တၢ်မၤလိ ၆
မ့ၢ်နနာ်လၢ ယဟိဝၤယွၤမၤတၢ်န့ၣ် အတီအလိၤထီဘိဧါ
“မ့ၢ်ဝဲလၢလၢၢ်တဖျၢၣ်, အတၢ်မၤလၢဝဲပှဲၤဝဲ, အဂ့ၢ်ဒ်အံၤ, အကျဲခဲလၢာ်မ့ၢ်တၢ်စံၣ်ညီၣ်လီၤ. မ့ၢ်တၢ်မ့ၢ်တၢ်တီအကစၢ်, ဒီးတၢ်အၢတအိၣ်လၢအီၤ, [တစံၣ်ညီၣ်တၢ်တတီတလိၤ နီတဘျီဘၣ်, NWT] တၢ်တီဒီးတၢ်လိၤမ့ၢ်အဝဲဒၣ်လီၤ.”—၅ မိၤၡ့ ၃၂:၄.
တၢ်သးဝံၣ် ၃ ပတၢ်ဂံၢ်တၢ်ဘါ, ပတၢ်မုၢ်လၢ်, ပတၢ်နာ်န့ၢ်အလီၢ်
တၢ်မၤလိအံၤ အတၢ်တိာ်ပာ်a
၁-၂. (က) ဘၣ်မနုၤအဃိ ပှၤတနီၤန့ၣ် ကီလၢကနာ်န့ၢ် ပှၤလၢအအိၣ်ဒီး တၢ်စိတၢ်ကမီၤလဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
ဆၢကတီၢ်ခဲအံၤ ပှၤအါဂၤန့ၣ် ကီဒိၣ်မးလၢ ကနာ်ဝဲ ပှၤလၢအအိၣ်ဒီး တၢ်စိတၢ်ကမီၤတဖၣ်. ညီနုၢ်န့ၣ်အဝဲသ့ၣ်ထံၣ်ဘၣ်ဝဲလၢ ပဒိၣ်ပပှၢ်ဒီး ထံကီၢ်အတၢ်သိၣ်တၢ်သီတဖၣ်န့ၣ် ဒီသဒၢဝဲ ပှၤကဲဒိၣ်ကဲပှၢ် ဒီးပှၤလၢအအိၣ်ဒီး တၢ်စိတၢ်ကမီၤ ဘၣ်ဆၣ် တမၤန့ၢ်တၢ်လၢ ပှၤဖှီၣ်ဖိယာ်ဖိတဖၣ်အဂီၢ် တီတီလိၤလိၤဘၣ်. လံာ်စီဆှံစ့ၢ်ကီး တဲဖျါထီၣ်ဝဲ တၢ်မ့ၢ်တၢ်တီလၢအမ့ၢ် “ပှၤပၢပှၤဂၤလၢ အတၢ်အၢအဂီၢ်လီၤ.” (စံၣ်တဲၤတဲလီၤတၢ် ၈:၉) တကးဒံးဘၣ် တၢ်ဘူၣ်တၢ်ဘါခိၣ်နၢ်တဖၣ်န့ၣ် မၤဝဲတၢ်လၢ အအၢအသီတဖၣ်. အဃိ ပှၤတနီၤန့ၣ် အတၢ်နာ်န့ၢ်ကစၢ်ယွၤ တအိၣ်လၢၤဘၣ်. အဃိ ပမ့ၢ်မၤလိလံာ်စီဆှံ ဒီးပှၤဂၤန့ၣ် ပကဘၣ်မၤစၢၤအီၤဒ်သိး အကနာ်န့ၢ် ယဟိဝၤယွၤ ဒီးပှၤဟီၣ်ခိၣ်ဖိလၢ ယဟိဝၤယွၤ ဃုထၢထီၣ်ဝဲတဖၣ်.
၂ တမ့ၢ်ထဲ ပှၤမၤလိလံာ်စီဆှံဖိတဖၣ် ကဘၣ်မၤဒိၣ်ထီၣ် အတၢ်နာ်န့ၢ် ယဟိဝၤယွၤ ဒီးအတၢ်ကရၢကရိဘၣ်. ပဝဲစ့ၢ်ကီး ပမ့ၢ်အိၣ်လၢ တၢ်မ့ၢ်တၢ်တီအပူၤ အနံၣ်အါမးသနာ်က့ ပကဘၣ်ပလီၢ်ပသးဒ်သိး ပတၢ်နာ်လၢ ယဟိဝၤယွၤအဖီခိၣ် သုတလီၤစှၤတဂ့ၤအဂီၢ်. ပကဘၣ်နာ်လၢ တၢ်လၢယဟိဝၤယွၤ မၤဝဲန့ၣ် မ့ၢ်ကျဲလၢအဂ့ၤကတၢၢ်ထီဘိ. တဘျီတခီၣ် ပကထံၣ်ဘၣ် တၢ်အိၣ်သးလၢ အမၤကွၢ်ပတၢ်နာ်န့ၢ် ယဟိဝၤယွၤ. အဃိ လၢတၢ်မၤလိအံၤအပူၤ ပကတဲသကိး ဘၣ်ဃးဒီး (၁) ဖဲပဖးတၢ်ဂ့ၢ်တနီၤလၢ လံာ်စီဆှံပူၤအခါ, (၂) ဖဲပဒိးန့ၢ်ဘၣ် တၢ်ဟံးစုနဲၣ်ကျဲလၢ ယဟိဝၤယွၤ အတၢ်ကရၢကရိအပူၤအခါ ဒီး (၃) ခါဆူညါ ဖဲပထံၣ်ဘၣ် တၢ်ကီတၢ်ခဲအခါ ဘၣ်သ့ၣ်သ့ၣ် ပတၢ်နာ် ကဘၣ်တၢ်မၤကွၢ်အီၤလီၤ.
ဖဲနဖးလံာ်စီဆှံအခါ နာ်န့ၢ်ယဟိဝၤယွၤ
၃. တၢ်ဂ့ၢ်တၢ်ကျိၤလၢ လံာ်စီဆှံပူၤတနီၤန့ၣ် ကဲထီၣ်တၢ်မၤကွၢ် ပတၢ်နာ်န့ၢ်ယဟိဝၤယွၤ သ့ဒ်လဲၣ်.
