တၢ်သးခုကစီၣ်န့ၣ် မ့ၢ်မနုၤလဲၣ်

၁. တၢ်သးခုကစီၣ်လၢယွၤအိၣ်န့ၣ် မ့ၢ်မနုၤလဲၣ်.

ကစၢ်ယွၤအဲၣ်ဒိးလၢ ပှၤဟီၣ်ခိၣ်ဖိတဖၣ် ကအိၣ်မူဘၣ်ဝဲလၢဟီၣ်ခိၣ်ချၢ ပှဲၤဒီးတၢ်သူၣ်ဖှံသးညီလီၤ. ကစၢ်အဲၣ်ပှၤဟီၣ်ခိၣ်ဖိအဃိ တ့လီၤဝဲဟီၣ်ခိၣ်ဒီး တၢ်အိၣ်လၢ ဟီၣ်ခိၣ်ချၢကိးမံၤဒဲးလီၤ. တယံာ်လၢၤဘၣ်ဒီး ကစၢ်ယွၤ ကမၤဂ့ၤထီၣ်က့ၤဟီၣ်ခိၣ် အတၢ်အိၣ်အသးတဖၣ်လီၤ. တၢ်လၢအဒုးအိၣ်ထီၣ် တၢ်နးတၢ်ဖှီၣ်လၢပှၤဟီၣ်ခိၣ်ဖိအဂီၢ်န့ၣ် ကစၢ်ယွၤကမၤလီၤမၢ်ကွံာ်ဝဲလီၤ.—ဖး ယံးရမံယၤ ၂၉:၁၁ တက့ၢ်.

ဘၣ်ဃးဒီး တၢ်မၤဆူၣ်မၤစိး, တၢ်ဆူးတၢ်ဆါ, မ့တမ့ၢ်တၢ်သံန့ၣ် တၢ်ပၢတၢ်ပြးတခါဂ့ၤတခါဂ့ၤ မၤဟါမၢ်ကွံာ်ဝဲတန့ၢ်ဘၣ်. ဘၣ်ဆၣ် တၢ်သးခုကစီၣ်အိၣ်ဝဲလီၤ. တယံာ်လၢၤဘၣ် ကစၢ်ယွၤကမၤဟါမၢ်ကွံာ် ပှၤဟီၣ်ခိၣ်ဖိအတၢ်ပၢတၢ်ပြးခဲလၢာ် ဒီးကပာ်လီၤအတၢ်ပၢတၢ်ပြးလၢ ပှၤဟီၣ်ခိၣ်ဖိတဖၣ်အဂီၢ်လီၤ. တၢ်ပၢအံၤကဒုးအိၣ်ထီၣ် တၢ်မုာ်တၢ်ခုၣ် ဒီးတၢ်အိၣ်ဆူၣ်အိၣ်ချ့လၢအဂ့ၤလီၤ.—ဖး ယၡါယၤ ၂၅:၈; ၃၃:၂၄; ဒၤနံးယ့လး ၂:၄၄ တက့ၢ်.

၂. ဘၣ်မနုၤအဃိ တၢ်သးခုကစီၣ်န့ၣ် အရ့ဒိၣ်လၢ မုၢ်မဆါတနံၤအံၤလဲၣ်.

ကစၢ်ယွၤမ့ၢ်သုးကွံာ် ပှၤအၢပှၤသီလၢဟီၣ်ခိၣ်ချၢန့ၣ် တၢ်နးတၢ်ဖှီၣ် ကကတၢၢ်ကွံာ်ဝဲလီၤ. (စဖါနယၤ ၂:၃) ကစၢ်ယွၤကမၤဝဲ ဆံးယံာ်လဲၣ်. ပစိၤခဲအံၤ ဟီၣ်ခိၣ်အတၢ်အိၣ်အသးလၢ အမၤပျံၤမၤဖုး ပှၤဟီၣ်ခိၣ်ဖိတဖၣ်န့ၣ် ယွၤအကလုၢ်ကထါ တဲဆိပာ်ဝဲလီၤ. ဆၢကတီၢ်ခဲအံၤတၢ်မၤအသးတဖၣ်န့ၣ် ပာ်ဖျါထီၣ်ဝဲလၢ ယွၤကစံၣ်ညီၣ်တၢ်အဆၢကတီၢ် ဘူးထီၣ်လံလီၤ.—ဖး ၂ တံၤမသ့း ၃:၁-၅ တက့ၢ်.

၃. ပကြၢးမၤတၢ်မနုၤလဲၣ်.

ပကြၢးမၤလိ ယွၤအဂ့ၢ်လၢ အကလုၢ်ကထါလံာ်စီဆှံအပူၤလီၤ. တၢ်အံၤလီၤဂာ်ဒ် လံာ်တဘ့ၣ်လၢ ဟဲလၢ ပၢ်လၢအိၣ်ဒီးတၢ်အဲၣ်တၢ်ကွံတဂၤအအိၣ်လီၤ. လံာ်အံၤပာ်ဖျါထီၣ်န့ၢ်ပှၤလၢ ခဲအံၤပကဒိးန့ၢ်ဘၣ် တၢ်အိၣ်မူလၢအဂ့ၤဒ်လဲၣ် ဒီးခါဆူညါ ပကဒိးန့ၢ်ဘၣ် တၢ်မူအထူအယိာ်လၢ ဟီၣ်ခိၣ်ချၢဒ်လဲၣ်န့ၣ်လီၤ. နီၢ်နီၢ် နမ့ၢ်မၤလိလံာ်စီဆှံန့ၣ် ပှၤတနီၤနီၤတဘၣ်အသးဘၣ်. ဘၣ်ဆၣ် ကစၢ်ယွၤအၢၣ်လီၤပာ်စၢၤပှၤလၢ ပအိၣ်ဒီးတၢ်ခွဲးတၢ်ယာ်လၢပကဒိးန့ၢ်ဘၣ် တၢ်အိၣ်မူလၢအဂ့ၤအဃိ ပတဟ့ၣ်အခွဲးလၢ ပှၤဂၤတဖၣ်ကမၤပတုာ်ကွံာ် ပတၢ်မၤလိလံာ်စီဆှံအံၤဘၣ်.—ဖး ကတိၤဒိ ၂၉:၂၅; လီၣ်ဖျါ ၁၄:၆, ၇.