တၢ်မၤလိ ၈၁
တၢ်စံၣ်တဲၤတဲလီၤတၢ်လၢ ကစၢၢ်ဒီခိၣ်
ဖဲယ့ၣ်ၡူး ဃုထၢထီၣ် အတၢ်မၢဖိ ၁၂ ဂၤ ဝံၤအလီၢ်ခံ အဟဲက့ၤလီၤဝဲလၢ ကစၢၢ်အခီၣ်ထံး ဖဲပှၤဂီၢ်မုၢ် အိၣ်ဖှိၣ်ဝဲအလီၢ်. ပှၤဂီၢ်မုၢ်တဖၣ်အံၤ အိၣ်ဟဲလၢ ကီၢ်ကၤလံၤလါ, ယူဒၤ, စိၢ်, စံဒိၣ်, ကီၢ်စူၤရံ ဒီးလၢယၢ်ဒ့ၣ်ဝၢ်ဘးခီ. အဝဲသ့ၣ်ဟဲစိာ်ဝဲ ပှၤဆူးပှၤဆါ ဒီးပှၤလၢတၢ်နါ အိၣ်လၢအလိၤ. ဒီးယ့ၣ်ၡူး မၤဘျါက့ၤ အဝဲသ့ၣ်ခဲလၢာ်. ဝံၤဒီး ယ့ၣ်ၡူးဆ့ၣ်နီၤလၢ ကစၢၢ်ဒီခိၣ် ဒီးစးထီၣ်စံၣ်တဲၤတဲလီၤတၢ်. ယ့ၣ်ၡူး တဲနၢ်ပၢၢ်ဝဲလၢ ပမ့ၢ်အဲၣ်ဒိးကဲထီၣ် ကစၢ်ယွၤ အသကိးန့ၣ် ပကဘၣ်မၤ မနုၤလဲၣ်. ပကဘၣ် သ့ၣ်ညါလၢ ပလိၣ်ဘၣ် ယဟိဝၤယွၤ လၢပတၢ်အိၣ်မူအပူၤ ဒီးပကဘၣ်အဲၣ်အီၤ. ဘၣ်ဆၣ် ပမ့ၢ်တအဲၣ် ပှၤလၢပဃၢၤဘၣ်န့ၣ် ပအဲၣ်ကစၢ်ယွၤ တသ့စ့ၢ်ကီးဘၣ်. ပကဘၣ် မၤဂ့ၤတၢ်လၢ လၢပှၤခဲလၢာ်အဖီခိၣ် ဃုာ်ဒီး ပဒုၣ်ပဒါစ့ၢ်ကီး.
ယ့ၣ်ၡူး တဲဝဲလၢ ‘ပတဘၣ်အဲၣ်ထဲ ပတံၤသကိးတဖၣ်ဘၣ်. ပကဘၣ်အဲၣ်စ့ၢ်ကီး ပဒုၣ်ပဒါ ဒီးပျၢ်ကွံာ်ပှၤဂၤအတၢ်ကမၣ် လၢပသးဒီဖျၢၣ်ညါ. ပှၤတဂၤဂၤ မ့ၢ်သးထီၣ်နၤန့ၣ် လဲၤလၢအအိၣ် တဘျီဃီ ဒီးဃ့ပျၢ်နတၢ်ကမၣ်. ဒီးနမ့ၢ်အဲၣ်ဒိးလၢ ပှၤကရ့နၤလၢ တၢ်အဲၣ်တၢ်ကွံန့ၣ် နကဘၣ် ရ့ဒီးအီၤဒ်န့ၣ်စ့ၢ်ကီး.’
ယ့ၣ်ၡူး ဟ့ၣ်ကူၣ်စ့ၢ်ကီး ပှၤဂီၢ်မုၢ် ဘၣ်ဃးဒီး ကျိၣ်စ့ဒီးတၢ်ထူးတၢ်တီၤ. ယ့ၣ်ၡူး တဲဝဲလၢ ‘နတၢ်ရ့လိာ်သးဒီး ယဟိဝၤယွၤန့ၣ် အရ့ဒိၣ်န့ၢ်ဒံးကျိၣ်စ့. နစ့န့ၣ် ပှၤဟုၣ်ဝဲသ့. မ့မ့ၢ် နတၢ်ရ့လိာ်သးဒီး ယဟိဝၤယွၤန့ၣ် ပှၤဟုၣ်ဝဲ တသ့နီတဂၤဘၣ်. နကအီၣ်ဘၣ်အီဘၣ် ဒီးနကကူကကၤဘၣ် ဒ်လဲၣ်ဒ်လဲၣ်န့ၣ် တဘၣ်သူၣ်ကိၢ်သးဂီၤတဂ့ၤ. ကွၢ်ထိၣ်တဖၣ်, ကစၢ်ယွၤ လုၢ်အီၣ်လုၢ်အီ အဝဲသ့ၣ် လၢလၢပှဲၤပှဲၤ. နမ့ၢ်သူၣ်ကိၢ်သးဂီၤတၢ် သနာ်က့ နတၢ်အိၣ်မူ တထီထီၣ်ဘၣ်. ဒီးသ့ၣ်နီၣ်ထီၣ်လၢ ယဟိဝၤယွၤ သ့ၣ်ညါတၢ်လၢ နလိၣ်ဘၣ်တဖၣ်.’
ပှၤဂီၢ်မုၢ်တဖၣ် တနၢ်ဟူဘၣ်ဝဲ ပှၤတဲတၢ် ဒ်သိးဒီးယ့ၣ်ၡူး နီတဂၤဘၣ်. အဝဲသ့ၣ် အတၢ်ဘူၣ်တၢ်ဘါ ခိၣ်နၢ်တဖၣ်န့ၣ် တသိၣ်လိ အဝဲသ့ၣ် ဘၣ်ဃးဒီး တၢ်ဂ့ၢ်တဖၣ်အံၤဘၣ်. ဘၣ်မနုၤအဃိ ယ့ၣ်ၡူးကဲသရၣ်လၢ အဂ့ၤတဂၤလဲၣ်. မ့ၢ်လၢ ကယဲၢ်တၢ်လၢ ယ့ၣ်ၡူးသိၣ်လိဝဲန့ၣ် ဟဲလၢယဟိဝၤယွၤအအိၣ်.
“ယိးထီၣ် ယနီၣ်ယိးဘိ ဒီးမၤလိတၢ်လၢ ယအိၣ်တက့ၢ်. မ့ၢ်လၢယသးစူၤ ဒီးယအိၣ်ဒီးတၢ်ဆီၣ်လီၤသးအဃိ သုကဒိးန့ၢ်ဘၣ် တၢ်ဂံၢ်တၢ်ဘါ.”—မးသဲ ၁၁:၂၉