၃ ဖဲပဖးလံာ်စီဆှံအခါ တဘျီတခီၣ် ပကဆိကမိၣ်ဘၣ်လၢ ဘၣ်မနုၤအဃိ ယဟိဝၤယွၤ မၤပှၤတဂၤအံၤ ဒ်အံၤလဲၣ် ဒီးဘၣ်မနုၤအဃိ အဝဲဆၢတဲာ်ဝဲဒ်န့ၣ်လဲၣ်. အဒိ, လၢလံာ် ၄ မိၤၡ့ အပူၤန့ၣ် ယဟိဝၤယွၤ စံၣ်ညီၣ်လၢပှၤကမၤသံဝဲ ပှၤလၢအလဲၤထၢသ့ၣ်မုၣ်လၢ မုၢ်အိၣ်ဘှံးနံၤတဂၤလီၤ. ဘၣ်ဆၣ် လၢခံအနံၣ်အါမး ဝံၤအလီၢ်ခံန့ၣ် ဖဲ ၂ ၡမူၤအ့လး အပူၤန့ၣ် ပဖးဘၣ်လၢ စီၤပၤဒၤဝံး အဲၣ်ဘၢတၢ် ဒီးမၤသံတၢ်သနာ်က့ ယဟိဝၤယွၤ ပျၢ်ကွံာ်အတၢ်ကမၣ်. (၄ မိၤၡ့ ၁၅:၃၂, ၃၅; ၂ ၡမူၤအ့လး ၁၂:၉, ၁၃) အဃိ ဘၣ်သ့ၣ်သ့ၣ် နကဆိကမိၣ်ဘၣ်လၢ ‘စီၤဒၤဝံးန့ၣ် အဲၣ်ဘၢတၢ် ဒီးမၤသံတၢ်သနာ်က့ ဘၣ်မနုၤအဃိ ယဟိဝၤယွၤပျၢ်ကွံာ် အတၢ်ကမၣ်လဲၣ်. ဒီးပှၤလၢအလဲၤထၢသ့ၣ်မုၣ် လၢမုၢ်အိၣ်ဘှံးနံၤတဂၤန့ၣ် ဖျါလီၤဂာ်လၢ အတၢ်ကမၣ်မး တဒိၣ်ထဲသိးဒီး စီၤဒၤဝံး ဘၣ်ဆၣ် ဘၣ်မနုၤအဃိ ယဟိဝၤယွၤ စံၣ်ညီၣ်လၢ ပှၤကမၤသံအီၤလဲၣ်.’ ဒ်သိး ပကသ့ၣ်ညါ တၢ်စံးဆၢအဂီၢ် ဖဲပဖးလံာ်စီဆှံအခါ ပကဘၣ်သ့ၣ်နီၣ်ထီၣ် တၢ်ဂ့ၢ်သၢမံၤလီၤ.
၄. ၁ မိၤၡ့ ၁၈:၂၀, ၂၁; ၅ မိၤၡ့ ၁၀:၁၇ န့ၣ်မၤဂၢၢ်ကျၢၤထီၣ် ပတၢ်နာ်လၢ ယဟိဝၤယွၤ စံၣ်ညီၣ်တၢ် တီတီလိၤလိၤဒ်လဲၣ်.
၄ တဘျီတခီၣ် လံာ်စီဆှံ တပာ်ဖျါထီၣ်ဝဲ တၢ်ဂ့ၢ်တၢ်ကျိၤလီၤတံၢ်လီၤဆဲး ခဲလၢာ်ဘၣ်. အဒိ, ပသ့ၣ်ညါဘၣ်လၢ စီၤဒၤဝံးန့ၣ်အပီၢ်ယၢ်လီၤသး လၢအတၢ်ကမၣ် နီၢ်ကီၢ်လီၤ. (စံးထီၣ်ပတြၢၤ ၅၁:၂-၄) ဘၣ်ဆၣ် ပှၤလၢအမၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီတဂၤန့ၣ်မီၤ. မ့ၢ်အဝဲပီၢ်ယၢ်လီၤအသးလၢ တၢ်လၢအမၤဝဲအဃိဧါ, လၢအပူၤကွံာ်န့ၣ် မ့ၢ်အဝဲမၤကမၣ် ကစၢ်ယွၤ အတၢ်သိၣ်တၢ်သီဒံးဧါ, မ့ၢ်အဝဲဘၣ်တၢ်ဟ့ၣ်ပလီၢ်အီၤ ဒီးဒိကနၣ်ဝဲဧါန့ၣ် လံာ်စီဆှံ တပာ်ဖျါထီၣ်ဝဲဘၣ်. ဘၣ်ဆၣ် ပနာ်သ့လၢ ယဟိဝၤယွၤန့ၣ် “တစံၣ်ညီၣ်တၢ်တတီတလိၤ နီတဘျီဘၣ်.” (၅ မိၤၡ့ ၃၂:၄, NWT) ယဟိဝၤယွၤန့ၣ် သ့ၣ်ညါတၢ်ခဲလၢာ် ဒီးစံၣ်ညီၣ်တၢ်တီတီလိၤလိၤ, အတၢ်စံၣ်ညီၣ်န့ၣ် တဒိးသန့ၤထီၣ်အသးလၢ တၢ်လၢအနၢ်ဟူဝဲ, အကွၢ်ဒိၣ်ဆံးအါစှၤတၢ် မ့တမ့ၢ် အထံၣ်ကမၣ်တၢ်အဃိဘၣ်. (ဖး ၁ မိၤၡ့ ၁၈:၂၀, ၂၁; ၅ မိၤၡ့ ၁၀:၁၇.) ပမ့ၢ်မၤလိအါထီၣ် ယဟိဝၤယွၤ ဒီးအတၢ်ဘျၢတဖၣ်အဂ့ၢ်န့ၣ် ပတၢ်နာ်လၢ အကစံၣ်ညီၣ်တၢ် တီတီလိၤလိၤန့ၣ် ကဟဲဂၢၢ်ကျၢၤထီၣ်. ဒီးဖဲပဖးလံာ်စီဆှံ ဒီးပတၢ်သံကွၢ် မ့ၢ်အိၣ်ထီၣ် ဒီးပမ့ၢ်တထံၣ်န့ၢ် တၢ်စံးဆၢဘၣ်သနာ်က့ ပကနာ်လၢ ယဟိဝၤယွၤ ကမၤဝဲ တၢ်လၢအ “တီဝဲလိၤဝဲလၢ အကျဲခဲလၢာ်အပူၤ” လီၤ.—စံးထီၣ်ပတြၢၤ ၁၄၅:၁၇.
၅. ခီဖျိလၢ ပတလၢတပှဲၤဘၣ်အဃိ ပစံၣ်ညီၣ်ကမၣ်ဘၣ်တၢ် သ့ဒ်လဲၣ်. (ကွၢ်တၢ်လွံၢ်နၢၣ်လၢအမ့ၢ် “ပတလၢတပှဲၤဘၣ်အဃိ ပတၢ်ထံၣ်န့ၣ် တဘၣ်ဝဲထီဘိဘၣ်.”)
၅ ခီဖျိလၢ ပတလၢတပှဲၤဘၣ်အဃိ ပစံၣ်ညီၣ်တၢ်န့ၣ် တဘၣ်ဝဲထီဘိဘၣ်. မ့ၢ်လၢကစၢ်ယွၤန့ၣ် တ့လီၤပှၤဒ် အက့ၢ်အဂီၤအသိး အဃိ ပအဲၣ်ဒိးထံၣ်လၢ ပှၤကရ့လိာ်သးတီတီလိၤလိၤ. (၁ မိၤၡ့ ၁:၂၆) ပမ့ၢ်ဆိကမိၣ်လၢ ပသ့ၣ်ညါ တၢ်ဂ့ၢ်တၢ်ကျိၤခဲလၢာ်နာ်က့ မ့ၢ်လၢပတလၢတပှဲၤဘၣ်အဃိ ပစံၣ်ညီၣ်ကမၣ်ဘၣ်တၢ်သ့ဒံး. အဒိ, ပကနီၣ်ထီၣ်ဘၣ် ဖဲယဟိဝၤယွၤ ပာ်ဖျါထီၣ် တၢ်သးကညီၤလၢ ပှၤနံၤနဝ့ဖိတဖၣ် အဖီခိၣ်အခါ စီၤယိၤနါ တဘၣ်သူၣ်ဘၣ်သးဝဲ နီတစဲးဘၣ်. (ယိၤနါ ၃:၁၀–၄:၁) မ့ၢ်လၢ ယဟိဝၤယွၤ ပာ်ဖျါထီၣ် တၢ်သးကညီၤအဃိ တၢ်ကဲထီၣ်အသးဒ်လဲၣ်. ပှၤနံၤနဝ့ဖိ အဂၤ ၁၂၀,၀၀၀ ဘျဲၣ်န့ၣ် ပီၢ်ယၢ်လီၤအသး ဒီးပူၤဖျဲးဝဲ. အဃိ ပသ့ၣ်ညါဘၣ်လၢ ပှၤလၢအတၢ်ထံၣ်ကမၣ်န့ၣ် မ့ၢ်ဝဲစီၤယိၤနါ, တမ့ၢ်ယဟိဝၤယွၤဘၣ်.
