၤဂာ်ဒ်သိး ပကမၢ်ထီၣ်ဒီး ယဟိဝၤယွၤ ဒီးပကဘၣ်ဟ့ၣ် တၢ်ဒဲးဘးအဘူးအလဲ လၢအမ့ၢ်တၢ်သံ. အဃိ ယဟိဝၤယွၤ မ့ၢ်တရဲၣ်ကျဲၤဝဲလၢ အကပျၢ်ကွံာ် ပတၢ်ဒဲးဘးဘၣ်န့ၣ် အိၣ်ဒၣ် ပကဘၣ်သံ ဒီးပတအိၣ်ဒီး တၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်ဘၣ်.—ရိ ၆:၇, ၂၃.
တၢ်ဒဲးဘး
လၢလံာ်စီဆှံပူၤ တၢ်ကတိၤ လၢအမ့ၢ် “တၢ်ဒဲးဘး” န့ၣ် အဲၣ်ဒိးတဲဝဲ–
၁. ခီဖျိလၢ စီၤအၤဒၣ် တဒိကနၣ် ယဟိဝၤယွၤ အကလုၢ်ဘၣ်အဃိ တၢ်ဒဲးဘး ဟဲအိၣ်ထီၣ်.—၁ မိၤ ၃:၁၇-၁၉; ရိ ၅:၁၄, ၁၇.
၂. ခီဖျိလၢ ပန့ၢ်ဘၣ်တၢ်ဒဲးဘးလၢ စီၤအၤဒၣ်အအိၣ်အဃိ ပကဲထီၣ် ပှၤတလၢတပှဲၤဘၣ် ဒီးပဘၣ်သးမၤ တၢ်ကမၣ်.—စံး ၅၁:၅.
၃. ခီဖျိလၢ ပတလၢတပှဲၤဘၣ်အဃိ တၢ်ကမၣ်လၢ ပသးအိၣ်မၤအီၤမ့ၢ်ဂ့ၤ တသးအိၣ်မၤအီၤမ့ၢ်ဂ့ၤ ပမၤဘၣ်အီၤ.—ယိၤ ၈:၃၄; ယၤ ၁:၁၄, ၁၅.
လါဒံၣ်စ့ဘၢၣ် ၁-၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ ယၡါယၤ ၃-၅
ယဟိဝၤယွၤမုၢ်လၢ်လၢ အခ့အပှၤကဒိကနၣ်အီၤ ဒီးပှၤကြၢးဒိကနၣ်အီၤစ့ၢ်ကီး
တၢး၀၆-E ၆/၁၅ ၁၈ ¶၁
“အံးထွဲကွၢ်ထွဲ စပံးမုၢ်တမုၢ်အံၤ”
ဝံယၡါယၤ ထိၣ်သတြီၤဝဲ “ပှၤအံၣ်စရ့လးဖိ” ဒီးစပံးကျီးလၢ အသၣ်ထီၣ် “စပံးသၣ်အမံၤ.” (ယၡါယၤ ၅:၂, ၇) စပံးသၣ်အမံၤန့ၣ် အဆံးန့ၢ်ဒံး စပံးသၣ်လၢအဂ့ၤ ဒီးအိၣ်ထဲအချံ ဒီးအညၣ်တအိၣ် အါအါဘၣ်. စပံးသၣ်အမံၤန့ၣ် ပှၤတ့စပံးထံတသ့ဘၣ် ဒီးပှၤအီၣ်အီၤ တသ့ဘၣ်. ဒီးဘၣ်တၢ်ဒိလီၤအီၤဒ် ပှၤဂီၢ်မုၢ်လၢ အထီဒါကစၢ်ယွၤ, အမၤကမၣ် တၢ်သိၣ်တၢ်သီ ဒီးတမၤတၢ် တီတီလိၤလိၤဘၣ်. စပံးသၣ်ထီၣ်ဒ်အံၤန့ၣ် တမ့ၢ်ပှၤလၢ အသူၣ်အီၤတဂၤ အတၢ်ကမၣ်ဘၣ်. မ့ၢ်လၢ ယဟိဝၤယွၤန့ၣ် အမၤတၢ်လၢ အဂ့ၤကတၢၢ်ခဲလၢာ် ဒ်သိး အပှၤဂီၢ်မုၢ်တဖၣ် ကသၣ်ထီၣ် တၤသၣ်လၢအဂ့ၤအဂီၢ်. အဝဲတဲဝဲလၢ “တၢ်လၢ ယမၤတ့ၢ်လၢ ယစပံးကျီးအဂီၢ်န့ၣ် တလၢပှဲၤဒံးဧီၤ.”—ယၡါယၤ ၅:၄.
တၢး၀၆-E ၆/၁၅ ၁၈ ¶၂
“အံးထွဲကွၢ်ထွဲ စပံးမုၢ်တမုၢ်အံၤ”
ပှၤအံၣ်စရ့လးဖိလၢ ဘၣ်တၢ်ဒိလီၤအီၤဒ် စပံးမုၣ်န့ၣ် တသၣ်ထီၣ် တၢ်လၢအဂ့ၤဘၣ်အဃိ ယဟိဝၤယွၤ ဟ့ၣ်ပလီၢ် အဝဲသ့ၣ်လၢ အတဒီသဒၢ အဝဲသ့ၣ်လၢၤဘၣ်, အဝဲကမၤလီၤပှီၢ်ကွံာ် တၢ်ဒူၣ်လၢ အကရၢဝးတရံး အဝဲသ့ၣ်. ဒီးအဝဲ တကျီပျီ စပံးမုၣ်အဒ့ ဒီးမၤပျီန့ၢ် အဟီၣ်ခိၣ်ဘၣ်. ဒီးသပှီာ်တၤဆှုၣ် ဒီးနီၣ်တဖၣ် ကခဲဘၢအဝဲသ့ၣ်. ဒီးယဟိဝၤယွၤ တဒုးစူၤလီၤ မူခိၣ်ဘၣ်အဃိ အဝဲသ့ၣ် သၣ်ထီၣ်တသ့ဘၣ်.—ယၡါယၤ ၅:၅, ၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဟးထီၣ်လၢ တၢ်ခံးကျါ ဒီးဆဲးအိၣ်လၢ တၢ်ကပီၤအကျါ
၁၀ ပှၤလၢအအိၣ်လၢ မုၣ်ကီၤလံၢ် အတၢ်ပၢဖီလာ်န့ၣ် အဝဲသ့ၣ် ဂုာ်ကျဲးစၢး လံၣ်န့ၢ်လီန့ၢ်ပှၤ ဒီးတၢ်မၤလၢ ယဟိဝၤယွၤ ထံၣ်ဝဲလၢ အတဂ့ၤဘၣ် ဒီးအတကဆှီဘၣ်န့ၣ် အဝဲသ့ၣ် ဂုာ်ကျဲးစၢး တဲပှၤလၢ အတကမၣ်ဘၣ်. (၂ ပ့း ၂:၁၉) အဝဲသ့ၣ် မၤဝဲဒ်အံၤန့ၣ် တလီၤကမၢကမၣ်ဘၣ်. အဒိ လၢညါမ့ၢ်ဂ့ၤ ခဲအံၤမ့ၢ်ဂ့ၤ ဒ်သိး ပှၤဟီၣ်ခိၣ်ဖိ တသ့ၣ်ညါနီၤဖး တၢ်အဘၣ် ဒီးတၢ်အကမၣ် တဂ့ၤအဂီၢ် မုၣ်ကီၤလံၢ် မၤဘံဘူအဝဲသ့ၣ် အခိၣ်နူာ်. (ၡါ ၅:၂၀; ၂ ကရံၣ် ၄:၄) အဃိ ပထံၣ်ဘၣ်လၢ တၢ်ဂီၤမူ ဒီးတၢ်ဂ့ၢ်လၢ ဝဲးပဆဲးအပူၤန့ၣ် အိၣ်ထဲတၢ်လၢ အထီဒါလိာ်သးဒီး ယဟိဝၤယွၤ အတၢ်သိၣ်တၢ်သီ. မုၣ်ကီၤလံၢ် ဂုာ်ကျဲးစၢး ဒုးဆိကမိၣ်ပှၤလၢ တၢ်မၤလၢ အတကဆှီဘၣ် ဒီးလုၢ်လၢ်သကဲာ်ပဝး လၢအတဂ့ၤဘၣ်န့ၣ် အတကမၣ်ဘၣ်. အကဲဝဲ တၢ်လၢအမၤမုာ်ပှၤသး ဒီးတမၤဘၣ်ဒိပှၤဘၣ်.—ဖး အ့းဖ့းစူး ၅:၆.
လါဒံၣ်စ့ဘၢၣ် ၈-၁၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ ယၡါယၤ ၆-၈
“ယၤလီၤ, ဆှၢလီၤယၤဟီ”
နတၢ်သးအိၣ်ဟ့ၣ်တၢ်န့ၣ် မ်အကဲထီၣ် တၢ်စံးထီၣ်ပတြၢၤ ယဟိဝၤယွၤတက့ၢ်
၅ လၢပျၢၤန့ၣ် ယဟိဝၤယွၤ ကွဲမုာ်ဝံယၡါယၤလၢ ကကဲထီၣ်အပှၤခၢၣ်စးဒီး ကမၤအတၢ်မၤလၢ အရ့ဒိၣ်တခါလီၤ. (ယၡါယၤ ၆:၈-၁၀) လၢတၢ်သူၣ်အိၣ်သးအိၣ်အပူၤ ဝံယၡါယၤတူၢ်လိာ် ယွၤအတၢ်ကွဲမုာ်ဒီး စံးဝဲလၢ– “ကွၢ်ကွၢ်, ယၤလီၤ, မၢလီၤယၤတက့ၢ်.” မုၢ်မဆါတနံၤအံၤစ့ၢ်ကီး ယဟိဝၤယွၤ ဟ့ၣ်ဝဲပှၤဟီၣ်ခိၣ်ဖိလၢ အိၣ်ဒီးတၢ်သးတီတဖၣ် တၢ်ခွဲးတၢ်ယာ်လၢ ကမၤအတၢ်မၤလီၤ. ယဟိဝၤယွၤ အခ့အပှၤလၢ အကထိတဖၣ် ပာ်ဖျါထီၣ် အတၢ်ပာ်သူၣ်ပာ်သးဒ် ဝံယၡါယၤအသိးလီၤ. လၢတၢ်သူၣ်အိၣ်သးအိၣ်အပူၤ အဝဲသ့ၣ်တူၢ်လိာ်ဝဲလၢ ကမၤယဟိဝၤယွၤ အတၢ်မၤလၢ ကျဲအဘိဘိ ဒီးလၢတၢ်လီၢ်တတီၤဂ့ၤတတီၤဂ့ၤလီၤ. တကးဒံးဘၣ် မ့ၢ်ကီလၢအဝဲအဂီၢ်ဒၣ်လဲာ် ဂုာ်ကျဲးစၢးမၤဝဲလၢ တၢ်သူၣ်အိၣ်သးအိၣ်အပူၤလီၤ. ဘၣ်ဆၣ် ပှၤတနီၤနီၤကစံးဝဲလၢ– ‘ယဒိန့ၢ်ဘၣ်တၢ်ခွဲးတၢ်ယာ်လၢ ကမၤယဟိဝၤယွၤ အတၢ်ဖံးတၢ်မၤအဃိ ယသးခုဒိၣ်မးလီၤ. ဘၣ်ဆၣ် တၢ်လၢယမၤတဖၣ်န့ၣ် မ့ၢ်တၢ်လၢအရ့ဒိၣ်ဧါ. ယအိၣ်မ့ၢ်ဂ့ၤ တအိၣ်ဘၣ်မ့ၢ်ဂ့ၤ ဒ်သိးတၢ်မၤတခါအံၤ ကကဲထီၣ်အဂီၢ် ယဟိဝၤယွၤမၤဝဲတသ့ဘၣ်ဧါ.’ မ့ၢ်နတူၢ်ဘၣ်ဒ်န့ၣ်စ့ၢ်ကီးဧါ. ခဲအံၤပကတဲသကိး ယွၤအခ့အပှၤလၢညါခံဂၤ လၢအမ့ၢ်နီၢ်ဒဘိရၤ ဒီးစီၤဘါရးအဂ့ၢ်န့ၣ်လီၤ. အဝဲသ့ၣ်ခံဂၤအဂ့ၢ်န့ၣ် ကမၤစၢၤပှၤဒ်သိး ပကသ့ၣ်ညါထီၣ် တၢ်သံကွၢ်တဖၣ်အံၤ အတၢ်စံးဆၢအဂီၢ်လီၤ.
