တၢ်ပှ့ၤဒိၣ်ထီၣ်အဃိ ပကြၢးမၤဒ်လဲၣ်
နာ်လၢ တၢ်အိၣ်သး ကဂ့ၤထီၣ်က့ၤ
လၢနအိၣ်တၢ်လီၢ်န့ၣ် တၢ်ပှ့ၤဒိၣ်ထီၣ် ဘၣ်ဆၣ် နတၢ်ဟဲနုာ် အိၣ်ဒ်လၢညါ အသိးဧါ. နဘၣ်ယိၣ်တၢ်လၢ နကလုၢ်အီၣ်လုၢ်အီ နနီၢ်ကစၢ် ဒီးနဟံၣ်ဖိဃီဖိ အဂီၢ်ဧါ. နမ့ၢ်ထံၣ်ဘၣ် တၢ်အိၣ်သးဒ်အံၤန့ၣ် ဘၣ်သ့ၣ်သ့ၣ် နကဘၣ်ယိၣ်တၢ် လၢခါဆူညါအဂီၢ်. ပတၢ်အိၣ်သး မ့ၢ်ကီခဲ ထဲလဲၣ်သနာ်က့ ပမ့ၢ်နာ်လၢ ပတၢ်အိၣ်သး ကဂ့ၤထီၣ်က့ၤန့ၣ် ကကဲဘျုးလၢ ပဂီၢ်ဒိၣ်မး.
ဘၣ်မနုၤအဃိ ပဘၣ်နာ်လၢ တၢ်အိၣ်သး ကဂ့ၤထီၣ်က့ၤလဲၣ်
ပှၤလၢအနာ်လၢ အတၢ်အိၣ်သး ကဂ့ၤထီၣ်က့ၤန့ၣ် အတမုၢ်လၢ်ထဲလၢ တၢ်ကကဲထီၣ်သး လၢအဂ့ၤလဲလဲဘၣ်. ခဲအံၤ အမ့ၢ်ထံၣ်ဘၣ် တၢ်အိၣ်သးကီခဲ သနာ်က့ အဂုာ်ကျဲးစၢး အဂ့ၤကတၢၢ် ဒ်သိး အကမၤဂ့ၤထီၣ် အတၢ်အိၣ်သး တမံၤမံၤ. အဒိ ပှၤဃုသ့ၣ်ညါတၢ် ပာ်ဖျါထီၣ်ဝဲလၢ ပှၤလၢအနာ်လၢ တၢ်အိၣ်သး ကဂ့ၤထီၣ်က့ၤန့ၣ် . . .
အဝဲသ့ၣ် လဲၤခီဖျိ တၢ်ကီတၢ်ခဲဒူဒူ
အဝဲသ့ၣ် ဆီတလဲအသး ဒ်တၢ်အိၣ်သး အိၣ်ဝဲအသိး
အဝဲသ့ၣ် ဆၢတဲာ်တၢ်လၢ အကဲဘျုးလၢ အတၢ်အိၣ်မူ ဒီးလၢအတၢ်အိၣ်ဆူၣ်အိၣ်ချ့အဂီၢ်
နမၤမနုၤသ့လဲၣ်
တၢ, ဆိကမိၣ်ကွၢ် ဆၢကတီၢ်ခဲအံၤန့ၣ် လံာ်စီဆှံ မၤစၢၤနၤသ့. တၢ်ပှ့ၤမ့ၢ်ဒိၣ်ထီၣ် သနာ်က့ နလဲၤခီဖျိအီၤ ကန့ၢ်အဂီၢ် လံာ်စီဆှံ အိၣ်ဒီးတၢ်ဟ့ၣ်ကူၣ်အါမး လၢအမၤစၢၤနၤသ့. လံာ်စီဆှံ မၤစၢၤနၤလၢ နကအိၣ်ဒီး တၢ်မုၢ်လၢ် အဃိ ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ နမ့ၢ်ထံၣ်ဘၣ် တၢ်အိၣ်သးကီခဲ ဘၣ်ဆၣ် တၢ်လၢနမၤသ့န့ၣ် အိၣ်ဝဲ.
