ပိာ်မုၣ်လၢပျၢၤလၢအိၣ်ဒီးတၢ်သးတီ ဒီးခရံာ်ဖိဒီပုၢ်ဝဲၢ်မုၣ်တဖၣ်

၁. မၤရံ, စၤရါ, ရူၤသး ဒီးပှၤအဂၤန့ၣ်

မ့ၢ်မါလၢအိၣ်ဒီးတၢ်သးတီ, ကူၣ်တၢ်သ့.

အဝဲသ့ၣ်ပာ်ဆိယွၤအတၢ်မၤလၢညါ

ဒီးမ့ၢ်ဝဲပိာ်မုၣ်လၢယွၤဘၣ်သူၣ်ဘၣ်သး.

အဝဲသ့ၣ်အိၣ်ဒီးတၢ်နာ် တၢ်သးတီ,

အမံၤလၢဃံလၤန့ၣ် လံာ်စီဆှံပာ်ဖျါထီၣ်.

၂. တၢ်သးတီဒီး တၢ်ဂ့ၤတၢ်ဝါလၢအဂၤ

မ့ၢ်တၢ်လၢပှၤဟီၣ်ခိၣ်ဖိသးလီဝဲဒၣ်.

လၢပျၢၤပိာ်မုၣ်လၢအိၣ်ဒီးမံၤဂ့ၤသၣ်ဂ့ၤ,

အဝဲသ့ၣ်ဒိတဲာ်န့ၣ် ပကွၢ်လိအီၤသ့.

ခဲအံၤခရံာ်ဖိဒီပုၢ်ဝဲၢ်မုၣ်တဖၣ်

မၤယွၤတၢ်မၤဒ်သိး ပိာ်မုၣ်သးတီလၢညါ.

၃. ပဒီပုၢ်ဝဲၢ်မုၣ်လၢဆၢကတီၢ်ခဲအံၤ

အဝဲသ့ၣ်ဂုာ်ကျဲးစၢးမၤယွၤတၢ်မၤလံ.

အိၣ်ဒီးသကဲာ်ပဝးဂ့ၤ, ဒိကနၣ်တၢ်.

တပျံၤတၢ်လၢကမၤယွၤအတၢ်ဘၣ်သး.

ယဟိဝၤဆိၣ်ဂ့ၤအဝဲသ့ၣ်ကိးဂၤ,

တယံာ်တၢ်လၤကပီၤခိၣ်ဖးကဒိးန့ၢ်ဘၣ်.