ip-1-E ၉၅ ¶၁၅-၁၆
ယဟိဝၤယွၤအိၣ်လၢ အတၢ်လုၢ်ဟံၣ်စီဆှံ
၁၅ ယဟိဝၤယွၤ တဲဘၣ်ဝံယၡါယၤလၢ တၢ်လၢအကဘၣ်တဲဝဲတဖၣ် ဒီးဖဲပှၤဂီၢ်မုၢ်တဖၣ် နၣ်ဟူတၢ်လၢအတဲအခါ အဝဲသ့ၣ် ကမၤဝဲဒ်လဲၣ်. ယဟိဝၤယွၤ တဲအီၤလၢ “လဲၤတဲဘၣ် ပှၤဂီၢ်မုၢ်တဖၣ်အံၤလၢ ‘သုကနၢ်ဟူဘၣ် တၢ်ကစီၣ်တဘျီဝံၤတဘျီ ဘၣ်ဆၣ် သုတနၢ်ပၢၢ်အီၤဘၣ်. ဒီးသုကထံၣ်ဘၣ် တဘျီဝံၤတဘျီ ဘၣ်ဆၣ် သုတဒိးန့ၢ်ဘၣ် တၢ်သ့ၣ်ညါ နီတမံၤဘၣ်.’ မၤဒ်သိးပှၤတဖၣ်အံၤ အခိၣ်ကကိၤအဂီၢ်တက့ၢ်. ဒ်သိး အဝဲသ့ၣ်သုတထံၣ်တၢ်တဂ့ၤအဂီၢ် မၤဘၢ အဝဲသ့ၣ်အမဲာ် ဒီးဒ်သိး အဝဲသ့ၣ် သုတနၢ်ဟူတၢ် ဒီးတနၢ်ပၢၢ်တၢ်တဂ့ၤအဂီၢ် ပံးအဝဲသ့ၣ်အနၢ်တက့ၢ်. ဒီးအဝဲသ့ၣ် တဃၣ်ကဒါက့ၤအသးဘၣ် ဒီးတဘျါက့ၤဘၣ်.” (ယၡါယၤ ၆:၉, ၁၀) လံာ်စီဆှံအဆၢအံၤ အဲၣ်ဒိးတဲဝဲလၢ ယဟိဝၤယွၤ အဲၣ်ဒိးလၢ ဝံယၡါယၤ ကမၤယံၤထီၣ် ပှၤယူဒၤဖိတဖၣ်ဒီးအီၤဧါ. တမ့ၢ်ဒ်န့ၣ်ဘၣ်. ဝံယၡါယၤနာ်က့ အကဲပှၤယူဒၤဖိအဃိ တမ့ၢ်လၢအကအဲၣ်ဒိးမၤဝဲ ဒ်န့ၣ်ဘၣ်. ယဟိဝၤယွၤ အတၢ်ကတိၤတဖၣ်န့ၣ် အဲၣ်ဒိးတဲဝဲလၢ ဖဲပှၤဂီၢ်မုၢ်တဖၣ် နၣ်ဟူတၢ်လၢ ဝံယၡါယၤတဲအခါ အဝဲသ့ၣ် ကမၤဝဲဒ်လဲၣ်အဂ့ၢ်. ဝံယၡါယၤ မ့ၢ်ဂုာ်ကျဲးစၢး မၤလၢပှဲၤအမူဒါထဲလဲၣ်နာ်က့ အဝဲသ့ၣ် တဒိကနၣ်ဝဲဘၣ်.
၁၆ အဝဲသ့ၣ် တဒိကနၣ်တၢ်န့ၣ် အိၣ်ဒၣ်အနီၢ်ကစၢ် အတၢ်ကမၣ်လီၤ. ဝံယၡါယၤ ကတဲဘၣ်အဝဲသ့ၣ် “တဘျီဝံၤတဘျီ” ဘၣ်ဆၣ် အဝဲသ့ၣ် တတူၢ်လိာ်ဝဲဘၣ် ဒီးတနၢ်ပၢၢ်ဝဲဘၣ်. အဝဲသ့ၣ် အါတက့ၢ်န့ၣ် အခိၣ်ကကိၤ ဒီးတကနၣ်ဃုာ်တၢ်ဘၣ် အဃိ လီၤဂာ်ဒ်သိးဒီး ပှၤလၢအမဲာ်တထံၣ်တၢ် ဒီးတနၢ်ဟူတၢ် နီတစဲးဘၣ်. ဝံယၡါယၤ မ့ၢ်လဲၤလၢ “ပှၤဂီၢ်မုၢ်တဖၣ်အံၤ” အအိၣ် တဘျီဝံၤတဘျီ ဘၣ်ဆၣ် တမ့ၢ်လၢ အဝဲသ့ၣ် ကဒိကနၣ်ဝဲဘၣ်အဃိ လီၤဂာ်ဒ်သိး အဝဲသ့ၣ် ပာ်ဖျါထီၣ်လၢ အဝဲသ့ၣ် တအဲၣ်ဒိး နၢ်ပၢၢ်တၢ်ဂ့ၢ်ဘၣ်. ဒီးလီၤဂာ်ဒ်သိး အဝဲသ့ၣ် ပာ်ဖျါထီၣ်လၢ အနီၢ်ကစၢ်ဒၣ်ဝဲန့ၣ် တအဲၣ်ဒိးကနၣ်ဃုာ် တၢ်ကစီၣ်လၢ အဟဲလၢ ယွၤအအိၣ်ဘၣ်. ပှၤလၢပစိၤခဲအံၤတဖၣ်နာ်က့ မၤသးဒ်န့ၣ်စ့ၢ်ကီး. အဝဲသ့ၣ်အါဂၤန့ၣ် တတူၢ်လိာ် ဒီးတအဲၣ်ဒိး ဒိကနၣ် ယွၤအဘီအမုၢ် တၢ်သးခုကစီၣ်လၢ ယဟိဝၤပှၤအုၣ်အသးတဖၣ် တဲဝဲန့ၣ်ဘၣ်.
ip-1-E ၉၉ ¶၂၃
ယဟိဝၤယွၤအိၣ်လၢ အတၢ်လုၢ်ဟံၣ်စီဆှံ
၂၃ ယ့ၣ်ၡူးတဲက့ၤဝဲ ဝံယၡါယၤ အတၢ်ကတိၤ ဒ်သိး ကပာ်ဖျါထီၣ်ဝဲလၢ ဝံယၡါယၤ အတၢ်ကတိၤန့ၣ် ဟဲလၢထီၣ်ပှဲၤထီၣ်လၢ အစိၤစ့ၢ်ကီး. ပှၤဂီၢ်မုၢ်တဖၣ်န့ၣ် အိၣ်ဒီး တၢ်ပာ်သူၣ်ပာ်သးဒ် ပှၤယူဒၤဖိ လၢဝံယၡါယၤ အစိၤခါစ့ၢ်ကီး. အဝဲသ့ၣ် တအဲၣ်ဒိးဒိကနၣ် တၢ်လၢယ့ၣ်ၡူးတဲဝဲဘၣ် အဃိ အတုၤလၢတၢ်ဟးဂီၤ. (မးသဲ ၂၃:၃၅-၃၈; ၂၄: ၁, ၂) တၢ်ကဲထီၣ်အသးဒ်န့ၣ် ဖဲ ခ.န ၇၀ ရိမ့ၤအပဒိၣ် ထဲထၢၤ (Titus) ဒီးအသုးဖိတဖၣ် ဟဲဒုးဝဲ ဝ့ၢ်ယရူၤၡလ့ၣ် ဒီးအဝဲသ့ၣ် မၤဟးဂီၤကွံာ်ဝ့ၢ် ဒီးတၢ်လုၢ်ဟံၣ်အခါ. မ့မ့ၢ် ပှၤတနီၤန့ၣ် ဒိကနၣ် ယ့ၣ်ၡူးအကလုၢ် ဒီးကဲထီၣ်ယ့ၣ်ၡူး အပျဲၢ်အဘီၣ်. ယ့ၣ်ၡူးတဲဝဲလၢ အဝဲသ့ၣ်န့ၣ် မ့ၢ်ပှၤလၢအ “သးခု.” (မးသဲ ၁၃:၁၆-၂၃, ၅၁) လၢအပူၤကွံာ်န့ၣ် ယ့ၣ်ၡူးတဲဆိပာ်စၢၤဝဲလၢ ဖဲပှၤထံၣ်ဘၣ် “သုးမုၢ်သံၣ်ဘိတဖၣ် ဆီလီၤအသးဒီး ကဝီၤဃာ် ဝ့ၢ်ယရူၤၡလ့ၣ်အခါ” ပှၤကဘၣ် “လဲၤဃ့ၢ်ထီၣ်လၢ ကစၢၢ်ကလိတဖၣ်.” (လူၤကၣ် ၂၁:၂၀-၂၂) “တၢ်အချံအသၣ် စီဆှံ” လၢအအိၣ်ဒီး တၢ်နာ် ဒီးအကဲထီၣ်ဝဲ “ကစၢ်ယွၤ အအံၣ်စရ့လး” န့ၣ်ပူၤဖျဲးဝဲ.—ကလၤတံ ၆:၁၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ပှၤလၢအထီၣ်ပှၢ်သီသီတဖၣ် ပာ်ဆိ ယဟိဝၤယွၤ အတၢ်မၤလၢနီၣ်ဂံၢ်တၢ ကသ့ဒ်လဲၣ်
၉ ဝံယၡါယၤ ဒီးအမါန့ၣ် ပာ်ဝဲယဟိဝၤယွၤ အတၢ်မၤလၢအရ့ဒိၣ်ကတၢၢ်. ဝံယၡါယၤန့ၣ် မ့ၢ်ဝဲဝံတဂၤ. ဒီးအမါစ့ၢ်ကီး လံာ်စီဆှံကိးအီၤလၢ “ဝံပိာ်မုၣ်” အဃိဘၣ်သ့ၣ်သ့ၣ် အကအိၣ်ဒီးမူဒါလၢ အကဘၣ်တဲဝဲ ဝံအတၢ်စံးပာ်တဖၣ်. (ယၡါယၤ ၈:၁-၄) အဃိ ပသ့ၣ်ညါဘၣ်လၢ ဝံယၡါယၤ ဒီးအမါန့ၣ် ပာ်ဆိတၢ်ဘူၣ်ထီၣ်ဘါထီၣ် ယဟိဝၤယွၤ လၢညါလီၤ. အဝဲသ့ၣ်ပာ်လီၤ ဒိဂ့ၤတဲာ်ဘၣ်လၢ ပှၤနီၢ်ဒီမါဝၤလၢ ပစိၤခဲအံၤအဂီၢ်လီၤ.
