ဖဲစီၤၡလိၤမိၤ ကဲထီၣ်ဝဲ ပှၤအံၣ်စရ့လးဖိ အစီၤပၤအခါ ယဟိဝၤယွၤ သံကွၢ်အီၤလၢ ‘နအဲၣ်ဒိးလၢ ယကဟ့ၣ်နၤ တၢ်မနုၤလဲၣ်.’ စီၤၡလိၤမိၤတဲဆၢက့ၤကစၢ်ယွၤလၢ ‘ယသးစၢ်ဒံး ဒီးယပၢနပှၤဂီၢ်မုၢ် တဘၣ်ဘၣ်. ဝံသးစူၤ ဟ့ၣ်လီၤယၤ တၢ်ကူၣ်သ့ ဒ်သိး ယပၢနပှၤဂီၢ်မုၢ် ကသ့အဂီၢ်တက့ၢ်.’ ယဟိဝၤယွၤတဲဆၢက့ၤအီၤလၢ ‘ခီဖျိ နဃ့ယၤလၢ နကအိၣ်ဒီး တၢ်ကူၣ်သ့အဃိ ယကဒုးကဲထီၣ်နၤလၢ ပှၤကူၣ်တၢ်သ့ကတၢၢ် တဂၤလၢ ဟီၣ်ခိၣ်ချၢ. ဒီးနကကဲထီၣ်ပှၤလၢ အထူးအတီၤတဂၤစ့ၢ်ကီး. နမ့ၢ်ဒိကနၣ်​ ယကလုၢ်န့ၣ်​ နကအိၣ်မူဘၣ်​ ဖးယံာ်ညါ.’

စီၤၡလိၤမိၤ စးထီၣ်တ့ထီၣ်ဝဲ တၢ်လုၢ်ဟံၣ်. စီၤၡလိၤမိၤ သူဝဲထူ, စ့, သ့ၣ်​ ဒီးလၢၢ်လၢ အဂ့ၤကတၢၢ်. ပှၤပိာ်မုၣ်ဒီးပိာ်ခွါ လၢအကထိတဖၣ်​ လၢအအိၣ်ဒီးတၢ်သ့တၢ်ဘၣ်န့ၣ်​ ဟဲသူၣ်ထီၣ်ဝဲ တၢ်လုၢ်ဟံၣ်. နွံနံၣ်ပူၤကွံာ် ဝံၤအလီၢ်ခံ ပှၤသူၣ်ထီၣ်​ တၢ်လုၢ်ဟံၣ်ဝံၤဝဲ. ဒီးတၢ်လုၢ်ဟံၣ်အံၤ ကဘၣ်တၢ်ပာ်စီဆှံအီၤလၢ ယဟိဝၤယွၤအဂီၢ်. တၢ်လုၢ်ဟံၣ်အံၤန့ၣ်​ အိၣ်ဒီးတၢ်လုၢ်လီၢ်တခါလၢ ပှၤကလုၢ်ထီၣ်တၢ်အဂီၢ်. စီၤၡလိၤမိၤချံးလီၤအခီၣ်လၢ တၢ်လုၢ်လီၢ်အမဲာ်ညါ ဒီးဃ့ဘါထုကဖၣ်ဝဲလၢ ‘အိ ယဟိဝၤယွၤဧၢ, တၢ်လုၢ်ဟံၣ်အံၤ မ့ၢ်တၢ်လီၢ်လၢ အဆံးဆံးဖိလၢနဂီၢ်. ဘၣ်ဆၣ်​ ဝံသးစူၤတူၢ်လိာ်ဘၣ်​ ပတၢ်ဘူၣ်ထီၣ်ဘါထီၣ်နၤ ဒီးဒိကနၣ်​ ပတၢ်ထုကဖၣ်တက့ၢ်.’ စီၤၡလိၤမိၤ အတၢ်ထုကဖၣ်​ ဒီးတၢ်လုၢ်ဟံၣ်အံၤန့ၣ်​ မ့ၢ်ယဟိဝၤယွၤ တူၢ်လိာ်ဝဲဧါ. ဖဲစီၤၡလိၤမိၤ ဃ့ဘါထုကဖၣ်တၢ် ဝံၤအခါ မ့ၣ်အူဟဲလီၤအီၣ်ဝဲ တၢ်လုၢ်ထီၣ်လၢ တၢ်လုၢ်လီၢ်အဖီခိၣ်​ အဃိ ပာ်ဖျါထီၣ်ဝဲလၢ ယဟိဝၤယွၤတူၢ်လိာ်ဝဲ တၢ်လုၢ်ဟံၣ်အံၤ. ဖဲပှၤအံၣ်စရ့လးဖိတဖၣ်​ ထံၣ်ဘၣ်ဝဲတၢ်မၤအသး ဒ်အံၤအခါ အဝဲသ့ၣ်​ သူၣ်ဖှံသးညီဝဲ.