၆. ဘၣ်ဃးဒီးယဟိဝၤယွၤ မၤတၢ်ဆၢတဲာ် ဒ်အံၤဒ်န့ၣ်န့ၣ် ဘၣ်မနုၤအဃိ အတလိၣ်တဲပၠးပှၤဘၣ်လဲၣ်.
၆ ဘၣ်မနုၤအဃိ ယဟိဝၤယွၤ ဆၢတဲာ်တၢ် ဒ်အံၤဒ်န့ၣ်လဲၣ်န့ၣ် တလိၣ်တဲပၠးဝဲ ပှၤဟီၣ်ခိၣ်ဖိဘၣ်. တဘျီတခီၣ် ဖဲယဟိဝၤယွၤ မၤတၢ်ဆၢတဲာ်ဝံၤအခါ မ့တမ့ၢ် အဘူးကမၤတၢ်ဆၢတဲာ်အခါ ဘၣ်ဃးဒီး အတၢ်ဆၢတဲာ်န့ၣ် ယဟိဝၤယွၤ ဟ့ၣ်အခွဲးလၢ အခ့အပှၤလၢပျၢၤတဖၣ် ကတဲဖျါထီၣ်အတၢ်ထံၣ်. (၁ မိၤၡ့ ၁၈:၂၅; ယိၤနါ ၄:၂, ၃) ဒီးတဘျီတခီၣ် ဘၣ်မနုၤအဃိ ယဟိဝၤယွၤ ဆၢတဲာ်တၢ်ဒ်အံၤဒ်န့ၣ်လဲၣ်န့ၣ် အတဲပၠးဝဲ အခ့အပှၤလီၤ. (ယိၤနါ ၄:၁၀, ၁၁) နီၢ်ကီၢ်န့ၣ် ဘၣ်မနုၤအဃိ ယဟိဝၤယွၤ ဆၢတဲာ်တၢ်ဒ်အံၤဒ်န့ၣ်လဲၣ်န့ၣ် အတလိၣ်တဲပၠးပှၤဘၣ်. ယဟိဝၤယွၤန့ၣ် မ့ၢ်လၢအကဲ ပတၢ်ဘၣ်တ့ကစၢ်အဃိ တချုးလၢ အမၤတၢ်ဆၢတဲာ်အခါမ့ၢ်ဂ့ၤ မၤဝဲဝံၤအခါမ့ၢ်ဂ့ၤ တလိၣ်ဃ့အခွဲးလၢ ပအိၣ်ဘၣ်.—ယၡါယၤ ၄၀:၁၃, ၁၄; ၅၅:၉.
ဖဲနဒိးန့ၢ်ဘၣ် တၢ်ဟံးစုနဲၣ်ကျဲအခါ နာ်လၢအဟဲလၢ ယဟိဝၤယွၤအအိၣ်
၇. ဘၣ်သ့ၣ်သ့ၣ် ကကီလၢ ပကမၤတၢ်မနုၤလဲၣ် ဒီးဘၣ်မနုၤအဃိလဲၣ်.
၇ ပနာ်သပှၢ်ကတၢၢ်လၢ ယဟိဝၤယွၤ မၤတၢ်လၢအဘၣ်ထီဘိ. ဘၣ်ဆၣ် မ့မ့ၢ်ပှၤဟီၣ်ခိၣ်ဖိလၢ ယဟိဝၤယွၤ ဃုထၢထီၣ်ဝဲတဖၣ်န့ၣ် ဘၣ်သ့ၣ်သ့ၣ် ပကတူၢ်ဘၣ်လၢ ပနာ်န့ၢ်အဝဲသ့ၣ် တသ့ထီဘိဘၣ်. ဘၣ်သ့ၣ်သ့ၣ် ပကဆိကမိၣ်ဘၣ်လၢ ပှၤလၢအအိၣ်ဒီး တၢ်ခွဲးတၢ်ယာ်လၢ ယဟိဝၤယွၤ အတၢ်ကရၢကရိအပူၤန့ၣ် မ့ၢ်အဝဲသ့ၣ် မၤတၢ်ဒ် ယဟိဝၤယွၤ အတၢ်ဟံးစုနဲၣ်ကျဲအသိးစ့ၢ်ကီးဧါ မ့တမ့ၢ် အမၤဝဲဒ် အတၢ်ထံၣ်အသိးဧါ. ပှၤလၢလံာ်စီဆှံအပူၤ တနီၤစ့ၢ်ကီး ကတူၢ်ဘၣ်ဝဲဒ်န့ၣ်လီၤ. အဒိ, ပကဆိကမိၣ်ကွၢ်က့ၤတၢ်ဂ့ၢ်ဖဲ လံာ်အဆၢ ၃ အပူၤ. ပှၤလၢအမၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီတဂၤ အဘူးအတံၢ်န့ၣ် ကဆိကမိၣ်ဘၣ်လၢ ပှၤတဂၤအံၤ တချုးလၢပှၤစံၣ်ညီၣ်သံအီၤဘၣ်န့ၣ် မ့ၢ်စီၤမိၤၡ့ တဲသကိးတၢ်ဒီး ယဟိဝၤယွၤ နီၢ်ကီၢ်စ့ၢ်ကီးဧါ. ဒီးအဂၤတခါန့ၣ် ဘၣ်သ့ၣ်သ့ၣ် ပှၤဃ့ၤသးဖိ စီၤအူၤရံယၤ အသကိး ကဆိကမိၣ်ဘၣ်ဝဲလၢ စီၤဒၤဝံး သူဝဲအတၢ်န့ၢ်စိန့ၢ်ကမီၤ ဒ်သိးအသုတဘၣ် တၢ်စံၣ်ညီၣ်သံအီၤတဂ့ၤအဂီၢ်လီၤ. နီၢ်ကီၢ်န့ၣ် ပှၤဟီၣ်ခိၣ်ဖိလၢ ယဟိဝၤယွၤ ဃုထၢထီၣ်အီၤတဖၣ်န့ၣ် ယဟိဝၤယွၤ နာ်န့ၢ်အဝဲသ့ၣ် အဃိ ပမ့ၢ်တနာ်န့ၢ် အဝဲသ့ၣ်ဘၣ်န့ၣ် လီၤဂာ်ဒ် ပတနာ်န့ၢ် ယဟိဝၤယွၤဘၣ်.