၁၀ မုၢ်မဆါတနံၤအံၤ ပှၤဒီမါဝၤတဖၣ် ကွၢ်လိမၤဒိး ဝံယၡါယၤဒီးအမါ ဒီးမၤယဟိဝၤယွၤအတၢ်မၤ လၢအဂ့ၤကတၢၢ်သ့လီၤ. အဝဲသ့ၣ် မၤဂၢၢ်ကျၢၤထီၣ် အတၢ်နာ်န့ၢ် ယဟိဝၤယွၤ ခီဖျိမၤလိ ဝံအတၢ်စံးပာ်တဖၣ် ဒ်သိးသိး ဒီးဆိကမိၣ်ထံဝဲ ဘၣ်ဃးဒီး ဝံအတၢ်စံးပာ်တဖၣ် ဟဲလၢထီၣ်ပှဲၤထီၣ်ဝဲထီဘိ အဂ့ၢ်လီၤ. (တံတူး ၁:၂) ဒီးအဝဲသ့ၣ် ကဆိကမိၣ်ထံ ဘၣ်ဃးဒီးလံာ်စီဆှံ အတၢ်စံးပာ်တဖၣ် ကလၢထီၣ်ပှဲၤထီၣ်အဂီၢ် အဝဲသ့ၣ် မၤတၢ်မနုၤကသ့လဲၣ်. အဒိ, အဝဲသ့ၣ် ကဆိကမိၣ်ထံ ယ့ၣ်ၡူးအတၢ်စံးပာ်လၢ တၢ်သးခုကစီၣ် ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ် တချုးလၢ တၢ်အကတၢၢ်ဟဲဘၣ်န့ၣ် ကလၢထီၣ်ပှဲၤထီၣ်အဂီၢ် အဝဲသ့ၣ် မၤစၢၤဝဲကသ့ဒ်လဲၣ်. (မးသဲ ၂၄:၁၄) ပှၤနီၢ်ဒီမါဝၤတဖၣ် မ့ၢ်ထံၣ်ဘၣ်ဝဲလၢ ဝံအတၢ်စံးပာ်တဖၣ် ဟဲလၢထီၣ်ပှဲၤထီၣ် ဒံးအါထီၣ်န့ၣ် အဝဲသ့ၣ်အတၢ်သးဆူၣ်လၢ ကစၢ်ယွၤအတၢ်မၤအပူၤ ကဟဲအါထီၣ်လီၤ.
လါဒံၣ်စ့ဘၢၣ် ၁၅-၂၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ ယၡါယၤ ၉-၁၀
ဝံအတၢ်စံးပာ် လၢဘၣ်ဃးဒီး “တၢ်ကပီၤဖးဒိၣ်”
ip-1-E ၁၂၆ ¶၁၇
တၢ်အၢၣ်လီၤ ဘၣ်ဃးဒီး တၢ်ဃူတၢ်ဖိး အပဒိၣ်
၁၇ “တၢ်ကပီၤဖးဒိၣ်” လၢကၤလံၤလါ လၢစီၤမးသဲ တဲဝဲန့ၣ် အဲၣ်ဒိးတဲဝဲ မနုၤလဲၣ်. အဝဲတဲက့ၤဝဲ တၢ်ကတိၤလၢ ဝံယၡါယၤ အတၢ်စံးပာ်အပူၤ. ဝံယၡါယၤ တဲဝဲလၢ “ပှၤလၢအဟးလၢ တၢ်ခံးကျါန့ၣ် အဝဲသ့ၣ်ထံၣ်ဘၣ် တၢ်ကပီၤဖးဒိၣ်လံ. ဒီးပှၤလၢအအိၣ်လၢ တၢ်ခံးသူဖးဒိၣ်အပူၤန့ၣ် တၢ်ကပီၤဆဲးလီၤဘၣ် အဝဲသ့ၣ်လံ.” (ယၡါယၤ ၉:၂) ယ့ၣ်ၡူးအစိၤန့ၣ် တၢ်ဘူၣ်တၢ်ဘါ ကမၣ်အတၢ်သိၣ်တၢ်သီ အါထီၣ်ဝဲအဃိ ပှၤတသ့ၣ်ညါ တၢ်မ့ၢ်တၢ်တီလၢၤဘၣ်. ပှၤယူဒၤဖိ အတၢ်ဘူၣ်တၢ်ဘါခိၣ်နၢ်တဖၣ် “ကွၢ်ကပာ် ကစၢ်ယွၤအတၢ်မၤလိာ်” ခီဖျိ အဝဲသ့ၣ် ပာ်ဒိၣ်ဝဲ တၢ်ဘူၣ်တၢ်ဘါ အလုၢ်အလၢ် အါန့ၢ်ဒံးကစၢ်ယွၤ အတၢ်ဘၣ်သး. (မးသဲ ၁၅:၆) ဒီးပှၤလၢအအိၣ်ဒီး တၢ်ဆီၣ်လီၤသးတဖၣ်န့ၣ် ဘၣ်တၢ်ဆီၣ်တံၢ်မၤနၢၤအီၤ ဒီးအဟးဖျိးကျဲ ခီဖျိ “ပှၤမဲာ်တထံၣ်တၢ်လၢ အဒုးနဲၣ် ပှၤဂၤကျဲ” အဃိ. (မးသဲ ၂၃:၂-၄, ၁၆) ဖဲယ့ၣ်ၡူးလၢ အမ့ၢ် မ့းၡံအၤ ဟဲပၢၢ်ထီၣ်အခါ အမၤစၢၤ အဝဲသ့ၣ် ဒ်သိး ကထံၣ်ထီၣ်တၢ်ကပီၤ. (ယိၤဟၣ် ၁:၉, ၁၂) တၢ်လၢယ့ၣ်ၡူးမၤဝဲလၢ ဟီၣ်ခိၣ်ချၢ ဒီးတၢ်ဆိၣ်ဂ့ၤလၢ အဟဲခီဖျိ ယ့ၣ်ၡူးတူၢ်ဆါအသးအဃိန့ၣ် ဝံယၡါယၤ ထိၣ်သတြီၤဝဲဒ် “တၢ်ကပီၤဖးဒိၣ်.”—ယိၤဟၣ် ၈:၁၂.
ip-1-E ၁၂၆-၁၂၈ ¶၁၈-၁၉
တၢ်အၢၣ်လီၤ ဘၣ်ဃးဒီး တၢ်ဃူတၢ်ဖိး အပဒိၣ်
၁၈ ပှၤလၢအတူၢ်လိာ် တၢ်ကပီၤန့ၣ် ကဒိးန့ၢ်ဘၣ် တၢ်သးခု. ဝံယၡါယၤ တဲဝဲလၢ“နမၤဒိၣ်ထီၣ် ပှၤတကလုာ် ဒီးနဒုးသူၣ်ဖှံသးညီ အဝဲသ့ၣ်ဒိၣ်မးလီၤ. အဝဲသ့ၣ် သူၣ်ဖှံသးညီလၢ နမဲာ်ညါ ဒ်သိးဒီး ပှၤဂီၢ်မုၢ်လၢ အသူၣ်ဖှံသးညီဖဲ ကူးတၢ်အဆၢကတီၢ် ဒီးဒ်ပှၤလၢ အသးခု ဖဲအဝဲသ့ၣ် နီၤလီၤလိာ်သး တၢ်လၢအဂုာ်န့ၢ်ဝဲလီၤ.” (ယၡါယၤ ၉:၃) ယ့ၣ်ၡူး ဒီးအပျဲၢ်အဘီၣ်တဖၣ် စံၣ်တဲၤတဲလီၤတၢ်အဃိ ပှၤလၢအသူၣ်ဘျၢသးဘျၢတဖၣ် တူၢ်လိာ်အဝဲသ့ၣ် ဒီးပာ်ဖျါထီၣ်ဝဲလၢ အဝဲသ့ၣ် အဲၣ်ဒိးဘူၣ်ထီၣ်ဘါထီၣ် ယဟိဝၤယွၤ ဒ်သးစီဆှံ အတၢ်ဟံးစုနဲၣ်ကျဲအသိး ဒီးလၢတၢ်မ့ၢ်တၢ်တီအပူၤ. (ယိၤဟၣ် ၄:၂၄) လၢခံန့ၣ် ပှၤအါဂၤ ကဲထီၣ်ဝဲ ခရံာ်ဖိ. ဖဲ ခ.န ၃၃ ဘူၣ်ယဲၢ်ဆံအနံၤန့ၣ် ပှၤအဂၤသၢကထိ ဒိးဘျၢထံ. ဒီးလၢခံ တယံာ်ဘၣ်န့ၣ် “ပိာ်ခွါလၢ အစူၢ်က့ၤနာ်က့ၤတၢ်တဖၣ်န့ၣ် အနီၣ်ဂံၢ်အါထီၣ် တုၤလၢ အဂၤ ၅,၀၀၀.” (မၤတၢ် ၂:၄၁; ၄:၄) ပှၤလၢအကဲထီၣ် ခရံာ်အပျဲၢ်အဘီၣ်တဖၣ် ဆဲးစံၣ်တဲၤတဲလီၤတၢ် လၢတၢ်သးဆူၣ်အပူၤအဃိ “ယ့ၣ်ၡူး အပျဲၢ်အဘီၣ်တဖၣ် ဆဲးအါထီၣ်ဝဲလၢ ဝ့ၢ်ယရူၤၡလ့ၣ်အပူၤ ဒီဒူၣ်လီၤ. ဒီးပှၤလုၢ်တၢ်ဒိၣ် အါဂၤန့ၣ် ကဲထီၣ်ဝဲပှၤလၢ အစူၢ်က့ၤနာ်က့ၤတၢ်လီၤ.”—မၤတၢ် ၆:၇.