စးထီၣ်လၢ ကီၢ်အံၣ်စရ့လး ဒီးတုၤလီၤလၢ တၢ်လီၢ်လၢ အယံၤတဖၣ်​ ပှၤအါဂၤ သ့ၣ်ညါဝဲလၢ စီၤပၤၡလိၤမိၤ မ့ၢ်ပှၤလၢအိၣ်ဒီး တၢ်ကူၣ်သ့တဂၤ. ပှၤဂီၢ်မုၢ်လၢအိၣ်ဒီး တၢ်ကီတၢ်ခဲတဖၣ်​ ဟဲဆူစီၤၡလိၤမိၤအအိၣ်​ ဒ်သိးစီၤၡလိၤမိၤ ကမၤစၢၤ အဝဲသ့ၣ်အဂီၢ်. ၡဘၤအနီၢ်ပၤမုၣ်စ့ၢ်ကီး ဟဲဝဲလၢ စီၤၡလိၤမိၤအအိၣ်​ ဒ်သိး ကမၤကွၢ်အီၤလၢ တၢ်သံကွၢ်လၢ အကီတဖၣ်. ဖဲနီၢ်ပၤမုၣ်​ နၢ်ဟူဘၣ်​ စီၤၡလိၤမိၤ အတၢ်စံးဆၢအခါ အဝဲတဲဝဲလၢ ‘ဖဲပှၤဂီၢ်မုၢ် တဲဘၣ်ယၤလၢ နဂ့ၢ်နကျိၤအခါ ယတနာ် အဝဲသ့ၣ်ဘၣ်. ဘၣ်ဆၣ်​ ခဲအံၤန့ၣ်​ ယသ့ၣ်ညါလၢ နအိၣ်ဒီး တၢ်ကူၣ်သ့ အါန့ၢ်ဒံးတၢ်လၢ ယနၢ်ဟူဘၣ်. နအိၣ်ဒီး တၢ်ကူၣ်သ့ မ့ၢ်လၢယဟိဝၤယွၤ ဆိၣ်ဂ့ၤနၤအဃိ.’ ပှၤအံၣ်စရ့လးဖိတဖၣ်​ အိၣ်မူဘၣ်ဝဲ မုာ်မုာ်ခုၣ်ခုၣ်​ အဃိ အဝဲသ့ၣ်​ ပှဲၤဝဲဒီး တၢ်သူၣ်ခုသးခု. ဘၣ်ဆၣ်​ လၢခံန့ၣ်ပှၤအံၣ်စရ့လးဖိတဖၣ်​ အတၢ်အိၣ်သး ကဆီတလဲအသး.