၈. ခရံာ်ဖိတၢ်အိၣ်ဖှိၣ် အတၢ်ရဲၣ်တၢ်ကျဲၤလၢ ပစိၤခဲအံၤန့ၣ် လီၤဂာ်လိာ်အသးဒီး ခရံာ်ဖိတၢ်အိၣ်ဖှိၣ်လၢ တၢ်မၢဖိအစိၤဒ်လဲၣ်. (မၤတၢ် ၁၆:၄, ၅)
၈ မုၢ်မဆါတနံၤအံၤ ယဟိဝၤယွၤသူဝဲ “ကုၢ်လၢအတီ ဒီးအကူၣ်တၢ်သ့” ဒ်သိးကပၢဆှၢဝဲ အတၢ်ကရၢကရိ လၢဟီၣ်ခိၣ်လီၤ. (မးသဲ ၂၄:၄၅) အဝဲသ့ၣ် မၤဝဲဒ် ပှၤပၢဆှၢတၢ်ကမံးတံာ် လၢတၢ်မၢဖိအစိၤတဖၣ် မၤဝဲအသိး. အဝဲသ့ၣ် တီခိၣ်ရိၤမဲ ကစၢ်ယွၤအခ့အပှၤ လၢဟီၣ်ခိၣ်ဒီဘ့ၣ် ဒီးဟံးစုနဲၣ်ကျဲဝဲ တၢ်အိၣ်ဖှိၣ်သးပှၢ်တဖၣ်လီၤ. (ဖး မၤတၢ် ၁၆:၄, ၅.) ဒီးလၢတၢ်အိၣ်ဖှိၣ်ပူၤန့ၣ် တၢ်အိၣ်ဖှိၣ်သးပှၢ်တဖၣ် မၤထွဲဝဲ တၢ်ဟံးစုနဲၣ်ကျဲတဖၣ်အံၤ လီၤတံၢ်လီၤဆဲးလီၤ. အဃိ ပမ့ၢ်ဒိကနၣ် တၢ်ဟံးစုနဲၣ်ကျဲလၢ အဟဲလၢတၢ်ကရၢကရိ ဒီးတၢ်အိၣ်ဖှိၣ်သးပှၢ်အအိၣ်န့ၣ် မ့ၢ်ဒၣ်ပပာ်ဖျါထီၣ်လၢ ပနာ်န့ၢ်ယဟိဝၤယွၤလီၤ.
၉. တဘျီတခီၣ် ဘၣ်မနုၤအဃိ ကကီလၢ ပကမၤထွဲ တၢ်အိၣ်ဖှိၣ်သးပှၢ်တဖၣ် အတၢ်ဆၢတဲာ်လဲၣ်.
၉ တဘျီတခီၣ် ပကမၤဒ် တၢ်အိၣ်ဖှိၣ်သးပှၢ်တဖၣ် ဆၢတဲာ်ဝဲအသိးန့ၣ် တညီဘၣ်. အဒိ, အပူၤကွံာ်စှၤကိာ်နံၣ်န့ၣ် တၢ်အိၣ်ဖှိၣ်တနီၤန့ၣ် ဘၣ်တၢ်ပာ်ဖှိၣ်က့ၤအီၤ အဃိ တၢ်အိၣ်ဖှိၣ်တနီၤ အကဝီၤတၢ်အိၣ်ဖှိၣ်အကရူၢ် (circuits) န့ၣ် တဒ်သိးဒီး လၢညါလၢၤဘၣ်. ဒီးပှၤတနီၤန့ၣ် တၢ်အိၣ်ဖှိၣ်သးပှၢ် မၢအဝဲသ့ၣ် လဲၤသုးလၢ တၢ်အိၣ်ဖှိၣ်အဂၤ ဒ်သိးပှၤထီၣ်တၢ်အိၣ်ဖှိၣ်လၢ ဘီမုၢ်ဘျီၣ်ဒိၣ် အနီၣ်ဂံၢ်ကဘၣ်ဂီၢ်အဂီၢ် ဒီးဒ်သိး လီၢ်ဆ့ၣ်နီၤ တလီၤဟိအါတလၢတဂ့ၤအဂီၢ်. တၢ်အိၣ်ဖှိၣ်သးပှၢ် မ့ၢ်မၢပလဲၤထီၣ်က့ၤလၢ တၢ်အိၣ်ဖှိၣ်အဂၤတဖျၢၣ်န့ၣ် ဘၣ်သ့ၣ်သ့ၣ် ကကီလၢ ပကပာ်တ့ၢ် ပဟံၣ်ဖိဃီဖိ ဒီးပသကိးတဖၣ်လီၤ. တၢ်အိၣ်ဖှိၣ်သးပှၢ်တဖၣ် ကမၢဒီပုၢ်ဝဲၢ် ကလဲၤလၢ တၢ်အိၣ်ဖှိၣ်ဖဲလဲၣ်ဖဲလဲၣ်န့ၣ် မ့ၢ်ယဟိဝၤယွၤ တဲဘၣ်အဝဲသ့ၣ်ဧါ. တတဲဘၣ်ဘၣ်. ခီဖျိလၢ တၢ်ဂ့ၢ်အံၤအဃိ ပဝဲတနီၤန့ၣ် ဘၣ်သ့ၣ်သ့ၣ် ပတအဲၣ်ဒိးမၤထွဲ တၢ်ဟံးစုနဲၣ်ကျဲဘၣ်. ဘၣ်ဆၣ် ယဟိဝၤယွၤ နာ်န့ၢ်တၢ်အိၣ်ဖှိၣ်သးပှၢ် လၢအမၤတၢ်ဆၢတဲာ်တဖၣ်အံၤ ဒီးပဝဲစ့ၢ်ကီး ပကဘၣ်နာ်န့ၢ်အဝဲသ့ၣ်လီၤ.b
၁၀. ဒ် ဧ့ၤဘြံၤ ၁၃:၁၇ ပာ်ဖျါထီၣ်ဝဲအသိး ဘၣ်မနုၤအဃိ ပကဘၣ်ဒိကနၣ် တၢ်အိၣ်ဖှိၣ်သးပှၢ်တဖၣ်လဲၣ်.
၁၀ ပသးမ့ၢ်တလီၤပလိာ်ဒီး တၢ်အိၣ်ဖှိၣ်သးပှၢ်တဖၣ် အတၢ်ဆၢတဲာ်ဘၣ်ဒၣ်လဲာ် ဘၣ်မနုၤအဃိ ပကဘၣ်ဒိကနၣ် ဒီးဆီၣ်ထွဲဒံး အဝဲသ့ၣ် အတၢ်ဆၢတဲာ်လဲၣ်. ပမ့ၢ်ဒိကနၣ် အဝဲသ့ၣ် အတၢ်ဟံးစုနဲၣ်ကျဲန့ၣ် တၢ်အိၣ်ဖှိၣ်အတၢ်ဃူတၢ်ဖိး ကဟဲအါထီၣ်လီၤ. (အ့းဖ့းစူး ၄:၂, ၃) ဖဲပဆီၣ်လီၤသး ဒီးဒိကနၣ် တၢ်အိၣ်ဖှိၣ်သးပှၢ် အတၢ်ဆၢတဲာ်တဖၣ်အခါ ကကဲဘျုးဝဲလၢ တၢ်အိၣ်ဖှိၣ်အပူၤလီၤ. (ဖး ဧ့ၤဘြံၤ ၁၃:၁၇.) တကးဒံးဘၣ် တၢ်လၢအရ့ဒိၣ်ကတၢၢ်န့ၣ် ပမ့ၢ်ဆီၣ်ထွဲ ပှၤလၢယဟိဝၤယွၤ ဃုထၢထီၣ်ဝဲလၢ ကကွၢ်ထွဲပှၤန့ၣ် မ့ၢ်ဒၣ်ပပာ်ဖျါထီၣ်လၢ ပနာ်န့ၢ်ယဟိဝၤယွၤလီၤ.—မၤတၢ် ၂၀:၂၈.
၁၁. ဒ်သိး ပတၢ်နာ်န့ၢ် တၢ်အိၣ်ဖှိၣ်သးပှၢ်တဖၣ် အတၢ်ဟံးစုနဲၣ်ကျဲ ကအါထီၣ်အဂီၢ် ပကဘၣ်မၤဒ်လဲၣ်.