၁၉ ယ့ၣ်ၡူးအပျဲၢ်အဘီၣ်တဖၣ် အါထီၣ်မးအါထီၣ်အဃိ အဝဲသ့ၣ် သးခုဝဲ ဒ်ပှၤဂီၢ်မုၢ်လၢ အသူၣ်ဖှံသးညီဖဲ ပှၤကူးတၢ်အဆၢကတီၢ် ဒီးဒ်ပှၤလၢအလဲၤဒုးတၢ်နၢၤ ဒီးဟ့ၣ်နီၤလီၤလိာ်သး တၢ်လၢအဂုာ်န့ၢ်ဝဲတဖၣ်. (မၤတၢ် ၂:၄၆, ၄၇) လၢခံန့ၣ် ယဟိဝၤယွၤ ဒုးကပီၤထီၣ် တၢ်ကပီၤလၢ ပှၤကလုာ်တဖၣ်အဂီၢ်စ့ၢ်ကီး. (မၤတၢ် ၁၄:၂၇) အဃိ ကျဲအိးထီၣ်အသးလၢ ပှၤကိးကလုာ်ဒဲးအဂီၢ် လၢအဝဲသ့ၣ် ကသုးဘူးအသးလၢ ယဟိဝၤယွၤအအိၣ်.—မၤတၢ် ၁၃:၄၈.
ip-1-E ၁၂၈-၁၂၉ ¶၂၀-၂၁
တၢ်အၢၣ်လီၤ ဘၣ်ဃးဒီး တၢ်ဃူတၢ်ဖိး အပဒိၣ်
၂၀ တၢ်လၢမ့းၡံအၤ မၤဝဲတဖၣ်န့ၣ် ကကဲဘျုးဝဲ လီၤထူလီၤယိာ်. ဝံယၡါယၤ ဆဲးတဲဝဲလၢ “အဝဲသ့ၣ် အနီၣ်ယိးဘိ, နီၣ်က့လၢ ပှၤတီၢ်အဖံဘၣ်ခိၣ် ဒီးပှၤလၢအမၢဆူၣ် အဝဲသ့ၣ်လၢ ကမၤတၢ်တဖၣ် အနီၣ်တီၢ်န့ၣ် နမၤကၢ်ကွံာ်အီၤ ဒ်သိးဒီး မုၢ်တနံၤဖဲ ကီၢ်မံးဒယၣ် ဘၣ်တၢ်မၤနၢၤကွံာ်အီၤန့ၣ်လီၤ.” (ယၡါယၤ ၉:၄) လၢအပူၤကွံာ် အနံၣ်အါမးန့ၣ် ပှၤမံးဒယၣ်ဖိတဖၣ် လ့ပစီ ပှၤအံၣ်စရ့လးဖိ လၢကမၤကမၣ်တၢ်. (၄ မိၤၡ့ ၂၅:၁-၉, ၁၄-၁၈; ၃၁:၁၅, ၁၆) ဒီးလၢခံန့ၣ် အဝဲသ့ၣ် မၤကီမၤခဲ ပှၤအံၣ်စရ့လးဖိတဖၣ်ဒံး. (စံၣ်ညီၣ်ကွီၢ် ၆:၁-၆) ဘၣ်ဆၣ် ယဟိဝၤယွၤသူဝဲ စီၤကံးဒဧိၣ် လၢကမၤနၢၤကွံာ် ပှၤမံးဒယၣ်ဖိတဖၣ်. “မုၢ်တနံၤဖဲ ကီၢ်မံးဒယၣ် ဘၣ်တၢ်မၤနၢၤကွံာ်အီၤ” အလီၢ်ခံန့ၣ် ယဟိဝၤယွၤ အပှၤဂီၢ်မုၢ်တဖၣ် တတူၢ်ဘၣ် ပှၤမံးဒယၣ်ဖိတဖၣ် အတၢ်မၤကီမၤခဲ နီတဘျီလၢၤဘၣ်. (စံၣ်ညီၣ်ကွီၢ် ၆:၇-၁၆; ၈:၂၈) တယံာ်လၢၤဘၣ်န့ၣ် ယ့ၣ်ၡူးခရံာ်လၢ အဒိၣ်န့ၢ်ဒံး စီၤကံးဒဧိၣ်န့ၣ် ကမၤဟးဂီၤကွံာ် ယဟိဝၤယွၤ အပှၤဂီၢ်မုၢ် အဒုၣ်အဒါတဖၣ်. (လီၣ်ဖျါ ၁၇:၁၄; ၁၉:၁၁-၂၁) အဃိ ဒ် “မုၢ်တနံၤဖဲ ကီၢ်မံးဒယၣ် ဘၣ်တၢ်မၤနၢၤကွံာ်အီၤ” အသိး ကစၢ်ယွၤ အပှၤဂီၢ်မုၢ် ကမၤနၢၤတၢ် လီၤထူလီၤယိာ် ခီဖျိလၢ ယဟိဝၤယွၤ အတၢ်စိတၢ်ကမီၤအဃိ ဒီးတမ့ၢ်လၢ ပှၤဟီၣ်ခိၣ်ဖိ အတၢ်စိတၢ်ကမီၤ အဃိဘၣ်. (စံၣ်ညီၣ်ကွီၢ် ၇:၂-၂၂) ဒီးကစၢ်ယွၤ အပှၤဂီၢ်မုၢ်တဖၣ် တယိးဘၣ်နီၣ်ယိးဘိလၢ အမ့ၢ် တၢ်ဆီၣ်တံၢ်မၤနၢၤ နီတဘျီလၢၤဘၣ်.
၂၁ ယဟိဝၤယွၤ ပာ်ဖျါထီၣ် အတၢ်စိတၢ်ကမီၤ ဒ်အံၤန့ၣ် တမ့ၢ်လၢ အဟ့ၣ်ဂံၢ်ဟ့ၣ်ဘါဝဲ တၢ်ဒုးတၢ်ယၤဘၣ်. ယ့ၣ်ၡူးန့ၣ် မ့ၢ်ဝဲတၢ်ဃူတၢ်ဖိး အပဒိၣ် တကးဒံးဘၣ် ခီဖျိလၢ အမၤဟးဂီၤကွံာ် ဒုၣ်ဒါတဖၣ်အဃိ တၢ်ဃူတၢ်ဖိး ကအိၣ်ဝဲလီၤထူလီၤယိာ်. ဘၣ်ဃးဒီး တၢ်ဒုးတၢ်ယၤ အတၢ်စုကဝဲၤတဖၣ် ကဘၣ်တၢ်မၤဟးဂီၤကွံာ်အီၤ လၢမ့ၣ်အူန့ၣ် ဝံယၡါယၤ တဲဝဲလၢ “ပှၤသုးဖိအခီၣ်ဖံး ခဲလၢာ်လၢ အမၤဟူးဝး ဟီၣ်ခိၣ် ဒီးအတၢ်ကူတၢ်ကၤ ခဲလၢာ်လၢ အဘၣ်အၢဒီး တၢ်သွံၣ်န့ၣ် ကကဲထီၣ် မ့ၣ်အူဆၣ်လီၤ.” (ယၡါယၤ ၉:၅) ပှၤတနၢ်ဟူဘၣ် ပှၤသုးဖိတဖၣ် အခီၣ်လီၢ်သီၣ် နီတဘျီလၢၤဘၣ်. ဒီးပှၤတထံၣ်ဘၣ် သုးဖိအတၢ်ကူတၢ်သိးလၢ အဘၣ်အၢဒီးတၢ်သွံၣ် နီတဘျီလၢၤ. တၢ်ဒုးတၢ်ယၤ တအိၣ်ဝဲ နီတဘျီလၢၤဘၣ်.—စံးထီၣ်ပတြၢၤ ၄၆:၉.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
mwb၁၉.၁၂ ၅, တၢ်လွံၢ်နၢၣ်
ကစၢ်ယွၤအတၢ်ဒုးလၢ ကမၤကတၢၢ်ကွံာ် တၢ်ဒုးတၢ်ယၤခဲလၢာ်
ဘၣ်မနုၤအဃိ ယဟိဝၤယွၤလၢအမ့ၢ် “တၢ်အဲၣ်တၢ်ကွံ ဒီးတၢ်ဃူတၢ်ဖိးအကစၢ်န့ၣ်” ဟ့ၣ်လီၤဝဲမူဒါလၢ အဖိခွါလၢအမ့ၢ် “တၢ်ဃူတၢ်ဖိးအပဒိၣ်ဖးဒိၣ်” လၢကဒုးတၢ်အဂီၢ်လဲၣ်.—၂ ကရံၣ်. ၁၃:၁၁; ၡါ. ၉:၆.
ယဟိဝၤယွၤ ဒီးယ့ၣ်ၡူးန့ၣ် အဲၣ်တၢ်တီတၢ်လိၤ ဒီးသးဟ့တၢ်အၢတၢ်သီ
ပှၤအၢပှၤသီတဖၣ် ဘၣ်တၢ်မၤဟးဂီၤအီၤ ဝံၤအလီၢ်ခံ တၢ်ဃူတၢ်ဖိး ဒီးတၢ်တီတၢ်လိၤကအိၣ် လီၤထူလီၤယိာ်
မူခိၣ်သုးမုၢ်သံၣ်ဘိလၢ ဘၣ်တၢ်ဒိလီၤအီၤလၢ ကသ့ၣ်ဝါ ဒီးတၢ်ကူတၢ်သိးအဝါကဆှီန့ၣ် က “စံၣ်ညီၣ်တၢ် ဒီးဒုးတၢ်လၢ တၢ်တီတၢ်လိၤ” အဂီၢ်
ဒ်သိးပကပူၤဖျဲးလၢ တၢ်ဒုးလၢအရ့ဒိၣ်ကတၢၢ်အံၤအဂီၢ် ပကဘၣ်မၤတၢ်မနုၤလဲၣ်.—ဖါ. ၂:၃.
ယဟိဝၤပှၤအုၣ်အသးတဖၣ် ဆီတလဲဝဲ လံာ်စီဆှံ ဒ်သိးကဘၣ်လိာ်ဒီး အဝဲသ့ၣ်အတၢ်နာ်ဧါ
ပတဆီတလဲဘၣ်. လၢတၢ်န့ၣ်အလီၢ်, ဖဲပထံၣ်ဘၣ်လၢ ပတၢ်နာ်တလီၤပလိာ်ဒီး လံာ်စီဆှံအခါ ပဆီတလဲကွံာ် ပတၢ်နာ်လီၤ.
ပဃုသ့ၣ်ညါဆိပာ် လံာ်စီဆှံ အနံၣ်အါမး ဝံၤအလီၢ်ခံ ဖဲ ၁၉၅၀န့ၣ် ပစးထီၣ်ကွဲးကျိာ် ဟီၣ်ခိၣ်သီ လံာ်စီဆှံကွဲးကျိာ် (New World Translation of the Holy Scriptures) န့ၣ်လီၤ. ပသူလံာ်စီဆှံကွဲးကျိာ် တဘ့ၣ်လၢ်လၢ် လၢပဒိးန့ၢ်သ့ ဒီးပမၤလိၤမၤဘၣ် ပတၢ်နာ် ဒ်လံာ်စီဆှံသိၣ်လိဝဲအသိးလီၤ. ဆိကမိၣ်ကွၢ် တၢ်အဒိစှၤခါ လၢဘၣ်ဃး ယဟိဝၤပှၤအုၣ်အသးတဖၣ် အတၢ်နာ်လၢ အိၣ်ပာ်စၢၤအနံၣ်အါမး ဒီးတၢ်စူၢ်တၢ်နာ်တဖၣ်အံၤ လီၤပလိာ်ဒီး လံာ်စီဆှံဧါ, တလီၤပလိာ်ဘၣ်ဧါန့ၣ် ဆၢတဲာ်လၢ နနီၢ်ကစၢ်တက့ၢ်.
၁. တၢ်လၢပနာ်– ယွၤတမ့ၢ် သၢဂၤတဂၤဃီဘၣ်. လါယူၤလံ, ၁၈၈၂, Zion’s Watch Tower စံးဝဲလၢ “ပှၤဖးပလံာ်လဲၢ်တဖၣ် သ့ၣ်ညါဝဲလၢ ပနာ်ယဟိဝၤယွၤ, ယ့ၣ်ၡူးဒီး သးစီဆှံ ဘၣ်ဆၣ်, ပဂ့ၢ်လိာ် တၢ်သိၣ်လိလၢအမ့ၢ် ယွၤသၢဂၤတဂၤဃီ လၢတဘၣ်လိာ်ဒီး လံာ်စီဆှံန့ၣ်လီၤ.”