ဖဲစီၤၡလိၤမိၤ ဘူၣ်ထီၣ်ဘါထီၣ်ဝဲ ယဟိဝၤယွၤအခါ ပှၤအံၣ်စရ့လးဖိတဖၣ်​ အိၣ်မူဘၣ်ဝဲ မုာ်မုာ်ခုၣ်ခုၣ်. ဘၣ်ဆၣ်​ စီၤၡလိၤမိၤန့ၣ်​ ဟံးန့ၢ်ဝဲအမါ အါဂၤလၢ ထံဂၤကီၢ်ဂၤ. ဒီးအမါတဖၣ်အံၤ ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်. ဒ်တၢ်ဆၢကတီၢ် လဲၤပူၤကွံာ်အသိး စီၤၡလိၤမိၤ စးထီၣ်ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်စ့ၢ်ကီး. ယဟိဝၤယွၤ သးဒိၣ်ထီၣ်ဝဲ စီၤၡလိၤမိၤ. အဃိ ကစၢ်ယွၤ တဲဘၣ်အီၤလၢ ‘ယကနီၤဖး ပှၤအံၣ်စရ့လးဖိခံဖု. ပှၤအံၣ်စရ့လးဖိလၢ အနီၣ်ဂံၢ်အါတဖုန့ၣ်​ ယကဟ့ၣ်လီၤလၢ နခ့နပှၤတဂၤအစုပူၤ. မ့မ့ၢ် ပှၤအံၣ်စရ့လးဖိလၢ အနီၣ်ဂံၢ်စှၤတဖုန့ၣ်​ ယကဟ့ၣ်လီၤ နဖိနလံၤ.’

ယဟိဝၤယွၤ ကမၤဝဲဒ်န့ၣ်န့ၣ်​ အဝဲပာ်ဖျါထီၣ်ဝဲလၢ ကျဲအဂၤတဘိစ့ၢ်ကီး. ဖဲစီၤၡလိၤမိၤ အခ့အပှၤ စီၤယၤရၤဘၣ်​ လဲၤတၢ်လၢကျဲအခါ အဝဲထံၣ်လိာ်အသးဒီး ဝံအဃံယၤ. ဝံအဃံယၤ ဖှီဝဲအဆ့ကၤ တဆံခံက့ ဒီးအဝဲတဲဘၣ်​ စီၤယၤရၤဘၣ်လၢ ‘ယဟိဝၤယွၤ ကဟံးထီၣ်ကွံာ် ဘီမုၢ်လၢ စီၤပၤၡလိၤမိၤအအိၣ်​ ဒီးနီၤဖးဝဲ ဘီမုၢ်အံၤခံက့. ခီဖျိလၢ နကကဲထီၣ်ဘၣ်စီၤပၤလၢ ပှၤအံၣ်စရ့လးဖိ အဒူၣ်တဆံအဖီခိၣ်အဃိ ဟံးန့ၢ်ယဆ့ကၤအက့တဆံအံၤ.’ ဖဲစီၤပၤၡလိၤမိၤ နၢ်ဟူဘၣ်​ တၢ်ဂ့ၢ်အံၤအခါ အဝဲအဲၣ်ဒိးမၤသံဝဲ စီၤယၤရၤဘၣ်. အဃိ စီၤယၤရၤဘၣ်ဘၣ်​ လဲၤဃ့ၢ်ဝဲဆူ ကီၢ်အဲၤကူပတူးအပူၤ. လၢခံ ဖဲစီၤၡလိၤမိၤ သံဝံၤအလီၢ်ခံ အဖိခွါ စီၤရဃၤဘၣ်​ ကဲထီၣ်စီၤပၤလၢအလီၢ်. ဒီးစီၤယၤရၤဘၣ်​ သ့ၣ်ညါဝဲလၢ တၢ်အိၣ်သး ဂ့ၤထီၣ်ဝဲလံ အဃိ အဝဲဟဲက့ၤဝဲလၢ ကီၢ်အံၣ်စရ့လးအပူၤ.