၁၁ ပကဘၣ်သ့ၣ်နီၣ်ထီၣ်လၢ ဖဲတၢ်အိၣ်ဖှိၣ်သးပှၢ်တဖၣ် မၤဝဲတၢ်ဆၢတဲာ်လၢ ကကဲဘျုးလၢ တၢ်အိၣ်ဖှိၣ်အဂီၢ်အခါ အဝဲသ့ၣ် ဃ့ကစၢ်ယွၤ အသးစီဆှံလီၤ. အဝဲသ့ၣ် ဆိကမိၣ်ထံဝဲ လံာ်စီဆှံ အတၢ်ဟံးစုနဲၣ်ကျဲ ဒီးတၢ်ကရၢကရိ အတၢ်ဟံးစုနဲၣ်ကျဲလီၤ. အဝဲသ့ၣ် အဲၣ်ဒိးမၤ တၢ်ဘၣ်ကစၢ်ယွၤအသး သပှၢ်ကတၢၢ် ဒီးတသ့ဖဲအသ့ အဲၣ်ဒိးမၤထွဲ ကစၢ်ယွၤအကလုၢ်ကထါ လၢအဂ့ၤကတၢၢ်လီၤ. တကးဒံးဘၣ် အဝဲသ့ၣ်သ့ၣ်ညါဝဲလၢ အဝဲသ့ၣ် မၤဝဲအမူဒါ ဒ်လဲၣ်ဒ်လဲၣ်န့ၣ် ကဘၣ်ၡဲစရီဒီး ကစၢ်ယွၤလီၤ. (၁ ပ့းတရူး ၅:၂, ၃) ပမ့ၢ်သ့ၣ်နီၣ်ထီၣ် တၢ်ဂ့ၢ်သ့ၣ်တဖၣ်အံၤန့ၣ် ပတၢ်နာ်န့ၢ် အဝဲသ့ၣ် အတၢ်ဟံးစုနဲၣ်ကျဲ ကဟဲအါထီၣ်လီၤ. ဒီးအဂၤတခါန့ၣ် ပသ့ၣ်ညါဘၣ်လၢ တၢ်လီၤမုၢ်လီၤဖး, တၢ်သဘံၣ်သဘုၣ် အိၣ်ထီၣ်လၢ ကလုာ်ဒူၣ်, တၢ်ဘူၣ်တၢ်ဘါ ဒီးထံဂ့ၢ်ကီၢ်ဂ့ၢ်အကျါနာ်က့ ယဟိဝၤယွၤအခ့အပှၤတဖၣ် ဘူၣ်ထီၣ်ဘါထီၣ် ယဟိဝၤယွၤလၢ တၢ်ဃူတၢ်ဖိးအပူၤလီၤ. တၢ်ကဲထီၣ်အသးဒ်အံၤသ့န့ၣ် မ့ၢ်လၢယဟိဝၤယွၤ ဆီၣ်ထွဲမၤစၢၤ အတၢ်ကရၢကရိအဃိလီၤ.
၁၂. ဒ်သိး တၢ်အိၣ်ဖှိၣ်သးပှၢ်တဖၣ် ကသ့ၣ်ညါဝဲလၢ မ့ၢ်ပှၤမၤကမၣ်တၢ်တဂၤ ပီၢ်ယၢ်လီၤအသးဧါအဂီၢ် အဝဲသ့ၣ် ကဘၣ်ဆိကမိၣ်ထံ တၢ်မနုၤလဲၣ်.
၁၂ ယဟိဝၤယွၤ ဟ့ၣ်လီၤဝဲ တၢ်အိၣ်ဖှိၣ်သးပှၢ်တဖၣ် မူဒါဖးဒိၣ်တခါလၢအမ့ၢ် အဝဲသ့ၣ် ကဘၣ်မၤစၢၤဝဲ ဒ်သိးတၢ်အိၣ်ဖှိၣ် ကစီဆှံအဂီၢ်လီၤ. ခရံာ်ဖိတဂၤ မ့ၢ်မၤတၢ်ကမၣ်ဖးဒိၣ်န့ၣ် ယဟိဝၤယွၤ အဲၣ်ဒိးလၢ တၢ်အိၣ်ဖှိၣ်သးပှၢ်တဖၣ် ကဆၢတဲာ်ဝဲ ဘၣ်ဃးဒီး ပှၤတဂၤအံၤ ကြၢးအိၣ်လၢ တၢ်အိၣ်ဖှိၣ်ပူၤဒံးဧါ, တကြၢးအိၣ်လၢၤဘၣ်ဧါလီၤ. ပှၤမၤကမၣ်တၢ်တဂၤ မ့ၢ်တဲဝဲလၢ အပီၢ်ယၢ်လီၤအသးဘၣ်ဆၣ် ဘၣ်သ့ၣ်သ့ၣ် အတသးဟ့ဝဲ တၢ်လၢအမၤဝဲတဖၣ်သ့လီၤ. အဃိ အဆိကတၢၢ်န့ၣ် တၢ်အိၣ်ဖှိၣ်သးပှၢ်တဖၣ် ကဘၣ်ဃုသ့ၣ်ညါဝဲ ဘၣ်ဃးဒီး မ့ၢ်ပှၤတဂၤအံၤ ပီၢ်ယၢ်လီၤအသးနီၢ်ကီၢ်ဧါ. အဒိ, အဝဲသ့ၣ် ကသမံသမိးဝဲဘၣ်ဃးဒီး ပှၤလၢအမၤကမၣ်တၢ်တဂၤ တဲဝဲလၢ အပီၢ်ယၢ်လီၤအသးဘၣ်ဆၣ် မ့ၢ်အသးဟ့ဝဲ တၢ်လၢအမၤကမၣ်ဘၣ်ဝဲတဖၣ်ဧါ, တဆဲးမၤကမၣ်တၢ် ဒ်အလီၢ်လီၢ်လၢၤဘၣ်ဧါ, ဒီးအမ့ၢ်မၤကမၣ်ဘၣ်တၢ် ခီဖျိလၢ အရ့သကိးလၢ အတဂ့ၤဘၣ်အဃိန့ၣ် မ့ၢ်အဟးဆှဲး အသကိးတဖၣ်အံၤဧါ. ဒီးတၢ်အိၣ်ဖှိၣ်သးပှၢ်တဖၣ် ကဃ့ဘါထုကဖၣ် ဒီးကဆိကမိၣ်ဝဲ လံာ်စီဆှံအတၢ်ဟံးစုနဲၣ်ကျဲလၢ ဘၣ်ဃးဒီးတၢ်ဂ့ၢ်တခါအံၤ ဒီးကဆိကမိၣ်ထံဝဲ ပှၤမၤကမၣ်တၢ်တဂၤ အတၢ်အိၣ်သး ဒီးအတၢ်ပာ်သူၣ်ပာ်သးအိၣ်လၢ အတၢ်ကမၣ်အဖီခိၣ်ဒ်လဲၣ်. မ့ၢ်ဝံၤန့ၣ် အဝဲသ့ၣ် ကဆၢတဲာ်ဝဲလၢ ပှၤမၤကမၣ်တၢ်တဂၤအံၤ အကြၢးဘၣ်တၢ်ဟီထီၣ်ကွံာ်အီၤဧါ, တကြၢးဘၣ်ဧါလီၤ. ဒီးလၢတၢ်အိၣ်သးတနီၤန့ၣ် ပှၤလၢအမၤကမၣ်တၢ်တဂၤ ဘၣ်တၢ်နီဟးထီၣ်ကွံာ်အီၤလၢ တၢ်အိၣ်ဖှိၣ်ပူၤသ့လီၤ.—၁ ကရံၣ်သူး ၅:၁၁-၁၃.