ခံ, ဆိကမိၣ်ကွၢ် ဘၣ်ဃးဒီး လံာ်စီဆှံ အတၢ်အၢၣ်လီၤလၢ ခါဆူညါ. ဖဲနသ့ၣ်ညါထီၣ်လၢ လံာ်စီဆှံန့ၣ် အိၣ်ဒီးတၢ်ဟ့ၣ်ကူၣ်လၢ အကဲဘျုးအခါ နကအဲၣ်ဒိး မၤလိအါထီၣ် ဘၣ်ဃးဒီး တၢ်အၢၣ်လီၤလၢ ခါဆူညါအဂီၢ်. အဒိ လံာ်စီဆှံ တဲဝဲလၢ ကစၢ်ယွၤ အဲၣ်ဒိးဝဲလၢ နကအိၣ်ဒီး “တၢ်အိၣ်မူလၢ အဂ့ၤလၢ ခါဆူညါ.” (ယံးရမံယၤ ၂၉:၁၁) တကးဒံးဘၣ် လံာ်စီဆှံ တဲစ့ၢ်ကီးဝဲ ဘၣ်ဃးဒီး ကစၢ်ယွၤ အဘီအမုၢ်အဂ့ၢ်. ဒီးကစၢ်ယွၤ ကသူဝဲအဘီမုၢ်အံၤ ဒ်သိး အကမၤလၢပှဲၤထီၣ် အတၢ်အၢၣ်လီၤ လၢခါဆူညါနီၢ်ကီၢ်.
ကစၢ်ယွၤ အဘီအမုၢ်န့ၣ် မ့ၢ်တၢ်မနုၤလဲၣ် ဒီးအကမၤလၢထီၣ်ပှဲၤထီၣ်ဝဲ တၢ်မနုၤလဲၣ်
ကစၢ်ယွၤ အဘီအမုၢ်န့ၣ် မ့ၢ်ဝဲ တၢ်ပၢတၢ်ပြး တခါလၢမူခိၣ် ဒီးကပၢဝဲ ဟီၣ်ခိၣ်ဒီဘ့ၣ်. (ဒၤနံးယ့လး ၂:၄၄; မးသဲ ၆:၁၀) ဖဲဘီမုၢ်အံၤ ပၢဟီၣ်ခိၣ်အခါ ပှၤဟီၣ်ခိၣ်ဖိ တထံၣ်ဘၣ် တၢ်ကီတၢ်ခဲ ဒီးတၢ်ဖှီၣ်တၢ်ယာ် လၢၤဘၣ်. တကးဒံးဘၣ် ပှၤဟီၣ်ခိၣ်ဖိ ကအိၣ်ဘၣ် မုာ်မုာ်ခုၣ်ခုၣ် ဒီးတၢ်လၢ အဝဲသ့ၣ်လိၣ်ဘၣ် တမံၤဂ့ၤ တမံၤဂ့ၤန့ၣ် ကဒိးန့ၢ်ဘၣ်ဝဲ ဒ်လံာ်စီဆှံ အဆၢတဖၣ်အံၤ ပာ်ဖျါဝဲအသိး.
ပှၤလၢအကကွဲၢ်တဖၣ် နာ်ဝဲ လံာ်စီဆှံ အတၢ်အၢၣ်လီၤတဖၣ်အံၤ. ဒီးအဝဲသ့ၣ် သ့ၣ်ညါဝဲလၢ ကစၢ်ယွၤန့ၣ် အ “လံၣ်တၢ်လီတၢ် တသ့ဘၣ်.” (တံတူး ၁:၂) အဃိ ပဟ့ၣ်ဂံၢ်ဟ့ၣ်ဘါနၤလၢ နကဃုသ့ၣ်ညါ တၢ်ဂ့ၢ်လၢ လံာ်စီဆှံတဲဝဲ လၢနနီၢ်ကစၢ်. ဒီးတၢ်မုၢ်လၢ်လၢ လံာ်စီဆှံ ပာ်ဖျါထီၣ်ဝဲန့ၣ် ကမၤစၢၤနၤလၢ နလဲၤခီဖျိ တၢ်ကီတၢ်ခဲကန့ၢ် ဒီးနကနာ် သပှၢ်တၢၢ်လၢ ခါဆူညါန့ၣ် တၢ်အိၣ်သး ကဂ့ၤထီၣ်က့ၤ.