လံာ်စီဆှံစံးဝဲ– “ယွၤပကစၢ်န့ၣ် မ့ၢ်ယွၤတဂၤဃီလီၤ.” (၅ မိၤ. ၆:၄, မ့ၤစံၣ်) “မ့မ့ၢ်လၢပဝဲဒၣ်, ပၢ်ယွၤအိၣ်တဂၤဃီ, လၢတၢ်ခဲလၢာ်ကဲထီၣ်လၢအီၤ, ဒီးပအိၣ်ပဝဲလၢအဂီၢ်, ဒီးကစၢ်ယ့ၣ်ၡူးခရံာ်တဂၤဃီ, လၢတၢ်ခဲလၢာ် ကဲထီၣ်လၢအီၤ, ဒီးပကဲထီၣ်လၢအီၤလီၤ” (၁ ကရံၣ်သူး ၈:၆, မ့ၤစံၣ်) ယ့ၣ်ၡူးအနီၢ်ကစၢ်ဒၣ်ဝဲ စံးဝဲလၢ “ယပၢ်ဒိၣ်န့ၢ်ယၤတက့ၢ်လီၤ.”—ယိၤဟၣ် ၁၄:၂၈, မ့ၤစံၣ်.
၂. တၢ်လၢပနာ်– တၢ်မၤနးမၤဖှီၣ် လီၤထူလီၤယိာ်လၢ လရာ်မ့ၣ်အူန့ၢ် တအိၣ်ဘၣ်. လါယူၤလံ, ၁၈၈၂, Zion’s Watch Tower တၢ်မၤလိအခိၣ်တီလၢအမ့ၢ် “တၢ်ဒဲးဘးအဘူးအလဲမ့ၢ်တၢ်သံ” အပူၤယၢၤထီၣ်ဝဲ ရိမ့ၤ ၆:၂၃ လၢ King James Version, အပူၤဒီး စံးဝဲလၢ “တၢ်ကတိၤတဘီအံၤ ယိယိဖိဒီးနၢ်ပၢၢ်ဘၣ်အီၤညီ ဒိၣ်မးလဲၣ်. လီၤဆီဒိၣ်မးလၢ ပှၤအါဂၤလၢတဲဝဲလၢ အနာ်လံာ်စီဆှံ မ့ၢ်ယွၤအကလုၢ်ကထါန့ၣ် ထီဒါဝဲတၢ်ကတိၤအံၤဒီး စံးဝဲလၢတၢ်ဒဲးဘး အဘူးအလဲမ့ၢ် တၢ်မၤနးမၤဖှီၣ် လီၤထူလီၤယိာ်လၢ လရာ်” န့ၣ်လီၤ.
လံာ်စီဆှံစံးဝဲ– “ပှၤအသးလၢ အမၤတၢ်ဒဲးဘးန့ၣ်ကသံဝဲလီၤ.” (ယဃ့းစက့လး ၁၈:၄, ၂၀, မ့ၤစံၣ်) ပှၤလၢအထီဒါ ကစၢ်ယွၤတဖၣ်အဂီၢ် တၢ်စံၣ်ညီၣ် လၢခံကတၢၢ်န့ၣ်မ့ၢ် “တၢ်ဟးဂီၤအထူအယိာ်”လီၤ. တမ့ၢ်တၢ်မၤနးမၤဖှီၣ် လီၤထူလီၤယိာ်ဘၣ်.—၂ သ့းစၤလနံ ၁:၉, ခ့ခါစှီၤကျိာ်.
၃. တၢ်လၢပနာ်– ယွၤအဘီအမုၢ်န့ၣ် မ့ၢ်တၢ်ပၢတၢ်ပြး နီၢ်ကီၢ်တခါလီၤ. တမ့ၢ်တၢ်တမံၤလၢ အိၣ် လၢပသးပူၤဘၣ်. ဘၣ်ဃးဒီး ယွၤအဘီအမုၢ်န့ၣ် ဒံၣ်စ့ဘၢၣ်, ၁၈၈၁, Zion’s Watch Tower စံးဝဲလၢ “ဘီမုၢ်အံၤ ဘၣ်တၢ်သူၣ်ထီၣ်အီၤလၢ ကမၤနၢၤ ဟီၣ်ခိၣ်အဘီမုၢ်ခဲလၢာ်အဂီၢ်” လီၤ.
လံာ်စီဆှံစံးဝဲ– “လၢစီၤပၤတဖၣ် အမုၢ်နံၤအပူၤန့ၣ် ကစၢ်ယွၤလၢမူခိၣ် ကသူၣ်ထီၣ် ဘီမုၢ်တဘ့ၣ်လၢ အကတၢၢ်တအိၣ်ဘၣ်လီၤ. ဘီမုၢ်န့ၣ် ဘၣ်တၢ်မၤနၢၤကွံာ်အီၤတန့ၢ်ဘၣ်. မ့မ့ၢ်ကမၤဟးဂီၤကွံာ် ဘီမုၢ်တဖၣ် လၢာ်လၢာ်ဆ့ဆ့ ဒီးကအိၣ်ဂၢၢ်ကျၢၤဝဲ လီၤထူလီၤယိာ်လီၤ.”—ဒၤနံးယ့လး ၂:၄၄, ခ့ခါစှီၤကျိာ်.
ယဟိဝၤပှၤအုၣ်အသးတဖၣ် သူဝဲ ဟီၣ်ခိၣ်သီလံာ်စီဆှံကွဲးကျိာ် လၢကဆီၣ်ထွဲ အဝဲသ့ၣ်အတၢ်နာ်အဂီၢ်ဧါ.
တမ့ၢ်ဘၣ်, တုၤခဲအံၤ ပသူဒံးလံာ်စီဆှံကွဲးကျိာ်အါမး လၢပတၢ်စံၣ်တဲၤတဲလီၤ တၢ်မၤအပူၤလီၤ. ပအိၣ်ဒီး တၢ်ရဲၣ်တၢ်ကျဲၤလၢ တၢ်မၤလိလံာ်စီဆှံလၢ အဘူးအလဲတအိၣ် ဒီးပဟ့ၣ်ကလီပှၤဂၤ ဟီၣ်ခိၣ်သီလံာ်စီဆှံကွဲးကျိာ်လၢ ပထုးထီၣ်အံၤလီၤ. သနာ်က့, ပသးအိၣ် မၤလိလံာ်စီဆှံဒီး ပှၤလၢအဲၣ်ဒိးသူဝဲ လံာ်စီဆှံ အဂၤတဖၣ်စ့ၢ်ကီးလီၤ.
လါဒံၣ်စ့ဘၢၣ် ၂၂-၂၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ ယၡါယၤ ၁၁-၁၃
ဘၣ်ဃးဒီး မ့းၡံအၤန့ၣ် လံာ်စီဆှံတဲဝဲဒ်လဲၣ်
ip-1-E ၁၅၉ ¶၄-၅
မ့းၡံအၤအတၢ်ပၢ ဒုးအိၣ်ထီၣ် တၢ်ပူၤဖျဲး ဒီးတၢ်သူၣ်ခုသးခု
၄ တချုးလၢ ဝံယၡါယၤအစိၤန့ၣ် ပှၤအဂၤလၢ ကွဲးလံာ်စီဆှံလၢ ဧ့ၤဘြံၤကျိာ်န့ၣ် တဲဝဲဘၣ်ဃးဒီး မ့းၡံအၤကဟဲအဂ့ၢ်. မ့းၡံအၤန့ၣ် မ့ၢ်ဝဲခိၣ်နၢ်လၢအဂ့ၤတဂၤ ဒီးပှၤလၢယဟိဝၤယွၤ ဆှၢလီၤအီၤ ဆူပှၤအံၣ်စရ့လးဖိတဖၣ်အအိၣ်. (၁ မိၤၡ့ ၄၉:၁၀; ၅ မိၤၡ့ ၁၈:၁၈; စံးထီၣ်ပတြၢၤ ၁၁၈:၂၂, ၂၆) ဒီးဘၣ်ဃးဒီး မ့းၡံအၤန့ၣ် ယဟိဝၤယွၤတဲဘၣ် ဝံယၡါယၤလၢ “စီၤယံးၡဲ အခိၣ်ဆၢၣ်န့ၣ် အဒ့ကဟဲထီၣ်တဒ့ ဒီးအဒ့ဘီၣ်လၢ အဟဲထီၣ်လၢ အဂံၢ်လိၤန့ၣ် ကသၣ်ထီၣ်ဝဲလီၤ.” (ယၡါယၤ ၁၁:၁; ထိၣ်သတြီၤဒီး စံးထီၣ်ပတြၢၤ ၁၃၂:၁၁.) လၢလံာ်စီဆှံအဆၢအံၤအပူၤ တၢ် “အဒ့” ဒီး “အဒ့ဘီၣ်” န့ၣ်ပာ်ဖျါထီၣ်ဝဲလၢ မ့းၡံအၤန့ၣ် ကဟဲလီၤစၢၤလီၤသွဲၣ်လၢ စီၤယံးၡဲအဖိခွါ စီၤဒၤဝံး. စီၤဒၤဝံးန့ၣ် မ့ၢ်ပှၤလၢ ဘၣ်တၢ်ဒိးဖှူအီၤလၢသိ ဒ်သိး ကကဲထီၣ် အံၣ်စရ့လး အစီၤပၤ. (၁ ၡမူၤအ့လး ၁၆:၁၃; ယံးရမံယၤ ၂၃:၅; လီၣ်ဖျါ ၂၂:၁၆) ဖဲ “တၢ်အဒ့ဘီၣ်” လၢစီၤဒၤဝံးအစၢၤအသွဲၣ်အကျါ လၢအမ့ၢ် မ့းၡံအၤ ဟဲတုၤဝဲအခါ အကမၤတၢ်လၢအဂ့ၤ.
၅ မ့းၡံအၤတဂၤအံၤန့ၣ် မ့ၢ်ဝဲယ့ၣ်ၡူး. ပှၤကွဲးလံာ်မးသဲ ပာ်ဖျါထီၣ်ဝဲလၢ ယ့ၣ်ၡူးဘၣ်တၢ်ကိးအီၤလၢ “ပှၤနစၤရ့းဖိ” အဃိ မၤလၢထီၣ်ပှဲၤထီၣ်ဝဲ ဝံအတၢ်စံးပာ်လၢ ယၡါယၤ ၁၁:၁ အပူၤ. ယ့ၣ်ၡူးန့ၣ် ဒိၣ်ထီၣ်လၢ ဝ့ၢ်နစၤရ့းအပူၤ အဃိ ပှၤကိးအီၤလၢ ပှၤနစၤရ့ဖိ. ဒီးလီၤဂာ်လၢ ဧ့ၤဘြံၤကျိာ်န့ၣ် မံၤလၢအမ့ၢ် နၤစၤရ့းန့ၣ် ဘၣ်ထွဲလိာ်အသးဒီး တၢ်ကတိၤလၢအမ့ၢ် “အဒ့ဘီၣ်” လၢအအိၣ်လၢ ယၡါယၤ ၁၁:၁ အပူၤ.—မးသဲ ၂:၂၃; လူၤ ၂:၃၉, ၄၀.