၁၃. ပသကိး မ့တမ့ၢ် ပဘူးပတံၢ်တဂၤ မ့ၢ်ဘၣ်တၢ်ဟီထီၣ်ကွံာ်အီၤ လၢတၢ်အိၣ်ဖှိၣ်အပူၤန့ၣ် ဘၣ်သ့ၣ်သ့ၣ် ပကဆိကမိၣ်ဘၣ်ဒ်လဲၣ်.
၁၃ ပတၢ်နာ်လၢ တၢ်အိၣ်ဖှိၣ်သးပှၢ်တဖၣ် အဖီခိၣ်န့ၣ် ဘၣ်တၢ်မၤကွၢ်အီၤသ့ဒ်လဲၣ်. ပှၤလၢအဘၣ်တၢ်ဟီထီၣ်ကွံာ်အီၤ လၢတၢ်အိၣ်ဖှိၣ်ပူၤတဂၤ အမ့ၢ်တကဲ ပသကိးလၢပဘူးဒီးအီၤ ဒီးပဘူးပတံၢ်ဘၣ်န့ၣ် ညီဒိၣ်မးလၢ ပကတူၢ်လိာ် တၢ်အိၣ်ဖှိၣ်သးပှၢ်တဖၣ် အတၢ်ဆၢတဲာ်လီၤ. ဘၣ်ဆၣ် ပှၤလၢအဘၣ်တၢ်ဟီထီၣ်ကွံာ်အီၤတဂၤ မ့မ့ၢ်ပသကိးလၢပရ့ဒီးအီၤမုာ်န့ၣ် ဘၣ်သ့ၣ်သ့ၣ် တညီလၢ ပကတူၢ်လိာ် တၢ်အိၣ်ဖှိၣ်သးပှၢ်တဖၣ် အတၢ်ဆၢတဲာ်ဘၣ်. ဘၣ်သ့ၣ်သ့ၣ် ပကဆိကမိၣ်ဘၣ်လၢ မ့ၢ်အဝဲသ့ၣ် သ့ၣ်ညါတၢ်ဂ့ၢ်တၢ်ကျိၤ ခဲလၢာ်ဧါ, မ့ၢ်အဝဲသ့ၣ် စံၣ်ညီၣ်တၢ်တီတီလိၤလိၤ ဒ်ယဟိဝၤယွၤ စံၣ်ညီၣ်ဝဲအသိးဧါ. တၢ်မနုၤ ကမၤစၢၤပှၤဒ်သိး ပကအိၣ်ဒီး တၢ်ထံၣ်လၢအကြၢးအဘၣ် လၢတၢ်အိၣ်ဖှိၣ်သးပှၢ်တဖၣ် အတၢ်ဆၢတဲာ် အဖီခိၣ်လဲၣ်.
၁၄. တၢ်အိၣ်ဖှိၣ်သးပှၢ်တဖၣ် မ့ၢ်ဆၢတဲာ်ဝဲလၢ ပသကိး မ့တမ့ၢ် ပဘူးပတံၢ်တဂၤဂၤ ကဘၣ်တၢ်နီဟးထီၣ်ကွံာ်အီၤန့ၣ် မ့ၢ်ပကြၢးမၤဒ်လဲၣ်.
၁၄ ပကဘၣ်သ့ၣ်နီၣ်ထီၣ်လၢ တၢ်ဟီထီၣ်ကွံာ်ပှၤလၢ တၢ်အိၣ်ဖှိၣ်အပူၤန့ၣ် မ့ၢ်ဝဲယဟိဝၤယွၤ အတၢ်ရဲၣ်တၢ်ကျဲၤ ဒီးကဲဘျုးလၢ တၢ်အိၣ်ဖှိၣ်အဂီၢ် တကးဒံးဘၣ် ကဲဘျုးလၢ ပှၤမၤကမၣ်တၢ်အဂီၢ်စ့ၢ်ကီး. ပှၤမ့ၢ်ဆဲးပာ် ပှၤမၤကမၣ်တၢ် လၢအတပီၢ်ယၢ်လီၤအသး လၢတၢ်အိၣ်ဖှိၣ်အပူၤန့ၣ် ပှၤတဂၤအံၤ အဒိအတဲာ် လၢအတဂ့ၤဘၣ်အဃိ ပှၤဂၤစ့ၢ်ကီး မၤကမၣ်ဘၣ်တၢ် ဒ်သိးဒီးအီၤသ့. (ကလၤတံ ၅:၉) တကးဒံးဘၣ် အတၢ်ကမၣ် ဒိၣ်ထဲလဲၣ်န့ၣ် ဘၣ်သ့ၣ်သ့ၣ် အတသ့ၣ်ညါလီၤအသးဘၣ်. ဒီးအကဆိကမိၣ်ဘၣ်ဝဲလၢ ဒ်သိးအကန့ၢ်ဘၣ်ကဒါက့ၤ ယဟိဝၤယွၤ အတၢ်ဘၣ်သးအဂီၢ် တလိၣ်ဆီတလဲ အတၢ်ထံၣ် ဒီးအတၢ်မၤဘၣ်. (စံၣ်တဲၤတဲလီၤတၢ် ၈:၁၁) ဖဲတၢ်အိၣ်ဖှိၣ်သးပှၢ်တဖၣ် ကဆၢတဲာ်ဝဲလၢ ပှၤတဂၤ ကဘၣ်တၢ်နီဟးထီၣ်ကွံာ်အီၤ လၢတၢ်အိၣ်ဖှိၣ်ပူၤအခါ ပနာ်သ့သပှၢ်ကတၢၢ်လၢ အဝဲသ့ၣ် ကမၤဝဲ လီၤတံၢ်လီၤဆဲးလီၤ. ဒ်စံၣ်ညီၣ်ကွီၢ်လၢ ပှၤအံၣ်စရ့လးဖိလၢပျၢၤတဖၣ် မၤဝဲအသိး တၢ်အိၣ်ဖှိၣ်သးပှၢ်တဖၣ်န့ၣ် သ့ၣ်ညါဝဲလၢ အဝဲသ့ၣ်တ “စံၣ်ညီၣ်တၢ်လၢ ပှၤကညီအဂီၢ်” ဘၣ် အဝဲသ့ၣ် စံၣ်ညီၣ်တၢ်လၢ “ယွၤအဂီၢ်” လီၤ.—၂ ကွဲးနီၣ်တၢ် ၁၉:၆, ၇.
ပမ့ၢ်နာ်န့ၢ် ယဟိဝၤယွၤခဲအံၤန့ၣ် ကမၤစၢၤပှၤလၢ ခါဆူညါစ့ၢ်ကီး ပကနာ်န့ၢ်အီၤ
တၢ်မနုၤကမၤစၢၤပှၤ ဒ်သိးပကနာ် ဒီးဒိကနၣ် တၢ်ဟံးစုနဲၣ်ကျဲ လၢပကဒိးန့ၢ်ဘၣ်အီၤ ဖဲတၢ်နးတၢ်ဖှီၣ်ဖးဒိၣ် အဆၢကတီၢ်လဲၣ် (ကွၢ်လံာ်အဆၢ ၁၅)
၁၅. ဆၢကတီၢ်ခဲအံၤ ဘၣ်မနုၤအဃိ ပကဘၣ်နာ်န့ၢ် ယဟိဝၤယွၤ အတၢ်ဟံးစုနဲၣ်ကျဲ အါန့ၢ်ဒံးလၢညါလဲၣ်.