ပှၤအံၣ်စရ့လး သူၣ်က့သးပှၢ်တဖၣ်​ တဲဘၣ်စီၤရဃၤဘၣ်လၢ ‘နမ့ၢ်ရ့ဒီး ပှၤအံၣ်စရ့လးဖိတဖၣ်​ ဂ့ၤဂ့ၤန့ၣ်​ အဝဲသ့ၣ်​ ကတီလၢ နဖီခိၣ်.’ ဘၣ်ဆၣ်​ စီၤရဃၤဘၣ်​ အတံၤသကိးလၢ အသးစၢ်တဖၣ်​ တဲဘၣ်အီၤလၢ ‘ပှၤဂီၢ်မုၢ်တဖၣ်အံၤ နကဘၣ်မၢ အဝဲသ့ၣ်မၤတၢ်မၤ ဆူၣ်န့ၢ်အလီၢ်.’ စီၤရဃၤဘၣ်မၤထွဲဝဲ အတံၤသကိးလၢ အသးစၢ်တဖၣ်​ အတၢ်ဟ့ၣ်ကူၣ်. ဒီးမ့ၢ်လၢပှၤဂီၢ်မုၢ်တဖၣ်​ ဘၣ်မၤတၢ် နးမးအဃိ အဝဲသ့ၣ်ထီဒါဝဲ စီၤရဃၤဘၣ်. ဝံၤဒီးပှၤဂီၢ်မုၢ်တဖၣ်​ ပာ်ထီၣ်ဝဲ စီၤယၤရၤဘၣ်လၢ စီၤပၤလၢ ပှၤအံၣ်စရ့လးဖိ အဒူၣ်တဆံအဖီခိၣ်. ပှၤအံၣ်စရ့လးဖိ အဒူၣ်တဆံန့ၣ်​ ဘၣ်တၢ်ကိးအီၤလၢ အံၣ်စရ့လးအဘီမုၢ်. မ့မ့ၢ်ပှၤအံၣ်စရ့လးဖိ ခံဒူၣ်န့ၣ်​ ဘၣ်တၢ်ကိးအီၤလၢ ယူဒၤအဘီမုၢ် ဒီးအဝဲသ့ၣ်တီဝဲလၢ စီၤရဃၤဘၣ်​ အဖီခိၣ်. ခဲအံၤ ပှၤအံၣ်စရ့လးဖိ တဆံခံဒူၣ်အံၤ လီၤဖးဝဲလံ.

စီၤယၤရၤဘၣ်န့ၣ်​ တအဲၣ်ဒိးဝဲလၢ အပှၤဂီၢ်မုၢ်တဖၣ်​ လဲၤဘူၣ်ထီၣ်ဘါထီၣ်တၢ်လၢ ဝ့ၢ်ယရူၤၡလ့ၣ်​ အပူၤဘၣ်. ဘၣ်မနုၤအဃိလဲၣ်န့ၣ်​ နသ့ၣ်ညါဧါ. မ့ၢ်လၢစီၤယၤရၤဘၣ်​ ဘၣ်ယိၣ်ဝဲလၢ အပှၤဂီၢ်မုၢ်တဖၣ်​ ကထီဒါက့ၤအီၤ ဒီးဆီၣ်ထွဲက့ၤ စီၤရဃၤဘၣ်. အဃိ စီၤယၤရၤဘၣ်​ တ့ထီၣ်ဝဲ ကျီၢ်ဖိခံဒုလၢထူ ဒီးတဲဘၣ်အပှၤဂီၢ်မုၢ်တဖၣ်လၢ ‘ဝ့ၢ်ယရူၤၡလ့ၣ်န့ၣ်​ အိၣ်ဝဲဖးယံၤအဃိ သုဘူၣ်ထီၣ်ဘါထီၣ်တၢ် ဖဲအံၤသ့ဝဲ.’ ဝံၤဒီး ပှၤဂီၢ်မုၢ်တဖၣ်​ စးထီၣ်ဘူၣ်ထီၣ်ဘါထီၣ်ဝဲ ကျီၢ်ဖိခံဒုအံၤ ဒီးအဝဲသ့ၣ်​ သးပ့ၤနီၣ်ကွံာ်ဝဲ ယဟိဝၤယွၤ.