ip-1-E ၁၅၉ ¶၆
မ့းၡံအၤအတၢ်ပၢ ဒုးအိၣ်ထီၣ် တၢ်ပူၤဖျဲး ဒီးတၢ်သူၣ်ခုသးခု
၆ မ့းၡံအၤ မ့ၢ်ပှၤပၢတၢ် ဒ်လဲၣ်တဂၤလဲၣ်. မ့ၢ်အဝဲ ကမၤတၢ်အၢအၢသီသီ ဒီးမၤတၢ်ဖဲအသး ဒ်ပှၤအၤၡူၢ်ဖိလၢ အမၤဟးဂီၤကွံာ် ကလံၤစိး အံၣ်စရ့လး အဘီမုၢ်ဧါ. အဝဲတမၤ ဒ်န့ၣ်ဘၣ်. ဘၣ်ဃးဒီး မ့းၡံအၤန့ၣ် ဝံယၡါယၤ တဲဝဲလၢ “ယဟိဝၤယွၤ အသးစီဆှံ ကအိၣ်ဝဲဆိးဝဲလၢ အလိၤ အဃိ အဝဲကအိၣ်ဒီး တၢ်ကူၣ်သ့, တၢ်နၢ်ပၢၢ်, တၢ်ဟ့ၣ်ကူၣ်လၢအဂ့ၤ, တၢ်ဂံၢ်တၢ်ဘါ, တၢ်သ့ၣ်ညါ ဒီးအကပျံၤ ယဟိဝၤယွၤလီၤ. အဝဲကသးခုလၢ တၢ်ပျံၤ ယဟိဝၤယွၤအပူၤလီၤ.” (ယၡါယၤ ၁၁:၂, ၃) မ့းၡံအၤ လၢအမ့ၢ်ယ့ၣ်ၡူးန့ၣ် တဘၣ်တၢ်ဒိးဖှူအီၤလၢသိဘၣ်. အဝဲဘၣ်တၢ်ဒိးဖှူအီၤလၢ ကစၢ်ယွၤ အသးစီဆှံ ဖဲအဒိးဘျၢထံ ဒီးသးစီဆှံ ဟဲလီၤလၢအလိၤ ဒ်ထိၣ်လွံၢ်အသိးအခါ. (လူၤကၣ် ၃:၂၂) ယ့ၣ်ၡူးအိၣ်ဒီး တၢ်ကူၣ်သ့, တၢ်နၢ်ပၢၢ်, တၢ်ဟ့ၣ်ကူၣ်လၢအဂ့ၤ, တၢ်ဂံၢ်တၢ်ဘါ ဒီးတၢ်သ့ၣ်ညါအဃိ ပာ်ဖျါထီၣ်ဝဲလၢ ယဟိဝၤယွၤ အသးစီဆှံ အိၣ်ဒီးအီၤ. အဝဲအိၣ်ဒီး တၢ်ဂ့ၤတၢ်ဝါ ဒ်န့ၣ်အဃိ အမ့ၢ်ပှၤပၢတၢ်လၢ အဂ့ၤဒိၣ်မး.
ဘၣ်မနုၤအဃိ ပကဘၣ်ပျံၤ ယဟိဝၤယွၤလဲၣ်
၅ ပှၤလၢအအိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်န့ၣ် အအဲၣ်ယဟိဝၤယွၤ ဒီးအတဘၣ်သးမၤ တၢ်လၢကမၤဟးဂီၤ အတၢ်ရ့လိာ်သးဒီး ယဟိဝၤယွၤ နီတမံၤဘၣ်. ယ့ၣ်ၡူးန့ၣ်အ “ပျံၤကစၢ်ယွၤ” ဒ်န့ၣ်. (ဧ့ၤဘြံၤ ၅:၇) အဃိ ယ့ၣ်ၡူးအိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်. (ယၡါယၤ ၁၁:၂, ၃) ယ့ၣ်ၡူး အဲၣ်ယဟိဝၤယွၤ ဒီးအဒိကနၣ် ယဟိဝၤယွၤ အကလုၢ်. (ယိၤဟၣ် ၁၄:၂၁, ၃၁) ဒ်ယ့ၣ်ၡူးအသိး ပပျံၤဒီးပပာ်ကဲ ယဟိဝၤယွၤ ခီဖျိလၢ ယဟိဝၤယွၤန့ၣ် အကဲ တၢ်အဲၣ်တၢ်ကွံ, အအိၣ်ဒီး တၢ်ကူၣ်သ့, တၢ်တီတၢ်လိၤ ဒီးတၢ်စိတၢ်ကမီၤ. တကးဒံးဘၣ် ပသ့ၣ်ညါလၢ ယဟိဝၤယွၤ အဲၣ်ပှၤဒိၣ်မးအဃိ ပမၤထွဲ အတၢ်ဟံးစုနဲၣ်ကျဲဧါ တမၤထွဲဘၣ်ဧါန့ၣ် အဘၣ်သးသ့ၣ်ညါဝဲ. အဃိ တၢ်လၢပမၤန့ၣ် အမၤသးအုး ယဟိဝၤယွၤအသးသ့ မ့တမ့ၢ် အမၤသးခု ယဟိဝၤယွၤအသးသ့.—စံးထီၣ်ပတြၢၤ ၇၈:၄၁; ကတိၤဒိ ၂၇:၁၁.
ip-1-E ၁၆၀ ¶၉
မ့းၡံအၤအတၢ်ပၢ ဒုးအိၣ်ထီၣ် တၢ်ပူၤဖျဲး ဒီးတၢ်သူၣ်ခုသးခု
၉ ဝံယၡါယၤ တဲအါထီၣ် ဘၣ်ဃးဒီး မ့းၡံအၤအဂ့ၢ်. အဝဲတဲဝဲလၢ “အဝဲတစံၣ်ညီၣ်တၢ် ဒ်တၢ်လၢအထံၣ်ဝဲလၢ အမဲာ်အသိးဘၣ်. ဒီးအတသိၣ်က့ၤသီက့ၤတၢ် ဒ်တၢ်လၢ အနၢ်ဟူဝဲအသိးဘၣ်.” (ယၡါယၤ ၁၁:၃) နမ့ၢ်ဘၣ်ထီၣ်ရူ ဒီးစံၣ်ညီၣ်ကွီၢ် မ့ၢ်အိၣ်ဝဲဒ်န့ၣ်တဂၤန့ၣ် နကသးခုဒိၣ်မး. မ့းၡံအၤန့ၣ် အဂ့ၤဒိၣ်န့ၢ်ဒံး စံၣ်ညီၣ်ကွီၢ် လၢအမ့ၢ် ပှၤဟီၣ်ခိၣ်ဖိ. စံၣ်ညီၣ်ကွီၢ်လၢ အမ့ၢ်ပှၤဟီၣ်ခိၣ်ဖိတဖၣ်န့ၣ် စံၣ်ညီၣ်ကမၣ်တၢ် ခီဖျိလၢ တၢ်အုၣ်အသးလၢ အတတီတလိၤဘၣ်, တၢ်ကူၣ်ထီၣ်ဖးလီၤတၢ်, တၢ်ကစီၣ်လၢအကမၣ် ဒီးတၢ်ထိးကျိၣ်ထိးစ့အဃိ. မ့မ့ၢ်ယ့ၣ်ၡူးန့ၣ် တမ့ၢ်ဒ်န့ၣ်ဘၣ်. အဝဲထံၣ်ဝဲ တၢ်တတီတလိၤခဲလၢာ် ဒီးအတကွၢ်တၢ်ထဲ တၢ်လၢအအိၣ်ဖျါလၢခိဘၣ်. အဝဲထံၣ်ဝဲ ‘တၢ်လၢ အအိၣ်ခူသူၣ်အသးလၢ ပှၤသူၣ်ကံၢ်သးလဲအပူၤ.’ (၁ ပ့းတရူး ၃:၄) ယ့ၣ်ၡူး ကဲထီၣ်တၢ်ဒိတၢ်တဲာ် လၢအဂ့ၤ လၢပှၤလၢအအိၣ်ဒီးမူဒါ လၢကဆၢတဲာ်တၢ်လၢ တၢ်အိၣ်ဖှိၣ်ပူၤတဖၣ်အဂီၢ်.—၁ ကရံၣ်သူး ၆:၁-၄.
ip-1-E ၁၆၁ ¶၁၁
မ့းၡံအၤအတၢ်ပၢ ဒုးအိၣ်ထီၣ် တၢ်ပူၤဖျဲး ဒီးတၢ်သူၣ်ခုသးခု
၁၁ ဖဲယ့ၣ်ၡူး အပျဲၢ်အဘီၣ်တဖၣ် လိၣ်ဘၣ်တၢ်သိၣ်က့ၤသီက့ၤအခါ ယ့ၣ်ၡူးမၤစၢၤ အဝဲသ့ၣ် လၢအဂ့ၤကတၢၢ်. အဃိ အကဲဝဲ တၢ်ဒိတၢ်တဲာ် အဂ့ၤဒိၣ်မး လၢတၢ်အိၣ်ဖှိၣ်သးပှၢ်တဖၣ်အဂီၢ်. မ့မ့ၢ်ပှၤလၢ အမၤတၢ်အၢတၢ်သီန့ၣ် ကဘၣ်တၢ်စံၣ်ညီၣ်အီၤနးမး. ဖဲကစၢ်ယွၤ စံၣ်ညီၣ် ဟီၣ်ခိၣ်တၢ်ရဲၣ်တၢ်ကျဲၤအံၤအခါ မ့းၡံအၤ “ကတီၢ်ဟီၣ်ခိၣ်” ခီဖျိဟ့ၣ်လီၤတၢ်ကလုၢ် လၢပှၤကမၤဟးဂီၤကွံာ် ပှၤအၢပှၤသီခဲလၢာ်. (စံးထီၣ်ပတြၢၤ ၂:၉; ထိၣ်သတြီၤဒီး လီၣ်ဖျါ ၁၉:၁၅) ပှၤအၢပှၤသီ တအိၣ်လၢၤဘၣ်အဃိ တၢ်မုာ်တၢ်ခုၣ် ကအိၣ်ထီၣ်. (စံးထီၣ်ပတြၢၤ ၃၇:၁၀, ၁၁) ယ့ၣ်ၡူးလၢ အစၢဃာ် အယီၢ်ဒ့ဒီး တၢ်တီတၢ်လိၤ ဒီးတၢ်သးတီန့ၣ် အအိၣ်ဒီး တၢ်စိတၢ်ကမီၤ လၢကမၤဝဲဒ်န့ၣ်.—စံးထီၣ်ပတြၢၤ ၄၅:၃-၇.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
“မၤစၢၤပှၤအါဂၤ ဒ်သိး အကကဲထီၣ် ပှၤတီပှၤလိၤ”
၂ ပှၤလၢအကဂဲၤဆၢထၢၣ် သမူထီၣ်က့ၤ ကိးဂၤဒဲးန့ၣ် ကလိၣ်ဘၣ် တၢ်ဟံးစုနဲၣ်ကျဲ. (ယၡါယၤ ၂၆:၉; ၆၁:၁၁) အဃိ ဖဲန့ၣ်အဆၢကတီၢ် တၢ်သိၣ်လိ အတၢ်ရဲၣ်တၢ်ကျဲၤ ကအိၣ်ဝဲ. (ဖး ယၡါယၤ ၁၁:၉, ၁၀.) အဒိ ပှၤတတီတလိၤလၢ အကဂဲၤဆၢထၢၣ်သမူထီၣ်က့ၤတဖၣ်န့ၣ် ကမၤလိဘၣ်ဝဲ တၢ်ဂ့ၢ်ဘၣ်ဃးဒီး ယ့ၣ်ၡူးခရံာ်, ယွၤအဘီအမုၢ်, တၢ်ပှ့ၤက့ၤ, ကစၢ်ယွၤအမံၤ မ့ၢ်တၢ်လၢအရ့ဒိၣ် ဒီးထဲဒၣ် ယဟိဝၤယွၤတဂၤန့ၣ် အိၣ်ဒီးတၢ်ခွဲးတၢ်ယာ်လၢ ကပၢတၢ်အဂ့ၢ်. ပှၤတီပှၤလိၤတဖၣ်စ့ၢ်ကီး ကဘၣ်မၤလိအါထီၣ်ဝဲ တၢ်ဂ့ၢ်ဘၣ်ဃးဒီး ယဟိဝၤယွၤ အတၢ်တိာ်ပာ်လၢ ပှၤဟီၣ်ခိၣ်ဖိအဂီၢ် လၢယဟိဝၤယွၤ သိၣ်လိတ့ၢ်ပှၤ တဆီဘၣ်တဆီ. ကစၢ်ယွၤအခ့အပှၤလၢ အအိၣ်ဒီးတၢ်သးတီတနီၤန့ၣ် အဝဲသ့ၣ်သံဝဲ တချုးလၢ ပှၤကွဲးလံာ်စီဆှံ ဝံၤဒံးဘၣ်ဖးယံာ်လံ. အဃိ ပှၤတီပှၤလိၤမ့ၢ်ဂ့ၤ, ပှၤတတီတလိၤဘၣ်မ့ၢ်ဂ့ၤန့ၣ် ကဘၣ်မၤလိတၢ် အိၣ်ဝဲဒီဒူၣ်.