၁၅ ဒ်တၢ်အကတၢၢ် ဘူးထီၣ်ဝဲအသိး ပကဘၣ်နာ်န့ၢ် ယဟိဝၤယွၤ အတၢ်ရဲၣ်တၢ်ကျဲၤ အါန့ၢ်ဒံးလၢညါ. ဘၣ်မနုၤအဃိလဲၣ်န့ၣ် ဖဲတၢ်နးတၢ်ဖှီၣ်ဖးဒိၣ် အဆၢကတီၢ် ဘၣ်သ့ၣ်သ့ၣ် ပကဒိးန့ၢ်ဘၣ် တၢ်ဟံးစုနဲၣ်ကျဲလၢ အဖျါလီၤဆီဘၣ်ပှၤ, အတကဲဘျုးဘၣ်ပှၤဘၣ် မ့တမ့ၢ် ပနၢ်ပၢၢ်အီၤတသ့ဘၣ်. တမ့ၢ်လၢ ယဟိဝၤယွၤ ကတဲတၢ်ဒီးပှၤလၢ အနီၢ်ကစၢ်ဘၣ်, ဘၣ်ဆၣ် အဝဲကဟံးစုနဲၣ်ကျဲပှၤ ခီဖျိ ပှၤလၢအဃုထၢထီၣ်ဝဲတဖၣ် တဆီလီၤ. ဖဲတၢ်နးတၢ်ဖှီၣ်ဖးဒိၣ် အဆၢကတီၢ် ပမ့ၢ်ဒိးန့ၢ်ဘၣ် တၢ်ဟံးစုနဲၣ်ကျဲန့ၣ် ပတကြၢး သးဒ့ဒီဘၣ်. ဒီးပတကြၢး ဆိကမိၣ်လၢ ‘မ့ၢ်အဝဲသ့ၣ် အတၢ်ဟံးစုနဲၣ်ကျဲန့ၣ် အဟဲလၢ ယဟိဝၤယွၤအအိၣ် နီၢ်ကီၢ်ဧါ ဒီးအဝဲသ့ၣ် မၤဝဲဒ် အနီၢ်ကစၢ်တၢ်ထံၣ် အသိးဧါ’ န့ၣ်ဘၣ်. ဖဲန့ၣ်အဆၢကတီၢ် မ့ၢ်ဝဲတၢ်ဆၢကတီၢ်လၢ အရ့ဒိၣ်ဒိၣ်မးအဃိ မ့ၢ်နကနာ်န့ၢ် ယဟိဝၤယွၤ ဒီးအတၢ်ကရၢကရိဧါ. ဘၣ်ဃးဒီးတၢ်ဂ့ၢ်အံၤန့ၣ် ဒ်သိး နကသ့ၣ်ညါလီၤနသးအဂီၢ် နကဘၣ်သံကွၢ်လီၤနသးလၢ ဆၢကတီၢ်ခဲအံၤ မ့ၢ်နနာ်န့ၢ် ပှၤလၢယဟိဝၤယွၤ ဃုထၢထီၣ်ဝဲတဖၣ်ဧါ. ဆၢကတီၢ်ခဲအံၤ ပမ့ၢ်နာ်န့ၢ် တၢ်ဟံးစုနဲၣ်ကျဲ ဒီးသးအိၣ်မၤထွဲအီၤန့ၣ် ဖဲတၢ်နးတၢ်ဖှီၣ်ဖးဒိၣ် အဆၢကတီၢ်စ့ၢ်ကီး ကညီလၢ ပကမၤထွဲ တၢ်ဟံးစုနဲၣ်ကျဲလီၤ.—လူၤကၣ် ၁၆:၁၀.
၁၆. ခါဆူညါန့ၣ် ပတၢ်နာ်န့ၢ် ယဟိဝၤယွၤ အတၢ်စံၣ်ညီၣ် ကဘၣ်တၢ်မၤကွၢ်အီၤဒ်လဲၣ်.
၁၆ ဖဲယဟိဝၤယွၤ စံၣ်ညီၣ်တၢ်လၢ တၢ်အကတၢၢ်အဆၢကတီၢ်အခါ ပတၢ်ပာ်သူၣ်ပာ်သးလၢ တၢ်စံၣ်ညီၣ်အဖီခိၣ် ကအိၣ်ဒ်လဲၣ်န့ၣ် ပကဘၣ် ဆိကမိၣ်ထံပာ်စၢၤအီၤ လီၤတံၢ်လီၤဆဲးလီၤ. တချုးလၢ တၢ်အကတၢၢ်ဟဲဒံးဘၣ်န့ၣ် ပမုၢ်လၢ်လၢ ပှၤအါဂၤလၢ အတဘူၣ်ထီၣ်ဘါထီၣ် ယဟိဝၤယွၤဒံးဘၣ် ဒီးပဘူးပတံၢ်တဖၣ် ကဘူၣ်ထီၣ်ဘါထီၣ် ယဟိဝၤယွၤလီၤ. ဘၣ်ဆၣ် ဖဲအၢ်မက့းဒိၣ်န့ၣ် ယဟိဝၤယွၤ ကမၢယ့ၣ်ၡူး မၤတၢ်ဆၢတဲာ် အလီၢ်ခံကတၢၢ် လၢအဝဲသ့ၣ်အဂီၢ်လီၤ. (မးသဲ ၂၅:၃၁-၃၃; ၂ သ့းစၤလနံ ၁:၇-၉) မတဂၤ ကဒိးန့ၢ်ဘၣ် ယဟိဝၤယွၤ အတၢ်သးကညီၤလဲၣ်န့ၣ် ပဆၢတဲာ်န့ၢ်အီၤ တသ့ဘၣ်. (မးသဲ ၂၅:၃၄, ၄၁, ၄၆) ဖဲန့ၣ်အဆၢကတီၢ် မ့ၢ်ပတူၢ်လိာ် ယဟိဝၤယွၤ အတၢ်စံၣ်ညီၣ် ကကဲဧါ မ့တမ့ၢ် ပတတူၢ်လိာ် အတၢ်စံၣ်ညီၣ်ဘၣ်ဧါ. ခဲအံၤန့ၣ် ပကဘၣ်မၤဂၢၢ်ကျၢၤထီၣ် ပတၢ်နာ်န့ၢ်ယဟိဝၤယွၤ ဒ်သိး ခါဆူညါ ပကနာ်န့ၢ်အီၤ လၢလၢပှဲၤပှဲၤအဂီၢ်လီၤ.
၁၇. ခီဖျိလၢ ယဟိဝၤယွၤ ကစံၣ်ညီၣ်တၢ်ဖဲ တၢ်အကတၢၢ်အဆၢကတီၢ်အဃိ ပကဒိးန့ၢ်ဘၣ် အဘျုးဒ်လဲၣ်.