လါဒံၣ်စ့ဘၢၣ် ၂၉-လါယနူၤအါရံၤ ၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ ယၡါယၤ ၁၄-၁၆
ပှၤလၢအထီဒါ ကစၢ်ယွၤ အပှၤဂီၢ်မုၢ်တဖၣ် ကဘၣ်တၢ်စံၣ်ညီၣ်အီၤ
ip-1-E ၁၈၀ ¶၁၆
ယဟိဝၤယွၤ မၤမဲာ်ဆှး ဝ့ၢ်လၢအပာ်ထီၣ်ထီသး
၁၆ ဖဲ ချ.ခ.န ၅၃၉ န့ၣ် တၢ်တကဲထီၣ်အသးဒ်န့ၣ် တဘျီဃီဘၣ်. ဘၣ်ဆၣ် လၢပစိၤခဲအံၤန့ၣ် တၢ်လၢဝံယၡါယၤ တဲဝဲဘၣ်ဃးဒီး ဝ့ၢ်ဘၤဘူၤလိၣ်အဂ့ၢ်န့ၣ် လၢထီၣ်ပှဲၤထီၣ်ဝဲ ခဲလၢာ်လံ. ပှၤဃုသ့ၣ်ညါ လံာ်စီဆှံ အဂ့ၢ်အကျိၤတဂၤ တဲဝဲလၢ ဘၤဘူၤလိၣ်န့ၣ် “ကဲတၢ်လီၢ်လၢ ပှၤတအိၣ်တဆိးဘၣ် ဒီးတၢ်ဟးဂုာ်ဟးဂီၤအလီၢ် အိၣ်လၢအနံၣ်လၢ အကယၤတဖၣ်လံ.” ဒီးအဝဲ ဆဲးတဲဝဲလၢ “တၢ်ဟးဂုာ်ဟးဂီၤ အလီၢ်အံၤန့ၣ် ကဲထီၣ်တၢ်အုၣ်အသးလၢ ဝံယၡါယၤ ဒီးဝံယံးရမံယၤ အတၢ်စံးပာ်တဖၣ် လၢထီၣ်ပှဲၤထီၣ်ဝဲ.” ဖဲဝံယၡါယၤ ကွဲးဝဲလံာ်ယၡါယၤဝံၤ အနံၣ် ၂၀၀ န့ၣ် မၤဒဲဒီးဖၢၡၢၣ် မၤနၢၤကွံာ်ဝဲ ဝ့ၢ်ဘၤဘူၤလိၣ်. ဒီးလၢခံ အနံၣ်လၢအကယၤတဖၣ်န့ၣ် ဝ့ၢ်ဘၤဘူၤလိၣ် ဟးဂီၤကွံာ်ဝဲခဲလၢာ်. ပသ့ၣ်ညါဘၣ် တၢ်ဂ့ၢ်အံၤအဃိ ပနာ်သပှၢ်ကတၢၢ်လၢ လံာ်စီဆှံန့ၣ် မ့ၢ်ဝဲယွၤအကလုၢ်ကထါ. (၂ တံၤမသ့း ၃:၁၆) လၢအပူၤကွံာ်န့ၣ် ဝံအတၢ်စံးပာ်တဖၣ် ဟဲလၢထီၣ်ပှဲၤထီၣ်အဃိ ပနာ်သ့သပှၢ်ကတၢၢ်လၢ ဝံအတၢ်စံးပာ်လၢ တဟဲလၢပှဲၤထီၣ်ဒံးဘၣ်တဖၣ်န့ၣ် ကဟဲလၢပှဲၤထီၣ်ဝဲ ဖဲတၢ်ဆၢကတီၢ် ဘၣ်ဝဲအခါ.
ip-1-E ၁၈၄ ¶၂၄
ယဟိဝၤယွၤ မၤမဲာ်ဆှး ဝ့ၢ်လၢအပာ်ထီၣ်ထီသး
၂၄ စီၤပၤလၢ အဟဲလီၤစၢၤလီၤသွဲၣ်လၢ စီၤဒၤဝံးန့ၣ် လံာ်စီဆှံ ထိၣ်သတြီၤဝဲဒီး ဆၣ်တဖၣ်. (၄ မိၤၡ့ ၂၄:၁၇) စီၤဒၤဝံး ဒီးစီၤပၤတဖၣ်အံၤန့ၣ် ပၢတၢ်လၢ ကစၢၢ်စံယိၣ်. ဖဲစီၤပၤၡလိၤမိၤ တ့ထီၣ်တၢ်လုၢ်ဟံၣ်လၢ ဝ့ၢ်ယရူၤၡလ့ၣ် ဝံၤအလီၢ်ခံ ဝ့ၢ်ယရူၤၡလ့ၣ်န့ၣ် ပှၤကိးအီၤလၢ ဝ့ၢ်စံယိၣ်စ့ၢ်ကီး. ဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိး ပှၤအံၣ်စရ့လး ပိာ်ခွါ ကိးဂၤဒဲးန့ၣ် ဘၣ်လဲၤဝဲလၢ ဝ့ၢ်စံယိၣ် တနံၣ်သၢဘျီ. အဃိ တၢ်လီၢ်အံၤ ကဲထီၣ်ဝဲ “ကစၢၢ်လၢ ပှၤအိၣ်ဖှိၣ်အလိၤ.” ဖဲစီၤပၤနဘူၤကးန့စၢ် ပာ်လီၤအသးလၢ ကမၤနၢၤကွံာ်ဝဲ ယူဒၤအစီၤပၤတဖၣ် ဒီးဒိၣ်စိလၢ အဝဲသ့ၣ်အဖီခိၣ်အခါ အဝဲတဲဝဲလၢ အကပာ်ထီၣ်အသးလၢ “ဆၣ်တဖၣ်” န့ၣ်အဖီခိၣ်. ဒီးဖဲအဝဲမၤနၢၤ ယူဒၤအစီၤပၤတဖၣ်အခါ အဝဲတဟ့ၣ် ယဟိဝၤယွၤ တၢ်လၤကပီၤဘၣ်. လၢတၢ်န့ၣ်အလီၢ် အဝဲပာ်ထီၣ်ထီအသး.
ip-1-E ၁၈၉ ¶၁
ယဟိဝၤယွၤ ကသိၣ်ဃီၣ် ပှၤကလုာ်တဖၣ်
တဘျီတခီၣ်န့ၣ် ယဟိဝၤယွၤ သူဝဲပှၤကလုာ်ဂၤတဖၣ် ဒ်သိး ကသိၣ်ဃီၣ်အပှၤဂီၢ်မုၢ် ခီဖျိလၢ အပှၤဂီၢ်မုၢ်တဖၣ် မၤတၢ်အၢတၢ်သီအဃိ. ဘၣ်ဆၣ် ပှၤကလုာ်ဂၤတဖၣ်န့ၣ် မၤတၢ်အၢတၢ်သီဒိၣ်မး, ပာ်ထီၣ်ထီအသး ဒီးထီဒါတၢ်ဘူၣ်တၢ်ဘါ အမ့ၢ်အတီအဃိ ကစၢ်ယွၤ ကသိၣ်ဃီၣ် အဝဲသ့ၣ်. အဃိ အမၢဝံယၡါယၤ တဲဝဲ “တၢ်စံၣ်ညီၣ်အကစီၣ် လၢအဘၣ်ဃးဒီး ဘၤဘူၤလိၣ်.” (ယၡါယၤ ၁၃:၁) ဘၣ်ဆၣ် ဖဲဝံယၡါယၤ အစိၤန့ၣ် ဘၤဘူၤလိၣ် တဘၣ်တၢ်စံၣ်ညီၣ်အီၤဒံးဘၣ်. ဖဲဝံယၡါယၤအစိၤန့ၣ် ပှၤအၤၡူၢ်ဖိတဖၣ် ဆီၣ်တံၢ်မၤနၢၤ ကစၢ်ယွၤ အပှၤဂီၢ်မုၢ်တဖၣ်. အဝဲသ့ၣ် မၤဟးဂီၤကွံာ် ကလံၤစိး အံၣ်စရ့လး အဘီအမုၢ် ဒီးမၤဟးဂီၤကွံာ် ယူဒၤအဝ့ၢ်တဖၣ်အါမး. ဘၣ်ဆၣ် အဝဲသ့ၣ် မၤနၢၤတၢ် န့ၢ်ထဲတစိၢ်ဖိလီၤ. ဝံယၡါယၤ တဲဝဲလၢ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အၢၣ်လီၤပာ်စၢၤဝဲလၢ “ဒ်ယပာ်လီၤပာ်စၢၤ ယသးအသိး အကကဲထီၣ်ဝဲ . . . ယကမၤသဘှံး ပှၤအၤၡူၢ်ဖိ လၢယကီၢ်ပူၤ ဒီးယကယီၢ်တံၢ်အီၤလၢ ယကစၢၢ်တဖၣ် အလိၤလီၤ. နီၣ်ယိးဘိလၢ အပာ်ထီၣ်ဝဲလၢ ယပှၤဂီၢ်မုၢ် အလိၤန့ၣ် ကဘၣ်တၢ်ထုးထီၣ်ကွံာ်အီၤ ဒီးတၢ်ဝံတၢ်ယိးဃၢ လၢအပာ်ထီၣ်ဝဲလၢ ယပှၤဂီၢ်မုၢ် အဖံဘၣ်ခိၣ်န့ၣ် ကဘၣ် တၢ်ထုးထီၣ်ကွံာ်အီၤလီၤ.” (ယၡါယၤ ၁၄:၂၄, ၂၅) ဖဲဝံယၡါယၤ တဲဝဲဝံအတၢ်စံးပာ်အံၤ ဝံၤတယံာ်ဘၣ်န့ၣ် ပှၤအၤၡူၢ်ဖိတဖၣ် မၤပျံၤမၤဖုးဝဲ ပှၤအိၣ်လၢ ယူဒၤအတၢ်လီၢ်တၢ်ကျဲတဖၣ် တသ့လၢၤဘၣ်.
ip-1-E ၁၉၄ ¶၁၂
ယဟိဝၤယွၤ ကသိၣ်ဃီၣ် ပှၤကလုာ်တဖၣ်
၁၂ ဝံအတၢ်စံးပာ်အံၤ ဟဲလၢထီၣ်ပှဲၤထီၣ်ချ့မး. ‘ဘၣ်ဃးဒီး ကီၢ်မိၤအးန့ၣ် ယဟိဝၤယွၤ တဲပာ်စၢၤဝဲ ဒ်န့ၣ်လီၤ. ဒီးခဲအံၤ ယဟိဝၤယွၤ တဲဝဲလၢ “ကီၢ်မိၤအးန့ၣ် အတၢ်လၤကပီၤ အိၣ်အါမး ဘၣ်ဆၣ် လၢသၢနံၣ်အတီၢ်ပူၤ အကဘၣ် တၢ်မၤမဲာ်ဆှးအီၤလီၤ. တၢ်သဘံၣ်သဘုၣ် ကအိၣ်ဝဲ အကလုာ်ကလုာ် ဒီးပှၤလၢအိၣ်တ့ၢ်စှၤဂၤန့ၣ် ကမ့ၢ်ပှၤလၢ အဂံၢ်စၢ်လီၤ.”’ (ယၡါယၤ ၁၆:၁၃, ၁၄) ပှၤဃုသ့ၣ်ညါ တၢ်ဖိတၢ်လံၤ လၢပျၢၤတဖၣ် ထံၣ်ဘၣ်တၢ်အုၣ်သးလၢ ဖဲ ချ.ခ.န ၈၀၀ အတီၢ်ပူၤ ကီၢ်မိၤအးန့ၣ် ထံၣ်ဘၣ်တၢ်ကီတၢ်ခဲနးမး ဒီးအပှၤနီၣ်ဂံၢ်စှၤလီၤ. တံးကလးပလ့စ့ၢ် သၢဂၤတဂၤ ပာ်ဖျါထီၣ်ဝဲလၢ စီၤပၤလၢအဘၣ်ဟ့ၣ်အီၤ တၢ်ခိတၢ်သွဲတဖၣ် အကျါန့ၣ် ပၣ်ဃုာ်ဒီး မိၤအးအစီၤပၤ စၤလၤမနူ. စၤနဃ့ရံာ် ဒိးန့ၢ်ဘၣ် တၢ်ခိတၢ်သွဲလၢ မိၤအးအစီၤပၤ ခၤမူစူၤနၢ်ဘံၢ် အအိၣ်. အၤၡူၢ်အစီၤပၤ စီၤအ့ၤစၢ်ဃးဒိၣ် ဒီးအၡဘၤနံပၤ ပာ်ဖျါထီၣ်ဝဲလၢ မိၤအးအစီၤပၤ မူစူၤရံ ဒီးခမဲၡၤတူ အိၣ်လၢအတၢ်ပၢဖီလာ်. မိၤအးအပှၤကလုာ် လီၤမၢ်ကွံာ်ဝဲ အိၣ်လၢအနံၣ်လၢ အကယၤတဖၣ်လံ. ပှၤထံန့ၢ်က့ၤ မိၢ်အးအဝ့ၢ်လၢ အဟးဂီၤကွံာ်တဖၣ် သနာ်က့ အံၣ်စရ့လး အဒုၣ်အဒါလၢ အအိၣ်ဒီး တၢ်စိတၢ်ကမီၤတဖၣ်အံၤ အဂ့ၢ်န့ၣ် ပှၤတထံၣ်န့ၢ် တၢ်အုၣ်သး အါအါဒံးဘၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
နာ်သပှၢ်တၢၢ်လၢ ယဟိဝၤယွၤ ကမၤမုာ်ထီၣ်နသး
၈ ပှၤဘၤဘူၤလိၣ်ဖိန့ၣ် ညီနုၢ်အဝဲသ့ၣ် တပျဲက့ၤ ပှၤလၢအဝဲသ့ၣ် ဖီၣ်န့ၢ်ဝဲတဖၣ် လၢအထံအကီၢ်ဘၣ်. အဃိ ဘၣ်သ့ၣ်သ့ၣ် ပှၤယူဒၤဖိတဖၣ်န့ၣ် ကဆိကမိၣ်ဝဲလၢ အဝဲသ့ၣ် တက့ၤဘၣ်လၢ အထံအကီၢ် နီတဘျီလၢၤဘၣ်. (ၡါ ၁၄:၁၇) ဘၣ်ဆၣ် ယဟိဝၤယွၤ ဟ့ၣ်အဝဲသ့ၣ် တၢ်မုၢ်လၢ်. ယဟိဝၤယွၤ အၢၣ်လီၤဝဲလၢ အဝဲသ့ၣ် ကထူၣ်ဖျဲးထီၣ် ဒီးကက့ၤဘၣ်လၢ အထံအကီၢ်. ဒီးယဟိဝၤယွၤ ကမၤလၢပှဲၤထီၣ် တၢ်အၢၣ်လီၤအံၤအဂီၢ် ပှၤတြီအီၤ တသ့နီတဂၤဘၣ်. (ၡါ ၄၄:၂၆; ၅၅:၁၂) လၢယဟိဝၤယွၤ အတၢ်ထံၣ်န့ၣ် ဘၤဘူၤလိၣ် လီၤဂာ်ဒ်သိးဒီး တၢ်ကမူၣ်လၢ အဒံကွံာ် သ့ညီညီဖိ. (ၡါ ၄၀:၁၅) အဃိ ယဟိဝၤယွၤ ကမၤထူၣ်ဖျဲးထီၣ် အပှၤဂီၢ်မုၢ်လၢ ဘၤဘူၤလိၣ်န့ၣ် အညီဝဲဒ်သိးဒီး ပှၤအူထီၣ် ကလံၤတထံၣ် ဒီးတၢ်ကမူၣ် လီၤမၢ်ကွံာ်ဝဲ. တၢ်မုၢ်လၢ်အံၤ ကမၤစၢၤ ပှၤယူဒၤဖိ ဒီးမၤမုာ်ထီၣ် အဝဲသ့ၣ်အသးဒိၣ်မး. ထဲန့ၣ်တကးဒံးဘၣ် ယၡါယၤ တဲဝဲလၢ “ပှၤလၢ အမုၢ်လၢ်တၢ်လၢ ယဟိဝၤယွၤန့ၣ် ကဒိးန့ၢ်ဘၣ်က့ၤ တၢ်ဂံၢ်တၢ်ဘါ.” (ဖး ယၡါယၤ ၄၀:၂၉-၃၁.) အဃိ ပသ့ၣ်ညါဘၣ်လၢ တၢ်မုၢ်လၢ်န့ၣ် ကမၤဆူၣ်ထီၣ် အဝဲသ့ၣ် အဂံၢ်အဘါ ဒီးအဝဲသ့ၣ် “ကယူၤထီၣ်ဖးထီ လီၤဂာ်ဒ်သိးဒီး အအိၣ်ဒီး လံာ်ကြီကြာ်အဒံး.”
လံာ်စီဆှံန့ၣ် နနာ်အီၤသ့ဧါ
၃ တၢ်လၢလံာ်စီဆှံတဲဝဲ ဘၣ်ဃးဒီး ခါဆူညါအဂ့ၢ်န့ၣ် ဘၣ်မနုၤအဃိ ပနာ်အီၤသ့လဲၣ်.
လၢလံာ်စီဆှံပူၤန့ၣ် အိၣ်ဒီး ဝံအတၢ်စံးပာ်တဖၣ် လၢအတဲဆိပာ်စၢၤဝဲ “တၢ်လၢ အတမၤအသးဒံးဘၣ်တဖၣ်.” (ယၡါယၤ ၄၆:၁၀) လံာ်စီဆှံ တဲဆိပာ်စၢၤဝဲ တၢ်ဂ့ၢ်အါမံၤလၢ တချုးလၢ အဟဲကဲထီၣ်အသးဒံးဘၣ် ဒီးတၢ်လၢလံာ်စီဆှံ တဲဆိပာ်စၢၤဝဲတဖၣ်န့ၣ် ဘၣ်ဝဲလီၤ. တၢ်မၤအသးတဖၣ် လၢဆၢကတီၢ်ခဲအံၤန့ၣ် လံာ်စီဆှံ တဲဖျါထီၣ်စ့ၢ်ကီးဝဲ လီၤတံၢ်လီၤဆဲးလီၤ. လၢတၢ်မၤလိအံၤအပူၤ ပကတဲသကိး ဝံအတၢ်စံးပာ်အဂ့ၢ်တနီၤ. နမ့ၢ်မၤလိ ဝံအတၢ်စံးပာ်တဖၣ်အံၤန့ၣ် နကထံၣ်ဘၣ်လၢ ဝံအတၢ်စံးပာ်တဖၣ်အံၤ ဘၣ်ဝဲလီၤတံၢ်လီၤဆဲးအဃိ နကကမၢကမၣ်ဖးဒိၣ်ညါ.
၅ လံာ်စီဆှံတဲဆိပာ်စၢၤဝဲ တၢ်မၤအသး လၢအရ့ဒိၣ်တဖၣ်
ဖး ယၡါယၤ ၄၄:၂၇–၄၅:၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
တချုးလၢ ပှၤဟဲမၤန့ၢ် ဝ့ၢ်ဘၤဘူၤလိၣ်ဒံးဘၣ် အနံၣ် ၂၀၀ န့ၣ်လံာ်စီဆှံ တဲဆိပာ်စၢၤဝဲဒ်လဲၣ်.
တၢ်စံၣ်စိၤတဲစိၤ ပာ်ဂၢၢ်ပာ်ကျၢၤဝဲလၢ ဖၢၡၢၣ်အစီၤပၤကိရ့ၣ် ဒီးအသုးဖိတဖၣ် မၤန့ၢ်ဝဲ ဝ့ၢ်ဘၤဘူၤလိၣ် ဖဲ ချ.ခ.န ၅၃၉ နံၣ်လီၤ. အဝဲသ့ၣ် မၤလီၤသံးဝဲ ထံကျိလၢအဒီသဒၢ ဝ့ၢ်ဘၤဘူၤလိၣ် တကးဒံးဘၣ် ခီဖျိလၢ ဝ့ၢ်အတြဲၤတဖၣ် အိးထီၣ်ပာ်စၢၤအသးအဃိ အဝဲသ့ၣ် လဲၤနုာ်လီၤဝဲလၢဝ့ၢ်ပူၤ ဒီးအဝဲသ့ၣ် မၤန့ၢ်ဝဲဝ့ၢ် ဘၣ်ဆၣ် တလိၣ်ဒုးတၢ်ဘၣ်. ခဲအံၤ ပူၤကွံာ်အနံၣ် ၂,၅၀၀ ဘျဲၣ်လံ ဒီးဝ့ၢ်ဘၤဘူၤလိၣ်န့ၣ် အိၣ်ထဲ တၢ်ဟးဂူာ်ဟးဂီၤလီၤ. ဘၣ်ဃးဒီး ဝ့ၢ်ဘၤဘူၤလိၣ်န့ၣ် လံာ်စီဆှံ တဲဆိပာ်စၢၤဝဲဒ်လဲၣ်, ခဲအံၤ ပကကွၢ်သကိး.
ဖး ယၡါယၤ ၁၃:၁၉, ၂၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်ဒ်လဲၣ်.