၁၇ ခီဖျိလၢ ယဟိဝၤယွၤ အတၢ်စံၣ်ညီၣ်အဃိ လၢဟီၣ်ခိၣ်သီပူၤန့ၣ် တၢ်ကမၤအသးဒ်လဲၣ်. တၢ်ဘူၣ်တၢ်ဘါလၢ အကမၣ်တဖၣ် တအိၣ်လၢၤဘၣ်, ပှၤမၤစံပွါယ့လၢ အသူၣ်လီသးကွံတၢ် အါတလၢ ဒီးပဒိၣ်ပပှၢ်လၢ အမၤနၢၤအီၣ်ဃီၣ် ပှၤဟီၣ်ခိၣ်ဖိ ဒီးအဒုးအိၣ်ထီၣ် တၢ်ကီတၢ်ခဲလၢ ပဂံၢ်ထီၣ်ဒွးထီၣ်အီၤ တသ့ဘၣ်တဖၣ်န့ၣ် တအိၣ်လၢၤဘၣ်. တၢ်ဆိးက့ဆါဘှီ ဒီးတၢ်သးပှၢ်ထီၣ် တအိၣ်လၢၤဘၣ်, ဒီးပှၤလၢပအဲၣ်ဘၣ်အီၤတဖၣ်န့ၣ် တသံလၢၤဘၣ်. လၢအနံၣ်တကထိအတီၢ်ပူၤန့ၣ် မုၣ်ကီၤလံၢ် ဒီးအတၢ်ဝံတၢ်နါတဖၣ် မၤဘၣ်ဒိ ပှၤဟီၣ်ခိၣ်ဖိတသ့ဘၣ်. ဒီးတၢ်အၢတၢ်သီလၢ အဟဲကဲထီၣ်အသး ခီဖျိလၢ အဝဲသ့ၣ် ပူထီၣ်ထီဒါတၢ်အဃိန့ၣ် တအိၣ်လၢၤဘၣ်. (လီၣ်ဖျါ ၂၀:၂, ၃) မ့ၢ်လၢ ပနာ်န့ၢ် ယဟိဝၤယွၤ အတၢ်ရဲၣ်တၢ်ကျဲၤအဃိ ဖဲန့ၣ်အဆၢကတီၢ် ပကအိၣ်ဒီး တၢ်သးခုဒိၣ်မး.
၁၈. ဖဲ ၄ မိၤၡ့ ၁၁:၄-၆; ၂၁:၅ န့ၣ်ပမၤလိန့ၢ်ဘၣ် တၢ်မနုၤလၢ ပှၤအံၣ်စရ့လးဖိတဖၣ် အအိၣ်လဲၣ်.
၁၈ လၢဟီၣ်ခိၣ်သီပူၤန့ၣ် ဘၣ်သ့ၣ်သ့ၣ် ပတၢ်နာ်န့ၢ် ယဟိဝၤယွၤ အတၢ်ရဲၣ်တၢ်ကျဲၤ ကဘၣ်တၢ်မၤကွၢ်အီၤ. အဒိ, ပကဆိကမိၣ်ကွၢ် ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအပူၤ ဝံၤအလီၢ်ခံ တယံာ်ဘၣ်န့ၣ် တၢ်ကဲထီၣ်အသးဒီး အဝဲသ့ၣ်ဒ်လဲၣ်. ပှၤအံၣ်စရ့လးဖိတနီၤန့ၣ် အဲၣ်ဒိးအီၣ်ဝဲ တၢ်အီၣ်တၢ်အီလၢ အအီၣ်ညီနုၢ်ဝဲလၢ ကီၢ်အဲၤကူပတူးအပူၤ အဃိ စးထီၣ်ကဒူးကဒ့ၣ်တၢ် ဒီးအဝဲသ့ၣ် တသးမံဒီး ကိၣ်မၤနၤလၢ ယဟိဝၤယွၤ ဟ့ၣ်ဒုးအီၣ်အဝဲသ့ၣ်ဘၣ်. (ဖး ၄ မိၤၡ့ ၁၁:၄-၆; ၂၁:၅.) ဖဲတၢ်နးတၢ်ဖှီၣ်ဖးဒိၣ်အလီၢ်ခံ မ့ၢ်ပကလီၤဂာ်ဒီး အဝဲသ့ၣ်ဧါ. ဒ်သိး ဟီၣ်ခိၣ်ကကဆှီထီၣ် ဒီးကကဲထီၣ် ပၤရဒံစူးအဂီၢ် ပကဘၣ်မၤတၢ် ထဲလဲၣ်န့ၣ် ပတသ့ၣ်ညါဘၣ်. ဘၣ်သ့ၣ်သ့ၣ် ပကဘၣ်မၤတၢ်ဒီဒူၣ် ဒီးလၢအခီၣ်ထံးခါန့ၣ် တမ့ၢ်ကညီလၢပဂီၢ်ဘၣ်. ဖဲန့ၣ်အခါ ဘၣ်ဃးဒီး တၢ်လၢယဟိဝၤယွၤ ကဟ့ၣ်လီၤပှၤန့ၣ် မ့ၢ်ပကကဒူးကဒ့ၣ်အီၤဧါ. ခဲအံၤပမ့ၢ်ပာ်လုၢ်ပာ်ပှ့ၤ တၢ်လၢယဟိဝၤယွၤ ဟ့ၣ်လီၤပှၤန့ၣ် ခါဆူညါ တၢ်လၢယဟိဝၤယွၤ ကမၤန့ၢ်ပှၤန့ၣ် ပကပာ်လုၢ်ပာ်ပှ့ၤအီၤစ့ၢ်ကီးလီၤ.
၁၉. တဲဖျါထီၣ် တၢ်ဂ့ၢ်အရ့ဒိၣ်တဖၣ်လၢ နမၤလိဘၣ်အီၤလၢ တၢ်မၤလိအံၤအပူၤတက့ၢ်.
၁၉ ပကဘၣ်နာ်လၢ ယဟိဝၤယွၤ အတၢ်ဟံးစုနဲၣ်ကျဲန့ၣ် ဘၣ်ဝဲထီဘိ. ပကဘၣ်နာ်စ့ၢ်ကီး ပှၤလၢယဟိဝၤယွၤ ဃုထၢထီၣ်အီၤလၢ ကတီခိၣ်ရိၤမဲတၢ်တဖၣ် သပှၢ်ကတၢၢ်. အဃိ ပကဘၣ်သ့ၣ်နီၣ်ထီၣ် တၢ်လၢယဟိဝၤယွၤတဲဝဲ ဝံယၡါယၤ. ယဟိဝၤယွၤတဲ ဝံယၡါယၤလၢ “လၢသုအိၣ်ဃိကလာ်, ဒီးသန့ၤသုသးန့ၣ် မ့ၢ်သုဂံၢ်သုဘါလီၤ.”—ယၡါယၤ ၃၀:၁၅.
တၢ်သးဝံၣ် ၉၈ လံာ်စီဆှံ—ဘၣ်တၢ်ကွဲးအီၤလၢသးစီဆှံ
a တၢ်မၤလိအံၤ ကမၤစၢၤပှၤလၢ ပကမၤဂၢၢ်ကျၢၤထီၣ် ပတၢ်နာ်န့ၢ် ယဟိဝၤယွၤ ဒီးပှၤလၢအဃုထၢထီၣ်ဝဲလၢ ကတီခိၣ်ရိၤမဲတၢ်တဖၣ်. ဒီးပကမၤလိဘၣ်လၢ ပမ့ၢ်မၤဒ်န့ၣ်န့ၣ် အကမၤစၢၤပှၤလၢ ဆၢကတီၢ်ခဲအံၤ တကးဒံးဘၣ် ကမၤစၢၤပှၤလၢ ပကအိၣ်ကတဲာ်ကတီၤပသးလၢ ခါဆူညါအဂီၢ် စ့ၢ်ကီး.
b တဘျီတခီၣ် ပှၤတနီၤနီၤ မ့တမ့ၢ် ဟံၣ်ဖိဃီဖိ တနီၤနီၤန့ၣ် အိၣ်ဒီးတၢ်အိၣ်သးအကီအခဲ ဖးဒိၣ်လၢ ကသုးတၢ်အိၣ်ဖှိၣ်အဃိ အဝဲသ့ၣ် ဆဲးအိၣ်လၢ တၢ်အိၣ်ဖှိၣ်အလီၢ်လီၢ်သ့လီၤ. ကွၢ် Our Kingdom Ministry, November 2002, “Question Box.”